16-10-22, 10:53 PM
| #181 | ||||
 
|  بارت ١٤ نزلت من باص الجامعه ودخلت وهي تدندن بهمس ...اشتاقت للمزرعه لما تتجول فيها وتغني بحريتها... تحس نفسها مكبوته هنا ...تبغى تغني وتركض وتطلع كل الكبت الي بداخلها ...بالرغم من كبر هالبيت الا انها تحس حريتها مقيده ... مطت شفتها وهي تناظر البيت من الخارج ...يمكن البعض يشوفها مجنونه لأنه بنظرها بيت جدها بالقرية أجمل وأريح من هذا البيت ... التفتت للخلف لما سمعت خطوات خلفها ... ابتسمت وهي تشوف حنان داخله خلفها ...وقفت بيلسان وهي تنطق بتساؤل: غريبه ما عندك دوام اليوم؟! حنان هزت رأسها: ايه عندي داومت ورجعت وقلت اجلس أسلم على جدي وجدتي بما إنه اهلي بالدوام وما في احد بالبيت!! بيلسان هزت رأسها: وإخوانك الي بالمدرسة ؟! حنان مطت شفتها بسخرية: وش اعمل لهم ؟! كل واحد طول الجدار يدبر نفسه بنفسه!! وانت وش فيك راجعه قاطعتها بيلسان: أنا دوم اكمل دوامي بهذا الوقت!! حنان بملل: أكره الدوام وضغط الدراسة ...يا حظك دراستك كلها عن البزران ما هي متعبه !! بيلسان خزتها: بزر بعينك...يمداك تحولين وتريحين رأسك!! ضحكت حنان بخفه: علشان الدكتور عبدالله يطلعني جنازة!! تدرين احمدي ربك إنه بابا ما هو أبوك...لو تكونين عنده اتوقع عندك إعاقة جسدية ونفسية وعقليه! تدرين أخوي جسار بالثانوية حصل على معدل ٩٤,٨ لو تشوفين وش عمل..قلب البيت فوق تحت...ولما طلعت القبولات طلع له هندسة مدنية وما عجب بابا التخصص وغصب عنه عاد جسار الثانوية وحصل على معدل ٩٤,٩ ختمت كلامها بضحكه ساخره! ابتسمت بيلسان على كلامها: يعني تعب مرة ثانية علشان عشر واحد!! حنان هزت كتوفها : ما ادري وش يصيبه بالامتحانات...مع إنه ذكي ما شاء الله..بس خلاص نصيبه كذا! بيلسان باندماج: ايه وبعدين وش صار عليه؟! حنان ابتسمت: اضطر أبوي يسفره لبرا يدرس طب والحمد لله الحين اجمل طبيب بالعالم!! خزتها بيلسان: مين يشهد للعروس أمها وخالتها وعشرة من حارتها! حنان ابتسمت: ليه أحسك حاقده على العيال؟! بيلسان بدأت تمشي: اقول تحركي حرقتني الشمس وانت واقفه تسولفين ... حنان وهي تمشي : تدرين وش يقولون عنك العيال؟! ناظرتها بيلسان وهي رافعه حاجب:ما يهمني رأيهم ؟! خزتها حنان: شفت انك حاقده عليهم!! يلا توقعي وش يقولون عنك ؟! بيلسان هزت كتوفها بلامبالاة: وش يعرفني!! حنان ناظرتها وهي تنطق بابتسامة: يقولون ما تشبهينا ..فرق بين البنات وبينك كل البنات بشرتهم بيضاء إلا أنت وقفت بيلسان ونطقت بسخريه: وش المطلوب مني اروح أدفن راسي بالطحين حتى اصير مثلكم يا فلة بياض الثلج؟! حنان خزتها: وانت ليه انفعلت كذا ..ترى ما كملت كلامي! قاطعتها بيلسان بحزم: ما ابغى اسمع الكلام وما يهمني الموضوع بكبره!! حنان قرصتها بخفه: وش فيك انفعلت ..لا تقولين زعلتي؟! بيلسان ناظرتها : وليه ازعل ؟! حنان ابتسمت لها: وربي إنك أحلى وحده فينا ...البارحة اقول لريناد ابغى غماز نفس الي بخدك لما تبتسمين احس كل العالم يبتسم من جمال هالابتسامه!! نفس الغماز الي بخد عمي وليد ...لو ربي يرزقني زوج بجمال عمي وليد يا حظي!! بيلسان ناظرتها باستغراب: صدق ما يملى عين ابن آدم غير التراب !! حنان مطت شفتها: صحيح إني بيضاء بس ملامح وجهي ما هي فاتنه.. عاديه قطعت كلامها واشرت على الحديقه بابتسامة عريضة وعيونها تشع فرح من شوفته: ناظري ناظري كنان هنا ! تعالي نروح نسلم عليه!! عقدت حواجبها وهي تحط علامات استفهام من ملامح حنان وكأنها شافت ملاك ...ناظرت بيلسان مكان ما اشرت حتى تشوف كنان الي واضح إنها معجبه فيه كثير ...حست قلبها توقف وهي تشوفه جالس وبيده كتاب يطالع فيه..رن الاسم بإذنها كنان كنان اسمه كنان! حنان وهي تسحب فيها: تعالي نروح نسلم عليه! بيلسان أبعدت يد حنان عنها بشويش..وهي تحس نفسها مبعثره: وش ابغى فيه حتى أسلم عليه! أنا رايحه أشوف إخواني ! كشت عليها حنان : غبيه! كتمت انفاسها وهي تناظر حنان لما تحركت ...حست الضيق تلبسها من تواجد حنان بالقرب منه ...نهرت نفسها وش علاقتها بالموضوع!! تحركت والضيق يتضاعف من نفسها ومن بنات القرية الي فتحوا رأسها على أمور هي بغنى عنها ... لزوم تشغل نفسها عن هذي الامور...توجهت للدور الثاني ...دخلت وهي تنادي على إخوانها ...دخلت غرفتهم وناظرت الحوسه الي عملوها وهم يتضاربون... اقتربت وهي تنطق بصوت مرتفع: رعد اتركه!! عبود خلاااص!! رفعت حاجب وهي تشوفهم ما عبروها ومشتبكين مع بعض .... طلعت من الغرفه تشوف لجين ....فتحت غرفتها وشافتها تغط بالنوم بملابس المدرسه ..اقتربت منها غطتها وطلعت من الغرفه ..قررت تبدل وتصلي وبعدها ترجع تشوف وش صار مع إخوانها!! بعد وقت دخلت غرفتهم ...مطت شفتها بعدم رضا وهي تشوفهم رجعوا يلعبوا على البلايستيشن: دوبكم تتضاربوا والحين تلعبون مع بعض رعد وعيونه على الشاشة: علشان اعلمه كيف يغش ويقول إنه فاز علي عبود بعناد: فزت عليك ما احدقال لك ناظر جهة الشباك!! مطت شفتها بانزعاج من شجارهم ... ناظرت الشباك ونفسها تسول لها تناظر من الشباك رح يكون مقابل لها مباشره وتشوف وش تعمل حنان عنده!! تحركت خطوتين ..بعدها ذكرت نفسها وهي تقول " رب نظره اورثت في القلب ألف حسرة" وش تبغى فيهم ؟! يا ليت لو ترجع للقرية على الاقل ما رح تشوفه كونها جالسه بالبيت ...بس رجوعها للقرية الحين صار شبه مستحيل .. وخاصه بعد كلام جدها سلطان ...وش يقصد إنه جلوسها هنا افضل من القرية وما يبغاها ترجع الحين ؟!! تحس يصيبها صداع من كثر التفكير وما تلقى اجابه ...طردت كل الافكار الي برأسها ما هو ناقصها صداع .... جلست على السرير وهي تكلم إخوانها تشغل نفسها عن التفكير: ما تبغون أكل ؟! رعد باندماج: ما نبغى سم الهاري ..اسكتي ولا تشغلينا! كشت عليه ورمت نفسها على السرير وهي تنطق: رتبوا الغرفة قبل ما ترجع أمي وأبوي!! هذا آخر شيء قالته ..وبدون وعي منها غطت بنوم عميق !! فزت مرعوبه على صوت أمها العالي : وش هذا ؟! ليه الغرفه كذا ؟! بلعت ريقها وقلبها يدق بقوة من الخرعه...ما تدري ليه ما يطبقون البرستيج لما يصحونك او يدخلوا عليك الغرفه!؛ ناظرت المكان بعبوس وهي تتذكر إنها نامت بغرفة اخوانها!! خزامى بغضب نطقت: نايمه حضرتك والبيت مقلوب!! وش هالفوضى هذي؟! تحس للحين فاقده التركيز بسبب الصحيان المفاجىء...فركت وجهها لعلها تصحح..وبصوت ناعس نطقت: قلت لهم يرتبوها؟! ردت خزامى بصوت يرعد: لا والله تعبت حالك كثير... قومي رتبي المكان أشوف؟! وبعدين وين إخوانك ؟! ردت بضيق من هالصراخ ومن هالاسلوب الي ما تدري لمتى تتحمله: ما ادري عنهم كانوا يلعبون! رمقتها خزامى بغل: مالت على الي يعتمد عليك... السناعه بجهة وانت بجهة!! قووومي تحركي رتبي المكان! رفعت بيلسان حاجب باعتراض: بس مو انا الي عفستها ..ليه ما يرتبها رعد وعبود لأنهم هم الي وسخوها خزامى رفعت يدها بتهديد: لا تراددي ونظفي المكان افضل لك!! قبل ما ترد ناظرت ابوها واقف خلف خزامى وهو ينطق بعبوس: ليه الغرفة كذا محيوسه؟! خزامى بغضب: شفت بعينك ...هذا وأنا معتمد عليها تهتم بإخوانها ..حضرتها نايمه وتاركه كل شيء خلفها ..وش اللامبالاة هذي!! وفوق هذا ترادد وما تبغى ترتب قاطعها وليد بهدوء: طيب ما له داعي صوتك المرتفع..رح ترتب المكان بدون ما تصارخين! وناظر بيلسان بحزم: رتبي المكان ! ختم كلامه وانسحب ... حست بالقهر بداخلها ورح تبكي بأي لحظة ..هي ما وسخت شيء حتى ترتب ...ليه ما يرتب رعد وعبود لأنهم هم الي عفسوها!! خزامى بأمر قبل ما تطلع: ابغاها تلمع لمع! بعد خروجها ...رفعت رأسها بيلسان للسقف تحاول تمنع نزول الدموع... بداخلها قهر وعاجزه عن التصرف ...ناظرت الغرفة بروح ميته لمتى تتحمل... تحس هالشغل بس عليها ..ما عمرها شافت ليان او لجين يشتغلون ...ليه بس هي الي تشتغل بهذا البيت ... اخذت نفس عميق تهدي نفسها .وتذكرت صلاة العصر ..قريب المغرب...وبسرعه تحركت تجهز نفسها للصلاة ...بعدها بدأت ترتب المكان بهدوء...بعد وقت كملت رجعت جلست على السرير ما لها نفس تطلع وتقابل احد منهم !! مسحت بخفه دمعه تسللت على خدها ....عبست ملامحها وهي تسمع خزامى تنادي عليها ..تبغى أحد يقنعها ويثبت لها إنها هذي أمها!! تحركت باتجاه المطبخ وهي تنطق بهدوء: نعم!! خزامى بعصبيه: يا جعل النعامة ترفسك.. إخوانك للحين بدون أكل ؟! بيلسان نطقت وهي تناظر إخوانها يأكلون: قلت لهم بس ما قبلوا لجين بتكذيب: والله ما احد قال لي ...مليت وأنا انتظرها ترجع ..وبعدها نمت قبل ما اشوفها خزامى بتحقيق: متأخره ؟! أي ساعة رجعت ؟! بيلسان خلاص أكثر من كذا مب قادره تتحمل ...بلعت غصتها ونطقت بجمود: مثل سبقها رعد ونطق قبلها: رجعت مثل كل مرة وحنا رفضنا الاكل ...بس لجين رجعت من المدرسة مبكر عن كل مرة!! ليان وهي تأكل بهدوء نطقت وهي تناظر لجين: ما قدرت تأكلين شيء ..تنتظرين احد يجهز لك ..تراك مو صغيره لجين مطت شفتها بعدم رضا لكلامها: ما اعرف ! عبود مط شفته بسخرية: وربي لو كنت المسؤول عنك الا اخليك اسبوع بدون اكل علشان تتعلمين تأكلين بنفسك!! خزامى بحزم: خلاص كل واحد يأكل وهو ساكت!! وانت اجلسي بيلسان بجمود: شبعانه! خزامى وهي تسحب كرسي لها : دامك شبعانه خذي القهوة لابوك تلقينه الحين بالصالة!! أخذت القهوة بهدوء وتوجهت للصالة بدون أي كلمة.....حطت القهوة قدام أبوها الي جالس وعيونه على الشاشة!! تحركت تبغى ترجع لغرفتها بصعوبه ماسكه دموعها ...بس وقفها صوت أبوها: انزلي عند جدتك اتصلت تبغى وحده فيكم انت او ليان!! هزت رأسها وتوجهت للغرفة تلبس وتنزل !! ** ** ** جالس بالصالة جنب جدته ...ما توقع اليوم يشوفها ... ما هو قادر يقيمها متكبره والا وش وضعها بالضبط ... ناظر جدته الي اتصلت بوليد حتى تنزل ليان تعمل لهم شاهي .... ما في وقت قصير وحلت الصدمه وهو يشوفها نازله ...حس فيها ترددت لما شافته ..بس سرعان ما رجعت ملامحها للهدوء وتقدمت منهم وهي تنطق السلام بهدوء!! يحس انها متكدرة والدموع بعيونها ...ما يدري وش سببه او تهيأ له!! نطقت بهدوء: ابوي يقول طلبتيني؟! ام فيصل رفعت حاجب : والله يا ابنتي قلت له ليان ..علشان تعمل شاهي..كنان يحب يشرب الشاهي الي تعمله!! ناظرها والكشرة مرسومه على ملامحها وهي ترد: الحين اقول لها لما تكمل اكل تنزل تعمل الشاهي!! ما يدري ليه حس كلامها وكأنها تتريق عليه ..انزعج من طريقة كلامها !! ام فيصل : خلاص ما له داعي ..اعملي انت يمكن ليان تعبانه من الدوام!! زمت شفتها بهدوء: ان شاء الله وتوجهت للمطبخ..ناظر جدته بتساؤل: كأنها ما تبغى تعمل؟! خلاص ما له داعي الشاهي ليه تحرجينها ام فيصل بنفي: وش هالكلام ...وليه ما تبغى؟! كنان باستغراب: ما شفتي كيف ملامحها ام فيصل تنهي السالفه: يتهيأ لك ...يمكن دوبها صاحيه من النوم!! نطق بتوجس: هي دوم عابسه كذا ؟! يعني طبيعتها كذا ؟! ام فيصل بنفي: لا هي مو كذا بس يمكن متضايقه ما تبغى تعيش هنا ولا تدرس جامعه تبغى ترجع للقرية!! غريبه هالبنت احد يترك الرفاهيه ويختار حياة التعب والشقى؟! نطق بتبرير: عاشت كل حياتها هناك أكيد صعب تتأقلم معكم!! ام فيصل هزت راسها: يمكن! تجهز الشاهي ودموعها ما وقفت مب قادرة تسيطر عليهم ... مسحت دموعها بكم عبايتها وهي تأخذ نفس عميق حتى تقدر تسيطر على نفسها !! ناظرت الشغاله وهي تنطق بصوت مخنوق: تقدري تأخذين الشاهي لهم؟! الشغاله هزت رأسها بالموافقه!! جهزت الشاهي واعطته للشغاله ترسله ...غسلت وجهها قبل ما تطلع لفوق ...سحبت كرسي وجلست عليه تنتظر لوقت يروح أثر الدموع ... بعد وقت قصير..حست نفسها صارت أحسن ...سحبت نفسها وطلعت من المطبخ بدون ما تناظر جهة الصالة وقبل ما تطلب جدتها منها أي شيء!! اول ما دخلت ناظرتهم مجتمعين بالصالة ..ردت السلام بهدوء! خزامى وهي تشرب القهوة اشرت لها بعيونها: نظفي المطبخ!! نطقت باعتراض خلاص ملت من هالحياة كل شيء عليها ويا ليت يعجبهم : وليه انا الي دوم انظف؟! إلي اكل ينظف ليان ناظرتهم: خلاص أنا أنظف المطبخ وليد باعتراض: أنا من زمان قلت ليان ما تشتغل أي شيء دراستها صعبه ويا دوب تكون فاضيه للراحة! ناظرته بقهر من تفكيرهم ..يعني هي وش مستفيده من دراسة ليان ...وبهدوء نطقت: وأنا عندي دراسة قاطعها بسخريه: ليه تخصصك يحتاج لدراسة؟! اسمعي كلام أمك ونظفي المطبخ بدون اعتراض! ختم كلامه بنظره قويه... حركت شفتها ترد ..بس شيء بداخلها جبرها على الانسحاب ...دخلت المطبخ ودموعها تنزل بصمت من مرارة الظلم والتمييز ...كل هذا حقد عليها لانها كسرت كلامه وما عادت الثانويه؟! تتمنى رجولها انكسرت ولا طلعت من القرية ...كانت عايشه في بيت جدها اميره ..كل شيء تطلبه يلبونه ...يدورون راحتها وما يضغطون عليها ولا يجرحونها بالكلام ... عكس خزامى الي تدور الزله عليها حتى تنفجر بوجهها ..ما هي متعودة على هذي الحياة ...ما هي متعوده احد يصرخ عليها بالطالعة والنازله ... لو غلطت ما رح تزعل ...الي يذبحها إنها ما غلطت ولا اساءت لأي احد ..ليه يجبروا الشخص يطلع عن طوره وهدوئه ويتعامل بطريقه ما هي من اخلاقه!! ** ** ** جالس تحت الشجرة ويتكلم بروقان: اااه لو شفت بيتهم ...يجنننننن ...تدري غرفة الضيوف اكبر من بيتنا كله !! ما ادري بيلسان تاركه هالعز وجالسه بخرابه سلطان!! ناظره وابتسم بخبث: تبغى تكون قريبه منك؟ ناظره وقلبه يدق طبول: انت متاكد إنها تبغاني قاطعه بتأكيد: اقولك متأكد ومن مصدر موثوق ختم كلامه وهو يغمز له!! تنهد وهوينطق : لو يتم النصيب الا اشتري من فلوس ابوها بيت قاطعه بعبوس: ترى من اول ما جلسنا وانت توصف بالبيت وتبغى تشتري بيت من فلوسهم. ..وللحين ما قلت لي وش صار معك! هز رأسه وهو يحك ذقنه: قلت له لي عندك طلب واتمنى ما تردني ...قال حياك والي اقدر عليه ..قلت له ابغى بيلسان على سنة الله ورسوله!! قاطعه بحماس: ايه وش قال؟! رفع حاجب: حسيته ملامحه تغيرت وما عجبتني بعدها سألني وش عرفك فيها.. قلت له اعرفها وهي صغيره ... هز رأسه باندماج: ايه وبعدين؟! رد بابتسامه: سألني وش اشتغل واذا عندي بيت او لا .. يعني بعض الأسئلة قاطعه بقلة صبر: ايه وبعدين وش صار ؟! رد بابتسامه: قال يا ولدي انت تعرف العادات والتقاليد ..يقول بالاول يشاور اهله ويشاور البنت ويسأل عني وبعدها يصير خير!! نطق بتوجس: ومتى يرد لك الجواب؟! نطق بضيق: يقول شهر! فتح عيونه باستنكار: وليه شهر؟! طول عمرها الناس اسبوع وان طالت اسبوعين ..ليه هو يبغى يسأل عن جدك العاشر!! وش هالمسخرة؟! نطق بإحباط: يعني تتوقع يرفض؟! رفع حاجب بتفكير: ما اتوقع عيال عمها يتركونها لك!! ** ** ** رمت الكتاب بملل وناظرت ليان مندمجة بين كتبها ... بدأت تدندن بخفوت ! ليان رفعت رأسها لها وابتسمت: دوم تحسين بالملل بالرغم من كل الرفاهيات حولك بيلسان بإحباط: وين الرفاهيات الي تقولين عنها؟! ليان باقتراح: وش رايك أعمل لك حساب على مواقع التواصل نفس الي عملته لك السنة الماضية لما زرتك بالقرية ورفضت..اعمل لك حساب وتتسلين وتتعرفين على بنات كثير قاطعتها بيلسان بملل: ما لي مزاج بذي الخرابيط ما احبها ولا أحب أشوفها!! ليان بتردد نطقت وهي تشوف الكدر بملامحها: بالنسبة للبارحة زعلتي على كلام بابا؟! بيلسان مطت شفتها بسخرية: وليه أزعل ليان تبرر موقف ابوها: بابا من زمان ومن قبل ما تجلسين عندنا ما يسمح لي بأيام الدوام أشتغل شيء حتى ما انشغل عن دراستي ..وكان عندنا شغاله هي تهتم بكل شيء بيلسان قاطعتها وهي رافعه حاجب : وين راحت الشغاله! ليان مطت شفتها: صارت مشكله وبابا طردها ومن بعدها حلف يمين ما تدخل الشغاله بيته! بيلسان مطت شفتها بسخرية وهي تناظر يدين ليان مثل الزبده .. نزلت نظرها ليدينها فرق بينهم ...انتفخت وهي تتذكر كنان الي جالس يبغى يشرب شاهي من تحت يدين ليان!! اكيد الحين ذايب بهواها...مين ما شاف ليان وما حبها!! ما هي حسوده بس بعض المواقف تجرحها وما تقدر تبلعها وتتجاوزها ... ليان باقتراح حتى تخفف ملل بيلسان: فكرتي تشغلي وقتك بقراءة قصه ؟! او خواطر؟! أو مطالعة كتاب بيلسان تثاوبت بنعاس: نعست اسمعي قبل وصول أمي صحيني ما ابغى أتخرع وأنا نايمه من صراخها ... ليان عبست ملامحها بضيق على بيلسان : خالتي خزامى طيبه بس انت حاولي تفهمينها ...ما ادري ليه متنافرات كذا!! بيلسان ما ردت واعطتها ظهرها قلة الكلام أحياناً افضل بأمور ما رح تتغير !! ** ** ** في اليوم الثاني جالسه ومتربعه على الارض ....ضحكت من قلبها على شكل رعد المنتفخ لما فازت عليه ...نطق والنار تغلي بداخله :غشاشه هذي ١٠ مو ٩٠ نطقت من بين ضحكاتها: وربي كتبت ٩٠ بس لأني مغطيه بيدي طلعت كذا!! رد بعناد وتصميم: لا غشاشه ..اكتبي مره ثانيه! هزت رأسها وهي تناظر ورقتها قربت تفوز ...غطت بيدها القلم وهي تكتب الرقم ...وبمراوغة كتبت الرقم حتى ما يعرف الرقم الي كتبته..ناظرته وهي تضحك: وش الرقم؟! ناظرها وهو صاك على اسنانه بقوة ...اكره ما عليه أحد يفوز عليه ...نطق بغيض: ٧٠ رفعت يدها وهي تضحك بقوة: ٦٠ سحب ورقتها وقطعها من شدة قهره وبتهديد: انت غشاشه ... بيلسان وهي تضحك : وربي ما غشيت بس انت احول ما تقدر تميز الارقام!! يحس رح يموت لو ما ضربها ...استفزته بضحكها ...وبدون وعي شدها من شعرها وهو ينطق بضحك: لا تضحكين لا تضحكين!! بيلسان تحاولت تفلت شعرها وهي مستمرة بالضحك على انفعاله ... شدها باقوى: انكتمي! مدت يدها وشدت شعره بأقوى ما عندها وهي تنطق بغضب بعد ما وجعها بشده لشعرها: اتركني يا زفته! نطق بقهر منها: اتركيني انت تحس شعرها تقطع ..تركت شعره وهي تنطق بغضب: اترك شعري بعد ما فلتت شعره ..شد شعرها بقوة وبعدها تركه..صرخت من شدة الوجع ...وبدون وعي هجمت عليه ..تضربه وتخمشه..واشتبكوا من جديد مع بعض !! ما فض اشتباكهم إلا وليد الي دخل على صراخهم ...ناظرهم بغضب وهو يشوف كيف ضاربين بعض ..وبصراخ نطق: وش هذي التصرفات؟! بزران انتم ؟! وليه متضاربين؟ ناظر فتات الورق على الارض ...وبغضب نطق: ليه متضاربين بلع ريقه رعد وهو ينطق بتردد وخوف: كنا نلعب ١٠ و٢٠ بس هي غشاشه قطع كلامه لما استقرت يد وليد على خد رعد وهو ينطق بغضب: ضارب أختك علشان هذي السخافة؟! انت ما تستحي على وجهك ....شاربك بدأ يخط على وجهك وهذي تصرفاتك!! صوتكم طالع وفضحتونا علشان كذا ؟!! وربي يا رعد اذا ما اعتدلت وصرت رجال مثل العالم والناس الا يكون حسابك عسير ...والحين انقلع غرفتك وان شفتك داخل غرفة اخواتك الا أمسح فيك الارض... تحرك بسرعه للخارج خوف إنه ابوه يغير رأيه ويطقه مرة ثانية!! زفر وليد والنار شابه بصدره ..صوت صراخهم واصل لتحت عباله صاير شيء كايد ...ما توقع سخافتهم وقلة عقلهم لذي الدرجة ...وبنبره غاضبه نطق: وش هالتصرفات هذي ؟! صوت صراخك واصل لتحت ...هذي آخرتها نصير سيرة للعالم؟! بلعت ريقها ونطقت تبرر موقفها: هو الي بدأ وشد شعري قاطعها وهو يشد إذنها بقوة:شد شعرك تقومين تعدمين وجهه كذا ؟! ما في جدار بالبيت تخبريه بتصرفات رعد ؟! بس لا نصرخ ونضرب وكأننا بالشارع وما في اي احترام لهذا البيت؟! يعني رعد اعذره ولد ويتضارب مع الاولاد ...بس انت بنت ..صبيه بالجامعة الي بعمرك تزوجوا وانت بكل سخافه تلعبين !! حاولت تبعد يده عن إذنها تحسها انقطعت...شد بأقوى وهو ينطق بتهديد: اذا تكررت هالتصرفات ما رح يعجبك رد فعلي ... الصوت العالي والضحك العالي ممنوع ...تفهمين والا لا ؟! ترك إذنها وهو ينطق بأمر: نظفي المكان!! ختم كلامه بنظره ناريه وطلع من الغرفة!! تحسست إذنها بشويش وهي تحس أنها مب قادرة تلمسها ... توجهت للمرايه وناظرت وجهها في بعض الخدوش برقبتها ...رفعت كم بلوزتها وهي تشوف مكان قرصات رعد باللون الازرق !!! نزلت كم البلوزه ونزلت الارض وهي تفكر بالموقف غلطت او لا... ما تقبلت يمد يده عليها ما هي صغيره حتى يشد إذنها بذي الطريقه !! كملت تنظيف والتفتت على ليان الي دوبها راجعه من الجامعه...وضعت اغراضها وهي تتكلم بروقان: تخيلي اليوم وش صار معي؟! ختمت كلامها وعبست ملامحها باستنكار: وش فيه رقبتك كذا ..وهنا وجهك؟! وشعرك ليه منفوش كذا حكت بيلسان وجهها بلامبالاة خارجيه وهي تنطق متجاهله سؤالها: وش صار معك ؟! ليان اقتربت منها وهي تناظرها بتفحص: وش صاير؟! بيلسان من الداخل تبكي بس تتظاهر بالهدوء: تشابكت مع رعد ! ليان فتحت عيونها بعدم تصديق: تشاجرتم؟! وش السبب ! مطت شفتها بيلسان ما لها نفس تتكلم: فزت عليه ليان هزت رأسها بتفهم: يا ربي رعد يتحول لوحش اذا أحد فاز عليه ...ما تشوفينه كيف يعمل بعبود ..ليه تلعبين معه ؟! بابا جالس تحت ليه ما نزلت وقلت له عن رعد وتصرفاته!! مطت شفتها بسخرية وبداخلها " جاء وقام بالواجب" :ما قلتي وش صار معك ليان ناظرتها بعبوس: وربي إنه غبي ...شوفي وجهك كيف خرابيط ...الحين رح انزل لبابا واقول له مسكت يدها بيلسان وهي تحاول تتحكم بملامحها: جاء ابوي وشافنا ! ليان بتدقيق: وش قال له؟! بيلسان بسخرية: حصل على محاضره ادبيه مع كف محترم! ليان ناظرتها: وانت قالك شيء؟! بيلسان استثقلت تقول لها إنه قطع اذنها وهو يشدها ...وبهدوء نطقت: محاضره أدبيه!! هزت رأسها بتفهم: خليني اسولف لك وش صار قبل رجوع خالتي خزامى!! موقف يضحك امسكي نفسك لا تموتين من الضحك!! هزت رأسها بيلسان بعبوس .. وبدأت تسمع لها الموقف الطريف .... ختمت ليان الموقف وهي تحس بالانتكاسه من رد فعل بيلسان ما ضخكت على الموقف ولو مجرد ابتسامه: وش فيك ما ضحكت؟! بيلسان ما لها نفس بشيء: خفت اذا ضحكت اموت ليان خزتها: سخيفه!! فكي هالكشرة...وربي ما احب اشوف الا ابتسامتك الجميله!! اكتفت بيلسان بابتسامه مجامله لها !! ليان ناظرتها بعجز وهي متاكده إنها ما عي مرتاحه معهم .. والأجواء ما ناسبتها!! ** ** ** مجتمعين على سفرة الاكل وتستمع خزامى لنفس الشريط بملل بس اليوم كانت العصبيه أكبر لأنها اقتربت من ولدها المدلل ... خزامى وهي تناظرها بقهر من برودها هي مولعه وحضرتها جالسه تأكل ولا كأنه الموضوع يهمها ..وبغضب نطقت: انت ما في إحساس ولا ضمير ...اي شخص عنده كرامه ما يأكل وهو يتبهدل؟! رفعت حاجب بيلسان بملل وهي تضع الملعقه قدامها ونطقت بسخرية: على هذا القانون رح اموت من الجوع لأنك ما شاء الله بالطالعه والنازلة تزفيني بسبب وبدون سبب ... خزامى ناظرتها بعصبيه وهي تشوفها رجعت تأكل ببرود: وقحه وقليلة ادب!! ما أدري عن وليد الي تركك وما حط لك حد ...بس يفرد عضلاته على رعد ... ناظري اخوك ما عندك رحمه أو شفقه..شوفي وجهه كيف اعدمتيه بأظافرك قاطعتها بجمود : هو الي بدأ وتمادى وتطاول علي يستاهل قاطعها رعد ووجهه منتفخ من الخرايط الي رسمتها بوجهه..وفشلته قدام الكل وما له وجه يدوام بالمدرسة: كذابه انت الي بديتي يا غشاشه وفوق هذا أنا إلي اكلت الطق بيلسان نطقت باستفزاز: تستاهل وتستحق أكثر قطعت كلامها وهي تتحسس جبهتها بألم لما ضربتها خزامى بالملعقة: انكتمي انت جايه من القرية تخربين بيتي؟! بعدين مع مشاكلك الي ما تنتهي!! وربي اذا ما اختصرتي الا اتصرف تصرف ما يعجبك ...يكفي إني ساكته للحين على كسلك والغباء الي معشش بعقلك وبمظهرك الي يفشل وتصرفاتك المقرفه ..بس سكوتي ما رح يدوم ...وربي اذا ما تسنعت الا تندمين قطعت كلامهاوناظرت رعد الي واقف فوق رأس بيلسان وبخوف ينطق: بيسو انت بخير...وريني اشوف!! ليان تحاول ترفع رأس بيلسان: ارفعي رأسك أشوف بيلسان منزله رأسها وضاغطه مكان الضربه ...تحس بالاختناق ..تحاول تأخذ نفس لأنها اذا رفعت رأسها ما رح يحصل خير رح تقلب البيت فوق رأسهم..ما تبغى تفقد عقلها وتتصرف بجنون... خزامى بانتقاد وهي تشوف كيف وجه رعد مخطوف : الحين أنا حارق دمي عليك يا رعد وانت قاطعها بقهر شوي ويبكي: ليه تضربيها ...يعني تضاربنا عادي كل الاخوان يتضاربون بس انت لا تضربيها علشاني.. رجع ناظر بيلسان وهو يحاول فيها: ارفعي رأسك...وربي آسف وحقك علي بس ارفعي رأسك!! طلبك بلسانك اي شيء تبغينه أعمله .. بس ارفعي رأسك!! ليان اكتست ملامحها القهر من الموقف : بيلسان ارفعي رأسك!! اخذت بيلسان نفس عميق ورفعت رأسها وهي تناظر امها ودموعها تتراقص بعيونها..وبنبرة مقهوره: هذا هو الرقي والبرستيج الي افنيتي بحياتك علشانه ...رقه واناقه مزيفه ومن الداخل حقد وقسوة ...تذبحك المظاهر بس هذا الي يهمك والباقي بستين داهيه.. خزامى وهي تناظر الاثر الي خلفته الملعقه على جبهتها والدم ينزل بخفه...قاطعتها خزامى : لا تحمليني اتصرف تصرفات ما هي من طبعي بسبب تخلفك !! بيلسان أبعدت ليان عنها الي تمسح مكان الجرح: اتركيني!! تحركت للغرفه والقهر بداخلها يشتعل.. وش هالذنب الي اقترفته حتى تعاملها كذا ...اكثر من كذا ما رح تتحمل الحياه معهم ...حياتها هنا يعني عقوقها وما تبغى تكون عاقه ...البعد أفضل لكل الاطراف!! قررت تتصل بجدها يأخذها ما تبغى لا دراسه ولا شيء.. تبغى فراشها الي على الارض تستلقي بكل راحة وآمان. ** ** في اليوم الثاني دخلت المطبخ للفطور ... البارحه منعتها ليان تتصل بجدها سلطان.. وهي تقنعها تبعد عن الفكره ... لأنها رح تصير مشاكل للجميع...هي متأكدة لو اتصلت بجدها رح تقوم مشكله كبيره بين وليد وسلطان ....ما تبغى تكون السبب بالمشاكل..رح تسكت وتشوف نهاية هالحياة! سحبت كرسي وجلست بهدوء بعد ما ردت السلام .. وليد ناظرها وعقد حواجبه وهو يشوف جبهتها منتفخه وفي اثر جرح بسيط ...التفت على رعد بنظرات ناريه ...توقع انها بسبب شجارهم ..وبنبره غاضبه نطق بوعيد: وربي يا رعد إن قربت او لمست وحده من أخواتك الا أكسر رأسك...شوف وجه أختك يا ****** رعد بلع ريقه بخوف من ملامح أبوه...وما قدر يقول إنه ما هو الي عمل كذا فيها..نزل رأسه وسكت!! ليان ناظرت بيلسان برجاء تقفل الموضوع وما يبغون مشاكل... رفعت حاجب بيلسان من أول ما جاءت وهي ساكته وأمها تتمادى عليها ..لمتى تسكت ما أحد يتجرع مرارة سوء المعاملة غيرها ..ناظرت امها الي تغيرت ملامحها بارتباك وبدأت تغير الموضوع ..يعني البارحه لما شافت وجه رعد ما سكتت لها والحين تبغى تغطي على الموضوع لأنها هي الجهة المتضررة ...لو كان رعد او عبود ما رح تسكت وتغير الموضوع...وبنبره هادئة نطقت متجاهلة نظرات أمها وهي تتحسس مكان الجرح: هذي الضربه ما هي من رعد رفع وليد حاجب باستغراب: كيف؟! ناظرت أمها الي تناظرها بتوعد اذا تكلمت ...ناظرت ليان الي نطقت بسرعه حتى تغطي على السالفة: انز قاطعتها بيلسان بقهر ما رح تسكت عن حقها : البارحه أمي ضربتني بالملعقة لأني تشاجرت مع ولدها رعد!! ناظر زوجته بعدم تصديق ...ما نطق بشيء وهو ينتظر منها تبرير... انتفخ وجه خزامى بقهر من بيلسان الي تحسها ناويه تخرب بيتها ..وبتبرير نطقت: تمادت علي بالكلام وفقدت اعصابي ..ورميت الملعقه من شدة غضبي وجاءت فيها؟! فتحت عيونها باستنكار وهي تنطق بحرقه مظلوم: انا تماديت بالكلام!! ليان انت كنت موجوده أنا قاطعها وليد بغضب: حنا ما رح نخلص من هالمشاكل...يا بيلسان افهمي تراها أمك ما يصير تردين لها الكلام ...دلالك الي عشتيه عند جدك سلطان ما هو موجود هنا ...قلت لك من قبل هنا انظمه تمشين فيها ...ولا تستفزين الي حولك ناظرته بخيبه على الغباء الي فيها يوم ظنت رح يوقف معها ...وبنبره مهزومه نطقت : وأنا ما عملت شيء خزامى بهجوم: أنا ما اقدر اتحمل تصرفاتها تستفزني بكل وقاحه قاطعها وليد وهو يناظرها باتهام:كله بسببك انت ..هذي نتيجة تربية ابوك والحين قاطعته بقهر: ابوي وش علاقته بالموضوع ؟! هي وقاحتها زايده وما تحترم الي اكبر منها ناظرتها بيلسان والغصه بحلقها من هذا الكلام: أنا ما احترم الكبير ؟! خزامى بقوة: ايه ..يكفي فشلتيني قدام زوجات أعمامك يقولون لي ليه كذا دوم مظهرها مبهدل عكس لين ولجين. ...كم مرةاقول لك إلبسي الملابس الي اشتريتها لك ومع ذلك تعاندين قاطعتها بيلسان بقوة: انت حاقده علي بزياده من يوم اللحم .. أنا اول مره اشوف انسان يحرم نفسه من اشياء يحبها ويكذب حتى يظهر للعالم إنه متحضر قاطعتها خزامى وهي تناظر وليد: سمعت بإذنك وش تقول لي؟! أنا كذابه؟! وليد ضرب الطاوله بغضب: خلاااااااص! وش هالكلام يا بيلسان؟! وحده محترمه تقول لأمها كذا؟! ناظرته بقهر من تصرفاتهم وبانفعال نطقت: ما هي أمي ..لمتى تخفون الحقيقه ؟! أدري إني مو ابنتكم ...إلي ابغى اعرفه مين أهلي الحقيقين؟ لمتى تخفون الحقيقه ؟! ما هي مجبورة تتحملني اكثر من كذا؟! ليان غطت فمها من شدة الصدمه ...وش هالكلام الي قاعده تخربط فيه!! وليد رفع حاجب وهو يشك بعقلها :وش هذي الخرابيط؟! مين قال هالكلام ؟! بيلسان ودموعها على وشك النزول: ما هو مهم مين قال ..الي يهمني مين أهلي ؟! تراني مو غبيه لذي الدرجه ..اي احد يشوفني يعرف إني مو ابنتكم..ريحني وقول لي مين أبوي قاطعتها خزامى والماضي يتراقص قدامها : حنا أهلك يا غبية من وين هالخرابيط قاطعتها بيلسان بقوة: ما هو صحيح مستحيل تكونين أمي ...يمكن أبوي هذا يكون ابوي ... أما انت مستحيل تكونين أمي .. ناظرت وليد بقوة: قول لي مين امي وينها ؟! طلقتها والا ماتت ؟! ليه أحس إني جيت على الدنيا بالغلط كلمتها رنت بإذن وليد واستفزته بقوة ..فهمها بمعنى مغاير ...وبدون وعي تقدم منها واستقرت يده على خدها ...مسكها من كتفها وهزها بقوة: ما هو وليد الي يعمل الغلط ..تفهمين ..وقاحتك ما توصف ..هذا آخر إنذار لك يا بنت ...اعتدلي وامسك لسانك افضل شيء.. واذا الي خلاك تفكرين بهذا الشيء لون بشرتك المختلفه عنا ...اطلبي من جدك يراويك صور أمك خزامى قبل الزواج وقتها رح تعرفين من وين ورثتي لون بشرتك!! دفها وطلع من المكان ...ناظرت بيلسان خزامى الي الصدمة حلت عليها من كلامه ... وبدون وعي طلعت خلفه خزامى والنار تشتعل بداخلها من كلامه الي حست فيه انتقاص وإهانه .... حل الصمت للحظات على المكان ...بعدها رفعت راسها بيلسان وهي تسمع صوت شجار امها وأبوها... ناظرت ليان الي نطقت بعتب: صدقيني يا بيلسان ما هو كل شيء بالقلب نقوله؟! عبود ناظرها وبخفوت نطق: يعني انت مو اختنا! ضربه رعد على رأسه: انكتم انت وكلامك! وبضيق نطق: كله بسببي بيلسان ناظرته للحظات وبعدها حملت نفسها وطلعت بهدوء.... وقفت وهي تسمع صوت أبوها وهو يصرخ على امها: ما يطلع لك تمدين يدك وتضربينها... خزامى بقهر : واكسر رأسها اذا تمادت بالكلام..هذا انت ضربتها والا حلال عليك ؟! تجاهلت كلامهم ودخلت للغرفه أخذت أغراضها وطلعت من البيت ...تتمنى مكان تجلس فيه وتطلع كل الكبت الي بداخلها ... وقفت عند الباب الخارجي للحظات لما شافت اثنين واقفين بطريقها ...ما ركزت عليهم وهي تحس بغشاوة على عيونها من الدموع ....ابتعدت وتوجهت مباشرة للباص الي جاء بالوقت المناسب ... اشرت له ...ركبت وجلست على الكرسي وهي تحس خلاص فقدت قوتها ورح تبكي بأي لحظة ... دفنت رأسها بحقيبتها وبدأت تبكي بصمت ..أكثر من كذا ما تتحمل!! ** ** نزل من السيارة مع جسار الي رح يدخل يحضر بعض الاغراض من بيت جده ...تفاجىء لما طلعت بطريقهم..ما ينكر صدمته من ملامحها متغيره وواضح إنها طالعه من شجار ...ورح تبكي بأي لحظة! تجاوزتهم بدون اي كلمه ....جسار بسخريه: يا اخي احس هالبنت حاقده علينا بقوة...مجرد سلام ما ردت !! التفت كنان عليها وهي تركب الباص وباستغراب نطق: هي بجامعه ****** هذا الباص يوصل للجامعه؟! جسار وهو يناظر الباص لما تحرك: يمكن يمر من باب الجامعه!! قلبه ما ارتاح ..نطق بعجله: ادخل خلينا نأخذ الاغراض تأخرنا!! دخل الصالة وجلس وهو يناظر جسار توجه لغرفة جده يحضر الاغراض ... عبس ملامحه وهو يسمع صوت عمه المرتفع وهو يصرخ. ... ناظر جدته باستغراب: صاير شيء ؟! ام فيصل هزت كتوفها: يمكن يصرخ على العيال ..البارحه متضارب رعد مع بيلسان ومعصب من البارحه على هذي السالفه!! رفع حاجب : وليه متضاربين؟! ام فيصل مطت شفتها بعدم رضا: ما ادري وش يلعبون وفازت بيلسان عليه وتشابكوا ... نطق بانتقاد: والحين من عقله يضرب اخته علشان كذا قاطعته ام فيصل وهي تمط شفتها بسخط: ما قصرت باخوها لو تشوفه كيف عامله خرايط بوجهه ورقبته حشى وكأنها قطوة!! المفروض تكون واعيه اكثر من كذا ..لو كانت بالمدرسة كان عذرناها بس هي بالجامعة ...ما هي صغيره تتصرف كذا ....سبحان من خلق وفرق ...فرق كبير بينها وبين ليان...ربي يحفظها ويسعدها مثل البلسم لما تشوفها تبتسم لوحدك... أخبر رعد متفشل البارحه وما يبغى يروح للمدرسة ..والحين اكيد وليد ملزم عليه يروح للمدرسة!! سكتت لما نزلت لجين وإخوانها !! كنان ناظر رعد الي وجهه كله خدوش ورقبته .. ابتسم بعفويه على حركاتها ... صدق ما فيها عقل اعدمت وجه اخوها..بس على جبهتها ضربه أكيد من حرارة الروح ضربها كذا !! ام فيصل نطقت بتساؤل: وش فيه صوت ابوك طالع؟! عبود عبس ملامحه بضيق من النكد لي في بيتهم .. ما له نفس يتكلم ..ناظر لجين الي نطقت بعبوس: كله بسبب بيلسان ماما ضربتها هنا البارحه ..وبابا عصب منها ورجع ضرب بيلسان قاطعها رعد بحده وهي تطلع أسرار بيتهم: انكتمي وانقلعي قدامي! ام فيصل عقدت حواجبها: وأمك ليه ضاربيتها رعد بضيق: كذابه يا جدتي صدقتيها؟! البارحة زلقت رجلها وضربت بالطاولة ام فيصل بعدم تصديق:: وابوك ليه ضربها؟! هز رأسه بالنفي : بابا ما ضرب احد !! استأذن وطلع مع إخوانه وهو يتوعد بلجين !! ناظر جدته بصمت وهو يفكر ...معقول أمها ضربتها ؟! وأبوها ليه ضربها ؟! واضح من شكلها إنها طالعه من شجار. ..بس وش سبب المشكله ...ناظر ليان الي نزلت بملامح عابسه .. يمكن اول مره يشوفها كذا عابسه؟! اقتربت وهي تسلم بهدوء ...ام فيصل بتحقيق: ابوك ليه صوته طالع! ليان مطت شفتها : على رعد ما يبغى يروح للمدرسه علشان وجهه!! هزت رأسها وهي تكمل استفسارها: وبيلسان وش فيها؟! ليان بانكار: وش فيها ؟! ام فيصل: غريبه ما هي نازله معك؟! ليان بهدوء: مستعجله طلعت قبلي!! ام فيصل : وش فيها جبهتها؟! ليان ما تدري وش فيها جدتها مسكتها تحقيق: انزلقت رجلها وضربت سكتت وهي تلتفت على جسار الي تقدم منهم وهو ينطق: كيفك ليان! ابتسمت مجامله وهي تنطق: ربي يسلمك؟! جسار باستغراب: غريبه ما طلعت مع بيلسان ليان تبغى تهرب من الاستجواب: عيل خليني ألحقها واطلع معها قاطعها كنان وهو ينطق باستغراب: طلعت بباص******** عقدت حواجبها باستنكار: كيف! جسار باستغراب: ما يوصل للجامعه؟!! هزت رأسها بالنفي: هذا الباص ما يمر من شارع الجامعه ...متأكدين طلعت فيه ؟! جسار ناظر كنان وبعدها ناظرها بتأكيد: ايه متأكدين فكرنا إنه يمر من باب الجامعه علشان كذا طلعت فيه! بهتت ملامحها وناظرت أبوها الي نزل عن الدرج وهو ينطق بجمود: وش صاير؟!! نطقت ليان بتردد وخوف من المشاكل الي رح تصير: يقولون بيلسان طلعت بباص ******** عقد حواجبه باستنكار: هذا ما يوصل للجامعه... هذا باص يوصل لباص القرية بمجمع******** ليان فتحت عيونها بصدمه من جرأة أختها كيف تتجرأ وترجع للقرية لوحدها!! *** *** ** انتهى البارت .....انتظروني الجمعه بإذن الله...دمتم بخير🌹 | ||||
|  |
|
16-10-22, 11:45 PM
| #182 | ||||
| السلام عليكم ورحمة الله وبركاته تسلم يمينككككك برووو... فصل جنان وحماسسس حماس وقهر ويغبن بالمرة.. اي هذي نكهه أبرار... إلي مستحيل تطعمها بأي روايه ثانيه... الله ياخذكككك ياخزامى...عمى ان شاء الله ياخذ روحكك..نفسي ادخل لروايه وامسح فيهااا الأرضّ.... هي ووليد.... علقتينا يا أبرار...حتّى الجمعه مالنا صبر ننتظررر...وش ذي القفله إلي احرقتينا فيها...واحرقتي بيلسان معانا.... ياربي الحين وش الترقيعه... ودي انها ترجع القريه وتفتك من خزامى ووليد...لكن الخوف من تركي وركان ينشبولها الله يشغلهم في نفوسهم.... عقليييييي وقف حتّى ماعندي قدرة...أتوقع ايش ممكن يصيييييررر يارب سلم سلّم .... الله لايسامحك ياحزامى نكدتي علينا الله ينكد عليككك ابدا ذي الشخصيّه ماتوقعت تنحدر لذا المُستوى... احس قلبي يوجعني من الغبنه والقهر على بيلسان...اسوء شعور انك تعيش مضطهد بين أعظم شخصين يفترض انهم يكونون صدر الأمان والاستقرار لروحك... دائما مبدعه بروو...وغصب تدخلينا بالأحداث وتعيشينا شعور الوجع والألم بأصغر حذافيرة.... فعلاً تعتبرين الأولى في الصدارة من نحايه تصوير احداث الظلم والاضطهاد الأسري..والتشتُت..قريت عده روايات كنت الاحظ في الكاتبه انها تحاول توضح كيف ان البطله تعاني وشعور النبذ إلي عايشه فيه، غالبا ماكنت اتأثر بصراحة لان ما احس في قوه في الأحداث والوصف إلي تخليني فعلا ادخل بالجو وأتأثر معاناه البطله....بعكس لما أقرأ روايه لِك... ما أدري وش ذي الميزه إلي تخلينا ندخل بعمق الأحداث لدرجه التعايش فيها وكأننا واقفين بنص الحدث لدرجه نتأثر...ويرتفع ضغطنااا فيه...حرفياً وبدون مجامله... ماعمري قريت لكاتبه توصف في حياه النبذ والمعاناه زي ماتوصفين انتِ..وتبدعين...دائما وأبدا إنت الأولى في الكتابه التراجيديه وبلا منازع ... وفوق ان رواياتك هادفه جدا....اشكر لك الرسايل الي تحطينها لنا بكُل سطرّ.. سواءً من محاربه بيلسان لنفسها عشان ماتضعف وتركض للحرام وتتهاون فيه؛ او من محاولاتها الدؤوبه انها ماتغلط ع أمها رغم حركاتها وتصرفاتها معاها.... والكثير الكككككثير....فعلا مشكورة والله يجعل ذا الشيء بميزان حسناتك لان فعلا قل ماصرنا نجد رواياتتت تعزز فينا مبادئ دينا، وأخلاق الإسلام فينا... 🤍🤍❤❤.. | ||||
| |
|
17-10-22, 02:51 AM
| #186 | ||||
| فاصل بكاء راسي يوجعني وكملت عليه بالبكاء بعض الاسر والناس مايفرقون بين الصرامة والقسوة بين القوانين وانعدام الانسانيه وين جدها فيصل لعجبني اخوان بيلسان وحمايه خصوصيه الاسرة جمله اختها من ابوها ان مو دايم يبان الي في القلب هل تعرف ان خزامة لا تحبها سبحان الله ابناء الاسر المشتته او اليتم الي يذهبون للاخوال والاهمام او بين والديهم يكونو لبقين وبلسم =ذكاء اجتماعي | ||||
|
| |
|
17-10-22, 03:43 PM
| #188 | ||||
| اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|
| |
 |
| أدوات الموضوع | |
| انواع عرض الموضوع | |
|
|
2373Likes
العرض العادي
