06-12-22, 05:34 PM
| #312 | ||||
 
|  بارت ٢١ جالسه معهم وتحس كل شيء يرتجف فيها ..الصداع مع الوقت يزيد ...توزع نظرها بين الموجودين والفرح واضح عليهم ..تحس نفسها بداومه تلف فيها وكأنها بعالم ثاني ..تحس بدأت تفقد تركيزها ..صوت ضحكات تضرب بإذنها ...تحس بشخص فوق راسها يصرخ بصوت عالي وينطق بتشفي كل احلامك تبخرت....كل شيء تبغينه تأخذه ليااااان!! احتضنت رأسها بيدينها وفكها يرتجف والصداع يضرب رأسها ضرب ... اقتربت منها عائشه باستغرب: بيسو وش فيك ؟! بيلسان بتعب نطقت: مصدعه عائشه باهتمام: تعالي لغرفتك اعطيك دواء ما اعطتها مجال تعترض مسكت بيدها وطلعوا برا المجلس..تمشي بمسانده عائشه بصعوبه ....ما تدري ليه ضعف جسمها كذا ...وش فيها جالسه تنهار بسرعه...تبغى توصل الغرفه قبل ما تفقد الوعي..تسمع عائشه تتكلم بس عقلها ما استوعب أي شيء من الي قالته ... لحظات وفقدت الوعي بدون ما تحس!! عائشه تفاجأت لما فقدت الوعي ..حاولت تقدر تمسك جسدها لما سقط منها ..زلت رجلها عن الدرجه وفلتت من يدها .. تحس جسدها تصنم لما سقطت عن الدرج وتدحرجت حتى وصلت الارضيه..تبغى تصرخ وتنادي بأعلى صوتها ..بس من الصدمه مب قادره تنطق اي شيء...نزلت عن الدرج ودموعها تنزل بغزاره حاولت تصحيها بس ما في استجابه منها ...توجهت للمجلس بفزع لما شافت الدم على الارضيه... دخلت المجلس وبفزع نطقت: بيلسان خزامى فز قلبها بخوف من منظر عائشه: وش فيها؟! عائشه نطقت وفكها يرتجف: وقعت عن الدرج وما تتحرك اتصلوا على بابا بسررررررعه!! خلال لحظات كانوا حولها ..اقتربت خزامى بفزع وهي تشوفها غارقه بدمها ..وبصوت مرتجف نطقت وهي تحط يدها على خدها: بيلسان ليان جلست على الارض ودموعها تنزل: وش فيها ما ترد علينا؟! رؤى بتحذير: ما احد يحركها ام فيصل بفزع وهي تشوفها جثه بلاحراك: لا حول ولا قوه الا بالله ...كيف وقعت؟! عائشه ناظرت ابوها اول ما دخل: بابا وقعت عن الدرج بس ما ترد علينا!! عبدالله توقع ما عندهم سالفه انصدم وهو يشوفها بلا حراك!! نطق وهو يقترب: ابعدوا عنها !! اقترب منها وهو يفحص النبض عندها !! ...نطق بغضب من الصوت والبلبه الي احدثتها البنات : خلاااص!! ناظر عائشة : ليه واقفه هاتي اي شيء يوقف النزيف!! طلع جواله واتصل على جسار..بعد عده رنات نطق بسرعه: اتصل بالاسعاف وقول لهم حالة مستعجله ...ما هو وقت اسئلتك ...البنت نبضها ضعيف ومعها نزيف قفل الخط بوجه جسار وزفر بضيق لما بدأت ليان بالنحيب: لا تقول انها قاطعها بغضب: خلاااص قلت لكم اول ما اقتربت عائشه صرخ بقوة: سنه سنه حتى ترجعين!! ام فيصل تناظر ولدها والرعب واضح على ملامحه وهو يحاول يوقف النزيف ...ناظرت بيلسان وجهها شاحب ما فيه حياة ...بلعت ريقها وأيقنت انها البنت جالسه تفارق الدنيا ...يا الله دوبها كانت جالسه معهم ...زفرت بضيق لما خنقتها العبرة... ناظرت وليد وابو فيصل لما دخلوا والخوف واضح عليهم ... نطق وليد باستنكار: وش صار؟! فتح عيونه باستنكار وهو يشوف بيلسان...وبانفعال نطق: وش صاير لها ؟! وما انتظر جواب مسك الجوال واتصل بالاسعاف يستعجلهم...قفل الجوال ونطق بانفعال: يمكن يتأخر الاسعاف خلينا ناخذها عبدالله برفض:ما ندري وين اصابتها اي تحريك غلط يزيد الحاله سوء!! جلس قريب منها ونطق بانفعال ': شفت نبضها عبدالله يطمنه: فيه نبض وليد مسك يدها يشوف نبضها لحظات حط يده على رقبتها نطق بفزع : عبدالله عبدالله الاجواء كلها شوشته وللحين مصدوم من الحاله..ابعد يد وليد وبدأ يشوف نبضها بنفسه..انخطف وجهه وين نبضها ...مايدري هو فعلا ما في نبض والا قوة الموقف شوشت عليه!!! قبل ما ينطق بشئ نطقت حنان : وصلت الاسعاف عبدالله بعصبية: وليه واقفات للحين ...ادخلوا للداخل!! خزامى تمسح دموعها وهي متأكدة انها فارقت الحياة...بداخلها ندم وحسرة على الايام الي ضيقت الخناق فيها عليها ...رحلت من هالدنيا ورده دوبها تفتحت ...كتمت شهقاتها لما دخل رجال الاسعاف المكان...تحس رجولها ما شالتها من قوة المشهد ..سرعان ما جلست على الأرض ..وخارت قوتها ..وش تقول لأمها وأبوها ؟!! كيف تنقل لهم هالخبر؟!! ناظرتهم لما حملوها وغادروا عن عيونها ...وبدون وعي صرخت : بيلساااااان ارجعي!!! ام فيصل جلست جنبها على الارض وهي تقول ودموعها تنزل بخفه: قولي لا اله الا الله!! هزت رأسها خزامى وانفجرت بالبكاء!! ** ** ** قبل الحدث بمجلس الرجال الكل مندمج بالكلام عن الحياة والمشاريع ...تنهد ماجد وهو يناظر المجلس ...قبل سنوات طويله جلس هنا مع أبوه والفرحه ما وسعته لما جاء يخطب ام كنان ...كانت النسمه الي تدواي الجروح...واليوم الزمن يرجع الماضي والحين جالس حتى يخطب لولده من نفس البيت...ناظر كنان والصمت يغلفه ...يمكن يتضايق كنان اذا تمت خطوبته من ليان بس بالنهايه رح يفرح لانها بنت طيوبه وحنونه وما يعيبها شيء ..وفوق هذا يضمن سلامة عقله من شجار الحريم ..ليان عند امها ورح تكون العلاقه فوق الريح ...بهذا الزواج يكون كنان رد الجميل لمنار لما وقفت معه من لما كان صغير وعاملته مثل ابنها وافضل ...ما يضره يرد لها هالجميل ويرجع ليان لأحضانها ... بالمقابل زواجه من بيلسان ما يضمن العلاقه بينها وبين منار ...ما يبغى مشاكل الماضي ترجع من جديد ...اخذ نفس وبدأ يتكلم بمقدمات بسيطه عن سبب تواجدهم هنا ... ابو فيصل بهدوء: حياكم الله جميعا قاطعه ماجد بثقل وهو يلعب بالسبحه: الله يحييك يا عمي ويكبر قدرك.... الايام تمشي بسرعة وتكرر نفسها ...قبل سنوات وكأنه الأمس ...كنت هنا بهذا المجلس مع ابوي الله يرحمه وخطب لي بنفسه ام كنان الله يرحمها ...كانت بنت اصل والكل يتكلم بأخلاقها الرفيعه ويذكرها بالخير للحين! سكت للحظات لما تردد بالمجلس همسات بالدعاء بالرحمه عليها ...تابع كلامه بهدوء: واليوم رجعت حتى أخطب لولدي كنان من بيتكم!!؟ سكت للحظات وهو يتسارق النظر لكنان ..بعدها ناظر ابو فيصل ونطق بصوت مرتفع: اليوم جينا نخطب ابنتكم بيلساااان لولدي كنان على سنة الله ورسوله!!! حلت الصدمه على اغلب الحضور من كلامه ...والاغلب توقع انه خربط بالاسم ... ناظر ماجد ولده كنان وابتسم له يدعمه وإنه معه وما رح يتركه ...مستحيل يشوف ولده مخنوق ومجبور على شيء ويتركه كذا ...حتى لو كان ما هو مقتنع بالموضوع الاهم عنده سعادة ولده ..اتسعت ابتسامته وهو يشوف ملامح كنان تغيرت والابتسامه شقت ثغره وكأنه ما هو مستوعب الي صار .... ناظر وليد الي صدمه ألجمته وما نطق أي حرف ... ابو فيصل ابتسم لهذا الخبر ..نطق بفرح: نسبكم ما ينرد يا ابو كنان واعتبر البنت ابنتكم انتم فصلوا وحنا نلبس...كنان من الشباب الي الكل يتمنى يكون عنده ولد مثله ...وما رح نلقى أفضل من كنان لبيلسان...اتمنى ربي يوفقهم ويسعدهم ...ومن الحين أقولها قدام الجميع والكل يشهد بيلسان لولد عمتها كنان انهلت التبريكات لكنان بالمجلس ...عبدالله الي يتابع الحدث بهدوء ..قاطعه صوت الجوال ...رد بخفوت: نعم ...انا بمجلس الرجال وش تبغون ...ترى مو فاضي لسخافه ودلع البنات ...ليه وش فيه ...بيلسان ...وش فيها...طيب الحين اجي!! قفل الخط وناظر جسار الي سأل باستغراب: وش فيه؟! عبدالله بنفس الهمس: وكأنك ما تدري عن سخافه الحريم ...يحبون المبالغه تقول بيلسان تدعثرت عن الدرج خلينا اروح اشوفها بلاه يموت علينا عريس الغفله!! ابتسم جسار على تعليق ابوه!! جالس بالمجلس ما توقع حركة ابوه أبدا ....يحس نفسه بحلم ورح يصحى منه بأي لحظة!! انتبه لخاله عبدالله لما طلع ...ولحظات وقف جسار وملامحه ما تتفسر.... اقترب من وليد وجده وطلعوا من المجلس بعد ما استأذنوا...ملامحهم تدل على حصول مشكله ..معقول ليان تضايقت بعد ما وصلها خطوبة بيلسان...او يمكن بيلسان عملت شيء بعد ما وصلها خبر خطبته لها ..يمكن ما تبغاه ..بس ما امداه ينتشر الخبر ..وش صاير ؟! دب الرعب بقلبه لما وصله صوت الاسعاف قريب ... بدأت التساؤلات عن سبب تواجدها... وقف وهو معقد حواجبه باستنكار لما وصله صوت صراخ بس ما فهم شيء!! جسار دخل وهو ينطق باعتذار لما بدأت التساؤلات عن وجود الاسعاف..وكانت اجابته مختصره حالة طارئة كل شيء تمام!! *** *** *** ابو فيصل جلس على الكرسي بتعب وهو يناظر عبدالله: كيف وضعها الحين؟! اغلب الناس توقع عن الدرج وما يصير شيء عبدالله بضيق: وقعتها قويه!!! وليد زفر بضيق والهم اكتسى ملامحه ...نطق باستغراب: كيف وقعت؟! للحين مو مستوعب الموقف!! عبدالله وهو يستند على الجدار: حسب كلام عائشة الظاهر إنها فقدت الوعي قبل ما توقع وليدبحواجب معقوده: وش سبب فقدان الوعي ابو فيصل بهجوم: قله تغذية ...ما تشوف البنت جلد على عظم قاطعه وليد بعتب: وش هالكلام يبه؟! ابو فيصل بإصرار على رأيه: اكيد تضايقونها بالكلام وتصد نفسها عن الاكل!! عبدالله يخفف الوضع: لما تطلع نتائج الفحوصات يظهر كل شيء!! انا اتصلت بأمي وقلت ما له داعي احد ييجي رح تجلس بالملاحظه ويطلعونها وليد بضيق: اي ملاحظة والبنت بالعنايه المركزة والحين ما صحيت!! عبدالله بضيق: كذا احسن لانهم رح يصجون رأسي!! ابو فيصل تنهد والهم اكتسى ملامحه: لزوم نتصل بسلطان ونعطيه خبر مط شفته وليد بضيق: وش رح يعمل لها؟! ابو فيصل ناظره: هذا انت جالس وش عامل لها ؟! تراه هو الي رباها ومن حقه يعرف الصغيره والكبيره عنها عبدالله باقتراح: انا اقول خليها لباكر نكون عارفين وضعها بالضبط ونخبره فيها؟!! وليد بسخرية: وش رأيك تتصل بعريس الغفله وتخبره وبنظرة شك: بالله مو انت الي قلبت سالفه الخطوبة ؟! ابو فيصل زم شفته بضيق: صدق ما عندك سالفه ...ترى كلهم حفيداتي ومنقود علي اقوم اخرب خطبة وحده منهم علشان وحده ثانيه!! وقبل ما يرد وليد تابع كلامه ابو فيصل: ترى ما هو وقته !! ** ** ** ** منار بقهر نطقت: يعني وش هالمسخره ..يروحون يخطبون ليان كيف انقلب الموضوع كذا؟! رنا تخفف عنها: عمي يقول إنه بابا خربط بالاسم واكيد ما رح قاطعتها بقهر:وش فيها لو عدل وقال "اقصد ليان" بس أبوك ما يرتاح الا لما يقهرني!! ديما تناظرهم بهدوء: لما يوصل بابا قولي الي تبغينه حنا وش يطلع بيدنا!! منار ناظرتها بقوة: انت بالذات انكتمي...ما فكرتوا بموقف ليان الليله؟! كيف موقفها الحين لما يقولون لها إنه خطب بيلسان!! رنا بحسافه: كنت متحمس كنان يخطبها حتى اقول أخوي تزوج أختي" ختمت كلامها بتورط وهي تشوف ملامح امها الغاضبه!! ديما كتمت ضحكتها وصدت للجهة الثانية!! منار ناظرتها: صدق سخيفه وما عندك سالفه!! رنا بعبوس : يعني أنا وش دخلني؟! .بعدين أنا بصراحه تعجبني شخصية بيلسان ومن ايام المدرسه تلفت انتباهي! منار قاطعتها بانفعال:وربي اذا ما انكتمي الا سكتت وهي تشوف ام ماجد داخله وجنبها ماجد ساندها ...ومن خلفهم كنان الابتسامه شاقه الحلق!! تنهدت منار ووقفت بعد ما رسمت على وجهها ملامح الهدوء...وبنبره هادئة: مبارك ما عملتم!! ماجد أجلس امه وناظرها بابتسامة:الله يبارك فيك!! اقتربت من كنان وسلمت عليه وهي تبارك له !! رنا ناظرت اختها وابتسمت من كيد النساء ... ام ماجد للحين منظر بيلسان قدام عيونها ..ما حبت تتكلم وتنزع فرحة كنان ...وأصلا ما تدري انه خطب بيلسان... بدأت تستغفر والكدر والضيق بداخلها ...ما تدري اذا رح تنجو من هالوقعه او لا ...مستغربه من فرحة كنان حسب علمها ما يبغى ليان وأنها مثل اخته صدق الرجال ما ينعرف لهم!! رنا بحماس: قول لنا وش صار بالضبط ؟! ومتى الخطوبة ؟! قاطعها ماجد : ما اتفقنا على شيء ...بس خلاص خطبناها رسمي واعطونا الموافقه ...باقي الامور نتفق فيها عن طريق الجوال!! ابتسم كنان لكلام أبوه ...وبعدها استأذن لما رن جواله ...وطلع خارج البيت عنده مناوبه!! منار بعد خروج كنان ما قدرت تسكت نطقت بعتب: ليان وش ذنبها تكسرون فرحتها؟! يقولون إنك خربطت بالاسم وخطبت بيلسان بدل ليان؟!! ام ماجد نطقت باستنكار : بيلسان؟!!! على اساس رايحين تخطبون ليان؟! ماجد ابتسم بثقل: كل شيء نصيب ..كنان يبغى البنت ما هو منطق اروح اخطب أختها!! وما اتوقع يا ام هاني تقبلين على ليان تعيش مع انسان قلبه مع اختها ..وش رح يكون موقفها لما تكتشف هالشيء؟! ناظر امه الي للحين الصدمه مرتسمه على ملامحها: وش فيك يمه؟! وانت بعد معترضه على الخطوبه ام ماجد بضيق نطقت: بس بيلسان اخذوها للمستشفى ماجد عقد حواجبه باستغراب سيارة الإسعاف الي جاءت لبيلسان : مستشفى؟! وش صاير معها!! زمت شفتها بضيق ام ماجد وهي تحس صخره جاثمه فوق صدرها: وقعت عن الدرج قاطعها ماجد بابتسامة: وأنا ظنيت صاير شيء ...البارحه وقعت رنا عن الدرج ام ماجد ناظرتهم بتردد :ما ظنيت البنت تطلع منها سليمه ... وقعتها قويه وكانت فاقده الوعي ..وما تتحرك واسمعهم يقولون نبضها ضعيف.... ماجد عقد حواجبه باستنكار: ما احد جاب سيره ؟!! خليني اتصل بعمي واشوف وش صار معها ..ما احد يجيب سيره لكنان أبدا!! ** ** ** تنهد بارتياح بعد ما رجع للمريضه النبض ... يحس بالراحه انه انقض حساة انسان ..ناظر الدكتور الثاني وهو يتكلم عن وضعها وكيف نزفت كثير وحالتها للحين ما هي مستقرة....تنهد وناظر جهاز دقات القلب وهو يفكر ببيلسان وش رد فعلها عن الخطوبة؟! رح يجلس مع ليان او يكلمها ويفهمها الموضوع .. متأكد رح تتفهم موقفهم وما تحط في بالها شيء او تزعل منهم!!! قرر يطلع ويتصل مع جسار او مسعود يمكن يلقى عندهم اي خبر من اخواتهم!! خرج بمرافقه الدكتور حمد .. عقد حواجبه باستغراب وهو يشوف اخواله وجده واقفين وملامحهم ما تبشر بخير!! عبدالله نطق : وش صار؟! الدكتور حمد بهدوء: الحمد لله سيطرنا على الوضع وليد بضيق وخوف: صحيت؟! الدكتور حمد هز رأسه بالنفي: لا أبو فيصل قاطعه وهو يناظر كنان: كيف وضعها؟! كنان عقله يحاول يركب الامور بس ما هي راكبه ...لما دخل ما شافهم او ما انتبه عليهم ...والسؤال الاهم مين الي بالداخل؟! ما ينكر انه ما انتبه على المريضه وما ناظرها ... وليد وهو يشوف سكوته حس إنه الوضع ما هو مطمئن..نطق بضيق: لا حول ولا قوه الا بالله!!! الدكتور حمد: صدقني استاذ وليد كل شيء تحت السيطره ...باكر بإذن الله رح تكون مثل الحصان ...بس نحتاج اوراقها وليد زفر بتعب: ما معي شيء الحين ..الحين اشوف اي احد يجلبهم!! بعد ما غادر الدكتور ..نطق عبدالله باستغراب: متى وصلت ودخلت وربي ما شفتك؟! كنان نطق وعقله يفكر بهوية الشخص الي بالداخل: عندي مناوبة ..غريب ما شفتكم لما دخلت .. ابو فيصل باهتمام: يعني الحين وضع بيلسان بخير عقد حواجبه باستنكار ..الحين الي بالداخل بيلسان؟!!! ليه ما احد خبره ولا عنده علم ... والأهم ليه حالها كذا ..نطق وهو يحس ريقه نشف: هي وش صار معها بالضبط؟! ** ** **مر ايام على تواجدها بالمستشفى من لما صحيت الصمت يخيم عليها ... يا دوب تنطق كم كلمه!! ام خزامى ارخت ظهرها للكرسي وهي تنطق باهتمام: اذا يوجعك شيء انادي الممرضة ؟! تناظر السقف والصمت يخيم عليها للحين ما هي مستوعبه شيء ...اخر شيء تذكره طلعت مع عائشة .. الصداع يضرب برأسها ضرب ...وما هي قادرة تتحرك ... ام خزامى اقتربت منها لما شافت دموعها تنزل بصمت..جلست على طرف السرير بحذر..مسحت دموعها بنبره حانيه نطقت: ليه الدموع يا قلبي!! يوجعك شيء ؟!! ليه ساكته؟! جدك قلقان عليك سكتت لما شافت سلطان دخل والهم مكتسي ملامحه ..اقترب منها وبابتسامة نطق: كيفك الحين؟! هزت رأسها بهدوء سلطان بضيق: يا ابنتي وش فيك ما تتكلمين؟! الدكتور يقول وضعك عادي ليه ساكته؟! في شيء مضايقك؟! تناظر جدها وهو يتكلم ويحثها حتى تنطق ...زمت شفتها تمنع نفسها من البكاء!! ام خزامى مسكت يدها: لا تحبسي هالدموع .. ابكي يا قلبي ...لا تكتمي شيء بقلبك يا بعد قلبي!! خلال ما ختمت كلامها هزت رأسها بضيق وهي تشوف بيلسان دخلت بموجه بكاء .... سلطان اشر لزوجته بعيونه يتركونها على راحتها!! بعد وقت مسحت وجهها بكفيها ام خزامى ابتسمت لها: ارتحت الحين؟! اذا يوجعك شيء انادي الممرضة نطقت بصعوبه فوق طاقتها: الصداع سلطان هز رأسه بتفهم: الدكتور يقول هالصداع بسبب الضربة على رأسك ...مع الايام رح يرجع لوضعك الطبيعي!! كل شيء عندك تمام بس رح تبقين تحت الملاحظة ...وليد ما يبغى يخرجك حتى يتأكد إنه وضعك تمام!! هزت رأسها وغمضت عيونها ...لعل وعسى يخف الصداع ...تحس بالضيق بداخلها يتصاعد ما تبغى تكون علة أو تثقل على احد ...كانت بنعمه كبيره تقفز هنا وتركض وتمشي بدون أي ألم أو عائق والحين عاجزه تتحرك بعد ما انكسرت رجلها اليمين ...كم يحتاج وقت حتى تسترجع صحتها وعافيتها ...رددت بداخلها يا رب لك الحمد على النعم الي انعمت علينا فيها ..يا رب لك الحمد والشكر كما ينبغي لوجهك وعظيم سلطانك " تسمع صوت وليد لما دخل ... رد السلام وبعدها سأل عن وضعها: كيفها الحين ؟! ام خزامى هزت رأسها: ان شاء الله تكون بخير وليد عقد حواجبه:بس كأنها اغلب الوقت نايمه ؟! أنا ما هو عاجبني وضعها!!! احس صحتها سلطان هز رأسه بتأكيد: حتى كلام ما تتكلم مثل الناس!! ام خزامى زمت شفتها بضيق وهي تناظر بيلسان غاطه بالنوم ...من لما صحيت ما نطقت كلمتين واغلب وقتها تقضيه بالنوم!! وليد بحيره: افكر انقلها لمستشفى ثاني! سلطان : اصبر يومين ونشوف وش يصير معها..يمكن يكون كلام الدكتور مضبوط من حر الضربه للحين متخوفه ام خزامى قاطعته: أنا ما هو عاجبني سالفه النوم هذي!! وليد هز رأسه: الحين رح اشوف الدكتورونتأكد مرة ثانية ونشوف كيف الوضع ....دام حالها كذا ما رح اخرجها من المستشفى وش يضمن ما يصير عندها مضاعفات!! سلطان هز رأسه: وأنا رايح معك ! هزت رأسها ام خزامى بقلة حيله بعد خروجهم ....لحظات ودخلت ليان بخطوات هادئة...وضعت حقيبتها وكتبها على جنب ونطقت باهتمام: كيف وضعها اليوم ؟! ام خزامى ناظرتها وواضح راجعه من الجامعه مباشره هنا: الحمد لله!! ليان وهي تناظر اختها : اكلت شيء؟! ام خزامى هزت رأسها بالنفي ..جلست على السرير ليان ومسكت يدها بهدوء: يا ربي يشيفها وتقوم بالسلامه ...وربي لما اشوفها كذا احس نفسي أختنق قطعت كلامها لما خنقتها العبرة!! ام خزامى بضيق: ربك كريم ليان وهي تمسح دموعها: ما اتخيل البيت بدونها ... ام خزامى هزت رأسها: الدكتور يقول وضعها تمام ... يوم يومين ورح تسترد عافيتها!! ليان من قلبها : امين امين! خالتي خزامى وين ؟! ام خزامى: رجعت للبيت تعمل شيء تأكله بيلسان يمكن ترضى تأكل ** ** ** كنان ناظر الدكتور وهو يتكلم عن وضعها الصحي ...بعدها التفت على وليد الي نطق: الصداع ما يفارقها الدكتور بمهنيه: شيء طبيعي مع الوقت يزول...وضعها طبيعي وما له داعي تواجدها مثل ما قلت لك وان شفتم شيء ما هو طبيعي تقدر تراجعونا..بس اهتموا لأكلها لأنها فقدت دم كثير!! بعد وقت استأذنوا وطلعوا من مكتب الدكتور ...كنان نطق بهدوء : خالي وليد رفع يده بقهر: ترى للحين ما نسيت حركتك انت وأبوك بليان ؟! كذا تعمل بليان تكسر فرحتها ؟! وش ذنبها ؟! الكل تجمع عندها وعاشت دور العروس وبكل بساطه انت وابوك تدمرون نفسيتها؟! وش هالأنانيه هذي؟! لا تظن إنها بيلسان تقبل فيك ..اصلا كيف تقبل بشخص خطب أختها ...وما استبعد إنه كل الي صار فيها رد فعل بعد ما سمعت إنك خطبتها ... قاطعه كنان ومن الداخل انزعج من الكلام ...بس اظهر الهدوء وهو ينطق بثقه: انا ما خطبت ليان من الأصل ... ولا تنسى جدي أعطانا الموافقه وليد بتحدي: أنا ما اعطيت الموافقه ولا عمي سلطان أعطى الموافقه ولا حتى بيلسان اعطت الموافقه ؟! سلطان ناظر كنان وبهدوء نطق: لا تبني احلامك يا ولدي هنا ..لا تظن بيوم من الايام تكون لك..ما رح تتزوج الا من شخص اختاره بنفسي...ومستحيل ارمي بيلسان تحت يد منار!! كنان رفع حاجب بعدم رضا عن كلامهم: حدك يا عم أمي ترى ما أسمح لاحد قاطعه وليد: ما قلنا شيء ..بس كل شيء قسمه نصيب!! كنان هز رأسه: اذا كتب لي ربي معها نصيب رح يتم لو وقف العالم كله بوجهنا..لا تنسى يا خالي ما هي حلوة بحقكم الانسحاب بعد ما اعلنا الخطوبه... قبل ما ينطق وليد ..تابع كنان كلامه: الحين ما هو وقت هالكلام ...الاهم الحين تقوم بالسلامه وهذا المهم ...باقي الامور نتفق عليها بعدين!! ** ** ** ** * مر اسبوع على خروجها من المستشفى ...نطقت بابتسامه: لو ادري إني بالكسر رح تجلسين عندي كان زمان كسرت رجلي!! ام خزامى ابتسمت لها: الله يحفظك ويبعد عنك الأذى قاطعهم دخول خزامى ومعها الاكل...ابتسمت بيلسان بخيبه اول الايام تغيرت خزامى وكأنها ثوب وقلبتيه.. بس سرعان ما عادت حليمه لعادتها القديمه ..الحين تأكدت وواثقه انها تغار منها بسبب قربها من جدها وجدتها ..ما في تفسير غير كذا!! خزامى وهي تناظر أمها: اتركيها تأكل لوحدها تراها ما هي صغيره تتدلع علينا... تابعت كلامها وهي توجه الكلام لبيلسان: تراك كبيره وواعيه أمي يا دوب تقوم بنفسها فلا تجبرينها تجاملك وتقابلك طول الوقت!! ام خزامى ناظرتها بعتب: وش هالكلام..الي يسمعك يقول طول الوقت احملها وألف فيها البيت؟! بيلسان زمت شفتها وقررت ما ترد أفضل لها ...ام خزامى ابتسمت لها:يلا يمه لزوم تأكلين تعوضي الدم الي فقدتيه!! بيلسان انسدت نفسها عن الأكل من كلام أمها....اضطرت تجامل جدتها وتأكل على عينها!! ام خزامى بتساؤل: وليد رجع؟! خزامى جلست على حافة السرير: لا ...اليوم في ناس يبغون يخطبون ليان ويبغى يحضر الضيافه حست انها سمعت غلط ..خطوبه لليان؟! طيب كنان وش صار على خطوبته؟! معقول تفركشت الخطوبة ؟!وش السبب؟! ناظرت جدتها الي نطقت: وكنان متى رح يملك ؟! خزامى مطت شفتها بلامبالاة: سالفته طويله وما رح يرسون على بر!! عقدت حواجبها معقول خطب وحده ثانيه؟! عقلها مشوش ومب قادره ترتب الأمور... نطقت بتوجس وحواجب معقودة: كيف يخطبونها وكنان خطبها لليان! خزامى مطت شفتها بسخرية: ليه ما احد خبرك؟! ام خزامى خزتها : خزامى خلاص خزامى ناظرت امها: ما يصيرالبنت تجلس هالوقت وهي ما تدري عن شيء!! رجعت ناظرت بيلسان بسخريه: سبحان الله يعني لو تجلسي ألف سنه ما ظنيت كنان يناظرك او يقبل فيك او حتى اهله مستحيل يقبلون فيك وخاصه العلاقات الي بيننا ما شاء الله قويه! ام خزامى ناظرتها بانتقاد: ماعلموك بالجامعه كيف تتعاملين مع البشر ؟! خزامى رفعت حاجب: ليه وش فيني؟! المهم ماعلينا ...هذا يا حلوة ابو العريس لما جاء يخطب ليان خربط بالاسم وقال قدام الرجال اسمك ..كذا انحرج ابو كنان وما قدر يعدل الخربطه واضطر إنه يبلع موس وينكتم وطبعا جدك رحب بالموضوع وقال لهم بيلسان ابنتكم جاءتكم بهدومها انتم فصلوا وحنا نلبس! والحين انت خطيبة كنان رسمياً!! تدرين يمه يمكن جاءت هالفرصه حتى اطلع عيون منار وفرصة اقهرها عن طريق بيلسان وربي الا اخليها تندم على كل كلمه قالتها بحقي!! عقدت حواجبها باستنكار وهي تحس أمها تمزح معها ..وش هالخرابيط الي تقولها ...خربطوا بالاسم؟!! كيف تتزوج شخص جاي يخطب اختها ؟! وكيف جدها يعطيهم الموافقه بدون ما يسمعون رأيها؟! ما تدري كيف يفكرون يقررون حياة غيرهم ...ما رح تسكت لهم أبدا! صحيح تمنت يكون من نصيبها بس ما هو بذي الطريقه...والكل اكيد يقول نفس القصة ما يبغاها يبغى اختها بس خربطوا بالاسم!! ناظرت جدتها الي تتكلم بانتقاد لخزامى على تفكيرها وانتقامها.. مطت شفتها بسخرية هذي نهايتها تكون اداة انتقام !! ** ** ** ام ماجد وبيدها السبحه ...تناظر منار الي تتكلم بحرقه: أنا ما اوقف بطريق احد بس صعبه علي ام ماجد بهدوء: انت مصعبه الامور..البنت ما لها علاقه بالماضي وما تعرف شيء عن ماضيكم... منار بقهر: وليان لذي الدرجة ما تفكرون بحالتها يوم كسرتم فرحتها ام ماجد قاطعتها: ترى من يوم الخطوبه وانت تعيدي وتزيدي نفس السالفه وقدام ماجد تبلعين لسانك ..انا وش علاقتي ؟؟! روحي كلمي ماجد تراه هو الي خربط وقال هالاسم...وبعدين البنت ما شاء الله عليها رح تحبيها مع الايام...لزوم نفرح لفرح كنان دام إنه مبسوط على هالخطوبة؟!! واليوم او باكر رح ازور البنت خلاص صارت كنة لنا قاطعتها منار بقهر: هذي مثل امها تتمسكن حتى تتمكن!! باكر رح تقولون يا ليت سمعنا كلام منار ...انتم الخسرانين!! ام ماجد بضجر: وربي اذا ما قفلت هالشريط الا اقوم من كل هالمكان!! منار هزت رأسها وبداخلها تفكركيف تقهر خزامى ووليد عن طريق بيلسان تبغى تحرق قلبهم مثل ما حرقوا قلبها ...بس خليها ترتب الأمور من جديد وبعدها يصير خير !!! دخل كنان بروقان ..رد السلام وجلس جنب جدته ..ام ماجد بابتسامة له: وش اخبار بيلسان؟! كنان ابتسم: اتصلت اليوم بجدي وسألته عنها يقول بخير ام ماجد باهتمام: ما اتفقتم على موعد الملكة!! كنان زم شفته بضجر: خالي وليد يقول ما في ملكة الحين ..يوم الزواج هو يوم الملكة؟! مطت شفتها منار بسخرية خايف على بناته أما بنات الناس بستين داهيه....بداخلها حقد عليه وكره ..ما يهمها ولا يعني لها بعد ما عوضها ربنا بماجد الي يسواه بألف مرة ...بس تواجد بيلسان رح يوقظ احقاد الماضي الي اندفنت مع الايام ... ام ماجد: ومتى إن شاء عزمت على الزواج؟! كنان ابتسم: خلي العروس بالاول ينجبر كسرها وبعدها يصير خير!! ام ماجد بملامح مريحه: ان شاء الله ربنا يفرحك ويسعدك ويرزقك الذرية الصالحة! هز رأسه بابتسامة عريضة: امين امين! ناظر منار والسكون يحيط بها ..يدري إنها ما هي راضيه عن هالزواج لكن متأكد مع الايام رح تنسى وتتقبل الوضع!! للحين ما يدري وش رد فعل بيلسان على الخطوبه معقول مبسوطه مثله والا متضايقه ؟! حاليا ما يقدر يوصل لها ولا يشوفها ..بس اذا زارتها جدته تقدر تجيب له التقرير بالتفصيل!! *** *** *** خزامى بغيض نطقت : سرحي شعرك مثل العالم والناس والا يا بيلسان أحلق شعرك زيرو تفهمين!! بيلسان بهدوء: وشفيه شعري؟! خزامى بعناد : ماهو عاجبني...انت وش مشكلتك مع الجدله؟! ترى فيه ألف تسريحه للشعر ام خزامى تحس بصداع من عصبية خزامى: وش فيك على البنت ؟! يا حلاة شعرها بالجدله!! ابتسمت بيلسان لجدتها وهي تغمز: يا حبي لك!! خزامى بعصبية فكت الجدله بقوة!! عبست بيلسان ملامحها من الألم....ام خزامى تحركت لهم ..ابعدت خزامى بزعل: اطلعي برا كذا قطعتي شعرها ؟! رأس البنت مفلوع وحضرتك تسحبينها وكأنها شاة!! ترى للحين مب راضيه عليك بعد ما قصيت شعرها والحين تشدين شعرها كذا؟! وش تبغين فيها ...تربط شعرها مثل ما تبغى ...وجكر فيك رح تربط شعرها جدله خزامى بقهر نطقت: يمه تبغين يقولون شوفوا التخلف قاطعتها ام خزامى لسخافة عقلها: ما رح يقولون تخلف علشان جدله ...ترى التخلف بالعقل ما هو بالشكل!! ما اقول الا حسبي الله على الي اعطاك الشهادة ما علموك كيف تتعلمين مع الاوادم!! خزامى ناظرت امها بقهر: يمه !! ام خزامى بحده: وجع إن شاء الله..اطلعي برا واتركينا لوحدنا أنا اجهزها بنفسي حركت شفتها تعترض بس امها قاطعتها بحزم: قلت برا والا وربي لأطلع من هالبيت! هزت رأسها على مضض ..طلعت وهي ترسل نظرات توعد لبيلسان!! بعد خروجها ضحكت بيلسان ودموعها تتراقص بعيونها!! ام خزامى تنهدت بضيق: ما عليه يا يمه لا تتضايقين من أسلوبها...من يوم ما تزوجت وليد وأنا غاسل يدي منها ...تجاهليها ولا تكدري خاطرك بيلسان مسحت دمعه تسللت على خدها وتبعتها دموع: ما ابغى أقابل أحد ... أنا ما وافقت على الخطوبه ام خزامى برجاء: لا يسمعك سلطان تراه تشاجر مع ابو فيصل على هذا الموضوع.... ما يبغى كنان زوج لك ..يقول لو تزوجها راكان او تركي اخف علي من كنان!! بيلسان بقهر: ما هو من حق احد يتدخل بهذا الشيء ...المفروض يشاوروني او يسألوني ..احس نفسي مثل الخضار يبيعون ويشترون على كيفهم!! وفوق هذا مخربطين بالاسم...اخخخ فيني قهر ام خزامى زفرت بضيق: استخيري اذا كان خير لك ربنا رح يتمم لك الموضوع على خير وإن كان شر ربنا رح يصرفه عنك!! زمت شفتها بضيق...كل شيء من حولها يخنقها حتى الحلم الي انتظرته ما فرحت فيه وكان بطريقه بشعه..كيف تناظر ليان ...اكيد تبغى كنان واكبر دليل رفضها للعريس الي جاء يخطبها بالرغم انها مواصفاته ما تنرفض.. متأكدة الاثنين بينهم مشاعر وهي العذول بينهم!! كيف تتقبل كنان على إنه زوج لها وتعيش حياة طبيعيه معه..رح يبقى طول حياتها بينهم حاجز اسمه " ليان"!! أم خزامى بهدوء: الجماعه على وصول لزوم تجهزين نفسك قبل ما يوصلون قاطعتها بيلسان بروح خاويه: وليه اتجهز؟! الي يسمع يقول متعنيين لي بالخطوبه. ..يمكن مخربطين بالاسم وجايين يزورون ليان!! نهرتها ام خزامى: وش هالكلام؟! بلا سخافه بيلسان ردت بضيق: يمه أنا كذا هذي طبيعتي عجبهم ما عجبهم مع ألف سلامه ... ام خزامى كشت عليها: على الاقل عدلي شعرك كل جهة اطول من الثانية...الله يهديك يا خزامى وربي فيني حره منها .. ابغى احوسها حوس !! بيلسان عبست ملامحها بوجع لما بغت تعدل شعرها: يوجع للحين ...ما رح ألمسه ...الظاهر حركت الشعر الي مكان الجرح!! ام خزامى اقتربت تشوف الجرح: خلاص لا تلمسيه عمره لا عجبهم..الباب يدخل جمل !! بيلسان بوجع نطقت: لا تلمسيه يمه ام خزامى بحذر ناظرت مكان الجرح: ما لمسته...لا تخافي وضعه تمام!! مسكت كأس المويه وضعت على يدها شوي واقتربت من بيلسان ... رح اغسل وجهك من هالدموع!! غسلت لها وجهها ومدت لها بالمنشفه: مسحي وجهك مسحت وجهها بشويش...ناظرت خزامى الي فتحت الباب وهي تنطق بترحيب: هلا هلا حياك الله !! اقتربت ام ماجد سلمت على ام خزامى وبعدها اقتربت من السرير وسلمت على بيلسان وهي تنطق : الحمد لله على السلامه!! بيلسان بخفوت وهي تحس نفسها على وشك تدخل بموجه بكاء ثانيه: الله يسلمك!! جلست ام ماجد وهي تسأل عن الحال والاحوال ....زمت شفتها بيلسان بضيق لما دخلت ليان وعيون ام ماجد عليها ...اكيد الحين متحسفه على هالغزال الي طار منهم وتدبسوا فيها!! مالت عليهم وكأنها ميته على ولدهم ...نزلت راسها من الحقيقه المرة ميته على ولدهم وتنتظر هذي اللحظة!! اختلست النظر لليان جالسه بهدوء والصمت يغلفها على عكس طبعها ... اكيد متضايقه بعد ما طار كنان منها!! زمت شفتها بملل وهي تشوف نظرات خزامى المتوعده متأكدة كل هذا لأنها ما بدلت ولا جهزت شيء بنفسها ....بنفس المنظر قبل ما تطلع من الغرفه ...صدق فاضيه اشغال مب قادرة تتحرك من الوجع فاضيه تتضبط وترز نفسها قدام جدة كنان ...ما تدري إنها قرفانه نفسها ...ما تدري وش حل هالصداع ما يفارقها والحين بدأ يضرب برأسها أقوى ...غمضت عيونها للحظات يمكن يخمد الوجع...و بدون وعي غطت بالنوم!! خزامى انتبهت على بيلسان تغط بالنوم وهي جالسه ...ما تدري وش هالحاله الي اصابتها تنام بدون سابق انذار ...اقتربت منها وعدلتها وهي تناظرها عابسه ملامحها من الوجع...غطتها ورجعت جلست وهي تناظر ام ماجد الي نطقت باستغراب: للحين تعبانه؟! ام خزامى : ذابحها الصداع للحين ما فارقها بس الدكتور قال ايام ويروح الصداع ...ويرجع كل شيء مثل أول وأحسن!! ام ماجد هزت رأسها: الله يشافيها ويعافيها !! ام خزامى : امين يارب العالمين!! ** ** ** جالس بالحديقه يستمع لأمه وهي تتحدث عن زيارتها ...عقد حواجبه باستغراب: كيف يعني؟! ام ماجد نطقت : ما ادري حسيت فيها شيء ما هو طبيعي ..دوبني جالسه انتبهت عليها نايمه وهي جالسه على السرير ماجد عقد حواجبه: وش فيها هذي..اي انسان يغلبه النوم وينام قاطعته بشرح: صحيح يا ولدي ..بس التصرف السليم لما شافتها امها انها تصحيها وتقول لها قومي عيب تنام وانا جالسه ازورها او تقول لها عدلي نومتك .. بس هي بسرعه تحركت ومددتها على السرير وغطتها ...وطول الوقت وهي تغط بالنوم!! رجعت للبيت وهي نائمه ماجد بنخليل: يمكن من المسكن فيه ماده منومه علشان كذا تنام ام ماجد هزت رأسها: كل شيء جايز ....بس تدري كسرت خاطري هالبنت لو تشوفها ما تعرفها ...نحفانه بزياده وشعرها ما ادري وش يعجبهم بذي القصات...هالمخبوله كان عليها شعر يجنن طويل وناعم !! ماجد : وكأنك ما تعرفين البنات كل ساعه موضه شكل!! ام ماجد هزت رأسها وهي تكمل فضفضه: والله يا ولدي لو اقولك شيء يمكن ما تصدق ؟! ماجد بانجذاب للموضوع: وش هو؟! ام ماجد: حسيت هالبنت مهيونه عند أهلها.. يعني ما ادري حسيت فرق بينها وبين ليان !! يعني لو شفت غرفتها ..سرير سوقي والغرفه فاضيه ما فيها اثاث الا كنبه اتوقع وضعوها علشان الي يزورها قاطعها : يمكن بيتهم كذا لم ماجد هزت رأسها بالرفض: لا يا ولدي ...طلبت اشوف بيتهم ...فرق عن غرفة ليان ...غرفة ليان شيء خيالي ..وغرفة البنت الصغيرة انيقه ومرتبه حتى غرف الضيافه عندهم اثاث فاخر يعني استغربت ليه هي الوحيده غرفتها كذا؟! ماجد عقد حواجبه وهو يفكر بكلام أمه ..ويتذكر لما اتصل فيه وليد علشان خطبة ليان وبعدها كنان أنكر إنه خطب ليان ...ليه عمل كذا ؟! يتذكر لما كلمته ليان وقالت علاقة بيلسان سيئة مع امها وأبوها!! يحس في حلقه ناقصه بالموضوع وش سبب هالتفرقة بين عيالهم ؟!!! ** ** ** مرت الايام بسرعه وفكت الجبيرة ...ورجعت جدتها للقرية ..كانت اجمل الايام وجود جدتها دللتها ورجعتها بذاكرتها لايام القرية ..وكانت درع حمايه لها من خزامى ومحامي دفاع ... حضرتةالعصير وتوجهت لغرفة ليان ..طرقت الباب ودخلت بهدوء ....من يوم الخطوبه ما فتحت معها الموضوع ولا تكلمت بشيء يخص الموضوع...وليان نفس الشيءما علقت على الموضوع ولا كأنه صار شيء...وبنات عمها ما احد فتح الموضوع متأكدة مراعاة لمشاعر ليان ... أول ما دخلت ابتسمت ليان لها: جاء بوقته نشف ريقي من المطالعة!! هزت رأسها وجلست على طرف السرير وهي تنطق بهدوء: تطالعين كتب خاصه بدراستك ليان ابتسمت: اكيد لزوم اتوسع بمجال تخصصي وما اقتصر على مقررات الدراسة!! هزت رأسها بيلسان بهدوء ..ارتشفت من العصير وهي تناظر ليان رجعت تناظر بكتابها !! نطقت بتردد: ليان! رفعت نظرها ليان لها : هلا اخذت نفس بيلسان وبعدها نطقت بتوجس: بالنسبة لموضوع كنان...أنا ما لي علاقه بالموضوع وما ادري عن شيء وما احد اخذ رأيي قاطعتها ليان بهدوء: ادري إنك ما لك علاقه بالموضوع...يعني عمي ماجد خربط بالاسم ... بيلسان وموضوع الخربطه وكأنه خنجر ينغرس بقلبها ...نطقت بهدوء ظاهري ومن الداخل قلبها يتمزق: والغلط يتصحح ... أبوي سلطان قال إنه رح يجمع نفس الجاهة ويصححون الخطأ الي صار ..ويتم موضوعك مع كنان!! ليان قفلت الكتاب ونطقت بضيق: جدي ابو فيصل حلف أيمان مغلظة ما تكونين الا لكنان ..وما يبغى يكونوا. مسخره للناس ....كل شوي اسم عروس قاطعتها بيلسان: بس أنا ما رح اوافق على هذا الزواج قاطعتها ليان بسخرية: إذا احد استشارك وقتها قولي هالكلام!! بعدين أنا انتهى موضوعي مع كنان .. صدقيني مو متضايقه وما همني الموضوع..كنان شخص قريب مني كأخ ..بس ماما فتحت موضوع خطوبته قدامي واصرت عليه حتى اكون قريبه منها ...يعني هو كان حلقة وصل بيني وبين ماما ... ومتأكده هو نفس الشيء وافق علشان يرضي ماما لأنه يحبها كثير ويقدرها ...لا تفكرين من هذي الناحيه صدقيني ما تضايقت ولا فكرت بالموضوع...كل شيء نصيب .. وبعدين أنا عن قريب رح يعلنون خطوبتي بيلسان عقدت حواجبها باستنكار ما عندها علم بشيء: خطوبة ؟! ليان تنهدت: الاسبوع الي طاف بابا خبرني إنه نورس خطبني ...وطلب مني أستخير وأرد له خبر ...واليوم أعطيته موافقتي!! حست بيلسان بمويه بارده بين أضلعها ...لها اسبوع ليان مخطوبه وما خبرتها وما علمتها بشيء والا خايفه تسرق العريس منها ... والي زاد قهرها ابوها ..ليه ليان أخذ رأيها واعطاها فرصه تفكر ...وش هالتفريق الي بينهم؟!! حست بالاختناق لو جلست لحظات رح تنفجر....وقفت وهي تنطق بمجامله: ربنا يوفقك ويختار لك الشخص الي يستحقك... استأذنت وطلعت من الغرفة والضيق يتصاعد بداخلها ...نفسها تمسك العصير وتضربه بالجدار يمكن تطلع حرتها وقهرها .... جلست بالصالة ووضعت العصير على الطاولة ما لها نفس بشيء... اخذت نفس عميق تهدي نفسها ...تحس نفسها بدوامه محتاره بين امرين..شيء بداخلها يحثها توقف بوجه الكل وترفض خطوبتها من كنان والنتيجه رح تخسر زواجها من كنان .. حست قلبها انقبض عند هذي النقطه..او إنها تسكت وتسلمهم زمام الأمور وبالنهاية رح تتزوج الشخص الي تبغاه!! زفرت بضيق وارخت رأسها على الكنبه .. غمضت عيونها وهي تفكر بين الامرين ... وكالعادة لحظات ودخلت بسبات عميق!! بعد وقت دخل وليد البيت وخلفه خزامى ...اشر على بيلسان: شوفي وين نايمه؟! متى تترك هالعادة وين ما تجلس تنام! خزامى : تعودت ايام المرض طول الوقت نايمه جسمها صار طبيعي ينام هالكثر ... وصار كسول اقتربت منها وهزتها : بيلسااااان بيلساااان قومي! زفرت بضجر خزامى: اففف ما أثقل نومها...ما ادري ما تتعب رقبتها كذا!! رجعت تهزها أقوى: يا بنت قومي!! عبست ملامحها بيلسان بانزعاج ..ولحظات رجعت للنوم ... خزامى بملل: صحيها انت خليني أبدل ملابسي!! اقترب وليد منها ..هزها بخفه: بيلسان تحركي هزها بقوة: تحركي!! فتحت عيونها بانزعاج ...تحس رقبتها انكسرت .وين موجوده ؟! بدأت تتضح عندها الصورة ...زاد عبوسها لما شافت وليد واقف فوق رأسها...نطق بانزعاج: كم مرة قلت لك لا تنامين بالصالة!! ما أدري هالعناد متى تتركينه!! تشوفه يتكلم بس عقلها ما هو مستوعب وش فيه ...فركت وجهها بيدينها لعلها تصحصح ..بس مو قادرة تفتح عيونها وكأنه شيء غصب عنها يقفل عيونها..وباستسلام غمضت عيونها للنوم...لحظات فتحت عيونها برعب من صراخه الي هز البيت ... تحس قلبها يدق طبول تناظر حولها بفزع مستغربه وش صاير... طلعت ليان بخوف على صراخه ..ناظرته باستغراب: وش صاير؟! زفر بقهر: الف مره قلت لها لا تنامين بالصالة وبكل وقاحه ترجع تنام والحين كأني أكلم جدار!؛ وبنبره غاصبه ناظر بيلسان: قومي تحركي للمطبخ جهزي عشاء لإخوانك..وش هالكسل الي فيك ؟! زمت شفتها بضيق لما استوعب عقلها إنه كل هالصراخ عليها التفتت على خزامى الي اقتربت وهي تنطق: تتعب نفسك على الفاضي بالكلام لأنه لو نكلم حمار كان استوعب وفهم علينا ...قومي ساعديني رح اجهز العشاء!! وقفت بشويش وهي تحس نفسها ما هي متزنه .... تحركت للمطبخ بهدوء والصمت يغلفها ...تتمنى للحين رجلها مكسورة ....عاشت لحظات راحه وهدوء بوجود جدتها!! بلعت غصتها وبدأت تجهز مع امها ودموعها على وشك النزول...رفعت نظرها للسقف للحظات تمنع نزول الدمع ...تركت الي بيدها وتوجهت للصالة وهي تسمع نداء ابوها ..اقتربت ونطقت بهدوء: نعم نطق وهو يطقطق بالجوال: انزلي عند امي ضروري!! مطت شفتهابضيق وتوجهت للغرفه تلبس وتنزل ....وهي مستغربه وش تبغى منها !! نزلت عند جدتها الي جالسه بالصالة ...نطقت بهدوء: ابوي يقول إنك طلبتيني ام فيصل هزت رأسها: ايه ..ام خليل ما هي موجوده والشغالة تقول مريضه اذا ما في كلافه تنظفي المطبخ ولك الأجر إن شاء الله!! كتمت ضيقها قرفانه الشغل الي فوق حتى تشغلها بشغل اضافي..هزت رأسها بمجامله وتوجهت للمطبخ تجهزه والعبرة تخنقها!! بعد لحظات دخل أبو فيصل ومعه كنان .. سأل بتوجس: نزلتيها! ام فيصل بقلة حيلة: يعني المطبخ ما في شيء الحين تقول جدتي بس تبغى تشغلني ابو فيصل بابتسامة: يعني لو يعرف وليد بوجود كنان ما رح ينزلها ..والرجال من حقه يشوفها ويكلمها بعد ما صارت خطيبته!! كنان ابتسم بثقل: الظاهر خالي وليد رح يطلع روحي!! ابو فيصل وهو يجلس: لا تهتم أنا معك ... جلس كنان وهو يسأل : متى نملك يا جدي؟! ابو فيصل هز رأسه: نتشاور أنا وخالك وبعدها نعطيك خبر ! وقف ابو فيصل: أروح أناديها توجه للمطبخ بخطوات هادئة ...ناظرها واقفه عند المجلى تغسل يدينها : الله يعطيك العافيه!! تعبناك معنا؟! مطت شفتها بضجر: ما ادري كيف جدتي تفكر ..نزلتني من فوق علشان اغسل كوب؟!! وش رح يصير لو ما احد غسله!! ابو فيصل ابتسم لها: انتم الحريم مثل بعض ....المهم تعالي معي كنان بالصالة يبغى يسلم عليك!! عقدت حواجبها باستنكار:نعم! وليه يسلم علي!! ابو فيصل رفع حاجب: ناسيه إنه خطبك قاطعته بانفعال من تصرفاتهم: بس ما وافقت عليه ...وما اسمح لكم تعاملوني وكأني لعبة تحركوني على كيفكم ...خطوبتي ما رح تتم من كنان ..ما ابغاه ولا ابغى اشوف وجهه!! ابو فيصل احتدت ملامحه: وطي صوتك ...خطوبتك منه رح تتم ورجلك فوق رأسك نطقت بقهر: ما ابغاه وما احد يجبرني على شيء ما ابغاه ..ولا تنسى أنا ما اتزوج بدون شور أبوي سلطان أبو فيصل: سلطان عندي وش عليك منه؟! .والحين تحركي بس ردي السلام ترى الرجال جالس ينتظر!! بيلسان سحبت كرسي بعناد: خليه ينتظر من هنا لباكر ما رح اطلع له!!! ارتخت ملامحها لما دخل كنان ...نطق بهدوء عكس الضيق الي بداخله: لا تطلعين براحتك...بس حبيت أسلم عليك ..كيف حالك يا بيلسان ؟! ابو فيصل انحرج وواضح إنه كنان سمع كلامها ...ناظرها بتوعد وحرك شفته يرقع الموضوع بس سكت لما نطقت بيلسان بهدوء وهي منزله نظرها للأرض وقلبها يدق طبول: الله يسلمك.... بالنسبة لموضوع الخطوبة أنا اوعدك نصحح الغلط الي صار وتملك على ليان قبل فوات الاوان... وإن شاء الله ربنا يوفقكم !! رفعت رأسها بألم لما ضربها جدها على كتفها: اقول يا هبلة جهزي لنا قهوة تعدل مزاجي من الغباء الي انت فيه ...ترى المويه تمشي من تحت رجولك !! ناظرت الأرض بغباء تشوف المويه ..رفعت نظرها لما مسك ابو فيصل كتف كنان: تعال يا ولدي الله يعينك على ما ابتلاك!! ابتسم كنان لجده وهو ينظر لها نظره خاطفه ..واقفه تناظرهم وما هي فاهمه شيء!! انتهى البارت...دمتم بخير 🌹 | ||||
|  |
|
07-12-22, 02:43 AM
| #320 | ||||
| ينصرررررر دددددينك يااا ابررارررر ،ههههههه احرقنا انفسنا منتظررين وووش بعد القفله وبالنهايه البنت طاحت من الدرج😂. بس اتوقع ان بيلسان عندها ورم بالراس او تجمع دموي وهو اللي سبب لها النوم ،او ان حالتها زي ما يسموها النوم القهري | ||||
| |
 |
| أدوات الموضوع | |
| انواع عرض الموضوع | |
|
|
2373Likes
العرض العادي
