16-01-23, 11:16 PM
| #401 | ||||||||
 
|  بدأ الموضوع يستحفل وبديت احس ان نجم الفراق لاح بين كنان و بيلسان الي قاعد يحصل اما بسبب المششاكل وسوء ظن كنان ان بيلسان ماتحمل له مشاعر يخرب حبها بقلبه او ان الحسد بدا مفعوله ، والحين تأكد ان سبب مشاكل بيلسان واهلها العين والحسد من ام سليمان ، اعوذبالله منهاا | ||||||||
|  |
|
18-01-23, 07:43 PM
| #402 | ||||
| السلام عليكم..سلمت اناملك ياقمر🫶🏻 بيلسان مسكينه تتحاذف عليها المشاكل من كل صوب ان شاء الله مايكون فيها مرض خطير ..اعتقد فيها عين هي وامها من ام سلمان ذي الحقوده اعوذ بالله من عيونها حتى كلامها مبين الحسد فيه.. | ||||
|
| |
|
18-01-23, 11:56 PM
| #403 | ||||
| بارت 26 جالسه في بيت ليان وللحين موقف كنان ما راح عن بالها ...ندمانه من سكوتها ..ليه انسحبت بسرعه ..ليه ما بينت له إنه فاهم الموضوع غلط ... معقول علشان كذا كان عابس؟! للحين كلامه يرن بإذنها " ما له داعي تراكضين خلف المشايخ..قولي لي ما تبغيني وكارهيتني ومن باكر ينتهي كل شيء " كتمت ضيقها وناظرت اخوات ليان الي عيونهم مسلطه عليها ...ما تحب احد يناظرها ويتأمل بوجهها... صدت عنهم وناظرت ليان الي بحضنها طفلها وتمسح على شعره بحنان وهي تنطق: البارحه ما نمنا الليل منه .... منار وعيونها منتفخه من السهر: ما ندري وش فيه ...الظاهر قالب شفته ...فاهم الحياة غلط ...ناظريه ينام بالنهار ويصحى بالليل الشفت عنده مقلوب!! رنا بابتسامة: وش رأيك بيلسان بالبيبي مين يشبه؟! ناظرتها بيلسان باستغراب إنها توجه لها كلام ...ما تدري ليه للحين ما هي داخله عقلها رنا ..يمكن كرهتها من ايام المدرسه بسبب غطرستها وتكبرها...وبهدوء نطقت: ما اعرف!! حست رنا بالانتكاسه من ردها...وناظرت ديما الي همست بشماته: تستاهلين!! منار تضايقت من رنا تحسها تهتم وتقدس بيلسان كثير ...اعطتها نظره تنكتم وما تكلمها!! مطت شفتها رنا بضجر من أمها!! ام نورس وهي تأخذ البيبي من ليان:هاتي عنك ارتاحي!! ابتسمت وهي تلاعب فيه: اغغغ يا قلبي...حبيب جدته!! ناظرت منار وهي تتكلم : ناظري يشبه رنا؟! منار ابتسمت بفخر: يا حظه اذا طلع لبناتي الكل يضرب المثل بجمالهم وبياضهم!! تجاهلت بيلسان كلامها وناظرت ساعتها ..متى يرجع جدها ويأخذها ...ما معها جوال كيف تتواصل معه؟! ناظرت ليان بتردد: لو تتصلين بأبوي سلطان تأخرت ليان برفض: وين ترجعين الحين..خليني أشبع من شوفتك باكر ترجعين للقرية وما نشوفك!! ام نورس بنصيحه: وش تبغين بالقرية اهلك هنا واهل زوجك هنا ردت بيلسان بلطافه: امي وأبوي بالقرية ... أنا حياتي هناك وما رح اطلع منها ام نورس رفعت حاجب: باكر تتزوجين وتنتقلين هنا! كتمت ضيقها بيلسان من هالسالفه..وهي متأكده هالزواج ما رح يتم ...لو يبغاها كنان ما تركها كل هالفترة ...رح تتوقع أسوأ الأحداث حتى ما تنصدم....وبنبره هادئة نطقت: حتى لو تزوجت من القرية ما رح اطلع ...وحتى الزواج رح يكون بالقرية؟! رنا بانفعال نطقت: نعمممممم!! منار اعطت رنا نظره تنكتم وما تتدخل بذي الامور!! ديما تجاهلت نظرات امها ونطقت باعتراض: ما بقى نعمل زواجنا الا بالقرية؟! وبعدين كنان جهز جناحكم هنا بالمدينة وما يبغى يسكن هناك!! بيلسان بهدوء: بكيفه ليان قاطعتها خافت تجيب بيلسان العيد بكلامها: من هنا لوقت الزواج يخلق الله ما لا تعلمون!! منار بعدم رضا لكلام بيلسان: بس كنان اتصل بأبوك وحدد موعد الزواج!! ليان باهتمام ناظرتها: صدق؟! متى ؟! منار وعيونها على بيلسان ما تدري وش عاجب كنان فيها ..عاديه واقل من عادي ..في بنات أجمل منها بكثير ... وبهدوء نطقت: الشهر الجاي انصدمت بيلسان من الموعد .. غريبه حدد موعد الزواج ....توقعت يكنسله ...بس جدها سلطان ما أعطاها خبر...اكيد ما عنده علم ... نزلت رأسها وهي تفكر بكلامها مع سلطان .. وعدها تعمل زواجها بالقرية ... معقول يعترضون على قرارها؟! رفعت رأسها وناظرت منار الي تتكلم بهدوء وكأنها تضرب كلام بيلسان بعرض الحائط :اليوم حجز بقاعة******* إلتزمت بيلسان الصمت وما علقت على كلامها ..ما رح تتناقش مع منار ...كلامها رح يكون مع جدها سلطان ..ما تبغى اعراسهم الي تخنق ..تبغى زواجها يكون بالقرية ويعملون لها صديقاتها الحفلة.. ما تبغى حفلة كلها تكلف وبرستيج !! مشكلتها مع الي من حولها انها تحب البساطه وما تحب التكلف!! وقفت بهدوء وهي تقترب من ليان ..قبلت رأسها بابتسامة: الاسبوع الجاي رح ارجع وأزورك واجيب معي هدية لحبيب خالته ...والحين ما اقدر أتأخر أكثر من كذا ليان ابتسمت لها بمحبه: ربي يسعدك..خذي الجوال واتصلي اخذت الجوال بابتسامة...اتصلت على جدها وما رد عليها ... ليان باقتراح: شوفي بابا بيلسان حستها ثقيله ما هي مواخذه عليه ..وما تحب تثقل على احد .. وبهدوء نطقت: خلاص ما له داعي ...قريب البيت رح أمر على بيت جدي ابو فيصل...حابه أتمشى!! ختمت كلامها بابتسامه دافئة...سلمت على الموجودات بهدوء ...وطلعت برفقه ام نورس!! بعد خروجها نطقت ديما بعبوس:غثيثه وما تنبلع!! منار ناظرتها بحده: ديما ؟! ديما بترقيع:ما شفتيها ما عبرتنا ليان بدفاع عن أختها:بالعكس بيلسان عسل وكثير طيبوبه ..بس ما هي متعودة عليكم..باكر لما يتزوج كنان رح تحبونها كثير!! رنا ابتسمت: أنا احبها قبل زواج كنان. ...تعجبني شخصيتها بقوة!! قاطعتها منار ما عجبها الكلام : أنا اقول تأخرتم رح اشوف ابو كنان يرجعكم!! رنا بإحباط: يا ماما خلينا بس شوي!! منار نطقت بحزم: ربع ساعه وترجعون ** ** ** بعد وقت كانت تمشي بالشارع بخطوات هادئة..وعقلها سارح بالدنيا ....زواجها قرب ..قلبها ينقبض من قرب زواجها ...خايفه من دخولها حياة جديده ...ما تعرف اذا متقبلينها او لا .... تنهدت ودخلت بيت جدها بخطوات بطيئة ... عقدت حواجبها لما وصلت عند الباب الداخلي وهي تسمع صوت ابوها المرتفع ...حست الرعب تملكها ..وبسرعه دخلت تشوف وش صاير ...وقفت وهي تشوف وليد وسلطان تشابكوا بالكلام!! وليد بغضب: لا تخليني أراويك الوجه الثاني..تراك تماديت بتصرفاتك سلطان ناظره بترفع: ما له داعي تواريني ..ترانا شفنا وجهك الثاني والثالث... او فيصل ارتفع ضغطه: خلاص وليد بقوة: الزواج رح يتم الشهر الجاي وهنا! سلطان بعناد:بأحلامك ..الزواج بالقرية والي ما هو عاجبه المحكمه تنتظر وليد باتهام: انت تلف وتدور حتى تفركش الزواج بأي طريقة...لكن بأحلامك...الزواج رح يتم غصب عنك!! واذا نزلت بيلسان للقرية معك اليوم أكسر رجلها! سلطان انفجر منه: رح تنزل غصب عنك !! واشوف كيف رح تكسر رجلها؟! ابو فيصل جلس بتعب من شجارهم ...نطق بتعب: وليد خزامى مقهورة من وليد ومن طريقته بالكلام ...مهما صار ابوها له احترامه وما تسمح لأحد يهينه ..وبنبره غاضبه نطقت: ولد ما أسمح لك تكلم ابوي كذا قاطعها وليد بسخرية:تدرين كنت انتظر موافقتك حتى تسمحين لي!! وبنظره متوعدع تابع كلامه: لا تتدخلين أفضل لك!! خزامى بانفعال وتحدي نطقت: وش رح تعمل؟! ام فيصل برجاء: يكفي يكفي..خزامى اخزي الشيطان !! خزامى بعناد: احترام ابوي من احترامي ...وابوي هو الي ربى البنت وله حق بكل شيء يخصها !! وليد نار مشتعله بداخله من سلطان ..وما هو ناقصه خزامى ..نطق بتحذير: لآخر مرة اقولك ما ابغى اسمع صوتك...اختصري أفضل لك!! والتفت على سلطان: البنت ما رح تنزل للقرية ..ما بقى وقت على زواجها رح تجهز نفسها سلطان بعناد: رح تنزل معي الحين للقرية واذا فيك خير امنعني!! التفت وناظر بيلسان الي واقفه تناظرهم بضياع..والدموع تتراقص بعيونها ... نطق بصرامه: يلا راجعين للقرية قاطعه وليد وهو يناظرها بتوعد وتهديد : اذا نزلت للقرية أكسر رجلك! سلطان بتحدي: رح تنزل ..يلا يبه تحركي!! واقفه تناظرهم بشتات ...اصعب شيء لما تكون اداة انتقام وتصفية الحسابات...هي وش علاقتها حتى يدخلونها بمشاكلهم ...موقف صعب أخرسها وما هي قادرة تنطق حرف واحد ... اذا اختارت جدها سلطان ابوها رح يزعل منها ويغضب عليها ...واذا سمعت كلام وليد جدها سلطان رح يزعل منها ..وما تبغى يزعل منها ...هي بين خيارين احلاهم علقم!! ناظرت جدها ابو فيصل الي نطق بغضب من تصرفاتهم: اسمعوني زين تتذابحون بالطقاق الي يطقكم ...بس بيلسان لا تدخلوها بمشاكلكم ...والحين ارجعي يا بيلسان مع جدك ..واذا اعترضت طريقها يا وليد ورب الكعبه ما يناطق لساني لسانك!! وليد بقهر من ابوه الي ربط يدينه : يبه قاطعه بغضب: وحطبه...خلااااااص...انتهينا الزواج بالقاعة الي حددها ابو كنان ..ما رح نجمع كل العالم الي هنا وننزل فيهم للقرية ... تبغى يا سلطان تعمل لها حفلة وداع مع صديقاتها بالقرية اعمل الي تبغاه ...بس الزواج هنا....أثقلنا على الجماعه..وغير الكلام الي قلته ما في!! سلطان يبغى يضمن بيلسان معه.. وبعدها يتفاهم معهم ..نطق بعبوس: يلا مشينا!! كتمت ضيقها واقتربت من أبوها ...قبلت رأسه وبغصه نطقت: ما رح أتحرك الا اذا رضيت!! ما ينكر وليد اندهاشه من تصرفها ..توقع انها تطلع وما تسأل عنه ....تصرفها حرك بداخله شيء اتجاه هالبنت ..حسسته بقيمته وإنه له كلمة عليها وما هو جدار بالبيت ...ما ينكر إنه فرح بداخله من تصرفها .....ناظر أمه الي ناظرته برجاء يمشي الموضوع...تنهد وهو يناظرها ما لها ذنب يكسر فرحتها وسعادتها بالزواج علشان سلطان ...يكفي الايام الي تركها بالقرية وما اهتم فيها ...ما رح يكون عثرة بسعادتها ..وسلطان يعرف كيف يتصرف معه.. وبهدوء نطق عكس ملامحه العابسه : الله يسهل طريقك ويحفظك ..درب السلامة!! هزت رأسها وهي ماسكه دموعها بصعوبة...استأذنت وطلعت بهدوء مع جدها باتجاه القرية !!! ** ** ** جالس يستمع لكلام رنا بهدوء...التفت لديما الي نطقت بتدخل: دوم تحشرين نفسك بأمور ما تخصك..وربي ضحكت بداخلي لما فشلتك رنا رفعت حاجب بقهر: ما فشلتني ...انا سألتها سؤال وردت انها ما تعرف!! وين الفشيله بالموضوع ؟! ديما بعبوس: وكأنك ما شفت برودها وهي تتكلم وكأننا رح نسحب الكلام من حلقها سحب!! كنان بضجر منهم: وأمي مطوله عند ليان؟! ام ماجد الي دخلت على سؤاله: ما ألومك اكيد أصابك صداع من ثرثرتهم!! كنان ابتسم لها: ما يعرفون مصطلح اسمه الصمت!! ام ماجد ابتسمت وهي تجلس بمساعدة رنا: احمد ربك زوجتك القط أكل لسانها ....رح تشك اذا لها لسان!! رنا بابتسامة: تراك يا جدتي تبالغين. ... لسانها وش طوله لو تشوفينها ايام المدرسة مع شلتها ما تسكت وضحكتها توصل لمزرعتنا ...بس هي الظاهر ما تتكلم وتضحك الا مع الناس الي تحبهم!! ديما بضحكه: الحمد لله اعترفتي بنفسك إنها ما تحبك!! مدت لسانها رنا بقهر منها!! ام ماجد بداخلها فرح لزواج كنان: كيف الاستعدادات هز رأسه بهدوء: الحمد لله ديما بمقاطعة نطقت: صحيح نسيت اقول ..بيلسان تقول الزواج رح يكون بالقرية وما رح تعمله هنا!! ام ماجد بعبوس: هذي منجدها ..وين نأخذ كل الاقارب للقرية...الي يسمع يقول من كبر بيت سلطان ..ناقصنا فشيله ؟!! كنان تثاوب بملل ...وبهدوء نطق: ما هي مشكله مكان الزواج ..اكيد تبغى تعمل حفلة مع معارفها هناك ...لا تنسي البنت عاشت حياتها هناك..واكيد تبغى تفرح معهم..علشان كذا خليها تعمل الي تبغى ...بعد ما تكمل حفلتها بالقرية رح نأخذها ونحتفل هنا!! ام ماجد باعتراض: وش جابركم تطرقون مشوار للقرية!! كنان بتفكير: فكره حلوة نعمل الزواج بالمزرعه ..مكان واسع وجميل قاطعته ام ماجد برفض: لا تبغى كل اهل القرية يفزعون علينا ..باكر تخرب المزرعه منهم!! نطق وهو متجاهل كلامها : باكر رح اشوف ابوي ونتفق على ذي الامور ..خلاص الزواج بالقرية!! ديما عبست ملامحها..حركت شفتها تعترض ...اشر بيده بتحذير: بحلقك كلام ابلعيه!! رنا ما هو عاجبها قراره ..نطقت باعتراض: اهلنا وصديقاتنا وش يوصلهم للقرية...ما نبغى الزواج بالقرية ختمت كلامها وناظرت امها الي دخلت وهي تسمع كلامهم..وضعت حقيبتها على الكنبة ونطقت بملامح تدل على وجود مصيبه:اعملوه بالمستشفى افضل شيء!! عقد حواجبه باستغراب من كلامها...وقبل ما يسأل نطقت ام ماجد : فالك ما قبلناه منار بتبرير لكلامها: العروس بالمستشفى كنان هبط قلبه : بالمستشفى ؟! وش صاير؟! منار بأسف: بالطريق وهي راجعه للقرية صار عليهم حادث قاطعها بانفعال وهو يأخذ مفتاح السيارة وجواله: اي مستشفى ؟! كيف وضعهم ؟! منار جلست بهدوء: ما ادري وصلنا الخبر كذا ...وما ادري بأي مستشفى!! ناظرته لما طلع يركض للخارج وما انتظر تكمل كلامها ... طلعت منها شهقه ما قدرت تكتمها ...سرعان ما دفنت وجهها بكفوفها!! ام ماجد هبط قلبها: منار تكلمي وش صاير؟! هزت راسها بعد ما مسحت دموعها..وباختناق نطقت: يقولون سلطان مات! قطعت كلامها ودخلت بنوبة بكاء.... رنا تناظر أمها وهي تبكي ..ولا عمرها توقعت إنها تبكي على سلطان ... سلطان الي ولا مرة اعترفت فيه كأخ...الحين تبكي عليه!! منار اخذت نفس عميق وهي تحس بالاختناق ..من لما وصلها الخبر حست بكتمه على صدرها...بالرغم علاقتها فيه كانت مقطوعه بس عز عليها رحيله ..عز عليها يرحل من الدنيا وهي مقاطعيته ..عز عليها يرحل وحيد بذي الدنيا...وش تقول لربنا بالاخرة وهي قطعت رحمها ..اخوها الي من لحمها ودمها ...كيف نسيت طول الفترة الماضية إنه الاعمال تنرفع كل اثنين وخميس ..كيف تناست إنه اعمالها ترجع اذا قاطعت انسان كيف لما يكون اخوها؟!! تحس نفسها كانت بغفوة وصحيت منها فجأة...ما تدري بكاء أمها ونواحها اوجعها بزياده!! رحل من الدنيا وما شاف ريق حلو من امها خاصه بعد مشكلتها مع خزامى..دوم عيالها مفضلين عليه بكل شيء.... تتمنى لو يرجع لحظة وتقول له آسف على كل شيء...حكت عليه واغتابته كثير ...كيف تجلب منه السماح الحين؟! كيف؟! رفعت رأسها لأم ماجد لما حطت يدها على كتفها بمواساه: كلنا على هذا الطريق يا يمه!! مين قال لك؟! منار وهي تمسح دموعها: كنت عند ليان لما وصل الخبر...الرجال الي اتصل واسعفهم قال كذا!! ام ماجد بضيق: وش يعرفه يمكن فهموا عليه غلط!! امك وين؟! منار بضيق: كانت معي لما وصلنا الخبر ...راحت للمستشفى ام ماجد بلوم: يا قسوة قلبك وليه ما رحت قاطعتها منار: ما قدرت اتصور اشوفه ميت!! رنا برجفه: اتصلي بجدتي وشوفي وش صار؟! هزت راسها منار ومسكت الجوال تتصل!! ** ** ** واقفه تناظر جدها تحت الأجهزة ...قلبها ما يتحمل يشوفه كذا ... فرصة نجاته ضعيفه ...وضعه الصحي متدهور ..تمنت لو كانت مكانه ..الاهم ما يصيبه اي وجع!! زفرت بضيق رفعت راسها لوليد لما وضع يده على كتفها بمواساه: لا تخافين رح يكون بخير!! هزت رأسها و طما قدرت تنطق حرف واحد ...وليد مسك يدها: تعالي ارتاحي وخلي الدكتور يكشف عليك!! قاطعته بنبره مكتومه: ما فيني شيء!! وليد بهدوء: طيب على الأقل اجلسي على كراسي الانتظار لا توقفين...ارتاحي يبه!! توجهت للكراسي وجلست وهي محتضنه يدها مب قادره تحركها ...ما يهمها نفسها اهم شيء تطمئن على جدها!؛ ناظرت ام سلطان بالجهة المقابله جالسه تبكي ومعها واحد من عيالها!! وليد تنهد بضيق: أمك للحين فاقده الوعي ..اذا تبغين آخذك لها!! هزت راسها بالرفض...ما لها حسل تقابل امها وتسكع منها كلام زياده..وبهدوء نطقت : اول شيء اطمئن على جدي!! وليد يحاول فيها: جلوسك ما رح يعمل شيء ..تعالي للمصلى غسلي وصلي وادعي له ..الحين محتاج الدعاء منك!! سكتت للحظات وهي تفكر بكلامه ..جدها يحتاج منها الدعاء الحين ... هزت رأسها ووقفت وهي متجاهلة وجعها ... تحركت بمساعدة ابوها ...وهي تحس نفسها رح تسقط بأي لحظة!! ناظرت جدها ابو فيصل واقف بالممر مع اعمامها ومع كنان ... وقفهم ابو فيصل وهو يسأل: ما في اي تحسن!! وليد هز رأسه بفقدان أمل: ربك كريم!! عبدالله باهتمام: لزوم ترتاحين يا بيلسان!! نطقت بصعوبه: انا بخير!! وبعدها التفتت لابوها حتى يتحرك ..تحس التعب انهك جسدها... كنان وهو يناظرها لما غادرت ...اهم شيء عنده إنها بخير ...صحيح انه تحمد لها بالسلامة من بعيد ..الاهم شوفتها...بخير!! عبدالله نطق وهو يتحرك: انا رايح اشوف كيف وضع سلطان !! كنان بهدوء: رايح معك أبو فيصل بعد مغادرتهم: يا رب تسلم سلطان ..لو يصير له شيء تنجن بيلسان... فيصل وهو يتثاوب بنعاس: هذي سنة الحياة!! والاعمار بيد الله.. انا اقول نرجع للبيت وترتاح وجودك هنا بدون فائدة...كم ساعه صار لك واقف!! أبو فيصل يحس جسمه منهك..هز رأسه وغادر المستشفى!! ** ** في اليوم الثاني معطي النافذه ظهره وهو متكتف وعيونه عليها ....قاطع تأمله وليد لما نطق: متى رح تصحى؟ رد بضيق : ما ادري حسب قاطعته ام خزامى الي جالسه على طرف السرير وتمسح على شعرها بحنان: من البارحة ما صحيت!! الحمد لله انك كنت معها يا ابو رعد ..اتخيل لو كانت لوحدها وفقدت الوعي!! وليد زم شفته بضيق: انا ملاحظ عليها التعب وتكابر وتقول ما فيني شيء ...وحنا رايحين للمصلى ..احسها ما هي متوازنه ...ربك سلم إني معها واسعوفها مباشره بعد ما فقدت الوعي!! ام خزامى هزت راسها بضيق..بعدها رجعت تناظر بيلسان : بيلسان يمه قومي ...تسمعيني فتحي عيونك ..لا توجعي قلبي بزياده ....يا رب احفظها لي!! ختمت كلامها ودخلت بموجه بكاء تحت انظارهم ...وليد بعد هالموقف استصغر نفسه ..كيف حاول يأخذها منهم..يحس فعلا هم أهلها..علاقتهم قويه .... ام خزامى من البارحه ما وقفت دموع على بيلسان وكأنها بالفعل هي ابنتها ...عكس خزامى الي شافها تأثرت على بيلسان ...بالعكس مسحت فيها الارض اول ما وصلت المستشفى وحملتها المسؤولية...يقر إنه ما يستحق بيلسان...ما قدم لها مثل ما قدم لها سلطان وزوجته ..ما قدر يحتويها ويعوضها فقدان سلطان وزوجته ...بالعكس عاملها بقسوة وجفاء...جكر وعناد بسلطان ؟! بس هي وش ذنبها ؟! من لما وصله الخبر والندم يأكله على تقصيره معها ...ان كتب ربنا لسلطان عمر وقام بصحه وعافيه مستحيل يوقف عثره بين بيلسان وسلطان!! ناظر كنان الهدوء يخلفه بس الخوف يقدر يشوفه بعيونه ... رجع ناظر بيلسان نايمه بعمق بوجه شاحب أصفر ....اغمض عيونه للحظات وبدأ يدعي ربنا يشفيها!! * ** *** مرت الايام على الحادث حمدت ربها ما اصابها الا رضوض خفيفه .... أما جدها تعافى تقريبا من الإصابة..تحسه من بعد الحادث تغير ..صحته ما عادت مثل اول ..احيانا تحسه يشتت بالكلام وكأنه طفل صغير .... يضيق صدرها لما تشوفه كذا...ويحز بخاطرها لما تشوفه ما عنده ولد يقوم فيه ويسانده ... ما تنسى وقوف ابوها معهم ..جلس هنا بالقرية واعتنى فيه لوقت ما تعافى ... مسحت دمعه من طرف عينها ...تغزوها مشاعر ما تدري وش سببها ...ممتنه كثير لأبوها ...صدق لما قالوا الرجال مواقف..بالرغم من علاقتهم السيئة مع بعض ...بس ما ترك جدها أبدا!! وقفت وهي تسمع ابوها ينادي عليها...طلعت من الغرفه ونطقت بهدوء وهي تناظره يقفل حقيبة اغراضه: نعم يبه!! وليد تنهد: اليوم راجع بإذن الله .. اذا ناقصك شيء وتبغين تشترين من المدينه تعالي وباكر ارجعك!! ردت بامتنان وهي تقترب منه: مشكور يبه ..بس عندنا هنا كل شيء موجود ما له داعي!! خزامى طلعت من غرفة أبوها .. تقدمت وهي تنطق بعدم رضا: باقي جهازك رح اشتريه بنفسي لأنه ما شاء الله انت وصديقاتك ذوقكم خايس..ما هو ناقصنا فضايح عند الناس!! زمت شفتها بيلسان بضيق من اسلوبها وتحقيرها للناس !! غمضت عيونها للحظات تصبر نفسها لما تابعت امها كلامها بتحذير:عينك على أبوي.. أمي لا تخليها تعمل شيء..يا دوب حامله نفسها ... وليد قاطعها: تراها تعرف شغلها..وما رح تقصر معهم!! ناظرت ابوها وابتسمت له بمحبه ...من بعد الحادث استقرت بأعماقها مشاعر جديده لابوها ما كانت تحملها من قبل .. حست انه يحمل بداخله حنان بس يظهر بمظهر القاسي والحازم ... ما تنكر انها ندمت على عنادها لما كسرت كلامه وما عادت الثانويه.... عزمت أمرها تبدأ حياه جديده مع ابوها. ...تحسنت العلاقه كثير ومستحيل تفرط بذي الفرصه ....أما أمها ارخت كتوفها باستسلام ...عجزت تلقى شيء يقربها منه ...ما تدري يمكن مع الايام يتصلح الوضع!! اقتربت من ابوها وقبلت رأسه وهي تنطق بمحبه: ربي يحفظكم ! وناظرت خزامى وابتسمت لها: لا تطولون علينا!! خزامى عبست ملامحها وما ردت!! مطت شفتها بيلسان بسخريه...ما رح تتغير خزامى!! بعد وقت غادر اهلها المكان ..استودعتهم ورجعت لغرفة جدها ..طرقت الباب بخفه ودخلت وهي تبتسم لهم!! ام خزامى متربعه وبيدها المصحف ترتل بصوت هامس...بيلسان جلست قريب من جدها: وش رأيك بكوب شاهي يدفي قلبك قاطعها بهدوء: ما لي نفس!! قبلت يده بابتسامة عريضة: ربي يطول بعمرك!! ابتسم لها وما علق!! قفلت ام خزامى المصحف ونطقت بهدوء: اسمع صوت على باب البيت ؟! عقدت حواجبها باستغراب: ما سمعت! نهضت نفسها وتحركت للخارج تشوف. ....طلعت للحوش وطرقات خفيفه على الباب ... فتحت الباب بتوجس ...سرعان ما رجعت خطوة للخلف بارتباك لما شافت كنان واقف ... ابتسم على ارتباكها ونطق بهدوء: السلام عليكم!! ردت ودقات قلبها تحس كل القرية تسمعها: وعليكم السلام حل الصمت للحظات ..بعدها نطق بهدوء: كيف حالك قاطعته بسرعه وكأنها تبغى تخلص من هالمواجهة: الحمد لله بخير! هز رأسه بنبره مريحه: ان شاء الله دوم ! ابغى ازور عمي سلطان اذا في مجال سكتت للحظات ما تدري وش تقول له..وبمجامله نطقت: حياك الله تفضل! تحركت قدامه حتى تعطي اهلها خبر....دخلت الغرفه وبملامح مخطوفه ومرتبكه نطقت: ءءء كنان هنا يبغى يزورك!! ام خزامى بترحيب: دخليه هزت راسها وطلعت والتوتر واضح عليها ...ناظرته عند الباب الداخلي واقف: تفضل حياك!! هز رأسه ودخل وهوينطق: زاد فضلك!! اشرت له على الغرفة ودخلت خلفه ..وقفت وهي تناظره يسلم على جدها وعلى جدتها ...تحس خلص كل الهواء الي بالمكان! ام خزامى اشرت لها على القهوة .. تحركت وهي مرتبكه زيارته ما هي متوقعه ...ضيفته وارتجاف يدها واضح ... بعدها انسحبت من المكان احترام لقرار جدها ...تنفست بعمق بعد خروجها ...وهي مستغربه زيارته ...زار جدها من قبل بس ما التقت فيه هنا ...كان اخر لقاء بالمستشفى وما تكلمت معه بس تحمد لها بالسلامه!! رجعت لغرفتها بخطوات ميته ...ما تدري ليه باغتتها مشاعر الحزن ... جلست على حافة الشباك ..وارخت رأسها وهي تفكر بحياتها ...ايام قليلة تفصلها عن الزواج ...بداخلها رفض ما تبغى تغادر هالبيت ..خلاص تعبت من الحياة ..ما لها نفس تقابل وجوه جديده وتجامل فوق طاقتها..خاصه منار تحسها نسخه عن خزامى.... تتذكر زارت سلطان هنا يا دوب ربع ساعة وبعدها غادرت ...طول الوقت كانت ساكته وما تكلمت بشيء وكأنه احد جبرها على الحضور!! ما لها نفس تعيش مع ناس جديده وتحلل شخصياتهم حتى تقدر تتعامل معهم!!! تحس ما لها طاقه لشيء!! واكثر شيء يوترها نومها..بعد الحادث زاد وصار شبه يومي...احيانا تحس نفسها فقدت الوعي ما هو نوم طبيعي!! ليتها لما كانت بالمستشفى خبرت الدكتور عن مشكلتها ..ما تدري ليه جبنت وخافت تتكلم للدكتور!! تنهدت بقلة حيلة ... ما تدري كيف رح تتصرف!! وقفت لما سمعت صوت جدتها تنادي عليها ...اخذت نفس وتوجهت لهم ..فتحت الباب ونطقت بهدوء: نعم يمه!! ام خزامى اشرت لها: تعالي اجلسي ناظرت مباشره لجدها الي هز راسه بالموافقه ....تمنت لو جدها رفض ...زمت شفتها بضيق وتقدمت بهدوء وجلست جنب جدتها ....ما رفعت رأسها وهي تناظر الأرض...تسمع لكنان الي يتكلم مع جدها بنبره هادئة عن حالة طارئة كانت البارحه بالمستشفى!! تجمدت لما تغير مجرى الحديث ونط سلطان بتساؤل: يعني رح تسكن بالمدينه كنان هز رأسه بهدوء: عند اهلي لي جناح ...هناك قريب من شغلي!! حست بالاختناق من كلامه ..ما تبغى تسكن معهم ..ناظرت جدها والضيق واضح على ملامحها! سلطان بنبره ضعيفه بسبب التعب: ليه ما تسكن هنا بالمزرعه ..وقت دوامك رح تكون عندي بيلسان ...وقت عطلتك ترجع للمزرعه كنان قاطعه باعتراض: صعب حالياً ..وخاصه مع استقرار امي واخواتي هناك... يعني هنا يمكن بالشهر انزل مره او مرتين.. أنا متزوج يا عمي حتى استقر ..ابغى ارجع من الدوام لبيتي والقى زوجتي ... ما ابغى اكون عاله على اهلي ... ام خزامى بتأييد لكلامه: استقرار لك ...ومشقه وكلفه عليه رايح راجع للقرية!! بيلسان ما عجبها كلام جدتها ... كتمت ضيقها ما تبغى تعيش مع اهله!! رفعت نظرها لما نطق كنان: وش رأيك يا بيلسان؟! زمت شفتها بضيق..شدت قبضة يدها حتى تقوي نفسها وتمنع ارتجافها ..ما رح تخسر شيء لو شجعت نفسها وضربت الطينه بالعجينه..يمكن يوافقون وما يرفضلها هذا الطلب .. وبنبرة هادئه نطقت:ء انا ما ابغى اطلع من القرية هز رأسه كنان باستياء من تفكيرها: والجناح الي جهزته هناك؟! طول عمرها الزوجه مع زوجها ..والا كلامي غلط؟! بيلسان تحس الكلمات طارت من عقلها مب قادرة تصيغ الكلام: أنا قدمت للمدرسه هنا قاطعها بعدم اقتناع بكلامها: بالمدينه اختاري المدرسه الي تبغينها ورح تدرسين فيها!! ردت وهي تهز بالرفض: ما ابغى التدريس هناك!! انا وقعت على العقد مع المدرسة ..وهنا أدرس البزران دروس تقويه .. وأبوي سلطان قال هذا الفصل رح نفتح مركز بدل ما يكون التدريس هنا بالبيت ..رح يكون مركز يتجمع فيه الطلاب وادرس فيه ...ما اقدر اترك شيء بدأت فيه!!! رسمت اهدافي هنا ولزوم احققها زم شفته بعدم رضا: يعني خلاصة الموضوع ؟! بيلسان بتوجس: نعيش هنا!! كنان هز رأسه بهدوء: انا اتفهم احلامك وطموحاتك...وبنفس الوقت احلامك تعارض اشياء اساسيه بحياتي الي هي وظيفتي!! يعني ما هو مقبول ابدا اترك وظيفتي وأجلس هنا!! طول حياتنا عايشين بالمدينة بس لما انتقل الوالد هنا.. انتقلت معه امي للقرية بدون اي اعتراض... الزوجه مكانها بالمكان الي يكون فيه زوجها!! سلطان ناظرها ..يعرفها لما تكون متضايقه وما تبغى الشيء...ما رح يجبرها على شيء ما تبغاه..للحين ندمان انه ارسلها عند خزامى ....قبل ما ينطق ناظر بيلسان الي نطقت بهدوء: تأجيل الهدف والفكره ما يعني إني لغيتها!! مع الايام تقدر تنقل وظيفتك لأقرب مستشفى هنا وبعدها نرجع!! ابتسم لها: إن شاء الله ربنا ييسر لنا الخير!! تنهدت وهي تناظر جدها الي مستغرب من موافقتها ...تكلمت قبل جدها الي متأكده رح يصعب الامور .. وإذا قال كلمه ما هو من السهل يتراجع ...اختصرت المشاكل من اولها ..ما تبغى المشاكل ترجع مثل اول خاصه بعد ما زانت العلاقة بين أبوها وبين جدها ...رح تتنازل عن حلم من احلام حياتها حتى يعم الهدوء والسلام بين الي حولها ...تعبت من المشاكل وما لها حيل تواجه عقبات بحياتها!! ** * ** وضعت الجوال جنبها ونطقت بعدم رضا: يعني كيف زواج هنا وزواج بالقرية؟! ماجد بتوضيح:يعني رح تعمل حفلة بعد العصر مع صديقاتها بالقرية واهل القرية ...وبعد المغرب رح تكون هنا ...حجز القاعه على الساعه ٩ مساء يعني في وقت حتى توصل هنا!! رنا زمت شفتها: اكيد رح توصل القاعه ويكون شكلها حوسه من الطريق ..لا تقول رح تتزين بالقرية؟! ماجد ناظرها بحده: أعتقد هذا الشيء ما يخصك ..هي حرة بنفسها لو تنزف بدون ذرة مكياج على وجهها ..هي حرة بنفسها...هذا يومها وزواجها رح تعمله مثل ما تبغى هي ما هو مثل ما تبغين انت وغيرك!! منار رفعت حاجب:بس حنا عندنا معارفنا ما نبغى نتفشل قدامهم قاطعها بملل من هذي السوالف: يا عمي اتركيهم يقولون الي يبغونه!! لنفرض رح يقولون عنها جوكر ؟! اتركيهم يقولون دام كنان ما هو شايف غيرها!! منار مطت شفتها ما هو عاجبها كل تصرفاتهم ...تحس هالبيلسان شايفه نفسها عليهم بزياده وشغل شروط وتعجيز وهم ما عندهم غير السمع والطاعه!!! ديما باقتراح: أنا اقول لو قاطعها ماجد بحزم:انا اقول لو تقومين تعملين لي شيء يعدل هالصداع يكون افضل!! حست ديما بالفشيله من رده ...وبطاعه نطقت: من عيوني!! منار رفعت حاجب: غريب للحين ما احد جلب أغراضها ؟! ماجد وهو يتثاوب بنعاس: يمكن يوم الزواج...ما هي مشكله!! امي متى ترجع من بيت ام سامي!! منار بهدوء: احتمال كبير تنام هناك ..قالت رح تتصل وتعطينا خبر!! هز رأسه بتفهم ...وهو يردد بهمس: على خير!! ** ** ** اليوم مجتمعات البنات بالحوش عندها ....كانت متوجه لهم بالضيافه ...حست جسمها تصلب من الكلام الي تسمعه ...تحس نفسها بحلم ...مستحيل هالكلام صحيح!! رجعت خطوة للخلف وهي تسمع الكلام الي مثل الخنجر يطعنها!! رهف بتكذيب: الناس ما يتركون الواحد بحاله!! سما باستنكار: أنا مثلك ما صدقت الكلام عنها ...مستحيل بيلسان يكون لها علاقه مع كنان نجوى بإنكار: الي يذبحك يقولون ما خطبها الا حتى يغطي على فضيحتهم ...والا واحد مثل كنان يناظر بوجهها؟! وصلت فيهم يقولون انها حملت منه علشان كذا حطوا هالمهر العالي.. حتى يضمنوا بعد الزواج ما يطلقها!! فاطمه بقرف: الله يأخذ هالقرية ..ما يتركون الواحد بحاله .. كله غيره وحسد ...والا بيسو ما شاء الله الف واحد يتمناها ...يحمد ربه كنان انها وافقت عليه!! نجوى هزت رأسها: ايه فعلا يا حظه فيها!! سما زفرت بضيق: عاد أنا سمعت اشاعه ثانيه يقولون خطبها ما هو حب فيها بس حزن عليها لانه اهلها تاركينها وما هم سائلين عنها!! فاطمه زمت شفتها بضيق: هنا الناس ما تترك أحد بحاله ...للحين يقولون انه بينها وبين راكان علاقه!! نجوى بعبوس: الظلم ظلمات ..يا ويلهم من الله ...عاد بيسو اتوقع يمكن لو تشوفه ما تعرفه ..يمكن شافته مره او مرتين طول حياتها!! بس اكيد كل هالكلام منه هالكلب حتى يشوه سمعتها!! لكن إن شاء الله ربنا يجعل بيسو حسرة بقلبه وما ينال ظفر منها ....صدق إنه شخص منحط!! بنات خلاص قفلوا الموضوع ما نبغى توصل بيلسان وتسمع شيء ..والله هالكلام يهد الحيل...حسبي الله على كل واحد يشوه سمعة البنات ...حسبي الله ونعم الوكيل!! الشرف غالي ومثل ما طعنوا بغيرهم بدون وجه حق ..رح يرجع لهم والناس تتكلم عليهم ..رح يذوقون من نفس الكأس...والناس تعرفها وتعرف اخلاقها ..لا يضر السحاب نبح الكلاب!! خلاص قفلوا الموضوع وربي تكدر خاطري!! متواريه خلف الجدار تسمع كلامهم ..وهي شاده على الصينية من شدة القهر ...الحين اهل القرية يتكلمون عليها كذا !!! المكان ما لقت الراحه الا فيه يطعنونها بظهرها...كلامهم حد حيلها ...تحس خرجت الحياة من جسدها ... اخذت نفس عميق وهي تحس بالاختناق ...بلعت غصتها بصعوبه ...رجعت بخطوات لمدخل البيت ...جلست على عتبه الباب ...وهي تحس قوتها خارت ...وضعت الصينيه على الارض ...وللحين مصدومه من الكلام!! خيبه خيبه ما توقعتها بيوم من الايام ....مسحت وجهها وهي تحس بارتجاف يدينها من القهر .... ما تدري وش تعمل ؟! تتجاهل الكلام الي سمعته والا تفاتحهم بالموضوع حتى تعرف مين الي يتكلم عليها بكذا!! صكت على أسنانها بقهر ..حتى لو واجهتهم متاكده رح ينكروا وما رح يتكلموا عن الشخص الي طعنها بظهرها ...المشكله اكثر من شخص يتكلم لأنهم قالوا بكلامهم قالوا" الناس!!" يعني ما هو شخص واحد .....تنهدت بضيق وهي تفكر وش تعمل...اذا تكلمت وبحثت بالموضوع اكيد رح يوصل الخبر لجدها سلطان...ما تبغى تصيبه صدمه أو يتضايق ...كافي الي اصابه بالحادث.... ما تبغى تكدر خاطرهم وتضايقهم ...كافي هي الي تحطمت وانكسرت من هالكلام...ثقيل ما هي قادره تتحمله!! اخذت نفس عميق تقوي نفسها بعد ما عزمت أمرها..ما رح تتكلم بشيء ...رح تبحث بطريقتها عن كل شخص طعن فيها وتطلع حقها من عيونه!!! اخذت الضيافه ورجعت لصديقتها وهي تحاول تخفي الضيق عن ملامحها .....عجزت عن رسم ابتسامه صغيره .. طول الوقت الصمت يغلفها ...وكأنها بعالم ثاني!!! ** ** ** في بيت ماجد هز كتوفه كنان بلا مبالاه : ما أدري كنسلوا حفلة الزواج بالقرية!! ام ماجد عقدت حواجبها: يعني السالفه لعب صغار؟! كل ساعه يطلعون لنا بسالفه؟! كنان بهدوء: يعني سواء عملوا حفله او لا ..ما رح تؤثر على حفلتنا ..وش الي يضايقكم؟! منار هزت راسها بعدم رضا: ما اتوقع تصرفاتها البزرانيه تناسب هذا البيت ... كل ساعه برأي؟! وحنا مطلوب منا السمع والطاعة ؟! حتى شهر العسل كنسلته لأنه حضرتها ما تبغى شهر عسل والحين كنسلت حفلة القرية ..الله اعلم تكنسل بعد الحفلة هنا؟! كنان رفع حاجب: وش مشكلتكم اذا عملت حفلة او لا؟! يمه منار قاطعته باستدراك: انا ما اقصد شيء ...يعني ما قاطعها بهدوء: اتركيها يمه تعمل الي تبغاه...يمكن صار عندهم ظرف ..يعني حنا ما نعرف ظروف حياتهم!! ام ماجد هزت رأسها بتسليك: يمكن سلطان تعبان؟! تابعت كلامها وهي تناظر منار :غريب ما رجعت لزيارة اخوك ؟! منار ما راق لها الحديث بهذا الموضوع ...وبهدوء نطقت: وليه ارجع؟! شفته وكان بخير !! سكتت وهي تناظر رنا لما دخلت بضجر: ماما شوفي ديما قاطعتها منار بحزم: رنا ترى مو فايق لدلعك ..اطلعي قبل ما اطلع حرتي فيك!! حاست بوزها ورنا وطلعت قبل ما تمسح أمها فيها الارض ... كنان ابتسم بهدوء: وليه كل هالعصبيه؟! منار انتبهت على نفسها..ابتسمت له: لو ما قلت لها كذا رح تأكل رأسي!! كنان بتذكر: صحيح اليوم رح تيجي جدتي ام فيصل وبنات اخوالي يرتبون جهاز بيلسان!! ام ماجد غزتها مشاعر الفرح واخيرا رح يتزوج كنان ..وبدون شعور أطلقت زغروده... وبعدها مسحت دمعه نزلت على خدها! ضحك بخفه على تصرف جدته: لذي الدرجه فرحانه فيني!! ام ماجد تنهدت: وربي انتظر الساعه الي تنزف فيها لعروستك واشوف عيالك!! هز رأسه بابتسامة دافيه: ربك كريم .. إن شاء الله ربنا يتمم لنا على خير!! هزت منار راسها وما قدرت تقول امين ..اكتفت تناظر ام ماجد الي دخلت بسيل من الدعوات لكنان وزوجته!! ** ** ** من يوم ما اجتمعت مع صديقاتها وسمعت الكلام ...وهي نايمه بالفراش ما لها حيل تقوم او تتحرك ...والغصه ما فارقتها من ذاك اليوم!! بداخلها تراكمات تبغى تفرغهم ....مقهوره ومن شدة قهرها وعجزها انعكس على جسمها ونفسيتها!! رفعت نظرها بضعف لجدتها الي تتكلم بخوف: يا يمه من كم يوم ما هو عاجبني وضعك زواجك بعد يومين ...وانت للحين طريحه الفراش ..وش صاير؟! بيلسان بنبرة ضعيفه: ما فيني شيء...يمكن انفلونزا!! خزامى واقفه متكتفه وهي تناظرها ...وبانتقاد نطقت: لمتى تجلسين تتدلعين على اهلي!! أنا متاكده تمثلين التعب حتى تهربي من الشغل؟! وبعدين على كيفك تكنسلين حفلة القرية؟! على اساس ذبحت حالك حتى تحتفلين مع اهل القرية ..وسببت وقتها مشكله كبيره بين وليد وابوي! والحين بكل برود تكنسليها وكأنها الدنيا على كيفك تمشين!! ام خزامى بنهر: خزامى!! اتركيها على راحتها ... خزامى بقهر: دوم واقفه بصفها سواء صح او غلط .. ترى انا ابنتك مو بيلسان!! غمضت بيلسان عيونها وهي تسمع كلام أمها المعترض عليها ... بدأ النوم يداعب جفونها...وبدون اي تفكير استسلمت للنوم حتى تهرب من الواقع المر!! خزامى انقهرت وهي تشوف تجاهل بيلسان لها ....وبنبره غاضبه نطقت: شايفه كيف تجاهلتني وتعمل نفسها نايمه!! ام خزامى بحزن: أنا متأكدة تعبت نفسيتها لأنها رح تبعد عن صديقاتها وعن القرية!! يعني ما توقعت ترجع للمدينه مرة ثانية!! خزامى بقرف نطقت: يا كثر ما تبرررين لها ..نشوف اخر هالدلال!! ** ** ** انتهى البارت...دمتم بخير 🌹 | ||||
|
| |
|
19-01-23, 01:31 AM
| #405 | ||||
| بارت جمييييل تسلمي يا جميلة أثلجتي صدري خصوصا إني اشتقت لأجواء الرواية، أعجبتني عروستنا العاقلة يوم أنها تسمع كلام زوجها،تراه مسايسها يعني طلبها عجيب ،بالله يترك شغله عشان هي ما تحب المدينة؟بس في النهاية هدأت الوضع و قالت الكلام الصحيح، القرية فيها أكثر ناس دمرت حياة أهلك و لو بتبقين فيها بيدمرونك بعد!و هم الي طلعوا عليك كلام و طعنوا في عرضك! أم سليمان يا ربي أبغى أذبحها و أخلصكم من سمها و حسدها😫و ترى سيبك من سالفة التدريس بيجيك منها بلاوي مالها أول من تالي،بعدني متذكرة موضوع الصور الي عند راكان و أستنى القنبلة الي بتفجرها أبرااار ،أبغى أشوف غضب كنان ترى أكره ما علي الإنسان الهادئ في كل شي 🙂 في النهاية ما أتمنى انفصالهم ،لكن أبغى أشوف غيرته ،خصوصا أنه يعرف أن في اثنين يحبونها من زماان و ما أشغله الموضوع و لا اهتم!!أما هاذي المرة فلو انكشف الموضوع فما أتوقع كيف رح تكون ردة فعله، لأن الموضوع كارثي حرفيااا و ما ينسكت عليه و مالومه لو طلقها مصيره يرجعها 😪... الحمد لله سلطان ما مات دمعتي في عيني بغت تنزل لولا عرفت أنه ما مات، قلت راح الي كان يعزك و يحبك يا بيلسان راح ال كان واقف بظهرك 🥺💔 ابرار بغينا نفرح كفاية أحزان 😭 عندي طلب صغير😙أتمنى نكتشف أسرار قصة بيلسان،كره أهلها لها، نومها غير الطبيعي و كثير أشياء،و أتمنى الأحداث المبهمة بين الأبطال نفسهم تنكشف،مثلا بيلسان تعرف أن كنان ما خطبها لاان أبوه أخطأ في الاسم! و هو يعرف أنها ما راحت الشيخ لأنها تبغى تطلق منه!! تحياتي لأروع أبرار 💚💚💚💚 | ||||
|
| |
|
19-01-23, 01:36 AM
| #406 | |||||||||||
| نجم روايتي  
| الذين يشاهدون محتوى الموضوع الآن : 165 ( الأعضاء 17 والزوار 148) موضى و راكان, ضي عيوني, hala20111, ام علي اياد, fara123, sabaconia, ضاقت انفاسي, صادقه# كاذبه, المسك الطيب, سفيان بن, أم هالة, وجدان احمد, فيروزززززززززز, rosa*, نونه الحلوة, زاي., ألأمال تسلمى كاتبتنا العزيزة على البارت الممتع نفسى خزامى تغير معاملتها لبيلسان كما تغير وليد و أصبح يهتم فيها يارب يكتشفوا مرضها و تتعالج حالتها بائسة للغاية دمتى بخير يا أبرار | |||||||||||
|
| |
|
19-01-23, 02:07 AM
| #409 | ||||
| فصل جميييل وراايق ،يعطيكِ العافيه ابرار ♥ بيلسان خير ماسويتي فنشتي حفلة القريه عشان تتجنب القيل والقال ولانهم مايستاهلون اصلاً . ياخوفي يا بيلسان تنامي عن حفلتك بالمدينه ،واتوقع انه بيوم العرس يجيها النوم القهرري وتنام وياخذها كنان بدون ما تنزف 😞. وليد الحمدلله حس واعترف بقرارة نفسه عن خطأءه ومعاملته معاها ،وباقي خزامى تندددم بوقت ماعاد ينفع فيه الندم يا خزامى. منتظرررينك يالغلأ بالفصل الجاااي بشووق ومنتظررين العرس يتم على خير 😍 | ||||
|
| |
|
19-01-23, 02:40 AM
| #410 | ||||
| السلام عليكم ورحمة الله وبركاته تونا بسم الله يا ابرار قلنا بالبارت الي فات لا تذبحين سلطان... الله لو أنك ذبحتنه اذبحككك وراه... احس بيلسان بتنام يوم العرس.. واتمنى فعلا يلاحظون الموضوع فيحاولون يصحونها ماتصحى.. ويودنها المستشفى ويعرفون وش فيها | ||||
| |
 |
| أدوات الموضوع | |
| انواع عرض الموضوع | |
|
|
2373Likes
.png)
العرض العادي
