[زاهره]

حكايات مرعي الدون جوان ف شهر رمضان

أنا مين؟

أنا مرعي السيد برعي الشهير بــ "مي مي الدون جوان"
إسمي ده مأخدوش هباءاً ده جه بس سنوات من الخبرة في الملاعب... عندي 18 سنه... في تالته ثانوية تجارية و حلم حياتي إني أجيب ف سنه خامسه الــ85% اللي تدخلني الجامعة لأني سمعت إن بنات الجامعه جامدين آخر حاجه.
إتربيت في إسرة متدينة والدي الحاج سيد معروف ف الحته بإنه راجل متقي مش بيسيب أي فرض و والدتي الحاجة نجاة منتقبه و مربية اخواتي البنات على الأدب و الأخلاق طبعاً الكل بتساءل دلوقتي إيه حكاية الدون جوان بتاعتي دي... أنا بقه هقولكم.
لغاية تالته إعدادي كنت مثال للولد المطيع المهذب... م البيت للمدرسة و م المدرسة للبيت كنت بحفظ قرآن بصفة دورية و بيقولوا عليا إن صوتي حلو فيه ( كانت أيااااام) لما خلصت الإعدادية أهلي حسوا إني مش وش ثانوية عامة فقرروا _و انا منحتهم بركاتي _إنهم يدخلوني مدرسة التجارة المتقدمة اللي على أول شارعنا أهو كلها خمس سنين و بعدها أدخل كلية تجارة على سنة تانيه ( حلم شكله مش هيتحقق)
المدرسة دي ليها مميزات كتيرة... من وجهة نظر أهلي إني مش هحتاج دروس إلاً ف آخر سنه (كان وهم و عايشين فيه)
و كمان مش هتكون صعبه زي الثانوية العامة (ده بقه للناس اللي بتذاكر مش زيي)
بالإضافة إلى إني لما أطلع على كلية تجارة اللي مستحيل أدخلها من ثانوية عامة هكون كويس أوي في المواد التجارية و المحاسبة على عكس خريجين الثانوية العامة ( دي لسه مبانتش)
أما انا بقه كنت شايف فيها ميزة واحده
ميزه ضخمه
ميزه هائله
ميزة رهيبه
جدا
جدا
جدا
إنهااااااااااااا
مدرسة مشترررررررررركه
و من هنا بدأت بذرة الفساد تكبر و تترعرع فيّا...ف المدرسه دي شفت بنات غير البنات... او تقريباً اللي كانوا معايا في البيت دول _اخواتي_ مش بنات و طبعاً دي حاجه بحمد ربنا عليها يعني لا بيكلموا صبيان و لا أصلاً يعرفوا يتعاملوا مع الكائنات دي، في مدرستي الغاليه كانت البنات في قمة الإجتماعيه و الإندماج....أول يوم في المدرسة كنت داخل قطة مغمضة يعني متكلمش إلا مع الراجل اللي زيي...قربت مني شلة بنات و عرفوني بنفسهم و لما سالوني عن أسمي قلت:
- مر.... مي مي.
- مي مي وااااااو جميل أوي.
- حلو أوي اسمك.
- ايه الاسم الكيوت ده... يجنن.
قعدوا نص ساعه يشكروا ف الإسم اللي ارتجلته كده... كان نفسي اقولهم مرررررررعي علشان أعرف ردة فعلهم.
بدون الدخول ف تفاصيل (هبقى أحكيهالكم في قعدة تانيه) كترت صداقاتي و معارفي في البداية كنت بعتبرهم إخواتي لكنهن أبين.... أي والله أبين و رفضن ....( حلوه حتة نون النسوة دي أنا عارف).
الست نوجه _والدتي_ عانت كتير اوي لما زميلاتي الموقرات بدؤوا يتصلوا بيا على البيت و كل واحده فيهم تسمعها قصيدة شعر كاتباها فيها ( على قولتها لجل مي مي... قصدي لجل الورد) كانت ردات فعلها في الأول إنها تقفل السماعة و تسمعني موشح لكن لما والدي عرف بالخبر
أن أن أننننننننننننننن
قامت حريقة مطفتش إلا لما ماما قالتله خلاص يا حاج سيد و لا يهمك انا هبهدل البنات دي و معادتش هتتصل هنا تاني.
لكن مييييييييييييييين هيهات؟ الإتصالات تكاثفت و انا عملت فيها البرئ اللي مليش يد في تهافت المعجبين عليا و قلت إنهم لا يتعدوا كونهم زميلات ليا و بعتبرهم زي اخواتي بالضببببببببببببببببببط.

كفاية ذكريات و نييجي بقه للحاضر رمضان بكره و مش عارف أنا هعمل ايه؟ البنات قالوا إنهم حطوا برنامج علشان رمضان تحت شعار ( ده رمضان شهر واحد ف السنه ...لازم نعيش بس من غير ما نغضب ربنه)
رمضان شهر واحد ف السنه دي حقيقه يعني مجابوش حاجه من عندهم... و من غير ما نغضب ربنا دي كويسه اوي و أنا بحييهم عليها.... أماااااااااا بقه لازم نعيش دي قلقاني.
لما أتصل بالواد (كَبّو) و أشوف البنات إتفقوا معاه على إيه.

أشوفكم بكره و كل سنه و إنتم طيبين
و إوعوا تنسوا
رمضان شهر واحد في السنه
لاااااااااااازم نعيش بــــــــــس
من غير ما نغضب ربنا

روابط فصول الرواية ...

المقدمة ....فى نفس المشاركة
الفصل الاول
الفصل الثانى
الفصل الثالث
الفصل الرابع
الفصل الخامس
الفصل السادس
الفصل السابع
الفصل الثامن
الفصل التاسع
الفصل العاشر
الفصل الحادى عشر
الفصل الثانى عشر
الفصل الثالث عشر
الفصل الرابع عشر
الفصل الخامس عشر
الفصل السادس عشر
الفصل السابع عشر
الفصل 18,19,20,21
الفصل 22,23
الفصل 24,25
الفصل26,27,28
الفصل الاخير