خَطَأٌ لَا يُمْكِنَ إِصْلَاحُهُ *مميزة و مكتملة*

[منال سالم]

الحلقة العشرون :


في كلية تجارة انجليش ،،،

عاد مروان إلى الكلية ونسي تماماً أن يحضر الهدايا و...
-يوسف: ايه يا عم ماروو اللي أخرك كل ده
-مروان: معلش حصلت شوية حاجات ورا بعض كده فده اللي اخرني
-يوسف: وبعدين فين الهدايا اللي انت جايبها عشان توريهالنا
-مروان وهو يخبط يده بجبهته اوووبا ، اتلبخت ونسيت الموضوع ده خالص
-مايا: ليه بس يا ماروو
-يوسف: انت دماغك مش فيك
-مروان: خلاص انا رايح أجيبهم
-يوسف: لأ استنى ، أنا هابقى أروح معاك
-رضوى: احنا لحد الوقتي معانا ناس تكفي لباصين كاملين ولسه الحجوزات مستمرة
-أحمد: ده حاجة عظيمة اوي
-مايا: طبعاً ، ده الناس ما هتصدق انها تطلع معانا
-رضوى: هو احنا أي حد يا مايا
-أحمد: ايوه
-يوسف: ربنا يسهل بس ومايحصلش اي مشاكل في الرحلة
-رضوى: انا بقول نقفل الحجز ع كده
-أحمد: وانا كمان ، كفاية لحد كده

ثم رن هاتف يوسف برقم والده فأجاب على الاتصال و..
-يوسف هاتفياً: الوو .. ايوه يا بابا
-سليم: تعالى يا يوسف بسرعة ع البيت
-يوسف: في ايه يا بابا
-سليم: مامتك تعبت شوية وآآآ....
-يوسف مقاطعاً: ايه ؟؟ ماما تعبت ، انا جاي حالاً

أنهى يوسف المكالمة مع والده ثم أسرع نحو سيارته ليستقلها ، حاول مروان اللحاق به وفهم ما يحدث و...
-مروان: في ايه يا جووو
-يوسف: .......
-مروان: يا بني استنى وفهمني في ايه

-مايا: ماله جوو ، بيجري كده ليه
-رضوى: مش عارفة
-أحمد: أنا هحاول أحصله وأفهم في ايه
-مايا: اه يا ريت

ركب مروان مع يوسف سيارته وعرف منه أن والدته مريضة و...
-مروان: ان شاء الله هتبقى كويسة متقلقش
-يوسف: ربنا يستر
-مروان: طب أبوك قالك فيها ايه
-يوسف: لأ ، وده اللي راعبني
-مروان: ان شاء الله مايبقاش في حاجة وحشة
-يوسف بقلق: يا رب

............................

في أحد المطاعم الخاصة بالوجبات السريعة ،،،

كانت نسمة تجلس بصحبة تامر حينما جاءت إليها مي و...
-نسمة وقد لمحت مي: ميوووي ، تعالي
-مي: هاي
-تامر: ازيك يا ميوي
-مي: هاي تامر
-نسمة: انتي كلمتني وقولتي عاوزة تشوفيني عشان حاجة مهمة
-مي: ده خبر الموسم يا نسوم
-نسمة: ايه
-مي وهي تخرج هاتفها المحمول من حقيبتها : بصي عالصور دي وقوليلي رأيك
-نسمة: وريني

رأت نسمة صوراً ملتقطة لنيرة ومروان وهما يتحدثان سوياً وأيضاً وهما يركبان السيارة و...
-نسمة: مش معقول ، دي البت نيرة
-مي: اه هي ، ها ايه رأيك بقى في الصور دي
-نسمة: دي البت بتلعب ع تقيل ، وبس عملالنا فيها الملاك البريء
-مي: شوفتها بالصدفة وأنا ماشية فقولت أما أصورها واوريكي
-نسمة: دي احسن حاجة عملتيها
-تامر: انتو بتحكوا عن مين
-نسمة: عن نيرو نيرو
-تامر: البت بتاعة الوردة البيضا
-نسمة: بالظبط يا .. يا بتاع اللحن الحزين
-تامر ضاحكاً: ههههههههههههه ، أنا عارف اخترتي الاسم النكدي ده ليه ليا وأنا أصلاً مش كده
-نسمة: سيبك من الكلام الفاضي ده ، الوقتي البت نيرة دي طلعت مش سهلة ، واحنا لازم نزود العيار معاها شوية
-مي: طب نعمل ايه؟
-نسمة: لازم اللحن الحزين يشتغل عليها أكتر
-تامر: يا بنتي ممكن تشك
-نسمة: لأ .. طالما هتعملوا اللي هاقولكم عليه يبقى هتقع في المصيدة ، المهم كمان عاوزين نخلي البت نهلة تظبطها في الجروب الجديد اللي عاملينوه وتدخلها من سكة الأنشطة والمعلومات
-مي: أنا مش فاهمة حاجة
-تامر : ولا أنا
-نسمة: أنا هافهمكم ، الوقتي هندخل البت نيرة في جروب خاص بالمعلومات العامة ويكون اللحن الحزين عضو في نفس الجروب ، ونخلي الكل يكتب كلمات تشجيع ليها فتحس انها شخص مهم ، واللحن الحزين اللي هو تامر يشتغل عليها بالتشجيع وانه يتكلم عن نفسه كل شوية ويلهيها ودايماً يكون متابع ليها فهي غصبن عنها هتتعود على وجوده في حياتها
-تامر: بس ده هياخد وقت كتير
-نسمة: مش مهم كبرها شهر معانا ، بس هيجيب نتيجة في الأخر ، وده اللي أنا عاوزاه إني أجرها لسكتنا وأستفيد
-مي: أها
-تامر: ده انتي شر
-نسمة: اومال ايه ، ده أنا هحاصرها من كل حتة !

.................................

في فيلا سليم الكومي ،،،

وصل يوسف إلى فيلته ، انتظر مروان في الردهة بينما صعد يوسف إلى الطابق العلوي ، وما إن وصل لغرفة والدته حتى وجد الطبيب خارجاً منها فسأله عنها و...
-يوسف: خير يا دكتور ماما مالها
-الطبيب: اطمن ، مافيش حاجة خطيرة
-سليم: تعالى يا جوو
-يوسف وهو يقبل رأس والدته : ماما .. انتي كويسة ؟؟ في ايه اللي حصل يا بابا
-عبير: آآآ.. أنا .. أنا بخير يا بني
-سليم: الحمدلله مامتك بقت أحسن
-يوسف: هو حصل ايه ؟
-سليم: غيبوبة سكر ، والحمدلله لحقناها ، بس الدكتور طالب شوية تحاليل وفحوصات أكتر عشان نطمن
-يوسف وهو ينظر لذراعها : طب ايه اللي حصل لدراعك
-عبير: اتلوى
-يوسف: مش تاخدي بالك أكتر يا ماما
-سليم: احنا ان شاء الله هنروح المستشفى بس أما مامتك تشد حيلها ونطمن أكتر
-يوسف: يالا الوقتي يا بابا
-عبير: لأ يا بني بعدين
-يوسف: مافيش حاجة اسمها بعدين
-سليم: اهدى يا جوو ، مامتك كويسة ، هي بس ترتاح شوية وبعد كده هنروح ع المستشفى ونطمن .. المهم انت ركز في كليتك واللي وراك
-يوسف وقد تذكر مروان: اوووبا ، ده انا نسيت مروان تحت
-سليم: هو مروان هنا
-يوسف: اه جه معايا وماسبنيش
-سليم: طب استى يا بني أنا نازل معاك أسلم عليه
-يوسف: اوك

...................................

في منزل صلاح الدسوقي ،،،،

عاد صلاح من الخارج بعد يوم مرهق قضاء في المستشفى الحكومي من اجل الاطمئنان على ذلك العامل البسيط رجب و..
-زينب: ايه يا حاج اللي اخرك كل ده ؟
-صلاح: اسكتي يا زينب ، كانت هتحصل مصيبة في الشغل النهاردة بس الحمدلله ربنا ستر
-زينب: يا ساتر يا رب في ايه اللي حصل
-صلاح: الواد رجب وقع من ع السقالة وكان ممكن يروح فيها بس ربك سترها معاه ورجله اتكسرت
-زينب: يا ربي ! وبعدين
-صلاح: خدته وجريت ع المستشفى مع كام واحد واتجبست رجله
-زينب: الحمدلله انها جت ع أد كده
-صلاح: قدر ولطف
-زينب: المهم احنا المفروض هننزل نقابل العريس وأمه ع الساعة 8
-صلاح: أنا معرفش هو مستعجل على ايه ومسربعنا معاه
-زينب: الراجل جاهز ايه اللي يخليه يضيع وقت
-صلاح: اوووف
-زينب: وبعدين يا حاج احنا اديناله كلمة ، مش معقول هنرجع فيها ، ده غير ان الست آمال جاية معانا
-صلاح: ربنا يسهل
-زينب: أنا هاجهزلك الغدا ، وبعدها أبدأ أجهز أنا والبت ندى
-صلاح: اه الله يكرمك لأحسن محتاجة أنام من التعب
-زينب: على طول

أعدت زينب الطعام لزوجها الذي تناوله ثم ذهب في نوم عميق من كثرة التعب والارهاق ، بينما بدأت ندى تستعد للقاء والدة علاء الليلة و...
-نيرة بخبث: ممم.. أيوه يا عم
-ندى: بس يا نيروو
-نيرة: ها هتقابلي حماتك النهاردة
-ندى: ايوه ، و ربنا يستر
-نيرة وهي تشير لفاطيما : هي البت دي هتفضل نايمة كده كتير
-ندى: سيبيها ملكيش دعوة بيها
-نيرة: ايوه خليها تعمل نفسها نايمة عشان تهرب من العقاب ، بس أنا هفضل وراها لحد ما تتعدل
-ندى: اعوذو بالله ، تموتي في الأذية
-فاطيما: يا رب الميس تضربك في المدرسة عشان أفرح فيكي
-نيرة: يعني انتي صاحية اهوو
-فاطيما: لأ نايمة
-نيرة وهي تقفز فوقها : طيب أنا بقى هاصحكي
-فاطيما: آآآآآآه ، ندى ابعديها عني
-ندى: بس انتو الاتنين
-نيرة وهي تشد أختها من شعرها: بتصيعي يا بت من ورانا
-فاطيما: آآآآآآآآه .. شعري
-ندى: سيبي شعرها يا نيرة
-نيرة: لأ ، ده انا نويالها ، عشان كمان تبقى تتريق عليا مع اللي اسمه بتاع ده
-فاطيما: آآآآآه ..
-ندى: هي متقصدش
-نيرة: ايوه ياختي افضلي دافعي عنها لحد ما تتنمرد علينا بزيادة
-ندى وقد خلصت فاطيما من يد أختها : ادك دي عشان تفضلي تستقوي كده عليها
-فاطيما وهي تتجه لباب الغرفة : يا رب يرزقك بواحد مفتري يا نيرة يطلع عينك
-نيرة بغضب: بت ، طب والله ما هسيبك
-فاطيما وهي تجري خارج الغرفة : عااااا

-زينب من الخارج : شششش ... أبوكو نايم ، بطلوا دوشة
-فاطيما: ماما والله هي اللي بتضايقني
-زينب: أنا لسه مكلمتكيش عن اللي حصل ، بس أما أرجع من برا بالليل هنتكلم ونتحاسب
-فاطيما بخوف: هــه
-زينب: اتفضلي خلصي الواجب بتاعك وحسك عينك ألاقي حاجة ماتعملتش
-فاطيما: حــ... حاضر
-زينب: وانتي يا ندى حاولي تخلصي بسرعة
-ندى: طيب

...............
انتهت ندى من ارتداء ملابسها ، وكذلك كان الحال مع زينب ، وانتظروا وصول علاء في الأسفل لكي يصطحبهم مع الجارة آمال لكي يروا والدته و..
-صلاح: علاء لسه قافل معايا ، هو منتظركم تحت
-زينب : خلاص احنا لبسنا ، هاشوف آمال فين وننزله
-صلاح: متتأخروش يا زينب
-زينب: لأ يا حاج ، يدوب بس نشوف أمه وينزلوا العيال ينقوا الدبل ونرجع على طول
-صلاح: ربنا يسهل الحال
-زينب بصوت مرتفع: يالا يا نـــــــــــــدى
-ندى من داخل غرفتها : حااااضر ، جاية يا ماما

خرجت ندى من غرفتها وهي متأنقة وترتدي جيبة لونها أسود ومن فوقها قميص لونه ( أوفوايت) ووضعت ميك آب بسيط ...
-صلاح: ماشاء الله يا بنتي زي القمر
-ندى: شكراً يا بابا
-زينب: الله يحميكي من العين يا نودة
-صلاح: اوعوا تتأخروا وخليكوا على اتصال بيا
-ندى: حاضر يا بابا

..................................

في سيارة علاء ،،،،

كان علاء منتظراً أسفل الxxxx ، وركبت بجواره الجارة آمال وانتظروا أن تنزل إليهم ندى ووالدتها و...
-آمال: انت هتاخد جوهرة يا علاء
-علاء: أها
-آمال: بت زي القمر مالهاش زي ، أدب وأخلاق وتربية
-علاء: ما أنا عارف
-آمال: أهوم نزلوا

ترجل علاء من السيارة وكذلك الجارة آمال ليرحبوا بندى ووالدتها و..
-آمال: أهلا يا عروسة ، اللهم صلي على النبي قمر يا ناس
-ندى بخجل: ميرسي يا طنط
-علاء: ازيك يا آنسة ندى
-ندى: الحمدلله
-زينب: ازيك يا آمال احنا متأخرناش أهوو
-آمال: لأ يا حبيبتي ، في ميعادكو مظبوط
-زينب: ازيك يا علاء يا بني
-علاء: الحمدلله يا طنط ، اتفضلي حضرتك في العربية
-زينب: حاضر يا بني

ركب الجميع في السيارة ، ثم انطلق بهم علاء نحو منزله لكي يقابلوا والدته و..
-علاء: والله ماما متشوقة انها تتعرف عليكم أوي
-زينب: واحنا كمان يا بني
-آمال: مش عاوزة اقولك أد ايه الحاجة سناء من اصل طيب وحاجة كده من الناس الكُرما الطيبين بتوع زمان
-زينب: اكيد طبعا ، ده أنا متوقعة انها هتبقى زي اختي واكتر
-آمال: الحاجة سناء زي البلسم والله ، لو عرفتيها هتحبيها أوي
-زينب: ان شاء الله

.......................
في أحد المستشفيات الخاصة ،،،،
اصطحب سليم ويوسف السيدة عبير إلى المستشفى من أجل اجراء الفحوصات اللازمة للاطمئنان على صحتها و..
-الطبيب: نتيجة الأشعة هتطلع كمان يومين ، متقلقوش
-يوسف بقلق: استرها يا رب
-سليم: اوعي يكون يا دكتور عندها حاجة وحضرتك مخبي علينا
-الطبيب: أنا مقدرش اجزم بده ، بس احنا بنطمن بزيادة عليها
-يوسف: اوووف ، أنا كده قلقت أكتر
-الطبيب: مافيش داعي .. في خلال يومين النتايج ختطلع وبأمر الله أطمنكم
-سليم: شكراً يا دكتور ع تعبك معانا
-الطبيب: أنا معملتش حاجة ، ده واجبي ، عن اذنكو
-سليم: اتفضل
-يوسف: لأ أنا كده مش هاعرف أعمل أي حاجة غير لما أطمن على ماما
-سليم: تقصد ايه ؟
-يوسف: انا مش طالع الرحلة ، مش معقول اسيب ماما وهي كده عشان أطلع أتفسح
-سليم: يا بني متقلقش أمك هتكون بخير
-يوسف: برضوه ، انا هاكلم رضوى يا تأجل الرحلة ، يا يطلعوها من غيري ، لكن أنا دماغي مش رايقة لأي حاجات من دي الوقتي
-سليم: اللي يريحك يا بني

اتصل يوسف بصديقته رضوى ليبلغها باعتذاره عن الرحلة و...
-رضوى هاتفيا: طب ليه بس
-يوسف هاتفيا: ماينفعش أسيب ماما وهي كده
-رضوى: انت عندك حق .. بس آآآ... بس الناس كلها عارفة انك انت المنظم وهتعملهم مفاجأت كتير
-يوسف: والله لو حابة تأجليها براحتك ، حابة تطلعيها برضوه معنديش مانع ، لكن أنا مش هاروح في حتة وأنا مش مطمن على ماما
-رضوى: لأ حقك .. انا هتكلم مع باقي الشلة والأسرة ونشوف هنعمل ايه
-يوسف: تمام .. سوري يا رضوى أنا عارف اني عملتلك مشكلة بس آآآ...
-رضوى مقاطعة: لأ متقولش كده ، دي برضوه مامتك ، واي حد في مكانك كان هيعمل كده
-يوسف: شكراً يا رضوى
-رضوى: ألف سلامة عليها ، وان شاء الله أكلمك تاني عشان أطمن عليها
-يوسف: بأمر الله ... سلام
-رضوى: باي

-يوسف في نفسه بعد أن انهى المكالمة: كده أحسن .. مافيش داعي أشيل مسئولية حد وأنا بالي مشغول على أمي .. أي حاجة تهون إلا الأم ..!
...................................

في منزل علاء ،،،،

ترجل علاء من السيارة وكذلك فعل الباقون ثم توجهوا لداخل الxxxx الذي يسكن به علاء و...
-علاء: انا ساكن مع ماما والعيلة هنا ، وشقتي بعدها بدورين
-آمال: اها
-زينب: ماشاء الله
-علاء: اتفضلوا في الأسانسير
-زينب: طيب
..............

وصل الجميع إلى شقة أسرة علاء عبدون ، فتح علاء الباب ودلف الجميع للداخل و..
-علاء: اتفضلوا يا جماعة في الصالون ، ماما جاية حالاً
-زينب: يزيد فضلك يا بني
-آمال: ماشي يا علاء
...............

في غرفة الصالون ،،،
ظلت ندى ووالدتها تتأملان ذلك المنزل الهاديء ، كانت ندى تشعر بالضيق من وجودها في هذا المكان ، هو هاديء جداً وأضوائه خافتة بالاضافة إلى انه غير جيد التهوية ، ثم بعد لحظات دلف علاء ومع والدته و................................................ .......... !!!

....................................

[منال سالم]

الحلقة الحادية والعشرون:

في منزل علاء ،،،
في غرفة الصالون ،،،
ظلت ندى ووالدتها تتأملان ذلك المنزل الهاديء ، كانت ندى تشعر بالضيق من وجودها في هذا المكان ، هو هاديء جداً وأضوائه خافتة بالاضافة إلى انه غير جيد التهوية ، ثم بعد لحظات دلف علاء ومع والدته و...
-علاء: اتفضلي يا ماما
-سناء: سلامو عليكم
-آمال بفرحة: حاجة سناء ، ازيك
-سناء وهي تحتضنها: الله يسلمك يا آمال
-آمال: دي الست زينب
-سناء وهي تصافحها: أهلا بيكي يا حاجة زينب ، نورتينا
-زينب: الله يخيكي يا حاجة سناء ، ده البيت منور بأصحابه
-سناء: شكراً
-آمال: ودي بقى عروستنا الحلوة ندى
-سناء وه تتفحص ندى بعينيها: أهلا بيكي يا بنتي
-ندى : أهلا بحضرتك يا طنط
-علاء: انتو هتفضلوا واقفين كده كتير ، اتفضلوا اقعدوا
-سناء: اتفضلوا يا جماعة ، معلش أنا عارفة اني تعبتكم وخليتكم تيجوا عندي وأنا المفروض اللي كنت أروحلكم بس اصلي تعبانة والدكتور منبه عليا ممنوع الحركة الكتير
-آمال: يزيد فضلك يا حاجة سناء .. وسلامتك يا حبيبتي من كل سوء
-زينب: ولا يهمك يا حاجة ، وألف سلامة عليكي ، احنا واحد وقريب هنبقى عيلة
-سناء: شكراً .. ده العشم برضوه
-زينب: اكيد ..
-علاء: لحظة واحدة وراجع تاني
-آمال: خد راحتك يا علاء

ساد الصمت للحظات قليلة ، فقطعته سناء بـ....
-سناء: ازيك يا حاجة زينب
-زينب: الحمدلله في نعمة
-سناء: انتي بتشتغلي ؟
-زينب: لأ .. أنا اتجوزت بدري وأقعدت في البيت
-سناء: اها .. وعلى كده معاكي شهادة يا حاجة زينب
-زينب: احم.. أه كان معايا الدبلوم
-سناء: أها
-آمال متدخلة في الحوار : آآآ... مقولتلناش ايه رأيك يا حاجة سناء في عروستنا الحلوة
-سناء: هي فعلا حلوة
-ندى: ميرسي
-سناء: انتي لسه بتدرسي يا ندى صح ؟
-ندى: ايوه يا طنط في تانية تجارة انجليش
-سناء: ماشاء الله
-آمال: ندى دي أشطر اخواتها ، ومؤدبة .. حاجة مش موجودة في الزمن الأغبر اللي احنا فيه ده
-سناء: لأ ماهو واضح فعلاً
.........

دلف علاء وهو يحمل صينية بها بعض من المشروبات والحلوى للترحيب بالضيوف
-آمال مسرعة: عنك يا ابني
-علاء: أنا عارف يا طنط أشيل الصينية
-آمال: طبعاً يا بني ، أنا بس بحب أساعد
-سناء: حطها عندك هنا يا علاء
-علاء : اوك
-سناء وهي تقدم لهم المشروب: اتفضلوا
-زينب: شكراً يا حاجة ، دايما عامر يا رب
-آمال: خدي يا عروسة من ايد طنطك سناء
-ندى: ميرسي
-سناء: علاء ابني يعني مش محتاج أتكلم عنه كتير بس فعلاً اللي هتاخده هتشوف معاه أجمل أيام في حياتها
-زينب: طبعا

رن جرس باب المنزل فأمرت علاء بالذهاب واحضار الضيف الجديد ...
-سناء: روح افتح الباب يا علاء ، دي أكيد مدام يمنى
-علاء: حاضر
-آمال مستفهمة : هو انتي عازمة حد معانا تاني يا حاجة سناء
-سناء: لأ دي مدام يمنى ، مش حد غريب ، وبعيد الوقتي هتعرفوا هي جاية ليه
-آمال: اها
-زينب في نفسها: يا خبر بفلوس دلوقتي يبقى ببلاش

دلفت السيدة يمنى إلى داخل غرفة الصالون ورحبت بالجميع و...
-علاء: اتفضلي يا مدام يمنى
-يمنى: شكراً يا عريس ، وربنا يتمملك ع خير
-علاء: اللهم أمين
-يمنى: مساء الخير عليكو جميعاً
-سناء: ازيك يا مدام يمنى
-يمنى وهي تحتضنها : حاجة سناء ازيك ، بجد أنا فرحانة اني شوفتك واني دايماً بقابلك في المناسبات السعيدة
-سناء: تسلميلي يا حبيبتي
-يمنى وهي تشير لندى : أكيد دي العروسة صح
-سناء: أه هي ، ودي والدتها الحاجة زينب ، ودي الست آمال
-يمنى: الست آمال غنية عن التعريف ، أخبارك ايه
-آمال: مدام يمنى وحشاني والله
-يمنى : انتي اكتر ، ازيك يا حاجة زينب
-زينب: بخير الحمدلله
-يمنى: تعالي يا عروسة جمبي
-ندى: اروح يا ماما
-زينب: هي دي محتاجة سؤال ، روحي يا بنتي جمبها
-ندى: حاضر
-سناء: مدام يمنى دي صاحبتي وعندها محل دهب وبنتعامل معاها من زمان
-زينب بدهشة : هه
-ندى: هــاه
-سناء: أنا طبعاً عشان مش بنزل كتير ، فطلبت منها انها تجيب كام حاجة كده عشان عروستنا تشوفها وتختار
-ندى: ايه
-زينب: آآآ...
-يمنى وهي تفتح كيس قماشي صغير : ده أنا منقية احسن حاجة عندي في المحل عشان العروسة تختار براحتها
-زينب: بس آآآ.. يعني احنا كان المفروض هنتقابل في المحل وكده ، ده اللي علاء بلغه للحاج صلاح ، مش كده يا بني؟
-علاء : الحقيقة آآآ...
-سناء مقاطعة : انتي شايفة صحتي عاملة ازاي ، وأنا مقدرش أتحرك كتير ، فأنا طلبت منه انه يجيبكم عندي
-زينب: اه يا حاجة بس آآآ...
-آمال متدخلة في الحوار : وماله مش عيب ، العروسة بس تشوف وتختار ، ولو معجبهاش حاجة مدام يمنى تجيبلها غيره
-سناء: بالظبط
-آمال: ايه رأيك يا زينب ؟
-زينب على مضض: طيب

أخرجت يمنى بعض الدبل من الكيس القماشي لكي تراهم ندى و..
-يمنى: شوفي الدبلة دي يا عروسة
-ندى وهي تنظر لها : حلوة
-يمنى: طب بصي لدي بقى
-ندى: كويسة
-يمنى: ها ، ودي كمان
-ندى: احم.. جميلة
-يمنى: ملي عينك كده واختاري
-ندى: أها

ظلت ندى تتفحص الدبل وهي غير متقبلة للوضع بالمرة ، هي تشعر أن هناك شيئاً خطئاً بالموضوع ، ولكنها لا تريد أن تتسبب في احراج أي أحد ، ثم أخذت تجرب مقاس الدبل في إصبعها وكان غالبيتهم واسع عليها بدرجة كبيرة مما قلل فرصة الاختيار بالنسبة لها و...

-يمنى: بصي مافيش بعد كده ، دي أحدث حاجة في السوق
-سناء: ممكن توريني يا مدام يمنى
-يمنى: أه طبعا ، اتفضلي
-سناء: مممم... لأ حلوين فعلا
-آمال: خليني أشوف أنا كمان
-يمنى: اتفضلي
-آمال: بصي يا زينب ع الجمال والرقة
-زينب: اها حلوين
-يمنى: ها يا عروسة ، في حاجة في دول عجبتك
-علاء مقاطعاً : أنا ممكن اقول رأيي؟
-آمال: أه طبعاً ، ده انت العريس ، ولا ايه يا زينب
-زينب: ايوه مظبوط
-علاء: انا رأيي تختاري الدبلة اللي من غير فصوص بتكون عملية اكتر ومش بتتبهدل
-يمنى: عندك حق يا علاء ، الدبل اللي بفصوص بتقع فصوصها بسرعة وبندوخ عقبال ما نجيب نفس الشكل والتصميم
-سناء: صح .. كلامك مظبوط يا علاء يا بني، ولا انتي ليكي رأي تاني يا ندى ؟
-ندى باحراج: احم.. اللي تشوفوه
-زينب: اختاري يا حبيبتي اللي يعجبك ،ولو عاوز حاجة تانية قولي ماتتكسفيش
-ندى: الدبلة دي كويسة
-سناء: فعلاً حلوة

اختارت ندى الدبلة التي لا تحتوي على أي شيء سوى نقوش بسيطة للغاية ، والتي كانت مقاربة لحجم اصبعها ...

-زينب: دي اللي عجبتك يا ندى
-ندى: ايوه يا ماما
-زينب على مضض: مش بطالة ، بس شوفي ان كان في حاجة تانية ولا لأ
-ندى: احم... دي كويسة يا ماما
-آمال: سبيها على راحتها يا زينب ، هي العروسة وتختار اللي يعجبها ، وأنا شايفة كده انها هتتفق مع علاء جداااا
-علاء: ممكن اذا سمحتي يا طنط أنزل أنا وندى تحت نشوف دبلتي من محل الفضة اللي جمبنا
-زينب بتردد: بس آآآ...
-علاء: مش هنتأخر
-سناء: ماهو أكيد محتاج يلبس هو كمان دبلة زي العروسة
-آمال ضاحكة : ههههههههههههههه العريس دايماً بيتنسى في موضوع الدبل دي
-سناء: اه والله ، ولو كنت بصحتي وقادرة أنزل كنا روحنا كلنا عند المحل ده
-آمال: ربنا يديكي الصحة يا حاجة سناء ويشفيكي قادر يا كريم
-سناء: امين
-زينب: طيب ، انزلي يا ندى مع عريسك
-ندى: حــ... حاضر

..................................

اصطحب علاء ندى إلى محل المشغولات الفضية الموجود بجوار منزله لكي ينتقي دبلته الخاصة ، كان علاء متوتراً من وجود ندى معه ، وهي شعرت بتوتره هذا ..
-علاء: آآ... دي أول مرة اتكلم معاكي من غير ما حد يكون متابعنا
-ندى: اها
-علاء: ها مبسوطة ؟
-ندى: الحمدلله
-علاء: بصي أنا بأمر الله لما نتفق على كل حاجة هاجيبلك أحسن شبكة في الدنيا وأعملك كل حاجة في الشقة فوق ما تتخيلي
-ندى: إن شاء الله
-علاء: مش عاوزك شيلي هم أي حاجة ، احنا كمان مش هنطول لا في خطوبة ولا غيره ، كله هيبقى ورا بعضه
-ندى: أهــا
-علاء وهو يشير بيده : المحل أهوو .. تعالي أما نشوف هنختار ايه سوا
-ندى: اوك

دلفت ندى بصحبة علاء إلى داخل محل المشغولات الفضية لتبدأ أولى المواجهات بينهما .....
.............................................

في منزل تامر ،،،،

كان تامر يفكر في نيرة كثيراً خاصة أنها أول فتاة تستعصى عليه ، لذا قرر أن يغير في الاستراتجية التي اتفق مع نسمة عليها ، ظل يفكر ملياً في كيفية استغلال الصور التي بحوزته ، وبالفعل وصل إلى .....
-تامر: أنا لو أعدت أسمع كلام البت نسمة دي مش هوصل لحل وهاتطلع عيني عقبال ما أوقعها، لكن أنا لو اتعامل مع نيرة بطريقتي هاجيب رجلها بسرعة، و هاعرف ازاي أوقعها .. أيوه واللي هيحصل نسمة مش هتعرف عنه أي حاجة ، أيوه بالظبط .. كده أحسن ، أنا هاقص الصورة اللي اتصورت دي وأبعتها بوش البت نيرة بس وأشوف بقى ردة فعلها لما تلاقي صورتها في رسالة ع النت .. !!!

...........................................

في منزل صلاح الدسوقي ،،،،،

كانت فاطيما مشغولة باتمام واجبها المدرسي ، بينما كانت نيرة تقضي وقتها على موقع الفيس بوك و...
-نيرة: اووف ، مافيش اي جديد خالص ، كل حاجة مملة ، مممم... ده ايه الجروب ده كمان .. الله ! ده فيه معلومات حلوة .. الله كمان عاملين جوايز للي يجاوب ، طيب أما أجرب كده
-فاطيما: نيرة تعالي ساعديني في الـ homework ده
-نيرة: أنا مش فاضية الوقتي
-فاطيما: ماهو لو ندى موجودة كانت هتساعدني
-نيرة: يووووه ، أما تبقى تيجي ندى خليها تساعدك
-فاطيما: غتتة
-نيرة: بتقولي ايه ؟
-فاطيما: مافيش

-نيرة: الله ! ده في حد باعتلي رسالة ، اما أشوف مين ...

قامت نيرة بفتح الرسائل الخاصة بها على الفيس بوك لتتفاجيء برسالة أخرى جديدة من ذلك المدعو اللحن الحزين ...
-نيرة: برضوه اللحن الحزين ، هو ايه مش بيزهق ، أما أشوف كاتب ايه المرادي

كان نص الرسالة المكتوب على الفيس بوك
(( لم أعد أطيق أن يراكي غيري ويتمتع بصحبتك بدلاً مني ، فأنتي خُلقتي لتكوني ملكة على قلبي ))
بالاضافة إلى صورة ملحقة بالرسالة والتي كانت عبارة عن صورة خاصة بها هي

أصيبت نيرة بالرعب حينما رأت تلك الرسالة والصورة ، فأرسلت رداً على الفور
-نيرة: انت مين بالظبط ؟؟ وجبت الصورة دي منين ؟؟

انتظرت نيرة لعدة دقائق دون أن ياتيها أي رد .. لم تكن تعرف كيف ستتصرف ، هي خائفة ولكن لا تعرف السبب .. فمعنى وجود أي صورة لها مع أحد لا تعرفه أنها في مأزق كبير

.............................

في محل المشغولات الفضية ،،،

دلفت ندى بصحبة علاء إلى داخل المحل ، كان علاء من النوع الذي يتعرق من يده حينما يصاب بالتوتر و...
-علاء: احم... اصل الواحد أما بيتوتر بتلاقيه كده مش ع بعضه
-ندى: ولا يهمك
-صاحب المحل: مساء النور
-علاء: مساء الخير
-صاحب المحل: تؤمروا بايه حضراتكم
-علاء: عاوز دبلة فضة على مقاسي
-صاحب المحل : عريضة ولا صغيرة ، بفصوص ولا سادة
-علاء لندى: انتي رأيك ايه ؟
-ندى: اللي يريحك
-علاء: طب ورينا كده المجموعة اللي عندك دي واحنا هنختار
-صاحب المحل: حاضر

لاحظت ندى تصبب العرق من يد علاء فقامت بفتح حقيبة يدها واخرجت علبة المناديل وأعطت علاء منديلاً لكي يمسح به يده
-علاء وهو ينظر لها: شكراً
-ندى: العفو

اخذ علاء يقيس الدبل على حجم اصبعه المبتل من التوتر ، فأخرجت ندى منديلاً أخر لكي يمسح به علاء يده ، ولكن تلك المرة أخذه علاء منها دون أن يشكرها ولكنه اكتفى بنظرة نارية تخرج من عينيه خافت على اثرها ندى منه ..

-علاء: تمام أنا هاخد الدبلة دي
-صاحب المحل: ذوقك حلو ، تحب نكتب عليها التاريخ والاسم ؟
-علاء: لأ التاريخ بس ، ووقت ما هنحدده هبلغك
-صاحب المحل : تمام
-علاء لندى : ايه رأيك ؟
-ندى: جميلة ماشاء الله

وضع علاء الدبلة الخاصة به في علبة صغيرة ، ثم خرج مع ندى من المحل لتبدأ أول مراحل الشجار بينهما و...
-علاء بحدة : ايه اللي عملتيه ده جوا ؟
-ندى بخوف: أنا عملت ايه ؟
-علاء: يعني مش عارفة
-ندى: لا والله أنا معملتش حاجة
-علاء بنرفزة : لا والله ، طب والمناديل اللي عمالة تطلعيها عمال على بطال عشان تحرجيني قصاد الراجل جوا
-ندى: والله ما أقصد، أنا بس كنت عاوزة اديك منديل تمسح بيه ايدك

اخذ علاء نفساً طويلاً كي يهدأ قليلاً ثم تحدث قائلاً ...
-علاء: تاني مرة متعمليش كده لو سمحتي ، وأنا لو عوزت حاجة هابقى اقولك
-ندى: حاضر
-علاء: بس ع فكرة انتي ذوقك زيي
-ندى: اها
-علاء: اوعي تكوني زعلانة مني
-ندى: لأ عادي
-علاء: انا بس عاوزك تفهميني عشان نقدر نكمل بعض بدون مايحصل خلاف بينا
-ندى: بأمر الله
-علاء: انتي لسه مش عارفاني واكيد لما هنفهم بعض كويس هتلاقي الأمور بينا ماشية
-ندى: اكيد
-علاء: طب يالا عشان محدش يقلق عليكي
-ندى: اوك

صعدت ندى مع علاء إلى منزلهم مرة أخرى ..

............................

في النادي ،،،،
-مايا: يعني ايه مش طالع الرحلة
-رضوى: هو اتصل واعتذر عشان مامته تعبانة
-مايا: طب وهنعمل ايه الوقتي
-رضوى: مش عارفة
-مايا: ده انا كنت معتمدة ع انه طالع الرحلة دي عشان نكون سوا ونقرب من بعض أكتر وأكتر .. اوووف
-رضوى: أنا هاضطر أبلغ المشرفين ع انه مش طالع
-مايا: طب مافيش بديل تاني
-رضوى: لأ ، في ..
-مايا: ايه هو ؟؟
-رضوى: إننا ممكن نأجل الرحلة
-مايا: هـــه ! تتأجل
-رضوى: أه ، بس ده معناه اننا هنخسر معظم المشتركين معانا
-مايا: ممم...
-رضوى: ده طبعاً غير ان مافيش أرباح هتطلعلنا منها ، والله أعلم بقى الباصات هنعرف نجيبها تاني ولا الشركة هتطلعها في رحلة تبعنا تاني
-مايا: بصي كل ده عادي نقدر ندبره ، وأنا دادي ممكن يظبطني في الحاجات دي
-رضوى: يعني ايه ؟
-مايا: يعني أجلي الرحلة
-رضوى: ايه ؟
-مايا: أجلي الرحلة اسبوع واعلني ده للكل ، اننا هنأجلها لظروف مرض والدة يوسف الكومي ، وكلمتين تضامن معاه هتلاقي الكل أقدر
-رضوى: بس آآآآ....
-مايا: من غير بس ولا حاجة ، يوسف أما هيعرف اننا عملنا ده عشانه هيفرح جدا ، وأي حاجة ناقصة انا هظبطكم فيها
-رضوى: على ضمانتك
-مايا: sure
-رضوى: يبقى بكرة هنزل اعتذار في الكلية وهبلغ كل الناس ، واللي عاوز يسحب فلوسه براحته ، واللي مش عاوز مافيش مشكلة احنا معاه
-مايا: وسيبي باب الحجز في الرحلة مفتوح ، وده أكيد هيعوض لو حد سحب
-رضوى: اوك

.............................
في منزل علاء ،،،،

-زينب: طيب يا حاجة سناء نستأذن احنا
-سناء: ما لسه بدري ، ده انو لسه اعدين معايا ومشرفيني
-زينب: يدوب نلحق نروح
-علاء: انا هتلكم مع الاستاذ صلاح ع ترتيبات قراية الفاتحة
-زينب: وماله يا بني
-سناء: انا هخلي علاء يحدد ميعاد مناسبه ويناسبكم بحيث نيجي نقرى الفاتحة ونتفق على كل حاجة
-زينب: بأمر الله
-آمال: لوووولووولي .. الف مبروك .. يا رب يسعدكم
-يمنى: وأكون أنا كمان حطيت الدبل في علبة شيك وكتبت عليها الاسامي والتواريخ
-علاء: لأ كفاية التواريخ بس
-يمنى: مش هاتكتب اسم عروستك
-علاء: لأ مافيش داعي ، أنا عاوز التواريخ بس
-يمنى: اللي يريحك
-زينب: يالا بينا يا ندى
-علاء: استني يا طنط أنا جاي معاكو أوصلكم
-زينب: مافيش داعي تتعب نفسك يا بني ، خليك مرتاح
-علاء: لأ أبدااااا .. مافيش تعب ولا حاجة
-آمال: نشوف وشك ع خير يا حاجة سناء
-سناء: تسلميلي يا آمال
-زينب: انا فرحانة اني اتعرفت عليكي
-سناء: وأنا أكتر
-ندى: مع السلامة يا طنط
-سناء: ألف سلامة يا عروسة

نزل الجميع من المنزل وركبوا سيارة علاء الذي قادها إلى حيث يقطنون ...

.............................

في منزل صلاح الدسوقي ،،،
ظلت نيرة جالسة أمام شاشة الحاسوب تنتظر أي رد من اللحن الحزين ولكن دون جدوى ..
-نيرة: مين ده ؟؟ وليه مردش عليا لحد الوقتي ؟؟ طب جاب صورتي منين ؟؟ هو ممكن يكون بيراقبني ؟؟ بجد أنا هتجنن !!

.......
سمعت نيرة صوت باب المنزل يُفتح وبالتالي خمنت أنها والدتها واختها ففأغلقت الحاسوب على الفور ، وجلست على الفراش وهي ممسكة بأحد الكتب وكأنها كانت تستذكر دروسها
-نيرة في نفسها: ده بين ندى وماما جوم ، لو شافني لسه أعدة ع النت هيعملوهالي قضية ، لأ أنا أحسن حاجة أطفيه وأقوم أذاكر ..

.............

-فاطيما: ماما جت ، نووودة جبتلي حاجة حلوة
-ندى: اه يا طمطم ، خدي
-فاطيمت: ميرسي
-صلاح: حمدلله ع السلامة ، ايه الأخبار ؟
-ندى: الحمدلله
-زينب بضيق: الولية وابنها بلفونا يا حاج
-صلاح: يعني ايه مش فاهم ؟
-فاطيما: ولية مين ؟
-زينب: ملكيش دعوة .. تعالى يا حاج أما أحكيلك جوا
-صلاح: طيب

-فاطيما: عملتي ايه يا نودة
-ندى: ولا حاجة يا طمطم ، قوليلي خلصتي واجبك ولا لسه ؟
-فاطيما: لأ لسه في كام حاجة طلبت من نيرة تساعدني فيها بس هي مرضتش
-ندى: طب تعالي هاغير هدومي وأساعدك
-فاطيما: ماشي ، وأنا كمان عاوزة أحكيلك على حاجة
-ندى : اوك

.....................

في غرفة صلاح وزينب ،،،،
قصت زينب ما حدث معها هي وندى لصلاح الذي استغرب كثيراً و..
-زينب: الولية بتزنوقنا وبتتحجج وبلفتنا في ثانية
-صلاح: مش يمكن تكون تعبانة فعلاً
-زينب: لأ يا خويا دي كانت أعدة زي ضربة الدم
-صلاح: ممم... طيب وانتي رأيك ايه ؟؟ نفضها سيرة
-زينب: هــاه
-صلاح: أما يتصل أعتذرله
-زينب: لأ .. أنا مقصدش ، أنا بس بحكيلك ع اللي حصل ، هما لو كانوا قالوا من الأول كنا هنبقى مجهزين نفسنا ، لكن دول خدونا على مشمنا ، والبت بنتك هبلة ومعرفتش تاخد وتدي معاهم
-صلاح: مش الحاجة عجبتها وخلاص ،وبعدين دي لسه دبلة ، يعني في الشبكة تبقى تنقي وتختار
-زينب: ده أنا هبقى واعيلهم
-صلاح: وهو قالك هيتصل امتى ؟
-زينب: أكيد على بكرة نكون فكرنا في ميعاد مناسب لقراية الفاتحة
-صلاح: وانتي يناسبك امتى ؟
-زينب: أنا رأيي نخليها كمان يومين ولا تلاتة نكون وضبنا البيت وندى جابتلها حاجة جديدة تلبسها
-صلاح: طيب

......................
في غرفة البنات ،،،
كان بال نيرة مشغول في أمر ذلك الشخص المسمى اللحن الحزين ، حاولت أن تغفو وتنام ولكنها فشلت للأسف ، بينما كانت ندى وفاطيما يتحدثان سويا و..
-نيرة في نفسها : لازم أعرف مين اللحن الحزين ده .. استر يا رب !

-فاطيما: ندى أنا كنت عاوزة اقولك ع حاجة
-ندى: ايه هي
-فاطيما بصوت هامس: هو ينفع حد كبير يمسكنا
-ندى: يمسكك ازاي
-فاطيما وهي تضع يدها على صدرها: يعني يحط ايده ع جسمنا كده
-ندى: لأ طبعاً ، ده غلط جداااا ، ولو حد عمل كده لازم نقول عليه على طول
-فاطيما: اها
-ندى وهي تنظر لفاطيما : انتي بتسألي ليه بقى يا طمطم
-فاطيما : أصل آآآ...

-نيرة بصوت مرتفع: اسكتوا بقى عاملين ترغوا وأنا مش عارفة أنام ، ايه مش بتزهقوا
-ندى: طب ما تنامي هو في حد حايشك
-نيرة: ما أنا مش عارفة انام من صوت البت دي المسرسع
-فاطيما: أنا صوتي مش مسرسع
-ندى: خلاص ، مش هنتخانق على اخر الليل ، يالا ننام عشان وراكو مدارس بكرة
-فاطيما: وأنا بكرة هابقى أحكيلك الباقي
-ندى: طيب
-نيرة: اطفوا النور بقى
-فاطيما: يوووه ، طيب

........................................

في منزل علاء ،،،،

-علاء: ها يا ماما ايه رأيك في ندى ؟
-سناء: كويسة ، شكلها هادي ومش بتاعة مشاكل
-علاء: ايوه
-سناء: بس أمها اللي مش عجباني
-علاء: وأنا مالي ومال أمها .. المهم عندي ندى
-سناء بمكر : بس شوفت ازاي عرفت أخليهم ياخدوا اللي أناعاوزاه
-علاء: طبعاً ، هو في حد زيك في تفكيرك العبقري ده
-سناء: ما احنا مش هنغلط تاني ونصرف ونكلف وفي الأخر تخسر كل حاجة
-علاء: ايوه ، الجوازة الأولى كلفتني كتير ، وأنا مش مستعد أخسر تاني
-سناء: بالظبط .. وأديك مخسرتش حاجة ، الدبلة القديمة اتلمعت والبت اختارتها
-علاء: ده أنا كنت خيف لأحسن تاخد حاجة تانية غيرها
-سناء: عيب عليك ، أومال أنا كلمت يمنى ليه وقولتلها تيجي ع البيت
-علاء: أها

◘◘◘ Flash Back لما حدث ،،،،

اتصلت السيدة سناء بصديقتها صاحبة محل المشغولات الذهبية يمنى لتطلب منها ...
-سناء هاتفيا: ازيك يا يمنى
-يمنى: حاجة سناء ، وحشاني ، فينك من زمان ؟؟ ده أنا قولت انتي نستيني والله
-سناء: معلش يا يمنى ، انتي عارفة صحتي ع ادها
-يمنى: ربنا يديكي الصحة وطولة العمر يا رب
-سناء: أنا كنت قصداكي في خدمة كده يا يمنى
-يمنى: خير يا حاجة أؤمريني
-سناء: بصي ماخبيش عليكي ابني علاء ناوي يخطب قريب ان شاء الله
-يمنى: بجد ، ألف ألف مليووووون مبروك
-سناء: الله يبارك فيكي ، المهم يعني أنا كنت عاوزاكي في خدمة
-يمنى: خدمة ايه يا ترى ؟
-سناء: بصي أنا كان عندي الشبكة القديمة بتاعة ابني
-يمنى: اها ، عاوزاني أغيرهالك
-سناء: لأ مش كده ، أنا كنت عاوزاكي تيجي عندي البيت لما تيجي العروسة وأمها
-يمنى: تمام
-سناء: وقبلها تاخدي الدبلة القديمة دي وتلميعها وبعد كده تحطيها وسط كام دبلة من المقاس الكبير كده وتقدميهم على انها حاجات العروسة تنقي منها
-يمنى: اها .. بس مش ممكن العروسة تضايق لو عرفت ده
-سناء: وهي هتعرف منين ؟؟؟
-يمنى: يعني .. مش هتشك أما ده يحصل
-سناء: لأ متقلقيش ، احنا لو عملنا ده محدش هياخد في باله ، المهم بس انتي موافقة على ده
-يمنى: أنا عادي ، مش فارقة معايا
-سناء: تسلميلي يا يمنى ، وأنا هشوفك يا حبيبتي
-يمنى: خيرك سابق يا حاجة سناء
-سناء: أنا برضوه هعدي عليكي في المحل عشان عاوزة أشتري غويشة جديدة بس أخلص من خطوبة علاء دي
-يمنى: تشرفي في أي وقت ، ده المحل بتاعك
-سناء: ربنا يخليكي ، المهم وقت ما هاعرف الميعاد هكلمك وأعرفك على طول
-يمنى: تمام ، وأنا مستنية منك تليفون
-سناء: ان شاءالله ◘◘◘
.......................................

عودة للوقت الحالي ،،،،
في منزل علاء ،،،،
-سناء: المهم تكون البت عجباك ، ومش زي الأولانية
-علاء: لأ من الناحية دي اطمني يا ماما ، هي مختلفة وفي حالها وعجينة طرية أقدر أشكلها زي ما أنا عاوز
-سناء: تمام يا بني .. شوف انت ناوي تكلمهم امتى عشان تحدد معاد قراية الفاتحة
-علاء: بكرة ان شاء الله ، وهحاول اخليها خلال يومين
-سناء: بأمر الله
-علاء: ولازم من البداية يكونوا عارفين احنا نظامنا ايه ويمشوا عليه .................................................. .... !!!!!

................................................

[منال سالم]

الحلقة الثانية والعشرون :

في صباح اليوم التالي ،،،،
في منزل صلاح الدسوقي،،،

اتصل السائق مجدي بصلاح ليبلغه بأنه لن يستطيع أن يوصل الفتيات لمدارسهن لاستمراه في السفر
-مجدي: غصب عني يا باشا ، لسه مرجعتش من البلد
-صلاح: ماشي يا مجدي ، لما تخلث اللي وراك وترجع بالسلامة عرفني
-مجدي: أه طبعاً

أنهى مجدي المكالمة وهو شبه مطمئن من عدم وجود أي مشاكل و...
-مجدي في نفسه: الظاهر ان البت الصغيرة مقالتش حاجة ، يومين كمان كده واعمل فيها مستعبط وأكلمه وأشوف النظام ايه

............

توجهت نيرة مع اختها الصغرى فاطيما إلى مدرستيهما بصحبة والديهما ..
-فاطيما: ده احلى يوم روحت فيه المدرسة النهاردة
-صلاح: ليه يا طمطم
-فاطيما: عشان انت اللي هتوصلني يا بابا
-صلاح: حبيبتي يا طمطم
-نيرة: اومال هاتيجي تاخدنا يا بابا ولا هنعمل ايه ؟
-صلاح: كلميني قبل ما تروحي وأنا هاشوف ان كنت فاضي هاعدي أجيبكم من المدرسة
-نيرة: طيب
-صلاح: وانتي يا طمطم ماتخرجيش من باب المدرسة إلا اذا انا جيت أو أختك ماشي
-فاطيما: حاضر ، بس والنبي يا بابا انت اللي تجي معانا وتروحنا
-صلاح: ربنا يسهل يا طمطم
-فاطيما: عشان خاطري ، انا عاوزة أروح معاك
-صلاح: ادعي ربنا أخلص بدري وأنا أجيلك
-فاطيما: يااااااااااا رب تخلص بدري يا بابا يا رب
-صلاح: أمييين يا طمطووومة
...........

قررت ندى أن تذهب إلى كليتها لتأخذ مافاتها من محاضرات ...
-ندى: ماما أنا هاروح الكلية النهاردة أشوف المحاضرات اللي فاتتني
-زينب: طيب يا حبيبتي متتأخريش
-ندى: حاضر ، هاخلص واجي على طول
-زينب: ماشي يا قلبي
.......

في مدرسة نيرة ،،،،،

كانت نيرة مازالت تفكر في اللحن الحزين ورسالته لها ، فقطعت تفكيرها قدوم نسمة ومي إليها و...
-نسمة: الجميل بيفكر في ايه
-مي: ممم... اكيد الجو الجديد
-نيرة بعدم فهم : جو مين ده
-نسمة: بس يا مي ، نيرة مالهاش في الكلام ده
-نيرة: انا مش فاهمة انتو بتكلموا عن ايه بالظبط
-مي: ازاي مش فاهمة وفي عربيات وحركات كده كانت بتتعمل امبارح
-نيرة : أفندم ؟؟ انتي بتقولي ايه

-هالة من بعيد: الحقوا يا بنات
-نسمة: في ايه؟؟
-هالة: البت دينا اللي في فصل 5/2
-نسمة: مالها
-هالة: اتمسكت هي وواحد قدام المدرسة
-نيرة: يا ساتر يا رب
-مي: ايه
-نسمة: ومين اللي مسكها ؟؟؟
-هالة: الاستاذ محفوظ بتاع العربي ، شافها وهي أعدة جمبه وع اللي عمله فيها وفيه ومصمم يكلم أهلها ويعرفهم ، والواد يسلمه للقسم
-مي: اوووبا
-نسمة: دي البت اتفضحت
-مي: لأ والواد هيطحن
-نيرة: عديها على خير يا رب
-هالة: تعالوا نتفرج ع اللي هيحصل
-نيرة: مالناش دعوة
-هالة: مالناش دعوة ايه ، ده انتي متعرفيش أم البت دينا هتعمل ايه في الاستاذ محفوظ ولا في ادارة المدرسة
-نسمة: ده لو دينا منحرفة قراط ، فأمها 24 قراط
-مي: هي هتجيبوه من بره
-هالة: يالا بقى خلونا نلحق نبص
-نيرة وهي تتجه لفصلها : لأ أنا هطلع ع الحصة
-نسمة بصوت هامس : وماله اطلعي ، الدور هيجي عليكي قريب ومش احنا بس اللي هنتفرج عليكي ، لأ ده الشباب كله !!!!

-نيرة في نفسها: ربنا يستر وما عملش غلط ولا أقع في مصيبة زي البت دي كده ....!!!!

...............................

في كلية تجارة انجليش ،،،،

وصلت ندى إلى الكلية وهي تشعر أن مضى عليها سنوات وهي غائبة عنها وليس فقط عدة أيام ..
-ندى: كأن الواحد بقاله سنين مجاش هنا ، يالا الحمدلله ، اخر يوم أصلاً كان سيء ، وأنا مش حابة أفتكر اللي حصل تاني

توجهت ندى إلى المكان المخصص لمحاضرات الفرقة الثانية فلم تجد أحداً هناك ثم سألت عنهم وعلمت أن الجميع في ندوة تثقيفية بمسرح الكلية ، ففضلت أن تقضي وقتها في مكتبة الكلية إلى أن ينتهوا من الندوة وتنضم معهم للمحاضرات

-ندى: لو سمحت اومال فين طلاب الفرقة التانية
-عامل النظافة: الكل موجود في ندوة في المرسح يا أبلة
-ندى: تقصد مسرح الكلية
-عامل النظافة: ايوه
-ندى: طيب شكراً

-ندى في نفسها: أحسن حاجة أطلع أقعد في المكتبة أقرى شوية لحد ما يخلصوا ، أنا من هنا ورايح مش عاوزة يكون ليا علاقة بحد ، كله يبقى على اد ازيك الله يسلمك وخلاص ..كفاية اللي حصل قبل كده

توجهت ندى إلى مكتبة الكلية وظلت جالسة بها تتطالع الكتب الموجودة بها وتنتقي ما يناسبها لكي تقرأه ..
-ندى: ماشاء الله ده في كتب حلوة أوي هنا ، ممم... أنا هقرى شوية في الرواية دي لحد ما يخلصوا الندوة وبعد كده أحصلهم ع القاعة

............................

في المقر الجديد لفرع شركة النقيب ،،،

كان صلاح الدسوقي يتابع مع العمال أعمال البناء والانشاء الخاصة بالمقر و...
-صلاح: تمام يا بشمهندس ، في حاجة تانية
-المهندس: لأ .. يهمني بس اللي في التصميم ده يتعمل ، واهم حاجة جودة الخامات
-صلاح: أطمن يا بشمهندس ، أنا كل حاجة بتابعها بنفسي
-المهندس: ربنا يعينك يا عم صلاح
-صلاح: الله يكرمك يا بشمهندس
-المهندس: بالحق عملت ايه مع رجب ؟
-صلاح: رجله اتكسرت وهيفضل في الجبس بتاع شهر
-المهندس: لا حول ولا قوة إلا بالله ، لازم تخلي بالك يا عم صلاح من اجراءات السلامة الخاصة بالعمال ، وإلا هتقع في مشكلة كبيرة
-صلاح: والله غلبت معاهم ، بس تقول ايه معظمهم أخد العملية فهلوة وبالدراع
-المهندس: لأ لازم تفتح عينك أكتر عليهم
-صلاح: حاضر يا بشمهندس
-المهندس: ولو في حاجة كلمني
-صلاح: ماشي

ظل صلاح يتابع العمال إلى أن رن هاتفه المحمول برقم علاء ، فأجاب على اتصاله و...
-صلاح هاتفياً: الووو
-علاء: ازي حضرتك يا أستاذ صلاح
-صلاح: ازيك يا بني
-علاء : ها يا عمي ايه الأخبار ؟
-صلاح: خير ان شاء الله ، البنت وأمها موافقين
-علاء: يعني نقدر نحدد ميعاد لقراية الفاتحة
-صلاح: طبعاً
-علاء: ايه رأي حضرتك في بكرة
-صلاح: لأ كده على طول ، ادينا يومين يا بني نستعد فيهم
-علاء: طيب على السبت مثلاً ؟؟؟
-صلاح: خليها على يوم الأحد ان شاء الله
-علاء: تمام ... واذا سمحتلي يا عمي ممكن أنزل مع ندى ومامتها طبعاً نشوف ايه اللي هتلبسه وكده وترتيبات قراية الفاتحة
-صلاح: هه
-علاء: انا حابب من البداية نكون متشاركين في كل حاجة
-صلاح: ربنا يسهل ، هاشور المدام الأول وبعد كده نتكلم
-علاء: منتظر تليفون حضرتك
-صلاح : بأمر الله

أنهى صلاح المكالمة مع علاء وهو في حيرة من أمره ، فعادة العروس وأهلها هم من يتولون الأمور الخاصة بقراءة الفاتحة ولكن ...
-صلاح: غريب اوي الجدع ده ، ايه اللي عاوز يشارك فيه بالظبط في موضوع قراية الفاتحة ، ده حاجة عادية مش مستهلة كل ده ، الواحد لسه ياما هيشوف

..............................

في كلية تجارة انجليش ،،،،

كانت مايا تجلس في الكافيه الخاص بالكلية ومعها مروان و...
-مايا: هو جوو مش جاي النهاردة ؟؟ اصله قافل موبايله ومش بيرد عليا
-مروان: لأ .. هو هيفضل مع أبوه وأمه اليومين دول لحد ما يطمن على أمه
-مايا: اوووف
-رضوى من بعيد: أنا خلاص علقت الاعلان وبلغت كل الناس بإن الرحلة إتأجلت
-مايا: اها
-مروان مستفهماً : هو انتو اجلتوا الرحلة ؟
-رضوى: أيوه
-مروان: ليه ؟
-مايا: أنا اللي قولت لمايا تعمل كده عشان خاطر جوو
-رضوى: في ناس سحبت فلوسها ، وفي ناس لسه مكملة معانا
-مايا: مش مهم ، اعلني انتي بس بعد كده أما نطمن على إن جوو طالع معانا على فتح باب الحجز تاني في الرحلة
-رضوى: أوك ولو إني أشك ان في حد هيطلع تاني معانا
-مروان: يا رضوى انتي مش عارفة شعبية جوو ولا ايه ، اصبري بس ع أول الاسبوع الجاي وهتلاقي طوابير ع الرحلة
-رضوى: اوك

-احمد وقد انضم إليهم: ازيكم عاملين ايه
-رضوى: انت فين من بدري
-أحمد: كنت في الندوة اللي كانت شغالة من شوية
-مايا: انا مش عارفة انت بتستحمل الجو الخنيق ده ازاي
-رضوى: يا مايا هو غاوي ندوات ولا انتي يعني مش عارفاه
-مايا: ده أنا بزهق بسرعة
-أحمد: انتي أصلاً التعليم مش في دماغك
-مايا: هاخد ايه منه ، هي مجرد شهادة هتتعلق مع غيرها
-رضوى: سيبكم بقى من الكلام ده وخلونا نشوف هنعمل ايه مع الناس اللي عاوزة تسحب فلوسها من الرحلة
-مروان: رجعيها عادي ، هنعملهم ايه يعني
-رضوى: اوك
-أحمد: هاتي بس أسامي الناس اللي عاوزة تسحب فلوسها وأنا هعمل كشف بيهم
-رضوى: ماشي
-مروان: طيب عقبال ما تخلصوا أنا ورايا مشوار كده وبعدين هارجعلكم
-مايا: مشوار ايه ده
-مروان: متخديش في بالك ، دي حاجة عادية

..........................

في مدرسة نيرة ،،،،،

قصت نيرة على صديقتها نهلة ما حدث لكي تأخذ بمشوارتها و...
-نهلة: ودي فيها ايه يخوف
-نيرة: بقولك معاه صورة ليا أنا معرفش جابها منين ولا ازاي
-نهلة: هي الصورة دي فيها حاجة
-نيرة: تقصدي ايه ؟
-نهلة: يعني كنتي في وضع كده ولا كده ، ولا متصورة مع واحد
-نيرة: هااااه ، انتي بتقولي ايه؟؟ لألألألأ طبعااااا
-نهلة: يبقى خايفة من ايه
-نيرة : خايفة انه يعمل بالصور دي حاجة مش مظبوطة
-نهلة: متخافيش يا بنتي ، تلاقيه حد بيعمل فيكي مقلب ولاحاجة
-نيرة: مش مطمنة
-نهلة: المهم انا عاوزة أطلب منك طلب
-نيرة: ايه هو ؟
-نهلة: بصي أنا هاخرج أتمشي شوية وكنت قايلة لماما اني معاكي في الدرس
-نيرة: نعم ؟؟
-نهلة: فلو ماما كلمتك وسألتك عني قوليلها اني معاكي ، ماشي
-نيرة: لالالا .. أنا ماليش دعوة
-نهلة: يا بنتي جمدي قلبك ، مافيهاش حاجة ، ما أنا ياما بعمل كده أنا والبنات ، ومحدش بيدور ورانا
-نيرة: بس أنا محبش أعمل كده
-نهلة: هي مش هتكلمك ، بس يعني لو صادفت وكلمتك تقوليلها إني معاكي
-نيرة: اوووف
-نهلة: عشان خاطري ، مش انا صاحبتك ؟
-نيرة: صاحبتي أه ، بس مش في الكوارث دي
-نهلة: اطمني مش هاتحصل حاجة

.................................

في موقع مقر فرع شركة النقيب الجديد ،،،،

استقل مروان سيارته وتوجه إلى مقر الشركة الجديد لمقابلة الأستاذ صلاح ، بحث عنه بعينيه إلى أنه وجده مشغولاً بالحديث مع أحد العمال ، فركن سيارته وترجل منها ثم ذهب إليه و...
-مروان بصوت مرتفع: استاذ صلاح يا استـــــــاذ صلاح
-صلاح وقد التفت إليه : أهلا .. ازيك يا بني
-مروان: ازيك يا استاذ صلاح ، ايه الأخبار ؟
-صلاح: زي ما انت شايف ، احنا شغالين بايدنا وسنانا وإن شاء الله هننجز
-مروان: الله يعينك يا رب .. احم .. يا استاذ صلاح أنا .. احم كنت عاوز يعني آآآ..
-صلاح: في ايه بني
-مروان: انا كت بس عاوز اسألك عن .. آآآ.. عن السواق بتاع بنات حضرتك
-صلاح: مجدي !
-مروان: اه هو الزفـ... قصدي اه هو
-صلاح: ده مسافر من امبارح والله ، كنت عاوزه في حاجة مهمة ؟؟
-مروان: لأ .. بس كنت عاوز اعرف هو حضرتك بتثق فيه وآآآ...
-صلاح مقاطعاً: ده علي صاحبي جايبه وكان بيشكر فيه أوي، والصراحة هو ملتزم معايا واخلاق ومالوش في شغل اللبش ، بس ظروف السفر اليومين دول هي اللي لخبطته
-مروان هامساً: اياكش يسافر مايرجع تاني
-صلاح: بتقول حاجة يا بني ؟
-مروان: انا بس كنت بسأل ان كانت طمطم بنتك اشتكت منه
-صلاح: لأ بالعكس دي بتحب انه يوصلها ، بس على غير العادة كانت مبسوطة اني بوصلها النهاردة المدرسة
-مروان : لا والله
-صلاح: اه يا بني ، وبعدين أنا مش هاجيب أي حد يوصل بناتي المدرسة ، وعلي لما جابه قالي انه مجربه من قبل واشتغل معاه لفترة ، وهو أهل للثقة ومحترم أوي كمان معايا
-مروان: ساعات المظاهر بتخدع يا استاذ صلاح
-صلاح: تقصد ايه
-مروان: أقصد ان آآآآ...
-احد العمال: احنا جهزنا المونة يا عم صلاح
-صلاح: طب استنى أما أشوف المهندس يكشف عليها قبل ما تعملوا الصبة ، مش عاوزين غش
-أحد العمال: ماشي
-صلاح: معلش يا بني انت شايف أنا أد ايه مشغول
-مروان: ولا يهمك .. أنا مستنيك

بحث صلاح عن المهندس ولكنه كان غير موجود بالموقع ، فاتصل به هاتفياً وطلب منه أن يأتي ولكنه اعتذر عن الحضور وطلب من صلاح اتمام العمل ..
-المهندس هاتفياً: والله يا عم صلاح مش هاعرف اجي ، أنا عندي اجتماع ويدب وصلت الشركة
-صلاح: ده العمال جهزوا كل حاجة
-المهندس : البركة فيك يا عم صلاح ، انت تمم عليهم بنفسك ، وسيبلي بس عينة وأنا لما هخلص هارجع أشوفها
-صلاح: طيب يا بشمهندس
-المهندس: أنا معتمد على الله ثم عليك .. وربنا يقويك
-صلاح: تسلم يا بشمهندس

صلاح للعمال: ابدأوا الشغل ، أنا جايلكم
-عامل ما: حاضر يا ريس
-عامل أخر: ماشي يا عم صلاح

-صلاح وقد تذكر شيئاً ما: ياااااه ، ده انا نسيت المفروض هاروح أجيب طمطم ونيرة من المدرسة
-مروان في نفسه : نيرة ..!!

-صلاح: استغفر الله العظيم يا رب ، راح من بالي خالص موضوع المدرسة ده
-مروان مقترحاً : أنا ممكن أوصلهم
-صلاح: لأ يا بني مش عاوز أعطلك ولا أضيع وقتك
-مروان: تعطلني ايه بس ، دي طمطم زي اختي الصغيرة ، وبعدين مدرستها في سكتي يعني مش هاروح بعيد
-صلاح: ربنا يكرمك يا بني ، انا مش هنسالك الجميلة دي
-مروان: متقولش كده يا عم صلاح ، هو أنا عملت حاجة
-صلاح: الله يكرمك يا رب ويرزقك ببنت الحلال اللي تستاهلك
-مروان: الله يخليك

ركب مروان سيارته وقرر أن يتوجه إلى مدرسة فاطيماً أولاً ثم إلى مدرسة نيرة و...
-مروان بفرحة: مصايب قوم عند قوم فوايد ............ !!

........................

في شركة الكومي للتطوير والاستثمار الxxxxي ،،،

كان يوسف يجلس مع والده في المكتب يتحدثان حول الوضع الصحي لوالدته و...
-سليم: لو لا قدر الله امك طلع فيها حاجة كده ولا كده أنا مش هاسكت هسفرها أحسن مكان تتعالج فيه
-يوسف: ربنا يستر ، بجد أنا خايف وقلقان
-سليم: ربنا يعديها ع خير
-يوسف: هو المفروض نتايج التحاليل هتبان امتى ؟؟
-سليم: بكرة ان شاء الله ، والدكتور قالي أول ما هتظهر هيكلمني على طول مش هايستنى
-يوسف: ربنا يستر لحد بكرة
-سليم: المهم انت حاول تبان طبيعي قدام أمك ، مش عاوزينها تقلق من حاجة
-يوسف: حاضر
-سليم: صحيح انت ماروحتش كليتك النهاردة
-يوسف: لأ مش هاروح في حتة غير لما أطمن على ماما الأول
-سليم: مصلحتك يا بني
-يوسف: مافيش اي حاجة مهمة عندي إلا ماما وبس
-سليم: ربنا يطمنا عليها
-يوسف: ياااا رب

............................
في كلية تجارة انجليش ،،،،

انتهت ندى من قراءة الرواية التي كانت بحوزتها ولم تدرك أن الوقت قد فاتها دون أن تحضر باقي المحاضرات الخاصة بفرقتها و...
-أمينة المكتبة : يا آنسة لو سمحتي
-ندى: ايوه
-أمينة المكتبة : ميعاد الانصراف من المكتبة
-ندى وقد أدركت أنها تأخرت: اووبس ، معلش الوقت سرقني
-أمينة المكتبة: ولا يهمك ، تقدري تستعيري الكتاب لو عاوزة تخلصيه
-ندى: اها
-أمينة المكتبة: اعملي كارنيه اشتراك في المكتبة وهتقدري تاخدي الكتب اللي انتي عاوزاها وتقريها
-ندى: تمام ، ممكن حضرتك تكتبلي المطلوب في ورقة عشان أعمل كارنيه الاستعارة
-أمينة المكتبة : اوك .. لحظة واحدة

كتبت أمينة المكتبة ماهو مطلوب لندى لكي تستخرج كارنيه الاستعارة ، ثم انصرفت بعدها لمنزلها خاصة بعد أن اتصلت بها والدتها و...
-ندى هاتفياً: خلاص يا ماما أنا جاية
-زينب: تيجي بالسلامة يا عروسة ، وماتنسيش تجيبي وانتي جاية الماسك بتاع البشرة من الصيدلية
-ندى: حاضر
..................................

عند مدرسة فاطيما ،،،،،

وصل مروان بسيارته عند مدرسة فاطيما ، ووقف ينتظرها حتى تخرج ، وما إن رأته فاطيما حتى أسرعت إليه و...
-فاطيما بفرحة : مـــــروان !
-مروان: طمطم
-فاطيما: انت بتعمل ايه هنا ؟
-مروان: انا استأذنت والدك هوصلك النهاردة للبيت
-فاطيما: بجد ؟
-مروان: اه ، يالا تعالي
-فاطيما: ماشي
-مروان: احنا المفروض نجيب اختك معانا صح ؟
-فاطيما: نيرة !
-مروان: اه هي
-فاطيما: ايوه بابا كان قايل هنروح سوا، انت هتلاقيها في السكول ( (school بتاعتها
-مروان: اوك ، انتي عارفة مكانها السكول دي
-فاطيما: أه ، هي اسمها ((....)) وموجودة هناك
-مروان: تمام .. انا عرفتها .. يالا
-فاطيما: اوك

ركبت فاطيما في المقعد الأمامي بجوار مروان الذي أدار سيارته واتجه بها نحو مدرسة نيرة ..

....................
عند مدرسة نيرة ،،،،
-نهلة: والنبي يا نيروو ماتنسيش اللي قولتلك عليه
-نيرة: ربنا يسهل
-نهلة: هي مش هاتكلمك بس برضوه ، تكوني مستعدية ، وبصي سجلي رقمها عندك عشان متتفاجئيش
-نيرة: ماشي ، بس أنا مش عاوزة مشاكل
-نهلة: متخافيش مافيش حاجة هتحصل
-نيرة: ربنا يعديها ع خير
-نهلة وهي تقبلها : باي يا نيرووو يا أجدع صاحبة في الدنيا

خرجت نيرة من بوابة مدرستها لتتفاجيء باختها فاطيما تقف وهي ممسكة بيد مروان ويلوح الاثنان لها و...
-فاطيما وهي تلوح بيدها : نيـــــرة .. !
-نيرة بدهشة: هـــاه
-مروان مبتسماً وملوحاً بيده : هاي
-نيرة: انت.. !! ايه اللي جابك هنا ؟؟
-فاطيما: أنا اللي جبته
-مروان: أه هي
-نيرة: انتي جيتي معاه ازاي ؟؟ مش بابا منبه عليكي ماتخرجيش بره المدرسة إلا لما هو يجي أو أنا ؟؟
-مروان: بالراحة يا نيرة
-نيرة: نعم ؟؟ نية كده حاف
-مروان: يعني أحط الاسم في سندوتش ولا عليه شوية غموس عشان يعجب
-نيرة: لأ انت جاي تهزر ، وانا مش فايقة ارد عليك ، يالا يا طمطم
-فاطيما: أنا هاروح مع مروان
-نيرة : هو عند وخلاص
-فاطيما: بابا قاله يوصلنا
-نيرة: نعم ؟؟
-مروان: اه هو قالي كده
-نيرة: يعني مش هنخلص منك بالساهل
-مروان: للأسف لأ .. لأني رزل في الحاجات دي
-نيرة بضيق : انت فعلا كده !
-فاطيما: يالا بقى

اضطرت نيرة أن تركب السيارة مع مروان واختها فاطيما ، ثم انطلق هو بهم إلى منزلهم ..
-مروان: ايه اخبار المدرسة يا طمطم
-فاطيما: شغالة
-مروان وهو ينظر في المرآة الأمامية : ممم ... هي فعلاً شغالة مش وحشة
-نيرة: استغفر الله العظيم يا رب
-فاطيما: ع كده يا مروان انت بتروح المدرسة زينا ؟
-مروان: لأ أنا في كلية
-فاطيما: زي ندى اختي
-مروان: اها ..
-نيرة: بطلي رغي بقى صدعتيني
-فاطيما: أنا بتكلم مع مروان مش معاكي
-نيرة: ربنا يهون
-مروان هامساً لفاطيما: هي اختك دي على طول روحها في مناخيرها
-فاطيما بصوت منخفض: اه.. محدش بيستحملها
-مروان: عندهم حق
-فاطيما: انت عندك كام سنة
-مروان: أنا 25
-فاطيما: ياااه وكل ده ولسه في كلية
-مروان: نصيبي بقى
-نيرة بصوت منخفض: طبعاً عشان ساقط وخايب ومش فاضي غير لمضايقة الناس
-مروان: ع فكرة أنا سامعك
-نيرة وهي تتمتم : احم... اياكش تكون بتحس

ثم رن هاتف نيرة برقم والدة نهلة صديقتها ، فاضطربت و...
-نيرة باضطراب: دي .. دي مامت نهلة

-مروان : ايه مش ناوية تردي
-نيرة: ملكش دعوة
-فاطيما: رقم غريب ده يا نيرة ؟
-نيرة: لأ
-فاطيما: طب ما تردي
-نيرة: أنا حرة مش عاوزة أرد
-فاطيما: يبقى أكيد بتكلمي حد ومش عاوزاني أعرف عشان مش اقول لماما عنك
-نيرة: بس آبت
-فاطيما: طب والله لأقول لماما
-مروان: خلاص يا طمطم ، سبيها ..

رن الهاتف مرة اخرى ، فلم يكن أمام نيرة إلا الرد وإلا سوف تثير الشكوك بعدم ردها على الهاتف
-نيرة هاتفياً: ألوووه ، ايوه يا طنط
-المتصل : ................................
-نيرة: لأ احنا خلصنا المدرسة وعندنا مجموعة الوقتي يا طنط ، هي نهلة مقالتش لحضرتك ؟
-المتصل: ................................
-نيرة: حاضر ..أول ما هنخلص هنكلمك على طول ..
-المتصل: ................................
-نيرة: مافيش ازعاج ولا حاجة يا طنط
-المتصل: ...................................
-نيرة: ميرسي يا طنط
-المتصل : ...........................
-نيرة: يا رب أمين ، مع السلامة

-فاطيما: درس ايه ده اللي عندك يا نيرة
-نيرة: وانتي مالك
-فاطيما: مش انتي بتقولي عندك مجموعة الوقتي
-نيرة: أنا أقول اللي أنا عاوزاه ، خليكي انتي بس في حالك ،واقعدي ساكتة
-مروان متدخلاً في الحوار: سبيها يا طمطم تكدب متدخليش ، ماهو الكداب بيروح فين ؟
-فاطيما: النـــــار يا مروان
-مروان: بالظبط كده
-نيرة: وانت مالك أكدب ولا أقول الحقيقة ، ده هيضرك في حاجة
-مروان: لأ مش هيضرني أنا ، بس هيجيب الأذية لغيري
-نيرة: والله كل واحد حر يعمل اللي هو عاوزه
-مروان: أه بس طالما مش هيأذي غيره ، وانتي باللي عملتيه ده أذيتي صاحبتك
-نيرة: والله هي حرة ، وأنا عملت اللي هي عاوزاه ، فأمها تحاسبها ولا لأ ماليش فيه
-مروان: انتي ساعدتيها على الغلط ، فانتي شريكة زيك زيها ولازم تتحاسبي معاها
-نيرة: انت.. انت بتكلمني كده ليه
-مروان: أنا بفهمك الصح
-نيرة: ملكش دعوة ، أنت مش من بقية عيلتنا عشان تنصحني
-مروان : والله النصيحة لوجه الله
-نيرة: خليهالك مش عاوزاها وخصوصاً لو كانت من واحد زيك
-مروان وهو ينظر لنيرة : أنا آآآآآآ...........
-فاطيما برعب: حاسب يا مــــــــــــروان !

وفجـــــأة ارتطمت سيارة ما مسرعة وقادمة في الاتجاه الخاطيء بسيارة مروان و.........................!!!

..................................................

[منال سالم]

الحلقة الثالثة والعشرون :

كان مروان ونيرة يتجادلان حينما صرخت فاطيما و...
-فاطيما برعب: حاسب يا مــــــــــــروان !
-مروان وقد أدار رأسه : هـــاه

وفجـــــأة ارتطمت سيارة ما مسرعة وقادمة في الاتجاه الخاطيء بسيارة مروان ارتطاماً قوياً من الخلف مما جعل السيارة ترتد بقوة وتصطدم بعمود الإنارة و...
طاااااااااااااااخ
-فاطيما: عااااااااا
-نيرة: لألألألأ

ثواني مرت وكأنها لحظات طويلة على الجميع ..
ومن فضل الله تعالى أن سيارة مروان كانت من نوع الدفع الرباعي مما جعلها تتحمل الارتطام القوي ..

تجمع المارة وبعض راكبي السيارات ليتابعوا الحادث ، أفاق مروان مما حدث، ثم نظر إلى فاطيما بجواره والتي كانت تقطر دماً من جبهتها و ...
-مروان بلهفة: طمطم .. انتي كويسة ، طمطم !
-فاطيما بتآلم: آآآآه ، دماغي
-مروان: ششش .. بس متتحركيش ، انتي هتبقي كويسة
-فاطيما: اها

نظر مروان للخلف ليجد نيرة فاقدة للوعي في المقعد الخلفي وتنزف دماً هي الأخرى ، فترجل من السيارة وأسرع إليها ..
-شخص ما: حضرتك كويس
-مروان: ايوه أنا بخير
-شخص آخر: يا ساتر يا رب
-شخص ثالث: لا حول ولا قوة إلا بالله
-شخص رابع: حد يطلب الاسعاف بسرعة
-شخص ما: المرور جاي في الطريق
-شخص أخر: عيال مستهترة مش هاممها أرواح الناس

-مروان لنيرة وهو يحاول افاقتها : نيرة .. نــيرة ... !
-شخص ما: متحركهاش ، استنى الاسعاف لأحسن يكون فيها كسر ولا حاجة
-شخص أخر: ده يومهم بسنة
-مروان: من فضلكم يا جماعة توسعوا شوية
-فاطيما: مروان
-مروان: أنا هنا يا طمطم
-فاطيما: هي نيرة مش بترد ليه
-مروان: ان شاء الله هتبقى كويسة ، متخافيش

وصلت سيارة الاسعاف إلى منطقة الحادث ونقلت نيرة إلى أقرب مشفى خاص بناءاً على طلب مروان ، ثم صعد معها مروان وفاطيما ....

.................................

في أحد المطاعم ،،،

كانت نسمة تجلس مع تامر يتناولان الغذاء و...
-نسمة: تامر أنا عاوزة فلوس
-تامر: ربنا يسهل
-نسمة: ان شاء الله هيسهل بس هاتلي انت فلوس
-تامر: يوووه ، انتي مش بتزهقي يا نسمة ، كل يوم كده هات فلوس هات فلوس
-نسمة: الله ! يعني اطلب من مين غيرك ؟
-تامر: هو انا كنت خلفتك ونسيتك !
-نسمة: ايه النبرة الجديدة دي اللي بتكلمني بيها
-تامر : عشان أنا اتخانقت وزهقت من الزن بتاعك ده كل يوم ، فارحميني شوية
-نسمة: اوووف
-تامر: بقولك ايه انا قايم
-نسمة: بس أنا لسه مخلصتش أكل
-تامر: كلي براحتك ، أنا هدفع الحساب ، وخدي فلوس تاكسي عشان تروحي
-نسمة: يعني انت ماشي ؟
-تامر: اه .. طهقان ، باي يا نسمة
-نسمة: ماله ده ، ايه اللي غيره كده عليا ؟؟؟؟

جلست نسمة مع نفسها لتتذكر ما حدث لها و..

◘◘◘ Flash Back لما حدث مع نسمة قبل فترة ،،،،

كانت نسمة فتاة شقية وفضولية تحب أن تلف الانظار إليها ، ولأنها كانت الأقل جمالاً بين قريناتها فقد كان أكثر اهتماماتها هو البحث عن الحب والتميز بين الغير ، انفصلت أمها عن ابيها في سن مبكرة وتزوج كلا منهما من أحد أخر ، وظلت نسمة مقيمة مع والدتها ..
◘◘◘ ولأن نسمة لم تكن تحظى بالاهتمام الكافي نصحتها احدى الصديقات بأن تنشأ حساباً خاصاً على موقع التواصل الاجتماعي الفيس بوك وتستغله في الحصول على الاهتمام والحب بدون أن يعرفها أي أحد ..

◘◘◘ وبالفعل قامت نسمة بعمل هذا ، كانت في البداية تجد هذا الموقع ممل إلى أن أرسل في طلب صداقتها عصام ، فقبلت الطلب على الفور وبدأت المحادثات والرسائل اليومية بينهما ، كانت الرسائل في البداية عادية ليس بها أي شيء ، إلى أن تغير مجرى الحديث تماماً و....
-عصام: نسووومة قلبي
-نسمة: ايوه
-عصام: أنا هافضل كده أكلمك من غير ما أشوف صورتك ولا أسمع صوتك حتى
-نسمة: مش هاينفع يا تامر
-عصام: هو ايه بس اللي مش هاينفع ، أنا نفسي بجد أشوف شكلك ، انتي مش عارفة انتي شقلبتي حالي ازاي
-نسمة: يا سلام
-عصام: أه طبعاً ، ده انا يومي من غير ما أكلمك مالوش طعم
-نسمة: بلاش هبل
-عصام: أنا عاوز أقولك اني .. اني .....
-نسمة: انك ايه يا عصام
-عصام: إني بحبك !
-نسمة غير مصدقة: مش معقول
-عصام: اه يا نسمة أنا بحبك أوي .. انا مش عارف انتي جننتيني ازاي بحبك

◘◘◘ ظل عصام يلعب على وتر الحب والأشعار لعدة أيام حتى يضمن وقوع نسمة في شباكه ، وما إن اطمأنت له حتى طلب منها ...
-عصام: مش ناوية بقى توريني صورتك
-نسمة: تؤ
-عصام: طب وريهاني وأنا هبعتلك انسيال دهب
-نسمة: تؤ برضوه
-عصام: ليه بس كده ؟؟
-نسمة: اصل أنا شكلي مش حلو
-عصام: أنا مش فارق عندي الشكل ، المهم الروح
-نسمة: بلاش الكلام ده عشان أنا مش بصدقه
-عصام: طب خلاص أنا مش هافضل أتحايل عليكي كتير
-نسمة: انت زعلت ؟
-عصام: ...............................
-نسمة: عصام ! متزعلش مني يا حبيبي ، أنا بس مش عاوزة أبعت أي حاجة
-عصام: ..........................
-نسمة:عصام ، رد عليا أرجوك ، عصام من فضلك !

◘◘◘ تعمد عصام أن يتجاهل رسائل نسمة المتكررة إليه لعدة أيام ، مما أصابها بحالة من اليأس والاكتئاب ، ثم بعد فترة رد عليها حينما أرسلت له ....
-نسمة: وحشتني
-عصام: بجد
-نسمة بفرحة شديدة بعد أن قرأت رده : اه والله ، انا مش مصدقة انك رديت عليا
-عصام: كنت مضايق
-نسمة: انا أسفة يا حبيبي ان كنت ضايقتك
-عصام: اها
-نسمة: انت لسه زعلان مني
-عصام: عاوزة الصراحة
-نسمة: ياريت
-عصام: لسه شوية
-نسمة: طب انت عاوز ايه عشان أصالحك ؟
-عصام: عاوز أشوف صورتك
-نسمة: .................
-عصام: ها قولتي ايه؟؟

◘◘◘ ظلت نسمة مترددة في قرارها ولكنها عقدت العزم على أن ترسل له صورتها لخوفها من ان تخسره مرة أخرى خاصة بعد أن تعودت على وجوده في حياتها الافتراضية و..
-نسمة: اوك
-عصام بعدم تصديق: انتي بتقولي كده عشان تسكتيني
-نسمة: لأ طبعاً .. أنا عاوزة أرضيك وأوريك اني بحبك فعلاً
-عصام: طيب ، وريني
-نسمة: بس توعدني الأول انك مش تتريق عليا
-عصام: أوعدك
-نسمة: وكمان انك مش توري صورتي لحد
-عصام: يا نسوم انتي عاملة زي الهوا اللي بتنفسه ، وأنا وعدتك اني هحافظ عليكي
-نسمة: ثواني هبعتهالك

◘◘◘ حاولت نسمة أن تنتقي صورة مميزة لها ، ثم أرسلتها لعصام وانتظرت رأيه فيها و..
-عصام بعد أن رأى صورتها : ايه ده ؟
-نسمة: ايه معجبتكش
-عصام: أصل أنا كنت متوقع حاجة تانية خالص
-نسمة: حاجة زي ايه ؟
-عصام: استني هابعتلك اللينكات
-نسمة : اوك

◘◘◘ أرسل عصام لنسمة عدة روابط لصور مختلفة وما إن فتحتها نسمة حتى صدمت مما رأت ، فقد كانت الصور لفتيات شبه عاريات أو عاريات بالفعل و..
-نسمة بصدمة : ايه دول ؟؟
-عصام: صور
-نسمة: دول .. آآآ... دول صور.. آآآ
-عصام: صور بنات لامؤاخذة ، صح
-نسمة: ايوه ، انت بعتهوملي ليه ؟؟؟
-عصام: أصل أنا فكرت انك هتبعتيلي صورتك وانتي لابسة بكيني مثلاً ، وصدرك باين كده منه ، ولا حتى وانتي عريانة .. اي حاجة كده من اللي تفتح النفس
-نسمة بصدمة: هــاه
-عصام: لأحسن تكوني مفكرة ان اللي بعتيها دي صور ولا حاجة ، ده أنا عمال أحور ع اللي جابوكي بقالي أد كده وفي الأخر أشوف منك وش معفن
-نسمة: آآآ..

◘◘◘ ألجمت المفاجأة لسان نسمة ، لم تستطع أن تستوعب ما حدث ، ولم تجب على رسائل عصام التي كانت بمثابة السوط اللاذع على ظهرها ...
-عصام مكملاً: هو أي حد يبعت يقولك انتي حبيبة قلبي ولا أنا بعشقك تصدقيه على طول ، انتي عبيطة ولا حاجة ، يا بت بطلي هبل ، أل مفكرة اني بحبك ، انا بس زهقت منك وقولت أشوف أخرتها معاكي ايه ، وفي الأخر طلعتي شبه وش البومة ، أنا أحسن حاجة أعملها إن اديكي بلوك محترم وأرحم أمي من وشك .....!!

◘◘◘ شعرت نسمة وهي تقرأ كل كلمة بأنها سكيناً يُغرز في قلبها وصدرها ، ظلت تبكي لما حدث وقررت ألا تصدق ما تقرأ أو تشاهد على الفيس بوك إلى أن تعرفت على رامي الذي انتهج نفس اسلوب عصام السابق في الحب والرومانسية مما أثر على نسمة مرة اخرى ولكنها كانت اكثر حذراً من السابق ...
-رامي: نوسة ، انتي موجودة
-نسمة: أيوه
-رامي: وحشتيني
-نسمة: وانت كمان
-رامي: بقالك كام يوم مش باينة ليه
-نسمة: عادي يعني
-رامي: لأ مش عادي ، ده انتي غيابك فرق معايا أوي
-نسمة: لا والله
-رامي: أه يا نووسة

◘◘◘ ظل رامي يلعب في رأس نسمة بالكلام المعسول إلى أن اطمأنت له هو الأخر ، وتناست ما حدث تماماً من قبل مع عصام .. ثم ....
-رامي: نوسة ، ممكن أشوف صورتك
-نسمة: ليه
-رامي: نفسي أشوفك أوي ، أنا كل يوم باقعد أتخيل فيكي
-نسمة: أنا عادية مافياش حاجة
-رامي: طب اوصفيلي نفسك حتى
-نسمة: ممم...
-رامي: أي حاجة بس عشان الصورة اللي رسمهالك تكمل في دماغي
-نسمة : طيب

بدأت نسمة في وصف شكل جسدها وهيئتها بطريقة مثيرة مما أثار رامي وجعله يصر على أن يرى صورة نسمة و...
-رامي: انتي جننتيني بكلامك ده ، ،انا مش على بعضي من وصفك ده
-نسمة: يا سلام
-رامي: أنا متخيل ان اللي زيك لازم يتعمله تمثال
-نسمة: مش أوي كده
-رامي: والله مش بهزر ..
-نسمة: اوك
-رامي: نفسي أشوفك صورتك أوي
-نسمة: رجعنا للكلام ده تاني
-رامي: والله انا عاوز بس اشوف صورتك عشان مش قادر خلاص أعيش من غيرك
-نسمة: انت بتكلم جد
-رامي: لو عاوزاني اقسم ع المصحف اني فعلاً متعلق بيكي أنا مستعد
-نسمة: خلاص مصدقاك
-رامي: طب هتحني عليا امتى وتخليني أتملى في جمالك
-نسمة: ربنا يسهل
-رامي: اي صورة طبيعية ليكي ، أنا مش عاوز اكتر من كده

◘◘◘ اخذت نسمة تفكر فيما يقوله رامي ، وكأن الشيطان يمهد الطريق لها لكي تستمر فيما تفعل وفي النهاية قررت أن ترسل صورة لرامي
-رامي بعد أن رأى الصورة: ماشاء الله حلوة اوي
-نسمة بعدم تصديق: بجد
-رامي: اه والله ، زي القمر
-نسمة: ميرسي
-رامي: ينفع بقى لو صورة تانية ليكي وانتي أعدة في البيت
-نسمة: افندم
-رامي: نفسي أشوفك على الطبيعة ، وانتي اعدة كده بلبس البيت بتاعك
-نسمة: ممم..
-رامي: ها قولتي ايه
-نسمة: مش عارفة
-رامي: انا ناوي بأمر الله أجي أخطبك
-نسمة: انت بتكلم جد ؟؟ هتخطبني ؟؟
-رامي: اه طبعاً ، بس لازم أبقى عارف شكل اللي هخطبها ولا أنا غلطان
-نسمة: أها
-رامي: ده أنا موريكي كل الصور بتاعتي عشان تبقى عارفة شكلي ، صح ؟
-نسمة: صح
-رامي: يبقى أنا برضوه من حقي أشوف شكلك وأعرفك أكتر ع طبيعتك
-نسمة: اوك
-رامي: يعني هتبعتيلي صورتك وانتي في البيت
-نسمة: ايوه
-رامي: طب امتى ؟
-نسمة: بكرة
-رامي: لأ الوقتي ، أنا مش هاقدر أصبر لبكرة
-نسمة بعد تفكير : ماشي ، هاصور نفسي وأبعتهالك
-رامي: وأنا مستنيكي يا حبيبتي

◘◘◘ قامت نسمة بالتقاط صورة لنفسها وهي ترتدي بيجامتها ثم أرسلتها إلى رامي الذي تمادى في طلباته منها و...
-رامي: تحفة اوووي
-نسمة: حلوة ؟
-رامي: دي مش حلوة بس ، دي تطير العقل
-نسمة: ميرسي
-رامي: ممكن أقولك على حاجة كمان ؟
-نسمة: حاجة ايه ؟
-رامي: حاجة كده انا لمحتها في الصورة وعجبتني أوي أوي أوي
-نسمة: ايه هي ؟
-رامي: بصراحة كده شكل صدرك حلو اوي
-نسمة بخضة: ايه ده هو باين ؟
-رامي: يالهوي ، انا مش متخيل انه كده ، ده انتي متفجرة الانوثة ، حاجة مالهاش حل
-نسمة: ميرسي
-رامي: انتي كده خلتيني اطمع بزيادة فيكي واطلب اشوف صورة ليكي بحاجة خفيفة شوية
-نسمة: لالالالا ..
-رامي: ليه بس ؟؟ ده انا خلاص وقعت على جدور رقبتي معاكي يا نسووومتي
-نسمة: لأ مش هاينفع
-رامي: والله هاينفع ، انتي بس البسي حاجة تبين صدرك وصوريها وانا هستناكي ان شاء الله للفجر
-نسمة: بس آآآ...
-رامي: من غير بس ، يالا يا نسوومتي ، وبعدين أنا هابقى جوزك يعني مش حد غريب ، ولا انتي ناوية تعصيني من أولها
-نسمة: لأ طبعاً
-رامي: يالا يا قمري ، وأنا مستنيكي ، بس بلاش صورة واحدة ، أنا عاوز كتيررررر

◘◘◘ قامت نسمة بتنفيذ ما طلبه منها رامي ، ولكن حاولت أن تخفي وجهها في الصور ، ثم أرسلتهم إليه و....
-رامي : الصور حلوة ، بس فين وشك
-نسمة: وانت عاوز وشي ليه
-رامي : يعني هاعرف منين ان الصور دي بتاعتك
-نسمة: والله بتوعي
-رامي : خلاص مش مشكلة ..
-نسمة: ناوي على ايه بعد كده
-رامي: عاوز أشوفك واتفق معاكي على تفاصيل الخطوبة
-نسمة: بجد
-رامي: اه طبعاً

◘◘◘ تبادل كلاً من رامي ونسمة أرقام الهواتف المحمولة وظلا يتحدثان هاتفياً لبعض الوقت ، ثم اتفقا على أن يتقابلا في أحد المطاعم ...
ذهبت نسمة في الميعاد المحدد لكي تقابل رامي ، انتظرته لفترة طويلة ولكنه لم يحضر ، حاولت الاتصال به مراراً وتكراراً ولكن دون جدوى و....
-نسمة : الله ! ده فات أكتر من ساعة ورامي لسه مجاش ، طب أكلمه ولا أعمل ايه
-النادل: تطلبي حاجة يا آنسة
-نسمة: آآآ... عصير من فضلك
-النادل: عصير ايه ؟
-نسمة: أي حاجة
-النادل: فراولة كويس ؟
-نسمة: ماشي
-نسمة في نفسها بقلق وتوتر : يا ربي ايه اللي أخره كل ده ، أنا هاكلمه أشوف هو مجاش ليه ... ده موبايله غير متاح .. يكون راح فين بس

وبعد ان انتظرت لعدة ساعات في المطعم قررت أن تعود إلى منزلها ، فتحت الحاسوب لتتفاجيء أن رامي قد حظرها من حسابه على الفيس بوك ، والغى كل شيء كان يربطهما سوياً

◘◘◘ ظلت نسمة غير مصدقة لما حدث ، شعرت بالندم والتسرع وأنها كانت مخطئة للمرة الثانية ، دخلت في مرحلة اكتئاب جديدة ، حاولت أن تبتعد عن المحيطين بها إلى أن تعرفت بتامر الذي عرف كيف يوقعها في شباكه بكل سهولة ، حيث اغدقها في الحب والاهتمام ،وظل يعاملها لفترة طويلة على انها ملكة إلى أن وثقت به تماماً فتجرأ وطلب منها أن تقابله ، وبالفعل قابلته في سيارته و...
-تامر: هاي
-نسمة: اهلا
-تامر : ازيك
-نسمة: الحمدلله
-تامر وهو يقدم لها علبة مغلفة : اتفضلي دي عشانك
-نسمة: ايه دي ؟
-تامر: افتحيها وانتي هتعرفي

◘◘◘ فتحت نسمة العلبة المغلفة لتتفاجيء بأنواع مختلفة من الشيكولاته الفاخرة ، ففرحت بها كثيراً و...
-تامر: عجبتك
-نسمة: اه أوي
-تامر: أنا كنت خايف لأحسن متعجبكيش
-نسمة: لأ بالعكس ، الهدية دي مميزة اوي
-تامر: ولسه هاجيبلك حاجات كمان وكمان
-نسمة: بمناسبة ايه
-تامر: من غير مناسبة ، لأن انتي عندي أغلى واحدة

◘◘◘ استطاع تامر بذكائه أن يستغل سذاجة نسمة وافتقارها للاهتمام والمتابعة من والدتها في ايقاعها وجرها إلى فعل أشياء شنيعة ، وهي كالغبية استسلمت له و..
-تامر وهو يفتح باب شقته : تعالي يا نسوومة
-نسمة: ايه المكان ده يا تامر
-تامر: دي شقتي يا قلبي
-نسمة : هــاه ، شقتك
-تامر: أه ، عشان نكون فيها على راحتنا
-نسمة: أها
-تامر: تعالي ، تحبي تشربي ايه
-نسمة: ولا حاجة
-تامر: لأ ازاي ، ده انا مجهزلك احلى اكل ... تعالي بس
-نسمة: اوك

◘◘◘ بدأ تامر في اغواء نسمة بطريقته التي تشبه من يضع السم في العسل إلى أن استطاع أن يحصلها منها على مايريد وهي استسلمت له بكل سهولة، ولم يكتفي بهذا بل طلب منها أن تأتي بصديقاتها ليكونوا مثلها ، فحالهن ليس افضل منها بكثير ، وكلما أوقعت الكثيرات كلما حظيت على الأموال منه ...
-نسمة: في بت جديدة وشكلها كُحيتي ومستعدة تعمل اي حاجة عشان الفلوس ، وانا خلاص ظبطتهالك
-تامر: برافو عليكي ، انتي كده تعجبيني
-نسمة: فين بقى مكافئتي
-تامر بخبث : عاوزة فلوس ولا آآآ....
-نسمة: الاتنين يا قلبي
-تامر: طول عمرك طماعة
-نسمة: البركة فيك يا تمورة ، انت اللي ضيعتني
-تامر: لأ يا نسوووم ، انتي كنتي جاهزة تعملي أي حاجة ، بس مش لاقية المقابل ، والوقتي انتي بتاخدي قصاد اللي بتعمليه وكتير اوي، صح ولا أنا غلطان
-نسمة: ايوه ..! ومش ندمانة ع اللي عملته ده
-تامر: طب يالا تعالي أما أروق عليكي يا .. يا حلوة ◘◘◘

...........................
عودة للوقت الحالي ،،،،

أفاقت نسمة من ذكريات الماضي على صوت رنين هاتفها المحمول ، كانت نهلة هي المتصلة ، أجابت نسمة الاتصال و...
-نسمة هاتفياً : هاي
-نهلة هاتفياً: هاي نسووومة ، ازيك
-نسمة: كويسة ، خير في حاجة
-نهلة: كنت عاوزة أبلغك بحاجة كده من بدري بس مجتش مناسبة
-نسمة: حاجة ايه ؟
-نهلة: نيرة كانت حكتلي عن اللحن الحزين ده اللي بيقرفها ع الفيس برسايله
-نسمة وقد انتبهت للحديث: ماله
-نهلة: هو الظاهر بعتلها صورتها ، وهي هتموت من الرعب منه
-نسمة: صورتها
-نهلة: ايوه ، وشغال عليها في قصايد حب وغزل
-نسمة: لا والله
-نهلة: اه والله
-نسمة: تمام .. في حاجة تانية
-نهلة: مش اللحن الحزين ده حد تبعكم صح ؟
-نسمة: اه ، بنت من البنات بتهزر مع نيرة شوية
-نهلة: تمام ، أصل انا خوف يكون واحد بجد وناويلها ع حاجة وحشة
-نسمة: لأ يا نهلة ده كله هزار ، ما أنتي عارفة
-نهلة: اوكيشن ، يالا مش عاوزة حاجة مني
-نسمة: لأ .. هو انتي لسه مع الواد اياه
-نهلة: ششش .. لأحسن هو جمبي
-نسمة: طيب يا بيبي ، انجوي
-نهلة: اوك ، باي

أنهت نسمة المكالمة مع نهلة وهي متفاجئة مما يدبره تامر من ورائها و...
-نسمة في نفسها : مش بعد كل اللي عملته ده والتضحيات اللي قومت بيها عشانك اترمى كده ، لأ انت غلطان يا تامر وتبقى مش عارفني صح .. نسمة الهبلة بتاعة زمان اتغيرت ، وأنا محدش يعمل مصلحة من ورايا !!!

انصرفت نسمة من المطعم ويعلو وجهها علامات الغضب ، ولكنها لن تترك الأمور تمر بسلام .......

.......................................

في المستشفى الخاص ،،،،

وصلت سيارة الاسعاف بنيرة واختها ومعهما مروان إلى المشفى الخاص ، تم إدخال نيرة إلى غرفة الطواريء لفحصها ، بينما تم وضع ضمادات للرأس لفاطيما و..
-فاطيما بحزن: هو نيرة هتموت
-مروان: متقوليش كده ، ان شاء الله هتبقى كويسة
-فاطيما: اومال هي ليه مش فاقت زيي ولا ردت عليا
-مروان: هي تعبانة شوية
-فاطيما: اهيء ...
-مروان: متعيطيش وادعيلها
-فاطيما: يارب نيرة تبقى كويسة وأنا مش هتشاكل معاها تاني
-مروان : يا رب ، خليكي أعدة هنا يا طمطم وأنا هاجيبلك حاجة ساقعة
-فاطيما: لأ مش عاوزة حاجة ، أنا عاوزة اختي بس
-مروان وهو يضع يده على رأسها: ربنا معاها

خرج الطبيب من غرفة الفحص ، فلمحه مروان ، فترك فاطيما تجلس على المقعد و أسرع إليه و...
-مروان: خير يا دكتور ؟؟
-الطبيب: الحمدلله مافيش حاجة خطيرة ، كلها كدمات ورضوض مكان الخبطة
-مروان: الحمدلله يا رب ، يعني مافيش أي كسر أو نزيف أو أي حاجة ؟؟
-الطبيب: لأ الحمدلله ، ستر ربنا ان عربيتك نوعها متين فاستحمل الصدمة وخفف كتير ، لكن لو كانت أي عربية تانية كان ممكن لا قدر الله تحصل حاجات أسوأ
-مروان: الحمدلله يا رب ، الحمدلله ، بس هي .. آآآ...هي كانت مش فايقة ولا بترد علينا لما كلمناها
-الطبيب: جايز من الخضة اغمى عليها ، أو من أثر الخبطة
-مروان: طب ممكن يكون مخها فيه حاجة ؟؟؟
-الطبيب: لأ اطمن ، احنا عملنا الفحوصات اللازمة ومافيش حاجة
-مروان: الحمدلله ، شكراً يا دكتور
-الطبيب: العفو

كان الطبيب على وشك الانصراف حينما ناداه مروان و...
-مروان بصوت عالي : دكتور لو سمحت
-الطبيب: ايوه
-مروان: هي فاقت دلوقتي
-الطبيب: اه هي كويسة ، الممرضة معاها جوا بتعملها ضمادات ع الجروح
-مروان: طب تقدر تروح البيت النهاردة ؟
-الطبيب: اه اكيد ، بس بعد ما تخلص ، وفي جوا روشتة معاها بمضادات حيوية ومراهم للكدمات عشان تستعملهم
-مروان: شكراً يا دكتور

حضر أحد الضباط لعمل محضر بالحادث ثم أخذ أقوال مروان ، وما إن انتهى من الاجراءات القانونية حتى أعطى مروان رقم المحضر وانصرف
...........

طرق مروان الباب الغرفة قبل أن يدلف لداخل الغرفة ، فسمحت له الممرضة بالدخول و...
-مروان: حمدلله ع السلامة
-نيرة: شكراً
-مروان للممرضة: اومال فين الروشتة اللي الدكتور سابها هنا
-نيرة: انت عاوزها ليه
-مروان متجاهلاً اياها : فين الروشتة ؟
-الممرضة: هناك ع التربيذة
-مروان: اوك
-نيرة: انت عاوزها ليه ؟؟
-مروان وقد نظر لما هو مكتوب فيها: تمام .. هو الدكتور عاوز حاجة تانية غير اللي مكتوبين هنا ؟
-الممرضة: لأ
-نيرة: أنا مش بكلمك ، ما ترد عليا
-مروان: عن اذنكم
-نيرة: الله ! ده ماله ده

وماهي إلا لحظات حتى دلفت فاطيما لداخل الغرفة لتجري على اختها وتحتضنها بشدة و..
-فاطيما: نيرة اختي ، انتي كويسة صح ؟
-نيرة: اه يا طمطم
-فاطيما: متزعليش مني
-نيرة: لأ مش زعلانة منك

ثم جاء مروان لداخل الغرفة ومعه كيس مليء بالأدوية و...
-مروان: اتفضلي
-نيرة: ايه ده
-مروان: ده الدواء بتاعك
-نيرة: شكراً مش بقبل العوض من حد
-مروان: عوض ايه بالظبط ، ده العلاج بتاعك والدكتور منبه يتاخد
-نيرة: على نفسه التنبيه ده مش عليا
-مروان: هو انتي عنيدة كده على طول
-نيرة: مش كفاية انك السبب في اللي حصلي ، كان زماني الوقتي في البيت
-مروان: الحمدلله انها جت ع أد كده
-نيرة: هــه
-فاطيما: طب احنا هنروح البيت امتى ؟
-مروان: في تاكسي تحت أنا موقفه هيوصلكم للبيت
-نيرة: كويس لأنه أكيد بيعرف يسوق أحسن منك
-مروان: لا حول ولا قوة إلا بالله ، انتي كده لسانك مسحوب منك
-نيرة: مع اللي زيك .. أه !
-مروان: احسن حاجة اني مردش عليكي

ظل مروان واقفاً بجوار الباب ، بينما طلبت فاطيما من اختها أن تنهض لكي يعودا لمنزلهما و..
-فاطيما: يالا بينا يا نيرة
-نيرة وهي تستند على اختها الصغرى : ماشي ، امسكي ايدي بس
-فاطيما: طيب .. ياااه ده انتي تقيلة أوي
-نيرة: بس يا بت ، ده انا خف الريشة
-فاطيما: هو في ريشة وزنها 80 كيلو
-نيرة: هتلمي نفسك ولا اخليكي تنامي مكاني
-فاطيما: حاضر هاسكت ، بس متسنديش جامد عشان كتفي مش يوجعني
-نيرة: طيب ..

وما إن اقتربت نيرة من الباب حتى طلب مروان من فاطيما أن تترك اختها ليقوم هو بحملها وايصالها لسيارة الآجرة التي تنتظرهم في الأسفل و...
-مروان: حاسبي يا طمطم
-فاطيما: ليه؟
-نيرة: وتحاسب ليه ؟؟ انت مش شايفها سنداني
-مروان: الوقتي هتعرفي ، تعالي ورانا يا طمطم
-فاطيما: حاضر

-نيرة وقد حملها: انت مجنون ؟؟ انت بتعمل ايه ؟
-مروان: .................
-نيرة: نزلني أنا مش مشلولة ولا مكسحة
-مروان: .................
-نيرة: انت مش بترد ليه ؟
-مروان: أصل انا عارف لسانك ، فمش هخلص منه ، فخليني أعمل اللي أنا عاوزه وأنا ساكت أحسن
-نيرة: طب سبني بقى
-مروان وهو يهز رأسه بالرفض : تؤ
-نيرة بضيق: اوووف
-فاطيما: هي تقيلة صح ؟
-مروان: اه يا طمطم
-فاطيما: من كتر الشيبسي اللي بتاكله
-نيرة: انا برضوه ولا انتي اللي شغالة عليه
-فاطيما: دي بطاسطية واحدة بس اللي باكلها
-نيرة: يا شيخة ؟
-فاطيما: اه و ابقي خسي عشان أما مروان يشيلك تاني تبقي خفيفة عليه
-نيرة باحراج: بت ، اتلمي
-مروان: خلاص أنا اللي هاخس ، ويالا لأحسن كده الكل هيتفرج علينا
-فاطيما: اوك

أوصل مروان نيرة إلى التاكسي ، وجلست بجوارها فاطيما اختها ، ثم ركب مروان في المقعد الأمامي وانطلق معهم إلى منزلهم ............................................!!!

......................................

[منال سالم]

الحلقة الرابعة والعشرون :


في منزل صلاح الدسوقي ،،،،

كادت زينب أن تُجن خاصة بعد تأخر عودة كلاً من نيرة وفاطيما ، حاولت أن تتصل بنيرة ولكن لم تجد أي رد ، وطلبت صلاح ولكن كان هاتفه هو الأخر غير متاح ، وصلت ندى للمنزل فوجدت والدتها في تلك الحالة و...
-ندى: في ايه يا ماما ؟؟
-زينب: الحقيني يا ندى ، اخواتك الاتنين لسه مجوش وأنا هاتجنن عليهم
-ندى: ازاي ؟؟
-زينب: اللي حصل ، وعمالة اطلب أبوكي ويقولي ان البتاع ده غير متاح
-ندى: طب انا هنزل أدور عليهم عند مدرستهم
-زينب: تنزلي فين ، لأ استني هنا ، انتي خليكي ورا ابوكي لحد ما يرد
-ندى: استر يا رب
-زينب: يا رب طمني عليهم ، أنا مش مرتاحة

............
في أسفل الxxxx ،،،
وصلت سيارة الآجرة أسفل المنزل ، ثم ترجل منها مروان وفتح الباب الخلفي لكي تنزل فاطيما ونيرة و...
-مروان: يالا يا بنات
-فاطيما: ماشي
-مروان: هاتي ايدك يا نيرة
-نيرة : لأ شكراً نا أعرف أقوم وأتحرك لوحدي ، مافيش داعي تتعب نفسك اكتر من كده
-مروان: مش تعب ولا حاجة
-آمال من بعيد: نيرة ، طمطم ! في ايه يا بنات ؟؟؟ ومين ده
-نيرة: ازيك يا طنط
-آمال: يا ساتر يا رب ايه اللي حصلك ؟
-فاطيما: احنا عملنا حادثة يا طنط لما كنا راكبين مع مروان
-آمال: هه
-فاطيما مكملة: وهو ودانا المستشفى وبعدين شال نيرة وجابلنا التاكسي وجينا أهو
-نيرة: تعرفي تقفلي بؤك شوية
-آمال : يا ساتر يا رب ، وانتي كويسة يا بنتي ؟؟
-نيرة: الحمدلله
-مروان: طب كده انا اطمنت عليكم ، أستأذن أنا بقى
-آمال وهي تتفحصه: أه وماله !
-مروان: سلامو عليكم
-فاطيما: باي يا مروان
-مروان: باي يا طمطم
-آمال: مممم... لأ باين عليه راجل ملو هدومه ، عرفتي تقعي عليه ازاي يا نيرة
-نيرة بضيق:أقع عليه ؟؟ ايه الكلام ده يا طنط ؟؟ هو انا بتاعة الحاجات دي
-آمال: وفيها لما تبقي كده ، خليكي ناصحة وماتبقيش عبيطة ، وكل ما تتخطبي وتتجوزي بدري بدري تضمني عيالك تربيهم في شبابك

-نيرة في نفسها: ايه الست العجيبة دي حاشرة مناخيرها في اللي مالهاش فيه
-آمال مكملة: شدي حيلك عشان نفرح بيكي زي اختك كده
-نيرة بضيق : عن اذنك يا طنط ، يالا يا طمطم
-فاطيما: طيب

..............................
ظلت زينب في حالة من القلق والتوتر على ابنتيها و...
-زينب: ابوكي ليه مردش
-ندى: التليفون مش بيجمع يا ماما
-زينب: اه يا بناتي ! روحتوا فين يا حبايب قلبي

ثم رن جرس الباب فأسرعت ندى بفتحه وتفاجئت بشكل نيرة وفاطيما و...
-ندى: ايه اللي حصل ؟؟
-نيرة: حاسبي يا ندى خليني أدخل
-زينب من الداخل بلهفة : ده صوت البت نيرة ، قلبي .. فاطيما

خرجت زينب من داخل الغرفة لتتفاجيء هي الأخرى بشكل نيرة وفاطيما و...
-زينب: يالهوي ! ايه اللي حصلكم
-فاطيما: حادثة يا ماما
-زينب: حداثة ايه دي
-فاطيما: كنا راكبين مع آآآ....
-نيرة مقاطعة: واحد صاحب بابا كان بيوصلنا فعربية خبطت فيه ، بس الحمدلله احنا كويسين
-زينب: يا ساتر يا رب
-ندى: الحمدلله انها جت ع اد كده
-زينب: وايه اللزق ده اللي في وشك وع دراعك
-نيرة: دي حاجة بسيطة
-فاطيما: احنا كويسين الحمدلله ، مروآآآ.....
-نيرة مقاطعة: ششش .. كفاية رغي بقى يا طمطم ، اطمني يا ماما ، احنا بخير ، يالا يا طمطم خلينا نغير هدومنا بدل ما بابا يشوفنا ويتخض
-ندى: اه يا ريت
-فاطيما: انتي بتسكتيني ليه ؟؟ مش أنا بحكي ع اللي حصل
-نيرة: أحسنلك تسكتي بدل ما أعلقك
-فاطيما: يوووه
-زينب: الحمدلله يا رب انهم بخير ، الحمدلله ، أنا لازم اصلي ركعتين شكر لله

....................................

في شركة النقيب للاستيراد ،،،،
حكى مروان لوالده ما حدث لسيارته ولكنه حذف الجزء الخاص بنيرة وفاطيما و...
-فهمي بفزع: وازاي تسيب اللي خبطك ده ومتجرهوش ع القسم وتعمله محضر
-مروان: حصل خير يا بابا
-فهمي: لأ محصلش ، خدت رقم العربية
-مروان: يا بابا خلاص ، المهم اني كويس
-فهمي: الحمدلله ، بس اللي غلط لازم يتحاسب ، كون انك تسيبوه كده يبقى هيقرر اللي عملوه
-مروان: يا بابا ده هو مدغدغ في المستشفى والله اعلم هيجراله ايه ، ومتقلقش اتعمل محضر في مكان الحادثة والمستشفى كمان
-فهمي: هو كان في مستشفى كمان ؟
-مروان بتردد : آآآآ... يعني عشان أطمن على نفسي وكده
-فهمي: طيب ، المهم انك بخير ، والعربية هوديها التوكيل تتصلح
-مروان: ماشي يا بابا
-فهمي: روح انت البيت ارتاح
-مروان: اوك

......................................
في فيلا سليم الكومي ،،،،

علم يوسف بما حدث مع صديقه مروان حينما اتصل به هاتفياً و...
-يوسف هاتفياً: كل ده حصل ومتقوليش
-مروان: الحمدلله عدت على خير
-يوسف: الحمدلله ، بس أهم حاجة انت كويس
-مروان: اه والله
-يوسف: الظاهر ان الرحلة اللي كنا هنطلعها دي فقر ، جاية علينا بالنحس
-مروان: باين كده ، أهي اتأجلت
-يوسف: انتو أجلتوها ؟ ده انا كنت مفكرها اتلغت
-مروان: هتعمل ايه في ست مايا ، مصممة انك انت اللي تطلع الرحلة
-يوسف: والله أنا مش عاوز أحرجها ، بس بجد تصرفتها الكتير دي بقت بتخنقني
-مروان: اه فعلا عندك حق
-يوسف: بس مقولتليش مين المزة اللي اتصابت معاك
-مروان: لا مزة ولا غيره ، دي بت مسحوبة من لسانها
-يوسف: عليا برضوه
-مروان: اه والله ، سيبك بس انت منها الوقتي وخلينا في مامتك ، اخبرها ايه
-يوسف: هي الحمدلله أحسن ، واحنا مستنيين نتايج التحاليل
-مروان: ربنا يطمنكم عليها
-يوسف: يا رب

.....................................

في منزل صلاح الدسوقي ،،،،

عاد صلاح من العمل ليجد البيت هاديء ، فتوجه إلى غرفته ليجد زينب جالسة تقرأ في المصحف قليلاً ، وما إن رأت زوجها حتى أنهت القراءة ، ثم نهضت من مكانها و...
-زينب: انت جيت يا حاج
-صلاح: اه يا زينب ، مال البت هادي كده ليه
-زينب: اسكت يا حاج ، حصلت النهاردة حادثة للبنات بس ربنا سترها
-صلاح بفزع: ايه حادثة ، ومحدش كلمني
-زينب: لأ اطمن هما بخير الحمد لله
-صلاح: محدش قالي ليه ؟؟؟ مكلمتنيش ليه يا زينب ؟؟
-زينب: والله كلمناك فوق الـ 100 مرة بس مكنش الخط بيجمع
-صلاح: انا عاوز أغير الموبايل ده ، لا بسمع منه ولا بيوصلني منه أي حاجة
-زينب: ان شاء الله يا حاج ، نطمن بس الأول على ندى ونخلص من خطوبتها وبعد كده ربنا يسهل
-صلاح: طب بمناسبة خطوبة ندى ، العريس كان عاوز يجي معاكو وانتو بتظبطوا حاجة قراية الفاتحة
-زينب: الله ! وده يصح برضوه
-صلاح: هو مصمم انه يجي بنفسه معاكو ، عاوز يشوف ان كان ناقصكم حاجة كده ولا كده عشان يجيبها
-زينب: كتر خيره ، احنا مش محتاجين حاجة ، كل حاجة موجودة
-صلاح: والله أنا شاكك ان الواد ده اخدة حجة عشان يتكلم مع البت ندى
-زينب: هههههههه ، شباب الايام دي معندهومش صبر
-صلاح: بصي أنا رأيي خليه يجي معاكو واهوو بالمرة ندى تاخد عليه ، عشان مايبقاش غريب عليها
-زينب: ماشي يا حاج ، اللي تشوفه
-صلاح: وأهوو انتي عينك هتبقى عليه برضوه
-زينب: حاضر
-صلاح: انتو هتنزلوا تجيبوا الحاجة امتى
-زينب: بكرة ان شاء الله
-صلاح: طب حلو أوي ، يبقى بكرة أخر النهار يروح معاكو ، ولو كنت أنا فاضي هاجي
-زينب : بأمر الله
-صلاح: انت عاوزة قراية الفاتحة امتى ؟
-زينب: خليها ع الأحد ولا الاتنين ، يدوب نكون كملنا اللي ناقص وخلصت من ترويق البيت
-صلاح: يبقى ع الاتنين ، انا كنت بفكر أعملها الاحد
-زينب: لالالا .. خليها ع الاتنين ان شاء الله
-صلاح: بأمر الله ، خلاص أنا هاكلمه واعرفه انه يجيلكم بكرة ع المغربية ، وقراية الفاتحة ع يوم الاتنين
-زينب: ماشي يا حاج

وبالفعل أبلغ صلاح علاء هاتفياً بما اتفق عليه مع زوجته زينب ..
......................................
في غرفة البنات ،،،،

كانت نيرة تفكر فيما حدث طوال اليوم ، وتتذكر تصرف مروان معها ، ابتسمت بعفوية حينما تذكرت كيف كان يحملها بين ذراعيه و..
-نيرة في نفسها: والله الواد مجنون ، هو صحيح كان جينتل معايا بس برضوه مجنون ..! انا مش قادرة أقوم أفتح الفيس ولا أشوف الزفت اللي اسمه اللحن الحزين ده رد عليا ولا لأ .. جسمي واجعني مكان الخبطات ، اوووف ! الحمدلله انها جت ع أد كده

كانت ندى تفكر في علاء وخاصة أول تصرف له معها ، حاولت أن تجد له مبرراً و...
-ندى في نفسها: هو أكيد مايقصدش يتعامل معايا كده ، برضوه احنا لسه مخدناش على بعض ، واكيد لما هنعرف بعض أكتر هيحصل بينا تفاهم . ربنا يكتبلي اللي فيه الخير ويجعله الزوج الصالح ليا ..


.........................................

في اليوم التالي ،،،
في المساء ،،،،
كانت نيرة راقدة طوال اليوم في الفراش مدعية المرض لتتجنب القيام بأي أعمال منزلية ، بينما استعدت ندى وزينب للنزول لشراء متطلبات الحفل الخاص بقراءة الفاتحة و...
-زينب: يالا يا ندى ، العريس زمانته على وصول
-ندى: حاضر يا ماما ، هلبس بس الشراب وبعد كده اجي ألبس الـ shoes
-زينب: طيب
-فاطيما: وانتو برضوه مش هتاخدوني معاكو
-زينب: لأ يا طمطم ، احنا مش فاضيين ، وبعدين انتي اقعدي مع اختك المكسحة اللي جوا دي
-نيرة من الداخل: سمعاكي يا ماما
-زينب: طب كويس انك سمعاني ، قومي ياختي رتبي الأوضة ، وروقي دولابك اللي كل ما أفتحه الهدوم تقع عليا
-نيرة: ان شاء الله لما أخف ، مش كفاية النت مقطوع من امبارح ولا عارفة أشوف أي حاجة
-زينب: احسن ، اياكش معاد يجي ، هو ده اللي مضيع وقتك
-نيرة: والله انتي ظلماني يا ماما
-زينب: أنا هافضل أرغي معاكي كده ومش هاخلص ، وانا ورايا لسه حاجات أد كده عاوزة تتجاب وتتعمل ، يالا يا ندى انجزي انتي كمان
-ندى: خلاص أنا خلصت

كانت ندى ترتدي بنطالاً من الجينز الأزرق وعليه قميص من اللون الروز الفاتح ووضعت شالاً من القماش حول رقبتها ..
-زينب: زي القمر يا ناس
-ندى: حبيبتي يا ماما
-فاطيما: ابقي هاتيلي كيس حاجة حلوة أد كده وانتي جاية
-ندى: حاضر يا طمطم
-زينب: يالا يا بنتي ، العريس واقف تحت من بدري
-ندى: وانتي عرفتي منين يا ماما
-زينب: انتي مش سامعة صوت الكلاكس اللي بيضرب من الصبح
-ندى: لأ ، وبعدين في اختراع اسمه موبايل ، ما يرن على بابا واحنا هننزل
-زينب: ابوكي في الشغل ومش فاضي
-ندى: الله يعينه ، بس المفروض ياخد أجازة اليومين دول
-زينب: هو عاوز ينجز الشغل بسرعة ، دي أول شغلانة مهمة تجيله وعاوز يثبت نفسه فيها ، هو أنا هاقولك ولا ايه يا ندى
-ندى: اها
-زينب: يالا بقى بسرعة
-فاطيما: متنسنيش يا نودة
-ندى: حاضر ، باي يا طمطم
-فاطيما: باي

..................
نزلت زينب مع ابنتها الكبرى ندى لتجد علاء في انتظارهما ، ومعه والدته ، وللمرة الثانية تتفاجيء زينب بوجود والدته بدون علمهما و...
-زينب في نفسها: الله ! مش دي الولية أمه ، هي جاية معانا ولا ايه
-سناء: مساء الخير عليكم
-زينب محاولة أن تبتسم: حاجة سناء ، ازيك
-سناء: الحمدلله بخير ، ازيك انتي يا حاجة زينب ، اظن انها مفاجأة حلوة
-زينب: أها
-سناء: ازيك يا ندى يا بنتي ؟
-ندى: الحمدلله يا طنط
-علاء: ازيك يا ندى
-ندى: تمام
-علاء: مساء الخير عليكي يا طنط
-زينب: مساء النور يا بني
-علاء: اتفضلوا اركبوا ، تحبوا أوصلكم فين
-زينب: مكنش في داعي يا بني ، احنا بس هانجيب كام حاجة نقصانا
-سناء: قوليلي ايه اللي ناقص يا حاجة زينب ، واحنا نجيبه معاكي
-علاء: بس الأول نروح نشرب حاجة ساقعة كده في كافيه
-زينب: احنا كده يا بني هنتأخر
-علاء: لا تأخير ولا حاجة ، ده 10دقايق بس ، مش هنطول
-زينب على مضض : ماشي
.............................

توجه علاء بسيارته إلى أحد الكافيهات القريبة ، ثم دلف الجميع للداخل ، فاستأذن علاء من زينب أن يجلس مع ابنتها في الطاولة المجاورة و..
-علاء: ممكن يا طنط أقعد أنا وندى مع بعض شوية
-زينب: هــاه
-علاء: هنكلم بس شوية ، يعني نتفق احنا الاتنين وكده ع النظام في قراية الفاتحة
-زينب: بس آآآ...
-سناء مقاطعة: يا حاجة زينب ، هما العرسان من حقهم يقرروا ويختاروا عاوزين ايه ، واحنا ننفذ طلباتهم
-زينب: مماشي ، بس احنا متفقناش على كده ، بعض الخطوبة يبقوا يعملوا اللي عاوزينوه
-سناء: دول 5 دقايق يا حاجة ، مش هتخسر حاجة
-زينب: عشان خاطرك بس يا حاجة سناء
-سناء: تسلميلي يا رب

جلست ندى مع علاء على الطاولة المجاورة ثم بدأ علاء بالحديث و...
-علاء: اخبارك ايه ؟
-ندى : الحمدلله
-علاء: ها ناوية تلبسي ايه في الخطوبة
-ندى بخجل: فستان ان شاء الله
-علاء: طب كويس أوي ، هيكون لونه ايه ؟
-ندى: ممم... بفكر في اللون الأحمر
-علاء: لألألأ .. بلاش اللون ده خليه أزرق ولا حاجة تانية
-ندى: ليه ؟
-علاء: مش عاوزك تكوني ملفتة والناس تبص عليكي ، انتي بتاعتي وبس
-ندى : اها
-علاء: هتتزوئي في البيت ولا عند كوافيرة ؟
-ندى: لأ عند كوافيرة
-علاء: اوك ، بس يا ريت ميكونش الفستان مفتوح ولا عريان
-ندى: لأ انا مش بلبس عريان
-علاء: تمام ، قوليلي هو انتو ناويين تعزموا مين ع قراية الفاتحة ؟؟
-ندى: يعني احنا مش هنعزم ناس كتير ، يدوب احنا وآآآ...
-علاء بحدة : نعم مش هتعزموا حد ؟؟ ليه ان شاء الله
-ندى: دي لسه قراية فاتحة وكده
-علاء: يعني ايه قراية فاتحة ، يعني أنا هاعزم كام حد من عيلتي وانتو مافيش حد عندكم معزوم ؟؟ عاوزة شكلي يكون قصاد الناس ايه ؟؟ ولا انتو مستعريين مني
-ندى: ليه الكلام ده بس ، كل الحكاية ان قراية الفاتحة دايماً بتكون ع الضيق وكده
-علاء: لأ أنا مش عاوز كده ، انا عاوز ألاقي قرايبكم موجودين وبيتعرفوا عليا وعلى عيلتي
-ندى: ربنا يسهل ان شاء الله ، انت تقدر تتفق مع بابا في الكلام ده
-علاء: ماشي ، بس انتي برضوه بنته وعاوزك تديله فكرة ، ماشي
-ندى: ان شاء الله ، مش يالا بقى لأحسن هنتأخر كده
-علاء: طيب ، بس أنا فهمتك ع اللي عاوزه ، فياريت ده يحصل
-ندى: والله زي ما قولتلك ، تقدر تتكلم مع بابا وهو هيقرر

.................
في نفس الوقت على طاولة زينب وسناء ،،،،
-سناء: عاوزة أقولك يا حاجة زينب ان علاء ابني مش بيخلي في وسعه حاجة إلا لما بيعملها
-زينب: اها ، ما احنا الحاج صلاح الله يبارك في عمره مش بيتأخر عن بناته في حاجة
-سناء: طب كويس ، ناويين بقى تجيبوا ايه لبنتكم
-زينب: مش فاهمة
-سناء: اقصد يعني العفش
-زينب: الحاجات دي يبقى يتكلم فيها علاء مع الحاج صلاح
-سناء: وماله .. بس أنا كنت عاوزة أديكي فكرة ان علاء لسه عنده الصالون بتاعه
-زينب: نعم؟
-سناء: احنا مابعنهوش ، محتفظين بيه ، هو لسه قيم وعلى حالته
-زينب: يعني تقصدي ان صالون جوازته الأولانية لسه موجود
-سناء: أه ، ماهو لو كان باعه هيخسر فيه ، وانتي يا حاجة ميرضكيش انه يخسر
-زينب: لأ ، بس بنتي عروسة جديدة ، ومن حقها انها تدخل على عفش جديد
-سناء: ماهو لسه جديد ، ملحقش يا حاجة
-زينب: برضوه ، انا بنتي مش هتدخل على عفش واحدة غيرها

ثم انضم إليهما علاء وندى و..
-علاء: مش يالا بينا
-زينب بضيق : اه يا ريت
-سناء: ماشي يا بني ، بس اسندني الأول
-علاء: حاضر ، تحبوا تروحوا فين ؟
-زينب: ع المول اللي جمبنا هنا ، احنا هنجيب منه اللي ناقصنا
-علاء: اوك
-زينب: روح انت مع الحاجة والدتك ، واحنا هنشوف اللي ناقصنا براحتنا
-علاء: بس آآآ...
-زينب: عشان ماتتعطلش معانا ، وبعدين الحاجة سناء محتاجة ترتاح ، ولا ايه ؟
-سناء: اه يا بني ، وديني البيت لأحسن رجلي شادة عليا
-علاء: اوك ، هوصلكم بس المول ، وبعد كده احنا هنطلع ع البيت يا ماما
-سناء: ماشي يا بني
-زينب في نفسها: الظاهر ان الجوازة دي فقر ومنظورة ...!!

........................................

في منزل صلاح الدسوقي ،،،،

عادت زينب وندى بعد ان اشتروا ما يلزم ، بالاضافة إلى قيام ندى بالحجز عند أحد مراكز التجميل القريبة من المنزل لكي تتجمل فيها و...
-زينب: آآآخ يا رجلي ، تعبت من كتر اللف والفرجة
-ندى: يا ماما ما أنا قولتلك من الأول خلينا نجيب الفستان الأزرق وخلاص
-زينب: ازرق ايه وكحلي ايه ، انتي يا تلبسي أحمر يا دهبي يا بامبي ، أي ألوان فاتحةة ، رايحة تدوريلي ع الكحلي والغوامق ، هو انتي مفكرة انك معزومة في فرح ، دي قراية فاتحتك يعني تلبسي اللي عاوزاه ، وحاجة تنورك
-ندى: بس أصل علاء بيحب الألوان دي
-زينب: يحب مايحبش انتي تلبسي وتتوضبي يا حبيبتي ، ده انتي العروسة ، وهو يحمد ربنا ويبوس ايده وش وضهر إننا رضينا بيه
-صلاح: في ايه بتتخانقوا ليه
-زينب: يعني يرضيك يا حاج ننزل تحت نلاقي الولية أم علاء أعدة في العربية ومستنيانا
-صلاح: ايه ؟
-زينب: لأ وعاوزة تيجي معانا كمان تشوف هنشتري ايه
-صلاح: يا ستي الموضوع مش مستاهل
-ندى: بابا كنت عاوزة اسألك هو حضرتك هتعزم مين في قراية الفاتحة
-صلاح: والله أنا كنت بفكر أعملها ع الضيق ، يعني ده لسه تعارف وكده ، وبعدين في الخطوبة والفرح نبقى نعزم الحبايب كلهم
-ندى: ممم...
-زينب: انتي بتسألي ليه
-ندى: أصل علاء كان عاوزنا نعزم مجموعة من قرايبنا عشان يتعرفوا عليه هو وعيلته
-صلاح: والله لما تبقى خطوبة هنعزم كل الناس ، لكن دي حاجة ع الأد ، وبعدين انتو شايفين البيت مش هيستحمل عدد كبير من المعازيم
-ندى: اها
-زينب: طب شوف النصيبة التانية يا حاج
-صلاح: نصيبة ايه بس ؟
-زينب: أل ايه الولية أمه عاوزة بنتي تدخل على الصالون القديم بتاع مراته الأولانية
-صلاح: ايه ؟
-ندى: نعم ؟
-زينب: مش مكفيها إن احنا ساكتين ع اللي بيعملوه ، قالت أما تسوق فيها وتحدفلي البلوى دي كمان
-صلاح: لأ احنا لسه متفقناش ع الأمور دي ، أنا هاتكلم مع علاء في قراية الفاتحة
-زينب: اه يا ريت تقوله عفش بنتي كله يبقى جديد في جديد
-صلاح: إن شاء الله
-زينب: خشي انتي بقى يا نووودة ارتاحي ، وأنا كمان هدخل أغير هدومي وانام لأحسن ورايا هم ما يتلم بكرة
-ندى: حاضر يا ماما ، تصبحوا على خير
-زينب: وانتي من أهله يا ضنايا
-صلاح: تلاقي الخير يا ندى

.................

استغلت البنات مناسبة قراءة الفاتحة كحجة للغياب عن المدارس والجامعة ، والاستعداد لذلك الحفل ، ظللن طوال اليومين الذين سبقا حفل قراءة الفاتحة في معاونة والدتهن في توضيب المنزل ، واعداده لاستقبال الضيوف ، واتفق صلاح مع علاء على أن تتناقش العائلتين في أمور الخطبة وترتيبات الزواج في حضور الجميع يوم قراءة الفاتحة .................................................. .............. !!!


.................................................. ..

[منال سالم]

الحلقة الخامسة والعشرون:


قرر صلاح أن يأخذ يوم خطبة ابنته أجازة من العمل لكي يستعد لذلك اليوم الهام ، فقام بالاتصال بفهمي هاتفياً وأبلغه بـ...
-صلاح هاتفياً: هستأذنك يا فهمي بيه اني مش هاجي بكرة عشان قراية فاتحة بنتي
-فهمي هاتفيا: بجد ، ألف الف مبروك ، ربنا يتمملها على خير
-صلاح: الله يبارك فيك يا رب ، هي حاجة ع الضيق كده ، بس ان شاء الله في الليلة الكبيرة حضرتك هتكون معزوم
-فهمي: بأمر الله ، خلاص ادي العمال في الموقع أجازة ، مش هيشتغلوا من غير مشرف عليهم ، صح ولا انت رأيك ايه ؟
-صلاح: لأ تمام .
-فهمي: وألف مبروك مرة تانية
-صلاح: الله يبارك فيك

قرر صلاح أن يدعو صديقه علي فقط على الحفل الصغير ، كما اتفق مع زينب على عدم دعوة أحد من الأقارب حتى يتفق مع علاء وعائلته على كل اساسيات الزواج ومن ثم يدعو العائلة والأقارب والأصحاب وجميع من يعرف على حفل الخطوبة المنتظر ..
..............................
في أحد المستشفيات الخاصة الكبيرة ،،،

ظهرت نتائج التحاليل الخاصة بالسيدة عبير زوجة سليم الكومي ، وبفضل الله كانت النتائج مبشرة ، فأسرع الطبيب بالاتصال بـ...
-الطبيب هاتفيا: الووو .. سليم باشا
-سليم بقلق هاتفياً: ايوه يا دكتور ، النتايج ظهرت
-الطبيب: اه ، والحمدلله كلها كويسة ، مافيش أي حاجة في الهانم
-سليم: اللهم لك الحمد والشكر ، ده انا كنت شايل الهم والله
-الطبيب: لأ اطمن ، هي بس تلتزم بالعلاج بتاعها ، وخصوصاً عشان الكوريسترول عندها عالي شوية
-سليم: تمام ..تمام ، شوف انت عاوزها تعلم ايه واحنا هنمشي ع التعليمات بالحرف يا دكتور
-الطبيب: اوك ..

...................

أنهى سليم المكالمة مع الطبيب ثم اتصل بابنه يوسف لكي يطمئنه هو الأخر على والدته و...
-سليم هاتفياً: الوو ، ايوه يا جوو انت فين ؟
-يوسف: انا كنت رايح ع النادي يا بابا ، في حاجة حصلت ؟
-سليم: لأ متقلقش ، أنا بس كنت عاوز اطمنك على مامتك
-يوسف بلهفة: ها يا بابا ، نتايج التحاليل ظهرت
-سليم: اه ، والحمدلله طلع مافيش حاجة
-يوسف: بجد يا بابا ؟؟؟ ولا انت بتقول كده عشان مزعلش ؟؟
-سليم: لا والله يا بني ، الدكتور لسه قافل معايا وطمني الحمدلله على أمك
-يوسف: ياااااااااااه ، ده انا كنت هاموت م الرعب لو كان فيها حاجة
-سليم: الحمد لله ربنا كريم
-يوسف: الحمدلله
-سليم: روح يا بني انت بقى شوف حياتك وكليتك ومتعطلش نفسك اكتر من كده
-يوسف: ماشي يا بابا ، بس لازم نعمل حفلة بالمناسبة دي لماما
-سليم: هنعمل بدل الحفلة عشرة بس الأول هطلع حاجة لله
-يوسف: ماشي يا بابا
-سليم: ومافيش داعي تجيبلها سيرة يا بني عن التحاليل دي
-يوسف: لأ اطمن يا بابا ، مش هانطق
-سليم: ايوه كده يا جوو ...

...................................

في النادي ،،،،

كانت مايا ورضوى تجلسان في النادي حينما انضم إليهم أحمد ثم لحق به مروان و...
-رضوى: عاوزة أقولك يا مايا ان الحجز ع الرحلة لما اتأجلت بقى اكتر من الأول
-مايا: مش قولتلك
-رضوى: فعلاً طلعتي بتخططي
-مايا: اومال ايه
-أحمد: مسا مسا على أحلى بنوتات في النادي كله
-مايا: هاي أحمد
-رضوى: ازيك يا أحمد
-احمد: الحمدلله تمام ، ايه لسه برضوه بتكلموا عن الرحلة

-مروان من بعيد: وهما وراهم حاجة غير كده
-مايا: ماروو .. how are you ؟ انت فين ؟
-مروان: كنت مشغول شوية
-مايا: سوري عشان العربية بتاعتك ، أنا عرفت انك عملت حادثة بيها
-مروان: اها .. ولا يهمك ، الحمدلله
-مايا: مافيش أخبار عن جوو

-يوسف من بعيد: مين بيسأل عني ؟
-مايا بفرحة: مش معقول جوو بنفسه في النادي
-يوسف: أينعم بشحمي ولحمي ، ازيكم جميعا
-مروان وهو يصافحه: وشك ولا القمر
-يوسف: حبيبي يا ماروو
-أحمد: لأ مش معقول ده جوو اللي كان شكله نكدي من يومين
-يوسف: لأ خلاص جو النكد ده راح لحاله
-مايا: واو .. بجد أنا مبسوطة انك رجعت لطبيعتك
-يوسف: الحمدلله مطولتش في المود النكد ده كتير
-مروان: اه كنت خانقة جدا ومحدش كان طايقك إلا أنا
-احمد: هههههههههههه فعلا
-يوسف: المهم يعني أنا رجعت زي الأول تاني ، وبجد عاوز أشكركم ع اللي عملتوه معايا
-مايا: متقولش كده يا جوو ، ده احنا معملناش حاجة
-يوسف: الصاحب اللي بجد هو اللي يستحمل صاحبه في الوقت الصعب
-مروان: ومافيش صاحب زيي
-احمد: بما انك رجعت لسابق عهدك ، فناوي تعوضنا بايه
-يوسف: شوفوا عاوزين ايه وأنا جاهز
-مايا: مممم... استنى أما أفكر
-يوسف: فكري براحتك
-رضوى: على كده انت هتطلع الرحلة معانا صح ؟
-يوسف: ان شاء الله ، لو مافيش حاجة جدت أنا معاكو
-مايا: وااااو .. ده خبر حلو أوي
-مروان: ايوه بقى عاوزين نشهيص الدنيا
-أحمد: عاوزين الرحلة تكسر الدنيا
-يوسف: اوك .. طب تعالوا نشوف هنعمل ايه
-رضوى: انا لسه سايبة باب الحجز لأخر الاسبوع ، وعاوزة اقولك ان احنا كده هنقفل عدد رهيب
-يوسف: مم.. ماشي ، بس أنا عاوز الكشف النهائي بالاسماء ع يوم الأربعاء بالكتير
-رضوى: اوك
-مروان: هو احنا هنفكر على معدة فاضية ، شوفلي أكل
-يوسف: شوف عاوز ايه وأنا أجيبهولك
-أحمد: احم.. مش لوحده ، كلنا
-يوسف: حاضر

ظل يوسف يناقش مع أصدقائه ترتيبات رحلتهم القادمة وكيفية تحضير مفاجأت لكل من سيشترك بها
.....................................

في منزل علاء ،،،،

كانت سناء تحدد من ستقوم بالاتصال به من أقاربها لكي تدعوهم لحفل قراءة فاتحة ابنها علاء و...
-علاء: عزمتي مين تاني يا ماما
-سناء: عمتك وجوزها
-علاء: تمام .. وأنا هعزم عمرو صاحبي عشان يصورنا
-سناء: انت مش ناوي تروح استديو تتصوروا فيه ؟
-علاء: وأروح ليه وعمرو موجود ، هو هيظبط الدنيا كلها ، وبعدين أنا مش عاوز اتكلف حاجات مالهاش داعي عشان شوية مظاهر فارغة
-سناء: عندك حق يا بني ، جوازتك اللي فاتت كلفتنا كتير ، وكل ده راح ع الفاضي ، فعاوزين المرادي ناخد بالنا ، ونكون واعيين
-علاء: من الناحية دي اطمني يا ماما ، أنا مش ناوي أخسر حاجة ولا أتكلف أي حاجة ، وان كان عاجبهم
-سناء: اها
-علاء: وبعدين ده ليهم الشرف انهم يناسبونا
-سناء: اه يا حبيبي ، مش هيلاقوا زيك اليومين دول ، عريس شغال وبياخد مرتب حلو وعنده شقته وربيته ومستعد يعمل كل حاجة في بيته
-علاء: ادي ومش لايقين اللضا
-سناء: بالظبط ، وشد ع البت ندى ، هي زي العجينة ، عاوزة اللي يشكلها
-علاء: اطمني يا ماما ، أنا هفهمها ع طريقتي وخليها تمشي ع نظامي من الأول
-سناء: برافو عليك ، هو ده الكلام

..............................

يوم الخطبة ،،،،
في منزل صلاح الدسوقي ،،،
كانت زينب تستعد لايصال بناتها إلى مركز التجميل القريب ، ومن ثم العودة لتجهيز المنزل لحفل قراءة الفاتحة و...
-زينب: خدوا كل حاجة معاكو عشان تلبسوا هناك
-ندى: اوك
-نيرة: ماشي يا ماما
-فاطيما: انا جهزت حاجتي يا ماما
-زينب: نيرة تخلي عينيكي ع طمطم
-نيرة على مضض: طيب
-ندى: ماما ألبس هنا ولا هناك في الكوافير ؟
-زينب: لأ يا حبيبتي هناك ، و انتو تغيروا وتجهزوا عشان أخد الهدوم بتاعتكو معايا وأنا راجعة البيت ، وبعد ما أظبط الدنيا هلبس هنا ، وأرجعلكم يا بنات
-ندى: ماشي ياماما
-زينب: وعوزاكي تضحكي يا عروسة
-فاطيما: وانا كمان يا ماما؟؟؟
-زينب: اها يا حبيبتي وانتي يا قمرة تضحكي برضوه
-فاطيما: ماشي

...................
عند مركز التجميل ،،،

وبالفعل انطلقت الفتيات بصحبة والدتهن إلى مركز التجميل القريب ، وفيه بدلت ندى ملابسها وارتدت فستاناً من اللون الأحمر ، ووضعت فوق راسها تاجاً رقيقاً بعد أن عقصت شعرها للخلف .. بينما ارتدت نيرة فستاناً من اللون الزيتي وتركت شعرها ثائراً خلف ظهرها، وارتدت فاطيماً فستاناً من اللون الذهبي .. بدأت مصففة الشعر في وضع اللمسات الأخيرة على ندى و...
-المصففة: تحبي نحطلك مونكير ولا هتتكفي فقط بالفرانشا
-نيرة: حطيها مونكير ، دي العروسة
-فاطيما: وأنا كمان عاوزة فراشة
-نيرة: اسمها فرانشا يا جاهلة
-ندى: بسسس يا نيرة ، مش تشتمي اختك
-فاطيما: أيوه أنا مش جاهلة ، انا شاطرة وبجيب دايماً الـ full mark
-نيرة: هــه
-المصففة: ها يا عروسة ؟
-ندى: اللي تشوفيه مناسب اعمليه
-المصففة: اوك

جاءت زينب إلى مركز التجميل لتتفاجيء ببناتها وهن في أبهى صورهن ، كادت الدمعة أن تفر من عينيها حينما رأت ابنتها الكبرى وهي كالأميرة الصغيرة ، وتذكرت كيف مرت الأيام سريعاً منذ ميلادها وحتى حانت لحظة خطبتها و...
-زينب والدموع في عينيها: ماشاء الله يا حبيبتي ، زي القمر ، الله يحميكي من العين
-ندى: ماما حبيبتي ، بلاش تعيطي
-زينب: دي دموع الفرحة يا قلب ماما
-ندى: ربنا ما يحرمني منك يا ماما
-فاطيما: ايه رأيك يا ماما فيا وفي الفستان
-زينب وهي تمسح دموعها : طعمة يا ناس
-نيرة: مبروك يا نوودة ، وربنا يتمملك ع خير
-ندى: الله يبارك فيكي يا نيروو ، وعقبال ما تخلصي الثانوية وتخشي الكلية كده وتحصليني
-نيرة: لأ أنا لسه بدري عليا
-المصففة: ممكن بس تقعدي يا عروسة عشان أظبطلك الماسكرا
-ندى: حاضر

انتهت المصففة من تجهيز ندى ، وماهي إلا بضع لحظات حتى سمع أصواتاً لأبواق بعض السيارات تقف في الخارج ، خرجت زينب لترى العريس ، وبالفعل وجدته بصحبة والدته وبعض الأقارب ، فرحبت بهما و...
-زينب: اهلا يا حاجة سناء
-سناء: الف مبروك يا أم العروسة
-زينب: الله يبارك فيكي
-سناء: العروسة خلصت ولا لسه
-زينب: لأ خلاص تمام
-علاء: ازيك يا طنط ؟
-زينب: الحمدلله يا عريس ، مبروك ليك يا بني
-علاء: الله يبارك فيكي يا طنط
-زينب: طب يالا عشان تاخد عروستك
-علاء: اوك

وبالفعل دلف علاء لداخل مركز التجميل ليتفاجيء بندى التي ارتدت الفستان الأحمر ، مما ضايقه وبدى هذا جلياً على وجهه ، ورغم هذا اصطحب دى من يدها للسيارة و...
-علاء بضيق: برضوه لبستي الفستان الأحمر
-ندى: هاه
-علاء: ع العموم مش هنتكلم دلوقتي ، يالا بينا
-ندى بقلق: اوك

خرجت ندى من المركز وتعالت الزغاريط في أرجاء المكان ، ورغم هذا لم تشعر بالفرحة التي كانت تنتظرها ، ركبت في المقعد الخلفي في السيارة المخصصة للعرائس ، وجلست اختها نيرة في الأمام ، بينما ظلت فاطيما مع زينب وركبتا سيارة اخرى مع السيدة سناء و....

كان علاء يتلقى التهنئات من أقاربه و أصحابه وظل منشغلاً معهم لبعض الوقت ، وبينما كانت نيرة تتحدث مع ندى قاطع حديثهما علاء حينما طل برأسه من نافذة السيارة و....
-نيرة: مالك في ايه ؟
-ندى: مافيش
-نيرة: يا بنتي ده انتي من ساعة ما خرجتي من جوا وانتي وشك اتقلب فجأة
-ندى: عادي

-علاء وهو يطل برأسه بنرفزة : كنت متأكد انك هتعملي كده
-ندى بفزع: هــاه ، اعمل ايه ؟
-علاء: بصي على ايدك يا هانم
-ندى: مالها ؟
-علاء: ايه اللي انتي حطاه ده ؟
-ندى: انا مش حاطة حاجة
-علاء: اومال المونكير اللي في ايدك ده ايه ؟؟ ها ؟؟؟
-ندى: ده ...ده حاجة عادية
-علاء: عادية ازاي يعني ؟؟ فهميني ؟؟ احنا متفقناش ع كده
-نيرة متدخلة في الحوار: دي عروسة والمفروض تعمل كل حاجة في اليوم ده
-علاء: لو سمحتي ماتدخليش بيني وبينها ، أنا كلامي مع اختك مش معاكي
-نيرة: بس آآآ...
-ندى مقاطعة: خلاص يا نيرة ، سوري يا علاء أنا مكونتش أعرف
-علاء: وبعدين مش احنا اتفقنا انك هتلبسي فستان غامق
-ندى: ماما اقترحت اني آآآآ..
-علاء مقاطعاً : بدأنا بقى في ماما قالت ، وماما عادت ، يا بنت الناس احنا كنا متفقين يبقى المفترض انك تعملي اللي اتفقنا عليه ، صح ولا أنا غلطان؟
-ندى: سوري
-علاء وهو يركب السيارة: اوووف ...
-نيرة في نفسها : الله يكون في عونك يا ندى ، ده باين عليه غتييت ورخم ..!
-ندى في نفسها: لا حول ولا قوة إلا بالله ، ده المفروض الفرحة تكون مش سيعانا ، لكن هو بيدور على أسباب تافهة عشان يتخانق

ثم انطلق الجميع نحو منزل صلاح الدسوقي ...

..............................

في منزل صلاح الدسوقي ،،،،

وصل الجميع إلى المنزل ، وصعدت ندى مع عريسها علاء حيث كان ينتظرهم والدها فوق ، وبدأ في الترحيب بالضيوف و...
-صلاح: يا أهلا وسهلا ، مبروك يا ولاد ، تعالوا جوا
-علاء: الله يبارك فيك يا عمي
-علي: الف مبروك يا عريس
-آمال: لوووولووولي ... زي القمر يا ولاد ، ربنا يهنيكم
زينب: لووولووولي ، الف مبروك يا نوودة ، يالا يا عروسة
-صلاح: اتفضلوا يا جماعة في الصالون

جلس الجميع في غرفة الصالون وبدأت مراسم قراءة الفاتحة
-أحد الأشخاص: احنا جايين النهاردة يا استاذ صلاح عشان نطلب ايد بنتك المصونة ندى لابننا الغالي علاء
-صلاح: ده احنا نتشرف بيكو والله ..
-أحد الأشخاص: ده الشرف لينا احنا ، وكل اللي هتطلبوه هتلاقوه
-صلاح: مش هنختلف بأمر الله
-علاء متدخلاً في الحوار : وزي يا عمي ما قولتلك قبل كده ندى هحطها في عيني وأنا مستعد أعمل كل حاجة ليها ان شاء الله
-صلاح: ان شاء الله
-أحد الأشخاص: يعني نتوكل على الله ونقرى الفاتحة
-صلاح: طالما العروسة موافقة مافيش مانع
-سناء: ايه رأيك يا عروسة
-ندى بخجل: آ.....
-آمال: يبقى السكوت علامة الرضا يا جماعة
-أحد الأشخاص : سمعونا الفاتحة بالصلاة ع النبي

ثم قرأ الجميع الفاتحة ، وتعالت بعدها أصوات الزغاريط والأغاني المبهجة و..
-آمال: لووووولووولي ... ألف ألف مبروووووك يا عرسان
-زينب وهي تقبل ابنتها : مبروك يا عروسة

-سناء: مبروك يا علاء يا بني
-علاء: الله يبارك فيكي يا ماما

-نيرة وهي تحتضن اختها : مبروك يا ندى ، وربنا يعينك ع اللي جاي
-ندى: الله يبارك فيكي يا نيرة
-فاطيما: مبرووووووك يا نووودة
-ندى: تسلميلي يا طمطم

أسرعت زينب بالذهاب إلى المطبخ لاحضار المشروبات والحلوى للجميع ، فلحقت بها آمال و...
-آمال: مبروك يا زوزو ، بنتك ولا القمر
-زينب: الله يبارك فيكي يا آمال ، عقبال ما تفرحي بعيالك ان شاء الله
-آمال: ان شاء الله .. بقولك
-زينب: خير يا آمال
-آمال: اومال العريس اللي جاي لبتك نيرة هيخطبها امتى ؟
-زينب بدهشة: عريس ! مين اللي قالك الكلام ده ............................................ ؟؟؟؟

.................................................. .

[منال سالم]

الحلقة السادسة والعشرون


في منزل صلاح الدسوقي ،،،
في المطبخ ،،،،


أسرعت زينب بالذهاب إلى المطبخ لاحضار المشروبات والحلوى للجميع ، فلحقت بها آمال و...
-آمال: مبروك يا زوزو ، بنتك ولا القمر
-زينب: الله يبارك فيكي يا آمال ، عقبال ما تفرحي بعيالك ان شاء الله
-آمال: ان شاء الله .. بقولك
-زينب: خير يا آمال
-آمال: اومال العريس اللي جاي لبتك نيرة هيخطبها امتى ؟
-زينب بدهشة: عريس ! مين اللي قالك الكلام ده ؟؟
-آمال: بقى بتخبي عليا يا زوزو
-زينب: انا مش فاهمة حاجة من اللي انتي بتقوليها دي
-آمال: يا زوزو أنا بتكلم عن الشاب الحليوة اللي كان بيوصل بنتك نيرة من يومين
-زينب: هاه
-آمال: ساعت ما كانت راجعة مع طمطم من المدرسة
-زينب: ده امتى ده
-آمال: لالالا يا زينب ، انتي أكيد مش عاوزاني أعرف
-زينب: والله ولا فاهمة حاجة من اللي بتقوليها
-آمال: اسألي بنتك وهي تقولك
-زينب: آآآ... طب خدي معايا الصينية للضيوف لأحسن كده اتأخرنا عليهم
-آمال : ماشي ، وعقبال شربات الفرح ان شاء الله

أخذت زينب تفكر فيما قالته آمال وتحاول أن تستوعبه و..
-زينب في نفسها: مين الشاب ده اللي بتكلم عنه آمال ؟؟ ووصل البنات امتى ؟؟ انا اللي اعرفه ان صاحب الحاج هو اللي كان وصل البنات مرة باين ولا اتنين ، يبقى شاب منين ؟؟ الموضوع ده مش هييعدي بالساهل .. أخلص بس من الليلة دي وهاعرف كل حاجة من نيرة .. !

............................

في غرفة الصالون ،،،،

قام عمرو صديق علاء بالتقاط بعض الصور الفوتوغرافية للعروسين وللموجودين و..
-نيرة في نفسها: مش المفروض يروحوا استديو تصوير يتصوروا ، باين عليه عريس بخيل ، حتى الصورة مستخسرها ، أعوذو بالله
-عمرو: اضحكوا يا عرسان
-علاء: اوك ، صور كويس يا عمرو ، مش هوصيك
-عمرو: اطمن
-ندى هامسة: هو ده صاحبك
-علاء: أه ده عمرو صاحبي ، انا موصيه يصور قراية الفاتحة ، انتي عارفة الاستديوهات زحمة وبتاخد فلوس كتير ع صورتين تلاتة ، لكن عمرو هيصور كتير وهيبعتلي الصور ع فلاشة نختار احلاهم ونطبعها
-ندى وهي تمط شفتيها: طيب

ثم طلب علاء لاحقاً من صلاح أن يصطحب ندى لتناول العشاء في أحد المطاعم القريبة و...
-علاء: ممكن يا عمي أخد ندى وأعزمها ع العشا برا
-صلاح: ممم.. والله يا بني آآآ...
-علاء باصرار: مش هتأخر يا عمي ، هي ساعة بالكتير ، وبعدين أنا هاخدها ونروح في مطعم هنا قريب
-صلاح مستسلماً : ماشي
-علاء: يالا بينا يا ندى
-صلاح: خدي بالك من نفسك يا بنتي
-ندى: حاضر يا بابا

اصطحب علاء ندى إلى المطعم القريب ، بينما ظلت باقي العائلة تتناقش في تتيبات الخطوبة والزواج
-صلاح: ان شاء الله أنا هاجيب لبنتي أحسن حاجة ، مش هابخل عليها بأي شيء ، كل اللي هتحتاجه هجيبهولها ، وربنا يعيني على ده
-سناء: وأنا علاء ابني هيفرش الشقة بالعفش المناسب ، وان شاء الله يعجب العروسة
-آمال: اكيد هيعجبها طالما منكم
-سناء: اهم حاجة هما الاتنين يختاروا سوا اللي عاوزينه ، يتفقوا مع بعض وبعد كده يختاروا
-صلاح: اها ..
-آمال: كلامك مظبوط يا حاجة سناء ، مش هما هيعيشوا مع بعض ، يبقى يختاروا اللي عاوزينه بنفسهم
-سناء: كمان احنا عاوزينكو تحددوا يوم تيجوا تشوفوا فيه الشقة
-صلاح: بأمر الله ، هظبط مع الحاجة زينب ونبلغ علاء
-سناء: متفقين
..................................

في سيارة علاء ،،،،

ركبت ندى في المقعد الأمامي في السيارة وكانت في قمة الخجل والاحراج ، بدأ علاء في التحدث معها و...
-علاء: انا مش عاوزك تزعلي مني ، بس انتي بتاعتي لوحدي ، وأنا مش بحب غيري يبص عليكي
-ندى: أها
-علاء: تعرفي انك حلوة أوي
-ندى: ميرسي
-علاء: خدي خط الموبايل ده
-ندى : ليه ؟
-علاء: عشان أكلمك منه
-ندى: بس أنا عندي خط بتاعي
-علاء: بقولك ايه ، انتي تنسي الخط اللي معاكي ده ، وتكلميني من الخط اللي أنا جايبهولك
-ندى: اوك
-علاء: يالا بدلي الشريحة
-ندى: لما أروح البيت ان شاء الله عشان بس لو ماما أو بابا كلموني
-علاء: ماشي ، قوليلي هو مافيش حد من قرايبكم جه ليه
-ندى: آآآ.. ان شاء الله هيجوا
-علاء: ده انا جايب نص عيلتي معايا ، وانتي مافيش حد كده
-ندى: احم.. يعني أكيد هيحضروا الخطوبة ان شاء الله
-علاء: اما نشوف .. ها تحبي تاكلي ايه ؟
-ندى: مش احنا هنروح المطعم ؟
-علاء: لأ أنا بصراحة مش حابب اننا نروح المطعم والناس تقعد تبص عليكي
-ندى: اومال هناكل فين
-علاء: هنا في العربية
-ندى بصدمة: ايه ؟
-علاء: احنا هنطلب اللي عاوزينه وناكل هنا في العربية
-ندى على مضض: اوك
-علاء: بصي أنا طول عمري باكل من برا ، عشان ظروف ماما وكده فهي مش بتطبخ كتير ، فأنا عاوزك بقى تطبخي ، الأكل من برا هيكون كل فين وفين ، ماشي
-ندى: ان شاء الله
-علاء: أنا هاطلب شاورمة ، تحبي تاكلي ايه ؟
-ندى: أي حاجة
-علاء: مممم.. خلاص أنا هاجيبلك حاجة على ذوقي ونتقاسمها سوا
-ندى: اوك ، بس يا ريت بسرعة عشان انا مش عاوزة اتأخر
-علاء: حاضر

أحضر علاء الطعام من أحد المطاعم القريبة ، ثم ركن السيارة بجواره ، وبدأ في تناول الطعام و...
-علاء: طعمه حلو الأكل ده
-ندى: اها
-علاء وهو يناولها السندوتش الخاص به : خدي دوقي
-ندى: آآآ...
-علاء: ايه انتي هتقرفي مني
-ندى: لأ .. بس أنا مش بحب أكل مكان حد
-علاء بحدة : وهو أنا أي حد ، ده أنا خطيبك ! يا ريت تبقي عارفة ده كويس
-ندى: أنا مقصدش بس آآآ...
-علاء : ولا تقصدي حتى ، يالا عشان أوصلك بيتك ، سديتي نفسي ع الأكل
-ندى بصدمة: هـــه !

قاد علاء السيارة عاءداً إلى منزل ندى مرة أخرى وهي لا تكاد تصدق أذنيها ، لم ترد أن تقص على والدتها ما حدث حتى لا تفسد اجواء الفرحة في البيت ، ولكنها كانت لا تعلم أن بصمتها سيحدث الكثير...
..........................
في غرفة البنات ،،،،
اخذت زينب نيرة من يدها لتتحدث معها على انفراد خاصة بعد أن غفت فاطيما ، وانشغال ندى بتبديل ملابسها في الحمام و...
-زينب: تعالي هنا يا بت عاوزاكي
-نيرة: في ايه يا ماما
-زينب: ايه ياختي موضوع الشاب الجميل اللي وصلك من يومين ده
-نيرة بعدم فهم : شاب مين ؟؟
-زينب: انتي هتعمليهم عليا ، بقولك ايه آمال شافت واحد بيوصلك انتي واختك من يومين ، وانا مردتش أتكلم قصاد أبوكي عشان مكبرش الموضوع ويقلب عليكي
-نيرة: يا ماما ده واحد صاحب بابا ، وحتى بابا عارف
-زينب: نعم ؟؟ أبوكي عارف !
-نيرة: ايوه ، بالأمارة هو اللي قاله يوصلنا لما مجدي السواق مجاش، وتقدري تسأليه بنفسك
-زينب: هـــاه
-نيرة: وبعدين انتي عارفاني يا ماما انا مش بتاعة لف ولا دوران
-زينب: ماهو عشان عارفاكي لازم أدور وراكي
-نيرة: اووف ، وبعدين الولية آمال دي ايييه مابتصدق تشوف حاجة وتعمل عليها أفلام وتألف قصص محصلتش
-زينب: والله اللي ميعرفش يقول عدس
-نيرة: طيب يا ماما في حاجة تانية
-زينب: لأ ، بس برضوه أنا هسأل أبوكي واعرف منه
-نيرة: براحتك يا ماما ، خليني بقى أروح أغير هدومي
-زينب: روحي ..!
........

تحققت زينب من كلام نيرة من خلال حديثها مع زوجها صلاح وتأكددت أنه طلب من مروان أن يوصل الفتاتين إلى المنزل لانشغاله في العمل فاطمئن بالها و...
-زينب: الحمدلله ، يعني البت مش بتكدب
-صلاح: لأ ، وهتكدب ليه ، مروان عرض يوصل البنات وألح ع ده وأنا وافقت
-زينب: ممم... اسمه مروان
-صلاح: أيوه
-زينب: وانت تعرفه منين يا حاج
-صلاح: ده ابن صاحب الشركة اللي أنا ماسك مقاولتها
-زينب: ابن صاحب الشركة ، ماشاء الله
-صلاح: ولد طيب وابن حلال ، المهم يا زينب ان اليوم عدى على خير
-زينب: الحمدلله
-
...........................

في اليوم التالي ،،،،

ذهب صلاح إلى عمله ، بينما ظلت الفتيات في المنزل يعانين من ارهاق حفل الأمس ولم يذهبن إلى أماكن دراستهن و...
-زينب: خلاص ده اخر يوم للدلع ، بعد كده الكل هيروح مدرسته تاني
-نيرة: هو احنا لحقنا
-زينب: كفاية تضييع وقت أكتر من كده
-نيرة: طيب
-فاطيما: ماشي
-ندى: انا من بكرة هانتظم في الكلية لأحسن حاسة انه فاتني كتير
-زينب : ماشي يا نودة
-نيرة: أنا هادخل اشوف الدنيا عاملة ايه ع الفيس
-زينب: يابت سيبك من الزفت اللي بيضيع الوقت ده وركزي في مذاكرتك
-نيرة: يا ماما هي نص ساعة بس
-ندى: النص بتقلب بساعة والساعة باتنين وهلم جر
-نيرة: اهدي يا نووودة ، ايه يا عروسة ، هي الخطوبة هتغيرك علينا ولا ايه
-ندى: لا هتغيرني ولا حاجة ، ده انا زي ما أنا

وفجـــأة رن هاتف ندى برقم علاء ، فتعجبت كيف يظهر الرقم على شاشة هاتفها المحمول وهي لم تسجله بعد ، ولكنها تذكرت أنها بدلت شريحة الهاتف بالأمس حينما عادت من الخارج ، فتوقعت انه سجل رقمه على الشريحة .. لم تفكر طويلاً وإنما ردت على الاتصال و...
-ندى هاتفياً: الووو
-علاء هاتفيا: الوو ، ايه يا بنتي ، كل ده عشان تردي
- ندى: معلش مكونتش عارفة انك بتتصل
-علاء: انتي تخلي التليفون دايماً معاكي عشان اما أكلمك في أي وقت تردي
-ندى: حاضر
-علاء: ها نمتي كويس
-ندى: الحمدلله
-علاء: نمتي أد ايه ؟
-ندى: الطبيعي اللي بنامه
-علاء: لأ أنا عاوزك تنامي كويس عشان وشك يبقى فايق ومنور
-ندى: طيب .
-علاء: ومافيش داعي انك تساعدي أمك في شغل البيت
-ندى: ليه
-علاء: من غير ليه ، انا عاوزك تبقي مريحة كده ومافيش أي حاجة تعمليها ، تبقي فاضية ليا وبس
-ندى: ربنا يسهل
-علاء: وابقي رني عليا كل شوية ، أو تبعتيلي رسالة تطمنيني فيها عليكي
-ندى: ليه كل ده
-علاء: عشان أعرف اخبارك ايه ، ماهو أنا مش موجود معاكي عشان أشوف بنفسي بتعملي ايه ، فالرسايل والمكالمات هتطمني عليكي
-ندى: اوك
-علاء: على فكرة أنا محضرلك مفاجأة حلوة
-ندى: مفاجأة ايه
-علاء: هاقولك لما أتأكد بس الأول منها
-ندى: ماشي
-علاء: روحي ريحي لحد ما أكلمك تاني
-ندى: اوك ، باي

أنهت ندى المكالمة وهي تتعجب من طريقة علاء معها و..
-ندى في نفسها: هو ايه ده اللي نامي وريحي وماتعمليش حاجة ، اوووف ، باين عليا هحتاج مجهود كبير عشان أغيره !

................................

في كلية تجارة انجليش ،،،،

في قاعة محاضرات الفرقة الثانية ،،،
كانت وفاء شاردة مع نفسها لبعض الوقت ، حيث كانت تشعر بالذنب لأنها ربما تكون قد تسرعت وظلمت ندى بدون أن تتسمع لها ، وما يضايقها أكثر هو أن بعد ما حدث اختفت ندى ولم تعد تأتي إلى الكلية و...
-وفاء في نفسها : باين عليا اتسرعت لما ظلمت ندى ، ده من يوم الشكلة اللي حصلت في الكافيه وهي مش بتيجي خالص ، يا ترى هي عاملة ايه ؟؟ أنما لازم اكلمها واسأل عليها

طلبت وفاء ندى ولكن وجدت ان هاتفها غير متاح فاستغربت لهذا و..
-وفاء: ده حتى موبايلها غير متاح ، ربنا يستر ومايكونش حصل عندها حاجة
-فتاة ما: ايه يا ويفووو ، انتي بتكلمي نفسك ؟
-وفاء: لأ عادي
-فتاة ما: طب يالا عشان نلحق السكشن
-وفاء: اوك ، انا جاية

-وفاء في نفسها: يا رب سامحني لو كنت ظلمتها ولا ظنيت فيها السوء ! أنا هحاول لما ترجعع بالسلامة أطمن عليها

...................................

في مكتب صلاح الدسوقي للمقاولات ،،،

حضر السائق مجدي إلى المكتب لكي يقابل صلاح ، ولكنه لم يجد إلا علي ، و أحد الموظفين فقط و...
-مجدي: سلامو عليكو
-ناجي: وعليكم السلام ، ايوه يا حضرت
-مجدي: هو الاستاذ صلاح موجود
-ناجي: لأ

-علي : الله ! مجدي ..! تعالى
-مجدي: ازيك يا علي باشا
-علي: بخير الحمدلله ، ايه يا مجدي جاي المكتب ليه ؟
-مجدي: كنت عاوز أقابل الاستاذ صلاح
-علي: ليه في حاجة
-مجدي: اصل أنا كنت آآآ... يعني عاوز اعتذر عن شغلانة توصيل بناته للمدرسة
-علي: طب ليه ؟؟
-مجدي: مشغول اليومين دول وهيبقى صعب عليا ألتزم معاهم
-علي: ممم.. والله مش عارف أقولك ايه ، بس صلاح مش موجود في المكتب الوقتي
-مجدي: خلاص هابقى أعدي عليه وقت تاني
-علي: طب ما تروحله الموقع اللي هو شغال فيه
-مجدي: وده فين ده
-علي: استنى أما اكتبلك العنوان في ورقة
-مجدي: ماشي يا علي باشا
-علي وهو يدون العنوان على ورقة صغيرة: انت روح اتفاهم معاه بنفسك ، وعشان يديك بقية حقك
-مجدي: تمام
-علي: هو بيفضل هناك لمتأخر يعني هتلاقيه ان شاء الله
-مجدي: متشكر اوي يا علي باشا
-علي: وربنا يوفقك في اللي بتعمله
-مجدي: الله يخليك يا رب

توجه مجدي إلى مقر الفرع الجديد لشركة النقيب لكي يقابل صلاح هناك ...
...........

وفي تلك الأثناء كان مروان متوجهاً لمقابلة الأستاذ صلاح بعد أن اتصل به هاتفياً و طلب أن يقابله و...
-صلاح هاتفياً: الوو ، ايوه يا استاذ مروان
-مروان هاتفيا: ازيك يا عم صلاح ، ايه الاخبار ؟
-صلاح: في نعمة الحمدلله
-مروان: يا رب دايما
-صلاح: معلش يا بني أنا كنت عاوزك تجيلي شوية ، ده لو مش هعطلك ولا حاجة
-مروان: لأ عادي ، أنا مش ورايا حاجة الوقتي
-صلاح: ربنا يكرمك يا رب ، وأهو بالمرة تشوف الشغل ماشي ازاي في الفرع الجديد
-مروان: أوك .. مسافة السكة وهاكون عندك

..........................

في مقر فرع شركة النقيب الجديد ،،،،

وصل مجدي السائق إلى الموقع ، وبحث بعينه عن صلاح ، ثم سأل أحد العمال عنه ، فأرشده إليه و...
-مجدي: والنبي يا خويا الله يكرمك ماشوفت الاستاذ صلاح
-أحد العمال : عم صلاح الدسوقي
-مجدي: اه هو
-أحد العمال: موجود هناك
-مجدي: هناك فين
-أحد العمال: تعالى أما أوريك هو واقف فين
-مجدي: ماشي
-أحد العمال وهو يشير بيده : أهوو ، واقف هناك
-مجدي: ايوه .. ايوه ، أنا شوفته خلاص ، تشكر يا ذوء
-أحد العمال: ماشي يا ريس

توجه مجدي إلى حيث يقف صلاح ثم بدأ بالحديث معه و..
-مجدي: صلاح باشا
-صلاح: مجدي ، حمدلله ع السلامة
-مجدي: الله يسلمك يا رب
-صلاح: كويس والله اني شوفتك ، بس انت عرفت مكاني ازاي ؟
-مجدي: اللي يسأل ميتوهش يا باشا
-صلاح: صح عندك حق ، خير يا مجدي
-مجدي: معلش يا باشا أنا كنت بس عاوز أعتذر عن شغلانة الأبونية دي
-صلاح: ليه ؟؟؟ هو في حاجة حصلت
-مجدي: آآآ.. لأ يا باشا ، بس أنا بس اللي عندي كام مصلحة والدنيا متلخبطة عندي ومش هاعرف أوصل البنات ولا أجيبهم في ميعادهم
-صلاح: مممم...
-مجدي: والله يا باشا كان على عيني ، ده الصراحة مافيش زيك في معاملته معايا
-صلاح: أنا مش عارف أقولك ايه
-مجدي: ربنا يرزقك بواحد سواق أحسن مني
-صلاح: أصله صعب في الوقت ده اني ألاقي سواق زيك
-مجدي: غصب عني يا باشا والله
-صلاح: خلاص يا مجدي هاقولك ايه ، ربنا يسهلك طريقك
-مجدي: الله يخليك يا باشا
-صلاح: أنا هديك اجرتك عن الأيام اللي فاتت وزيادة كمان
-مجدي: خلي يا باشا ، خيرك سابق
-صلاح: لأ ماينفعش ، الاتفاق اتفاق
-مجدي: تسلم يا صلاح باشا

وفي نفس الوقت تقريباً وصل مروان إلى الموقع ، ثم لمح صلاح وهو يتحدث مع أحد الأشخاص ، فصف سيارته على جنب ، وترجل منها وتوجه إليهما و...
-مروان: سلامو عليكم يا عم صلاح
-صلاح وهو يصافحه : وعليكم السلام يا بني
-مروان: أنا جيت لحضرتك زي ما طلبتني
-صلاح: شكراً يا بني ، لحظة وهاكون معاك
-مجدي: طب يا باشا ، هستأذن أنا ، واشوفك على خير
-صلاح: ان شاء الله ، وربنا ييسرلك طريقك
-مجدي: يا رب يا باشا ، سلامو عليكم
-مروان بعدم اكتراث : وعليكم السلام

كان مجدي على وشك الانصراف حينما ناداه صلاح و..
-صلاح: وعلكيم السلام ، لو عوزت أي حاجة ابقى تعلالي المكتب يا ..مجــــــــدي !
-مروان وقد انتبه للاسم بصدمة : ايييييه ! هو ده مجدي السواق .................................................. ..............؟؟؟؟؟

...........................................

[منال سالم]

الحلقة السابعة والعشرون:

في موقع مقر الفرع الجديد لشركة النقيب ،،،،

كان مجدي على وشك الانصراف حينما ناداه صلاح و..

-صلاح: وعلكيم السلام ، لو عوزت أي حاجة ابقى تعلالي المكتب يا ..مجــــــــدي !

-مروان وقد انتبه للاسم بصدمة : ايييييه ! هو ده مجدي السواق !

-صلاح: اه هو

-مروان بحدة وعيون نارية : استنى عندك

-مجدي وقد التفت خلفه: هــاه

-مروان: انت بقى مجدي اللي لا مؤاخذة بتلاغي العيال

-مجدي وقد بدى التوتر عليه: آآآآ... هاه ، تـ... تقصد ايه يا بيه ؟

-مروان: لأ انت فاهمني كويس

-مجدي: أنا مش فاهم حاجة يا بيه ، و.. و..آآآ... عن اذنك ورايا مصالح

أمسك مروان بمجدي من ياقته وإنهال عليه بالضرب المبرح ، لم يعرف صلاح السبب وحاول أن يحول بينهما و...

-صلاح: في ايه يا بني ، بتتخانق معاه ليه بس

-مجدي متآلماً: آآآآه ، ايه يا جدع انت بتضربني ليه

-مروان: أنا مش بس هاضربك ، ده أنا هدبحك .. خد .. طااااااااخ .. بوووم

-صلاح: يا بني اهدى ، هو عمل ايه لكل ده

-مروان: عمل بلوى سودة على دماغه ودماغ اللي جابوه

-مجدي: حوشه عني يا صلاح باشا

-صلاح وهو يحاول التفريق بينهما : طب فهمني هو عمل ايه ؟

-مروان: الكلب النجس ده كان بيتعرض لبنتك طمطم

-صلاح بصدمة: ايه ؟ بتقول ايه ؟

-مجدي: البت كدابة ، أنا مجتش جمبها

-مروان: اه يا و*** ، يا حيوان ، مين دي اللي كدابة ، ولما خدتها ف حتة المقطوعة كنت عاوز منها ايه يا *****

-صلاح وقد أمسك بمجدي لكي يفتك به هو الأخر: اه يا نجس بقى أنا أئتمنك على بناتي تقوم يا وسـ* تعتدي عليهم

-مجدي: آآآآآآآه ... كفاية

-صلاح : ده أنا مش هارحمك ، وعمال أشكر فيك ، وانت يا كلب بتنهش في عرض بناتي

-مروان: الكلب ده لازم يتسلم للقسم

-مجدي: لا الله يكرمك ، والله معنتش هعمل كده تاني

-صلاح: وبتعترف كمان

-مروان بغضب عارم : وانت كنت ناوي تعمل كده تاني

-مجدي: الشيطان غواني ، وأنا .. أنا ضعفت

-مروان: ده انت هتتنفخ

-صلاح: انا عاوز أعمل محضر في النجس ده

-مروان: وانا مستعد أشهد معاك

-مجدي: الله يخليك يا صلاح باشا كده انا هاروح في داهية

-مروان: ربنا ياخدك وياخد أمثالك

-صلاح بصوت عالي : اطلبوا الشرطة بسرعة للكلب ده

-أحد العمال : حاضر يا عم صلاح

-صلاح: ليه يا مروان مقولتيش ع الكلب ده من بدري

-مروان: والله جتلك أكتر من مرة بس الظروف مكنتش سامحة إني أقابلك أو احكيلك

-صلاح بغضب : آآآآخ ، لو اطول أدبحه كنت عملت

-مروان: ده كلب ولا يسوى يا عم صلاح ، متوديش نفسك في داهية عشانه ، الوقتي الشرطة هتيجي وهيتعمل معاه الصح ، وأنا ليالي معارف في الشرطة هوصيهم عليه ، متقلقش ، حق طمطم هيتجاب من الوا** ده

بالفعل حضرت الشرطة إلى الموقع وتم اصطحاب مجدي السائق للقسم ، وذهب مع رجال الشرطة كلاً من صلاح ومروان لعمل المحضر ، وطلب الضابط من صلاح أن يحضر ابنته الصغري لكي تقص ما حدث معها حتى يتم اتخاذ الاجراءات القانونية اللازمة ضد هذا السائق ...

.................

كان أمام صلاح الدسوقي مهمة صعبة ، فهو يريد أن يأتي بابنته الصغرى فاطيما للقسم بدون أن يحكي شيئاً لزوجته وإلا سترفض احضارها ، فكان عليه أن يلجأ للحيلة ، وهنا تدخل مروان وعرض عليه المساعدة و...

-صلاح: طب أقول لزينب ايه ؟ والنبي لا تجيبي البت عشان تحكي عن الكلب اللي جه جمبها ، دي يمكن تروح فيها ، أتصرف ازاي

-مروان وقد خطرت على باله فكرة ما : أنا عندي اقتراح يا عم صلاح لو مافيهاش مضايقة

-صلاح: قول يا بني ، ده انت كتر خيرك انك عرفتني باللي حصل ، وإلا كان زماني نايم على وداني ومش عارف أي حاجة ، والكلب النجس ده سارح على بنتي وعلى بنات الناس

-مروان: بص مش بنت حضرتك الكبيرة نيرة باين في ثانوي

-صلاح: أيوه

-مروان: طيب ايه رأيك لو تقول انك لاقيت ميس جديدة ليها تديها الدرس ، والناس بتشكر فيها وتاخدها هي وفاطيما ، فاهم .. آآآ.. يعني كأنكم رايحين تشوفوا الدرس ده نظامه ايه

-صلاح: اها ، وبعدين

-مروان: بس ، وتاخد فاطيما وتفهمها انها تحكي اللي حصل معاها في القسم لواحد صاحبك ، ونيرة متقولهاش خالص انك اخد فاطيما عشان تعمل محضر

-صلاح: طب ماهي نيرة أكيد هتسأل أنا أخد فاطيما ليه للقسم

-مروان: بسيطة ، تقول انك بتسلم ع صاحبك وعاوز منه عنوان الميس دي عشان تروحولها مكان الدرس بتاعها

-صلاح: مممم...

-مروان: ده أئمن حل

-صلاح: والله حل مش بطال

-مروان: وأنا مستعد أجي معاك

-صلاح: ده أنا تعبك معايا والله

-مروان: لا يا عم صلاح تعب ايه بس ، متقولش كده ، ده أنا أزعل والله

-صلاح: طب يالا بينا يا بني

وبالفعل توجه صلاح مع مروان إلى منزله لكي يأخذ كلاً من نيرة وفاطيما معهما .....

...............................

في منزل صلاح الدسوقي ،،

في غرفة البنات ،،،،

كانت ندى تجلس على الفراش وهي تتخيل حياتها مع زوجها المستقبلي علاء ، حاولت أن ترسم له صورة رومانسية تتماشى مع أحلامها البريئة ، تخيلت يوم عرسها وهي تزف إليه بالفستان الأبيض ويكسو وجهها الخجل والحياء وهو يقترب منها ليطبع قبلة على وجنتيها ، ولكن قطع تفكيرها صوت أختها نيرة و...

-نيرة بصوت عالي: نـــــــــدى !

-ندى بخضة: في ايه ؟؟؟

-نيرة: بنادي عليكي بقالي ساعة وانتي مش هنا

-ندى: عاوزة ايه يا نيرة

-نيرة: بصي في حاجة كده أنا كنت عاوزة أقولك عليها بس متتعصبيش

-ندى: حاجة ايه ؟

-نيرة: احم... بصي في حد كان باعتلي اضافة ع الفيس بوك و..آآآ

-ندى: حد مين ؟؟ وده عاوز ايه

-نيرة: انا معرفش هو مين، بس المشكلة انه عمال يبعتلي في رسايل ع الفيس وأخرها باعتلي رسالة ومعاها صورتي

-ندى بفزع وهي تمسك ذراع اختها: اييييه ؟؟؟ صورتك ؟؟؟ ازاي ده ؟؟ انتي عملتي ايه بالظبط احكيلي

-نيرة: والله ما عملت حاجة ،أنا معرفش هو مين ، وبعت أسأله ورد عليا بـ.. آآآآ

-ندى: رد بايه ؟

-نيرة : كاتبلي ( هتعرفي أنا مين لما أقابلك )

-ندى: ايه الجنان ده ؟؟ وازاي تسمحي بكل ده يحصل ؟؟ وصورتك جابها منين

-نيرة: معرفش جابها منين ، وأنا خايفة أرد عليه

-ندى: لأ انتي مترديش خالص ، لو يكون احسن تقفلي البتاع ده ، الغيه من حياتك

-نيرة: بس آآآ...

-ندى: بس ايه تاني

-نيرة: شوفي الصورة اللي هو صورهالي ، كانت بلبس المدرسة

-ندى: هـــاه ... ده معناه انه ..انه

-نيرة مكملة : انه عارف أنا فين

-ندى: طب .. طب يمكن يكون مقلب من حد من صحباتك في المدرسة

-نيرة وهي تنهض من مكانها بقلق : مش عارفة ، بس أنا حاسة ان في حاجة غلط

-ندى وهي تجلس على حافة الفراش : انا قولت من الأول وجود البتاع ده هنا هيجيب مصايب ، اقفليه ، مقدمكيش إلا كده

-نيرة: اوووف

-ندى: ع الأقل الفترة دي لحد الشخص اللي بيعمل كده يعرف ان انتي مش في بالك

-نيرة: ممم...

-ندى : انتي لسه هتفكري ، يا بنتي أنا باسمع ان اللي بيمشي ورا الناس دي بيروح في داهية ، وأظن اننا مش هننتظر انك تروحي في مصيبة عشان عندك

-نيرة: طب أنا عندي آآآ....

ثم دلفت زينب إلى الغرفة بصورة مفاجئة مقاطعة لحديث الفتاتين و...

-زينب: البسي يا نيرة بسرعة

-نيرة: ليه ؟

-زينب: ابوكي جاي ياخدك تشوفي درس جديد

-نيرة بعدم تصديق: نعم ؟؟؟ درس ايه الوقتي ؟؟

-زينب: هو اتصل بيا ، وقالي انك تجهزي نفسك عشان هياخدك تشوفي ميس جديدة

-نيرة: طب أنا مش عاوزة ، ما كفاية المجموعة اللي باخدها

-زينب وهي تفتح الدولاب لتنتقي ملابس لفاطيما : والله أبوكي مصمم

-نيرة بدهشة: وانتي بتطلعي هدوم البت طمطم ليه

-زينب: أصلها هتلبس وتروح معاكي

-نيرة بصدمة أكبر : نعم ؟؟؟

-ندى: هو في ايه بالظبط يا ماما

-زينب: والله ما أعرف أبوكي اللي عاوز كده ، فخلصي لبسك أوام

رن هاتف ندى ، فنظرت إلى شاشة هاتفها المحمول فوجدت المتصل هو علاء ، تحرجت ندى من الرد عليه امام والدتها واختها ، ففضلت أن تضعه على الوضع الصامت إلى أن تخلو الغرفة وتتحدث معه على انفراد و..

-ندى في نفسها: أما ماما تخلص ونيرة تلبس أبقى اكلمك ..

-نيرة : كل يوم درس ، كل يوم مدرسة ، مش هنخلص من الموال ده أبداً

-زينب: افلحي في دروسك وانتي تخلصي

ثم انصرفت زينب خارج الغرفة تاركة نيرة في حالة من الضيق والتذمر و...

-نيرة بضيق: هو انا كنت ناقصة درس تاني

-ندى: أهوو احسن من انك تضيعي وقتك ع النت

-نيرة: اوووف ، حاجة تقرف

...........

وصل مروان بسيارته أسفل xxxx الأستاذ صلاح الدسوقي الذي استأذن لكي يصعد إلى شقته ويأتي بإبنتيه و...

-صلاح: ثواني يا بني هاطلع بس اجيب البنتين من فوق

-مروان: براحتك يا عم صلاح

-صلاح: الله يكرمك يا بني

-مروان: ماتنساش يا عم صلاح ان محدش يعرف باللي حصل

-صلاح: اطمن يا بني

.....

انتظر مروان في السيارة وتعلو شفتيه ابتسامة لا يعرف من أين تأتي ولكنها للأكيد بسبب توقه لرؤية نيرة ، وما هي إلا لحظات مرت كالدهر عليه حتى سمع صوت فاطيما يأتي من بعيد هاتفاً باسمه فالتفت إليها وهو على يقين من أن المفاجأة بل الصدمة ستلجم نيرة حينما تراه أمامه و..

- فاطيما من بعيد: الله ! ده مــروان

-صلاح: اه هو

-نيرة وقد فغُرَّ فاهها من الصدمة: هـــاه

-مروان ملوحاً بيده : هاي

-نيرة: مش ممكن

كانت نيرة ترتدي بنطالاً من الجينز ذو اللون الأزرق الداكن و يعلوه قميصاً باللون الأصفر الليموني

-مروان: طمطم ، تعالي

-صلاح: يالا يا نيرة ، مالك متسمرة في مكانك ليه

-نيرة: هو ايه اللي جاب ده هنا

-صلاح: مش وقته ، يالا بس عشان نلحق اللي ورانا

-نيرة على مضض: طيب

ركبت نيرة في المقعد الخلفي وعلى وجهها علامات التوتر والضيق ، بينما جلست بجوارها فاطيما التي وقفت لتتحدث مع مروان وهو يقود السيارة في مهارة و...

-فاطيما: أنا فرحانة اني بشوفك كل يوم يا مروان

-مروان: ,انا كمان

-فاطيما: هو احنا هنتفسح يا بابا ؟

-صلاح: اه يا حبيبتي ، بس الأول هاعدي ع واحد صاحبي في القسم أسلم عليه وبعد كده نطلع نتفسح

-نيرة: والدرس اللي انت قولت عليه يا بابا وخليتني ألبس بسرعة عشانه

-صلاح: آآآ...

-مروان متدخلاً في الحوار: هنروحه يا آنسة نيرة بس أما يخلص الأستاذ صلاح مشواره الأول

-فاطيما: يا رب كل يوم نخرج كده ونتفسح

-صلاح وهو يقبل ابنته: حبيبتي يا بنتي ، مش عاوزك تزعلي اني كنت مقصر معاكي

-فاطيما: مش فاهمة

-صلاح: ولا يهمك يا حبيبتي ، المهم انتي واخواتك عندي أغلى من أي حاجة في الدنيا كلها

....................................

في منزل صلاح الدسوقي ،،،،

رن هاتف ندى برقم علاء الذي نسيت تماماً أن تطلبه حينما اتصل بها قبل قليل ، فأجابت الاتصال على الفور لتتفاجيء بموجة من الغضب العارم الذي صدمها و...

-علاء بنرفزة هاتفياً: أخيراااا حنيتي عليا ورديتي ، ايييه يا هانم كل ده عشان تردي على تليفوناتي ؟؟

-ندى: انت أول ما طلبتني أنا رديت على طول والله

-علاء: لأ أنا طلبتك قبل كده ومردتيش

-ندى: كنت مشغولة ، ومخدتش بالي انك بتتصل

-علاء: مش أنا قايلك تنامي وتريحي وماتعمليش حاجة

-ندى: الله ! معملش حاجة ازاي يعني ؟؟ لو ماما طلبت مني حاجة أقولها لأ ... ده ما ينفعش ولا يصح أصلاً

-علاء بضيق: طيب .. ماشي ، أنا هاعدي ده بس عشان خاطر امك ، المهم قوليلي أخبارك ايه

-ندى: الحمدلله

-علاء: عملتي ايه في الكام ساعة اللي فاتوا دول

-ندى: شغل البيت

-علاء: ممم... طيب قوليلي انتي لابسة ايه الوقتي ؟

-ندى : نعم ؟؟؟

-علاء : ايه مكسوفة تقوليلي

-ندى: لو سمحت يا علاء مافيش داعي نتكلم في الكلام ده قبل أوانه

-علاء: مش احنا مخطوبين ، وقريب هنتجوز

-ندى: لما نبقى نتجوز ، لكن الوقتي ماينفعش الكلام ده

-علاء: اوووف ، قفلتيني !

-ندى: هاه

-علاء: هابقى اكلمك تاني ، باي

-ندى: باي

أنهت ندى المكالمة وهي تشعر بأنها قد تسرعت في أمر موافقتها على الارتباط بهذا الشخص و...

-ندى: لأول مرة احس اني اتسرعت في قرار ، بجد الانسان ده مش مفهوم بصراحة ، تصرفاته غريبة ..!

.........................

عند قسم الشرطة ،،،

وصل مروان بالسيارة إلى قسم الشرطة ، تعجبت نيرة من هذا المكان الذي وقفت السيارة بجواره ، طلب صلاح من فاطيما أن تنزل معه لكي تسلم على صديقه ، بينما طلب من نيرة أن تنتظره في السيارة و...

-نيرة في نفسها متسائلة : قسم شرطة الـ ((....)) ، ايه اللي جابنا هنا ؟؟ درس ايه ده اللي في القسم

-صلاح: يالا يا طمطم

-فاطيما: هنروح فين يا بابا ؟

-صلاح: هندخل نسلم ع واحد صاحبي جوا

-فاطيما: وبعدها نتفسح

-صلاح: اها

-فاطيما: ماشي

-صلاح: يالا يا قلب بابا

أمسك صلاح بيد ابنته الصغرى فاطيما ودلف بها إلى داخل القسم ، كان يحاول أن يخفي الحزن البادي على وجهه ، هو سيستمع لأول مرة إلى ما مرت به ابنته دون وعي منها على يد ذلك الذئب المتجسد في صورة انسان .. بينما ظلت نيرة منتظرة في السيارة وهي متقبلة لذلك لوضع

ظل مروان يراقب نيرة من المرآة الأمامية وهو يبتسم عفوياً ، ثم حاول أن يتطرق معها إلى ....

-مروان: ازيك

-نيرة: أحسن منك

-مروان مبتسماً : طب الحمدلله

-نيرة: احنا ايه اللي جابنا هنا

-مروان: العربية !

-نيرة: لا والله

-مروان وهو يلتفت إليها : اه والله

-نيرة: طب بص قدامك

-مروان: لأ

-نيرة: يعني انت مصمم اني أشتبك معاك

-مروان: وليه نشتبك ما تخلينا كده سمنة على عسل

-نيرة: حد قالك انك بارد

-مروان: طب ليه الغلط بس

-نيرة: انا مش عارفة بابا ايه اللي خلاه يجيبك توصلنا بدل مجدي السواق

-مروان بصبية: متجبيش سيرة الزفت ده تاني

-نيرة: في ايه؟؟ انت مالك بيه ؟؟ ده السواق بتاعنا

-مروان: الكلب الحيوان

-نيرة: متغلطش فيه

-مروان: وانتي بتدافعي عنه أوي كده ليه

-نيرة: وانت ايه اللي مضايقك منه

-مروان: مترديش على سؤالي بسؤال

-نيرة: يوووه ، أقولك على حاجة أنا ماشية من هنا

-مروان: لأ مش هتنزلي من العربية

-نيرة وهي تحدق به : افندم ؟

-مروان: انتي أمانة معايا لحد ما باباكي يطلع من جوا

-نيرة: أهــا .. قولتلي .. الكلام ده تمشيه ع حد تاني مش عليا ، فاهم !

كانت نيرة على وشك الخروج من السيارة ولكن منعها مروان بضغطه على القفل الالكتروني الخاص بسيارته فأغلق الأبواب كلها

-نيرة وهي تحاول فتح الباب: انت عملت ايه ؟؟ افتح الباب !

-مروان: لأ مش فاتح ، وهتفضلي هنا

-نيرة: انت ايه ؟؟ بتضايقني كده ليه

-مروان: اوووف

-نيرة: استغفر الله العظيم ، يا رب هون

-مروان محاولاً أن يبدو هادئاً: قوليلي ، هو الزفت اللي اسمه مجدي ده .. آآآ... آآآ... اتعرضلك في حاجة

-نيرة بعدم فهم: اتعرضلي ؟

-مروان: اها

-نيرة: وانت بتسأل ليه

-مروان: كده وخلاص ، ممكن تردي على سؤالي بعد اذنك

-نيرة: لأ

-مروان محاولاً أن يسألها بطريقة اخرى : يعني آآآ... محاولش انه ..آآ.. يقرب منك أو يلمسك

-نيرة: قطع ايده هو ولا غيره قبل ما يعمل كده ولا حتى يفكر في ده ، هو أنا كنت هاسكت أصلاً ، لأ انت متعرفنيش بقى

-مروان وقد اطمئن: طب كويس

-نيرة : وبعدين قولي انت عمال تسأل عنه كده ليه؟؟

-مروان: عادي يعني

-نيرة: والله أنا حاسة ان في حاجة ورا اسئلتك دي

-مروان: هـاه .. متخديش في بالك

.........................

في داخل القسم ،،،،

دلف صلاح إلى غرفة الضابط المسئول عن تحرير المحضر ، وبدأ في مخاطبة فاطيما باسلوب بسيط وسلس كي يعرف منها ما يريد دون أن تشعر بالريبة أو البغض مما حدث و..

-صلاح : سلمي على عمو الظابط يا طمطم

-فاطيما وقد ذهبت إليه : حاضر

-الضابط وهو يصافحها بيده : انتي فاطيما ؟

-فاطيما: ايوه يا عمو أنا طمطم

-الضابط: ممم.. طمطم ، اسم حلو ، انتي في سنة كام يا أمورة ؟

-فاطيما: في رابعة ابتدائي

-الضابط: ماشاء الله ، ده انتي كبيرة

-فاطيما: ايوه

-الضابط: طمطم أنا كنت عاوز أحكي معاكي في حاجة

-فاطيما: ايه يا عمو

-الضابط: عارفة مجدي السواق

-فاطيما وقد تغيرت ملامح وجهها واختفت البسمة من على وجهها: هــاه

-الضابط: أنا مسكته عشان بيعمل حاجات غلط ووحشة

-فاطيما وهي تهز رأسها : أها

-الضابط مكملاً : وهيتعاقب عن كل حاجة غلط عملها ، قوليلي بقى يا طمطم هو مجدي ده عملك حاجة

-فاطيما وهي تنظر لأبيها بخوف: آآآ...

-الضابط: متخافيش يا حبيبتي ، قوليلي ومحدش هيعملك حاجة

-فاطيما بخوف:آآآ... أنا .. أنا

-صلاح: طمطم حبيبتي قوليلي مجدي ده عملك حاجة ، قولي يا بنتي و متخافيش

-فاطيما: بس .. آآ..

- صلاح: بس ايه ؟

-فاطيما: أصل ماما ممكن آآآ...

-صلاح: ملكيش دعوة بماما ، هي مش هتعرف حاجة ، احكيلي لعمو عن مجدي ده وهو هيتعاقب ع اللي عملوه

-فاطيما: حاضر

بدأت فاطيما في قص ما حدث من تجاوزات من مجدي معها بكل براءة ، بينما كان وجه صلاح يحتقن بالدماء مع كل كلمة يسمعها من ابنته الصغرى ، كيف يمكن لذئب كهذا أن يستغل سذاجة وبراءة طفلة لا تعي أي شيء من اجل شهوات حيوانية شاذة

وما إن انتهى الضابط من سؤال فاطيما حتى أعطاها بعض الحلوى لشجاعتها ونصحها بــ...

-الضابط: أي حد يا طمطم يقولي ع حاجة لازم تحكيها مع ماما أو بابا ، ومتخليش أي حد مهما كان انه يحط ايده عليكي أو يلمسك

-فاطيما وهي تهز رأسها بالايجاب : حاضر

-الضابط: ومتخافيش من أي غلط عملتيه لازم تقولي لحد كبير ، مش تسكتي

-فاطيما: طيب

-الضابط: وحضرتك يا استاذ صلاح لازم تكون اكتر وعي للناس اللي شغالين معاك ، في ناس كتير نفوسها مريضة ونوايها خبيثة ، والحمدلله ان الموضوع بان في بدايته

-صلاح: حاضر يا حضرت الظابط ، الغلط عندي إني آمنت على بناتي مع كلب زي ده من غير ما أتأكد منه

...........................

في مكتب علاء ،،،

استغل علاء وقت الراحة الخاص به ليطلب إحدى قريباته ويستفسر منها عن ...

-علاء وهو يبحث عن رقم ما بهاتفه: مممم... أنا فاكر إني مسجل رقمها هنا ، أيوه أيوه .. هو ده

اتصل علاء بقريبته رضوى لكي يطلب منها خدمة ما و...

-علاء هاتفياً : الووو

-رضوى: الوو ، ايوه ، مين معايا ؟

-علاء: ايه ده نسيتي صوتي بالسرعة دي

-رضوى بعدم فهم : انت مين ؟

-علاء: متخافيش يا رضوى ، أنا علاء

-رضوى: علاء مين ؟

-علاء: علاء ابن طنطك سناء ، نسيتني

-رضوى وقد تذكرته: أهــــا .. علاء .. ازيك ؟؟ فين أراضيك يا بني ؟

-علاء: انا تمام يا رضوى ، انتي عاملة ايه ؟

-رضوى: أنا الحمدلله بخير

-علاء: يا رب دايماً ، المهم أنا كنت عاوزك في خدمة

-رضوى : قول كده بقى ، انا برضوه شكيت ، انت دايماً بتتصل لما تكون عاوزة مصلحة من حد

-علاء ضاحكاً : دايماً فهماني يا رضوى

-رضوى: ها ، قول عاوز ايه ؟

-علاء: انتي لسه بتطلعي رحلات زي عوايدك

-رضوى: أها .. ايوه لسه بنظم رحلات

-علاء: طب كويس أوي ، انتي هتطلعي رحلة قريب

-رضوى: ايوه

-علاء: حلو جداااا ، أنا عاوزك بقى تحجزيلي فيها لـ 2

-رضوى: مممم... قولتلي ، لمين ؟

-علاء بفرحة: ليا ولخطيبتي

-رضوى بعدم تصديق: ايه ده ، هو انت خطبت ؟

-علاء: ايوه يا ست رضوى ، خطبت من كام يوم

-رضوى: ألف الف مبروووك ، ومين دي بقى تعيسة الحظ اللي وقعت معاك

-علاء بضيق وحدة: رضـــــوى، أنا مش بحب الكلام ده ، وأظن انتي عارفة ده كويس

-رضوى: سوري مقصدش ، أنا بهزر معاك

-علاء بحدة : المهم يعني في مكان فاضي في الرحلة دي

-رضوى وهي تتحدث بلكنة جدية : اه يا علاء في مكان

-علاء: طب احجزيلي فيها

-رضوى بتردد: آآآ...

-علاء: ها يا رضوى ؟

-رضوى: اوك حاضر يا علاء عشان خاطرك بس

-علاء: اوك ، ومتنسيش تعمليلي تخفيض ، ولا احنا قرايب ع الفاضي

-رضوى على مضض: احم... أه طبعاً

-علاء: ماشي ، وأنا هبقى أعدي عليكي اديكي الفلوس

-رضوى: اوك

-علاء: يالا سلام

-رضوى: باي

أنهت رضوى المكالمة مع علاء وهي تدعو الله أن يعين تعيسة الحظ التي ستتزوج منه و..

-رضوى لنفسها: الله يكون في عون البنت اللي هتجوزك ، بجد أنا مش عارفة دي وافقت ازاي ع الارتباط من أساسه بيك .. ده انت .. استغفر الله العظيم ، انت زي ما انت ، ماتغيرتش .......................................... !!!!!

............................................

[منال سالم]

الحلقة الثامنة والعشرون :

في سيارة مروان ،،،،

ظلت نيرة صامتة لا تتحدث ، حاول مروان أن يبدأ معها الحديث مرة اخرى و...

-مروان: تعرفي انا مبسوط انك كده

-نيرة بتجاهل: هــه

-مروان: يعني لو بنت تانية في مكانك كان زمانتها مصدقت ان معاها شاب زي ولفت عليه

-نيرة بصوت خافت: مغرور

-مروان: سمعتك

-نيرة بثقة : ما تسمعني ، هو أنت مفكرني إني هخاف منك ولا حاجة

-مروان وهو ينظر إليها بنظرات كلها تحدي : والله !

-نيرة: أمثالك دول معروفين ، تافهين مالهومش شخصية وعاوزين البنات تفضل حواليهم عشان صورتهم تكمل

-مروان: طب لمي لسانك بدل ما أقصهولك ، وخليني محترم للأخر معاكي

-نيرة: ولا تقدر تعمل اي حاجة

-مروان: بلاش أنا !

-نيرة وقد لمحت والدها : بابا

-مروان وقد انتبه لمن تنظر إليه : احم ...

-نيرة وهي تتعمد اغاظته: جالك اللي هيعدلك ، افتح بقى الـ lock

-مروان وهو يفتح القفل الالكتروني : اووف

خرج صلاح من القسم وعلى وجهه علمات التجهم وهو أيضاً يحمل ابنته بين ذراعيه ، ثم ركب صلاح سيارة مروان ووضع ابنته فاطيما على حجره وضمها إليه ، ثم أشار لمروان بالتحرك و...

-صلاح: اطلع بينا يا مروان ع البيت

-مروان: حاضر

-نيرة: هو احنا مش هنروح الدرس يا بابا ؟

-صلاح وقد شرد في عالم تاني : هــه ....

-نيرة: بابا !

-مروان: احم... تقريبا مافيش درس النهاردة

-نيرة: أنا مش بكلمك ، أنا بكلم بابا

-صلاح بصوت جهوري آمر : نيـــــــــرة ! اسكتي مش عاوز أسمع أي حس الوقتي

-نيرة وقد شعرت بالاحراج : حـ.. حاضر

.................................

في منزل صلاح الدسوقي ،،،

عاد صلاح إلى المنزل مع ابنتيه ، كان صلاح يحمل فاطيما التي غفت في الطريق ورافض أن يتركها من بين ذراعيه أو حتى يجعلها تفيق ، ثم دلف بها إلى غرفة نومه ، ودثرها في فراشه ، تعجبت زينب لحاله وحاولت أن تستفسر من نيرة عما حدث و..

-زينب وهي في حيرة من زوجها : هو أبوكي ماله ؟

-نيرة بضيق وهي تدلف لغرفتها : معرفش

-زينب: الله ! مش انتي كنتي معاهم

-نيرة: ابقي اسألي بابا

-زينب: طيب والدرس

-نيرة: مافيش درس

-زينب: لأ الوضع كده مايتسكتش عليه ، أنا لازم اعرف في ايه اللي بيحصل

دلفت زينب إلى غرفة نومها ، فوجدت صلاح ويبدو كما لو كان يبكي و..

-زينب: مالك يا حاج ، في ايه

-صلاح: مافيش

-زينب: انت بتخبي عليا يا حاج

-صلاح: زينب ، من فضلك ، اخرجي الوقتي وسيبني مع طمطم

-زينب: ليه مالها ؟ في ايه اللي حصل يا حاج

-صلاح بنرفزة: ايه يا زينب ، هو أنا ماينفعش أقعد مع بنتي شوية

-زينب: لأ ينفع ، بس شكلك مش مطمني ، هو .. البت ... جرالها حاجة

-صلاح وقد شرد : هــه

-زينب: بنتي جرالها حاجة وانت مش عاوز تقول

-صلاح: لأ الحمدلله ، بس كان ممكن تضيع مننا واحنا مش حاسين

-زينب : ازاي ؟

حكى صلاح لزوجته زينب ما مرت به فاطيما من نهش لبرائتها بدون أن يعلم أي منهما عن هذا الأمر أو حتى تدركه ابنتهم الصغيرة ، ولولا فضل الله لكانوا يعانون من مأساة بحق ...

-زينب بصدمة وهي تلطم على صدرها: يالهوي ، يادي النصيبة ، بنتي !!

-صلاح: الحمدلله انها جت ع أد كده ، بس دي غلطتنا

-زينب: البت كانت هتروح واحنا ولا هنا ، يا نصيبتي ياني

-صلاح: آآآخ ... وده اللي قهرني يا زينب ، اننا مكوناش مدين خوانة

-زينب: لا حول ولا قوة إلا بالله ، القذر اللي آمناه ع بناتنا يعمل كده

-صلاح: بايدي أنا سمحت لكلب زي ده يدنس بنتي

-زينب: شششش .. وطي صوتك يا حاج مش عاوزين البت تسمع

-صلاح: من هنا ورايح يا زينب تتابعي بناتك كويس ، حطي عينك عليهم ووعيهم

-زينب: حاضر

-صلاح: ومعدتش حد هيوصلهم تاني ، أنا اللي هوديهم وأجيبهم ، كل حاجة تغور إلا بناتي

-زينب: ايوه ، عندك حق

............................

في غرفة البنات ،،،،

كان يبدو الوجوم جلياً على وجه ندى ، وكذلك كان حال نيرة.. ظلت كلتيهما صامتتين وسارحتين في حالهما و...

-نيرة في نفسها : يعني كان لازم تحرجني يا بابا قصاده ، وحد زي ده ما هيصدق يمسكهالي ذلة ، وبعدين هو أصلاً ليه بيطلعلي في كل حتة كده ، أنا أصلاً إيه اللي مخليني أفكر فيه ، يوووه

-ندى في نفسها: يا ترى أنا فعلاً هاكون سعيدة مع علاء ، ولا هيكون مجرد واحد اتفرض عليا في حياتي ، أنا مش حساه قريب مني ، حساه بيحاول يفرض شخصيته عليا ويلغيني ، أنا لازم متسرعش في قرار الاستمرار معاه ، هديله فرصة اخيرة اعرفه أكتر فيها ، وإلا مافيش داعي نستمر سوا

قطع تفكير ندى رنين هاتفها الملقى على الوسادة ، فأخذته ثم نظرت للمتصل والذي كانت خمنت من هو قبل أن ترى اسمه ...

-ندى: اوووف .. هو ! مضطرية أرد

-علاء هاتفياً: الوو..

-ندى: الوو

-علاء بصوت هاديء : وحشتني يا نونو

-ندى: نونو !

-علاء: أها .. جاي على بالي أدلعك

-ندى: أها

-علاء: تعرفي أنا عملك مفاجأة حلوة

-ندى: مفاجأة ايه

-علاء: مش قبل ما تديني بوسة جامدة من شفايفك

-ندى وقد صدمت من كلامه: نعم ؟

-علاء: ايه ، بوسة ع الهوا ، دي فيها ايه دي كمان

-ندى: مافيهاش ، بس أظن اننا اتفقنا مافيش داعي للكلام حالياً

-علاء: يوووه ، يا بت أنا بحاول أعبرلك عن مشاعري ، مالك مش قادرة تفهميني ليه

-ندى: معلش أنا كده ، مش حابة أستعجل حاجة

-علاء: استعجال ايه ، اومال لما أخدك في حضني وأفعصك بين ايديا هتعملي ايه

-ندى بخجل : لو سمحت

-علاء: ماشي .. ماشي الكلام ده مايصحش يتقال فهمت ، بس ده مايمنعش اني أنفذه عملي

-ندى بصدمة: ايه ؟

-علاء: اما نتجوز يا قُطتي ، المهم يعني اعملي حسابك يوم الجمعة الجاية هنطلع أنا وانتي رحلة سوا

-ندى : رحلة ؟؟ لوحدنا ؟؟

-علاء: اه طبعا لوحدنا

-ندى: كده عادي

-علاء: ايوه ، أنا عاوز اطلع معاكي رحلة وخلاص ظبطت الدنيا

-ندى: ودي بمناسبة ايه ان شاء الله؟

-علاء: من غير مناسبة ، أنا عاوز أقضي وقت أكتر معاكي ، ونتعرف على بعض وآآ... ونتقرب اوي من بعض ، هاه ، فهماني ؟

-ندى: وهي الرحلة دي هي اللي هتقربنا من بعض

-علاء وهو ينتوي على شيء ما : أه .. فرصة انتي مش فاهمة، وبعدين ده احنا هنروح اسكندرية يوم وراجعين

-ندى: سوري ، معتقدش ان بابا هيوافق

-علاء: ملكيش دعوة بأبوكي ، أنا هاكلمه

-ندى: لأ مافيش داعي ، هو اكيد هيرفض

-علاء: مش هيقدر ، وانا عارف هقنعه ازاي

-ندى: مم...

-علاء: المهم عاوزك تلبسي لبس مافيهوش بهرجة ولا حاجة تلفت النظر ، ماشي

-ندى: اما بابا يوافق الأول

-علاء: يوووه ، هو كل شوية هتقوليلي بابا بابا ، يا بنتي اسمعي كلامي من اول مرة ، متخلنيش اتعصب واضايق منك

-ندى وقد ارتفعت نبرة صوتها : هو انا عملت حاجة غلطت عشان تتعصب ، بقولك استأذن بابا الأول وبعد كده نتكلم ، دي فيها ايه

-علاء: لاحظي انك بقيتي بتعلي صوتك عليا ، وده أنا مش بسمح بيه

-ندى: أنا مقصدش ، بس انت مش عاوز تفهمني

-علاء: عاوزة تقولي إن أنا غبي ؟

-ندى: لأ .. انت ليه بتغير في الكلام

-علاء: سلام يا ندى

-ندى: استنى يا علاء .. الووو

أنهى علاء المكالمة دون أن يستمع إلى رد نيرة ، بل إنه أغلق هاتفه تماماً ، حاولت ندى أن تطلبه ولكنها ظلت تستمع إلى الرسالة الصوتية المسجلة ( الهاتف مغلق )

-ندى بضيق: ده ماله ده كمان ، هو أنا قولتله حاجة غلط ، والله هو بيدور على سبب للخناق !

-نيرة : انتو اتخنقتوا

-ندى: اه

-نيرة: بدأتي بدري اوي

-ندى: ولا بدري ولا حاجة ، ده انا في الغلب ده من لحظة ما اتقرت فاتحتي عليه

-نيرة: وانتي ايه اللي جابرك عليه ، ما تفكرشي وتريحي نفسك

-ندى : هــه

-نيرة: أنا لو مكانك مكونتش قبلت ببني آدم زي ده

-ندى باضطراب : لأ.. أنا.. أنا مش هاينفع .. آآآ..

-نيرة: والله العظيم انتي لو سبيته هتبقي الكسبانة ، ده ابتلاء ، انا معرفش اللي زي ده بيجي يخطب بنات الناس ليه ؟؟ مش بيحمد ربنا انك وافقتي بيه ، لأ عمال يتأمر ويبيع ويشتري فيكي كأنك جارية عنده ، بلا قرف ..!

-ندى وقد أخذت تفكر في كلام اختها ملياً : ممم...

...........................

في منزل علاء ،،،،

كان علاء يدور في غرفته ذهاباً واياباً ويلقي بالأشياء الموضوعة على مكتبه على الأرض ، جاءت والدته على أثر الصوت العالي لتحطم الأشياء وتفاجئت بمنظر الغرفة المبعثرة و...

-سناء بصدمة: في ايه يا علاء ؟؟ مالك متعصب كده ليه

-علاء وقد ضاق خلقه: مافيش

-سناء: مافيش ازاي ؟ انت مش شايف شكلك

-علاء: يوووه

-سناء: هي البت ندى ضايقتك

-علاء: يعني

-سناء: عملت ايه فيك ؟

-علاء: كل ما اقولها حاجة تقولي استنى أما أقول لبابا ، اصبر أما أخد اذن بابا ، حاجة تخنق

-سناء: ها وعملت ايه معاها ؟

-علاء: قفلت السكة في وشها وفصلت الموبايل يمكن تخلي عندها دم وتحس باللي عملته

-سناء: عندك حق ، شد عليها يا حبيبي ولا يهمك ، وإديها فوق دماغها ، دي لسه عبيطة وزي العجينة الطرية ، تشكلها زي ما انت عاوز

-علاء: ما أنا ناوي أعمل كده

-سناء: ايوه ربيها ، متغلطش زي المرة اللي فاتت وتسكت ، خد حقك اول بأول ، اومال أنا وافقت تتجوز بت صغيرة ليه ، مش عشان أضمن انها تكون تحت طوعك

-علاء: اه صح ، وانا هعرفها غلطها

..............................

في فيلا فهمي النقيب ،،،،

في غرفة مروان ،،،

كان مروان ممداً على فراشه يفكر في نيرة تلك الفتاة التي سلبت تفكيره وشغلته بطريقتها ، أحياناً يشعر بالحنق لطريقتها في التعامل معه ، ثم يبتسم حينما يتذكر أنها تفعل هذا مع كل من تقابله من عالم الرجال .. هي غريبة الأطوار بالنسبة له ، ولكنها استحوذت على تفكيره و..

-مروان: مجنونة ! لأ مش طبيعية ، بس هبلتني بطريقتها

دلفت والدة مروان ( السيدة أحلام ) إلى داخل غرفته لترص بعض الملابس في دولابه حينما سمتعه يتحدث مع نفسه و..

-أحلام: هي مين دي اللي مجنونة

-مروان وقد انتبه لوجود والدته: آآآ... ماما

-أحلام وهي تضع الملابس داخل دلفة الدولاب: آه يا مارو ، مين دي بقى

-مروان: دي .. دي

-أحلام وقد جلست بجواره على الفراش: بنت جديدة ؟

-مروان: أها

-أحلام: وايه اللي خلاك تقول عليها مجنونة ؟

حاول مروان أن يغير مجرى الحديث مع والدته لكي يخفي ارتباكه و..

-مروان: اومال فين الشغالة ، انتي بنفسك اللي جاية تحطي الهدوم في الدولاب

-أحلام : ممم.. غير في الموضوع غير ، برضوه في الأخر هتيجي وتقولي

-مروان: اها .. المهم انتي ازيك

-احلام: انا بخير يا بني

-مروان: طيب يا ماما مش هاتقومي تشوفي الحاج فهمي ، ده أنا سامعه بيناديكي

-أحلام: والله بس أنا مسمعتش !

-مروان: بس أنا سامعه

-أحلام ضاحكة : والله انت اللي مجنون مش هي

...................................

في اليوم التالي ،،،،

أوصل صلاح بناته بنفسه إلى أماكن دراستهن ، وشدد على إدارة المدرسة بعدم السماح لأي أحد باصطحاب ابنتيه وخاصة فاطيما .. فهو من سيتولي تلك المهمة من الآن فصاعداً .. ثم توجه إلى عمله ، وحينما وصل إلى هناك رن هاتفه برقم علاء فأجاب على اتصاله و...

-صلاح هاتفياً: الوو ، ايوه ياعلاء يا بني

-علاء هاتفياً: صباح الخير يا عمي ، ازي حضرتك

-صلاح: بخير يا بني ، خير في حاجة

-علاء: أه ، كنت عاوز اطلب منك طلب ويا ريت توافق عليه

-صلاح: ايه هو ؟

-علاء: عاوز ندى تطلع معايا رحلة يوم الجمعة الجاية

-صلاح باستغراب: رحلة ؟ رحلة ايه دي يا بني

-علاء: رحلة لاسكندرية لمدة يوم واحد ، أنا عازم ندى عليها

-صلاح: بس ماينفعش يا بني ندى تسيب دراستها وتطلع معاك رحلات

-علاء: ده انا خطيبها يا عمي

-صلاح: برضوه ، مايصحش

-علاء: يا عمي أنا عاوز أتعرف على ندى أكتر

-صلاح: طب ما تجي تزورها في البيت

-علاء: يا عمي أنا عاوزها تغير جو وتتعود على وجودي في حياتها

-صلاح: عشان تتعود عليك أقوم أنا أوافق أخليها تطلع رحلة معاك لوحدها

-علاء: يا عمي دي هدية مني ليها ، والرحلة دي مع مجموعات شباب زينا يعني مش هاتكون لوحدها خالص

-صلاح: ممم..

حاول علاء جاهداً أن يقنع الأستاذ صلاح بالموافقة على ذهاب ندى إلى الرحلة ، اخذ يختلق له المبررات والحجج من أجل أن يوافق ، فاضطر صلاح تحت إلحاحه المستمر أن يوافق ولكن بشرط

-صلاح وقد فاض به الكيل: خلاص يا بني أنا موافق

-علاء بعدم تصديق: بجد ؟

-صلاح: اه ، بس بشرط

-علاء: قول يا عمي

-صلاح: هتاخد اخواتها معاها

-علاء: ايه ؟؟

-صلاح: هو ده شرطي ، يا تكون البنات سوا ، يا إما لأ

-علاء على مضض : ماشي

-صلاح: عاوز حاجة تانية ، خليني أروح أشوف ورايا ايه

-علاء: لأ متشكر يا عمي

-صلاح: مع السلامة

أنهى علاء المكالمة مع صلاح وهو يسب ويلعن ذلك الشرط الذي فرضه والد ندى ، هو كان يريد الانفراد بها ، ولكن وجود اختيها سيعيق مخططه ، كما أنه الآن يواجه مشكلة اخرى ، حيث بات عليه أن يحجز لأختي ندى وهو ما لم يكن في حسبنه

-علاء : أعوذو بالله ، ابوها الفقري ده حطلي العقدة في المنشار ! يا إما اخواتها يطلعوا يا لأ .. حاجة فقر ، لأ والنصيبة السودة اني هدفعلهم تمن التذاكروأتحمل مصاريفهم طول الرحلة ، أل أنا كنت ناقص ده !!

.........................................

في النادي ،،،،

كان يوسف وأصدقائه يضعون التصورات النهائية لرحلة الاسكندرية حينما انضمت رضوى وعلى وجهها علامات الضيق

-يوسف متسائلاً : في ايه يا بنتي ، ضاربة بوز ليه ؟

-رضوى: محتاجة اوفر مكانين كمان في الرحلة

-يوسف: لأ صعب أوي ، ده احنا مقفلين 3 باصات كبار

-مروان: ده غير الناس اللي واقفة في الطرقة

-أحمد: معدتش فاضل غير اننا نحمل ع السقف

-رضوى: عشان خاطري يا جوو حاول تدبرلي المكانين دول كمان

-يوسف: ممم.. وهما تبع مين

-رضوى: برضوه تبع قريبي

-يوسف: كده هيبقى حاجز 4 أماكن ، وده صعب أوي

-مايا: عشان كده مش بحب أعزم قرايبي معايا في اي رحلة

-رضوى: ده مصمم انه يطلع الرحلة دي بالذات مع خطيبته ، ولو مطلعش هيفضحني في العيلة كلها

-مروان: أعوذو بالله من القرايب اللي من النوع ده

-يوسف: مستغلين

-مايا: ويقرفوا

-أحمد: كبري دماغك منه

-رضوى: اسكت يا أحمد الله يكرمك ، مش هاينفع أكبر دماغي مع النوع ده

-يوسف: بصي أنا أخري معاه اني أوفرله مكان زيادة وبس

-رضوى: ممم.. طيب

-أحمد: بصي وقت الرحلة الناس بتقف فعادي محدش بيدقق مين أعد فين ،وهتعدي

-مايا: بالظبط

-رضوى: 3 أماكن مش وحشين ، ونبقى نتصرف وقتها

-يوسف: تمام .. تعالوا نشوف هنروح فين بالظبط

-الجميع: اوك.

............................

أبلغ صلاح زينب بطلب علاء في اصطحاب الفتيات في رحلة ترفيهية لمدة يوم واحد في الاسكندرية وموافقته على هذا بمضض .. رحبت زينب بالفكرة لكي تتعرف ندى أكتر إليه وتدرس طباعه عن كثب ..

-زينب: وماله يا حاج ، خلي البنات تفرح

-صلاح: أنا أصلا موافق بالعافية

-زينب: ده يوم يا حاج ، وبعدين البت ندى محتاجة تعرف طباع علاء كويس

-صلاح: ويعني هي مش هتعرفه إلا لما تطلع معاه الرحلة دي

-زينب: معلش يا حاج ، أهي مرة ، وبعدين هما مع بعض كلهم

-صلاح: اوووف ، ربنا يهون

طوال يومين ظل علاء متجاهلاً ندى ولم يجب على أي من اتصالاتها الهاتفية، ورغم أن ندى في قرارة نفسها كانت مرتاحة لتجاهله اياها ، إلا أنها واظبت على الاتصال به حتى لا تترك له الفرصة ليتشاجر مجدداً معها ...

-ندى: والله الواحد باله رايق ، لكن غصب عني مضطرية اتصل بيه عشان مش ناقصة انه يعملهالي زعلة

-نيرة: الحسنة الوحيدة اللي خدنها من الفقري بتاعك ده اننا هنطلع رحلة نغير بيها جو

-فاطيما: مين الفقري ؟

-نيرة: خطيبها

-فاطيما: هو مش اسمه علاء

-نيرة: لأ الفقري

-ندى: بس انتو الاتنين ، خليني اعرف اكلمه

و أخيراً قرر علاء أن يحن على ندى ويهاتفها و..

-علاء هاتفياً: الوو

-ندى: الوو

-علاء باقتضاب: اخبارك ايه

-ندى: الحمدلله ، انت لسه زعلان

-علاء: هيفرق معاكي

-ندى: يعني

-علاء: ع العموم بكرة هنتحاسب

-ندى: هــه

-علاء: أنا كنت بتصل عشان أكد عليكي انك تجهزي نفسك انتي واخواتك من بدري بكرة عشان هاخدكم الرحلة

-ندى: طيب

-علاء: انا هاكون عندكم ع 6 الصبح ، وبلغي أبوكي بده

-ندى : ماشي

-نيرة بصوت خافت: الفقري شغال نكد ع اختك

-فاطيما: اها .. انا مش هناديه بعد كده بعلاء ، أنا هاقوله يا فقري

-نيرة: ششش .. بس لأحسن هو اللي يسمعك ويتكدر

-فاطيما: هههههههههههه فقري ..!

.................................

في يوم الرحلة ،،،

أشرقت شمس صباح يوم جديد لتعلن فيه عن بدء يوم جديد مليء بالاثارة ...

انتظر علاء أسفل xxxx ندى في سيارته ، وما هي إلا لحظات قليلة حتى نزلت ندى وبصحبتها أختيها ، زم علاء شفتيه في ضيق حينما رأهم ، ولكن حاول أن يرسم البسمة على وجهه و..

-علاء مدعياً الابتسام : اركبوا يالا يا بنات ، تعالي يا ندى جمبي

-ندى: اوك

-فاطيما: ازيك يا علاء

-علاء بضيق: اسمي آبيه علاء ، أنا مش ادك عشان تقوليلي كده

-فاطيما: بس مروان اكبر مني بكتير وأنا بقوله مروان عادي

-علاء مستفهماً: مين مروان ده ؟؟

-نيرة: متخدش في بالك

-علاء وهو ينظر لندى : لأ ، أنا عاوز اعرف مين ده ؟؟؟ تعرفيه يا هانم ؟؟؟

-ندى: آآآ...

-نيرة: لأ هي مش تعرفه لأنه صاحب بابا في الشغل ، وهو كان ساعات اللي بيوصلنا للمدرسة

-علاء غير مقتنعاً : ممم... هنتكلم أنا وانتي سوا يا ندى

-فاطيما بصوت أقرب للهمس: آآآخ الفقري هيزعل نودة

-نيرة بصوت خافت: ششش، بدل ما يسمعك انتي كمان

انطلق علاء بسيارته وهو يزفر في ضيق ، وبوادر مشكلة قريبة تلوح في الأفق ..

..................

كان العشرات من الشباب والفتيات قد بدأوا بالتجمع بالقرب من الكلية في انتظار وصول الاتوبيسات التي ستقلهم إلى الاسكندرية ، كان يوسف يتابع مع مروان أسماء جميع المشتركين في الرحلة و..

-يوسف: بص يا مروان معايا ع الاسماء كده

-مروان: هات الكشف

-يوسف: اتأكد ان الكل موجود

-مروان: ماشي

جاءت مايا وهي متأنقة كعادتها حيث ارتدت شورتاً قصيراً ، ومن الأعلى ارتدت (بادي) يكشف اكثر مما يداري ووضعت طقية عريضة فوق رأسها ثم بدأت تختال في مشيتها أمام الجميع متعمدة بهذا أن تلفت انتباه يوسف ونجحت في تحقيق غرضها و...

-يوسف بضيق : ايه اللي انتي لابساه ده

-مايا: ايه رأيك ، sexy صح ؟؟

-يوسف: مايا انتي عارفة ان اللبس ده ماينفعش في النوع ده من الرحلات ، وأنا خايف عليكي

-مايا: بجد .. خايف عليا

-يوسف: ايوه ، الكل هيقول عليكي ايه الوقتي ، وخصوصاً زمايلنا اللي في الكلية

-مايا: انا مايهمنيش حد إلا انت ، وبعدين اللي متغاظ مني ، يقلدني !

-أحمد وهو يصفر : ايييه ده يا مايا ، فووووفوووو ، جامد

-يوسف: انت بتشجعها

-احمد: بصراحها لازم ، اما يبقى معانا الصاروخ ده لازم نشجع طبعا

-مايا: ثانكس احمد ...

كانت رضوى تقف على جنب تحاول أن تهاتف علاء لتطلب منه أن يتعجل في الحضور و..

-رضوى هاتفياً: انت فين يا علاء ؟؟

-علاء هاتفياً: 5 دقايق وهاكون عندك

-رضوى: يالا بسرعة ، الناس كلها تقريباً جت ، معدتش إلا انت

-علاء: طيب .. باي

-مروان: أنا ظبطت الدنيا ، وأعدت كل الناس ، بس فاضل كام حد لسه مجاش

-يوسف: اوووف ، خليهم في الباص عندنا لحد ما نشوف

-مروان: اوك

-يوسف بصوت مرتفع: رضـــوى ، الكل عندك موجود

-رضوى: فاضل قريبي

-يوسف على مضض : طب لما البيه يشرف بالسلامة ، خليه يجي معانا ع الباص بتاعي

-رضوى: حاضر

-يوسف: يالا يا مارو ، ع الباص

-مروان: أنا طالع معاك وش

-مايا: استنوني أنا جاية معاكو

-مروان: اوك

-احمد: انا هطلع الباص بتاعي ، أشوفكم في الريست

-مروان: ان شاء الله ، انجوووي

.............

أدركت ندى من الطريق الذي يسلكه علاء أنهم يتجهون نحو كليتها ، اذن سوف يكون مكان التجمع من هناك ، وصل علاء بسيارته متأخراً ، كانت رضوى في انتظاره ، وما إن رأته حتى أسرعت إليه لتوبخه على تأخيره ، و...

-رضوى: ايه يا علاء ، كل ده تأخير

-علاء: معلش يا رضوى

وقف علاء أمام سيارته فغطى بجسده رضوى التي كانت تحادثه ، ولم تهتم ندى للأمر كثيراً ، فهي كانت منشغلة بالنظر إلى الجهة الأخرى

-نيرة من داخل السيارة: مين دي ؟

-ندى بعدم اكتراث وهي تنظر للجهة الأخرى : معرفش

-نيرة: الظاهر انها قريبته ولا حاجة

-رضوى: بس احنا عندنا مشكلة

-علاء: مشكلة ايه

-رضوى: انا عرفت احجزلك بس 3 كراسي

-علاء: هاه ، طب ليه ؟؟ مش أنا ماكد عليكي

-رضوى: هاعمل ايه ، كان الحجز اكتمل ، وللأسف التالت مشترك مع حد تاني

-علاء: كمان !

-رضوى: سوري يا علاء ، انت عارف النظام وكده

-علاء: خلاص مش مشكلة ، المهم ان أنا وخطيبتي أعدين جمب بعض

-رضوى: لأ اطمن ، انتو سوا

-علاء: كويس

-رضوى: اه سوري ، مبروك ع الخطوبة

-علاء: الله يبارك فيكي ، استني أما أعرفك بيها

-رضوى: اوك

-علاء وهو يلتفت لندى : تعالي يا ندى

-ندى: حاضر

ترجلت ندى من السيارة لتتفاجيء أن من تتحدث مع علاء هي رضوى تلك الطالبة التي صادفتها في حملة التبرع بالدماء و...

-ندى وهي لا تصدق عينيها: انتي

-رضوى وهي مصدومة: مش ممكن !

-علاء باستغراب: هو انتو تعرفوا بعض ؟

-ندى بتردد: آآآ...

-رضوى: يعني .. مش أوي ، أنا ساعات كنت بشوفها في الكلية وكده

-علاء وهو يفكر في شيئاً ما : مممم... طيب !

-رضوى: طب يالا نادي بقية الناس اللي جاية معاك

-علاء بضيق: نادي لأخواتك يا ندى عشان نطلع الباص

-ندى: حاضر

أخرج علاء من جيبه ورقة ما ثم دون فيها بالقلم ملوحظة ما ، وطوى الورقة ووضعها مرة أخرى في جيبه .. ثم ركب سيارته لكي يصفها على جانب الطريق ،

ترجلت الفتاتين من السيارة وذهبتا بصحبة اختهما ندى إلى الأتوبيس ، ثم لحق بهم علاء بعد أن تأكد من اغلاق سيارته و...

-نيرة وهي تمسك بيد أختها : ربنا يستر ، شكل الرحلة دي هتكون عكننة علينا كلنا

-فاطيما بصوت خافت: اه بسبب الفقري

-علاء وهو يسير بجوار ندى: انتي هتقعدي جمبي ، واخواتك هيقعدوا في حتة تانية بعيد عننا

-ندى : ايه ، لأ مش هينفع !

-علاء وقد أمسكها من ذراعها : نعم ؟؟؟ انتي هتعارضيني ولا ايه

-ندى وهي تحاول افلات قبضتها : لأ مش بعارضك ، بس مش ده الاتفاق

-رضوى بصوت مرتفع آمر: يالا بسرعة يا جماعة ، احنا اتأخرنا أوي

-علاء: اوك يا رضوى

-علاء بنظرات غاضبة : اطلعي ع الباص وفوق هنتكلم

-ندى بضيق: ماشي .................................................. !!!

..........................................

[منال سالم]

هيتم تنزيل باقي الحلقات يومياً في الساعة 9 مساءاً والساعة 11:30 مساءاً على المنتدى ، وارجو من الله أن تنال اعجابكم