آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
08-09-19, 06:22 PM
| #21 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  #قضية_لم_الشمل #البارت_التاسع_عشر #الكاتبة_نهى جلال رحت اركض راجع للقاعة اريد الحك لعناد واشوف شبي ومهيمن كان يركض وراي, دخلنا ولكينا صاير مضارب بالكراسي عركة معتبرة صرت ادور على عناد لزمني مهيمن من كتفي.. تعال ارجع وين رايح ما تشوف صايرة عركة بالنعل لا يلوحك شي كان مهيمن يحجي ويباوع على القاعة سمعنا عياط نسوان ومرت وحدة من كدام مهيمن مفرعة ومهيمن التفت علية وعقد حواجبه واتوغل للقاعة وسألني بشك .. لك جلال هذني شنو انتوا شنو جنتوا تسون هنا كان يحجي وياية وانا بعدني ادور بالقاعة اريد اشوف عناد وينه جاوبته .. مهيمن بعدين افهمك هسة مو وكتها صرت ابعد بالناس من كدامي حتى اشوف والله وكان اشوف صاحبي واكف على صفحة متكابلين عليه اثنين يضربون بي وهو يصيح ويتلاوة بين ايديهم مبين ولية مال مخانيث هاي عركة عناد من غير العركة الكبيرة الي صايرة بنص القاعة ما ينعرف شنو القصة صايرة خبصة رحت هديت عليهم ومهيمن لحكني صرت اتلاوة وية واحد منهم ومهيمن كام يدفع بيهم ويبعدهم عن عناد الي وكع بالكاع شكله ساحت روحه اباوع لمهيمن بدون مقدمات دنك على عناد ورفعه من الكاع وسنده حتى يطلعه من القاعة انطيت دفرة لهذا الي لازك وبعده يريد يتعارك ما نعرف هذولي شنو يردون من عناد لكفت نقاله الواكع من الكاع واخذت سترته وسحبت بطريقي بطل ماي من على الميز وطلعت اركض ورة مهيمن هذا كله الي صار والعركة الكبيرة بعدها مستمرة رحت ورة. مهيمن الي وصل عناد لسيارته وفتحله الباب اباوع لعناد استند على سيارته. ودنك راسه دايخ اقتربت منه. وانطيته بطل الماي .. هاك اغسل وجهك وفهمنا شنو الصار اخذ مني الماي وصبه على راسه باوع عليه وكال .. جلال والله ولية مال مخانيث شافوني لوحدي وكاموا يبلوني بطياح حظهم واحد انضرب من ورة العركة ووكع بصفي اشو اجوي علية يكلولي ليش ضربته ونزلوا علية مرة وحدة بالضرب وشكلهم سكرانين مهيمن بغيض من عناد .. هي هاي النعرفها طريق الحرام نهايته الخراب مابي خير ان شاءالله يكون درس عناد بصوت ناصي من بين اسنانه .. اهووو هسة هذا شجابه مو كلت اخوك راح. هسة تعال شيسكته اكيد راح يوصل كل شي لأبوية وتعال يا عناد اكعد اقنعهم انا مالي دخل بكل الي صار مهيمن بغيض .. هسة شنو راح تخلصون الليل هنا واكفين يالله فضونا باوعت لعناد وسألته اتطمن عليه .. ها عناد شلون صرت هسة ما شوية احسن .. لا لا صرت زين تكدرون تتوكلون لا تعطلون نفسكم علمودي مهيمن .. لا ما راح نعطل نفسنا علمودك انا واكف منتظر هذا الاخ شوكت يخلص كلامه حتى اروح جان يقصدني سألته .. تكدر تسوق لوحدك عناد طبطب على كتفي وكال .. لا تخاف يا صاح اكدر اسوق قابل انا سكران حتى ما اكدر اسوق هي لطمة على الوجه ، روح جلال لا يظل بالك يمي انتظرناه يصعد بسيارته شغلها وحرك ودك هورن وسلم علينا وراح مهيمن .. اتفضل باشا كدامي حسابي وياك بعدين .. اهوو هم رجعنا لشغلة حسابي وياك اي مو ادري حتى فلوسي خلصوا من ورة المحاسبة مهيمن وصل لسيارته وصعد بيها وانا اتبعته .. جلال ليش احس بيك شاب طايش الله انطاك عقل شلون تروح برجليك للتهلكة ليش تخليني اتبع وياك غير اسلوب ما يعجبك .. مهيمن على كيفك مايحتاج كل هذا الكلام الي تكوله انا هم مثلك حالي من حالك انعزمت بالحنة واتفاجئت بيهم مسوين حفلة طرب ورة ال١٢ مهيمن .. هسة تريد تقنعني ان انت ما عندك علم بالراقصات واحياء الحفلة .. عندي بس حبيت اشوف واجرب لان اول مرة بحياتي ادخل لهيج اجواء غمض عيونه بصبر وكال .. جلال انتبه لنفسك ولتصرفاتك مو كل شي جديد لازم تجربه ما يصير ، كل شي وله حدود وانت بتصرفاتك تجاوزت حدودك فاهم رجعت راسي للخلف وسندته على الكرسي وحجيت بتعب .. تمام فهمت عليك ابو الهمة. وغمضت عيوني وما حسيت الا على مهيمن كعدني .. يالله جلال اكعد وصلنا للبيت نفضت راسي حتى اصحى نزلنا دك نقال مهيمن وكان المتصل ابن خاله سجاد يتطمن عليه .. الو هلا سجاد اي وصلت لا يظل بالكم دخلنا للبيت ولكينا ام مهيمن ونور ينتظرون ام مهيمن.. ها يمة اشو اتأخرتوا ظل بالي يمكم باوعت لنور كانت نظراتها كلها خوف وعيونها حمر مهيمن كعد يطمن بامه وانا رحت دخلت للغرفة ونور اجتي وراي تعرج بمشيتها وفاجئتني بكلامها .. جلال والله اليوم دخلت بخطيتي وكعت گلبي عليك كنت انزع بحذائي واتوقفت على كلام نور .. لا تخافين هذا انا كدامج ما بية شي .. حقك ما تعرف شصار بية من مهيمن يتصل عليك وانت ما تجاوب اجيت اموت بدمي عيونها جانت تنطق بالخوف من شفت خوفها علية ما اعرف شصار بكلبي اتمنيت اخذها لحضني واطمنها واكللها هذا انا موجود لاتخافين بس المسافات الموجودة بيني وبين اخواني خلت بينا حواجز تنمنعنا نتصرف بتلقائية مثل بقية الاخوة العاديين يمكن لو كنا عايشيين حياتنا مع بعضنا بصورة طبيعية جان ما واجهت صعوبة اخذها لحظني اباوع عليها شلون دموعها تلالي بعيونها اتذكرت خالي من اتأخر يظل يصيح ويعصب عكس مهيمن ونور كان خوفهم طاغي عليهم اقتربت منها مسحت على راسها بكف ايدي اواسيها .. ما جنت اتوقع تأخيري عليكم راح يسببلكم فزع مسحيها بية هالمرة اطلب منج السماح نور.. حقك مستغرب لان ما تعرف انت ومهيمن شنو بالنسبة الي من يوم الي شفتكم صرتوا كل حياتي واماني ووخوفي عليك اليوم بين محبتك بگلبي صحيح انا مصارلي هواي من تعرفت بيكم بس ربي الشاهد يمكن لو يقيسون حبي الكم راح يلكونه يضاهي حب اخت رابية من الصغر وية اخوها ويمكن يفوقهم تعرف ليش افوقها بحبي الكم لان احتمال هي تكون متحس بنعمة الاخو لان من صغرها تعودت على وجوده بحياتها ما يحس بالنعمة الا الي فاقدها .. هاي هي وداعتج بعد ما تنعاد واخذيها مني وعد .. الله يخليكم الي اخذت راحتك شكلك كلش تعبان هم يالله تنام باجر وراك كعدة من الصبح مو تنسى تكعدني اسويلك ريوك ابتسمت لها .. صار تدللين شريد بعد اختي واصبح بوجهها الحلو وتسويلي ريوك طلعت وتركتني بدلت ورحت اتمددت على فراشي ودخل مهيمن وباوع علية بزعل وتمدد بفراشه وانطاني ظهره ونام باوعت للسكف وسحبت نفس عميق واليوم عرفت شلون يكون شعور الواحد من يكون عنده عائلة والله يا جلال قربان راحت عليك ايام زمان صار لازم اتنازل عن هذا اللقب وابطل اجازف بحياتي لان الظاهر حياتي غالية على عائلتي ومبين عليهم ما مستعدين يتنازلون عنها ويقدموها قربان التفتت اباوع لمهيمن كم مرة يجي على بالي احضنه بس ياخذني التردد والخجل ما اعرف ليش اكون دائما متقيد بالتعبير عن مشاعري وياه وحتى وية نور جائز هاي ضريبة افعال مؤيد الي احنا جاي ندفعها لهذا يومنا. وبعد ما نعرف الايام شنو ضامتلنا نور اجوي نسوان وحجوا وية ام مهيمن وطلبوا ايدي. وام مهيمن فرحت وكامت تباركلي وكالت .. خالة الولد شايفج وياي بالسوك وسأل عليج وعرف بيج اخت مهيمن وداز اهله حتى يخطبوج له بس انطيني نقالج حتى اخته ترسل صورة الولد لان انا نقالي قديم ما يرسل انطيتها نقالي وفتحتلها البلوتوث حتى ترسلي صورته لان هنة كاعدات بالهول قبل شوية دخلت عليهن وسلمت وقدمتلهم العصير وسألوني كم سؤال عشر داقايق وكمت من يمهم مثلما علمتني ام مهيمن اذا يجون الخطابة هيج لازم اسوي طلعت من يم النسوان واجوي البنات ريم وحوراء يركضون شكلهن كانوا واكفات ورة الباب حوراء.. ها بشري ابتسمت.. ههه شنو ابشر متكليلي .. شنو كالوا .. ما اعرف البنات وامهم مبين عليهم حبابات بس بقى نشوف الولد هسة منتظرة خالة تجيب صورته واشوفها شوية واجتني ام مهيمن وانطتني النقال وراوتني الصورة وكالت .. ما شاء الله عين الباردة عليه كلش حلو ومرتب يا يمة كون الج بي صالح ربي يتمم عليج .. ان شاء الله خالتي ربي يسمع منج رجعت ام مهيمن دخلت يم النسوان و ريم وحوراء خطفوا النقال من بين ايدية بسرعة وصارت وحدة تتعارك وية الثانية حتى يشوفون الصورة واني صرت اتعارك وياهم .. ولكم انطوني مجال بعدني ما شفته عدل حوراء .. انتي رأيج مو مهم اهم شي رأي لجنة التحكيم بالله شو ريم عوبة انطيني خلي اشوف ريم لازمة الموبايل وتباوع بتمعن .. اممممم يعني وسط مو كلش حلو. مهيمن اجمل منه بقاطات حوراء اخذت النقال منها و دفعتها على صفحة وصارت تتفحص الصورة بتفكير .. امممممم حلو بس مو احلى من الي بالي .. بالله شو جيبي انتي وياها والله. موتوني جنكم ذبانات بس تزنون على راسي اخذته منها وصرت اتمعن بصورة الولد وادرس شكله كان حلو مرتب واسمراني وجسمه وسط لا سمين ولا ضعيف وصرت اتخيله يجي ويشوفني ونتعرف اني وياه على بعضنا .. شوفوا بنات هو مو كل شي بالدنيا الشكل ،اهم شي الاخلاق والشخصية يعني مثلا عندج هواي شباب يملكون جمال وجاذبية مواصفات الجمال عندهم متكاملة بس من تجين لشخصيتهم تلكيها صفر ريم.. والله بهاي انتي صدقتي كلامج صحيح مثلاً عندج نائل ابن عمة اسيا هو شكله حلو ووسيم وكل صديقاتي من كلتلهم اني رفضت نائل ظلن يلطمن من القهر وحدة تكلي الله ينطي الجوز للي ما عنده سنون والثانية تكلي والله حظوظ وبختج كاعد بالعلالي خطية البنات غرتهم جاذبيته وشكله الوسيم. هو صحيح حلو ووسيم بس لو تجين لشخصيته عساه لا يفتح حلكه وتسمعين كلامه التافه بالحقيقة راح تنصدمين وتنخذلين وراح تكولين حرامات ولا اتوقعته هيج تافه سألتها.. منو نائل تقصدين على هذا الولد الي شفناه وية عمتج بمكتب ابو سيف .. اي هو نفسه مو نورس الضخم لا نائل الثاني الناعم حوراء.. بالله ماعندج صورة لنائل صار عندي فضول اريد اشوفه ريم سحبت نقالها وكالت .. ما عندي صوره له بس هسة راح ادخل على صفحته بالفيس هو دائماً ينزل صوره فتحت النقال ودخلت عالفيس ودخلت على صفحة نائل كالت .. شوفوا هذا هو نائل انتبهوا عليه شلون حلو ووسيم وصديقاتي من يشوفونه يحسدوني عليه وعلى حجايتها وجان يدخل مهيمن وزمخ بيها وسحب النقال من ايدها كلنا كمرنا على دخوله المفاجيء وريم ضلت تباوع عليه مصفصفة ومتفاجئة .. بالله شو راويني منو هذا الي حاسدينج البنات عليه باوع للنقال واتسعت عيونه وكال .. هذا نائل شيسوي بنقالج ريم جاوبته.. يعني شيسوي بنقالي ابن عمتي ترة عادي جاي اروي للبنات صورته اباوع لمهيمن النار تريد تطلع من عيونه اول مرة اشوف مهيمن ما يسيطر على اعصابه .. بالله ما تكوليلي شعجبج بهذا الخنيث انتي هم حاسبته رجال والله حسافة هذا محسوب عالزلم ريم .. مهيمن اني ما راح اسوي وياك مشكلة علمود نائل لان رأيك بي ما يهمني كانت واكفة كدامه وتباوع عليه بتحدي وكملت كلامها .. على الاقل هذا نائل الي ما عاجبك كل يوم يتصل علية ويسأل عن احوالي حتى يتطمن علية حسن من بعض الناس الي ما يعرفون الله وين خالقني اخذت النقال من عنده وراحت وقبل لا تطلع مهيمن وكفها بمكانها وكال .. اذا سمعت بيج او لمحتج تحجين وية نائل بالنقال ما تلومين الا نفسج . مو تكولين مهيمن ما كال ريم .. ما اوعدك ما اتواصل وياه بس احاول لا تنسى هو ابن عمتي مثلما انت ابن عمي واني بية طبع ما اعرف ارد الي يسأل عني راحت وتركت مهيمن الي عروكه بانت من ورة قبضة ايديه طلعوا النسوان وام مهيمن دخلت للمطبخ وشافت مهيمن وسألته عن جلال جاوبها .. جلال اليوم يتأخر عنده شغل بالمعمل وحدة من المكاين عطلانة اكول يمة منو هذولي النسوان ام مهيمن ابتسمت وكالت .. يا يمة اليوم اجوي ناس يردون يطلبون ايد اختك نور وصارت ام مهيمن تحجيله عن الناس المتقدمين وانطته اسم الولد وعنوانه بالشغل واخير شي راوته صورة الولد الي بنقالي بحيث صرت بنص هدومي مهيمن باوع علية وابتسم ام مهيمن .. ها يمة مهيمن شنو رأيك بي ومهيمن كال .. طبعاً هذا الولد انا اعرفه وشايفه بالسوك بس ما مختلط بي هواية بس انطوني فرصة كم يوم اسأل عليه وبعدين اردلكم خبر حتى تحجون وية الناس .. ان شاء الله يمة بيها الخير مهيمن .. اي يمة صدك قبل لا انسى جهزي روحج اليوم اخذج وياي لبيت الحجي ابو حيدر خطية هذا ابن ابنه واكع عليه جدرية ماي فاير وحارك نص جسمه .. يا يمة صخام وهسة شلونه الولد .. والله حسب كلامهم هسة هو زين وجاي يعالجونه يمة الله يرضى عليج فكلت اخذج وياي ونشتريلهم خروف على سلامة ابنهم .. اي يمة ابو حيدر صاحب واجب يستاهل نواصله ونقوم وياه بالواجب للعصر اجتي ام مهيمن وكالت .. خالة نور جهزي روحج ترحين وياي انا ومهيمن لبيت ابو حيدر على الواهس صايرة اضوج اطلع لوحدي اتعودت عليج .. صار خالة انا بالخدمة ما عندي شي اجي وياكم جنا نحجي انا وام مهيمن وجان نسمع صوت صرخة ريم ام مهيمن.. يا ستار شبيها بت عمج ركضنا اني وياها ومهيمن وجلال اجوي على مصدر صوت بكاء ريم لكيناها بالمطبخ الدموع عشرة عشرة ام مهيمن.. ها ولج خالة شصار ريم هزت راسها وزاد بكاءها صدك كسرت كلبي ام مهيمن شافتها هشكل تبجي .. ولج خالة ريمة احجي شصار عمتج اسيا صار بيها شي ريم وبصوت منهار .. لالا ياريت عمتي اسيا ولا الصا...... وانقطع كلامها مختنكة بالبجي اقتربت منها وحطت كتفها اريد بس اهديها ونعرف شنو الموضوع حوراء تباوع عليها بس ترمش بعيونها جلال .. يا ستار صار الموضوع يخوف ام مهيمن لطمت على صدرها يمة صخام بس لا واحد من اولاد عمتها مات ريم.. ياريت وضمت راسها بصدري واستمرت بالبجي عاد ام مهيمن سمعت هشكل وجان توكف بنص البيت وتكول بهوسات الفواتح .. يبوووووووو خيه اطينا نتسامر لاتونين احو .. احوو مهيمن..يمة صلي عالنبي هسة شفتهمتي وكعدتي تلطمين ام مهيمن.. ولك بنت عمك تبجي مفزوعة مبينة تصيح لأمها وابوها مات واحد من اهلها كابلت مهيمن وكملت هوسات الفواتح وهي تلطم .. يمة مهيمن جتك طايرة الونة كوم اكعد تلگاهة هذولي اهلج اهل دلة وفناجين ليش تونين سم اهلج طواعيين هذولي اهلج اهل غيرة ودواوين وليش تونين سم اهلج طواعيين مهيمن بخوف .. ولج ريم احجي شنو القضية منو مات ريم رفعت راسمها من حضني وهي تناشغ بالبجي .. اااا مهيمن اظافري انكسرتتتتتتت اااااااااااااا هيء ورجعت لحضني تكمل بجيها جانت تبجي مثل الطفلة المهضومة هي كالت هذا الكلام والبيت انكلب هدوء سنطة اباوع للوجوه. ام مهيمن اتوقفت عن اللطم والنعاوي وبقت مصفصفة ومهيمن فاتح حلكه مصدوم يباوع لريم عبالك جاي يباوع لكائن فضائي غريب وجلال نفس وضع مهيمن وحوراء حجت بصوت ناصي .. ردها ان استطعت يا هذا راحت هوساتج على خالي بلاش يا ام مهيمن ام مهيمن.. الله يسامحج خالة والله سوايتج ما تتسولف وكعتي گلوبنا علمود ظفر صدك تحجين جذب مهيمن حجة بصوت هاديء بس مبين عليه كوة لازم روحه ما يسحلها .. يعني هذا البجي وروحج مفرفحة كله علمود ظفرج انكسر ريم مسحت خشمها وكالت .. لا مو ظفر واحد ثلاثة انكسروا هااااك شوووف مدت ايدها كدامه والشفايف مبرطمة وترجف من اثر البجي جلال .. لا لا لا ثلاثة ضحايا بوقت واحد انا لله وانا اليه راجعون. الله يساعدج صدك كارثة زين طمنينا مأمنة عليهم بالتأمينات لو لا لو لوحدج راح تتحملين الخسائر الفادحة مهيمن .. جلال انلصم وسد حلكك انت الثاني لا اجي ابتلي بيك ورب الكعبة وباوع لريم كمل كلامه .. والله العظيم احلف عليج انتي مو عاقلة بس اريد اعرف انتي بشنو تحسين حجيت وياه حتى اهدي.. مهيمن مصار شي انت تعرف ريم ام مهيمن.. عوفها يمة بنية صغيرة بزر دلال لا تحط بالك وياها يالله يمة امشينا لا نتأخر على الناس هم يالله نروح لهم اكيد هسة ينتظرونا مهيمن .. انا طالع كدامكم لحكوني مو تتأخرون باوع لريم وكال .. مع الاسف يوم عن يوم تثبتين بتصرفاتج انتي مجرد طفلة بجسد مرة راح وعافنة وريم زادت بالبجي وضمت روحها بصدري عبالك تريد تختفي وام مهيمن راحت دخلت لغرفتها وصاحت لحوراء .. يمة حوراء تعالي حضريلي العباية والجورايب والشحاطة اريد اروح وية اخوج حوراء طبطبت على ظهر ريم تواسيها .. كناري حبيبتي لا تزعلين من مهيمن بس هو يتخبل من دلع البنات ما تشوفيني صرت جعفر ابو الغاز كله من وراه وعافتنا راحت ورة امها وريم رفعت راسها وباوعت علية بخيبة امل .. نور مهيمن اكيد صار يضوج مني جلال .. باربي لا تشيلين هم زعل مهيمن صدكيني تكبرين وتنسيها هسة خلينا بأظافرج الي انكسروا وين راح يقام العزاء عليهن شنو رأيكم اسويلكم العزة فوك بالسطح اليوم بالليل عليكم الله انتظروني اليوم لا تتعشون اشتريلكم بيتزا وبيبسي ونتعشا فوك بالسطح ونجيب ام مهيمن تنعى شوية والله عليها نعاوي غير اجيت اكابلها والطم من جو الحماس الي سوته ينعل بليسج باربي حركتي الجو حرك غمزتله .. جلال يمكن مهيمن يصيحلك راح جلال وطلع برة وكال .. مو تنسون اليوم نتعشى بالسطح باوعت عليها ورفعت راسها ومسحت دموعها وكلتلها .. يالله تعالي وياي حتى ابدل راح اطلع وية خالة ام مهيمن ومهيمن اريد اخذ ذوقج بالملابس مسحت دموعها وهمست بصوت واهن .. تمام يالله امشي كدامي خلي نشوف شنو عندج ملابس وصلنا لببيت الحجي ابو حيدر جان بمركز المدينة وبيتهم كلش فخم ومرتب استقبلونا الحجي ابو حيدر وابنه سمعت مهيمن سلم عليه وكله.. هلا شلونك حيدر الحمدلله على سلامة ابنك . واني وام مهيمن دخلنا جوة يم النسوان من باب المطبخ واستقبلتنا ام حيدر واخته وبنية ثانية ما عرفتها وكعدنا بالصالة بيتهم كان ضخم ما شاء الله مبينين اهل خير وام مهيمن صارت تتحمدلهم عالسلامة. وبدوا يحجون عن الحوادث وبعدين سمعنا صوت ولد صغير يبجي. واخت حيدر كامت ام حيدر كالت .. خطية هذا مصطفى ابوه ما رضى يبقيه بالمستشفى الدكتور نصحه يطلعه من المستشفى حتى الحرك ما يتلوث لان المستشفى بيها جرثومة ام مهيمن.. خطية سودة علية ام حيدر .. انا سمعت من الحجي انتي عندج معرفة بطب العرب بالله ما تشوفينه كامت الحجية ام حيدر وام مهيمن هم كامت واني كمت وياهن ورحنا مشينا وراها ودخلتنا بغرفة كلها ريحة ديتول حاطين الولد على سرير مغلف كله نايلون بلاستك مسوين عليه مثل الحجر الصحي اخت حيدر كانت كلش حبابة عرفتني على اسمها كان اسمها رغد وانطلقنا اني وياها بالسوالف ام مهيمنسالت باستغراب.. ام الولد وينها ما شفناها ام حيدر .. والله يا ام مهيمن تعرفين ساعة الشيطان من تدخل بين اثنين تخرب الاكو. والماكو وهذا حيدر من رجع وشاف ابنه محترك اتعارك وياها وكاللها هاي السبب اهمالج ، وهي ما سكتت وكلمة منها وكلمة منه تالي اخذها ووصلها لبيت أهلها ، وهسة هي زعلانة ببيت اهلها وانا اريدج تحجين وية مهيمن هو صاحبه ويسمع كلامه خلي يروح يرجع مرته خطية الولد مفرفح وهذا وضعه يريد امه وهي تشوفيها كل شوية تتصل على ابنها تريد تشوفه ام مهيمن .. الله يهدي سرهم والله كسر خاطري هذا الوليد كامت ام مهيمن تعاين الحرك مالته وكالت .. ياااا خية هذا بس زره محترك والحرك مو عميق لا تخافين وداعتج عندي خلطة دهون ان شاء الله مسحة الرحمن بس يستمر عليها يطيب بأذن الله ماكو واحد من جواريني وقرايبي استخدمها لخلطتي وما حمد بيها انا باجر ادزلج الخلطه بيد مهيمن واخذولي صورة قبل لا تحطون الدهن وبعد ما تحطونه حتى اشوف الفرق ام حيدر .. انطيني رقمج حتى ارسلج صوره على الواتساب وتشوفيهم ام مهيمن التفتت علية وكالت .. يمة نور انطيهم رقمج حتى يرسلون الصورة انا نقالي قديم رغد طلعت نقالها واني رديتلها رقمي وحفظته بجهازها بعدما انطيتها رقمي رجعنا نكمل سوالفنا احس بيها تشبه اسيل صديقتي نفس روحها الحلوة بالكلام لفت انتباهي كلام ام حيدر وية خالة ام حيدر .. اشو ما ندري عند مهيمن اخت هيج حلوة وين كان ضامها علينا ام مهيمن .. والله يا خية هي مو بس حلوة شكل هي حتى حلوة اخلاق صار وجهي ينطي الوان واتهربت منهم وشغلت روحي بالسوالف وية رغد وورة ربع ساعة دك نقالي والمتصل مهيمن .. الو هلا مهيمن .. يالله طلعولي انا بالباب .. ان شاء الله هسة اكول لخالة انهيت الاتصال وكلت لأم مهيمن .. خالة مهيمن اتصل ينتظرنا بالباب ام مهيمن .. اي خالة يالله انتي سبقيني وروحي لاخوج وانا جاية وراج كامت ام مهيمن تلبس عبايتها وام حيدر .. لا لا وين طالعين الله عليكم ابقوا يمنا انتي وهاي الحلوة على العشا ام مهيمن تلبس بعبايتها .. ربي يعمر بيتكم يا خية هم يالله نتوكل تعرفين طريقنا بعيد ومهيمن عنده شغل اني كمت من مكاني ورغد كامت وياي حتى توصلني للباب سبقتني بكم خطوة دخلنا للمطبخ. ولكيت واحد واكف بالمطبخ منطيني ظهره كان يحجي ويباوع على شاشة التلفزيون كانت مقسمة بيها كاميرات مراقبة اسمعه يكول .. اهوووو هم هذا الغثيث شعنده جاي هنا بس لا جاي علمود يحرك فلمي عند الحجي هو يحجي وانا تلقائياً. عيني صارت عالشاشة ولكيت المقصود بالكلام اخوي مهيمن صدك اتنرفزت وانقهرت رغد جانت ما منتبهة على اخوها كانت تلبس ملتهية تلبس بشالها حتى تطلع وياي التفت علينا متفاجيء بوجودنا اتسعت عيوني من شفته هذا نفسه الشخص الي ساعدني بذاك اليوم هو بقى يباوع علية مستغرب وجودي ببيتهم رمش عيونه ما مصدك حجة بدون ما ينتبه على روحه .. يا محاسن الصدف حمامة بغداد حطت على بيتنا اني بسرعة اتمالكت نفسي واتذكرت كلامه على مهيمن باوعتله وخزرته يغيض سمعت صوت خالة اجتي وراي حجيت متعمدة .. يالله خالة بالعجل مهيمن اخوية ينتظرنا بالباب هو انا كلت مهيمن اخوية وما اشوف الا هذا ضرب كصته .. خرب بالحظ الاكشر ودار وجهه وطلع برة المطبخ بسرعة هههههههه حل يستاهل طلعنا اني وخالتي ولكيته واكف يسولف وية مهيمن والحجي رحنا صعدنا اني وخالتي بسيارة مهيمن اباوع عليه كل شوية يباوع علية من جوة لجوة خايف من مهيمن انا خزرته ودرت وجهي عنه خلي يولي الحقير يحجي على اخوي مهيمن جلال .. هلو سلوان بشرني اشتريت النقال لخالي .. اي جلال اشتريته مثلما كلتلي ونصبت له برنامج الفايبر وفعلت له الانترنيت وصار تكدر تتصل عليه بأي وقت وتحجي وياه بمكالمة فديو .. اي والله عاشت ايدك ما تدري شلون مشتاقلهم .. ولك جلال لو تدري شكد مشتاقلك. يا عار ومشتاق لمغامراتنا .. بس اصبرلي ضاملك مفاجئة انتظرني بس يصير الي ببالي الا اراويك اماكن الي تتمنى بأحلامك تشوفها .. اي ولك قبل لا انسى تعرف ابن الاسطى توفيق .. اي هذا الهتلي شبي .. ولك قبل يومين عثروا عليه مقتول .. لا تكولها شنو السالفة اشو صاير القتل بفلس .. والله يا جلال الوضع كلما اجاله يتدهور جاوبته .. هو الوضع بالعراق العظيم كله تعبان نور دك نقالي برنة رسائل الواتساب فتحت الرسالة وكانت من رقم غريب مكتوب بيها .. هلو نور اني رغد بنت الحجي ابو حيدر ورسلت صورة كانت لرجلين ابن اخوها الصغير جاوبتها .. هلا بيج حياتي رغود جاوبتني .. نور هاي صورة مصطفى خلي خالة ام مهيمن تشوفها وفعلاً رحت واخذت النقال لخالة وشافت الصورة كالت كتبيلها خلي ترسلي صورة بعدما تحط الدهن علمود اشوفه شلون صار رديت لها كلام خالة وهي جاوبتني .. حياتي نور راح نتعبكم ويانا .. لا يا عيني تعبكم راحة امانة عليكم أي وقت تحتاجون تراسلون خالة ام مهيمن اني نقالي موجود وصدك من هذا اليوم اكتسبت صديقة جديدة حبابة وصرنا دائما نتراسل بسوالف بنات مرات تحشش وتضحكني لو ترسلي نكات احس هاي البنية الله رسلها الي حتى تعوضني عن اسيل صديقتي لان اسولة دائما مشغولة بدراسة الماجستير وما فارغة مثل قبل وفوك هذا كله انتقلوا من مكانهم وسافروا استقروا بأربيل يعني التمت عليها دراسة والنقل احلى شي برغد كامت ترسلي الاكلات الي تسويهم بيدها تنطي لاخوها ابو راس اليابس وهو ينطيها لجلال صحيح جلال يوصلها نصها طايرة لان غشاش بس انعم الله عليه يكلي شلون ما اشوف انا والمسكين عناد صرنا المرسال مالت الخلفوكم وكل مرة تريد ترسلي حاجة. تتصل علية تنطيني خبر واليوم نفس الشي اتصلت علية رغد بصوت خجول وبتردد .. هلو نورة حبي رسلتلج الزيت مالت الشعر الي ردتيه بيد عناد وراح ينطي لجلال بس انتي اكدي عليه .. يا عمري رغودة ليش تكلفين نفسج كليلي شكد سعره ترة والله ما اخذه رغد.. احنا صديقات وما بينا هاي السوالف يالله خلي اروح امي صاحتني مع السلامة من تستخدمينه على شعرج كليلي بالنتيجة .. اوكي حبيبتي تسلمين وتعودنا اني وياها نتراسل شنو ناكل وشنو نسوي نكص صور لأكلنا وللاماكن الي نطلع لها وحدة ترسلها للثانية واليوم سويتلها كيكة. لان اني اختصاص بالمعجنات كلت انطيها لجلال ابتسمت واني اتذكر كلامها البارحة من فتحنا مواضيع الخطبة الزواج هي سألتني عن عمري ومواليدي واني هم سألتها كانت تقريبا اكبر مني بسنة وسألتها .. اكول رغودة شعجب ما متزوجة لحد الان .. ماكو واحد اجة على المرام وانا اتعودت على دلال بيت اهلي والي يجون كلهم يردوني اسكن وية اهلهم عوفج مني وكليلي انتي ليش ما متزوجة لحد الان .. اني بالحقيقة محد دك بابي. شكلي ما يعجب العرسان .. عميان وربي عميان يعني بربج هذا الجمال كله وتكولين ما نعجب اني شنو اكول .. لا تضوجين رغودة هانت ربج ما ينسى عبده قبل فترة اجوني خطابة. ومنتظرين مهيمن بعده يسأل عن الولد رغد.. لالالا لالا لا. نور لا تستعجلين وتوافقين عقدت حواجبي مستغربة وجاوبتها .. ههههههه هو بالاول خلي تطلع موافقة الجهات العليا ويقبل اخوية مهيمن والله كريم رغد.. بعدج صغيرة على الزواج عفية لا توافقين .. هههههههه والله كلامج ضحكني هو اني ما صدكت احصل عريس وانتي البطرانة جاية تكولين رفضي اضحك على كلام رغد وقاطعتني خالة ام مهيمن بكلامها وياية كانت كاعدة تطحن بخلطات الاعشاب الي تداوي بيها الناس وتعبيهم بكبسولات شفافة ام مهيمن.. شكد عيب من اهل الولد لحد الان ما مرجعيلهم خبر كلما اسأل مهيمن يكلي بعد انطيني مجال اريد اسأل عن سابع جد للولد يالله انطي موافقتي بالله عليج هذا شحجي وياه گلبي يكوم يغرد من اشوف حرص مهيمن علية ربي ما يحرمني من حنانهم .. خالة حقه لان هذا زواج مو لعب اكيد لازم يسأل ويتأكد من الولد واهله حتى يتطمن علية جنا نحجي دخلو علينا البنات راجعات من المدرسة ريم جانت لازمة كارت درجاتها وتهفي بي على وجها .. اوووووف والله حارة حوراء دخلت وراها وكالت .. طبعاً تصير حارة من ورة درجاتج الزفت الظاهر اليوم استلموا نتائج الفصل الاول كمت من مكاني.. بالله شو خلي اشوف راويني انطتني النتيجة وجان اشوف الخطوط الحمراء منورة النتيجة والدرجات الزفت .. عزة بعينج ياريم اليوم شيخلصج من مهيمن ...... جلال انهيت الاتصال وية. مهيمن والتفتت على عناد الي صاير اعصاب وكل شوية كايم على العمال .. خير سالمين شبيك معصب .. ما معصب يتخيلك .. انت من لفيت للمعمل من الصبح والوجه مكلوب ما تكلي شبيك .. والله ما بية شي بس اتعاركت وية اخوية اليوم كمت من مكاني .. يالله ابو الشباب مو تنسى توصي الحارس علمود يتاكد من اقفال المعمل كام وياية .. شنو وين رايح .. شنو وين غير ارجع للبيت .. اذا هيج انتظرني اخلص القوائم الي بيدي ونروح انا وياك اوصلك بطريقي رفعت حاجبي وكلتله .. هاي شنو معرفتك والله ، من شوكت نزلت عليك الحنية وصرت توصلني عناد.. اكلك. بلا لغوة زايدة كلتلك اليوم اوصلك يعني اوصلك لو اعرف اخذك سحل لبيتكم ضحكت على شكله المعبس مااعرف ليش .. عمي انعم الله تعال وصلني ما اكول لا ما يرد الكريم الا البخيل بالطريق واحنا راجعين عناد .. تدري انا نسيت اشكر مهيمن على وكفته وياي باوعت عليه ورفعت حاجبي .. هاي شنو اليوم انت بايسون كلك حركات اشو صاير كلش مؤدب ومحترم من شوكت انت متصافي وية مهيمن ليش مو جنت قبل كم يوم ضايج من مهيمن لان عرف بموقف العركة عناد مسح وجهه وعدل نظاراته الشمسية .. بالحقيقة كنت متوقع انه راح يحرك فلمي يم ابوي لان تعرف انا وياه مو على توافق بس اتفاجئت لهذا يومك ابوية واخواني ما عندهم علم بأي شي صار وشكلي استعجلت بحكمي على مهيمن طبطبت على كتفه وكلتله .. مو كلتلك لا تحكم على ابو الهمة والله مو لان اخوي احمد بي گدامك مهيمن شايل طيبت گلب ما شايلها احد بس هو ما يحب يبين كدام احد هالشي وانا الي كدامك واحد من الناس لحد هذا يومك ما شايف حنانه الا من ادور وجهي عنه وانطي ظهري يالله اعرف بي يعني عندك مثلا انا من بديت وياه الشغل لليوم ولا مرة گلي كلمة (عفية ) ورغم شطارتي بالمعمل ولا مرة اسمعه يثني على شغلي بس من وراية اتفاجيء اسمع من الناس ان مهيمن وين ما يمشي يحجي بية ويتفاخر بشغلي كدام الناس عناد.. الله يبلغنا من حنانه وطيبة گلبه ضحكت .. شفت مو اكلك انت اليوم موطبيعي تكلي ماكو شي شكلها شمس البصرة ضاربتك وساطرتك سطر عناد.. والله يا صاح. شكلها هالمرة شمس بغداد ضربتني .. حييييييل شوداك على شمس بغداد صاير لعقلك شي وصلنا لمنطقة مهيمن وباوعت عليه نزلني براس الشارع لا تدخل السيارة الشارع كله طسات عناد.. لا يابة فدوة الك السيارة وراعيها .. يا اخي ما اعرف ليش احس ورة كرمك وياي قصة بس ما علينا نصبر ونشوف هذا الكرم الي نزل عليك فجاءة شنو غايته ابتسم وكال .. ولك انا من يومي الناس تصيحني ابو الكرم لان انا كريم .. لا انت مو كريم عناد ابو راس اليابس التيس وصلنا يم باب بيت مهيمن ونزلت وسلم علية وكال هاك قبل لا انسى هاي العلاكة دزوها الاهل اخذتها منه وراح التفتت وشفت سجاد ابن خال مهيمن واكف بالباب كان منطيني ظهره ومنطلق ديحجي بس ما عرفت ويامن يحجي بس استوقفني اسم حوراء بقيت واكف بمكاني اسمعه يكول .. ولج حوري من فدوة رحت لهذا الطول. ما. الله يهديج وتوافقين تتزوجيني يتبع | ||||
|  |
|
08-09-19, 06:24 PM
| #22 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| السلام عليكم ورحمة الله وبركاته اسعد الله مساءكم يا احبتي المتابعين ❤️ #الكاتبة_نهى_الحسون #قضية_لم_الشمل #البارت العشرون جلال اني سمعت كلام سجاد وية حوراء و ما اعرف شصار بية ماحسيت على روحي الا واني راكض عليه وبحركة گلب لزمت ياخة القميص من الخلف وهو وحوراء كمزوا متفاجئين بوجودي لزمته ومحتار منين ابدي بي اكله بسنوني لو انطيه دفرة. لو اسحله فتح حلكه يريد يحجي معترض وانا بسرعة انطيته كلة بالراس اختل توازنه ورجع للخلف حوراء شهكت بخوف وكالت .. هاي شبيك جلال التفتت عليها وزمخت بيها بنترة .. اششششش انتي ولا كلمة هسة تدخلين جوة للبيت وين مهيمن وخالتي عنج ها ولج واكفة بالباب وية هذا وتدكين سوالف نهض سجاد من الكاع. وهد علية انطيته دفعة مرة الثانية ووكع بالكاع على وجهه .. شوف ولك هسة تمشي تتحرك منا وترجع لبيتكم ما اريد اشوف وجهك جاي مرة ثانية هنا نهض من مكانه وكال بغيض .. ولك انت منو حتى تجي تحاسبني انا و بنت عمتي انت شنو دخلك .. تاكل تبن وتحترم نفسك هذا البيت له حرمة .. اسمع منو اليحجي ولك انت كلك خلك خطار كاعد لفو بهذا البيت هديت عليه ووين اليوجعه كلامه مثل السكين غرزت بكلبي حوراء ركضت تصيح لأمها وطلعت ام مهيمن ونور على اصوات صياحنا وصارت ام مهيمن وكم واحد من قرايبهم يهدون العركة لان هو بيت مهيمن الله يحفظه كاعد بنص قرايبه لو واحد يصيح اخ تلكة العشيرة كلها فوك راسك والله بعد ما هدت العركة وسجاد بعده يهد وينثتي وهمة كوة لازمينه وام مهيمن لازمتني تريد تدخلني جوة للبيت. ام مهيمن .. ولك خالة جلال شنو القصة فهمونا شصاير شبي وياك سجاد سجاد بصياح .. ولكم هدوني عليه هالعار اللفو الله ينطي مهيمن لمك من الشوارع غمضت عيوني ولزمت ايد ام مهيمن اريد ابعدها بدون ما ااذيها لان هذا الظاهر مشتري موته بيده بس فجاءة قاطعنا صوت مهيمن .. سجاااااااد ولك عليمن هذا الحجي راح اقترب علينا ووكف كبال سجاد سجاد .. همزين اجيت والله جابك ترضاها مهيمن اخوك جلال يتعدى علية ويطردني من بيتكم مهيمن بهدوء.. سجاد سألتك سؤال وجاوبني عليه الكلام الي سمعته قبل شوية كنت تقصد بي منو سجاد دنك راسه وحجة بصوت ناصي .. على جلال. بس والله. هوال............ وما حسينا الا و مهيمن ضرب سجاد راشدي وصوت الراشدي كان يشهد على اعتراض مهيمن مهيمن بتحذير وهو يباوع للكل .. هاي المرة صارت مرت الثانية خليني اسمع واحد منكم يكول على اخوية كلمة وحاضركم. يعلم غايبكم. اخواني خط احمر الي يمسهم بكلمه معناها متعدي علية خاله حجة بصوت متنرفز .. مهيمن انت بالاول افتهم شنو السالفة بعدين احجي ما يصير الي سويته وية سجاد اجة خالهم حسن وكال ..عمي صدك جذب تحجون واكفين تتعاتبون بنص الشارع اذا انتوا اهل وهيج تسوون بينكم بعد شبقتوا للغريبة بالله شو تعالوا فوتوا دخلوا جوة. للبيت عيب منا الوادم رفع راسه وكال لأم مهيمن .. خوية ام مهيمن فتحي باب الاستقبال الله يرضى عليج حتى يدخلون جوة دخلونا كلنا لداخل البيت بالاستقبال انا كاعد اباوع على سجاد يمكن لو النظرات تذبح جان هسة سجاد. غركان بدمه من ورة نظراتي له ما اعرف شبية انا هذا مو طبعي احقد على شخص واتوعدله بس هذا شعل نار بگلبي ما جاي تنطفي كعدوا خوال مهيمن يحجون الي صار وشلون اني لزمت سجاد يحجي وية حوراء الخال .. يعني مهيمن احنا كلنا نعرف سجاد لحوراء من الصغر وهمة تعودوا يسمعونا. نحجي بهذا الموضوع وسجاد كان يحجي وية حوراء من باب الضحك والميانة اجة اخوك وسمعهم اشو لزم سجاد وضربه وطرده من بيتكم الله عليك يرضيك ابن خالك ينهان وينطرد من بيتك مهيمن باوع علية وسألني كدامهم عن الي صار وانا جاوبته .. بالحقيقة انا ما عندي علم بسالفة سجاد وحوراء ووعدهم للزواج ومن وصلت للبيت ولكيته واكف يحجي وياها بالباب هيج كلام حزت بخاطري احس اتجريء على عرضي اباوع لمهيمن لطالما انا احجي هو ساكت ويستمع لكلامي بتفكير ما علق على كلامي التفت على خاله وكال .. شوف خال انا لو كنت بمكان جلال واسمع الي كاله سجاد راح اسوي مثل جلال واكثر لان هذا عرضي ، واختي كبرت وسجاد صار رجال وما يجوز بعد ينحجي هيج كلام وية اختي واحمد ربك اجتي على هيج مو زين انا ما صدته بالباب جان بالكعبة ما يشفي غليلي الا احط سنونه بيده .. بالله انت اخوها ونكول حقك من تسوي هيج بس هذا واشر علية بأي حق يحكم ويتعارك ويطرد سجاد وهو ابن خالتها اولى منه. ترة بدون زعل مهيمن هو بالنسبة لنا ينحسب غريب مهيمن .. شوف خال جلال اخوي يعني من دمي ولحمي وعرضي هو عرضه معناها اختي حوراء مثل اخته وله الحق يحكمها وانا هاي احجيها كدامكم جلال وكيلي من بعدي على اهل بيتي يعني خاف يصير علية شي بالمستقبل لا سامح الله جلال هو ينوب عني صار معلوم لو اعيد على فكرة خال تراها كلمة غريب جبيرة اني اعرف الي ما ينتمي لعشيرتكم تكولون عليه غريب وبما ان اني و اخوي مو من عشيرتكم معناها اثنينا غربة بنظركم خاله حسن .. مو هيج الحجي يا ابو الهمة اهدا، واذكر الله. ما عليك بكلام خالك وابنه كل كلامهم صدر منهم بساعة غضب ما يقصدونه وانت بوية جلال حقك علينا خاف تجاوزنا عليك بالكلام امسحها بوجهي. انتوا مثل اولادنا والله الشاهد والي يصيبكم يصيبنا وبوكت الشدة نفزعلكم صغار وكبار هذا من شيمنا كلام خال مهيمن هدأ النفوس وبرد الموقف وبيومها اتعشوا كلهم عدنا بس سجاد طلع ما رضى يبقى همزين ما ظل على العشا لان ما اضمن نفسي ما احطله سم بالاكل اعوذ بالله من الشيطان الرجيم هسة هو راح ولى لبيت اهله واني بعدني حاقد عليه شلون حالة هاي دخلت للمطبخ حتى انقل الاكل واتلاقت عيوني بعيونها لاول مرة تنظرلي بنظرة اهتمام خزرتها ودرت وجهي زعلان ومقهور منها وبنفس الوقت محتار اتذكرت كلام مهيمن وية خواله ( جلال مثل اخوها ) جانت عايزة والتمت. باوعت عليها ودنكت من بعد كلام مهيمن لازم اجبر نفسي واحساسي وتكون نظرتي لحوراء نظرة اخوة مهيمن اليوم سلمني امانة. ثكيلة ولزمني من الايد التوجعني مستحيل اخذله احس من هاي اللحظة انفرض على گلبي قيود وسلاسل من حديد حوراء من هاي اللحظة اصبحت مثل حلم مولود واندفن بنص گلبي بس خطية حتى بعده ما شاف النور يالله رب العالمين يعوض اهم شي مهيمن وكلمته وثقته بية تسوى الف حلم من احلامي نور كعدت من الصبح اسوي ريوك لجلال سحبت نقالي وابتسمت رغد المخبلة ما تبطل رسايل لكيتها راسلة صورة صباح النور على احلى نور راسلتها قبل لا انهض من فراشي .. صباح الرغد يا رغودة الحلوة دزتلي سمايل وكتبت .. صحي النوم ياحلو هسة يالله كعدتي .. اي والله اريد اسوي ريوك لجلال .. هنيال جلال يصبح بوجهج. ابتسمت.. ههههههه اني ما اكدر على هالغزل فديتج رغودة. .. بالله شو اتحركي شكلنا انا وياج من زود الجفاف العاطفي صرنا وحدة تتغزل بالثانية .. اي صدك رغودة قبل لا انسى سويت كيك من هذا الي تحبينه. راح ارسله بيد جلال .. شكلي من وراج راح اسمن .. هههه الف عافية على گلبج ..يالله انا صار لازم اروح لا امي تجي وتلكاني لازمة النقال واكلب بي وعايفة الشغل .. يالله يا حلوة روحي مع السلامة نهضت من فراشي حطيت النقال على الشحن ورحت اسوي الفعاليات الصباحية ودخلت عالمطخ وحطيت القوري عالنار واتوجهت لغرفة الولد ودكيت الباب وطلع لي مهيمن مبدل وجاهز. كان يمشط بشعره .. هلا نور صباح الخير فوتي جوة وكعدي هذا الثور صارلي ساعة انده بي ما يكعد ما اعرف بالنهار شيسوي حتى نومه هشكل ثكيل ابتسمت ودخلت .. خطية الله يساعده النهار كله بالشغل اقتربت منه وبعدت الغطى عن وجهه .. جلال اكعد. انتبهت عليه عقد حواجبه واتمغط وحجة بصوت ثكيل من اثر النوم .. ها اي اي .. اني اصلاً من الصبح كاعد منتظركم نهض من فراشه واخذ المنشفة وصبح علية وراح للحمام سمعت اصوات البنات ريم وحوراء شكلهم كعدوا من النوم وراهم مدرسة رحت فتحت الشباك وصرت اجمع بملابس جلال من الكاع وطلعتله ملابس نظيفة ومكوية اجتي ريم دخلت للغرفة وحجت وياي .. هلو نور صباح الخير .. هلا صباح النور ريم .. اكول نورة عفية اريد اطلب منج خدمة .. كولي شنو الخدمة .. البارحة المدرسة طلبوا مني حضور ولي الامر علمود النتائج فاريدج تجين اليوم للمدرسة تحجين وياهم كانت تحجي وجلال دخل للغرفة ينشف بشعره وكال .. صبحنا وصبح الملك لله. ها باربي خير شنو هالحجي لا يكون مستلمة النتيجة راسبة التفتت ريم بسرعة وحجت وياه بصوت ناصي .. اششششششش نصي صوتك لا يسمعك مهيمن عفية خلوا هذا الشي سر بيني وبينكم دخل مهمين وعيونه على ريم .. ما يحتاج ينصي صوته انا عرفت كلشي ريم اتسعت عيونها متفاجئة من وجوده وبنفس الوقت مهيمن .. بس اريد ادخل لعقلج واشوف بشنو تفكرين كل يوم صدمتي بيج تزيد اكثر واكثر يعني من باب تحركين الدنيا وتگلبيها مناحة اذا انكسر ظفر من اظافرج تستلمين النتيجة وتطلعين راسبة بكل الدروس الكاه شي عادي عندج ومتقبلة الامر بكل بساطة ولا كأنه شي صاير يعني شي ما يشبه شي معقولة انتي هيج تافهة. وحرصج على اظافرج اكثر من حرصج على مستقبلج فهميني كانت ريم واكفة كدامه والعيون تلالي .. لا هالمرة ما راح. تاخذيني بدموعج. اتعودت عليهن كوليلي شنو السبب شنو ناقصج حتى ما تنجحين اصلا ليش هذا الاهمال معقولة هيج الدلال يخرب اتقدمت عليه حتى اهدي لان نزل على ريم مرة وحدة مال واحد مكبوت .. مهيمن اعذرها بعدها ما متعودة. على المدرسات مهيمن.. هذا مو عذر لو هي حريصة على مستقبلها ودارستها كان اجتي وحجت من شنو تشتكي هاي مو حوراء وياها بشنو احسن منها حتى هي نجحت والخاتون ما نجحت ريم .. اسأل حوراء دائماً ادرس وياها بس ... قاطعها .. بس شنو فهميني ولو انا ليش متعب نفسي وياج بالكلام اذا هو الشخص ما يحرص على نفسه ومستقبله. لا يترجى من احد يفيده لا انا ولا نور ولا جلال راح نفيدج او تأثرين علينا اذا رسبتي او نجحتي هذا كله لنفسج مستقبلج مو مستقبلنا بس بسيطة يا ريم منا ورايح انا اعرف شلون اتصرف وياج طلع. وتركنا لوحدنا وجلال هز راسه بأسف وهي طلعت تبجي من الغرفة ودخلت لغرفة حوراء وبعد ما طلعت منها نهايئاً حتى مدرسة ما راحت رفضت تاكل اي شي اليوم كله حابسة نفسها بالغرفة احتاريت شحجي وياها مهيمن كال كل شي كنت اتحرك واشتغل بالبيت وكل شوية ادخل عليها الكاها نايمة حاولت وياه تكعد تاكل بس رفضت دك نقالي برسالة واتساب فتحتها والمرسل رغد رغد.. لج نور انا سمنانة كلش فهميني شنو اسوي اريد اضعف كتبت .. بالحقيقة سألتي الشخص الخطأ لان اني جسمي رشيق واصلاً اني ادور السمن .. خرب هنيالج صدك اول ما شفت جسمج ضليت اتحكرص عليه متشوفين لجأتلج وسألتج على الرشاقة. كلت شتسوي وهيج جسمها حلو .. ههههههه لا تضوجين راح نسوي لج برنامج غذائي تتبعينه وانا راح اكعد اراقبج .. يالله انا من ايدج هاي لأيدج هاي ريم مخنوكة من الي جاي يصير وياية احس يوم عن يوم صرت اخسر مهيمن بالتدريج بس مو بيدي شسوي احاول الفت انتباهه بس مع الاسف كل محاولاتي تنكلب ضدي احس تعبت. وفوك هذا كله تجي النتيجة تكمل علية الكل يلومني على اهمالي بس محد يعرف بي اني حاولت ادرس وية حوراء بس ما جاي تدبر احس غركت منين ما التفت كلها عكسي سمعت اصوات نسوان دخلت نور للغرفة وشافتني كاعدة وابتسمت .. ريم حبيبتي يالله كعدي ما شبعتي نوم اانتي زعلانة على مهيمن اني شنو ذنبي. غمضت عيوني ورجعت شعري للخلف .. اكول نور منو اجة .. اجوي بنات خال مهيمن كلهن عفية تعالي كعدي ويانا غيري جو نهضت من فراشي وباوعت لروحي ولملابسي معكرة من النوم .. روحي كدامي اني اغير ملابسي واجي لبست جينز كاحت. واختاريت بدي اسود طوله لحد الورك وعدلت شعري وحطيت عطر طلعت يم البنات وسلمت عليهم عيونهم تبصبص علية حوراء دخلت وبيدها صينية تقديم .. اي هسة يالله حلت الكعدة كناري شرف يالله تعالي قدمي وياي الضيافة ابتسمت وصرت اساعدها اباوع لأم مهيمن كاعدة يم بنت اخوها اسمها نغم طبعاً منتبهة لام مهيمن اكثر وحدة تخصها بالسلام والاهتمام هاي البنية سمعنا صوت مهيمن يحمحم والبنات عدلوا حجاباتهم واني بقيت كاعدة بمكاني ما اتحركت دخل سلم عليهن. وام مهيمن صاحته. يمة مهيمن تعال سلم على نغم اباوع لنغم صارت طماطة ومهيمن اقترب عليهم وسلم وسألها عن دراستها مهيمن.. ما شاء الله على هاي الدرجات ان شاء الله ننتظر هالسنة تطلعين طب نغم بصوت ناصي خجول .. ان شاء الله ربي يسمع منك مهيمن.. وعد علية اذا طلعتي طب اخذكم للزيارة على حسابي هو يحجي وياها واني نار تسعر بكلبي ما حسيت على روحي من كمت من مكاني ورحت وكفت يمه وسألته.. اكول عمو ابو سيف اتصل علية وكال حولت الفلوس على غير مكتب صيرفة بالله اتأكد ردت اي شي يلفت انتباهه باوع علية وكال .. ان شاء الله اتصل عليه وافتهم منه شنو الموضوع بعدها طلع من يمنا ووحدة من بنات خاله سألتني .. ريم انتي شنو ما تلبسين حجاب من مهيمن وجلال باوعت عليها.. لا اني ما البس حجاب منهم لان اصلاً اني مو محجبة سكتت مجاوبتني بقت بس تكلب بعيونها ام مهيمن .. اليوم تبقون عالعشا ماكو طلعة نغم .. عمة لازم نرجع ابوية ما يقبل نتأخر ام مهيمن .. انا اتصل على حسن واحجي وياه هسة ما تكليلي هو هذا بيتكم هنا ومهيمن يرجعكم بالليل وافقوا البنات وكاموا ويانا بالمطبخ شي تساعد بالطبخ وشي كاعد تسولف جمعتهم حلوة وتفرح لكيت نفسي تلقائياً. مندمجة وياهم بالسوالف وحتى نغم كلش حبابة بس حركات ام مهيمن ونظراتها لنغم بيها ألف معنى معقولة لان بنت اخوها حسن وهي تحبها على حبه لو شنو المميز بالبنية وتخلي ام مهيمن هيج مهتمة بيها اني من شفت البنات اخذتني الحمية وحبيت اسوي مثلهم لان لاحظ ام مهيمن تقدر البنية الي تشتغل كانت نغم والبنات يلفون بالكبة وكالت .. عمة راح اخلص الكبة اكليها هسة لو تنتظرون ابوية والولد يجون ام مهين.. لا كليها هسة الولد على جية اقتربت عليهن وشافت شغلها وكالت .. اي عفية بالسباعية ورفعت. ايدها للسما. كون الله. ينولني الي ببالي واشوفج احلى عروسة البنات كلهن صاحن .. اااااااامين الله يسمع منج عمة احلى دعوة وصار الضحك ونغم ابتسمت ودنكت خجلانة والبنات صاروا يضحكون ويتهامسون رحت لنور .. عفية نور انطوني شي اسوي وياكم نور التفتت باستغراب كانت واكفة عالطباخ تسوي معكرونة باوعت لي بعدم ثقة وفكرت قبل لا تنطيني شغلة وكالت .. ها. انتي جهزي الصحون بين ما اخلص هزيت راسي تمام صاحتني حوراء حوراء .. تعالي ياكناري. انا عندي الج شغل يلوك لهلوجه الحلو تعاي سوي زلاطة انطيني عادي اعرف اسوي سلطة سهلة ما ينرادلها شي .. بس ها ديري بالج ما تطيرين ظفرج وتعالي يا زهرة انعي ولطمي علمود ظفر مكسور .. اهوو عابتلج حوري احس صار الموقف عار يلحقني كل شوية واحد بيكم مذكرني لو انتي لو جلال كنا مشغولين حظرت السلطة كانت حلقات خيار وطماطة صرت اتصارع وية الطماطة والخيار والحمدلله تمت المهمة بنجاح. كل شوية اباوع للماعون وابتسم واهني روحي على هذا الانجاز . راويتها لنور وشافت المواعون وكالت .. عاشت ايدج سباعية رتبتها بصحون صغار وحطيتهم على الكاونتر وكلت .. تدرين طلع شغل المطبج كلش حلو وسهل ما يأذي حوراء .. هسة اليسمع كلامج يكول داخلة ساحة حرب نور تكلب بالمعكرونة .. ريمة حياتي حضرتي الصحون .. لا. ما طلعتهم بس هسة طلقة اجهزهم رحت بسرعة دنكت وفتحت الكاونتر. وطلعت درزن مواعيين رفعت روحي حتى احطهم عالميز وكان يزلكون من بين ايدية كلهم ويكعون ويتكسرون شهكت من الهبطة احس گلبي اجة يوكف ام مهيمن كانت برة المطبخ كاعدة يم نسوان اخوانها وصاحت من مكانها .. هاااااااي شنو اتكسر ولج حويرة العوبة لحظات ودخلت علينا وشافتني اريد الم المواعين المكسورة والدمعة معلكة بعيوني كالت.. يالله خالة فدوة طرد الشر بالكزيز ولا بالعزيز لمو الكزاز لا احد ينجرح اجتي انجرحت ايدي وطلع دم واجتي نور .. كومي جرحتي نفسج عوفي الي بيدج انا اكنسه واشيله مر مهيمن من يمي وباوع للدم وسأل نور شبيها كلتله جرحت نفسها ما تدري من كسرت المواعين سكت ما كال شي بس باوع لأيدي من بعيد وكمل طريقه بقيت كاعدة على ميز الطعام كلشي ما اسوي لان ايدي انجرحت والبنات التهو مثل الزنابير بس يشتغلون لحظات وجان نسمع صرخة وحدة من البنات التفتت لكيت نغم كانت واكفة عالطباخ ولازمة ايدها موجوعة صارت الصيحة ودخل خالهم وجلال جلال ومهيمن خوات ام مهيمن ونسوان اخونها اجوي على صوت البنات ام مهين .. يا يمة سودة علية عمة نغم شصار بيج حوراء .. خطية جانت تكلي الكبة وطفر على ايدها الدهن مهيمن بأهتمام .. خلي ناخذها للمستشفى بسرعة نغم جانت بس ترجف ام مهيمن .. اي والله يمة روح بسرعة جيب سيارة علما البس عباتي وناخذها. خطية هاي عيني الي صابتج والله عمة اباوع لمهيمن شلون انخبص بنغم احس بروحي انسلبت مني نغم بصوت ناصي.. لا عمة ما يحتاج هسة احط عليها ملح مو كلش كبير الحرك كانت تحجي وتنفخ على مكان اللسعة مالت الزيت مهيمن .. يابة خلي. ناخذج يعاينج الطبيب ام نغم.. لا يمة شنو القضية ما يحتاج عليمن رايحين للمستشفى وامك موجودة ام مهيمن لزمت نغم من ايدها واخذتها وكعدتها على ميز الطعام وصاحت لحوراء .. يمة حور روحي جيبي علبة الزيوت خلي احطلها المرهم مال ابن حيدر اليوم سويتله منه احس نار الغيرة اكلت كلبي خلص الحادث ومهيمن رجع كعد يم خواله بالاستقبال. والبنات رجعوا يكملون العشا ورغد راحت كعدت يم النسوان ما خلوها تدخل للمطبخ وانا بعدني مثلما اني كاعدة بمكاني بس اباوع بعيوني مستهضمة صبوا العشا وساعدت البنات بنقل الصحون كان باب المطبخ مفتوح الولد كاموا ينقلون الاكل صاح واحذ من اولاد خاله اعرفه اسمه مؤمل كال .. وين الخبز شفت سلة الخبز يمي رحت اخذتها وانطيتها له اشو هذا اخذ السلة مني وظل واكف يباوع بوجهي فاتح حلكه اجة. مهيمن وشافني وخزرني .. مؤمل ودي الخبز جان يحجي من بين اسنانه بغيض اني دخلت جوة هسة اني ليش مدوخة روحي اشو شنو اسوي ما يعجبهم صاحتني نور .. ريمة تعالي اكلي ويانا جاوبتها واني طالعة من المطبخ. .. اكلوا انتوا اني ما اشتهي دخلت لغرفة حوراء وما احس الا على ايد لزمتني من زندي وعتتني رفعت راسي متفاجئة وكان اشوف مهيمن حجة وياي بصوت حاد .. والله العظيم اذا شفتج معتبة باب المطبخ الخارجي رجلج اكسرها شنو حضرتج كاعدة. تستعرضين لالت عيوني بالدموع غصب عني .. مهيمن انت شتريد مني لخاطر الله انت تكرهني لو تغار علية ما جاي افتهم عليك .. ريم ما يحتاجلها فهم انتي عرضي وتصرفاتج تلفت الانظار تخلين الواحد غصب عنه يباوع عليج وانا ما احب من هب ودب يباوع على اهل بيتي لان عرضي مو فرجة للعالم فاهمة لو اعيد نترت ايده وكلت .. لتخاف ما اجيبلك العار. اني صحيح اتربيت بالخارج بس ما نسيت مبادئي واخلاقي اني مو تقبلتكم ليش انتوا صعبة عليكم تتقبلوني .. لا مو صعبة بس تصرفاتج تصعب الامور انتي لحد هذا يومج ما سويتي اي شي حتى تغييرين من نفسج وتصرفاتج اخذي في سبيل المثال شنو سويتي حتى تحسنين من درجاتج دنكت .. انت ما تعرف اي شي عني لاتلومني قبل لا تفتهم سمعنا واحد صاح على مهيمن .. مهيمن وينك يا رجال. انصب العشا وانت ماكو باوع علية يريد يحجي بس ما يكدر راح وعافني غمضت عيوني بتعب ورحت صعدت فوك بالسطح اريد مكان اختلي وية نفسي اريد اعرف منو الغلط بينا اني لو هو رفعت راسي للسما وعيوني كامت تدمع عمو مؤيد جاي تشوف حالي اني جاي احاول بس ما اكدر تعبت والله تعبت سمعت صوت حركة وانفتح باب السطح باوعت لكيت جلال شافني واجة علية .. هاي شنو باربي اشو هنا كاعدة ليش مو جوة تتعشين يمهم مسحت دموعي وجاوبته .. ما اريد اتعشا كان السطح اظلم فتح الضوة. وباوع علية .. هاي شنوجاي تبجين. لالا لا والله ما يلوكلج الزعل لا تكولين ورة هاي دموعج استاذ مهيمن اجة وكعد بصفي واتكئ على الحايط وطلع جيكارة وكعد يدخن .. ليش هو اني عندي غيره باوع علية.. اي عندج شهادتج المفروض هاي الدموع اشوفها بيوم استلام النتيجة راسبة ترة حقه مهيمن من يحجي ويعصب يعني بربج اكو وحدة ما يحترك گلبها على مستقبلها وشهادتها الا گلبج ميت شنوالسبب الي يخليج هيج لا ابالي بدراستج باوعت عليه وكلتله تعرف هذا انت اول واحد يسألني عن سبب رسوبي الكل كان يكتفي يديني ويحملني المسؤولية وينصح ويروح بس محد سألني عن السبب .. اي بالله كليلي شنو السبب .. اني كنت بالخارج وخلصت كل دارستي برة من اجينا للعراق واجهت هواي صعوبات وية المواد وطريقة التدريس بالمدارس تختلف عن هناك حتى الاختبارات والتشديد. لذلك كلما احاول اسعى الكة روحي افشل اني حاولت اكثر من مرة وخصوصاً هسة وية حوراء كنت ماخذة الموضوع بجدية بس مع الاسف ما جاي يفيد باوع علية وكال .. زين ليش ما كلتي او حجيتي جاوبته.. شلون احجي واكول هيج شي وانتوا ماخذين علية نظرة مدللة ودلوعة. ومغرورة صرت اخاف احجي وياكم بمثل هيج امور لان اعرف انتوا ما راح تاخذوني على محمل الجد .. ما راح احجي اي شي بس راح اكلج شغلة وحدة منا ورايح انا ادرسج. المواد ترة الي كدامج خريج هندسة ميكانيك يعني مو شوية اي شي يصعب عليج انا موجود بالخدمة ابتسمت ابتسامة واهنة .. تسلم جلولي جلال .. اشو تحجيها من ورة كلبج وانتي معبسه وجهج .. مقهورة من مهيمن دار عيونه بمعرفة .. هو احنا ندور .. ندور ونرجع لمهيمن وشبي مهيمن درت علية واتربعت وسألته .. اليوم انتبهت لنظرات لبنت خاله كلها اعجاب وتقدير وهالشي زاد غيضي واريد اموت من الغيرة ضحك وكال .. شوفي ريم خلي اكلج اياها من الاخير انا صرت اعرف طباع مهيمن وشنو الي يعجبه وشنو الي ينفر منه ومن خلال عشرتي وياه بالمحل ومعاملتة وية النسوان اباوع عليه يحترم المرة الرزنة الثكيلة المحترمة نفسها وبتعاملها جدية ويتخبل من المرة المايعة والي تجر بحجيها جر وخفيفة تلكينه حتى ما يوجه لها نظرة حسيت بجلال الواسطة الي راح تدخلني لگلب مهيمن حجيت بتوسل .. جلال عفية الله يخليك عملني شلون تتصرف البنية الرزنة جلال باوع علية فاتح حلكه.. خاب صدك تحجين شنو شلون اعلمج رمشت بعيوني وبرطمت شفايفي وكلتله .. الله يخليك اكسب بية ثواب تعرف الي يجمع راسين بالحلال له بيت بالجنة وانت راح تساعدني حتى تجمعني وية مهيمن باوع علية وحك لحيته وكال .. ليش دتحسسيني انا الدلالة ام زكي تدور العرسان للبنات ابتسمت على كلامه .. يالله عاد لا تصير ثقيل دم عفية علمني .. يابة انا اتبرعت اعلمج فيزيا كيميا انكليزي مو اعلمج شلون تصيرين مرة حوك يابة والله صعبة درت وجهي زعلانة منه وهو كلب عيونه بقلة حيلة .. اهووو امرنا لله كلشي ولا باربي تزعل بالله شو تعالي اشر لي على مكان اكعد بي كدام الضوة وهو نهض من مكانه ونفض التراب من الجينز مالته راح لحبل شر الغسيل واخذ قميص من الملابس المنشرة نور تشر ملابس جلال كله بالسطح ما تشرهم جوة اخذ القميص ولفه راسه مثل الشال سألته واني ابتسم .. شنو جاي تسوي .. انتظري لاتستعجلين على رزقج جايج بالطريق عدل الشال ووكف متخصر كدامي جلال.. هسة اعلمج المرية الرزنة شلون تتصرف .. شلون بالله .. من تحجي وية رجال ما ترفع عينها وتحجي يجدية وشخصيتها قوية. على فكرة هالشي ما يقلل من انوثتها بالعكس يزيد من احترامها ومحد يتجرأ يستهان بيها والمرية الخفيفة تكون حركاتها هشكل راح وكف بنهاية السطح وكام يمشي بتجاهي ويمشي بمياعة ويسوي روحه يعلج وضحك بدلع باوعت عليه مستغربة.. زين هاي شنو .. هاي البنية الخفية وصار يمشي ويقلد واني خربانة من الضحك وقطع علينا جو الالفة دخول مهيمن شتسوون فوك صارلي ساااعة اصي..... وكعت عيونه على جلال الي ارتبك وانخبص من شاف مهيمن وكام بسرعة يريد ينع الشال مدري القميص مهيمن عقد حواجبه .. شنو جنت تسوي جلال.. جنت انطيها دروس مهيمن باوع علية وكال .. ليش ما اكلتي وشعندج صاعدة فوك باوعت عليه وجاوبته .. شنو هو تحقيق قابل هسة انت مقهور علية روح لست نغم شوفها خاف ايدها متأذية دك نقال جلال وكال .. يا جماعة الخير ممكن تسكتون اجاني اتصال فايبر فديوا من بيت خالي عيب زحمة يسمعون صوت عركتكم فتح جلال الاتصال وحط النقال مقابل وجهه ولمعت عيونه. وصااااح بلهفة .. لكم هلااااااا رنيييييييين ورنودة. سمعنا صوت خاله يكله هلا جلولي شلونك شخبارك طمنا عنك وصار جلال يحجي وياهم ويسألهم واني ومهيمن واكفين مهيمن حجة وياي بصوت ناصي .. وتسأليني انت ليش دائما تحجي علية بربج اكو بنية تكعد وية شاب لوحدها بالسطح مو عيب حتى لو كانت نيتج صافية. بس تصرفاتج الغير مدروسة تجيبلج الكلام هسة افتهمتي هزيت شعري بدلع .. ما يهمني كلام الناس ما يقدم عندي ولا يأخر اهم شي اني واثقة من نفسي ما مسوية شي غلط انت اذا عندك كلام وما راضي تعال واحجي وياي لا تضل تتحجج خلف كلام الناس. اقترب مني يريد يحجي قاطعنا صعود نور للسطع وجلال كال .. نور ريم الله عليكم تعالوا خلي اعرفكم على بنات خالي وخالتي وخالي الو مصطفى جاب النقال ووجه الشاشة علينا انا ومهيمن ونور وكعد يعرفنا على عائلة خاله جلال .. تعالو خلي اعرفكم على جيش ابو مصطفى هذا مصطفى وهذولي البزازين رنين ورند كامن يصحن جلاااااااال نريد نشتري .. ولكم انا لو بيدي اصير طبر واجي اشتريلكم ريم .. سلمنا عليهم وعرفهم علينا وعلى اسماءنا ومهيمن سلم على خال جلال واولاده التفتت على جلال وكلت .. لك جلال بيت خالك كلهم حلوين وخصوصا هذني الصغار بسهم شبه منك جنا نضحك ونسولف وياهم وجان مصطفى ابن خاله كال لجلال .. اي صدك جلال قبل لا انسى قبل يومين اجوي اثنين رجال بالمنطقة وسألوا عنك. .. منو هذولي جاوبه مصطفى .. كالوا احنا جماعته من طرف ابو بهاء انتبهنا لجلال انخطف لونه وكمز من مكانه يتبع اتمنى لكم قراءة ممتعة مع تحيات اختكم نهى الحسون | ||||
|
| |
|
08-09-19, 08:57 PM
| #23 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_واحد_وعشرين #الكاتبة_نهى جلال بس سمعت بسيرة ابو بهاء جسمي كله ارتعد وتذكرت ايامي السودة وياهم مهيمن والبنات انتبهوا علية مهيمن.. شكو شبيك جلال باوعت لمصطفى وخالي يمه كال بخوف .. اكلك جلال هذولي بس لاهم نفسهم الي خطفوك من فترة وعذبوك كلام خالي كان مثل القنبلة وكعت على راسي الكل التفت يباوع علية متفاجيء احس بروحي انحشرت بزاوية ردت اغير الموضوع واخلي خالي يحجي بغير شي .. لا خالي هذول غير جماعه وباوعت لمصطفى الي كان بعده واكف يم خالي .. اكول مصطفى وين كلتلهم مسافر .. كلتلهم سافر لبغداد غيرت الموضوع .. اي زين سويت اكلك انت جاي تدرس لو بعدك حسيت على مهيمن انسحب ونزل جوة وريم ونور خلوني لوحدي وراحوا. نزلوا ورة مهيمن انهيت الاتصال من خالي واتصلت على سلون اتصل عليه ما يجاوب باوعت للساعة اهووو هسة هذا اكيد نايم بهيج وقت بسابع حلم هذا مثل الدجاج ينام من وكت. ان شاء الله باجر اتصل عليه واحذره منهم خاف يرحون عليه ظليت احوم بالسطح كان الجو بي نسمة هوى طيبة شكله الشتا عالابواب شكد اكره الشتا كئيب ويذكرني بلون حياتي دخنت جيكارتين اريد شوية اهديء ماكو الي شفته على ايد هذولي الانذال مستحيل اكدر انساه كلما يمر ذكرهم على بالي ينقبض كلبي. هو انا ما صدكت اخلص منهم وكلت واخيراً ارتاحيت وبديت اشوف رحمة الله شجابهم على حظي الاكشر شذكرهم بية. نزلت جوة بغرفة مهيمن لكيته مطفي الضوة ونايم بفراشه الحمد لله والشكر مادام نايم يعني مرت بسلام وماظلت بباله دخلت للغرفة بدون ما افتح الضوة. غيرت ملابسي واتمددت بفراشي الي كان بصف فراش مهيمن غمضت عيني واتنفست بعمق ورجعت الافكار هجمت على عقلي. لكن فجاءة سمعت صوت مهيمن اخترق افكاري السودة وسألني .. منو هذولي الي خطفوك وليش عذبوك جمدت بمكاني وانحبست انفاسي من اثر سؤال مهيمن وانا الغبي بكل عقلي مهيمن عبرت عليه وما اهتم او ما انتبه. اثاريه منتظر ينفرد بية حتى يبدي استجوابه التفتت على الجانب وكلت له .. هذولي جماعة بالموصل حشاك كلاب اشتغلت وياهم بشغلة تصنيع الادوات فترة وغدروا بية من غير سبب طلبوا مني طلب وانا رفضتهم .. وشنو هذا الطلب الي خلاهم يعذبوك من رفضته .. طلبوا مني اشتغل وياهم .. اي فعلاً هذا شي خطير اي واحد يرفض يشتغل لازم يتعذب شكو شبيك جلال انتبه لروحك من تحجي واعرف ويامن تحجي فكر شوية انت ما جاي تحجي وية طفل شنو رفضت تشتغل وياهم وشنو لزموك وعذبوك كلامك ما بي ترابط قطع كلامه وسحب نفس عميق وكمل مثل الي اكتشف فقرة ضايعة ..تذكرت شغلة احنا من التقينا بيك بمكتب المحامي بوقتها كان وجهك ملعوب بي طوبة وجسمك كله مضرب يعني هذا كله من اثار التعذيب صح كلامي لو انا غلطان .. صح كلامك. مهيمن بالحقيقة ما اعرف منين ابديلك بس راح اكلك شغلة وحدة لان انت اخوي وعاشرتني وعرفتني كلش زين .. كمل اسمعك .. هذولي من طرف داعش وعرضوا علية اشتغل وياهم وانا رفضت وتعرف الي يقترب لهذولي النماذج شيصير بي وانا بس عرفت بيهم ارهابيين سحبت روحي منهم وانطيتهم رفضي القاطع بس همة ما اقتنعوا بكلمة لا كجواب ولجؤا للتعذيب حتى اخضع لهم وربك لطف بحالي وطلعني من بين ايديهم ما اعرف شلون صدك معجزة كنت احجي وجسمي كله ينتفض مهيمن .. والله الموضوع يدوخ. ولك جلال من اول ما شفتك كلت هذا الولد وراه بير اسرار مليان مشاكل والله الي يستر من الجاي احس بي كال الكلمة الاخيرة بصوت مهموم .. لا تخاف مني مهيمن اني بعدني جلال قربان اخوك مهيمن انطاني ظهره وكال .. هو انا هذا الي مخوفني جلال قربان التفتت على جانبه وكال .. زين تعال گلي همة ليش رجعوا يدورون عليك .. والله ما اعرف بس لا تخاف وحتى لو يردون ما يندلون دربي .. ولك انا ما اخاف بس من الي خلقني انا خوفي عليك انت جلال احجيلي اذا عندك شي ضامه عني خليني اعرفه منك احسن ما بعدين اعرفه من غيرك. وتالي يصير ما لا يحمد عقباه .. مهيمن. اطمئن من ناحيتي بيمن احلفلك ما عندي شي .. الله كريم خلي الايام تجاوبني على سؤالي بس اتمنى ما يجي اليوم الي تخذلني بي ساعتها صدكني راح تنفتح عليك ابواب جهنم وراح تشوف وجه مهيمن الثاني كان يتكلم بتهديد وخوف بنفس الوقت وبعدها كلمن انطة ظهره للاخ وبقة الكلام معلق بيني وبين مهيمن ما انتهى صرت اعرف مهيمن راح يخلي الايام تجري اختباراتها على جلال قربان بعدها ما حسيت على روحي من نمت وياريتني ما نمت صارت الكوابيس تتوالى علي من كل مكان ساعة اشوف ابو بهاء يركض وراي وساعة الكة صگبان يجر بنور اختي من شعرها اهوووو صارت خبصة وساعة احلم بمهيمن يجلدني بحزام اسود على ظهري شنو من احلام ، كوابيس سودة بحيث من كعدت يوم ثاني راسي يريد يطك وجسمي كله مكسر لكيت نور مثل كل يوم كاعدة قبلي ومجهزة الريوك دخلت للمطبخ وصبحت عليهم واني امسح على راسي كلت لنور .. نور عفية ما اريد بس استكان جاي ما اشتهي اكل نور باوعتلي بقلق وكالت.. شنو شبيك جلال مريض .. لا مو مريض بس كعدت راسي يوجعني ام مهيمن كالت .. يا خالة طبعا راسك يوجعك وتطيح وتتمرض اذا انت طالع للشغل بس بهذا التشيرت ،البسلك شي يدفي عظامك مو جاي تشوف الجو تبدل ابتسمت على كلامها وكلت .. خالة انا متعود على جو البارد هذا الجو بالنسبة لبرد الموصل ربيع كامت من مكانها وكالت .. تعال بالله شو اكعد خلي اغلي لك شوية زهورات عندي وورد بابونج حتى شوية يريح راسك لزمتني من ايدي مثل الطفل وكعدتني عالكرسي وراحت تتنقل بالمطبخ كعدت ريم وحوراء كانوا جاهزين يردون يرحون للمدرسة دخل مهيمن وكعد كدامي وگبل بلش يتريك رفع راسه باوعلي ورفع حاجبه بسؤال جاوبته .. راسي ما اشتهي اكل دنك يكمل اكله ام مهيمن حجت وية البنات .. يالله تعالوا اتريكوا لا تظلن واكفات جنكم عامود كهرباء ريم كانت بعدها مطنكرة من عركتها وية مهيمن كالت .. شكراً عمة اني ما اشتهي اكل مهيمن رفع راسه وباوع عليها صفن بوجهها غمض عيونه بصبر سحب كلاص ماي وشربه وكام مهيمن .. الحمدلله والشكر. يالله يمة انا طالع ما محتاجة شي .. لا يمة سلامتك ما رايدة شي دار علية وكال .. جلال اليوم من تخلص من المعمل مر علية راح اشتري سيارة من صاحبي يريد يبيعها بس اريدك تجي تشوفها بما انه انت عندك خبرة بالسيارات .. صار تدلل. من اخلص امر عليك للمحل طلع وانا شربت جاي الاعشاب الي سوته ام مهيمن كلبت معدتي منه ما متعود على طعمه بس حسيت راسي فعلا ارتاح شوية كانت حوراء لازمة كتابها وتراجع وام مهيمن سألتها .. ولج حويرة ما الله يهديج وتوافقين على سجاد ابن اخوي حوراء.. يمة قطنة وشيليها من اذانج. ما اتزوج سجاد لو يظل اخر واحد بالعالم سامعة .. ولج ليش تحجين هيج ، ثولة وين تلكين احسن من ابن خالج رفعت عيني وصدتها للغزالة تراقبني اااااااخ احس مر علية دهر ما شايف عيونها ولا عبالك همة كم يوم ما شفتها اخ يا جلال منين تتلكاها من داعش لو من غزال البصرة اشو منين ما التفت الكاها مسدودة بوجهي .. نور كملت شغل البيت وام مهيمن كملت الغدا ولبست عبايتها وكالت .. انا رايحة اسير على بيت اخوي حسن اريد اشوف ايد نغم شلون صارت .. اي والله خالة البارحة ما شفتي كف ايدها كله تنفخ صار طكاك ورم. خطية كسرت خاطري .. اي سكتي شكد عيب لان احتركت تسوي عشا ببيتي والله مستحية من اخوية .. خالة هو قضاء الله وقدره يعني شي مو بيدج .. هو حتى حسن اخوي يكول هيج بس بعد انتي صرتي تعرفين بية هاي البنية ناوية اخطبها لمهيمن وهيج امور تكصر الركبة كدام المقابيل انقبض گلبي وانخبصت من سمعت كلامها ياربي شلون بريم اذا سمعت سألتها قبل لا تطلع .. اكول خالة مهيمن يدري بيج تردين تخطبين نغم له .. اي خالة مهيمن عنده علم. والا انا ما اتجرء اخطبله بدون علمه غير حتى ما يفشلني وية الوادم غمضت عيوني بحيرة. شلون ورطة هاي ياربي .. يالله خالة اسلم عليج انا رايحة عينج على البيت اي واحد يدك الباب سألي منو قبل لا تفتحين طلعت وراها اسد الباب .. ان شاء الله خالة راحت وبقيت لوحدي بالبيت ولزمت النقال وصرت اراسل رغد كتبت .. اكول رغودة شنو كاعد تسوين حالياً لحظات وصار جاري الكتابة .. حياتي نور. عيني انا جاي ارتب بكنتوري وكل ساعة انزع والبس ولكيت عندي كم لبسة صارت علية ضيقة تعرفين اني سمنانة. راح ادزهم الج كلش حلوات متأكدة يجون على قياسج .. جيبي ما اكول لا اني صايرة مقبرة ما ترد ميت اي صدك تعالي شنو سالفة هاي الكلادة الي دازتها بحرفي والله حلوة اليوم لبستها بس تعاي اكلج هاي كأنه ذهب جاوبتني .. ههههههههههه شوف هاي مصدكة. روحها ادزلها كلادة ذهب .. لعد هاي شنو .. يا حلوة. هاي يسمونها ذهب برازيلي .. اي طمنتيني والله وكع گلبي من شفتها كلت هاي رغد اكيد اتخبلت .. والله تردين الصدك انتي تستاهلين اغلى من الذهب بس اني لان اعرف بيج ما راح تتقبلين هيج نوع هدية دزيتها اكسسوار هسة ارتاحيتي بالله شو لبسي الكلادة وطكيلها صورة اريد اشوفها عليج ابتسمت على خبالات رغد وسوالفها فعلا رغد غيرت كل عالمي وملت كل حياتي بسوالفها اخذت صورة للكلادة وهي بركبتي ورسلتها ردت علية .. هسة اني شفتهمت اشو الدشداشة مشجرة ومضيعة شكل الكلادة .. هسة لعد انتظري فتحت سحاب الدشداشة وبعدتها عالجانبين. وصارت الكلادة تلامس بشرتي ونازلة على صدري وطكيت صورة ورسلتها لحظات وجان تجيني عشر سمايلات عيونهم قلب الحب .. اشرد الا بشدة لج هاي شنو بياض لو لبن صافي .. ههههههههههههه ها رغودة صلي على النبي كولي ما شاء الله عفية .. اللهم صل على محمد وال محمد كسرتي علية بعد راح ابطل ما البس الكلادة وانا فرحانة بروحي اشتريت وحدة الج ووحدة الي مثل الصدك كلت اثنينا نلبس سوية نفس الشي بس بعدما ما شفتها عليج بطلت ما راح البسها .. شبيج ثولة تحجين على روحج والله انتي حلوة .. اي واحنا نظل نكضي عمرنا وحدة تتغزل بالثانية وتالي نعجز وسنونا توكع واني مكابلتج وانتي مكابلتني عمي حلي عني خليني اروح اكبل واشوف مستقبلي ضحكت .. ما تروحين تكبلين منو الي لازمج بس ادري بيج انتي مثل حلاتي مالج بالدروب التعبانة متشوفين كابلتيني وكعدتي رغد.. هو انا وياج جدرولكة غطاه تدرين حتى عناد اخوي كلما يشوفني احجي بالنقال يكول .. اكيد جاي تحجين وية نور من كد ما احجيلهم عنج .. ولج حتى اني جلال ووالبنات منتبهين علية خرب كولي لأخوج خلي يعوفنا بحالنا اني وياج لا يصير حشري .. لا نور عناد كلش حباب ومو حشري خطية خلص حياته يدرس بالخارج تدرين بنات عمي كاتلات روحهن عليه وهو ما يكلبهن .. شلونه هو عاد توم كروز بس هي كالوها منو حمادة العروس .. ههههههه غير حفافتها كون يسمعج عناد والله يسويج عبرة لمن اعتبر بالتصنيف الله لا يوكع واحد بلسانه .. لا لا عفية فكيني عمي استاذ عناد ماكو منه خوش رجال. .. اكول نورة انا والله ضايجة خلي نطلع اني وياج سوية للمول او لأي مكان شنو رأيج نروح لشط العرب .. والله ياريت والله اني بس قارية على شط العرب بالجغرافية بس ما شايفته .. تمام لعد اخذج لحدائق البصرة العائلي على الشط ونصعد سوية بالطراد يجنن .. شنو طراد .. حياتي الطراد زورق بالشط سريع حتى يفلق .. الله شكد حلو .. يعني موافقة .. اني عني موافقة بس بالاول اسأل مهيمن واخذ منه الموافقة والله كريم .. تمام بلكي يوافق ، حتى اني اقنع الي عندي استاذ عنودي ياخذني .. ان شاء الله ... جلال بالمعمل ملتهي اوجه العمال عالم المكاين والعمال شغلوني عن افكاري السودة اجاني عناد وشايل بيده نقالي احنا اتعودنا اذا نتنقل بالمعمل نترك النقالات بالمكتب عناد.. جلال نقالك صارله ساعة يدك سطرني حتى ما عزفت اشتغل من وراه هذا واحد اسمه سلوان يتصل ضربت كصتي .. اهووو جيب .. جيب شلون نسيت سلوان رديت عليه ورحت بعيد عن اصوات المكاين .. الو هلا سلوان شلونك سلوان.. وينك يا اخي ما ترد عالنقال ضل بالي يمك .. النقال كان مو يمي من اتصلت وهسة جابوه الي .. لكيتك متصلي علية البارحة بالليل شنو شبيك حلمان .. لا ولك ما حلمان. .. لعد شبيك .. سلوان جماعة ابو بهاء عرفوا بية عايش ما ميت .. شششنو شلون عرفت منو كلك .. بارحة بالصدفة كنت احجي وية بيت خالي بالنقال ومصطفى كال اجوي اثنين رجال سألوا عنك وهذا مصطفى كايللهم جلال سافر لبغداد سلوان.. لا تكولها. هاي شلون بلوى .. اسكت ما اضم عليك يا صاح من سمعت بيهم سائلين عني اطرافي جمدت وبكت طن هوى اسمعني زين كل الي اريده منك تصير فطن اكيد راح يجون يسألونك عن مكاني سلوان.. ما يحتاج تكول اكيد ما راح انطيهم اي خبر عنك سرك ببير بس انت دير بالك رب الي كدروا يعرفون بيك عايش راح يكدرون يوصلونك والله على كاعد اشوفه هسة بالموصل كلشي اتوقع منهم .. ليش شنو جاي يصير بالموصل .. جلال شبكات الانترنيت بدت تضعف عدنا اليوم سمعت بالصدفة حاركين ثالث برج خاص بشبكة الانترنيت كل واحد من جماعتنا يفسر هاي الظاهرة من يمه وانا ما اضمها عليك كلش ما مرتاح للوضع .. لا تخاف يا اخي هو كل العراق من الشمال للجنوب داخلين بالانذار والاوضاع تخوف عندك البصرة نفس الشي كل فترة يطلعون مظاهرات يم مجلس المحافظة مظاهرات سلمية اشو على غفلة تنكلب المظاهرة وتصير بالنعل حتى رمي يرمون على المتظاهرين والي يكتلك تالي تصفى السالفة لا الجيش ولا الشعب الهم يد بالرمي الصار تالي يطلع طرف ثالث مدسوس غايته يوكع بين الشعب والجيش ويزرع الفتنة بين الناس حتى يربط لحية بلحية وما تعرف شنو مصلحتهم اما بغداد فعدها قصة متنتهي وية الانفجارات التهيت اطمن مخاوف سلوان ونسيت نفسي زين واني منو يطمني على حالي ووضعي كلام سلوان زاد الطين بلة بس ما علينا ما راح يكدرون يوصلون شيجيبهم من الموصل للبصرة مستحيل دخلت للمكتب حتى احط النقال على الشحن ولكيت الاستاذ عناد سارح يباوع للنقال ويوزع ابتسامات .. خير ابو الشباب وين صافن عناد عدل كعدته وكال .. ما صافن جاي اراسل الاهل .. لعد اطلب لنا اكل انا جوعان ما متريك .. تمام راح اطلب بس الك. انا عني مسوي دايت رفعت حاجبي .. هاي من شوكت صرت تسوي رجيم جنت احجي واعاين قوام جسمه جاوبني.. لك انا جاي اسمن هاي الايام.وخصوصاً من بلشت اشتغل بالمعمل هملت روحي وجسمي متعود على الرياضة لان من كنت ادرس بالخارج كنت داخل نادي رياضة جيم وية اصدقائي فتشوف من رجعت واكل الوالدة الله يحفظها والشغل بالمعمل كلها تعاونت علية .. هسة الي يسمعك يصدك بيك سمنان والله عيب تكول مسوي رجيم عناد.. اهوووو وخر عني لا تضل تزن فوك راسي حتى تخرب علية نظامي بالله شو روح منا خلي اطلب لك اكل هزيت ايدي وكلتله .. والا اكولك ما يحتاج تطلب انا هسة رايح لمهيمن ومناك نرجع للبيت نتغدى بعد فد مرة بس عبالي انت وياي تاكل كلت ناكل عالواهس بعدها تركته وطلعت ريم. رجعنا من المدرسة ودخلت للبيت. لكينا نور جاي تسوي سلطة حوراء .. شنو وين امي نور.. راحت لبيت خالج حسن علمود تتطمن على نغم حوراء.. شلون تتطمن عليها ونغم اليوم مداومة اقتربت على نور واخذت قطعة من الخيار وكلت .. اي خطية اليوم منظر ايدها يخوف حتى المدرسات سألوها ليش داومتي اليوم وهي كالت ما كدرت اغيب لان عندي امتحان ما اكدر ااجل حوراء.. هاي لو كناري يمكن تحرك الدنيا وتنصب مناحة جاوبتها .. اسم الله علية فال الله ولا فالج كنا نحجي ودخلت ام مهيمن نور.. ها خالة شلونها نغم ام مهيمن نزعت عبايتها وكالت .. والله يا خالة ما شفتها طلعت بالدوام بس مرت اخوي تكول خطية البارحة الليل كله ما نامت بسبب الحرك وانا اترخصت منها وكلتلها انا راجعة للبيت من ترجع من الدوام. خليها تجيني للبيت حتى اداوي مكان الحرك من المرهم العندي تركتهم يحجون ورحت غيرت ملابسي. كان باب غرفة حوراء شوية مردود. ما غلقته بسرعة دخلت ابدل ملابسي لان كنت كلش محصورة محتاجة اروح للحمام لبست قطعة البجامة التحتية وبلشت البس التشيرت وما اشوف الا مهيمن صار كدامي عبر من يم باب الغرفة. بسرعة ما لحكت اسمع منه غير بس يسب ويلعن من بين اسنونه بغيض عزة مهيمن هنا رحت ركضت غلقت الباب وكملت تبديل ملابسي رحت للحمام وغسلت وجهي وعدلت شعري وطلعت وصار جلال بوجهي سلمت عليه وسألته.. شعجب اليوم راجعين من وقت جلال.. مو اليوم مهيمن اشترى سيارة وانا رحت وياه حتى اشوفها بالله شو بعدي من كدامي خلي ادخل اسبح صرت على صفحة وهو دخل للحمام مر من يمي مهيمن وراح وكف المغسلة يمشط بشعره كدام المرايا وكال وهو عيونه على المرايا .. انتي ما تصيرلج كل جارة تبقين حلل. غمضت عيوني بصبر .. ما راح اكعد ابررلك الي صار لان متأكدة انت حكمت عندك المحكمة وصدر القرار بحقي وخلاص يعني اي كلمة راح احجيها حتى ادافع عن نفسي كدامك راح يكون كلام زايد حجة وياي بغيض .. يعني شلون بيج ما ناوية. ترحمين بحالي وتنتبهين لنفسج شوية رفعت كتفي بقلة حيلة .. والله حاولت بس شفت كل محاولاتي عقدت الامور وصارت اسوء من الاول فقررت اترك كلشي واعيش مثلما اني متعودة وعلى طبيعتي وهاي اني مليانة هفوات ومكتوب عليك تتحملني اني واخطائي ما راح ادعي البراءة واتصنع كدامك لان هذا مو طبعي جنت احجي وياه. واندك الجرس وهو راح يفتح الباب وسمعت صوت نغم بالمطبخ رحت بسرعة ودخلت للمطبخ سلمت على عمتها وكعدت بالمطبخ ام مهيمن .. ويامن اجيتي نغم .. اخوي مؤمل جابني هنا وراح للبيت ام مهيمن.. تعالي خلي اسلخ الجلد واحط المرهم نغم بخوف .. لا عفية عمة والله يأذي .. يمة لازم ينسلخ الجلد الميت حتى يتجدد من احط المرهم رحت كعدت يمهم وخلصت ام مهيمن تطبيب الحرك بس خطية نغم فرت روحها بحيث اني من يمي اجة يغمي علية وبعدما خلصت كامت نغم من مكانها ام مهيمن .. ها عمة وين كايمة .. عمة اريد ارجع للبيت انام اني هاي جيتي من المدرسة .. يابعد عمتج ابقي ويانة عالغدا .. لا عمة خليها غير مرة والله تعبانة .. لحظة اوكفي خلي اصيحلج مهيمن يوصلج نغم بخجل.. لا عمة هسة اتصل على مؤمل يجي علية .. كولي يالله على شنو تتصلين على اخوج وهو هذا بيتكم مهيمن يوصلج صاحت لمهيمن حتى يوصلها .. يالله خلي تتطلع انا انتظرها بالباب همة يحجون وانا صرت احوم مثل وحدة عندها حالت ولادة ما اعرف شسوي بس اباوع بعيوني طلعوا اثنينهم واني ما تحملت رحت فتحت باب الشارع ومديت راسي اباوع عليهم شفت مهيمن يمشي كدامها وهي تمشي وراه بمسافة شارعهم ما مبلط كله طسات اباوع عليها اتعثرت بمشتها ومهيمن اقترب منها وسندها هو اني شفت هذا المنظر واني صرت ابجي مثل الطفلة المهضوم حطيت ايدي على حلكي اكتم صوت شهكاتي دخلت بوجهي للغرفة وحطيت راسي عالمخدة واتغطيت استمريت على هذا وضعي الى ان دخلت حوراء تصيحني عالاكل جاوبتها من جوة الغطى .. حوراء ما اشتهي اكل .. لج عمة بعينج انتي من البارحة ما حاطة شي ببطنج لا تموتين من الجوع والله عيب شنو نكول للناس المرحومة ماتت من الجوع وين كاعدين بأفريقيا .. حوراء عوفيني اريد انام طلعت حوراء واجتي نور حاولت وياي وهم ما لكت مني نتيجة ما حسيت على روحي من نمت وكعدت لكيت الدنيا مغرب وتذكرت عندي امتحان فزيت من فراشي مثل المخروعة عزة عندي امتحان وكعدت ادرس وية حوراء والي ما افتهمه اروح لجلال يفهمني اباوع لحوراء تريد تاكلني بسنونها حوراء.. اكلج كناري مو ياخذج الواهس وكل شوية رايحة يم الولد ثكلي شوية شخليتي لنا اضحك على حركاتها .. لج حتى انتي يا حوراء كمتي علية .. خية انا وياج للوحة بس بشغلة وحدة اخرب اذا واحد حط عينه على حلالي اكتل وانكتل دخلت ام مهيمن وسمعتها .. يا يمة اسم الله منو الي يكتل وينكتل جاوبتها حوراء .. هذولي بيت ام طارش عندهم عركة واسمعهم يصيحون اكتل وانكتل ام مهيمن .. يا يمة صخام الصخمنة بس لا تصير عركة عشاير حوراء تباوع على امها مستغربة .. والله ما ادري يمة الله يدفع عنا البلاء ام مهيمن .. اكول حويرة همة منو بيت ام طارش اشو ما سامعة عنهم .. يا يمة ما دام انتي ما سامعة بيهم بع شكو خايفه لو انتي بس ما تعولين على حس الطبل خفن يا رجلية هي حجت هشكل وام مهيمن نزعت نعالها ودنكت عليه ام مهيمن.. ولج انتي صدك ما تستحين اليوم الا اعيد تربيتج من جديد وحوراء طفرت من مكانها وطكتها ركضة وهي تتكنا على امها لان سمينة وما بيها حيل تلحكها .. كامت علينا انتصار الشراح كانت تركض وتغني .. يالله يمة. اشوفك وين يا مهاجر .. انا اعلمج بسيطة وين ترحين مني شمرت النعال وطار بالهوى بدون ما يسدد الهدف مع الاسف دارت علية وكالت .. يالله خالة كومي اكلي لكمة باوعت للكتاب تقريباً خلصت المادة ما بقى شي جاوبتها خالة بس اكمل واجي اتعشا طلعت واني ورة ربع ساعة خلصت دارسة امتحاني طلعت من الغرفة ورحت للمطبخ سمعت اصواتهم ام مهيمن .. مهيمن مو تنسى ورة العشا نروح لبيت خالك عندي شغلة وياه. وبالمرة اعاين حرك نغم مهيمن كان يغسل بيده بالسنك وجاوبها .. صار يمة بس اخلص الي بيدي والله كريم وانا مجرد سمعت كلامهم من يمها معدتي انعقدت انسحبت من يمهم من غير ما يحسون وصعدت فوك للسطح نور رجع مهيمن من وكت للبيت وجايب وياه عشا جاهز بيتزا وبيبسي دخلت حوراء .. اممممم شنو هاي بيتزااا مهيمن .. اي هاي بمناسبة اشتزيت سيارة جديدة كلت افرحهم بعشا جاهز حوراء.. يارب ما يحرمنا منك واني استغليت مزاج مهيمن وفاتحته بموضوع اقتراح رغد بنت الحجي ابو حيدر وهو وافق وكال تمام انا اخذج انتي والبنات فد مرة هن ما طالعات للمنتزه وانطي خبر لصديقتج هناك تنتظرج كمت من مكاني طايرة ورحت راسلت رغد حتى ابلغها موافقة مهيمن عالطلعة حوراء.. مهيمن احلف صدك راح تاخذنا مهيمن .. اي بالله عليج صدك راح ابتلي على عمري واخذكم حوراء كامت من مكانها وكامت تطك اصبع .. وهلا وهلا واركب ديلاب الهوى وسفينة نوح. وطراد ام مهيمن .. ولج ديلاب الفرج على هالخفة ولج شو صاير فرد نوب كلش بايعة المستحى كعدنا عالعشا وافتقدنا ريم مهيمن سأل وين ريم امه جاوبته .. هاي البنية والله محيرتني من البارحة لليوم ما حاطة ببطنها لكمة ما اعرف شلون عايشة غمض عيونه وكال حوراء كومي صيحيها راحت حوراء واجتي .. مهيمن تكول ما جاي على بالي اكل ما اريد اباوع لمهيمن شال علبة بيتزا وقوطيتين بيبسي وكام من على الصينية ام مهيمن .. ها يمة وين كايم حتى بعدك ما اكلتلك شي مهيمن جاوبها رايح اتعشا يم خناگي ام مهيمن باوعت عليه من غير ما تفهم شنو يقصد راح وترك خلفه هدوء تام. ما يقطعه غير بس صوت الصرصر ريم اجتي وراي حوراء شافتني جاي اصعد الدرج صاحتني عالعشا و كلتلها ما اريد وكملت صعود الدرج فتحت باب السطح على كيف والهوى البارد لفح وجهي كان هوى طيب مو قارص شكله الشتا عالابواب ارتعد جسمي وحضنت نفسي ومسحت على طول ذراعي حتى احرك الدم. ورحت لمكاني المفضل وكعدت اخذت نفس عميق ورفعت راسي للسما وشردت دمعة من عيوني غصب عني وشكل هروب الدمعة الغافل شجع البقية عالهروب وصاروا وحدة تنزل ورة الثانية احبه واريد وده وما بيدي اسوي شي حتى اغير من معاناتي واكفة عاجزة بنص الطريق محتارة اختار اي طريق اسلك. هل يا ترى اترك كل شي وراي واسافر لمصير مجهول ما اعرف شنو بي لو ابقى هنا واتحمل المصير المعروف بس المشكلة. هذا الطريق كله اشواك واحتمال منا علما اقطعه اكون مليانة جروح وخذلان كنت صافنة اباوع للسما وكان يقطع علية تأملي صعود مهيمن للسطح فتح الضوة وشافني وكال .. والله عرفت راح الكاج هنا انتي شنو قصتج كان يحجي وبيده علاكة ببطنها كارتون باوعت عليه بس ما جاوبته حجة بصوت .. سمعت بيج من البارحة لليوم ما ماكلة كلت هاي ناوية تنتحر وتبليني بموتها وتعال يا مهيمن ينشلع گلبك من جديد كعد يمي وفتح العلاكة وطلع منها علية كارتون بيتزا وقواطي بيبسي حسيت ببطني غردت بفرح على اثر الريحة سألته بثگل .. هاي شنو باوع علية وكال .. هذا عشا كلت ما راح تجي تاكل ام راس اليابس كلت اخذ عشاي واصعد فوك وحلفت ما اتعشا الا تاكلين كدامي هو حجة هاي الكلمات واني گلبي صار يرفرف مثل العصفور ما مصدكة ان هو كاعد كدامي وجاي ياكل وياي صرت اكل واباوع عليه كان حالي مثل الطفل من يفرح بجية ابوه هشكل كانت فرحتي حجيت هو مدنك ياكل .. اكول مهيمن انت ليش دائماً معبس وجهك. رفع راسه وباوع علية بتفكير حجيت .. شنو معقولة سؤالي يحتاج له تفكير .. انتي الوحيدة.بالدنيا الي من احجي وياها ابقى حاط كلبي بشيشة عبالك جاي امشي وياج بحقل الغام اشرت على نفسي وكلت .. اني حقل الغام .. اي والله مو بس هيج انتي عبوة ناسفة كل كلمة تصدر. منج تطرحني بأرضي اول مرة بحياتي اعاني بتعاملي وية بنية هذولي امي اختي حوراء. اختي نور. بنات خالي خالاتي كلهم حتى البنات الي بالسوك. ما مرت علية وحدة مثلج. تصرفاتج حيرتني صرت ما اعرف المن انسبج لقسم النساء لو. لقسم الصغار حتى اعرف شلون اتعامل وياج امرأة شابة وتصرفاتج ببراءة الاطفال هو كان يحجي وياي واني صافنة على كلامه كان لاول مرة مهيمن ينطلق وياي بالكلام بدون قيود يمكن هاي اطول محادثة بيني وبينه صار هو يحجي واني استمع ما قاطعته ولا جاوبته فضلت التزم بالسكوت. حتى لو كان عندي اعتراض على بعض كلامه ما حبيت اقطع علينا جو الالفة كان كاعد متكيء عالحايط وباوع علية وكال .. اكلج انتي شنو ما تبردين من تصعدين للسطح بالله جلال يصعد فوك حتى يدخن انتي شعندج .. اهرب من غضبك لهنا مهيمن اني اريد اعتذرلك عن موقفي وياك بذاك اليوم من بستك بخدك التفت علية وعيونه متسعة .. ويلوموني من اكول مفخخة اريد اعرف هذا ما عليه كونترول كان يقصد على لساني .. شفت انت هذا عيبك ما تنطيني مجال احجيلك كبل تروح نازل علية بالكلام وتغلبني بالسانك .. اني بيوم الي شفتك زعلان شفت بيك عمو مؤيد اني كنت متعودة كلما يزاعلني عمو اراضيه وابوسه من خده بس انت اخذت الموضوع من غير زاوية وحسستني عبالك وحدة بنت شوارع واعتديت عليك فتح حلكه وهز راسه متعجب على كلامي وياه وابتسم.. يعني لا زلتي مصرة. تغردين بلسانج المزروف والله لازم يتخيط وانا بيدي اخيطه سحبت نقالي وفتحته وطلعت صورته هو وعمو الي دامجتهم سوية اخذ النقال مني متفاجيء ومصدوم بنفس الوقت وهمس بصوت مبهوت من المفاجئة .. هذا عمج مؤيد !!!!! .. اي نعم هذا ابوك احس بي صار يباوع للصورة بتمعن ودار علية مبتسم .. هسة صدك عذرج مقبول فعلاً الشبه بينا كلش كبير. رحت اقتربت منه وكعدت بصفه وتكأت عالحايط الوراي مثل ما هو كان. كاعد وحجيت بصوت هامس راح اطلب منك طلب بس ما تقلبها دراما .. كولي خليني انجلط اتحفيني .. اتمنى احط راسي على كتفك باوع علية وضحك .. والله احلف عليج مخبلة مو عاقلة كان كاعد بصفي وكتفي بصف كتفي لزمني من راسي وميله على كتفه وكال .. تعاي يابعد عمج شكلي راح انگلب عمج وخالج وخايف لا يجي اليوم واصير امج ابتسمت وحضنت ذراعه مهيمن وهو يضحك .. ها شو صرنا طماعين همست .. اشششششش لا تخرب علية اللحظة بتعليقاتك غمضت عيوني ........ ((دع كتفك وسادة راسي فأنا احبك صارحني أيمر طيفي ببالك كطيفك لم يفارفني تعال اقترب ادنو مني الفك بأحضاني تعال انثر شذى ليلك واضعني بغياهب صدرك فأنا احبك ايا ويلك ان قطفت ثمرك الداني ولتكن نهاية صبري واحزاني ان سافرت يدك السمراء بين مفاتن اغصاني واشم عطرك الرجولي لطالما شوقي اليه اعياني)) بقلم هدى سعد نور يوم ثاني الموقع في المنتزه واكفة اباوع لرغد الي كانت واكفة كدامي ووجها مخطوف لونه كنت لازمة نقالي واني مصدومة شنو الي جاي يصير يتبع | ||||
|
| |
|
08-09-19, 09:13 PM
| #24 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_اثنان_وعشرون #الكاتبة_نهى السلام عليكم ورحمة الله وبركاته اسعد الله مساءكم يا احبتي المتابعين ❤️ يا عمري انتوا احب اكلكم اني ما انقطعت عن الكتابة وانما هي اجازتي يومين خميس وجمعة وسبق ان اعلنت هالشي قبل لا ابدي بالقصة فشكراً لتفهمكم وان شاء الله اذا صار عندي مجال اكتب لكم بارت ما راح اقصر وياكم لخاطر عيونكم تستاهلون اكثر من بارت نور اليوم كعدت من وكت كلي نشاط لان اليوم مهيمن وعدني يطلعني اني والبنات للحدائق وهناك راح التقي برغد كنت كل شوية اشتغل واراسل رغد مثلما تعودت كل يوم اني وياها نتراسل لزمت النقال وكتبت .. اكول يا حلوة تدرين اني وياج اليوم حجينا بكل شي الا شغلة وحدة رغد.. شنو ، ما اتذكر نسيت شي ما حجيته حتى جوارينا حجيتلج عنهم وكلتلج صفية جابت ابتسمت وكتبت.. خرب يومج رغد اي اعرف وصار عندها ولد ما تركنا واحد بحاله فارين العشيرة فر رغد.. بعد شنو الشغلة الما حجينا بيها .. حياتي نسينا نتناقش شنو راح تلبسين حتى اني اختار نفس الالوان رغد.. ما اعرف بس راح البس ابيض وجينز وانتي هم لبسي نفس الالوان ابتسمت .. اممممم يعني ابيض تذكيرني بأيام الكلية مالتي خرب يومج رغد.. اكول نور صدك انتي هم حبيتي بالكلية يعني انتي حلوة ، ما صادفج واحد ابن حلال علاقات وكذا .. بالحقيقة دخلت الكلية وطلعت واني كل شي ما مفتهمة منها. .. يا ليش .. لان صادف وية دراستي امي اتوفت وانتكست صحتي واخذت فترة كلش طويلة منطوية على روحي اضطريت اكذب واجاوبها هيج صعبة اكوللها على صابر هو سبب عقدتي من الرجال وعدم اهتمامي بنفسي .. اها يعني ولا مرة حبيتي .. لا ما اجذب عليج اني حبيت مرة وحدة بس كان حب من طرف واحد .. اي ومنو هذا الي حبيتي .. واحد اسمه امير كان يتواجد بنفس المكان الي كنت اشتغل بي ببغداد كان كلش طيب صاحب مواقف مشرفة وياي .. وشمعنا هو حبيتي .. بالحقيقة لان كان شاب محترم وشخصيته وتصرفاته وحنيته وتعامله ويه امه واخته هي الي خلتني اتعلق بي واحبه طبعاً بس كنت احبه بيني وبين نفسي ومع الاسف هو كان يشوفني مثل اخته وتالي خطب وحدة من اقربائه وربي تمم عليه .. هو الخسران عوفج من سيرته الي تجيب وجع الراس والضوجة وكوليلي الناس الي اجوي اتقدمولج شنو صار بموضوعهم .. مهيمن سأل على الولد وطلع خاطب قبلي مرتين وفاسخ الخطوبة ومهيمن بس عرف بالموضوع راسا كال لخالة رجعي خبر للناس كوليلهم اخوها رافض يزوجها وخطية خالة ام مهيمن كعدت تحاول تقنع بي .. احسن زين يسوي عين العقل زين نور اريد اسألج فلنفرض لو اخوي عناد يتقدم لج. توافقين عليه ؟؟ عقدت حواجبي ورديت .. اخووج ؟؟ .. اي اخوي .. والله ما اعرف شنو. اكلج بالحقيقة سؤالج فاجئني بس بما ان انتي كلتي لنفرض اذن راح انطيج جواب افتراضي اني مستحيل اوافق على اي شخص قبل ما اخواني يصدرون موافقتهم واقتناعهم بالعريس المتقدم طبعا بغض النظر اذا كان اخوج او غيره بالنسبة لعناد اني ما شايفته غير مرتين بس كونت عنه انطباع مبين عليه شايف نفسه وثقيل دم ومتكبر رغد.. حييييييييييل هاي الصفات السلبية كلها بأخوية مسكين ياعناد لو يدرون بيك. شلون حنين وحباب واخو خيتك كان ما كالوا ابد هذا الشي عنك اي بس تعالي كوليلي انتي شنو شفتي على اخوية حتى رحتي حللتي شخصيته هيج .. صادفته مرة ببيتكم وسمعته يحجي على اخوية مهيمن بوكتها حيل نرفزني ولوما عيب وزحمة كان انطيته كم كلمة بالعظم ارد بيها اعتبار اخوية. بس كانت الكاع محظورة. رغد.. نور الله عليج لا تظلمين اخوية بحكمج عليه يعني هو كان بوقتها بين اخوج وعناد حزازيات ومشاكل سوء تفاهم بالشغل لذلك كانوا مو على وفاق فأنصحج تغيرين فكرتج عن عناد .. ههههههه اكلج اشو انتي گلبتي الموضوع جد انتي مو قبل شوية كلتي فلنفرض وبعدين تعالي ما اتوقع نظرتي على اخوج راح تأثر عليه شوية دزتلي صورة كانت لعناد. كان كلش مرتب وانيق اتمعنت بشكله وكتبت لها .. يابة هي كوة مبين من خشمه انفة ومتكبر اي صحيح هو الي يشوفه يكول عليه متكبر بس الي يعاشره يتفاجيء بشخصيته .. اكول شلون بالله اليوم راح نكضيها كله كلام عن اخوج بالله شو روحي خلي اكمل شغلي ريم لازمة كتابي وصافنة افكر بكلام مهيمن وياي البارحة كانت احلى واجمل لحظات ابتسمت واني اتذكر كلامه وياي مهيمن .. ريم انتي جبيرة مو صغيرة ليش ما تبدين تغيرين من تصرفاتج باوعت عليه .. ليش شبيها تصرفاتي ابتسم .. لا استغفر الله كلشي ما بيها تصرفاتج بس تجيب الجلطة للمقابل لو طارت طيورج .. اشرت على روحي ..هاي علية اني اجيب جلطة .. لا مو عليج على امي برطمت شفايفي .. عابتلك صاير تقلد بس من صدك شنو اسوي لتصرفاتي هاي اني حاولت بس اشوف صعبة اتغير .. ماكو كلمة صعبة اتغير المثل يكول من عاشر القوم اربعين يوم صار منهم وانتي عاشرتينا اشهر ولازم تصيرين مثلنا اتمنى تباوعين لنور وتتخذيها قدوة بتصرفاتج اريدج تنتبهين على حركاتها وكلامها وتصرفاتها. .. اي صحيح نور كلش طيبة وحبوبة. وطبخها يجنن .. مو بس هيج وضيفي عليهم نور تتحلى بكل صفات المرة الرزينة اباوع عليها تكون منتبهة. لكل حركاتها من تريد تكعد ومن تگوم حتى من تريد تحجي يكون صوتها ناصي وحتى بكلامها ويانا انا وجلال ووية اي رجال توزن كلمتها قبل لا تحجيها بالحقيقة خلتني افتخر انا عندي هيج اخت ترفع الراس كنت اراقب شفايفه بين لحيته وشواربه شلون تتحرك وهو يحجي ومعاني وجهه وتقاطيعه الحاده شلون تتغير من ينفعل لزمت ايدي بقوة بيدي الثانيه لان اكو فكرة براسي تدور امد ايدي اتحسس وجهه وشفايفه كان يباوع كدام من يحجي وياي بس شكله حس على هدوئي والتفت يباوع علية كنت سرحانة اباوع عليه وانتبهت من صفنتي ونفضت راسي اوووف صارله ساعة يحجي على البنية المثالية واني صافنة بغير وادي اريد اعرف بشرة وجهه القوي شلون راح تكون تحت اطراف اصابيعي نسيت شنو حجة مهيمن .. احم شنو مضيعة بوجهي شي .. لاما مضيعة شي بس كنت افكر بكلامك صحيح هو اني لازم اتغير ابس اريدك تعرف شي واحد وتخلي ببالك ان كل تصرف يبدر مني يكون بتلقائية مالي قصد بي يعني مثلما تعرف اني كنت عايشة طول عمري برة يعني ١٧ سنة اني عايشة بحرية بملابسي وتصرفاتي وبكل شي بس ما عدا الخطوط الحمراء ما يوم اتجاوزتها رفع حاجبه .. مثل شنو هاي الخطوط .. يعني ما يوم طلعت من البيت بدون علم عمو. ولا يوم اتصرفت تصرفات رعنة اروح لسهرة وية البنات او اطلع وية شاب لحفلة يعني تخيل اني الوحيدة ما سويت علاقات مع الشباب. عمو الله يرحمه هو وعمة اسيا كانوا كلش متشددين علية بهيج امور اباوع عليه نطت عيونه والوجه صار نار وحجة من بين سنونه كوة لازم نفسه يا يخنكني .. ولج غضب انتقام ما يصير تحجين وياي هيج كلام سكت ومسح على وجهه ،غمض عيونه بصبر .. شفتي شلون هاي وحدة من الامور الي اريدج تغييرها وتنتبهين عليها لسانج الي دائما يشطح ويسحب خارجي .. شبيك عصبت انا ما حجيت شي غلط يعني جاي احجيلك عن حياتي قبل حتى تفتهمني .. اهوووو هاي البنية اليوم ناوية علية ولج انتي من ورة هذا لسانج المفروض اخليج بغرفة واقفلها عليج يالله تنحل سالفتج لكزته من خاصرته .. .. زين انت ليش هشكل مهتم وتريد تغير من تصرفاتي .. شوفي ريم انتي بنت عمي وعرضي وضيفي فوك هذا كله اذا انتي راح تصيرين زو...... انتبه على على نفسه وكال .. وضيفي فوك هذا كله انتي راح تصيرين مرة واريد افتخر بيج من اكول هاي بنت عمي .. يعني بس تريد تفتخر بية ماكو شي ثاني .. خليها للايام ومن يجي يومه انا راح اكلج شنو هدفي من كلامي وياج ..... انتبهت من صفنتي على لكزة حوراء باوعت عليها.. يالله تحركي هم يالله نبدل ونحضر نفسنا مهيمن راح يجي ياخذنا .. نور وين .. نور حضرت نفسها من العصر طفرت من مكاني .. يعني من ورانا تحضر نفسها .. اي اليوم نور انسيها لان صديقتها رغد راح تجي يعني اتوقعي بعد ما راح تهتم للصغار الي مثل حلاتنا جاوبتها .. حياتي احجي عن نفسج اني عني امرأة والعمر يشهد اكبر منج بسنة .. ما دام انتي امرأة ماشاءالله معناها تفتهمين بالامور احسن مني انا كم مرة منبهة عليج تتركين صبا وما تمشين وياها .. اهووو هم رجعنا لصبا اي غير تكولين شنو شبيها البنية انتي نفس الطبع مثل اخوج بس تنطين. تصريحات وتدورين وجهج وترحين من غير ما تفهميني واني من غير ماافهم مااسمع لاحد دخلنا لغرفتها حتى نبدل ملابسنا سدت الباب وكملت كلامها .. اها يعني اذا كلتلج عن الاسباب راح تعوفيها .. اكيد اتركها اذا كان هناك سبب مقنع حتى اعوفها .. والله يامحفوظة السلامة. ترة صبا تصير اخت زمن وسمعتها. زفت والي تمشي وياها وترافقها معناها مثلها زبالة .. يعني من يا ناحية سمعتها زفت يعني هي حرامية مثلاً. او نصابة او عراكة .. ولا هاي ولا ذيج. كل ما في الموضوع البنية كل يوم تمشي وية ولد شكل الله يكفينا شرها .. اي بس هذا الشي الي دتسويه على نفسها ما تأثر على احد ما راح تضرني بشي بدلت ملابسها وكملت .. لا ريم كلامج مو. صحيح ترة صديقة السوء راح تلوث سمعتج حتى لو كنتي بنت نبي .. على فكرة اني ما مرافقتها هي الي تجي وتكعد يمي يعني بنية تجي وتحجي وياي مو من المعقول اطردها واكللها. روحي كومي ما احجي وياج لان انتي كل يوم تحبين ولد شكل اوك هالشي خاص بيها احنا شعلينا شنو دخلنا بالموضوع حوراء.. اهووووو هاي عبالها عايشة بالخارج بابا اصحي انتي هنا بالعراق ريم نصيحة لا تستهانين بالموضوع لا يسمع بيج مهيمن تمشين وياها وتصير مو خوش .. اوك راح احاول اسحب نفسي من عندها بالتدريج من غير ما تحس علية حتى لا انحرج وياها ولا اجرحها .. عفية عليج هسة بديتي تفتهميني بدلنا ملابسنا وجهزنا نفسنا ومهيمن اجة هو اللاخ بدل ملابسه كنت متعودة اشوفه كل يوم بملابس الشغل العادية بس اليوم بدل وطلع على اربعة وعشرين حباية من غرفته عطره سبقه شكد احب العطر الرجالي يترك اثر وراه بالمكان وين ميروح باوع علية اني وحوراء ونور يشوف ملابسنا واتوقفت نظراته علية وكال .. لو بس تعدلين الحجاب جان انا بخير .. ليش شبي شال وحاطته على راسي بعد شسوي اكثر .. اي بس شنو الفايدة حاطته كفيان شر كنت لابسة الشال بصورة عادية بدون دبوس او لف بس اسمه مغطي شعري اباوع عليه كوة لازم نفسه ما يبطل الطلعة كلها مهيمن .. هسة مو هذني البنات وياج شوفي شلون مرتبات كان يحجي عبالك جاي يقنع بطفل برطمت وعدلته وضميت فقط مقدمة شعري بدون ما الفه واني انافخ برطمت شفايفي .. خربت كشختي من وراك ابتسم على شكلي وكال .. وربي هسة صرتي احلى وارتب هو كال حلوة واني مزاجي اتغير ١٨٠ درجة ابتسمت له اني اعرف بنفسي حلوة وسامعة انواع الغزل من اطلع لكن هو الغزل منه يختلف غير طعم التفتت وكان تصير بوجهي حوراء فاتحة حلكها على مهيمن مستغربة كلامه وياي نور وصلنا للمنتزه واتصلت على رغد حتى انطيها خبر بوصولنا للمنتزه حتى تطلع لان همة جايين قبلنا وردت علية رغد.. الو هلو نور شلونج حياتي .. رغد احنا وصلنا انتوا وين وكعدت رغد توصف لنا المكان الي همة كاعدين بي ورحنا عليه ولكيناها كانت كاعدة هي وكم بنية وامها جاية وكم طفل واخوها عناد وحيدر هم جايين وياهم شافونا وكامو من مكانهم حتى يسلمون ورغد اجتي ركض سلمت علينا سلمت عليهم وكعدنا اني والبنات وياهم وعناد وحيدر ومهيمن راحوا كعدوا على غير ميز بس قريب يمنا حتى ناخذ راحتنا كعدنا نسولف اني والبنات سوية. لكن انتبهت لام رغد كل شوية تسألني عن حياتي وعلاقتي وية مهيمن وكانت تعرف هواي معلومات عني وعن اخواني وكالت حتى تبررلي معرفتها بينا .. الحجي صديق الوالد ولطالما هي تسولف وياي نظراتها تتفحص شكلي وجسمي من فوك ليجوة عبالك جاي تعاين بضاعة كانت كاعدة بصفي وحجت وياي اكثر من ما حجيت وية رغد رغد اندمجت وية البنات حوراء وريم التفتت عليها وكلت .. شنو رغد انتي مو كلتي بس نروح للمنتزه اصعدج بالطراد رغد .. ها شنو اي صدك اكو هنا طراد عقدت حواجبي احس رغد شخصيتها بالنقال تختلف عن شخصيتها بالواقع بالنقال تكون منطلقة مالحك عليها من تكتب ومرحة بس اشو هاي تختلف كمنا اني والبنات ومهيمن اشرلنا بحركة ( وين رايحات ) جاوبته .. وية البنات نركب الطراد اتمشيت وية البنات خوات رغد وريم وحوراء كنت امشي بصف رغد ولكزتها .. اكول يا حلوة شنو هاي الخيانة اشو ما لابسة الملابس الي اتفقنا عليهم ابتسمت وكالت.. هااا اي ااا مو غيرت رأيي باللحظة الاخير وبدلتهم لزمت كلادتي اراويها .. شوفي شنو لبست باوعت للكلادة. بعدم فهم وكالت .. الله شكد حلوة هاي منين اشتريتيها عقدت حواجبي وجاوبتها .. هههههههه صدك حلوة حبيتها منج صايرة هواي تتشاقين. روحي سألي المحل الي اشتريتيها منه وهو يكلج منين ضربت على كصتها .. اهووووو صدك هاي شلون فاتتني ونسيت .. هو انتي اليوم مو طبيعية حوراء والبنات جاي يمشون ويانة ويحجون عالزواج ويقلدون على الشكولات الي يشوفونها وحوراء التفتت على رغد وكالت .. اكول رغد وانتي شنو شوكت يجي دورج وتنخطبين رغد جاوبتها .. بالحقيقة اني محجوزة لابن عمي وبس يخلص دراسته ويرجع من برة نتزوج عقدت حواجبي مستغربة من كلامها اشو هي ما كالتلي اتذكر ذاك اليوم كالت اريد ابقى ببيت اهلي التزمت السكوت وصرت اراقب رغد وتصرفاتها وية البنات واتعمدت اسألها عن اشياء كنا نتناقشها سوية بالايام العادية اباوع عليها تاخذلها صفنة يالله تجاوبني ركبنا الطراد. وبعدها ركبوا البنات هواي العاب اني ما شاركتهم فقط الطراد لان اخاف وبهاي الاثناء نزلوا البنات من اللعبة واجوي يمي وسألتهم .. هاي شنو لعد وين رغد نسرين اختها كالت .. رغد راحت للحمامات تعدل حجابها والتفتت عالبنات يالله بنات امشوا خلي نصعد سفينة نوح حوراء.. اي عفية انا متحلفة اركب كل اللعب جاوبتهم .. انتوا روحوا ركبوا بالالعاب واني رايحة لرغد للحمامات بس اشرولي من الحمامات نسرين اشرت .. شوفي يم ذيج البناية هناك .. اوك تمام ريم كالت .. نور اخذيني وياج اني اكتفيت من الالعاب ولعبت نفسي هذني العابكم كراسيها حديد تكسر الظهر ما مدشنيها كانت تقصد على مقاعد الالعاب اغلبها تكون حديد ما عليها شي راحوا البنات واني وريم اتجهنا على عالحمامات طلعت نقالي من الجنطة حتى اتصل على رغد واسألها وين يدك نقالها وتنطيني رفض شوية واقتربنا اني وريم من الحمامات ولفت انتباهي وقوف رغد يم اخوها عناد على صفحة. قريب عالحمامات. رفعت حاجبي .. ايا ثولة اتصل عليها وتنطيني رفض ورجعت اتصل عليها بالله اريد اشوفها هم تنطيني رفض حتى من صدك ازعل كنت واكفة. قريب عليهم بس ما منتبهين علية لان المنتزه هوسة بي هواي ناس ودكيت عليها مرت اللاخ واتخصرت بزعل اراقبها بالله هم تنطيني رفض لكن هنا كانت صدمة عمري اتصلت ودك نقال عناد طلعه من جيبه. وانطاه لرغد .. هاج جاوبي نور دتتصل عليج وجاوبتني .. الو هلو نور فتحت حلكي متفاجئة .. رغد!!!!!! بس صحت بأسمها التفتت هي وعناد متفاجئين بوجودي واكفة اباوع لرغد الي كانت واكفة كدامي ووجها مخطوف لونه كنت لازمة نقالي واني مصدومة حجيت بصوت مبهوت وخايفة .. فهموني شنو الي جاي يصير رغد اقتربت علية .. لحظة نور خلي افهمج الموضوع ارتديت للخلف .. لا تقتربين مني وجاوبيني على كد سؤالي عناد.. نور انا راح اجاوبج التفتت عليه بغضب .. اني ما سألتك كلامي موجه لصديقتي الي امنت بيها رغد باوعت عليه بغضب .. شفت عناد هذا الي كنت خايفة منه همة يحجون واني گلبي يريد يطلع من صدري صرت كلي ارجف عناد.. نور اهدي شوية. وخليني افهمج الموضوع كله .. ما اريد افتهم اي شي بس اريد اعرف اني طول المدة. الي فاتت كنت اتراسل وية منو بيكم عناد.. كنتي تتراسلين وياي شهكت حطيت ايدي على حلكي وراتديت للخلف .. لا مستحيل يعني شنو كنتوا تضحكون علية زين ليش احس راح اتقيء او يغمي علية عناد .. نور انطيني فرصة افهمج قبل لا تحجين ريم لزمتني من كتفي .. نور اهدي لا تعصبين منا الناس صار منظركم ملفت للانتباه باوعت عليه .. انت ليش سويت هشكل زين شنو كلت لروحك من سويت وياية هيج ما استحيت من ضحكت على اخت اصدقائك مهيمن وجلال ماكلت شنو راح تكون ردت فعلهم من يعرفون بالموضوع جاوبني .. نور والله العظيم قصدي وياج شريف نيتي الزواج وابوي قبل فترة حجة وية مهيمن وطلب ايدج الي للزواج ومهيمن كال انطونا فرصة نفكر ومن ذاك اليوم احنا منتظرين مهيمن يردلنا الخبر وانا ما كان عندي صبر وحبيت اتواصل وياج واتعرف عليج وماكو طريقة اتواصل وياج بيها غير بس هاي لان اعرف كلش زين اذا طلبت منج تتواصلين وياية راح ترفضين .. حتى لو. هذا مو عذر انت مو من حقك تسوي بية هشكل وتوهمني كل هاي المدة واني الي امنت بيكم عناد.. اترجاج تفهمين موقفي وداعت ابوية الما عندي اعز منه. انا من يوم الي راسلتج اعتبرتج عرضي وحلالي .. عن اي حلال تحجي وانت الي سويته بية كله حرام واصلاً منو كلك اني راح اوافق عليك بعد الي كل هذا الي سويتة كنت احجي بعصبية وفجاءة اتذكرت الصورة الي رسلتها لرغد والكلادة وغيرها من الهديا وهزيت راسي وكلي ارجف .. لو كانت عندك ذرة غيرة وشرف هسة كدامي تمسح صورتي لان اني المغفلة امنت بيكم ورسلت صورتي لك وسلمت شرفي بيدي بدون علمي حجيت كلمتي الاخير ونزلت دموعي مهضومة على نفسي عناد باوع علية بقهر وكال .. ولج نور مسحي دموعج لا تبجين انتي بحسبة عرضي واذا كان على الصورة هاج هذا النقال ومسحي انتي بيدج مدلي النقال وابتعدت عنه وكلت .. وشنو الي يخليني اصدك بيك ومنو يكول انت ما ناسخ الصورة وحافظها بغير مكان او راسلها لأي واحد ثاني اني ما عندي اي ثقة بيك وفعلتك وياية تثبت صحة كلامي اباوع عليه غمض عيونه بغضب لزم النقال ورگعه بالكاع كمزت من مكاني على صوت كسر النقال حتى كم واحد كان فايت من يمنا والتفت على عناد يباوعون عليه مستغربين تصرفه وسحك النقال برجليه وكال .. اتطمني يا بنت الناس شرفج محفوظ ما عاش الي يدنس شرفج وهذا انا كسرت حتى تتطمنين وتتأكدين ان انا مالي نية بأذيتج نور كل الي صار بيني وبينج من محادثات كانت صدفة وكلامي وياج خلاني اتعلق بيج وحبيتج والله الشاهد علية .. ما اريد اسمع منك اي حجاية والتفتت لرغد .. مع الاسف عليج. المعروف عنكم انتوا اهل غيرة واصل ليش وصلتوا يم نور ونسيتوا اصلكم شلون انطاج گلبج تخدعيني مو انا حبيتج مثل اختي وابتسمت بأ ستهزاء وقهر غمضت عيوني .. والمشكلة رغم الي عرفته وبعدني جاي احجي وياج واعاتبج على صداقة اصلاً. ما لها وجود هذا كله كان كذبة. درت وجهي ومشيت وسمعت صوت عناد كان يلعن ويشتم وريم مشت وراي متفاجئة من الي سمعته ريم .. نور عفية مسحي دموعج لا يشوفج مهيمن ريم من يوم موقف عناد ورغد وية نور وهي من يومها انتكست صحتها اباوع عليها مثل الشمعة وانطفت حاولت اساعدها حتى تطلع من حزنها وتجتاز هاي الفترة لكن نور كانت بغير عالم فاصلة عن الكل كعدت الصبح اني وحوراء للدوام ولكيت جلال ومهيمن جاي يتريكون ونور وام. مهيمن كانوا يعدلون بالكاونتر شكلها ام مهيمن اليوم عازمة لان جاي يطلعون مواعين كومة سلمنا عليهم ومهيمن رفع راسه وباوع علية ولملابسي وابتسم واشر على راسه عرفت شنو المقصود اعدل شالي عدلته وبرطمت مهيمن كال .. عفية يا بعد عمج حوراء رفعت حاجبها وباوعت علية وعلى مهيمن بشك واني صرت اوزع ابتسامات قطع علينا نظراتنا سؤال جلال الهامس جلال .. اكول ريم شبيها نور هاي الايام احس مو على بعضها كان يحجي ويباوع لشكل نور الهاديء الذبلان مرت من يمنا وكانت تحجي وية ام مهيمن نور.. خالة اني بالاول راح انظف الاستقبال وبعدين البيت ام. مهيمن.. اي خالة الله يرضى عليج انتظرت نور تطلع وجاوبته اطمنه عليها .. جلال لا تخاف نور ما بيها شي بس شوية مريضة .. اي بس اشو اني جاي اشوف اختي مثل المكسورة ما عبالك مريضة مهيمن .. حتى انا ملاحظ عليها هذا الشي انا اليوم احجي وياها. واشوفها شبيها ام مهيمن جاوبته .. ولك يمة اختك بعمر زواج وكل وحدة بعمرها تفكر شلون تكون عائلة وتخلف اطفال يعني اختك حالها حال اي بنية تفكر بالزواج وانت الله يحفظك ياهو الي يتقدملها تطلع بي الف عيب مهيمن.. اي غير بالاول يتقدملها واحد براسه خير شنو قابل ازوجها ياهو الي يجي ام مهيمن كالت .. انت مو كلتلي قبل فترة الحجي ابو حيدر طلب ايدها لأبنه عناد. شبي ليش ضربتها عالصامت لاسمعنا منك خبر ولا اي شي ما اعرف ليش تماطل بالسالفة جلال رفع راسه وسأله .. صدك عناد طالب ايد نور ؟ مهيمن جاوبه بأنزعاج .. اي صحيح عناد طلب ايد نور جلال بضحكة .. ايا ملعون واشوفه شلون صاير حباب ويوصلني اثاري الزلمة راسم على اختي مهيمن بزمخة .. جلاااااااال. عيب هالحجي جلال .. شبيك يا رجال جاي نضحك انت حتى الضحك ما تعرفه. بس خلي يصبرلي اني اعلمه اذا ما اسوي تصنيف جلال كان يحجي بتوعد ويضحك مهيمن.. لحظة جلال ما اريدك تفتح وياه موضوع الخطبة. لان انا بالاصل مغلس عليهم جلال عقد حواجبه مستغرب.. وليش تغلس عليهم مهيمن .. لغاية في نفس يعقوب الي بيها غاية. جلال.. وشنو هاي الغاية الي تخليك تعطل قسمة اختك .. انا ما معطل قسمتها انا جاي افكر واختبر الولد جلال.. والله خفت على عناد منك. شراح تسوي بالولد مهيمن.. ما مسويله شي تاركه للايام هي الي تسويله انا عني بس اراقب ومع الاسف لحد الان كل الي عرفته عنه ما يبشر بخير ام مهيمن .. مهيمن هاي امانة. المفروض يا يمة تسأل اختك وتجس نبضها وتطرح كل شي كدامها محاسن الرجال ومساؤه. وهي الي تقرر توافق لو ترفض مو انت من يمك. تقرر باوع عليها مهيمن وكال .. الله كريم اليوم من ارجع من الشغل اكعد وياها واحجي واشوف شنو ردها. همة كانوا يحجون واني اراجع احداث الصار بين نور وعناد واربطه مع كلامهم كان عناد مبين عليه من شكله يحب نور صحيح اني ما عندي خبرة عن الناس بس نظرات عناد لنور ما يحتاجلها علم مبين يصيح لأمه ولأبوه هذا الولد يعشقها مو بس يحبها. لنور بس يا ترى نور شنو شعورها اتجاهه من بعد الي صار طلعنا من البيت وحوراء نزلت علية بالاسئلة .. اي عيني ست ريم اشم ريحة خيانة بالجو باوعت عليها.. شنو تقصدين .. ما اقصد شي بس سألي نفسج انتي شنو ضامة علية .. انتي تعرفيني كلش زين ما يوم اضم عنج شي اشو تعرفين البير وغطاه .. اي صحيح انا اعرف البير بس غطاه ما اعرفه .. اليوم شنو القضية ست حوراء جاي تحجين كله بالالغاز احجي مباشر لا تظلين تلفين وتدورين .. تمام انطيج اياها من الاخير كوليلي شنو جاي يصير بينج وبين مهيمن على فكرة حتى امي انتبهت عليكم صارلكم كم يوم تتبادلون النظرات او بالاحرى اخوي مهيمن صارله كم يوم مو على بعضه وبس يوزع ابتسامات وشكله رايق ومتونس وهذا الشي جديد عليه وانتي يا وكت اجيج الكاج صافنة وساهية بوجه اخوية ابتسمت وجاوبتها بصريح العبارة .. اي انا احب اخوج وميتة بهواه. هسة ارتاحيتي حوراء.. يا عيب الشوم وهيج تكوليها بوجهي بكل بساطة يعني يا اختي على الاقل مثلي كدامي وسوي حالج خجلانة ومستحية .. وليش اخجل واستحي من حبي له .. لج عوبة اني اخت الولد .. اكول بطلي سوالف المعقدين لا تخليني هسة اروح لامج. واغنيلها ( هذا الحلو كاتلني يعمة فدوة شكد احبه واريد اكلمه حوراء جاوبتني .. وامي تغنيلج (هاچنة .. وهاچنة. .. انطيني رباي واخذنه ) .. اتحدى وحدة تحب مهيمن مثلي حوراء.. اي خية مبين عليج بس صدك هاي من شوكت وكعتي بحبه اشو انا ما منتبهة عليج .. من اول يوم حط رجله بمكتب المحامي ابو سيف واني بديت انعجب بي. ومن وصلت هنا لبيتكم كنت فقط مجرد اعجاب. وبعدين اتعلقت بي. وما حسيت على روحي الا واني واگعة بحب اخوج. كنت اراقب كل حركاته شلون ياكل شلون يعصب شلون يضحك. كل شي بحيث صرت اعشق كل تفاصيله احبه وهو زعلان واحبه هو راضي واحبه في كل حالاته ..حوراء كملت كلامي . اي اي بعد عنده هواي حالات الحالة الغازية والحالة السائلة والحالة الصلبة بس ها ديري بالح ويا ويلج من يتحول اخوي للحالة الصلبه. يصير. راسه اعند من الحجر لو يعرف على قطع ركبته ولا يطخ راس دفعتها عني .. غبية كاعدة تضحكين علية واني منطلقة وياج بالكلام عابتلج وصلنا للمدرسة. واول ما دخلنا استقبلتنا. نغم بنت خالها وكانت شايلة الشاش حوراء شافتها وشهكت مصدومة وضربت كصتها وكالت .. هاي شلون بلوى. وين جانتلك هاي يا مهيمن التفتت عليها وكلت .. شكو حوراء شصاير التفتت علية وباوعتلي وكالت ........... نور من يوم الصار واني احس بروحي منزوعة اي لان الصار بية مو شوية صعبة. تتعلق بشخص وتأمن بي ويصبح كل عالمك رغد او بالاحرى عناد ومراسلتي اليومية وياها اتعودت ابدي يومي وياها وانهي وياها عرفت عني كل شي واني كنت اتوقع اعرف عنها كل شي او يمكن عناد كان يرسل معلومات خاصة بي صرت اعرف طبعها مدري طبعه من خلال كلامها بالنقال صرت كل يوم اكعد من النوم والزم النقال وادخل على رقم رغد او عناد. بعد الي صار انطيته حضر لان بيومها بالليل كله كان يراسلني ويعتذر ويحاول يحجي وياي لحد ما انطيته حضر يالله ارتاحيت ما اريد احتك بي او انطي اي فرصة صرت اگلب المحادثات الي كانت بيني وبينه وارجع المحادثات القديمة وهالمرة صرت اباوع لكل كلمة واتخيل عناد هو الي كان يحجيها ويقصدها كنت مرات انسى نفسي وابتسم على بعض كلامه احس بروحي ضايعة ومتشتتة حتى خالة ام مهيمن انتبهت علية وكامت تقرأ على راسي المعوذات ام مهيمن .. خالة هاي والله عين انتي ما شفتي النسوان من شافوج بالعرس مال بيت ام احمد هيج اكلوج بعيونهم من اشوف حرص ام مهيمن وخوفها اخجل من نفسي حتى جلال ومهيمن انتبهوا علية وجلال صار كل شوية يجي يكعد يمي ويباوع لوجهي عبالك طفل يزعل على زعل امه خطية ساعة يضحكني بسوالفه حتى يلهيني وابن الحلال بذكره. دخل علينا وسلم علينا انتبهت لحوراء كانت تسوي سلطة واول ما شافت جلال دخل انخبصت هاي البنية شغلتها مو خالية شمعنا من تشوف جلال اخوية تنخبص ام مهيمن .. اي والله اجيت بوكتك هسة سديت النقال من مرت اخوي. وكالت البارحة البنية السألت عليها بالعرس جلال سألها مستغرب .. شبيها البنية ام مهيمن بجدية لمعت عيونها .. البارحة شفتلك بنية وانت ما محلفني تكول للگمر گوم وانا اكعد بمكانك جلال حجة بحذر .. اي خالة كملي .. وكعدت اسأل عليها هاي الحلوة وين اهلها واليوم مرت اخوي اتصلت علية وجابتلي المعلومات .. تكول البنية اسمها حنان وعمرها ٢٠ سنة وتداوم بالمعهد جلال .. لحظة خالة انتي ليش تكوليلي كل هاي المعلومات ام مهيمن .. يا خالة غير اريد اخطبها الك مو انا اريد ازوجك انت ومهيمن بيوم واحد ومن شفت هاي البنية كلت ما تلوك الا لجلال سمعنا شهگة والتفتت باوعت لحوراء شكلها جرحت ايدها لزمت صبعها وعيونها تتحرك مثل المحروكة منا ومنا ام مهيمن .. يا يمة حويرة شبيج ما تنتبهين حوراء الدمعة معلگة بعيونها باوعتلي وكالتلي .. حنان جيبيلي كلينكس او اي شي احطه عالجرح عقدت حواجبي مستغربة ورحت بسرعة جبتلها شاش من صيدلية ام مهيمن وانطيتها وكلت بصوت ناصي.. هاج يا حلوة بس على فكرة اني اسمي نور. مو حنان اباوع عليها خدودها صارت احمر اخذت الشاش من ايدي وكعدت تلف صبعها درت وجهي وباوعت لجلال الي كان عين على حوراء وعين على ام مهيمن وكال .. خالة اروحلج فدوة انسي شغلة الزواج ولا تحطيني ببالج بالاول زوجي مهيمن وعود لاحگة علية ولزم نقاله واتصل على بيت خاله مكالمة فديو سلم عليهم وصار يحجي وية خاله انا اعرف جلال ليش يتهرب من سيرة الزواج لان هو حياته لحد الان مو مستقرة خصوصاً هو ما معروف بعد انتهاء السنة وين يستقر لذلك ما يريد يربط روحه بهيج امور من اتذكرت شرط الوصية وانتهاء السنة گلبي عصرني ما جاي اتخيل روحي ما اشوف جلال ومهيمن باوعت عليه شلون يضحك ويسولف وية بنات خاله التوأم رنين ورند واسراء وزوجة خاله كان يحجي وياهم وراح يم خالة ام مهيمن ووكف بصفها ووجه عليها وكال لأم مهيمن .. خالة تعاي اعرفج على سرب القائد آكسى حوراء حجت بصوت ناصي .. شعنده نيلز اليوم كايم علينا ويعرفنا على عائلته ام مهيمن ابتسمت بكل ود وكالت .. يا هلا ومية هلا بيج خية مرت خال جلال سلمت عليها .. هلا ومرحبا كثير نتشرف بمعرفتج يا طيبة جلال دوم يحجيلنا عنج وعن كرمج .. والله انا الي الشرف بمعرفتج وامانة تجون تزورنا بالبصرة. جلال .. خالة الله عليج وجهي الكاميرا على رنين ورند خلي تشوفهم ام مهيمن دارت الشاشة عليهن وام مهيمن گامت تصلي على النبي وكالت .. يمة فدوة للبنيات كانوا اولاد خاله. كلهم واكفين كدام شاشة النقال عبالك عندهم تصوير جلال حول الكاميرا علية انا وجوراء وكال .. نور سلمي على صديقاتج رند ورنين حوراء سلمت عليهم بأيدها .. ااوي فدوة. اررررريد هذولي البزازين كلهم خرب والله اشبعهم عض بنت خاله اسراء سألت جلال .. جلال منو هاي البنية ام العيون الكبار جلال .. هذا جعفر ابو الغاز ااااااقصد حوراء اخت اخوي مهيمن حوراء نطت عيونها بغيض وكالت .. ابو الغاز بعينك ان شاء الله هذا اخوج اكيد احول كل هاي الانوثة ويكول جعفر جان يحجي ويضحك هذا جلال كلما يجي يمي لازم يضحكني وينسني حتى ضوجتي الساعة بال٣ الظهر بعدما اتغدينا رحت دخلت للغرفة على حوراء وريم ردت اخذلي قيلولة كانوا يتهامسون بينهم ريم .. عفية حوراء انتي روحي كليله والله اخاف حوراء.. اني ما علية لا تحطيني بهيج موقف اني العلية سويته ضميت النتيجة مالتي لخاطرج حتى ما يسألون عن النتيجة الباقي عليج عقدت حواجبي وسألتها .. هاي شنو لج. ريم لا تكولين هم واگعة بالشهر الثاني دنكت وهي معبسة .. اي واكعة عفية نور انتي والوحيدة الي تكدرين تهدين مهيمن وتحجين وياه .. لج انتي شلون بيج وتالي وياج ليش هيج مستاهنة بمستقبلج كامت ريم تبجي ونحجيلي عن اسباب فشلها والله كسرت گلبي خطية عندها هواي عراقيل بس متحجي .. ليش متحجين .. گلت لجلال ووعدني يساعدني بس هو ما فارغ يطلع من الصبح يرجع يتغدة وبعدها يرجع للشغل وسوى الي يكدر عليه وفعلا الدرس الوحيد الي نجحت هو نفسه الدرسه الي جلال رحت كعدت يمها وحضنتها وكلتلها .. خلاص منا ورايح. انا راح استلمج. اگابلج واكعد اريد اشوف شلون ترسبين بعد كنا نحجي وسمعت صوت مهيمن يصيح لي طلعت من الغرفة ورحت عليه كان كاعد هو وجلال بالمطبخ وام مهيمن هم كاعدة يمهم شكلهم عبالك كان عندهم اجتماع مهيمن .. تعالي نور كعدي عندي موضوع وياج اريد احجيه رحت كعدت يم ام مهيمن .. اتفضل مهيمن اسمعك مهيمن .. طبعاً. من فترة. اجاني الحجي ابو حيدر وطلب ايدج لأبنه عناد هو ذكر الاسم واني گلبي كام يرعد .. اتوقع انتي شفتيه من رحنا للمنتزه هزيت راسي بنعم .. شوفي نور اريد احجيلج كل شي بخصوص هذا الشخص حتى انتي تقررين طبعا والده الحاج ابو حيدر واولاده ذهب صافي بس عناد يختلف عنهم وعنده سوالف تعبانة جلال عقد حواجبه معترض .. مهيمن مثل شنو السوالف التعبانة يعني انا عاشرت الولد ما شفت عليه شي والولد نزيه وصاحب نخوة. وفطن. وسبع بعد الواحد شيريد مهيمن .. لا جلال غلطان هاي الصفات لوحدها ما تكفي حتى ازوجه اختي جلال .. لعد شنو تريد بالضبط .. شوف جلال انت تعرف عناد عنده سوالف مكسرة مال نسوان وسهرات وهذا الشي ما ارضى عليه ولا اوافق بي بالنسبة الي لان اكيد نور راح تتعب وياه. وانا بحكم الامانة لازم اخبرها كل شي جلال بلع ريكه وسأله.. يعني اذا رجل يكون عنده سوالف نسوان ويسوي علاقات انت ما تنطيه. اختك .. اي اكيد انا اريد شخص يصون اختي ويحافظ عليها اريدها من تتزوج تكون مرتاحة مو كل يوم جايتني زعلانة لان ابو طبع مايجوز من طبعه التفت علية وكال .. شوفي نور انا عني مسؤول امام الله ان اكولج كل شي اعرفه ويخصه لعناد. ااي صحيح اريد اكولج بالمقابل هو رجل سبع وصاحب نخوة. ونزيه بشغله ويانا وانتي بكيفج اني كلتلج سيئاته وحسناته ام مهيمن.. خالة نور اخذي راحتج وفكري بكلام اخوج زين وقرري هذا زواج مو لعبة. سحبت نفس عميق وغمضت عيوني وجاوبته .. خالة ما يحتاج افكر اني رأيي من رأي مهيمن هو شنو يشوف ويقرر اني وياه اكيد هو يعرف الزين الي شنو باوع علية مهيمن وابتسم بفخر وكال .. نور انتي ذهب ومستحيل افرط بيج لذلك انا عن رأيي مستحيل ازوجج لعناد وربي يعوضج بالاحسن رفعت راسي وجاوبته .. خلاص هاي هي اتوكل على الله وبلغهم برفضنا ونهض مهيمن وكال يالله انا رايح للشغل ومناك انطي خبر للحاج ابو حيدر يالله مع السلامة نهض مهيمن وباوع لجلال الي ضربها صفنات شكله رفض مهيمن لعناد صدمة ، بس الصدمة من نوع اخر يعني بين قوسين هذا الشي شكل تهديد لجلال بالليل الساعة ب١٢ فوك السطح كنت احجي وية عناد .. عناد اترجاك بعد ما تتصل علية من اي رقم هذا ثالث رقم احضره وانت تتصل ورجاءاً. اذا كنت تريد شي تروح لأخواني التفتت واني بعدني احجي بالنقال وية عناد وكان يصير بوجهي جلال سحب النقال مني بكل غضب وكال بصوت يرعد .. ولك عناااااااااااد يتبع | ||||
|
| |
|
08-09-19, 09:17 PM
| #25 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_ثلاثة_وعشرون #الكاتبة_نهى نور بعدما قررت وانطيت جوابي لمهيمن حسيت براحة لكن ليش احس غصة بصدري والم لحظة نور... على شنو الالم على فكرة الي صار كله لصالحي اي هي الحياة دروس وشكل حظي يحط بطريقي الناس الغلط صابر وسعدون وامير وعناد كلهم يشتركون بصفة وحدة سيطرت على حياتي وهي الخذلان اي كلهم خذلوني كل واحد بيهم خذلني واذاني على طريقته بس شمعنا اني ، معقولة الغلط مني اتعوذت من الشيطان وباوعت للجانب الحلو بالموضوع حرص اخواني مهيمن وجلال علية وخوفهم حبهم وتمسكهم بية وحمايتهم الي تحسسني بالفخر بوجودهم بحياتي ويعوضوني عن خذلاني بالباقين لليل رجعوا مهيمن وجلال وهمة يتناقشون ام مهيمن سلمت عليهم وسألت مهيمن اول ما دخل .. ها يمة رديت على بيت ابو حيدر بخصوص نور مهيمن جاوبها وحواجبه معقودات .. اي رديتلهم خبر احنا رافضين وتفاجئوا حيدر وابوه. صار وجههم ينطي الوان .. ياااا شكد عيب والله هم بيت ابو حيدر ما ينرفضون بس هاي شغلات الشباب العوجة واحدهم من يبدي يسلك الطريق الغلط ما يفكر باجر عكبة الناس راح تذكره بغلطه الي صار وصمة عار بتاريخه وهذا المسكين عناد وكع بيها شكله ما مكتوبله الراحة جلال جاوبها ضايج .. والله خالة قهرني شكله اباوع لوجهه شلون انطعن طعن من سمع رفض مهيمن لطلبهم. والله ما اتمنيت اكون بمكانه يوم من الايام مهيمن.. جلال اعرف بك انت زعلان على صاحبك بس خلي ببالك الي صار لصالح نور واتوقع مصلحة اختك اهم من مصلحة صاحبك جلال.. اي بس والله كسر خاطري مهيمن.. والله خبصتنا ، تعال اكلك انت شنو لزكت كل شوية كلت كسر خاطرك هسة الي يسمعك يگول متقدم لنور عن علاقة حب وهو كله على بعضه شافها مرة وحدة وطلبوا ايدها واحنا رفضنا يعني عادي احنا لا اول ناس نرفض ولا اخر ناس البنية مثل العتبة ياهو اليجي يدوسها لا تكعد تنوح على صاحبك الاعوج انصحك تاخذ العبرة منه وتعدل روحك وتنتبه على حالك حتى لايصير وياك مثل الي صار بصاحبك روح نظف سجلاتك القديمة وابدي صفحة جديدة لان انت مصيرك مثله جلال جاوبه بصوت مبهوت .. الله لا يكولها فال الله ولافالك . ترة انا نظيف ماعندي سوالف عوجة واخلاقي تشهدلي وانت تعرفني زين وجربتني يعني ماله داعي لكل هذا الي كلته مهيمن.. هو منو الي كال شي عن اخلاقك حتى انت من يمك كعدت تعددلي صفاتك الحميدة هسة الي يسمعك هيج تحجي يكول طالب ايد اختي اباوع لجلال شلون وجهه كام ينطي الوان احتار شيجاوب مهيمن صار الكلام بالنسبة له مثل الغصة بالعظم كام من مكانه وكال .. خلي اكوم شكلك راح تطلع حركتك بية. بس على فكرة. برفضك لعناد خشنت خاطر الحاج ابو حيدر واولاده مهيمن.. لاتخاف عليهم الحجي واولاده عقلهم اكبر من هذا الشي ما راح يخلون هيج امور تخرب علاقتنا على العموم هي حتى نور رفضته للولد يعني الرفض مو مني من صاحبة الشأن نفسها كنت استمع لكلامهم وضل عقلي يكرر كلام جلال عن ردة فعل عناد كله من ايده يستاهل ، بس بعدني ما اعرف اني ليش ضايجة اجتي ريم وكالت .. نور نقالج صارله ساعة يدك رحت للغرفة كان نقالي عالشحن لكيت رقم غريب يتصل علية معقولة عناد يتجرأ يتصل علية ما رديت لان اني بية طبع من زمان حذرة ما ارد على ارقام غريبة وهسة بعد الي صار وية عناد وموقفه خلاني بعد صرت اكثر حذر لحظات وسمعت صوت مهيمن يحجي بعصبية علمود نتيجة ريم تركت النقال ورحت للمطبخ لكيت ام مهيمن حاضنة ريم وتحجي على مهيمن .. يمة على كيفك وية بنت عمك تراها يتيمة وامانة عندك ولا تهضمها .. يمة هو انا هذا الي راح يموتني لان هي امانة عندي اريدها تنجح وتنتبه لنفسها ريم تناشغ وتبجي .. والله حاولت حتى اسأل حوراء وجلال هم الي كانوا شاهدين علية بس شسوي مو بيدي المدرسات ناشبين وياي حوراء.. اي والله صدك خصوصاً مدرسة العربي تلقبها بالكسلانة كدام كل البنات بالصف تفشلها مهيمن .. تردين اروح للمدرسة هناك واكعد وية المدرسات واشوف شنو علتهن لو شنو اسوي كوليلي انتي شتريدين اسوي رحت يم مهيمن وحجيت وياه وصرت اهدي بي وفهمته على علة ريم ووعدته ان اني الي راح استلمها ريم راحت دخلت للغرفة وعيونها حمر انتبهت عليه شلون عيونه تبعتها لحد ما دخلت للغرفة وصار يحوم بالبيت مثل الواحد مضيع شي ميعرف شنو هو بس يدور عليه بعدين بدل ملابسه وطلع من البيت خالة سألته .. ها يمة وين طالع جاوبها.. يمة رايح وين ما عند الله گاع رحت يم خالة بالمطبخ كانت تحجي بالنقال وية اختها وكالت .. هو انا اريد افاتح اخوي حسن حتى اتفق وياه يعني هسة بس نخطب ومن تخلص سادس عود نزوجهم لان البنية جاي يجونها خطابة وما اريدها تروح من ايدي سكتت خالة شوية تستمع لاختها وبعدها كالت .. لا ما يحتاج اخذ رأي مهيمن. هو من زمان انطاني الموافقة ليش اسأله شنو رحمة الله من عادها وانا اعرف ابني يضوج من الملّحة لذلك كلت ارتب الموضوع واخلصه وبعدين اكول لمهيمن ادري ما يهتم بهيج سوالف مال المقدم والمؤخر وتجهيز البنية هي تحجي واني صرت احوم ما اعرف شصار بية كلبي احس صار يسعر نار على ريم محد يعرف حركة الخذلان بالحب غير المجرب ما اريدها تمر بهيج موقف ورة ساعتين رجع مهيمن للبيت دخل للمطبخ وعيونه تدور اجة يمي وكال .. شنو ريم ما طلعت من الغرفة .. لا ما طلعت وبعد انت تعرفها هي من تنقهر تحبس نفسها .. نور رحمة على اهلج ما تروحين تشوفيها بعدها اخاف بعدها تبجي بس ها ديري بالج مو تكوليلها مهيمن دزني اتطمن عليج باوعت عليه وابتسمت على كلامه شلون بيهم هذولي الثنين وانطاني علاكة .. هاج هاي حلويات الج وللبنات .. هسة حيرتني ادعيلك ربي ما يحرمنا من حنانك لو ادعي لريم الي بسببها اشتريت حلويات لان تدري بيها نقطة ضعفها الشكولاتة كنت احجي وياه واتذكرت كلام ام مهيمن عن بيت خاله قربت منه وباوعت منا ومنا حتى اتأكد محد موجود ويسمعنا وحجيت وياه بصوت ناصي .. اكول مهيمن انت شوكت ناوي تفاتح امك بشرط الوصية عقد حواجبه وسأل.. شذكرج بالوصية ليش صاير شي ابو سيف اتصل .. لا ابو سيف ما اتصل بس شكلها امك ناوية تزوجك بدون علمك هو انا حجيت هيج ومهيمن جمد بمكانه مصدوم ونفض راسه .. لحظة ممكن تفهميني شلون امي تريد تزوجني بدون علمي .. لا يعني مو بدون علمك بمعنى الكلمة بس امك هاي الايام تتحرك بشغلة خطوبتك من بنت خالك على اساس حصولها على موافقتك المبدئية اباوع عليه ضرب كصته .. اهووو هاي شلون فاتتني والله سالفة ابوج نستني كل شي ،يعني اني مو زين وباقي عندي عقل .. هو اني ليش اجيت وحجيت وياك اريد اعرف انت على شنو ناوي ومنو تريد تتزوج ريم لو بنت خالك جاوبني بسرعة بدون ما ينتبه على روحه .. اكيد ريم ما يحتاجلها سؤال .. هسة ارتاح گلبي يعني انت تريد ريم انتبه على روحه وكال وهو يمسح جسر خشمه .. اي اكيد غير بنت عمي اولى من الغريب صرت اعرف طبع مهيمن ما يحب يبين مشاعره كدام احد وكأنما عند التعبير عن مشاعره يحسسه بالضعف والعجز رفعت حواجبي استفزه.. اهااا يعني بس علمود هي بنت عمك عقد حواجبه وكال.. اكول شكلج جاي تدورين على سحلة وانا گلبي ما ينطيني اشوفج محتارة خلي اسحلج حتى تبطلين فضول رفعت ايدي بأستسلام .. لا على بختك ابو الهمة بعدني بريعان شبابي ما بية حيل سحلة .. يالله اتحركي كدامي خلي اشوف ام مهيمن شمسوية ولأي مرحلة واصلة دخل على امه بالهول واني تركتهم لوحدهم حتى ياخذون راحتهم بالكلام بس بقيت احوم اريد اعرف شنو راح يكوللها بس عيب لازم انتظر رحت دخلت عالبنات وبيدي علاكة الحلويات باوعت على ريم لكيتها كاعدة مكابلة الكتب وتحجي وياهم .. شلون بيكم كلكم صرتوا علية على الاقل واحد منكم يحن علية ويهون علية الموضوع ويخفف من تعقيده اشو كلكم صعبين الذباون في الدماغ شكو شبيكم باوعت لحوراء واشرتلها بسؤال صامت.. شبيها الاخت حوراء جاوبتني .. ما عليج منها شكل بنت عمج لگفت وعقلها ضرب اندعيلها بالشفاء العاجل راح اكول لأمي تسويلها حجاب حرز تعلكه بصدرها وتصير مثل صلبوخ شوكت ما تجينه تلكينه ثوبه معلك بي اشكال وانواع الحرز والحجاب ..خرب يومج حوراء عوفي البنية ما ناقصتج انطيت الحلويات للبنات وريم شافت الحلويات مسحت دموعها وخشمها وكالت .. اي عفية اجوي بوكتهم جيبي خلي اكل كاكو لان راح اموت من القهر عيوني ذبلت حوراء. باوعتلي.. مو كلتلج البنية واصلة مرحلة اللا عودة عقلها شخط من ورة السادس دك نقال ريم وباوعت للشاشة وعقدت حواجبها وكالت بصوت بي بحة البجي.. هذا رقم غريب گبل ردت عالمتصل بدون ما تنتظر خرب يومها سريعة ريم .. الو نعم منو وياي سكتت لحظة حتى تسمع الطرف الثاني شوية وحجت بمعرفة .. ها هلو صبا شلونج حياتي سمعت صوت مهيمن معناها طلع من الهول اكيد هسة حجة وية خالة رحت طلعت من الغرفة وسمعت حوراء كالت لريم .. ها ريم شكلنا اشو صار تبادل ارقام وية ست صبا ريم اشرت لها حتى تنصي صوتها واني تركتهم يكملون كلامهم و رحت على مهيمن لكيته يريد يروح لغرفته استوقفته اباوع لمعالم وجهه كان شكله عادي كتلني الفضول اريد اعرف شنو كال لخالة سألته .. ها بشر شنو كالت خالة .. ادري شنو جنتي خاتلة ورة الباب كسرتي على ام حمزة جوارينا بالفضول .. اي غير اريد اعرف شنو حجيت وية خالة. يعني عرفت بشروط الوصية لو بعدها حتى ناخذ احتياطنا وما نحجي كدامها بالوصية .. لا يابة شتحجين بعدين اكوللها بالوصية مو هسة .. لعد شنو كلتلها .. كلشي ما كلتلها. غير بس يمة الغي شغلة الخطوبة ما اريد اتزوج هسة سألته مستغربة.. هاي شنو وخالة هيج بكل سهولة وافقت على كلامك بدون ما تسألك .. ما عندها حل ثاني غير بس توافق ترة هاي مو اول مرة ااجل سالفة الزواج عادي هي متعودة علية دائما اماطل بالزواج بالبداية علمود وضعنا المادي وهسة علمود شغلي وري........ وقطع كلامه ابتسمت بمعرفة مهيمن واكع بحب ريم بس ما يحجي .. لا تظلين توزعين ابتسامات خلي يبالج ما اريد اي شي من الي صار قبل شوية يوصل بريم ابتسمت وكلتله .. احجي لا تستحي ترة سرك ببير .. ما اريد استعجل عليها اريدها بالاول تركز بمستقبلها وتتغير شوية وانتي هم عينج عليها وعلميها شلون تصير مرة مسؤلة يعني على الاقل حتى من احجي وية الوالدة عن موضوع زواجي من ريم اكون واثق كدامها ومتأمد من اختياري الصحيح .. اي بس ريم حلوة يعني خلي ببالك خالة اكيد راح تفرح بيها .. الجمال وحده ما يكفي ومو شي اساسي بنجاح الزواج ياما. اعرف ناس متزوجين نسوان اية من الجمال لكن زواجهم فاشل يعني انا من اريد اتزوج وحدة بس شكل شسوي بيها قابل احطها تحفة بالبيت ما اجذب عليج واكلج ما اريد زوجة حلوة بس الاهم من هذا كله اريدها تكون سباعية وفطنة وتكون ام بيت اكدراامنها على بيتي وجهالي وما يظل بالي يمها من اعوفها لوحدها بالبيت وتكون كد المسؤلية هاي الامور كلها هي اساس نجاح الزواج رحتوتركته بالغرفة ولكيت نقالي مرة اللخ يدك والبنات كل وحدة متمددة بفراشها يردون ينامون ما رديت عالمتصل رقم غريب ما اعرفه لكن شوية ووصلتني رسالة عالنقال مكتوب بيها .. هلو نور مرحبا اني الحجية ام حيدر اذا متصير زحمة ممكن تردين عالنقال اريد. احجي وياج بشغلة بيني وبينج احس گلبي ارتعد من قريت الرسالة. اهووو هاي شلون سالفة والله هذا الاحراج بعينه هسة شنو اجاوبها دك النقال وارتبكت وانخبصت خبص باوع للبنات بالغرفة. ما يصير احجي يمهم رحت طلعت برة. وما لكيت احد صعدت فوك حتى اكدر احجي وياها براحتي اكيد متصلة علية علمود سالفة رفضي. رديت عليها .. الو وكان اسمع صوت رجال بسرعة حجة .. الو نور لحظة قبل لا تغلقين النقال بوجهي عقدت حواجبي مستغربة الصوت .. منو انت !! ..انا عناد بس سمعت بأسمه اجة يوكع النقال من ايدي حجيت وياه بغضب .. رحمة لله ما تگلي انت شنو تريد مني ترة موقفك صار بلا ملح وما ينسكت عليه .. نور بس سمعيني زين ما راح اكعد ادافع عن نفسي وابرر موقفي وياج اعرف من حقج تتخوفين مني بعد الي صار حجيت وياه من بين اسناني .. لعد شكو متصل علية .. يابنت الناس انا رايدج بالحلال لا تسدين ابواب رحمة الله كلها بوجهي ترة جل من لا يخطأ ميصير تعاقبيني برفضج كليلي شنو تردين انا اسويه بس غيري رأيج .. عناد الرفض مو بس صدر مني وانما هماتين صدر من اخوي مهيمن اكيد هو هم شايف عليك شي ما عجبه من تصرفاتك. وضيف فوكاهم هسة الخدعة الاخيرة مال رسالتك بحجة امك تريد تحجي وياي شكلك ما راح تبطل مكر وانا هيج امور تخوفني من الشخص المقابيل فوق ما تتصور .. نور تأمنين بالله لو لا. بيمن احلف لج انا حبيتج ومشتري قربج وطلبت ايدج من اخوج انتي ليش هيج مصعبة الامور .. ما دامك انت لحد الان مقتنع بغلطك وتشوف سوايتك وياي هينة اذن خلاص معناها اني اهني نفسي لان اتخذت القرار الصحيح برفضك عناد. جاوبها بعناد وتحدي وكال .. شوفي يابنت الحلال واخذيها كلمة مني للموت ما اغيرها انتي الي ما تصيرين لغيري. لو اعرف اكتل وانكتل مو يوم عيني وكعت عليج وانا سميج بأسمي تردين تكولين علية مجنون تردين تكولين علية شايف نفسه هذا انا. ما راح اتوب منج. وانا متأكد انتي تحبيني والدليل انتي لحد هسة ما غلقتي النقال بوجهي ومستمرة تحجين وياي اتسعت عيوني وگلبي ارتعد وجاوبته حتى احطله حد لكلامه وياي .. عناد اترجاك بعد ما تتصل علية من اي رقم هذا ثالث رقم احضره وانت تتصل ورجاءاً. اذا كنت تريد شي تروح لأخواني التفتت واني بعدني احجي بالنقال وية عناد وكان يصير بوجهي جلال كان جلال الشرر يتطاير من عيونه ما انطاني فرصة مباشرتاً سحب النقال من ايدي بكل غضب وكال بصوت يرعد .. ولك عناااااااااااد شلون تتجرأ وتتصل على رقم اختي من ورانا ليش انا مو كتلك الموضوع انتهى ولك انت لو رجال انتظرني انا جايك واراويك شلون تتعدة على عرضي من وراي سد النقال باوع علية كبل بدون ما انطيه مجال بسرعة حجيت وياه ابرر موقفي وصورتي كدامه .. جلال لا تفهمني غلط الله يخليك هو الي اتصل علية جاوبني وهو ينزل الدرج .. اي اعرف وكلامي وياج بعدين انتظريني بس خلي اربي ذاك الارعن واجي ما انطاني مجال كبل راح نزل جوة مثل الاعصار هو راح جلال واني كعدت بالكاع الطم على خدودي ..يمة صخام الصخمني هسة. يتعاركون من وراي كله من عندي من الله ياخذني كمت من الكاع وعظامي كلها ترجف من الخوف والترقب شنو راح يصير نزلت جوة بالبيت كان هاديء سمعت صوت باب انفتح گبل مسحت دموعي باوعت لكيت باب غرفة مهيمن افتح وطلع مهيمن وسألني .. شكو شصاير شنو هاي الركضة والبارب الخارجي من غلقه هشكل بلعت ريكي بخوف وجاوبته .. هذا جلال طلع قبل شوية صاحبه اتصل عليه مهيمن باوع للساعة .. هاي شنو وهذا يا صاحب عديم الذوق متصل عليه بهيج وقت يطلبه سكتت وما جاوبته شكول راح مهيمن اتصل على جلال وسأله .. ما تكول وين طالع بهالليل سكت مهيمن يسمع جلال وانا واكفة جامدة بمكاني منتظرة مهيمن بأي لحظة يلتفت علية معصب وينتر بية مهيمن .. هااا خوش عود من توصل طمنا عليه و حاول ترجع من وكت كنت اباوع عليه بقلق انهى الاتصال وباوع علية .. شبيج وجهج اصفر لا تخافين جلال طالع لصاحبه يكول متخربط بالمستشفى وهو راحله يريد يگوم وياه بالواجب اتنفست براحة وبنفس الوقت بعدني متشنجة وخافية تركني وراح دخل للغرفة واني بقيت احوم مثل الوحدة عندها مخاض ولادة احس هاي اطول ساعات تمر علية هسة غير يرجع اتذكرت النقال ورحت اتصلت عليه بس ما رد علية كله ينطيني رفض .. شلون ياربي هسة غير يرد اي مو راح اموت من الانتظار كل شوية مسوية مقتل من ورة التفكير مرت ساعتين بالتمام وكان ينك نقالي والمتصل جلال وبسرعة رديت ..الو هلا جلال وينك ليش مترد جاوبني بصوت خشن مبحوح مبين من اثر الصياح كال .. نور انا بالباب فتحيه ما اريد ادك الجرس لا يكعدون .. تمام هسة افتح غلقت النقال ورحت ركض عالباب فتحته ودخل وصرت اتفحص بشكل جلال وجهه احمر وكانت ملابسه وشعره مهوسة سألته واني حابسة انفاسي .. جلال ما اريدك. تاخذ عني فكرة مو حلوة كنا واكفين بالطارمة يم الحديقة باوع على باب المطبخ وسألني .. الجماعة نايمين هزيت راسي بنعم تركني وراح كعد بالحديقة مالتهم عالثيل وكال .. انا اعرف انتي مالج يد بأتصال عناد على رقمج .. شلون عرفت .. مو هو اليوم طلب مني اتوسطله وراد يحجي وياج وانا جاوبته وكلتله ما اريد احرج اختي بهيج موقف بس هو اصر وانا رفضت بس ما اتوقعته يتجرأ. يتجاوزني ويتصل عليج ويوصل لرقمج زين انتي ليش تردين على ارقام غريبة .. جلال اني بالاصل ما ارد على ارقام غريبة ومن دك هذا الرقم ما جاوبته لكن. هو اوهمني وصلتني رسالة هاك شوفها فتحت نقالي ورايته لجلال يقراها قرة الرسالة وهز راسه .. خرب عرضك عناد شكد عنودي وراسه يابس ويستاهل الضربة الي اكلها. بلعت ريگي واني بگلبي احجي لعد يا جلال لو تعرف بسواية عناد وياي كان شسويت بي هذا مجرد اتصال واحد من وراكم وانت هيج گلبت الدنيا وسألته بفضول .. جلال شنو صار بينكم رحت عليه لبيتهم ودكيت الباب وطلعلي وگبل بدون لا سلام ولا كلام انطيته المقسوم وگلتله هذا درس الك حتى ما تتعدة حدودك. وما تندك بينا حطيتله كم ختم على وجهه واحلى شي بالموضوع طلع اخوه مستغرب شافني معصب وكاعد اغلط على عناد وعناد واكف بس يستمع واخوه سألني عن الموضع گال .. فهومنا شنو الصاير عناد كله .. عوفه لا تتدخل هاي مشكلة بيني ووبين جلال يريد يصفي حسابه وياي كان جلال يحجي واني مركزة وياه بالكلام وعاقدة حواجبي .. فردي حواجبك راح بنعقدون شبيج هشكل متشنجة وخايفة ترة هو العار غلطان بس انتي كان المفروض اول ما عرفتي بالمتصل عناد وسمعتي صوته تنهين الاتصال وتجين تحجيلنا مو تكعدين تاخذين وتنطين وياه بالحجي .. صحيح كلامك بعد لو اموت ما ارد على رقم غريب لو اخذ وانطي بالحجي بالنقال وية كائن من كان كنت احجي مثل الي يقطع وعد عالصار بية بعد توبة ريم بالمدرسة كنت اتمشى اني وحوراء بالساحة وشفنا نغم كانت هم بالسادس بس بغير شعبة حوراء شافتها وكالت .. شلون بلوى هاي درت وجهي عليها .. اكلج انتي شنو سالفتج ملما تشىفبن نغم تكولين هاي الكلمة مو عيب خطية البنية حوراء.. هو اليدري يدري والمايدري شيكول حقج لو تعرفين هاي شنو موقعها بحياتك كان ما كلتي عنها هشكل .. هسة غير تحجي ست حوراء .. لا عيني شحجي غير حتى ما يصير كتلي رفس من الصفحتين من امي ومنج ومن نغم ومن مهيمن ومن العشيرة كلها كانت حوراء تحجي وياي بالالغاز وقاطعتنا صبا بصوتها الي كله دلع خلي يجي استاذ مهيمن ويسمع الاصوات الدلوعية عدنا هنا بالدرسة حتى يكعد يحمد ربه علية صبا .. ريم حبيبتي ممكن احجي وياج بشغلة على انفراد حوراء گلبت عيونها وخزرتي بتحذير همست لحوراء .. بس اشوفها شتريد حوراء.. انجبي وكعدي لا ترحين وياها خليها تولي حجيت وياها واني اباوع لصبا الواكفة تنتظرني .. شبيج حوراء هياتني يمج ما راح تاكلني او تسويلي شي ترة احنا بالمدرسة حوراء بغيض .. بكفيج مشكلتج هاي. روحي شوفيها شتريد الخاتونة وانا اوكف هنا انتظرج ريم .. اوك رحت لصبا واخذتني بأخر المدرسة بحجة تريد تحجي وياي على انفراد ومحد يسمعنا اباوع عليها طلعت نقال صغير من جيب صدريتها وكالت .. ريم حياتي عندي طلب يمج .. شنو كولي .. هذا صديق محمد خطيبي ميت عليج ويريد يحجي وياج يكول بس خليني اسمع صوتها جاوبتها بكل بساطة .. اسفة حبيبتي عذريني هالشي ميصير بصفتي شنو احجي وياه .. عفية بصفتج صديقتي يريد بس يتعرف عليج هو شافج مرة من كنتي واكفة بباب المدرسة ومات عليج ومن ذاك اليوم لهذا اليوم هو يلح ويكول شنو تريد اسويلها بس خلي تسمعني صوتها باوعتلها بحذر كعدت تطمني فتحت النقال وكعدت تتصل ارتديت للخلف .. لا صبا لا تتصلين مستحيل احجي وباه مهيمن ما يقبل والله يموتني .. شبيج ريم لا تخافين هو مهيمن شمدريه واتطمني هذا يصير صديق خطيبي لتخافين وانتي صديقتي المفضلة مستحيل اخلي احد يأذيج حطت النقال على اذني وما حسيت الا والنقال انخمط من اذني التفتت متفاجئة شنو كاعد يصير كان الكة حوراء واكفة بصفي وكالت .. ست صبا ليش تجذبين من شوكت صار محمد خطيبج كلنا نعرف هذا صاحبج صبا.. وانتي شنو دخلج حوراء بجدية .. شوفي صبا سمعيني زين اياني وياج الكاج واكفة او مقربة يم ريم والله العظيم احطج بحلك مهيمن وتعرفين مهيمن شيسوي ما يحتاج اذكرج والله يعزل بيوتكم عليكم نهت كلامها وشمرت النقال بالكاع صبا بغضب.. ادبسزز حيوانة كسرتي نقالي حوراء باوعت خلف صبا وصاحت بصوت عالي على المعاونة كانت صادف طالعة بالساحة حوراء.. ستتتتت نظيمة التفتت المعاونة على مصدر صوت حوراء حوراء بصوت عالي عبالك عندها نداء استغاثة .. ست لحكي صبااااااااا جاااااااايبة وياها نقااااااااااال بالمدرسة كانت تحجي عبالك عندها اعلان خطير المعروف هنا عندهم بالمدارس ممنوع جلب النقالات والي تجيب نقال بالسر تتعرض للعقوبة اجتي المعاونة تمشي كانت تشبه كعبول الكسول وصبا قبل لا توصل المعاونة حجت بتوعد .. بسيطة اني اعلمكم اذا ما خليتكم تعضون ايدكم من الندم ماكون صبا حوراء بستهزاء .. يمةةةةةةة خوفتي كلبي اجتي المعاونة واخذت صبا والنقال وراحوا للادارة هناك الحساب يم المديرة وحوراء دارت علية ودفعتني كدامها وكالت .. وانتي شبيج مثل السليمة جوة ايدها جاوبتها.. لا حوراء اني كلتلها قبل لاتجين لاتتصلين على الولد كلتلها مهيمن ما يقبل غمضت عيونها بصبر وكالت .. ولج ريم شلون بيج انتبهي بابا الي هنا وحوش ما ينفع تعامليهم بأحترام وبود. هيجي نماج ما يفع وياهم غير سوك العصا من غير يمة ارحميني رجعنا للصف وحجيت وية حوراء.. عفية حور مو تجيبين سيرة بالصار بيني وبين صبا لمهيمن حوراء.. شبية تخبلت حتى ما يعلگنا اني وياج بالبنكة جلال يوم ثاني بالمعمل داومت مثل كل يوم دخلت للمكتب ولكيت عناد كاعد عالمكتب او ما شافني نهض من مكانه كانت اكو كدمة زرگة على بنفسجي بطرف حنكه باوعت عليه وخزرته. وما سلمت عليه عابلك ما موجود موقف عناد البارحة استفزني. هو من سمع جواب مهيمن بالرفض نهض من مكانه. وسأله .. ليش ترفض بس ابوه كعده وكله عناد كافي خلي نسمع مهيمن شيكول مهيمن جاوبهم وكال .. عمي هو كل شي بالحياة قسمة ونصيب وشكل ابنكم ما عنده نصيب يم اختنا لان انا سألتها وهي رفضت حتى كلتلها اخذيلج وقت وفكري بس هي كانت مصرة الحاج ابو حيدر سأله .. اكدر اعرف شنو سبب الرفض مهيمن .. والله يا ابو حيدر انت مثلما تعرف بحياتنا ووضعنا انا واخواني ما صارلنا هواي من اتعرفنا عاى بعضنا والبنية تشوف بعد وكت على الارتباط بالزواج يعني احنا اخوانها وهسة يالله بدت تثق بينا فما بالك بالزواج مصيرها معلك عليه ابو حيدر .. هي بهاي حقها صدك مصارلها هواي مع اتعرفت بيكم صعبة تجيها وتكللها تعاي ازوجج صاحبي ان شاء الله الايام تثبتلها حسن نيتنا وياها احنا بالحقيقة مشترين نسبكم والحجية والبنات من شافوها لنور حمدوا بأخلاقها وهالشي يخلينا نتمسك بيها والله كريم على كولتك كل شي بالقسمة والنصيب وان كان الله كاتب لأبنا عناد نصيب يم اختك. يصير حتى لو طالت الايام والما كاتبله ربي عليه العوض لكن هذا الكلام كله ما كدر يقنع عناد الي كام يحوم ما يعرف شيسوي اخير شي صاحني وكال اريدك بشغلة طلعت وياه وكال .. جلال اريد اطلب منك طلب .. كول عناد كان كاسر خاطري صدك صعبة على الرجال ينرفض خصوصاً انا اعرف شنو السبب ورة رفض مهيمن بعيداً عن السبب الي ذكره مهيمن حجة وياهم هشكل حتى لا يخشن خواطرهم وياخذون الموضوع بتحسس عناد .. ما اريد اي شي منك بس من ترجع للبيت اتصل عليك وتخليني احجي وية اختك وافهمها عني حتى لا تخاف وتتطمن من ناحيتي اريد اقنعها انا اعرف اي واحد بمكان عناد راح يسوي هيج هو مو عيب يلجيء لصديقه حتى يتوسطله بس انا رفضته لان ما ردت اسبب احراج لنور وفعلاً مثلما كال مهيمن هي هسة يالله بدت تبرز شخصيتها وتتغير مأمنة بينا ما اريد اضغط عليها وكلتله .. عناد اعذرني ما اكدر البي طلبك ما اريد احرج نور ولا اضغط عليها بهيج امور لان انتي صديقي خاف تخجل مني وهالشي ما يصير لكن مع الاسف شكل عناد التيس وراسه اليابس ما يقتنع بكلمة لا كجواب واتصل عليها من رقم امه اي البارحة من كثر ما رزلت بي كلي والله اتصلت عليها من رقم الوالدة بس هالشي ما يشفعله ما دام اتجاوزني وراح اتصل عليها من وراي هاي هي حلت عليه الكتلة الاوع لوجهه بغيض حطيت نقالي عالشحن وطلعت يم العمال بس استوقفني صوته واجة وراي .. جلال عليك وداعت عزيز گلبك لا تهون عليك عشرتنا لا تكسرني بيك والله زعلك علية ثكيل كنت منطي ظهري سمعت كلامه وعفته ورحت اسمعه من وراي ركع الباب بغضب وصاح بصوت عالي .. من الله ياخذ عمري واخلص حجيت بغيض بصوت عالي .. اكل تبن حماااااار وعفته ورحت اشتغل بالمكاين وهو طول اليوم يروح ويرجع علية اعرف طبع بعناد. يتخبل ولا واحد يزعل عليه خصوصاً الي يحبهم بس ما اطلع جلال قربان اذا خليت الموضوع يعبر عليه بسهولة حتى مرة الثانية ما يستهان بية مر علينا مهيمن للمعمل عنده شغل بس انتبه على الوضع بيني وبين عناد باوع علية ورفع حاجبه بسؤال صامت عرفت قصده جاوبته .. عوفك منه. .. لا صدك شبيكم ليش متتحاجون .. سوة موقف ما عجبني وزعلت عليه هيج امور عادية المشكلة هو صاحبي ما اكدر انطي بي كدام مهيمن وهو مهيمن من غير كل شي متخبل منه ونوب اكله عالصار والله يحطه ويدفنه ...... نور مرت الايام وجلال بعده ما يتحاجة وية عناد واني بعدني احس بفراغ بحياتي حاولت اطلب من مهيمن يلكالي شغل بس رفض وكال انتي اختي تعيشين ببيتي معززة ومكرمة مو حلوة بحقي ادورلج شغل ترة انا ما مستثقل منج واطلع تشتغلين ورة فترة من الي صار اتفاجئت بزيارة رغد ونسرين حوراء وام مهيمن استقبلوهم بكل رحابة صدر ما يعرفون شنو الموضوع واني انجبرت ادخل واسلم عليهم بكل برود حتى ما ابين كدام ام مهيمن زعلي على رغد اباوع لعيون رغد تباوع عليةوبيهم كلام بس اني استأذنت منهم وطلعت لحظات ودخلت علية حوراء مستغربة وكالت .. نور ليش طلعتي من يم البنات ليش مو رغد صديقتج وهي جاية علمودج شلون تعوفيها لوحدها غمضت عيوني بالله شجاوبها .. راسي كام يوجعني وطلعت ليش شنو سألت علية حوراء.. اي وتربد تحجي وياج ضروري ياربي شنو هذا الاحراج رجعت دخلت عليهم وام مهيمن كامت وصاحت لحوراء وكالت .. خالة شكلجن جايات علمود تحجن وية نورة انا اعوفكم تاخذون راحتكم كانت تحجي وتوزع. ابتسامات عرفت شنو قصد ام مهيمن طلعوا ورغد كالت .. نور ادري بيج زعلانة علية بس والله العظيم اول مرة بحياتي يصير وياي هيج موقف محرج بس بيمن احلفلج انا لو ما شفت جدية كلام عناد بالموقف ولو ما متأكدة. من نيته بتجاهج الزواج كان فلا. اسمحله يسوي وياج هشكل بالحقيقة انا ما اعرف شنو كان يدور بينج وبين عناد من محادثات بالواتساب بس كل الي اعرفه ان هالشي الصار عناد جاي يدفع ضريبته لهذا يومج واني اجيت اعتذرلج عن الصار وحقج علية كنت اشوف طلب عناد بذاك الوقت. ان اني جاي اصير واسطة خير بينكم لكن من شفت صدمتج انا اتأكدت ان انتي مالج علم بالي كان يحجي وياج بالنقال وهالشي عظم الذنب علية سألتها .. بس اريد اعرف هو شلون اخذ رقمي منج وشلون اتواصل وياي بصور ابن اخوه رغد .. انا افهمج. الموضوع شلون صار بيوم شافنب اخذ صور لحرك ابن حيدر وسمع امي تحجي وياي وكالت يمة مو تنسين اخذي صور للحرك ورسلي لبنتهم نور عالواتساب حتى ام مهيمن تعاين الحرك وعناد من سمع هيج الموضوع كبل كلي انطيني الصور انا ارسلهم لها بوقتها رفضت وهو طمني وحلفلي نيته زواج. منج وكلي اصلاً ابو الحجي حجة وية اخوها حتى يطلبها الي للزواج كانت رغد تحجي وانب اربط بالاحداث اي صحيح بعد زيارتنا لبيت الحاج الو خيدر بيومين رسلولي الصور جاوبتها .. وهو شنو عرف مني حتى گبل راح يخطبني رغد گلت .. مو هو طلع سأئل عليج من يوم الشافج ببيتنا. وعرف بيج اخت مهيمن. والعرفه عن اخلاقج وادبج خلاه يخطي هيج خطوة عالعموم انا اجيت حتى ابرر صفحتي والله العظيم كانت نيتي صافية وياج اجمع راسين بالحلال بس ما جنت متوقعة الامور راح تتعقد هشكل توصل لهيج حد. باوعت عليها وكلتلها .. ما يحتاج تعتذرين. يكفي افتهمت الموضوع رغد .. والله العظيم من شفت نظرات العتاب واللوم بعيونج كرهت روحي. واتمنيت من صدك انا عندي هيج صديقة فاتمنى هسة من صدك تقبلين صداقتي بعيداً عن عناد وهالمرة انا وياج ضد عناد سألتها بشك .. اعتذر ما اكدر اوافق على صداقتج رغم الكلام الي كلتي انا راح اكتفي بمسامحتج بس مال ارجع ابدي صداقة مرة ثانية وياج لا هاي صعبة علية رغد بصوت مرتبك .. حقج وما الومج بس حبيت ابدي وياج هالمرة من صدك وانا ارجع واكول اعتذر عالسويته بيج لان اني بنية وعلى وشك زواج. ابريني الذمة حبيبتي حجيت بصوت هاديء ما يحمل اي ضعينة وياها ..الله يوفقج بزواجج. وشايفة الف خير واني مسامحتج وبيومها طلعوا البنات وام مهيمن .. شكل البنات جايات علمود يقنعونج صحيح كلامي؟؟ .. اي نعم وعبالهم اني قطعت العااقة وياهم لان رفضت اخوهم بس الحمدلله انحل الاشكال مرت من يمي ريم كان شايلة كتبها بيدها هاي الايام بدت تدرس بجدية لان هالمرة الامتحانات راح تكون مصيرية ومن عندها راح يحكمون تدخل بكلوريا او لا ....... ريم الموقع بالمدرسة خلف الحمامات واكفة وعيوني شاخصة تباوع بخوف على صبا والبنات الي وياها اتقدمت علية هي وصديقاتها والشر مبين بعيونهن ارتديت للخلف مرعوبة. وسألتها .. هاي شششنو صبا ؟؟؟؟؟؟؟ يتبع | ||||
|
| |
|
08-09-19, 09:26 PM
| #26 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_اربعة_وعشرون #الكاتبة_نهى تحية خاصة الى كل المتابعين الي دعموني وتابعوني وصوتوا للقصة لكم مني جزيل الشكر على تعاونكم وتفهمكم جعلتموني افتخر بكم ريم بالمدرسة ، والامتحانات شرفت هلكت بالدراسة ونور خطية ما قصرت وياية وفعلاً حسيت بفرق وصرت افهم بالمواد صحيح كان شهر امتحانات لكن هذا الشي ما كدر يشغل صبا عن مشاحناتها وياية اني وحوراء وكل شوية تشمرلنا كلام ومرات تخلي البنات تضحك علينا واكثر شي تستغل الفرصة من تلكاني كاعدة لوحدي تكوم تغرد بالزايد واني اغلس عليها ما اجاوبها بالحقيقة هيج نماذج. مو جديدة علية ياما مرت علية هيج تصرفات وبنات متنمرات بس اني كان تصرفي اتحاشاهم وما اجاوبهم وبعدين يتعبون ويروحون بس شكل صبا مطولة الى ان تتعب واني بطبعي اكره المشاكل والعراك وهي شكلها مبين عليها عراكة درجة اولى فكفاً للمشاكل كلت احسن شي اهملها وما اجاوبها ابد لكن الامور تختلف اذا كانت حوراء موجودة. لان حوراء ما تفوتلها كلمة تنطيها الكلمة بعشرة حوراء .. هي انتي وين صافنة حطي بالج يمي راح اكوم اشتري عصير وبتيتة فينگر من الكافتريا تردين اشتريلج وياي طلعت فلوس من جنطتي وانطيتها باوعتلي وكالت.. شنو تردين مهيمن يزفني غمضت عيوني بصبر .. بس ما يصير هيج اني عندي راتبي واكدر اصرف منه الى متى مهيمن يبقى ينطني مصرف انا ما اقبل اخذ منه كل مرة اسكت بس لهنا وكافي حوراء.. هاي شنو بايسن كلك حركات. ولا عرفتك كناري صاير تبيع ثگل علينا يمعودة. اصرف ما في الجيب يأتيك مافي الغيب جاوبتها.. اي بس ما يصير احس جاي استغله .. خلي فلوسج عندج. وخلي اخوي يحرك جيبه انتي شبيج ضايجة هو بكيفه يريد يصرف على بنت عمه تركتني وراحت تشتري واني بقيت كاعدة بالرحلة اراجع الاجوبة. وية صديقتي ورة عشر دقايق باوعت للساعة هاي وين صارت اي مو الفرصة راح تخلص شوكت ناكل صديقتي جاوبتني .. هسة تلكين الكافتريا صايرة هوسة من الازدحام كنا نحجي وكان تدخل للصف وحدة تركض وكالت .. ريم لحگي حوراء بنت عمج زلكت ووكعت على ظهرها ما نعرف شبيها بس لا انكسرت شهكت بخوف وطفرت من مكاني .. يااا عيني عليج حور ورحت ركض ورة البنية كانت المدرسة كلش كبيرة. ومتكونة من طابقين واحنا صفنا فوك بالطابق الثاني كنت اركض ورة البنية واسألها .. كليلي شلون وكعت اباوع للبنية تمشي وتتلفت وراحت ورة الساحة .. اكلج يا بنية هي حوراء راحت للكافتربا شوصلها ورة الحمامات انتبهت المكان هنا كان هاديء كانت بي فقط كم بنية ينعدون بالاصابع عكس بقية اماكن المدرسة ،هذا المكان عبارة عن ساحة ترابية صغيرة خلف الحمامات كان لتجمعات البنات السرية مثلاً الي تريد تحف وجهها او مرات يلتمون البنات ياخذون خيرة بالقاموس وسوالف وكذا او الي تريد تتصل. وعندها تلفون سري وغيرها من الامور وبين ما كنت اتسائل وادور بعيوني عن حوراء فجأة طلعت كدامي صبا وصديقاتها وقطعوا علية الطريق جمدت واكفة بمكاني وعيوني شاخصة تباوعلها بخوف وحذر اتقدمت علية هي وصديقاتها والشرمبين بعيونهن ارتديت للخلف مرعوبة. وسألتها .. هاي شششنو صبا ؟؟؟؟؟؟؟ صبا بخبث .. لج انا من تالي وكت انفصل من المدرسة من وراج وينطوني انذار علمود حضرت جنابج ها ولج عزة ليش اليوم صبا مو غايبة شجابها للمدرسة. حسيت اكو كمين بالموضوع بلعت ريكي واني اتلفت منا ومنا ادور على واحد يفزعلي الا من معين يرحم بحالي يمكن هسة لو يذبحوني ويدفنوني هنا محد راح يسمع لي خبر رجعت باوعت عليهن. كانت صبا تحجي وياي وتتقدم بتجاهي كانت قاطعة علية الطريق كلتلها .. صبا اني ما سويت لج شي انتي ردتي تورطيني بمكالمة وية ولد واني رفضت يعني انتي الي بديتي بالاول صبا.. اكلج انتي ما تكولين على شنو شايفة نفسج لو اعرف الشباب شنو عاجبهم بيج وهيج كاتلين نفسهم عليج. كان ارتاحيت جاوبتها .. اني ما اريدهم اخذيهم الج اني متنازلة عنهم بس خليني اروح ارجع للصف كانت محاولتي عقيمة مثل طفل يحاول يقنع ذئب ان يروح ياكل جزرة ضحكت صبا ودارت وجهها عالبنات وكالت .. يالله بنات شوفوا شغلكم مثلما اتفقنا وهن البنات باوعوا علية وابتسموا بخباثة وحدة طلعت مكص من جيبها والثانية طلعت لاصق يمة اني شفتهم هيج ارتديت للخلف وكان اطكها ركضة مثل بيب بيب. ما يشوفون الا غباري بس مع الاسف هن ركضن وراي وكانوا اسرع مني ما لحكت اجتاز الساحة الترابية و لزموني وكتفوني اثنينهن والثالثة اجتي هي ومكصها واني صرت اتلاوة جوة ايدهن احاول ادافع عن نفسي مددني بالگاع بالتراب وصارت تكص بملابسي بالصدرية. والقميص اني كمت اصرخ مفزوعة خايفة يسولي شي وكان يجيني راشدي من ست صبا وجتي الثانية فتحت اللاصق تريد تلصقه على شفايفي كنت خايفة ومرعوبة ويمكن لو يذبحوني ما يلكون قطرة دم بية. رجلية بادت من الخوف وكنت اتلاوة جوة ايدهن اقاومهم. حتى ابعدهن عني .. لج صباااااااا لاااااااا ملابسيييي حاولت انهض بس وكعت بالكاع مرة الثانية وصبا گامت ترفسني ببطني كنت اتلوى من الالم واني لا زلت مستمرة اصرخ وما انطيت مجال لصديقتها. تكمم حلگي كنت ما ازال اقاوم بس فجاءة سمعت اصوات هوسة مال بنات ما احس الا وتجيني العجاجة من نهاية الساحة. رفعت راسي وكان اشوف المنقذ مالتي حوراء كانت جاية تركض مشنفة ردانها مستعدة للعركة ولازمة بيدها عصا وموبس هيج وجامعة بنات خوالها وخالاتها الي يداومن ويانا بالمدرسة بس بصفوف متفرقة كان بيهم سبع بنات وحوراء الثامنة كانت حوراء تركض مترأسة العصابة انتبهت كل وحدة بيهن لازمة بيدها شي تهد بي حتى نغم كانت حاضرة وشايلة بيدها كتاب ضخم ما اعرف مال يا مادة وكفوا المجموعتين وحدة مقابيل الثانية ببعد مسافة خمس مترات مجموعة حوراء ومجموعة صبا وانا لازلت على وضعي ممددة بالكاع بالنص حاولت انهض من مكاني بالكوة لا اروح بالرجلين حوراء. بغيض تتوعد .. ولج صبية اذا ما اليوم نتفت شعرج ما اكون حوراء بنت زهرة التفتت على بنات خوالها وخالاتها وكالت .. يالله بنات راونا همتكم اليوم عالوا بينا نريد فزعتكم وصاحت بصوت عالي ..يلة بنااااات بس عود شنو هي حوراء صاحت يلة بنات وما اشوف الا الترابه. گامت وصارت عجاجة تگول ساحة حرب مو مدرسة واني وكفت مستندة على الحايط ولازمة بطني كنت خايفة ومتأذية و بنفس الوقت اراقب العركة اريد افتهم شنو الموضوع منو الي انتصر ومنو المهزوم ماكو بس ترابة وگايمة زائداً. عياط .. آآآآي.. آآآآي ولج اااخ .. شعري .. شعري .. عوبة عوفي شعري .. حجااااااابي .. بالحقيقة هذا كل الي كدرت اسمعه من العركة طبعاً هاي من غير الغلط والسب وفردة حذاء تطير بالهوى حجاب ينشمر بس لفت انتاهي دور نغم بالعركة الي توكع يم رجليها تركعها على راسها بالكتاب ما تنطيها مجال تكوم اني من يمي راسي گام يوجعني من ورة صوت السطرة كنت مستندة عالحايط بطني تكطعني من الالم وعيوني تدور على حوراء خايفة عليها وهناااااااااك. وكان اشوف حوراء مددة صبا بالكاع وصاعدة فوكها. ولازمة المكص وجاي تكص بكذلتها واسمع ذيج بس تعيط .. لج لاااااا حيوانة. والله اذا لمستي شعري ايدج اكصها حوراء لزمت الكذلة وكالت .. يالله هاي انا راح اكص عطوبج بالله راويني شراح تسوين بدوا بقية. الطالبات يتجمهرون حولنا بس يباوعون ما يسون شي كانت الهوسة كايمة. وكان تجي المديرة والمعاونات وكم مدرسة. وكعدوا يفرقون بالبنات. والمديرة كعدت ترزل وتتوعد بيهن وسحبونا كلنا عالادارة دخلنا. لغرفة المديرة وصبا وجماعتها وكفوا على صفحة بزاوية. الغرفة كان ملعوب بخلقتهن لعب اما اني وحوراء وبنات خالها كنا واكفات صف واحد كدام مكتب المديرة اباوع لملابسي المشككة والردان مكصوصه وشعري منكوش. التفتت اعاين على البقية كان شكلهن ارحم مني بس الصداري كلها متربة والشالات معووجة كان شكلنا تحفة مال واحد ياخذلنا صورة ويكتب عليها ( كي لا ننسى) المديرة بتأنيب .. صدك جذب تحجون. عود هاي انتوا بنات العوائل المحترمات تتصرفون بهذا الشكل لعد شنو بقيتوا للصايعات حوراء.. ست بس خلي افهمج المديرة.. اششش ولا كلمة. محد تفتح حلكها بأي حرف اتصلت على اولياء اموركم. واتفاهم وياهم والتفتت على صبا. وكالت .. وانتي ست صبا انتي اليوم مو على اساس غايبة ومسجلينج غياب بدفتر الحضور يس كوليلي شلون يعني بالله ظهرتي بقدرة قادر بداخل المدرسة صبا.. ست اني مداومة من الاول بس كنت مريضة ما كدرت ادخل اي درس المديرة .. اشششش انتي الثانية ما اسمعلج ولا صوت شبيج مريضه من تعاركتي شو صايحة مابيج شي دزيت على اولياء اموركم انا ما يصرفلي استقبل هيج نماذج. بمدرستي قطعت كلامها وصاحت الفراشة وطلبت منها. تصيح كم وحدة من الطالبات الي كانوا موجودين وشاهدين على العركة. حتى تفتهم منهم القصة. حتى تحكم منو الظالم ومنو المظلوم الطالبة الاولى كالت .. ست كنا كاعدين بالصف اني وريم نراجع الاجوبة ودخلت وحدة للصف وصاحت لريم وكالتلها بنت عمج وكعت وريم راحت ركضت وانا بين ما ضميت كتبي ورحت اركض ورة ريم بمسافة حتى نشوف حوراء شبيها ووين وكعت بس استغربت البنية اخذت ريم لخلف الحمامات. وكان اشوف صبا وصديقاتها وصارت البنية تحجي للمديرة عن كل كلام صبا وياي اما الطالبة الثانية كالت .. ست احنا وحوراء كنا نشتري من الكافتريا واجتي نجود كان اسم الطالبة الاولى. وكالت لحكوا بنات صبا راح تأذي ريم. مسويلها كمين واحنا كلنا ركضنا حتى نشوف شنو جاي يصير. وحوراء ركضت وهي تركض بالساحة كامت تصيح لأقاربها ولمت بنات خوالها وخالاتها كلهم وطلعت بيهم نفير عام وراحت لمكان صبا وريم والطالبة الثالثة كالت .. ست اني اكلج الحقيقة كولها ريم كانت تتواعد مع ولد وهذا الولد. دائما يحجي وياها بالنقال. ومن سمعت بصبا هنا راحت عليها وصارت تتوسل بيها علمود تنطيها النقال. حتى تحجي وية الشاب وصبا كلتلها احترمي نفسج انا ما اجيب نقالات للمدرسة اني باوعت عليها متفاجئة من كذبها والتفتت على المديرة .. ست والله كذابة وتتبلى علية المدير.. ليش ريم تنكرين مو على اساس صبا صاحبتج وكنتي كله تمشين وياها بس احب اكولكم لا عبالكم. احنا ما نعرف شنو يصير من ورانا واستمر حبل الشهود ما بين معنا وعلينا وحوراء كل شوية تصيح .. والله جذابات ست لا تصدكيهم وهي كلها بصفحة واني كنت ابجي على منظري وشكلي والكشخة كلها خربت النوبة المديرة اتصلت على مهيمن وخواله. وطلبت منهم يحضرون فورا للمدرسة هسة اني بهاي اللحظة اتمنى اتبخر بالجو واختفي من ورة الخوف والترقب اليوم كلها التمت فوك راسي ياربي شلون ورطة هاي همست بصوت تعبان .. ياربي سترك حوراء.. خرب بالحظ ولج اتصلوا على قباض الارواح اليوم شيخلصنا اليوم اجتي الفراشة. وانطتني عباية من بيتهم لان هم عايشين بالمدرسة والفراشة تصير مرت الحارس باوعت للعباية بغرابة لا ونوب عباية راس ولونها من كثر الاستعمال گالب اسود مخضر يعني شطلع بيها اخذتها حوراء منها وكالت .. مشكورة خالة باجر نرجعها الج انطتني اياها وكالت .. هاج ستري روحج انا وصيت الفراشة تجيبلج شي من بيتهم تلبسينه قبل لا يجي مهيمن ويشوف منظرج والله يحرك الدنيا هزيت راسي برفض .. لا لا عفية خليني هشكل ولا البس هاي العباية والله اتخبل اذا حطيتها على جسمي .. ماشي براحتج ابقي هيج اني مالي دخل وخلي مهيمن يجي ويشوف عرض الزنود والزرور الي انتي مسويته حتى ما يخبلج من صدك انصحج تلبسيها لان انتي بكل الاحوال راح تتخبلين علينا عقجت وجهي ولبست العباية على راسي واني حاصرتني البجية حوراء بابتسامة معوقة كالت .. اي هسة صرتي شحلاتج جنج سعدية ام اللبن كنا نحجي وكان يدخل مهيمن وجلال وكم واحد من خواله عزة اباوع لمهيمن عيونه نار وعروكه مبينة من راسه من الغضب واهل صبا والبنات هم اجوي همست لا ارادي.. ولج حوراء شلون بينا مهيمن عبالك وحش حوراء ما جاوبتني بس اسمعها تقرة ايات ((وجعانا من بين ايديهم سدا ومن خلفهم سدا فأغشيناهم فهم لايبصرون )) دارت وجهها علية وكالت .. ان شاء الله نتقابل بالجنة واشوفج هناك بس خاف اموت قبلج اطلب منج طلب واحد سلميلي على امي وكليلها بنت جانت خوش بنية اخذت نفس عميق وصرت اهدي نفسي .. اني ما مسوية شي حتى اخاف منه والمفروض ما اخاف بس شكل مجتمعهم لازم البنية تخاف بكل الاحوال سواء كانت ظالمة او مظلومة. وهالشي يحسسني بالظلم اكثر من ظلم صبا الي وصارت المديرة تحجي لأولياء الامور عن الي صار وحجت لهم عن كل كلام الشهود الي النا والي علينا كانت هي تحجي وعيون مهيمن وجلال كل شوية يباوعون علينا اني وحوراء المديرة كملت كلامها والتفتت على مهيمن .. واختك الحبابة هاي ما شاءالله الطالبة الشاطرة. حشمت قريباتها وراحت هدادة على البنات يعني هاي بدال ما تجي للادارة وتكللنا اشو راحت تتعارك وياهم كانت المديرة تحجي بحيادية وية عوائل البنات كلهم حتى تتجنب المشاكل مهيمن باوع علية وكام من مكانه ووكف كدامي دنكت راسي اني وحوراء كال .. بالله شو رفعي راسج خلي اشوف رفعت راسي وشفايفي ترجف بية بجية التفت على المديرة وكال .. احلفج بالله هاي شكلها مال وحدة تعتدي على وحدة مثل هاي واشر على صبا وكان واحد من اهل صبا زمخ بي .. احترم نفسك وانتبه لكلامك. شنو شبيها بتنا. دشوف شكلها هي هم مكتولة مثل بتكم اني منا موجوعة من الم بطني وفوكاها الخوف والرهبة من الموقف ونوب هذولي يصيحون بينهم وجلال واكف كدام مهيمن حتى يردعه ما يهد وذولاك مناك هم كل واحد بيهم يكول بنتي سلام الله عليها ما يطلع منها هيج شي لعد منو الي سوة العركة امي. اشو الكل طلع مظلوم وشككوني بروحي وبعد الجر والعر ما طلعنا بنتيجة والمديرة كالت .. رجاءاً بدون عرايك هاي مدرسة محترمة مو سوك اذا تردون تتعاركون. تتفضلون برة خارج المدرسة وتعاركوا مهيمن .. ما دامها مدرستكم . محترمة ممكن اعرف ليش اجي الكة اختي وبنت عمي. معتدين عليهم ومتعرضات للتهديد.، اكدر اعرف وين. جانت ادارة المدرسة المحترمة من صارت العركة انتوا شنو دوركم بالضبط المديرة .. ياعيني هن حشى مو بنات وحوش. رايحات يتعاركن ورة المدرسة وبالحقيقة الي تتعارك تعكس بيئتها وبعد الاخذ والعطاء بالكلام كم واحد من اولياء الامور وافق يتنازل ويوقع ورقة تعهد ان الادارة. لا تتحمل مسؤلية البنات المذكورة اسماءهم نتيجة تصرفهم الغير مقبول الخارج عن. نظام المدرسة ومن ضمن الي وقعوا بيت اهل صبا واخذوا بنتهم مع فصل ثلاث ايام. وتنزيل درجة السلوك بوثيقتها المدرسية ومهيمن وخواله رفضوا يوقعون على الورقة خالهم حسن كال .. شوفي ست المديرة احنا ما راح نوقع على هاي الورقة لان هالشي يحط من قدر بناتنا وسمعتهن وعلى فكرة احنا كلنا نعرف منو العايل وانتي وحدة من الناس تعرفين كلش زين هاي الطالبة كان يقصد على صبا وانا متأكد سبق وان جايتج كم شكوى عليها فمو من المعقول تساوين بناتنا وياهن حق الله هسة احنا نگاوم اهالي البنات ونسويها كعدة عشاير بس بنفس الوقت احنا ما نرضاها مدرستكم تتعرض للتخريب والتهديد احنا ناس تخاف الله وحقنا ما يضيع المديرة .. حجي كلامك على راسي وانت مبين عليك شخص تعرف بالقانون والاصول بس هم الصوج من بتكم ريم واشرت علية والعيون كلها التفتت علية صار شكلي مثل الحرامي الهارب من السجن من يسلطون عليه الاضواء حتى يقبضون عليه بلعت ريكي مهيمن عقد حواجبه وسألها بشك .. ليش شبيها ريم المديرة .. هي هم كانت من فترة مرافقة صبا ودائماً تمشي وياها مهيمن .. مستحيل ريم ما تسويها تعرف انا الف مرة محذر البيت من زمن واختها المديرة.. هاي اختك حوراء. كدامك واسألها دارت على حوراء وكالت .. ماما حوراء بنت عمج ريم كانت تمشي وية صبا لولا حوراء دنكت راسها وهزته بموافقة وبعدها كالت .. اي. بس ست ريم تركتها لصبا المديرة .. حتى بعد ما تركتها المشاكل زادت ما نقصت حوراء احجي كم مرة. صارت مشكلة بين ريم وصبا ويجيبوهم للادارة يمي حوراء.. ثلاث مرات التفتت المديرة. على مهيمن وكالت .. شفت انا ما جاي اتبلى على بنت عمك مهيمن .. اكدر اعرف على شنو المشاكل الي صارت بينهم .. مشاكلهم كلها علمود سالفة شباب طبعاً اعرف هذا الشي مالي حق احجي بي بس لازم احجي حتى انتوا هم تكونون على بينة ومعرفة بالامور وتعلمون بناتكم يبتعدون عن هيج نماذج اني هذا كل الي اكدر. عليه تعرفون ماكو امان. وصاير التهديد بفلس وحصرة على المدير يصدر قرار عقوبة بحق طالب اذا مو يوم ثاني يهدون بيته على راسه هي كانت تحجي ومهيمن صار وجهه احمر من الغضب اريد احجي ادافع عن نفسي بس هم هنا محد ينطي مجال .. ست الكل يعرف اني قطعت علاقتي بيها وهي ظلت تلحكني وين ما اروح يعني مو ذنبي مهيمن حجة من بين اسنانه وكال .. ريم سدي الموضوع المديرة كملت كلامها وية خال مهيمن .. شوف حجي اني هالمرة راح اعفيكم من التوقيع على الورقة. وهاي لخاطر جيتكم ولان اعرف ببناتكم طالبات مؤدبات وشاطرات بس بعد اذا صارت مرة الثانية اني تعذروني اتخذ غير اجراءات طلعوا خواله واخذوا بناتهم ومهيمن انطى السويج مالت السيارة لجلال وكله اخذ البنات وصعدهن بالسيارة وطلعنا من المدرسة وجلال يباوع لشكلنا اني وحوراء وكان كوة لازم نفسه ما يعلق كال .. الحمدلله على سلامتكم شباب باوع علية وكال .. تصدگين باربي ولا عرفتج وانتي لابسة العباية طالعة تشبهين س........ جاوبته واني معبسه وضايجة .. اعرف لا تكمل طالعة اشبه سعدية ام اللبن ابتسم وگال .. اي والله صدك هاي شلون عرفتي فتحلنا باب السيارة واني صعدت بالاول وحوراء صعدت وراي وهو بقى واكف وفاتح الباب ويباوع على حوراء وكال .. اكول جعفرري. انت هم طلعت مو هين وينخاف منك صاير عراك المنطقة وتلم الشلة وتعزمهم عالعركة والله فاجئتني حوراء باوعت علية وكالت بصوت ناصي .. اكلج هذا ابن عمج منين ينطفي. كليله خلي يسكت لا ابتلي بي واسحله بنص الشارع مثلما سحلت صبية هو انا اليوم مكتولة مكتولة اخلي اسحله واريح الناس من عيونه ااااقصد من ثقل دمه جلال.. الله يكفينا شرك ياجعفوري حوراء.. جعفوري بعينك ابو عيون الحول سد الباب وهو خربان ضحك على كلام حوراء ومهيمن طلع من المدرسة وصعد بالسيارة انگلب جو السيارة هدووووء سكون الوضع ينطبق عليه مقولة الهدوء الذي يسبق العاصفة نور كنا بالبيت اني وخالتي وكان يدخلون علينا ريم وحوراء وشكلهم ملعوب بي طوبه وخالة شافتهم ولطمت على صدرها .. يمة صخام ولك مهيمن شبيهم بناتنا ياهو الي مسوي بيهن هشكل مهيمن.. الخواتين متعاركات بالمدرسة ام مهيمن لطمت على صدرها .. يايمة اسم الرحمن ويامن اتعاركن كانت خالة تسأل بمهيمن وهو يجاوبها واني عيوني تتفحص شكل البنات كانت ريم اكثر وحدة متضررة. ووجها اصفر ولازمة بطنها تتلوى. مبينة من عقدت حواجبها جاي تتألم رحت وكفت يمها اتطمن عليها ام مهيمن دارت على حوراء .. ها ولج حويرة صايرة تتعاركين بالمدرسة هاي من تالي وقت اجتي حوراء ووكفت وراي تحتمي بية وكالت .. شوفي يمة انتي تعرفيني كلش زين ما احب العرايك ريم كالت بصوت موجوع .. والله خالة انا اشهد حوراء بنية مسالمة كنت احجي وية خالة واتذكرت شكل حوراء الي كانت تركض ولازمة بيدها العصى كان شكلها بذيج اللحظة بعيد كل البعد. عن المسالمة حوراء.. بس هن صبا وشلتها عالوا بينا لكيتهم ماخذات ريم ورة الحمامات ويضربن بيها وشكو عليها ملابسها مهيمن بصوت هادي بس بي تحذير .. حوراء صوتج ما اريد اسمعه. هسة ترحين انتي وهاي اليمج وتبدلون ملابسكم وحسابي وياكم بعدين اباوع لريم رفعت راسها وباوعت لمهيمن بنظرة عتاب حسيت على جسمها ارتعد جوة ايدي ريم .. اني عندي اسم ما اقبل تكول علية هاي ودارت وجهها ومشت متوجهة لغرفة. حوراء وكان توكع ويغمى عليها ومهيمن اتحول شكله من اللامبالاة والعصيبة الى الخوف والاهتمام اول واحد وصل لريم من وكعت نزل يمها بالكاع من غير ما ينتبه على نفسه وحط راسه بحضنه وصاح بصوت مرعوب .. نورررر بسرعة جيبي ماي هاي اغمى عليها ووجها انگلب اصفر رحت اركض اجيب ماي ومهيمن ربت على خدها حتى تصحى .. لج ريم كعدي يمة روحي جيبيلها شي خلي تلبسه وعاط بجلال الي واكف متصنم بمكانه شمر عليه السويج وكال .. جلال اركض روح شغل السيارة انخبصنا كلنا بسبب صياح مهيمن. ام مهيمن اخذت كلاص الماي مني كالت.. يمة گول يالله شبيك حركت الدنيا وخبصتنا بالله شو انطيني البنية. اباوع لمهيمن حس على وضعة الي مو طبيعي وشكله شلون حاط ريم بحضنه ام مهيمن اخذتها منه وصارت تمسح على وجهة وقربت شيشة عطر يم خشمها حتى تصحى بدت ريم تسترد الوعي مهيمن .. يمة خلي ناخذها للمستشفى ريم بصوت ناصي تعبان .. لا ما اريد اني اكره المستشفيات ام مهيمن.. ما يصير خالة لازم ناخذج ما تشوفين وجهج انگلب اصفر ريم جاوبتها.. لا عفية مااحب المستشفى صارت بية عقدة من ايام عمومؤيد الله يرحمه ماريد اروح الله يخليكم لا تاخذوني ام مهيمن.. زين شنو الحل حوراء.. يمة اكيد ريم متأذية من بطنها لان انا لحكت عليها ولكيت صبا منومتها بالكاع وتدفر ببطنها مهيمن باوع على ريم وكال .. انا رايح للصيدلية اشوف شنو اجيب راح طلع من البيت ام مهيمن باوعت لحوراء وكالت .. ولج ثولة كافي بعد لا تكعدين تزيدين النار حطب هو اخوج مشتعل من گاعه ما يحتاج تزيدين الطين بلة متشوفين انا سكتت لان ادري بي كوة لازم نفسه ما يهد عليهم حوراء .. اي يمة غير اكله شنو علتها وليش متأذية اني تركت خالة وحوراء يحجون واخذت ريم عالحمام حتى ابدللها ملابسها وتسبح وبين ما بدلت وخلصتها كعدتها بالغرفة كانت بس تبجي مثل المصدومة شكل الصدمة هسة بينت عليها .. لاتخافين حبيبتي بس سكتي ولو مو وكته الكلام هسه بس تريدين الصحيح انتي السبب انتي يعني هسة حتى اني الي ما اعرف صبا صرت اعرفها من كلام حوراء وياج انه هي بنية مو زينة ريم .. اي اني صح مشيت وياها فترة هي ظلت تريد بس تصير صديقتي واني شفت ليش لا اذا ممسويتلي شي واحنا بس بالمدرسة نحجي اني شعلية بيها مصادقة او لا هذا شي يخصها وحدها بس تركتها من حاولت تخليني احجي وية واحد واني ماريد ومن يومها وهي كامت تسبب لي مشاكل روحي سألي الطالبات الي ويانا بالصف .. ليش ما اجيتي وگلتي حتى احنا نحط لها حد لتجاوزاتها بس هي شافت من يسكت واستقوت وهذا الي صار ما يحمد عقباه كنت احجي وفجاءة وسمعنا صوت صياح زلم ام مهيمن گبل صاحت .. والله عرفت بي ما راح يعديها على خير هذا الي اني خايفة منه ولج حويرة ركضي جيبيلي عبايتي ريم باوعتلي بخوف .. لالالالا عفية لا تكولون عركة ثانية والله راح اتخبل رحت تركتها وطلعت اركض واخذت شالي اصطدمت بحوراء. بطريقي لگيت ام مهيمن سابقتني وجلال نزل من فوك. يركض .. شكو شصاير جاوبته.. اتوقع هذا مهيمن تعارك وية بيت زمن تركني وراح طلعت للطارمة ولازلت اسمع صوت صياح رجال مديت راسي من الباب وراهم اريد افتهم شنو الي صار لكيت خوال مهيمن لازمين مهيمن. وهناك واحد واكف يم بيت زمن على بعد بيتين يصيح على مهيمن ويتوعد ومهيمن .. وحق هذا الله اليوم الا اشيلكم من المنطقة ما اتسمى ابن ابوي اذا تريد سلامة اهل بيتك بيع بيتك واطلع بيهم اني حذرتك مو تگول ما كال مهيمن خاله حسن كال.. عيب مهيمن شنو هالحجي هذا جارك ام مهمين صاحت .. كومة حجار ولا هالجار. يا خوية هذولي ما يتسمون جورايين هذولي عصابة ترضاها هاي صبية بتهم لازمة البنية وناعلة ابو حظها . وين كاعدين هاي من غير سوالفهم الغمة تالي خوال مهيمن فضوا الموقف ودخلوا مهيمن للبيت وجلال يهدئ بي لليل هدأت الامور ومهيمن انطى المقسوم لحوراء وريم وراحوا ناموا من وقت دخلت يمهن كانوا يسولفون بينهم ريم .. اي صدك حوراء انتي ليش جبتي بنات خالج وياج ليش ما صحتي لصديقاتنا خطية بنات خوالج وخالاتج حوراء.. لا ريم مو انتي ما تعرفين منطقتنا احنا كاعدين بمنطقة عشائرية ما يصير وحدة تتدخل بمشكلة اي بنية غريبة الا اذا. تقربلها حتى ما يگامون عشيرتها وتصير فصول وبيومها ريم نامت وكل شوية تكعد من نومها مفزوعة خطية. كسرت خاطري صرت اقرة عليها ايات الليل كله ... ريم مرت فترة على موضوع العركة واني وحوراء رجعنا داومنا بالمدرسة من يوم ثاني بس ما لگينة. صبا لان فصلوها ثلاث ايام واني من ذاك اليوم صرت اخذ وياي مبرد الاظافر لان صارت بية خوفة من الي صار حتى يكون عندي شي ادافع عن نفسي بي مر من يمي مهيمن واني جريت حسرة بقهر هو من ذاك اليوم ما يحجي وياي رحت يم نور اشتكي لها .. بس اريد اعرف اني شنو ذنبي وشنو الي سويته حتى مهيمن يعاقبني بجفاه نور.. تستاهلين وزين منه بس ما يحجي وياج اني لو منه من بعد الي صار ابطلج حتى من المدرسة باوعت عليها مستغربة.. ليش تحجين هيج فوك ما اني مكتولة نور.. ولج ريم هاي نتائج الي ترافق بنت السوء والمشكلة انتي لحد هسة ما مستوعبة خطورة الي صار ريم لازم تعرفين مهيمن حقه. انتي امانة عنده ومسؤولية يعني شنو تردين منه. يصفك لج مثلاً على الي سويتي اتخيلي هذني البنات حتى الادارة المدرسية صايحيين منهم الغوث وما يكدرون يتخذون بحقهم اي اجراء ترة هذني عصابة مستعدات يسوون بيج اكثر من هذا الشي كنت كل يوم اكعد واشوف مهيمن تلاگيني نظرات عيونه الي كانت كلها خذلان. زين من شنو ينخذل ما انسى اخر كلام وجهه الي .. انتي ليش كله تمشين بالعكس ولج انا كضيت عمري كله ما طالع لي صوت بالمنطقة انا من تالي وكت اطلع اتعارك وية الجيران بسببج انتي ليش ما تاخذين بالكلام تدرين تصرفاتج هاي جاي تصعب علية الامور وتعقدها فوك ماهي متعقدة جاي تسدين الابواب كلها بوجهي ليش انتي مو وعدتيني راح تتغيرين بتصرفاتج اليوم اخر يوم بالامتحانات المصيرية رغم الي صار بس ما تركت دراستي ونور بقت تساعدني بدروسي لكن اليوم من طلعنا من البيت اني وحوراء انتبهت لشغلة كانت اكو سيارة بيها اربع شباب شفتهم اول ما طلعنا من البيت حوراء شافتهم وكالت عزة هذولي جماعة صبية والله راح اموت بدمي كلتلها .. امشي خلي نركب بالسيارة. ماعلينا بيهم. احنا ما عندنا شي نخاف منه بس من خلص الدوام وحلت المدرسة لگينا هذولي الشباب نفسهم واكفين قريب عالمدرسة ونازلين من السيارة حوراء .. لاااااا اني اليوم راح احجي لمهيمن عن هذولي الشباب لان الموضوع زاد عن حده .. انتي شبيج خايفة منهم وليش نخاف اصلاً ما عندنا شي يمهم وهم ما يكدرون يسوون شي لنا ما يتجرؤن اكو شرطة وقانون حوراء.. لج عوبة هذولي ذيل صبا يعني مثلها ناس ما تخاف الله والي ما يخاف الله لا تتوقعين منه يخاف من الشرطة والقانون حوراء تتلفت .. ادري وين صار هذا اشو اتأخر السايق ماكو هي لحظات وكان يجون يتقدمون بسرعة بتجاهنا اني گبل مديت ايدي داخل جنطتي ولزمت مبرد الاظافر اخذ احتياطاتي وواحد منهم اقترب علية وكال بتهديد .. وصلي هاي الرسالة لابن عمج ابو الهمة گليله مرة ثانية ما يروح يهدد صباوي لان انتي وهاي ترحن بالرجلين حتى يعرف صبا وراها زلم تفلت بوجهه وجاوبته .. قصدك انتوا كلاب صبا. السافلة هو بغضب غلط علية ومد ايده بتجاهي ما اعرف شنو يريد يسوي بس سمعت شهگة حوراء من خوفي لزمت المبرد وشخطت ذراعه لزم ذراعه المجروحة وصاح بصوت موجوع ومتفاجيء الولد .. ولج ساقطة اليوم ابوج احركه وين ترحين مني كنت واكفة جامدة بمكاني من الهبطة والخوف اقترب علية جرني من شالي وعطت بي .. حيوووووووان حوراء راحت ركضت للمدرسة تصيح الحراس بصوت عالي خايفة كان اكو ثلاث حراس شرطة يم باب المدرسة بس هم يدخلون جوة من تصير الطلعه وهمَ طلعوا على اصوتنا. كم طالبة من الموجودات كامن يصرخن مفزوعات والشرطة بس شافوا منظرنا اجوي يركضون واحد من الحرس رمى ليفوك حتى يرهبهم الحراس.. اوكف بمكانك لا تتحرك قبضوا على اثنين منهم. والبقية انهزموا بالسيارة واخذوهم سحل على مركز الشرطة والسايق اجة بعد العركة بعشردقايق وعلى طول الطريق كنا اني وحوراء وحدة تباوع للثانية بخوف اني جسمي كله يهتز اباوع لأيدية اني شسويت يتبع | ||||
|
| |
|
08-09-19, 09:30 PM
| #27 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_خمسة_وعشرون #الكاتبة_نهى ريم رجعنا للبيت اني وحوراء والوجوه مخطوفة وحدة تكول للثانية شلون شنسوي نكوللهم لو لا حوراء.. ريم احنا لازم نكوللهم الي صار لان الموضوع زاد عن حده ووصل للعظم ما يصير نسكت ومثل هيج امور لازم اهلنا يعرفون بيها .. والله مهيمن يتخبل اذا عرف ويلعب بينا طوبة .. ميخالف رزالة مهيمن ولا مصيبة تايهة من ورة هذولي الساقطين اليوم هيج سوو بينا باجر الله يعلم شنو يصخمون كنا كاعدات بالغرفة ودخلت نور شايلة بيدها الملابس النظيفة تريد تحطهم بمكانهم باوعت علينا وكالت .. ها بشروا اليوم شلونكم بالامتحان .. الحمدلله مجاوبين .. يالله ما بقى شي شدوا حيلكم .. ان شاء الله كانت حوراء تجاوبها واني ساكتة وافكر بمهيمن شلون افاتحه بالموضوع طلعت نور ورجعنا اني وحوراء نكمل كلامنا حوراء.. شوفي ريم عندي فكرة احنا نحجي وية امي ونكوللها كل الي صار وهي بطريقتها تكول لمهيمن ووبيومها كلنا لأم مهيمن وهي ضربت على صدرها .. يمة صخام وجهي على هاي السواية ولج هاي مصيبة وحلت عليينا بلعت ريگي .. عمة اهدي شوية لا تخافين همة الشرطة قبضوا عالشباب واخذهم للسجن يعني الموضوع انحل والقانون راح ياخذ مجراه .. ولج خايبة يا قانون يا صخام ولج هذا الولد متعدي عليج وهتك سترج وهاي عليها فصول وطلابة جبيرة بس الله يسترنا. وين جانتلج هاي زهرة اباوع عليها ظلت تحوم بالبيت ونور تهدي بيها واني وحوراء وحدة تباوع بوجه اللاخ حوراء.. شفتي ريم هاي الي اني خايفة منه باوعت لحوراء وزاد خوفي .. يعني امج شنو تقصد بهذا كلامها .. مو كلتلج الموضوع ما ينسكت عنه وشكل ام مهيمن عظمت الامور فوك ما اني متصورة مدري هو الموضوع بالاصل كبير واني ما جاي افهم عليهم احس كأنه داخلة بدوامة. وما اعرف شلون اخلص نفسي واطلع منها. يعني همة ليش هيج يحبون يعقدون الامور الشباب الي تجاوزوا علينا اخذوهم الشرطة خلاص بعد شنو يردون ام مهيمن .. ولكم انطوني النقال خلي اتصل على مهيمن وبعدما اتصلت على مهيمن وحجتله الموضوع كاللها هسه جاي بعدها دقايق وكان يندك الباب راحت ام مهيمن لبست عبايتها وفتحت الباب ودخلوا اخوانها اولادهم وكل واحد بيهم شايل سلاح اتسعت عيوني متعجبة .. يا ستار شنو صاير دخيلك ربي هذولي بس لا عندهم عركة ورحت اركض لحوراء .. حوراء لحكي اجوي خوالج واولادهم و وياهم اسلحة شكلهم متعاركين عندهم مشكلة حوراء طفرت من مكانها ولطمت خدها .. عزة العزاني ولج هذولي اجوي وشدوا حزام الفزعة علمود سالفتنا. بس لا راح يدكون بيوت اهالي الشباب حجيت بصوت واهن.. حوراء عفية فهميني وحدة وحدة احنا شنو دخلنا. وليش السلاح. وشنو يدكون .. ولج معناها راح تصير طلابة يعني مصيبة. بس الله يستر يعني مهيمن ما راح يسكت هي حوراء كالت هيج واني رجلية بادت وكعدت بالكاع وحطيت ايدي على راسي صرت ادعي ياربي سترك بس لا يصير على مهيمن شي من وراي والله. اموت ورة ربع ساعة وكان يدخلون مهيمن وجلال وصاح من الباب .. وينهن البنات صيحيهم اريد احجي وياهم ام مهيمن كالت .. يمة بهداي وية البنات ترة هن ميتات من الخوف مهيمن .. رحمة لموتاج صيحيهن خلي افتهم منهن السالفة رحت وية حوراء للمطبخ ورجلية رجل تطك برجل جلال شافنا وكال..خو ما سولكم شي هزيت راسي بلا ما اكدر اجاوب من الخوف مهيمن .. احجولي بالتفصل شلون وكفوا وياكم بالشارع بدت حوراء تحجي الصار لمهيمن رفع راسه وباوع علية وكال .. ولج غضب شلون تفلين بوجه الولد جاوبته .. مو هو كعد يهدد وكال وصلي الرسالة لابن عمج. مهيمن.. المفروض منج بهيج امور ما تردين عليهم بسرعة تبتعدين عنهم وترحين للحرس او ترجعين للبيت وتبلغيني رسالتهم وانا اشوف شغلي وياهم مو تگدين تتراددين وياهم بنص الشارع انتي مو رجال وتكعدين تتلاوين وياهم شفتي الساقط من رديتي عليه شسوة بيج راسا تعدى على سترج ولوما انتي صايرة فطنة ومتلاحكة لروحج وشاخطته كان مو بس ينزعج حجابج هاي اذا ما سحلج بالشارع كدام الناس دنكت وجاوبته بخوف .. اي صحيح اني ضربته بالمبرد بس والله ما اذيته.بس شوية شخطت ذراعه جلال..والله عمي كفو منج. بس لو جايبتها بعينه كان ارتاح گلبي مهيمن سكت جلال وكال .. ولج غضب فهميني انا ما جاي احجي على المبرد انا جاي احجي عن الي سويتي وكلامج وياه استفز الشباب وهجموا عليج. نهض من مكانه وكال .. وعليه من بعد الي صار انا ما راح اعديها على خير واكبر عيب بحقي اذا سكتت على الي صار بيج اتوجه للباب يريد يطلع والنار تسعر بوجهه رحت ركضت و قطعت عليه الطريق بخوف .. لا لا لا عفية مهيمن لا تروح. الله يخليك والله اذا يصير بيك شي اموت. ام مهيمن كام تلطم .. يمة انهجم بيتي. مهيمن بعدني عن طريقه .. ولج ريم بعدي عن طريقي انتي انطيتهم سبب حتى يتطاولون على عرضي وهاي النتيجة وانا مو زلمة وشاربي مو علية اليوم اذا ما اسويها دم للركب. نور انگلب البيت بلحظة الى حجيم. ريم انهارت بالبجي من بعدما طلع مهيمن طلع مهيمن وجلال وياه كان جلال يمشي ورة مهيمن مثل ظله احس بعيونه حذر وارتباك من الي كاعد يصير وبساعتها طلعوا مهيمن وجلال وخواله والشيوخ وام مهيمن لبست عبايتها وهي لازمة راسها وتولول ووصلت يم الباب ودارت وجها على حوراء وريم وكالت بغضب .. والله اذا صار على ابني شي بسببكم ، والله محد يخلصكم مني وانتي حويرة اذا ما بطلتج من المدرسة ما اتسمى زهرة خليتوا ابني علج بحلك الناس كله منج انتي وياها كانت تقصد حوراء وريم وطلعت وسدت الباب ووصتني ما افتح الباب لكائن من كان. ريم .. يعني ترة همة الي هجموا علينا احنا شنو بيدنا قابل احنا كللنالهم تعالوا تحارشوا بينا نور.. صحيح هم الي اجوكم وهددوكم حتى توصلون الرسالة لمهيمن. بس انتي بجوابج وطلعتج. خربت كلشي. يعني لو بس ساكتة وما تافلة على الشاب وغالطة عليه ورايحة للحارس او ترجعين تكولين لمهيمن كان ما صار كل هذا شفتي لا تستهانين بأبسط الامور لان هي الامور الصغيرة اساس مصايب الناس وهجمان البيوت وهسة بس الله الي يستر من الجايات وبقينا اني والبنات بس نترقب شنو الي راح يصير حوراء خنست وگعدت على صفحة ووجهها اصفر وريم بس تبجي وكل شوية تجيني تتوسل حتى اتصل على اي واحد تريد تعرف شصار وياهم التفتت على حوراء. وسألتها حوراء .. عفية اتصلي على ابن خالج وسأليه شنو الصار اتصلت حوراء وكعدت تستفسر عن الي صار وبعدها انهت الاتصال .. ها بشري شنو گال .. يكول مهيمن وخوالي راحوا هدوا لمركز الشرطة علمود يطالبون بالشباب الثنين. الموجودين هناك وكلولهم هذولي حصتنا والضابط معترض ما مسلمهم الشباب ويكول واهل الشباب اجوي وجابوا شيوخهم لهناك وطلبوا عطوة من شيخ العشيرة ثلاثة ايام وراح تصير كعدت عشاير اني كنت اسمع قبل عن هيج امور بس ما مارة علية كعدنا ندعي اني والبنات ان ربي يردهم ساليمن وتعدي السالفة على خير جلال اليوم الكعدة صارت بديوان خال مهيمن انا بالحقيقة انا مو هالگد متطلع عن قوانين العشيرة والفصل. بس كل الي اعرفه ان انا لازم اكون موجود بصف مهيمن وين ما يروح مستعد ومحضر حالي خاف تصير عركة ويغدرون بينا انا والشباب ما كعدنا بالديوان. بقينا لازمين اسلحة وواكفين بباب المضيف ماخذين احتياطاتنا حتى العشاير البقية كل واحد جايبله درزن زلم ومتحضر اهالي الشباب كل واحد عشيرته شكل جمعوا شيخوهم وناسهم واجوا حتى يحلون السالفة اجتمعوا بالديوان ومهيمن جوة كاعد وانا واكف بالباب واسمع اصواتهم العالية وما افتهمت شي منهم غير بس كلمة صلوا النبي واتعوذوا من ابليس وكل شوية تگب العيطة. وتحتد المناقشة وتعلى الاصوات هذا اليصيح مايصير هذا الكلام وهذا الي يكول شباب طايشين ماعندهم احد يردهم ودامت سالفة الفصل ثلاثة ايام بس بأيام متفرقة واخر شي ما كدروا يفضون السالفة لان مهيمن رفض الفصل كانوا اهالي الشباب يردون ينطون فصل فلوس كتعويض عن الصار لذلك ما توصلوا لحل وطلعوا من الديوان ويم باب الديوان. واحد يتوعد للثاني واحد من الشباب كال .. بسيطة انا اعلمك. وانا اجيت اهد عليه بس شيخ عشيرة خوال مهيمن لزمني وكال. .. لا تهد يابعد عمك. تنحسب علينا مو عليهم لان همة بديوانة. جايين باوعت عليه وجاوبته .. شيخنا ما شفته شبون يهدد الشيخ وجه كلامه لشيوخ عشاير الشباب وكال بصوت عالي .. شوفوا هذا ابن كعد يهدد كدامكم. وانتوا شاهدين والي رفع السما اذا وكعت حجارة على ابنا. ترة انتوا حصتنا اباوع لمهيمن غافل خواله وراح زنك الولد ومطله بالگاع. وگال .. ولك مخنث تهدد منو وحق الكعبة. ما اتسمى مهيمن اذا ما لبستك ثوب نسوان وانا اعرف شلون اخذ حقي منكم وخواله بسرعة رفعوا مهيمن من على الولد وسحبوه ودخلوه بالديوان والشيوخ البقية. اخذوا ولدهم وراحوا والشباب الثنين بعدهم بالمركز. والثنين الباقين لحد الان ما لاكيهم اهلهم هربوهم و مهيمن يطالب بالبقية يريدهم يكول ما يشفي غليلي الا اخليهم يخيسون بالسجن وبيومها مهيمن اتصل على ابو حيدر وطلب منه ان ينطي رقم ضابط بالجنايات ابو حيدر عنده هواي معارف وواسطات نور كان البيت هوسة وكله نسوان قرايب ام مهيمن متجمعات عندها حتى يواسنها ويستفسرون عن اخبار الگعدة وريم وحوراء غابوا من المدرسة بأمر من مهيمن بعد الي صار مهيمن كال .. راح اخذ للبنات اجازة هاي اليومين الى ان تفض الطلابة. لان بعد الي صار كلشي اتوقع منهم يسون سمعت صوت قوري الجاي ورحت اصب جايات للنسوان وحوراء تساعدني وكلما تدخل وحدة من خالاتها. تظل تحجي على حوراء وتبهذل احوالها هي وريم. .. شنو من بنات انتو ما كاعدات راحة. شلون توكفون بالشارع وتردون الزلم والله عمي خوش هاي بنات اخر زمن. وحوراء تسكت ما تجاوب وريم تظل تدردم .. من وصلت للعراق واني مشاكلي بدت. واكتشفت شغلة وحدة ان البنية بالعراق. لازم تسكت سواء كانت صاحبة حق او لا. ظالمة مظلومة بالحالتين هي غلط ان سكتت راح يركبون فوك راسي واني الممنونه وان حجيت راح تصير كل المصايب براسي ويطلعوني ام لسان. وما استحي وبالاخير البنية هي الضحية الوحيدة من كل هذا ..لكل مجتمع قوانينه. ولازم تخضعين لهاي القوانين حالج حال البقية ريم ترة مو صعبة بس انتي الي صعبتيها بعدم اهتمامج ان تعرفين معنى تصرفاتج وادراكج للمواقف الي تجريها لنفسج بقينا ننتظر رجوع الرجال من الديوان وصار الليل وراحوا قريبات ام مهيمن ورجعوا مهيمن وجلال اباوع لريم طلعت من الغرفة. بلهفة. وراحت يم مهيمن تباوع عليه. راحوا دخلوا كلهم بالهول يم ام مهيمن وكعدوا يفهمونها على الصار بالگعدة وام مهيمن بخوف.. يعني يمة افهم من كلامك الشغلة ما انحلت .. لا يمة ما انحلت وانا ما اريدها تنحل شنو ترديني اوافق يساوموني على ستر بنت عمي بفلوس .. زين وبعدين شنو الحل اذا انت ما ترضى وهم ما يوافقون على طلبك ويسلموك ولدهم ، هم يخافون عليهم منو يسلم ابنه بيده . . خلاص هاي مشكلتهم واظل وراهم لحد ما اجيبهم واحد واحد واخيسهم بالسجن بس خلي يصبرولي ريم .. عفية مهيمن وافق على الفصل باوع عليها وكال .. هاي نتيجة تصرفاتج الطايشة طلع الموضوع من ايدي وصارت شغلة تمس الشرف وهالشي مو هيّن انزل راسي وامشي بين الناس بسببج اباوع لريم الليل كله وهي تتكلب مثل السمجة الي مطلعيها من المي ومتكدر تتنفس . ما تعرف شنو تسوي وحوراء حالها اضرب من ريم. امها كل شوية تحجي عليها. جلال يوم ثاني اني ومهيمن مثل كل يوم نطلع من الفجر على شغلنا بنفس الوقت الي متعودين عليه لان هاي الايام هملنا الشغل طلعنا ووكفنا بالباب وهو يريد يركب بالسيارة واني ي بصفه وسألني مهيمن .. اكلك جلال صدك المكينة الهيتر مالتها عطلان الخاص بالسليفان ؟؟ جاوبته.. اي بس لا تخاف وصيت عالادوات راح يجيبوها الي من بغداد وانا اسويها جنا نحجي وكان تعبر من يمنا دراجة عليها اثنين شباب ملثمين. ورموا. علينا وانهزموا مهيمن شافهم قبلي وكان اسرع مني دفعني ووكعنا بالكاع اثنينا. كانت هي مجرد لحظات مو اكثر كنت بعدني ما مستوعب الي صار متفاجيء الناس طلعوا على صوت الرمي بديت انهض على كيف من الكاع وانا احجي وية مهيمن وانفض بملابسي ..سووها الناقصين مهيمن كان ساكت التفتت وكان اشوف مهيمن بعده مدد بالكاع واكع على وجهه ما يحرك ساكن انخمط گلبي رحت عليه بسرعة وقلبته على ظهره وصار ممدد بحظني وكان اشوف بطنه كلها دماية هو انا شفته هيج وانا اتخبلت. احس اندليت مكان گلبي بلحظتها. عرفت بأحساس الخوف على الاخ كان شعور مرعب بشكل ما اتمناه لعدوي فقدت من منظره و صرت اصيح بصوت مفجوع. وما اشوف الا الناس فوك راسي كلها ملتمة وام مهيمن طلعت على الصوت وشافت ابنها غركان بدمه كدامها وگامت تدك وتلطم على وجهها مفجوعة. والبنات طلعوا على صوتها لفت انتباهي حوراء طلعت حافية. وما عليها حجاب وشافت مهيمن وركضت عليها وكعدت يمه بالكاع ووهي تصرخ وتلطم. ..لاااااااا عفية مهيمن لاااااا تكولها وتكسر ظهري كل واحد بينا حاله شكل وانا عقلي فاصل عنهم بغير عالم كان همي الوحيد بهاي اللحظة شلون الحك على مهيمن واوصله للمستشفى تعاونا انا وكم واحد حتى نصعد مهيمن بالسيارة كنت مرعوب لا اخسر اخوية. ربي حتى بعدني ما لحكت اتهنى بي انتبهت لوحدة من النسوان شمرت عباية على حوراء الي بعدها كاعدة بالگاع فاقدة وصلنا للمستشفى وهناك استلموه واخذوه من بين ايدية الحياة اختبار ومرات يجي مع الاختبار صدمة تخليك تعرف قيمة المقابيل سمعت صوت وراي وحدة تبجي مثل الطفلة المهضومة التفتت وكان انصدم بوجود ريم كاعدة بالكاع يم الباب الي دخلوا بي مهيمن منظرها كان غريب كانت مكرفصة على نفسها وحاضنة روحها وتحجي بكلام غير مفهوم. .. كله مني اني السبب عفية عمو لا تتركني رحت عليها .. ولج ريم. شلون وصلتي لهنا منو جابج اباوع عليها. كانت لابسة شماغ على راسها مثل الحجاب وببجامة البيت خال مهيمن جاوبني .. بوية انا جبتها ويانا لگيتها تركض بالشارع ورة سيارتكم مثل المخبلة فاقدة ما تدري بنفسها. وما عليها حجاب وتصيح عمي وخفت عليها والدنيا فجر كلت لابني يصعدها ويانا وانطيتها شماغي تستر حالها اي صدك خوال مهيمن كلهم اجوي ورانا هواي ناس تفقد عقلها بساعة المصاب ما ينتبهون على حالهم وتكون كل افعالهم وتصرفاتهم صادرة عنهم بدون وعي وادراك احس بحيلي انهد ورجلية بعد ما بيها حيل تشيلني كعدت بالگاع واتكأت عالحايط المقابيل غرفة الطواريء الي دخلوا مهيمن بيها كانت الناس تروح وتجي والمستشفى انگلب گلاب بالناس وانا عيني بعدها ثابتة عالباب منتظر الدكتور يطلع انتبهت على واحد لزم كتفي وعصره يواسيني التفتت وكان اشوف عناد. كاعد بصفي بالكاع وابوه واخوانه كلهم جايين وواكفين يم خوال مهيمن عناد.. هونها يا صاح جاوبته وانا ناسي الزعل .. عناد انا جاي انازع بالروح وبعدها دخلت بسكون عميق ما اتحركت من مكاني نور خوف ورعب وصدمة الي صار بمهيمن عياط ام مهيمن ومنظر حوراء. واختفاء ريم نساني نفسي والدمعة عاندت وياي صرت انتقل من شخص لشخص اسأله عن ريم بس لا سوت بروحها شي ياربي سترك صرت اواسي ام مهيمن وارجع اواسي بحوراء بعدها ام مهيمن صاحت .. ولكم اخذوني لابني. لا اكتل روحي اخوها جاوبها .. شتسوين ترحين وهناك كلها شيوخ وزلم. وصوتج يطلع هناك ام مهيمن .. والله اذا ما تاخذوني انا اروح. كامت من مكانها وصاحت .. وينكم انطوني عبايتي. خلوني اولي. اروح اشوف ابني شصاير بي محد يرضى يطمني عليه اخوها .. بوية جيبولها عباية. انا اعرفها ما ترتاح الا تشوفه بعينها اني ركضت ولبست حجابي والجبة. ورحت وكفت يم ام مهيمن .. عفية خالة اخذيني وياج وصلنا للمستشفى وشفنا كل جماعته واقاربه هناك عيوني كامت تدور على جلال لكيته كاعد بالكاع وصافن بغير عالم وتشيرته كله دم كسر گلبي بمنظره اتمنيت اروح واحضنه واوسيه مثل ما الاخت تواسي اخوها. بس شكل الزمن حبس مشاعرنا ودفنها وخلانا نخجل نعلن عنها وهناااك وكان اشوف ريم رحت عليها وكومتها من الكاع واخذتها يم ام مهيمن ريم كانت بس ترجف والعيون ذبلانة من البجي وخالهم حسن بس شاف اخته اجة علينا ام مهيمن .. خوية ابو مؤمل انشدك. على ابني كلي شلونه .. تعالي بالاول كعدي هنا واخدنا على صفحة وكعدنا على كراسي مخصصة للمراجعين الي بالمستشفى كعدنا وصار يفهم ام مهيمن عن الصار .. بعدنا كلنا منتظرين بس لا تخافين ان شاء الله ما بي شي دقايق وطلع الدكتور من غرفة الطورايء. وجلال بسرعة كام من مكانه. واتجه هو وخوال مهيمن على الدكتور .. ها دكتور طمنا على اخوي الدكتور ابتسم وكال .. الحمدلله على سلامة اخوك اصابته طفيفة. لان الطلقة جاية شطح من الخاصرة ام مهيمن سجدت بالگاع وصارت تحمد ربها وتشكره جلال كنت حابس انفاسي لكن كلام الطبيب طمني عن مهيمن تنفست براحة. والتفتت على اولاد خوال مهيمن وكلت .. انا اعرف منو الي سوى الدكة الناقصة بأخوية وانا راح عليهم. احرك بيوتهم رحت طلعت من المستشفى وتركتهم وراية. التفتت لكيت اولاد خواله كلهم. متحزمين واحد منهم كال.. جلال اخذنا وياك ما تروح لوحدك كل واحد صعد بالسيارة الي جاي بيها صعدت بسارة مهيمن واتفاجئت من انفتح باب السيارة الثاني وكعد يمي عناد غمضت عيوني وحجيت .. عناد شتسوي هنا انا رايح طالب ثار عناد بعيون تلمع كال .. صاح انا وياك وين ماتروح غمضت عيوني بصبر وشغلت السيارة وعفته مو وكت الزعل انا بيا حال انا هسة كون الله يوليني على هذولي السفلة الي رموا مهيمن والله ما ارحم ولا واحد بيهم اباوع لعناد على طول الطريق يتصل كان بالي مو يمه كل شوية يحجي وية واحد وينطي تعليمات منا لحد ما وصلنا لبيت الشباب. لگينا مفارز الشرطة موجودة تنتظرنا نزلت من السيارة وسألت .. الشرطة. شنو عدهم هنا شلون عرفوا احنا جايين هدادة عليهم عناد .. جلال انا اتصلت على كم واحد من جماعتي وهمة اي دزوا مفارز الشرطة ولزموا واحد من الشباب الي كانوا شاردين باوعت عليه وزنگته من ياخة قميصه .. انت منو طلب منك تتصرف ، بس كول هسة اني شلون اخذ حق اخوية وارد الصاع صاعين واحرك گلوبهم مثلما حركوا گلبي عناد ما قاوم وجاوبني.. صدگني جلال راح تشكرني بعدين على الي سويته لان انت هسة غضبك متحكم بأفعالك اذا خليتك تسوي الي براسك صدگني الدم راح يجيب الدم وما راح تنتهي الا يموت واحد بيكم دفعته حيل وكلت .. عناد وخر من وجهي ولا تخليني اشوفك. غدرتني بهاي سوايتك بس بسيطة ما علينا وين يرحون وفعلاً طلع كلام عناد صحيح. جماعته لازمين واحد من الشباب الثنين الي كانوا شاردين وبعد ما لزموه وضيفوا بالحبس اعترف بعظمة لسانه انه هو وصاحبه الثاني رموا علينا وانطاهم مكان صاحبه الثاني وراحوا الشرطة والقوا القبض على الثاني كله هذا صار خلال سبع ساعات ورغم الي صار بس ما اعترفت بفضل عناد وموقفه بقيت متمسك ومعبس وجهي وهو بقى مرافقني وين ما اروح ما يعوفني كنت كاعد بالمستشفى وكمت من مكاني باوعت لعناد هو راسا نهض درت وجهي عليه وكلت .. خير سالمين انا رايح للحمام شعندك كايم وراية عناد. ابتسم وكال .. مو ادري بيك الشر متربع براسك. خايف تسوي شي غمضت عيوني .. شكلك باقي لزكة نور بقينا اني وخالتي وريم كاعدات بالمستشفى وخالتي تدهورت صحتها والتهيت بيها واخوانها خطية انخبصوا خبص واخذناها لطواريء النساء شافوا ضغطها ولكوه مرتفع انطوها ابرة خلتها شوية تنام تركتها بعد ما اتطمن عليها واتذكرت ريم الي كانت كاعدة لوحدها بغير عالم ورحت يمها كعدت ولزمت ايدها كانت قالب ثلج . همست بصوت ناصي .. ريم باوعي علية وسمعيني زين درت راسها وحطيت عيني بعينها كانت نظراتها ضايعة .. ريم مهيمن زين وما بي شي هزت راسها بخوف ونزلت دموعها وحجت بصوت متجرح .. كولي والله مهيمن ما بي شي .. والله صحته تمام والاصابة مو خطيرة حطت راسها بحضني وكامت تبجي وتكول .. والله اذا صار على مهيمن شي ما اسامح نفسي رجعت رفعت راسها وكالت .. بس يطلع مهيمن من المستشفى راح ابدي اغير من نفسي وبعد ما اسوي مشاكل واصير مثلج مثلما كان. مهيمن يتمنى دمعت عيوني على كلامها عن مهيمن وكلتلها.. ريم لا تلومين نفسج الي صار كله قضاء وقدر صيري قوية. هزت راسها برفض وكالت.. لا نور صوجي اني كان دائما عمو مؤيد يكولي انتي وين ما ترحين تسوين مشاكل. وفعلاً كلامه. ريم كسرت خاطري. جاي تحمل نفسها اصابة مهيمن ومناك حوراء الي تركتها منهارة بحضن خالتها ما اعرف شصار بينا حياتنا انگلبت فوك حدر كنت حاضنة ريم وامسح بدموعها وكان واحد يجي علينا ويمدلنا. علاكة رفعت راسي وكان اشوف عناد. كدامي اجتي عيني بعينه. كان ينظر لي بلهفة لكن بسرعة اتلاحك. لروحه. نزل راسه وكال .. نور هاي شوية عصاير وماي وكيك انتبهت عليكم باقين على كعدتكم ما اتحركتوا ولا اكلتولكم شي اخذتها منه وايدية ترجف. وشكرته بصوت ناصي يمكن حتى ما سمعني تركنا وراح. واني دخلت مشاعري بحالة فوضى ورة ساعتين اجة جلال وكال .. نور اريدكم ترجعون انتي وريم وخالتي للبيت وانا راح ابات يم مهيمن بالمستشفى وبيومها بالكوة كدرنا نقنع ام مهيمن ترجع ويانا للبيت. جلال كنت كاعد بالليل يم مهيمن وسمعته بالليل يهذي بأسم ريم ابتسمت. واستغليت الفرصة وصورته فديو خلي يكوم بالسلامة واراويه كل شوية اباوع عليه واضحك خرب يومه طلع اخوية مو هين ولا مبين عليه ، اثاري الزلمة غركان بحب باربي وما يحجي ههههههه الساعة بالوحدة بالليل مهيمن صحى وسألني وانا كعدت احجيله عن الصار. من بعده وعن صحته. اتحرك وهو متأذي. وكال بصوت تعبان .. ااااااااخ ولك جلال انت متأكد الرصاصة جاي شطح. .. اي والله هذا كلام الدكتور .. ليش احس بخاصرتي مقصومة نصين ما اكدر اتنفس .. اي غير هي طلقة قابل شوية .. كلي انت شتسوي هنا ليش ما بتت بالبيت الاهل منو يمهم .. ماكدرت اتركك لوحدك .. شعليه قابل انا صغير بس البيت ما يصير نعوفهم لوحدهم محد يمهم. كلشي يصير .. لا تخاف الشرطة لزموا الي رموا علينا وكعدت احجيليه عن موقف عناد مهيمن.. الي سواه عناد عين العقل مرات العرايك مو حل حتى تاخذ حقك بس طمني ما كالوا شوكت اطلع طكت روحي .. بعدنا ما گلنا حلال ...... نور يوم ثاني خالة كعدت من الصبح وكامت تطبخ واني وياها اساعدها حتى تاخذه لمهيمن ام مهيمن.. اكل المستشفى مايلزم الگلب اباوع لحوراء دخلت للمطبخ وتباوع لأمها بس ام مهيمن بعدها ما تحجي وياها وحوراء متأذية على زعل امها وريم ما اقتربت لأم مهيمن ولا احتكت بيها اجة ابن خال مهيمن حتى ياخذ الاكل وام مهيمن لبست عباتها وكالت تاخذني وياك واني هم حضرت نفسي حتى اروح وياها ما اكدر اعوفها تروح لوحدها هي صحتها ما تساعد خطية لطالما تطبخ ايديها ترجف وصلنا للمستشفى ولكينا هواي ناس واكفين يم غرفة مهيمن واخوان ام مهيمن بس شافونا فسحولنا مجال حتى ندخل يم مهيمن بعدما طلعوا جماعته من الغرفة دخلت ام مهيمن وحضنت ابنها وكامت تبجي واني بقيت واكفة بمكاني مترددة. اقترب منه وكلت .. الحمدلله على سلامتك مهيمن باوع وعيونه بيهم حنان علية ومد ايده يدعوني اقترب منه ........ نور المكان في المستشفى طلعت من الحمامات وكان اشوف عناد بوجهي صارت عيني بعينه وارتبكت دنكت وردت اكمل طريقي لكن صوته استوقفني وكال عناد .. نور لحظة يتبع | ||||
|
| |
|
08-09-19, 09:33 PM
| #28 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_ستة_وعشرون #الكاتبة_نهى جلال وصلت ام مهيمن هي ونور وابن اخوها محملين بالاكل اباوع لحنان ام مهيمن على ابنها. ولهفتها واصفن وية نفسي واكول امي گلبها من شنو مخلوق لو انا اتصل اسأل عليها لوماكو ما يوم كلفت نفسها وكالت خلي اشوف ابني عايش لو ميت من عشت وية اهل مهيمن وشفت حنان امه حسيت بالفرق بينها وبين امي نهضت من مكاني وكلت .. ما دامكم اجيتوا يم مهيمن لعد انا استغل الفرصة واروح للبيت اسبح اغير ملابسي واجي مهيمن .. مو تنسى الي كلتلك عليه مفاتيح المحل سلمها للحاج ابو حيدر حتى يخلي كرار ابنه يكعد بمكاني وانت عينك على المعمل بعد كافي لا تجي تبات يمي انا ان شاء الله ماضل شي واطلع من المستشفى .. صار بعد تأمر على شي .. لا اتوكل على الله طلعت وتركت نور. وام مهيمن كاعدات يمه ولا زالت صالة الاستعلامات مليانة بخوال مهيمن وناسهم. لكيت الحاج ابو حيدر وكرار وعناد جايين وكاعدين يمهم وكم واحد من جماعتنا هم موجودين استحيت امر واسلم بدون ما اكعد وياهم همة اصلاً جايين علمود. اخوية رحت سلمت علييهم وكعدت يم ابو صادق من جماعة السوق. اسمع الشاب الي كاعد يم ابو صادق يگله .. بالله سأله عن البنية الفاتت وية ام مهيمن صدك هاي اخته لمهيمن التفت علية الرجال الكبير ابو صادق وسألني .. اكول بوية ولو تطفل مني بس اريد اسألك البنية الفاتت هسة منا اختكم. عقدت حواجبي يالله هسة هذا شحجي وياه بربكم هسة هذا هم سؤال جوابته وانا على اعصابي .. اي عمي اختي كال .. اكلك يابعد عمك متزوجة مخطوبة هو سألني هيج وما احس الا الشخص المقابيلي وكع النقال من ايده رفعت راسي وكان الكة عناد عيونه تريد تطلع من راسه. وموجهة على الشاب شكله سمع كلامهم اباوع على وجهه مال واحد راح يرتكب جريمة قتل ما اعرف ليش من شفت ارتباك عناد ارتاح گلبي احس ماي بارد ونزل على گلبي التفتت على الرجال وجاوبته .. لا ما مرتبطة. ليش تسأل .. بوية ولو هو مو وكته. هذا الكلام . بس يگولك في البلايا تحصل الغنايم. واختك الله يستر عليها شنو من ادب واخلاق شايلة البارحة وانا مثل ابوك انتبهت عليها ولارفعت عينها ولا علت صوتها. وهيج ذهب انا جنّايه. رفعت راسي بفخر وصارت عيوني بعيون عناد اتحداه يحجي او يفتح حلگه. .. والله ابو صادق انت الذهب واصلك معروف بس مثلما اتفضلت وگلت. هذا الكلام مو وكته هسة خلي مهيمن يطلع بالسلامة. ويرتاح والله كريم لكل حادث حديث انا احجي وبعدني اباوع لعناد الي صار يمسح بعرك كصته وكل شوية يحم حم احتار شيسوي. يمكن لو عليه يشيل ابو صادق والشاب الي يمه. ويطلعهم سحل برة المستشفى بقيت كاعد وياهم حوالي ساعة وطول هاي الساعة اباوع لعناد كل شوية ينافخ گمت من مكاني .. انا اترخص منكم. اريد امر على البيت ابو حيدر .. الله وياك عمي. مو تنسى تجيب مفاتيح المحل وياك .. ان شاء الله ما انسى نور كاعدين يم مهيمن وخالة بسطت بالاكل يمه مهيمن.. شالقضية يمة المن هذا الاكل كله جوابته.. يمة هذا كله الك اريدك تاكل يايمة حتى يترمم جرحك وانت سودة علية بالگوة تاكل صبت واني ساعدتها لان لطالما تتحرك ايدها ترجف مهيمن عقد حواجبه مستغرب وسأل .. يمة ايدج ترجف شنو شبيج .. كلشي ما بية اني من يمي حجيت .. لا مهيمن خالة البارحة اتخربطت هنا بالمستشفى ونقلناها للطورايء وطلع ضغطها مرتفع باوع عليها.. معناها البارحة كالبة المستشفى عزة حسب ما فهمت يمة شلون بيج وين اوديج. .. يمة حقك ما تدري بگلب الوالدة شكد شايل محنّة لاولادها كعدت يمه تريد تأكله مهيمن.. يمة لاتكولين راح تكعدين تأكليني بأيدج شوفيني اني ما انشليت ايدية ما بيهم شي جيبي عنج انا اكل وانتي اكلي وياية جنت ارجع حافظات الاكل بالعلاگة واتبدة علية سوب اللحم كمزت من مكاني ولاح طرف الجبة ام مهيمن .. يالله خالة فدوة. خو ما احتركتي حار السوب .. لا ما لاح رجلي بس تلف الجبة .. روحي غسلي وصيحي وياج الفراشة حتى تجي تنظف الكاع طلعت من يم مهيمن وعبرت الممر ورحت للحمامات حتى انظف طرف الجبة بين ما خلصت تنظيف وكملت وطلعت من الحمامات وكان اشوف عناد بوجهي صارت عيني بعينه وارتبكت دنكت وردت اكمل طريقي لكن صوته استوقفني وقطع علية الطريق وكال عناد .. نور لحظة وكفت محرجة وباوعت منا ومنا ما اريد احد يمر ويشوفني واكفة يمه حجيت بصوت ناصي ما اعرف انا صوتي ليش يختفي بهيج مواقف .. ششنو عناد غمض عيونه ومسح بكف ايده على وجهه وكال .. يابنت الناس اترجاج بعد لا تلفين للمستشفى الناس كاموا يحجون بيج ويردون يخطبونج وخلي ببالج انا ما راح اسكت .. عناد اني ما اسمحلك تحجي وياي بهاي الطريقة .. مو انتوا ماناوين تنسون ولا تسامحون سديتوا ابواب رحمة الله كلها بوجهي شترديني اسوي من اسمع الناس تطلب ايدج من اخوانج كدامي .. عناد كل شي بالدنيا قسمة ونصيب اترجاك تنسى وتكمل طريقك اشر على گلبه وكأل .. ليش هو هذا امره بيدي حتى انا هيج سهلة علية انسى واكمل. طريقي لج نور انا الله بلاني بحبج واتورطت بي كون الامر بيدي كان هسة انا مرتاح ونايم ليلي مرتاح ومتهني هو يحجي بحرگة گلب واني كلي ارتعد ما اعرف شبية خايفة ومخبوصة. ومتوترة هيج خلطة مشاعر غريبة ما اعرف شنو مصدرها وليش اصلاً اني مرتبكة رفعت راسي وكلت.. عناد بعد عن طريقي خليتي اروح لا والله اكول لجلال عليك اباوع عليه رص على اسنانه واتحرك على صفحة حتى افوت. مشيت وهو كال وراية .. نور سمعني زين هي حجاية وما اثنيها لو على گص رگبتي انتي اتسميتي بأسمي وعسى ما يصيرون خواطيبج مية انتي الي ما تصيرين لغيري تركته وكملت طريقي ورجلية ترجف عناد تمسكه بية يربكني دخلت لغرفة مهيمن وام مهيمن كالت .. ها خالة صحتي للفراشة .. هااا لا خالة ما لگيتها رحت گعدت يمهم وبعد ما اتحركت من مكاني اراجع بكلام عناد وياية و گلبي يدك سريع شبي جلال وصلت للبيت وحوراء فتحتلي الباب باوعت عليها عيونها وخشمها حمر من كثر البجي خطية هاي الثانية هم تحس بالذنب على الصار بأخوها الله يحفظهم الكل حملوهم ذنب ما مرتكباته سلمت عليها وكلتلها حتى اطمنها .. حوري مسحي دموعج انتي تعرفين مهيمن اسد ما ينخاف عليه ذاك هو كاعد بحضن امج وكاعد يتدلل عليها حوراء سمعت كلامي ودموعها كامت تنزل وغطت وجهها بكفوف ايدها عود انا النجر بين اصحابي وبدمعة من غزال البصرة لگيت گلبي ينعصر .. ولج حور كافي لا تبجين عليمن هاي الدموع حوراء جاوبتني وهي تبجي بحركة .. جلال محد يقبل ياخذني اشوف اخوي والله گلبي طاك على شوفته امي علنت الحرب علية والكل هنا معاديني منو الي اكله اخذني يظل يحجي علية نست نفسها وصارت تشتكيلي وتبجي وعاد انا شلون گلبي منا ميت عليها ونوب تشتكيلي قهرها .. حور مسحي دموعج ما عاش الي يقهرج سحبتها النقال من جيبي واتصلت على مهيمن .. الو مهيمن. انا راح اجي للمستشفى واجيب حوراء وريم وياية خطية هاي اختك تكسر خاطر حتى الي ما بگلبه رحم تريد بس تشوفك الظاهر الوالدة والكل معاديها علمود الي صار جاوبني وكال.. اي اي جيبها وياك اريد اشوفها اسمعه يحجي وية امه ويگول .. ها يمة اشتغلت رحمة الله. انا مو موصيج كل شي ولا حور تقهريها وتأذيها من انا مو يمها ، مو محلفج ما تحجين عليها امه جاوبته.. خليها تولي لا يجيبها للمستشفى هي وذيج. كله من تحت راسهن الي صار رجع حجة وياية .. جلال جيبهن وتعال ماعليك بأمي غلقت النقال وهي كانت عيونها معلكة بأمل بوجهي غير انا تروح روحي من تباوع لي بهيج نظرات روحي جهزي نفسج وكولي لريم هم تحضر نفسها حتى اخذكم اثنينكم للمستشفى ابتسمت بفرحة والعيون تلمع بالدموع .. صدك والله جلال راح تاخذني ؟ فهيت بوجهها .. هااا اي اخذج اااا يالله بسرعة تحركي وروحي كولي لريم بين ما اسبح .. ربي ما يحرمني من حنانك وراحت ركضت تصيح بعالي صوتها على ريم ضحكت على شكلها وهزيت راسي ريم وصلنا للمستشفى واني كلي لهفة حتى اشوفه واتطمن عليه ما ارتاح الا اشوفه بعيوني جلال اجة للبيت واخذنا وياه من وصلنا للمستشفى جلال كال .. ريم حوراء من تمرون من يم خوال مهيمن دنكو وامشوا بسرعة. لان جماعتنا كلهم هنا بالمستشفى وعيونهم ليزر من ابو صادق وشيل ايدك سألته.. منو ابو صادق جاوبني وهو يمشي كدامنا .. هذا واحد يفرق الجماعات وصلنا للمكان الي بي مهيمن جلال دك الباب ودخل. واني وحوراء دخلنا وراه مرتبكات ومترددات رفعت راسي وباوعت عليه عيوني ما تشوف بس هو سمعت صوت شهگة بجي حوراء كانت بعدها واكفة يمي مثل الي تنتظر الاذن حتى تروح لعنده باوع علينا انا وحور وفتح ذراعه وصاح تعالي حوري ولج ولا تبجين هي سمعت هاي الكلمات وراحت ركضت عليه مثل الطفلة وشمرت روحها بحضنه وكأمت تبجي بحرگة گلب. .. مهيمن والله اجيت اموت. ما راح اسامح نفسي على الي صار بيك التفت على امه وگال .. عفو عليج يمة شمسوية بأختي مو تدرين بية ازعل على زعلها. شلون انطاج گلبج هيج حاركة كلبها ام مهيمن .. هو احنا شحصلنا من دلالك لها اشو تتعارك بالمدرسة وتجيب المشاكل هي تحجي اني وبلعت ريگي اهووو ام مهيمن كلش محملة بكلبها علينا بس الله اليستر بقيت واكفة بمكاني. اباوع عليه شلون حاضن اخته يواسيها ويسكتها اتمنيت بلحظتها اني بمكانها وهذا حنانه كله الي همست بصوت ناصي .. مهيمن الحمدلله على سلامتك رفع راسه وباوع علية عيونه بيهم شوك مدفون لكن مع الاسف جاوبني ببرود .. الله يسلمج ريم من باجر ترجعون تداومون وجلال يوصلكم ويرجعكم للمدرسة. انا اتفقت وية المديرة بس تخلص امتحاناتكم تكعدون بالبيت قبل شهر المراجعة جاوبته واني مقهورة من اسلوبه البارد وياي .. اوك كلي انت شلون صرت .. الحمدلله بخير حجاها والتهة يحجي وية جلال يسأله باوعت لنور والدمعة معلكة بعيوني جلال .. مهيمن قبل شوية اجة الضابط ويريد ياخذ اقوالك بموضوع هذولي الي لزموهم اي وقبل لا انسى ابو سيف درة بالموضوع وكال راح ادزلكم جماعة اختصاص بهاي الامور ، راح يفهموكم شنو تسون مهيمن .. والله اجة بوكته جلال رحت للمعمل مستعجل اكمل شغلي حتى ارجع لمهيمن لان راح يطلعون مهمين من المستشفى ولازم اكون وياه امه مسوية عزيمة على سلامته كنت مشغول وكان تدخل علينا بنية شكلها من هذني الفايخات عقدت حواجبي واستغربت هاي شتسوي هنا وبالمعمل موقعها كلش غلط احنا نادراً ما تجينا نسوان للمعمل. كبل سألتني .. العفو عناد هنا اهاااا من جماعة الاستاذ عناد دخل عناد. وتفاجيء بوجودها وجمد بمكانه وسألها بغضب .. انتي شلون تتجرأين تجين لهنا. ولج انتي شنو ما تعبين ما تملين مو كلنا يفتح الله البنية بدلع .. عنودي ليش هذا الجفة ما اتعودت عليك هشكل تعاملني عناد يباوع علية مثل الي وكع بمأزق ورجع باوع عليها وحجة .. لا تخليني اسب ابو عنودي تطلعين برة لا بالقران اعزل المعمل على راس الخلفوج. كافي ما مليتي حجة وياها وطلعها من المعمل ورجع للمكتب باوع علية وگال .. جلال الله عليك لا تاخذ علية نظرة مو حلوة والله العظيم هاي من الملفات القديمة. يعني ماضي لا تسجلها علية نقطة ضدي ادري هذا الشي ما راح يشفعلي رفعت حاجبي بأستهزاء وكلت .. وهسة انت منو سألك حتى كعدت تبررلي. اخذت نظرة عليك او ما اخذت ما راح اقدم او ااخر هاي سوالفك الناقصة تخصك لك لوحدك ما تخصني كمت من مكاني وهزيت ايدي .. لا ويريدنا نزوجه اختنا. تحلم تشوف طرف ثوبها على هاي سوالفك انا حجيت هيج وطلعت وهو بقى بمكانه يحوم مثل الي عنده مصارعة عناد.. الله يلعن ابو الحظ الي شايله مو هي جانت عايزة والتمت نور اليوم مهيمن يطلع من المستشفى والبيت مخبوص خبص بالناس وخالة ام مهيمن وما ادراك ما ام مهيمن كالبة البيت فوك حدر جابت خروف علمود سلامته واول ما وصل ذبحوه يم رجله وظلت الناس على طول هاي الايام يجون هي كلها بصفحة وريم الي كانت. تحاول دائما تتقرب من مهيمن. اباوع عليها اذا صاح مهيمن يطلب شغلة هي تركض اول وحدة يمه كانت ما تداري لهفتها كدامنا حتى خالات مهيمن انتبهوا عليها وحدة منهم حجت بعد ما كدرت تضمها .. اكلج خية شعجب تخلين بنت عمه تدخل وتطلع بكيفها يم الولد شنو وين كاعدين ام مهيمن .. هي مثل اخته ومتعلقة بي حالها حال حوري بس ام مهيمن من هذا اليوم كامت تراقب تصرفات ريم الي كانت غافلة عنها. كنت سرحانة وسمعت صوت مهيمن صاح على حوراء ريم كانت تقرة بس سمعت صوته تركت كتابها وكامت تريد تروحله ام مهيمن .. خالة كعدي وين رايحة. ابني شاب لوحده بالغرفة ما يصير كل شوية داخلة عليه هم يريد ياخذ راحته ريم ..اي بس مهيمن مو اي واحد هو خط .... ابن عمي يعني مو غريب ام مهيمن صاحت.. يالله هسة هاي شحجي وياها رجع مهيمن يصيح على حوراء وريم راحت وهي تكول .. خالة حوراء بالحمام راحت ريم ودخلت على مهيمن وانا كنت اسوي بالعشا الخطار بدوا يخفون شوية وبدة البيت يرجع لوضعه الطبيعي شوية وسمعت صوت مهيمن يصيح بأسمي درت وجهي على ام مهيمن وكلت . خالة عينج عالاكل خلي اروح اشوف مهيمن شنو يريد رحت دخلت ولكيت مهيمن كاعد على فراشه بالكاع ومتكيء على المخدة وريم كانت تباوع عليه والوجه احمر والشفايف مبرطمة مهيمن .. نور رحمة على والديج كعدي وياها وفهميها بعد مرت الثانية ما تدخل لغرفتي ارتبكت من طلبه وما كدرت اسأله عن السبب بس مهيمن مو هونفسه مهيمن الاولي اي كان متولع بشوفة ريم كان اذا مر يوم عليه ما يشوفها يظل يدور الاعذار بس بعد الي صار هواية تغير بتعامله وية ريم. صار يعاملها برسمية وما يوجهلها اي كلام ويتجنب التقرب منها وكأنما قنبلة موقوته تهدد حياته باوعت عليها نزلت دموعها وكالت .. اريد اعرف انت ليش هيج تبعدني عنك وتصدني غمضت عيوني مقهورة عليها وكلتلها .. ريم حياتي تعالي شوية خلي احجي وياج .. لا ما تحجين وياية خلي هو يجاوبني مهيمن لزم خاصرته وكال .. ريم رحمة على موتاج طلعي برة. اريد ارتاح اباوع لريم طلعت برة بسرعة مثل العاصفة سألته .. ليش هيج مهيمن تعاملها بقسوة مهيمن مسح على وجهه وكال .. ما اريدها تتعلم على قربي منها وتتأمل بوجودي لجانبها لان انا بعد الي صار ما ناوي اكمل طريقي وياها. من يوم الي صار انا عرفت ان ريم مستحيل تتغير لان حياتها ما تتوالم وية حياتنا. حاولت اكثر من مرة انصحها وانتي وحدة من الناس هم كمتي تعلميها لكن هي ما جاي ترضخ.للامر الواقع وحقها ما الومها لان كضت عمرها كله. عايشة بعالم غير عالمي وشوفت عينج اني شخص بسيط وهذولي ناسي وهاي حياتي ما اكدر اغيرهم وصعبة اطلب منها تتغير علمودي بليلة ويوم ولا راح اترجى منها بعد تتغير طلبت منها مرة وحاولت.وهي ما سمعتني بعد حلم ارجع اطلب مرة ثانية هي جبيرة. مو صغيرة لذلك انا نويت ابتعد عنها وما اخليها تعلق املها بية .. بس مهيمن انت تحبها واعرف طبعك انت مو بسهولة تحب شلون ترضاها .. الي يشوف الموت يرضى بالصخونة. وانا تعرضت للموت وعشيرتي دخلت بمشكله طويلة عريضة بسبب قلة فهمها لحياتنا. ما مستعد اعيد الي صار بهفوة ثانية من هفواتها خليني فقط ولي امرها. منا لحد ما الله يسهلها صافنة بكلام مهيمن وقراره دورت على ريم ما لكيتها ونوب هاي وين راحت ريم طلعت من غرفته مقهورة. منه ومن تصرفه وياية حوراء شافتني واجتي يمي بالغرفة .. شنو شبيج ريم .. اخوج. قهرني. من يوم الي صار وهو ما يقبل يحجي وياية حوراء.. لا تضوجين هو كل مرة هيج يزعل عليج وبعدين من وحده يجي يراضيج. لان ما يكدر زعلج التفتت عليها بأمل .. يعني انتي تشوفين هيج .. اي والله شبيج. هسة تشوفين. شلون هو من وحده يكعد يسأل عنج ويدور عليج بس هسة لازم تعذريه لان ما صارله هواي من متصوب وكاعد بالبيت وهو ما متعلم على كعدة البيت فتشوفين بسرعة. يتعصب من ابسط الاشياء هم صحيح كلامج تركتها وصعدت فوك ادور على جلال حتى يدرسني كيميا لكيته بالسطح كاعد يدخن ويحجي بالنقال وية بيت خاله شافني واشرلي هسة اخلص المكالمة اسمع خاله يكله بعتب . . جلال مرة الثانية من يصير هيج شي وياكم انطينا خبر حتى ما يظل بالنا عليك .. خال لا يظل بالك بس هي هيج صارت على غفلة وهجموا علينا وما صار عندي وقت اتصل عليكم كان يحجي واني فرشت الحصيرة وبسطت بكتبي وملزمتي كدامه حتى يدرسني جلال.. خال مو تنسى تطمني على الاوضاع الي يمكم وان شاء الله ماكو شي عليكم هاي كلها مخربين ما راح يسون شي يالله اخذ راحتك وسلمنا على الاهل وبوسلي رنين ورند انهى الاتصال وباوع علية وكال .. هاي شنو باربي بعدج عايشة. لحد الان برطمت شفايفي وكلت .. عفية جلال اسكت ما ناقصتك هسة اتعاركنا اني ومهيمن وواصلة حدي بس تسويلي بز ابجي نزلت دموعي بقلة حيلة .. جلال والله تعبت اريد اعرف اني شنو سويت حتى مهيمن هيج يصدني وبيعدني عنه جلال .. منعوج عن صبا اخت زمن وانتي ما امتنعتي. وبقيتي ترافقيها ولج انا الزلمة شكدني وشكبرني ومن مهيمن منعني عن بيت زمن اخذت بكلامه وابتعدت عنها وانتي ام راس اليابس عرب وعجم تصيح وتكلج يابة ابتعدي عن هاي العلة ماكو انتي مستقلة بتفكيرج وشحصلتي بعدين من مشيتي وياها غير بس الطلابة وكعدة عشاير. ومهيمن تهدد من وراج. واتصوب وزين ما. مات. كل هذا صار وانتي تكولين اني شنو سويت. ولج باربي انتي مال خنك. .. على فكرة هم كبروا الموضوع وسوها كعدت عشاير يعني مالها داعي كل هاي الهوسة جلال.. ما ينلام بيج مهيمن من يكول الكلام وياج ضايع ولج غضب بس افهمي شلون مالها داعي كعدة العشاير ليش مو اربع شباب اتهجموا عليج ونزعوج حجابج بالشارع كدام الناس وفوك هذا هددوج. واي واحد عنده غيرة على عرضه ما راح يسكت ويسوي مثل ما سوى مهيمن لان العرض عظيم وما يستهان بي. جلال يحجي واني تسود الدنيا بوجهي فوك ما هي سودة .. عفية جلال لا تخليني اتندم صعدت لك فوك حتى تدرسني اشو گلبت علية الموازين سحب الكتاب مني وكعد يگلب بي وكال .. وحوراء ما تجي تدرس وياج فد مرة ادرسكم اثنينكم رفعت حاجبي وكلتله.. استاذ جلال درسني بس اني حوراء ما محتاجة خدماتك هي اصلاً شاطرة بالكيميا جلال.. شنو سالفتج باربي كطعتي علينا الهوى والماي سديتها خلي نقريج وحدج امرنا لله جلال بالمعمل ومهيمن اتصل علية طبعاً مهيمن صارله يومين من رجع على الشغل والحمدلله. شغلة الجماعة انحلت. الشباب اربعتهم. موجودين بالسجن. وية جماعة ابو سيف وابو حيدر انتقل ملف قضيتهم. لبغداد وراح ينحكمون. بسبب التعدي على ريم ومحاولة قتل مهيمن. الجماعة كالوا.. راح يخيسون كم سنة بالسجن طبعاً اهالي الشباب حاولوا بكل طريقة اقناع مهيمن حتى يتنازل بس هو رفض كنت كاعد بالمعمل وكان يدخل عناد ووجهه مدخن ما يتفسر ما حجيت وياه ولا هو اقترب مني بعدنا محد يحجي وية الثاني كعد على المكتب وفتح الحاسبة وهو ينافخ كل شوية دقايق واتصل علية مهيمن وسألني وهو معصب .. اكول هذا الحقير عناد يمك رفعت حاجبي وباوعت عليه .. اي يمي مهيمن بغضب .. هسة اريدك تجيبه سحل لمحل ابوه عندي حجي وياه .. ليش شنو مسوي .. انت جيبه لهناك وبعدين تعرف انهيت الاتصال باوعت لعناد بالله هذا الطنطل شلون راح اسحله مو عبالك مهيمن شوية حمة. من كال سحله وجيبه لمحل نهضت من مكاني وجليت صوتي .. اكول ابو الشباب مطلوب منك الحضور هسة لمحل ابوك سألني مستغرب .. شكو وليش انت تكول .. تعالي وياية وانت تعرف ليش سحب نقاله واتصل على ابوه وشكله حتى ابوه عنده علم بطلب مهيمن كام وياية واخذ نقاله صعد بسيارته وشافني اتوجهت للدراجة وكال .. مالها داعي تركب الدراجة انا وياك اثنينا رايحين بنفس المكان رفعت حاجبي وما جاوبته بعدني زعلان عليه .. ما يحتاج دراجتي موجودة ركبتها وحركتها وانطلقت كدامه وهو شغل سيارته واتحرك وراية وصلنا لمحلات ابوه لكينا مهيمن وحيدر وكرار. موجودين بالمحل ابوه بس شافه كال .. يالله مهيمن كول الي عندك هذا هو عناد وصل شكو شصاير مهيمن كام ووكف گدام عناد وكال ..شوف عناد هاي كدام ابوك واخوانك. اذا مرة الثانية سمعت بيك. حاجي بالسوك وكايل انا خاطب اخت مهيمن ما تلوم الا نفسك هاي المرة راح اعديها لخاطر الحاج واخوانك مرة الثانية بالقران ادفنك اذا جبت سيرة اختي على لسانك ابو حيدر كام من مكانه مستنكر .. مهيمن فهمنا شنو الموضوع شبي عناد وشبيها اختك مهيمن التفتت على ابو حيدر وكال .. قبل كم يوم اجاني ابو صادق يريد يطلب ايد اختي ابو حيدر .. اي .. واليوم رجعلي ابو صادق زعلان يكلي ليش ما كلتلي اختك مخطوبة. لعناد. اشو احنا اخر من يعلم وانا سألته منو كلك هذا الشي كال عناد ابن الحجي هو بنفسه اجانا للمحل وكال انا خاطب اخته وهي الي.وما يصير تحجون بيها وتجيبون سيرتها وكعد يهدد شوف عمي ابو حيدر والله خاطرك وكف بعيني والا جان عناد هسة ممدد يم رجليك مكسر بالكاع جلال كنت واكف وراه وقريب عليه .. كلب ما تصيرلك جارة ولا حل عناد.. اي صدك انا خطبتها قبلهم. وهم ارجع اخطبها مرة الثانية وثالثة ورابعة. منا لحد ما تملون وتزوجوني اختكم بيدكم كان مهيمن بعده واكف كدامه لزمه من ياخته وضربه كلة براسه ووكعه بالكاع مهيمن .. هاي حتى مرت الثانية ما تجيب سيرة اختي على لسانك. ودار على ابو حيدر .. حجي لزمه وفهمه مو كل شي يريده يحصله طلع مهيمن وطلعت وياه وكال .. والله هذا عناد تاليته مكتول على ايدي جاوبته.. ما عليك منه هذا دواه يمي انا اعرف شلون اعلمه نور رجعوا مهيمن وجلال للبيت وحجوا وية خالتي وكان صوتهم عالي واني كنت اريد اروح يمهم انتبهت على كلامهم وسمعت اسم عناد بالقصة ثبتت رجلية بمكانها وتلقائياً صرت استمع لكلامهم وتفاجئت بالسمعته ام مهيمن .. يايمة والله مسكين هذا عناد شكله ماعنده حظ وياكم خطية مبين عليه هذا الشاب الحيد وكع ومحد سمة عليه مهيمن .. ادفنه بأرضه والله اذا يتجرأ ويفكر يهوى اختي ام مهيمن .. يايمة ليش هو الحب بيده حتى يكدر يمنعه مهيمن.. يمة سدي الموضوع ما اريد احجي بي كافي علية اليوم شطت للزركة.احتركت اعصابي بسبب عملته السودة هم كانوا يحجون واني كنت بعدني واكفة اسمعهم وكلبي وية كل كلمة يحجوها يخفق. ما اعرف شبي حسيت على لكزة بخاصرتي وانتفضت من مكاني وباوعت بخوف .. عابتلج ريم. خوفتيني شبيج ريم غمزتلي وكالت بصوت. ناصي .. هاي شنو استاذ عناد كلش مستقتل ومسوي ثورة بس تدرين حبيت كلامه من يكول اخطبها منكم (مرة ثانية وثالثة ورابعة. لحد ما تملون وتزوجوني اختكم ). اوووووف يوم للي ببالي يسحل روحه علمودي اوووف بس شكلي ما راح انطي مجال يسحل روحه. اني راسا انطيه الموافقة. بدون ما ينتظر سحبتها من ذراعها ودخلتها للغرفة .. لج اشششش انفضحنا والله ريم.. ليش عيني اني ما حجيت شي بس تدرين كسر خاطري هذا عناد يحب وحدة مو بحاله وما تفكر بي راح اندعيله ربي يخلي ينسى حبج ويعوضه بحب وحدة ثانية تكون تحبه وتموت عليه ما اعرف شصار بية من سمعت دعاء ريم المستفز .. ريم انتي صايرة كلش مكروهة. بالله شو وخري عني. تركيني بحالي ضوجتيني بدعائج هذا طلعت من الغرفة واسمعها ضحكت من وراي وكالت .. اكص ايدي اذا ما طلعتي تحبينه وما تدرين بروحج وعلى كلامها ارتعد گلبي يثبت كلامها مر اسبوع والبنات استلموا النتائج. وريم داخلة بكلوريا بس واكعة بثلاثة وكانت طايرة من الفرح اباوع لفرحتها واتذكر كلام مهيمن وقراره وانقهرت عليها ريم .. وين مهيمن اريد ابشره اني دخلت بكلوريا وان شاء الله ادرس وانجح لزمتها وكعدتها يمي وحجيت وياها ما اريدها تنجح وتدرس لاجل شخص مقرر يتركها .. ريم حبيبتي ما اريدج تبنين حياتج وحول مهيمن وتنجحين علموده هالشي غلط اني اريدج تهتمين بدروسج ومستقبلج وتكون حياتج كلها تدور حول شهادتج ومستقبلج اما الحب والزواج خليه عامل مكمل لاتخليه شي اساسي بحياتج .. لا نور انتي غلطانة هو اصلا ما عندي حياة ومن شفت مهيمن بدت حياتي وادركت هو كل عالمي. وهالشي ما تحسين بي الا من تكونين وحيدة كنت احاول اغير تفكير ريم واهيأها حتى ما تنصدم بقرار مهميمن اريدها تستقل بحياتها بس شكلي جاية متأخرة صعبة تقنع شخص عماه الحب تركتها فرحانة بنتيجتها وتنتظر مهيمن يجي صار الليل وكان ينزل جلال من السطح بسرعة ووجهه مخطوف سألني .. نور وين مهيمن اشرت على الغرفة تركني وراح يركض فتح باب الغرفة وكال. .. مهيمن. واحد من ولد الحاج ابو حيدر مات وما يعرفون منو. بيهم الميت اني سمعت هشكل وگلبي انخمط شهكت بصوت مخنوك ...... في البارت القادم ريم جمدت بمكاني ما مصدكة الي كاعد اسمعه من كلام ام مهيمن وية اختها هزيت راسي معترضة ورحت عليها .. عمة لحظة انتي شنو جاي تحجين ترة اني ومهيمن متفقين عالزواج يتبع .. | ||||
|
| |
|
08-09-19, 09:36 PM
| #29 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #بارت سبعة وعشرين #الكاتبة_نهى_الحسون #قضية_لم_الشمل السلام عليكم ورحمة الله وبركاته اسعد الله مساءكم يا احبتي المتابعين ❤️🌹 احبتي ماانطاني گلبي اعوفكم للسبت بدون ما انزللكم بارت تصبيرة نور ركضة جلال وفزعة مهيمن ودعاء ام مهيمن ورعدة گلبي بوسط صدري كلها صارت بلحظة سماع الخبر اباوع على مهيمن طلع يركض ورة جلال ويدكم بقميصه ويكول بصوت خايف .. ولك جلال منين سمعت الخبر جلال ركض بسرعة قبله للشارع واني وراهم اريد بس اعرف منو الي مات. وحاطة ايدي على كلبي جلال جاوبه .. ولك مهيمن الامة كلها مگلوبة. يم بيت ابو حيدر وصديقنا محمد اتصل علية وبلغني الخبر ام مهيمن لبست عبايتها واجتي تمشي بسرعة وراهم .. ولكم يمة اخذوني وياكم صعدوا بالسيارة واختفت اصواتهم ومهيمن شغل السيارة وحركها بسرعة ريم وحوراء اجوي على الصوت يسألوني .. شكو ريم شنو صار التفتت عليهم ودموعي نزلت معقولة ربي زرعت حبه بكلبي حتى يحترك على فقده كانوا البنات يباوعون علية. وما جاوبتهم رحت دخلت جوة للبيت واريد نقالي دورت بالارقام وطلعت رقمه الي حضرته بأخر مرة فتحت الحضر واتصلت لكن مع الاسف يطلع لي الجهاز مغلق رجفت رجلية وكعدت بالكاع ريم .. نور عفية كولي منو الي مات سمعت جلال يصح مات رفعت راسي جاوبتها بصوت مبهوت .. ما اعرف منو الي مات بس الي اعرفه واحد من اولاد الحاج ابو حيدر حوراء.. يا خطية واني كاعدة بمكاني ماعندي وسيلة اعرف بيها الخبر اليقين .. شلون ياربي منو الي يطمني عليه جلال وصلنا لبيتهم. ولكينا الناس ملتمه وصريخ النسوان المفجوعة واصل للشارع. والرجال المتجمهرين بباب البيت الي يصيح .. انا لله وانا اليه راجعون والي كاعد على الرصيف ينحب مفجوع بالصار وهذا الي حاضن صاحبه ويبجي. وكل واحد يصيح يااااااااااخوية نزلت بسرعة من السيارة هايم على وجهي وادور بالوجوه. على ظلعي والزلم تدك وتبجي مفجوعين ربي دخيلك مو صاحبي والله اموت صرت امشي واسأل وانا خايف من السؤال لزمت واحد من الموجودين وسألته .. منو المات كال.. عناد وكرار اثنينهم راحوا بالحادث ومطلعين واحد منهم والحجي والزلم راحوا كلهم للمستشفى اجاني مهيمن يركض وكال .. امشي خلي نروحلهم هناك للمستشفى رحنا وكان نشوف حيدر كاعد بالكاع يبجي يجيب تراب ويحط على راسه كابتله وكعدت بالكاع وسألته .. ولك حيدر. منو بيهم المات كلي صاااح بصوت مكسور .. ولك جلال كررررار. مات ولكم اخوتي اتفرهدت وصاحبك بالعناية المركزة. وضعه يم الله مهيمن حضنه وصار يواسيه كعدت بالكاع وانا ارجع بدماغي كل مواقفي وية عناد ضحكتنا سالفتنا اكلنا وشربنا كله سوية وبأخر ايام شلون صرت اجرحه الكلام. وهو ينقهر ويتوسل حتى نرجع نتصالح واني اريد اعاقبه والله اذا صار عليه شي ما اسامح تفسي الناس مخبوصة يردون يطلعون كرار الله يرحمه من المستشفى يريدون يستعجلون اجراءات الدفن والمشكلة كلها مخبوصة وناسين عناد الي هم حالته خطرة بين الحياة والموت كمت من مكاني وصرت اتنقل من واحد لواحد. حتى يدليني على مكان عناد وصلت وكان اشوف صاحبي بحالة يرثى لها وضعه ما يسر لاعدو. ولا حبيب بقايا عناد الدماية مغطية كل معالم وجهه. و الدكاترة والممرضين كلهم يدخلون وويطلعون وانا بس اباوع بعيوني كانوا بس اثنين من اولاد عمه والبقية من جماعة عناد واكفين بالباب يبجون رحت اقتربت على سريره الي كان كله اجهزة وحجيت بصوت ناصي مستفز ..ها ولك عناد. لاتسويها وتصير جبان وتنهزم. مني. ارجع. بعدها ما خلصت عركاتنا وفرت دمعة من طرف عيني ولحكتها خواتها دخل الدكتور وشافنا وظل يحجي .. هاي شنو ما يصير هيج ترة هاي مو حالة هاي عناية مركزة صاح .. وين المسؤول عن الردهة. اجة ممرض وكال.. نعم دكتور .. ماتكلي هذولي شنو يسون فوك راس المريض .. دكتور شسويلهم ما ياخذون كلام الي يحجي وياهم يتعاركون وياه. محروكة گلوبهم على صديقهم باوع علينا الدكتور وطلعنا كلنا وبقيت انتظر رحمة الله الواسعة. ترحم بحال صاحبي بيومها بتت بالمستشفى واتبادل الاتصال وية مهيمن واتصلت علية نور تريد تتطمن وانا حجيتلها على الوضع وطلبت منها تندعي لصديقي عناد. وهي جاوبتني بصوت يبجي .. ان شاء الله. راح اصلي وادعيله بقينا كلنا ننتظر اي خبر من الدكتور يطمنا على عناد طلع الدكتور وكال عناد عنده عدد من الكسور بأجزاء متفرقة بجسمه وحالياً دخل غيبوبة وهسة ننتظر يصحى من الغيبوبة .. دكتور طمني صاحبي بعد بي روح و يعيش .. والله ما اعرف شنو اكول بس كله بيد الله ننتظر ونشوف نور مرت ايام العزاء ومهيمن وجلال وام مهيمن كل يوم يرحون من الصبح ما يرجعون الا بالليل ومرات جلال يبات برة. بالمستشفى يم عناد واني طلبت من خالة ام مهيمن ناخذني وياها ورحت هناك وياريتني ما رحت شفت رغد وخواتها وامها كلش فاقدات. حقهم ابنهم موشوية عزيتهم وكعدت اواسيهم. وبالي وعقلي كله يم عناد اتمنى اسألهم واستحي والمشكلة الكل مشغولين بالفاتحة ونسوه وجماعته وجلال صاروا يتناوبون على الاهتمام بي. جلال يكول وضعه بدة شوية يتحسن ويستجاب وية العلاج المؤشرات الحيوية بدت تاخذ وضعها الطبيعي منتظرينه يصحى من الغيبوبة واني ما اكدر الح بالسؤال وية جلال خاف ياخذ عني فكرة ويفهمني غلط رغد تبجي منهارة واني حاضنتها وطبطب عليها .. لج نور عناد اذا عرف بأخوي كرار اتوفى. يتخبل والله .. اسم الله عليه ليش تفاولين عليه هذا قضاء الله وقدره .. انا اعرف اخوي. راح يكعد ياكل بروحه من القهر جلال ثاني يوم الفاتحة وعناد صحى من الغيبوبة بس كانوا يضربوا ابر لتهدئة الاوجاع كلما يصحى يضربوا ابرة وبعد يومين صار وضعه شوية احسن طبعا لحد الان ما عنده علم بوفاة اخوه واول شي سأل عنه بعد ما كدر يتكلم اخويىة كرار شلونه. بس اهله فضلوا ما يكولوله وهو بهاي الحالة حتى ما تنتكس صحته. ومر اسبوع من وفاة اخوه وبعدها الحاج ابو حيدر سأل الدكتور عن صحة عناد اذا تسمح بسماع الخبر ابوه يريد يكله قبل لا يعرف بالصدفة من يفتح النقال لان جماعتهم بالفيس كلهم حاطين صورة حداد واخوه كرار والدكتور طمنهم على صحة عناد وكال اليوم تكدرون تفاتحونه بخبر وفاة اخوه وانا شايل هم شلون بعناد اذا عرف بأخوه مات كرار اخوه الاكبر منه وقريب عليه علاقته كلش قوية بي والي افتهمته من الجماعة ان الحادث صار على الطريق السريع كانوا راجعين من بغداد وعناد الي كان يسوق وانقلبت بيهم السيارة وصار الحادث وهو ما حاط حزام الامان والكيس الهوائي انفتح بوجهه بقوة وصار عنده ارتجاج بالمخ وكسور ورضوض وهسة انا واكف بغرفة عناد بالمستشفى لان الحجي طلب مني اكون متواجد يم عناد من يسمع الخبر حتى اهون عليه المصيبة واواسيه اباوع عليه كاعد يباوع علينا بنظرات ضايعة ومصدوم بعده ما مستوعب موضوع الحادث كان السرير مرفوع بوضعية الجلوس وصدره وخاصرته كلها. مضمدة. بلفاف الشاش الابيض ووجهه كله كدمات و مناطق زركة بسبب ارتطامه بالكيس الهوائي بس رغم هذا كان حماية ما يتعرض للجروح قهرني شكله وما اعرف ياترى عناد راح يتقبل الخبر لو ينهار ياربي هاي صدك محنة ابو حيدر كاعد على الكرسي القريب من سرير اكتافه محنية والشيب مالي لحيته وفاة ابنه نكبة بالنسبة له هدت حيله لكن مبين عليه هو رجل مؤمن ويؤمن بقضاء الله وقدره لان كنت دائماً اسمعه يردد هاي الكلمات (قدر الله وماشاء فعل ) انا لله وانا اليه راجعون ربي اسألك الصبر عناد كان يباوع علينا مستغرب لمتنا كلنا فوك راسه ووجوهنا مبين عليها عندنا شي نريد نحجي وياه ابوه جله صوته وبدة يحجي .. بوية عناد شنو الي تعرفه عن الامانة عناد سأله بتعب ومستغرب .. شنو تقصد ما افتهمت يا امانة .. انا اكلك. اذا انا في يوم انطيتك امانة. شلون راح يكون تصرفك بيها جاوبه وهو ما يعرف ابوه شيريد بهذا سؤاله .. بوية اكيد اصون الامانة. واحطها ببطن عيوني شنو الي صاير تشكك بامانتي .. لا بوية حاشاك بس حبيت اسألك زين واذا اجيتك انا بيوم وطلبت الامانة .. اكيد بوية بعد انت كلت امانة يعني ملكك وانت حر بي وشوكت ما يعجبك تجي تاخذه مني. بس ما افتهمت القصد من ورة. سؤالك اباوع عليه كان يجاوب ابوه ويضغط على كتفه متألم ابو حيدر دنك راسه وكال.. بوية عناد الله سبحانه وتعالى بيوم الحادث اخذ امانته. عناد بشك.. شلون يعني ما افتهمت ابوه جاوبه ودموعه نزلت وكال .. بوية عناد عظم الله اجرك بوفاة اخوك كرار ريم مرت ثلاث اسابيع واني ماشايفة مهيمن يطلع من الصبح يرجع بالليل وراسا ينام كان طول هاي الفترة الفاتت يتنقل مابين المعمل وية جلال والمحل وشوية يمر على بيت ابو حيدر وهاي الايام جاي الاحظ حركة غريبة بالبيت خالات مهيمن وجياتهم المستمرة. كدرت اعرف من خلال الحديث الي يتردد لسمعي مبين عندهم عن قريب عرس احد لان اغلب سوالفهم عن الذهب وموديلات بدلات وتحضيرات لخطوبة غير معلنة لحد الان بس اني هذا كله مو يمي اني عقلي وفكري كله عند مهيمن طول المدة الي فاتت اني ما نمت ليلي مفتقده حنانه ونظرة الشوك الي بعيونه مشتاقة لكلمة (بعد عمج) شكد احبها منه سؤاله عني ولهفته علية هاي كلها اختفت مهيمن ما وعدني بشي بس احساسي يكول ان مهيمن يحبني مثلما اني احبه. صرت اعرفه يرفض يتجاوز حدوده وياية حرصاً علية. عكسي تماماً اني الي بگلبي يبين بنظرات عيوني وبتصرفاتي دخلت حوراء وشافتني كاعدة لازمة الكتاب وصافنة بغير مكان .. ها شنو القصة رجعنا صفنّنا ترة ما يصفن بس الغبي .. والله ماكو غبية بس انتي كالت حوراء بأعتراض .. لا والله خاف ما ترضين لا تكعدين تشمرين بلاج علية انا من يوم يومي ذكية .. اي مبين ذكية. وين كلامج ذاك اليوم عن مهيمن منو الي كلتلي اتحملي وصبري وشوفي هو راح يجي من وحده يدور عليج وينة لحد هسة وهو لا اجة. ولا بين مو كلتلج مهيمن جاي يتهرب مني ويصدني عنه ياذكية .. انتي صدك تحجين والله بطرانة هسة احنا بدت عطلة قبل اخر السنه حتى نحضر نفسنا للامتحانات وانتي محتارتلي بمهيمن. .. حقج تحجين هيج لان النار موجودة تسعر بكلبي مو بگلبج .. يابة درسي وعوفي عنج هاي السوالف شهادتج اهم عود بعدين مهيمن ما طاير تلحكين عليه خلصي امتحانات والله كريم خلي اروح اجيبلنا كل وحدة كلاص جاي حتى نكعد نمخمخ بالدارسة طلعت وتركتني حقها حور تحجي هيج ما تعرف انا هسة گلبي شلون متلهف عليه هسة اني مطالبة منه شي على الاقل يجي يتطمن علية دخلت حوراء وبيدها اكواب الجاي كعدت ورجعت كالت .. بالله شو كومي طلعينا من هاي الحلويات الي مجمعتهم بكنتورج حلليهم حرامات تشترين وتضمين وانا اباوع واتحسر واكول هسة هي تحن وتحس على دمها وتعزمني على كم نستلة على جبساية كاكواية. جكليتاية عقدت حواجبي وكلتلها .. لج ثولة هو اني شوكت طالعة حتى اروح اشتريلي ليش هي هاي الحلويات مو الج انتي حوراء.. وشبية اشتري حلويات واضمهن بكنتورج شبية انضربت بعقلي. حبيبتي لا تستحين كولي غلست عليج وانا حرجتج بطلبي عقدت حواجبي .. لا والله اني احجي الصدك يعني اذا مو انتي ولا اني لعد. منو. معقولة نور .. اكلج ترة نور مثل حلاتنا لعد منو الي يجيب ويحط بكنتوري اتذكرت شغلة ولكزت حور .. اكول حور صدك اتذكرت شي شنو نغم بنت خالج راح تنخطب حوراء عقدت حواجبها وكالت .. لا ماكو هيج شي ليش تسألين .. ما اعرف بس على كم مرة اسمع ام مهيمن تذكرها بشغلة زواج حتى هاي الايام جاي الاحظ كثرت طلعات ام مهيمن لبيت اهل نغم اتوقع بنت خالج راح تنخطب وانتي اخر من يعلم كنت احجي وحوراء ارتبكت من كلامي وانخبصت .. انتي متأكدة من كلامج معقولة. امي ما تكلي عن نغم لا مستحيل كامت من مكانها اباوع لحوراء نهضت من مكانها رفعت راسي .. ها على وين كمتي حوراء.. هسة اكلج بس خلي بالاول اتأكد من الشغلة الي ببالي راحت وتركتني .. هاي يمكن راحت تسأل امها اهوو اتذكرت خلي الحك عليها واكوللها لاتكول ريم كالتلي كمت رحت وراها كانت نور واكفة بالمطبخ تخفق بمواد الكيكة وام مهيمن جاي تحجي وية اختها بالنقال لكيت حوراء واكفة فوك راسها منتظرتها تخلص مكالمتها لفت انتباهي كلام ام مهيمن وية اختها .. هو انا اجلت كل شي انتي تعرفين بسبب. وفاة صاحبهم كرار الله يرحمه. ومهيمن من سألته هاي المرة سكت ومثل ما يكولون السكوت علامة الرضى لذلك انا قررت بنهاية هذا الشهر نسوي خطوبة مهيمن ونغم قبل لا تبدي الامتحانات جمدت بمكاني ما مصدكة الي كاعد اسمعه من كلام ام مهيمن وية اختها هزيت راسي معترضة ورحت عليها .. عمة لحظة انتي شنو جاي تحجين اني ومهيمن متفقين على الزواج احس گلبي وگع بين رجلية انخبصت عبالك روحي انسلبت مني لحظة شنو كاعد يصير ام مهيمن فتحت حلكها مصدومة وهدلت ايدها ووكع النقال من ايدها نور اجتي ركضت علية وكالت .. شنو ريم شبيج لزمتني من زندي واخذتني تريد تطلعني برة المطبخ حجت من بين اسنانها .. لج ريم شبيج اتخبلتي وصلنا للباب وام مهيمن استوقفتنا وكالت .. اوكفي وين ماخذتها التفتنا اني ونور عليها كانت تباوع علينا بشك نور غمضت عيونها بقلة حيلة .. نور فهميني شنو تقصد بنت عمج بعذا كلامها كانت تحجي بهدوء بس بنفس الوقت واضح عليها التوتر جاوبتها .. كل شي ماكو خالة لا تهتمين لكلام ريم لزمت نور وبعدتها من كدامي ورحت يم ام مهيمن .. لا نور شلون كل شي ماكو. عمة لازم تعرف قبل لا تتصرف من يمها وتطلع خجلانه وية بيت اخوها .. احجي شنو الي لازم اعرفه. نور .. ريم انتظري مهيمن هو يجي ويكول ام مهيمن بنفاذ صبر.. اكلجن تحجن لو لا شلون تالي .. انا اكلج خالة مهيمن لازم يتزوجني الي لان هذا من ضمن الشروط الي بالوصية ام مهيمن لطمت على صدرها .. يمة سودة بوجهي على هاي الدكة انتي شكاعد تسربتين لا وانا ليش اسألج الج انطوني نقالي خلي صاحب الشأن هو الي يحجيلي انا مأمنة وطلع الماي يمشي من جواية وانا اخر من يعلم ياغافلين لكم الله لزمت نقالها واتصلت على مهيمن كانت كلش معصبة ونور راحت يمها تهدي بيها لان صارت كلها ترجف نور.. خالة على كيفج لاتعصبين ترة انتي عندج ضغط ام مهيمن.. من عساني بالموت ان شاء الله ولا هاي العملة الدونية قطعت كلامها وحجت وية مهيمن .. هلة والله ها يا ابن بطني ليش يمة. اعرف من الوادم انت خاطب بنت عمك من راي. هاي تالي رباتي بيك سكتت تستمع لمهيمن ما اعرف شنو كان يحجيلها بلعت ريكي ما اتوقعت ام مهيمن راح تكون هيج ردة فعلها على هذا الكلام ام مهيمن جاوبت بصوت عالي وكالت .. شوف ولك على هاي سوايتك وياية ما راح ابقالك بالبيت انا طالعة مولية عايفتلك البيت وطالعة. سدت النقال وباوعت لحوراء وكالت روحي جيبيلي عبايتي خلي اولي ما ابقاله بالبيت صاير يخطط وبدبر ويخطب من وراي وانا هنا كاعدة خراعة خضرة لا اهش ولا انش هيج ما حاسبني موجودة مالي دور اخذت عبايتها ونور وحوراء يهدؤون بيها ويحاولون يلزمونها. دك نقال نور وردت عليه وكان المتصل مهيمن طلب منها ان تلزم امه وما تخليها تطلع من البيت منا الى ان يجي لان هو جاي بالطريق نور.. خالة عفية كولي يالله هسة مهيمن جاي بالطريق وراح يكعد وياج ويفهمج. كلشي ام مهيمن .. بالله شو بعدن عن طريقي انتي وياها اشوف يامرة تبقى بعد بالبيت. ماكون زهرة اذا ما طلعت هي طلعت من البيت ونور التفتت علية .. لج ريم انتي شسويتي تدرين بهذا تصرفج انتي حركتي كل اوراقج وخسرتي مهيمن للابد هزيت راسي بخوف ورفض .. لالا تحجين هيج اني مستحيل اخسر مهيمن هو الي ما يصير لغيري نور.. مع الاسف مثلما كال مهيمن انتي فعلا ما تعرفين تتصرفين ولا تتحملين مسؤلية تصرفاتج هو لو يريد كان فاتح امه بموضوع الوصية بس هو لان يعرف تفكير امه ما كال حب يخليها لوقتها بس انتي شكلج استعجلتي .. شنو نور يعني ترديني اسمع امه تريد تخطبله وابقى اكعد واسكت وما اسوي شي وعلى فكرة هي اول وتالي لازم تعرف بشروط الوصية وان اني ومهيمن مصيرنا الزواج حوراء.. ريم عفية ما تسكتين انتي الظاهر ما تعرفين مهيمن لحد الان عنده الدنيا بكوم وامي بكوم لوحدها يحرك الدنيا اذا امي زعلت عليه .. ليش تكولين هيج يعني ما اتوقع زواج مهيمن مني خبر يزعلها المفروض تفرح نور .. ريم كافي الله يخليج بعدها نور وحوراء راحوا ورة ام مهيمن حتى يقتعونها ويرجعونها للبيت واني بقيت بالبيت لوحدي گلبي يفور شلون تريد تخطبله ولا والي زاد وغطى فوك هذا كله الاستاذ ساكت من تحجي وياه بموضوع خطوبته من نغم كنت اروح وارجع على طول الغرفة. بسيطة خلي يجي لازم يحط النقط على الحروف اريد اعرف اني شنو موقعي بحياته. اندك الجرس وفجاءة سمعت صوت مهيمن يدور على امه بالبيت طلعت دخل لغرفة امه واني رحت دخلت وراه وغلقت الباب وقطعت الطريق عليه شافني وعيونه نار .. ولج انتي شنو من بلوى الله بلاني بيها ولج غضب منو سمحلج تكولين لأمي عن موضوع زواجنا .. مهيمن غصب عني ما اتحملت اسمعها تكول اخطبله بنت خاله ما كدرت اسكت ورحت كلتلها كنت احجي وهو يفور هجم علية مثل الي يريد يضربني واني ارتديت متفاجئة بتصرفه. اصطدمت بالباب وراي ما حسيت الا مهيمن لكم الباب بقبضة ايده وصرخت. ورفعت راسي اباوع عليه .. مممهيمن انت مالك حق تعصب علية اذا اكو واحد غلطان بالموضوع كله فهو انت. ما كان لازم تضم عن امك هيج موضوع كان لازم تكعد وياها وتفهمها غمض عيونه وكال.. المشكلة انتي صعبة عليج تفهمين هيج امور ريم بعدي عن طريقي. خلي اطلع يوم عن يوم تثبتيلي انتي مو بكد المسؤولية .. مهيمن ما اتحرك منا الا انت تگلي اني شنو موقعي بحياتك .. ريم على سوالفج هاي اكون اكبر غبي اذا بيوم تورطت وفكرت ارتبط بيج لان هاي انتي نفسج لا راح تتغيرين ولا تتأقلمين وية حياتي وانا هسه دين ما باقي براسي انا واحد اركض على العيشة حياتي بسيطة اريد اتزوج وحدة مثلي بسيطة اريد من ارجع لبيتي الكة مرتي تتلكاني بالهلة والمرحبا صاحبة واجب وتعرف شلون تصير ام بيت وتسند ظهري من وراية ومع الاسف انتي ما تتوفر بيج هاي الصفات اتخبلت من سمعت كلامه رافضة استمع اصلاً رافضة افتهم هو شنو يريد يگولي لزمته من مقدمة قميصه .. مهيمن لاتكول هيج صحيح اني ما تتوفر بية كل هاي الصفات بس اتحداك تنكر انت تحبني مثلما ما اني احبك. غمض عيونه وكال.. الحب وحده ما يكفي ابني عليه مستقبلي ، حياتي وياج صعبة وصدگيني تالي نظل واحدنا يحطم بالثاني ونكره الساعة الي ارتبطنا بيها كان كلامه كله صد واني مثل الغركان الي كان يحاول ينقذ نفسه لأخر رمق. .. لالالا مهيمن انتي الي مستحيل تصير لغيري تعرف انت مُلكي لوحدي. ما تكدر تعيش حياتك بدوني اتحداك. وخلي ببالك انت مطالب بتنفيذ شرط الوصية. ماكو تصير نص حصتك الي يعني رضيت او ما رضيت انت ملكي اتسعت عيونه بغضب وثارت عاصفته .. ولج ريم انا مو ملك احد ولا بعمري احد يجبرني اسوي شي لزم ايدية المعلقة بمقدمة قميصه. يريد يبعدني عنه حتى يطلع نزلت دموعي بيأس وحجيت بصوت هامس اقرب للتوسل .. مهيمن متروح عفية گلي انت الي وما راح تتزوج غيري سحب نفس بصبر وكال .. ريم مسحي دموعج وسحب راسي وحطه على صدره دفنت راسي بصدره وصرت ابجي اخاف افقده ما اعرف ليش احس راح افقده كلتله بصوت مكتوم .. اني ما مستعدة اتنازل عنك واعيد تجربة الفقد مرة ثانية. عمو گال انت الي معناها راح تصير الي لا تتصور راح اكعد اباوع عليك شلون تتزوج صدكني اگلب حياتك جحيم دنك راسه وحجة من بين اسنانه بغيض بصوت هامس .. انا مو لعبة بيدج وبيد عمج فاهمة رجف جسمي من اثر كلامه وياي سمعنا صوت حوراء تصيح على مهيمن بأستعجال ابتعدت عن مهيمن وعيوني حمر وهو بسرعة فتح الباب حوراء شافته وكالت .. مهيمن الحك امي راح تروح من ايدنا ....................................... جلال ..الحك علية مهيمن سقطت الموصل بيد الدواعش يتبع | ||||
|
| |
|
08-09-19, 09:45 PM
| #30 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_الثامن_وعشرون #الكاتبة_نهى نور رحت ورة خالة ام مهيمن اني وحوراء كانت رايحة لبيت اخوها حسن يكون قريب على بيتها دخلنا للبيت وشفناها كانت كاعدة بالهول وية مرت اخوها وبناته. واولادهم بس شافونا استأذنوا وكاموا من يم عمتهم. وزوجة اخوها سلمت علينا وكامت وصاحت لبناتها وبقينا احنا وخالتي لوحدنا خالتي انتظرتهم يطلعون يالله كالت .. شوفن ما اريد احد يعرف انا طالعة زعلانة من ابني هاي المشاكل بيني وبينه. واني كلتلها لزوجة اخوي انا عجبني اجي عليكم واتغدى يمكم لاحظت عليها كانت تحجي بصعوبة وتمسد هامة راسها وتضغط عليها. سألتها بخوف .. ها خالة راسج يوجعج. دنكت راسها وحجت بصوت واهن .. اي والله يا خالة راسي راح ينفجر من الوجع احس بي وشوشة عبالك قطار يمشي جوة لراسي ورجعت رفعت راسها انتبهت خشمها كام ينزف دم حوراء بس شافت امها هيج كمزت من مكانها وكامت تبجي بخوف .. نور امي اليوم ما اخذت حباية الضغط رايحة اجيبها وراحت تركض برة البيت كمت من ومكاني كلتلها .. خالة خشمج نزف دم اكيد ضغطج ارتفع. لازم ترتاحين الله يخليج خالة بدون تعصيب اروح اجيبلج ماي تغسلين وجههج بي ما كالت شي رجعت ظهرها على الحايط وغمضت عيونها بتعب وكالت اريد دواية دقايق وكان يدخل مهيمن علينا وجهه مخطوف لونه ومبين عليه الخوف على امه راح يمها وكال .. نور تعالي عينيني خلي ناخذها للمستشفى امه كان وجهّها شاحب وكالت بتعب .. ما يحتاج مستشفى بس شوية ارتاح واخذ علاجي حوراء دخلت وبيدها كلاص الماي والحباية مهيمن كعد بالكاع يم امه وسندها وانطاها الحباية وبعدما اخذت علاجها دخل اخوها حسن سلم علينا واتفاجيء بوجودنا بالبيت وبس شاف اخته كال .. ها سلامات زهرة. زوجته جاوبته.. خطية عود اجتي يمنا على الغدا اشو ضغطها ارتفع وخشمها نزف وتعبت المسكينه كال .. امشي مهيمن ناخذها للمستشفى مهيمن.. مو اكوللها خلي اخذج ما تقبل ماتعرف زهرة من تعاند باوعتله بعتب وكالت .. ما يحتاج. اخذت علاجي وهسة ارتاح انا هم نسيته اليوم ما اخذته شوية زوجة اخوها والبنات ونغم فرشوا السفرة وصبوا الغدا اني استحيت من وضعي هنا باوعت لمهيمن وكلت .. اني لازم ارجع للبيت خطية ريم لوحدها مهيمن كان باله مشوش مثل الي مضروب على راسه باوع لامه وكال بصوت اقرب للتوسل .. يمة امشي خلينا نرجع للبيت خاله حسن جاوبه.. ماكو طلعة منا مايصير وكت غدا هذا شلون حجي ، تعالوا كلكم تتغدون يمنا واذا كان على بنت عمك هسة انا اوديلها مؤمل يروح يجيبها ويجي نغم .. والله عفية ابقوا يمنا اتغدوا انتوا والبنات مهيمن جاوب .. ما نريد نسوي عليكم زحمة الخال حسن .. يابة والله انتوا رحمة صاح لمؤمل وكال لحوراء روحي وية مؤمل قفلي باب البيت وجيبي ريم راحت حوراء وانا اباوع لمهيمن يحوم عنده كلام وية امه بس ما يكدر يحجي كدامهم شوية ودك نقال مهيمن وكان المتصل حوراء من رقم ريم سكت يستمع لكلام حوراء بعدها مهيمن جاوبها وكال .. خلاص ابقي انتي يمها وانا وامي شوية وجايين انهى الاتصال وكال لخاله .. بنت عمي تعتذر منكم ما تكدر تجي لان مريضة .. سلامتها يالله خيرها بغيرها بعدما تغدينا وخلصنا وام مهيمن ما اكلت شي بس تحرك بماعونها ومهيمن كل شوية عينه تصد عليها بعدها مهيمن كام و استأذن من خاله يريد يطلع وياخذ امه لكن ام مهيمن فاجئتنا كلنا بكلامها وية اخوها ..خوية انا راجعتلك غير وكت اطلبك بشغله بس هسه مو وكتها اريد اشوف ابن بطني بالاول جاوبها حسن باستغراب .. خيتي زهرة تامرين امر ولو مافهمت شي بس انتي تعرفيني الي تريديه يصير لو شنو ما كان بس هسه انتي ارتاحي مهيمن اخذها من ايدها وكال بسرعه مو وكتها هسه اهم شي صحتج ترتاحين والسوالف بعدين ماراح تطير باوعت عليه وهزت راسها يعني هسة صارت. صحتي تهمك يا مهيمن لا تختف ماراح اموت مهيمن .. اسم الله عليج يمة من عمري على عمرج لاتحجين هيج باوعتله مرة ثانية وهزت راسها وما جاوبته والله مهيمن كسر خاطري ما يعرف وين ينطي وجهه مثل الي حشروه بزواية وما يكدر يطلع منها منا ريم ومنا امه كان يريد يلزم العصاية من الوسط ومضبطت وياه وهسه ما يعرف شلون تنحل وصلنا للبيت وام مهيمن رجعت ويانا دخلنا وكان البيت هدوء حوراء اجتي على امها وحضنتها .. يمة وكعتي گلوبنا اني كلتلها .. يارب تنذكر ما تنعاد. خالة تعالي نامي شوية بغرفتج حتى ترتاحين هزت راسها برفض وكالت .. اني شوية ارتاحيت وما اتحرك من مكاني اذا مو مهيمن يحجيلي كل القصة ويفهمني الموضوع واريده يحجي كدام بنت عمه ويكولي شنو شغلة زواجه من ريم مهيمن.. صار راح احجيلج كلشي بس انتي بالاول شوية كعدي ارتاحي ريم دخلت علينا للهول والعيون حمر تشهد عليها انها كانت تبجي منهارة ام مهيمن.. يالله يا ابن بطني احجيلي هاي بنت عمك موجودة.اريدك تكولي كل شي بوجودها ، اريدك تكولي شنو الي صاير من وراية مهيمن.. يمة لا تعظمين الامور ترة الشغلة ما مستاهلة كل هاي الهوسة .. يعني انت تشوف الشغلة ان تتفق على الزواج من وراية موضوع ما يستاهل انقهر عليه .. لا يمة مو هذا قصدي ، بس شفتي هاي ردة فعلج وارتفاع ضغطج هي الي تخليني اضطر اضم عليج لان اعرف بيج كلش زين راح تكبرين القصة وهي ما مستاهلة ..زين شوكت جنت ناوي تكلي على الموضوع من تتزوجها تجي تعزمني وية الاغراب مهيمن.. لا من يحين وكته ويجي يومه انا كلت ابلغج ريم كانت واكفة بهدوء غريب. تستعملهم .. ام مهيمن بعد انا عرفت هسه بالقصة ، والفضل يرجع لبنت عمك. احجيلي اريد اعرف شنو سالفة الوصية وشرط الزواج مهيمن باوع لريم بلوم وكال.. الي ما تعرفينه اكو بالوصية موجود شرط اذا اريد استلم حصتي كاملة من ورث مؤيد لازم اتزوج بنت اخوه فلذلك انا مضطر اتزوج ريم لان اذا رفضت راح تصير نص حصتي بأسم ريم اني صرت اعرف مهيمن يريد يفرض تنفيذ الشرط على امه ويحطها امام الامر الواقع وبنفس الوقت يبقى محافظ على كبريائه وية ريم ام مهيمن .. يمة وانت من شوكت صارت الفلوس هي الي تحكمك وتخليك تقرر حياتك ومستقبلك من وراها ريم قاطعتهم وراحت وكفت كدام مهيمن وكالت بكل برود .. مهيمن اذا كان قرارك بالزواج مني علمود لا تخسر حصتك فأني احب اكولك عني راح اعفيك. عن هذا الشرط وراح اتصل بعمو ابو سيف ابلغه اني رافضة الموضوع مو انت وراح ابقى سنتين انتظر اخذ ورثي مو مشكله السنه الاولى ماظل منها الشي والثانية مثل مامضت الاولى راح تمضي فلذلك لا تتقيد بية وريح گلب امك وتزوج البنية الي تحب تكون زوجة ابنها وانت تتزوج الي تناسبك اكثر مني لان اني هم ما يرضيني اربط نفسي بشخص مجبور علية. بعد مستحيل ارخص من نفسي اكثر من هيج اني اسفة خالة كنت فاهمة الموضوع غلط كانت تحجي وعيونها بيهم لمحة انكسار وتصميم بنفس الوقت واحنا كلنا عيوننا عليها مستغربين هاي ريم نفسها الي نعرفها لو منو مهيمن ميعرف شلون يتخلص من الموقف الي حطته بي ريم كال بنفاذ صبر .. ريم رحمة لوالديج كافي محد طلب منج تتنازلين فلا تعقدين علية الامور بكلامج فوك ماهي متعقدة .. لا بالعكس اني جاي اسهلك الامور على شنو بعد ضايج انت محتار بين تختار زوجة تناسبك وبين شرط الوصية الظالم الي يجبرك تتزوجني واني مايهون علية هذا الشي يصير لذك اني عفيتك من الشرط راد يجاوبها وهو يمسح بوجهة بتعب وكأنما ريم خربت كل خططه بس امه سبقته وكالت.. انعم الله على البنية وبارك الله بيها ، فاهمة وثبتت بهذا كلامها ان هي بنت حلال وتخاف الله. ما وراح تظلمك وياها بعد مالك حجة وتتهرب من سالفة الزواج مهيمن.. لا تخليني هسة اسب ابو الزواج يمة انا روحي زهكت من طاري الزواج عوفي الامور تمشي مثلما هي .. لشوكت انتظرك. حتى تقرر تحن علية واشوف عرسك الي اصغر منك اتزوجوا وفتحوا بيوت وخلفوا وانت بعدك تفكر وشوكت ما اكولك على الزواج انت تكلي اجليها باوع على ريم بغضب ورجع يحجي وية امه .. يمة انا ما كلتلج بعد ما اتزوج بس مو هسة اني هسه ضروفي ماتسمحلي اتزوج بس اكون جاهز اكولج خطبيلي براحتج ماشي بس ارتاحي واهتمي بصحتج .. يمة شلون تريدني ارتاح وانا اشوفك بعيني صرت بهذا العمر وانت لابيت ولا جهال ريم قطعت المناقشه بين مهيمن وامه وكالتلهم ..اني تسمحولي بعد هذا الموضوع مايخصني ومو ضروري ابقى واسمعه وطلعت وعافتنا الكل نباوع وراها مو بس مهيمن ريم بعد دخول حوراء وخوفها على امها الي راح تروح من بين ايديهم بسبب ارتفاع ضغطها وخروج مهيمن المفزوع الي صار حتى ميعرف شلون يفتح الباب وراها بقيت وحدي كانت كلماته القاسية ترن بأذني وهسه امه هيج صارت حالتها لان عرفت بموضوعنا يعني هي هم رافضتني بشكل خلاها ماتستوعب الموقف ارتفع ضغطها ورة ساعتين تقريبا من كعدتي وية نفسي اجوي دخلنا كلنا للهول كنت متعمدة ادخل وياهم لان الموضوع يخصني مثل ما يخصهم اباوع على مهيمن الي جنت مصورته بخيالي شلون مسح هاي الصورة بلحظه من كال لامه اني مضطر لازم اتزوجها لان نص ثروتي تروح لها اذا رفضت احس كلماته صارت خنجر وانغرس بصدري وقتلني قتل بيده ريم الي حبته وكان بالنسبة لها النفس الي تتنفسه اليوم وبهاي الساعه وهاي الدقيقه ماتت ريم والي موجودة انسانه ثانية حتى اني جديدة علية اشكرك مهيمن لان جرحك خلق انسانه ثانية بداخلي قوية واثقة من نفسها تركتهم بنقاشهم العقيم عن الزواج الموضوع ماعاد يهمني اني كلت الي اريده وخلص صعدت فوك اخذت تلفوني وياية وقررت اتصل على عمتي اسيا اني ماعندي مكان اروحله غير بس يمهم .. الو هلو عمة شلونج اخبارج .. هلة شعجب تذكرتيني ومتصله علية ..اني متصلة لان انتي عمتي واني بالنهاية ماعندي غيرج اريد بس اخلص الامتحان اجي يمج اني مااكدر اعيش بالعراق مكدرت اتاقلم وية الناس ، اشوف اذا رجعت اعيش برة يمج احسن .. اي تعالي بس بشرط يجي نائل يتزوجج بالعراق وترجعين وياه .. شنو عمة شتحجين اني مااتزوج نائل ماريده وانتي تعرفين .. واني ما مستعدة استقبلج هنا يمي على يا اساس حتى فلوس ماعندج تصرفين على روحج من تجين ، ابقي يمج ومن تخلص السنتين اخذي ورثج وتعالي اكعدج يمي .. راح انتظر الى ان تخلص السنتين بس اكيد ماراح اجي وكتها يمج عشم ابليس بالجنه سديت التلفون واني احس اخر باب كان كدامي ممكن الكه بي الحل نسد بوجهي ما حسيت بالخذلان الحقيقة خذلاني بمهيمن مغطي على كل احساس ثاني ممكن احس بي نور ريم فمن يوم الي صار وياها بمعرفة ام مهيمن بسالفة الوصية ولحد اليوم صارت مثل الوردة يوم عن يوم تذبل اوراقها كانت كلش هادئة وبدت تتجنبنا كلنا فقط تكعد بالغرفة. لوحدها وتدرس واذا تحتاج مساعدة مني بالتدريس تجي تطلبها مني برسمية وكأنما اني شخص غريب عنها وهذا التصرف كان مع الكل طبعاً اني متأكدة اكو شي صاير وية ريم وخلاها هيج تتصرف اي لان هاي مو ريم الي اعرفها ولا تشبهها كنت كاعدة اني وحوراء بالهول ودخلت ريم وسألت .. نور اذا ممكن ما تعرفين جلال وين .. لا والله ما اعرف وين بس قبل شوية كال عندي شغلة بعد شوية ارجع سمعت جوابي وكالت .. شكراً وباوعت للساعة وطلعت كلش صايرة رسمية بتصرفاتها وحدية حوراء باوعت ورة ريم وبعدين التفتت علية .. تتذكرين بيوم ارتفع ضغط امي ورحت للبيت حتى اجيب دواها .. اي .. بيومها لكيت ريم ومهيمن بالغرفة لوحدهم من دخلت للبيت وسمعت صوت مهيمن كان معصب ويصيح على ريم وسمعها كلام كلش مو حلو بحقها واني من حسيت راح يدوس اكثر بالكلام دكيت عليهم الباب وسويت موضوع امي حجة حتى لا يحجي شي اكبر ويندم عليه بعدين. اخوي وانا اعرفه زين من يعصب يحرك الاخضر واليابس وما يخلي خط رجعة هذا عيبه. كان املي بريم انه هي تحبه وراح تنسى كلامه مثل كل مرة لكن هالمرة شكل كلام مهيمن كسر شي بداخل ريم لدرجة ان يخليها هيج تتغير جلال بالمعمل كاعد اگلب بدفتري مال مخطط جهازي واقدر قيمة الادوات الي احتاجهم. دخل علية مهيمن وشافني حاط كم قطعة من الي كدرت احصلهم يفيدوني بتصنيع الالية باوع علية وكال.. انت شنو قصتك يا رجال ما صرنا نشوفك. ما تكلي وين جاي تروح باوع للمواد والدفتر وشال وحدة من الادوات وكال .. و هاي شنو بعد .. هاي عدة تفيدني بالتصنيع تعرف اخوك ميكانيكي اختصاص اليات فاحب اركب هيج سوالف رجعها لمكانها وكال .. شنو شخبار عناد جاوبته .. على نفس وضعه ما اتغير كنت احجي وية مهيمن اتذكر عناد وحالته النفسية الي تحطمت بخبر وفاة اخوه وتقوقع على نفسه لا يقبل يحجي وية احد ولا يطلع من البيت كنت كلما ازوره ماكو اي كلمة على لسانه غير انا الي كتلت اخوي لحيته طالت وابوه واخوانه حاولوا يساعدونه بس هو فاصل بغير عالم مو ويانا بس رغم كل هذا ما تركته ولا يوم صار مثل الواجب كل يوم اروح ازوره واكعد اواسيه صحيح زيارتي ما جابت نتيجة وياه بس على الاقل احاول عسى ولعل اكدر اساعده مهيمن كمل كلامه .. زين وبيت خالك. كدرت تحصلهم لو بعدك .. لا والله ما حصلتهم والمشكلة مو بس همة حتى سلوان صاحبي وكل واحد اعرفه بالموصل ما جاي اكدر احصله ما اعرف شنو صار عالشبكات وهاي مواقع التواصل الاجتماعي ما تعرف صدكهم من جذبهم. وضاعت علية السالفة. منو احباره صحيحة ومنو الغلط .. ان شاء الله ما عليهم شي هسة تلكاهة شغلة عطلات بشبكات الاتصالات .. والله ياريت انا گلبي ما متطمن .. هسة كوم امي اتصلت علية وكالت جيب جلال وتعالوا تغدوا كمت من مكاني وواتبعته ورجعنا للبيت لكينا امه ونور جاي يحضرون بالغدا ربم بس شافتني اجتي سلمت علية. بهدوء وكالت .. جلال ممكن اطلب منك طلب انتبهت بطرف عيني لحركة مهيمن الي كان يباوع لريم ما سلمت عليه ولا باوعتله وهذا الشي صدق او لا تصدق كلتلها.. أمري ريم شنو تردين .. اريدك اليوم تفرغ نفسك الي من وقت حتى تدرسني كيميا. وراح تجي صديقتي بالمدرسة خطية حالتها تعبانة ماتكدر تحط مدرس خصوصي واني عرضت عليها تجي تدرس وياي اذا تكدر جلال طبعاً وعندك وقت اكيد ما راح افرض نفسي عليك رفعت حاجبي مستغرب كلام ريم شنو الي صاير هنا اني هاي الايام الاخيرة ملتهي وية عناد ومااعرف شصاير .. اكول باربي هاي من شوكت صايرة عاقلة وتحجين بأحترام مهيمن كال بتحذير .. انتبه لكلامك ريم قاطعته من دون ما تلتفت لمهيمن وجاوبتني .. جلال اني من يومي محترمة بس مرات ينفرض علينا ان نتصرف بتحفظ مع بعض الناس وما نتصرف على طبيعتنا وهذا الشي للاسف اكتشفته من جديد متأخر فعلاً الحياة تنطينا دروس اباوع عليها مستغرب وجاوبتها .. اكولج باربي شنو الي صاير شنو الي غيرج اني تركتج كم يوم والتهيت عنج بسالفة صاحبي ارجع الكاج متغيرة لوفة بالتسعين شنو مضروبة براسج بشي لو شنو الموضوع .. هسة ما جاوبتني شنو اليوم تدرسني لو مشغول .. ااااخ الله هاي يسموها لصمة يمعودة لا عادي اليوم ارجع لخاطرج من وكت وادرسج وانطي خبر لصديقتج خليها تجي. بس ها اكولج كون اذا ممكن بعد اذنج اريدها حلوة حتى يصيرلي واهس بالتدريس كنت اتبادل بالكلام وية ريم واقلد طريقتها الجديدة بالكلام ومهيمن بقى يحوم فوك راسنا اخير شي قطع كلامي الاخير بتحذير ..جلااااااااااال انتبه سويت حركة قفل السحاب على شفايفي .. خلاص سكتت كنت اريد ادخل لغرفة مهيمن وكان غزال البصرة يمر من يمي ويخزرني شكلها ما عجبها كلامي قبل شوية هذولي عائلة مخيفة تتعامل بحد السيف ما عندهم شي اسمه مزحة وضحك ريم لو على ايامي السابقة كنت ركضت على جلال وكلتله الي بخاطري ومكدرني كان شكيتله عن كسرتي كان كلتله اقوى انواع الانكسار هو انكسار القلب والادهى والامر من يكون كسّار گلبك هو نفسه الي انت تعبره سندك بالحياة الي تسميه حبيب الكلب مهيمن بكلامه وتصرفه وياي اتعاونوا على كسري وهضمي صحيت بيومها من احلى حلم واصبح بالنسبة الي كابوس يطاردني كان كلتله اني كرهت نفسي لان سمحتله ان يكسرني اتعلقت بي وحبيته وردته الي لان هو كل عالمي لكن بعد كلامه انهار كل عالمي من حولي وصفيت وحيدة. خايفة اواجه العالم بدون وجودهم يمي كرهت ضعفي لان كنت بأمس الحاجة لأحد يبقى يمي ويحميني ويحسسني بالامان صار لازم اصحى واعتمد على نفسي والما يردني اني هم ما اريده ولا راح اعبره او انطيه فرصة يحطمني صحيح. اني لازلت احبه لكن مثل ما هو يكول الحب وحده ميكفي انتبهت من صفنتي على صوت نقالي باوعت وكان المتصل عمة اسيا انطيتها رفض نور باوعت علية ورفعت حاجبها مستغربة تصرفي ما يوم سويتها وية احد طبعاً نور الوحيدة الي كانت مستمرة. تحوم وراي تريد تعرف شنو سبب تصرفاتي لكن اني اخذت عهد على نفسي ما اخلي اي واحد. يستهان بية او اخلي يوصل لگلب ريم الجديدة نور .. ريم شعجب انطيتي رفض لعمتج .. هي الثانية خذلتني واني الي منا ورايح الي يخذلني اطلعه من حياتي بدون ما يرفلي جفن خلاص انا اكتفيت من كل الي صار والحياة علمتني شغلة ان محد دايم لأحد. وكل واحد بينا يصيح ياروحي نور.. ريم عفية لاتحجين هيج من يوم الي صار وانتي على هذا الوضع والله حتى ما جاي اعرف شلون اتعامل وياج صرت حذرة بتعاملي اخاف اجرحج بدون ما انتبه عفية رجعي لشخصيتج مثل قبل لا تتغيرين محد يستحق تغيرين حالج علموده .. اني نفسي بقيت ما اتغيرت بس فظلت اكون حذرة بتعاملي وية اي شخص رجع نقالي يدك وهالمرة انطيت لعمتي رفض وحضر نور .. زين على الاقل كولي عمتج شنو سوت حتى هيج انتي ضايجة منها جاوبتها.. بصراحة عمتي حالها حال البقية ما تهمها ريم ويمكن هسه راجعت حساباتها وشافت نفسها غلطانه خسرت من رفضت تمدلي ايدها وتساعدني اسافر يمها نور شهكت وكالت بخوف .. شنو ريم ناوية تعوفينا وترحين لاعفية لا تكوليها ولا تفكرين مهيمن ما يخليج .. ما يمهني مهيمن اني اذا قررت ابتعد عنكم فهذا الشي راجعلي لا مهيمن ولا اي واحد له الحق يتدخل بقراري اني كبيرة وبعمر يسمحلي اتصرف بحياتي لكن مع الاسف انا ما املك احد ثاني يستقبلني غير بس اسيا واسيا من طلبت منها اروح اعيش يمها وافقت لكن بشرط .. شنو هالشرط .. تردني اول ما اوصل لهناك اتزوج نائل ابنها وهالشي مستحيل اوافق عليه لو اعرف اعيش طول عمري بدار ايتام ولا اتزوج نائل لذلك شكل الحياة ناوية علية فقررت ابقى هنا واتعلم شلون اعتمد على نفسي واصير قوية حتى من اترك هذا البيت اكون مهيئة نفسي واكدر اواجه العالم الخارجي .. ريم ما بيها شي الوحدة بينا تعتمد على نفسها وتصير قوية لكن مو من حقج تفكرين تستقلين بحياتج بعدما اتعرفنا عليج صرتي وحدة منا وبينا واتعودت عليج ما جاي اتخيل نفسي ما اشوفج واحجي وياج واهتم بيج كلام نور مثل القشة الي قسمت ظهر البعير كنت هواي محملة بهموم خانتني دموعي ونزلت بعجز في لحظة ضعف نور اخذتني لحضنها وكالت .. لج عفية لا تبجين جاوبتها .. ليش هو اني الي اكدر بدونكم انتوا صرتوا نقطة ضعفي وبنفس الوقت صرتوا سبب بكل معاناتي صار العصر ورجع جلال واجتي صديقتنا اني وحوراء حتى يدرسها وياي وكعدنا بالهول حتى يدرسنا دخلت نور وضيفت البنية جلال كان مبسط بينا وكعد يگلب بالملازم ويدون كم مسألة. باوع علية وكال .. هذا فصل الكيمياء العضوية اذا ما سويته الج مثل شربة الماي هسة تشوفين نجود بصوت ناصي .. والله ياريت هو اصعب فصل عندي هي الكيماء العضوية وكان تدخل علينا كارثة سونامي ست حوراء والعيون تتطاير منها الشرر جابت كتبها وراحت بعدت صديقتنا نجود وهي كعدت بمكانها بالجهة الثانية من جلال وحطت كتبها بتحدي بصوت يرعد مثل الي يكول انا جاي وناوي لى واريد اتعارك واريد واحد بيكم يكول كلمة جلال واني ونجود بقينا مصفصفين نباوع على حوراء مو من عوايدها تجي تدرس ويانا جلال سالها بأستفزاز.. هاي شنو حور لا تكولين تحتاجين مساعدة بشرح الكيميا حوراء جاوبته بتحدي .. شنو عندك مانع انا اكتشفت اليوم بالصدفة انا ضعيفة بالكيميا واذا ما تكدر عادي اكوم اروح لسجاد ابن خالي يشرحلي هو هم يعرف يدرس جلال جاوبها بسرعة .. لاااااااا يابة كعدي علية النعمة ما اكوم منا اذا ما اكون مفهمج المادة كلها بس لا تجيبين سيرة سرطان واحنا كاعدين كان يسمي سجاد بسرطان نجود بصوت ناعم .. يالله عفية بلش درسنا هم يالله نكمل حوراء دارت عليها بغيض .. هييي نجود خيرج علي صوتج صاير كلش ناعم ترة محد غريب انا وريم نعرف صوتج من تكعدين تجعرين مثل المولدة بالصف نجود وجهة كام ينطي الوان وجلال كاتم ضحكته وحوراء الغيرة مبينة من نظراتها واني كاعدة بنصهم اتمنى اتفاعل وياهم واندمج وية اجواءهم بس احس بنفسي مكسورة. قاطعتهم وكلت .. يالله جلال ابدي اشرح ماعدنا وقت نضيعه نور اتصلت علية خالتي سناء وكعدت تسألني عن احوالي والاوضاع يمي اسمع صابر يكللها سأليها .. اخوانها وينهم موجودين وياها بنفس البيت كوليلها اذا اسمع هي مو وية اخوانها اجي ارجعها للبيت خو ما نخليها تصيع وتسرح وتمرح بكيفها غمضت عيوني بصبر ما اريد احتك بي هذا بكل عقله يحجي عرفت صابر ورة اتصال خالتي خالتي سألتني عن مهيمن وجلال واني جاوبتها وصابر يكللها .. خليها تدزلنا كم فلس حتى نودي بنتج للطبيب كان يقصد على بنته سألتها بخوف .. خالة منو من بناتج مريضة جاوبتني وهي تبجي.. والله يا خالة الصغيرة انكلب عليها قوري الجاي واحتركت. والدكاترة حلبونا حلب بفلوس الادوية والمراجعات كعدت اطمن بيها .. خالة اني راح ارسلج مبلغ. .. شلون ترسلينه .. ما اعرف شلون بس راح اطلب من مهيمن يساعدني ويشوف بيد منو يوصلهم لكم وصارت خالتي تدعيلي وتتشكر مني وصابر القذر يحجي من يمها ويكول . عليمن تدعيلها هذا جزء بسيط من الي صرفنا عليها سلمت عليها وانهيت الاتصال كل واحد همه شكل هاي خالتي الله بلاها بواحد ما اعرف مخلوق من يا طينة. يحجي ويقرر بكيفه عبالك عايش بعالم لوحده باوعت لنقالي كان بعده بيدي ورحت مثل كل يوم ادخل للواتساب واقرة الرسالة الي كتبتها لعناد كنت كاتبة ( الحمدلله على سلامتك عناد والبقية بحياتك طمني شلون صرت ) رسلت هاي الرسالة ثالث يوم من معرفته بخبر وفاة اخوه كلام جلال عن عناد قبض گلبي وكسر خاطري عليه اتمنيت اواسيه الرسالة بيومها وصلت لكن كانت غير مقروءة وقبل اربعة ايام تمت قراءة رسالتي لكن. بدون اي جواب لحد الان ما رد علية ومن يومها اني كل يوم ادخل للوات واروح لصفحته كل شي ما اسوي بس اتأكد منه متصل لو لا ومن اشوفه متصل گلبي يكوم يدك حيل كنت اسمع عن اخباره من جلال بالصدفة بأثناء ما يحجون هو ومهيمن او من تسألهم خالة عنه جلال كاعد بالسطح احاول الاتصال على سلوان او خالي صارلي يومين اتصل على بيت خالي وماكو منهم اي خبر والزاد خوفي الاخبار الموجودة بالفيس كل واحد يجي يصرح من يمه لكن بأثناء ما كنت اكلب بالفيس. لفتني منشور اخباري موثوق يأكد على سقوط الموصل بيد داعش احس وكع گلبي بين رجلية طفرت لا ياربي دخيلك. نزلت اركض هايم على وجهي دخلت للغرفة على مهيمن اريده يكلي شسوي وشفته متمدد بفراشه التفت علية وباوع لوجهي .. شنو جلال شبيك .. مهيمن الحك علية الموصل سقطت بيد داعش وبيت خالي كلهم هناك. كلي شسوي طفر من مكانه وكال .. اوكف لحظة خلي نفتهم شنو الموضوع شنو تسقط الموصل بليلة ويوم وين كاعدين وبدة مهيمن يتصل على معارفه الي عندهم صلة بهيج امور وانا اتصل على كل واحد اعرفه اريده بس يوصلني بخيط لبيت خالي مهيمن انهى الاتصال وباوع علية بأسف .. اي جلال الموصل وكعت بيد الي مايرحم وبس الله اليستر فتحت الكنتور وصرت اطلع بملابسي مهيمن .. شنو جلال كلي شراح تسوي جلال.. ما اكعد هنا اريد اروح للموصل لبيت خالي يكلك داعش غالقة المنافذ كلها مهيمن.. ما تطلع لوحدك تاخذني وياك كنت احجي مخبوص ودك نقالي باوعت كان المتصل سلوان رديت عليه بلهفة .. ها سلوان شلونك ولك كلي صدك هاي الاخبار الي جاي نسمعها سلوان.. اي يا جلال الموصل راحت من ايدينا والعوائل كلها مخبوصة ومذعورين حجيت وياه.. كلي بيت خالي شلونهم .. لا بيت خالك حالهم حال اهلي وبقية اهل المنطقة زينين كلتله .. انتظروني انا جايكم سلوان.. ولك جلال على شنو تجي بيا زلك منو يخليك تدخل هي عبالك سهلة ولك جلال دخلت علينا شكولات غريبة تتذكر ابو بهاء وجماعته وكلامهم الفصيح .. اي اتذكره .. همة كلهم هيج شكلهم وكلامهم تصدك خلال هاي اليومين نسفوا كم منطقة من الموصل وسووها كاع احسن شي لا تجي لان احنا قررنا وبيت خالك هم قرروا ان نطلع من الموصل بالسر بدون ما يعرفون بينا مهيمن كال .. كله خلي يجيبهم ويجون للبصرة بيوتنا مفتوحة للكل كلت لسلوان.. عفية سلون طمني بس كلي ليش ما عندكم شبكة .. ماكو قطعوا علينا كل شي حتى ما نتواصل وية اي جهة من الخارج صارعلينا حصار .. هسة انت وين كلي وانا اجيك .. لا جلال دير بالك تفكر تسويها وتجي على فكرة انا تركت بيت اهلي ورحت بمكان محد يكدر يوصله سألته مستغرب .. ليش سلوان من شنو شارد .. مو جايك بالحجي الجماعة من دخلوا كرفوا كم واحد من الرجال وضموهم للتنظيم غصب عنهم والي ما يتطوع وياهم يعتبرونه خاين ويقتلوا وازيدك من الشعر بيت وصلني خبر الجماعة يسألون عني وعنك بالاسم وعن كم واحد بالموصل عندهم يمه شغ...... انقطع الاتصال وصرت احوم وگلبي منتفض من الي سمعته ما اعرف شنو اسوي ياربي دخيلك ...... في البارت القادم ام مهيمن.. لا تكول يمة لا انا امك ولا اعرفك ولا تعرفني ولا تجيني وتطلب رضاتي ولو عندي يمك خاطر من صدك تطاوعني وتخليني اروح اخطبلك بنت اخوي | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
3Likes
العرض العادي
