آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
20-12-19, 07:08 AM
| #1 | |||||||||||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  ﻗﻠﺒﺎﻥ ﻳﺠﻤﻌﻬﻤﺎ ﺍﻟﺴﺤﺮ/ للكاتبة ﻧﻮﺭ ﺍﻟﺸﻤﺮﻱ ، عراقية
التعديل الأخير تم بواسطة لامارا ; 15-01-20 الساعة 10:54 PM | |||||||||||||
|  |
|
30-11-20, 02:41 PM
| #2 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
|  ﻗﻠﺒﺎﻥ ﻳﺠﻤﻌﻬﻤﺎ ﺍﻟﺴﺤﺮ للكاتبة ﻧﻮﺭ ﺍﻟﺸﻤﺮﻱ رابط التحميل هناقصة حقيقية 100% ... باللهجة العراقية خلف نيران السحر والحقد .... وجدت ذالك الحب .... الذي قلب حياتي جذرياً ...لا اعلم اذا كان هذا الحب قلب حياتي اللاسوء ام الاجمل... لكن علمت انه جعل حياتي تبتسم وتبكي معاً ... كل ذالك كان من ذالك السحر اللعين ....الذي جعلني اميرة ذالك الفارس المسحور....... • سحراً صابني .... وجعلني اعود الى زهر شبابي ... ذالك السحر الذي جعلني اوافق ... على ان يدخل لقلبي هذا الحب ... بعد ان اقفلت جميع الطرق المؤديه الى قلبي .... جعلني افقد قلبي وعقلي معاً ...... ليفكر بتلك الفاتنه...الذي فتحت قلبي من جديد ... قصة جديده تجمع بين الدراما والكوميد والرومنسي و الاكشن معاً في # قلبان يجمعهما السحر قصة شخصين تجبرهم مرارة الايام وسحر اسود ع ان يكونو تحت سقف واحد وتحت مسمى زوجين ... القصه حقيقيه 100% بقلمي .... الكاتبة #نور الشمري (#نوشه) قلبان جمعهما السحر الكاتبه # نور الشمري ( #نوشه ) ( مــــــــشـــــــهـــــــ ـد ) - نزلت من السياره واني اباوع ع البيت شكد حلوو امي وابوي كدامي واني وراهم مشت السياره الي جابتنا من الكراج واني واكفه ع رصيف دك بابا الجرص ووكف ع صفحه وامي بصفي واني يم الباب مادري ليش احس كلبي داكاته سرعت وزادت عن دكاتها الطبيعيه واحس كلبي مقبوض انفتح الباب وطلع شخص منها جنت واكفه بصف الباب وصار ضهره عليه جسمه شويه متروس بس مو هواي وطوله زين لابس بنطرون اسود وقميص ابيض ويلك اسود بارز كل عضلات جسمه بلبسه الرسمي انتبهت عليه جان اصلع وصلعته تلمع لمع انضف والمع من حياتي حتى خرب بحظي اذا راسه المع من حياتي شكله شلون دار وجهه ع امي وسلم عليها انتبهت ع عيونه صارت عليه بطرف عيونه مجرد البؤبؤه اتحركت بتجاهي ورجع دار وجهه ع بابا واشر النا بدخول ضجت من تصرفه برغم ماعرفه ولا يعرفني وهاي اول مره نلتقي دخلت امي واني وراها وهو وبابا ورانا اسمع صوته خشن وبي بحه غريبه اكيد من الجكاير سمعت مره من بابا يحجي ويه عمار ع الجكاير بس صراحه صوته حلو ويجذب الشخص المقابل حته لبسة وكشخته مبين شخص اله سلطه وهيبةة عشتوووو هاي شبيه انتبهت ع روحي كرصت زند ايدي حيل كافي عيب ثكلي شنو ما شايفه ولد قابل اثكلي انصافووو شويه ثكلي صارت رانيا اختي كدامي ابتسمتلها وسلمت عليها وبصفها مره تطلع اكبر من امي عرفتها عمتها ام رجلها الرانيا اختي سلمت عليه وطببتنا جوه جنت امشي وراه امي مثل الطفله الخايفه اضيع وابالي الشخص الي فتحلنا الباب مايروح من بالي شكله يخوف بس يجذب كعدت بصاله ماعرف شنو بيها قنفات ورانيا كعدت يم امي صارت كبالي صورة بيها 3 شباب االبنص اعرفه رجل رانيا والي ع الجهه اليمنى ماعرفته بس الي ع الجهه اليسرى جان نفسه الي فتح الباب النا عرفته من صلعته التلمع عده لحيه خفيفه شويه وشوارب ثخان نضراته حاده كلش وحواجبه ثخان حسيت روحي شايفته بمكان هلعيون ماره عليه بس وين ماعرف واني منتبهه ع الصوره حسيت بي دخل صاااح بعلو صوته طفرت من صوته العالي واخترعت بنفس الوكت واذكرت وين شايفته .... ( مــــــــشــــــــهــــــ د 2 ) - جنت كاعده اسوي الزلاطه وعمتي كدامي اتكلب بلتمن ورانيا اتنيم ببتها حسيت ع اقدام بتجاه المطبخ رفعت راسي شفته وبمجرد ما شفت شكله حسيت بحركه باصابيعي عطت بكل علو صوتي طفرت عمتي عليه باوعت ايدي مليانه دم عرفت كصيت اصبعي بلسجينه حاده جانت هستوها عمتي اشترتها رفعت عمتي راسها عامود اجيب الكطن وسمعت صوت ضحكها رجعت باوعت عليه واكف بباب المطبخ نسيت كل الامي ووجعي ورجعت ضحكت من شفته عمتي : يااااا يمه وين رايح بهل الهدوم هاي ههههههههه شكلك جنه من هذول المطيوجيه هههههههههههه - مكدرت اسكت من سمعت كلام عمتي هيج حجت طكيتها بضحكه وبصوت عالي بس بسرعه سكتت من شفت خزرته - عممه بس المطيرجي يلزم عوده هو لازم بندقيه ههههههههه حجيتها بصوت ناصي بس نظراته الي اتحولت الي عرفته سمعني سكتت ودنكت راسي - مشكوره يمه سويتيني مطيرجي رحمه الله والديج - ههههههه لا يمه حشاك داشاقه بس وين رايح الجنطه والبندقيه والشماغ والدشداشه شنو صرت شيخ واني مادري - ههههه ثبتي لو شيخ لو مطيرجي هههههههه لاا يمه بس شغل وتدرين بشغلي بعد يطلب البس اشكال والوان ههههه يلا مع السلامه اودعناكم يممه ترا اتاخر مو تبقين كل ساعه تتصلين - الله وياك يمه محروس الكاظم يحميك يمه ويحرسك من عين الشر طلع وماباوعلي ولا عبرني عبالك ولا موجوده ضجت عفت كلشي وصعدت لغرفتي واني اذكر شصار قبل يومين ...... (مـــــــــــشــــــــهــ� �ـــــد 3 ) - صافن ع الطريق والجكاره بحلكي ويامن بصفي يسوق احس روحي ضعيت كلشي سنين ماحسيت بهذا الاحساس واليوم من شفتها وشفت ان كلشي راح وانتهى ومابقت الي وراح اصير الغير بعد كم يوم مجرد الفكره بهيج شي يخليني افور نار ذبيت الكطف مال الجكاره من الجامه وطلعت الجكاره السادسه من ركبت السياره لسه والجكاره مافارقتني اذب وحده اشيل وحده باوعت يامن شغل الراديو طلعت اغنيه اول ماشغله حسيت كلماتها مست كلبي يمكن القصه مال الاغنيه مو مثل قصتي بس حسيت ان دايعاني مثلي مثل معاناتي بلحب كلماتها مست كلبي سمعت يامن كام يردد بيها صوته كلش هادئ وحنين وكلمات الاغنيه كعدت وزن ويه صوته -شفتها ياسعود صدفه بعد ما مرت سنين!!!!!! ............ عند قسم المختبـر وسط مشفى الجامعـه جيتها ثم قلت ممكن في سؤالي تسمحيـن . .....................ناظـرت فينـي بدهشه نظره متواضعـه ماحسيت بروحي من صحت - طفيهاااااااااااااا اسكتتتتتتتت يامن : شبيكككك متكلي شبيك كبالك طفل اصيح براحتكك لك اصحححه اصحهه كم شهر مر وكم سنه صار وانت ع هلحاااله هاااي راح تخسر روحك وتخسر ابنك وحته هي راح تخسرهاااااا كافييييي انسه الماضي وعيش حياتك محد معصووم من الغلطط محددد الكل يغلط كافي انك بعدتها عن ابنهااااا وصبرتتتت كل هلمده ياما اتخليها اتعيششش يامااااا ترجعها الك فكر بكلامي زين نصر فكر زين امك ابنك انت طليقتك وحته هي كلكم ضحاياا وحده متخاف من الله ضحايا سحر جان محتلك بس لا تنسه بفضل هلسحر قلبك رجع ينبض من جديد ولا تنسهه هي من خاطرت بروحها حته اتخليك ترجع مثل قبل ماخلت امام وماخلت شيخ كافي فكر بروحك شوف شكلك هذا شكل نقيب بلاستخبارات هااا احجي هذا شكل عسكري استخباراتي شكل شخص بلستخبارات اله هيبته والكل ادكله التحيه هملت روحك عملك ابنك حياتك راح تخسر كلشي مثل ماخسرتهااا مثل ماخسرت الانسانه الضحت بكلشي علمودك راح تخسر كل شي تملكه حته عملك يا حظرت النقيب نصر الدين يعقوب ...... يتبع ... ومن هنا تبدأ حكايه وروايه لقصة حب غريبه جمعم السحر وفرقتهم الايام هل قلبان هذان العاشقان سيرتبطان الى الابد مع وجود ذالك السحر برغم من كل الصعوبات التي سيواجهانها ام ان للحياة رئي اخر قلبان ربطهم السحر... قلب انثى صدقت وسارت خلف كلام اقرب الاشخاص اليها لتكون ضحية حقد وتملك وانانية .... و قلب رجل غلق كل الطرق المؤديه الى قلبه لكن بفضل ذالك السحر الذي أصابه انفتحت كل طرق قلبه لتدخل به تلك الانثى لكن هل الذي سيصيبه من ذالك السحر سوف يكون نهاية هذا الحب والعلاقة ام سيكون بدايتها ..؟؟ قصة فتاة مراهقه ورجل ثلاثيني ليجمعهم السحر اللعين العاشق كما اطلقت عليه بطلتنا ( اللعين العاشق ) جميعنا نعرف السحر وجميعنا نعرف مئسات السحر وسلبياته وامراضه فكم من روح فارقت الحياة بسبب السحر وكم من حلم انكسر بسببه وكم من قلبان انكسرا بسببه وكم من قلب مات بسببه وكم من اخوة اصبحو اعداء بسببه لكن اليوم سيكون السحر ضيفنا لكن سيكون فاعل خير بنظري انا ... لولا السحر ما انجمع هذان القلبان بعد ارادة الله ... السحر يكون فاعل خير بجمع هذان القلبان تحت سقف واحد بكل سلبياته سيعيشان هذان الابطال كل مساوء السحر ومع كل سلبياته لكن هل سيسطيعان ان يتخطا كل المراحل التي سيمران بها وكل امتحانات الخالق سبحانه و تعالى ام ان سيكون نهايتهما في منتصف الطريق القصه اجتماعيه رومنسيه كوميديه واكشنيه ههههههههه يعني ع كم غزل ع كم بوكس ع كم موضوع صراحة كلش حلوووه واني عشت ايامها ويمكن الي دور بيها هههههههه،بس ماراح اذكر شنو دوري لان راح ينكشف المستور وتنكشف كل الشخصيات القصه هواي بيها احداااث ومواقف وهواي صارت بيها مشاكل كم مره ردت ابطل نشرها بس ارجع عليها لان احس موضوعها جديد وحلو ومامطروق بلواتباد ويمكن مطروق بس بقله ابطالنا موجودين وديتابعون القصه لهذا من هسه اكلكم ماريد اي غلط ع ابطالنا وخاصه الاهل و اكو بيهم برحمة ربهم ... وهاا اهم شي تفاعلكم هو مصدر استمراري بلكتابه صورة مقربه لرانيا اخت بطلتنا والها دورر اساسيي ومهمممممم بلقصه اتكدرون اتكولون القصة كلها تعتمد عليها هههههههه وهسه اريد من عدكم تفاعل حته اكمل القصه اطوني رئيكم بلموضوع وان شاءالله هلايام انشر البارت الاول ضيفوها للمكتبه حته من انشر يجيكم اشعار و منشو للي يحب يقرا قصص حته يكون الي واهس بيها لان من هسه داعاني من عدها اذا شفت مابيها تفاعل احذفها .gif) احبكم ككواياتي الكاتبه : #نور الشمري #نوشه التعديل الأخير تم بواسطة Topaz. ; 11-12-20 الساعة 10:01 AM | ||||
|
| |
|
30-11-20, 02:51 PM
| #3 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قلبان يجمعهما السحر بقلمي #نور الشمري (#نوشة) #البارت الاول # الحب عظيم جدا عندما يدخل القلب وياخذ صاحبه الى حياة ورديه لكن .... كيف سيكون هذا الحب عندما سيرافقه ذالك السحر اللعين ويدخلان معا الى ذالك القلب ...؟؟ هل سنعش حياة جميله ام جهنميه ...؟؟كيف ستكون حياتي وانا مع ذالك المسحور الذي لا يعلم ماذا حدث ....كيف سيكون قلبي بجانب قلبه والسحر من جمعنا معا.... كيف ساسير خلف من يكونو سندي وهم من هدمو حياتي.... كيف سأعيش معه وهو لم يطلق النعم من اعماق قلبه بل نطقها ذاك السحر... كيف سأثبت برائتي له وانني تم غدري كما تم غدره .... كيف أثبت حبي له بعدما اتهمني بلكذب والخيانة .... كيف أواجهمم واعيش معهم وهم من هدمو حياتي.... كيف سأازيل ذالك الحب من داخلي بعدما نبت بأعماق قلبي .... كيف امحي تلك الايام واعيش الحرية بدون قيود ..... كيف اجعل ذالك السحر ان يذهب عني بعدما جمعني بنصفي الثاني... كيف ساجعل ذالك السحر ان يغادر حياتنا لنعيش بأمان ...... كيف ..وكيف ..وكيف... وانا هنا مليئه بلكثير من القيود ...فكيف سأنجو من قيودك يا سيدي ...كيف امحوو حبك واهلي من حياتي .... قيود حبك وقيود اهلي لا تتركونني وحيده لاجرب حريتي ...... _____ 2015 ... واسط .... 12:20 م ____ - كاعده أسقي الزرع وادندن بيني وبين نفسي ومندمجه قلب قلب وين وين غايب عليه يومين لتغيب أكثر حبيبي خاف اموت من الحنين بسبس بسبس بسبس نيوووو مندمجه اغني شكد احب الاغنيه بس اكره المغني كلشش حسيت ع عيطت امي من وره البيت وهي اصيح الي - لج انصيييييفه نصييييفه طركاااعه وينج اطرشتيي ها ها يمه اجيت اجيت بس ع كيفج انفظحنا بين الجوارين وعلي اجيت عفت كلشي وركضت الها لوره البيت كاعده تخبز وصلتلها واني الهث كوه اتنفس ها ست الحبايب امري باوعتلي صفح واني كوه كاتمه الضحكه - طويفه نامت عليج وخلصتني منج ولج مو صالي ساعه انهد عليج ليش متجيني بت الزماله مو صوتي راح فوك ضيم الخبز - لا يمه لا حشاج والله ماسمعتج عذريني حبيبه امري شمحتاجه شبيك لبيك اني خادمك بين اديك ههههه كولي وامري - امشي ولي امشي تمشيني بهلحجايتين شوفي الغدا لا يحترك ابوج واخوج ع جيه جوعانين هسه - من هاي العين لهاي العين عفتها تخبز وطبيت للبيت اليوم الصبح تعاركت ويه ابويه وكاعده اطلع كل حركتها بيه ههههههه هاي هي اذا مااجت اختي رانيا اضل تتعارك ويه بابا وع اي شي لان ماشافت حبيبت كلبها كلبت التمن وقللت النار عنه باوعت ع المركه اتفور طفيتها وعفتها طبت امي شايله صينية الخبز وادردم - هاج هاج اخذيها من ايدي خذتها من عدها وهي مطنكره حجت وهي تغسل بوجهه - روحي لمي الغراض والتنور من وره البيت لا تجيها البزونه واني طابه اصلي اذا اجو اهلج صبويلهم غدا لا تنتضروني حجت وطبت للغرفه اليوم ست الحبايب مطنكره عفتها وطلعت لوره البيت لميت التنور والغراض وكلمن بمكانه ردت ادخل وسمعت طكطكه ع السياج درت وجهي لنه رضوان ابن ابو رائد الي يشتغل ابويه ببستانهم دكيت ع صدري واني اخزر بي وهو مجلب بسياج ويضحك ويأشرلي اجي باوعت ابوي وعمار ع جيه ياربي شسووي رحت عليه واني النار شايطه بيه واحس الشياطين تتطافر كدامي قبل لا يحجي عطت بي - انت شتريد هااا ابوي وعمار ع جيه اذا شافوك يذبحوني ويذبحوك كم مره كتلك هذا الحجي انت ماتفهم اضاهر حجينا تفهم لغة الحيوان الي مايمشي بس بلضرب واله اكول العمار عليك - ستووب ستوب يمعوده ع كيفج اكلتيني بكشوري ترا جاي اسلم عليج واروح شمالج عصبيتي - استغفرك ربيي انت شتريدد مني شتريددد حجيتها واني عصبيه وااشر بايده كمش ايدي وجرني ع السياج لزك جسمي بسياج وراسي رافعته اله حته اشوفه دنك راسه وهمس بصوت ناصي - مرة الثانيه هاي ايدج اكسرها اذا انعادت مرة الخ هاي شغله وشغله الخ شريد منج يمكن كايلج شريد اريدج انتِ ... - من شفته هيج حسيت كلبي راح يطلع من مكانه ودكاته سرعت اول مره اكون قريبه هيج من شاب اول مره انحط بهيج موقف حسيت ع روحي ورفعت ايدي الثانيه وضربته راشدي - واضاهر اني كايلتك اذا تريدني فيااا استاذ رضوان باب ابوي موجوده وابوي الله يطول بعمره موجود وفهمت قصدي حجيت هيج ونترت ايدي من ايده ورجعت للبيت بس احس كلبي راح يوكف كد ماا يدك سريع والهث طبيت للبيت شفت ابويه دخل هستوه يممه يمكن لو ضاله دقيقه جان رحت بيها وانتهيت ركضت عليه بست ايده - الله يساعدك يابه اطيني عنك اخذت الادوات مالاته وهو راح غسل - اصب الغدا لو اصلي - لا بويه مصلي بس خل يجي عمار راح يودي الفلوس لابو رائد هسه ع جيه حظرت الماعين ع مااجه عمار وكعدنا ناكل وامي ماكو مطنكره - بويه نصوفه ليش امج ماكو - يابه ماتدري بيها انت بركان مال نار صايره من الصبح لسه كلساع مفجوره عليه هههههه ع حبيبة كلبها عمار : حيل ام السان تستاهلين - وشمسويتلك اني بسيطه شوف منو يسويلك اكل تالي اليل عمار : لك ابو الصووف انت الروح و الريه اشاقه وياك شبيك ههههههه كلشي ولااا الاكل باوعتله صفح كلشي ولا بطنه اهم شي عده خلصنا غدا والكل طش بابا نام وعمار كمش تلفونه واني كمت انظف خلصت تنضف وطلعت بره بلبستان مالتنا ألكط بلخضره لو اسقي الورد ماعرف انام الظهر بقيت احوص اروح منا وارجع منا اذكرت رضوان دائما من يشوفني وحدي يجيني ويضل يحجي حجيه المعسل عود يقشمرني صح ممجربه الحب ولا اعرفه بس اعرف نواياا من جنت بثالث متوسط قبل لا ابطل جانن البنات كاتلات روحهن عليه وكليوميه اثنين يتعاركن هاي اتكول اني ام بيته وذيج اتكله اني ويتمالخن عبالك براد بيت مو رضوان ابن ابو رائد خشمه بطولي واني صافنه افكر شفت جوري صديقتي من الابتدائيه وامها صديقة امي ركضت عليهاا من السياج احاجيهاا - لج جورري تعااي لج مشتاقتلج هوااي - أنصاف .... لج اني الاشوق بذاته ليش كمتي ماتجين ويه امج النا هااا كمنا بسنه حسنا انشوفج من يوم التركتي المدرسه لسه - ضحكت لج ماتدرين بعمار عود كبرت ومايقبل اطلع للبيوت يخاف عليه ههههه تعاي انتي عدي هواي حجي وياج مال سنتين - خوش راح اكول الامي واجيج - يلا اتانيج اني يم الباب طبيت للبيت والفرحه ما تشيلني جوري صديقتي واختي من جنت بلمدرسه ماامشي اذا مو وياها وانروح ونرجع سوه شكد ايام حلوه بس هي جانت حيل شاطره اشطر مني اني بلكوه وبلدفرات ياله انجح عكسها تماما اذكرت من جنت بثالث هي طلعت معدل 90 واني طلعت دور ثاني ومعدلي 58 واركص لان نجحت ووخلصت هسه هي خامس اعدادي واني من نجحت من الثالث بطلت لان مادبرها ومو كلش بدراسه وهم حالة اهلي بوكتها مو شي وابوي ياله يدبر فلوس رانيا لان جانت تدرس ببغداد قسم داخلي وملابس وهم عرسها يريد يصير يعني ياله نطلع اللكمه كوه منين يجبولي مصرف الكتب والملابس بطلت وكعدت وسكتت بقيت كاعده انتظرها بطرمه شويه واندكت الباب فتحتها الها ودخلنا عمار كاعد بصاله اخذتها للبستان حلو الجو وعمار مسويلي مرجوحه بلفي يم الشجر كعدنا عليها بيتنا صح صغير بس بستانا شويه جبير وعليه عايشين اكثر شي لان بابا مرات يشتغل فلح بلبساتين الباقيه ويطوه يوميته هم ياله تكفينا كعدت يم جوري وبقيت احجي وياهاا واسئلها ع الخامس شلونه - لجج انصاف صعب صعب ابجي طيانه من وراه شكد تمنيت لو اني مثلج واكدر ابطل واكعد بس اهلي ميخلوني لج شايله هم للسادس شلون راح ادبرها اذا الخامس هيج - انجبي انتي شاطره وكدها وانشاءالله اصيرين دكتوره واترفعين راسنا واصير صديقة الدكتوره ههههههه - انجبييي ايي ما كلتيلي شلونها اختج بعد ماستقرت ببغداد عمي اختج طكت وبعد محد يحاجيهاا - ههههه ايي لج منو يتوقعهاا احنه اناسب عائله غنيه ومعروفه ببغداد هاي اختي اتخوف برغم جانت متحب الدراسه بس كملت في سبيل تروح تدرس ببغداد وكلنا انصدمنا من نجحت من السادس وجايبه معدل زين دخلت هندسه ببغداد وخطيه كام ابويه يشتغل منا ويدزلها الفلوس منا للقسم الداخلي والها والله لعد اني ليش بطلت لان شفت ابوي تعب وهو يصرف ع رانيا وامي ماعاجبها واتكله قليل والبنيه ببغداد مو مثلنا هنا ويشيل كل العده ويدزلها - اووف الله يساعدج ويرزق ابوج انصاف انتي تدرين اختج من زمان ماديه واتحب تتكشخ بس محد اصور راح تتزوج ببغداد وتكعد - ايي لج حته احنه تدرين صاللها سنه ونص من ازوجت وكل شهرين تجينا مره وع اساس اليوم تجينا بس خابرت وكالت ماكدر لان السياره مالت رجلها عاطله وحماها بلشغل مالته ماكدرت ضلت ع الاسبوع الجاي دوام عدها وبتها شالعه كلبها ورجلها متكدر بعد تجي وامي من الصبح مطنكره لان رانيا ماجتها ههههه - امج هواي اتحبها الرانيا زين ع الاقل اتحصلين شي من عدها لو كلشي ماكو ههههه - ايي كلش ههه اي لج تجي اشكال لابسه الملابس والكشخه واجيبلي واجيب الماما والعمار والبابا بس تدرين بابا نفسيته ماتقبل ياخذ من شي هو ما تعب بفلوسه بس مايكدر يرفض من وره امي تدرين جوري دائما اكول نهاية بابا لا سامح الله من وره امي وسوالفها حته رانيا طلعت عليها لان اتحب الفلوس ودائما تتذمر من حالتنا وما تحمد الله خايفه لا يجي يوم واصير مثلهن - لج لا نصوفه انتي تختلفين الكل الي بلمنطقه يعرفج ويعرف انتي تختلفين عن امج واختج ووحده بسيطه وكلبج طيب والله يرزقج ع نياتج ويجيج ابن الحلال اليحبج - صدك ع طاري الرزق والحلال والحب تدرين منو الي صاله فترا لازكلي - منوووو ولج اكو حب واني مادري اي عيني صالي سنتين اني مو يمج ومن اشوفج امج بصفج مااا تعوفج دقيقه لهذا كلشي ماعرف عنج اليوم ماعوفج اذا ماعرفه منوو - خايبه شبيج اطيني صبر احجي اكلتيني اكل ماكو لا حب ولا بطيخ بس اكلج اكو شخص صاله شهرين لازكلي لج مايرضه يعوفني واني من اشوفه اخاف لا عمار يشوفه ويروح يكتله ناقصنه مصيبه احنه - منوو ولج هذا العاشك الولهان المسكين التورط بحب وحده خبله ام اربع عيون ههههههه - جوري انجببي - ههههههههه سكتت بس عليج بداعت صداقتنا كولي منو - رضوان - شنوووووووو رضوان رضوان ماغيره ابو النسوان - هزيت راسي ايي وضحكت غريبه مو - لا تكليلي اتحبي لج هسه اذب روحي بشط البصره غيرر - ههههه لج لااااا ولي انتي مادري شلون شاطره ووصلتي للخامس علمي جماله ولي - اوكفي اوكفي تعاي سولفيلي بلااا شلون خليتي يزحفلج هااا - بقيت كاعده اسوالف ويه جوري من جنه بلمدرسه من كاعدين هلكعده لان من بطلت بعد كمت قليل اطلع لان عمار مايقبل ومن اروحلهم جانت امي وياي وماتتركنا وحدنا وهي دراسه واهلها يدخلوها دورات تقويه لهذا ماتجينا بقيت كاعده اسولفلها ع رضوان هو تقريبا الصاك والطاك مال المنطقه بس والله عمار اخويه احلا منه اذا اجه بس خشمه الرضوان بطولي كد ما طويل هههههه بس هو حلو شعره ع الموديل ولبسه وكشخته وعيونه عسليات واسمر يااخي اتحسه مزيج من العراقي والاجنبي لو ما خشمه وسماره جان كلنا اجنبي عليه بنات منطقتنا كلها تزحفله وكاتلات روحهن عليه لهذا هو ميتعب روحه ويزحف عليهن لا هنه يجنا برجليهن لهذا كعدت جوري تحقق وياي لان يمكن هاي اول مره رضوان يزحف ع بنيه مو بنيه تزحف عليه هههههه صار المغرب وراحت جوري دخلت للبيت ماحسيت بسرعه الوقت مر ابوي طالع للشغل وعمار طالع للكوفي وامي كاعده اسوي بلعشه ماحاجيتها لان بس احاجيها تنفجر بقيت لازمه تلفونها ابو الصرصر الي الف باكيت تيب لافينه عليه ياله يشتغل وكعدت العب دوده بي دك بيدي باوعت رانيا رديت عليها لان امي كاعده تتوضه اتريد تقرا قران دائما هاي عوايدها قبل لاذان تقرا قران - الوو ها رنوشه شلونج - هلا صوصه امي وين - يعني وين هيج وقت بعلمج - اووو نسيت ردت اكلها باجر وره الضهر جايين اني و مثنى رجلي ويجوز يبات عدنا وثاني يوم يرجع حظرو روحك - ماشي راح اكللها بس خير مو ع اساس ائجلتيها ع الاسبوع الجاي - ايي بس ضجت صالي شهرين ونص ماجايتكم تعاركت وياه وراح يجيبني باجر - خوش حبيبتي براحتج - يلا باي سدته راسا حته ماكملت الباي مالتي بعدها بطرف الساني اهمداج انصاف دوم مستصغريج وعبالهم بعدج طفله مو بت عمرها 17 سنه هففف صليت وخلصت بعد مااذن كلت الامي ع رانيا والضحكه شكت حلكهااا من الاذان الاذان هههه فرحت واخيرا امي ضحكت بعد يوم كامل مطنكره بقت اتحوص وتفكر شسوي باجر وحطت ورقه وقلم وكعدت تكتب الاحتياطات واني صافنه عليها - يمه ترا ماراح يجيناا العبادي والله راح يجي مثنى ورانيا - انجبي لج لعد شتردين استقبل مثنى هيج باجر اطلع للسوك واجيب النواقص بس خل يجي ابوج واصالحه بكلمتين واخذ منه فلوس باوعت عليها وبقيت صافنه ماعرف اضوج لو اضحك ع تصرفات امي تبقه امي وماكدر احجي عليها واذمهه بكلمه حته لو كانت ع خطأ عفتها ومشيت حظرت العشه واجو فتحت الموضوع امي انتبهت ع ابويه مثل الي ضاج هو ما ضاج لان راح يجون بلعكس بس ضاج من وضعيتنا وشلون راح يستقبل مثنى هاي ثاني مره يجينا من ازوجو لسه اول مره من عزمناهم وره العرس وراسا راح ماطول وهاي المره لهذا الكل استغرب وره العشه كام بابا ودخل للغرفه لحكته حته اطي تراجيي الذهب يبيعهن شسوي بيهن اني وحته صغار صايرات عليه كوه اسدهن لان من جنت صغيره من جابهن الي طبيت لكيته يحسب بلفوس الي كاعد يجمع بيهن علمود عرس عمار راح يصير عمره 30 وهو مامزوج منو يقبل يطي بته وهو لسه ما مكون روحه هو صح خريج سادس بس ماكمل لان كعد يشتغل ويه ابويه وكل مايشتغل بشغله لازم يتعارك ويه واحد وينطرد لو يصير شي ويترك الشغل لهذا ما ثابت شكد انقهر ع حالنا بس مرات استغفر الله واكول الله كريم كعدت يمه وهو باوعلي ابتسمت بوجهه وكتله - باباتي اريد اكلك شي مسح ع راسي ورسم ابتسامه تعبانه ع خدوده كولي ياروح ابوج شنو تردين - حطيت التراجي بيده وهمست اله اخذهن وبيعهن واطي فلوسهن الامي باجر تطلع للسوك تتسوك بيهن وخلي فلوس عموري لان انريد نفرح بي راح يكبر ومحد تاخذه هههههه - لا بويه لا ضميهن وان قاطعته واني اكمش ايده - حباب بابا اسمع كلامي ترا حته مايصير لان صغار انشاءالله بس يزوج عموري والله يرزقك اجيبلي احلا منهن موو باوعتله واني اغمزله ضحك واخذني بضحنه وهو يبوس براسي الله لا يحرمني منج صدك انتي بنيتي انتي اتشبهين ابويه الله يرحمه بكلشي لاهذا انتي عزيزتي - الله لا يحرمني منك بست راسه وكمت واني الدمعه بعيوني طلعت شفت عمار واكف بلباب يباوعلنا وعيونه مغرغره دموع مد ايده وهو يداري الموقف وخربط شعري - عماااار كم مره كتلك لا اسوي هذه الحركه تدري بيه اكرهه ماحبهااا - اوووي عينيي اسفيين بس شعرج هو يجبرني شسوي - راح اغلط - انجبي لجج بطول خشمي وتريد تغلط عليه ام اربع عيون - عمااااار اني اعلمك والله ركضت وراه وهو طلع بس مالحكت عليه لان طلع للشارع بسيطه شوف منو يسويلك اكل من تجي بليل فرشت اله والابويه بصاله بابا نام واني كعدت ع التلفيزون وامي اتخيط بلغرفه دومها منعزله عنا بده فلم مال قراصنه واني اموت ع هذا الفلم مينةت مره يعيدو واني اشوفه كمت ادور ع المناظر مالاتي لان ماشوف الكتابه لهذا عمار وجوري يصيحولي ام اربع عيون جبتهن وكعدت اتفرج ومندمجه لل 11 خلص الفلم واجه عمار قفلت الباب ونمت ثاني يوم امي رادت اتروح للسوك ابو عمار : ام عمار اخذي وياج أنصاف واشتريلله الي تريده مثل ماوصيتج - صفنت ع بابا من كمل كلام وطلع امي باوعتلي وكالت امشي لبسي يلا شمنتضرره لبست وطلعت وياها شعجب خلوني اطلع هههههه واحنه بطريق كالت امي - ترا ماعدنا فلوس ابوج كال هيج مجرد كلمه تراا ماعدي ياله يكفن الي اطاهن الي ابوج واريد اشتري هديه لمثنى فشله يجي وكلشي ماكو ضجت من تصرف امي ابتسمت عادي هاي مو اول مره دائما اتفضل رانيا عليه بكلشي ليش استغرب يعني من شفتها فضلت مثنى رجل رانيا عليه هزيت راسي هي تتصرف هيج لان دائما اتعارك ويه رانيا لان تصرف هواي ولان ماارضه ع تصرفاتها هي ورانيا وع ماديتهن وكلشي عدهن ماده وكشخه هزيت راسي ومشيت من دخلنا للسوك هي بقت اشيل واتحط وماخلت شي ماجابته مسواك وحلويات وفواكهه ووو كومه بس اني وامشي انتبهت ع محل مال اكسسوارت وعطور جذبني سوار معلك كلش حلو مزخرف وبي حرف A كلش حبيته امي دخلت للمحل رجالي واني اشرتلها هنا رحت عن قريب حته اشوفه المحل مفتوح بس مكتوب ع الباب مغلق شنو هاي جديده هههههه اتقربت ع الجامه حته اشوف السوار زين بس الي شفته صدمني . . . . . . . . . في مكان اخر .... 2015 .... بغداد .... اليرموك ..... 6:25 م ..... - ولك يمه اكعد الدنيا غروب ميصير تنام هيج وكت اكعد يايمه من الصبح نايم - هممم اي يمه هسه كايم - من السته واني اكعد بيك وانت ماعدك غير هلكلمتين اي يمه هسه كايم كوووم يلا كدامي كووم اخوك هو وعائلته بطريق كوم يبعد روحي راح ياذن - وخرت الغطى ورفعت حاجبي انتي ماراح تعوفيني موو هزت راسها لا هههههه عدلت روحي وكعدت بست راسها وها اها كعدت بعد شتامريني - مايأمر عليك ضالم يايمه هاا اذن صلي وروح جيب صمون للعشه اخوك جاي هو واهله عشاهم هنا - تتدللين انتي وابنج واهله الابنج بعد - اريدك سالم يابعد روحي عفتها وكمت غسلت وجهيي من النعاس باوعت ع ايدي حمرا خرا بيك يامن ايدي ورمت من وراك طلعت انشف بوجههي ونزلت جوه ادور ع مرهم شي بلمجر بس هو مجر لو انفجار صاير بي ولا كأن اكو جنه بلبيت زباله صاير مو بيت حته لعبت نفسي وصرت ماحب اطبله عفت كلشي وطلعت اجيب صمون واني بسياره دك تلفوني باوعت يامن - شتريد ابن الحلو مو ايدي مورمه من وراك و وره اسوالفك الماتخلص - ههههههه ع كيفك ابو برهوم وين انت هسه - بشارع وين الله وكيلك من النعاس صاير مطي حته المطي من اشوفه عبالي انسان من النعاس - ههههههههااي لعد ضلمت المطي من شبهته بينا هسه فظها كول وين انت - كتلك بشارع ادور صمون للحجيه راح يجي سند هو وعائلته وبعد تدري بلحجيه اذا اجاها احد شلون اشد مو بعد ابنها - ههههه خوش لعد اني جايك - شعدك ابن الصاكه - لك نصررر شوكت تبطل سوالفك هاي مو امي ميته وشابعه موت من جنت بلكماط شعرفك بيها صاكه بلا - احساااسيي يلا رايح اني سديته من عده ونزلت للفرن اخذت صمون وجرك وطبيت ع الاسواق اخذتلي باكيت جكاير وكم شغله لغزوله ورجعت اول ماطبيت اتلكتني غزل تزحف - عمم صرر ههههههههههاي شلتها واني ابوس بيهاا وهي تضحك لج خربتي اسمي راحت الهيبه ان اخوك يا مثنى راحت هيبتي وبتك اصيحلي صر هاي تاليتها ملازم اول بلستخبارات تاليتي هاي بكد الفصمه اصيحلي صر مثنى : ههههههه هي بس هاي صكارك محد يكدرلك غير بنيتي - حبيبت عمها هااي رانياا رانياا هاج هاي غراضها الغزوله بس مو تطيها هواي حلويات مو زين عليها رانيا : هههه ايي بس عليمن كل هل علاكه لهاي الفصمه ام السان - شعدي غيرهاا اني عفتهم وطلعت انتظر يامن مو من عوايده يجيني هيج وكت اكيد اكو شي ولو هو كل مشاكله من وره حبيباته ولا يكعد راحه ابو النسوان شويه واجه سند اخوي ومرته وبناته وابنه سلمت عليهم وبقيت كاعد وياهم الى ان رمش تلفوني شفته يامن استاذنت منهم وطلعت - ها ولك ابو النسوان شعدك هم قشمرت وحده ولكفتك ودزت اخوها عليك واتريدني اروح وياك اخذ انتقام ترا ايدي وارمه هااا - ههههههه لااا بس خابرني العميد احمد من وزارة الداخليه اكو مهمه والرائد مالتنا كال انت والملازم نصر الدين تلزمونها - الله هاي الاخبار الزينه وشنو من مهمه - تريد بشارع احجي خو اجيب مايك واصيح مو احسن - ههههههههههههه دفوت فوت بلغرفه مالتي نحجي عود يحافظ ع معلومات السريه ابن الصاكه هههههه طب يامن وسولفلي ع المهمه اكو بضاعه بيها سلاح داخله من ميناء البصره وراح تدخل واسط باجر الصبح وتروح للسوك الجبير لازم نخبر شرطة واسط بس قبل كل هذا لازم نتاكد من الاخبار وانحقق وياهم ابتسمت واني افكر بباجر شكد احب شغلي احس بمغامره بي واني من صغري احب المغامرات وهاي عمري 35 صار واني لسه بكل مهمه تجيني احس بفرح كأنما اول مهمه الي راحو سند وعائلته واني وقتت التلفون ونمت سند اخويه الاصغر مني بسنه مزوج وعده 3 بنات وولد واحد من ازوج مثنى طلع جان عايش يمنا بس خاف من المشاكل وهو يعرف مرته شويه ادور خباثه دبر روحه وطلع وخاصه هو لازم محلات الوالد الله يرحمه جان الوالد عده تقريبا 4 محلات تبدل دهن وغسل وتشحين يعني كل شي يخص السيارات ولان اني الجبير جنت لازم اكون المسؤول عنهم بس فظلت الكلية العسكريه ع محلات الوالد واطيت مسؤليتهم السند اخويه وهو الي اتكفل بيهم صدك واني بس شنو كل شهر يجيني الوارد المالتنا يتقسم علينا مثنى اخوي الصغير شالع كلبي برغم من زوجته وكلت بلكت يعقل ويثكل بس ماكو كل همه بسيارات كل اسبوع بايع سياره ومشتري سياره شكل يصرف كل فلوسه ع هذه السوالف شكد حذرته ولا يفيد صح هو مهندس بس كل فلوسه يحطهن ع السيارات ولا داير بال المرته وبته وفوك كل هذا مرته هسه حامل هم شلون يعيشهم مادري يمكن لو مو اني جان ماتو من الجوع كلهم بجفه وهو بجفه وحد شايل همه حييل لمثنى ومرته ماديه شلون اتراهمو مادري عدي اخواتي اثنينهن مزوجات وحده مزوجه ابن عمي وعدها ولد بس والصغيره مزوجه غريب من يلتمون كلهم ببيتنا اخوتي اخواتي نسابتي والضحك والسوالف انسه كلشي واندمج وياهم بس من انفرد وحدي اذكر الاهانه الي حصلتها بسبب كلبي الي حب وحده ما تستاهل ذرة من حبي بس بفضل هذا الحب واهانته كدرت ابني شخصيه جديده لنصر الدين ومحيت كلشي صار قبل 8 سنوات وصار نصر الدين الجديد درست بكليه العسكريه واتعينت ضابط استخباراتي وهذا اكثر شي اني فخور بي بنفسي كدرت انساها او حاولت اتناساها لشهد بت خالتي واتناسيت اهانتها الي وكلمن عايش حياته هي عدها بنيه واني اضربت عن الزواج كل هذا شريط يمر ببالي قبل لا انام اذكر كلشي صار وياي واذكر عائلتي ويامن صديقي وحبي الانسانه الغلط اذكرهم وبعدها تغفه عيني كعدت ع المنبهه سديته ورجعت نمت ميت نعس واني نايم صارت كدامي صورة العميد احمد طفرت واني اذكر خرب بشاربك يامن شلون نسيت الروحه لواسط اني طفرت بسرعه بدلت ملابسي ولبست بنطرون اسود وقميص اسود ويلك ابيض عدلت شواربي ولحيتي يرادلها تخفيف باوعت ع راسي وضحكت من شفت كروعتي الصاكره البعض ههههه نزلت شفت الوالده تصلي بست راسها واخذت سيارتي وطلعت ع يامن اخذته وطلعت لواسط من الفجريه علمود نوصل من وكت مرت الساعات ووصلنا من نزلت دامشي شفت يامن يمشي وراي و يغمز لابنيه والبنيه خزرته اخ يابه ولا يكعد راحه هذا الولد انصاف : احس اطرافي جمدت وانصدمت من شفت اثنين كامشين ابو المحل ويحجون وياه وواحد منهم حاط اسلاح بخصره رجف جسمي وحسيت روحي بفلم مو بسوك عفتهم وركضت الامي واني ارجف ……… يتبع - أحبَبتُك بمدينةهَ تصَف الحُب بالجَريمةهَ 💛🌼) ،،،،،،،،،وللحكايه بقيه ،،،،،،،،،،،، توقعاتكم ورئيكم بلقصه اكمل لو لا يمكن اول بارت ممل او مابي شي بس البارتات الجايه ناار ناار احداث ولا احلا صدكوني تفاعلكم اهم شي اذا شفت تفاعل قوي انزل النشر بين يوم ويوم من هسه اكول بس لا تخافون انززلكم مرات بارت مفاجئه غلاف القصه من تصميم عبوره AbeerAL_Hussnawy  #نور الشمري #نوشه | ||||
|
| |
|
30-11-20, 02:57 PM
| #4 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قلبان يجمعهما السحر #البارت الثاني بقلمي # نور الشمري (#نوشه) #لقائك الاول جعلني أسيره بك سكنت عقلي قبل قلبي بمجرد أن رئيتك 💕 أنصاف : مشيت سريع واني احس كلبي راح يطلع من مكانه اباوع امي ماكو يممه وين راحت كل فكري جان يم الاشخاص المسلحين وكل عقلي هم شافوني مثل ماشفتهم اني ولحكوني امشي واباوع لوره وادور ع امي اعيوني انترست ادموع وكل جسمي كام يرجف يمكن بس احد يكلي بخ ابجي لمحت امي من بعيد يم ابو البهارات ركضت الها واني اكمش بعباتها مثل الطفله باوعتلي مستغربه بوضعي - شبيج ولجج عبالك لاحكج واحد شوف وجهج اصفر هزيت راسي واني اريد اسولفلها كلشي بس عافتني وكامت تحجي ويه ابو المحل وتعامل ومادارت الي بال درت وجهي مسحت ادموعي وابتسمت حتى اقوي روحي باوعت ع المحل محد طلع من عده بقيت واكفه وعيوني ع المحل لحد ما خلصت امي كلشي وكالت يلا نرجع باوعتلي بشك وكالت - سالفتج مو خاليه ولج شبيج اترجفين وعبالك كاتله واحد - لا يممه هيج بس اكو جلب راد يعضني وخفت تدرين بيه اخاف - اهمداج اذا صدك الي بكبرج خلفن وصارن امهات وانتي تخافيلي من جلب عفتها وصرت امشي كل همي اطلع من السوك كله وانعل ابو الي يطبله بعد سوك هو لو مجرمين بي عزاا شنو حال ابو المحل هسه خطيه اهمداج انصاف ماصحتي بصوت وفضحتيهم هسه اكيد كتلو الابو المحل وباكو خطيه حراميه مجرمين الله لا يطيهم الله لا يوفقهم امشي واحجي ويه روحي باوعتلي امي وهزت ايدها اجرت تكسي ورجعنا للبيت كعدت امي اسوي من هسه العشه واني نضفت وطلعت للحديقه كاعده اسقي بيها وشفت رضوان واكف ويباوعلي احنه سياجنا بس سيم وينشاف كلشي لهذا جنت من اطلع البس حجابي بس وره البيت لاا عمار مغطيي بجينكو يعني مانبين اذا طلعنا لوره البيت علمود امي تاخذ راحتها بلخبز خزرته وهو بقه واكف يباوعلي ويضحك ويدنك ماهتميت اله عفته ودخلت وره الغدا ابوي نام وعمار طلع للكوفي يشتغل عمال هناك هو صح الكوفي الابو صديقه بس هو حاله حال العامل لازم يجي من وكت وينضف خطيه حيل متبهذل يطلع من الصبح لليل ياله يجي مانعرف وين يروح مرات يروح ويه ابويه ومرات يختفي من المنطقه كلها العصر ابويه راد يروح لشغله للبستان ابو رائد يشوفه امي ماخلته وكفت بلباب وهي تحجي - شنو تطلع وصهرك ع جيه اذا اجه منو يستقبله اني لو هاي الطفله نصيفه لا انت ولا ابنك فشله من الولد هو جاي علمودي لو علمودك غير تستقبله اشوفه تكعد وياه - يامره هسه اني عايفه وحده اجه هو واني ماكو كتلج طالع ومن يجون دكي عليه اجي ليش ابقه هنا انتضرهم ع الاقل اجيبلي كم فلس - فشله ابو عمار اتريد اتفشلنا كدام الولد وهاي ثاني طبه اله النا عيب وخابر ابنك هم خل يجي وين وله - ام عمااار بسس هسه اني كلت ميخالف وهاي كعدت عوفي الولد يشتغل مو والله حته الرزق طار من وراج عافنا ابوي وطلع للبستان مالتنا وهو عصبي وامي تنافخ ضايجه ماعاجبها باوعتلي وصاحت - دكيي ع اخوج خل يجي وين وله هذا راح يجي الولد وهو ماكو باوعتلها ماعاجبني تصرفها عفتها ومشيت دخلت للمطبخ ماخابرته العمار اكيد كاعد يشتغل واذا عاف شغله ينطرد خطيه وهو كوه لكاه شويه واندكت الباب طلع ابوي فتحه جانت رانيا شايله بتها غزوله ورجلها طببهم ابويه وهو يرحب بيهم اني واكفه بلمطبخ اعدل بحجابي شويه وطبت امي سلمت عليه ورحبت بي واني كاعده اصب بلعصير سمعتها صاحتلي اخذته وطبيت سلمت وهو رد السلام بقه هو وابوي بصاله يحجون ويشاقون ورانيا يمنا بلمطبخ تسولف الامي ع عيالها وع الفوس وع هذيج ششترت وذاك ششتره وشيجيبون الغزل اذا اجه عمها وووو طول الكعده هي اسولف بحماها الجبير رانيا : لج يممه شايل البيت شيول هو يلعب بلفلوس لعب ومايهمه شي والله لو ما هو جان اني حالي من حالج وبعد افقر مثنى كل فلوسه مخليهن ع السيارات ولا يصرف ربع عليه لو ع بته ومنا حامل مابقالي 4 اشهور واجيب وهو ولا كانمااا ذاك سند عائلته شكبرها بس ولا يطلب من اخو الجبير اله رجلي كل شي وصاح نصر كلشي ونصر وهو ولا كانما موجود بلفلوس - يااا يمه ليش هيج رجلج كعدي احجي وياه سولفي مايصير هيج كل فلوسه اتروح - يمه عبالج ماحجيت حجيت لحد ما مليت وهو يسمع من هاي الاذان يطلع من هاي الاذان اني ماخايفه بس اذا لا سامح الله عمتي تقنع نصر وازوجه وخاف يكوم يشيل ايده عن مسؤليتنا والله اضيع ام عمار : ااااخ اااخ يايمه انتي حظج مثل حظي ولا كاعد عود كيفت ازوجتي ابن ناس وراح ترتاحين طلعتي اضرب بعد - جنت واكفه اسوي بلعشه واسمع الهن احس راسي راح ينفجر من عدهن رانيا اختي الاكبر مني عمرها 22 سنه حيل حلوووه وجانت قبل لا تروح للبغداد تدرس اغلب نسوان المنطقه اجن خطبنها بس هي ترفض حته بدون ماتعرف منو جنت دائما اسمعها تحجي ويه صديقاتها واتكللهن اني اريد واحد يدللني بلفوس واعيش ملكه مو مثل ابويه لو اموت ماازوج من منطقتنا الفكرر جنت اسكت واكول شنو يعني راح تزوج ابن الرئيس قابل نهايتها تزوج منا تزوج منا بس صدمتني من نجحت من السادس وبمعدل كلش عالي خلت ابويه يفتخر بيها ويرفع راسه جان ناوي يدخلها معهد طبي هنا بواسط بس اللاسف ماقبلت وعاندت اله ببغداد بقه ابوي حاير مايعرف شيسوي بس ماكدر يكول لا خاصه اذا امي حطت روحها بلموضوع لازم يقبل بدون اي نقاش قبل ابويه وراح عمار للبغداد ومشه بتسجيلها وخطيه ضل عمار رايح راد للبغداد ومتبهذل من وراها دوامت رانيا وضلت اقسام داخليه اشهر واجت كالت اكو ولد يريد يتقدملي جان نفس قسمها بس اخر مرحله اله امي كعدت تحقق ويه رانيا ورانيا اتكلها يمه والله احبه وهو يحبني واهله ناس خير من الله عدهم واعيش ملكه ابويه ماقبل وكال ماكو زواج لحد ما تتخرجين بس هي عاندت كالت اخاف يروح يزوج وحده ثانيه واني وراي 4 سنوات شيخلصني ضلت معانده لحد ما كامت امي اتنك ع ابويه لحد ما وافق ابويه بدون نقاش واجه مثنى هو وامه واخته وخطبوهاا اهله ناس كلش بسطاء برغم من انهم اغنياء بس مايهم الماده يعني بمجرد مااجه ابنهم وكال احبها اجو خطبوها اهم شي ايكون مرتاح ازوجت رانيا سوينالها حفله هواي بسيطه وثاني يوم اجه اخذها مثنى وزفوهم من بيتهم للفندق مارحت لان امي ماقبلت حته هي راحت وثاني يوم اجت بقيت اني يم ابوي وعمار ماشايفه بس مثنى واخته الصغيره اجت ويه امهم بيوم الي خطبوها وامه المثنى اتعشو وعمار اجه وصار الضحك والسوالف بين عمار وبين مثنى ابتسمت من سمعت اخوي يضحك دخلنا للغرفه اني ورانيا كعدت العب بغزل شكد احبها عدها سوالف اتخبل حجت رانيا - لججج أنصاف شلون صايره دخيل الله جلد وعظم شوف شعرج شوف بشرتج جنج عجوز هاج اخذي من كريماتي وحطي بلكيت يتعدل وجهج باوعتلها ودرت وجهي ع غزل - والله يااختي العزيزه شبيه اخبل وزني 53 وشعري يخبل صح مو طويل مثل شعرج بس سرح وناعم ومايتعبني وراسا يتمشط مو مثل شعرج ووجهي خلي كريماتج الج اخاف ع بشرتي اني هذني كلهن مواد كيمياويه اعرف شبيهن مابيهن اخاف تتحسس بشرتيي حجيت هيج وصرت اكركر بغزوله ورانيا سكتت بعد مافتحت حلكها شكد اتنفز منها من اتكوم تحجي هيج ثاني يوم راح رجلها وهي بقت وامي اتحير شسوي واتحطلها وهي حامل مناا وخطيه ابويه يجيب يوميته منا تاخذه امي منا علمود رانيا مرات اصفن ع عمار هو الوحيد المايدخل بهيج مواضيع ولا يدخل منعزل ودائما بره البيت قليل يدخل وبس بليل من ينام واذا دخل البيت يبقه لازم تلفونه ومنصي مرت الايام ورجعت رانياا لبغداد ورجع وضعنا احسن شويه مرت الايام والشهور رضوان دائما الصبح من اطلع اشوفه واكف ويبقه بس يباوعلي ويبستم مااجرء بعد واتقرب يمي او يحجي بس مجرد يباوع عليه من بعيد هشي حرك عدي مشاعر بداخلي صرت من اشوفه ابتسم وافرح ومن مااشوفه اضوج واتكئب صار شي روتيني لازم كل يوم اشوفه مراهقه وجان هو اول شاب بحياتي من يوم الي طلعنا للسوك وكمت اشوف كوابيس من انام ياا هذوله المسلحين يكمشوني ويكتلوني لوو يخطفوني لو اشكال اكعد من النوم مخروعه وخايفه ارجف وكوه ارجع انام من الخوف جوري كامت من كل فترا وفترا تجي يمي ونكعد بوره البيت انسولف لحد ما فد يوم اتصلو ع امي رانيا جابت وهسه بلمستشفى وجابت بنيه راسا شاشت ع ابويه تعال اخذني جان وكت عصريه واله تاخذني للبغداد وتعاركو وثاني يوم الصبح شاشت ع عمار تعال اخذني انت اخذها عمار وراحو للبغداد بقيت وحدي بلبيت ابويه طلع للشغل بقيت اشتغل وانضف واغني احب اغني هووواي صوتي مزنجر ادري بروحي بس ماا اسكت هههه وكفت كبال المرايه معقوله رضوان يحبني من صدك ويخطبني واخيرا اباوع ع شكلي عيوني كبار وجوزيات شعري يوصل لجتفي بس سرح وناعم عدي خدود عمار دائما يكعد يكرص بيهن واكو شامه صايره جوه عيني مو كلش طويله دائما يكللولي قصيره بس طولي حلوو بس من يردون يضوجوني يكللولي قصيره واني اتخبل سمني حلو وزني 53 ومنتضمه بلاكل ابد ماا اكل زياده خاف اسمن اكثر طلعت بره شفت رضوان اشرلي خزرته اشر الي اعبر السياج اتخبلت صح احب اشوفه وابتسم اذا اشوفه بس مااحب اخون ثقة اهلي رحت اله عصبت انت شنووو هاا يعني ماتستحي - اششش شبيج ولج اريد اكلج كلمتين واروح الشهر الجاي اهلي يجون يخطبوج حظري روحج فتحت عيوني مستغربه فتحت حلكي مصدومه هو ضحك كال ولج سدي حلكج فشلتينااا هههههه - هااااا شنوو - هههههههههه خبال لج سدي حلكج لا اسدهن بهاي النضارات الابستهن باوعتله احس خدودي حمررر دم من المستحه عفته وركضت للبيت ميته خجل مر اسبوع امي بقت يم رانيا لحد ما تحسنت واني كل ما اذكر موقفي اخجل وخدودي تحمر وراه ايام امي من رجعت اخذتلها كم يوم وكامت تحجي ويه ابويه ع ان لازم انروح انشوفها بتنا انت اتباركلها ميصير وهي عد ناس غربه اتفقنا انروح الهم بعد يومين واني وياهم وجانت هاي اول مره اطلع بيها بره واسط صح اطلع ويه امي بس ماطالعه بره محافظتي ابد جنت متحمسه حيل اروح وياهم ووين لبغداد يا ويلي ع حظج يا انصاف شكد كاعد هلمره حظرت روحي قبل يومين وعمار كال اني عدي شغل روحو انتم الصبح طلعنا للكراج والطريق كله اني افكر ببغداد ممصدكه راح ادخللها بقيت صافنه ع الطريق افكر معقوله رضوان يخطبني وازوجه ويكعد حظي وياه وازوجه حسيت روحي اميره شكد جنت اسمع عنه بس ما يوم اتوقعت راح يدخل بالي او انعجب بي وازوجه خلص الطريق واني افكر وابتسم وصلنا بغداد واني صافنه عليها وع شوارعها يالله شكد حلوه بس تبقه واسط بنظري احلا لان تبقه محافظتي الي ولدت بيها واتربيت بيها ووعيت بيها باوعت ع امي وابوي نزلو من الكراج وراح ياجر تكسي بابا وامي تباوع ع البنات وع الرايح والراد وتهز بيده عرفته تتبطر وعرفت شنو يدور ببالها كاعد نمشي اني وامي حته نلحك ع ابويه اكو ولد كاعد واكو بنات ثنين يمشن كدامنا الولد ذب كلام الهن هن ضحكله وبقن واكفات امي من شافت هيج شهكت ووكفت باوعتلهم الولد شال ورقه وواطاها لوحده من البنات لو امي صارن عيونها بكصتها تجر بيها وهي تدفعني وخرري لج زماله خل اشوف هذا المامتربي وهذني الخايسات مامتربايات مايستحن بنص الشارع هيج يسوون راحت ع الولد واستلمته مربع وطن رزايل وهي اصيح - ماتستحي ولك ماعدك خوات ماتخاف الله والولد فاتح عيونه واني ادك ع كصتي واجر بعباة امي اباوع ابويه ماكو وين راح خرب بحظييي البنات شردن راسا الناس اجمعت وعبالهم الولد مقلل ادب وياي وامي هاده عليه وتحجي ع البنات لان شردن والناس اتهدي بيها شفت ابويه يباوع يدور علينا يباوع منا ومنا عفت امي وركضت ع ابويه والدموع بعيني من الفشله السوتها امي راح ابويه والنار بعيونه اعتذر من الولد وجر امي وهو يحجي عليها - انتي شعليج يااامره انتي شعلليبج كلمن اله بنفسه شعليج هنه لو شريفات جان ماا قبلن بلي سواه الولد وياهن وجان رزلنه بس قبلن شعليج انتي سكتت امي وركبنا بلتكسي والطريق كله ضايجين الوضع مكهرب محد يحجي ويه احد واني ساعه اضحك ع الموقف وساعه اريد ابجي من الفشله والناس عبالهم متحرش بيه هههههههه باوعت ع الشارع سمعت بابا كلها بهذا الشارع اي اي هنا يم هذا البيت وكفت السياره و نزلو اهلي نزلت من السياره اني واباوع ع البيت شكد حلوو امي وابوي كدامي واني وراهم مشت السياره الي جابتنا من الكراج واني واكفه ع رصيف دك بابا الجرص ووكف ع صفحه وامي بصفي واني يم الباب مادري ليش احس كلبي داكاته سرعت وزادت عن دكاتها الطبيعيه واحس كلبي مقبوض انفتح الباب وطلع شخص منها جنت واكفه بصف الباب وصار ضهره عليه جسمه شويه متروس بس مو هواي وطوله زين لابس بنطرون اسود وقميص ابيض ويلك اسود بارز كل عضلات جسمه بلبسه الرسمي انتبهت عليه جان اصلع وصلعته تلمع لمع انضف والمع من حياتي حتى خرب بحظي اذا راسه المع من حياتي شكله شلون دار وجهه ع امي وسلم عليها انتبهت ع عيونه صارت عليه بطرف عيونه مجرد البؤبؤه اتحركت بتجاهي ورجع دار وجهه ع بابا واشر النا بدخول ضجت من تصرفه برغم ماعرفه ولا يعرفني وهاي اول مره نلتقي دخلت امي واني وراها وهو وبابا ورانا اسمع صوته خشن وبي بحه غريبه اكيد من الجكاير سمعت مره من بابا يحجي ويه عمار ع الجكاير بس صراحه صوته حلو ويجذب الشخص المقابل حته لبسة وكشخته مبين شخص اله سلطه وهيبةة عشتوووو هاي شبيه انتبهت ع روحي كرصت زند ايدي حيل كافي عيب ثكلي شنو ما شايفه ولد قابل اثكلي انصافووو شويه ثكلي صارت رانيا اختي كدامي ابتسمتلها وسلمت عليها وبصفها مره تطلع اكبر من امي عرفتها عمتها ام رجلها الرانيا اختي سلمت عليه وطببتنا جوه جنت امشي وراه امي مثل الطفله الخايفه اضيع وابالي الشخص الي فتحلنا الباب مايروح من بالي شكله يخوف بس يجذب كعدت بصاله ماعرف شنو بيها قنفات ورانيا كعدت يم امي صارت كبالي صورة بيها 3 شباب االبنص اعرفه رجل رانيا والي ع الجهه اليمنى ماعرفته بس الي ع الجهه اليسرى جان نفسه الي فتح الباب النا عرفته من صلعته التلمع عده لحيه خفيفه شويه وشوارب ثخان نضراته حاده كلش وحواجبه ثخان حسيت روحي شايفته بمكان هلعيون ماره عليه بس وين ماعرف واني منتبهه ع الصوره حسيت بي دخل صاااح بعلو صوته طفرت من صوته العالي واخترعت بنفس الوكت واذكرت وين شايفته يمممه عزااااااا بعيني هذااا نفسه الي شفته قبل شهور بلسوك وجان شايل اسلاح يم ابو المحل صخاااام طلع مجرررم عزا العزاني هذا مجررم شلون عايشه رانيا وياه اثاري زنكين وغني من البوك شفته طب عصبي ويحجي ويه امه وعيونه نار والدمارات مبينه ومنا اصلع ودمارات وجهه بينت خفت منه ودحست روحي بصف امي واني اباوعله بخوف صعد فوك شويه ونزل امي ورانيا ولا يمهن كاعدات ويسولفن ورانيا اترضع ببتها الصغيره اتخبل طالعه السبعه اجنن كمت اخذت غزوله واباوع ع بتها همستلها - رانياا بتج اتخبل الصغيره عليمن طالعه لج اطينياها عليج الله - هاجياها خلصيني منها اخذتها واني ابوس بيها رزان رزونه حبيبتي امورتي يمه اتخبل خل ناخذها ويانا - يا لج نصيفه اتخبلتي شناخذها هو اني اريد اخلص من مسؤليتج مو بعد اجيبلي بعد وحده هههههههه حته اشد راسي سكتت ضجت من كلام امي بس كلت يلا هسه من ازوج رضوان اتكوم تحبني وتشتاقلي مثل رانيا طبت عمتها الرانيا وهي تضحك واسوالف ويه امي باوعتلي وكالت - يمه صلوات طالعه اتخبلين نصوفه عيني بارده عليج كبرانه وصايره مره - دنكت خجلانه شكرا خاله تسلمين - هههه ام عمار اذا طلبناها تطينياهاا لج اتخبل رانيا : يا عمه المن تاخذيهاا ام نصر : المن النصوري غيرر يمه فدووه ام عمار : يا ام نصر هو انتم تنرفضون اتكبعوها وتاخذوها - تسلمين حبيبتي بس ادعي كون الله يفك جبست هذا العدي والله بس يقبل اله اخذهااا اله بس اااخ اااخ شالع كلبي ولا يقبل يزوج راح يكبر ومحد تاخذه - لاا انشاءالله خير ام نصر انتم ذهب اباوع امي طارت من الفرح لو بيدها اتعوفني هنا واتروح ورانيا صفنت واتباوع عليه بستغراب وعمتها تباوعلي وتضحك واني صافنه شنو يعني ازووج !!! ومنو ازوجهه قصدهم منو نصر هذا الي بصوره لو هذا المجرم عزاااا بعيني ازووج مجرم زين وو ورضوان يالله معقوله لا مااقبل ماازوج واحد مجرم واعوف رضوان ……يتبع ،،،،، وتستمر الحكايه ،،،،،، قرائه ممتعه رئيكم وتوقعاتكم للبارت القادم البارت الجاي نار نااار تصويت ⭐وتعليق حبايب قلبي تفاعلكم حيل قليل #نور الشمري #نوشه | ||||
|
| |
|
30-11-20, 03:04 PM
| #5 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قلبان يجمعهما السحر #البارت الثالث بقلمي #نور الشمري (#نوشه ) - أخترتُ أَنّ أُحبكَ ، رَغم رَغبتي بالإِنعزال عَن كُلِ شيءِ🧡 ! أنصاف : صفنت ع كلام امي وعمتها الرانيا وسوالفهن وضحكهن واني بعالم ثاني زين معقوله اهلي يجبروني لا لا رضوان هم غني وامي اتكيف ويمها اي اكيد هي صح قاسيه بس اكيد اتريد الراحه الي اجت رانيا كعدت يمي وصارت اسولف وياي واني بعالم ثاني ساعه افكر منو هذا نصر معقوله نفسه الي شفته يمه فوكاها جبير واكرع يخوف اذا عصب دماراته كلها تبين ووجه يصير احمر خفت حيل بس بقيت اطمن بروحي مو هو واهلي ميقبلون امي مجرد كلمه كالتها كامت رانيا اسوي بلغدا شويه ودخلت بنيه تطلع اكبر من رانيا بكم سنه ووراها 3 بنات وولد اصغير سلمت ع عمت رانيا واجت ع امي سلمت واني صافنه عليها سئلت رانيا منو هذه - هذه سلفتي مرت حماي الثاني سند - هذا الي بصوره غير باوعت رانيا ع الصوره وابتسمت وكالت - اي هذا الي واكف - الاصلع مو - هههههه لاا الاصلع الجبير مامزوج حجتها وغمزتلي ومشت للمطبخ فتحت عيوني يعني شنووو نصر هذا المجرم دكيت ع كصتي فوكاها اسمه نصر منين يجي النصر ياخاله وابنج مجرم وبواك وحرامي اسمه عكسه كمت اساعد رانيا وحده من البنات الجبيره جانت تطلع اصغر مني بشويه طبت ع رانيا - عمه اساعدج تردين باوعتلها رانيا وكالت اي تعاي انتي وأنصاف وحده اسوي الزلاطه ووحده تصب اللبن بلكاسات حجتها وهي اصب بتمن بلماعين اجت مرت حماها الاختي وضلت اساعد رانيا لان بعدها جايبه جديد ماخلوها تشتغل بقيت يمهن اسولف واضحك بسرعه اندمجت وياهن حبابات وسوالفهن حلوه حسيت احد دخل للمطبخ وصاح - لج حوري شداسوين شوفي الجبتلج تعاي تعااي هنه جانن 3 بنات وحده اصغر مني بشويه يطلع عمرها 14 ووحده يطلع عمرها 10 ووحده 8 والولد 6 سنوات او اصغر ماعرف بس حلو ومدبدب واني نقطت ضعفي الاطفال اموت عليهم درت وجهي ع مصدر الصوت شفته نفسه هذا الاصلع شايل البنيه الصغيره الي عمرها 8 سنوات ويشاورها وهي تضحك وتكركر من الضحك حجت البنيه الاصغر مني - شنو هاي عمو بس حوراء لعد احنه شنوو - يابويه عيوون لو قناص انتم ههههه بعدين عمو اطيكم انتم هديتكم غير وين بيبيتكم حجاها وصارت عينه عليه عقد حواحبه وهو يباوعلي دنكت خحلانه ودخلت يم امي احس خدودي صارن حمر وماعرف شنو اسوي سمعت صوته يصيح الامه كامت امه اله بقينا يمهم للعصر ورانيا بس تحجي ويا امي ويبسبسن اريد اسمع شي ماكو للعصر وكال ابويه يلا ما خلونا نطلع بس بابا ماقبل يبات وكاللهم ورانا طريق وهم ياله نرجع جنا واكفين بطرمه وبابا يحجي وياهم جانو 3 ولد واكفين رجل رانيا وهذا الاصلع وهذاك الثاني يمكن ابو البنات الكالت عليه رانيا حجه مثنى وهو يضحك - عمي مو ذاك اليوم بتت عدكم اني انت هم بات عدنا اليوم وين اطلعون بهذا الوكت والدرب بعيد - لا عمي بيتنا مناك منكدر وشغلنا غير مره انشاءالله نصر الدين : لعد عمي خلي مثنى يوصلكم ماترجعون وحدكم - لا عمي ماكو داعي احنه نرجع - عمي لو ما عدي شغل جان وصلتكم اني بس هاي هسه راح اطلع وياكم عدي واجب لا تخليني اعوف الشغل واوصلكم - لا عمي هذهو روح الشغلك ومثنى يوصلنا صدك طلعنا بسيارة مثنى اخذنا وابويه كله اتبات عدنا ماترجع بليل وحدك كله الله كريم الطريق كله اباوع ع الشوارع اشبع عيوني يمكن هاي اول واخر مره اجيج يابغداد منو يعرف راح ازورج فد يوم امشي واحفظ كل مكان بيها حبيتها وحسيتها دخلت الكلبي مثل حب واسط بكلبي مثنى الطريق كله يشاقا ويه ابويه وامي كلش حباب وسبورتي بس هو مشكلته يصرف ويبذر هواي وصلنا وبات مثنى عدنا وثاني يوم راح الصبح كاعدين نتريك كلنا حجت امي واني غصيت - ابو عمار البارحه ام نصر كتلت روحها ع نصوفه من شافتها وكالت اذا اخطبها تنطوها ابويه عقد حاجبه كال المن تخطبها ؟؟ - المن يارجال غير الابنها نصر كلتلها اتكبعون وتاخذون انتم ناس ذهب بس غير اسئل ابوها اخوها - بس يامره الولد جبير مو مال عمرها هواي اكو فرق بينهم و - يااا شبيك يا رجال ع كيفك مو لهدرجه هاي وهم كلمه كالوها والناس مايرفضون وويه اختها اتعيش ملكه والعمر مو مشكله باوعلي ابويه وهو يبتسم كال الله كريم خل اصير صدك واسئلو نصوفه وهي صاحبة القرار حجه كلماته ابويه وكام عمار ساكت يباوعلي كرص خدودي وصاح هااا ولج ام اربع عيون كبرتي وراح اتعرسين سنفوره - عماااار حجيتها بغضب وكمت هم عبالهم خجلت بس ضجت شنو يزوجوني لمجرم هذوله شبيهم لازم اكول العمار هذا مجرم وحرامي اكيد راح يرفضو ورضوان اي من يجي يتقدم يوافقون عليه لان زين طلعو كلهم ع الشغل واني هم كمت انضف وبالي مو يمي بس اطمنت من بابا كال القرار الي محد يكدر يجبرني نصر الدين : طبيت للبيت ميت تعب صحت يووم يوم وينج ماكو شفت رانيا مرت اخويه - رانيا وين امي - راحت لبيت سند كرار ابن سند مريض ومكدرت اتعوفه وحده - هاا شبيي - ماعرف يمكن افلاونزا لان ماكل موطه - خوش عفتها وصعدت فوك اتمدتت واجت ابالي افكر معقوله البنيه الي،اجت ذاكليوم ويه بيت ابو عمار جانت اخت رانيا ماتشبهه ابد ولا يمها يجوز كرايبهم لو شي عيونها ماتروح من بالي من دخلت المطبخ وشفتها يم بنات اخوي شلون تباوعلي ماشايفه ضربت راسي ها نصر شو جنك كمت اتبصبص ع بنات العالم يمكن عدااني يامن دخلت للغرفه لبست تراكي ونمت ميت تعب البارحه اليل كله سهران بلواجب كعدت بليل لكيت الحجيه موجوده سلمت عليها وبست راسها وكعدت يمها مرت مثنى 24 ساعه بغرفتها لو طالعه ومثنى مانشوفه غير وكت الاكل والنوم واني شغلي وهي ضاله وحدها مرات انقهر عليها اكلهه روحي يم بيت سند ماتقبل اتكول هذا بيتي ماعرف اكعد اذا مو بي هم حقها وهنا ضاله وحدها كاعد اكل حجت امي وهي تبتسم - يمه نصوري ذاكليوم من اجو بيت ابو عمار شفت بنيتهم الصغيره باوعت ع امي هاي تلميحاتها اعرفها كلش زين - لا يمه ماشفتها مانتبهت عليها تدرين بيه ماباوع - اي يمه ادري بيك شالع كلبيي - له ليش هيج يمه هاي تاليتها اني شالع كلبج - اي شالع كلبي يا يمه شوكت اشوفك عريس ومريتك يمك واولادك بحظنك قبل لا الله ياخذ امانته والله امنيتي اشوف جهالك - يمه شسوين بجهالي هاي اذا صار عدي مو هاي سند حاطلج 4 يخبلون وهذا مثنى هم جابلج ثنين يخبلن اله اني - يمه انت بجري ومن حقي افرح بيك وفرحت جهالك تختلف لا تكول هيج انت سيد الشباب باجر عكبه تكبر منو الك اني مادايمتلك منو تخدمك وتكوم بواجبك نسوان اخوتك لو اخواتك الي كلمن ملتهيه بعيالها يايمه انعل الشيطان وانت بس ااشر اجيبلك وحده اتكول للكمر كوم واني اكعد بمكانك - هههههههه لا يمه لا ماريدها هيج حلوه باجر عكبه تنغر بروحها وتعال يا نصر الدين شيخلصك - هاا يمه هذهو اخطبهااا يعني - يا يمه منو هاي،شبيج مو كاعد اكل ليش اسممين اكلي - لعد شوكت تزوج هااا كافي صار عمرك 35 سنه كبرت يا وليدي واني مادايمه اريد افرح بيك كافي عايش بماضييي - يمه منو كلج عايش بماضييي شهد شلتها من بالي من يوم الي خطبتها ورفضت ومافككرت بيها بس يايمه كرامتي ماتسمحلي ازوج بعد الاهانه الي اكلتها من عدهاااا - والله انت عكس الناس يعني ماتكلي غيرك من سمع كلامها الشهد من ثاني يوم يزوج اله انت صالك سنين ماتقبل يمه اكسر خشمها لشهد واثبت للعالم والها انت مو مثل ما كالو عليك وتكدر اتخلف عشره مو واحد -اهووووو يا يمه يعني ما ارتاح ماا استقر يعني لازم تسمميني بكلامج كم مره كتلج ماريد اسمع هذا الكلام كم مره كتلج اسدين هذا الموضوع وماتفتحي واني من اريد ازوجج اجي واكلج - شووكت ماتكلي شووكت من تدخل الاربعين لو الخمسين وشكو وحده مطلقه لو ارمله تاخذك وتبقه تتشمت بيك شهد وغيرهااا - يمممه - وغمممه من الله ياخذني واخلص عليمن عايشه اني عافتني وكامت واني النار بصدري عفت الصينيه وطلعت شفت رانيا بلمطبخ عرفتها سمعت كلشي عفتها وطلعت للحديقه كعدت ادخن واحس شياطيني كلها متربعه براسي وافكار تجي ببالي بس الله يعلم بيها لا اني المرتاح ولا اني المامرتاح اااخ ااخ منج يا شهد غمضت عيوني واني ادخن اذكر كلامها الي من رحت اخطبها جان عمري بوكتها 26 سنه جنت احبها من اني وصغير وماصدكت اتخرجت حته ادز اهلي يخطبوها بس الصدمني رفضهاا واني ابن خالتها ومو بس هيج ابوها يصير ابن عمه الابوي يعني مثل عمي وهي بمثابت بت عمي هم الجرح الي نبت بكلبي بهذاك الوكت ماانساه للموت جنت اعشقها وانتضرها تكبر يوم يوم حته اصير ببيتي ومن خطبتها وكفت كدام امي وبصاله وصوتها وصل الي - شنو خاله اني شهد ازوج نصر لا خاله لا ماريد شناقصني وازوجه النصر وبعدين اني ع علاقة واحب واحد وياي بجامعة وينتظر الوكت المناسب حته يخطبني عذريني خالتي بس نصر الدين كلنا نعرف بي من يوم الحادث الصار يعني عذريني خالتو بس هذه الحقيقه يعني نسيتي كلام الدكتور من كال نصر ميكدر يخلف بعدد يعني عقييييم واني ماناقصني شي من حقي ازوج واخلف ياخالتي ترضيها ع بتج يعني تزوج واحد عقيم ردت امي وبصوتها الحزن والقهر - مشكوره يابنيتي هاي انتي بت خالته وبت عمه هم هيج عيرتي هو لو ما الحادث الصار جان حاله من حال كل شاب واصلا كلام الدكتور جان 60% ومو اكيد عقيم يكدر يتعالج ويخلف وهو يحبج - اسفه خاله بس اني مااشوف نصر غير اخويه عذريني ماكدر حته لو ماكان اكو احد بحياتي منو يكول يكدر يتعالج واني اريد اصير ام حالي من حال البنات - مشكوره بنيتي ماقصرتي اطيتيها بوجهي وماجذبتي وانشاءالله ابن الحلال الي تحجين عنه يجي يخطبج ووتعيشين حالج حال البنات طلعت امي بوكتها والدموع اتلالي بعيونها اشرت الها تسكت وعرفت سمعت كل حرف كالته النار الي جان بداخلي بس الله يعلم بيها بهذا الوكت اهانتها الي وكلامها خلاني اكره روحي ميت مره قبل لا اروح اخطب شهد بسنه صار وياي حادث ومن يومها الدكتور كال اكو نسبة 60 % المريض يصير عقيم حاولو اسفرو وتعالجو كلام الدكتور الي ماجنت اعرف بي غير بعد اشهور من الحادث هواي حاولت اتعالج بس جان الوضع مايساعد اسافر واترك اهلي بوكتها الطائفيه والسقوط صاير امريكان بكل مكان مكدرت اترك اهلي واسافر كلت من اخطبها اخذها واطلع بره واتعالج بس مااصورت ولا اتوقعت راح اسمع الكلام الي سمعته من عدها من يومها واني كرهت الزواج وعزلت عن الزواج جان هذا الموضوع اكثر موضوع ينفزني ويموتني قهر واموت الف مره بليوم بمجرد ما اذكر حالتي سافرت اني وسند بعد ماهدت الاوضاع وكدرت اتعالج والدكتور بشرني بنجاح كلشي بس بقه الخوف بداخلي خايف من كلشي لهذا جنت اكره سالفة الزواج وماحب احد يفتحه كدامي واعصب من واحد يكلي ازوج صح اتعالجت بس اكو خوفه بداخلي وهذا الشي صار من وره شهد وكلامها كرامتي خسرتها وانهانيت بما فيه الكفايه ماعدي الطاقه بعد حته انهان اكثر خليني هيج مرتاح عاقبت روحي بشخصيتي البنيتها من جديد من كلام شهد وكدرت اكون روحي مو بس شخصيتي لا حته شكلي غيرته من زينت شعري صفر وبقيت هيج اسنين ماريد ارجع نصر الدين القديم الي انهان من حب حياته انصاف : جنت كاعده بلغرفه وسمعت امي تحجي بتلفون كمت سمعتها تحجي ويه رانيا صوت تلفونها عالي كلش يعني كدرت اعرفها رانيا من صوتها بس مااميز الحجي زين من وره السماعه الي ملفوفه بتيت الف لفه اله اتقدم بقيت واكفه اسمع امي اتكلها - يعني شنو ولج مافهمت عليج مايردوها الاختج ياا وليش مايريدها شنو شناقصها انصاف ويرفضها هذا حماج مغرور وشايف روحه بس هو مفهمت قصدج روينه شنو يعني اتخلي يوافق - اتقدمت اكثر حته اعرف رانيا شتحجي ويه امي سمعتها اتكول - يمه اذا نصر ازوج اني انتهي تدرين عايشه بفلوسه وكايلتلج بس اذا تزوج انصاف هاي اختي اكدر اقشمرها بحجايتين وانعيش اني وياها اميرات بهذا البيت اذا ازوجها ومحد يكدر يمنع نصر اني خايفه اذا ازوج مرته هي الي اتمنعه ويجوز حته من البيت تطردنا بس اذا جانت انصاف ماسويها لان كلبها طيب واختي - بس يايمه شلون راح اتخلينه يوافق وانتي هسه كلتي ماقبل من عمتج فتحت الموضوع وياه - ماعرف ماعرف بس لازم بكل الطرق انحاول انخلي يوافق يزوج انصاف باي طريقه عوفيني هسه افكر وبعدين اكلج سدته امي واني ركضت للغرفه خايفه شراح اسوي رانيا راح اتخرب حياتي اتريدني ازوج مجرم يممه هاي مو صاحيه زين واني مااحبه شلون ازوجه لا لا هاي رانيا اتخبلت احسن شي اخابرها واكلها اني احب رضوان واريد ازوجه ايي احسن حته اتبطل ماا ازوجني غصب اني ما احبه لرضوان بس مجرد اعجاب لسه ماوصل مرحلته الحب بس ماريد هذا المجرم اخذت تلفون امي من طلعت تخبز وخابرت رانيا واديه كلها ترجف ردت وعبالها امي - ها يمه مو كتلج خليني افكر - رانيا اني انصاف - ها صوصه شبيج محتاجه شي - اي - شنو فلوس لو ملابس لو شنو - لا محتاجه حياة - شنوو شبيج ولج مصخنه شاربه شي، - سمعي رانيا اني ماريد حماج اني احب رضوان هذا الي بمنطقتنا الي يشتغل ابوي ببستانهم وهو وعدني الشهر الجاي يجي يخطبني حبابه لا اتخلين حماج يقبل بيه - شنووو شنوو ولج شتحجين انتي من كل عقلجج - اي من كل عقلييي سكتت شويه رانيا واني افتر خاف واحد يطب للبيت ويسمعني وارجف سمعتها كالت - سمعي نصوفه شوفي هذا واحد ملعب وجذاب - لاااا مو جذاااب كال الشهر الجاي ادز اهلي - لج يجذذذب شوفيي تذكرين من جنت بسادس وعدي صديقه اسمها رسل - ايي - اي رسل هم مثلج اجاها رضوان وكاللها احبج وراح ادز اهلي واليوم وباجر واليوم وباجر ومادز لحد ما ضحك عليها وجان دائما يشوفها ويضل يسولف وياها واخر شي ضحك عليها وخطيه اهلها كشفوها وزوجوها لابن عمها سسمعي مني نصوفه ترا رضوان اكبر جذاب وملعب لا اسمعين منه ابد وبعد اذا شفتي كولي العمار زين وترا نصر ماتلكين مثله لج اتعيشين امييييره والله فكري زين وبعدين احاجيج - سدته من عدي وعافتني مصدومه من كلامها ششنو يعني رضوان جذاب مايدز اهله بس يريد يضحك عليه ليش شسويتله وهيج يسوي خلص همزين ماحبيته ومجرد اعجاب بس الحمدالله شكد حقير لعد هو اصلا مو صوجه صوجي صدكت بي وادري بحظي اني يعوف بنات المنطقه يخبلن جمال وفلوس ويجي الج انصاف بقيت كاعده افكر زين اذا ازوج هذا الاصلع اخاف خاف يكتلني مثل ابو المحل اوف ياللهي زين هو جبير اذا اجه بكبر عمي شلون ازوجه وهو جبير عليه وين العدل مو من حقي اخذ واحد عشريني وبعمري مو واحد بعد كم سنه يدخل الاربعين اهمده حظج انصاف هاي تاليتها هم مجرم وهم شايب وهم اصلععععع كعدت ضايجه طلعت دفتري وكمت اكتب خواطر بدفتري احب اكتب الخواطر ماعرف من اضوج اطلع دفتري واكوم اكتب شنو يجي ع بالي ويصف حالتي دخل عمار شافني ضحك جنت لابسه مناضري وحاطه الدفتر واكتب من شافني كال هلا بشاعرتنا شلونها - يا عمار سويتني شاعره ههههه لك مجرد خواطر مو اشعار ههههه - عادي يااختي يلا ام الخواطر اسفين شكو ماكو امي وين - بوره البيت تخبز تلكيها وين يعني اا عمار اريد اسئلك سؤال - كولي نصوفه - ئئئ شسمه شوف هذا الي حجت عنه امي حماها الرانيا شيشتغل - هاا بده التحقيق ولج هههه مو جنج ذبيتي ميانه وياي - ياا هسه اني شسئلت وخر زعلت - تعااي اشااقه وياج ولج شوفي هو محد يعرف شغله لان حساس بس اهله وناسه فتحت عيوني عزا بعيني هذا صدك طلع مجرم مادام شغله سري - اييي كمل شيشتغل - شبي وجهج اصفر ولج ههههههههه لا تخافين ما يسويلج شي هو ضابط استخباراتي ملازم اول وشغله حيل حساس دائما تلكي بمكان لان يعتمدون عليه هواي هو وصديقه لان يحبون شغلهم - فتحتت عيوني مصدومه ضااابط واستخبارات صخام عمار يحجي واني صافنه عزا بعيني شكد اخذت غيبته لعد اني ياربي سامحني مو قصدي والله اكيد جان بشغله اوف يا حظي سامحني ياللهي هسه لازم اخلي يبريلي الذمه لان حرام حجيت عليه وهو ميدري عفت عمار وبقيت صافنه يعني مو مجرم بس يخوف هسه لو ما اصلع خوش بس صلعته تخوف ولحيته وشواربه كلها بجهه وصلعته بجهه مرت ايام وامي اشوفها تحوص ومدري شبيها احسها خايفه وراها شي لحد ما فجئه اندكت الباب طلعت امي تفتحه لكت رانيا استغربت شعجب جايه وماصارللنا هواي من جنه عدهم ذبت بناتها عليه وبقت هي وامي يدردمن واني العب ويه رزان وغزل واشاقه وياهن رزان عيونها ملونه مدري عليمن طالعه محد عدنا عيونه ملونه بس هي الخبيثه هههه صارت طفر عدها صرت اعضعض بيها وامي ورانيا من اجت لسه بلغرفه وسادات الباب عليهن كمت سمعت امي اصيح ع رانيا - شتحجين ولج لالا رانياااا فكرتج اتخوف خاف يجي يوم وينكشف كلشي - يمه شينكشف ماكو غير حل محد يعرف بس اني وياج هسه كومي كومي لبسي عباتج خل نطلع يلاا شويه وطلعت رانيا و اجت يمي تحجي نصوفه قررتي مو - باوعت عليها وسويت روحي مافهمت عليها وشويه شغلت الغباء عدي شنو شقرر عليمن دكت ع كصتها وكالت شبيج لج ثوله ع نصر حماي باوعت عليها وكلتلها شبي حماج - لج راح اكوملج والله شهلغباء هذا - يا غباء شبيج والله مدافهم - دولييي غاسله ايدي منج انتي ثاني يوم يرجعج ع اهلي اذا اخذج نصر غير حجتها ودك تلفونها ردت شفتها انخطف لونها وكالت - ليش شكووو مثنى يااااااا صدك تحجي يلا انشاءالله مابي شي خوفتني عبالي نصر بي شي يلا مع السلامه الله وياك سدته وباوعتلها اجت امي كالت شكو ولج شبيج - ماكو يمه بس حماي نصر حجت هيج وباوعتلي باوعتلها شبيها هاي تباوع عليه ياا اليشوفها يكول عدي علاقه ويه حماها رانيا مو خاليه ابد حجت امي وهي خايفه - شكو ولج شبي حماج - مابي شي يمه صديقه يامن مسوي حادث وملتهين بي من دكيت علي مارد هسه خابرني - خطيه الله يكومه بسلامه شويه واجت امي كالت اني واختج طالعين عدنا شغله مانطول ديري بالج ع بنات اختج فاهمه حجت هيج وطلعت هي ورانيا وبقيت اني وبنات رانيا بلبيت ……… يتبع ،،،،،،وتستمر الحكايه ،،،،،،، قرائه ممتعه توقعاتكم للبارت القادم تصويت وتعليق حبايب كلبي تفاعلكم وينه ياهل الغيره وينكم مختفين اريدكم اطلعون افكاركم وتوقعاتكم شيصير ههههه #نور الشمري #نوشة صور # قلبان يجمعهما السحر السلام عليكم حبايب قلبي هواي طلبو مني صور مقربه اللابطال ومثل متعرفون طريقتي بكل قصة انزل صور مقربه للابطال ماعدا قصة مابين الحب والنهوة المهم اليوم جبتلكم صور مقربه الهم حيل تعبت بيهن أول شي نصر الدين الصلعه 😁 أهم شي واللحيه والشوارب تشبه اللي بصورة بالضبط بس نصر الدين شوي أسمر   إنصاف ما تعبتني لأنها تشبهها حيل ههههه بس بطلتنا لابسة نظارات طبية  يامن الي خبل نص البنات 😂😂  جوري  رانيا  شنو اكثر شخصيه حبيتوها وشنو اكثر شخصيه كرهتوها ؟؟ #نور الشمري #نوشه التعديل الأخير تم بواسطة لامارا ; 30-11-20 الساعة 04:01 PM | ||||
|
| |
|
30-11-20, 03:12 PM
| #6 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قلبان يجمعهما السحر #البارت الرابع #نور الشمري (#نوشه) #صدفة.. وعثرت عيوني على عيونه.. شحچيت وحبتك روحي؟! شگلت يمي ونسيت الدنيا وجروحي؟!❤ انصاف : بقيت كاعده العب البنات وهنه ماكو وين راحن هذني نيمت زران الي بقت بس تبجي ماعرف شبيها كوه نيمتها طفله بعدها ماصاللها هواي وامها ماكو عنها اخ منج رانيا باوعت غزل تلعب بلطحين لج غززل اكعدي خرب بحظي المزنجر لج غزل ماكدر اكوم حاطه رزان بحظني ونايمه وبس احركها تكعد صارت الدموع بعيني شهلورطه الي وكعت بيها اني كامت غزل اطلع بلطحين واطشر بي ع روحها اجت تزحف وتمسح ع راسي وع وجهي واتكركر ضحك واصيح - هيئئ صوص ثاثت ثني ( صوصه صارت جني) لج غزززل راح اجيج احجي وصاكه ع سنوني لا اكدر اصيح ولا اكدر اكتلها وهي تضحك فرحانه حطيت رزان ع الكاع خل تكعد بس خل اربي هاي الخبيثه الي مامتربيه ركضت وراها وهي تضحك وشالت طاسه بيه طحين وشمرتها عليه اجت برجلي صرخت الطاسه حديد اتوجع كعدت رزان تبجي وهاي تضحك عليه الدموع صارن بعيني لجججج غزززل اني الج والله امج عافتج وطلعت بت امج انتي تعالي ليه صرت امشي و اعرج عليها وهي تضحك شلتها واني خازرتها وهي تضحك خزرتها سكتت باوعتلها مخنزره ماكدر امد ايدي عليها كلبي ميطيني عطت عليها بعد ماحبج ولا احجي وياج روحي يلا نزلتها وهي نزلت تزحف وتباوعلي وادردم مدري شتحجي بس سمعتها اتكول - اثول الصر حليث (اكول النصر عليج ) باوعتله بنص عين اي مسبعه بعمج هذا الاكرع روحي روحي خايفه منج عود عفتها وهددتها توصل للمطبخ بعد ورحت الرزان الي شبعت بجي سكتتها ورجعت كوه نيمتها مرت ساعتين وطبن امي ورانيا وجهن مخطوف اصفر خايفات باوعتلهن بنص عين وهمستلهن - شبيجن وجهج اصفر شنو لحكجن جلب ردت رانيا عليه بسرعه - اي اي لحكنا جلب وكوه شردنا منه اله شويه جان وصل النا ضحكت عليها وطبت امي للمطبخ واخترعت عاطت بعلو صوتها - لججج انصاااااافوووو هاي شنووو رفعت ايدي بعلامة الاستسلام مستسلمه واشرت ع غزل والله يا حبيبتي يا امي الغاليه هاي حفيذتج اني مو خدامة رانيا وبناتها تطلع وتفتر وتعوفهن ع كلبي هن بنات لو شياطين مخلفه بتج وحده بس تبجي ووحده كلبت البيت بطحين وبس تضحك مكيفه سكتت امي وماكدرت تحجي بعد وبقت اتخنزر عليه عبالك اني الي كالبه الطحين شمرت رزان ع رانيا وكمت للحديقه شفت جوري من السياج اشرتلها تجينا صدك شويه واجتي اخذتها وطلعت بلحديقه ضايجه - شبيج ضايجه هم شفتي لهذا النسونجي رضوان - لاااا مو عليه عشتو بس اكو سالفه مدوختني - شنو احجي شبيج - شوفي هذه حماها الاختي يردوني ازوجه - حلووو شيشتغل شيدرس وين بيته و - جورييي خل اكمل شبيج ملكفه - سكتت سكتت هههههه كملي وشبي ابن ادم ماعاجبج - مو ما عاجبني بس يخوف لج جوري اخاف منه وجبير عليه اصوري عمره بثلاثين حيل جبير ضلم والله ازوج هيج واحد وين صايره واني عمري 16 بس وهو بعد كم سنه يدخل الاربعين - يعني انتي خايفه بس من عمره عادي شنو بي واذا جبير - حته شكله يخوف ومو بس شكله شغله هم - ليش شبي شكله وشيشتغل - مابي شي بس يخوف وشغله ماكدر اكول سر - اوووي صارت اسرار بعدج ماازوجتي ولج وبعدين شنو مابي شي ويخوف انتي شاربه شي مصخنه وكامت جوري اشم بيه و اتحط ايدها ع كصتي وتباوعلي خزرتها ضحكت وكالت - دوختيني والله هسه شتردين بضبط هههههه اتكولين يخوف ومن اكلج ليش اتكليلي هيج بس يخوف مو ثاحيه انتي كلشي ماريد ولي يلا هو صوجي حجيتها وبجيت ماعرف شبيه ع ساعه ضجت بمجرد ماذكرت هذا الاصلع وكمت ابجي بدون سبب حته شبكتني جوري وعبالها اهلي جابريني عليه وهي متدري حته هو ميريدني واختي وامي دايخططن حته يلزكنني بي ماكدر اكول هلكلام صعبه عليه اكول امي تريد اذبني هيج هي واختي بس علمود يزوجني بقيت ساكته وابجي بحظنها وهي تمسح ع راسي - شوو وخري شو ولج انتي حيل صايره حساسه مجنتي هيج وين انصاف المرحه المايهزها شي والظحكه مرسومه ع وجهه 24 ساعه باوعتلها وبرطمت كفختني ع راسي وكالت - لج هسه عوفي لهذا شسمه بلا - مدري يمكن نصر باوعتلي بنص عين وهزت ايده وهي تقلدني - مدري يمكن نصر اهمداج انصاف حته اسمه متعرفي لعد شتعرفين عنه متكليلي شلون زواج هذا اكص ايدي اذا مارجعج هههههه - شقصدج لجج جوري انتييي حقيره ولي اطلعي يلاااا صوجي احجي وياج والله صوجي - ههههههههه رايحه بس مو تنسين وماتعزميني ع العرس اريد اهز جتف شعر بلكت اشوفلي عريس واكدر اخلص من الخامس النقمه راحت وهي تضحك بقيت كاعده واحس روحي راح انفجر من وره تصرفات رانيا وامي دخلت جوه واني اشوف امي تعجن ورانيا حاطه اظافرها واصبغ بيهن وبتها تبجي ولا دايره الها بال شلون صارت ام مااعرف اخذت رزان اسكت بيها وهي بس تبجي اخذتها وكمت العب وياها بللعاب هي وغزل العب بيهن وعيني ع رانيا الي مااجت ولا باوعت ع بناتها شبيهن مابيهن نصر الدين : كاعد بسياره ادخن واباوع ع البيت الي صارللنا اسبوع انراقبه كلشي ماكو دك تلفوني باوعت يامن صالله يومين من طلع من المستشفى وكاعد بلبيت ابن الحلو لا شغل ولا تعب - ها شتريدد - وين انت نصر - بجنه ويمي حوريات ااخ لك يموتن مكانك فارغ اذكرتك والله - عليك الله صدك تحجي اطيني العنوان جايك اني - يلا راح ادزلك ياه برساله واني انتظرك سديت واني اضحك عليه اريد اروح للبيت اسبح انام ميت تعب من البارحه اني هنا وهذا مايجي لو اخابره لو مدري شكله مايجي ادري بي بس اكله بنات هسه يجي يركض شويه وطبكت سيارة يامن وره سيارتي نزلت وهو نزل يضحك يامن : ها ابو البرهوم وين الحوريات بداعت الخوه ولك عفت مرت ابوي اصيح لان ما اسوكت واجيتك - صدك حذب تدلل انت مو حوريه حوريات اكعد بسياره وباوع ع هذاك البيت اي حركه خبرني لو خبر العقيد حسين وهنه الحوريات يجنك يلا ثيمالاه عفته صافن ع البيت مايفتهم شي ركبت سيارتي وطلعت لبيتنا واني خربان ضحك ع يامن وصلت للبيت دك عليه - هاا ولك شنو اكو جديد احد طلع - لك نصر اني الك والله اني الك تضحك عليه مووو قشمر كدامك موو بسيطه شووف منو يوكفلك بعد تنسه صديق اسمه يامن عدك واني الك بسيطه - ههههههههههههههه اي وماوصيك عود نام وعوف البيت اخذلي غفه وبليل اجيك يلا حبيبي الله وياك سديته وهو يغلط هستوه ياله وصلتله السالفه ههههه خرب بيومك يامن البيت هدوء لان عيال مثنى مو هنا من يرحون يصير البيت هدوء ومو حلو متعود ع خباثة غزل ووكاحتها واطنش رانيا وصياح امي ع البنات ههههه نمت وكعدت ع صوت التلفون باوعت الساعه 9:20 حيييل شكد نايم اني 20 مكالمه من يامن دكيت عليه رد بسرعه - وينك انت اي حقك نايم ومحد يمك ويزعجك عود ردت اكلك كمشنا الجماعه واجه العقيد حسين وسئل عليك كتله نايم وراح تتعاقب تعال هسه للدائره عدنا مهمه ياغدار - هههههههه عادي عادي المهم نمت وشبعت نوم ولو بعدني منعس بس ميخالف اكو من يوكف بمكاني اذا تعبت موو ما وصيك سديته من عده وكمت لبست ملابسي وطلعت لكيت همسه بت سند الجبيره عدنا يلا خوش حته امي مضل وحدها عفتهن وطلعت اخذنا المهمه اني ويامن وطلعنا بسيارته باوعت عليه - وين رايحين الله وكيلك كلشي مفهمت هذا الرائد الجايبي جديد مدري شلونه - مو انت مو يم هاي السوالف لهذا مافهمت اكو حفله لواحد من تجار بغداد وشاكين راح اصير صفقه ممنوعات بيها و تعرف الباقي ماكو داعي اكمل - وصلت وصلت بس شلون ندخل اكو بطايق شي - نصررر بعدك مطفي من النوم يمكن لعد شلون ندخل اذا ماعدنا بطايق زين هذني الي اطاهن الرائد شنو بشرررفك انت صاحييي - لك والله ميت نعس انجب وسوق وعوفني مطفي وعايش بعالمي باوعتله هز راسه ماعاجبه ضحكت عليه دخلنا للببيت بصفتنا زبائن واسماء وهميه شايلين بقيت اراقب الوضع شكيت الصفقه راح اتكون المسؤله عنها بنيه لان اغلب المعازيم رجال واكو كم بنيه باوعت ع يامن وحجيت يامن راقبلي هذيج ام الاحمر واعرفلي عنها كلشي واني راح اشوف هذاك صاحب البيت - مال هسه ابوسك ع هلمهمه تدري بيه اني رقيق كدام هاي الكائنات الي خالقهن رب العالمين كائنات رقيقات حساسات اتحس حته من يمشن ع الارض غلط مهمتهن هي يطيررررن ونحقق كل احلامهن احنه الرجال باوعتله صفح - اييي ايي عفيه عفيه شهلذكاء الشايله انت يعني انت رقيق احنه شنو ذنبنا نتورط بكلامك ورقتك ابن الحلووو يريد يورطنااا ورط روحك مو تجمع الكل وياك - ههههههااي لك انت من هاي ضايج ياله سهله كل الرجال ماعدا نصر الدين لك باوع باوع شلون تمشي لك هاااي النسوان هاي الكائنات الرقيقات موو الي تريدني مرت ابوي ازوجهه - ليش شبيها الي تريدك خاله سعديه تزوجهه - تريد الحقيقه لو اختها - داحجي لك فضها عطلتنا - والله تريدني ازوج وحده اتكول عبالك انت نصر الدين لابس باروكه شعر عبالك عفريت واتريد اعوف هاي الحوريات -لككك شقصدكك ياامن - لالالا ماقصدي شي شبيك اني كلت هيج ع جمالك ولان االبنيه حلوه مثلك شبهتها بيك شبيك عصبت ترا مو قصدي انت مو حلو هي بس صلعتك اتخلي البنات تشرد منك ههههههههههه مو بعد تعقد حواجبك واتعصب افلتتتتتت - حجه هيج وشرد راح اني اعلمك يامن اسويها وحده بوحده موو شلون خليته اليوم بمكاني هسه هو هم انتقم مني بس بطريقته الخايسه كدرت اجمع المعلومات واعرف الصفقه وين اتم وجان شكي بمحله البنيه الي دزيت يامن الها هي الي راح تستلم الصفقه دزيت رساله للفريق الموجود براس الشارع حته يتحضر وصدك وكت استلام الصفقات دخلوو اخذوهم وطلعو يامن : يلا نصر اني راح احقق ويه حبيبتي ااقصد ويه نرجوسه ام الاحمر هههه غمزلي ومشه شايف هتليه بس مثل يامن هتلي ماشايف فظحنا بنص الشباب عفتهم ورجعت للبيت محد يعرف شغلي غير بس اهلي وكم واحد قريب عليه ام اهل المنطقه الباقين حته كرايبنا عبالهم اشتغل ويه سند بمحلات الوالد مرت ايام اجت رانيا مرت مثنى وشعوذتها اقصد بناتها صارت عدي مهمه اكو ارهابي شاكين بي موجود بمطقه ولازم نتاكد بدون ما حته انذي او انشكك الناس،بينا وهيج مهمه يرادلها وقت مو يوم ويومين وصعبه اطوني بيت وسكنت بنفس المنطقه ع ان مستاجر جديد بلمنطقه وصرت قريب منهم يامن جان يجيني دائما وازوده المعلومات لحد ما فد يوم جنت واكف ببلباب واكو سياره بيك اب دخلت الشارع وكفت كدام بيت البيت جنت شاك بي 40 % وهسه صارت 70 % هم المطلوبين بس الي صار صدمني واكدلي شكوكي انصاف : اسبوع ضلت رانيا عدنا واشوفهن دائما يطلعن هي وامي ساعه ساعتين ويرجعن وجهن مخطوف ضجت وطكت عدي رحت الرانيا وحجيت وياها واني افور نار - رانيااا شتخططين انتي وامي هااا كتلجن ماريد ازوج ماريدددد - انصاااف انجبي ومالج دخل احنه اعرف بمسوليتج انتي بعدج صغيره وماتفهمين كلشي شوفي اذا بعدج تحبي لهذا العار رضوان والله اكول العمار يصرف واخلي من صدك يروح يكتله واصير مشاكل ماله اول انجبي وكعدي وسمعي الكلام كل الي انسوي علمودج علمود يكون الج مستقبل حلووو تتصورين منو ياخذج وانتي ماعدج شهاده هااا تتصورين هذا رضوان ياخذج وهوو اكثر شاب بلمنطفه حلو وزنكين ويجيج الج لو تتصورين اتحبين واحد واتعيشين قصة حب وانتي باب الشارع ما اطلعينها اذا مو امي وياج وللضروريات هم الله وكيلج هسه بس يصير عمرج 18 شكو واحد ملطلط طايح حظ لو فقير وع كد حاله يجي يدك بابج متحصلين هيج فرصه وين تلكيها بيت ورجال الكل يحلف بي ونسب وعائله وفلوس ودنياااا كلششي حته اخلاق لج امي مستعده تطيج اليوم قبل باجر الاي واحد يخطبج وتقنع ابويه حته لو جان مكطوع من شجره بس علمود اتخفف من المصروف سمعيني حبيبتي نصوفه ترا الناس وحوش ومحد يرحم احد اذا ضليتي هذا ماحبه وهذا جبير وهذا يخوف وهذا مدري شنو تعنسين واضلين علج بحلك الناس وهنا الناس ماترحم لج تعاي لبغداد وشوفي العيشه بيها محد يكلج ع راسج ريشه اتعيشين براحه وجاه وخاصه نصر يدللج دلال عمرج ماشايفته واذا جبير شنو يعني مو هاي رغده اختها الرسل صديقتي ازوجت واحد جبير وعن حب وهو اكبر منها ب20 سنه وهذيج وياها عايشه احلا عيشه العمر مو دومه مشكله ازوجي واذا ما ارتاحيتي وعد مني اني اذا مارتاحيتي بزواجج اني اطلكج واوكف وياج وحته ارجعج للدراسه بس صدكي ماراح تندمين ابدد - بقيت صافنه ع كلام رانيا قنعتني وبعد ماعدي اي سبب للرفض هزيت راسي الها بلموافقه وهمست الها - بس هو ماقابل سمعت امي وهي اسولف وياج مايقبل يزوج - مالج دخل عوفيها عليه هسه ارجع وافاتح عمتي ويومين وارجع اخابرج واكلج نصر قبل بعد هزيت راسي الها وهي كامت اخذت بتها اترضعها واني حايره معقوله راح اصير صدك وازوج هذا نصر مدري عصر ليش ماخلو صبح انصاف مو جنج كمتي اتحششين هواي انجبي واسكتي بيومها رانيا رجعت للبغداد وامي فرحانه بس اكو خوف بعيونها من اباوع عليها الشي الي فرحني بهلايام هو عمار واخير لكه شغله دائمي بشركه بس شويه بعيده يعني يطلع من الصبح وما يرجع لل 12 بليل وبس الضهريه يجي ساعه ويرجع وبابا بقه وحده بلبساتين ويتعب هواي كمت اني اشيل مسؤليت بستانا واسقي واهتم بي حته لا يتعب ابويه من يجي من الشغل من يشوفني هيج يمسح ع راسي وهو فرحان عمار الفرحه بعيونه اتلالي لان واخير راح يعتمد ع روحه بشغله الخاص مايبقه من بستان للكوفي ويه ابويه و صديقه مرت يومين ورانيا ماكو اعرف مستحيل يقبل حماها لان مبين شخصيه قويه ومستحيل يسمع الكلام بسرعه بس الصدمني خابرت رانيا بليل ع امي تحجي وتبجي وامي تتوسل تحجي لج شكو شبيج شفت امي لطمت ع صدرها وكالت سوده بوجهي ولج لا بس من الي سوينااه ردت رانيا عليها بس ماعرفت شنو رجعت امي جاوبتها لعد شبي ولج ياااا مايستاهل هسه يجي ابوج واخلي باجر نجيكم خوش خوش ماصدكت امي سدت الخط ركضت الها شكو يمه شصاير - اااخ يايمه شلون حظ عدج انتي نصر حماها الاختج مصوب وهسه بلمستشفى باوعت ع امي حطت شيلتها ع وجهه وصارت تنوح وتبجي ومااصدك شوكت يصبح الصبح وتروح للبغداد واني صافنه عليها عبالك رجل بتها مو حماها الابتها شويه وطب عمار من شاف امي هيج اخترع اشرالي شكو رفعت اجتافي بمعنى مادري اشر الي وطب للمطبخ لحكته - اليوم جاي من وكت خير - المدير عنده فاتحه وسدو الشركه حداد شكو شبيها امي ليش هيج عبالك ميت الها واحد - ضحكت من كال هيج امك بعد ماتدري بيها هذا نصر مدري عصر مصوب وبلمستشفى وكلبتها مناحه وكل مشوفني وكالت ااخ من حظج يايمه ولا كاعد هههههه - هههههه هاي صدك تحجي امي وهسه شلونه نصر خو مابي شي - مدري ماعرف بس العرفته مصوب لو بي شي جان لكيت امي ببغداد من زمان هههه لا تخاف كلشي مابي هذا الاصلع عصر - ولا تبطلين سوالفج انتي بابا الرجال بين الحياة والموت وانتي كاعده تحششين عليه بطلي هاي سوالفج اتعلمي من امج عبالك خطيبج وبعد محد يجي يخطبخ بس هو وخايفه لا يروح ههههه وكاعده اتنوح ع حظج - باوعت عليه وسويت روحي ابجي اهئ اهئ اي والله بعد محد ياخذني راح اترمل يلهووي حظج اسود يا انصااف -طاااحظج هههه لج ماعرف انقهر ع الولد مدري اضحك من وره اسوالفج عيببب ولجج مو اني كدامج احتراميني شويه حجه هيج وضربني ع راسيي وكال - هنا عقل لو شنو اذا اكو غير شي ونايم كعدي خل يفكر اشويه ما تعب من الكسل والخمول وبعدين وخري خل اخابر مثنى واشوفه فشله صفنت وعطت عزااااااااااا ولك عمااار حباب خابر وشوفه لا بس مات لا يالله لا كلشي ولا مات وهو ما باريلي الذمه سوده بوجه عمتي خرب بحظيييي شلون نسيت انييي يبووو باوعلي عمار صافن ويهز بيده ويصيح ولج اني كتلج كعدي لهذا النايم براسج مو تطي جرعة فاليوم وترجعي ينام و يكوم يمسلت شبيج كمت اتمسلتين وبعد ماتدرين شسوين شنو يبريلي الذمه شنو عمتج وين عدج عمه واني مادري عدنا عمه عافني وطلع يهز بيده واني صفنت لا يالله ماريد عدي ذنب اريد ادخل الجنه وهذا غيبه يالله والله اريد ادخل الجنه لا تخلي يموت قبل لا يبريلي الذمه عليك الله شنو عليك الله هاي شبيه اني استغفر الله استغفرالله كمت اتوضيت وفرشت سجداتي وامي تباوعلي مستغربه صليت اله ركعتين وكعدت ادعي مابي شي وسالم ويكوم بسلامه علمود يبريلي الذمه اريد ادخل الجنه اخاف من الناار يممه واحترك يمه لا ياالله والله ماعيدها بعد ولا احجي عليه التوووبه خلصت ولميت سجداتي اجه ابويه وعمار خابر مثنى وكاله مابي مجرد اصابه طفيفه انشاءالله باجر انطلعه صدك ثاني يوم راحو امي وابوي لبغداد وبقيت اني وعمار عمار راح للشغل واني بقيت بلبيت شويه واجت جوري وامها يمي لان امي موصيتهن بيه خابرت عمار كال خابرتهم واصلين ومطلعي النصر والحمدالله مابي شي ارتاحيت وبقيت كاعده ويه جوري ووامها سويت غدا وخلصت طلعت انضف الحديقه شفت رضوان باوعلي بغضب وصاح بصوت عالي تعاااي خفت وباوعتله بخزره رجع عاط مو وياااج تعااي خفت لا خاله ام جوري اشوفه واتروح اتكول الامي واصير سالفه مشيت بتجاهه وباوعتله خزرته وحجيت شتريددد هاا انت ماتستحي ماعدك اخوات - لججج لا تخبليني ذاكليوم امج كايله لنسوان المنطقه انتي مخطووبه المن مخطوبه هااااا اضحكين عليه انتييي وتردين ادز اهلي حته يتفشلووون - شنو اضحك عليك شنو مخطوبه شبيك انت صاحي تعرف هذا كلامك الي تحجي شنو وداثمنه لو لا - ايي اعرفه كلششش زين شنو واثمنه بس انتي وحده حقيررررررره اضحكين عليه وانتي مخطوبه بسيطه يا انصاف بت ابو عمار بسيططه اذا ماخليتج تبجين دممم مايطلع اسمي رضوان حجه هيج ومشه واني صافنه هذا شبي مصخن لو شنو طبيت للبيت وجهي اصفر وجسمي يرجف شافتني جوري جرتني كعدتني - شبيج ولج احجي لا امي اشوفج شكوو ولج باوعتلها وعيوني نترست دموع خفت من تهديده اخاف من كل تهديد مو بعد كلام رضوان هذا احس جسمي يرجف كله من فوك لجوه كوه طلعت الكلامات وسولفت الجوري كلشي هي فتحت عيونها وكالت عزااا بعينج انصاف هذا يخوف لا بس يفضحج ويخليج علج ويسويلج مشكله يمممه خفت اكثر من سمعت كلام جوري وصرت ابجي شسوي اكول الرانيا عليه لو اسكت لا اكول العمار لا خاف يتعارك وياه ويطرد ابوي من الشغل شلوون يالله منين اجتني اني هاي المصيبه بقت جوري اتهدي بيه وكوه سيطرت ع روحي اجه عمار الضهر وجوري اتحذرني مااحجي واهدي روحي ومجرد كلام لا تخافين مايسوي شي راحت هي وامها وبقه عمار يمي للعصر اجو اهلي واني الخوف محتلني مر اسبوع ع هذا الحجي من اصوب نصر وصاله اسبوع بلبيت وع حجي رضوان وكل يوميه اشوف كابوس اني بيه حاله اذا خفت من شي اكوم اتحلم بي دائما وشلون بعد اني جبااانه وخفت حيل من رضوان وكل يوميه اشوفه لو جاي يذبحني لو فاضحني واهلي يذبحوني بقيت اسبوع اني حالي حال لحد ما خابرت رانيا ع امي وامي صارت تحجي وياها وفرحانه ممصدكه وبقت لوين هي تحجي وفرحانه سدت التلفون وباوعتلي وكامت اتهلهل باوعتله شكو يووم منو الي عررس شكووو - ولج يمه فرحي بعد يومين يجون عيال رانيا يخطبوج النصر وافق وهو اجه وكايل الامه روحي خطبيهااا الي صلوااااتك ياا محمد فتحت عيوني مصدووومه شنووو يعني هذهوو وافق بس شلون يعني راح ازوجه زين شلووون الف سؤال ببالي ماداستوعب اني وين حطيت روحي بقيت صافنه ع امي الي اتهلهل واتصلي ع النبي ممصدكه فرحانه وتفتر اجه ابوي وعمار واتلكتهم امي بلهلاهل وسولفتلهم كلشي ابوي سكت وكال الله كريم يامره شبيج مستعجله اطي صبر عمار باوعلي ورجع باوع الامي وكال يمه بس ………… يتبع ،،،،،وتستمر الحكايه ،،،،، قرائه ممتعه احبتي توقعاتكم وتعليقاتكم وتصويتكم شوفونياهم #نور الشمري #نوشه | ||||
|
| |
|
30-11-20, 04:06 PM
| #7 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قلبان يجمعهما السحر #البارت الخامس بقلمي #نور الشمري #إنّ العُـيون ترَى كلَّ يومٍ وجوهاً جميلَة، ولكنّ القلْـب لا يفتحُ أبوابهُ إلا لوجهٍ واحِـد عمار : يمه بس اني ما موافق ع هذا الزواج - شنو شنووووو ليش ما موافق يمه هااا بعدين اني امها واعرف بمصلحتها انت هسه جاي ذاكليوم طالع من بطني واتحط قرارك فوك قراري وين صايره هاييي - يمممه شبيج اني ابنج الجبير و اخوها الجبير ومن حقي هذا الشي واني اشوف الزواج هذا كله غلط وبي الف سالفه وسالفه بس فهموني نصر شلون قبل شلووون يمه لا تخبلوني انتي ام لو شنوو - ولك هاي تاليتها توكف بوجهيي وتصيح عليه هيج علمتك وربيتك اني - يممه انتي ع عيني وراسي بس انصاف ماتزوج نصر لو ع جثتي وبس هذهوو احجيلك كلمه يابه شنو هاي ركع الباب وطلع عمار معصب ابوي يستغفر ويهز براسه ماراضي وامي تفتر وتفور نار ومبين الخوف والقلق عليها وراحت فرحتهاا باوعت ع ابوي كاعد كبال التلفزون ع الاخبار وكلساع واستغفر ويكح اخذتله مي باوعلي مبتسم وابتسامته مليانه حزن امي بلغرفه وعمار ماكو طلع والطلعه طلعه بقيت كاعده واحس بضوجه ومملل مو طبيعي ابد لوين ياله دخل عمار معصب ومايتحاجه خفت احاجي ويعصب اكثر عفته براحته ورحت نمت ثاني يوم كعدت البيت وضعه مكهرب لا ابوي ولا عمار موجودين وامي ضايجه وبس تافئف اخذت تلفونها ورحت دكيت ع جوري محتاجه احجي ويه احد واسولفله همومي احس اكو كوم مال صخور ع صدري لا اكدر اشيلهن ولا اكدر اتنفس واخليهن اول ما دكيت طلعتلي امها - الو خاله شلونج - هلا حبيبتي نصوفه الحمدالله خير محتاجه شي - ئئ اي خاله ممكن احاجي جوري - اي عمري هسه اصيحها اجتي جوري اول مكالت الوو حسيت ادموعي نزلت محتاجه حظن افرغ بي كل همومي واسولف الي بكلبي احس كل هذا غلط وخايفه هواي - شبيج نصوف الووو نصوفه وينج - جوري اتكدرين تجين الناا حجيتها كوه واني امسح دموعي هي فزت وكالت - شكو شبيج ولج خوفتيني يلا هسه اجي اشوف امي واجيج - اي حبابه تعاي .. سديته واني ابجي ماعرف شبيه ضايجه ع عمار الي ماشايفته هيج ابد وخايفه لا من وره هذا رضوان الله بلاني بي ومدري منين جابه كدامي وخايفه من امي ورانيا وحته من هذا نصر احس وره سالفه ليش يزوجني اني مندون كل البنات اكيد عده شي شويه واجت جوري وامها كيفت رحت الها ركض امي استقبلت ام جوري وهي تبجي وتنعى عبالك ميتلها واحد شكد ضوجتني من سوت هيج اخذت جوري وطلعت من للحديقه ماريد ابقه يمها - شبيج نصوف اكو شي صاير شي - باوعتلها وسولفتلها كلشي اسولف وابجي هي باوعتلي صفح وكالت - زين هسه انتي عليمن تبجين ماتردين تزوجين لو لان امج واخوج تعاركو لو شنو - ماعرف كلهن كلهن حجيتها وبجيت - شنو هن الكلهن ولج لا تخبليني زين انتي شايفته النصر مو اسمه - هزيت راسي وباوعتلها واني امسح ادموعي - اسكتييي يا كافي جنج ام حمود 24 ساعه تبجي وتنعه شبيج شوفي انتي شايفته يعني فكرين اتكدرين اتحبي واتعيشين وياه لو لاا باوعتله مصدومه شنو احبه لااااا يمه يخوف شحب منه ولج هو بس صلعته كافيه حته اتخليني ارفض واخاف - لعد ليش وافقتي هااا - رانياا حجت وياي وقنعتني بس هسه ماريده وماريد عمار يتعارك ويه امي شلون بيه حليها الي حبابه - زين عوفي صلعته تدبر ويزرع شعر وتنتهي القضيه شنو الشي مايخليج اتوافقين عليه وهو وافق خلص - هو هذا هم قالقني ليش وافق عليه مندون البنات كلهن اله اني شنو السبب - هواي اكو يجوز انعجب بيج او يجوز امه قنعته بانج خوش بنيه ترا افكارج هاي راح اتعم عليج شوفي نصوف يا اي يا لا تتصورين اذا كلتي لا وصفيتي ويه عمار امج تهده وتنسه او اذا كلتي اي وصفيتي ويه امج عمار يهده ويضطر يوافق لو لا فكري زين وشوفي شنو السهل الج ومنو الي يهمه قرارج انتي اما عنه صدكي اذا هو خوش ولد عوفي صلعته رحمه الاهلج وعوفي العمر فكري بغير شي يكون شي اساسي برفضج اذا متردي سبب قوي غير هذني الخابصتني بيهن واذا ماكوو ازوجي وعيشي يمعوده كلنا ع هلطريق وكلنا نزوج اذا زين ليش اضيعي من ايدج وبعد القرار بكيفج - صفنت ع كلام جوري ماعرف دوختني اكثر وماعرف شسوي بس القالقني عمار هو صح مايجبرني ع شي مثل امي بس اخاف هذا رضوان كايله شي بقيت صافنه وحايره ماعرف شسوي راحت جوري هي وامها واني بقيت الف فكره ببالي ماعرف شسوي اجه عمار بليل امي جانت بلغرفه ومن البارحه محد يحجي ويه الاخ - عمار احجي وياك باوعلي بنص عين وبعدين اشر الي وسوالي مكان بصفه كمت رحت اله واني احظنه -تدري شكد احبك انت مو بس اخويه لا انت صديقي وابوي ماانسه الي سويته الي اني وصغيره ياما حميتني من امي وضرباتها وعقوباتها وياما وياما وحته هسه انت وكفت بوجهه امي علمودي عمار شنو سبب رفضك النصر كولي حته اني هم ارفضه وياك واوكف بوجه امي بس اذا ماكو سبب ليش هيج اسوي باوعلي وعيونه هواي حجي - نصوفه امي اعرفها كلش زين هي كل همها الفلوس والكشخه ومايهما اذا انتي سعيده او لا اني نصر ماشايف عنه شي مو زين الله شاهد وهو ولد ذره مال الله وكلها تحلف بي وشكد شايف اني ضباط بس يكونون نسونجيه اله هو مافد يوم باوع ع بنيه او سو من الي يسوو اصدقائه الضباط مو عبالج ماعرفه النصر اعرفه كلش زين وهو مو بس حماها الاختي لا هو صديقي واعرفه كلش زين راح يسعدج وشنو اطلبي يصير كدامج محد يحرمج من شي وراح يصيلج اب واخ قبل لا يكون زوج ويصيلج صديق قبل الحبيب بس يا انصاف ماريدج اتكونين لعبه بيد امي ورانيا ادري بيهن هن من خططن هيج والله اعلم رانيا شلون قنعته النصر ووافق لان اعرفه كلش زين مايقبل بضلم وزواجج منه ظلم الج لان جبير بس ااااخ من رانيا شلون قنعته ماعرف لو ماعرف بيها واختي جان كلت سحرته بس مسويهه اكيد ذبتله كم كلمه كدام امه وامه هي القنعته شوفي حبيبتي نصوف اني مو ضد زواجج من نصر اني ضد مصلحت امي ورانيا بهذا الزواج لان متاكد اذا ازوجتي ع مصلحتهن ماراح ترتاحين ولو اتمنالج الخير اني واتمنالج واحد مثل نصر يحميج ويسندج - يعني انت عبالك رانيا راح اضرني واتمسني بسوء اذا ازوجت زين اذا هو زين اني شعليه برانيا وامي اني راح اعيش وياه مو وياهن وشون راح يكون زواجي مصلحه الهن مادافهمك عمار - اخ يابه ويردون يزوجوج وانتي كلمتين مااتفهميهن شلون راح اتفهمين الزوج بلا - شنو قصدك اني صغيره مووو ليش هيج اسوي روح مااحجي وياك - لج تعااي خل انكمل وانفظ السالفه الناس باجر تجي شوفي انتي تردي لو لاا كولي الصراحه - هااااا شنوو - تردي لو لااا - شنو هو عليمن تحجي - ولجج غبييييه عليمن احجي طلعت حجايه هسه لو نصر هنا جان علكني بلمروحه لج احجي ع نصر يا ثوله تردي لو لاا - مادري بكيفك اذا هو زين - لج لا تكولين اذا هو زين ترا هو ذره مال الله بس اني خايف من رانيا وامي واخاف لا رانيا اتروح اجرج وصيرين مثلها وهناا نصر تررا يرجعج النا ولله يتخبل من هيج تصرفات ومن التبذر - بس انت تدري بيه مستحيل اصير مثل رانيا ودائما انصحها واحجي وياها بس هي ماتسمع مني وعبالها اني دانقص منها واتكوم اصيح هي وامي بس مستحيل ياعمار اصير مثلهن ابددد ووعد مني لو اموت مااصير مثلهنن ابتسم وهو يمسح ع شعري - كيفج لعد اذا تردي وافقي واني بضهرج واذا متردي ابدد لا تخافين واني هم بضهرج واوكف بوجه امي و بوجه الكل اهم شي انت قانعه عافني وهو يمسح ع شعري ونام كمت نمت بفراشي واني صافنه ع كلام عمار يعني هسه القرار بيدي اوافق لو لا بس صل اووو انصاف نسيتي كلام جوري مو مهم عادي اكو الف طريقه ونخلص من الصلعه وبعدين شبيها شو مطيته رونق وجمال وحته هيبه هاا انصاف بدينه شو من هسه ازحفين عليه هسه اني شحجيت وزحفت صرت احجي ويه روحي مثل المخبله لحد ماغفيت كعدت الصبح امي مطنكره وتفتر وتنضف واني صافنه اوافق لو لا اذا هو حباب وزين ليش لا وكلام عمار البارحه خلاني احب اعيش وياه واكتشف شخصيته لهذا الاصلع اااا نصر نصر لج انصاف نصر نصر اسمه عود فضحي روحج وكولي كدامه اصلع حته يعلكج بلمروحه ع كولت عمار يمه يعني الشي المايعجبه يعلكني بلمروحه لالا بطلت ماريده اي شنو بايعه روحي اذكرت كلام رانيا وشلون اذا بقيت هذا ماحبه وهذا هيج وذاك هيج اعنس وابقه ومن جهه كلام امي الي مايخلص وكلام الناس اوافق احسن اي واخلص من امي ونكها الي شنو يعني هيج ضالم لا عمار كال هو مو ظالم اي هذهو كمت الامي واني امشي خطوه وارجع عشره خطوات وكفت كدامها وهي تنضف وتحوس كاعده اسوي معجنات باوعتلها وهمستلها يمه باوعتلي ورجعت دنكت ع المعجنات - شتردين خيرج - يمه اني ان ي اني - شبيج اتئنئنين لو تحجين لو تولين عدي شغل واصل لراسي - ئئئ اني اريد اكلج يعني اني مم موافقه باوعتلي بصدمه وكالت عليمن موافقه - ائئئ ع نصر حماها الرانيا عمار البارحه كال القرار بيدج واني موافقه - صدك تحجيننن ولج يمه يوم المنى والله ككللووووووشششش تعاي تعاي ابوسنج والله اليوم اني افرح وحده بلعالم ظلت اتبوس بيه وممصدكه فرحانه كامت تشتغل وتضحك واني صافنه ماعرف الي سويته صح لو غلط بس الاعرفه اني فرحت اهلي وهذا اكيد يرضى رب العالمين وره الغده طببتني امي للحمام سبحت وطلعت لكيتها محظرتلي ثوب كلوشه يوصل لحد ركبي ابيض ووردي بس حزام وردي وهو ابيض واكو دانتيل وردي بنهاية الردان وبنهاية الثوب من جوه واكو ورد وردي بنص شسورت شعري وخليته مفتوح وشلت منها شوي من كدام من الجوانب وشديته وخليته من وره مفتوح وشويه واندك الباب طلعت امي تفتحها واني بلغرفه خايفه وع ساعه اغير قراري وابطل سمعت صوت رانيا وبجي بتها رزان وادردم غزل شوي وصاحتلي امي طلعت سلمت عليهن جانت عمتها الرانيا و رانيا وحماتها اخته النصر الجبيره اول مره اشوفها ووياها بنيه تطلع بكبري او اصغر بشويه سلمت وقدمت العصير واني ارجف واحس كلبي راح يطلع من مكانه عمت رانيا طول ما هي كاعده بس تباوعلي وتضحك واصلي ع محمد وال محمد وومصدكه اسمعها اتكول الامي - ام عمار ماصدكين الفرحه الاني بيها والله من اجه وكال اي موافق خطبيها ردت اركص واهلهل للصبح هذا بجري وفرحتي واخيرا راح اشوفه مزوج ومستقر عيني بارده ع نصوفه اتخبل والله ماصدك راح اصير جنتي وصارن يحجي واني عفتهن وكمت خجلانه ضلن هن للمغرب وكالن احنه انروح ورديلنا الخبر الاكيد علمود اذا الله راد واكو قسمه الجمعه الجايه المشيه والعقد - انشاءالله ام نصر انشاءالله خير تتدللون مية هلا بيكم والله لو اضلون يمنا وباجر ترجعون حجت حماتها الرانيا زهراء : لاا خاله رجلي ينتضرنا حته نرجع لان مانكدر غير يوم انشاءالله حاولت امي رادت بس هن ماقبلن راحن ورانيا فرحانه وتغمز الي راحن واني ركض بدلت وعدلت روحي احس مسوي شي غلط احس كل هذا غلط وما لازم يصير بس مو بيدي ابد لليل اجه عمار وابويه وسولفتلهم امي كلشي شفت عمار باوعلي وهز راسه راضي ع قراري بس اكو بعيونه قلق عمار اعرفه كلش زين اكثر من روحي لان هو الي رباني ودائما وياه لهذا اعرف كلشي عنه ماحجه شي وكال القرار بيد انصاف وابويه هم كال مادام البنيه وافقت هذهو مانمنعها ماعرف افرح لو لا اكو فرح بس احسه مو كامل احس اكو شي ناقصني بس شنو مادري ثاني يوم خابرت امي عمت رانيا واطتهم الموافقه والاكيده واتفقو الجمعه الجايه المشيه والعقد احس كل جسمي يرجف بطلت ماريد ماريد لا يالله ماريدد بقيت حايره شسوي بعدين صفنت ع روحي شبيه اني كلساع قرار وكلساع شكل انصاف ثبتي ع قرار وخليج مثبته ع قرارج والي يغير قراره يندم بعدين صدكيني الخيره في ما اختارها الله والله اختالي نصر خلص كافي كلساع ابطل سكتت وضليت ويه امي الي شدت اتنضف بلبيت واتحظر روحها للجمعه الجايه رانيا تخابر وتكلي لو شوفين الاجواء هنا يمنا اتخببببل كلها ممصدكه نصر راح يزوج وحالفين اصدقائه كلهم اله يعلكوها بيوم عقده واني اخاف شراح يسوون هذوله شلون يعلكوها اتخيلت اصدقائه كلهم صلعان وضخمين ويخوفون مثله ضحكت ع عقلي وسكتت طلعت اني وامي للسوك واشترتلي بدله ماعرف منين جابت الفلوس مارضيت اخذها بس هي اله اشتريها واله اخذها جانت بينصل وشويه بيها كلوشه من جوه جانت مبطنه والكلوشه الجوه كانت بس تور بدون بطانه ورجليه اتبين ومن فوك جان البطانه لحد الصدر وبيها تعاليك رفاع ومن وره بيها سبعه ضهري يطلع كله من عدها يعني جانت بسيطططه بس حلوه واقتنعت بيها بس ماردت اشتريها بس امي ماقبلت اخذتها جان لونها بيجي اشتريت حذاء عالي ضحكت لان امي اشيل ناصي واني عالي اريد اصير بطوله هو طويل واني كصيره والبدله طويله يرادلها كعب عالي وامي ماقبلت تاخذ عالي كالت - يمه خاف يضربونج عين وترحين توكعين من وراه شو ذبيها واخذي هاي باوعت جانت فلات ورياضيه دكيت ع كصتي - يمة من كل عقلج البس هاي بيوم عقدي شيكولون عليه ماريد اخذ من رانيا ابو المحل انتبه النا كاللها الامي - خاله اذا البنيه عروس ميصير ازعليها وما تاخذين الي تختاره هي فال مو زين وسامع من حبوبتي اتروح العروس حياتها كلها ماتعجبها لان نيشانها ماختارته ع ذوقهااا امي ردت ع الولد وهي عصبيه - بس هذا مو نيشانها وبعدين انت شدخلك - خاله غير اني اريدلج الزينه حته لو جان مو النيشان لازم هي تختاره حته كلشي يكون بقرارها هي مو قرار العريس يا خاله حجه هيج وضحك باوعتله عرفته جذاب وكل هذا جذب بس حته نشتري من عده شكد لوتي وكلاوجي لعد امي خافت وفرحت من كاللها حته قرارها يمشي مو قرار العريس راسا كالت اخذي الي تردي اطيتها اللولد واني عصبيه وهو يضحك ويباوعلي ضجت حيل لو ادري مادخلت منين اجتني هاي اطانيها جريتها من عده وطلعت ادردم جذاب و كلاوجي هم جذب ع امي بس همزين خلاها تشتري الكعب هههه اشتريت باقي الغراض ورجعنا بليل جنا كاعدين وعمار كاعد كبالي باوعلي وكال - ولج كبرتي وراح اتعرسين - شكالولك عليه لعد ابقه صغيره - لاا مو هو انتي بطول خشمي شلون راح اتعرسين وانتي هلطولج يمكن نصر يدنك ويحني كل ظهره ياله يكدر يلبسج الحلقه هههههههه - عماااااار مو لهدرجه كصيررره اني عابتلك ضجت وردرت وجهي بضوجه وهو ضحك بابا كال - لك عمار لا ازعل بنيتي هاي عزيزتي عوفها ضحكت ورحت حظنت بابا واعيب ع عمار وهو يهز بيده ويكول لااااا ربحنا عمي هاي باجر راح تزوج يمكن نصر راح يربيها مو يزوجها ههههههه بقه عمار يشاقه ويضوج بيه ويضحك واني كاعده يم بابا وكل ما يضوجني احظن بابا واعيب عليه احس هيج انتصر عليه ماعرف ليش من اني وصغيره من يضوجني عمار اسوي هيج وهو يضحك يكول عبالج اتخليني اغار دروحي اخذي كله الج واني افرح واكله اله مااطيكياه نمت بحظن بابا بليلتها وعمار يضحك عليه - ولج ترا مو باجر تزوجين باجر بس اتعقدين ومشيه وهذهو شبيج حاظنته عبالك راح يطير من كال هيج ضجت يعني اذا تزوجت مااشوف بابا بعد مثل رانيا بشهر مره وكم يوم بس حيل ضجت ونمت والدمعه بعيني الصبح كعدتني امي ركض ركض كالت خابرت ام حمزه ام الصالون وحجزت عدها امشي اخذج وارجع للبيت انضفه وانتي من تخلصين دكي ع عمار يجيج اطتني تلفونها واهذتني لام الصالون اول ماطبيت استلمتني ام الصالو لعبت بيه طوبه واني اصيح وهو ولا يمهمها اتحف واتمكيج سلتت شعري اسلت رادت اصبغه ماخليتها احب لون شعري مااريد اصبغه هي حطتلي خصل اصطناعيات بشعري علمود التسريحه اتبين جانت بسيطه ونصه مفتوح بس حلوه مكيجتني مكياج خفيف ومن خلصت اتصلت ع عمار كال شويه واجيج لفلفي روحج زين لفيت روحي زين وطلعتني ام الصالون لان محد وياي ركبتني بسياره وراحت ماعدي عمات بس عم واحد وعايش بلبصره واليوم يجي هو وعائلته وخالات عدي 2 وخال واحد وهم اليوم يجون وكت الغدا يضربون الاكل وشويه يهزن علمود يصرفن الشحونات والاكل الي اكلنا ويرجعون كل مره هيج رجعت للبيت لكيت بيت عمي وخالي وخالاتي كلهم موجودين اول ما طبيت صلت امي ع النبي وممصدكه وكاعده وتمدح باهل نصر وكلساع وتريد تجفصها واتكول يشتغل بلستخبارات وتسكت واتلحك بروحها واني اضحك عليها لو بيدها جان كتبت ع كصتي خطيب انصاف استخباراتي بس رانيا حذرتها تحجي بشغله وماتكدر تحجي للعصر وصوت السيارات والناس سمعت الجهال اتهوس اجو اجو اجو عمار جان ناصب جادر بلباب للزلم لان البيت ياله يكفي النسوان طبت رانيا اتهلهل وعمتها واخوات نصر ومرت حماها الرانيا الي شفتها هي وبناتها وطبن يركصن ويهوسن وكاشخات ذيج الكشخه ضلن خالاتي يباوعن ويبسبسن متعجبات لان بعرس رانيا ماحظرن جانت اول شي مشية الزلم وبعدين العقد رانيا فرحانه وامي والكل بس اني احس اكو شي ناخزني ومامخليني افرح خلصت مشيتهم وكالو حظرو العروس حته تعقد اخذتني امي ولبستني جادر مال صلاة ابيض وكعدتني بلغرفه وطب ابويه وعمار والسيد وهو ماشفته لان جانو مغطين راسي بشال ابيض بس حسيته كعد بصفي بده السيد يردد وابوي كاعد بصفي وهو وكيلي سئلني حسيت اكو شي مانعني اكو شي مانع انطق الكلمه بس ماعرف شنو كوه طلعت الكلمه وحجيتها وسئله السيد بقه ساكت مرت دقائق وهو ساكت الكل انصدم من سكوته واني رفعت راسي بس مكدرت اشوفه شفت حذائه كاعد بصفي رجع السيد سئله احس علامة الاستغراب ع وجهه عمار وابوي مندون ما شفتهن بس حسيت بيهم من سئلة مرة الثانيه جاوب كام السيد وهو يبارك النا اخذه ابويه وطلع عمار مسح ع راسي وطلع بقيت صافنه يعني عافونه وحدنا يمه طفرت واني،خايفه وكع الشال من راسي شفته كاعد ويمسح ع راسه رفع راسه باوعلي باستغراب وعيونه حمر دممم خفت من شكله بس مكدرت احجي صفنت يعني هسه اني صرت مرته خلص صرت مرته شرعا باوعت عليه وواني واكفه واعصر بديه همس هو وعيونه ع الكاع ويهز برجله - شبيج شفتي جني وطفرتي والطفره طفره كعدي كعدت كوه واني ارجف باوعت عليه كلساع يمسح كصته وعيونه حمرر همس وكال - ليش قبلتي بيه - نعممم باوعتله مصدومه من سؤاله وهو رجع باوع عليه مصدوم همس اسمج انصاف - باوعتله ماعرف شنو اجاوبه صدمة ع خوف ع خجل ع ماعرف شنو هههه هستوه عرف اسمي راد يحجي شي بس الباب اندكت راسا وكفت خايفه انتبهت عليه ابتسم بطرف شفايفه ابتسامه خفيفه بدون ما يباوعلي من وكفتي مبين عليه الخوف والتوتر دخلت رانيا تبتسم يلا عيني الكل ينتضر حته اتلبسها النيشان عمتي بس تحجي هههههههه هز راسه وهو يوكف واني اباوعله اجت رانيا عليه ضربت ع راسي ولج ثوله سالج ساعه كاعده بصفه لابسه الجادر شكوو مو مرته صرتي عبالك كاعد يم امه اهمداج نزعتني الجادر وهي ادردم واني احس خدودي حمر لسه ما مستوعبه الي دايصير يعني كلشي خلص وبعد ماكدر اغير قراري طلعت واني كوه امشي رانيا كدامي هو واكف يم اخته يحجي بس مبين عصبي من وصلت يمه سكت وينافخ ردت اكعد بس ماحس غير وكعت عثرت بلكعب جلب بلبدله وردت اوكع كمشتني رانيا بصفي جانت وهو صاح الله الله وابتسامه ع شفايفه خفيفه كلها تضحك واني وجهي صار احمر وردت ابجي من الفشله لو سامعه كلام امي مو احسلي كعد هو بس عيونه رجعن عاديات ليش من جنه وحدنا جانن حمر ويخوف ويعرك ماعرف شبي لبسني الذهب والنيشان همست عمتي ام نصر حبيبه هذا ذوقي اذا ماعجبج عوفي مجرد رسميات كدام الناس انشاءالله ع العرس اختاري واحد انتي ع ذوقج ماشي ماماتي ابتسم الها وهو كمل لبسني الحلقه بس انتبهت عليه رجله بس يهزها ومتوتر مبين عليه كلساع يمسح ع لحيته وكمل الكلاده والتراجي وكام وكف باوع ع اخته مدري شحجه وياها ورجع باس ايد امه حسيت عيونه البؤبؤه صارت عليه بس ماباوع مجرد البؤبؤه اتحركت اتنفزت من تصرفه هذا وصل للباب وصاحت اخته عليه دار وجهه صارت عيوني بعيونه باوعلي مبتسم تك خد وباوع ع اخته هز راسه وطلع اول ماطلع بره ماحس بس صوت الطلق ترس المنطقه ترس ………… يتبع ،،،،،، وللحكايه بقيه ،،،،،،، قرائه ممتعه احبتي توقعاتكم وتصوياتكم وتعليقاتكم شوفونياهن وين حته انشر باجر 😁 #نور الشمري #نوشه | ||||
|
| |
|
30-11-20, 04:15 PM
| #8 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| بربوت مفاجئ صغيروني 😁 #قلبان يجمعهما السحر #البارت السادس بقلمي #نور الشمري #لو جئتَني لوجدتني يعقوباً اعماهُ الشوق ، وليس غيرك يوسفي💔 انصاف : وكفت مفجوعه وخايفه من صوت الطلق الي ترس المنطقه ترس جسمي يرجف الكل وكف طلعت رانيا واجت تضحك كالت ماكو شي هذوله اصدقائه النصر هههه ارتاحيت ع ساعه كلت هذا رضوان اجه ينتقم لو شو شنو يسوي لان تهديده الاخير رعبني كلش كعدت واخوات نصر وبناتهن يركصن وفرحانات اجت يمي بنيه اعرفها اصير بت حماها الرانيا همسه اصغر مني بكم سنه وياها بنيه تطلع بكبرها عرفتني عليها اصير بت خالته النصر كلش حبابه ضلن يسولفن وياي غيرت جو وياهن واندمجت اسوالف واضحك وحاولت انسه الي شفته وانسه الي صار بقيت ويه جوري من اجت حيل فرحت عبالي متجي - عبالي متجين ردت ازعل عليج - كم انصاف عدي ومااجي هاا الف مبروك حبيبتي انشاءالله اتكونين سعيده وماتندمين ع هذا القرار - انشاءالله الله يسمع منج شويه وجرتني جوري للمطبخ وهي ادردم لج تعاي شوفيهم شلون يركصون عليج الل يخبلون اريد اطلع يمهم - لج ساعه واجت امي وشافتني هنا اكل طن رزاله منها راح اروح - لج اوووكفي تعاي حبابه نطلع للبستان - عزااا ولج البستان يبن اذا طلعنا تردين عمار يشنقني انجبي واكعدي - لج لا وره البيت منبين بس انباوع عليهم لج صاااكين يخبلوون واريد اشوف هذا صهري الاصلع ههههههههههه - جوررري انجبي ترا ماقبل بس اني اكول عليه اصلع اي غيري لا - هلووو هلووو العب بيها عيني الاخت بسرعه ذااابت وراحتت اي عيني شسوالج هاا احجي احجيي انجبي جوري شبيج اتغمزين والله كلشي ماسوه بس ماااقبل اصيحيله اصلع بس اني اكول اصلع - ماشي اكرع يلا - جوررريي - هههههه سكتت تعاي عليج الله تعاي جرتني وطلعنا وره البيت اكو زروف بجينكوات الي مسويهن عمار كعدت جوري اتباوع عليهم واني واكفه خايفه لا تجي امي لو عمار واترزل اجر بيها وهي ولا كانما لحد ما الغبيه اكو سطل مال مي فارغ من حديد محطوط بصفها ودفرته وهي متدري وكع وصار صوت عالي سمعنا صوت واحد صاح منووو هناا من وره السياج المغطى بجينكو اني هنا متت بدمي كلت لا هذهو اذا شافناا اروح بيها اكيد هسه يكول العمار وانتهيي يالله دخيلك رجع صاح الولد منوو هناا تحجون لو اطفر السياج واشوف منوو باوعت ع جوري وهي الدموع صارت بعينها جريتها وهمستلها بسرعه خل ندخل جوه ركضت وهي وراي تركض وصلت للبيت درت وجهي عليها وهي ماكو عزاا هاي وين راحت مديت راسي شفتها واكعه وايدها تنزف واكو ولد من السياج يصيح الله الله ويضحك باوعتله اني من وره الباب ما طالع مني شي جان كاشخ واول مره اشوفه مبين مو منا شعره عالي وعده لحيه وشوارب عيونه سود وحادات انتبهت عليه كص جوري كص وهاي الثوله متربعه وكاعده وتبجي اريدها تجي ماكوو بس تبجي وهو واكف يباوعلها من السياج سمعته يكوللها تردين مساعده اكومج متحملت اعوف صديقتي هيج جريت عباة امي وره الباب لفيت روحي بيها وطلعت خزرته هو باوعلي وابتسم كومت جوري وماباوعت عليه بعد طببتها راسا للبيت واني اغلط عليها - ثووله ليش ماكمتي من وكعتي ارتاحيتي هسه من شافج هذا السرسري الهتلي هيج وانتي بدون حجاب كامت تبجي اكثر شبكتها وسكتتها اجت رانيا تخزر بيه - وينج انتي تعااي الكل يسئل وين العروس فضحتيناا عفت جوري تهدئ وكمت ويه رانيا رجعت بمكاني شويه وراحت جوري انقهرت عليها هواي وبالي كله يمها شويه و بدت الناس اتروح شويه شويه الى ان فرغ البيت وبقو بس رانيا وعيالها او عيالي هم صاارو اجت اخت نصر وهي تضحك - تفضلي حبيبه هذا تلفون دزه نصر الج صفنت تلفون والي يعني راح يصير الي تلفون خاص اخذته واني فرحانه اشكرتها وهي تضحك رادو يطلعون بس امي ماخلتهم وكالت اله تباتون صرنا من صدك اهل اطيتكم اثنين من بنياتي ومافد يوم نمتو عدنا مايصير الدنيا ليل وين ترجعون بهذا الطريق بقن يجادلن امي وام نصر الى ان كالت رانيا زين سئلو الولد مو احسن من هذا الجدال بينجن حجت هيج وضحكت باوعتلها ابد ما يهمها شي واذب الكلمه عادي ما تهتم الي كدامها جبير لو صغير راحت بت سند الصغيره صاحت واحد منهم اني عفتهم وطبيت للغرفه بدلت ملابسي لان البدله احسها خنكتني وكوه امشي منها هي والكعب لبست ثوب طويل واخذت حجابي وطلعت مكياجي بعدني ماغاسلته ردت اغسله جرتني رانيا - شكو رانيا شبيج - وجعع وين موليه امشي للصاله رجلج هناك مكابله الحمام وكاعده شعدج - باوعتلها رجلج !! رجلي منوو شبيج رانيا ضربتني ع راسي وهي عصبيه - لجج ثووله لا اصيرين منو يعني نصر يا غبيه يا فاهيه رجلج غيرر امشي طلعي اله كاعد بصاله هو وامي وعمتي كعدي كدامه اتموعي احجي بهدوء شويه شبيج اعلمج اني جرتني ودفعتني ع الصاله ردت اوكع اله شويه جلبت بلباب صار اكو صوت كلها رفعت راسها من الفشله ردت ابجي حجيت ويه روحي - الله ياخذج رانيا واخلص منج يا كلبه فشلتيني ارتاحيتي هسه دماخ سزز صفنت ع روحي اني لسه واكفه بلباب ومجلبه بلباب ومبين عليه عصبيه وكلها تباوعلي حسيت روحي مطي ياريت الكاع تنشك واطمني هسه ولا هلموقف هذاا الي شفته جان كاعد بصف امه ويحجي ويه امي من دخلت باوعلي ورجع باوع ع امي بقه يباوعلي بهدوء ويرجع عيونه سمعت امه حجت - تعااي حبيبه تعاي يمي هنا كعدي تعاي يبعد روحي مرت العزيز انتي ابتسمت الها ومشيت صرت قريبه الها ماعرف وين اكعد واحس روحي غريبه بنصهم امي تضحك وتخزر بيه اكعد بصفه يمه لو اموت ما اكعد بصفه شكد فشله شنو بايعه روحي واكعد بصفه سمعت امه كالت - تعاي نصوفه كعدي يم رجلج حبيبه وسوتلي مجال بينها وبين نصر احس خدودي صارن دم حمر كعدت بنصهم واني ارجف حجت امي وكالت - ماتطلع هسه والله تباتون وباجر ترجعون سمعته صوته حجه يمه احس كلبي يريد يطلع من مكانه بمجرد ما سمعت صوته - لا خاله عذريني باجر عدي دوام وماكدر اعوفه لازم من الفجر اروح وسند ومثنى وعمامي كلهم رجعو هسه لازم الحكهم غير مره انشاءالله - سكتت امي وماكدرت تحجي بعد كام هو وكال يالله يمه حظرو ارواحكم حته نرجع جانت بس امه ورانيا واخته ضالات والباقي كلهم رايحين من دخلت ابدل اني وكفت وياهم احسه قريب عليه باوعت عليه بدون مااحد يحس لكيته عركان وكوه واكف وعيونه حمر بس من دخلت ماجان هيج جان طبيعي شبي معقوله مريض ردت امشي وانقذ روحي قبل لا اجفص بشي بس اذكرت السالفه الي صارت وحجيي عليه عزا لازم يبريلي الذمه قبل لا يطلع بس شلون احاجي بقيت اعصر بديه ماعرف شلون ادبرلي سالفه اخر شي باوعتله - احمممم باوعلي رافع تك حاجب ورجع نزله وكال - محتاجه شي حجاها كوه بس ماحط عيونه بعيوني مجرد باوعلي خطف ورجع نزل راسه همست اي اريدد ااا اريد ااكلك ع شي - انشاءالله من ارجع للبيت اخابرج وكوليها اكو شي بعد حسيت روحي اتفشلت واتمنيت ماحجيت هزيت راسي لا وعفته ومشيت طبيت المطبخ واني فايره شايف نفسسسه مغرور ابو صلعه عباله هو وبس والله يالله ع جماله واخلاقه شايل خشمه عشتوو واذا ضابط واذا استخباراتي هيج يشيل خشمه ويصير مغرور كوه يطلع الحجايه من خشمه والله يالله ششايف روحه حته مراد ع المدار ماشايف نفسه هيج كاعده اشرب مي واحجي واني اعصاب لان احس روحي اتفشلت وعيوني صارن نار من العصبيه كلشي ولا واحد يفشلني لو يصغرني اتخبل من هذا الشي احس روحي طفله وهيج يعاملوني حسيت واحد وراي درت وجهي شفته هو واكف يمه انصنمت وفتحت عيوني لا بس سمعني عزااا بعينييييي صخام همس - كلاص مي - هااا باوعلي رافع حاجبه ورجع كرر الكلمه وهو صاك ع سنونه - كلاااااص ميي خفت منه همست اي اي ركضت جبتله اطيته ماباوعلي اخذه وطلع بسرعه احس كلبي وكف يمه لا بس ياخذ نضره عليه ياللهي نذر مني اذا ماسامعني بعد ماا اكل تربه والله والله صفنت اني بيه حاله من الصغر احب اكل الترب مال الصلاه كل مره اكول بعد ما اكلها وارجعلها ماكدر احس هاي نقطة ضعفي اعرف ميصير بس ماكدر صارت ادمان بنسبه الي بس هلمره والله نذرررر مني اذا ماسامعني بعد ماااكلها ابد ابددد كمت غسلت وجهيي ونظفت البيت اجو عمار وابويه فرحانين عمار كال - نصوفه فرحانه - هزيت راسي اي وباوعتله اهم شي اشوفه مرتاح ابتسم هو فرشتله هو وابويه ونامو فتحت تلفوني الجديد مااعرفه جان من هذا الجديد مثل مال عمار ورانيا لمس وقليل اعرفله باجر اخلي عمار يعلمني عليه كعدت اكلب بي بي العاب وبرامج عفته ونمت بس حسيت اني ونايمه شي يرج جوه مخدتي طفرت مخروعه كل عقلي حشره جوه المخده ركضت جبت اسلاحي الفتاك النعال ووكفت ع المخده رفعت منها شويه بيدي وايد كامشه بيها اسلاحي ومتحضره بس تطفر اضربها بس شو ماكو لسه ماطلعت وخرت المخده شويه شويه كلشي ماكو بس التلفون شفته يلمض يممه شبي هذا فتخت شفت اكو رساله صفنت يااا هذا التلفون مو حشره اهمداج انصاف همزين محد كعد وضحك عليج طفيت الضوه ورجعت ع التلفون شفت اكو رساله منه مكتوب اسمه نصر الدين ابتسمت من شفت اسمه دخلت عليه 💬 سلام اذا مانايمه شنو الي جنتي تردين اتكولي احس روحي شطت وصرت نار ششايف روحه هذا صدك مغرور وتااافه وسخيف واصلع وو شنو بعد انصاف فكري لالا هسه خل افكر شنو ارد عليه ماريد اكله ابريلي الذمه مايستاهل هيج واحد يستاهل احجي عليه واخذ غيبته بس اريد ادخل الجنه شلون لالا اكيد الله ميحاسبني لان هو واحد سخيف ومغرور يستاهل احجي عليه سمعت رج التلفون باوعتله اكو رساله ثانيه 💬الووو يمعوده اريد انام تحجين لو شلون اتنفست قوي حته اسيطر ع روحي وكتبتله 💬وعليكم السلام اسفه ع ازعاجك بس يعني ردت اسئلك ع سؤال وخلص سئلت رانيا عليه شكرا الك اخذ راحتك دزيتها واني ارجف احس روحي داحجي ويه واحد ماعرفه مو يكول اليوم عقدنا وصار رجلي اذكرت رانيا من عقدت الليل كله هي ومثنى حجي وضحك ورومنسيات لعد شبي خظي اني شفته شافها بس مارد عليه عابت طيرت نومتي عفته ونمت كعدت الصبح ع صوت الطكطكه مال امي وهي تشتغل كمت شفت عمار يتريك ركضت جبت التلفون واجيته - عمووورييي حباب علمني عليه قبل لا تروح باوعلي وباوع ع التلفون - جابه نصر الج عوجت حلكي وهزيت راسي اي عشتو عود مثل المخطوبين وهو ماحجه وياي البارحه مثل رانيا من انخطبت شبيه اني عزاا لا بس يحب وحده وامه جبرته عليه لالا هو شنو طفل واجبره امه بعدين امه كالت هو ماجان يريد يزوج وكوه قبل كعدت بصف عمار وكعد يعلمني عليه واني صافنه سهل وحلوه خلص طلع هو واني كمت انظف ويه امي هي طلعت تخبز واني كمشت التلفون لان ماعدي شي دك باوعت ع الاسم جان هو يمه احس روحي صخنت كمت اطفر ممصدكه دك دك اتنفست شهييق زفيير اوووف يالله دخيلك رديت واني اجمع كل قوه عدي احس بخوف وخجل وتوتر - الوووو الوووو الوو شنو هاي محد يحجي هذا شبي مايحجي ضليت اصيح الوووو الوو اذكرت هاي الاغنيه مال الووو بابا فين ضحكت عزاااا حجيتها بصوت عالييي يلا عادي هو ماكو يجوز داك بلغلط لو شو شنو بس ليش ماسدو زين ليش ما يحجي اذا هو داك الووو نصر نصررر نصرر اصلللع حطيت ايدي ع شفايفي صخااااام بوجهيي باوعت الخط مفتوح بس ماكو صوت لسه يبووو يارب ماكو احد سديته واني ارجف الله ياخذني شكد كمت اجفص اني شبيه شبيه مرت يومين التلفون يدك من اشيله ميحجي اعرفه هو بس ليش ميحجي ويبقه ساكت شنو السبب ماعرف اول مره كلت يجوز بلغلط بس من اتكررت اكثر من مره استغربت هشي العصر خابرت ام نصر امي وكالتلها الشهر الجاي العرس انشاءالله راح ادز الفلوس مال النيشان واطلعي انتي ونصوفه اسوقو واني هم راح اشتريللها منا ع ذوقي سدتته امي منها ومن عرفت موعد العرس طفرت خايفه لا يالله شنو الشهر الجاي العرس مووو بعد وكت مستعجلين يالله شلون بقيت خايفه لا اكدر ارفض ولا اكدر احجي شي مجبوره اقبل و هذا ميحجي وياي من يوم العقد من بليل من دز الرساله وبعد ماكو يخابر بس ميحجي اصيح الو الوو وهو ماكو ضجت من تصرفاته يعني رانيا من انخطبت جانت 24 ساعه هي تحجي ويه مثنى شو اني عكسهاا ليش هيج نصر الدين : الشي الي صار ماعرف شلون افسره اخر مهمه الي اصوبت بيها ماعرفت شلون عرفوني وشلون كشفوني انجرحت بجتفي وشي بسيط بقيت يوم بلمستشفى وثاني يوم طلعت كامت امي تهتم بيه واداريني اسبوع اني بلبيت بس كمت احس بخنكه واكو شي بيه بس شنو ماعرف راسي كام يوجعني باقل شي احسه يريد ينفجر ع اقل هوسه يكوم يوجعني مره جنت بلغرفه سمعت امي ورانيا يحجن بطاري خطوبه وماعرف شنو ماهتميت بليل اجت امي الي - يمه نصوري اريد اكلك حجايتين يابعد روحي انت ماريد اتعصب وانت جرحك ع كيفك نحجي ام وابنها صفنت عليها شبيها امي جريت ايدها بستها وهمستلها يمه كولي خيرج اكو شي صاير جنت احجي كوه من الم راسي الخنكه الي مصاحبتني يمكن من البيت لان مامتعود اكعد بلبيت هلكد - يمه نصوري هذه اخت رانيا الصغيره اتخبل ايه من الجمال جمال واخلاق ونظافه وبيني وبينك اذا اجت احسن من رانيا بهواي انتبهت عليه بهواي اشياء تنحط بكلب مساعه رانيا كالت جاييها خطابه يمه حرام اتروح من ايدنا وهي ماتتعوض خلني اخطبها الك ولك يمه كبرت وراح اموت وانت ماتقبل تزوج شلون بيه هااا شوف حبيبي والله البنيه ماتتعوض وكلشي بيها حلوو اتخبلت من سمعت كلام امي هي تدري بيه مااقبل وشايل الفكره من راسي ليش اتعيد وتسقط بسالفه بس احس اكو شي بداخلي مال الكلام امي ووموافق عليها حاولت اسيطر ع هذا الجزء البداخلي بس مكدرت صيحت وعصبت بس فجئه هدئت واني خيالها من شفتها ببيتنا من جابت رانيا وعيوني صارت بعيونها مجرد ما شفتها هيج ماعرف شلون كلت اي موافق يمه خطبيها الي شلون هيج نطقت ماعرف من اصفن ع روحي اكرهه شلون قبلت ازوج طفله اصغر مني بهواي شلون كدرت اسوي هيج وهذا ظلم بحد ذاته بس كل ما ردت اكول الامي اتبطل وتلغي الموضوع اكو شي يمنعني وميخليني احجي اكو شي مانعني من الرفض بس ماعرف شنو بيوم الخطوبه ومن سئلني السيد حسيت ع روحي شداسوي اني داظلم بنيه وياي ليش هيج اسوي وياها فكره اجيبني وفكره اتوديني بس مثل كل مره من اريد ارفض مااكدر انطق الكلمه وانطق بكلمه نعم شكيت بروحي بيه شي بس ضحكت ع روحي وسكتت من شفتها احس اكو شي يجذبني الها واكو شي يمنعني منها احسها صغيره ما توالمتي بس شلون وافقت ماعرف من اشوفهه اكره نفسي واريد بس اكتلها ليش فبلت بيه واني جبير ليش مارفضتني اكره روحي بس بعدين اكول هي شعليها اني قبلت واني لازم اتحمل المسؤليه من طلعت اتلكاني يامن وسند واصدقاء وياي ضباط كلبو المنطقه طلق وهوسه واغاني وركص اشوف الفرحه ع الكل ممصدكين اني راح ازوج حته اني مامصدك بروحي شلون وافقت ازوج من شفتها مرة الثانيه بلبيت جانت حلووه حيل بس ماكدر احط عيني بعينها احس اظلمها وياي اريد اكتل روحي واخلص افكار براسي خبلتني كل ساعه افكر بشي وكل ساعه اسوي شي شكل كمت ادك عليها بس ماعرف شنو السبب وليش بمجرد مااسمع صوتها اكره روحي قررت اكول لامي تنهي كلشي احس داموت من هذا الشي بس بمجرد ما دخلت البيت وامي فتحت موضوع العرس غيرت رئيي وكتلها بكيفج شوكت متردي خلي حته اطلب اجازه حجيت هيج وصعدت الغرفتي صفنت ع روحي شداسوي اني مو ع اساس انهي كلشي بس مكدرت ماعرف شنو المانعني ............ يتبع ،،،،،،وللحكايه بقيه ،،،،،، قرائه ممتعه احبتي تعليقاتكم وتوقعاتكم وتصويتكم الحلوو # نور الشمري # نوشه | ||||
|
| |
|
30-11-20, 04:21 PM
| #9 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قلبان يجمعهما السحر #البارت السابع بقلمي #نور ااشمري #احسبيني طفل مــآ يعرُف الصَح ، انـهَ الخسران عُمره و بيچ يربح ♥️. انصاف : جنت نايمه وكعدت ع صوت امي اتعكد بيه - لج انصييفه كومي يلا خل انروح للسوك هم ياله نشتري نيشانج من هسه شويه شويه وهم ياله انلحك كل يوميه نشتري شي - اوووف كاااايمه عفتها وكمت للحمام صفنت البارحه اجه مثنى وجايب وياه الفلوس مالاتي عشتو ما اجه رجلي ع كولت رانيا بدلت وطلعت ويه امي اشيل هذا وترجع هذا ضجت كلشي تاخذه ع ذوقها ووين الغالي كلشش لعبة روحي اريد شي اختاره اني وتاخذه ومطلع بي حجه ولوله هذا بي هيج هذا طويل كلش مو حلو يطلع عليج هذا هيج اخر شي عطت واني فايره نار شنو نيشاني لو نيشانها يممه مايصير هيج ترا هذا نيشاني واني اختاره مو انتي لا تخليني مااطلع وياج والله ومااشتري ولا شي واروح بهذني هدومي الي عدييي خافت امي خاف اسوي هيج وتدري بيه اذا عصبت وكلت كلمه خلص انفذها لو مدري شيصير سكتت وكامت تاخذ الي اختاره اني حسيت روحي عدي شخصيه واخير ماا اخذت رئيها ابد كل شي عجبني اخذته وماسئلتها حلو لو لا اهم شي قانعه بي اني مجنت اخدهم غاليات وهي تتخبل احس الغالايت حته مو حلوات اخذلي ثوب ب50 الف وهو يلعب النفس وابو 25 يخبل ماتهمني فلوسه اهم شي نازك وحلو خلصنا ورجعنا للبيت ميته تعب واريد بس انام هستوني غافيه ودك تلفوني طلعت راسي من جوه المخده هم عصر افندي الي ضاربها ع الصامت مارديت ميته نعس واذا ارد اطير النعسه وهو مايحجي عليش ارد بعد نمت كعدت العصريه باوعت ع الساعه من الفون وكمزة كمزه من هاي الزينه 70 مكالمه لم يرد عليه من نصر الدين صخام هذا شعده هلكد داك شنو شكو ردت ادك عليه بس استحيت ولا مره داكه عليه استحي ولو اموت مااسويه احسن شي ادزله رساله اي رساله احسن دزيتله الرساله واني ميته خوف ع خجل 💬 هلو خير اكو شي داك عليه هواي جنت نايمه ومادري بي اسفه بقيت افتر بلغرفه مارد عليه برغم شافها بس مارد بسيطه هو مو صوجه صوجي اني الي دزيتله رساله وهو مايستاهل ابو صلعه شمرت التلفون وطلعت اساعد امي بلعشه وهي تحجي ع تحظيرات العرس وشلون بينا البيت صغير ميكفي ومن هذا الحجي باوعت ع امي وهمست شتردين هسه ماما انروح اناجر قصر وانسوي بي العرس لو انروح انبوك فلوس ونستاجر قاعه لو ابيع ذهبي وانكبر البيت ترا هذا بيتنا اليعجبه يعجبه والمايعجبه ماجابري يجي عفتها وطبيت للغرفه فايره نار اعرف قصدها اتريدني احاجي نصر علمود اخلي العرس بقاعه لو شو وين ادري بيها امي واعرفها واعرف هاي افكارها هي ورانيا لان من ازوجت رانيا هم نكت ع مثنى اسوي بقاعه بس هو كالها محد يجي عليمن هلفلوس وصدك بعرسها ناس قليله انتبهت التلفون يلمض باوعت رساله منه 💬اذا موجوده راح اتصل اريد اكلج شي - يمه احس كلبي راح يوكف واخيررررا راح يحجي واخيرا مال هسه اهلهل بس فشله واخير ابو خشم يابس راح يحجي بعد صمت طويل دك واني كلت خل اتاخر شويه ومابين عليه كاتله روحي عليه وبسرعه ارد راد ينكطع ياله رديت واني مبتسمه همست الووو - الووو انصاف مو - عوجت حلكي وعقدت حواجبي همست لا جني انصاف اتفضل محتاج شي - ماشي لعد اريد اسئلج سؤال وجابي بكل صراحه ماشي جان كوه يحجي ومبين اعصاب يمكن لو كدامي جان هسه عيونه حمرر صرت اعرفه - ليش قبلتي بيه واني جبير عليج جنتي اتكدرين تاخذين واحد بعمرج يفهمج واني الاعرفه اكو من خطبوج قبلي - يممممه فتحت عيوني هذا شيقصد لا بس يقصد رضوان لالا شعرفه برضوان هاي شبيه بس منو الي خطبني قبله ماكو غير رضوان بقيت ارجف ماعرف شجاوبه جمعت قوتي وجاوبته -يعني مو اهلي كالو خوش ولد ااقصد خوش رجال وزين والعمر مايهم و - هذهو هذهو يلا مع السلامه سده بوجهي يا هذا شبي صاحي لوو مخبل صدك يحجي عود عفته واني ضايجه ششايف نفسه هذااا عشتووو بقيت اطلع ويه امي واسوك واشتري لحد ما امي كالت انروح للنجف انزور ونزور جدي ابوها الامي وهم نشرتي مناك هم خابرنا رانيا اذا تجي ويانا وسمعت امي تخابر بام نصر وتعزمها انروح سوه عمار كاعد كبالي يلعب بتلفونه باوعلي وكال - شلونه نصر وياج - هااا ئئئ زين هز راسه ورجع كال كلتيله راح انروح - لااا - ليش كليله ميصير اطلعين وماتكليله ماشي نصوفه اي مكان ترحيله كليله هزيت راسي اي وهو ابتسم ورجع ع تلفونه يلعب بقيت حايره شسوي شلون اكله خل ادز رساله اله 💬هلو نصر اريد اكلك راح نروح للنجف وو يعني اووف مسحتها وبقيت حايره شكتب هسه اني ويني وين هاي الورطه اخابره احسن لا ماخابر ادزله رساله بس شكتب اتنفست ورجعت كتبت رساله 💬هلو نصر شلونك ردت اكولك باجر اروح للنجف وكلت خل اطيك علم باوعت ع الرساله زين اي هذهو دزيتها اله وكمت سمعت امي كالت بيت نصر هم راح يطلعون مناك ونتلاكه بلامام صفنت يعني هم راح يجي وياهم بقيت اليل كله احظر بروحي واطلع ملابس البسهم وانسق باوعتله شفته شاف الرساله بس ماراد عليها ضجت ونمت واني ضايجه ليش هيج اذا ميريدني ليش ازوجني وقبل بيه كعدنا الصبح وبسرعه جنت منعسه وكوه امشي لبست وخلصت وطلعت عمار كاعد بلباب بس شافني طكها بضحكه كال - هيج ترحين - هزيت راسي واني كوه مفتحه عيوني من النعاس اتقدم جرني واخذني للمرايه وكال فتحي عيونج زين وباوعي باوعت ع روحي وصرخت صخام لابسه المالتو مالتي لوني تركوازي وجواها بجامتي لونها احمر وحجاب اخضر والكب ازرق صخااام وين راحن الملابس الي محظرتهن البارحه باوعت ع الفراش محطوطات عمار واكف بلباب يضحك ويهز بيده - ربحنا وعلي ربحناا هاي بعد اسبوعين عرسها بلا عليكم هز ايده وهو يضحك وطلع واني الدمعه بعيني يمه لو طالعه بشارع هيج شنو يكولون عليه شبيها هاي انخطبت واتخبلت لبست مالتو وردي وبنطرون ابيض وحجاب وردي وكب ابيض وبسرعه بسرعه البس وامشي حذائي اخذتها امشي والبس بيها طلعنا وعمار جان مائجر سياره النا والطريق كله هو يضحك عليه واني اخزر بي وهو خربان ضحك عليه اخر شي نمت بسياره من كعدت كلت اطلع تلفوني العب بي لحد مانوصل افتح بجنطه ادور ماكو صخام وين راح بعدين اذكرت نسيته جوه المخده خرب بحظي المصخم المزنجر يايوم كعد هو وصلنا للامام وكعدنا ننتضر اهل نصر شويه واجو رانيا وبناتها ومثنى وام نصر بس اباوع خاف وراهم بس ماكو ماشفته ائيست ودرت وجهي سلمت عليهم جان عدي امل يجي بس خابت امالي ودخلت زرت وخلصت اخذت مكان بصحن وكعدت اصلي يارب اذا هو مايحبني وماريدني ليش قبل يزوجني يارب بحق ابو الحسنين بعده عني اذا مراح يحبني ماريد ازوج واتعذب بقيت كاعده ادعي ضايجه واحس روحي مخنوكه بس من زرت ارتاحيت رانيا اجت لا عبايه لا حجاب حالها حال ههههه سئلتها شبيج كالت - ولج هذني الماشايفات شباج بس يدفرن هستوني وصلت اريد ازور وماحس غير انجريت ورجع لاخير ورجعت ادفع هستوني مديت ايد حته اكمش الشباك وصارت مره كدامي ودفعتني ورجعت مرة الخ هم ادفع وامشي بصف الحافه هستوني ردت اكمشه للشباج وماحس غير وكعت والنسوان فوكي همزين بناتي يم بيبيتهن جان راحن - وهسه زرتي لو لا - لا وين ولج متت وماكدرت اكمشه ماريد خليها صفنت بس من زرت اني الشباك كان فارغ وزرت براحتي اصلا النسوان سولي مجال حته اطب وازور من شافني ابجي اجت ام نصر ووياها غزل ورزان اخذت غزل يمي وصرت ابوس بيها باوعتلي ام نصر وكالت - يمه لا اضوجين لان ما اجه نصير والله ع اساس يجي بس خابرو الفجريه صار هجوم ع مقر تابع الهم وطالبي يجي بسرعه وماكدر علمود بعد شغله - عادي خاله ماصار شي ابتسمت بوجهه وهي جرتني باست راسي واني اخذت ايدها بستها رانيا تباوعلي وع خدها شبهه ابتسامه بس نظراتها معرفت افسرهن من شافتني اباوعلها دنكت ع بتها اترضع بيها اجت امي وطلعنا جان عمار ومثنى ينتضرونا ابوي مااجه ماكدر يعوف البساتين ويجي كال غير مره اجي جنت امشي بصف عمار واسولف وياه واضحك اجت امي جرتني - تعاي امشي بصف عمتج لا تخليني اعصب تحجي وصاكه ع سنونها صفنت ع امي شبيها مشيت بصف ام نصر وصارت كل الي شوفه اتكلي شوفي نصوفه هذا يخبل واني اهز براسي صدك جان ذوقها حلو وتقريبا نازك واني احب الاشياء النازكه اي شي يعجبني اكل الامي تشتري الي بس ام نصر من اشوفه الي ماتخلي امي تدفع وتدفع هي شكد لحيت واحجي وياها خاله والله هاي الفوس الي دزيتيهن اصرف بيهن عليمن ادفعين انتي بس ماتقبل كمت مااشتري ماريد اخسرها خطيه بس هي ماكو اجرني واطببنيي للمحل وااختاري خاله ماريد هي ابدد اله اشتري واذا مشتريت شنو الشي الي اباوعله حته لو بدون قصد تاخذ الي جانت مبينه كلش فرحانه بيه والفرحه مبينه بهتمامها بيه رانيا تكرص وتغمز الي - اي عيني اي ادللي بعد شتردين ماهتميت الكلامه وبقيت امشي شفت حلويات وكرزات اموت عليهن رحت ع عمار - عمار عمار حبااااب باوع - شكوو عليمن اباوع ولج - هذاك المحل ابو الحلويات والمكسرات حباب اشتريلي ضحك وكال تدلل ابو الصووف عماااار اذا طلعنا وعمار ويانا ابد مايصيحلي باسمي بشارع ولا يدلعني كله ابو الصوف يصيح الي اشترالي واطاني العلاكه جنت شايله علاليك هواي كتله وين احطها فوك راسي مثنى: اي اجيبلج هاي القاعده الي تنحط ع الراس ثبتيها ع راسج وحطيها وامشي وصيحي العلاكه بالف العلاكه بالف ياهو اليشتري - ياااااا هههههه عاطت بي خاله ام نصر وهي تضحك - خلف الله عليك الملابس المشتريهن كل وحده ماتقل ال30 الف تاليتك اصيح بيهن بالف - ههههههه والله حجيه انتي قشمر قطتج هاي القزمه صدك جذب باوعت ع مثنى واحد شقاوجي كلش ومايهتم الشي ياا مثنى حته انت اصيح قزمه والله مو كصيره اني شجاكم ام نصر : تعاي حبيبه تعاي مالج دخل بيهم والله طولج يسواه ويسوه عشيرته الهذا ابو السيارات دخل نوصل اله اخلي نصر يملص هاي شعراته ويزنه صفر مثله اشوف شلون بعد يطلع - لااا يمممه دخيلج كلشي ولا شعري بروح المرحوم ابوي بداعت العشره البينج وبينه لااا كلشي ولا هاااي عمي السموحه منج مرت الامبراطور نصر الدين ستري علينا بداعت الخوه - ههههههههه باوعتله بمكر وحجيت اي راح اسكت وماخلي خاله تحجي النصر بس بعد ماتكول قزمه - ايي ايي زقجه - يااا خاله وخر بقه هو وعمار بس يشاقون ويضحكون وياي رحنا للمقبره هم راحو الجهه واحنه بجهه وكلمن رجع المحافظته اخذت الطريق كله افكر مابقه شي وادخل لبيت هاي العائله واصير وحده منهم بس ياترى راح اكدر اتقلم لو لا وصلنا للبيت ومرت الايام صارت امي تنظف وتعدل دكت رانيا عليه جان يوم خميس جنت كاعده اسجل النواقص كالت الخميس الجاي العرس احس كلبي صار طبل واحس حبل المشنقه مالتي قرب مو عرسي كلش خفت كالت ترا حاجيت عمتي والحنه راح اصير بلقاعه مو بلبيت - ليش رانيا منو سمحلج ماريد بلقاعه اني اريد بلبيت مالتنا - انجبي انتي ماتعرفين لج الناس هواي وين انخليهم - لا مو هووواي بس تستحين انتي وامج من بيتنا كدام عيالج موو كوليها ليش اضمين عليه ترا اعرفكم كلش زينن - يايا شبيج ولج منين جبتي هذا الحجي - وخري رانيا والقاعه ماادخللها خليها ببالج سديته واني افور احس دخان كام يطلع من راسي الى متى يبقن هن يقررن عني اني ماريد بلقاعه هن شعليهن منو العروس اني لو هنه بليل دك تلفوني رساله شفته من عده استغربت شعجب ذاكرني اليوم الله يستر 💬 شلونج انصاف سمعت ماتردين الحنه بلقاعه ليش ترا اني الي كلت لرانيا اريدها بلقاعه هااا انصدمت من كلامه وانصدمت اكثر من اختي ليش كلتله شغله بيني وبينها ليش اتروح اتكله 💬مااريد اريد اخذ راحتي وبلقاعه ماكدر اخذ راحتي 💬 لاا ماعليج اني اوصلي اهل القاعه وكلشي تردي يصير ماشي 💬ماشي 💬خوش تردين شي بعد 💬لا سلامتك بس 💬 بس شنو 💬هيج اخذ راحتك 💬 تعااي احجي ماحب هيج تصرفات يا تحجين يا ماتحجين مو اذبين الكلمه نصها وترحين 💬ماكو شي واسفه اصلا ماعرف تصرفاتك اعذرني ماتتكر مرة الثانيه 💬 شبيج اسفه واسفه هذهو روحييي صفنت هذا شبي مايتحاجه نار 24 ساعه درووح هسه كلش كاتله روحي عليك خلصت كلشي وحجزت عد الصالون وكملت كل النواقص ورانيا تخابر تحجي واسوالف واني ماديرللها بال مابقه شي بس يومين احس اكو شي ع صدري كلبي ناخزني مامرتاحه ابد ثاني يوم اجت رانيا النا ورحت للصالون حفيت وسولي شعري ماقبلت اصبغه وتعاركت اني ورانيا اخر شي ام الصالون كالت الرانيا اذا العروس متريد اصبغه ليش نجبرها خليها ع راحتها جانت رانيا تريد اصبغه اصفر واني اموت من هذا اللون واميشه تلعب روحي كمت اختاريت لون اسود وخصل ثلجيات من شافت ام الصالون الاوان كالت عاشت ايدج لان راح يكعدن وزن ع شكلج ولون بشرتج صبغته وخصلت كم خصله ثلجي وحفتلي طلع شكلي غير يختلف جذريااا رجعت للبيت بقيت بلغرفه استحي اطلع لابويه وعمار هيج احس مسويه ششي غلط كاعده العب بتلفوني ومتوتره دخل عمار من شافني ضحك - هاي شنو عيني اليوم الكمر عدنا هو بس اليوم وباجر خاتله بلغرفه شعدج دكرمي كومي خل نشبع منج من كال هيج حسيت دموعي ع خدودي متحملت كمت ركض شبكته - عمار ماريد ازوج اريد ابقه يمكم راح اشتاقلكم شبكني وهو يضحك ولج تردين تفشلينااا شنكول النصر يابه العروس ماتريدك لان راح تشتاقلنا - زين مايصير ازوج وابقه يمكم اله اروح البغداد - ههههههههههههههههه لا ميصير باسني من راسي وطلع طلعت وراه وكعدت بينه وبين عمار وصرت احجي وياهم واضحك والدمعه بعيني ماكدر افاركهم كلساع حاظنه واحد منهم ودموعي تنزل ثاني يوم الحنه جانت بلقاعه والكل ملتهي وهوسه وخبصه رحت اني ورانيا وبت خالي للصالون مكيجتني ام الصالون وكامت تسئل ع الوان بدلاتي واني اجاوبها مكياجها جان نازك وكلش حلوو فد شي حبيته حيل وتسريحتها جانت كذالك بسيطه وحلووه نص شعري عافته مفتوح ومبروم وشالت نص منه بفيكه حلووه مكياجي بعد احلا لبسة بدله لون بصلي كلش حلوه من كدام قصيره ومن وره طويله وبيها فيونكا من وره وصدرها كله تول لبستها ولبست البركع والعبايه وطلعتني رانيا ولافتني لف جان عمار ماخذ سيارة صديقه اخذني للقاعه دخلت جان نص كرايبنا موجود كعدت ع الكوشه واحس كلبي يطلع من مكانه دكاتها الف الف وعيوني ع الكل الكل فرحان بس اني احس بغصه بس ابتسم بكذب اجو اهل نصر كلهم وكرايبهم كلهم ترست القاعه ترس سلمو عليه وفرحانين بيه جان كل الي يطب يباوعلي بدلت بدلتي ولبست بدله حمراء طويله مخصره اتخصر عليه وبلا تعاليك ورجعت بدلت بدله لخ وجانت لونها اسود وذهبي مجرد ما دخلت الكل استغرب جانت كلش حلوه اكثر بدله عجبتني سودا وذهبي ومدنفشه اتخبل واردانها تول اسود اغلب الكاعد استغرب لان سودا واسمع الناس اتكول فال مو زين والنص كال شكد حلو اختيارها ماهتميت اهم شي تعجبني مااصدك بخرافاتهم هي بدله وبعدين الاسود سيد الاوان بقيت متونسه لبسة البدله الاخ جانت قصيره ولونها سمائي وبيها ابيض واردان واحد واخر شي لبسة بدلتي البيضه جانت مدنفشه كلش وطووويله تسحل وراي خلصت الحلفه واني ابتسم مااجه حناني وحنتني خالتي ام نصر كالو ببغداد اصدقائه مسويله حنه وميكدر يعوفهم ابتسمت وسكتت خلصت ورجعت للبيت ميته تعب نمت شويه وفزيت شفت حلم او كابوس عبالك امشي ورانيا كدامي تضحك واتكلي امشي لا تخافين جان الطريق كله شوك ووصخ طينن ووصاخه ويخووف كلش لحد ماتركتني رانيا وراحت بقيت افتر واصيح بس محد سمعني وشفت نصر مدد بنهاية الطريق فرحت من شفته بس حاولت اكعده ماكعد بقيت اضرب بي اريده يكعد ويطلعني بس ماكعد لحد مافزيت من النوم خايفه ارجف الساعه ب4 الفجر كمت اتوضيت وكعدت صليت بجيت لحد ماكلت بس، بقيت كاعده مكدرت انام افترا ببيتنا اليوم اخر يوم الي هنا واليله مانام هنا حسيت كلبي نغزني والحلم مخوفني طلعت للبستان وماخليت مكان ما وكفت وذكرت طفلتي وايام الي قضيتها بهذا البيت فرح وحزن وعركات وكل شي جوري مااجت بحنتي لان جان عدها امتحانات بس كالت اجي بلعرس اودعج صبح الصبح شفت بابا كعد من شافني بلمطبخ كاعده فتح اديناته ركضت اله ابجي اخذني بحظنه وهو يمسح ع شعري ويهدي بيه بقه يمي لحد ما كعدت امي وعمار واستلمني عمار شقه وضحك نساني شويه شايله هم فراقهم ماكدر بدونهم رحت للصالون اني ورانيا واسلمتني ام الصالون هم خلصت لبست بدلتي البيضه والبركع والكبوسه ولفت عليه العبايه واخذني عمار للبيت جانت الساعه 2 ونص والزفه تجي ب4 دخلت للبيت بس خالاتي ومرت خالي ومرت عمي وبناتهن كعدت واني ارجف اجت جوري - لجج طالعه اتخبلين فدوووه لج شبيج اترجفين - خايفه جوري خااايفه كلشش - من شنو حبيبتي ماكو شي يخوف شبيج ولج وين نصوفه السبعه الماتخاف - باوعتلها صفح منو كال اني سبعه اصلا اكبر جبانه من الفاره اخاف وهاي تكلي سبعه هنيالي اجت مرت عمي وخالتي بصفي وضلن يضحكن حجت خالتي وهي تباوع الامي - ام عمار البنيه ترجف شبيها شنو خاله بردانه - هزيت راسي لا - لعد شبيج خالاتي ام عمار انتي حجيتي وياها خاف خايفه - لاا كلت رانيا اتحاجيها من توصل لهناك - لعد شبيج ياخالتي اترجفين بقيت كاعده ارجف وخايفه وجوري بصفي اتهدي بيه لحد ما اجو الجهال يصيحون اجه العريس اجه العريس وكفت ع حيلي خايفه جرتني جوري كعدتني اباوع كلها تضحك باوعت الجوري وعيوني مليانات دموع - شبيج يحظي مستعجله بس سمعتي اجه وكفتي هههههههههه اطي صبر خجلت وسكتت بقيت كاعده وبيدي الورد والقران والمرايه والشمعه كوه حاطتهن بيدي امي تجي وتحط بيدي رانيا اتحظر بروحها حته تجي وياي بس امي كالت ماكدر اعوف ابوج واخوج وحدهم باجر الصبح اني يمج ابتسمت شنو الجديد يعني دائما اني اخر مسؤلياتها بقت ع هاي يعني طبت خالتي ام نصر واخواته ومرت اخو وهو وراهم جان لابس قاط رصاصي وقميص ابيض ويلك اسود والبنطرون والستره رصاصي معدل لحيته وشواربه ومخفف لحيته بقيت واكفه اباوعله ومرتبكه كوه واكفه ع رجليه واحس روحي راح اوكع طالع حلوو صراحه اجذب لو اكول مانعجبت بي وهو يتقدم الي وكف بصفي ومبتسم تك خد بدل حلقتي وحطها بيدي الثانيه واني ارجف باوعلي عاكد حاجبه همس ليش اترجفين بردانه هزيت راسي بلا ابتسم ودنك بقت جوري كامشه الكامرا واصورلي اني وصيتها اصورلي ماريد اصور بلفون حته الحنه كله بلكامرا ماصورت بلفون وماخليت احد يصورني حته رانيا كتلهم نصر مايقبل وهو جذب اصلا ما محاجيني بس مااحب احد يصورني وكف كدامي عدل الكبوسه ونزلها ع وجهي وجاب العبايه فتحت عيوني الكبوسه جبيره ومخطيتني كلياتني ماطالع مني شي بعد شنو العبايه باوعت ع رانيا عضت شفتها واشرت ع نصر بمعنى سكتي هاي الاوامر بعد سكتت وحطو العبايه ع امتوني والكبوس مخطيني كلشي ماشفت بعد بس ادري جوري كاعده اصور طلعت واني ارجف واحس روحي كوه امشي ع ساعه اوكع طلعت واسمع صوت ركصهم واغانيهم وهوساتهم الاصدقائه واخوته وصلت يم السياره وماحس بس صوت الطلق نزيت ووكعت الكماشه مال الورد الكامشته من ايدي سمعته صاح الله الله شنو القصه بس حجاها بعصبيه دنك بسرعه شالها واطانيها وصاح لحد يرمي رحمه الاهله ركبت بسياره وهو بصفي واخوه سند كاعد يسوق وامه بصدر رانيا ركبت ويه رجلها اني كلتلها لجوري من اتخلصين تصوير اطي الكامرا الرانيا مادري اطتها بعد لو لا بالي يم الكامرا اذا نستها منو يجيبها الي بسياره احس السياره تجي منا ومنا دخت وريحة دخان مال جكاير موتتني رفعت الكبوسه شويه شفته كاعد يدخن بصفي انتبهه عليه كال - شو باوعيلي باوعتله خايفه وهو باوعلي وعاكد حواجبه وماعاجبه الوضع كال خليج هيج الجام مضلل فرحت وبقيت اتفرج اكو سياره كلساع وتجي يم سيارتنا الطريق طويل والسيارات كلساع تجي يم سياراتنا وهورنات وهوسات واغاني شفت واحد صف يم سيارتنا وصار يمشي بصف سيارتنا نزل الجامه نصر وصاح - لك يااامن اثكلل راح انزلك وعلييي هو ضحك وكال تتدلل عيني ابو برهوم بس لا تعصب يمعود ويضحك سد الجامه ويهز براسه دار وجهي خزرني من شافنه موخره الكبوس واباوع يمه متت دنكت راسا خايفه لحد ماوصلنا روحي طالعه نزلوني وطببوني للبيت رانيا وياي اباوع محد من اهلي بس رانيا وخالتي الجبيره اجت ويه الزفه حسيت بغصه لان احتاجيت امي كعدوني بصاله مالتهم وعشوو الكل واني مااكلت ولا حطيت لكمه بحلكي من الصبح بس اكل اتقيه بقيت هيج احسلي لحد ماكالو يلا صعدوها خل يطبون الولد يزفون العريس اني هنا متت اريد اوكف ماكدر اجت رانيا اتكومي ماكدرت اكوم رجليه ثكيله بقيت كاعده شويه ورانيا اتهدي بيه احس جمدت رجليه وبعد ماحس بيهن كمت احرك بيهن كوه ياله وكفت وصعدت فوك كعدتني رانيا ع الجربايه - لا تخافين نصوفه ولا تهتمين الشي ماشي وشنو يكلج سوي لا تخلي يعصب حجت هيج ونزلت البركع ع وجهي وسمعت صوت هوساتهم جوه وتبجهم ع الدرج وهم يهوسون النصر انفتح الباب ودخل جنت مدنكه ومجلبه برانيا خايفه هدتني هي وكالت يلا اني طالعه طلعت باوعت شفت رجليه بعدها بلباب سمعت واحد صاح - نصررر مو تفشلناااا يمعودددد واليوم يومك يا بطل ههههههههااااي بشرررني رفعت راسي صاح هو وينزع الستره - يااااامن انجببب ووانزل لااا اطلعلك وابو فاضل - لالالا يمعود وين تطلع تريد تفشلنااااا شنكول شنحجي هاي تاليتك ماادبرهااا - لك ياااااااامن مجرد ما عاط طفرت وكفت واني خايفه من عيطته سمعت صوت ضحك اصدقائه بره وصوت رجلين ع درج ادل ع نزولهم كلهم دقائق وصار هدوء بره واني واكفه مصككه بمكاني رفعت شويه من البركع شفته ينزع بلرباط وعصبي بمجرد ماشافني فتح عيونه وصارن حمر دم اتقدم صار كدامي جر سترته وطلع وهو يركع الباب حيل ........يتبع ،،،،،،وللحكايه بقيه ،،،،،،، قرائه ممتعه احبتي تعليقاتكم وتصويتكم وتوقعاتكم 🥰😍 #نور الشمري #نوشه | ||||
|
| |
|
30-11-20, 04:33 PM
| #10 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| مليان سحكات مليان 😂 #قلبان يجمعهما السحر #البارت الثامن بقلمي # نور الشمري #كُنْتَ لِيْ وَعْدَاً وَعْهَدَاً وَانْتِظَاراً كُنْتَ إِبْحَاْرَاً يُسَاوِيهِ انْتِظَارِيْ كُنْتَ مَجْدِيْ كُنْتَ رَاْيَاتِ انْتِصَارِيْ صِرْتَ عُكَّاْزِيْ وَعَجْزِيْ وَانْتًحَاْرِيْ لَمْ يَعُدْ وَجْهِيْ يُلاقِيْكَ انْبِهَارَاً وَصَبَاْحَاً أَوْ يلاقِيْكَ انْبِهَاْرِيْ قَدْ كَسَرْتُ عَنْدَ قَاْعِ العَينِ حُلْمَاً وَمَسَحَتُ كُلَّ ذِكْرَىْ فِيْ جِدَارِيْ مَاْ بَقَىْ شَيْءٌ أُجَارِيْهِ فَلا تَرْ جُوْ سَمَاحاً أَوْ أو إِيَاباً مِنْ حِوَارِي نصر الدين : ركعت باب الغرفه بكل قوتي وكعدت بصاله الفوك راسي احسه حينفجر احس اكو شي غلط عصرت راسي بايدي يالله دخيلك بمجرد ماشفتها ماعرف شصار بيه احس روحي وحش واحد حقيرر شلون قبلت بيها مادري بقيت كاعد بربع ساعه فوك بصاله باوعت الساعه 9 ونص وهدوء جوه اضاهر كلها راحت بس كرايب باقيه جريت تلفوني ونزلت كلها بلستقبال كاعده وسادين الباب والي بلغرف كاعد عفت الكل وطلعت حته السياره ماخذتها لان السويج عد مثنى اخذت تكسي وطلعت من المنطقه كلها احس بخنكه مو طبيعيه اول مره هيج يصير بيه ليش هيج صار مجرد ما شفتها اتخبلت اكو شي بداخلي راغبلها بس مجرد ماشوف وجها وبرائتها وعيونها التلمع بمجرد ماتحطها بعيوني احس بذنب احس ظلمتها شلون هيج سويت ماعرف نزلت ماعرف وين باوعت شفت روحي بلكراده حيل شجابني اني لهنا اشكرت من ابو التكسي ونزلت دكيت ع يامن ماعدي غيره هو الوحيد الي اسولفله كل همومي وكلشي يصير بيه احسه روحي وكانما احجي ويه روحي ارتااح من اسولفله برغم سخافته بس مو بيدي ماكدر بدونه دكيت عليه رد وهو يضحك - هااا ابو برهوم بشرني دبرتها لا هههههه - انجب يامن وانت وين - وين شنو هستوني طبيت البيت ها اها جنت بعرسك غيررر مابشرتني انشاءالله ابراهيم بطريق موو هههههه - دتطلع دتطلع تعالي اريدك وانجب سخافتك هاي - وين اجي يمعود اتريد مرتك تدعي عليه واخاف بعد ماازوج من دعائهاا اخذتك بليلة عرسك - يااااامن كتلك تعال اني يمك قريب عليك بلكراده تعال اريدك بسالفه - صدك تحجي لو تشاقه شجابك للكراده ابو الغيره احجي غيرها وينك وين الكراده ولك - يااااااامن - خلص خلص جاي جاي وين بلكراده - يم تمثال كهرمانه فظها لا تتاخر - يلا خوش جايك طبكه واني بقيت فتحت اول دكم من القميص احس ماكو هواء صالي ايام هيج ماكدر اتنفس وبمجرد مايجيبون طاري الزواج ارتاح وافرح بس دقائق واعصب واتخبل من اذكر اني ايدتهم بكل كلمه يخص العرس شلون ماعرف مزاجي هلايام فدور ماعرف شنو اريد بضبط شويه وطبك يامن بسيارته يمي هو بيتهم بلكراده مااتاخر راسا اجاني نزل وكعد يمي جنت كاعد ع الرصيف وكامش راسي كعد بصفي وحط ايده ع جتفي وهمس - شبيك نصر خوفتني البنيه بيها شي اكو شي - اخ ياامن اخ راح اتخبل وحق ابو فاضل راح اتخبل لك ماعرف شنو اريد ساعه اريد ازوج وساعه اكره روحي لان قبلت ع الزوج لك يامن داحس ارتكبت جريمه مو ازوجت ولك طفلللله تعرف شنو طففففللللله نظراتها عيونها حركاتها شكلها ملامحها جسمها طولها كلشي بيها يكول طفله شلووون ازوجتهاااا مادري صرت احجي واضرب ع راسي احس فقدت ماكدر افكر بشي غير اني واحد ظالم من شفتها واكفه بزاويه ورافعه البركع وعيونها مليانه خوف اتباوعلي بخوف وتوتر وخجل كرهت روحي شلون طاوعت امي وقبلت سنين اني معتصم ع الزوج وتالي اخذ بت الناس واظلمها وياي ليشش - اووكف اووكف وحده وحده شبيك شنو متريدك اهلها جابرينها لو شنو نصر اول مره اشوفك بهلحاله شكد مرت عليك ايام بس مشفتك هيج مهموم لهدرجه شنو مشكلتك يخوي - باوعتله وعيوني مدمعه اني نصر نصر الدين الي حلفت مااادخل كلبي وحده من جنس حواء غير امي واخواتي وحلفت ما تنزل دمعتي ولا انقهر علمودهن من يوم الي جرحتني شهد واني حالف ماتقهرني حواء بعد اليوم اليوم اني احس ظلمت وحده منهم مثل ما ظلمتني وحده بيوم من الايام يمكن لو مزوج من زمان جان بتي اصغر منها بكم سنه بس غمضت عيوني ونزلت دمعتي لثاني مره بحياتي اول مرة نزلت دمعتي بوفاة والدي الي حسيته كسر ظهري وراح زعلان مني شكد جان يحاول يزوجني بس اني معاند وراح وهو زعلان مني واليوم اليوم نزلت لان ظلمتها لهطفله بس ليش ليش اكو شي يجذبني الهااا كل ماحاول الغي كلشي جنت اشوفها كدامي واغير رئي بس اليوم حسيت شكد اني واحد حقير واناني وحيوان وظالم حسيت ع ظربات يامن ع ظهري وهو يحجي - كول يالله نصر شجاك اول تالي شبيك يمعود اذا البنيه موافقه ومن ذاتها شنو الي مخليك بهلحاله متكلي ليش هيج قاهر روحك - يااامن مكاعد اتحس بلي احسه يامن مداكدر اتنفس احس اكو شي يمنع تنفسي لك نظراتها الخايفه الخجوله لسه بدماغي ماترووووح لك اصور لو اتقربتلها شنو راح اكول الربييي طفله امي شلون خطبتها الييي ماعرف شلووون - يعني انت ماشايفها قبل العرس شبيك يامن احسك مو انت التحجي - هههههه هو اني شاك بروحي مبدليني بلقساط لك كل شويه احس بروحي داصرف شي اني مو راضي عنه بس ماعرف شلون اصور البارحه اتعاركت ويه سند الي طول عمري اني اعتبره اب الي برغم اني اكبر منه والبارحه ردت اظربه اصور يامن ردت امد ايدي ع اخوي ااااخ ياللهي دخيلك اني ع ساعه الله ياخذ امانته هاي الطفله تترمل بسببي ليشش - يامن كل هذا لانك ما ماتعرفها عمرك طويل لا تحجي هيج بعدين دشوف كلامك مو مفهوم كلساع تحجي شكل دوختي والله العظيم كل كلمه وكلبت ع غير موظوع ورجعتلها احسك سكران مو صاحي تدري - باوعتله ورجعت دنكت هو اني مادري شبيه انت تريد تعرف شبيه -دكووم كوم وياي هسه اخذك المكان ترتاح بي وارجع للبيت وحاول تعيش وياها هذا زواج مو لعب وبعد انت ازوجتها وكدام الناس ماكو رجعه اتوكل ع الله وبطل هذا مزاجك ابو طفله كال طفله دكووم يمعود شتريد بعد جتك وحده بلباكيت ربيها ع ايدك وهي هم توعى عليك وتتعود عليك حته بمرور السنين اصيرللها اب قبل الزوج يلا لك كوم مامتعود اشوفك هيج ترا انت حزام ظهري ماكدر اشوفك هيج - جرني وركبني بسيارته ومشه جريت باكيت الجكاير مالته حاطه ع الدبشون وكمت ادخن واني صافن ع روحي احس جنت بنص غيبوبه وهسه كعدت باوعت هذا الطريق اعرفه كلش زين جنت كل ما اضوج اجيله واشكيله همي ابتسمت ع يامن يعرفني كلشي زين ويعرف راح ارتاح بمجرد ما ازوره طريق الكاظم (ع) كل هم واقل شي يصير بيه اروح للكاظم ارتاح نفسيا وجسديا يامن اخوي الثالث الماجابته امي وصلنا عفت تلفوني بسياره وهو هم ونزلنا راسا دخلنا الساعه قربت ال11 الشباك فارغ ومابي احد هنا ارتاح لو الدنيا اطيح ع ظهري بس من ادخل هلمكان ينزاح كلشي بمجرد مادخلت جريت النفس بكل سهوله مجنت اكدر اتنفس بصعوبه اجر النفس زرت وخلصت انتبهت ع يامن تركني ووكف ع صفحه وكفت بصف الشباك ورجعت ادموعي تنزل ياللهي دخيلك اعذرني اذا ظلمتها لهطفله هاي بهذا زواجي منها ماعرف شلون وافقت عليه وانت ادرى بهذا الشي ساعدني يابو الحوائج ما فديوم دخلتلك وطلعتي خالي الادين واليوم اريدها منك اريد ارتاح احس روحي ظالم هوووواي دليني ع الطريق الصحيح ياللهي انتي الوحيد التعلم بحالي صليت ركعتين ووكفت صفنت ع روحي اني بس من اكون بلبيت اصلي من اكون خارج البيت وياذن مااصلي ومن ارجع انساها ومااقضيها حته من عدي مهمه لو شو شنو بدائره مااصلي يعني بختصار يوم اصلي ويوم لا لو الضهر اصلي والمغرب لا والعكس خلصت صلاة وطلعت شفت يامن كاعد ينتظرني من شافني وكف طلعني جان ساكت مو من عوايده اليامن يبقه ساكت بس مايريد يزعجني ويخاف هم ههههه اطلع حركتي بي نص الطريق وحجه - اكلك نصر يعني هسه انت فشلتني كدام الطفله بلا عليك هسه شتكول عليك وسفه والله حجاها وهز راسه برفض باوعتله بخزره مال اركع راسه بجامه هسه احد يكلي ليش هو سكت راسا حس ع روحه ادري بي مايعرف يسكت وصلني للبيت جانت الساعه وحده تقريبا باوعتله كتله انزل باوعلي بنص عين وكال - اكو صاكات لو بس العجايز - اي مو اني فاتح استغفرالله امشي ولييي هو مو صوجك صوجي اني الي اعزمك يا هتلي سرسري مو هسه زاير لك زيارتك للسكف اذا وصلت تعالي اعتب عليه طبكت الباب ونزلت وهو يضحك عليه طبيت للبيت كلمن بغرفته واكو نسوان بستقبال نايمات وبصاله امشي واكول هسه اجفص ببطن وحده منهن بس عدت سلامات وصلت للدرج وما جافص ببطن وحده الحمدالله طلعت فوك وني رجعت احس النفس كوه اجره واختنكت بس اتنفس وهمست - دخيلك يالله يااا كاظم الغيظ دخلت للغرفه جانت ظلمه هندس وبارددده ثلج اكو ضوه خفيف احمر مال السبلت وضوه من الشباك متسلسل من وره البرده من بره انتبهت عليها جانت مدده ع الجربايه وبس رجلينها اتهز بيهن عرفتها كاعده شعلت الظوه واني ماباوعلها ماريد يصير بيه مثل قبل شويه من شفتها لهذا اجاهل اباوع عليها شفتها طلعت راسها من جوه اللحاف واتباوع عليه بخوف ابتسمت ع نظراتها نزعت ساعتي ومحبسي حطيتهن ع الميز واباوعلها من المرايه وهي متدري احس اكو شي يجذبني الها اريد اخذها بحظني بس اصفن ع روحي اني حتى ماعرفها ولا حاجي وياها قليل كلششش وع كد السؤال والجواب ليش هيج دايصير بيه لعد اخذت تراكي ودخلت الحمام تحت نظراتها الي تنظرها الي بسرقه طلعت اتمدتت ع الجربايه بصفها وهي طفرت تباوعلي بغضب انصاف : اول ماطلع طفرت من ركعتها القويه للباب صفنت عليه هذا شبي اتخبل وخرت البركع وكعدت ع الجربايه اهز برجلي وماعرف شسوي مرت ربع ساعه وسمعت خطواته بصاله يمه طفرت خايفه لا بس يطب والله يخوف من جان عصبي ويباوعلي بنظراته هاي كلت خلص اقراء الفاتحه ع روحي باوعت وين اختل يالله وين اظم روحي عنه والله يخوف والعباس يخوف هسه اني شورطني وازوجت ويني وين الزواج بقيت افتر بلغرفه اريد مكان اظم روحي بي بس مادخل اتنفست براحه لان ماكو صوت اتقدمت ع الباب فتحتها بهدوء ماكو احد بصاله مديت راسي يمنى يسره ماكو احد الحمدالله راح ركضت فتحت الجنط مالاتي وطلعت تراك باوع اكو سيت ابيض ع القنفه الي بغرفه الغرفه جبيره كلش غرفه كامله جان الكنتور من جهه وبصفه ميز بي جرارات خشبي حلوو فتحت اول جراره بي ملابسه الداخليات يبوووووو سديتها بسرعه واحس وجهي احمر بسرعه باوعت ع الباب لا احد يطب يمه هسه الي يشوفني شيكول متربعه وكاعد ببدلتي البيضه شطوله وكاعده اتفرج ع ملابسه يبووووو فتحت الجراره الثانيه جانت فارغه والثالثه بيها جراجف وماعرف شنو والرابعه جانت مقفوله حاولت ردت ماكو ماانفتحت باوعت ع الجهه الثانيه جان اكو قنفه وميز مال تلفزون الغرفه حلوه بس احسها مامرتبه يرادلها ترتيب يعني ميز التلفزون صاير صفح والقنفه بصفه تقريبااا ميز المرايه جان جبير والمرايه اتخبل جبيره كلش وبيها خانات وجرارات اكو زاويه جبيره صايره بنهاية الغرفه مرايه ع طول الواحد وتنفتح بيها تعاليك حمام بداخل الغرفه وثلاجه حلوه جانت بس يرادله تعب وفيكات كمت اباوع ع روحي بلا اني عروس متتربعه وكاعده بنص الغرفه هسه اليدخل شيكول زين اذا سئلو ع هذا المعصب ابو صلعه شجاوب اووو هسه خل ابدل وبعدين افكر عفت السيت يمه لو يموتون مالبسه شنو مخبله البس هيج حته عمار يذبحني يممه لبست تراكي وفتحت التسريحه مسحت المكياج ورتبت روحي مشطت شعري لان صاير عكد من وره التسريحه والسبره باوعت الساعه 11 صارت هذا وينه صاله صاله ساعتين بقيت افتر بلغرفه واكتشف البيها رتبت ملابسي بلكنتور وغراضي، باوعت الساعه وحده اله ربع كمت شغلت السبلت وطفيت الظوه نعسيت اريد انام كاعده من الصبح اذكر الحلم الشفته الصبح خفت استغفر الله ونمت ستوني غفيت وفزيت ع صوت الباب يفتح حسيت بي دخل يمه وكف كلبي يارب احميني يارب والله والله اسوي الي يريده واسمع كلامه مثل مكالت رانيا بس لا تخلي يعصب رفعت اللحاف ع كيفي جان كدامي مطيني ظهره وكدام المرايه ينزع بقيت اراقب بي بسكوت بدون ميحس عليه كاعده لحد ما ندد بصفي طفرتت يمه هذا راح ينام بصفي عزااا شكد فشله مايستحي باوعتله بخزره وهمست وكلي غضب - منو سمحلك اتنام بصفييي ماتستحي والله اكول العمار عليك باوعلي رافع حاجبه ومبتسم تك خد - شبيك تباوع هيج ترا احجي صدك اني شكو نايم هنا - وين انام لعدد حجاها ورفع حاجبه الي دنكت وحجيت اي نام اني انام بلكاع عيبب انام سوه - عيبببب ههههههههههههههه خرب بيومج جر اللحاف واتغطه ويحجي دنامي نامي راسي يوجعني مالي خلكج هههههه عيب والله يالله هههههه باوعتله هذا شبي ليش يضحك كلت نكته اني والله لو عمار يدري بي اتمدتت بطرف الجربايه واباوعله بخوف ونمت نعسانه بسرعه نمت بس خجلانه انام بصفه غفيت ومادري بروحي نومي ثكيل حيل حسيت ع واحد يصيح بسمي فتحت عيوني ضلمه سمعته يصيح باسمي يا لعد هذا وين شلت راسي انطخ صحتت بعلو صوتي ااااخ اباوع اني وين شفته دنك يباوعلي رافع تك حاجب الي عزا هاي اني وين باوعت زين صخام هاي اني جوه الجربايه شسوووي هناااا طفرت ورجع انظرب راسي بجربايه صحت اخخخ هو كاعد ركبة ونص ومدنك يباوعلي اشر براسه اطلعي طلعت زحف اباوع الجرجف مخربط واللحاف نصه بلكاع عضيت شفايفي وباوعتله كال - شسوين هناا ولج شنو بردتي هههه - هااا لاا بس موو يعني لان نومي ثكيل ومخربط يجوز وكعت ومادري بروحي وو - ههههه خرب بيومج كعدت نص الليل اباوع انتي ماكو كلت هاي شردت مني - شفته حجاها ودار وجهه كعد ع الجربايه وعدلها ومدد باوعت الساعه 5 الفجر خرب الله يطيح صبغي ع هلدكه طفيت الظوه واجيت اتمدتت ع الجربايه همس - تعاي هناا لا توكعين ادور اشدلج سياج حته ماتوكعين لو اربطج هههه - باوعتله بنص عين شكالولك عليه حيوان وتربطني حجيت وسكتت خرب مااعرف اسكت اني ابتسم وكال - لا حشاج عمي وينج وين الحيوان باوعلي وكال - انتي شبيج نايمه بلحافه مااكل بشر والله تعاي لا توكعين واتكعدين الناس النايمه جوه هسه احنه محرومين من النوم هم شذنبهم - ئئئ لا موو هيج بس يعني شلون انام بصفك وانت يعني انت غ ر غريب - غريب !!!!!! هاي منين طلعتيها شو تعاي تعاي انتي يرادلج كعده لج بابا امي رجلج تعرفين شنو يعني رجلج يعني - باوعتله هزيت راسي اي غير زوجي - اي عفيه زوجج بس انتي تعرفين شنو يعني - هزيت راسي هذا شبي عباله طفله اني ماافهم اتورطت حجيت كلمه حجتي بكلبي باوعتله بغضب وهو يباوع عادي مكدرت افسر نظراته - زين احم انتي تدرين شنو يصير بهذا الليله علموج لو لا احم ااايعني هسه نعرف نعرف اذا جبيره لو طفله حجاها وغمزلي يمه احس خدودي حمر عزااا هذا شبي ليش يغمزليي شيقصددد اااااا اريد انام تصبح ع خير - تعاااي تعااي وين اشردين لازم نعرف شكالولج امج رانيا واحد جبير من اهلج ماعلمج - ع شنو - ع اليوم حجه ورفع حاجبه - ئئئئ يعني هي رانيا حجت بس مكالت بس اسمعلك وماا اعترض ع اي شي اتكوله - بسسس حجاها بستغراب هزيت راسي وهو رجع راسه ع التاج مال الجربايه ومبين مستغرب ويهز راسه عفته ونمت كعدت ع صوت الباب وصوت خالتي ام نصر فتحت عيونه شفت كاعد هستوه ويحرك ركبته منا ومنا كام فتح الباب الامه ماعرف شحجه وياها وطب باوعلي ودار وجهه - خظري روحج يلا اهلج جو باوعت الساعه 9 ونص طغرت من سمعت طاري اهلي اكيد عمار وبابا جايين ركضت ع الكنتور طلعت كوستم لونه اوف وايت وجواها سترابلس وردي فاتح طلعت من الحمام شفته كاعد يعدل بلحيته اني هم اخذت المشط ومشطت شعري وحطيت مكايج هيج خفيف حمره ع كحله وباودر لان ماعرف احط بعدني اخذت شالي ونزلت وهو وراي شفت امي ورانيا وخالتي ام نصر واخوات نصر وبناتهن ومرت اخوه ونسوان ماعرفهن هم سلمت عليهم وكلها باركتلي وفرحانين وبقيت احوص اريد اروح البابا وعمار خالتي ام نصر كاعده بصفي شافتني احوص سئلتني - شبيج يمه مو ع بعضج مابشرتيني البارحه عفتكم براحتكم جانت تحجي بصوت ناصي ماعرفت قصدها بس كتلها - اي خاله لا اشيلين هم كلشي تمام جاوبتها واني ابتسم عبالي تقصد ع تعامله ماتدري ببانها كظاها دياحه - يمه لا تكولين خاله طولي يمه لو عمه بكيفج ماحب خاله اني امج وعمتج - انشاءالله خا عمه تتدللين بقيت كاعده فوك الساعه يمهن كلها اسولف وتباوعلي واني احس بخجل بنصهم امي كاعده بصف رانيا وشويه عني اجت بصفي همست - ها يمه بشري كلشي تمام - باوعتلها شبيهن هذني كلهن يسئلن هزيت راسب الامي وهي ضحكت فرحانه سئلتها ع بابا وعمار كالت جوه بلبراني كمت للمطبخ ويه البنات بقظت يمهن خجلانه بس احاول اتقلم وياهم واسولف واضحك كوه طب نصر باوعلي وكال جيبي عباتج وتعاي سلمي ع ابوج واخوج - باوعتله وكتله اكو احد لو ادخل هيج خزرني وكال كلت جيبيي العبااايه عشتووو شبي هذااا عمتي ام نصر دزت وحده من بنات ابنها راحت جابت عباتي واجت لبستها وطبيت وراه متبهت منو كاعد ركضت ع بابا شبكته وبست ايده اشتاقيتله كلشششش مو عبالك يوم عايفته عبالك سنه رحت ع عمار شبكته والدمعه بعيني ماريد اعوفهم اريد ابقه بحظنهم من دخلت ماانتبهت منو كاعد بس هسه انتبهت اخوته النصر اثنينهم واكو رجال جبير كاعد وولد شاب وبعد رجال يطلع اكبر من نصر بشويه كال نصر انصاف هذا عمي الجبير ابو سعود ومثل ابوي وهذا ابنه سعود وهذا خالي الصغير كاظم هزيت راسي مبتسه وسلمت عليهم كوه وطلعت اركض خجلانه طبيت للبيت دورت لا امي ولا رانيا وين هذني باوعت غزل بت رانيا كاعده تلعب بصاله - غزول وين ماما - بلطرفه حجتها ببرائه واتاشر ع غرفة امها ابتسمتها وفتحت الباب سمعت رانيا اتكول الامي - هاج يمه هذا سوار الذهب اطيهيا وكليلها مثل ما وصيتج خل شافتني راسا سكتت وعاطت - انصاااف غير ادكين الباب نزيت هاي شبيها تععيط عفتها وطلعت ضايجه محد يحترمني وكلها تعاملني مثل الطفله بقيت بلمطبخ يم البنات محد قبل اشتغل وياهم لان عروس عود بس كاعده واسولف وياهم دخلت رانيا وامي يضحكن ويباوعلي بخوف امي اخذتني بحظنها وخي تبوس براسي واتكول - افيشششش ياا يمه البيت اظلم بلياااج مادرتلها بال اصلا مامشتاقه الها بكثر بابا وعمار وهم مشبعت منهم راسا طلعت لان اكو خطار يمهم اتغدو وخلصو وهوسه راحو اهلي واني صعدت فوك لبست نظاراتي وكمشت تلفوني كعدت العب بي دخل نصر باوعلي مستغرب عرفته يباوع ع مناظر هههههه البارحه عدي عينين واليوم اربعه انصدم ههههههه بقيت كاعد العب ماعرف انام الظهر وجوه كلها نامت رفعت راسي اوخر الكذله مالتي انتبهتله صافن عليه ويباوعلي هذا شبي صافن عليه بقيت اباوعله صافن ورايح بغير عالم جماله عيونه عليه صفنته خرب صافن جنه مط عزااا راسا حطيت ايدي ع حلكي يمه الحمدالله ماحجيتها بصوت عالي كمت وكفت كباله وسويتله بيدي حركه مرحباا بيدي هو راسا انتبه وباوعلي بخزره ونتر - شكوووو خفت منه هزيت راسي بكلشي ماكو وطبيت للحمام ركض يمه هذا شلون راح اعيش وياه وهو يخوف هيج ع كلشي ينتر و عصبي بس صفنته حلوه هههههه جوري : جنت كاعده بلحديقه وحاطه كتبي كدامي وصافنه البارحه جان عرس انصاف وجان كلش حلو يارب يسعدها خطيه هلبنيه صفنت ع البارحه كل بالي بي حته دراستي عفتها وافكر بلي صار البارحه جنت لابسه ثوب مناسبات بس مستور وحجابي لافته عدل اني شويه طويله وجسمي زين شعري واصل لحد خصري لونه تمري الشي الحلو بيه عيوني مجرورات وكبار ورموشي طووال وحلكي هلكدوده خدودي 24 ساعه حمر دم صيف شتا هن حمر دم جنت كامشه الكاميرا واصور بيها مثل ماطلبت لحد ما خلصت وطلعت بره مكدرت بعد اصور طفيتها ورحت الرانيا ادور عليها اطيها الكاميرا جان اخوي حسن وامي جايين للعرس وياي ماعدي لا اخ ولا اخت بس اني وحسن حسن اكبر مني طالب مرحلة اخيره طب اسنان جان يم عمار لان صديقه وابد مايتفارقون جنت خايفه ع انصاف لا هذا العار رضوان يجيها ويسويلها مشكله بس اطمنت من سمعت اليوم حسن يسولف العمار ع رضوان ماهو مسافر الاربيل ارتاحيت راح يعدي عرس انصاف ع خير وسلامه طبيت للبيت ادور ع رانيا ماكو رجعت طلعت دامشي اروح اسئل امي صار كدامي ولد شاب من شافني ضحك وصوفررر وصاح - بووويه هاي شنو الطيره الجانت تتجسس علينا ذاكليوم هناااا باوعتله منو هذاااا انتبهت عليه عزااا هذا نفسه الولد الي بيوم خطبت انصاف من طلعنا للبستان نتفرج عليهم ووكعت شافني وكام يصيح الله الله الحقير الي وكعني وماخلاني اباوع براحتي - اليوم البدر طالع بويه شني هاي مو مره وحك العباس مو مره عسسسل - باوعتله بنص عين وعفته ومشيت صاح من وراي بوويه شووف الجسم درت وجهي خزرته واني ارحف من فوك لجوه صاح اروح فدوه للخزره اني عفته وركضت شفت رانيا يم رجلها اطيتها الكامرا ورجعت ركض يم الباب صار كبالي وكل مااصير عينه بعيني بغمزلي واني افور نار شكد مايستحي وماعده شرف وغيره ويكول بنات العالم عيب هيج اسوي حقير شكد حلو وصاك بس مبين عليه لوتي وهتلي عفته مادرتله بال ورجعت لبيتنا بس مشت الزفه واليوم كله اني افكر بي طيرته من بالي وبقيت ارحوص اريد اعرف اخبار انصاف بس استحي اتصل بيها اذكرت عمار البارحه طالع كلش حلو يخبل وشخصيه بس مبين عليه ضايج ع اخته يالله شكد احبه هلانسان ياللهي اجعلني من نصيبه لعمار والله نذر عليه اطبخ باجه اذا ازوجته اني تلعب نفسي من الباجه وامي دائما تحجي علمود اتعلم اطبخها لان كلها تحبها واني اتخبل بس والله نذر اذا ازوجت عمار اله اتعلم طبخها مرت يومين واني احوس شلون اعرف اخبار انصاف بعدين اذكرت شلون راح اشوف عمار اني جنت اشوفه من اروح الانصاف هسه ازوجت شلون راح اروح اشوفه بعد شنو الحجه طلعت للمدرسه الصبح ضايجه وروحي طالعه منا هذا ميروح منن بالي الحقير الي بلعرس اذكرت من رجعت للبيت جان كاعد بسيارته من مريت من يمه غمزلي وصاح - اجيبك للدرب اجيبك لك حموددي ماااطلع ياامن اذا ماجبتك هههههههههااي اتخبلت وكلت لا مو عليه اكيد كال حمودي يعني جان يحجي ويه ولد ليش اعصب اني بس بعدين صفنتلها ماجان اكو احد يمه وجان يباوعلي ويحجي مبين يبسمرلي شكد حقير طردته من افكاري وبقيت حايره بعمار وحبه صالي 3 سنوات اني ظامه اعجابي اله بداخلي ويوم يوم يكبر لحد ما تحول الحب امشي واتخيل روحي عروس وازوج مثل انصاف وانزف الحبيبي عمار بس حسيت بخيال كدامي رفعت راسي شهكت يمه عزاا رضوووان شتريددددد - سمعي ولج ادري بيج صديقت ذيج العار انصاف اسئلج سؤال جاوبي لا افظحج وحق الله خفت وبقيت اباوعله هذا شبي حاي حامي عليه وبعدين مو جان باربيل شجابه والله اخاف منه من اشوفه احسه مو قانوني ابد ماعرف شنو الحلو بي هو بس خشمه ع كولت انصاف شطوله جنه سكة قطار عاط بيه واني طفرت - سمعييي ولجج انصاف صدك ازوجتتت هاا - ئئئئ اي هز راسه وهو عصبي واني خايفه لا حسن لو شو منو يشوفني وياه دموعي بخدي باوعلي وصاح - ؤيا عار هذا الي ازوجته هاااا يا عار الي اخدها مني وانييي ع اساس اليوم اخطبهااا من اخوهااااا وفشلتني امي من كالت عرسها الخمسسس صار ورااااح منوو احجيي نزيت وباوعتله بخوف همست حمه اختها - باوعلي وهز راسه حمه اختها يعني ببغداد بقيت ساكته عاااط بجيت خفت خفت ع صديقتي واختي خفت لا احد يشوفني الصبح والساعه 7 ونص والشارع فارغ بس اني وياه الي يشوفني شيكول عليه رجع عاط هزيت راسي اي وبجيت عافني وراح ميحت ادموعي واني ابجي هذا واحد حقير ويخوف لازم احذر انصاف منه درت وجهي اريد امشي صار عمار كدامي يباوعلي و رافع حواجبه انصاف : مرت يومين عاديات جان جوه عادي يسولف ويضحك بس فوك بلغرفه لا مجاهلني ولا يباوعلي بس من ارفع راسي الكي يباوعلي وصافن عليه اني هم تركته براحته خفت انحك بي او اتقرب منه لان من ندخل الغرفه ينكلب 180 درجه لا يحجي ولا يضححك ولا يسولف ولا اي شي ومرات اشوفه يكوم يعصر براسه ويضرب بي بيده القنفه ويعصب ع اقل شي ويكوم يصيح عمتي ام نصر اتكول يمه هاي عين وصابتكم ماصلت ع النبي والله ماجان هيج شحلوته جان يضحك ويسولف مدري شبي هسه اقل شي وصاح وعصب اقري صورة البققره يمه دائما وراح اجيبلج خرزه زركه علكيها بغرفتج عن العين واني اهز براسي رانيا جانت كامشه تلفونها 24 ساعه ولا مهتمه الشي وعمتي ماتخليني اشتغل شي لان عروس وكالت خل تطلع السبعه وشبعي سغل من عيني وتضحك ادري تشاقه وياي بس مايطيني كلبي اعوفها تشتغل واني كاعده وهاي اختي ما اتعب روحها واتكوم اشغل روحها شويه جنت اخذ غزوله ورزان العبهن والهيهن لان متعلقات بعمتي هواي وما يهدنها وحده وخطيه هي تشتغل جنت اذا ماتخليني اشتغل الهي البنات عنها الخطار ولا وكف كل يوميه جايين شكثرهم والعصريه دائما يحون ولد للنصر ويبقون للعشه يومين اكتشفت هواي اشياء وعرفت كلشي تقريباا حبيتهم وكدرت اتقلم شويه شويه بس هم بقت خايفه من نصر حييل ثالث يوم جنت كاعده بلغرفه الصبح انظف بيها طب هو فتح كنتوره وطلع ملابسه قميص اسود وبنطرون اسود ويلك رصاصي انتبهت عليه كل ملابسه هيج ستايله اغلبهن طب للحمام سبح و بدل وطلع عدل لحيته وعطر روحه اقصد سبح روحه بلعطر ومسح ع راسه مكدرت الزم روحي ضحكت شتمسح متكلي تاخذ مراد منها ههههه متحملت ضحكت بصوت عالي باوعلي رافع حاجبه - شكو اضحكين ضحكينا وياج - ئئ لا هيج اذكرت موقف - اي ضحكيني وياج شنو من موقف حجاها وغمزلي رجعت لوره خايفه من نظراته هذا شبي يمه ساعاته براحاته كمت ارجع لحد ما انطخيت بلحايط فزيت وباوعتله بخوف حط ايديه منا ومنا وسد الطريق عليه وتقرب عليه صارت المسافه بينا شبر حرك خشمي بخشمه وابتسم ويباوع بعيني شفت نظراته اختلفت وباوعلي بعطف او ماعرف شنو من نظره جر غراضه وعافني وطلع ………… يتبع ،،،،،،للحكاية بقية ،،،،، قرائه ممتعه احبتي توقعاتكم وتصويتكم وتعليقاتكم | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
1Likes
العرض العادي
