31-05-22, 12:35 AM
| #1031 | ||||
 
|  بارت ٤١ طلع فارس وأهله للفطور في بيت اهل ابو ضاري ...وبقيت لوحدها بالبيت ...بعد أذان المغرب ...ما كملت فطورها وهي تسمع دقات على باب الجناح ...نطقت بتوجس : مين سمعت صوت حرمة تقول لها : انا يا ابنتي ناظرت رحيق من العين السحريه شافت حرمه متغطيه كامل ...فتحت الباب شق بسيط وهي تسأل: مين قبل ما تكمل سؤالها انفتح الباب ودفها للداخل وهو يقفل الباب بالمفتاح ... وقبل ما تستعيد رحيق توازنها وتقوم .. انقض عليها وربط ايدينها للخلف ...وضع لاصق على فمها حتى ما تصدر صوت... رمى الخمار والعباية وفتح كيس الأغراض الي معه وهو ينطق بخبث: وين تحبين تموتين هنا والا بغرفة النوم¡ هزت رأسها برعب وهي تحاول تفك يدينها ... سحبها لغرفة النوم ..وناظر البنات نايمات بسلام على السرير...طلع المسدس وهو ينطق بتحذير: اي غلطه ترتكبينها رح تكون الرصاصه بعيون الصغار ...بدات دموعها تنزل بغزارة .... طلع حبل وعيون رحيق تناظره وهو يربطه بالسقف ويثبته ...بعد وقت جهز الحبل. ..وهو يناظرها بابتسامة: اخترت لونه أحمر لانه لون العشاق!! فك يدينها وبعدها وجه المسدس على الصغار:طلعي قلم وورقة نفذت كلامه بسرعه وهي تناظره برعب...نطق بأمر: إلي اقوله اكتبيه بالحرف الواحد ويا ويلك تنقصين شيء! هزت رأسها وبدأت تكتب كلامه .."أنا آسفه لأني أقدمت على هذا الشيء .. بس أنا خلاص اكثر من كذا ما اقدر اتحمل الحياة بدون الشخص الي تمنيته لسنوات طويله ...ما قدرت أتقبلك يا فارس ولا رح ييجي في اليوم إلي أحبك فيه ... أكرهك لآخر يوم بحياتي ... وبما اني حبل الوصل بيني وبين الشخص الي تمنيته مستحيله ..فما له داعي وجودي هنا .. أنا ما اقدر اعيش بدونه...هذا قراري الصحيح. ..اتمنى تهتم بالصغار ...رحيق! اخذ منها الورقه وهو يناظرها يتأكد من محتواها طلع جواله وهو يفتح مقاطع فيديو: هذه صور لك نشرتهم .. فيها فضيحتك فتحت عيونها بصدمه وهي تشوف هالمقاطع...لحظات وقفل الجوال ... سحبها حتى يضع حبل المشنقه برقبتها ...لحظات وهي تناظره برجاء وتحاول تتكلم ..بس ما أعطاها الفرصة ... وبدون اي تأنيب ضمير أبعد الكرسي الي كانت واقفه عليه ...ابتسم وهو يشوفها بين الحياة والموت!! مسك جوالها وأرسل رساله لفارس " أنا قررت أنتحر واترك الدنيا لكم" أخذ أغراضه وخرج بخطوات منتصرة ...بعد وقت رجع فارس وهو يظن انها مزحه من رحيق حتى يرجع للبيت ...طلعت عيونه وهو يشوف رحيق متدلية من السقف وخرجت الروح منها ... تناول الورقة وهو يقرأها ومع كل حرف تسود الدنيا بعيونه أكثر....بعد ما توصله الفيديوهات ويكتشف خيانة رحيق له..رح تكون ضربه قوية له ختم اخر كلمه لما ضربه صديقه علي على رأسه بملل: يا أخي صدق إنك هندي! وش هالفيلم الهندي هذا!! عدنان بابتسامة واثقه من مخططه: رح تشوف بعيونك نجاح خطتي...رح انتقم وقدام الكل هي الي قتلت نفسها مط شفته بسخرية: لا تقول إنك الحبيب الي انتحرت علشانه هز رأسه بتأكيد: ايه أنا...كنت افكر اخليها تكتب اسمي ..بس كذا اخاف انفضح..علشان كذا رح يبقى الحبيب مجهول ... ضحك علي بقوة على خيال صديقه: انت من عقلك تتكلم؟!! ومتى رح تطبق هالفيلم؟! نطق بجديه: اليوم رح ترسل لي هناء الصور ...وباكر رح يكون التنفيذ بما إنه أهل أبو ضاري رح يفطرون في بيت ابو فيصل عقد حواجبه باستغراب: وانت وش عرفك؟! مطشفته بغرور: لي مصادري الخاصه لوى بوزه بعدم رضا: وش عرفك انها ما رح تروح؟! رد بغموض: انت وش عليك مني ...المهم اني أعرف إنها ما رح تروح!! علي شرب العصير وبعدها نطق: وش عرفك إنه تقدر تربط الحبل بالسقف؟! يمكن يكون السقف قاطعه بلامبالاة: ما هي فارقه ..وقتها رح اخنقها بيديني ... سكت للحظات وبعدها تابع وهو ينطق بقهر: رح اطلع كل قهري فيها ... صار لي اكثر من سنة أراكض وبالاخير ما حصلت فلس واحد ولا حصلت على عروس..وملاحق من الشرطه...متخيل الحياة الي اعيشها!! رح انشر أكثر من مقطع وأكتب فضيحة زوجةفارس ... ومقطع ثاني واكتب عليه أخت مشعل ..... قاطعه يحاول يثنيه عن قراره : يا ابن الحلال اترك البنت بحالها ...ما لها ذنب بشيء! ابتسم بخبث: اتركها؟! انت ما تدري كم مر من الوقت وأنا اخطط وارسم؟! وتبغاني بهذه السهولة اتركها؟! ** ** ..باكر اول يوم من أيام رمضان ... وضعت القهوة بدون ما تناظره وهو يتكلم:باكر فطورنا كلنا عند جدي ابو فيصل! عبست ملامحها بضيق ...لاحظ عبوسها ..أخذ فنجان القهوة وهو يسأل: وش فيك؟! اعتدلت بجلستها وهي تنطق: ما ابغى أروح..وقبل ما يعترض تابعت كلامها: جدتك ما تواطني .. وأنا ما احب أجلس مع ناس ما تحبني ...وفوق هذا ما اعرف أحد من اهلك قاطعها:تعرفي على الناس بدل ما تجلسين لوحدك؟! هزت رأسها بالرفض: ما أبغى ارتشف من القهوة وهو ينطق بحزم: ما أقدر أتركك لوحدك بالبيت ... الكل رح يروح ...وجدي رح يزعل قاطعته برجاء: الباب مقفل ما رح يصير علي شيء! اتركني على راحتي! مط شفته بعدم رضا ... وبنفس الوقت ما يبغى أي أجتماع بين جدته ورحيق لأنه ما يضمن تسوء الأحوال ... وقبل ما ينطق ..اقتربت منهم نورة وهي تنطق بضجر: شوفي اخذت رحيق منها الجوال وسألتها بروقان: وش فيه؟! نورة : ابغى ألعب قاطعها فارس بانتقاد: هذه البنت طول وقتها على الجوال ...وكل هذا يضر عيونها رحيق وهي تنزل لها ألعاب على الجوال: ما أحب أكسر بخاطرها ...نورة بالنسبة لي خط احمر! مدت لها الجوال بابتسامة: خذي! تناولته وهي تناظر صيته الي تمسكت بفستانها تبغى الجوال! نورة وهي تبعدها عنها: ماما رحيق وهي تسحب صيته عن نورة: روحي إلعبي وقفلي الباب حتى ما تدخل عليك تحركت نورة بسرعه اول ما تحررت من صيته ...تجاهلت رحيق صوت صيته الباكي وهي تنبه على نوره: لا تقفليه بالمفتاح! فارس عفس ملامحه بانزعاج من بكاء صيته : هذي وش يسكتها بعد! رحيق حضنتها وهي تنطق: اعطي جوالك لها قاطعها باستعلاء: هذا الناقص اسلم جوالي للبزران خزته بقوة: ذيك المرة شفت جوالك بيد ريان؟! مط شفته بلامبالاة: وش جاب ريان لصيته ! هذي بعدها صغيره أخاف تضربه بالأرض وتكسره!! كسر الجوالات عندكم وراثه! ابتسمت على نغزته ...وقبل ما تنطق مد يده وهو يمسك بغرتها: قاصيتها أبعدت يده وهي تعدل غرتها بعد ما نزلت ياسمين على الأرض: هذي نورة قصتها لي! فتح عيونه باستنكار: انت من جدك؟! رحيق بضحكه: ما سكتت حتى قصت لي غرتي ...ما حبيت أكسر بخاطرها وهي متحمسه تقص شعري!! نطق بغضب: لااا تراك أوفر! بحياتي ما شفت افشل منك بالتربية!! قاطعته بحده: اختي وش علاقتك فينا ؟! أدلعها أذبحها ما احد له قاطعها بقوة: وعسى هالتربية رح تطبقينها على صيته؟! نطقت وهي تشد على أسنانها بقهر: ياسمين! لوى بوزه بضيق من تصرفاتها ترفع الضغط: رحيق أتمنى تعقلي وتتصرفي بعقلانيه اكثر!! رحيق عبست ملامحها: لما تشوفني مجنونه وقتها تقول هالكلام! وقف وهو يتجاهل صيته إلي امسكت بساقه حتى يأخذها معه ...نطق وعيونه على رحيق: لا تنسين باكر العزيمه بغت تعترض والقهر واضح بملامحها ...قاطعها بحزم: لو تعترضين من اليوم لسنة إلا تروحين بإذن الله ورجلك فوق رأسك...سالفه الانعزال والانفصال ما تمشي معي ...من يوم وطالع رح تشاركين بكل المناسبات وتتعرفين على أقاربي وتقومي بالواجب بدون تقاعص أو هروب! تركتك فترة طويلة على راحتك والحين خلاص! أبعد صيته عنه وهو متجاهل البكاء ...وطلع من الجناح ....تحس بالقهر بداخلها ألف....وش فيه صاير كذا ...يا ليتها ما انكشفت الحقيقة كان تاركها على راحتها...الظاهر رح ينشب لها بكل شيء! حملت ياسمين الي جلست على الأرض تبكي...نطقت بانزعاج: خلاص اسكتي ترى والله مو رايقه لك!! بدأت تلاعب فيها وترفعها بالهواء ..لحظات وبدأت ضحكتها تعم الصالة!! ** ** ** بعد العصر جالسة وبيدها القرآن ...غمضت عيونها وهي تردد بصوت خافت : اللهم آءتنا في الدنيا حسنه وفي الاخرة حسنه وقنا عذاب النار . يا رب من أراد بي سوء فرد كيده في نحره واشغله في نفسه ..اللهم اكفني شر من حولي من البشر والجن بما شئت! وبعدها بدأت تردد بأذكار المساء... كملت أذكارها وبدأت تجهز نفسها وهي تدعي ربنا يحفظها ويحفظ نورة وياسمين وفارس من كل أذى!! كثير ننسى الدعاء والإلتجاء لرب العالمين ...ونغفل إنه يمكن بهذه الساعة تكون الإجابة ...وربنا يستجيب لنا الدعاء .... ويحفظنا من اي شر يحيط فينا! ناظرت جوالها وهو يرن .. شافت اسم فارس ..اكيد يبغاها تتجهز ...ما لها نفس تروح لبيت صيته!! تفكر تسحب على العزيمه ..وخلي فارس يعمل الي يبغاه ما رح يطلع بيده يعمل شيء!! يمكن يزعل وبعدها يرضى!! ردت لما شافت إصراره على الإتصال بهدوء مع هو: هلا.... فارس يستعجلها: اذا جهزت نفسك انزلي قاطعته تشوف رد فعله : ما أبغى اروح.. أنا قلت لك من البارحه ما رح اروح! رفع حاجب من ردها: بس انا قلت لك رح تروحين! معك خمس دقائق وتكوني عند السيارة ...ولا تحاولين تختبرين صبري لأنك للحين ما تعرفيني قاطعته: بقهر: لا تجلس تهدد! لو بغيب أروح رح يكون بكيفي وما احد يغصبني على شيء! نطق بخلق ضيق: لا تضيعي الوقت ... أنا انتظرك تحت..سلام! ناظرت الجوال بقهر مسكت نفسها لآخر لحظة تضربه بالجدار تذكرت إنها صائمه ...تحتاج القليل من الصبر ...ولزوم تكون اخلاقها افضل من كذا..وبالها طويل ... وخاصة انها رح تقابل صيته وحصه لساعات طويلة!! اخذت نورة منهاالجوال وهي تحضر افلام كرتون! جهزت كل شيء ..واشرت لنورة : يلا يا ماما رح نطلع! نورة هزت رأسها بعناد: ما ابغى ..لما يخلص رحيق باسلوب هادىء جلست على مستواها: يا ماما بعدين تكملينه الحين رح نطلع هزت رأسها برفض : ما أبغى! وقفت رحيق وهي تفكر كيف تقنعها: طيب احضري شوي وبعدها نطلع اتفقنا! هزت رأسها نورة بدون ما ترد! مر ربع ساعة على الوقت ...دخل فارس وبداخله بركان من تجاهلها لكلامه ...وقف باب الغرفه وهو يشوفها جالسه على السرير ترضع الصغيرة ...ولابسه وجاهزه ...كتم ضيقه وهو ينطق: تأخرنا قلت لك خمس دقائق! رحيق ببرود: انتظر شوي يخلص البرنامج الي تحضره نورة ..مب راضيه تطلع قاطعها خلاص انفجر من هالنورة ومن تربيتها الفاشله: والله؟! أكيد تمزحين؟! الحين اتصل بجدي واقول له ينتظرنا على الفطور لوقت نورة تخلص برنامجها قاطعته برجاء: بس خمس دقائق ..الحين تبكي نطق والشرار يطلع من عيونه: تراها كبيره على البكاء... تقدم من نورة وسحب منها الجوال بحده وهو ينطق: يلا تحركي! ناظرته نورة لثواني وبعدها بدأت صفارات الانذار! رحيق وقفت وهي تنزل ياسمين على الارض..وبقهر من تصرفه: كذا الأسلوب؟! الحين وش يسكتها؟! نطق بتحذير: قلت لك لا تختبرين صبري يا رحيق ناطقته بانتقاد: وين اخلاق الصوم قطعت كلامها لما حمل نورة وتوجه خارج المكان حتى يقطع هالنقاش الي ما رح يرسي على بر ! ضربت الارض بقوة وهي تطلع خلفه وبكاء نورة يوصلها!! وصلت السيارة وهي تشوف حصه جالسه من الأمام...ما تدري ليه رازه نفسها ورح تروح وهي نفاس !! فتحت الباب الخلفي وجلست جنب نورة المستمره بالبكاء...زفرت بضيق وكأنه ينقصها بكاء نورة ... وضعت ياسمين جنبها ...وحضنت رأس نورة: خلاص يا قلبي!!! ريان وهو يؤشر على نورة: تبكي! تجاهلته رحيق وهي تمسح على شعر نورة وتحاول فيها تسكت!! فارس يحس رأسه صدع من بكاء نورة ... حرك السيارة وهو يناظرها تطبطب على ظهره نورة وتمسح على شعرها! ياسمين وهي تبعد راس نورة عن أمها بقوة...رحيق أبعدت يد ياسمين وهي تنطق بحده: اتركيها!! ياسمين تقوست شفتها وبدأت تبكي بقوة! حصة وهي حاضنه طفلتها ومنزعجه من الصراخ..عفست ملامحها لما صحيت ابنتها من الصراخ وبدأت تبكي!! يحس نفسه ما عاد يركز على الطريق من هالصراخ .. وكأنه اصابه ارتجاج بعقله!! وقف السيارة وهي ينطق بغضب: وبعدين ؟؟ وش نهاية هالزفت! نورة سكتت وهي تناظره لثواني ..ولحظات رجعت تبكي بصوة اقوى! نطق بغضب: لا حول ولا قوه الا بالله!! ابتسمت رحيق من تحت النقاب بشماته ..خليه يستاهل حتى يعرف كيف يتعامل مع نورة!! حصه وهي تحاول تهدي الصغيره: استغفر الله!! رحيق ناظرته: خلاص رجعنا للبيت لأنها ما رح تسكت قطعت كلامها لما حرك السيارة وما رد على كلامها! طول الطريق رحيق تراضي فيها وتحاول فيها تسكت ... وبطلوع الروح حتى سكتت ورجعت تحضر افلام كرتون بصوت مرتفع ! اضطر يسكت حتى يمر هاليوم بسلام!! رحيق وضعت ياسمين بحضنها .. وبدأت تلعب بشعرها حتى نامت!! *** ** مر وقت الفطور بهدوء ...للحين مرتاحه صيته ما رمت عليها اي كلمه..وحصه جالسه بالجهة الثانيه وما صار بينهم اي احتكاك ... نزلت نظرها لياسمين جالسه على الارض وتلعب بحقيبتها ونورة على الجوال!! تحس ما هي مرتاحه بين ناس ما تعرفهم ...لمحت حصه مندمحه مع بنات عم فارس والضحكه شاقه حلقها!! رفعت رأسها على سيرين الي جلست جنبها بضجر ...رحيق باستغراب : وش فيك؟! سيرين مطت شفتها بقهر: في برنامج على التي في وما حضرته رحيق ابتسمت: احضريه هنا قاطعتها بملل: يعني تشوفين المكان المناسب أحضر!! خلاص رح أحضر الإعادة بعد ١٢!! رحيق بهمس: مليت متى نرجع؟! سيرين وهي تثاوبت بكسل: والله ما ادري ...احس أصابني تلبك معوي من كثر ما اكلت!! . رحيق ابتسمت: شوي وتأكلين الصحون وكأنك طالعه من مجاعة! سيرين بروقان: والله اليوم الصيام كان صعب ... لأني مو متعودة ..ما تدرين فرحتي لما شفت الأكل...والحمد لله بيت جدي فيه شغالات يعني ما في شغل ولا تكريف! ختمت كلامها وناظرت جدتها صيته الي تنادي عليها!! هزت رأسها سيرين بهدوء وهي تهمس: اروح اشوفها احسن ما تعمل لي سالفه إني اتجاهلها! ابتسمت رحيق بود لها وما علقت .. لأنها متأكدة نادت على سيرين حتى تبعدها عنها وما تلقى رحيق أحد تكلمه!! ناظرت جوالها بيد نورة فيه اتصال ..أخذته منها بلطف: اعطيني اشوف مين!! عقدت حواجبها باستغراب رقم مو مسجل عندها ...فتحت خط حتى تعرف هوية المتصل متجاهلة نورة الي بدأت تبكي تبغى الجوال! أول ما نطق الو حست نفسها سمعت غلط ...نطقت للتأكيد ودقات قلبها تسارعت: مين قاطعها بغضب: أنا إلي ابغى أدفنك واخلص من مشاكلك!! ناظرت المكان مزدحم بالحريم وما هو مناسب الكلام هنا ...نطقت بهدوء: لحظة!! تحركت خارج المجلس متجاهلة ضجة البكاء إلي عملتها نورة وياسمين !! ناظرت الصالة فارغه .. نطقت باستغراب من اتصاله: وش تبغى قاطعها بصوت غاضب: انت وينك؟! ردت ببرود: ما يخصك ...انت وش تبغى مني؟! نطق :تكلمي قبل ما توصل فضيحتك لأهل أبو ضاري ...خلينا نحل السالفة قاطعته بانفعال: احترم نفسك وما اسمح لك تغلط علي بحرف واحد! زفر بزفرات وهو يرد عليها: وصلتني فيديوهات لك إذا احد شافهم من اهل زوجك ردت باستنكار: اي فيديوهات!! نطق بقلة صبر:انت وينك الحين رحيق تحس نفسها وكأنها بحلم ....تلبسها الضيق من كلامه... وبنبرة محتارة نطقت: أنا في بيت أبو فيصل!! رد بقرف: وين بيتهم؟! نطقت بتردد: الحين ارسل لك الموقع ..ختم المكالمه وهو يقول لها: أنا قريب من هالمكان ..انتظريني برا ناظرت الجوال لما قفله بوجهها!! رجعت للداخل بخطوات تائهة ...ناظرت خالتها الي سألتها بانزعاج: انت وين تركت البنات؟! رحيق بملامح مخطوفه ردت: تكلمت بالجوال! اقتربت من البنات وأخذتهم وانسحبت من المكان بهدوء.... طلعت للشارع الرئيسي وهي تنتظر مشعل ومن الداخل القلق أكل قلبها ... وكأنه ناقصها مشاكل!!! دقائق وكانت سيارة مشعل جنبها ...اقتربت من السيارة وفتحت الباب وهي تنطق بقهر من أسلوبه: وش السالفة! نطق بملامح ما تتفسر:اركبي ما نبغى فضائح هنا! ركبت السيارة من الخلف مع البنات...اول ما قفلت الباب حرك السيارة ...نطقت بسرعه: انت وين رايح ...ما قلت لفارس اني طالع!! نطق بقرف: ما رح نبعد بأقرب مكان فاضي نتكلم ! بعد وقت قصير وقف السيارة على جنب الطريق ..بمكان فاضي.. نزل من السيارة بعد ما طلب منها تنزل... نزلت بتردد اقتربت منه وهي تنطق بتردد ...من الداخل خايفه تسمع كلامه: وش صاير مد لها بجواله: شوفي الفيديوهات الي وصلتني اليوم الظهر...سبحان الله ما شفتهم الا بعد الفطور فتحت الفيديوهات وهي تشوف نفسها بوضعيات ما هي مضبوطه مع شخص ..هذا الشخص تعرفه من قبل ...شافته وقبل ما تنطق سألها بقوة وهو ماسك اعصابها ما يطحنها: وش بينك وبين عدنان الزفت!! رددت الاسم بضياع: عدنان!! سحب النقاب عن وجهها وهو ينطق بغضب: هذا وش الفائدة منه اذا ما كان رادع لك عن وقاحتك..والا تتسترين فيه؟؟! وبنبرة غاضبه نطق: وش بينك وبين الزفت؟!! تراك متزوجه ....تعرفين وش يعني متزوجه؟! وإلا مثل امك ما عندها حدود قاطعته وهي تنطق بغضب: احترم نفسك.. تراها امك قاطعها وهو يضربها على وجهها بقوة: تخسى تكون امي .. أنا ما عندي أم! أخذ الجوال منها وهو ينطق: طبعا ما اكتفى بهذا الشيء ...كاتب رسالة إنه رح ينشر الفيديوهات بكل مكان! يا ليتني ما رجعت لهنا..وين عيني من الناس اذا شافوه... أنا صاحب شركة******* اختي تكون منحطة بهذا القدر! رحيق للحين منصدمه من الكف الي حصلته منه... عقلها يحاول يستوعب إنه كل هذا واقع!! مسحت خدها وهي تنطق بتوعد: رح تندم على سكتت لما استقرت يده على خدها مرة ثانية..وهو ينطق بغضب :فوق وقاحتك لك عين تتكلمين ختم أخر كلمه وعيونه طلعت من مكانها باستنكار بعد ما ردت له الكف بكل قوتها وهي تنطق: كل تبن ... ما أسمح لك ابدا تتعدى حدودك معي! انقض على يدها إلي ضربته فيها ..ولواها بقوة وهو ينطق: رح اكسرها حتى تتعلمين ترفعين يدك على الي أعلى منك يا حقيرة! ما قدرت تكتم صرختها لما كسر يدها بدون اي رحمه...دفها على الارض وكأنه على قلبه حجر بدون إحساس أو ضمير...ما يشوف قدامه الا امرأة خائنه ما تستحق الحياة ..من البداية لزوم تأكد إنه العرق دساس .. وابنة اسماء رح تطلع عليها ...نطق باستعلاء: بغيت أمد يدي لك واساعدك قبل ما ينتشر الفيديو لاهل زوجك ..بس انت ما تستاهلين ... جعلهم يذبحونك واخلص من فضيحتك ..من اليوم أنا ما اعرفك كل شيء انتهى ...كنت أفكر ألغى الحواجز وارجع اكلمك ..بس بعد الفيديوهات وبعد وقاحتك هذه غيرت رأي ..وما رح أجلس بالمنطقة كلها ... أنا رح أرجع أسافر وابتعدعن سواد وجهكم الي ما يخلص!! الله يأخذكم كلكم..انتم بصمه سوداء بحياتي ...وما تشرفوني أبدا!! تسمع كلامه وهي تتلوى من شدة الألم...مب قادرة تصدق إنه هذا مشعل ! هذا الشخص الي تمنت تشوفه ...يا كثر ما نتمنى أشياء وما ندري إنه وجودهم بحياتنا ما رح يسبب الا الهم والنكد...لزوم ما نزعل على اي شيء تمنينا نشوفه أو نحصل عليه وربنا ما حقق لنا هالأمنية ...ربنا يختار لنا الافضل .. ولو اطلعنا على الغيب رح نختار الي اختاره لنا ربنا ... ندمانه قد شعر رأسها إنها تمنت تشوفه... وقفت وهي تتلفت تبحث عن أي شيء تضربه فيه ... تحرك نحو السيارة وقبل ما يركبها تفل عليها وهوينطق: يا ساقطه..تلقي وعدك الفيديوهات اكيد وصلت زوجك الموقر الي رفضتي تتطلقين منه وفضلتيه علينا! لاتحاولين تتصلين فيني لأني ما ر ح استقبلك في بيتي! آنت من شدة الالم وهي تشوفه حرك السيارة مبتعد عن المكان ....اي أخ يترك اخته بهذا الموقف ...ناظرت البنات يناظرونها بصمت. .نطقت بصعوبه: يلا نرجع نورة تمسكت بالعباية: انا أخاف! تحركت بخطوات بعد ما تناولت نقابها الي رماه على الارض...لبسته بصعوبه وتحركت راجعه لبيت أبو فيصل قبل ما يفقدها أحد ! بعد مسافة قطعتها ...ناظرت حولها بضياع ما تعرف بيتهم بالضبط...تحس كل البيوت هنا متشابهة وكأنه نفس المهندس الي صممهم!! غمضت عيونها لعلها تتذكر اي شيء يدلها على بيت أبو فيصل!! ترددت تتصل بسيرين ترسل لها الموقع...بس خايفه تنفضح وتفتح على نفسها ابواب لخروجها بهذا الوقت!! عضت على شفتها من شدة الوجع ... ياسمين بدأت تبكي تبغاها تحملها ... شافت رجال يمشي بالطريق اقتربت منه وسألته بتوجس عن بيت ابو فيصل ....وصف لها مكان البيت...تحس طلعت عيونها لما قال لها تأخذ سيارة اجره لأنها تحتاج ساعة مشي حتى توصل له!! ما حست بالمسافه لما طلعت مع مشعل!!! رفعت نظرها تبغى تدعي عليه لأنه سبب لها الاذى بدون ذنب...قلبها ما قدر يدعي عليه!! نزلت رأسها وبغت تمشي بس ناظرت سيارة مشعل لما وقف جنبها وهو ينطق بنبرة فيها استعلاء: تعالي ارجعلك بلاه يفقدك قيس ابن مملوح ويطلقك وتموتين علينا!! جلست على الرصيف بروح خائرة...طلعت جوالها تتصل بفارس حتى ييجي يأخذها ما عادت تفرق معها ...يقول إلي يبغاه!! اتصلت على رقمه ...آخر رنه رد بهدوء: الو رحيق اغرقها الصمت مب قادرة تنطق حرف واحد... قل الخط فارس بعد ما ردد الو عدة مرات وما احد رد عليه ...توقع نورة اتصلت عليه بالغلط!! اخذت نفس عميق تحاول تهدي نفسها ...رجعت اتصلت بفارس ...وبصوت مرتجف نطقت: فارس تقدر تيجي تأخذني؟! توقع إنها تبغى ترجع للبيت ... وبضيق نطق من عنادها: ما نقدر نرجع للبيت الحين .. قاطعته: أنا سكتت لما اقترب منها مشعل وسحب منها الجوال وقفله وهو ينطق بنهر: غبية تبغين تخربين بيتك؟! اطلعي أرجعك بدون ما احد يدري بخروجك مطت شفتها بسخرية ودموعها ما وقفت: وكأنه يهمك استمرار زواجي! انا مليت من الكل خلاص طق قلبي منكم كلكم!! اتركني بحالي مثل قبل لا اعرفك ولا تعرفني....ما ابغى اشوه صورة مشعل الي بذاكرتي أكثر من كذا!! ابغى احتفظ لك مواقف من ذكرياتنا القديمة ...لما كان دم الاخوة يسري بعروقك..لما كنت تمسح على رأسي وتواسيني وتردد ما رح أتركك!! روح يا مشعل انتهينا ...مشعل الي أعرفه مات من زمان ...لا تخاف ما رح ادعي على قطعه من قلبي...رح أدعي لك مثلك مثل امي وأبوي .... ختمت كلامها وتابعت خطواتها بهدوء ودموعها تنزل بصمت بدون اي صوت!! صوت الجوال يرن بحقيبتها تجاهلته وهي تتابع المشي..... بعد وقت تنهدت براحه لما شافت بيت أبو فيصل ..عرفت البيت من السيارات المتجمعه امام البيت ...هذه سيارة فارس ..تمنت لو إنها مفتوحه وتجلس فيها ...وقفت عند الباب بتردد ..دخلت خطوتين ونشف الدم بعروقها لما اقترب فارس منها وهو ينطق والشرار يطلع من عيونه: انت وين كنتي؟! بلعت ريقها وردت : البنات كانوا يبكون وطلعت فيهم أغير لهم جو قاطعها بغضب: رحيق! زفرت بضيق: بعدين نتكلم؟! اشر لها للخارج: امشي رح نرجع للبيت قاطعته باستغراب: وحصه نطق بقلة صبر: مب شايفه نفسك كيف مبهذله ...كيف ترجعين للداخل بهذا المنظر!! تحركي اشوف! ما فهمت كلامه وتحركت خلفه وهي مرتاحه ما لها قلب ترجع للداخل!! ركبت من الخلف مع البنات ...ناظرها وهو رافع حاجب: ليه قاطعته بمرارة: هذا مكاني الأصلي ما احب أكون احتياط! حرك السيارة وهو يسأل: وين كنت؟! رحيق ناظرته بروح ميته لأنها متأكدة اول ما توصل لفارس الفيديوهات ما رح يتركها على ذمته...وبنبرة هادئة نطقت متجاهله سؤاله: ممكن تمر المستشفى ناظرها باستغراب: ليه؟! رحيق وكأنها تتكلم عن يد ابنة الجيران: وقعت على يدي ...اتوقع إنها انكسرت!! قرر يؤجل النقاش للبيت ويشوف آخرتها معها!! ** ** ** سيرين تهمس لامها: أرسل رساله يقول لقاها جالسه بالحديقه...ورجعوا للبيت! زينب بضيق: قلبي يقول صاير شيء .لزوم ما خبرناه عن اختفاء رحيق..انتبهي احد يعرف بشيء او يحس بشيء! سيرين : ما احد يدري او انتبه على اختفاء رحيق ... ما ادري كيف تفكر هالبنت ! زينب بهمس: رح تصيبني جلطه من زوجات عيالي ...ولا وحده تسر الخاطر!! سيرين ابتسمت : إن شاء الله العوض بهاجس!!! مطت شفتها بسخرية: خليه بالاول يخطب وبعدها يصير خير!! ** ** ** ** ** عبايتها كلها غبار ومتسخه...النقاب معفوس ...وجهها واضح عليه علامات الضرب ...ويدها مكسورة ..وفوق هذا تقول له بكل بساطه تعثرت على الأرض! تظنه غبي اذا صدق هالكذبة؟!! عدل لها النقاب ونطق بجمود: مشينا!! طول الوقت الصمت يغلف المكان ...بداخله ألف سؤال لتصرفاتها ...وبداخله نار متأججه ما هو قادر يتحمل هالحركات منها...يعني اذا يحبها لزوم يبلع السم ويسكت حتى ما يجرح الشخص الي يحبه ...بس بنفس الوقت في حدود وعادات وتقاليد ما يسمح لها تتجاهلهم بهذه الطريقة وبدون تبرير مقنع!! تناظر من النافذة وبداخلها ضجيج عكس مظهرها الهادىء....ما تدري وش تعمل بعد سالفة الفيديوهات ...بالفيديو هي بس وجاب عدنان لها ...وما تتذكر إنها إلتقت فيه الا في بيت جدها ابو عبدالرحمن ...حتى ما تذكر شكله كثير...مين صورها وعمل كذا؟!! طردت شيء بداخلها يشك بياسمين او ام ربيع ذول الوحيدات الي يمكن يكون لهم علاقة بعدنان!! ما تقدر تتصور موقفها قدام فارس لما توصله الفيديوهات... ما توقعت تكون نهايتهم بهذا الشكل ...نهايتها شك وخيانه!! عضت شفتها بقوة وهي تحس بطعم الدم بفمها ...ما تدري ليه الناس تبتلي على الناس وش يبغون من بعض..وش يضايقهم اذا شافوا شخص عايش ومرتاح البال؟!! غمضت عيونها لما وقفت السيارة ..ما لها حيل للجدال معه ... نزلت وكأنها تسحب للموت ...اقترب وحمل ياسمين وتوجه للجناح بخطوات هادئة .... دخلت الجناح وهي تحس طبول بقلبها ...قفلت الباب وتقدمت وهي تشوفه حط ياسمين على الكنبة ..رفع نظره لها بنظرات عابسه...نكست نظرها وهي تحس نفسها بحجم النمله ...ما عندها اجابات لاي سؤال منه ... لأنه كل الأسئلة إجاباتها رح توصل للفيديوهات وهذا الشيء ما تبغى يوصل فارس او تتكلم عنه!! رفعت رأسها لما نطق بجمود: تعالي رحيق اقتربت بتردد وهي تجلس على الجهة المقابلة .... نطق بقوة وتحذير: ابغى السالفة بالضبط وبدون أي كذب وخرابيط..بس احتاج منك الصدق!! تكلمي ليه طلعت ! وليه طلعت مع مشعل ؟! وليه حالتك كذا؟! وليه ضربك مشعل؟! وليه رجعت لوحدك؟!! كتمت ضيقها ونطقت بغموض: ما عندي أي إجابة لأسئلتك ... انت تبغى الصدق وأنا ما اقدر اكون صادقه بأجوبتي...ما اقدر اقول الا اني كنت مع مشعل وبس..غير كذا لا تسألني!! انقهر من ردها ..وبنبره غاضبه نطق: من متى الزوجة تخفي عن زوجها الاسرار!! انت ليه متكتمه على الموضوع؟!. ريحي قلبي وجاوبي! هزت رأسها بالرفض:لا تسألني نطق ببرة غاضبه وهو يوقف: انت اخترت ما يكون بيننا صدق او صراحه ...تبغين التكتم ..ابشري بعزك...لكن لا تفكري بيوم تلقين مني إجابه لأي سؤال او استفسار! براحتك يا رحيق ! تحرك ثلاث خطوات ...وبعدها إلتفت لها وهو معقد حواجبه .. وكأنه فهم السالفة..سأل بشك: يبغى يطلقك مني؟! رحيق لما قال إنه فهم السالفة خفق قلبها بقوة .سرعان ما ارتاحت لما تكلم عن الطلاق...وبنبرة مخنوقه ردت: خلاص إنسى قاطعها بغضب: ما رح أنسى واقسم بالله لو اشوفك متواصله مع الزفت مشعل او زرتيه ما يحصل لك خير !! مط شفتها بسخرية مقطعه حالها زيارات لمشعل!! هزت رأسها بهدوء حتى ينتهي النقاش..تحس رأسها بدأ يضرب عليها ...ووجع يدها بدأ يثور من جديد...بعد ما طلع مسحت على يدها المكسورة من فوق الجبيرة بشويش ...ما تدري ليه الشاطر يفرد عضلاته على يدها الضعيفة...تحس ضاق النفس عندها وهي تتذكر كيف لوى يدها وكسرها بدون ما يرف له جفن! نورة جلست جنبها وهي تدفن رأسها بحضنها : ماما لا تبكي! رحيق مسحت دموعها وبنبرة مخنوقه نطقت: ما ابكي يا قلبي!! ** ** ** ** قفل علي الجوال من هناء بعد ما طلب منها تمسح كل شيء يتعلق برحيق ..وتختفي للأبد ...ضميره ما ارتاح يشوف أكبر جريمتين تحصل لفتاة بريئة ما لها ذنب بطمع وجشع الي حولها ... حاول قد ما يقدر يساعدها بدون ما احد يحس فيه ...بعد ما أرسل عدنان الفيديوهات لمشعل ..طلب منه هو الي يرسل لفارس وينشره على مواقع التواصل ...وبدون ما يحس حذف كل شيء يتعلق برحيق ...وحذف كل الأرقام الي جلبها عدنان! كان مراقب لعدنان بكل تحركاته...وبعد ما غادرت سيارة فارس البيت ...اتصل بالشرطه وبلغ عن عدنان وانه متنكر بملابس حرمه... صحيح إنه عدنان صديقه ...بس صديقه ما ترك للصداقه باب ... كره يكون شيطان اخرس ...يشوف غيره ينظلم ويبقى ساكت.... دام البنت ما تعرف عدنان وما لها اي مشاكل معه فما سمح له يؤذيها... تنهد براحه لأن فعل الخير ومساعدة الناس يترك بالنفس أثر جميل .... يجلب السعاده من حيث لا يحتسب...لزوم ما نحقر اي عمل خير ...مساعدة الغير حتى لو كان بالكلمة الطيبة ..كل هذا يترك أثر جميل بالنفوس ...وتحصل ثواب من رب العالمين .. . ما يهمه أحد يعرفه او يعرف الإنجاز إلي عمله وكيف أنقذ روح بريئة من يد مجرم ما عاد يميز الصح من الغلط ...ما يهمه يحصل على الشكر والتقدير من الناس ...كل الي يبغاه الأجر والثواب ... *** *** من بعد السالفه سافر فارس وللحين ما رجع ...مر أسبوع على غيابه ... من لما سافر ما ارسلت له ولا هو ارسل لها! ما تدري يمكن وصلته الفيديوهات ويبغى يطلقها بعد رجوعه .... ما تدري وش يبغى منها عدنان وليه يلاحقها!! انقلبت على الجهة الثانيه بملل ...هذه حياتها طول الوقت مستلقيه على السرير ليل نهار...ما لها رغبه تعمل أي شيء .. وحتى بيت أبو ضاري ما دخلتها ؟! نورة اقتربت منها : ماما أبغى اكل رحيق طول الايام عايشه على ساندويتش الزعتر ما لها حيل تطبخ او تعمل أي شيء !! تحركت بملل للمطبخ ...ناظرت علبة اللبن خلصت ...قررت تعمل لنورة ساندويتش جبنه!! أعطتها وهي متغلبه لانها تشتغل بيد وحده! رجعت للغرفه وهي تناظر بقى على أذان المغرب خمس دقائق! تثاوبت بنعاس ووضعت رأسها ونامت أفضل شيء حتى تهرب من الواقع المرعب...تخاف باي لحظة تنتشر الفيديوهات وقتها مين رح يصدق إنها كذب!! كل يوم تدعي ربنا يكفها شر صاحب الفيديوهات!!! ارهقتها حياة الترقب وكل شوي تتوقع تدخل عليها زينب وتمسح فيها الارض وتطردها!! تعبت من هالحياة....بس الي متاكده منه قرارها كان صواب إنها ما تكلمت لفارس عن الفيديوهات ..بقناعتها لزوم الزوج ما يطلع على كل اسرار المرأة..في خصوصيه تخص الاهل هذه بالذات لزوم ما يعرف عنها شيء حتى ما تعود على المرأة بالندم بيوم من الأيام ...ليه تستبق الأحداث وتتكلم بشيء للحين ما حصل ...عندها امل ربنا يستيجب لها وتنحذف هالفيديوهات وتندفن السالفة بصفحات الماضي!! ** ** ** وصل وقت الفطور ...سلم على اهله وشاركهم الفطور والهدوء يحيط فيه!! أبو ضاري يناظره بابتسامة: كيف كانت الرحلة؟! هز رأسه : الحمد لله بخير!! حصة وهي تحط صحن قدامه: طول وقت سفرك وأنا قلبي مثل النار .. أول مرة يصير كذا الاتصالات ضعيفة! غريبه حنا بعصر التطور زينب براحه وهي تشوف ابنها قدامها: المهم إنه بخير! نطق وهو يناظر أمه: رحيق ما افطرت معكم؟! زينب مطت شفتها بسخرية: ليه حنا شفنا ست الحسن والجمال! طول الوقت معتكفه فوق وما تقول اتفقد بيت عمي! وحتى ابوك زعلان يقول لذي الدرجه ما تطبق تشوفنا! أبو ضاري بانتقاد: يكفي رجوعها من عزيمة اهلي ..وفوق هذا اتصلت فيها اكثر من مرة حتى تنزل تفطر معنا وترفض! على وش شايفه نفسها هالكثر! قاطعه فارس وهو ينطق : يمكن انشغلت قاطعه ابو ضاري بانفعال: لا ترقع لها ...وخبرها ما ابغى تدخل هالبيت أبدا وان دخلته رح اطردها فلا تحرجها وتحضرها ! كتم ضيقه وهو ينطق بكدر وهو يهم بالوقوف: رح تيجي وتعتذر منك يبه ..بس لزوم حتى لو ما نزلت احد منكم تفقدها يمكن صاير معها شيء! قاطعه أبو ضاري: وين ؟! كمل فطورك ؟ نطق بهدوء: رح اتفقدها وارجع قاطعه بتحذير: لا تنزلها لأني رح امسح فيها الارض واطردها! تحرك فارس بدون ما يرد ..حصة تحس بالانتعاش والسعادة ما فارقت ملامحها!! توجه للجناح طرق الباب عدة مرات ..فتحت له نورة الباب... دخل بجمود وهو يتوجه للمطبخ أكيد جالسه تفطر...عقد حواجبه وهو يشوف إنارة المطبخ مطفيه ...توجه لغرفه النوم ...رفع حاجب وهو يشغل الانارة ... اقترب وهو يشوفها تغط بالنوم وجنبها صيته تغط بالنوم! ما يدري وش معنى هالتصرفات؟ نطق وهو يهزها: رحيق رحيق نطقت بعبوس: همممم رجع هزها : رحيق يا رحيق قومي! فتحت عيونها بصعوبه...تحس النظرة مشوشه ... رجع نطق بنبرة قويه: وبعدين؟! نقزت على صوته وهي تشوفه واقف فوق راسها وملامحه تدل على مصيبه...وبتوجس نطقت : وش صاير تكتف وهو ينطق: الناس أفطرت وانت للحين نائمه؟! تركها وطلع رحيق حست بالراحه شوي يعني للحين ما عنده علم !! رفعت رأسها لما اقترب منها ومد لها بكأس المويه: قولي بسم الله وافطري! بغت تضحك ما يدري انها تفطر بعد ما تصحى بساعات!! شربت من الموية وناظرته وهو ينطق: انت ما طبخت نطقت : ما لي نفس بالاكل! قاطعها : يا مخلوقه ترى جسمك له عليك حق لزوم تأكلين ...يدك وش صار عليها؟! وين الجبيرة؟! رحيق بتورط وهي تحك رأسها: فكيتها قاطعها: يعني المستشفى فكوها هزت رأسها بالرفض: نورة خافت منها وفكيتها حتى ما تخاف نطق بقهر من هالنورة: تراها تخوف بلد! رحيق برجاء: فارس بالله عليك ما تصرخ بوجهها .ادري انها مدلعه بزيادة وتصرفاتها غلط بغلط...بس لما اتذكر انها يتيمه وما لها أحد تكسر خاطري تنهد وهو يجلس على طرف السرير: ربك معها ...صحيح انها يتيمه بس تصرفاتها كلها غلط ...يعني اليتيم ما نقوم سلوكه ... نتركه يعمل الي يبغى لأنه يتيم؟! مفهومك غلط وصدقيني انت الي رح تندمين بعدين على هالتربية!! هزت رأسها بتفهم: أحاول اكون صارمه معها بالأيام الجايه! تنهد وبعدها دف جبهتها بخفه: امي وأبوي زعلانين عليك رحيق بابتسامة باهته: ما ينفع أنزل بدون ما أساعدهم ..ويدي ما اقدر احركها خزها بقوة: طول الايام وش كنت تأكلين؟! ضحكت بخفه على طريقته وهي تنطق: ساندويتش! وقف وهو ينطق: قومي قومي ننزل تحت نفطر وانتبهي أي شيء يقوله أبوي تجاهليه لأنه متحلف فيك! تحركت على مضض ما لها مزاج تنزل وتشوف حصه وابو ضاري!! قبل ما تتحرك نطق :انتظري ألف يدك بشاش أفضل. بعد وقت قصير وقفت بتردد وهي تناظره برجاء يعفيها من هالواجب! دفها لصالة الأكل ...انحرجت لما تسلطت كل النظرات عليها ...التفتت عليه بقهر من تصرفه!! حصة ارخت ظهرها للكرسي وتكتفت حتى تستمتع ببهدلة رحيق ... فارس تقدم رحيق وهو يسحب كرسي جنب امه: راحت عليها نومه قاطعه ابو ضاري الي نطق عكس توقع الموجودين: هلا تفضلي رحيق ..حياك حياك ..اجلسي يا ابنتي! رحيق ناظرت فارس بشك بكلامه إنه عمها زعلان...ابتسم لها وهو يهز كتوفه ما له دخل ...أبوه ما أحد يتوقع تصرفاته ! ابتسمت وهي تسحب كرسي جنب فارس متجاهلة حصة الي عيونها طلعوا من مكانها!! ابو ضاري باهتمام: عسى ما شر وش فيها يدك فارس رد قبلها: انزلقت وانكسرت وعلشان كذا ما كانت تنزل تفطر معكم..ما تحب تأكل بدون ما تساعدكم! زينب تناظرهم وبداخلها شك إنه فارس هو الي كسر يدها...لانه من يوم العزيمه اختفت ولما سألت عنها كنسل السالفة ...رفعت حاجب وهي تشوف رحيق تناظر فارس وهو يتكلم وتبتسم...ما تدري وش شعور الحريم تأكل طراق وتبتسم بوجه زوجها ...صدق ما في كرامه ولا إحساس!! ** ** ** مرت السنوات والراحة تعم حياتها ....حصة انتقلت لبيت مستقل لها بمكان بعيد شوي عن أهل ابو ضاري ... وما تشوفها الا بالمناسبات وما في أي احتكاك بينهم ... أما هي ما زالت في بيت أبو ضاري ...ما تنكر الراحه الي تلقاها هنا ...وخاصه إنها تكون مطمئنة على البنات بوقت غيابها بالجامعة ...وخاصة بعد ما صارت دكتورة تدرس بالجامعة....واجهت صعوبات وما كان سهل عليها تنال الدكتوراة.....وكثير فكرت تترك الدراسة ..بس الدافع الي بداخلها حتى يكون لها بصمه ومكان بهذا المجتمع ...كان الدافع لها حتى تكمل وما توقف بنص الطريق...ما تنكر إنه فارس كان المحفز لها حتى تكمل... ساندها وشجعها حتى وصلت لهدفها.. ارتاحت من النواحي النفسية والاجتماعية والمادية...ما تنكر بعض المشاكل الي تحصل بينها وبين فارس ...بس مشاكل تحصل في كل بيت ...وتنتهي بسرعه وترجع سمن على عسل .... ما عادت تهتم لسالفه إنه متزوج ..دام إنه ما قصر معها بشيء ليه تنزعج.... قطعت أفكارها نورة وهي تنطق بضجر: ماما شوفي ياسمين ؟! رحيق وهي تناظر نورة ومحبتها تعجنت بداخلها ..مرت الايام وكبرت نورة ...صار عمرها ١٢ سنة...جذبتها جنبها ومسحت على شعرها: وش فيها ياسمين؟! نورة بزعل مدت بوزها: أخذت ألواني! رفعت رحيق نظرها لياسمين وهي تطلع من الغرفه وبيدها دفتر الرسم والألوان.. وبنبرة تأنيب نطقت: ياسمين ليه تأخذين ألوان اختك!! ياسمين بقوة نطقت: هذي ألواني نورة باندفاع: كذابة! والله ألواني!! ختمت كلامها وهي تقوس شفتها تبغى تبكي...رحيق بصرامه ناظرت ياسمين: اعطي نورة الألوان واستخدمي ألوانك قاطعتها ياسمين: بس يا ماما رحيق بنبرة حازمه: بسرعه أعطيها الألوان! بلعت غصتها من التفرقه بالمعاملة ...وبخطوات هادئة تقدمت منهم..مدت لها الألوان بدون ما تنطق أي حرف! رحيق بنفس النبرة الحازمه:لا تضيعين وقتك على الرسم ..كملي حل الواجب بسرعه. هزت رأسها ورجعت للغرفه ... أول ما دخلت مسحت دمعها نزلت من عيونها .... ناظرت الكتب بكره ...كرهت الدراسة بسبب امها وأبوها ..يبغونها تكون دافورة وتصير طبيبة ...كل وقتها دراسة وجدية...بعكس نورة الي مدلعه وما تدرس الا بطلوع الروح وما احد يقول لها شيء! وكل شيء تبغاه لها!! مسكت الكتاب وبداخلها كره عميق لنورة .... بدأت تكتب الواجب بملامح عابسه!! بعد وقت قفلت الكتاب ورتبت اغراضها وطلعت من الغرفة ...ناظرت امها منشغله بأوراق أمامها ...ونورة متمدده على طولها تلعب بالجوال...هذا الجوال محرم عليها اوامر من أبوها ...يا ويلها إن شافها تلعب بالجوال...تحس بالملل تغزو روحها...نفسها تلعب مثل الصغار برا ...كل شيء بهذا البيت ممنوع!! اقتربت من أمها: ماما رحيق وهي منشغله بالأوراق: كملت واجباتك وحضرت الدروس! ياسمين بعبوس: ايه رحيق رفعت نظرها بتحذير: ابوك اليوم هنا ... وانت تعرفين إذا مسك كتبك وما كنت محضره قاطعتها ياسمين: ابغى أنزل عند جدتي رحيق برفض: الحين موعد رجوع ابوك ...بعد الغداء! قطعت كلامها لما فتح فارس الباب ودخل وهو يرد السلام! اعتدلت مباشرة نورة بجلستها ..تخاف منه بقوة!! رحيق ابتسمت وهي تحط الأوراق على الطاولة: وعليكم السلام ورحمه الله!! جلس وهو ينطق: الاكل جاهز؟! هزت رأسها رحيق: الحين أجهزه!! جلست ياسمين جنب نورة ...وهي تناظر ابوها بجمود ... ما تحب تحتك فيه ...تخاف منه وخاصه لما يعصب!! دق قلبها طبول وهو يسألها بحزم: كملت واجباتك؟! هزت رأسها بخوف وارتباك: ايه! تابع بنفس الحزم: والتحضير؟! هزت رأسها وكأنها رجل آلي : ايه هز رأسه: بعد الاكل رح اراجعك بالمواد ...انتبهي لدراستك ابغاك لما تكبرين تكونين دكتورة تعالجين الناس! ما هو مثل بعض ناس شغل جوالات!! ختم كلامه وهو يرمق نورة بانتقاد! بلعت نورة ريقها وما تجرأت تفتح حلقها بحرف واحد!!! طلع فارس جواله وبدأ يقلب فيه بهدوء .....نورة مطت شفتها ينتقدها وطول الوقت هو على الجوال ... بعد وقت اجتمعوا على سفرة الاكل ...رحيق وهي تكلم فارس: في رحلة مدرسية لياسمين ونورة قاطعها بحزم: صيته ما في رحلات لها ... نورة ما لي دخل فيها! رحيق رفعت حاجب: يعني كيف وحده تروح والثانية لا؟! رد ببرود: لا ترسلين اختك حتى يكونون مثل بعض!! رحيق ناظرت نورة الي شوي وتبكي من رده..نطقت: أنا رح ارسل نورة...وياسمين بكيفك ! نطق بجدية: أتوقع سالفة الرحلات من زمان تكلمنا فيها...ابنتي أنا أخذها رحلة وما انتظر المدرسه ترفه قاطعته رحيق: بس البنات يتونسون مع صديقاتهم قاطعها: إخوانها معها وبنات عمها وش تبغى اكثر من كذا؟! تستمع لكلامه وهي تتوقع بيوم من الايام يقولون لها ممنوع تتنفسي... ناظرت نورة الابتسامه شقت حلقها ....تحس بالاختناق من هالحياة ... ناظرت أبوها وهو يكلمها: نهاية الاسبوع جهزي نفسك رح نروح للالعاب مع إخوانك هزت رأسها بانصياع ورجعت تأكل بصمت!! انتهى البارت دمتم بخير 🌹 | ||||
|  |
|
31-05-22, 03:56 PM
| #1036 | ||||
 
| اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|
| |
|
31-05-22, 06:20 PM
| #1037 | ||||
| موقف مشعل يزعل كثير المفروض يوقف مع أخته مهما كان تعمنا من رحيق اللجوء إلي الله في كل وقت الان الله قادر على كل شئ الدعاء الله في كل وقت الذي نجا رحيق من حيث لا تحتسب من كيد عدنان تربيه رحيق فاشله درجه اولي اكيد بتطلع اختها ضائعه مش مهتمه غير بالكماليات هي تفرق بين بنتها بين اختها اكيد تزرع الحقد بينهم من غير لاتشعر | ||||
|
| |
|
01-06-22, 01:31 AM
| #1039 | ||||
| رواية رحيق الياسمين أول شي سلمت أناملك ياسكاكر على هالبارت الحلو💞🕊️ اااي نجي للأحداث تعامل مشعل مع رحيق ومعاملة رحيق مع بنتها وأختها وكيف تفرق بينهم والله كلها مواقف وتصرفات أليمة وتكسر الخاطر أتمنى رحيق تحس على نفسها وتنتبه لتصرفاتها وتدرك خطأها في معاملتها مع بنتها وحتى مع أختها لأنها حتخربها بهالدلع الزايد… وأخيرا أحس إن هالنقلة الزمنية اللي صارت بالرواية هي بداية النهاية لقصة جديدة عاد دائما وعلى قد مانتوقع مانصيب بتوقعاتنا وتفاجئينا بأشياء مختلفة تماما وماتخطر على البال لهذا مارح أقول شي غير أنو واثقة تماما من كل حرف تكتبينه إنه رح يعجب كل جمهورك القراء… دمتي بود وأتمنى لك التوفيق والنجاح في كل خطوة تخطينها💗 •• "واجعلنا ممن مسح على الجرح ورتق الشّق وجبر الكسر وسار بنهج الجسد الواحد وكان غيثا لمن يحتاج، ارزقنا الرحمة والرأفة وجملنا بالعطف". 💚 | ||||
|
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
العرض العادي
