06-06-22, 04:54 PM
| #1043 | ||||
 
|  اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|  |
|
07-06-22, 01:03 AM
| #1046 | ||||
 
| بارت ٤٢ والأخير نزلت من باص المدرسة وهي تتكلم مع زميلتها بالمدرسة وجارتهم بنفس الوقت باندماج ... بدأت تلعب معها حجر ورقه مقص أمام البيت..انضم لهم اخو البنت... كانت تضحك من قلبها على ملامح زميلتها لما فازت عليهم ... لبنى بغبن: نعيدها هزت رأسها بابتسامة وهي تردد : حجر ورقة مقص حست وكأنه لسانها أصابه شلل...وهي تشوف أبوها قدامها...نطق بنبرة عاديه : صيتة ادخلي بلعت ريقها ودخلت البوابة خلفه بدون أي نقاش...سرعان ما انقضت يده على إذنها وهو يشدها بقوة: أنا ابغى اقص إذنك الي ما تسمع الكلام! كم مرة قلت لك لا تلعبين مع الأولاد! حاولت تخلص إذنها من قبضته بدون ما تنطق أي حرف ... أول ما افلت إذنها ركضت بسرعه باتجاه بيت جدها ..دخلت البيت ومباشرة توجهت لجدتها زينب الي كانت تجلس بالصالة...جلست جنبها وهي تخفي نفسها خلفها زينب بنبرة حنونه: وش فيك؟! نطقت بخوف وترقب: يبغى يضربني! حركتها أمامها وهي تنطق: اكسر يده الي يضربك ولد مين ؟! سكتت لما شافت إذنها حمراء ...عرفت الجاني بدون ما تسأل! أول ما دخل الصالة دفنت نفسها بظهر جدتها ... تنهدت زينب بقلة حيلة وهي تنطق: وش فيك على هالبنت؟! فارس بغضب: كم مرة قلت لها ما تلعب مع العيال زينب بترقيع: يا يمه بعدها صغيره!! فارس بقوة: بالصف الثالث وصغيره؟!! وقف فوق رأسها وهي دافنه نفسها بظهر جدتها: أقسم بالله إن شفتك مع العيال الا اكسر رأسك بإذن الله!! والحين اطلعي للجناح بدلي ملابسك وانزلي مع الجنية الثانية لما ترجع من المدرسة ..امك رح يكون دوامها متأخر! بدون تردد تحركت بسرعه وهي تركض للخارج! زينب بعتب: يا يمه شوي شوي على البنت ..رح تتعقد والسبب انت!!! نطق بتبرير: كله لمصلحتها..والا تبغينها مثل نورة المدلعه! انا أعرف رحيق فاشله بالتربية وما أقدر أعتمد عليها ...والبنت أكيد تحمل جينات ذيك العائلة لزوم اكون معها حازم! ما تشوفين وجهها وكأنها نسخه عن اسماء ..الي ورثت شكلها اكيد ورثت شيء من أطباعها! زينب زمت شفتها تكسر خاطرها صيته من صغرها مثقل فارس عليها العيار... أحيانا ما تلومه الي يشوف الشبه الكبير يخاف تكون تحمل أطباعها!! ** ** ** دخلت الغرفة المشتركه بينها وبين نورة ....اقتربت من سرير نورة ناظرته للحظات ...بعدها جلست على سريرها وهي تتمنى أبوها يكون راح لبيته الثاني ...تحمد ربها إنها تشوفه قليل ...لو يعيش عندهم كل يوم الا تموت وما تقدر تتحمل حزمه! رفعت نظرها لنورة الي دخلت الغرفة وألقت حقيبتها على الارض وهي تردد:الله يأخذ المدرسة!! وارتاح منها!! استغفر الله يغثون الواحد بطلاسم ما ادري من وين يجيبوها!! ناظرت ياسمين الفوضى الي أحدثتها نورة بقدومها واغراضها ألقتها على الأرض ...لو تعمل كذا الا يعاقبها أبوها عقاب شديد...نطقت ياسمين بخفوت حتى تحذرها: بابا هنا! فتحت نورة عيونها بصدمه: هنا!! وبسرعه رتبت الفوضى الي أحدثتها .. تخاف يدخل الغرفة ويقطع آذانها ورحيق ما هي موجودة تدافع عنها!! لمحت إذن ياسمين وباستفسار نطقت: شد إذنك!! وقبل ما ترد ياسمين..انفجرت نورة بالضحك:شكلك تحفه!!! وش هببت حتى يشد إذنك! ياسمين بلعت غصتها ودفنت نفسها تحت الفراش وهي تنطق: ما يخصك! نورة اقتربت منها وهي ترفع الغطاء عنها: ليه ضربك؟! بالله ما قالك : أنا ابغى أقص إذنك الي ما تسمع هالكلام؟! ختمت كلامها وانفجرت من الضحك وهي تتخيل الموقف!! بلعت ضحكتها وهي تناظر ياسمين الي مستمره بالضحك!! نورة بضجر: ابوك إنسان معقد ..ويرفع الضغط وبنفس الوقت أخاف منه!! وبتذكر تابعت كلامها: واجب الرسم ما عملته ..باكر أبله هنادي رح تجلدني اذا ما رسمت خرابيش الدجاج الي تبغاها!!! مالت عليها عامله نفسها فنانه علينا..مالت عليك حيطه انت وخرابيطك! وبنبرة استعطاف: ياسمين ارسمي لي قاطعتها ياسمين بقوة: لو تموتين ما رسمت لك! نسيت البارحة ألوانك ما تركتيني استخدمهم!! نورة تستعطفها: سامحيني ما كان قصدي ..ما رح أعيدها! المهم اخلص من الرسم لأني ما افهم شيء بذي الخرابيط! ياسمين بعناد: لو تموتين! وإن شاء الله تجلدك ٥٠ جلدة يا كسوله! قال ما تفهم بذي الخرابيط ليه انت تفهمين شيء بالحياة؟! ماغير ترمين نفسك بحضن رحيق مثل البزران تتدلعين!! نورة انقهرت منها ...تكتفت وهي تنطق بنبرة مستفزه: تغارين مني لأنه ماما رحيق تحبني أكثر منك! ياسمين تركت السرير واقتربت من نورة: كذابة ..تحبني أنا أكثر منك يا كسوله!! نورة تجاكرها: كسوله! كل هذا من قهرك لأني طول وقتي أرفه عن نفسي وانت تكسرين الخاطر دافنه رأسك بين هالطلاسم ! دفتها ياسمين بقهر: قليلة أدب! نورة عصبت من تصرفها ...اقتربت منها وشدت شعرها بقوة: أنا خالتك يا حماره تحترميني غصب عنك والا انتف شعراتك! ياسمين تحاول تفلت شعرها من قبضه نورة ... ما قدرت تحرر شعرها ..سرعان ما مسكت شعر نورة وشدته بقوة!! مر وقت والحوار بينهم : اتركي بتركك ... اتركي بتركك! نورة وهي متألمه: رح أعد للثلاثه ونترك مع بعض! ١...٢...٣ تركت نورة شعر ياسمين ..وبعدها ياسمين تركت شعر نورة! نورة والنار مشتعله بداخلها: ما تركتي شعري لما قلت ٣ غشاشه! ختمت كلامها وهي تضرب ياسمين على كتفها! ردت ياسمين لها الحركه بقوة: الله يأخذك ودخلوا من جديد بصراع مين ضرب آخر شيء! تذكرت ياسمين كلام أبوها عن الغداء...وشهقت بقوة: بابا قال لما توصل نورة ننزل مباشرة للغداء تحت وما نتأخر! نورة ناظرتها بقهر: الله يأخذك ليه ما قلت..والله ليقطع إذني الحين! ياسمين وهي تطلع من الغرفه: إن شاء الله يقطعها ونرتاح منك! ** ** ** بالمساء جالسه بضجر تناظر أمها وهي غرقانه بأوراقها: ماما كلمتي بابا عن الرحلة! رحيق بانشغال:حاولت وما وافق نطقت بقهر وهي تضرب الخداديه بوجه نورة المندمجه على الجوال: ليه هذي الزفته تروح وأنا لا؟! علشانها غبية بالمدرسة تجازينها بالرحلات وأنا اجلس هنا مندفسه! رحيق ما قدرت تمسك نفسها من الضحك على شكل نورة الي كانت مندمجة بالجوال وفجأة الخدادية بوجهها! وقفت نورة بقهر: تضحكين لها!! والله لأضربها قاطعتها رحيق وهي تمسكها والبسمه مرسومة على ملامحها: ازعل منك يا نورة!! نورة بقهر وعيونها تنذر بالدموع: ما شفت تصرفها!! رحيق تنهدت وهي تشوف نورة على وشك البكاء..بحياتها ما شافت إنسان دمعته تنزل بهذه السرعه...ناظرت ياسمين بتأنيب: وش هالتصرف هذا يا ياسمين! هذه خالتك ولزوم تحترمينها..لو كان أبوك هنا وش رح يعمل على تصرفك الي غير مؤدب!! ياسمين بضيق: ليه كل شيء مسموح لها وأنا لا؟! خزتها رحيق بعد ما ناظرت الساعه: الساعة ١٠ متأخرة عن موعد نومك نورة تكمل عن رحيق: لو ابوك هنا كان قطع إذنك على هذا السهر...لزوم تتعودين على نوم الدجاج هذا!! ختمت كلامها وهي تمد لها لسانها تجاكرها! ياسمين رح تنفجر منهم ... تحركت والغصه بحلقها من هالتحكم بعد ما أشرت لها رحيق على الغرفة: يلا روحي نامي وباكر نتفاهم!! ختمت كلامها بنظره قويه حتى ما تتكلم وتجادلها ..... التفتت على نورة وبأمر بعد ما دخلت ياسمين الغرفة: يلا يا نورة وقت النوم...ما ابغى اسمع اي همس ! نورة بضجر من هالقوانين: أنا وش دخلني حتى انام بنفس الوقت... وكأني دجاجه!! رحيق وهي تتصفح الأوراق نطقت بحزم: تحركي خلفها بسرعه! نورة وهي تحضن رحيق وترتجيها: يا قلبي بس ربع ساعة وانام ...الحين إن دخلت الغرفة نتشاجر قاطعتها وهي تهز رأسها: عشر دقائق !! ** ** ** اليوم كانت بزيارة ياسمين أختها ...تمددت على الكنبه وهي تنطق بتردد: متأكده زوجك ما هو موجود! ياسمين بتأكيد: اقولك ما هو موجود..المهم بغيتك بسالفه نار!! رحيق بملل من سوالف ياسمين...طول وقتها من بيت لبيت تزور اقارب زوجها وكل يوم عندها سالفه جديده...وبمجاراه نطقت: ايه اسمعك ياسمين بحماس: لو تسمعين هالسالفه ما رح تصدقين! رحيق رفعت حاجب: خلاص صدقتك! ياسمين خزتها : يا كلبه تسلكين لي!! ابتسمت رحيق : يا ابنة الحلال تكلمي وخلصيني بدون لف ودوران ...نفسي تقولين السالفه بدون مقدمات بايخه وتفصيلات ممله..تكلمي مباشرة ١ ٢ ٣!! ياسمين لوت شفتها: الحق علي اجيب لك قصص واخبار العالم !! المهم البارحة قلت لك أبغى ازور ابنة خالة زوج اخت زوجي!! عقدت حواجبها رحيق بعدم استيعاب: يا خال جدي حك ظهري!! ياسمين ضحكت بخفه: يعني مرام اخت زوجي طبعا زوجها عنده ابنة خال قاطعتهابتسليك: المهم وش فيها!! ياسمين باندماج: روحت ازورها لأنه ابنتها كانت مريضة بالمستشفى..وجلست معها وتعرفت عليها ...وللصدفه تكلمت عن ابنة عمتها الي هي جارتهم ...تقول البنت سنعة واخلاقه عاليه والكل يتكلم بسمعتها الطيبة عفست ملامحها رحيق: لا تقولين تبغين تخطبينها لطراد! ياسمين بنفس: خليه بالاول يكمل دراسة ويتوظف وبعدها يصير خير!! المهم نرجع ابنة عمة وابنة زوج أخت زوجي ناظرتها رحيق بغيض: وبعدين معك..ترى فقعت مرارتي منك ...تكلمي بسرعه بدون لف ودوران!! ياسمين كشت عليها: اعوذ بالله نفسيه ...والا تظنين إني طالبه من طالباتك تبغين إجابات نموذجية رحيق اصابها ضجر من هالسالفه ..غطت عيونها بساعدها وهي تنطق بملل: كملي ياسمين تربعت على الكنبه وهي تكمل: تقول هذه البنت الي تكون ابنة عمتها قاطعتها رحيق بغضب: لا حول ولا قوة إلا بالله! وش فيها ترى طق قلبي..وش فيك صايره غثيثه وانت تتكلمين ...تكلمي بسرعه بدون تفاصيل! ختمت كلامها ورجعت غطت وجهها بساعدها ياسمين بروقان: يا حلوك وانت معصبه!! المهم هذه البنت ابوها خريج سجون من الديون والشيكات عليه ...ولما طلع من السجن زوجها غصب عنها من رجال كان معه بالسجن رحيق ببرود: لا تقولين إنها اكتشفت إنه الشخص الي كانت تحبه وتسهر الليالي علشانه والسجن فرق بينهم؟!! ياسمين بضحكه: أكيد لا!! وطبعا تقول ابنة خالة زوج اخت زوجي إنها انجبرت عليه وهي ما تبغاه ...وتزوجته ويقولون لو تشوفين كيف خلته يمشي على الطريق السوي بدون لف ودوران...كلمتها ما تثنيها وهو مثل الارنب بيدها! رحيق باستغراب: البنت حلوة؟! ياسمين: عاديه وأقل من عادي!!! رحيق وللحين مستغربه: يا اختي ذول الحريم كيف يفرضون سيطرتهم على الرجال؟!! شوفي أنا يقولون عني حلوة ودكتورة ومتزوجني عن حب ومع كذا ما يسمع كلامي! ياسمين بتأييد: صحيح ما ادري وش الاساليب الي يستخدمونها !! فكرتي تتركيه لشهر وشهرين يمكن يصير مثل الكلب يركض خلفك قاطعتها رحيق: جعل الكلب يقطع عدوك ..انت وش لك عند الرجال تشتمينه؟!! لو أهج سنوات ما رح يسأل ... يقولي رح يفقدني يوم يومين وثلاث وبعدها رح يتعود على الحياة بدوني .يا اختي الرجال ما لهم أمان ...يتأقلمون على الوضع بسرعه ولا كأنك كنت بيوم من الايام بحياتهم!! ياسمين بتأكيد: صادقه ..تدرين الاسبوع الي طاف لما زرتك..التقيت بضاري عند البوابة ..سبحان الله مشى من جنبي وكأنه ما كان بيوم من الايام يلاحقني ومقرفني حالي!! رحيقناظرتها بشك: انت قاطعتها وهي تهز رأسها: لا يروح بالك لبعيد ... أنا مجرد أعطيك مثال...هو بالأصل ما دخل قلبي حتى تشكين بأي شيء! قلت لك من قبل كنت مجرد فتاة تحب الكل يمدح جمالها ..والحمد لله ربي عوضني بزوجي ..الحمد لله لو اطلب لبن العصفور ما يقول لا ...وعامل عيالي أفضل معاملة ولو كان ابوهم عايش ما رح يلقون هذي الحياة والرفاهية..شوفي كيف ربنا عوضه ورزقه بولد مني مع إنه أغلب الدكاترة قطعوا منه الأمل ..بس تربية الأيتام والاهتمام فيهم اجرها وثوابهاعند ربنا قاطعتها رحيق: على سيرة عيالك ما اشوف احد هنا ياسمين خزتها: وش فيك من الصبح اقولك راحوا قاطعتها رحيق بتذكر: صح صح نسيت...الله وكيلك هالايام الذاكرة معطوبه شوي! يا زين الجلسة بدون العيال ! ياسمين ابتسمت: الي يسمعك يقول عندها عشر اولاد ...للحين معنده ما تبغين عيال؟! رحيق تنهدت براحه: صدقيني مرتاحه بشكل ما تتصورينه ...مستحيل ارجع وأحمل مرة ثانية ...كلما اتذكر ولادتي بياسمين قلبي يتوقف من الخوف. ...وبعدين انا مكتفيه بياسمين ونورة ! إن شاء الله ثلاث سنوات وازوج نورة واشوف عيالها قاطعتها ياسمين بفجعه: تزوجينها؟! لا الظاهر عقلك ضارب!! ومين رح يتزوجها هالبزر؟! ردت رحيق بابتسامة عريضة: رح تكون سلفه لك ...اهل زوجك عندهم عزابيه ...وكذا اطمئن إنه نورة بخير وبراحه ...وخاصه اهل زوجك ما شاء الله ما عمري شفت بتواضعهم وطيب قلبهم!! ياسمين عفست ملامحها: خافي ربك تبغين تلصقينها عندي ...ترى ما اتحمل دلعها الماصخ!! تدرين انا لما اشوفها ترمي نفسها بحضنك احس أحد يمسكني من خناقي...تراها كبرت على هالحركات ...تراك دلعتيها بزياده ...وما اشوف هالدلع لابنتك! رحيق مطت شفتها بملل: وكأنك ما تعرفين فارس ! ما يبغاها مدلعة مثل نورة!! صدقيني أنا ما افرق بينهم بس حياة ياسمين مختلفه عن نورة ...اهل ابوها ما يحبون البنت المدلعة ومن هذه الأشياء... وأنا ما ابغاها تعيش بتناقض ...ما ابغاها تعيش نمطين بحياة وحده ...خليها تعيش مثل إخوانها بنفس الاسلوب والعادات والتقاليد !! كثير اكون حازمه معها لأنها ياسمين بكل بساطه ما تنعطي وجه ... ياسمين عفست ملامحها بتذكر: من لسانك الطويل نسيت السالفه المهمة ! خلينا نرجع لابنة عمة قاطعتها رحيق بقوة: ترى طق قلبي من سالفتك البايخه! وش فيها هالبنت؟! ياسمين هزت رأسها بابتسامة باهته: تخيلي إنها متزوجه أخوك فيصل! نهضت نفسها بصدمه من الكلام: وش تقولين؟!! ياسمين مطت شفتها بسخرية: شفت كيف الدنيا صغيره!!! سبحان الله صدق المثل اجاك يا بلوط مين يبلطك!! نافش ريشه علينا ويتقوي علينا وعند زوجته مثل الخروف! وعنده ولدين قاطعتها رحيق بعبوس وقسوة فيصل تنعرض بذاكرتها: شفتيهم؟! لا تقولين انك زرتيهم! ياسمين هزت رأسها بفخر بتصرفها: حملت نفسي وزرتهم..ابغى أشوف أخوي العود وهو مثل الخروف!!؛ رحيق بعدم تصديق لتهورها: وش قال لك؟! ياسمين تابعت كلامها:لو تشوفين زوجته صدق إنها اجوديه وأصيله وهي الي تشور وتمون عليه!! رحيق تأخذ اخباره بالتفصيل: وش يشتغل؟! ياسمين بسخريه: وش رح يشتغل يا حظي!! دكتور والا مهندس تراه خريج سجون عتال وكثير عليه!! عبست ملامحها بضيق من حال إخوانها: والفلوس الي سرقوها ياسمين قاطعتها: البيت لهم وفاتح بقالة بالحارة يصرف على عياله منها ...يعني حسيت وضعه المادي كويس...لو تشوفينه ما تعرفينه.. إنسان ثاني يا رحيق هادئ وتخيلي رحب فيني في بيته ؟!! تدرين اكثر شيء ضحكني إنه مداوم على صلاة الجماعة! ختمت كلامها وهي تنفجر من الضحك!! رحيق ناظرتها بانتقاد: وش الي يضحك.. الهدايه من عند ربنا!! ياسمين وهي للحين تضحك: ما ادري احسه قاطعتها رحيق بضيق من ضحكها الي ما له معنى: ترى والله ما تضحك!! والله يضيق صدري لما اشوف حال إخواني ..وش ينقصنا لو كنا مجتمعين وبيننا أخوة مثل باقي الناس!! ياسمين خزتها: ناقصك قلب أبيض يا حقودة...كم صار لك مقاطعه مشعل رحيق بمراره: بعمري ما كنت حقودة وقلبي اسود بس المجتمع ما ترك لي الخيار! تصرفات مشعل للحين محفورة بقلبي وما نسيتها ...جرحني كثير بدون أي ذنب!! ياسمين بجديه: انا قررت مع فيصل نرجع نلم شمل عائلتنا ونتصافى بيننا!! القطيعة ما ترضي رب العالمين!! وفيصل يقول حرق كل الماضي وبدأ حياته من لما تزوج والفلوس الي أخذهم رح يرجعهم ويقسمهم بيننا لما يجمعهم رحيق قاطعتها: ما أبغى منه شيء ...كل الي نبغاه راحة البال!! ما قال لك كيف أخذ الفلوس!! ياسمين هزت رأسها بالنفي وبتصميم نطقت: تهرب من الإجابة..المهم انا رح أرتب الأمور ونرجع شملنا من جديد! رحيق بتذكر: طيب ورياض؟! ياسمين هزت رأسها بالنفي: ما احد يدري عنه ...فيصل يقول إنه قرر يبدأ حياة جديدة بمكان جديد وناس جديده! بس يقول يقدر يوصل له ! ** ** ** في بيت ابو ضاري ...مدت لجدتها كوب المويه وهي تنطق بنبرة راجيه: يا جده شوفيه لما يرجع حاولي اقنعيه علشان الرحلة! زينب شربت موية ووضعت الكأس قدامها: يا ابنتي وكأنك ما تعرفين ابوك؟!! ياسمين تلح عليها: حاولي اقنعيه قاطعتها بملل: شوفي امك تكلمه ياسمين بعبوس: كلمته ورفض ضحكت زينب بسخرية: اذا ليلى وما سمع كلامها تبغين يسمع كلامي! عقدت ياسمين حواجبها بعدم فهم: مين ليلى زينب بلا اهتمام: خلاص رح اكلمه ومع إني متأكدة رح يرفض ...لا تنسين اخوك ريان الاسبوع الي طاف راحت مدرسته رحله وما راح معهم ! ابوك يخاف عليكم علشان كذا هو رافض! يبغى مصلحتكم ناظرت جدها لما دخل البيت ...رد السلام وهو يجلس جنب زينب..وبنبرة مبتسمه: اشوف صيته هنا!! ناظرته ياسمين بعدم رضا: ياسمين! ضحك على انفعالها والبنت متعقده من اسمها كثير ...نطق بروقان: يعني عاجبك اسم ياسمين؟! مدت بوزها بعبوس: لا بس يعني أهون من صيته! ضحكت زينب من قلبها على ملامح ياسمين العابسه: يا قلبي..والله أمك وابوك رح تطلعين بسببهم معقده نفسية وخاصه من هالاسم! أبو ضاري بجدية: لو منحوك تختارين اسمك .. وش رح تختارين! سكتت للحظات وهي تفكر بالإسم الي رح تختاره ...بعد تفكير قصير نطقت : شمس عفس ملامحه أبو ضاري: شمس؟! وش هالاسم هذا؟! ردت بابتسامة: حتى نكون أنا وأختي " شمس وقمر" مط شفته بعدم رضا: ليه قالوا لك ابغى اجمع المجموعة الشمسية عندي!! زينب بابتسامه: طيب ياسمين حلو ومتناسق مع امك " رحيق الياسمين" هزت رأسها بالرفض: خليها تسمي حالها" رحيق نورة" أبو ضاري ضحك على ملامحها والغيرة تأكل قلبها: يا ابنتي اتركي عنك الحسد والغيرة ..ترى الحسد ما ياكل إلا صاحبه!! وبعدين هذي خالتك ولزوم تحبينها قاطعته بقهر: بس هي سرقت امي مني!! زينب بهدوء: نورة وضعها مختلف عنك ...هذه طفله يتيمه ما عندها ام وأب تجلس معهم تطلع معهم أو تحكي عنهم...والدين امرنا نعامل اليتيم معاملة حسنة ....ناظري نفسك عندك أم وأب قاطعتها بعبوس: يقهروني ماما وبابا متسلطين علينا وكل شيء ممنوع!! أبو ضاري يخزها: ناظريها يا أم ضاري وكأنه ريان إلي يتكلم!! زينب بابتسامه: فارس وقليل عليكم ...يا جيل اليوم ما تبغون تدرسون ولا تتعلمون وكل عقلكم بالإنترنت! وهذي أمك رجعت! ناظرت أمها وهي تدخل بخطوات هادئة ومتزنه .ردت السلام بخفوت!! أبو ضاري بروقان نطق: تعالي شوفي ابنتك معترضه على حياتها وما هو عاجبها شيء!! ناظرتها رحيق بجديه: لا تقولين أسأت الأدب مع جدك وجدتك!! زينب بضحكه: ترى أسلوبك يضحك يا رحيق ! اتركي البنت بحالها يكفي لما يكون فارس يطلع روحها بالأوامر!! رحيق ابتسمت: احب العب دور الأم الحازمة إلي يتنفذ كلامها بالحرف الواحد تحسين نفسك هيبه! أبو ضاري رفع حاجب: وليه ما تطبقينها على نوير!! رحيق ارتسمت ملامح الحزن على وجهها: فرق ما بين نورة وياسمين! ياسمين أنا أمها مهما قسيت عليها وزعلتها أبقى امها ومرجعها لحضني ...وكل الأمهات يعاملن عيالهم كذا!! بس نورة لو قسيت عليها أو زعلتها ..رح تصير تفكر بأمها وتحس بالنقص عن كل العيال ...ورح تكون كئيبه وحزينة لأنها تعيش بدون اب أو أم!! أنا أحاول دوم مهما لعبت فيها الدنيا أكون أنا المرجع لها والحضن إلي ترمي أحزانها عليه بدون تردد او خجل!! زينب بهدوء:إن شاء الله ربنا يحفظها لك وتفرحين فيها!! هزت رأسها رحيق: آمين بعدها إلتفتت على ياسمين بتساؤل: وين نورة ما أشوفها؛ ياسمين بهدوء: نامت بعد الغداء مباشرة!! رحيق باستجواب: حضرت دروسك ناظرتها ياسمين ودمعة القهر بعيونها من الدراسة الي صارت شبح يتابعها وين ما راحت: بعدين وقفت رحيق وهي تؤشر لهاقدامها : تحركي بسرعه كملي دراستك وبعدها ترجعين بغت تعترض بس نظرات رحيق الحازمة أجبرتها تطلع والقهر بداخلها وصل حده!!! زينب بعدم رضا: ترى انت وفارس رح تعقدون العيال من الدراسة...مو كذا الحياة تمشي! تخيلي زوجك الفهمان حرم ريان يطلع يلعب أسبوع كامل لأنه حصل بمادة العلوم على ١٥/٢٠ !! رحيق باستنكار: ١٥!! والله لو ياسمين تجيب هالعلامه إلا أكلها بأسناني!! أبو ضاري بسخرية: على رسلك يا أنيشتاين!! يعني الي يسمع يقول انت وفارس كنتم الاوائل بالمدرسة!! والله يا فارس كان يطلع روح امه وهي تدرس فيه قاطعته رحيق بتبرير: لأننا لما كبرنا اكتشفنا مصلحتنا ...وما نبغى عيالنا يمشون نفس طريق حياتنا ..نبغى لهم الأفضل!! أبو ضاري تثاوب بنعاس: اقول خففوا عن العيال افضل ما اتدخل ..صدقوني ما رح يعجبكم تدخلي!! في نقطه مهمه نسيتيها يا حضرة الدكتورة ...إنه في شيء اسمه ميول وقدرة! مو كل الطلاب يحبون كل المواد .. وقدرات الطلاب مختلفه من طالب لثاني..تلقينه قوي بالعربي بس فيه عنده ضعف بالانجليزي او الرياضيات...لزوم تشوفين ولدك بأي مجال ميوله وانت بدورك تقوي وتدعمينه! هو له حياة ومن حقه يختار اوقات حياته ما هو على كيفكم!! هذا أنا اقولها لآخر مرة إذا ما خففتم عن هالعيال ما رح يعجبكم تصرفي أبدا!! رحيق ردت بمضض: إن شاء الله يصير خير!! ** ** ** كان يمشي بالمطار بخطوات هادئة ...لفت نظره رحيق تمشي بعجله وبيدها اوراق منشعله فيهم!! يحس نفسه بحلم وش جاب رحيق لهنا!! توجه لها بخطوات سريعه لما اقترب منها وقف لما رفعت رأسها ...فيها شبه من رحيق بس مو رحيق ..للحظة ظن إنها رحيق ...مرت من جنبه وواضح إنها مستعجله.. لفت نظره لما وقعت الاوراق منها قريب منه ...نزل للأرض وهو يجمع الاوراق...حس يده تيبست وهو يقرأ الاسم الي على البطاقة!! مستحيل اسم رحيق ونفس تاريخ الولاده ونفس الرقم الوطني!!! عقله يرفض يستوعب إنه الي واقفه قدامه تنتحل شخصية رحيق!! اعتدل بالوقوف لما مدت يدها تاخذ الاوراق والتوتر واضح عليها!! مايدري مين تكون ؟! وما يدري وش جاب اوراق رحيق لها ...وما يدري ليه تنتحل شخصيتها بكل هالبساطه .. والأهم وش هدفها من هالتصرف؟!! بس ما رح يخليها تهرب وما يكون فارس اذا ما عرف السالفه من اولها لآخرها! ** ** ** بمركز الشرطه مط شفته وهو يناظرها فرغت كل إلي بجعبتها من كلام...وبنبرة رجاء نطقت: ارجوكم اتركوني بحالي والله ما أعيدها ولا رح تشوفون وجهي!! انا مو سيئة بس هم أجبروني أعمل كذا...وأنا بنت وحيدة ما لي سند ...سامحوني رح ارجع على بلادي وما رح تشوفوني!! اقتربت من رحيق وبرجاء: يستر عليك دنيا وآخرة سامحيني!!! ناظرتها رحيق بسرحان ...عقلها يفكر بالعالم والشر إلي يسري بداخلهم ...ما عمرها شافتها او إلتقت فيها ...تقوم تؤذيها بهذه الطريقة البشعة ...سرقت الفلوس من حسابها ...وانتحلت شخصيتها بالشركة ...وختمتها وهي تشوه سمعتها ...وقتها ربنا لطف وما وصلت الفيديوهات لأهل زوجها...والا كانت الحين مشردة ما لها بيت يضمها وسمعتها بالأرض! ليه الناس ما تراعي شعور الآخرين ...ما يدرون إنه حنا لنا مشاعر واحاسيس ...بداخلنا مثل الزجاج ينكسر بسرعه!! وفوق هذا للحين تحمل وثائقها وتنتحل شخصيتها ....مر قريب ٨ سنوات من ذلك الحدث وللحين ما تابت ومستمرة بشرها .... يمكن أي شخص ثاني بمكانها وهو يشوف الرجاء وانكسارها وندمها حتى تسامحها رحيق ..وخاصه هالقضية رح تجر إخوانها للتحقيق...بس هي انظلمت منهم ومن حقها تأخذ حقها وما تسامح ..ما رح تسامح أي أحد أساء لها بهذه البشاعه لأنه اذا سكتنا رح يتمادوا بالأذى..تنهدت رحيق وهي تنطق بهدوء: أنا رح أقدم شكوى عليك حتى تتعلمين كيف توصلين الأذى للناس بدون ما تعرفيهم! هناء انفجرت من البكاء: والله ما اعيدها! رحيق بقوة وبكره لهذه الإنسانه: كل مذنب لزوم يأخذ جزاء افعاله!!! هز فارس رأسه بتأكيد لكلامها..حتى لو لانت أو تراجعت هومستحيل يتراجع ...ما هو قادر يستوعب حقارة هذه الناس!! *** *** ** بالطريق نطق بانتقاد: وليه أخفيت سالفة الفيديوهات؟! علشان كذا إلتقيت بمشعل؟! تنهدت بضيق: ما بغيت شيء يخرب حياتنا من جديد...فارس خلاص قفل هالموضوع والله يكدر خاطري!! خزها بقوة: بس ابغى أفهم لذي الدرجة عقلك طافي وما تميزين بينك وبين هناء! حتى مشعل ما ميز قاطعته وهي تضحك على حالها بخيبه: الموقف ما ترك لي فرصة أميز أو انتبه!! فارس تنهد : ما له داعي أحد يعرف بالسالفة خليها بيننا...مو كل الأمور لزوم تنفضح للعلن...وخاصه إخوانك متورطين معها ...ما احب شيء يسيء لابنتي ..فهمتيني! هزت رأسها وهي ترخي رأسها على الشباك بتعب... إخوانها اهلكوها بعمايلهم وصغروها قدام زوجها!! صدق الطمع ضر ما نفع .... نطق يغير الموضوع: الحين لما نوصل خلي صيته تنزل لي بسرعه ما أبغى اتأخر! رحيق بهدوء: إن شاء الله !! بعد وقت دخلت السيارة ياسمين بتردد...حرك السيارة فارس والصمت يخيم عليه ...استغربت حاله دوم لما تطلع معه يصج راسها وهو يسألها عن الدراسة وادق التفاصيل بحياتها...تنهدت براحه إنه ما فتح معها أي موضوع !! بعد وقت وقف السيارة عند بيته...نزلت بخطوات هادئة للداخل...عبست ملامحها اول ما شافت حصة..ما تدري ليه هالمخلوقه تناظرها بحقد وكره! طنشت نظراتها وسلمت عليها ببرود ... حصه مطت شفتها وهي تنطق: ابوك ما يرتاح الا لما يغثني! وين ابوك! ياسمين ببرود نطقت: يتكلم بالجوال! وين ريان وقمر قاطعتها بقرف: بغرفهم تحركت تركض لهم قبل ما تكمل حصة كلامها!! توجهت لغرفة قمر...فتحتها بحماس : ياهوووووو قمر فزت على حيلها بفرحة وركضت لها ...حضنتها بقوة: تأخرتم كثير توقعت بابا ما رح يجيبك! ياسمين ابتعدت بابتسامة: وأنا توقعت كذا .. وين ريان وين التوأم؟! قمر مسكت يدها بتملك: تعالي إلعبي معي واتركي العيال!! جلست على السرير وهي تمسك كتاب قمر : تدرين لما كنت بالصف الثاني هذا الدرس اخذت عليه ١٨ وقتها فقدت الإحساس بإذني من بابا!!! ختمت كلامها بضحكه نحيب: اكره الدراسة! قمر عبست ملامحها وهي على وشك البكاء: لو يطلع بيدي احرق كل الكتب ..انت افضل منا أمك دكتورة وما تضربك ...ما هو مثل ماما شوفي كتفي...أشرت على مكان احمرار بكتفها: كل هذا لأني ما حفظت الأنشودة!! ماما عصبيه وما لها خلق ... من اول ما تعصب تبدأ تضرب!! ياسمين وهي تتصفح كتاب قمر: أمك تخوف ..لو شفتيها كيف تناظرني...تقول أبوك يحب يغثني!! تعالوا انتم على بيتنا ماما ما رح تقول شيء ولا تتضايق!! ريان وهو يسمع كلامهم: إلي يسمعك يقول بس نطلب على طول بابا ينفذ لنا!! ترى البارحة جبت بامتحان الرياضيات ١٢ من ٢٠ بس ما احد يدري! فتحت عيونها باستنكار: ١٢!! لو يدري بابا وش رح يقولك! ضحك بعباطه: علشان كذا ما خبرت أحد حتى ما يكنسل الطلعه اليوم!! ياسمين عبست ملامحها: أبغى أروح رحلة مع المدرسة بس بابا رفض وقال رح ياخذنا للألعاب اليوم! قمر بانتكاسه: يعني ما تبغين تروحين معنا؟! ياسمين بعبوس: ابغى اروح مع صديقاتي بالمدرسة! ريان خزها: يعني حنا مو قد المقام؟! ابتسمت بلطافه: ما أقصد كذا ..بس قاطعها بتفهم: وأنا مثلك كنت ابغى أروح مع المدرسة بس للأسف ما وافق بابا!! وين نورة ليه ما جاءت معك؟! قمر نطقت قبلها: اكيد ارتمت بحضن خالتي رحيق وقالت ما ابغى أطلع!! ضحكت ياسمين لأنه هذا بالضبط الي صار! دخل فيصل وخلفه محمد: متى رح نطلع للألعاب!! ياسمين ناظرتهم بابتسامه: وين بابا؟! فيصل : جالس مع ماما بالصالة! خلينا نطلع الحين حتى نكسب وقت اطول لللعب! جالس بالصالة مع حصة ويسمع لها وهي تتكلم عن الحفلة الي رح تعملها بس تخلص المدرسة ويحصلوا عيالها على شهادات تقدير! هز رأسه بهدوء ..رفع نظره لعياله متوجهين لهم ..ابتسم من قلبه وهو يشوف قلوبهم على بعض وما في كره او بغضاء بينهم ...هذا اهم شيء حاول يغرسه فيهم !! ريان تقدم بتردد: بابا متى قاطعه وهو عارف سؤاله: بعد شوي ...جهزوا نفسكم حتى ما نتأخر! قمر ابتسمت بفرح: شكرا بابا ! ضحك فارس من قلبه على طريقتها وخاصه مع اسنانها الاماميه إلي خلعتهم الاسبوع الماضي!! كل عياله يشبهونه كثير باستثناء صيته ما تشبه لهم .. الشبه فيها لجدتها أسماء...بس يحمد ربه إنها للحين ما ظهر عليها اي خلق من اخلاق جدتها!! حصه وهي تناظر ياسمين بعدم رضا: كيف علاماتك فارس قاطعها: من هذي الناحية صيته أذكى وحده بعيالي كل علاماتها مرتفعة قمر ببراءة نطقت: أمها دكتورة اكيد رح تطلع ذكيه مثلها!! ناظرتها حصه بنظرات ناريه ...حست قمر إنها جابت العيد بكلامها ..نطقت ببراءه: صح يا بابا امها دكتورة! ضحك فارس من قلبه على براءة قمر وعلى ملامح حصه المنتفخة! ياسمين ببراءة نطقت:ايه دكتورة ودوم بابا يقول لها " احلى دكتورة" ما قدر فارس يمسك نفسه من الضحك أكثر وهو يشوف حصه زعلت وغادرت المكان والنيران تطلع من عيونها! ريان بصوت هامس لإخوانه: ماما ما تحب خالتي رحيق علشان كذا زعلت...ما يصير تمدحينها قدام ماما! قمر باستغراب: وليه ما تحبها؟! ياسمين بتفكير: لأنها ماما أحلى منها!! فيصل نطق بعد ما طلع ابوه خلف أمه: يا غبية لأنه امك دكتورة وهي لا!! ياسمين مطت شفتها : وليه ما درست وصارت دكتورة؟! قمر بجديه: اذا ماما بغت تضربني علشان الدراسه رح اقول لها أنا أبغى اصير مثلك كسوله!! محمد خزها: والله لاقول لماما تقولين عنها غبيه!! ريان بترقيع: هي قالت كسوله ما قالت غبية!! ** ** ** ياسمين من لما سمعت السالفه توجهت لرحيق تحاول فيها تطلع فيصل من السالفه .. وبنبرة اقناع:تراه تاب وتغير...لا تسمعين لفارس تراه حقود وما يحبنا من زمان قاطعتها رحيق بمرارة: فارس ما له علاقة هذا قراري...ليه كل شخص غلط ما ينال جزاء عمله!! أنا تجرعت العلقم منهم ومن بطشهم !! ياسمين زفرت بضيق: ادري إنهم سيئين وما راعوا حق الأخوة ...بس تغيروا يا رحيق!! صدقيني اذا ما طلعت إخواني من السالفه إلا أخبر مشعل عن نورة ووقتها ما اتوقع تشوفينها قاطعتها رحيق بصدمه: تهدديني؟! ياسمين عفست ملامحها بمرارة: ما اهددك بس ما ابغاك تأخذين قرار تندمين عليه طول حياتك!! يا رحيق سنوات مرت بعد خروج فيصل من السجن ومن بعد زواجه كل الحي بمنطقته يشهد بأخلاقه وحسن تصرفه!! صدقيني لو تجلسين معه رح تنصدمين إنه فيصل!! وين فيصل الي يتجبر ويتكبر ويبطش بدون ما يرف له جفن!! اختفى فيصل القديم وحل مكانه إنسان مسالم متمسك بالحياة ويسعى لقوت يومه حتى يوفر لعياله لقمه تسد جوعهم !! حنا مو سيئين يا رحيق بس المجتمع هو السبب!! حنا بداخلنا قلوب رقيقه بس إلي حولنا هم إلي خلوها قاسيه! شوفي فيصل لما وجد من يحتويه ويقوم سلوكه ظهر الجانب الطيب منه!! لو شفتي عياله يدخلون قلبك وتحبينهم ...مؤدبين والهدوء يحيط فيهم...ومتعلقين بأبوهم كثير!! رحيق إذا انسجن فيصل عياله رح يضيعون ويتشتتون! لا تكوني سبب في دمار هالبيت ...لا تكوني سبب حتى يعيشون الحياة إلي عشناها!! اعطي فرصة للي حولك ....ولا تنسين زوجته ما لها ذنب تحمل هم العيال وتراكض حتى تصرف عليهم!! عشنا طفوله مؤلمه يا رحيق وما لقينا أحد يحتوينا ...ولما كبرنا لقينا من يحتوينا ويسعدنا ..بالله عليك لا تهدمي سعادتنا!!! أنا أبغى يلتم شملنا من جديد... أبغى يكون لي إخوان أزورهم ويزوروني...أبغى يكون لنا مكان بالمجتمع وما نكون منبوذين او وحيدين...ابغى نشد على يد بعض ويرجع دم الأخوة يسري بعروقنا!! تدرين قطعت كلامها وهي تناظر رحيق دموعها تنزل بغزارة ..بغت رحيق تتكلم بس الشهقات كان أقرب للكلام!! احتضنتها ياسمين بقوة وهي تردد: القادم الأجمل ورح يصير كل شيء ذكريات نضعها بدفتر النسيان ونقفله للأبد!!! *** *** *** مرت الأيام ومع إصرار ياسمين ومحاولاتها إلتم شمل بينهم ... مجتمعين في بيت مشعل ...رافقتها خالتها زينب معها!! مشعل بالبداية كان رافض يلتقي بإخوانه يبغى يبعد عن الكل وينسى الماضي وسنينه!! بس إصرار ياسمين وزوجته رغد على الصلح رضخ للأمر الواقع!! جالسين بالحديقة ورياض وفيصل تكفلوا بتجهيز المشاوي!! رحيق متمدده ورأسها بحضن خالتها زينب ...تناظرها وتبتسم وهي تسمع مناقرة خالتها وياسمين ما تنتهي!! ياسمين رفعت حاجب باعتراض على كلام زينب: لا والله!! والله طراد احلى من عيالك كلهم ..صحيح إنه اسمر بس حلو!! زينب : والله عيالي ما عليهم كلام .. قاطعتها رغد بضحكه: والله يا خالة كلنا خلقة رب العالمين... وكلنا جميلين !! مشعل وضع يده على كتفها: درر ما شاء الله!! رحيق ناظرتها وللحين ما استلطفتها ولا قادرة تبلعها ...بالرغم إنه الكل حبها ودخلت قلبهم لتواضعها ..رجحت السبب عدم تقبلها إنها كرهتها بوحام!! سناء بنبرة هادئة وواثقه بالرغم من بساطتها إلا إنها تجذبك بالكلام : رب العالمين ما رح يحاسبنا على الشكل ..رح يحاسبنا على أعمالنا ....يقدر الإنسان يزين نفسه بأخلاقه الحسنة وتعامله الطيب ... فيصل ابتسم لها وبعيونه نظره امتنان لهذه الإنسانه..ربنا أرسلها له حتى يطلع من الوحل إلي كان غارق فيه!! اذا كان الإنسان من داخله عازم على التغيير وصادق ربنا ييسر له الخير...هو عزم على التغيير وربنا يسر له سناء ساندته وما كان بالسهولة التغيير!! حس ببشاعة هالحياة بعد ما تركوا جدتهم الهنديه بالصحراء لمدة ساعتين ...بعدها رجعوا لها وحطوها ببيت العجزة بمنطقة تبعد عنهم ٦ساعات...حس وقتها بقرف الحياة ...وش فائدتها اذا طلعت منها وما لقيت خلفك شخص يدعي لك بالرحمه؟! وش قيمة هالحياة؟!! رياض اشر لزوجته: تكلمي خلينا نشوف وش عندك من الحكم!! ولاء ضحكت بخفه وهي تقول: أنا مع ياسمين ..يعجبني السمار زينب كشت عليها: مالت عليك وش يفهمك بالزين ..بس دام إنك متزوجه هالجوكر ما رح ألومك! رياض فتح عيونه باستنكار: أنا جوكر!! ضحكت رحيق من قلبها شكل رياض المنفعل من كلامها!! نورة تقدمت من رحيق : ماما شوفي ياسمين قاطعتها زينب: انت يا مدلعه حاطه دوبك من دوب هالبنت!! نورة لوت بوزها بزعل وبدأت عيونها تنذر بنزول الدموع: هي مشعل تحرك لها ورفعها لفوق: اختي الحلوة تبكي!! وين صيته الدبه أنا أراويها!! زينب بتهديد مازح: يا ويلك إذا قربت من ياسمين! شوفي كيف حاملها والله كبيرة وما تليق لها هالحركات...كل هالدلع رح يرجع عليكم بالندم! مشعل بابتسامة حزينه: ما شفنا الدلع بطفولتنا خليها تتدلع ! تحرك مشعل جهة الاولاد وهو يحمل نورة على كتفه: وش عملت لك! نورة بفرح: شدت شعري!! اقترب مشعل من ياسمين إلي منشغله مع العيال باللعب... رفعت ياسمين نظرها وهي تشوف نورة حاملها مشعل على كتفه وتناظرها بانتصار!! نزل مشعل نورة على الارض وناظر ياسمين ...عبس ملامحه وكأنه أمه إلي قدامه بس على صورة طفله ....تنهد هي ما لها علاقه بأسماء ...فما له الحق يكرهها لمجرد الشبه ... يمكن لأنه ابوها فارس وللحين ما قدر يبلعه ....وبنبرة استجواب نطق: ليه شديت شعر هالحلوة؟! ياسمين وهي توزع نظرها بينهم ...ردت بهدوء: هي ضربتني بالأول!! نزلت نظرها ورجعت تلعب مع العيال بدون أي اهتمام!! هز رأسه بتوعد: الحين رح اتصل بأبوك واقول له صيته جالسه تلعب مع الاولاد!! رفعت رأسها بفجعه وخوف.. سرعان ما هدأت وهي تنطق: بابا قال الاولاد إلي اكبر مني ما العب معهم .. أما الصغار عادي!! ورجعت تكمل لعب بنفس الهدوء! نورة انقهرت منها وبدون تردد شدت شعرها بقوة: لأنك شديت شعري قبل شوي! وبسرعه شدت ياسمين شعرها بقوة: كذابه انت شديت شعري اول! كل وحده شدت شعر الثاني ولسانهم يردد: اتركي عشان اترك شعرك! اترك أترك اترك أترك اترك أترك ضحك مشعل من قلبه على شكلهم..مسك ايديهم وفكهم من بعض : انتم دوم كذا!! نورة بعبوس: هي دوم آخر ضربه!! ضحك من قلبه : طيب وش فيها نورة بقهر: انا ابغى اضربها آخر ضربه مو هي! ياسمين مدت لسانها تجاكرها: موتي بحرتك!! ورجعت تركض عند أمها!! زينب بترحيب: هلا هلا بالقمر..تعالي يا ابنتي! ياسمين ابتسمت وهي تعدل شعرها وجلست ملتصقه بجدتها. رحيق رفعت نظرها بابتسامة: ضربت نورة وهربتي؟! ياسمين بعبوس: هي إلي بدأت بالضرب!! رحيق هزت رأسها بأسف: توم وجيري ما ادري متى تعقلون!! رن جوالها ..توسعت ابتسامتها وهي تشوف رقم فارس!! ياسمين خزتها: الفارس المقنع..مالت عليك !! رحيق وقفت وهي تكش عليها: محترررررررره! ياسمين لوت بوزها: على وش احتر يا حظي! زينب بقوه: عند أبو ريان وقفي!!! ياسمين بملل: ايه الحمد لله قلتي لي أتوقف😪 زينب خزتها: كأنك تتمسخرين! ياسمين بضحكه: استغفر الله وش هالكلام ..وليه اتمسخر؟! ** *** ** رتبت اوراق الجامعة وناظرت فارس وهو يتكلم عن القضية ...ما قدمت شكوى على إخوانها بسرقة الفلوس ...اكتفت بالشكوى على هناء بانتحال شخصيتها ....وهناء ما جابت سيرة فيصل ورياض بالمحكمة حتى ما تدخل بقضايا ثانيه!! إلي قدرت تتوصل له إنها أمها اخذت اوراقها حتى تقدر تسحب الفلوس براحتها ...سبحان الله ما كانت تدري إنها رح ترحل عن هالدنيا بدون فلس واحد ...طلعت من الدنيا بكفن يسترها بقبرها ...ومعها أعمالها ....الإنسان هو إلي يختار طريق الخير أو طريق الشر... امها وأبوها قصروا بحقهم كثير ومع ذلك تدعي لهم بكل صلاة وتتصدق عنهم ...مهما كانت قسوة الام والأب بالتعامل معك ...لهم الحق بالبر والمعاملة الحسنى ...وحتى بعد موتهم ما ننساهم لأنهم بأشد الحاجة لنا بهذا الوقت!! وكمان ما نسيت جدها وجدتها إلي كان لهم فضل عليها بعد الله سبحانه وتعالى ...تركوا أثر جميل بحياتها ...بالرغم من المشاكل الي صارت بينهم والتشابك إلا إنها الحين ذكريات بعقلها تتمنى ترجع ...وتجلس جنبهم و يوبخونها على تصرفاتها... لأنها متأكدة كانوا يبغون مصلحتها ...حتى قسوتهم ببعض الاحيان فيها حنان!!! الحين مع اجتماع شملها مع إخوانها تحس بإحساس جميل يدغدغها..لها إخوان تزورهم ويزورونها ..ما هو مثل قبل ...ما تنكر ساعات طويلة امتد العتاب واللوم بينها وبين إخوتها وخاصة مشعل ...وبالنهاية تم الصلح ...وحرقوا صفحات الماضي!! من الشخصيات الجميلة بحياتها ام ربيع ..انسانه رائعه خلوقه..تشعرك بالراحه من لما تجلس معها ....تتمنى لها دوم التوفيق وتفرح بعيالها! علاقتها بأهل أبو ضاري تمام لا تخلو من الاشتباك وخاصه مع عمها !! مرتاحه بالعيش عندهم وما في شيء يكدر خاطرها ..وخاصه وهي تشوف تقبلهم لياسمين والشبه ما أثر على محبتهم لها... وحتى نورة ما قصروا معها ايام دوامها بالحامعه ...فرحتها ما توصف لما تشوف ياسمين ونورة توم وجيري مشاكلهم ومناقرتهم إلي ما تخلص ... بعد صلحها مع إخوانها ما توقعت يتقبلون نورة بهذا الشكل..وخاصه مشعل يدلعها وياخذها لايام تنام عندهم ..بالمقابل ياسمين تزعل وتتضايق لغيابها ...ما يطيقون بعض ومايطيقون يبعدون عن بعض!! عجزت تفهم مشاعرهم!!! رفعت حاجب لما قاطع فارس افكارها: متى آخر يوم بالامتحانات؟! أرخت ملامحها: بعد اسبوعين هز رأسه بتفهم: كذا نقدر نسافر ونأخذ نورة معنا .. أنا كلمت مشعل ورح نضبط أمورها!! توسعت ابتسامتها من زمان خاطرها تسافر مع بناتها ... نطقت بامتنان: مشكور يا ابو ريان! ضحك بخفه: لا اليوم راضيه علينا تقولين ابو ريان!! ضربت كتفه بخفه: أنا طول الوقت راضيه بس انت الي ما يعجبك شيء!! فتح عيونه باستنكار: أنا؟! أقول قومي نجلس بالحديقة اشوف رجوع إخوانك سرقوك مني ويا دوب اشوفك! تلفت حوله: وين ياسمين!! عقدت حواجبها باستنكار لأنه دوم يناديها صيته: ياسمين؟ مين ياسمين؟! ابتسم فارس بروقان: ابنتك! نسيت أخبرك! مد لها الورقه: اليوم روحت للأحوال وغيرت اسمها لاسم ياسمين بعد ما حلف علي ابوي أغير اسمها ! عقدت حواجبها بعدم تصديق: وليه هالإسم؟! يعني ما توقعت تقبل باسم ياسمين!! رد بهدوء: بصراحه ما ابغى البنت تتعقد اكثر ...لا يغرك إني ساكت بس فعلاً مثل ما يقول ابوي البنت كل يوم أحسها يزيد قهرها من هالاسم ...وانت تعرفين ساعة غضب لما قلت هالاسم ...وكذا نمحي كل عقبات الماضي!! صافي يا لبن!! ابتسمت ابتسامه عريضه وهي تردد: صافي يا لبن!! قاطع ابتسامتها دخول ياسمين وهي تنادي: ماما فتحت يدينها لها وهي تنطق: عيون ماما! بدون تردد ارتمت بحضن أمها ...نزل فارس لمستواهم وهو ينطق بابتسامة ويمسح على شعر ياسمين: اشوف حركات نورة هنا!! ابتعدت ياسمين عن أمها ونطقت بفرح: ماما جدتي زينب تقول صار اسمي ياسمين! فارس حملها وهو ينطق بابتسامة: صار عندي رحيق الياسمين!!! && &&& &&& تم بحمد الله إنهاء الرواية ....اتمنى تكون نالت إعجابكم ..... بالنهاية حبيت تكون الروايه اكثر واقعيه ....وبقاء حصة ورحيق على ذمة فارس ....يمكن البعض انتظر طلاق حصه مع إنها الزوجه الاولى ورحيق هي الي نزلت عليها ...وما عملت اي تصرف حتى تستحق الطلاق ...هي إنسانه ومشاعر الغيرة الي كانت تحرقها شيء طبيعي ومن فطرة الانثى تمون غيورة على زوجها ... وبالنهاية بقيت على ذمة زوجها وعاشت حياتها في بيت مستقل مع عيالها وزوجها بعيده عن رحيق.... بالنسبة لفارس يمكن البعض ما حبه ولا استلطفه مع إنه حاول بكل جهده بغض النظر عن تصرفاته قبل ما يعرف رحيق ... إلا إنه حاول قدر المستطاع يحافظ على زواجه من حصه ورحيق بدون ما يظلم احد الاطراف ....وبالرغم من حبه لرحيق إلا إنه رفض يطلق حصه بدون سبب ويظلمها علشان يعيش مع البنت الي يحبها... بالعكس وضع قلبه على جنب واستخدم عقله حتى يحاول قدر المستطاع يعدل بينهم .... وبالنسبة لتعامله مع اولاده نقدر نحكي إنه أغلب الآباء فيهم صفة الحزم والشدة مع الابناء ...وكل شخص له طريقته في تربية الابناء!! بالنسبة لرحيق مو شرط حتى تكون سعيده إنها تعيش مع زوجها بدون ضره !! كثير نساء ازواجهم ما تزوجوا عليهم وعايشين حياة الشقاء والبؤس !! اي إنسان يقدر يبني بيته ويعيش بسعادة ويكون اساس الحياة الاحترام بين الطرفين والرضا والتفاهم .. هذا إلي استحضرني حاليا للتعليق على الرواية .... اشكر كل من تابع وعلق على الرواية ...بالرغم إني عتبانه على كثير منابعين إلتزموا الصمت طول الوقت وتحسفوا يحطوا لايك على كل بارت ينزل ...ومع ذلك بعذركم يمكن تكونوا مثلي ما بعرف اكتب تعليق على الروايات،😪 بالنهاية اتمنى الخير للجميع ...لا تنسوني من الدعاء وإنه ربي يحقق أمنيتي .....دمتم بخير 🌹 | ||||
|
| |
|
07-06-22, 01:49 AM
| #1047 | ||||
| ياااااااااااااااااااه أبرااااااااااررر قلبييييييي الصغيييييييير مايققققققققدر يتحملللل..تجننننن تجنننن النهاية..شوف انا كنت اكرة فارس ودي يطلق رحييييققق بس خلاص رضيتتتت بنهايّه إلي كانت جبررر خاطررر حرفياً.. اققققدر اقولللل ان البارتتت الاخير هوووون افصل بارتتت برواية... ياربي...أحب شعور الكاتبة إلي تبدع بنقل أحداث الختام السعييييده لقلبيييي.. كذا أصييييير طايرة فرحه والضحككككه شاقه الوجههههههه..❤❤❤❤.. ع اني انقهرت ع ياسمين وخفت ان علاقتها تخرب مع نورة بس دام كل وحده تفقد الثانيه تطمنتتتتت ع مستقبلهممم..... ❤❤❤😭😭😭 .. والحمدالله فويرسسس غير إسمها.. الحدث الأخير اخذ قلبي...وفرحححت بفرحتهااا وكميه الانتعاش بكل حرف من البارتتتت خصوصا بعد لم الشمل...واجتماع اخوان رحححححححححيييققق ... النهاية تجججججن تجججججن بطريقه مو طبيعيه.... الحححححين أنا راضيه صدق❤😍🤗🤗.. وحرفيا ممكن مو قادرة اترجم فرحه قلبي بنهايّه الرواية إلي حرفيا جبر خاطرّ.. وكميه ايجابيه وسلام انتعشنا معاها.. ع أن نهايه روايه رونق حلوه...لكن ما أذكر جاني نفس الشعور المنعش وفرحه كذا مالها حد، مثل روايه رحححيييق...❤❤😭 يمكن الوحيده إلي تنافسها بجمال النهاية روايه ريييييييييم،وفرحتنا بعد المعاناه الطويلّه... حرفياً مجهود جبارررررر... عرفتي تجيبين راسي مع ان فارس ماطلع رحيق مثل ماكنت أبغى ...بس بإبداعك عرفتي تخلني أرضى بنهايّه ❤❤❤❤ | ||||
| |
|
07-06-22, 01:52 AM
| #1048 | ||||
| الذين يشاهدون محتوى الموضوع الآن : 259x( الأعضاء 38 والزوار 221)شجنّ العُذوب, ضاقت انفاسي, سفيان بن, مون فقط, زينبة بن, خووووله الهاشمي, صمت الزوايا, نسائم الريحان, أم البنيين, nuok88, Aljazii88, الماسه مياسه, مزايااا, قطر االندى, Dlala, الخلووود°`, Riham**, عاشقة الحرف, خديجه شعيل رزيق, فرح**, كيم ف, ام عمر العمر, فتاة الحزن, فيروزززززززززز, أمانينا, FATIMAH_355, الاسطورهـ, انبثاق فجر, بوح السحاب, رواء الزين, Nadiakh90, غدا يوم اخر, الآمال, حلاوة الميم, هنوش عثمان, ام جسار, braa وووووووسلفييييي اخييييير مع كاتبتنااااااا وأحنا متجاورييييين مع بعضضض👌.. الججججججججميييع يبتسسسسسم للكاميرا😊✌.. | ||||
|
| |
|
07-06-22, 01:56 AM
| #1049 | ||||
| متشوقهلروايتك الجديدة خصوصا انكتابتك انضج عن الي قبلها التسلسل اغلبه متسلسل مش في بداياتك كنت احس بمزاج ونفسيتك وافكارك مره تكتبين راضيه ومره تتشاقين ومره تبردين هالروايهناضجة بالنسبه الي عمرة وفيها قفزه عن سابقتها وهو مستوى النضج فيفهم المشكلات وتحديد الاسباب واختلاف الشخصيات ابدعت بنقل ضغط المجتمع والراي العام بسلبيه وتسببه بانحراف افراده عنوان هالروايه التقبل والثبات علي حسن المعاملة خصوصا علي الاطفال متشوقه لجديدك لا تطولين فاتحة كم روايه بعد ماسكر المتصفح الصفحات الي فاتحتها ومالي مزاج وقلت اذا مانزلتي بارت برجع اعيد قرائة الروايه خصوصا انها وصلت للنهايه بصراحة توقعت ان نهايتها رجعو الاخوان بس ادارة الرجوع شي جميل بالاخص علاقه البنت وخالتها واقعيه جدا وعن واقع كانو دايم يتضاربون من كانو في الروضه الي الثانوي بدو يرجعون لبعض الان يعزو بعض رغم ان كل وحده شخصيه وشكل واسره مختلفه وحده اخر العنقود اتت بعد وفاةجدتها فسماها علي اسم جدتها والاخري هي ابنه الاخت الكبري ذات الشخصية القويه التي ربتها الجده فماتقبل اختها الي باسم جدتها تتنازل او تسكت او تكون مسالمه | ||||
|
| |
|
07-06-22, 02:03 AM
| #1050 | ||||
| مساء الخير اولا الف مبروك ع ختام الرواية 💚 ثانيا انا بشكرك ع التزامك معانا ة من وقت ما تابعت وانتي موعدتيش الا ونفذتيه 💚💚 ثالثا رغم أنه فعلا في كل القصص اللي تابعتها أو نقول الغالب منها مشاعري بتكون سلبية ناحية التعدد ولكن يحسب ليكي انك حيدتي مشاعري وخلتيني متقبلة النهاية والبطل بزوجتين لأنه بكل صراحة هو الشخصية الافضل والانصف والانظف في القصة انسان مستقيم ومحترم ورغم ميله القلبي إلا أنه حاول بقدر الامكان ما يميل رغم أنه ده مستحيل لأننا بشر ففارس كمان بشر وأوقات حبه لرحيق خلاه يعدي مواقف مكنش هيعديها لحصة اللي بالمناسبة شخصيتها لا غبار عليها وهي الزوجة الافضل فأنا صراحة متقبلة النهاية . قد ينظر البعض للنهاية انها وردية لكن أنا بدعي كل كاتبة انها تخللي الواقع حلو مش معنى أنه النهاية واقعية انها تكون نهاية محزنة فألف مبروك تاني وفي انتظار جديد 💚💚💚 | ||||
|
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
العرض العادي
