16-10-21, 09:23 PM
| #111 | ||||
|  ابرار بشكل عام رواياتش ضخخخخخمممممه 👌👌 طبعاً انا انسانة اكرررهه الروايات انتي الوحيده بس اللي تعجبني رواياتش اسلوبش غير عن الجمييييع🖤🖤 طبعاً انا مابناقشش ليش رواياتش بشكل عام حزينة لأني شفت هذا طابعش واسلوبش بالروايات اللي حقش عشان هذا ابداً مابناقشش من هذا الموضوع😁😁 بس عندي مواضيع ثانيه احب اناقشش فيها... اولاً ليش كل ابطالش بنات😅😅جربي يكون لش رواية يكون البطل فيها ولد اصلاً كم ي اولاد مساكين ومظلومين💔😅😂 السؤال الثاني لاحظت ان كل رواياتش سعادة البطلة ترتبط بزوجها جربي نهاية سعيدة غير الزواج مثلاً انها تكون ناجحة بمجتمعها وتكون أيقونة مشهورة بمجتمعها... اصلاً فيه نهايات سعيدة غير الزواج اتمنى انش تطرحي هذه الفكرة ببالش وجربيها برواية... اعتقد رواية بدايت انساك هاذيك اللي شفت النهاية مش مرتبطة بالزواج ...المهم وبس هذا اللي حبيت اطرح عليش اما بالنسبة لهذه الرواية بشارك رأيي لما تتقدمي في البارتات واشوف أحداث اكثر وتقبلي مروري🖤🖤 | ||||
|  |
|
18-10-21, 02:21 PM
| #112 | ||||
 
| بارت ١٢ جالسه معهم والهدوء مخيم عليها ..أفضل شيء مسكت لسانها وما كلمتهم بالسالفة ...خافت يعرف فارس إنها بالجامعه تطلع شعراتها ...فقررت تنتقم منها بطريقتها ...لكن تظل سالفة مجنون ليلى حسرة بقلبها كيف تعرف اصل هالسالفة ...قاطع تفكيرها فارس وهو يسأل باهتمام: وش فيك ساكته؟! ابتسمت بتوتر وهي تعدل شالها وتتأكد إنه شعرها ما هو طالع: ما فيني شيء زينب باستغراب: من لما رجعت من الجامعة أحسك متضايقه وشيء شاغل بالك ! تنهدت وبهدوء نطقت: صارت مشكلة بيني وبين بنت بالجامعة وغلطت علي قدام البنات .. زينب بانفعال: يا سلام !! وهي سايبه حتى تغلط عليك كذا ؟! مطت شفتها حصه بقهر كان نفسها اليوم تمسح برحيق الأرض او ترجع وتخبرهم وتعمل لها مشكلة لكن ما تضمن الدم يحن ويوقفون مع رحيق ضدها : ما قلت لها شيء ..كنت أتكلم مع زميلاتي وتعدت علي بالكلام بدون سبب ..والكل يشهد ..وعلشان كذا رح اشتكي عليها خليها تأخذ إنذار أو يفصلوها! قاطعتها سيرين: بما إنه ابوك يشتغل بإدارة الجامعة كل شيء لمصلحتك؟! حصه انقهرت من كلامها ..ومع ذلك حافظت على هدوئها : ابوي ما يتحيز لأحد ..بس البنت غلطت علي والكل شهد ! فارس رفع حاجب ما عجبه تصرفها المفروض تخبره بكل شيء يصير معها .. وبأسلوب ونظرات رجف قلب حصه من التوتر: يعني كذا من فراغ جاءت وتعدت عليك ؟! يعني ما قطيتي عليها كم كلمه؟! ردت وهي تحاول تكون طبيعية : انت ليه مب مصدقني؟! زينب تنهي الكلام: حصل خير ..وتستاهل هالبنت حتى تتعلم كيف تتعدى على غيرها !! ابتسمت حصه بغموض وبداخلها " لو تدرين إنها ابنة أختك " رح تظهر بمظهر البريئة الي ما تدري إنها ابنة خالتهم اذا تكلمت رحيق بشيء! بس غريبة ما تكلمت وما جابت سيرة لأحد!! فارس وعقدة قلبه تقول خلف حصه سالفه وتخفيها عنهم ... زينب تغير الموضوع : اليوم كنت بالسوق ...استغفر الله يا كرهي للبنات الي يلبسون شال ونص شعرهم طالع ..ليه مغلبه نفسك خلاص قطيه كامل ! وكل شوي ينزل الشال عن شعرها وترجع تعدله ...بطت كبدي منها ..بغيت اروح واسحب الشال منها واقول لها بلاه هالشال تعبتي هالعالم وهو يناظرون الشال طالع نازل ! مطت شفتها حصه وبنفسها " قطيعه الخالة وابنة أختها نفس الطينة " وبمجاملة نطقت: صادقة يا خالتي ! يعني وش الفرق بين الشعر من الامام والشعر الي من الخلف إما تكشفي شعرك كامل أو تغطيه كامل !! يعني مقدمة الرأس حلال والشعر من الخلف حرام ؟! وبداخلها تشتم نفسها وش فيها تردد كلام رحيق !! ...كل هذا حتى تنال رضا فارس ...تحس نفسها رح تصاب بالجنون من كثر حبها له ...ما هي مصدقه انها تزوجت به !!! فارس يرجع لنفس السالفة ...حتى لو غلطت البنت على حصه ما توصل تشتكي عليها ...يخاف واسطة حصه تدمر مستقبل هالبنت ..وهذا الشيء مستحيل يصير : وش اسم البنت ؟! ما أبغى مشاكل وقال و قيل ...لا تشتكي عليها و إذا اشتكيت عليها ما رح يصير خير! انفعلت من كلامه بدل ما يوقف معها يتكلم كذا ؟! وبضيق نطقت : يعني بدل ما توقف معي تقول هالكلام ؟!! نطق بلا اكتراث لكلامها ..اخر همه كلام الحريم : انتهينا ..اذا غلطت معك مرة ثانية كلميني وأنا اتصرف ...وغير كذا ما عندي! وبتساؤل: من اي عائلة هالبنت ؟! ابتلعت ريقها وحست نفسها تورطت ... لكن اذا ما تكلمت الحين ما رح تقدر تعرف سالفة مجنون ليلى ...عصرت مخها كيف تتصرف الحين ....وخلال ثواني بدأت بالبكاء : نسيت اسم عائلتها بس الظاهر إنها تعرفكم ؟! زينب اهتمت بالسالفه لما قالت انها تقرب لهم ..وبتساؤل نطقت : تقرب لنا ؟! وش عرفك ؟! حصة وهي مستمرة بالبكاء: لأنها تعرفكم وتتكلم بكلام قهرني !! فارس عقد حواجبه باستغراب ... وش الكلام الي يخليها تبكي ..وبنبرة متسائلة نطق: وش قالت لك؟! حصه ابتسمت بداخلها رح تقلب السالفة لصالحها ..وبانفعال تكلمت : أنا كنت انتظر المحاضرة بالقاعة مع صديقاتي ومندمجه بالكلام كنت أتكلم عنك و أمدحك !! مط شفته بملل من صغر عقل الحريم : ايه وبعدين! حصة هزت كتوفها ببراءة: فجأة قامت ذي البنت وقالت قدام البنات هذا فارس الي تتفاخرين فيه ترى لقبه "مجنون ليلى" سكتت حصة حتى تشوف مفعول هالكلمة عليه ....حس فارس انه سمع غلط ...تغيرت ملامح وجهه ونطق باستنكار مين الي يعرف خصوصياتهم ويطلع ينشرها: وش تقولين؟! حصة تأكدت إنه السالفه صحيحه ملامحه وانفعاله يؤكد هالشيء: تقول إنك كنت عشقان ليلى ابنة عمتك ورفضتك ليلى وانت للحين على اطيافها عايش مثل المجنون ..وما تزوجتني الا لترضي اهلك ..والا انت ما تحبني وما تبغاني وتنتظر اللحظة الي تتطلق ليلى حتى تتزوجها ؟! وختمت كلامها و هي تنفجر بالبكاء! زينب تحس أصابها صمم من هالكلام ...مين هذه البنت الي تعرف اخبارهم ...وش مصلحتها حتى تطلع هالكلام..انفعلت وبقهر نطقت : وبعدها وش صار؟! حصة بحزن متقن: كلامها كان مثل الخنجر بقلبي ...من الصدمة ما نطقت حرف واحد ...وما اكتفت بكذا قامت سحبت شالي ودخل الدكتور وشعري مكشوف بسببها ! ما ادري هالبنت ليه حاقدة علي كذا ؟! وكأني سارقة حلالها! حتى البنات يقولون الظاهر انها كانت راسمه على فارس وانقهرت لما تزوجني!! وتابعت تبهر الكلام من عندها: وتقول إنها ليلى غصبوها اهلها على الزواج وهي ما تبغى زوجها ..وقريب رح تتطلق وترجع لفارس! فارس حس عقله ما هو مستوعب الكلام ... ليلى مغصوبه؟! ليلى الي انتظرها تبغاه؟! وش هالكلام؟! بلل شفته وناظر حصه الي نطقت بقهر: يعني صحيح انت تحب ليلى؟! زفر بضيق وسيرة ليلى توجع له قلبه كيف بعد هالكلام ... ما عجبه أسلوب حصه جالسه تستجوب فيه ...وبنبره حادة نطق: وش رأيك تحاسبيني على حياة حضرتك ما كنت موجوده فيها؟! اتوقع اي شيء قبل زواجنا ما يخصك أبدا!! وبعدبن وقسم بالله ان سمعت كلمه من هالكلام ...طلعت من هنا ما يصير خير ...ليلى أشرف من هالكلام ...والي وصلك هالكلام كذاب ...البنت تزوجت وربنا يوفقها بحياتها ...يا ويلك ان جبت سيرتها خير شر ما ابغى اسمع منك كلمة واحدة عن هذا الموضوع ...تفهمين !!! ارتعد قلبها من حدته ...هزت رأسها بدون ما تنطق حرف واحد! زينب رفعت حاجب بملامح غاضبه : مين هذه البنت قليلة الادب الكذابة الي تطلع هالكلام ؟!! حصة حاولت تحافظ على طبيعتها وما تتوتر ..نطقت وكأنها جاهلة بإسم البنت: اسمها ...اففف نسيت اسمها كأنه رسيل لا لا رحمة لحظة اتوقع انها من عائلة (**********) زينب عقدت حواجبها بعدم تصديق: اسم البنت رحيق؟! حصه هزت رأسها بتذكر: ايوه اسمها رحيق زينب بحدة نطقت : كذب ما اصدق! حصة بانتكاسه من ردها ...نطقت بقهر: وش قصدك؟! زينب بقوة وثقة نطقت: رحيق ما تعمل كذا ولا تتكلم كذا ؟! أنا اعرفها ما عندها هذه الاشياء! حصة انقهرت من ردها ..وبردح نطقت: يعني انا كذابة؟!! وإلا لأنها ابنة أختك هي الصادقة وأنا الكذابة قاطعها فارس بحدة: حصة ! هذه النبرة ما تكلمين امي فيها ..فاهمه؟!؛ وسالفه رحيق إن طلعت من هنا ما تلومين الا نفسك ...اسمعيني زين البنت صار لها فترة هنا ولا عمره أحد اشتكى منها إلا انت !! وإذا قدمت عليها شكوى ما رح يصير خير ...رحيق من أهل أمي واحترامهم من احترام أمي ..ما اسمح لك تقللين من احترام احد منهم ! رح اعتبر السالفة انتهت. حصة انتفخ وجهها من القهر ...كيف انقلبت السالفة عليها ..نطقت بقهر: ما رح اسكت على سحبها الشال عن رأسي ... ادري فيكم مب مصدقين لكن تقدروا تسألوا الدكتور محمد شافني قاطعها ينهي السالفة : ما رح أسأل احد ...السالفة انتهت ...انت لا تتعرضين لها وهي ما رح تتعرض لك !! زينب والنار تغلي بداخلها ما تسمت لحصه تفتري على رخيق المسكينة وكأنه ينقصها مشاكل حتى تجلس تفتري عليها ..رح تداويها ويا ويلها اذا كانت حصة كذابة : قومي معي الحين نروح عند رحيق رح تتواجهون واعرف الصادق من الكاذب! تعالي يا فارس قاطعها وعقله مشوش بالكلام ااي وصله عن ليلى: يمه كلام حريم أنا ما لي فيه ...انت اهتمي بالسالفة ! سيرين تناظر حصه بجعرفه وبعدها نتظرت فارس: اصلا ما رح تقبل تجلس معك !! او تكلمك! فارس مط شفته بقهر من كلام اخته : لا رح أموت علشان اجلس معها !!! زينب تحث حصه حتى تتحرك: قومي! ه هزت رأسها بالرفض .. وبنبرة ظهر فيها الزعل: الحين ما تصدقيني الا اذا قالت رحيق إنه كلامي صحيح؟! ما توقعت لذي الدرجة إنك قاطعتها زينب وهي متأكدة انها تكذب على رحيق : ما هو كذا يمكن صار بينكم سوء تفاهم ! حصة وقفت بضيق: ما ابغى اشوفها ..وما رح اسامحها على الاشياء الي عملتها معي قاطعها فارس: خلاص يا حصة اطلعي على جناحك ...ومثل ما قلت لك ما ابغى اسمع السالفة ...انتهت وما رح تتعرض لك رحيق مرة ثانية ! مطت شفتها بعدم رضا وغادرت المكان وبداخلها قهر من موقف فارس وأهله .. زينب بتصميم : أنا رايح بنفسي أشوف رحيق واتأكد من هالكلام ما رح ارتاح الا لما اسمع منها ! قبل ما يعارضها فارس : رجاء لا تعارضني! && && && && جالسه مع جدتها بالصالة ونورة بحضنها تهز فيها حتى تنام .....بداخلها ضيق من لما رجعت ..ماتدري كيف ارتكبت هالفعل وتكلمت عن ليلى وفارس ...كيف سعنطت تخرب بين زوج وزوجته ؟! ما كانت كذا كيف تعمل كذا ؟! الحين لو صارت بينهم مشكلة رح تكون بسببها .. وكأنه ينقصها إثم ....وفوق هذا اذا انتشرت السالفة وصلت لزوج ليلى يمكن يفهم السالفة غلط وتخرب بيوت عائلتين ...أغمضت عيونها بانزعاج من نفسها ..ورددت دعاء سيد الاستغفار " اللهم انت ربي لا اله الا انت" تنفست بعمق وهي تفكر تحل السالفة ما تبغى تخرب بيوت العالم بسببها ! بس حصة احرجتها وفضحتها امام البنات وتكلمت عليها بطريقه اوجعتها ... ام عبدالرحمن تناظرها باستغراب من هالبنت تميل للكتم ونادرا ما تتكلم بأمور تزعجها ...استغربت لما اتصلت فيها زينب وخبرتها بالسالفة ...ما تتوقع رحيق تعمل كذا ...رحيق مثل النسمة الرقيقه مستحيل تجرح احد ...ما رح تكلمها بشيء دام زينب على وصول..بس واضح من ملامحها الضيق وعيونها ذابلة ..... تنهدت وهي تناظر زينب تدخل وملامحها منتفخة ...ردت السلام زينب بهدوء وجلست عند أمها! مطت شفتها رحيق بسخرية أكيد خبرتها حصة بالسالفة ...انشغلت بالصغيرة والهدوء يحيط فيها ...رفعت رأسها لما نطقت زينب ما هي عارفه تسكت : صحيح الكلام الي قالته حصة ؟! رحيق بهدوء ظاهري وقلبها من الداخل يبكي موجوعه من كل شيء وما هو ناقصها خالتها : تستحق ما جاءها! زينب بانفعال من برودها : انت وش فيك انجنيت ؟! كنت يا محلاك وش الي غيرك ؟! من لما جاءت اختك وكأنك ثةب وقلبتيه؟! والا ظهرت على حقيقتك؟ ام عبدالرحمن قاطعتها حتى تحاسب على كلامها: زينب ! زينب بقهر ما توقعت رحيق تتكلم كذا وتنشر غسيلهم : خلينا اتكلم ...مب قادر استوعب انها تعمل كذا ؟! انت وش غايتك يوم تخربين العلاقة بين فارس وزوجته ؟! والحين تحركي لزوجة ضاري وقولي لها ضاري كان يحب اختي ؟! وخربي بيت عيالها علشان ترتاحين! ظهرت على ملامحها علامات الاستنكار وعقلها يترجم ضاري كان يحب اختها ؟! عقلها مشوش تحس هذه الأحداث مرت عليها لكن ما تتذكرها !! زينب للحين مقهورة توقعت حصة كذابة الحين وين عينها من حصه : ليه عملت كذا ؟! وش بينك وبين حصة ؟! جاوبيني ليه ساكته ؟! ام عبدالرحمن مطت شفتها بضيق من اسلوب زينب الهجومي: زينب وبعدين معك ؟! هو كذا التفاهم ؟! رحيق مطت شفتها وهي تهز اختها الي رجعت تبكي بصوت اعلى من صوت زينب العالي ..وبنبرة هادئة لكن ما قدرت تخفي نبرة الوجع : اتركيها تصرخ ... صايره هذه لغة التفاهم بهذا البيت ! ام عبدالرحمن بضيق وهي تحسها تنغز على صراخ جدها عليها : خالتك ما هو قصدها ! رحيق ببرود وقفت : عادي خليها تأخذ راحتها . زينب انقهرت من برودها : يعني تبغين تطلعيني انا الغلطانة ؟! طيب مشكورة ..ما توقعتك لسانك طويل وتطلعين اسرار الناس ! من يوم وطالع حرف ما رح نقوله قدامك دامك تطلعين الاسرار ..... ويكون بعلمك اذا خربت بيتهم ذنبهم برقبتك ! ختمت كلامها وملامحها منتفخة هي معصبة ورحيق ولا على بالها ولا كأنها تكلمها ... جلست رحيق وهي تكلم جدتها بهدوء: جدتي أنا بحثت على النت يقولون يمكن البنت ممغوصه علشان كذا تبكي ..لو اعمل لها يانسون او كمون يمكن يريحها ...عادي لو عملت لها ؟! صكت زينب على أسنانها بقوة من برودها ...نطقت بغضب: انت وش قصدك من هذه الحركات ؟! ليه متجاهلة كلامي كذا ؟ ناظرتها رحيق بهدوء: وش تبغين مني أقول ؟! أروح اعتذر لزوجة الكابتن فارس ؟! إلتمست زينب من كلامها السخرية: وليه تقولينها كذا؟! وكأنه ما هو عاجبك فارس جالسه تتمسخرين ؟! رحيق ما لها خلق ونكد أختها زاد بتعكر مزاجها ..نطقت بعبو س: لا ما هو عاجبني ؟! زينب الكون بكفه وفارس بكفه ...عندها خط احمر ..ما تسمح لاحد يتكلم عليه وبانفعال : وليه ما هو عاجبك ام شاء الله ؟! وإلا لأنه ما هو من مستوى أبوك واخوانك ؟! بهتت ملامح رحيق ...زمت شفتها بضيق... حتى خالتها الي كانت تظن انها قريبه منها حيل تعايرها بأهلها وش ترتجي من الغريبين ؟! دوم الانسان مفروض يكون بينه وبين الناس مسافة ما يتعداها مهما حصل...غبية إن ظنت انهم رح يعتبروها مثل بناتهم ...تلوم نفسها على هبلها لأنها اعطت لنفسها حجم اكبر من حجمها ! تعاملهم معها بهذا الاسلوب الحلو من باب الشفقة ..يشفقون عليك يا غبية بعد ما صار الشارع بيتك!!! هزت رأسها بهدوء ونطقت بنبرة عميقها فيها عتب : مشكورة يا خالتي ! توجهت لغرفتها متجاهله نداء جدتها عليها ...احيانا نحتاج لمثل هذه الصفعات حتى نصحى على أنفسنا ..ونعرف قيمتها الحقيقية ...وس كانت تنتظر توقف معها وتترك زوجة الكابتن فارس ؟! مطت شفتها بسخرية ..ودموعها تنزل بصمت ...ملت هالحياة ووجود نوره أثقل حملها !! ناظرت جوالها إلي اعلن وصول رساله...ما لها خلق لأحد ...اكيد الشركة ...مين رح يراسلها ...لا اخ ولا اخت ولام ولا اب ولا صديقات مقربات هي مثل الشجرة المقطوعة .... مسحت دموعها ووضعت أختها على السرير لما نامت ...تنفست براحة حياتها معها عذاب !! توجهت للحمام غسلت وجهها ونشفته ... ناظرت نفسها بالمرآة ...عيونها ذابلة ..مهما اخفت ضيقها عيونها تفضحها ... ما رح تتهتم لكلامهم ..هي واثقه من نفسها وما عليها من احد ...تنفست بعمق ...زفرت براحة .. وخرجت من الحمام ...جلست متربعه على السرير وبيدها مصحف بحجم الكف ... فتحت على سورة يس وبدأت القراءة بصوت هادئ ... قاطعتها زينب وهي تدخل بتردد : رحيق ! رفعت نظرها رحيق وابتسمت بتكلف وهي تنطق بهدوء: نعم اقتربت زينب وبندم نطقت : الله يلعن الشيطان .. أنا جيت هنا وأنا واثقه انك ما تكلمت كذا وإنها حصة تكذب وتبتلي عليك .لكن انت صدمتيني ..ما تلوميني كنت معصبة وما ادري وش خبصت بالكلام !! هزت رأسها بهدوء ..وبنبرة رقيقه نطقت : لا تعتذرين يا خالتي لأنها هذه هي الحقيقة ... أنا وين وانتم وين؟! انا الي اخذت بنفسي مقلب .... الذنب ذنبي أنا ! ما رح أعتب على الغريبة اذا خالتي هذا كلامها !!!! أنا آسفه اذا سببت مشاكل بينكم ... أنا قاطعتها زينب وهي تحس نفسها بحجم النملة ..ونبرتها الموجوعة ذبحتها من الاعماق ... كيف عملت برحيق كذا ..تقدمت واقتربت منها وهي تنطق بندم : سامحيني والله من قهري تكلمت كذا ...خفت يتدمر بيت فارس وانا ما صدقت ينسى ليلى ويتزوج ..لا تزعلين مني ..والله اني اعتبرك مثل بناتي ! حصة قالت لك شيء؟! رحيق ببرود نطقت : لا تعتذرين يا خالتي ما زعلت عليك ...انا زعلانه من نفسي بس ! وحصة ما قالت لي شيء!! زينب زفرت بضيق : يا قلبي لا تقولين كذا ترى توجعين قلبي ! ابتسمت رحيق بدون نفس وما نطقت ما عندها اجابه !! سحبت زينب المصحف من يدها .. وبهدوء نطقت : أختك نامت تعالي اجلسي معنا ! كتمت رحيق البركان الي بداخلها ..ونطقت بإعتذار : وقت ثاني .. أبغى أستغل نوم نورة وأكمل دراسة ! هزت رأسها زينب على مضض وهي تحس انها زعلانه وما تبغى تجلس معهم ...رح تتركها الحين وبكرة رح يكون معها كلام ثاني !! بعد خروج خالتها ..مسكت الجوال ...فتحته وهي مستغربة ..على الواتس رسالة من رقم غريب ...فتحت الرسالة وهي معقدة حواجبها باستغراب من هوية الشخص : " السلام عليكم .. أنا فارس بالنسبة لموضوع الي صار بينك وبين حصة زوجتي ...أتمنى ما يتكرر هالشيء لأنكم مو بزران سواء انت او هي ... الي يهمني بالسالفة "ليلى" حطي خط احمر تحت اسمها ما اسمح لك تشوهين سمعتها قدام العالم وهي عنوان للشرف والاخلاق والأدب ... اذا سمعت هالكلام مرة ثانية صدقيني ما رح يعجبك تصرفي أبدا " ** ** ** دخلت البيت زينب والضيق ملازمها ...ناظرت حصة جالسة بالصالة وتضحك مع سمر ...تقدمت بعد ما ردت السلام...وبدون إنذار نطقت : وش هالكلام الي قلتيه لرحيق؟! ارتبكت حصة من هالسؤال المفاجئ...ونطقت بنبرة تردد:انا ؟! زينب ملامح حصة تأكدت انهم بينهم سالفه وحصة كذبت بالسالفة ...وبحدة نطقت: تكلمي! حصة بضيق نطقت : أنا ما كذبت بشيء ... تراها رافع خشومها بالكلية على قلة سنع ..وما قلت لها الا حقيقتها ؟! وليه تزعل من حقيقة ابوها واخوانها؟! والا الحين جلست تبكي عندك بعد ما عرفوا البنات أصلها وفصلها قاطعتها زينب بغضب: وقص يقص لسانك ...انت وش علاقتك فيها حتى تتكلمي عن اهلها قدام البنات ؟! هزتها بقوة وهي تردد بغضب: وش تبغين فيها ؟! حصة بخوف وهي تشوف غضب خالتها ... إن وصلت السالفة لفارس ما رح يسكت لها ...حركت شفتها تتكلم ..لكن بهتت ملامحها وهي تشوف فارس وضاري واقفين يناظرونهم ! زينب بقهر نطقت : على اساس ما تعرفين البنت الي تشاجرت معها ؟! لكن حبال الكذب قصيرة؟! فارس بملامح ما تتفسر نطق : رحيق وش قالت لك يمه؟! زينب جلست و ي تحس خارت قوتها ...نطقت باختناق : انا هذا الي ذبحني...ما قالت ولا كلمة عن المشكلة ...ما قصرت فيها ...مسحت فيها الارض وجرحتها بالكلام ...وبالاخير أكتشف انها حصة الي غلطت عليها ؟! انت وش تبغين منها ؟! حصة بتوتر وخوف من نظرات فارس لها: خفت ان قلت لكم ما احد يوقف معي لأنها ابنة أختك ! فارس كتم غضبه من تصرف حصه : هذا اخر تنبيه لك يا حصة مع رحيق ...حتى لو غلطت عليك ما تردين عليها وتكلميني انا وانا اتصرف تفهمين؟! هزت رأسها وهي تحس المكان يخنقها ..وغادرت المكان بسرعه! جلس جنب أمه وهي تتكلم بضيق : الي يذبحني سكوت هالبنت كل شيء تحطه بقلبها وما تفضفض وما تنفعل بس الهدوء يغلفها ..أخاف قلبها ما يتحمل كل هالكبت الي فيه ! ضاري بهدوء نطق: انت المفروض قبل ما تتكلمين بشيء سألتيها وش صار بينها وبين حصة بالجامعة!! زينب مطت شفتها بضيق: انا سألتها بس استفزتني لما قالت عن حصة نالت الي تستحقه! جوابها حسسني إنها حصة صادقة ! فارس بعد ما طلعت سمر .. سأل أمه بهدوء: طيب وش مصلحتها تتكلم عن ليلى قدام حصة؟! زينب : اقولك ما تكلمت بشيء بس قالت إنها اسفه اذا حصلت مشاكل بسببها! مط شفته بقهر: لا والله متعبة نفسها على هذا الاسف! ما ادري هالبنت قاطعته زينب : صدقني ما تكلمت كذا الا انها حصة جرحتها قدام البنات وضايقتها بالكلام ! هز رأسه بتفهم : حصة رح تندم على كلامها بس بنفس الوقت هذا الشيء ما يحملها تتكلم على ليلى ! ضاري مط شفته بسخرية: يا اخي انت تزوجت وللحين تقول ليلى! ما ادري وش عاجبك فيها تراها مثل المكنسة اتذكر لما كنت اشوفها بالحارة شعرها وكأنه صايبة التباس كهربائي قاطعه وما عجبه كلامه عنها..خزه بقوة : طبعا كنت تشوفها لما كنت تروح تشوف حبيبة القلب ابتسم ضاري بحنين لذيك الايام : ايام مراهقة راحت ! زينب عبست ملامحها لذكرى الماضي : قفلوا السالفة ! فارس سكت وهو يفتح جواله .. ويشوف رسالته شافتها رحيق بس ما ردت ! ينقهر من تحفظها هذا تحسسهم وكأنهم وحوش ورح يأكلونها ...مالت عليها لو ما بقى من جنس حوى غيرها ما رضي فيها! ابتسم وهو يشوف الاسم الي سجله فيها "الهندي" ** ** ** دخلت القاعة وابعدت نظرها عن رحيق ...بداخلها كره لهذه المخلوقة ...الله اعلم وش كذبت عليها ...خالتها تكلمها من رؤوس خشومها وفارس ما يكلمها أبدا وزعلان منها لأنها ما تحترم اهله ...وما رح يكلمها حتى تأخذ هدية وتروح لرحيق وتعتذر لها ...تحس بداخلها رح تنفجر كيف تعتذر لهذه !! عبست ملامحها باشمئزاز ...هي وين وهذه الحشرة المتشردة وين ؟! لكنها محبورة تروح وتكسر نفسها علشان يرضى فارس. ...شتمت بداخلها الحب لما يذل! رمقت رحيق وهي تخرج من القاعة بخطوات واثقة وكأنه أبوها دكتور وأمها سيدة مجتمع راقيه واخوانها يشغلون مناصب عالية ! انسانه غبية رح تدمرها بأقرب فرصه وتشوف!! اما رحيق طلعت بدون ما تناظرها لانها ما تشوفها بعيونها ...انسانه سطحية وتافهة مثل زوجها تماما ...قهرها بالرسالة الي بعثها له ! انسان متخلف للحين على اطياف ليلى ؟! وش عملت ليلى حتى تسحره بهذه الطريقة ؟! صدق الحب أعمى ...زفرت وخرجت من الجامعة وكلام خالتها ضايقها كثير ... ** ** ** نهاية الأسبوع قرر جدها يطلع للبر حتى يغيرون جو ...ناظرت المكان وهي تأخذ نفس عميق الاجواء تريح الاعصاب ..تتمنى تبعد عنهم وتتوجه لمكان بعيد وتصرخ باعلى صوتها يمكن هل التراكمات الي فوق قلبها تطلع ! ابتسمت لجدها الي يكلمها عن البر والصيد ...هزت رأسها باندماج وهي تسأل: طيب ما تخافون هنا ؟! يعني الحين الجو حلو ..بس اتوقع بالليل يكون موحش ؟! ام عبدالرحمن : يمكن اول مرة تطلعين علشان كذا تقولين .. رحيق ابتسمت بألم : يمكن هذه اول رحلة لي في حياتي؟! ما اتذكر إنه يوم من الايام طلعنا رحلة او نزهة او شيء !! عبدالرحمن كتم ضيقه من اسماء الي دمرت عائلة كامله ولا على بالها ..وبمواساة نطق : انا كل اسبوع رح اخذك لمكان حتى قاطعته بانحراج وابتسامه جميله: ربي يسعدك .. ابو عبدالرحمن قرصها من خدها وهو يشوف كمية النقاء والصفاء بهذه البنت : ربي يحفظك ويبعد عنك الشر ! يا حظ الي رح يكون من نصيبك ...يا ليت عيال اخوالك اكبر منك تحول وجهها للاحراج من كلامه .. وبنبرة هادئة مغايرة لملاحها الخجلة: أنا ما ابغى اتزوج اصلا...رح اربي أختي تربية صالحة وهذا يكفيني! ناظرها وهو ينطق بنصيحه: يا ابنتي اسمعيني قاطعه رنين جواله ...وابتعد خطوات عنهم ...رحيق نتظرت جدتها باهتمام : تبغين شيء ..خليني استغل الفرصة ونورة ساكته! ام عبدالرحمن ابتسمت وهي تشوف نورة مستكينه بحضن رحيق وساكته : خليها ساكته الحين تذا تحركت يمكن تبكي؟! انتبهي الحين ترى خالاتك على وصول؟! عقدت حواجبها باستغراب: ليه ما قلت ؟؟! نقابي بالسيارة ! قاطعتها : تغطي بالشالة هذا هم وصلوا؟! تغطت رحيق بضيق لو تدري ما جاءت معهم ! مسحت على شعر أختها بحنية وهي تشعر إنهم يتيمات بهذا العالم ...ما رح تترك أختها تذوق الحياة الي عاشتها ..رح توفر لها كل عوامل الراحة والسعادة حتى لو كان على حساب نفسها ...خلاص هي اكتفت من هذه الدنيا .... اكتساها الهدوء لما اقتربوا خالاتها وبناتهم منهم .... رح تجعل ببنهم وبينها حدود ..وما تنسى هي مين وهم مين!! زينب باهتمام : كيفك يا رونق ؟! رونق بهدوء : الله يسلمك ! سيرين تناظر المكان بفرح : ياااه يجننن. ...بخاطري اركض واصرخ من الفرح ! تعالوا بنات نركض ونشوف مين يسبق ؟! مرح اتحمست: يلا انا جاهزه ! حصة عدلت جلستها وهي تمسح على بطنها: انا ما ابغى اخاف اكون حامل !! ما رفعت رحيق نظرها لها وعقدة قلبها تقول انها بدأت تضرب بالكلام ! فرح سحبت حصة: لا تركضين تعالي نجلس هناك ! سمر بتشجيع: يلاااا سيرين اشرت على رحيق: يلا يا ام العيال !! رحيق هزت رأسها بالنفي: مشكورة ..اذا تحركت الحين رح تبكي ام عبدالرحمن بتأييد : الله يرضى عليك لا تتحركين ما صدقنا تسكت ! فاطمه بتحليل : في اطفال كذا طبعهم نكد لما تكبر رح تعقل ان شاءالله! رحيق بخفوت : ان شاء الله زينب وهي تناظر من حولها : تعالي يا فاطمة نتمشى شوي رجولي تعقدت من جلوس السيارة! ام عبدالرحمن بعد ما ابتعدوا : تجاهليها لحصة وكأنها ما هي موجودة ! وإن قالت شيء صدقيني من غيرتها ...ما اقول كذا مجامله ...بس صدقيني يا رحيق انت مثال البنت المثالية ..لكن الدنيا حظوظ ...وربك كريم ما تدري وين الخير!! رحيق ببرود : ما عادت تفرق يا جدتي ! كل الايام وحدة ... ام عبدالرحمن : رح سكتت وهي تشوف فارس اقترب منها يسلم عليها ..بغت رحيق تقوم بس جدتها نطقت بأمر: لا تروحي ما رح يتأخر يبغى يسلم ! كتمت ضيقها من تواجد فارس تكره هالانسان...نزلت نظرها لأختها الي دافنة نفسها بحضنها ..وما ناظرته ...وانشغلت وهي تمسح على شعر نوره بلطف ! فارس بعد ما سلم على جدته التفت على رحيق ونطق ببرود : كيف حالك يا رحيق؟! توقفت يدها عن المسح عن شعر اختها وحست انه اصابها صمم ..الحين هذا يكلمها والا تتوهم ...بغت ترفع راسها حتى تتأكد ..بس ما قدرت ...التفتت على جدتها الي تكلمها : فارس يكلمك ؟! رجعت نظرها لأختها وهي تنطق بخفوت : بخير مط شفته بسخرية خايفه يأكلها ...هزت رأسها وما سمع وش قالت ...حتى متأكد جدته الي جنبها ما سمعت وش قالت ... لفت نظره يدها الي تمسح فيها على شعر الصغيرة ...يدها بيضاء وناعمة واظافر مقلمه بطريقة جميلة ..بالرغم ما فيه مناكير الا انه جمال يدينها واضح وملفت للنظر..اصابه الفضول يعرف شكل صاحبة هاليدين! نهر نفسه من الغباء الي فيه وش يبغى فيها حتى يعرف شكلها ؟! يعني وش رح تكون اذا كانت تشبه رياض يا بختها! مط شفته بسخرية ! عدل جلسته وهو يتكلم بأريحية مع جدته وهو متأكد انه جالس على قلبها وما تبغاه موجود ! لكن يبغى يعرف ليه نقلت سالفة ليلى لحصه وش هدفها من كل هذا ..وبسؤال مباشر لها نطق : ممكن اعرف السبب الي دفعك تخبرين حصة بسالفة ليلى ؟! وش هدفك من هذه الحركة ؟!!! انتهى البارت .. دمتم بخير 🥰 | ||||
|
| |
|
18-10-21, 07:42 PM
| #115 | ||||
| رووووووعه خرافي بارت واحد وقصير بالاسبوع بليز طووووويل يكون حصه وانقلبت السالفه عليهاا ههههه فارس لايزال يعييش ع اطيااف ليلي حتى بالمشكله مايبي اي كلمه عليهاا رحيق وش اخر الكبت مين اللي راح تنفجر فيه وطلع اللي بنفسهاا | ||||
|
| |
|
18-10-21, 11:06 PM
| #116 | ||||
| بارت حلو وردة فعل ما توقعناها سواء من حصه او فارس او زينب حصه حيه رقطاء العمى ما اخبثها الله يحمي رحيق منها . اوسخ شخصيه لكن سمعه اهلها اللي محليتها بعين الناس بعكس رحيق . تكشف عن شعرها من ورا زوجها هالتصرف لحالو اعتبرو خيانه لاهلها وزوجها اللي مثلها تساوي كلشي سيئ ينخاف منها حربايه بميت وجه . مستغربه كيف بتحب فارس ومش مقتنعه برايو وتوافقو وهي مش مقتنعه طيب لشو هالحب كلو الظاهر هالحب لوظيفتو ومكانتو بس . فارس في بعض الاحيان تعحبني شخصيتو وكيف اط انو وقف ضد زوجتو رغم كان موضوع انو خبرت رحيق حصه بليلى يمكن يستفزو لكن تصرف صح وعدل . لكن ما بعرف ليش ما بدي اثق فيه رغم انو اغلب ردات فعلو عاديه من حقو يكره اهل رحيق وهم بالسمعه وانو ما يثق برحيق ويرفض انو اخواتو يمشو معاها . زينب على قد طيبتها مع رحيق لكن اتوقع في اي لحظه تتخلى عنها . صحيح حكمت عقلها وهي اللي كشفت حصه لكن بتظل نقطه سوده الها قصتها مع اخت رحيق . لحد هسه ومن التلميحات اللي ظهرت ابنها غلطان اكثر من بنت اختها لكن الفضيحه كانت من نصيب البنت رغم صغر سنها . اللي قدروا يلموا هالموضوع بدون فضايح مهما كان درجه الغلط . اتذكر في البارتات الاولى انو حتى رحيق الطفله كانت تتصرف معاها مش منيح . الزاهر هالحنيه اللي يمكن ما تقدر تكملها تكفير عن ذنبها القديم بحق بنت اختها اللي هي ضحيه ام مهمله صارت تدافع عن ابنها رغم انو كان متمسك بيها وتتهمها انو ساحرتو . اتمنى رحيق ترد رد منيح لفارس وتظهر حجم غلط حصه . ما بدي تظل ساكته مثل ما عملت مع زينب بدي هي اللي توخذ حقها . | ||||
|
| |
|
18-10-21, 11:11 PM
| #117 | ||||
| اهلااا ومرحبا اولا شكرا كثير على البارت , ماتعرفي قد ايش انا متحمسه للرواية وكل يوم ادخل اشيك نزل بارت او لا لدرجه قلت خلاص بعد شهر كامل ارجع افتح الرواية عشان اجمع كذا بارت بس مافيني صبر صراحه اولا احكي عن الحربايه حصه هههههههههههه احسن تستاهلي احد قالك افتحي حلقك وافضحي نفسك تصرف فارس كويس انو حط حدود بين مرته ورحيق وانو احترامها من احترام امه رغم ان افعاله عكس هذا زينب مطفيه النور وماتفكر قبل تتكلم متسرعه كثير حملت حالها وسببت مشكله مع رحيق وبعد ما حست انها غلطت جاء الدور على حصه وهي تستاهل رسالة فارس لرحيق ضحكتني كثير مايوقف بصف حصه ، مازال متعلق بليلى (رحيق ) وتعلقه هذا من شان صفات رحيق مو من شان اهل ليلى وانها بنت عمته ويحاول يبري ساحتها كثير , وخاصه سالفه حصه المؤلفه انها بدها تنفصل والخ رحيق بشرتها بيضاء كنت راسمه بشرتها سمراء بسبب كلامهم الهنديه الهنديه انصدمت صراحه فارس فقع عيونك غض البصر عن رحيق صار فيه فضول ناحيتها نورة الحمل الثقيل على رحيق احس فارس لما يعرف انو رحيق هي البنت اللي قلبه متعلق فيها بيكون فات الاوان سبحان الله وبحمده | ||||
|
| |
|
19-10-21, 01:42 AM
| #118 | ||||
| رواية جميلة روووووعه اول مرة ارد على رواية مع اني قريت كل رواياتك بس هالمره بعلق حبيت شخصية رحيق فعلا الإنسان هو اللي يحافظ على نفسه وهي صانت نفسها بالرغم من سوء عايلتها بس هالمره لي رجاء منك بلاش يتغير البطل خلينا ثابتين على فارس بالرغم من غروره بس ان شاءالله حبه لرفيق يغيره مو نفس الروايات الثانية البطلة تتزوج مرتين ويحبها اكثر من واحد واخر شي يطلع البطل اخر الرواية هالمره نبغى تجديد يظل فارس متعلق فيها وتكسر خشمه وتربيه وتطلع كل غروره من عينه ويندم على كل كلمه حتى رحيق تسامحه | ||||
|
| |
|
19-10-21, 08:31 AM
| #120 | |||||
| عضو موقوف
| اقتباس:
| |||||
|
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
العرض العادي
