12-12-21, 12:09 AM
| #326 | ||||
 
|  الفصل العشرون جالسه مع جدتها ما داومت بالشركة ...بعد ما خبروها الموظفات بالانذارين..يعني كلامه كان قول وفعل ...توقعت إنه مجرد تهديد ....كتمت ضيقها تحملت اصعب من كذا تقدر تتحمل فارس وكل أهله ...عودت نفسها من زمان على ضبط اعصابها والتعامل ببرود مع المواقف ...الا بعض المواقف ما تقدر تتحمل وتفقد السيطرة على الوضع ...ابتسمت بدون نفس لما قاطعت جدتها افكارها: وش فيك يا ابنتي سرحانه وكأنك متضايقه من شيء؟!! رحيق هزت رأسها بالنفي: ما فيني شيء ...اشرت بعيونها على أمها الي ساكته والظاهر تفكر بعمق: علامها ساكته؟!! ام اسماء: خليها هاجده ...جعلها على طول تهجد وتفك الناس من شرها ...انا تعبت من هالبنت!! رحيق تحس وضع أمها ما هو طبيعي: جدتي احسها ما هي طبيعيه وكأنها سكتت للحظات وبتردد نطقت: كأنها فقدت عقلها وما هي بوعيها!! ام اسماء بلامبالاة:ما عليك منها .. تلقينها الحين مبحره بمستنقعها وتفكر كيف تسترد فلوسها!! انت كيفك ؟! ومتى زواجك ان شاء الله؟!! رحيق ببرود : انا بخير ...للحين ما تحدد الزواج!! ام اسماء بهدوء: الله يسعدك ويوفقك....تزورين خطيبك او هو يزورك؟! وضرتك وش رد فعلها؟! رحيق بتكتم على هالسيرة الي تضايقها: أي انسانه ما تقبل زوجها يتزوج عليها وما رح تقبل بهذا الشيء!! هزت رأسها: صحيح...انتبهي منها تعمل لك مشاكل ..وحصني نفسك دائما قاطعتها رحيق تنهي السالفه: إن شاء الله وباستغراب سألت حتى تغير محور الكلام: جدتي ما عندك شغل اليوم؟!! ام اسماء بتعب: اعتذرت ما اقدر اروح للشغل وأترك المجنونه هنا!! الشغاله ما اقدر اعتمد عليها ...الا إذا جلست انت عندها لوقت رجوعي تكونين عملت لي الخير ...ابغى اجمع أجرة البيت يا ابنتي رحيق باستفسار: كم ساعه تشتغلين؟!! أم اسماء : حسب الطلبيات كلما اشتغلت اكثر أحصل فلوس أكثر!! هزت رأسها بتفهم : طيب كم تحتاجين اجرة البيت؟!! سكتت رحيق للحظات بعد ما خبرتها جدتها بالمبلغ...حسبت وش معها فلوس ...رح تحتفظ بمبلغ صغير يمشيها وتعطي الباقي لجدتها ... انسانيتها ما تسمح لها تتغاضى عن هذا الشيء...مهما كانت هي حرمة كبيرة وما لها حيل على الشغل.... طلعت الفلوس من شنطتها ونطقت: جدتي خذي هذه الفلوس تساعدك بأجرة البيت وانا نهاية الشهر رح احاول اعطيك مبلغ ثاني ام اسماء برفض: لا يا ابنتي هذه فلوسك ...حنا عندنا عزة نفس وما نأخذ من احد قاطعتها رحيق: انا مو احد ... أنا حفيدتك ...خذي يا جدتي واعتبريهم هدية مني ..اتفقنا!! أخذتهم منها على مضض وهي تدعي لها وكأنها طرارة عند الإشارة!! رحيق وهي تفكر بالجلوس عند أمها بس ما تقدر أختها نورة ما جابت سيرتها لأمها ...ما تضمن أمها تذبحها بقلب بارد ...وبهدوء نطقت: أنا ما اقدر اجلس عندها وقت طويل وما أقدر أعيش معها ظروفي ما تسمح لي ...لكن بأي فرصه رح ازورها بإذن الله!! أنا رح احاول أوفر لك الفلوس بأقرب فرصه قاطعتها ام اسماء: الله يوفقك ويرزقك الرزق الحلال! *** *** *** واقفه جنب تاج تناظرها بصدمه من كلامها مع أمها : هذه رقية جاءت من القرية إلي كلمتك عنها تبغى تشتغل وتسدد أقساط البيت وتوفر لعائلتها حياة كريمة أمها عاجزة وما تتحرك وجدتها عجوز كبيرة وابوها مات زمان وضاقت عليها الدنيا!! أم تاج بتعاطف نطقت: اعتبري هذا المكان بيتك الثاني وإن شاء الله ربنا يرزقك ويفرجها عليك الحين قولي لي وش تعرفين تطبخين ؟! رحيق ناظرت تاج لثواني بورطه وبعدها ناظرت ام تاج بصدق : أنا بصراحة يا خالتي ما اعرف اطبخ ام تاج مطت شفتها وهي تناظر ابنتها بشك: كيف قلت انها طباخه ماهرة تاج بضحكه: يا يمه عايشين حياتهم على الخبز ما يعرفون الطبخ والاكل حياتهم كلها نواشف....مشيها رح تتعلم مع الايام ولك الأجر رحيق بغت تضحك على كلام تاج لكن مسكت نفسها ونطقت بتأكيد: رح اتعلم يا خالتي قاطعتها ام تاج بضجر: خلاص خلاص الحين تدخلين عند أم علي وتساعدينها بأي شيء تطلبه منك!! هزت رأسها بهدوء: إن شاء الله!! تاج بابتسامة: تعالي معي نروح لها! رحيق خزتها بعد ما ابتعدوا عن أمها: وش هالفيلم الحزين الي ألفتيه!!! تاج بابتسامه: أعجبك!! اكتفت رحيق بابتسامه رقيقه ..وهي تفكر بالشيء الي تعمله صح او غلط!! ما عندها الا هذا الحل تشتغل وتصرف على أمها وجدتها ..ما تقدر تطلب من جدها فلوس لهم ...والشركة للحين ما اعطوها فلوس .... بدأت تساعد أم علي بهدوء خارجي وبداخلها ضيق وعدم راحه من تواجدها هنا ...تحس نفسها جالسه تستغفل جدها ...وما يصير تعمل كذا لزوم يكون عنده خبر بتحركاتها..لكن شيء بداخلها يحثها تستمر وتكمل هالطريق...دخلت ام سند عليهم بضجر: طق قلبي من هالشغل كله .. أم علي بهدوء : احمدي ربك لقيتي وظيفه غيرك يشحد لقمة العيش!!! ام سند وهي تناظر رحيق : رح تقرفي حالك من هالشغل!! ام علي بملامح بائسه: اتركيها يمكن تتعلم وتصرف على اهلها ... وبنبرة فيها حدة : نظفي ذيك الأواني ..أبغاها تلمع لمع!! ما عجبها رحيق نبرة هذه الحرمة وطريقة كلامها وكأنها خدامه تحت رجولها ...أخذت نفس تحاول تضبط اعصابها ما زالت بالبداية ولزوم تتحمل!! *** *** *** جالسه بغرفتها وتناظر اصابع يدها المحروقة ...ما توقعت الطبخ لهذا الحد سيء..كرهت الطبخ والتنظيف...يمكن هذه حوبة جدها الي استغفلته...توبه ما رح ترجع مرة ثانية ...يا زين الشركة ويا زين ابو ناصر...ابتسمت على كلامها ...وقفت لما دخل جدها غرفتها ونطق باستغراب: انت للحين جالسه ما تجهزت؟! رحيق باستغراب: اتجهز ؟! ليه؟! ابو عبدالرحمن باستغراب: ما قالت لك جدتك؟! ولا خبرك فارس؟! رحيق وقفت بهدوء: ما خبرتني جدتي قاطعها بضجر: واكيد حضرتك ما بينكم اتصالات ردت بهدوء : ما في بيننا تواصل ..وش صاير؟!! أبو عبدالرحمن نطق بنرفزه: والله حال عجيب وحياه رح تعيشونها..اسمعي فارس رح يسافر وسفرته هذه المرة رح تطول شوي ...جهزي نفسك نودعه ونسلم عليه قاطعته ببرود وهي ترجع تجلس على السرير: طيب انا وش دخلني؟!! على بالي صاير شيء بالدنيا!! نقزت على حيلها لما صرخ بغضب من برودها: لا تجلطيني تراه زوجك يا غبيه !! والا ناويه تنسحبين وتسلمين كل الامور لحصه؟؟! انت ليه كذا شخصيتك ضعيفه بهذا الموضوع ودوم تنسحبين وكأنك مقترفه جريمه؟!! ردت بهدوء: الموضوع ما هو كذا ..بس أنا مو مقتنعه بفارس وما احب أحشر نفسي بين رجال وزوجته ...ليه أفرض نفسي عليه وهو رافضني؟!! كم صار لي على ذمته للحين ما بادر بزيارة وحده لي ولا اتصال ولا كأني موجوده !! لا تظن إني اقول كذا لأني متضايقه او شيء ثاني ..انا ما همني من البداية لكن عقليا لما افكر فيها ليه لازم دوم اكون أنا المتبادرة قاطعها وهو عارف إنه كلامها مضبوط لكن الي مستغربه جمود وبرود فارس لرحيق معقول انه فهم السالفة غلط ؟! وبتبرير نطق: صدقيني ما هو رافضك بالعكس هو يحمل لك مشاعر قاطعته بقلب ميت : مشاعر كره وحقد وانتقام اعرف ما له داعي تبرر يا جدي ..ترى الكتاب واضح من عنوانه قاطعها بإقناع: هالكتاب تقدرين تغيرينه رحيق ناظرت جدها برفض نهائي: جدي رجاء أنا احترمك لا تحملني فوق طاقتي!! أبو عبدالرحمن بانتقاد: كيف رح تتعودون على بعض اذا انت تعاملت بجفاء وهو بجفاء ؟!! خلينا نكسر هالحاجز بينكم ...مثل ما قلت لك جهزي نفسك ونروح لهم وتسلمين له وتودعينه...يعني يبغى يسافر وسفرته طويله قاطعته بإصرار على رأيها: جدي اترك المركب ساير قاطعها بغضب: وبعدين معك انت تقولين اترك المركب ساير وهو يقول اترك المركب ساير ..ما في حل وسط بينكم؟! رحيق بضيق من تدخل جدها: يا جدي قاطعها وهو ينطق بحزم: أقسم بالله خمس دقائق تكونين مزروعه عندي بالصالة ... وإذا ما طلعت معنا يحرم علي لساني يناطق لسانك!! عبست ملامحها بقهر من تسلط جدها ...زفرت بضيق لما طلع بدون ما يهتم لرأيها... بداخلها شعور ما احد قادر يفهمه ...تحس نفسها مفروضه على فارس واهله .... ما تبغى ترمي نفسها عليهم ...يكفي إنهم يشوفونها ما تسوى نعال ليه تكبرهم وتروح لهم؟!! اذا هو ما كلف نفسه يزورها ويحسسها إنها خطيبته ليه هي تركض خلفه؟!!! **★ ★★ ★★ جالسة بغرفة الضيافه تناظر الحريم بهدوء ....ابتسمت لسيرين إلي جلست جنبها : كيفك يا بطه ؟! زمان ما شفتك!! رحيق بابتسامه هادئة: بخير ربي يسعدك! سيرين قرصتها بخدها: وش هالجمال لو تشوفك حصة الا تولد الحين!! شوفيها دخلت !! ما كلفت نفسها تناظرها وبهدوء نطقت: ما تهمني ..غيري السالفة! سيرين وهي تسحب نورة من حضنها: يا جمالها بس لو تضحك شوي!! ابتسمت رحيق : الحمد لله خف نكدها شوي لكن احيانا ترجع نكديه بشكل ما ينطاق!! سيرين وهي تلاعب نورة: بس ما في شبه بينكم..انت احلى منها بكثير! وين فروس ييجي ويشوف هالجمال! عبست رحيق من طاريه ونطقت تغير سيرته: وش صار على زواج فرح؟!! سيرين وهي تناظر حصه الي تسلم على بنات خالتها فاطمه جنبهم ..وعيونها تناظر بدقه السلام المنتظر بين حصة ورحيق... فتحت عيونها بصدمه لما تجاهلت حصة وجود رحيق وما سلمت عليها... نطقت سيرين بهمس: وقحه رحيق بلامبالاة نطقت: ما همتني اصلا !! سيرين ابتسمت وهي تتسارق النظرات لحصة وجهها منتفخ لحظات وتنفجر..نطقت بهمس: أنا اقول جلوسنا هنا خطر جنب هالبركان لحظات ورح تنفجر هالحصة!! ضحكت رحيق بخفه على تعليق سيرين وناظرت سمر الي اقتربت وسلمت عليها بحفاوة! سيرين بعد ما ابتعدت سمر نطقت: ترى سلمت عليك كذا حتى تقهر حصة ترى خشبهم ما هو متراكب! تدرين يا سخف عقل الحريم يعني لو تشوفي جلستهم ونغزاتهم على بعض ! عبست رحيق وهي تشوف صفيه داخله عليهم: جدتك سيرين بابتسامة: جدتي صيته! رحيق عقدت حواجبها : هي وش اسمها قالوا صفيه؟!! سيرين وهي توقف حتى تسلم على جدتها: لها اسمين ريحي رأسك وقولي ام فيصل!! زفرت رحيق بضيق ما لها خلق تجامل هالانسانه بالذات ...بعد وقت وقفت حتى تسلم عليها ونطقت بهدوء: كيفك يا خالتي ردت بدون نفس ام فيصل: بخير جلست مكانها رحيق وبداخلها تردد مالت عليك يالعجوز وكأني ميته حتى اسلم عليك...تتكلم من رؤوس خشومها ...ويبغونها تعيش معها علشان تنتحر...استغفرت بداخلها وهي تنهر نفسهاعلى كلامها ... افضل شيء تتجاهل هذه الأشكال وكأنها ما هي موجودة... ناظرت رحيق خالتها زينب وهي منشغله مع عمات فارس.. ولا اهتمت لوجودها .. اصلا ما احد عبرها الا سيرين...فرح ومرح منشغلات بالضيافه...وعلاقتها مع بنات خالتها فاطمه عاديه وخاصه ما تشوفهم كثير.... حصه بصوت مرتفع حتى الكل يسمعها: ايه البارحة كنت انا وفارس عند الدكتورة وقالت لنا جنس الجنين ..طبعا ولد الحمد لله ...لو تشوفون فرحةفارس ...اشترى حلو واتصل بعمي وخالتي يبشرهم... يقول طار قلبه ليوم الولادة متى يطلع لهذه الدنيا ويحمله بيدينه!! سيرين همست لرحيق: حامت كبدي من هالسالفة من البارحة وهي ما عندها الا هالشريط! ابتسمت رحيق : اتركيها مبسوطه سيرين باستغراب: معقول ما تحسين بالغيرة رحيق بهدوء: ليش اغار؟! سيرين ببراءة: يعني لأن يهتم بحصة وانت ما يسأل عنك ؟!! كتمت رحيق ضيقها من هذه الكلمة...ما شاء الله العلاقة مفضوحة الكل يعرف انه ما هو سائل عنها وما يدري عن هوى دارها ولا يعبرها وكأنها شيء حقير يخاف يستعر منه اذا اهتم فيها ...بلعت غصتها وبهدوء نطقت: ما يهمني أحد ... أنا أرفع نفسي بنفسي وأسعدها بنفسي وما انتظر السعادة والاهتمام من احد ... سيرين هزت راسها: صحيح فعلا السعادة حنا بنسعد انفسنا! شوفي الشريط ما خلص...ترى هذا الكلام لعمتي حتى توصل لها رساله انه فارس نسي ليلى ونسي أطيافها! رحيق بهمس نطقت: قولي إن شاء الله تجيب حصه بنت ويسميها فارس ليلى ختمت كلمتها وابتسمت على سيرين الي ضحكت ضحكة عاليه والكل ناظرهم باستغراب! سيرين من بين ضحكاتها نطقت: سوري بس تذكرت نكته..ناظرت رحيق ودخلت بنوبة ضحك جديده!! زينب بانتقاد: سيرين! ام فيصل بانتقاد: قولي للي جالسه جنبها الله اعلم وش قالت لها حتى تضحك كذا !!! جيل ما يحترم جلسات الكبار!! توسعت ابتسامة رحيق جكر بهذه العجوز ..وناظرت جدتها أم عبدالرحمن الي تدافع عنها : والله قولي هالكلام لسيرين ترى من يومها لسانها فالت وصوت ضحكها يسمعه المريخ.. اما رحيق ربي يحفظها ويسعدها الكل يتكلم بهدوئها ورزانتها! ام فيصل بقهر نطقت: مشكلتك مخدوعة يا ام عبدالرحمن وما تميزين الغث من السمين! رحيق وهي تشوف كل نظرات المتواجدات عليها بعد كلام ام فيصل ...احيانا يعجز اللسان عن وصف مثل هذه المخلوقات ...هي ما عملت لها شيء ليه متحامله عليها هالكثر؟!! زينب ماعجبها كلام حماتها ...نطقت تغير السالفه قبل ما تصير سالفه: كل الناس خير وبركة...ما قلت لنا يا خالتي عمي جاء معك ؟! ام فيصل بقهر من زوجها الي يمدح رحيق وعاجبيته : ايه جاء!! دخلت فرح بابتسامه: فارس وضاري رح يدخلون ويسلمون على جدتي ام عبدالرحمن نطقت بهدوء: خليهم يدخلون ما في احد غريب غطت وجهها رحيق بهدوء واخذت اختها بعد ما ناولتها سيرين نورة وابتعدت عنها وجلست بالجهة المقابلة...استغربت رحيق تصرف سيرين...طنشت وتشاغلت مع اختها وهي تسمع خطوات لما دخل ورد السلام.... ام فيصل بعد ما سلمت عليه نطقت بنغزه: فارس اسم على مسمى ...وما يليق فيك الا حصة ما شاء الله مناسبين لبعض ربي يبعد عنكم العذارى والحاسدين!! ما عجبه كلام جده المبطن ...استرق نظرة لها منشغله بأختها ولا كأنه احد موجود حولها ...يستغرب برودها وعدم المبالاة الي عندها!! سلم على عماته بابتسامة ...وسلم على بنات خالته فاطمه من بعيد ... بعدها جلس جنب جدته ام فيصل وهي تسأله باهتمام عن حاله ... دخل ضاري بعده سلم على الجميع ..واقترب منها باهتمام نطق : كيفك رحيق؟! رفعت نظرها باستغراب ما توقعت منه يسلم عليها ..اذا خطيبها ما سلم ولا عبرها ما توقعت ضاري يسلم عليها ...لانت ملامحها تحس هالانسان راقي ومحترم لو تزوج اختها كان اختها الحين جنبها ومطمئنه عليها ..لكن كل هذا نصيب وقدر ...وبهدوء نطقت: بخير الله يسلمك! ابتسم بهدوء: إن شاء الله دوم تكونين بخير وصحه وعافيه!! توجه وجلس جنب زوجته وهو يمزح معها ويضحك !! كان المجلس يعم الضحك وسوالف مسليه والكل مندمج مع بعضه ...الا هي جالسه وكأنها بعالم اخر ما احد يكلمها او يعبرها حتى بنات خالتها زينب ولا كأنهم يعرفونها !! ضاق صدرها من الملل ..ما هو ملل ضاق صدرها من الشعور بالغربة ... غريبه بينهم هذا اكثر شعور تكرهه وتحس بالنقص بسببه ...تحس انها بحاجه لعائلة تحتويها وتشعر بالانتماء لبيت واهل وحياة مستقرة....ما تحب تكون على الهامش او تكون في آخر رف!! رفعت نظرها لما نطقت حصة بدلع: فارس قول لجدتي وش رح تسمي ولدنا؟! فارس بهدوء نطق: من هنا لوقت الولادة يصير خير! اكتفى بهذه الجملة واسترق النظر لها ..جالسة لوحده وما تكلمت مع احد وكأنها جالسه لوحدها ...يتمنى لو كان هو وهي لوحدهم بدون ما يكون حوله احد يقطع عليه تأمله لليلى... التفت على جدته وهي تنطق: تعالي يمه يا رحيق اسنديني ابغى اروح اصلي!! وقفت بهدوء وتوجهت وهي تحمل اختها بحضنها ...مدت يدها تساعدها..وقف مباشرة فارس وهو ينطق: انا اسندك يا جدتي ابتعدت رحيق لما اقترب من جدته واسندها بشويش...نطقت ام عبدالرحمن بهدوء: تعالي يا رحيق ابغى اجدد وضوء ساعديني! هزت راسها وتحركت بجانب جدتها بخطوات هادئة للخارج ...بدون ما تلتفت لحصه الي تحولت لبركان ثائر ما تبغى اي شيء يقرب فارس من رحيق!! ام عبدالرحمن بعد ما خرجوا من المجلس: ضاق خلقي من الازعاج !؛ فارس بهدوء وعيونه على رحيق الي تمشي بهدوء وعيونها بالارض: لأنك متعودة على الهدوء يا خالتي وباستدراك نطق اقصد يا جدتي!! ام عبدالرحمن ابتسمت: وش فيك خربطت!! فارس بهدوء: زل لساني! دخلوا الغرفة...جلست ام عبدالرحمن بمساعدة فارس...دخلت رحيق خلفهم بخطوات هادئة ... اعتدل بوقفته وهو يناظرها وبهدوء نطق: كيفك رحيق؟!! مطت شفتها بسخرية الحين تذكر يسلم عليها ...نطقت ببرود: الحمدلله اقترب منها وهو يناظرها ببرود ظاهري: اي شيء تحتاجيه بغيابي أبوي موجود .. وأي شيء تحتاجينه تقدرين تتصلين فيني او ترسلين رسالة ..اتفقنا انتظر منها جواب بس ما نطقت حرف واحد تحركت باتجاه جدتها متجاهلة كلامه ...لكن سرعان ما سحب يدها بقوة بعد ما استفزته بتجاهلها: أنا اكلمك ما تتجاهليني بهذه الطريقة!! هذه المره الثانيه الي تقللين من احترامك لي!! اسمعيني رحيق هذه اخر مرة انبهك على هذه التصرفات ختم اخر كلمه وانتبه على الحرق الي بيدها وبفجعه نطق وارتسمت على ملامحه الوجع وكأنه هو المحروق: وش فيها يدك؟!! سحبت رحيق يدها وما نطقت حرف واحد ..ما يستاهل تكلمه بحرف واحد ...تكره تكبره وغروه عليها ...يتجاهلها هو بكيفه عادي ...ومتى ما بغى يكلمها يبغاها ترد عليه مباشره ... وكأنها لعبة بيده ...تابعت خطواتها وجلست جنب جدتها الي سألت باهتمام: وش فيها يدك ...هات اشوف!! رحيق بخفوت نطقت: ما فيها شيء!! اقترب منهم وهو مقهور من تجاهلها .. نطق بقوة: ممكن اعرف وش معنى هالحركات؟!! ام عبدالرحمن بهدوء: طول بالك يا ولدي! وبانتقاد: رحيق وش فيك ساكته كذا تكلمي ..ما تصير هالحركات!! رحيق بهدوء نطقت : ما له داعي لهذه التمثيلية السخيفة والاهتمام المزيف...انت تكرهني وتنتظر اللحظة الي تفسخ هالعقد الي انفرض عليك ... وأنا نفس الشيء انتظر شيء غير متوقع ويفسخ هالزواج الي اساسه غلط ... وكل شخص فينا رح يكمل بطريق فما له داعي لهذه المجاملات قاطعها بحدة: انت لو عندك ذرة فهم ما سمحت للموظفات يتكلموا معك بالزواج وانت على ذمتي ...ما اسمح لك بهذه السخافات وطلاق ما رح أطلق لو على جثتي ..رح نكمل هالمشوار غصب عنك حتى لو تكرهيني قاطعته ام عبدالرحمن بنهر: وش هالكلام؟!! رحيق بهدوء نطقت : اي زواج ناجح وكلا الطرفين يكره الثاني!! نطق بقهر من عنادها: ومين قال إني اكرهك ؟!! رفعت رحيق نظرها له ...وهو يناظرها بنظرات ما فهمتها..وبهدوء نطقت: ما احتاج احد يقولي لأني اعرف كل شيء . قاطعها بقوة: انت ما تعرفين شيء ولا رح تعرفين ام عبدالرحمن بانتقاد: وش هالأسلوب الي تكلمون فيه بعض؟!! زفر فارس بضيق ...ما يعرف ليه يفقد أعصابه كذا ...وباستدراك نطق: كلامها يستفزني..رحيق أنا أعتذر إن كلمتك بطريقه ما هي حلوة... ام عبدالرحمن وقفت بشويش: انا ابغى اجدد الوضوء ... اجلسوا مع بعض تكلموا تفاهموا مع بعض!! وقفت رحيق تساعدها: اساعدك قاطعتها أم عبدالرحمن: لا يا ابنتي ارتاحي!! رجعت جلست رحيق مكانها والصمت خيم عليها ....ناظر فارس جدته لما دخلت الحمام ... نطق بهدوء: خلينا نتكلم ونتفاهم على بعض الأمور حتى نتجنب المشاكل بالمستقبل ...ادري بك ما رح تتجاوبين معي علشان كذا رح اتكلم وانت تسمعين كلامي بالبداية بالنسبة لزواجي الثانية شيء عادي ففكرة التعدد وارده فلا تظنين إنك رح تخربين بيني وبين حصة ... أنا حياتي مع حصة تمام بأفضل الأحوال سواء تزوجت او لا ما رح يتغير شيء أبدا...أما بالنسبة لزواجنا رح يكون بعد تخرجك مباشرة بإذن الله ...رح نسكن في بيت جدي ابو فيصل لفترة حتى نضبط أمورنا...حاولي من الحين خففي علاقتك بأمك لأنه بعد الزواج رح تنسين شيء اسمه اسماء نهائيا ... وبالنسبة للشركة لا تعلقي آمالك فيها لأنه بعد الزواج ما في شغل ... أحب اشوف زوجتي معززة مكرمه ومرتاحة البال بدون ضغط وشغل واعباء جديده عليها ... بالنسبة للنقاب ما ابغى اشوفه عليك نهائيا وخاصه بهذا الشكل ....تغطين وجهك كامل ما يبان منه شيء رفعت حاجب ما قدرت تتحمل أوامره اكثر من كذا: انت جالس تتمسخر والا وش قصدك بالضبط؟!! كيف اشوف اذا غطيت كامل...ما ادري ليه تحاول بأي طريقة تضيق علي بكل شيء ...ما اشوف اخواتك والا حصه متغطيه ليه قاطعها بهدوء: لا تقارنين نفسك بأي احد...انت شيء واخواتي وحصة شيء ثاني!! تنقهر من التفريق بالمعاملة ...وش قصده يعني هم فوق ما احد يقارن نفسه فيهم ؟!! اكيد يبغاها تتغطى لأنه يستعر منها وما يبغى احد يشوفها ...وبجكر وعناد نطقت: حتى تكون بالصورة لباسي ما احد له دخل فيه ...انا ألبس الي اشوفه مناسب ... وما رح اغير لبسي علشان فلان وعلان ...انا هذا لبسي ما هو عاجبك للحين حنا على بر الامان نلتقي بالمحكمة ويا دار ما دخلك شر .. وأمي ما احد يقدر يبعدني عنها ...هذه اشياء خاصه فيني وما اسمح لأي احد يتدخل بخصوصياتي لو على جثتي.. والشغل نفس الشيء ما تقدر تمنعي من هالشيء أبدا... أنا هذه حياتي وما رح أغيرها علشانك ...عجبك تكمل معي أهلا وسهلا ما عجبك يا ليت ترسل ورقتي ون قاطعها وهو صاك على أسنانه بقوة: وقسم بالله اذا جبتي سيرة الطلاق مرة ثانية ما رح يحصل خير ... لا تنسين إنك زوجتي ورح تمشين مثل ما ابغى أنا !! كرهت هالثقة الي يحكي فيها وكل زمام الأمور بيده وكأنها خدامه تحت تصرفه يتحكم فيها مثل ما يبغى!! تلبسها الهدوء رح تتجاهل وجوده وما رح ترد عليه ... رفعت نظرها لما كلمها : وين نظارتك ارجعي إلبسيها سكت لما دخلت ام فيصل الغرفة وبانتقاد نطقت: الناس جايه تسلم عليك وانت جالس هنا ! أشرت على رحيق بتحقير!! فارس نطق بهدوء: جدتي طلبت انتظرها هنا قاطعته وهي تقترب وتجلس معهم: هذا الكلام ما ينفع ..لا تنسى الناس ما تعرف انك خطبتها .. كذا تجيب الكلام لك يا ولدي...اذا هي ما تهمها سمعتها لا سائل ولا مسؤول حنا تهمنا السمعه مطت رحيق شفتها باستخفاف من هذه المخلوقه ...تحاول تستفسزها بأي طريقة ...ما رح تخليها تنال مرادها ورح تتجاهلها ولا كأنها موجوده معهم... نطق بانزعاج : جدتي رجاء هذا الكلام ما ابغى اسمعه ..ما يهمني احد وما عملنا غلط ..ورحيق سمعتها مثل المسك ما له داعي رمي هذا الكلام التفتت رحيق عليه بصدمه ما توقعت يقول عنها هذا الكلام ....سرعان ما التفتت لام فيصل لما نطقت: متعودة حضرتها تراكض ورى الخطيب .. أيام عبدالرحمن ترى عندي علم كل الوقت في بيتهم ما ادري ليه ترمين نفسك كذا وتراكضين خلفهم !! وبعد طلاقك ما لقيتي الا فارس ترمين عليه شباكك وتقفلين عليكم الباب بالشالية حتى تجبريه يتزوجك؟! انا ما شفت انسانه اوقح منك وفوق هذا جايه لبيته بكل قوة عين ... خلاص استحي على وجهك واتركي الرجال وزوجته ..عايشين حياتهم ومبسوطين فارس قاطعها بحدة: جدتي ترى تجاوزت بكلامك قاطعته بقوة: لا ما تجاوزت انا ابغى أخليها تعرف قدرها ..استحي على وجهك واتركي الرجال بحاله تراه ما يبغاك ...واقفه له هنا مثل الشوكة ما هو قادر يتخلص منك بعد ما قطع وعد لابو عبدالرحمن ما يطلقك !! ام عبدالرحمن طلعت من الحمام وبغضب نطقت: ام فيصل !! أم فيصل بقهر ناظرتها: ما احد خرب الدنيا غيرك ...طول الوقت خايفه على مشاعرها وماتبغين تجرحينها ... وش استفدت من الاجر الي تبغينه شوفيهاكيف تشبك خيوطها بيننا!! مأ ادري كيف تنامين مرتاحه وهي جالسه في بيتك!!! وفوق هذا وقعتم فارس بسبب الغباء الي عندكم فيها ..وما هو عارف كيف يتخلص منها لأنها قاطعها فارس بغضب: خلااااص ..جدتي رجاء عندك كلام ابلعيه بالعافيه وما له داعي لكلام ما له معنى!! تراك جالسه تهينين فيني...اكثر من مرة قلت لك رحيق زوجتي والي يشتمها ويهينها يكون أهاني انا !! ام فيصل مقهورة من دفاع فارس عنها ...والي زاد قهرها رحيق تجاهلت كل كلامها وكأنها ما قالت شيء ..وتلاعب اختها ولا كأنه احد حولها ...هذه تبغى تجلطها والا عديمة احساس؟!! نطقت بوعيد : على جثتي يتم هالزواج ... سحبت نفسها وطلعت من المكان...اقتربت ام عبدالرحمن بتعب وجلست وهي تزفر بضيق من كلام ام فيصل!! فارس وهو يناظر رحيق تلاعب أختها ولا عبالها شيء...يرفع ضغطه هالبرود وكأنها بدون احساس!! معقول كلام جدته ما ضايقها ؟؟!! ما قهرها ؟!! وكأنها جماد ...اكثر شيء يقهره هالبرود الي يكتسيها ....حاول يضبط اعصابه وهو ينطق: بالنسبة لكلام جدتي سكت للحظات لما نطقت بهدوء: جدتي نسيت حليب نورة بالبيت! يحس اشتعل نيران من تجاهلها التام له ولا كأنه موجود ...وبكل غضب مسك كأس وضربه بالارض بقوة وهو ينطق: انت ما قاطعته ام عبدالرحمن برجاء : فارس انتهينا!! اطلع واتركنا لوحدنا أبغى اصلي!! اذا لي عندك خاطر اطلع يا ولدي! خلاص اطلع! كتم غضبه وطلع لأنه ما يضمن نفسه يطحنها تحت أسنانه...عديمة احساس ... التفتت ام عبدالرحمن على رحيق لثواني ...مطت شفتها بضيق هي تعرفها كثير لما تظهر بهذا المظهر البارد تكون من الداخل تنزف من الحزن والضيق ...تتمنى لها حياه سعيده بدون مشاكل لكن عجزت تعدل لها اوضاعها ..تنهدت بقلة حيلة وبعدها بدأت بالصلاة ... وضعت رحيق اختها على الكنبه وجمعت القزاز المكسور..تحس نفسها نفس هذا الكأس ..من داخلها عبارة عن شظايا ...هي تؤمن بالمثل الحقران يقطع المصران ... رح تقهرها بسكوتها...عجوز النار ما تدري وش تبغى منها ؟!! وليه كل الحقد والكره يشع من عيونها؟!! قطعت أفكارها على صوت فارس الغاضب وصوت صيته مرتفع... ناظرت جدتها إلي انهت صلاة سنة الوضوء...وقفت بضيق وهي تردد: يا رب ينتهي هاليوم على خير!! زفرت رحيق بضيق ووضعت القزاز على الطاولة ...جلست على الكنبة وصوتهم يوصولها بوضوح بعد ما فتحت جدتها الباب!! فارس والنيران تطلع من رأسه ..مقهور من كل شيء حوله.. ارتفع ضغطه من جدته ورحيق بنفس الوقت وبحدة نطق: قلت لك ألف مرة ما ابغى اسمع هالكلام ام فيصل بقهر: تراك ما تعرفها على حقيقتها هالأفعى ...انت وجدتك وأمك مخدوعين فيها ... هذه الكلبة كانت راسمه على جدك ابو فيصل ام عبدالرحمن بغضب وقهر : خلاص يا صيته خلاص وش هالكلام هذا!! انت صاحيه؟!! ام فيصل بقوة: ايه صاحيه وما خرفت للحين ..بخطوبة ضاري قالت هالكلام تبغى تحصل على فلوسه زينب وهي تناظر اخوات زوجها واقفات يناظرن هالمشهد ... وبضيق نطقت: خالتي ما له داعي هالكلام ام فيصل بعناد : ما صدقتوني؟!؛ هذه هي جالسه بالداخل اسألوها اذا كان عندها الجراءة تجاوب!! التفت فارس على رحيق وهي واقفه عند الباب بهدوء وبحضنها كالعاده اختها! اشرت عليها ام فيصل: تعالي قولي الحق ...قلت هالكلام يوم خطوبة ضاري ترى للحين اتذكر وما خرفت !! رحيق وهي تناظر الموجودات وبهدوء نطقت: اتوقع علامات الخرف بدأت تظهر عليك لأني قلت هالكلام بزواج ضاري وفارس ما هو بخطوبة ضاري!! وتحركت لخارج البيت بخطوات واثقة ومتزنه ولا كأنها جابت العيد بكلامها! ام فيصل بقهر وكره نطقت: اوقح من كذا ما شفت! سمعتها بإذنك وش قالت ؟!! فارس بضجر وملل من جدته: ترى واضح انها تتمسخر على كلامك!! من عقلك تراها بعمر احفاده!! تركهم وغادر المكان...ام عبدالرحمن بعتب وزعل: انت وش فيك على البنت ما يصير تحكمين على انسان لأنه امه او ابوه سيء!! خلاص اتركي هالبنت بحالها!! *****" *** *** خرجت خارج البيت والهدوء يتلبسها لكن من الداخل بركان نفسها تمسك هالعجوز وتمسح فيها الارض ...غليظه غليظة وما تنبلع....لمتى رح تتغاضى عن ثقل طينتها!! كتمت ضيقها لما مسكها فارس من يدها ووقفها: لحظة رحيق! نطقت بهدوء وهي تسحب يدها: اتركني! ترك يدها ونطق وهو يضغط على نفسه يتكلم بهدوء: وين طالعه بهذا الوقت ... تعالي ادخلي الحين أختك تبرد!! ردت بهدوء: الحين رح اتصل بجدي حتى نرجع قاطعتهم زينب وهي تقترب منهم: وش تعمل هنا يا فارس؟!! قبل ما يجاوب نطقت: ترى ما احد من عماتك يعرف إنها خطيبتك..بلاه احد يشوفكم نطق بملل : ما يهمني أحد...والحين ادخلي يا رحيق!! زينب نطقت بهدوء: خلاص ادخل وأنا اكلمها!! فارس هز رأسه بهدوء: أنا أعتذر مرة ثانية عن جدتي مهما عملت تراها كبيرة بالسن...والبيت بيتك حياك الله بأي وقت! كتمت ضيقها رحيق بعد ما غادر فارس ...ما هي قادرة تفهم هالإنسان مرة يكرهها وما يطيق يشوف وجهها ومرة يعتذر؟!! ما تدري وش المصلحة من خلف كل هذا ؟!! ما تدري اذا كان فيه صفقات رح يوقعها بدون علمها...والاغرب ابو ضاري سجلها بدورات مجانيه للشركة؟! ما هي داخله عقلها فجأة صار يبغاها بالشركة ويدعمها ...وبنفس الوقت فارس يبذل جهده حتى يطردها من الشركة!!! وش السر بينهم وليه كل هالتناقض بأفعالهم؟!! قاطع افكارها زينب: مطوله وانت واقفه!! رحيق بهدوء نطقت: ما لي نفس ارجع للداخل .. لأني إذا دخلت رح امسح الارض بصيته قاطعتها زينب بضحكة وهي تهمس: حلالك!! لنا العظم ولك اللحم!! لانت ملامح رحيق : ما تنطاق يا خالتي...ما ادري ليه متحامله علي كذا؟!! زينب بضحكه: يعني مخططه على زوجها وتبغينها تهلل وترحب فيك! وباستدراك ضربت رحيق على رأسها: يا قليلة الحيا ما لقيت الا ابو فيصل رحيق ابتسمت : بغيت اقهرها واكسر خشومها! فتحت زينب عيونها بصدمه:يعني خالتي كلامها مضبوط؟!! ضحكت رحيق بخفه وهي تنطق: أنا قلت شايب وما حددت بكلامي بس هي توقعت إني اتكلم عن زوجها !! زينب بلوم: ما يصير هالكلام يا رحيق ...الحين ما تترك احد الا وتقول له هالسالفة وش رح يكون موقفك قدام الناس؟! ما هي حلوة بحقك قاطعتها رحيق بابتسامة:ما يهمني احد يا خالتي....كلام الناس ما يخلص... أنا واثقه بنفسي وهذا الشيء يكفيني!! زينب هزت رأسها بتفهم: يلا الحين ندخل وتجاهليها قاطعتها رحيق : انا جالسه هنا لوقت رجوعي ...ارسلي لي المهرج سيرين وأكون لك من الشاكرين! هزت رأسها زينب بابتسامه: إن شاء الله!!! *** **** *** انتهى البارت دمتم بخير 🌹 التعديل الأخير تم بواسطة ebti ; 18-12-21 الساعة 12:22 AM | ||||
|  |
|
12-12-21, 02:00 AM
| #328 | ||||
| اسماء وامها واضح سالفه هسرت فلوسها كذب ورحيقق تشتغل وتصرف عليهن بيصير لها شي بهذا الشغل ويكتشف جدها الموضوع الصراحه اتمنى بسرعه يعرف الجد موضوع شغلها ام فيصل كل هذه الضجه وحقدها لانها قالت لها بتزوج شايب غارت ع ابو فيصل مع مدحه لهاا فاارس ورحيق مادري احترت بزواج بيتم او يتفركش الواضح فارس متمسك فيه بعد معرفه بلبس ليلى هه يبي منها تطغي وجهها ويسال عن النظاره بس بعد هذه المشاكل او يحصل لرحيق شي يمس الشرف علاقتها بامها مش هرتااحه لهااا وامها حالسه تخطط بهدوء والدليل صمتها اليوم بزياره | ||||
|
| |
|
12-12-21, 02:03 AM
| #329 | ||||
| أخ يا ربي نفسي هالعجوز صيته صفيه توخذلها كتله مرتبه يخرب بيتها رجلها في القبر وشرها مش خالص ما بتوب . العالم بتتسمى اسم واحد وهي اسمين وبتستخدهن كمان من يومها نكده حتى على اسمها اهلها اختلفوا . الهنديه من وقت ما حكت احنا عندنا عزة نفس واخذت الفلوس ما فيها خير . احسن اشي انو رحيق وقفت شغل لانو لو خلص البارت وهي بعدها بتشتغل كان ابدعنا في توقعات المصايب اللي راح تيجي مش عارفه كيف رحيق بتصدق انو امها وجدتها محتاجات فلوس وهن عندهن شغاله وقال شو بلشانات بآجار البيت . هو الشغاله اجباري بتيجي مع البيت في الخليج ؟؟ لا وكمان ما بتقدر تخلي اسماء لوحدها مع الشغاله ليش شو وظيفتها . لاول مره تكون غبيه رحيق . انها اعطت فلوسها وانو راحت نشتغل غلطت . فارس بدو رحيق تلبس نقاب مغطي العيون وهو ولا حدا بعيلتو بتلبسو . شو هالمنطق الاعوج هاد . كل هاد غيره اعمت عقلو طيب اكيد راح تفهمها رحيق مثل ما فهمتها . | ||||
|
| |
|
12-12-21, 02:30 AM
| #330 | ||||
| رررررروووووعه البارت يجنن ايوه كذا خلي فويس يقهر ويطبخ ويدور رضاعته وخليها كذا سافهته ومحتقرته اكثر شي احبه قوة شخصيتها لاتتنازل لهم وفارس خليه يركض وراها بعد بس اهم شي لاتطلق منه حسيت هالرواية مختلفه والبطل فارس ثابت | ||||
|
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
العرض العادي
