05-03-22, 12:26 AM
| #838 | ||||
 
|  بارت ٣٣ نزل من السيارة وهو يزفر بضيق ...رحلته اليوم على الساعه وحدة ما يقدر يسافر وهي هنا ...قرر يرجعها غصب عنها....بالرغم إنه كان حازم ما يرجعها وترجع لوحدها ...بس خاف إذا عاند يوصلوا لطريق مسدود وهذا الشيء ما يبغاه ...ما يبغى يفقدها بعد ما حصلها .... تنهد بتعب منها ما هي قادرة تفهم شعوره.... ناظر البيت للحظات وقبل ما يتقدم خطوة ...وقف وهو يشوف مهند طالع وماسك وحده من كتفها ونور ماسكه بيدها!! أكيد انها رحيق! وبسرعه تحرك لهم وهو ينطق بحده: مهند!! رحيق حست الروح ردت لها لما شافت فارس...يمكن اول مرة تفرح بشوفته هالكثر... مهند بهتت ملامحه وهو يشوف فارس ...ما يدري من وين طلع له !! همس لها بتهديد: اي حركة غبية رح تدفعين ثمنها غالي...تراه جاء يطلقك.. احفظي ماء وجهك ولا عاد تلتزقين فيه!! حست وكأنها سقطت من اعلى الجبل ... جاي يطلقها بهذه السرعة تخلى عنها!! ما رح تسمح له يطلقها ويتركها رح تبقى جالسه على قلبه طول حياته!! لحظة يبغى يطلقها؟! يعني مهند جالس يلعب فيها الكرة..قال لها متى ما تنازلت ارجعك لزوجك والحين يقول فارس يبغى يطلقها!!! مهند تحرك خطوة باتجاه سيارته متجاهل وجود فارس...يبغى يخلص من السالفة بسرعه! رحيق حاولت تسحب يدها وتفك نفسها ...لأنها متأكدة إنه واحد كذاب ..حالس يدمر حياتها..ما رح تسكت له ..وبنبرة غاضبه نطقت: اتركني .. مهند لما شاف فارس اقترب منه ...نطق بتهديد: ابعد عن طريقي أفضل لك ...ومثل ما اتفقت معك نهاية الاسبوع الطلاق... فارس بنبرة غاضبه نطق.. والشر يسري بعروقه: ليه على كيفك تمشي الحياة قاطعه مهند بنبرة ساخره: والله تمشي على كيفها ورحيق ما تبغاك ..فأعطيني ظهرك أفضل لك فارس والشياطين بدأت تتراقص قدامه...نطق بتهديد: ما هو بكيفك ولا كيفها ...رح ترجع معي لبيتي غصب عنها..والحين اختصر الشر واترك رحيق معي!! مهند بأعصاب باردة طلع الموس وبتهديد نطق: أقسم بالله اذا قربت الا اليوم تكون رحيق أرملة ! فارس عقد حواجبه باستنكار ...الظاهر العائلة كلها مجنونه ...وهو كان يظن إنه غير عن إخوانه!! يتوقع إنه مجرد تهديد ...بس شغل هياط وعرط..تابع تقدمه وبداخله بركان من هالعائلة المجنونه!!! مهند بتحذير لما شافه اقترب منه أكثر : وقف مكانك وإلا أقتلك بدم بارد!! فارس مط شفته بسخرية ..وش شايفه غبي حتى يصدق هالسيناريو... رحيق تعرف جنان إخوانها يقتلون بدم بارد...نطقت برجاء: فارس لا تتقدم ...خذ ابنتنا وما عليك مني.. أنا أكمل كم شغلة معه وأرجع لك ...بس ارجع لسيارتك! فارس قطب حواجبه بعدم استيعاب ..هذه وش تخربط ...من متى نورة ابنتهم؟!! دفت رحيق نورة باتجاه فارس برجاء: خذها وانتبه عليها!! فارس تقدم وهو يحس إنه ما هو فاهم شيء!! مسك يد نورة يوهم مهند بتراجعه....وبحركه سريعه تقدم لجهة مهند حتى يبعده عن رحيق!! صرخت رحيق من الرعب لما حاول يطعن فارس... تفادى فارس الضربه بسرعة... بس للحين الموس بحوزة مهند... خارت قوتها من قوة المشهد والدم نشف بعروقها ....جلست على الارض بانهيار ..وهذا المشهد فتح ذاكرتها على ذكريات سيئة حاولت كثير تفرغها من ذاكرتها...تتذكر لما إخوانها طعنوا بعض بدم بارد!! غمضت عيونها برعب وهي تحتضن نورة بقوة ...ما تبغى تشوف هالمشاهد مرة ثانية.... فتحت عيونها بتردد لما سمعت صوت الموس رن بإذنها لما سقط على الأرض.... ناظرت فارس ومهند مشتبكين مع بعض ويضربون بعض ضرب جنان .... ناظرت الناس الي بدأت تجتمع على صراخهم وتفرق بينهم...بس فارس وكأنه متلبسه جني ما هو تارك مهند بحاله!! شهقت وهي تشوف مهند وقع الارض بعد ما فقد الوعي...أي جنون اقترف فارس... زحفت للخلف برعب لما اقترب منها وعيونه تقدح شرار: تعالي معي غمضت عيونها للحظات لما غافل واحد من اهل ابوها فارس وضربه على رأسه.... كتم فارس وجعه وإلتفت للشخص الي ضربه ..وهو ناوي يكسره تكسير...بس الناس وقفت حاجز بينهم ...لحظات كانت الشرطة بالمكان والاسعاف... رحيق تحس رح تفقد الوعي وهي تشوف الشرطة قبضوا على فارس واخذوا مهند بالإسعاف!! فارس يحاول يفلت وهو يصرخ: زوجتي هنا ما رح أتركها! لحظات بدأت تدور الدنيا فيها و تحس إنها رح تفقد الوعي وهي متمسكه بنورة بقوة... ** ** **★ *★ زينب وهي تول ول رايحه جايه بعد ما وصلها الخبر ...ما هي داخله عقلها فارس المؤدب الخلوق متشاجر مع واحد والحين موقوف بالمركز؟! عمره ما تشاجر مع احد الكل يحمد بأخلاقه ...ما هي داخله عقلها !! لا والمشكلة الرجال حالته حرجه!! حصه وهي تبكي بقوة: يا رب الفرج من عندك!! وش الي بينه وبين هالرجال حتى يضربه؟! زينب تحس خلاص طار عقلها: ما ادري عمك ما قال لي! ما احد أعطاني التفاصيل !!! سمر وهي تناظر حماتها : ضاري يعطيني مشغول وما يرد علي!! سيرين بخوف على اخوها: يا رب ما يصير للرجال شيء .. لأنه رح يضيع مستقبل فارس!! زينب بغضب: حسبي الله عليه ..أكيد تبلى على فارس ...ولدي أنا أعرفه ما يعرف طريق الشر!! دخلت فرح وعلامات البكاء واضحه عليها..اقتربت من امها وحضنتها بقوة وهي تواسي فيها: إن شاء الله كل شيء تمام لا تخافين! زينب وهي تمسح دموعها سألت: ما قالك زوجك وش السالفة؟؟! فرح بتردد ما تبغى تعرف إنه فارس بالمستشفى ..نطقت تستر على السالفه حتى تتأكد من وضعه: ءء ما يدري بالضبط..بس قال الرجال الي تشاجر معه يكون أخو رحيق مهند حصة طلعت عيونها باستنكار: وش تقولين؟! زينب وبعقلها ألف سؤال: وليه ؟! وأصلا كيف إلتقوا حصه بانفعال وهي تتذكر: طلع الصبح من وقت مبكر قال عنده مشوار ضروري!! فرح هزت رأسها بقلة حيله وهي تكمل كلامها: المشكله يقولون انه الرجال حالته حرجه! زينب حست رح تصيبها سكته قلبيه ...وبصوت ضعيف نطقت: لا تقولين فارس هو السبب؟!! جلست على الارض وهي تحس خارت قوتها: كم مرة قلت له دام إنها ما تبغاك خلاص اتركها تشوف حياتها!! ما ادري من وين له صفة التملك ...اخخخخ يا فارس ضاع مستقبلك والسبب عيال منصور!! حصه النار مولعه بداخلها: اكيد عاملين شيء كايد حتى يضربه فارس بهذا الشكل زينب ناظرتها بغضب: انكتمي..وقص يقص لسانك إن شاءالله....ما صدقت تثبت التهمه على فارس ...مستحيل فارس يعملها ..هذا ولدي وانا أعرفه عمره ما ضرب أحد ولا تشاجر مع احد.... أكيد عيال منصور هم الي تبلوا عليه!! سيرين اقتربت من امها وهي تناظر فرح:عيل وين رحيق الحين؟! فرح : يمكن عند اهلها هناك ما معي تفاصيل سيرين بخوف على اخوها: يمه خلينا نروح عند فارس ونطمئن عليه زينب ما لها حيل توقف على رجولها: اصبري شوي ما عاد فيني حيل اوقف على رجولي!! فرح: وين تروحون تراهم بمنطقة******* وما في احد يأخذكم. سمر اتصلت بزوجها ....تكلمت بانفعال اول ما تفتح خط: واخيرا رديت..وش صار....طيب ورحيق....كيف؟!! ....طيب إذا اشتكت على فارس....طيب لا تصرخ بوجهي...مع السلامه! زينب قلبها ما عاد يتحمل أكثر... ناظرت فرح الي تسأل سمر وقلبها طبول: وش صار سمر بضيق: ما اعطاني التفاصيل...يقول متشاجرين علشان رحيق...بس أعمامها يقولون ما رح يسكتون .. والحين ينتظرون شهادة رحيق!! حصه بانفعال وقهر: حسبي الله عليها يوم إنها تدمر حياتنا!! *** ** *** ناظرت نورة جالسه على الارض بملل ... ما تدري وش تعمل ..ما معها لا جوال ولا أي شيء !! فكت المغذي بعبوس وهي تحس بألم في بطنها فضيع وكأنها أمعاء بطنها تتقطع... الدكتور حذرها ما تتحرك وضع الجنين ما هو مستقر...لزوم تتحرك تخاف اهل ابوها يهددوها أو يرجعونها لبيت مهند ...هذا الشيء ما رح تقبل فيه ...لزوم تهرب الحين..وتطلع من هالمكان!! وقفت بعبوس من التعب ...مسكت بيد نورة الي مباشرة وقفت لما شافتها استندت.. وضعت الشال على وجهها وطلعت من الغرفه بحذر وهي تترقب من حولها بهدوء.. المكان شبه فاضي ...تنفست براحه اول ما ركبت المصعد..المصعد فيه مرآة كبيرة ...عدلت الشيلة وتنقبت فيها.. أخذت نفس عميق لما وقف المصعد..انفتح وطلعت مع دخول رجال ما ناظرته وصوته يوصل لها: الحين طالع لرحيق يقولون مطعونه او فاقدة الوعي ما ادري وش بالضبط...لا تخاف رح اخليها تندم حست قلبها ارتجف من الخوف وهي تسمع هالكلام ...ناظرت المصعد لما قفل وما سمعت باقي الكلام.. وجودها هنا خطر عليها ...تحركت بخطوات سريعه حتى تهرب ...سرعان ما وقفت وهي تشوف جدها يدخل المستشفى وهو ينطق بغضب:أنا اذا ما كسرت رأس رحيق ما ارتاح! وبحركة سريعه اعطته ظهرها ودفنت وجه نورة بجسدها حتى ما يشوفها!! الكل متحلف فيها ..هي ما عملت شيء ...الحين وين تروح؟!! ما في مكان تروح له وما معها فلس واحد وبمنطقه ما تعرف فيها احد تروح له!! حست كل العالم من حولها كلهم وحوش...لكن يبقى جدها أخف وحش رح تقابله..وبسرعه لفت له ما لها أحد غيره بعد الله سبحانه وتعالى... قطع كلامه ابو عبدالرحمن وهو يشوف نورة ...التفت على البنت الي معها..كانت رحيق ...وقبل ما ينطق اقتربت منه وهي تنطق برجاء: كسر رأسي يا جدي واعمل الي تبغى بس طلعني من هنا او اعطيني فلوس أهرب بسرعه مسكها من قبضة يدها: انت وش تعملين هنا؟! وش هببت يا مجنونه!! رحيق قاطعته برجاء: ما هو وقته يا جدي! تلفت حوله باستغراب ليه تبغى تهرب وليه خايفه هالكثر...وبنبره واثقه نطق: اقول امشي معي وابن أمه إلي يتعرضلك وانت معي!! توسعت ابتسامتها ودموعها تنزل بغزراة..تناقض عجيب بداخلها تضحك وتبكي بنفس الوقت ... جدها مثل ماهو ما رح يتغيرلما يعصب يكون قاسي كثير...بس من داخله قلبه طيب ...ما تنكر فضله عليها أبدا بعد الله سبحانه وتعالى... وللحين ماسك على يدها وما تركها مع انها متاكده مهند جاب العيد بالكلام معهم...تمسكت فيه بقوة وتحركت وكأنها ملكت كل أمان الدنيا بجواره! ابو عبدالرحمن للحين زعلان من تصرفاتها ..نطق بتوعد: وقسم بالله اذا ما كسرت رأسك ما رح ارتاح..والله اذا اصاب فارس شيء الا اطحنك تحت ضروسي...فارس المؤدب والمحترم هذه آخرتها؟!! لا والله بعد هالوظيفه شفت نفسك شيء كبير...اعتبري نفس مفصوله من الوظيفه..ويا ويلك اذا عتبت رجلك باب البيت ....اخخخخخ يالقهر !! رحيق تجاهلت هجوم جدها الناري عليها ..ونطقت باستغراب: جدي ليه حنا هنا؟! زفر بضيق..وناظرها بلوم : لك وجه تسألين بعد! فارس بالمستشفى توقف عقلها عند نقطه انه فارس بالمستشفى...وبنبرة واضح فيه الخوف نطقت:فارس ليه بالمستشفى؟! سكت جدها للحظات ...بعدها نطق بنبرة هادئة بطيئة...أتلفت أعصاب رحيق المشدودة: ما ادري بالضبط عن وضعه الظاهر تعرض لضربه على رأسه! ماشفت مين ضربه؟!! رحيق تحس خلاص اعصابها تلفت من كل شيء.. وبنبرة ضعيفه نطقت: ما اعرفه أشر لها وهو يتابع كلامه: الحين امشي وبعدين تقولين لي التفاصيل ونضع حدود لتصرفاتك الي ما تنطاق!! ** $* ** ضحك فيصل بشماته: يا ليته للحين يطق فيه!! رياض خز جدته: انت من وين تعرفين أخبارهم؟! تجاهلت سؤاله وهي تنطق: والحين وش رح نعمل حتى نحصل على الفلوس أنا اقول تروحون للمستشفى وتأخذون رحيق لهنا وغصب عنها تعترف!! فيصل هز رأسه بالرفض:ما ينفع كذا!! ما ادري أشك إذا كانت رحيق تدري عن سالفة الفلوس..كلنا نعرف اسماء وطمعها ما رح تخاطر وتضع الفلوس بإسم رحيق... رياض بتحليل نطق: كلامك مضبوط كلنا نعرف اسماء وجشعها وأنا اقول مثلك رحيق ما عندها علم بالسالفة...اسماء كانت مخططه تحط الفلوس بحساب رحيق حتى تبعد عن نفسها اي شبهة وأخذت هويه رحيق حتى تقدر تتصرف بالفلوس على كيفها عن طريق هناء!! يكفي هالغبية ما عندها علم بحصتها بالشركة واكبر دليل الثعلب المكار ابو ضاري موقعها على توكيل وباع حصتها الغبية...يعني فقدنا هالفلوس بسببها!! غبية وطول عمرها غبية!! بس تدري نقدر نضغط عليها وتعطينا حصتنا من هالسهم زوجها وابوها عندهم فلوس وخير واجد فيصل بانسحاب: أنا بالنسبة لي ما أنصحك اترك رحيق وخلي جهدك بالبحث عن الفلوس الي دفستهم اسماء !! متى ما أخذت حصتي منهم رح أغادر من هنا مباشرة وما لي رجعة لهذا المكان إلي دمر حياتي...أبغى أبدأ من جديد مليت من حياتنا وقرفها!! رياض هز رأسه بتأكيد: وأنا مثلك رح اترك المكان بس أخذ الفلوس... ما اتوقع ارجع لهذا المكان ...أبغى أنسى حياة التشتت واليتم والعذاب إلي عشناها .... مط شفته بشبح ابتسامه وهو يناظر فيصل: رح أشتاق لك ..مع إني متأكد هذه آخر مرة رح نلتقي فيها... فيصل حس بالغصة بحلقه...رياض بالرغم من سوء اخلاقه لكنه أقرب واحد له من إخوانه ...تقاسموا الضيم ومرارة الحياة والشعور بالنقص مع بعض...كانوا يحاولون يغطوا النقص والحرمان الي عاشوه بضرب كل واحد يناظرهم بانتقاص...اختاروا طريق الغلط وكأنهم يعاقبوا الي كانوا السبب للحال الي وصلوا له....الحين رح يفترقون وما يتوقع يلتقوا مرة ثانية.....ابتسم بضيق وهو ينطق: اذا جارت عليك الدنيا رح أعطيك رقمي رياض قاطعه بالرفض: لا تخاف علي ...فراقنا الافضل طول ما نكون مع بعض رح يبقى الماضي يحاصرنا..كلما شفتك رح أتذكر ويزيد الحقد الي بداخلي وارجع أسوأ من الأول...خطوة للنسيان أتمنى لك خير!! لا تنسى قبل ما نفترق رح نضرب السبب بكل شيء حنا فيه ضربه قوية. فيصل ابتسم وهو يتذكر خطتهم: إن شاءالله ام أسماء تناظرهم بسخريه ..بس ما تقدر تنتقدهم بحرف واحد ...الشيء الوحيد بكل الي قالوه الانتقام ..تنتظر اللحظة الي ينتقموا من اهل اسماء وتشتفي فيهم!! متى ذاك اليوم؟!!! *** *** *** جالسة وعيونها تناظر فارس للحين فاقد الوعي...رجعت ناظرت جدها الي نطق بقهر: تصرفاتك زادت عن حدها يا رحيق ...يعني فوق ما طلبت الطلاق...تروحين البارحة للشركة بكل وقاحة حتى تتنازلين عن حصتك بالشركة لفيصل ورياض؟! هذا الناقص يدخلوا شركاء بالشركة ؟! حست وكأنه أصابها صمم ما سمعت مضبوط.. كأنه قال رياض وفيصل..ما تدري ليه ارتجف جسمها من الخوف لطاريهم... ناظرت جدها باستنكار: رياض وفيصل طلعوا من السجن؟! ابو عبدالرحمن ناظرها بقوة: بدون استغباء..لا تعملين نفسك ما عندك علم وانت البارحة كنت بالشركة ..لا تنكرين اغلب الموظفين شافوك معهم ... نفسها تصرخ بأعلى صوت وتقول " يا عالم وش تبغون مني" تابع كلامه وهو يشوف سكوتها: لما يطلع فارس من هالورطة الي بسببك رح تنتقلين لبيتهم لأني من قبل خيرتك اذا مشيت خلف مهند ما رح تدخلين بيتي!! واعتبري العلاقة بيننا مقطوعه ....ما لك كلام معي واعتبريني رحلت من هالدنيا!!! وبنبرة عتاب وزعل: تغيرت كثير يا رحيق ...مب قادر أصدق إنك نفسك البنت الي عاشت في بيتي وكانت مثال للأخلاق العالية... وش إلي قلبك وكأنك شخص ثاني أناني وما يبغى الا مصلحته...ما كنت كذا أبدا.... وبتذكر تابع كلامه: وبالنسبة للفلوس إلي سرقتهم أسماء أنا سامحتكم فيها رح أعتبرهم ميراث لأسماء وحلال عليكم ...تقدرين تسحبينهم وتقسمينه على إخوانك!! تحس نفسها فقدت القدرة على الكلام ..لسانها معقود مب قادرة تنطق حرف واحد ...كلام جدها فوق طاقتها...أي فلوس وأي حصة واي خرابيط يتكلم عنها؟!! تحس بأي لحظة رح تنفجر من البكاء...بصعوبة نطقت : أي فلوس؟! مط شفته بسخرية: مرة ثانية تتغابين...انا قالت لنا الهنديه إنه أسماء متفقه معك بس أنا بصراحه كذبتها وللحين مستحيل أصدق رحيق الي عاشت سنوات تحت عيوني مستحيل تعمل كذا!! متأكد كل هذا تخطيط من اسماء وأمها وانت مثل الغبية الموية تمشي من تحت رجولك .... إصرار الهندية على الفلوس وإنهم بحسابك وكل فترة ترجع وتكلمنا بنفس السالفه وإنه الفلوس معك ...وحتى نسكتها بحثنا عن طريق معارف لنا حتى نشوف اذا لك حساب بالبنك..ما لقينا بس لقينا الفلوس إلي سرقتهم أسماء حوالة بإسمك .. تقدرين بأي وقت تروحين لبنك***** وتسحبي الفلوس حلال عليك!! وقفت رحيق وهي تحس رح تفقد الوعي بأي لحظة...كلام جدها كان ثقيل عليها حيل.... ما هي متخيلة كلام جدها هذا موجه لها .... اذا جلست هنا دقيقة رح تموت ... وقفها جدها وهو يتابع كلامه بحزم: اجلسي هنا ...رح ترجعين معنا ..انا طالع برا!! ما أعطاها فرصة ترد ...كشفت عن وجهها لما غادر المكان ...أخذت نفس عميق وهي تحس بالاختناق ...كلامه ذبحها من الوريد للوريد...عقلها ما هو قادر يستوعب الكلام الي قاله ...كيف مبارح بالشركة وهي محبوسه عند مهند!! توجهت للحمام توضأت لعل النار الي بصدرها تهدأ رح تلبس ثوب الصمت وتشوف نهاية هالمهزلة...لزوم تكشف الشخص الي انتحل شخصيتها...مين هذا الي يشبهها هالكثر؟؟!! ناظرت وجهها الي تشوه بسبب ضرب مهند ...مسحت دموعها إلي رافضه التوقف.... خرجت من الحمام وهي تعدل الشيلة...تقدمت قريب من الشباك ..وسرير فارس خلفها ... وقفت باعتدال ورفعت يدينها وهي تنطق بصوت منخفض: الله أكبر نطقت تكبيرة الإحرام وبدأت بالصلاة ...تبغى تشكي حالها لرب العالمين...هو العالم بكل شيء...وهو إلي يظهر الحق ويجبر الخاطر المكسور... وش أصعب من الشعور بالظلم ...مظلومة وما لها الا رب العالمين...ونعم بالله الي ينصر عبده المظلوم ولو بعد حين!!! دخل ضاري الغرفة مع ابوه ويتكلم بانفعال.. سكت وهو يشوفها جالسه تصلي...ناظر ابوه الي قلبه مليان عليها من البارحة بعد سالفة الشركة!! حست رحيق بصوتهم ومع إنها كملت الصلاة ..ظلت جالسة على الارض ونورة متمددة ورأسها على فخذ رحيق ! غطت وجهها بالشال ...مسحت على رأس نورة بحنية...وهي تتمنى تلقى شخص يمسح على رأسها بحنيه..... بعد وقت وقفت وهي عازمه تغادر هالمنطقه اول شيء وتبعد عن أهل أبوها ...وبعدها ما تدري وش تعمل؟! أبو ضاري ناظرها بحده وهو ينطق: عساك ارتحتي الحين بعد ما دمرت فارس؟! أقسم بالله يا رحيق اذا هالسالفة أثرت على وظيفة فارس ما تلومين الا نفسك ... ضاري : يبه بعدين هالكلام ابو ضاري بقهر: انا ما رح ارتاح طول ما هو عيال اسماء ومنصور حولي!! اسمعيني زين مثل ما دخلت حياتنا ..تطلعين منها بهدوء بدون أي شوشرة ..خلاص كافي مشاكل...وحصتك بالشركة اشتريتها وفلوسك موجودات بالشركة بأي وقت تقدرين تأخذينهم ضاري تضايق من كلام أبوه : يبه خلاااااص! رحيق تحس بوسط حلقها سكاكين...بصعوبه بلعت غصتها ..وبصوت حاولت قد ما تقدر يكون صوتها هادىء: ترى مهما عشت بذي الدنيا ..رح يكون آخرك جيثة مدفونة تحت التراب...لا ترفع خشومك للسماء لفوق حتى ما تكون بيوم تحت اقدام الناس...أنا ما رح أرد على كلامك .... ما رح اطلع من حياتكم ورح أبقى شوكه بحلقكم كلكم ...ورح تدفعون ثمن كل كلمة باطله قلتوها بحقي...والله ما أسامحكم لو تموتون قدام عيوني!! تحركت تطلع من الغرفه...بس وقفها ابو ضاري لما سحبها بقوة وهو ينطق:تر سكت بعد ما انكشف وجهها بسبب سحبه لها...انلجم لسانه وهو يشوف وجهها المعدوم ومستعد يحلف أيمان ما هي رحيق الي واقفه قدامه!؛ غطت وجهها وسحبت نفسها وطلعت من الغرفة وهي متمسكه بيد نورة بقوة!! ضاري بعدم تصديق: مين عامل فيها كذا؟! ابو ضاري يحس إنه تسرع وفي إلتباس بالموضوع...بغى يلحقها ويعرف السالفه بالضبط...بس وقف لما تحرك فارس وفتح عيونه بتعب!!! ** *** ** وقفت باب المستشفى وهي تحس الدنيا سكرت بوجهها وين تروح ؟! ولمين تروح؟!! جلست على الارض بانهيار ....ودموعهاتنزل بصمت...لحظات وحست بيد حانية على كتفها: رحيق!! التفتت عليه بقلب ميت ...ما عندها طاقه تسمع محاضرات ولوم وعتب ...خلاص اكتفت منهم كلهم!! نطق بنبرة حانيه: قومي يا ابوك للسيارة نطقت بنبرة باكية راجيه: خذني من هذه المنطقة كلهاااااا!! ربت على كتفها وهو يطمئنها : تعالي! توجهت معه للسيارة وهو يحس بالضيق والقهر من ولده ..كيف يكلم هاليتيمه بهذه الطريقه...كان جاي يشوف فارس بعد ما سمع الخبر ... وصوت ولده طالع برا الغرفة...كسرت خاطره رحيق ...حتى إنها ما انتبهت على وجوده قدام الغرفة!! اول ما حرك نطق بهدوء: اكشفي يا ابنتي وخذي راحتك ابكي ولا تكتمين بداخلك... كشفت وجهها وهي تحس بالاختناق من كل شيء حولها...ما فيها طاقه تتحملهم أكثر منها...ما آذت أحد ليه يبرعون بتجريحها وآذيتها...ما عملت لهم شيء... غمضت عيونها تبغى تعيش بعالم الاحلام ما تبغى الواقع أبداً.. ناظرها وهي مسترخيه ودموعها تنزل بخفه...ما ينكر إنه انفجع لما شاف وجهها ...بس ما سألها عن شيء يبغاها ترتاح وبعدها رح يشوف مين عمل فيها كذا إلا يخليه يندم على هالإجرام! قطع أفكاره لما نطقت ببرود ينافي وجهها الباكي: عمي خذني لأقرب مركز شرطة.. هبط قلبه ونطق باستغراب: ليه؟!! ** ** ابو عبدالرحمن بغضب نطق: انت كيف تقول لها هالكلام ؟! طيب وين راحت الحين؟! ابو ضاري بتوتر: ما ادري .. والله كنت معصب وما ادري كيف طردتها أبو عبدالرحمن بغضب: والله إن صار لها شيء ما ارحمك!! ابو ضاري بانتقاد: مب كأنك كنت معصب منها اكثر مني! قاطعه بقهر: اي أب بالدنيا يعصب من عياله ويمسح فيهم الأرض ومع ذلك ما يتخلى عنهم....ما يتخلى عنهم.... استغفر الله!! فارس صداع فضيع في رأسه ما هو مستوعب شيء من كلامه..يبغى مسكن يخفف الوجع... ضاري يحاول يهدي فيهم: خلاص اكيد رح نلقاها..خلينا بالاول نخلص من سالفة فارس وبعدها يصير خير! ابو عبدالرحمن بغضب: اخلص من سالفة اخوك انت وابوك...ما رح اجلس انتظر تضيع مني البنت حتى تكملون مشاكلكم.. وبعبوس تابع كلامه وهو يناظر ضاري: يا برودك ! ابعد عن وجهي! ابتعد ضاري عن طريق جده لما شافه طلع من الغرفه وكأنه نيران مشتعلة! ابو ضاري زفر بضيق..وبتبرير: والله ما كان قصدي ...يعني ما كنت قاصد أطردها ..بغيت أكون حازم حتى تصحى من تصرفاتها الغبية!! فارس بتعب: أبغى مسكن رأسي رح ينفجر وانتم تتشاجرون من اول ما صحيت...وش صاير؟! ضاري بضيق: الحين يمر الدكتور ويصرف لك العلاج... أنا طالع ادور على رحيق قاطعه فارس باستنكار: تدور على رحيق؟! وين رحيق؟؟!! ضاري مقهور من تصرف ابوه: ابوي طردها قاطعه بفزع وهو يستند على طوله متجاهل الأسلاك إلي بيده: يبه كيف تطردونها وهي ما عندها أحد هنا!! وبقهر نطق: أنا رح يصيبني الجنون من تصرفاتكم! ابو ضاري رفع حاجب بعدم تصديق: دوبك تبغى مسكن للوجع ومب قادر تتكلم من التعب.. والحين أشوفك مثل الحصان فارس قبل ما يتحرك رجع جلس على السرير وهو يحس بالدوران.... ابو ضاري وضع يده على كتفه بندم : ارتاح انت يا ولدي ...يقولون إنك نزفت بسبب الجرح الي برأسك وانت عامل نفسك البطل المغوار...الحين يشوفها ضاري ويرجعها هنا .. فارس احتضن وجهه بكفيه والتعب هد جسمه...نطق بضعف: أنا متأكد إنه مهند جابرها على الطلاق ما أدري وين يبغى يأخذها من الصباح ابو ضاري خزه بقوة: انت وش تعمل عندهم من الصباح ؟! مو اتفقنا الأسبوع الجاي نأخذ جاهة ونرجعها وانت قلت راحت لوحدها ترجع لوحدها؟! فارس بوهن نطق: قلبي ما هو مرتاح لوجودها هناك ...حتى الرسائل الي وصلتني منها لما رجعت أتأملها حسيت مب رحيق الي كتبتها!! في شيء بينهم وانا ما اعرفه ابو ضاري ناظر جواله وهو يرن...رد بهدوء: هلا يبه...صدق...الحمد لله وحنا لفينا الدنيا عليها...أدري إني غلطت ..إن إن شاء الله ...مع السلامه! قفل الخط وهو ينطق: رحيق مع جدك ابو فيصل ..رح اتصل بعمي ابو عبدالرحمن وأخبره سكت لما دخل ابو عبدالرحمن وخلفه ضاري : عمي رحيق قاطعه أبو عبدالرحمن بعبوس: اتصل فيني ابوك!! جلس ابو عبدالرحمن على طرف السرير وهو يناظر فارس: خلينا ننهي السالفة بينك وبين مهند...اتصل فيني عم مهند الحين وقال ما رح يتنازل ...وقلت له وحنا ما رح نتنازل ...جدك ابو فيصل أخذ رحيق للشرطه حتى تشتكي على مهند أبو ضاري عبس ملامحه وهو يتذكر شكل رحيق: مهند الي عمل فيها كذا!! فارس ما هو فاهم شيء..نطق بانفعال: الزفت وش عمل لرحيق؟! ضاري اشر له يهدي أعصابه: ما عمل لها شيء ..بس الظاهر ضاربها كف قاطعه بغضب: وليه يضربها؟! ابو عبدالرحمن زفر بضيق: أنا الحين أتوقع فهمت شوي من السالفه ...عمة رحيق ماتت قبل موت منصور وماعندها عيال ولا زوج ...وكذا ورثها منصور مع إخوانه ... اتوقع مهند يبغى رحيق تتنازل عن حصتها بالورثة!! ابو ضاري زفر بضيق وهو ينطق: منصور يا عمي تنازل بحصته من الورث كلها لرحيق ..واتوقع لما عرف مهند جاء حتى تتنازل! واكبر دليل على هذا الشيء ..طول الوقت ما سأل عنها الحين تذكرها!! اتوقع كان يبغاها تتنازل عن الورث له أو يطلقها من فارس...يعني يبغى يلوي ذراعها!! فارس يتمنى للحين يطق مهند ..نطق بقهر: حقييييير ابو ضاري تابع كلامه: طبعا ما هو الوحيد الظاهر كل إخوانها الحين يدورون خلف الورثة ...وخاصه لما عرفوا إنه تنازل فيه منصور يعني طلعوا فشوش.. الحين يبغون يستردون الورث بأي طريقة! ضاري :واكيد جبروها إنها تروح للشركه حتى تتنازل لهم!! ابو عبدالرحمن يحس في حلقه مفقودة بالسالفه: علاقة مهند بإخوانه زفت ..كيف رحيق البارحة كانت معهم واليوم كانت رحيق عند مهند!! ضاري بتعجب: يمكن تصالحوا؟!! أبو عبدالرحمن باستبعاد: ما ظنيت إنت ما تعرف كيف يكرهون بعض!! الحين خلي رحيق تشتكي على مهند حتى نضمن ما يتعرض لها مرة ثانية!! أبو ضاري بضيق من هالمشاكل: يا رب تخلص هالمشاكل!!! ** *** *** *** *** مهند يحس كل جسمه مكسر والي زاد عليه اتصال الزفت رياض..مايدري من وين جاب رقمه...وش عرفه بالمشكلة...هالكلب يتشمت فيه...وكسر ظهره لما قال انها رحيق تنازلت بالورثه لهم...وكل سعيه للورثه طار بالهواء...يا كرهه لعيال اسماء...وفوق هذا الكلبة رافعه عليه قضية اختطاف هو وأمه ... وهو ظنها غبية وعبيطة ما رح يتعب معها...عيال الهندية أنجس من ذيل الفأر... ما يبغى يفقد وظيفته بسبب هالقضية ...مضطر يتنازل عن حقه عن فارس حتى تتنازل رحيق حسب ما قال عمه .... ما رسم تمشي الأحداث كذا ...كله بسبب الزفت فارس خرب كل شيء...قطع افكاره وناظر عمه الغاضب: أقسم بالله إن سمعت إنك تعرضت لأي واحد من عيال الهندية ما رح يصير خير...ذول لا ذمة ولا ضمير...اتركنا منهم وخلينا نعيش حياتنا بدون مشاكل ولا وجع رأس!! والورث أخذتم حصة منصور من ورث أبوي ..يكفي طمع يا مهند...وتذكر أمك ما لها غيرك ...زوجتك وعيالك إن دخلت السجن رح يضيعوا! لا تمشي دروب منصور...ارجع عقلك لرأسك وأمسك بيتك وأهلك أفضل لك..وانتهينا!! هز رأسه بتعب: إن شاء الله *** *** *** بعد ما استردت حقيبتها وجوالها ..تحس بالقرف من نفس مهند الرديئة..حتى الفلوس الي كانوا بحقيبتها أخذهم...ما تدري لاي مدى توصل النفوس الدنية....كتمت اختناقها ونطقت بهدوء: يا عمي لو سمحت وقف هنا!! ابو فيصل ناظرها باستغراب بعد ما وقف السيارة: تبغين شيء!! ردت بصوت هادئ: رح أنزل هنا ..أخر خدمة أطلبها منك أبغى فلوس وبأقرب فرصة أردهم لك قاطعها برفض: وين تروحين ؟! انا قلت نروح لبيت جدك نأخذ أغراضك ...رح تيجين لبيتي وتعشين عندي وكذا أضمن ما أحد من اخوانك يتعرض لك! ردت بنبرة غامضة : ما رح يتعرضون لي..عندي بعض الشغل هنا ... إذا ما تبغى تعطيني فلوس أقدر أدبر قاطعها بقوة: وش هالكلام؟! أنا خايف عليك قاطعته بنظرة امتنان: لا تخاف يا عمي أنا بخير... هز رأسه وهو ينبه عليها: بيننا اتصال أي شيء يصير لك مباشرة اتصلي فيني!! أخذت الفلوس بعد سأل كم تحتاج فلوس...فتحت الباب ونطقت بنبرة شكر وامتنان: مشكور يا عمي ما قصرت!! ابتسم لها وهو يهز رأسه بهدوء!! قفلت باب السيارة وتحركت باتجاه عكس اتجاه سيارة ابو فيصل حتى تضمن إنه ما يلحقها!!! بعد وقت أشرت لسيارة أجرة ..ركبت بعد ما اعطته العنوان... تناظر من الشباك وبداخلها تشتت وضياع ...خلاص أكثر من كذا ما رح تسكت ...ما رح تقدم تنازلات علشان فلان وعلان ...ما تبغى أحد يتمنن عليها او يضغط عليها بقراراتها .... رح تعمل الي تبغاه هي ملت من حياة المجاملة...رح تضع نقطة، وتبدأ حياة جديدة تختارها بنفسها..تكون بسيطة ومريحه لها!! وقفت باب البيت ...اخذت نفس عميق...طرقت الباب وهي تحس بارتجاف يدها... ما احد عنده معلومات الا الهندية...تبغى تسألها عن صحة خروج إخوانها من السجن...وش سالفة الشركة... متأكدة هذه الحية عندها كل الاخبار!! رجعت خطوة للخلف لما فتحت الباب ...نطقت باستنكار: رحيق!! رحيق بنبرة هادئة نطقت: جيت أسألك كم سؤال واروح سكتت لما نطقت الهندية بسخريه: تعالوا شوفوا من هنا!! هبط قلبها من كلامها لأنها تجهل هوية الي بالداخل... تلقائيا رجعت للخلف تحسب لأي طارئ! فيصل تقدم وهو يناظر رحيق : رحيق هنا!! رياض بسخريه: وش عندك؟! رحيق ناظرته بحسافه رياض عمره ما رح يتغير.. لأي حال وصلوا ؟!! ....كذا الإخوان يتقابلوا بعد سنوات.. كتمت ضيقها ونطقت بجديه: ابغى أسأل عن سالفة الشركة.. قاطعها فيصل يختصر عليها: ايه صحيح بس الكلب الظاهر لما وصله خبر بخروجنا مباشرة باع حصتك لأنك غبية!! رياض بسخريه:بس لا تخافين إخوانك ما يطلعون كذا بدون ربح... ورث عمتك المصون أخذناه أنا وفيصل ..ختم كلامه بضحكه رنانه!! عقدت حواجبها باستنكار: كيف انا ما تنازلت قاطعها فيصل: لا تحاولين أخذنا حقنا .. وإن راجعت ما رح تستفيدين شيء لأنه كل خطواتنا قانونية وسبقنا أخوك مهندوووو!! فعلا الحين تحس ببشاعة إخوانها ...وفعلا قرفت منهم ومن أفعالهم ..وهي كانت ناوية اذا كان صحيح تتنازل فيه ويتقسم بينهم الستة ... رياض قاطع افكارها بنبرة مستفزة: تفاجأت ؟! شدي حيلك ورح تعوضين الفلوس من حماك ترى عنده فلوس هالكثر!! مستفزين بقوة...ما رح ترد عليهم ...لأنهم بدون عقل وما تضمن يضرونها ...بما إنها الفلوس طارت ...تبغى تعرف مكان ياسمين ..تبغى يكون لها إخت تشاركها همومها ...وبضيق نطقت: ياسمين وين؟! ومشعل قاطعها فيصل بلامبالاة: مشعل ما نعرف عنه شيء...وياسمين عايشه في منطقة*****شارع***** رياض بسخريه: اعطيها رقم الفيلا الي عايشه فيها ياسمين!! ناظرته بحسافه وتحركت بس يد الهنديه كانت اسرع: وين منقلعه؟! فلوس اسماء وينهم؟!! دفت يدها رحيق بقرف: الله يأخذك وتخلص الدنيا من شرك!! وتحركت مبتعده عنهم...الهنديه بقهر: كيف تتركونها قاطعها فيصل بملل: تراها ما تدري عن هوى دارها ...اذا ورث ما تدري عنه ...تبغينها تعرف بفلوس أسماء..انا اتوقع دفنتهم وما هم من نصيبنا...ما رح اتأخر أكثر من كذا...خلال هالأسبوع رح أنهي كل شيء وارحل من هنا!! *** *** *** ياسمين مستلقيه على الارض بملل وهي تتكلم عن مغامراتها بالشغل البارحة... وإم ربيع تعلق على بعض المواقف وتضحك من قلبها!! سكتت ياسمين لما سمعت صوت طرق الباب..ما تدري دب الخوف بقلبها: معقول اخواني رجعوا!! ام ربيع باستبعاد: وليه يرجعون؟! ياسمين والطرق مستمر نطقت: قلت لك خلينا ننتقل من هنا حتى ما يعرفون مكاني! ام ربيع وهي تتحرك تشوف مين على الباب: بأقرب فرصة إن شاء الله!! اقتربت من الباب وهي تنطق: مين!! رحيق بحرج نطقت: أنا رحيق فتحت ام ربيع الباب بعدم تصديق: رحيق ءءء نفسها رحيق ضحكت رحيق بدون نفس على طريقتها وعلى صدمتها: ايه رحيق...ياسمين هنا! اشرت لها ام ربيع بعيونها: ايه ايه تعالي ..ادخلي حياك الله!! سمت بالله ودخلت رحيق وهي تحس اليوم وصلت حد الهلاك....كان اليوم من الصباح مهلك لها.... ياسمين اعتدلت وجلست وهي تناظر باستغراب... وتسأل بعيونها ام ربيع ! ام ربيع ابتسمت بعدم تصديق: هذه اختك رحيق ياسمين بفجعه وعدم تصديق: اختي اختي انا!! وقفت وهي تعدل شعرها وتمسح وجهها بتوتر: الله يسامحك كان قلت لي أضبط نفسي قبل ما تشوفني كذا! ابتسمت رحيق بتعب ومدت يدها تسلم بهدوء: كيف حالك؟! ياسمين تحس انها متوترة ومرتبكة ما كانت حاسبه انها تقابل احد الحين!! بعد السلام ام ربيع نطقت: اجلسي رحيق البيت بيتك!! وخذي راحتك ما في رجال في البيت غير عيالنا!! جلست رحيق وزفرت بتعب ...كشفت عن وجهها وهي تناظر ياسمين بتعجب لو شافتها كان ما عرفتها ..متغيرة كثيره! ياسمين فتحت عيونها بفجعه: وش فيه وجهك خرابيط كذا؟! وناظرت ام ربيع بانفعال: قلت لك ما رح ترتاح عند زينبووو لعنبوا إبليسهم ليه عملوا فيك كذا!! ختمت كلامها وهي تنتظر تبرير وكلام من رحيق .. رحيق بهدوء نطقت : أبغى موية أو عصير ياسمين حست بالانتكاسة ..منفعلة وحالتها حالة وتنتظر منها تبرير وبالاخير ترد بهذا البرود...ناظرت ام ربيع : الله يرفع قدرك جيبي لها مويه! بعد خروج ام ربيع حل الصمت بينهم وكل وحده غرقت بأفكارها... تحس بحاجز كبير بينها وبين ياسمين..صحيح إنها أختها بس بعمرها ما كانت قريبة منها ولما تزوجت ياسمين كانت بعدها طفلة! رجعت ام ربيع بسرعه وناولتها المويه ...خافت يفوتها مقطع من السالفه:تفضلي! شربت رحيق وناولت نورة تشرب مويه والهدوء والبرود يحيط فيها... وياسمين وام ربيع بأشكال مضحكه فاتحات عيونهم ويناظرونها بترقب حتى تتكلم والفضول صار ألف... وأخيرا حركت شفتها تبغى تتكلم! ياسمين وكأنها تسحب الكلام من حلق رحيق .. بدأت تهز رأسها باندماج وكأنه تقول لها ايه تكلمي أسمعك! سرعان ما انتكست لما نطقت رحيق: ابغى أجلس عندكم فترة قصيرة اذا ما في كلافه! ياسمين مصدومة من ردها ..نطقت بانفعال: اجلسي هنا طول عمرك بس أبغى اعرف مين عمل فيك كذا؟! ابغى أكسره تكسير قليل الخاتمه ما عنده ضمير ولا إحساس!! رحيق ابتسمت وهي تناظر الصالة فيها ثلاث فرشات ..استلقت على طولها وهي تقاطع ياسمين: أبغى غطاء وقت أذان المغرب صحوني للصلاة.. لما أريح جسمي رح أخبرك بالسالفة..وعساي لما أصحى أفقد الذاكرة وارتاح من كل شيء من حولي!! ! ام ربيع تضايقت من كمية البؤس الي بداخل رحيق: ربك يفرجها ..انت نامي وما عليك! بعد ما غطتها ياسمين ..ناظرت نورة الي مندسة بحضن رحيق ... ام ربيع اشرت لها بيدها ما تنطق حرف واحد وتتركها تنام وترتاح!! *** *** ** في اليوم الثاني تم التنازل بين مهند وفارس مقابل ما يتنازل فارس عن مهند وعن ولد عم مهند الي ضربه على رأسه ... وقضية رحيق للحين مرفوعه .. ناظر جده ابو فيصل برجاء: بس انت قل لي وين نزلتها؟! ما قالت لك وين رح تروح؟! ابو فيصل وهو يسند ظهره على الكنبة: ما قالت لي ..بس قالت بيننا اتصال زفر بضيق: جوالها مغلق ابو ضاري رفع حاجب باستغراب: كأنك منفعل بزيادة!! تلقاها عند إخوانها فارس نطق بضيق: على أساس إخوانها عندهم بيت تروح لهم!!! زينب تحاتي رحيق: يعني وين نامت البارحة ...يا رب احفظها ابو فيصل بانتقاد: يعني لو زوجك مسك لسانه وما سمعها كلام مثل الزفت ما كانت راحت ...يعني البنت عندها كرامه أبو ضاري بضجر من هالسالفه: قلت لكم ما هو قصدي؟! فارس ما يدري وين يلقاها الحين ...رجع رن عليها بفقدان أمل...حس الروح ردت له لما رن الجوال! اربع رنات وانتفتح الخط ...نطق بلهفه لفتت نظر كل الموجودين: رحيق رحيق بهدوء نطقت: هلا فارس تنهد انها بخير ...نطق باهتمام: وينك يا رحيق من البارحة اتصل عليك ..انحرقت أعصابي قاطعته بنفس الهدوء: أنا بخير... نطق بمقاطعه: طيب وينك؟! ردت : بعد ساعة ونص رح أكون في بيت جدي ..ابغى اوصل له أمانه ...أبغى أشوفك واتكلم معك نطق بسرعه: ان شاء الله ..انتظرك!! *** *** *** ياسمين وهي جالسه قريب منها ..نطقت باهتمام: رح أروح معك ابتسمت رحيق بملامح باهته: ما له داعي ما رح أتأخر! ياسمين عبست ملامحها وهي تتلمس ملامح رحيق: والله نمت البارحة وأنا أدعي على مهند ...ربي يأخذ حقنا منه هالواطي!! وبنبرة ضعيفه تابعت: طول عمري اسمع انهم الاخوان سند للأخت ..بس حنا بعمرنا ما حسينا بهذا الشيء ...لما زوجوني تمنيت يكون عندي أخ يوقف بوجههم ويأخذ حقي! بس تدرين يا رحيق الدنيا علمتني إني ما أكون الضحية وانتظر الفارس الي يخلصني من هالضيم...تعلمت تكون نفسي هي الفارس الي تخلص نفسها بنفسها... تعلمت اكون قوية وأخذ حقي بيدي ..بس طبيعة المرأة الضعيفة هي تكون السبب بالتراجع!! حاولي قد ما تقدرين إنك ما تضعفين وما تتنازلين عن حقك وخلي مهند يندم على اليوم إلي تعرض لك فيه!! رحيق عدلت نقابها والإبتسامة مرسومه على ملامحها ... طريقه ياسمين بالكلام تضحكها غصب عنها ...ما توقعت ياسمين بسيطة لهذه الدرجة ... كانت تتوقع إنها مغرورة ومتكبرة وما تنطاق وقلبها قاسي! تحسها بالعكس إنسانه رقيقه حساسة... ياسمين بابتسامة: لا تناظريني كذا ...ادري اني شينه..راحت ايام البرستيج! قبل ما ترد رحيق ناظرت طراد ولد ياسمين دوبه صاحي : انتبهي على نورة ما رح أتأخر!! ياسمين هزت راسها بابتسامة: بيد أمينه!! *** ** *** *** طلعت من البنك والصدمة للحين حولها ..الفلوس تم سحبها اليوم الصبح؟!! في احد ينتحل شخصيتها وهي ما تدري؟!! معقول إخوانها لهم يد بالسالفة؟!! قررت تروح لهم بالاول وتتفاهم معهم ...الوقاحه ما هي لذي الدرجة ينتحلون شخصيتها؟! اول ما وصلت طرقت الباب بقوة ..بس ما احد رد عليها ...رجعت تطرق الباب بأقوى ...بس ما في مجيب!! التفتت على احد الجيران نطق بنبرة ما هي مفهومة بشكل جيد...فهمت منه إنهم رحلوا وسلموا البيت!! يعني أخذوا الفلوس والورث وهربوا!!! غادرت المكان والضيق مكتسي ملامحها ...قررت تروح للشركة وتأخذ فلوسها وتعطيهم لجدها بدل ذيك الفلوس ...ما ترضى اي احد يناظرها بالنظرة الدونية...ما هي محتاجه احد من البشر؟! رن جوالها وكان فارس يعجل فيها....غيرت الخطه ما رح تروح لبيت جدها رح تلتقي فيه بمكان عام وتطلب منه يوصل الفلوس لجدها!!! بعد وقت جالس بالمطعم إلي قضى فيه مراهقته وهو يبحث عن ظل رحيق ...ما توقع تختار هذا المكان للقاء!! واختارت رقم الطاولة الي كانت دوم تجلس عليها!! ناظر ساعته وهو يحسها تأخرت ....ابتسم براحه لما اقتربت منه ... ردت السلام وهي تزفر بتعب...سحبت كرسي وجلست مقابل له!! رد السلام وللحين متمسك بيدها وهو يسألها عن حالها! سحبت يدها وهي تنطق بهدوء: الحمد لله بخير! كيف رأسك الحين؟! هز رأسه : الحمد لله بس الصداع للحين ما فارقني!! ابتسم وهو يناظر من النافذة: غريبه اخترت هذا المكان؟!! وهذا المكان بالضبط الي كنت تجلسين فيه من سنوات قاطعته بابتسامة ذابله: هذا المكان له ذكريات جميلة بقلبي ...كنت ألتقي مع أعز صديقات بحياتي ..وأقضي وقت جميل معهم!! هز رأسه بتفهم: حلو الواحد يزور المكان إلي مليء بذكريات جميلة بذاكرته!! وقف وهو ينطق: رح اروح اجيب لنا شيء نشربه... هزت رأسها باستغراب منه ..بإمكانه يطلب من القرصون ...ليه راح بنفسه؟!! تنهدت وهذا المكان جدد الحنين لايام المدرسة ...كانت المدرسة متنفسها بالضحك والسعادة ونسيان الواقع الي كانت تعيشه!! رجع فارس ومعه الطلب ...وضعه أمامها وهو ينطق: تفضلي!! جلس وهو ينطق باستغراب: ليه مغطيه وجهك اضطرت تكشف حتى تشرب ..غمضت عيونها لما نطق باستنكار: وش فيك..لا تقولين مهند قاطعته بضيق كل واحد شافها فتح معها نفس السيناريو: خلاص انسى قاطعها بقهر: على بالي قالوا ضربها كف !! هذا مخفي معالم وجهك... الحقير أنا اراويه الحين مسكت يده لما هم بالمغادرة: فارس بعدين معك!! اجلس خلينا نتفاهم!! نطق بقهر: تبغيني اشوف وجهك كذا واسكت له قاطعته بهدوء: في قانون يأخذ حقي ...وانت ما قصرت فيه...اجلس واترك مهند على جنب! كتم قهره وجلس وهو يناظرها: يوجعك ؟! ابتسمت والدموع تلمع بعيونها: لا ما يوجعني!! هز رأسه والعبوس مرسوم على ملامحه: خلينا نروح للمستشفى قاطعته برفض: ما له داعي ..كم يوم ويروح!! في موضوع ثاني ابغاك فيه! طلعت ظرف من شنطتها: أبغاك هذا الظرف تعطيه لجدي ..وقول له هذا تعويض عن الفلوس الي سرقتهم أسماء انا ما اعرف كم الفلوس الي سرقتهم...بس انا حاليا ما عندي الا هذه الفلوس اخذتها من شركة ابوك بدل حصتي إلي باعها قاطعها وهو معقد حواجبه: وليه ما تعطيها لجدي؟! ردت بهدوء: أنا ما رح ارجع لبيت جدي ... أنا حاليا رح أستقر عند أختي ياسمين وخالتي ضحك بسخريه: انت تتكلمين جد والا تضحكين علي؟! رحيق ابتسمت على ضحكته: أتكلم جد... أنا هذه الفترة محتاجة أبعد عن الناس ...أبغى ارجع ارتب أمور حياتي من جديد احتدت ملامحه: ليه قالوا لك انا رجل طاولة؟! ما عندك زوج حتى تعيشين عند ياسمين ردت بهدوء: فارس حتى نكون على بلاطه ...أنا ما رح أرجع الا ولي بيت مستقل او شقة اعيش فيهم لوحدي!؛ وانت هذا الشيء رافضه ...علشان كذا قاطعها بتحذير : يا ويلك إذا تطرين سالفة الطلاق هزت رأسها بالنفي: ومين قال ابغى الطلاق؟! اتمنى تتفهم شعوري ...أبغى أستقل بحياتي ...اذا وفرت لي هذا الشيء ...انا جالسه في بيت خالتي ...وبيننا اتصال!! رد وهو يصك على اسنانه بقهر: ما رح أقبل بكل هالخرابيط...واذا حجتك البيت الحين استأجر لك شقة ...وتأخذين راحتك ... ما توقعت يوافق يستأجر لها شقة بروحها...متاكد كل هذا حتى ما تسكن مع ياسمين...ما رح تعلق أهم شيء تحصل على بيت مستقل لوحدها ....نطقت بحماس: يلا نروح الحين نشوف شقة!! دف جبهتها للخلف بخفه لما اندفعت بحماس: أقول إجلسي بلاه يطق لك عرق من الفرحة!! ابتسمت وهي تشوف ملامحه المنتفخه من القهر: طيب متى زفر بضجر: يا رب اعطيني الصبر...خلاص بعدين أشوف وأضبط الامور تظنين إنه استأجر شقة بهذه السهولة ...أحتاج اختار مكان مناسب ويكون آمن!! وقفلي سالفة الشقة لأني بدأت أتنرفز وأفقد أعصابي!! ابتسمت وهي تشوفه يزفر من القهر ...فرحانه بالشقة مثل البزران .... ناظرها بتذكر: انت الي كنت ترسلين الرسائل من جوالك لما كنت عند مهند هزت رأسها بالنفي : لا الجوال كان معه!! سكت وهو يفكر مثل ما توقع الي كان يراسله مهند ...يعني سالفة الحمل كذبة من عنده.. تابع كلامه: وليه قلت إنها نورة ابنتنا!! رحيق ضاق صدرها من الماضي: هو يعرف إنه عندنا اخت بس ما يعرف إنها نورة ... وأنا خفت يلوي ذراعي ويأخذها مني ...فأظهرت له إنها نورة ابنتي قاطعها بتعجب: كيف مشت عليه ردت بابتسامة باهته: الحمد لله ما اكتشف هالشيء...لأني مستعدة أتخلى عن العالم كله وما أتخلى عن ابنتي نورة.. عقد حواجبه بغيره: لنفرض رجعت امها وتبغاها قاطعته بحزم: مستحيل أعطيها لها ...إلي تخلت عن ضناها وهي رضيعه ما تستحقها بعد كل السنوات..هذه ابنتي أنا! مط شفته : وباكر لما يصير عندك عيال قاطعته بتذكر:صحيح نسيت أخبرك إني حامل عقد حواجبه يعني كلام مهند مضبوط..نطق بقهر من استهتارها: وحبوب الزفت الي كنت تبلعيها لوت بوزها بلامبالاة: كنت أوهمك إني اشرب دواء ..بس أنا تركته من قبل التخرج نطق بتعجب: وليه كل هذا ؟! صدق يالحريم وضعكم عجيب وما ينفهم لكم!! رحيق ابتسمت تغير مجرى الكلام : تتوقع ولد والا بنت! نطق وهو يناظرها بابتسامه: إن شاء الله ولد نفس شكلك بس يأخذ عقلي وأفكاري!! عقدت حواجبها باستنكار: وليه إن شاء الله وش فيه عقلي؟!! رد بابتسامة: ما تعجبني تصرفاتك وعقلك . لأنه كل هالمشاكل الي نواجهها بحياتنا بسبب تصرفاتك مطت شفتها بسخرية: نسيت إنك قاطعها بابتسامه واثقه: لا تنكرين أنا أذكى منك وأتصرف أفضل منك بكثير!! انقهرت من كلامه بس ما اظهرت ..وبنغزة نطقت : اذا بنت رح نسميها ليلى ختمت كلامها وهي تناظره تشوف رد فعله!! تعجبت لما دخل بنوبة ضحك قويه...وبقهر نطقت: وليه كل هالضحك؟! اذا ناسي ترى هذا المكان الي كنت دوم تيجي له حتى تشوف ليلى !! اخذ نفس عميق وللحين الابتسامه مرسومه على خده: ايه اتذكر وكنت أجلس قريب من طاولتكم حتى أسمع صوت ليلى...تتذكرين لما وقفت معك وسألتك عن البنات الي معك فتحت عيونها وهي تحس هالحدث مر بعقلها: صدق مراهق!! توسعت ابتسامته وهو ينطق: واحلى مراهق!! نطقت حتى تقهره : انا اقول خلينا نروح ندور على شقة قاطعها وملامحه تبدلت للضجر والقهر: وبعدين معك؟!! خلال هالاسبوع رح تكونين في بيتك...رح تجلسين في بيت جدي لوقت قاطعته بحزم: ولا دقيقه اجلس هناك...انا رح اجلس عند ياسمين متى ما جهزت رح تلقاني أنتظرك وبيننا اتصال!! نطق بقهر: فصبر جميل!! رحيق لا تجننيني...اذا زعلانه من جدي ...خلاص تجلسين عند اهلي قاطعته برفض: انا وحصه بمكان واحد ما نجتمع! نطق بقهر: عمركم إن شاء الله ما اجتمعتوا! وبما إنك كذا ...الفلوس وصليها بنفسك لجدي ... أنا آسف!! ناظرته بزعل: مشكور وأنا الغبية إلي انتخيتك قاطعها بابتسامه:غبية ما جبت شيء جديد...وسالفة الانتخاء هاتي الفلوس رح اوصلهم من باب النخوة وبس!! رح أسكت حتى اشوف نهايتها معك!! ** ** ** رحيق باقتراح: انا اقول خلي انتقالكم لوقت يختار لي فارس شقة حتى تختاروا مكان قريب مني! ياسمين لوت بوزها: بالله لا تقولين فارس ترى تحوم كبدي منه ... أتذكره زمان ما ينبلع!! ما ادري وين عقلك يوم وافقت عليه! ام ربيع بدفاع: تراك تبالغين والله إنه رجال والنعم ... يعني ما هو بالسوء الي توصفيه!! رحيق هزت رأسها بتأكيد: ما في إنسان كامل ..كلنا عيوب وما في احد معصوم عن الغلط!! الحين اتركينا من فارس ..وفكري معي كيف ألقى إلي انتخل شخصيتي!! ياسمين بتفكير: الي انتحل شخصيتك معه وثائق باسمك وعلى الاغلب انها مزورة رحيق بضيق:, وكيف اقدر أعرفه ...واخوانك ما اهم أثر!! ام ربيع هزت راسها بأسف: ما ظنيت نعرفه مع اختفاء اخوانك النصابين!! ياسمين بقلة حيلة: رح ييجي يوم ونكشفه بس ما رح أرحمه!! رحيق هزت رأسها بضيق : ربي يفرجها أن شاء الله علينا...بالرغم من ضيقي إلا إني لما اتذكر إني إلتقيت فيكم أنسى كل ضيقي ...كان حلمي أجتمع معك ياسمين ضمتها بحنان: يا قلبي والله انا فرحت بشوفتك... بس للحين مب قادرة أتصور إنها الطفلة الصغيرة صارت كبيرة!! ابتسمت رحيق : حال الدنيا سكتت لما رن جوالها...نطقت ياسمين بانزعاج لما شافت اسم المتصل: يا كثر ما يتصل فيك!! رحيق وقفت وابتعدت حتى تكلمه بعيد عن الازعاج!! *** *** *** انتهى البارت دمتم بخير 🌹 | ||||
|  |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
العرض العادي
