15-03-22, 11:47 PM
| #871 | ||||
 
|  بارت ٣٤ ناظرتهم بترقب وعدم الراحة رافقتها.. نطقت بتوجس وهي تناظر الصحراء: متأكدين إنها اسماء دفنت الفلوس هنا! رياض وعيونه على الطريق: الحين نتأكد ونعطي كل شخص حصته! فيصل ناظر رياض ومط شفته بسخرية ورجع يناظر الطريق.... بعد وقت وقف رياض السيارة...نزل منها وهو يقول: اتوقع هنا ام أسماء نزلت من السيارة وهي تناظر من حولها صحراء قاحلة ..تحس ما دخلت رأسها إنه الفلوس هنا .. اسماء وش يجيبها هنا. ...والاهم كيف عرفوا إنه الفلوس هنا!! تقدم فيصل وبيده الفأس ..رياض وهو يناظر جواله: هنا احفر ...الجوال أعطى الإشارة هنا! تنهدت براحه اكيد عن طريق برنامج رح يطلعون الفلوس ...جلست تناظرهم وهم يحفرون... مسحت حبات العرق من جبينها... أجواء الصحراء بالظهر ما تنطاق بس في سبيل الفلوس كل شيء يهون!! بعد وقت رياض أشر لها: تعالي شوفي؟! طلع فيصل من الحفرة وبعده رياض وهو يمسح وجهه الي صار احمر من حرارة الشمس.... نطقت وهي تناظر الحفرة: ما لقيتم شيء؟ رياض ابتسم وهو يناظرها: لقيناه والحين رح نتقاسم كل واحد حصته! وبلمح البصر مسكها بمساعدة فيصل ووضعوها بالحفر...وتجاهلوا صراخها ...رياض بقوة: اقسم بالله اذا ما انكتمي الا الحين ادفنك وانت عايشه! هزت راسها وبنبرة ضعيفه: طلعوني انا بمقام أمكم!؛ فيصل بقرف: لا تظنين اننا أغبياء ترى سمعنا اتفاقك مع عدنان...تبغين تورطينا بقضية ونرجع للسجن وتحوشين الفلوس كلها لك!! ردت وهي تبكي: كذب كذب ومين قال كذا...انتم مثل عيالي ومستحيل أضركم ..طلعوني من هنا!! رياض بلامبالاة: اجلسي هنا وريحي العالم من شرك...خدي هذه قارورة مويه فيصل رمى عليه فلوس: وخذي هذه الفلوس اذا حسيت بالجوع اشتري لك شيء يشبعك مع اني اشك إنه عينك تشبع!! رياض وهو يهم بالمغادرة: يعني حنا رحمناك شوي اعطيناك مويه تمشي أمورك فيها..إن كان حظك حلو يمكن تلقين احد يساعدك ويطلعك من هنا ... وإذا ما لقيت احد اعتبريه قبرك فيصل تنهد وهو يناظرها...اشر لرياض بيده: خلينا نتحرك ما اقدر اوقف بالحر أكثر من كذا!! تحرك فيصل وخلفه رياض متجاهلين صراخ وبكاء ام اسماء من خلفهم!! ** *** ** جالس وهو يسمع كلام فارس عن آخر المستجدات...وبرفض نطق: وانت وافقت تجلس عند ياسمين؟! لا تخلي حبك لها يجبرك تتصرف بدون تفكير!! وكأنك ما تعرف ياسمين؟! فارس بهدوء نطق: رح أعجل واستأجر شقه قاطعه بعدم راحة: انا ما ارتاح لهذه البنت .. أخاف تعمل لرحيق شيء ام عبدالرحمن نطقت وهي توزع نظرها بينهم: البنت سنوات ما شفناها وما ندري عن حالها...و ما تدري يمكن البنت تغيرت قاطعها ابو عبدالرحمن: ياسمين وجودها هنا غلط ...رح يخرب بيت ضاري.. والا ناسيه حفيدك الأهبل إلي قضى حياته يلاحقها!! ام عبدالرحمن : هذا انت قلت حفيدك الي كان يلاحقها ... والحين ضاري متزوج فارس تنهد بضيق: محتار من هالحال..أخاف أمنعها عن أختها وتصير مشاكل بيننا وأكون ظلمت ياسمين بموقفي ضدها...وبنفس الوقت اذا سمحت لها تختلط فيها أخاف تكون ياسمين مثل اسماء وتخرب رحيق او قاطعته ام عبدالرحمن: نصيحتي لك حاليا لا تمنعها وخلينا نشوف كيف وضعها وبعدها تقرر.. تابعت كلامها وهي تناظر زوجها: وانت يا ابو عبدالرحمن ترى كلامك ثقيل على رحيق ..واكبر دليل شوفها رافضه تدخل هالبيت ...هذا البيت الي حلفت أيمان ما تطلع منه إلا بعد موتك هز رأسه بتفهم: كنت أبغاها تفكر بأي شيء قبل ما تقدم عليه ...بغيت اكون معها حازم حتى تكون أكثر جدية بقرارتها! الفلوس يا فارس خليهم معك الحين لأني ما أضمن إخوانها يأخذون الفلوس منها ...الظاهر إنها اعطت فلوس أمها لإخوانها لأنه حسب معلوماتي إنها الفلوس انسحبت! فارس هز رأسه بتفهم: ان شاء الله! ** ** *** ياسمين بتنبيه : لا تخبرين فارس ولا احد عن سالفه الانتحال...لزوم نحل مشاكلنا لوحدنا ما نبغى أحد يتمنن علينا! رحيق بضيق من هالسالفه: اخاف تعمل لي مشاكل أكبر... ام ربيع بتفكير: لزوم نلقاها بس كيف؟!! ومين هالشخص الي تجرأ يعمل كذا...ومثل ما قلت لك من قبل الظاهر إخوانك يعرفونه!! زفرت رحيق والهم اكتسى ملامحها: المشكلة إنهم اختفوا مرة وحده...وحتى امك اختفت معهم!! ياسمين بتحذير: لزوم تخففين من طلعاتك الحين .. لأنك ما تضمنين اي تصرف غبي من إخوانك او من مهند وخاصة الحقود مهند ما اتوقع يتركك لوحدك بعد القضية الي رفعتيها عليها!! ام ربيع بنصيحه: انا اقول لو تتنازلين عن هالقضية أخاف يعملوا لك مشاكل وينتقمون منك ياسمين بانفعال: ما رح تتنازل وخليهم يأخذون جزاتهم ...يظنون إنها هبلة يوم يعملون فيها كذا؟! رحيق هزت رأسها بتأكيد ..ياسمين تعطيها دافع قوي حتى تحافظ على قراراتها وما تضعف...ليه تسامح مهند وهو ما رحمها ولا قدر إنها أخته الصغيرة اليتيمة!! ام ربيع بانتقاد: اشوفك متحامله على مهند وناسيه اخوانك الي بلعوا الفلوس والميراث واكلوا حقكم؟! ياسمين نطقت بقوة: جعلهم ما يتهنون بالفلوس ...اكلوا الفلوس وتجاهلوا هاليتيمه وحقها ...واشرت على نورة وهي تكمل كلامها..انا ما هي فارقه معي أسامحهم ورحيق يمكن تسامحهم بس هالطفلة كيف تسامحهم؟!! ام ربيع ناظرتهم بقلة حيلة: لو مشعل هنا كان وقف معكم ... ياسمين نطقت بقرف: اقسم بالله لو اشوفه قدامي الا اتفل بنص وجهه ..وش يظن نفسه يوم يهج من المنطقة كلها!! ما فكر فينا وبحالنا؟! أكره الأشخاص الانانيين الا ما يهمهم الا مصلحتهم!! رحيق بدفاع: الغايب عذره معه ما تدرين وش عذره!! كشت عليها ياسمين بقرف: تراك غبية وصدقيني طيبة قلبك بهذا الزمن ما تنفع ...مبسوطه على نفسك متزوجه رجال متزوج!! انت كيف وافقت على هذا الزواج؟! تخيلي نفسك مكان حصة تقبلين زوجك يتزوجك عليك بداية زواجكم! ما في حرمه ترضى يتزوج عليها طول العمر! لو فيك عقل تتطلقين منه وخلينا نعيش مع بعض بدون رجال ووجع رأس..ترى ما ييجي منهم الا وجع الرأس!! ابتسمت رحيق بارهاق من انفعالها: هذا الشيء مستحيل أوافق عليه ...ما أبغى أتطلق ... ام ربيع بتأييد: لا تردين على ياسمين تراها شغل خراب بيوت اذا كرهت احد الله يفكنا من شرها ... وكل كلامها هذا نكاية بخالتك زينب لأنها ما تحبهم!! ياسمين بدفاع عن نفسها: لا مو كذا ..بس أنا ما هو عاجبني هالزواج كله وخاصه إنك انجبرت عليه ...صدقيني الزواج قناعة قاطعتها ام ربيع : أقول اسكتي واتركي البنت بحالها!! ياسمين مطت شفتها بسخرية: وش صار على الشقة رحيق قاطعتها : لما يعطيني عنوانها رح تستأجرون بنفس العمارة او قريب مني ... أبغى اكون قريب منكم ياسمين وهي تتربع وتنطق بسخريه: ايه أكيد رح نستأجر مباشرة نفس العمارة!! رحيق خزتها بقوة: تتريقين حضرتك!؛ تنهدت ياسمين بحسرة: من وين لنا فلوس نستأجر شقة بنفس العمارة الي رح يستأجرها زوجك الموقر؟! ناظري المستوى يا حلوة! رحيق بإصرار: رح تسكنون قريب مني ..ورح أدفع معكم بالأجرة ...لا تنسين فارس أغلب وقته مسافر يعني يا دوب اشوفه يوم او يومين بالاسبوع واحيانا يمر اسبوعين ...ما تدرين فرحتي بلقياك يا ياسمين فلا تكسري فرحتي بجعرفتك ياسمين ابتسمت : مضطرة اجاريك لأني نفس الشيء ما ابغى أفقدك ...ما ابغى اكون وحيدة بذي الدنيا!! مسكت يد رحيق وشدت عليها: رح نبقى سوى وما رح أتخلى عنك مهما صار! توسعت ابتسامة رحيق. ..وبداخلها راحة وسعادة من قربها من ياسمين ما توقعت بيوم من الايام تلقاها...ما توقعت يكون هاللقاء بكل بساطة!! *** ** ** *** بعد أيام تتجول بالشقة وتناظرها والضيق مكتسي ملامحها ...تخاف تكون أجرتها مرتفعه كثير وما تقدر ياسمين تسكن قريب منها!! تقدمت من نافذة الصالة ...تطل على الشارع ...رفعت نظرها وهي تشوف بيت ابو ضاري مقابل لهم وقريب منهم ... يمكن ياسمين ما تقبل تنتقل لحي ابو ضاري لانها ما تطيقهم .... التفتت للخلف لما وقف جنبها فارس وهو ينطق بابتسامة: عجبتك الشقة!! نزلت نظرها ورجعت تناظر من الشباك: هي حلوة ومرتبة بس اتوقع أجرتها مرتفعه ... تقدر تشوف قاطعها : انت وش عليك منها...بالعكس سعرها مرتب ومناسب كثير! مطت شفتها بسخرية وبنفسها نطقت" ايه كثر منها ..سعرها مرتب ومناسب كثير".... متاكده كذا ما رح ينفع...رح تحاول بطريقه ثانية...نطقت بهدوء: بس أنا ما ابغى الشقة قريبة من حصة قاطعها وهو معقد حواجبه: وانت وش عليك منها؟! هي في بيتها وانت في بيتك؟!! وبعدين هنا قريب علي بأي وقت أقدر أمرك وأشوفك قاطعته برفض: لا لا أحس ما هي مناسبة ...تقدر تشوف شقة قريبة من اهلك قاطعها وهو يضبط أعصابه بصعوبه: فصبر جميل!! رحيق ترى فاهم حركاتك... حست بالصدمه وش فاهم ....وباستغراب نطقت: ما فهمت وش تقصد؟! نطق وهو يناظرها بقوة: تبغين شقة جنب أختك؟!! رفعت حاجب بتساؤل: ولنفرض أبغى شقة جنب أختي فيها مشكلة؟! رد بنبرة قويه: يا بنت الحلال أنا أبغى تكونين قريبة مني واطمئن عليك ..وبيت اهلي جنبك...ودام أختك مستأجره خليها تنتقل لهذه المنطقه وتكون قريبه منك. ختم كلامه بابتسامة واثقه .. لأنه متاكد ما رح تقدر ياسمين تدفع أجرة شقة بهذه المنطقة! ما حبت هالنظرة الواثقه منه .. لكن رح تفحمه وتخلي ياسمين تنقل هنا غصب عنها ... صدت عنه ورجعت تناظر من الشباك وهي تحسب راتبها..بعد ما تركت شركة الي كانت فيها ...تاج دبرت لها واسطه وتوظفت بشركة ثانية...تقدر تستأجر هنا مع راتب ام ربيع وياسمين... قاطعها حساباتها وهو ينطق بنبرة هادئة: وأخيرا رح نستقر أنا وانت بمكان قاطعته رحيق وهي تؤشر على الشارع: هذه خالتي زينب جاءت هنا!! فارس ناظر أمه بعدها التفت لرحيق: الحين نروح لبيت جدي ونأخذ أغراضك وأغراض نورة!! تحركت مبتعده عن الشباك وهي تنطق بهدوء: ما له داعي قاطعها وهو يسند ظهره على الشباك ...نطق وهو رافع حاجب: ما تبغين تدخلين بيت جدي؟! زعلانه؟! التفتت عليه ونطقت بملامح باهته: هو ما يبغاني أدخل بيته.. وأنا ما رح قاطعها بملل: وكأنك ما تعرفين جدي لما يعصب يتكلم بكلام قاسي..بس ما يكون قصده وكل هالكلام من خلف قلبه...وللمعلومة ترى زعلان جدي عليك وعتبان كثير.. وكأنك كنت تنتظرين الفرصة حتى تطلعين من حياته!! هزت رأسها بالنفي ..وبتبرير نطقت: مو كذا أنا ما أبغى أضايقه قاطعها بحزم: اليوم نروح لهم ...جدي يحبك وفاقدك كثير...وما يبغاك تطلعين من بيته...لا تكسرين جسور المحبة بينك وبين ناس حبتك لذاتك إنت ...وتغاضت عن كل شيء...حبتك لأنك رحيق وما هو لأي سبب ثاني!! رفعت حاجب باستغراب من كلامه..وقبل ما ترد ناظرت الباب لما انطرق... فارس اقترب من الباب وفتحه وهو يرحب بأمه بابتسامة! زينب أعطت نظره شاملة للمكان ...وبعدها اقتربت من رحيق وسلمت عليها بإهتمام: وش أخبارك يا قاطعه!! رحيق ابتسمت بذبول: الحمد لله بخير!! زينب بدأت تتفحص الشقة :حلوة واحلى شيء إنها قريبة مني!! ابتسمت رحيق مجاملة لها ...وناظرت فارس إلي يكلمها: أي شيء ينقصك خبريني فيه زينب قاطعته بمداخلة: حتى لو كان فارس ما هو موجود ..ابو ضاري موجود ما يردك لسانك ... وأي شيء تبغينه حنا هنا قريب منك!! *** **** *** ياسمين وهي تتجول بالشقة بعبوس...ناظرت ام ربيع الي تتكلم بابتسامة: يا حلو هالشقة!! رحيق ملتزقه بياسمين تقنعها: وش قلت؟! ياسمين ناظرتها بقوة: انت عقلك ضارب؟! ما سمعت صاحب العمارة كم قال الإيجار؟! مجنونه حتى نضيع فلوسنا علشان شقة!! ام ربيع بتأييد: كلام ياسمين مضبوط ...في فرق كبير بالسعر بين الشقة الي نعيش فيها الحين وبين هذه الشقة! ياسمين وهي تتأمل الشقة:على قد لحافك مد رجليك! رحيق بإصرار: رح تنتقلون هنا...الشقة الي جنبي فاضية...وقلت لكم رح أدفع معكم! ولا تنسين فارس قال لي إنه جدي ما رضي يأخذ الفلوس. ...وهذه الفلوس من حقك انت ونورة قاطعتها ياسمين بانزعاج: يا كرهي لجدك ! لا تجيبي سيرته ترى يصيبني غثيان!! رحيق بعتب: ترى انت تبالغين ...يعني جدي شخص طيب ..صحيح إنه زعلان مني ويوم ما اخذت أغراضي ما كان بالبيت ..تمنيت أشوفه لأنه بكل صراحه جدي يعني لي الشيء الكثير! قاطعتها ياسمين بعبوس: لا تدافعين عنه ...المهم خلينا بسالفة الشقة ام ربيع بتفكير: حنا قررنا ننتقل من المكان الي عايشين فيه..بما اننا رح ننتقل خلينا نجرب شهر واحد ونسكن هنا!! رحيق قفزت خفيف بحماس: يس!! ياسمين لوت بوزها: انتبهي لا يطيح سبع البرومبا!! ضحكت رحيق وهي تمسح على بطنها: خلاص ياسمين فكي هالكشرة وابتسمي أشوف!! طراد نطق وهو يقترب من أمه: يمه رح نعيش هنا؟! رحيق ناظرت طراد بشرته سمراء مملوح ...نحيل وشعره قصير: إن شاء الله ..عجبك البيت؟! هز رأسه بفرح: يجنن رحيق مسكت يد ياسمين: تعالي نشوف صاحب العمارة ونكمل الإجراءات!! ياسمين تحركت على مضض ما هي مقتنعة بهذا الشيء!! *** ٪٪٪ *** مر أيام على انتقالها للشقة ..والراحة النفسية عالية ...جميل شعور الاستقلال..يكون عندك بيت لوحدك ..تأخذين راحتك بدون قيود...مع إنها متأكدة فارس ما هو عاحبه هالشيء ..ما خبرته عن انتقال ياسمين جنبها...ما تعرف كيف رح تكون رد فعله ... وضعت الضيافه وابتسمت : ما بغيت تشرفين شقتي ...كل يوم أنا عندكم ياسمين وهو تثاوب بنعاس: ما ابغى ألتقي بزوجك ...ولولا انك زعلت كان ما دخلت حتى ما احد يتمنن علينا بشيء خزتها رحيق بقوة: كأنك تبالغين؟! ترى ما عو لذي الدرجة! وبعدين فارس مسافر سكتت رحيق وهي تسمع جرس الباب...ياسمين خزتها بقوة وبتهديد:وقسم بالله اذا طلع فارس الا ادوس ببطنك! رحيق ابتسمت بتوهق: فارس مسافر لا تخافين! تحركت رحيق للباب وسألت باستغراب:مين؟! زينب بهدوء: أنا خالتك افتحي الباب!! رحيق هبط قلبها اخر شيء تتمناها تلتقي زينب بياسمين....فتحت الباب وابتسمت مجامله: هلا خالتي تفضلي انمسحت الابتسامه وهي تشوف حصه معها.... زينب وهي تدخل وتكلم رحيق: قلت خليني أشرب عندك قهوة سكتت وهي تشوف حريم عند رحيق! حصه سلمت على رحيق بطرف أصابعها...رمقتها رحيق بعدم استحسان..واشرت لها تدخل!! ياسمين عبست ملامحها وهي تشوف زينب داخله ...ما تطيقها لا من باب ولا من طاق!! ام ربيع اشرت لياسمين بعيونها تنكتم وتقفل حلقها حتى ما تعمل لرحيق مشكلة!! زينب ناظرت ام ربيع باستغراب ما عرفتها: مين هالحريم! رحيق توهقت بينهم: هذه خالتي ام ربيع..وهذه أختي قاطعتها زينب وهي تكمل عنها بنبرة ما ارتاحت لها رحيق: اختك ياسمين!! ياسمين ناظرت زينب بنظرات ترفع وما نطقت بحرف واحد...تقدمت زينب وسلمت ببرود ... جلست وهي تناظر رحيق: لو ادري انه عندك احد كان اتصلت فيك ياسمين ابتسمت باستفزاز: عاد الناس تغيرت في اختراع جوال تكلم فيه الناس قبل ما تطب عليهم!! زينب عقدت حواجبها بانفعال من كلامها: والله بيت ولدي وأدخله بأي وقت أبغى!! رحيق بهدوء نطقت: حياك الله يا خالتي بأي وقت!! ياسمين مطت شفتها بسخرية وناظرت ام ربيع الي همست لها بكلمات!! حصة عيونها طلعت وهي تناظر الشقة بحسد ...ليه رافض يطلعها بشقة لوحدها..وهذه الزفتة أخذ لها شقة!! زينب ناظرت ياسمين وهي مستغربه متغيره كثير ...وين جمالها واناقتها .. انسانه بسيطه وعادية...بس لسانها للحين ما تغير.. وبنغزة نطقت: ذول عيالك؟! ياسمين ناظرت عيالها وبعدها التفتت على زينب: ايه عيالي! زينب هزت رأسها باستغراب: كأنهم لون بشرتهم سمراء بزيادة الظاهر إنهم تأخروا ببطنك واستو قاطعتها ياسمين بتسخيف: هه هه ترى ما تضحك..ترى بشرتهم أزين من بشرة زوجك تراه قاطعتها زينب باندفاع: والله ابو ضاري بشرته صافية بس من الشغل تغيرت ام ربيع بمداخله: ترى كلنا خلقة ربنا ...ولون البشرة من عند ربنا ما احد يختارها ياسمين لوت بوزها : والله ما اعترضت ولا قلت شيء بس الي يطق الباب يسمع الجواب!! زينب حست بسخافتها ..ما تدري كيف تكلمت كذا..تبغى تحر ياسمين بأي شيء!! ياسمين اشرت على حصه: وهذه مين ما عرفتونا زينب ناظرتها وهي تنفش ريشها: هذه زوجة فارس حصة!! ياسمين بتعجب وهي رافعه حاجب بتقييم: غريب رازه وجهها هنا...حسب علمي ما تطيق رحيق وتغار منها قاطعتها حصه وهي تفتح فمها باستنكار: اغاااااار!! ياسمين عقدت حواجبها : صكي حلقك تراه وصل للارض...فاتحه فمك كذا وكأنه مصيدة ذبان!! رحيق تبغى تنفجر بالضحك على طريقة ياسمين بالكلام ...ما كانت كذا زمان ... تتذكر انها كانت جديه وما تضحك وبرستيج يعني تحسسك إنها شيء كبير... بس اذا استمرت كذا...رح تجيب لها مشاكل ..وبترقيع نطقت: ياسمين تحب المزح!! خالتي تشربين قاطعتها زينب قوة: جعلني أشرب السم... اسمعيني زين خلي أختك تحط لسانها بحلقها وتحترم الناس أفضل لها!! أم ربيع وقفت اختصار للمشاكل: يلا ياسمين قاطعتها ياسمين بابتسامة مستمتعه وهي تشوف ملامح زينب وحصه :اجلسي اجلسي زمان ما شفت خالتي ومشتاقه لها! كشت عليها زينب وبداخلها تردد مالت عليك يالرفله!! حصة تتوعد رحيق بداخلها اذا ما نقلت كل هالاحداث لفارس وبهرت ما تكون حصيص!! رحيق تحس بشحنات كهربائية بين ياسمين وخالتها..نطقت تغير الاجواء المتكهربة: كيف جدي يا خالتي؟! زينب تنهدت ما رح تخلي ياسمين تستفزها: عتبان عليك..انت ما تتصورين كم متعلق فيك يا رحيق ....دوم يقول رحيق ابنتي الي ما ولدت قاطعتها ياسمين وهي تنطق وتعمل نفسها تمسح دموعها: ياااا تأثرت من هالموقف ..ما توقعت جدي عنده احاسيس مرهفه! ضربت رحيق جبهتها بقلة حيلة الظاهر ياسمين ما رح ترسيها على بر!! زينب احتدت ملامحها: صدق سخيفة وما عندك سالفه ...ما ادري كيف رحيق أختك سبحان من خلق وفرق! ياسمين بايعيتها واهم شيء عندها تقهر زينب يا ما كانت باطه كبدها وجالسه لها بالبلعوم ..نطقت باستفزاز: ايه معلوم رح تختلف عاشت عندكم وغسلتم دماغها واستغليتوا انها وحيده وما عندها أحد ..لكن أبشرك أختي من اليوم وطالع ما رح أتركها ...رح أفتح عيونها المغمضه وأخليها تشوف الناس على حقيقتها...ويا ويله الي يقترب منها او يفكر يضرها ...رح اخليه يندم قاطعتها زينب بغضب: انت جالسه تهدديني؟! ياسمين وقفت بعد ما رفعت ضغط زينب: أنا الي عندي قلته!! يلا يا خالتي نرجع للبيت!! رحيق بهدوء وصلت ياسمين للباب وبتوعد نطقت: بعدين نتفاهم ضحكت ياسمين بصوت مرتفع وهي تطلع من البيت .... خلاص فارت اعصابها زينب من وقاحة هالمخلوقه وفوق هذا تضحك بهذا الشكل عليهم!! ناظرت رحيق الي قفلت الباب بهدوء وتقدمت بخطوات هادئة....نطقت زينب بهجوم: عاجبك كلام أختك ؟!! حصة نطقت: قلة أدب! قبل ما ترد رحيق نطقت زينب وهي تكلم حصه بقوة: انت انكتمي ولا تتدخلين بيننا... ابتسمت رحيق لا اراديا ملامح حصه بعد ما تفشلت!! زينب كملت كلامها وهي تناظر رحيق بجديه وحزم: اتمنى تقطعي علاقتك فيها ...جدك ما يبغى هالعلاقه قاطعتها رحيق ببرود وهي تجلس: علاقتي بياسمين هذا شيء خاص فيني وما احد يقرره عني...واختي ما رح أقطعها او ابعد عنها حتى لو توصل للطلاق ...انا ما لي علاقة بمشاكلك مع ياسمين ..فلا تحطيني بالنص بينكم...انت خالتها وافتصلوا ! زينب بداخلها حرة من ياسمين: وش هاللسان عليها...اسمعيني تبغين تزورينها ذاك الطريق ...اما تدخل بيت ولدي أنا أعارض وبشده ما ابغى اشوفها او أقابلها بوجهي رحيق ناظرت حصة الي فاتحه آذانها مثل اذان الفيل: نتكلم بعدين بهذا الموضوع يا خالتي!! انتبهت زينب على ابنة ياسمين جالسه تلعب مع نورة: وهذه ليه ما انقلعت مع امها؟!! رحيق بهدوء نطقت وهي تشوف رد فعل خالتها: شقة ياسمين جنب شقتي هنا!! فتحت عيونها زينب باستنكار: وش تقوليييييييين!!! *** *** *** *** جالس عند اهله من البارحة وصلته مجلدات شكاوي ...والحين من اول ما وصل وامه ما سكتت وحصه جالسه جنبها تؤيدها بالكلام!! وجود ياسمين قريب من بيتهم شيء ما يبغاه لانه ما يضمن عواقبه ....ياسمين الحين ارمله وش يضمن له ضاري ما يرجع يحوم حولها!! ما يدري رحيق تتحداه بوجود ياسمين والا وش سالفتها بالضبط؟!! وبهدوء نطق يقطع تدخلات اهله: يا يمه هذه انت قلتيها ساكنه جنب شقة رحيق...يعني العمارة مو باسمي حتى اروح واطردها!! اذا بغيت تزورين رحيق اتصلي بالجوال وتأكدي إنه أختها ما هي موجودة وانتهت السالفه زينب بقهر للحين بداخلها حرة: انا ما ابغى رحيق تختلط فيها ...رح تلعب برأسها وتشيشها علينا...تراها قالت كذا بالحرف العريض وهذه حصة تشهد!! هزت رأسها حصه بتأكيد بالرغم انها البارحه كله حطته بإذن فارس مع بعض البهارات: خالتي صادقه... وأكبر دليل ما قالت لأختها لو سمحت هذه خالتي العود ما اسمح لك تكلمينها كذا ..بالعكس كانت تضحك ومستانسه على كل هذا؟!! نطق بهدوء: اعتقد قلت لك البارحة هذا الموضوع ما يخصك...واصلا مين سمح لك تروحين للشقة؟! وبنبرة متوعدة نطق: رح نتكلم بهذا الموضوع! حصه حست نفسها تورطت ...نطقت بترقيع: خالتي طلبت مني ارافقها مستحيه تروح لوحدها؟! عقدت زينب حواجبها باستنكار...ونطقت بقوة: كذاااااابة!! انت الي التصقت فيني مثل لاصق الفئران حتى تروحين معي حصه ناظرتها بعتب: خالتيييييي زينب خزتها بقوة: تخلخلت عظامك قولي آمين!! اقول تكلمي زين بلاه هالدلع الماصخ تراها لاعت كبدي منك !! **** *** *** بعد الدوام توجهت لبيت جدها ..ما هي قليلة اصل حتى تنسى فضله عليها بعد الله سبحانه وتعالى....اليوم فارس راجع من السفر ودور حصة... متأكدة كل الي صار نقلته لفارس مع بهارات خاصه بحصيص... يعني متوقعه باكر يجيها قالب وجهه عليها وخاصه بعد ما يعرف إنه ياسمين ساكنه جنبها!! دخلت البيت بخطوات هادئة بس بداخلها تردد من هالخطوة... تخاف جدها يتكلم بكلام قاسي قطعت أفكارها وابتسمت لجدتها كالعادة جالسه بالصالة..اقتربت وسلمت على جدتها وجلست جنبها وهي تسألها عن حالها وأحوالها..... ام عبدالرحمن ابتسمت لها بمحبه: كيف الشقة مرتاحه يا ابنتي!! هزت رأسها بهدوء: الحمد لله ..وين جدي ام عبدالرحمن قبل ما ترد ...اشرت بعيونها وهي تشوفه دخل الصالة: هذا هو جاء! ما تدري حست بتوتر..كتمت نفسها ووقفت تسلم عليه...اقتربت منه بابتسامة: كيف حالك يا جدي!! سلم عليها برود وجلس بهدوء جنب زوجته... جلست رحيق وهي تناظر جدتها ..الي اعطتها اشارة بعيونها تسلك الموضوع وما تدقق!! عم الصمت المكان لوقت قصير..قطع الصمت أبو عبدالرحمن وهو يسأل: وين نورة!! رحيق ناظرته ما توقعت منه عالسؤال: عند ياسمين زم شفته بعدم رضا: مسرع ما اخذتم على بعض!! ام عبدالرحمن ناظرته بعتب: تراهم أخوات! ابو عبدالرحمن ارتفعت نبرة صوته: أخوات!! ترى بالاسم اخوات..الحين تذكرت ياسمين اختها؟! وينها عنها كل هالسنوات!! اسمعيني رحيق ابعدي عن ياسمين تراها ما هي من ثوبنا!! رحيق عقدت حواجبها باستنكار: جدي تراها أختي .. وأنا بعد ماني من ثوبكم!!! قاطعها بغضب: مسرع ما قلبت رأسك؟!! رحيق تنهدت والضيق اعتلى صدرها: ما احد قلب رأسي...بس أنا ما اشوف ياسمين بنفس النظره الي تشوفوها انتم...وما تجبروني أشوفها بنفس نظرتكم!! ياسمين انظلمت بحياتها وأنا مستحيل أتركها بعد ما لقيتها!! رفع حاجب بتعجب من تعلقها بياسمين: رحيق سكت وهو يشوف فارس دخل عليهم!! ناظرهم باستغراب وكأنه في مشكله بينهم...سلم على جده وجدته..بعدها سلم على رحيق وهو مستغرب من ملامحها واضح فيها الكدر...جلس جنبها وناظرهم : وش صاير؟!! ابو عبدالرحمن نطق بقرف: نتكلم عن ياسمين!! يعني بكل عين حامله قشها وجايه تجلس جنبكم... أنا ما هو عاجبني وجود ياسمين أبدا... فارس مط شفته بضيق من هالسالفة ...ياسمين صارت حديث الساعة ...نطق بهدوء: يا جدي للحين ما شفنا خيرها من شرها ...وياسمين غابت سنوات طويلة والحين س عندها عيال ما نقدر نحكم عليها ...اكيد انها تغيرت حست براحه ما توقعت يكون رده كذا ...سرعان ما انقبض قلبها لما نطق جدها بغضب: واضح التغير ...أمك تقول لسانها يوطوط وما تحشم لا كبير ولا صغير! رحيق بضيق نطقت: بس خالتي هي الي بدأت تضرب بالكلام وتناظر ياسمين بنظرات قاطعها ابو عبدالرحمن بقهر: الحين زينب غلطانه وياسمين الملاك البريء! تكلم يا فارس اشوفك ساكت!! فارس خلاص ضاق خلقه من هالسالفة ..نطق يقفل الموضوع وبالبيت يتفاهم مع رحيق: ما عندكم قهوة ولا شيء من اول ما دخلت وانتم تتشاجرون ابو عبدالرحمن خزه بقوة: تحب ما قلنا شيء أما إنك تقلد طريقتها الباردة ما هي حلوة أبدا!! سكت للحظات يستوعب كلام جده وبعدها ضحك بقوة على كلام جده! ناظرت رحيق فيهم ما فهمت كلام جدها وما تدري ليه ضحك فارس !! ام عبدالرحمن بهدوء: قهوي فارس يا رحيق!! هزت رأسها قهوت جدها وجدتها وبعدها فارس إلي للحين يضحك!! ابو عبدالرحمن زفر بضيق وهو ينطق: رح اسكت لهذه المهزلة لفترة قصيرة واشوف نهايتها ...لكن سكوتي ما رح يطول...انت ابنتي وما اقبل اشوف أحد يضرك وأنا ساكت تفهمين!! رحيق ناظرت جدها: جدي ترى ياسمين لو تجلس معها وتعرفها رح تحبها... إنسانة ثانية قاطعها وما راق له هالكلام:ما علينا باكر يذوب الثلج ويبان إلي تحته. بعد وقت إستأذن فارس وطلع مع رحيق يغير جو ..وبداخله سعادة وهو يعيش مع البنت الي دخلت عقله وقلبه بدون استئذان!! ***** ***** **** تمر الايام بهدوء ...مرتاحه نفسياً بقرب ياسمين إلي تقضي وقت طويل معها ...شعور إنها وحيدة اختفى من داخلها ..وحل مكانه شعور جميل بقربها من أختها .... عضت شفتها بألم لما حست بمغص ببطنها...ناظرت الملفات المتراكمة على مكتبها ...الشركة الحين بحالة استنفار ..ما تدري وش فيهم ..تدقيق وحالتهم حالة! تعبت من الشغل ما تدري هو الشغل كثير والا الحمل أتعبها!!! دخلت زميلتها بالشغل وهي تنطق: ابنة المدير بالشركة تلف وتتفقد فيها بعد وفاة أبوها صارت لها!! رحيق بلامبالاة بالموضوع: هذه الملفات متى قاطعتها وهي تقترب منها بهمس: وجهها لوحده يصيبك بالاكتئاب..استغفر الله! عقدت حواجبها رحيق بعدم فهم: كيف يعني؟! ردت وهي تتأكد ما في احد: شايفه نفسها على قلة سنع..تتعامل مع الموظفين وكأننا حيوانات...صدق إنها كلبة!! رحيق مطت شفتها: دام المدير هنا حتى لو كانت صاحبة الشركة باعتقادي ما لها تتدخل بالموظفين! ابتسمت بحسرة: يا بساطتك يا رحيق! حتى المدير الي استلم قبل فترة نفس طينتها... اصلا ما احد استلم إدارة الشركة وفيه خير!! الله يأخذ الحاجة إلي تخلينا نطرق هالباب.....بس اصبري خليني أحصل على خبرة كافيه وأقدم لشركة****** هناك أفضل بكثير ومعاملتهم راقيه! مطت رحيق شفتها بسخريه تتكلم عن شركة أبو ضاري...مالت عليها من شركة!! التفتت الموظفه برعب لما وصلها صوتها الغاضب:ما شاء الله فاتحين الشركة لطق الحنك! ناظرتها الموظفه بارتباك: أنا أنا كنت أسألها أشرت لها بيدها بتكبر حتى تسكت والتفتت على رحيق الي ما كلفت نفسها تناظرها...نطقت بترفع: انت موظفه هنا! ناظرتها رحيق بازدراء .. يا سخافة هالسؤال ..وببرود نطقت: ما ادري عنك نمت وصحيت لقيت نفسي هنا والملفات على المكتب قدامي!! فتحت عيونها باستنكار ..ما احد من الموظفين يتجرأ يرد عليها وهذه تتمسخر عليها وتحقرها بهذه الطريقة: رح تندمين على طريقتك الوقحة ...حتى تتعلمين كيف تتكلمين مع الناس إلي اعلى منك قاطعتها رحيق بلامبالاة: في مراكز تعقد دورات لتعليم أمثالك كيف تتكلم مع الناس بإحترام وتتعامل مع الموظفين بلباقة لأنه للأسف أسلوبك همجي جدا فتحت الموظفه عيونها باستنكار من رحيق...اكيد انها اليوم مفصوله!! نار تغلي بداخلها من وقاحة هالموظفه...ما رح تخليها تستفزها وبقوة نطقت وهي تناظر مرافقاتها: هذه الشرشوحه مين وظفها بشركتي!! أنا عممت من قبل ما يتوظف بشركتي الا بنات أنيقات وجميلات رحيق ضحكت بسخرية: ناظري نفسك بالأول بالمراية وبعدها تعالي قولي هالكلام!! خلاص وصلت حدها من وقاحتها: رح تندمين على كلامك...ناظرت مرافقتها بأمر: خلي الاستاذ بدر يتصرف معها على قلة أدبها ! أسندت ظهرها رحيق للكرسي ببرود ولا كأنه الموضوع يهمها ...ورجعت تناظر بالملفات ببرود تقدمت زميلتها منها بعد ما طلعت صاحبة الشركة من المكتب: انت مجنونه؟! والله رح يفصلونك؟! رحيق ما هي مهتمه: بالناقص ...في غيرهم ألف شركة!! فتحت الموظفه عيونها باستنكار برود هالمخلوقه ما طبيعي....ما تدري كيف تفكر!! *** *** *** ياسمين تشرب عصير وهي تسمع لرحيق بابتسامه...ام ربيع بانتقاد: مالك حق بكلامك ..يعني هي صاحبة الشركة ياسمين بتأييد: إلا عين الصواب عملت...خليها تعرف نفسها هالحشرة! ولما رحت لبدر وش قال لك؟! ضحكت رحيق بغمزه: اعطوني إنذار وخصم من راتبي!! ياسمين ابتسمت بروقان: اهم شيء انك طلعت حرتك فيها وبطيتي كبدها.. رحيق توسعت ابتسامتها: أعجبك! لو شفتيها انقهرت وانجلطت مني! وقالت لي وحده من الموظفات إنها قالت لبدر حتى يفصلني من الشركة...بس رفض يقول ما يفرط فيني...الشركة بحاجتي! ضربتها ياسمين بخفيف على ظهرها: والله ما عرفتك! الظاهر خبث ودهاء منصور ورثك إياه!! رحيق بنظرة عتب: الله يرحمه ويحسن إليه!! ياسمين بضيق : الله يرحم الجميع!! ام ربيع بتساؤل: اليوم رايحه لبيت خالتك؟! هزت رحيق رأسها : ايه فارس أصر أكون متواجده هناك!! ياسمين لوت بوزها: زينبووووو يا حبها للتبجح ...كم شهر صار لها حصه والده ....يعني وكأنه ما احد عنده أحفاد غيرها! رحيق بلامبالاة: هي أجلتها لوقت يتحسن وضع الاولاد بما انهم جلسوا فترة بالخداج... ياسمين تويعت ابتسامتها وهي تسأل:بالله وش شعورك وانت رايحه لضرتك الي ولدت؟! ام ربيع بابتسامة: انت وش عليك منها؟!! رحيق تثاوبت بنعاس: لو يطلع بيدي أنام الحين ...الدوام هلاااااك!! ياسمين تناظر ساعتها: انا قرب وقت دوامي ...انتبهوا على العيال!! رحيق بكسل: افكر اترك الشركه واشتغل مثلك على الاقل ما اصحى من الصبح ..الدوام المسائي أحلى! عبست ياسمين ملامحها بقرف: وش تبغين بوجوه الحريم الي تغث ...بالله تخيلي اغلب الزبائن مثل حصيص يتكلمون ..وش رح تصير بمراراتك!! ام ربيع هزت راسها بأسف: استغفر الله..انت ما ترتاحين الا لما تحشين بخلق الله!! ياسمين ابتسمت ؛ تدري الانسان بتمر عليه فترة يحس نفسه يبغى يقطع الناس بأسنانه مو بس يحش فيهم!! تحسين بداخلك شيءيغلي قاطعتها رحيق بابتسامة:اقول قومي جهزي نفسك للشغل أفضل لك!! *** *** *** اقتربت من بيت خالتها بمفردها ...تركت نورة عند ام ربيع ... زفرت بضيق ما تحب تدخل هالبيت ما ترتاح فيه أبدا!! ناظرت جوالها الي وصلته رساله من فارس يؤكد عليها الحضور!! زمت شفتها بضجر ما تبغى تشوف حصيص وصيته!! التقت بفارس عند الباب الداخلي..ابتسم ابتسامه عريضه وهو ينطق: اقول وش فيه المكان منور! ردت بضجر: الله يسامحك رفع حاجب باستغراب: وش صاير؟! رحيق بملل: ترى والله ما لي خلق مجاملات ...نعسانه وأبغى أنام قاطعها بحزم: هذا بيت حماك وأي مناسبة تصير لزوم تكونين موجوده ..هذه هي الأصول!! مطت شفتها بضجر: ما رح أتأخر لأني تعبانه قاطعها وهو يمسك يدها ويدخل للداخل: انت جالبه الشقى لعمرك ..اجلسي في بيتك معززة ومكرمه! رحيق بهدوء تقطع هالموضوع: مرتاحه بشغلي وما رح اتركه! هز رأسه بهدوء: طيب نشوف آخر الشغل..المهم انتظريني نرجع للبيت مع بعض خاطري أتمشى معك بالشارع قاطعتهم زينب وهي تسأل: علامك تأخرت؟! رحيق بهدوء: ما تأخرت فارس تنهد وهو يناظرها تكلم أمه ...نفسه يصرخ بأعلى صوته ويقول أحبها يا عالم ... كتم مشاعره وتوجه عند الرجال وهو ينبه على رحيق تنتظره!! كالعادة دائما تشعر بالملل هنا...ناظرت صيته الي تضرب بالكلام: أهم شيء حصنوا عيال فارس من العين!! . حصة نطقت بابتسامة وهي تناظر ولدها بحضن صيته والثاني بحضن زينب: الحمد لله أحافظ على الاذكار هذه الايام يا كثر الحاسدين!! صدت عنهم بضجر....حست إنها تبغى الحمام...لأنها بالاشهر الاخيرة تحس ما تقدر تتأخر عن الحمام...تحاول تلهي نفسها ...بس أكثر من كذا ما تقدر تحبس نفسها ... أشرت لسيرين باحراج حتى تقترب منها..اقتربت سيرين وسألت باستغراب: وش تبغين ؟! رحيق بخفوت: ابغى الحمام! ابتسمت سيرين بخفه: وأنا على بالي صار شيء!! تعالي!! تحركت خارج المجلس مع سيرين.. وقفت سيرين لما دخل ضاري: تعالي سيرين!! سيرين نطقت بخفوت: غرفتي تعرفينها فوق رحيق ما تبغى تتجول البيت بمفردها...نطقت وهي ماسكه نفسها بصعوبه:انتظرك هنا!! هزت رأسها سيرين وتوجهت للمطبخ بعد ما وقفت مع ضاري لثواني!! طلعت حصة من المجلس وناظرت رحيق وهي واقفه وبانتقاد: وش فيك واقفه هنا!! رحيق ما لها خلق لها تجاهلتها وهي تدعي بقلبها ما تتأخر سيرين!! عضت على شفتها بقوة لما تجاوزتها حصه وغابت عن عينها!! حست إنها ما تقدر تتحمل أكثر من كذا...وبسرعة توجهت لغرفة سيرين!! بعد وقت طويل طلعت من الحمام ما لحقت على نفسها ...تحس بالخزي... تبغى تبكي من هالموقف المحرج ..ما تدري وش تعمل الحين ...لا والمشكلة فارس قال لها تنتظره!! ناظرت غرفة سيرين رح تستعير منها ملابس تمشي امورها فيها!!! ولما تنزل تخبرها! فتحت الخزانه وهي تبحث عن اي شيء يناسبها ...حست يدها تيبست لما انفتح الباب على مصرعه ونطقت حصه باتهام: انت وش قاعدة تعملين؟!! غمضت رحيق عيونها لثواني وكأنه ينقصها حصه...ناظرت سيرين الي رافعه حاجب باستغراب: رحيق حصة ما صدقت تلقى عليها شيء وبنبرة عاليه: انت ما تستحين على وجهك تفتشين بالغرفه اعترفي وش تبغين تسرقين؟! تحس حطت نفسها بموقف محرج بكلا الحالتين موقفها محرج!! وش تبرر وهم شافوها وهي تفتش بالخزانة..وبنفس الوقت ما تبغى تفضح نفسها قدام حصه...اخذت نفس ونطقت بهدوء: ممكن تطلعين برا وتتركيني أنا وسيرين لوحدنا!! حصه بردح: ايه تبغين تستفردين بذي الضعيفه وتضحكين عليها بكلمتين ..لكن انا الحين رح أعلمك كيف أتصرف.... طلعت برا الغرفة بعجلة ... رحيق ناظرت سيرين وبتردد نطقت: قفلي الباب بالمفتاح وتعالي!! سيرين قفلت الباب وتقدمت منها تبغى تبرير لتصرفها!! رحيق بحرج وهي ترجع تفتش بالخزانه: أبغى ملابس سيرين رفعت حاجب باستغراب: ليه؟ رحيق وهي تحس بالخزي والحرج: مالحقت أدخل على الحمام قاطعتها سيرين بتفهم وهي تشوف ملامح رحيق المنحرحه:الحين اعطيك ملابس! رحيق وهي تبلع العبرة: بسرعة قبل ما ترجع ذيك الفزاعة.. بوقت قياسي بدلت رحيق ملابس ..وضعت ملابسها بكيس وبحرج نطقت:سيرين لا تخبرين أحد سيرين حاسه بحرجها: قلت لك لا تنتظريني!! قبل ما ترد انطرق الباب بقوة ..رحيق بتوهق:وين احط كيس ملابسي! سيرين اخذته منها بسرعه: خلاص احطهم بالزبالة!! رحيق سحبت الكيس تخاف احد يشوفه وتنفضح وبسرعه اخذت منها الكيس ودفته تحت العباية!! فتحت الباب سيرين وتفاجأت من الموجودين!! انتهى البارت...انتظروني يوم الجمعة بإذن الله..دمتم بخير 🌹 | ||||
|  |
|
16-03-22, 02:34 PM
| #878 | ||||
| فصل حلو رائع ياسمين طالعه لخالتها زينب ما فيها عرق هندي ما عندها مجاملات بتدج الحكي دج . اتفاجأت انهم بيعرفوا انو ضاري اللي بلاحق ياسمين ومع هيك رفضوا الزواج . ليش اسماء تطلع اشاعات على بنتها معقول حتى تبعدها عن ضاري رغم انو كان عادي عندها زواج رحيق من فارس ما اعترضت او حاولت تمنع هالشي . وكمان لما تزوج فارس وضاري زوجوهم بنات من نفس نوعيه باسمين قبل ما تتغير الموضوع في إنه اتمنى تطلع .... ولا اقول بلاش اتمنى خلاص حتى يصير هالشي اللي في بالي لازم اظل ساكته منو نضرب وننسف بيه عده عصافير مره وحده ونشمت شماته فيهم احنا ورحيق . احس رحيق مظلومه في هالروايه حتى لو اتعدل وضعها وهي وفارس وعرفت انو بحبها من زمان وجود حصه اكبر ظلم سواء الها او لحصه بغض النظر انو صعب الواحد يتعاطف مع حصه تستاهل لانها خبيثه لكن رحيق كمان ظلمت . ما في هيك شي يطير حصه من هالروايه عادي ما بنزعل ولا بنقول انظلمت هالحربايه . | ||||
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
Wwwwww 
مبدعة 
العرض العادي
