18-03-22, 02:24 PM
| #882 | ||||
 
|  اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|  |
|
19-03-22, 12:07 AM
| #884 | ||||
 
| تسجيل دخووووول اتمنى البارت يجي الحين مايتأخر لبكره 💔 ماادري ليش احسن الموقف حق حصة بيرجع لصالح رحيق وشيرين بتدافع عنها وكمان عجوز النار صيته لقيتها فرصه 😅 تخرج اللي بقلبها على رحيق الله يعينها هههههه | ||||
|
| |
|
19-03-22, 12:17 AM
| #885 | ||||
 
| بارت ٣٥ قبل ما ترد انطرق الباب بقوة ..رحيق بتوهق:وين احط كيس ملابسي! سيرين اخذته منها بسرعه: خلاص احطهم بالزبالة!! رحيق سحبت الكيس تخاف احد يشوفه وتنفضح وبسرعه اخذت منها الكيس ودفته تحت العباية!! فتحت الباب سيرين وتفاجأت من الموجودين!! صيته بهجوم:انت يالسروق ما تستحين على وجهك سيرين قاطعتها بدفاع: جدتي انا طلبت منها تنزل لي غرض من خزانتي وهي نازلة!! حصة باتهام رفعت يدها: كذابه جالسه تغطين عليها ... لأنك لما طلعت معي كنت مستغربه من تأخيرها وانصدمت مثلي لما مسكناها تفتش بالخزانة!! كتمت رحيق ضيقها ... وكأنه ينقصها حصة...نطقت ببرود وهي تبغى تطلع من الغرفه: ابنة خالتي وابغى أسرقها وانتم وش دخلكم دام إنها راضيه!! زينب ناظرت سيرين الصمت يخيم عليها وحصه تتكلم بكل ثقه!! هذا الي كان خايف منه فارس وصار ...وش لها حتى تفتش بخزانة سيرين وبكل قوة عين تتكلم كذا!! وش ترقع لها الحين قدام حماتها؟!! بغت تطلع رحيق بس مسكتها يد صيته : انتظري! وبصرامه تابعت كلامها بتحقيق: وش كنت تعملين بخزانة سيرين؟؟ رحيق ناظرت صيته بازدراء عمرها ما حبتها ... وبنبرة غير مباليه نطقت: جاية أسرقها! زينب بغضب نطقت: رحيق تكلمي عدل!! رحيق ناظرت صيته إلي ناظرت رحيق باحتقار وهي تتكلم: ابنة أسماء وش نرتجي منها ..قلت لكم دوم قفلوا الابواب لما تكون هنا!! بس ما احد يسمع كلامي!! الحين رح أتصل بزوجك حتى يوقفك عند حدك! رحيق تحس موقفها لا تحسد عليها ..وكلام صيته أشعل النار بقلبها ...ما تدري هذه الحرمه ليه دوم تدور الزلة عليها ...رفعت يدها بتهديد وهي تنطق بغضب خلاص اكثر من كذا ما رح تتحملها: انت بالذات انكتمي أحسن ما أهف وجهك بيدي وأعلمك قدرك يا عجوز النار!! زينب نزلت يد رحيق بقوة وهي تشوفها لحظات وتضرب صيته ...وبنبره مقهورة من تماديها نطقت: انت انجنيتي؟! ترفعين يدك على خالتي قاطعتها صيته بقهر : اتركيها اتركيها قليلة الأدب ابنة منصور قاطعتها رحيق وهي تدفعها عن طريقها بقرف: انقلعي من وجهي! اسندت زينب حماتها قبل ما تقع على الارض ...وناظرت رحيق لما تركتهم وغادرت المكان!! حصه بانفعال: وقحه كيف تعمل كذا...لزوم نمسكها نشوف وش سرقت!! زينب بغضب نطقت: خلاص يا حصه...انثبري مكانك...ما ابغى السالفه تطلع من هنا .. ويا ويلك اذا وصلت فارس ام فيصل بغضب وقهر نطقت: تبغين تتسترين عليها لأنها ابنة أختك ...لكن والله ما أسكت لها واذا ما اخذوا لي حقي منها الا أطلع عيونها بيديني! ابتسمت حصه براحه بعد كلام صيته .وخاصه لما مسكت صيته الجوال ورفعته تتصل ما تدري مع مين!! *** *** *** طلعت من البيت وهي شادة على قبضة يدها ...للحين نفسها تسددها بوجه صيته وتخلص منها... كل شكها كان بمحله يخافون تسرقهم....أخذت نفس عميق وهي تحس بالاختناق.... وقفت على جنب الطريق وهي ماسكه دموعها بصعوبة...غبية الي سمعت كلامه وحضرت هالزفت ...قهروها بهذا الإتهام ...رجعت للبيت وقفلت الباب بشويش ما تبغى ياسمين تحس عليها ... جلست على الكنبة بتعب ..رمت الشالة على جنبها وهي تحس بالاختناق ....حسبي الله عليك يا صيته ...ما تدري ليه كل هالكره ؟!! عضت على أصبعها من شدة الغيض والقهر...وللحين ما شفت غليلها بحصه ....غبية المفروض ذبحتهم بيدينها ..... بداخلها نار مشتلعه ما تدري كيف تطفيها!! توجهت للغرفه وهي تجر خطواتها بتعب ...رح تقفل الباب ما تبغى اي تصادم بينها وبين فارس لأنها متأكدة ما رح تمسك لسانها..ارسلت لياسمين تخلي نورة تنام عندها...قفلت جوالها.. ... بدلت ملابسها واستلقت على السرير بتعب...غمضت عيونها تريح أعصابها....سرعان ما نقزت لما حاول يفتح الباب ...مثل ما توقعت ...طرق الباب وهو ينطق بنبرة هادئة: رحيق افتحي الباب ما رح ترد عليه ما هي مجنونه حتى تفتحه له .... يحس ماسك أعصابه من تصرفاتها ...مل وهو يطرق الباب ..نطق بوعيد: افتحي الباب احسن ما اكسره! نقزت بخوف لما ضرب الباب بكل قوته...ونطق بتوعد: يصير خير!! تنهدت براحه بعد ما سمعت صوت الباب الخارجي...بس ما تضمنه أبدا ما رح تطلع من الغرفه لأنها تعرفه لما يعصب يكون عبارة عن ثور هائج!! **** *** *** كان داخل عند الرجال ..اتصلت فيه جدته وطلبت منه يطلع لها لغرفة سيرين ضروري ..هبط قلبه من اتصالها ما يدري وش تبغى....من كل قلبه تمنى تكون رحيق ما هي بالسالفة. ....ما يبغى مشاكل والقال والقيل!! تبخرت كل امنياته لما بدأت جدته تسرد الأحداث وهي تبكي .... غمض عيون يمسك أعصابه من تصرفات رحيق .....ناظر جدته الي تبكي وتشكي عنها ....وين عايشين حتى ترفع يدها تضرب جدته وتدفعها وتشتمها!! اخخخخ منك يا رحيق!! والي كسر ظهره سالفة السرقة ...كتم ضيقه وهو ينطق بانزعاج: انت يا جدتي وش طلعك هنا زينب بضيق نطقت: رحيق طلعت للحمام وتأخرت ...ولما تأخرت طلعت سيرين وحصه يفقدونها ...ولما فتحوا الباب عليها ...لقوها تفتش بخزانه سيرين حصة نفخت نفسها بإعجاب إنها مسكتها بالجرم المشهود!! زينب تابعت كلامها:، ولما شافوها كذا جاءت حصةوخبرتنا سكتت زينب وهي تشوف يد فارس استقرت على خد حصه ...وما شفى غليله كف واحد... رجع ضربها مرة ثانية وهو ينطق بغضب: وانت وش عليك منها !! لو تسرق البيت كله انت وش دخلك فيها!! وش علاقتك حتى تدخلين جدتي وأمي بالسالفة زينب أبعدت فارس عن حصه وهي تشوفه يبغى يضربها من جديد: اتركها!! فارس بغضب : الظاهر إني تركت لك الحبل وتماديت ...أقسم بالله يا حصة لو تكررين هالسالفة ما يحصل لك خير ..تفهمين! أنا إلي ارسلت لرحيق رسالةتجيب لي الشاحن من غرفة سيرين...تقومين تلبسينها سالفه وتتسببي بمشكلة بينها وبين جدتي!! توجهت حصه لجناحها وهي تبكي بقوة بعد ما ضربها قدامهم... صيته وهي تمسح دموعها: ايه ايه جاي تستقوي على ذي الضعيفة ...فوق ما كشفت حقيقتها كذا تجازيها ...كذا تعاملها !! بدل ما تفرد عضلاتك على هذه الضعيفه روح شوف إلي ضربتني ومسحت فيني الأرض...وفوق هذا تبغى تسرق اختك الحين رح أتصل بأبوك وارجع لبيتي بعد ما انمسحت بكرامتي الأرض زينب بضيق ما تبغى السالفه تكبر لأنها رحيق الي رح تتضرر وبمحاولة نطقت: يا خالتي لا تكبرينها وتزيد المشاكل.. وأنا عن رحيق ما رح تكررها بس ما نبغى فضائح! فارس زفر بضيق وهو ينطق: رح تيجي وتعتذر منك رحيق .. وبنفس الوقت رح اسمع من رحيق و اذا احد منكم غلط على رحيق ولو بنظره رح يعتذر منها مين ما كان...ومثل ما قالت امي ما نبغى السالفه تكبر! صيته بتوعد:حنا ما غلطنا عليها .. من هنا لباكر اذا ما اعتذرت ورب الكعبه ما اسكت لها!! زفر بضيق وناظر سيرين الي واقفه تناظر مرعوبة...وزاد رعبها لما ناظرها بقوة وهو ينطق: انت شفت رحيق وهي تفتش بالخزانة؟ تحس لسانها اصابه الخرس ملامحه مخيفه....غمضت عيونها برعب لما نطق بنفاذ صبر: جاوبي شفتيها هزت رأسها وما قدرت تنطق حرف واحد وتوضح السالفة وخاصة لما قرب بغى يضربها!! تكورت على نفسها وهي تبكي ...وحمدت ربها انها امها وقفت حاجز بينهم ....وهو ينطق بغضب: يا سوء الظن عندكم ...ما قدرت تسأليها مباشرة حكمتم عليها!! بداخله نيران...يبغى احد يشهد ويقول كل هالكلام كذب..رحيق ما عملت كذا!! رح يروح يتفاهم معها ويسمع منها...بالرغم الكل شهد على نفس الكلام...بس في شيء داخله يبغى يسمع منها!! حاول يفتح باب الغرفة بس مقفل ...طرق الباب وهو يطلب منها تفتح ومع ذلك اعطته طاف وما ردت ...يحس النيران بدأت تشتعل بداخله ما هوبزر حتى تتجاهله كذا!! رح تندم على تصرفها ....قرر يتركها الحين لأنه إذا شافها ما يضمن نفسه يذبحها...!! *** *** *** عندها دوام وضروري تواجدها بالشركه...خايفه تفتح الباب وتلقاه بوجهها!! جهزت نفسها سمت بالله وفتحت الباب بشويش ... تنهدت براحه ما هو موجود ...وبحركات سريعه طلعت من الشقه..وهي بحالة ترقب تخاف تشوفه بوجهها..ما ارتاحت الا لما ركبت بسيارة الاجرة وحركت السيارة بعيد عن المكان...تنفست بعمق مهما هربت المواجهة لا بد منها!! دخلت الشركة وحاولت تشغل نفسها بالملفات بس عقلها كل شوي يقفز للسالفة! لحظة ليه هي خايفه من المواجهة؟! هي ما غلطت صيته تستحق الي وصلها ...هي المفروض تزعل على كلامهم...يتهمونها بالسرقه...!! غمضت عيونها للحظات وهي تفكر كيف تقلب الطاوله عليهم ... قاطع عليها دخول رئيس القسم وهو ينطق بهدوء: السلام عليكم ناظرته رحيق وهي ترد السلام بهدوء! نطق وهو يمد لها بأوراق: هذه الأوراق مستعجلة يا ليت تجهزيهم وترسليهم لمكتبي قبل نهاية الدوام!! هزت رأسها وهي تنطق بهدوء: ان شاء الله أستاذ!! نزلت نظرها تتصفح الورق بعد خروجه ... وكأنه عقلها ناقصه هالأوراق!! زفرت بضجر لزوم تفصل ما بين الشغل والمشاكل العائلية! همست بقهر: نذر علي اذا ماتت صيته إلا أورزع حلوان بهذه المناسبة!! ** ** *** ** حصة وهي جالسه تمسح دموعها بقهر: شفت يا خالتي بعينك؟! ضربني وكأني أنا المذنبة! وفوق هذا مقاطعني وما يكلمني... زينب بضيق من تصرف فارس ما له داعي يضربها قدامهم كذا ...وبغى يضرب اخته بعد ..ما لقت مبرر لتصرفه ...وبهدوء نطقت: كان معصب لا تلومينه!! انت المفروض تتعودين وتقصرين لسانك وانت تعرفين فارس اكره ما عليه القيل والقال!! صيته بقهر: شفت قلت لك ما رح تيجي وتعتذر! زينب ناظرتها: يا خالتي اكيد الحين بالدوام ... أنا كلمت فارس الصبح يقول للحين ما شافها ولا كلمها! حصه بقهر: اخخخ يالقهر يعني هي المذنبة وللحين ما كلمها وأنا وأنا يضربني!! ورجعت تبكي من جديد!! صيته لوت بوزها بقهر من فارس: ولا قدر انها جايبه له توأم اولاد!! حصه وهي تمسح دموعها: كذا حظ الملايح يا خالتي!! صيته بمواساة: لا تهتمي يصير خير!! *** *** *** دخلت الشقة وهي تحمد ربها سيارته ما هي موجودة يمكن للحين بعده بالدوام! فتحت باب الشقة ...قفلت الباب وتوجهت لغرفتها تبدل وبعدها تروح تتفقد نورة ...حست الدم نشف بعروقها لما شافت فارس جالس على السرير ... وكأنه جالس ينتظرها!! من صدمتها نسيت ترد السلام ..زم شفته وبنبره ما ريحتها: وعليكم السلام! وضعت أغراضها على السرير والسكون يحيط فيها ...كتم ضيقه وهو يفكر من وين يبدأ...نطق وهو يناظرها بتقييم: البارحة ليه ما فتحت الباب؟! ناظرته للحظات ...تحس قلبها يدق بقوة ...نظراته مخيفه...حاولت تظهر بمظهر القوية ..وبنبرة هادئة واثقه نطقت: أفتحه علشان تضربني! مط شفته بتعجب من إجابتها.. وكأنها تعترف إنها مذنبه: وليه أضربك؟! انت عامله شيء! مطت شفتها بسخرية: يعني تقنعني إذاعة ***** ما نقلوا لك الأخبار قاطعها بتحذير: بدون مسخرة وتكلمي عدل أفضل لك!! وش هالتصرفات البزرانيه مع جدتي!! حاولت بصعوبه تحافظ على اعصابها ..واسم صيته لوحده ينرفزها: أخذت الي تستحقه لأنها ما هي من البشر وما هي محترمه سنها قاطعها وهو يوقف وعيونه تقدح شرار: انت وبعدين معك ؟! تظنين إنها من جيلك حتى تغلطين عليها؟!! تراها بمقام جدتك حتى لو غلطت عليك تجاهليها قاطعته بقوة وهي مقهوره من موازينهم: ما شفتك قلت هالكلام لخالتي زينب لما دفت جدتي الهندية على الارض وطردتها...ليه ما قلت لها عجوز بمقام جدتك وتجاهليها! فتح عيونه باستنكار هذه الي رح تجلطه بكلامها...ما يدري كيف تقارن اهله بجدتها وبأسماء ..وبغضب نطق: كم مرة قلت لك لا تقارنين ذيك الحية بجدتي!! رحيق رجعت خطوة للخلف وهي تنطق بنفس القوة: ما فرقت عنها شيء لأنها جدتك مثل الثعبان تبث سمومها وما احد قادر يوقفها عن حدها!! وأنا أعيد وأكرر هذه المرة سكتت لها المرة الجاية وربي الا أكسر رأسها اذا جلست تقط علي كلام! قاطعها وهو يسحبها من كتفها لجهته بقوة ..وبفحيح نطق: انكتمي...ويا ويلك تتكلمين على جدتي بهذه الطريقة...والحين امشي قدامي رح تعتذرين لها دفته عنها وبغضب نطقت: والله لو اموت ما اعتذرت لأحد قاطعها بغضب: رحيق!! انت وبعدين معك؟!! لمتى أرقع خلفك ...في وحده عاقلة تضرب جدة زوجها؟! رحيق لا تجننيني وأنا للحين ماسك اعصابي بقوة...امشي خلينا نخلص من هالمشكلة قاطعته وهي تزفر بضيق: أنا آسفه ما رح اروح ... كرامتي ما اهدرها علشان جدتك...هم الي غلطوا علي .. واتهموني نطق وهو يغمض عيونه للحظات يمسك أعصابه: رحيق لا تكبري السالفة وامشي نحل الموضوع هناك تتواجهين معهم ونعرف الصادق من الكاذب قاطعته برفض وإصرار: بيت أهلك لو أموت ما دخلته ...حتى لو توصل للطلاق ما رح أتنازل أبدا...وبدون ما أواجه أحد أنا ضربت جدتك وشتمتها وكنت ابغى اسرق سيرين! قابض يده بقوة ما يسددها بنص وجهها...مستفزة بقوة ...بإمكانه يسحبها غصب عنها ...بس دام إنها كسرت كلمته رح يتصرف معها بطريقه ثانية.... سحب نفسه وطلع من المكان قبل ما يضربها!! ** ** ** ياسمين بعد العصر ناظرت رحيق الي جالسه من اول ما وصلت ولا نطقت بحرف واحد.. وباستغراب نطقت: وش فيك هاجدة!! رحيق أتعبها التفكير بالسالفه المفروض تصرفت بهدوء وما عملت مشكلة مع فارس...كلما تزين حياتهم يطلع لهم شيء ويخرب كل شيء...مطت شفتها بضيق وهي تناظر ياسمين تنتظر اجابتها: ما في شيء تعبانه!! ياسمين هزت رأسها بتفهم: ليه ما تروحين عند دكتورة وتكشفين على حملك وتتأكدين إنه كل شيء تمام! رحيق بلامبالاة: ما له داعي!! ام ربيع ابتسمت: لزوم تروحين يمكن تكونين حامل بتوأم مثل ضرتك!! رحيق ابتسمت بدون نفس: توأم مرة وحده!! ما عندنا بالعائلة توأم..حصة أمها شق التوأم! ياسمين بتفكير: تدرين احسن شيء التوأم تجيبين ثلاث اربعه مع بعض مرة وحده وترتاحين ١٠ سنوات!! يعني تتعبين مرة وحده!! رحيق بعبوس: وتظنين سهل تربين هالأعداد.. أنا نورة لوحدها وطلعت الشيب برأسي! ناظرت ياسمين نورة وهي مندمجه باللعب: والله أحسها ابنتك رحيق ناظرت نورة بابتسامة: ما اتصور حياتي بدونها ... وكأنها فعلا ابنتي!! ام ربيع باستفسار: فارس وين ؟! اليوم دورك؟! قاطعتها رحيق : عنده شغل... خليني ارجع يمكن يرجع باي لحظة! ام ربيع هزت رأسها وناظرت ياسمين الي نطقت بعد ما طلعت رحيق: اقص يدي اذا ما كان بينهم مشكلة!! *** *** *** واقفه عند الشباك وهي تناظر بيت ابو ضاري ...ناظرت الساعه وحده وللحين ما جاء! وش قصده من هذه الحركة؟! اكيد زعلان لأنها ما راحت تعتذر لعجوز النار...ندمت على تصرفها يمكن لو تكلمت بهدوء يكون افضل!! رجعت جلست بالصالة ومسكت الجوال ...فتحته بعد ما كان مغلق ...وصلها إشعار إنه في مكالمات فائته!! توقعت تكون ياسمين الي اتصلت فيها وهي بالشغل!! قفلت الجوال لما فتح الباب ودخل الشقة بهدوء....ناظرته لما تعداها ودخل الغرفه بدون ما ينطق حرف واحد!! يعني هي المفروض تزعل على اتهامهم لها بالسرقة!! أرخت رأسها على الكنبة بتعب ..كل يوم بعد يوم يزيد تعبها من الحمل.... تمددت على الكنبة افضل لها ...ما رح تروح للغرفة..لو يموت ما كلمته ورح يندم على تصرفه معها !! رفعت حاجب لما طلع من الغرفة وهو ينطق بأمر: جهزي لي عشاء رفعت حاجب وهي تحس نفسها مضغوطه وروحها معلقه بأنفها: وليه تكلمني كذا؟! صدق المثل ضربني وبكى وسبقني واشتكى! أنا قاطعها وهو يقترب منها والنار بداخله للحين ما طفأت: دام عليك النفس طيبه انكتمي لأني خلاص مليت منكم ومن مشاكلكم ردت بقهر: ما كأنها جدتك هي الي غلطت علي قاطعها وهو يصك على اسنانه: انت وش مشكلتك مع جدتي؟! حاطه دوبك من دوبها؟! ليه انت الوحيدة الي تتشاجر معها جدتي؟! ولا وحده من زوجات عيالها أو أحفادها تشاجرت معها الا انت؟! وش هالعداوة الي بينكم! نطقت بغل وحقد: أكرهها وما احبها ولا اطيق أشوف رقعة وجهها ..والا ذي بعد بتتحكم فيها؟! ناظرها والكره والحقد يشع من عيونها... يعرف كيف يداويها على لسانها الطويل عليه ...وبتصميم وحزم نطق وهو يرفع يده للأعلى : نذر علي نذر علي يا رحيق اذا جبت بنت إلا يكون اسمها صيته علشان تبقى مرارتك مفقوعه طول حياتك!! استفزها بكلامه هذه أخريتها تسمي ابنتها صيته...وبغضب نطقت: بأحلامك تسميها باسم عجوز النار..بأحلامك على جثتي! مط شفته باستفزاز: أنا ابوها وش يطلع بيدك تعملين! والحين تحركي اعملي عشاء قاطعته بقهر : جعل يدي الكسر اذا عملت لك سم الهاري! وتوجهت للغرفة بعد ضربت الباب بقوة...اخذت نفس وهي تحس نفسها رح تنفجر خلااااص! تمددت على السرير وهي تفكر بنذره رح تموت لو يسميها صيته...زفرت بضجر من اخلاقها قافله هالأيام !! ما تبغى تخرب بيتها ويعيش طفلها حياتها...تبغى حياة استقرار وراحه ..ما رح تخلي حصه وصيتة يتشمتون فيها!! رح تتركه الحين لوقت تهدأ النفوس وبعدها تتكلم معه!! ** ** ** مر أسبوعين ما شافته ولا كلمته واغراض البيت الظاهر ييجي وقت دوامها يحطهم ويطلع من الشقة!! الاسبوع الي طاف زارت بيت جدها ...وما قصر فيها جدها مسح فيها الأرض علشان صيته!! زفرت بضيق وناظرت جوالها يرن باسم جدها....نطقت بخفوت الله يستر..فتحت الخط وردت بهدوء: هلا جدي! نطق بجفاء: وينك؟! كتمت رحيق ضيقها: بالشركة قاطعها بعدم رضا: يا هالوظيفه الي انقلبت بعدها وتغيرت رفعت نظرها للسقف تصبر نفسها...تابع كلامه بهدوء: المهم اليوم أنا عازم الكل على المزرعة قاطعته بتوجس: مين الكل؟! رد بجديه: خالاتك وعيالهم وبيت ابو فيصل قاطعته بضيق حسب كلامه لما زارتهم الكل شاب عليها نار بسبب موقف صيته ليه تروح وتغث نفسها: ما ابغى اروح قاطعها بعصبيه من تصرفها: انكتمي...رح تروحين ورجلك فوق رأسك تفهمين!! نطقت بتبرير: يا جدي السالفه ما هي سالفة جكر وعناد بس أنا تعبانه وما لي حيل قاطعها بإصرار: اسمعيني زين أنا سكتت على تصرفاتك... انت ابنتي وما اسمح لك بهذه التصرفات الطائشة ..رح نجتمع ونحل هالخلاف بينكم ... رح أمرك بعد صلاة العصر كوني جاهزة!! لانت نبرته وهو يكمل كلامه: يا ابنتي والصلح خير!! كتمت قهرها من تسلط جدها ... وبنبرة ظهر فيها الضيق: إن شاء الله!! أنهت المكالمة واعتراها الضيق ... ما تدري وين فارس بالدوام والا بإجازة...ما له حس ولا خبر!! دفنت وجهها على مكتبها بتعب وكسل...نطقت بنبرة خافته " يا رب يكون الجنين ولد يا رب يا رب" كملت دوامها ورجعت للشقة تريح نفسها قبل العصر...قررت تترك نورة عند ياسمين ما لها حيل تبتلش فيها.... تمددت على السرير تنتظر العصر بخمول ...نهضت نفسها وهي تسمع آذان العصر ... جهزت نفسها وصلت العصر ...لبست عباية واسعه تحاول تخفي بطنها الي مع الايام يكبر بسرعه.... اقتربت من المرآة تناظر نفسها ...بشرتها شاحبه والهالات تحت عيونها واضحه .... لبست النقاب واخذت أغراضها وطلعت من الشقة ...طرقت شقة ياسمين ...فتحت الباب ودخلت وهي تكلم ياسمين الي متربعه بالصالة وتأكل شيبس: انا رح اطلع سكتت لما شافت نورة توجهت لها وبدأت تبكي تروح معها!! ضحكت ياسمين: وش يفكك منها!! رحيق بضيق نطقت: ما لي حيل أحملها ..اعرفها كسول ما تقبل تمشي!! ياسمين اقتربت وهي تحاول تأخذ نورة الي ملتصقة برحيق وتبكي بقوة ... زفرت رحيق بضجر: لحظة احضر لها أغراض!! زاد بكاء نورة لما طلعت رحيق ...اخذت اغراض لأختها ...ورجعت لشقة ياسمين ..ناظرت رحيق وهي للحين تبكي ... مسكت يدها بحنيه: تعالي! نورة وهي تبكي تبغاها تحملها!! ياسمين : تراها ما هي صغيره تتدلع عليك ...خليها تمشي لوحدها رحيق وهي تحملها: خليها تتدلل هالقمر! ياسمين كشت عليها: اقول انقلعي ترى بطيتي كبدي بتربيتك الفاشلة لهذه البنت! طنشتها رحيق وتوجهت للأسفل وهي متغلبه بالاغراض ومن حمل نورة!! اقتربت من السيارة وهي تشوف جدها دوبه وصل ...اقتربت من السيارة ... فتحت الباب الخلفي ...وضعت الاغراض وبعدها جلست وهي ترد السلام ..وهي تلهث بتعب! ابو عبدالرحمن بانتقاد: وليه حامله اختك؟! رحيق وهي تعدل جلستها بصعوبه: ما رضت تمشي!! ام عبدالرحمن بهدوء: انت حامل يا ابنتي وهذا يمكن يضر الجنين!! ابو عبدالرحمن وهو يحرك السيارة بهدوء وهو ينطق: توقعت تتركينها عند اختك رحيق وهي تمسح على شعر نورة الي جالسه جنبها: رفضت تجلس نورة عندهم ... ابو عبدالرحمن هز رأسه وهو يناظر نورة مستكينه بحضن رحيق..بهدوء نطق: مثل ما قلت لك يا رحيق ..لا تفشليني يا ابنتي ...وين ما تكون جدتك تكونين معها ...ولا تنسين رح تسلمين على ام فيصل وتبوسين على رأسها ... رحيق هزت رأسها بهدوء ونطقت: بس ما رح اعتذر لانها هي غلطت علي واتهمتني بالسرقة!! ابو عبدالرحمن بفقدان امل منها: رحيق لا تجننيني .. أنا كل الي يهمني الصلح بينكم تفهمين!! رحيق رفعت حاجب : واذا رمت علي كلام؟! ام عبدالرحمن التفتت عليها: ما رح ترمي بس انت خلي نيتك لله سبحانه وتعالى ..وانت تعرفين إنه الاعمال ما ترفع اذا كنت مقاطعه قاطعتها رحيق بهدوء: إن شاء الله!! بعد وقت دخل ابو عبدالرحمن المزرعه...زفرت رحيق بضيق...ما لها نفس تشوف أحد ...مرتاحه بشقتها مع اختها وخالتها وش تبغى بوجع الرأس!! نزلت نظرها لما شافت فارس اقترب من السيارة...فتح جهة جدته وهو يساعدها تنزل!! اخذت نفس عميق وهي تحس بالتوتر وقلبها يدق بقوة ...ما رح تنزل الحين ...رح تنتظره يدخل داخل!! لما ابتعد فتحت الباب ونزلت ونزلت أغراضها ... بدأت نورة تبكي تبغاها تحملها ...ابو عبدالرحمن وهو ينزل اغراضهم: لا تحملينها كافيها دلع! رحيق حملتها وهي ترد: خفيفه يا جدي ..احسن من صوت صراخها!! أبو عبدالرحمن أشر لها: ادخلي من ذاك الباب هزت رأسها وحملت اغراضها وتوجهت بخطوات هادئة ...وقفت عند الباب لما طلع فارس من الباب بدون ما يناظرها ولا كأنها موجوده! تكره فيه هذا الاسلوب لما يطنش..يعني هي المفروض هي الي تزعل ....هزت راسها بتوعد وهي تدخل للداخل!! دخلت وحده من الغرف وضعت اغراضها وقفلت الباب بالمفتاح ما لها نفس تشوف أحد!! وضعت نورة على السرير وهي تبكي وتفرك عيونها تبغى تنام!! رحيق بضيق وضعتها على رجولها وبدأت تهز فيها ....تحس ما عادت تقدر تفتح عيونها من النعاس..متعودة بعد الدوام تنام وتريح نفسها ....عدلت مكان نورة لما شافتها نامت ...ارتمت جنبها ودفنت نفسها تحت الغطاء ...تبغى بس تنام وتريح نفسها حتى تعرف تتصرف مع هالصلح العالمي!! ** ** ** واقف عند سيارة جده وبداخله نار مشتعله ...ولا حاولت تكلمه او ترسل له خلال الفترة الماضية.... زفر بضيق وهو يردد بداخله صدق عمره الحب ما فتح بيوت ... من ذاك اليوم ما كلمها ولا كلم حصة قاطعهم يمكن يتعدلوا ...حصة كل يوم تتصل وترسل رسائل بخلاف رحيق الي ما كلفت نفسها ترسل رساله!!! يعني وكأنها تقول له وجودك وعدمك واحد بحياتي...يقهره هذا الشعور... كل الي يتمناه يعيش معها بهدوء وسعادة بدون مشاكل ...ما يدري اذا كان أسلوبه غلط او لا ... وإلا هي اسلوبها غلط!! ناظر سيارة جده ابو فيصل لما وصل ...ردد بداخله وهو يتمنى تمر ايام المزرعة على خير بدون مشاكل!! سلم على جده بحفاوة ....وهو يسأله عن حاله واحواله! اقترب من جدته وسلم عليها ببرود... تضايقت وهي تشوف الزعل بعيونه..من ذاك اليوم زعلان منها ويسلم عليها من باب الواجب ...كل هذا لأنها تكلمت على رحيق واتهمتها بالسرقه ..وهي متأكدة انها وحده سراقه ...بس ما تدري ليه حفيدها ما يشوف أخطاء رحيق .... نطقت وهي تحاول ترجع المويه لمجاريها ما تحب تشوف بعيونه الزعل: فارس قاطعها وهو ينطق بجمود: تفضلي يا جدتي ابو فيصل بهدوء نطق: بعدين يا ام فيصل!! هزت رأسها وتوجهت للداخل...ابو فيصل اقترب من فارس ونطق بتأييد: ايوه كذا كون حازم مع هالحريم حتى يتعدلن ...فضحونا آخر هالعمر!! ابتسم فارس بدون نفس على كلام جدة..سرعان ما انمسحت الابتسامه من ثغره لما تابع جده كلامه: بس رحيق تصرفها أبدا ما عجبني ..وللحين زعلان عليها وكلامي يوصل لها!! ...يعني غلطوا عليها تكلمنا وخنا نتصرف نا هو تقوم تضرب ام فيصل...حنا وين عايشين؟! هز فارس راسه وما علق لما اقترب منهم احمد وبدأ بالكلام وهو يضحك على ضاري!! ** ** ** بعد المغرب كل أطراف المشكلة مجتمعين باستثناء رحيق للحين تغط بنوم عميق ....تحس بانزعاج وهي تسمع رنين الجوال...نهضت بعبوس وهي تنتظر المكان كله ظلام ... بغت ترجع تنام لما وقف الجوال عن الرنين ...بس سرعان ما نهضت لما رجع يرن من جديد .... فتحت خط وهي تنطق بصوت ناعس: هلا جدي....لا نائمه....الحين صحيت....يا ربي يعني الناس بعد الدوام تنام... طيب الحين اصلي وانزل...ان شاء الله...قفلت الخط بضجر من جدها ومن إصراره!! حكت شعرها بعبوس وهي تحس بعيونها ملح مب قادرة تفتح عيونها!! وقفت وهي تناظر المكان ظلام ...كيف تعرف مكان الاناره...استعانت بضوء الجوال .... بعدها توجهت للحمام تجهز نفسها للصلاة...ما تدري اليوم حست صلاتها طويله وكأنها قرأت سورة طويله حتى تتأخر بالنزول!! زمت شفتها بضيق الحين والا بعدين رح تنزل...رح تروح لتأدية هالواجب وترجع تنام أفضل لها!! ناظرت نورة الي صحيت وهي تفرك عيونها...تقدمت منها اخذتها للحمام غسلت لها وبدلت لها وطلعت من الغرفه بخطوات حذرة!! سألت الشغاله الي خبرتهاتتوجه لإحدى الغرف ...زفرت بضجر من تحكم جدها.... اقتربت من المجلس مفتوح ...حست بالتردد من الدخول...بس صوت جدها العالي الي شافها وهو ينطق: تعالي رحيق!! شدت على اسنانها من الغيض...اخذت نفس عميق وهي تدخل بخطوات هادئة وواثقه!! حمدت ربها مو الكل موجود!! اشرت لها ام عبدالرحمن بعيونها تسلم على الموجودين!! بس صوت ابو عبدالرحمن وقفها وهو ينطق بصوت قوي: وهذه رحيق قدامكم!! الحين ابغى اعرف سبب هالعداوة بينكم الثلاثة؟! لمتى الناس تسمع فينا وننشر غسلينا للعالم!! تكلمي يا ام فيصل حنا نسمعك...ويكون بعلمكم ما رح نطلع من هالمجلس الا لما ينزل الحطب من راسكم!! ام فيصل بضيق نطقت بدون ما تناظر رحيق : انا يا ابو عبدالرحمن بعمر جدتها ترفع يدها بوجهي وتشتمني حتى لو غلطت عليها هذا ما يبرر لها إنها تدفعني لولا ربنا يسر ام ضاري والا كنت رح أسقط على الارض رحيق ناظرتها بعبوس وبداخلها" ليتك وقعت وافتكينا من خشتك" ابو عبدالرحمن اشر لرحيق: ارتاحي يا رحيق!! جلست على طرف المجلس وهي تسمع هالمهزله بملل!! ابو فيصل بزعل وهو يكلم رحيق: ما هقيتها منك يا رحيق ... والله بالبدايه ما صدقت لما سمعت هالكلام ..ما توقعت تصدر منك هالتصرفات!! رحيق ناظرت ابو فيصل وبنبرة هادئة كعادتها نطقت: حقك علي يا عم ..وإن كان تصرفي غلط أنا أعتذر والحين أعتذر من ام فيصل...بس يقولون يا عم وش دخلك يا مسمار الجدار ..قال من كثر الطرق... وأنا كل شيء بدر مني ما كنت بوعي... أنا تصرفت بعد هجومهم علي واتهامهم لي إني جالس أسرق غرفة سيرين! ما شفتهم لما وقفوا بوجهي وسدوا علي الطريق وهم يرمون علي التهم والشتائم ويبغون يفتشوني على اني حراميه..وش تنتظر مني أصفق لهم؟! والا قالوا لك رحيق معدومة الاحساس والمشاعر؟! هذه خالتي زينب وسيرين كانوا واقفات ويشهدوا على كلامي... أنا يا عمي إنسانه وعندي حد معين أتحمل...بس زوجتك تعدت حدودها وما تلقى فرصة الا ترمي علي الكلام والنغزات.. لمتى أتحمل؟!!! ابو فيصل ناظر زوجته بتوعد وبعدها التفت على ابو احمد زوج فاطمه: والله انا اشوف كلام رحيق مضبوط...يعني ما هي بالساهل يرمون عليك تهم...بس انت يا رحيق المفروض تكلمت لزوجك او عمي ابو فيصل او جدك بدون ما ترفعين يدك عليها ...تبقى بمقام جدتك وللكبير احترامه!! ام فيصل بدفاع: بس هي قالت بعظمه. لسانها انها داخله تسرق قاطعها ابو فيصل بحزم: انتهينا من هالسالفه ...والحين وش نهاية هالمخسرة؟! كلما التقيتم ننفضح بين العربان؟!! ابو عبدالرحمن بحزم: الحين تسلمون على بعض ونفتح صفحة جديدة وكأنكم اول مرة تلتقون ...واتمنى كل واحد ينشغل بنفسه وما يتدخل بالثاني...هذه المرة رح نمرر الغلط للطرفين... المرة الجاية ما رح يعجبكم تصرفنا! والحين يا رحيق قومي سلمي على الموجودين زمان ما شفتيهم!! كتمت ضيقها ووقفت بثقل ... بدأت بالسلام من جهة اليمين وكانت خالتها زينب وبعدها على ابو ضاري الي باين انه للحين حامل عليها ..وما نطق ولا بحرف واحد ...تقدمت من ابو فيصل سلمت عليه وباست على رأسه...هز رأسه برضا... تقدمت من صيته سلمت عليها وباست على رأسها حسب اوامر جدها...اقتربت من سيرين وسلمت عليها بيدها و من بعدها حصه سلمت عليها ببرود .... ابو فيصل بأمر : ام ريان اعتذري من رحيق لأنك انت سبب المشكلة كلها! حصه فتحت عيونها باستنكار ما بقى الا رحيق تعتذر منها ...ناظرت فارس الي أعطاها نظره قويه حتى تقوم وتعتذر...كتمت قهرها وناظرت رحيق ونطقت من فوق الجوزه: أنا أسفه! مطت شفتها رحيق وش تعمل بهذا الاعتذار بعد ما خربت علاقتها بفارس...رجعت مكانها وما ناظرت فارس الي جالس جنب حصة ... دام إنه كارها وعايفها ما رح تسلم عليه...دوبه اول ما وصلوا المزرعه مر من جنبها وتجاهلها! انتفخت ملامحه من تطنيشها له ولا كأنه موجود.... بركان بداخله منه ..هز رأسه بتوعد وهو يردد بداخله نشوف مين رح يندم!!! ابو فيصل بحده وهو يوزع نظره بين زوجته وحصه لأنه متأكد انهم سبب المشكلة: أقسم بالله يا أم فيصل ويا أم ريان إن جاءت رحيق تشتكي منكم مرة ثانية ما رح يحصل طيب...تحترمونها غصب عنكم واعتبريها مثل حفيداتك وإن شفت عليها الزلة انصحيها بأسلوب محب ما هو بطريقه همجيه وشتم واستنقاص..هذا الشيء أبدا ما اسمح فيه ... وانت يا رحيق مرة ثانية اتمنى تقصرين يدك ولسانك وإن أحد زعلك وضايقك بكلمة وحدة تعالي لي ابتسمت رحيق وهي تشوف ملامح صيتة وملامح حصة ما بقى على اشتعالهم الا لحظات!! ** ** ** قفلت الخط من ياسمين ...ووقفت عند شباك الغرفه ...ما تدري متى ترجع من هنا ... وقع نظرها على حصة واقفه مع فارس وهو يحمل ريان والإبتسامة مرسومه على ملامحه.... افضل شيء من هالصلح ما عادت حصه وصيته يناظرنها ولا كأنها موجوده...ارتاحت من ثقل طينتهم... مطت شفتها وهي تسمع صوت ضحكة حصة...ما تدري تحس بالغيرة تفتت قلبها ... تتمنى بيدها شيء وتحذفه على رأس كل واحد منهم!! ابتعدت بسرعه عن الشباك لما بدأ فارس يرفع ولده بالهواء...ما تبغى يشوفها ويظنها جالسه تراكض خلفه!! قررت تطلع برا وتغير جو أفضل لها ... ابتسمت وهي تستنشق الهواء براحه ...يا حبها لابو فيصل ما احد يقدر لصيته غيره... ناظرت المكان من حولها..حلو كثير ويشعرك بالسعادة....وقفت نورة عند الورد وبدأت تلتقط لها صور.... تأكدت ما في احد حولها ...عدلت الشال وكشفت عن وجهها...حملت نورة وبدأت تلتقط صور للذكرى!! غطت وجهها وتوجهت تجلس عند جدتها ام عبدالرحمن ...توسعت ابتسامتها وهي تشوف ملامح صيته انقلبت لما شافتها...تابعت خطواتها بكل ثقة وجلست قريب من جدتها بعد ما كشفت وجهها والابتسامه شاقه حلقها...تحس بشيء يدغدغها ..شعور الانتصار جميل بس ما تبغى تضحك وتقلب السالفه عليها!! مسكت الجوال تنشغل فيه حتى ما تضحك لأنه اذا رجعت ناظرت صيته مرة ثانية ما رح تمسك نفسها مرة ثانية!! ..نزلت صورها هي ونورة على الواتس وعملت تخصيص للحالة ما يشوفها الا فارس وياسمين وخالتها ام ربيع.. ومع كل صورة كتبت خواطر حب لنورة...تبغى تقهر فارس وتثبت له حياتها وسعادتها ما هي متوقفه عليه!! قبل ما تقفل الجوال وصلها إشعار من فارس... قرأته بدون ما تفتح الرسالة" وقسم بالله إذا ما مسحت الصور إلا أمسح فيك الأرض" ابتسمت براحه وهي متأكده الحين تنزلي عنه طبخه من كثر الغليان...خليه ينقهر ويموت بحرته...نفسها تفهم ليه يمنعها تكشف وعائلتهم يكشفون ؟! والا السالفه جكر؟! قفلت الجوال وناظرت جدتها الي تتكلم عن موقف صار معها بمراجعتها بالمستشفى! ناظرت جوالها يرن باسم فارس...ما رح ترد عليه ...وضعت الجوال صامت ورجعت تستمع لجدتها! ام عبدالرحمن باستغراب: تخيلي ربك ستر كاتبه لي علاج ما له علاقه بعلتي ومرضي...ما غير ماسكه هالجوال وتتكلم وعقلها بالجوال!! رحيق باندماج: زميلتي بالشغل مرة صار معها كذا ..راحت تتعالج للحمل اعطتها الدكتورة حبوب منع حمل! صيته ناظرت رحيق وهي تتكلم ...مضطرة تنكتم وما تخرب بيتها آخر هالعمر!! صيته بهدوء: يظنون الناس لعبة ام عبدالرحمن هزت رأسها بهدوء: والله أحس رأسي مصدع رحيق باهتمام: جدتي انت شربت الدواء؟! هزت رأسها : ايه بس ما شربت كفايتي من القهوة! رحيق ناظرت الشغاله لما دخلت ومعها القهوة...قامت رحيق أخذت منها القهوة...واقتربت من جدتها صبت لها قهوة وهي تتكلم باهتمام:الله يسامحك يا جدتي ليه ما قلت لي كان جهزت لك القهوة بنفسي ام عبدالرحمن ابتسمت لها بمحبه: جعلني افرح بعيالك يا ابنتي ما ابغى أغلبك! رحيق قبلت رأسها بمحبة: غلبتك راحة لي يا جدتي!! رجعت صبت قهوة لصيته بهدوء: تفضلي يا خالتي!! بغت ترفص صيته بس أم عبدالرحمن اعطتها نظره حتى تسلك وتمشي الامور... رحيق نطقت من باب الواجب: أجيب لك حلا يا خالتي مع القهوة قاطعتها صيته باستغراب من هالتغير: لا لا ما أبغى! رجعت رحيق مكانها بعد ما صبت لها قهوة وهي تنطق باستغراب: غريبه جالسات هنا بالداخل .. الجو برا حلو! ام عبدالرحمن : كنا برا أبغى اتمدد وآخذ راحتي بالجلسة! اذا تبغين اطلعي مع البنات قاطعتها رحيق بابتسامة: لا أجلس معكم! ام عبدالرحمن هزت رأسها بضيق وهي متأكدة ما في احد تجلس معه وبنفس الوقت متأكدة انها أخذت موقف من الجميع وللحين زعلانه حتى لو أظهرت العكس...عاشت عندها سنين وتقدر تشوف الضيق بعيونها... صيته تسترق النظر لرحيق جالسه تسمع لهم بإنصات وتمسح على رأس أختها بشويش.... ما تدري ليه جالسه معهم يعني الي بعمرها يروح يجلس مع جيله!! دخل المجلس بعد ما عرف مكانها ...شافها وهي تناظر جدتها باندماج والجوال ملقي جنبها بإهمال...رد السلام بهدوء... زمت شفتها بضيق لما سمعت صوته وهو يقترب...ما رفعت نظرها له ... صيته الي تراقب الوضع بدقه...اقترب فارس وما ناظر رحيق نهائيا وهو يكلم جدته: جدي يقول تعالوا للمجلس الكبير الكل مجتمع هناك ام عبدالرحمن بتعب: والله ما لي حيل أتحرك!! ام فيصل وقفت : عيل خلينا نروح يا ام عبدالرحمن نتونس بما إنها جلسه عائلية! أسند فارس جدته بشويش ...ام عبدالرحمن تعرف رحيق ما تحب التجمعات فما قالت لها تروح معهم!! تحرك من جنبها وهو يسند جدته وبحركه خاطفه أخذ الجوال متجاهل صوت الاستنكار الي طلع منها!! وقفت رحيق بثقل وتعب من الحمل وتوجهت له وهي تنطق بحدة: هات جوالي!! ام عبدالرحمن وقفت وناظرتها باستغراب: وش صاير! فارس بدون ما يناظرها نطق: بعدين نتكلم !! قاطعته وهي توقف بطريقهم : ما رح اتحرك حتى ترجع لي جوالي!! ام عبدالرحمن وهي توزع نظرها بينهم: انتم وش فيكم؟! فارس أبعدها عن طريقه بشويش وبحزم نطق: خلي اليوم يعدي على خير ..بعدين نتكلم! قهرها بتصرفاته وبدون وعي غرزت أظافرها بكتفه بدون ما تشوفها جدتها بكل قوتها وهي تنطق بهمس: اكررررررهك! حس كلمتها انغرست وكأنها خنجر وطعنته فيها...لذي الدرجه تحمل له الكره...ترك جدته ومسك يدها الي مغروسه بكتفه ونطق بنفس الهمس: شعور متبادل! ناظرها باشمئزاز ودفها عنه بقرف...رجع أسند جدته الي ضايعه بينهم وما هي فاهمه شيء !! مسكت نفسها لآخر لحظة حتى ما توقع واستعادت توازنها...ناظرته لما طلع من المكان...لذي الدرجة يحمل لها الكره ..ونظراته لها وكأنها شيء مقرف! هي الغبية الي أخذت بنفسها مقلب ونسيت هي مين وهو مين! ضحك بوجهها من باب العدل وهي ما صدقت أحد يضحك بوجهها ...وعاشت حياة المراهقه.... نسيت او تناست لما رفضها بشكل بشع لما طلبت منه خالتها يتزوجها...كلامه يرن بإذنها وهو يقارن بينهم ...هو فوووق وهي تحت!! هو الي تزوجها من فوق الجوزه ومع ذلك تناست كل هذا حتى تمشي الحياة!! هي غبيه المفروض فهمت كل شيء لما طلب منها تشرب حبوب منع الحمل... غبية لما فكرت تنجب منه...ما تدري وين كان عقلها ... وكأنها كلمته الحين صحتها من سبات عميق كانت غارقه فيه.... صدق كلام ياسمين وش تبغى بالرجال ما يجي من منهم الا وجع الرأس!! مسكت يد نورة الي بدأت تبكي ....طلعت من مكانها بعد ما مسكت النقاب وألقته خلفها ..تعرف كيف ترد له حركة الجوال...أخذت نفس عميق وتوجهت للمجلس الكبير بخطوات واثقة... قبل ما تدخل حست بتردد وخجل لأنها ما تعرف مين الي بالداخل...قرار اتخذته ما رح تتغطى بعد هاليوم مثلها مثل حصة.. وأصلا الفكرة واردة لأنها مع هالحمل ما عادت تتحمله! خطوة صعبة بس رح تشجع نفسها!! رجعت خطوة للخلف صعبه عليها ...بالتدريج ما تقدر تقطه مرة وحده.... تلثمت بالشالة ...اخذت نفس عميق ناظرت خالتها فاطمه الي تيغى تدخل المجلس..دخلت معها المجلس بدون ما تناظر احد حتى ما تضعف ...ردت السلام بخفوت وتوجهت لأقرب مكان وجلست وكان جنب سيرين!! سيرين باستغراب ناظرتها وبهمس نطقت: وين نقابك؟! احس هاللثمه باي وقت رح تسقط رحيق بلامبالاة: تركته يضايقني!! رفعت رأسها وهي تشجع نفسها ...حست قلبها انقبض وهي تشوف نظرات فارس النارية!! هي جالسه تلعب بروحها ....تجاهلت نظراته وهي تتظاهر بالقوة ومن الداخل قلبها يتراقص ...نظراته تخوف!! سيرين همست لها: ترى خصله من شعرك طالعه!! رفعت رحيق تعدل الشيلة وفارس يناظرها بقوة ...وهو يشوف انعكاس بياض يدها مع الشال الاسود....رح يموت من الغيرة ...وش قصدها من هالحركات!! نص وجهها طالع هذه مجنونه والا وش بالضبط!! ابو عبدالرحمن ما عجبه تصرف رحيق إما تلبس مثل العالم والناس او تكشف وجهها كامل...وخاصه وهو يشوف نظرات بعض عيال فاطمه تتسارق لها!! نطق وهو يشوف ملامح فارس وكأنه بركان واختصار للمشاكل نطق: اقول انا الحريم و البنات تجلسون بالمجلس الداخلي يكون افضل...باستثناء ام فيصل وام عبدالرحمن!! زينب ما هي منتبه للي يصير من حولها: خلينا والله مستانسين قاطعها ابو عبدالرحمن بحده: أنا قلت الحريم اطلعوا للمجلس الثاني!! بدأت الحريم بالمغادرة...وقفت رحيق وهي متأكدة عمل جدها كذا نكايه فيها حتى ما يزعل السيد فارس!! طلعت من المجلس وهي تحس بالضيق من نفسها!! كشفت عن وجهها وهي تحس بالاختناق...خلاص ما رح تغطي وجهها من بعد اللحظة والي ما هو عاجبه يطق رأسه بأقرب طوفه!!! وقفت لما حست بشخص لفها لجهته بقوة...عفست ملامحها بألم من هالحركه المفاجئة...سرعان ما وضعت يدها على خدها بصدمه وهو ينطق بنظرات ناريه: انت زودتيها!! ناظرت حولها تتأكد ما احد شاف هالشيء...زينب الي كانت متأخرة نطقت باستنكار: فارس وش فيك؟! فارس يبغى يطحنها تحت اسنانه ونظرات عيال خالته لها للحين بباله: أقسم بالله اذا شفتك متلثمه الا اذبحك بيديني تفهمين!! رحيق ماسكه بصعوبه نفسها ما تبكي..وبإصرار نطقت: ما احد له دخل بلباسي...ومن الحين مثلي مثل امك واخواتك زينب تحاول تلم الموضوع: خلاص لا تغطين وجهك وفكونا من هالمشاكل تراه ما هو واجب نطق والشرار يطلع من عيونه: ادري إنه ما هو واجب بس هي بالذات ممنوع أحد يشوف وجهها خليني أشوف هالشيء مرة ثانية وربي لأسحب اوراقك من هالوظيفه الي من بعدها نا احد قادر لك! ناظرته بغيض يبغى يلوي ذراعها..سحبت نورة وتركته وهو يتوعد فيها!! توجهت للغرفه وناظرت خالتها الي دخلت خلفها مباشرة!! زينب بضيق: رحيق وش فيك صايره كذا؟! رحيق بصوت مخنوق: خلاص ما عدت اقدر اتحمل تصرفاته يتحرى أي فرصه حتى يكبتني فيها ويضيق الخناق علي!! زينب ما تدري ليه فارس يتصرف كذا: يا رحيق طولي بالك ... وطول عمرها الحرمه يكون بالها طويل وتتحمل الرجال!! رحيق انتبهي ما ابغى احد يتشمت فيك...امسكي زوجك ولا تنسين إنت قربت على الولادة..باكر يصير عندك عيال تبغين يعيشون حياة النكد والصراخ...فكري يا رحيق ولا تخربين بيتك...خلاص اسمعي كلامه وغطي وجهك وفكينا من المشاكل! رحيق بداخلها نار من فارس وخاصة بعد ما ضربها ..نطقت بتصميم: مثل ما جبرتوني على هالزواج رح أجبركم إنه قاطعتها زينب بغضب: انكتمي..اكيد الحمل أثر على عقلك! هذه حصة من يوم السالفه وهو مقاطعها وما ناطق لسانه لسانها وضربها قدامنا كفوف ومسح فيها الارض ومع ذلك ما خربت بيتها...ما في بيت يخلو من المشاكل... أنا وابو ضاري كنا نتشاجر كثير وايام نزعل ما نكلم بعض... وبعدها نرجع ولا كأنه صار شيء... كذا الحياة مد وجزر لزوم تتحملين وتتجاهلي حتى تستمر الحياة! رحيق وربي يشهد إني اعتبرك مثل بناتي ومثل ما اكلمهم أكلمك ...ما ابغى احد يتشمت فيك...اخزي الشيطان وقومي تصالحي مع زوجك زفرت رحيق وهي تجلس على السرير بتعب... تعرف إنه كلام خالتك مضبوط ...بس بنفس الوقت كرامتها ما رح تهدرها علشان إنسان ما يشوفها بعيونه... وبنبرة ظهر فيها الضيق: خلاص يا خالتي اتركي المركب يسير...مع الايام إن شاء الله تتحسن الحياة زينب زفرت بضيق: أجل قومي اجلسي معنا وفكي هالكشرة ما ابغى احد يعرف او يشعر إنه بينك وبين فارس خلاف!! رحيق هزت رأسها بهدوء وهي تنطق: خليني اريح شوي وبعدها رح أنزل ! هزت رأسها بتفهم زينب وانسحبت بهدوء...زفرت رحيق بضيق ... بدأت تبكي وهي تمسح دموعها ...يظن إنها سايبه يمد يده عليها... لو يموت ما تكلمه...استلقت وهي تتوعد فيه ورح تطلع هالحركه من عيونه!! ** انتهى البارت دمتم بخير 🌹 | ||||
|
| |
|
19-03-22, 03:34 AM
| #888 | ||||
| رحيييق وش فيها عجوله ليش ماتفهم زوجها القصه بهدوء القصه وهو جاء لعندها يسالها الصراحه اول مره اكره منطقهاا وفارس يغطي عليها. انه يبي شاحن ويضرب الثانيه الصراحه وضح انه يحبها لكن الحب لازم صراحه منهم اثنيهم عسله تفهم نصحيه خالتها زينب | ||||
|
| |
|
19-03-22, 04:18 AM
| #889 | ||||
| لسا مابدأت اقرأ الروايه منتظرة تخلص وبعدين ارجع اقراها لان ماعندي صبر انتظر البارتات بس بصراحة رواية ضاقت انفاسي من اروع الروايات الي قرائتهم تسلم اناملك على الابداع قريت روايتك كلهم وكل رواية اروع من الثانية بالتوفيق ي اروع كاتبه تستحقي وسام التميز في جميع روايتك | ||||
|
| |
|
19-03-22, 05:41 AM
| #890 | ||||
| نجم روايتي 
| سلام عليكم سلمتي غاليتي علي الاجزاء روووعه كما اعتدنا منك اسلوب وسرد وطريقه وكل شئ جزيتي الجنه ربي يسعد قلبك وحياتك وآخرتك ويرفع قدرك في الدنيا والاخره ويراضيكي ويوفقك لكل خير ❤️ كل الشكر والتقدير والاحترام لكي في انتظارك بكل شوووق ربي يحفظك. 💕💕 | ||||
|
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
العرض العادي
