25-03-22, 11:46 PM
| #901 | ||||
 
|  بارت ٣٦ قضت ايام المزرعه بمرافقة جدتها ام عبدالرحمن ...وما طلعت للخارج أبدا وما شافت فارس من ذاك اليوم ...وجوالها معه ..علاقتها بمن حولها عاديه وخاصه حصه لاحظت انها تتجنبها ولا تناظر لجهتها أبدا ... ناظرت سيرين الي همست لها بابتسامة: افضل شيء حصلتيه من هالمشكلة خلصت من حصه وجدتي ونغزاتهم! رحيق ابتسمت براحه:الحمد لله..وبتذكر نطقت: قلت لأحد ليه كنت أفتش بخزانتك؟! سيرين بهمس خافت: فارس وقتها قال إنه طلب منك تحضرين من غرفتي الشاحن فما احد سألني عن شيء ...ارتاحي ما قلت لاحد الا لأمي لأنها ما صدقت كذبة فارس!! خزتها بقوة واحمر وجهها من الاحراج: حسبي الله على عدوك ..فضحتيني!! سيرين بابتسامة : عادي تذكري ايام الطفوله! زفرت رحيق بضجر من لسان سيرين ...تحس موقف ما هو حلو قدام خالتها!! ...وبنفس الوقت مستغربه من كذبة فارس! سيرين بتردد نطقت بنفس الهمس: أمي خبرت فارس بالسالفة صرخت رحيق بدون شعور من هول هالفضيحه وهي تحط يدها على فمها : لاااااا تلقائيا كل الحريم ناظروها باستغراب!! حضنت رأسها بين يدينها من هالفضيحه..اخخخ من سيرين وامها ما يحفظون اي سر!! رفعت راسها وكأنه الطير فوق رأسها لما سألت جدتها بخوف: رحيق وش صاير!! رحيق نطقت والعبرة خنقتها بعد هالفضيحه: ما في شيء! ناظرت سيرين الي ضحكت بقوة...وبغل وقهر ضربتها على كتفها: كلبه! سيرين بلعت ضحكتها وهي تشوف رحيق شوي وتبكي وواضح بملامحها الزعل والكدر.. حست بالندم على تصرفها بس حبت توصل السالفه لامها وفارس حتى ما يدخل لقلبهم الشك بتصرف رحيق.. نطقت بأسف: والله آسفه ما هو قصدي أضايقك! ام عبدالرحمن وهي تشوف الدموع تلمع بعيون رحيق ..رجعت سألت بخوف: وش صاير؟؟ سيرين بترقيع وهي تشوف الكل يناظرهم: ما في شيء جالسه أخوفها من الولاده...وهي ما صدقت خبر !! ام عبدالرحمن خزت سيرين بقوة: انت ما تعرفين توزنين كلامك قبل ما تنطقين! وانت بزر يا رحيق تسمعين كلام هالجاهلة!! حصة ناظرت رحيق لثواني وصرفت نظرها وهي نفسها تقوم وتمسح فيها الارض...اذا ما طيرتها وطلقتها ما يكون اسمها حصة بس خليها تلقى الفرصة المناسبة!!! ** ** ** ** ما صدقت يقولون رح يرجعون ...جالسة بسيارة جدها تنتظره ..رفعت نظرها على زينب الي فتحت الباب ونطقت بهدوء: رحيق فارس يقولك رح ترجعين معه!! ام عبدالرحمن التفتت على رحيق وعي تحثها على النزول: انزلي يا رحيق مع زوجك رحيق ناظرته واقف عند سيارته ما كلف نفسه يخبرها يرسل مراسيل...وبهدوء نطقت: أنا راجعه مع جدي زينب برجاء قاطعتها : يا ابنتي فكينا من المشاكل...الحين فارس يقول لأبوي .... وأبوي رح ينزلك غصب عنك! ام عبدالرحمن بتأكيد: وكأنك ما تعرفين جدك يا رحيق!! رحيق بعناد: ما رح أنزل إلا إذا جاء بنفسه وقال تعالي اركبي معي!! زينب زفرت بضجر: رحيق بعدين مع حركات المبزرة...تعالي وبلا هذرة! رحيق لما ركب جدها السيارة ..نطقت رحيق وهي تناظره بجديه وهي عاقده حواجبها: جدي لوتحرك بسرعه أحس بمغص ببطني زينب فتحت عيونها باستنكار من كذبتها... تلقائيا رجعت للخلف لما قفلت رحيق باب السيارة! ابو عبدالرحمن باهتمام:من متى المغص اخاف يكون طلق!! رحيق ماكذبت لأنها من الصبح وهي تحس بالمغص: ما ادري حرك يا جدي بسرعه! ام عبدالرحمن صدت للشباك وما علقت وهي عارفه كذبة رحيق!! ارتاحت لما حرك جدها السيارة ما تبغى ترجع مع فارس للحين حاقده عليه بسبب الكف... سرعان ما رفعت رأسها لما وقف جدها وفتح الشباك لما وقفه فارس وهو ينطق: ام صيته رح ترجع معي ..واشر على رحيق! حست رحيق المغص زاد من هالإسم ... ناظرته بنظرات ناريه وكأنه يبغى يجلطها بهذا الاسم... ارتخت ملامحها براحه لما نطق جدها: رحيق راجعه معي تعبانه ورح أخذها لاقرب مستشفى بطريقي فارس عقد حواجبه باستغراب:وش فيها؟! أبو عبدالرحمن بعجله: لا تأخرني أخاف يجيها الحين الطلق! رفعت راسها بابتسامه لما حرك جدها السيارة وابتعد عن المزرعه...وكل شوي يسألها عن حالها ... نطق باهتمام: الحين رح نروح لمستشفى***** بطريقنا قاطعته برفض: ما له داعي يا جدي بس ابغى ارجع للبيت واريح نفسي يمكن يكون برد!! ابو عبدالرحمن بإصرار: رح تنزلين وتطمئنين على نفسك! مطت رحيق شفتها بضجر يا أبو النشبه!! ام عبدالرحمن خايفه تصير مشاكل والا كان قالت لزوجها إنها تمثيليه حتى تتخلص رحيق من فارس!! بعد وقت التفتت على رحيق الي غصب عنها نزلها جدها للمستشفى !! ام عبدالرحمن بهدوء: نزل نورة هنا ...أنتظركم بالسيارة! رحيق نزلت نورة عند جدتها ...وابتسمت على كلام جدتها وهي تهمس :إن كيدكن عظيم! رحيق بهمس مماثل وهي تبتسم: الكرامة يا جدتي!! ام عبدالرحمن خزتها: اقول روحي ولا تأخرينا!! هزت رأسها رحيق وقفلت الباب...عبست ملامحها وهي تحس بالمغص زاد!! ما هو موعد ولادتها ....توقعت انها بردت البارحه بالليل كان الجو بارد!! توجهت خلف جدها وهي تشعر بالاحراج منه ..الحين يقولون له ما فيها شيء!! همست بداخلها وهي تدعي ما يكشفها جدها!! ** ** ** متمدده على طولها بالصالة وهي تبتسم براحه ... المستشفى ما كان فيه دكتور بالطوارىء...كان فيه حادث خطير وكل الاطباء انشغلوا بالحادث ..وقدرت تقنع جدها إنها ما فيها شيء وتحسنت ... مجرد برد وراح ...حمدت ربها مرت السالفه على خير...لو اكتشف جدها سالفتها كان مسح فيها الارض وما تستبعد ينزلها من السيارة! رفعت نظرها لياسمين وهي تناظرها: سلامات جالسه توزعين ابتسامات! رحيق توسعت ابتسامتها وهي تحك خدها: انت وش عليك مني...المهم ما قلت لي متى رح نطلع قاطعتها ياسمين وهي تجلس بطفش : كنسلناها رحيق فزت على حيلها باستنكار: ليه ؟!! ياسمين بضجر: اليوم طالبيني بالدوام الله يأخذ الحريم ما يشبعون مشتريات! رحيق رجعت تمددت وهي تشوف ام ربيع اقتربت ومعها الشاهي: دام انهم يعطونك فلوس زياده انت ليه متضايقه!! ياسمين بملل وكسل: مليت من الشغل أبغى ارتاح!! ام ربيع خزتها: قولي انك فكرت بالعريس الي جاءك؟! وبديت تطلعين حجج حتى توافقين!! رحيق فزت وهي جالسة وهي تناظرهم باستنكار: عريس!! وش السالفة ما أحد خبرني!! ام ربيع بضحكه قصيره: حضرتك انقلعت للمزرعه وما رجعت وجوالك مغلق! عبست ملامحها بقهر من فارس للحين ما رجع جوالها ...رجعت ناظرت خالتها بجديه: وش السالفه؟! ام ربيع ابتسمت وهي تناظر ياسمين الي تحاول تشغل نفسها بأي شيء: تقدملها رجال عمره ٤٠ مطلق لأنه ما ينجب وهو متكفل بعيالها..بس هذه الخبلة رفضت...بس أنا قلت لهم انتظروا ونرد لكم خبر!! رحيق حست بهتت ملامحها...رح تفقد ياسمين بعد ما لقتها ...وبنفس الوقت ما تقدر توقف عقبة أمامها...وبهدوء نطقت: ليه رافضه؟! ياسمين بجمود: انا خلاص جربت حظي وما أبغى أدخل هالقفص مرة ثانية...وبعدين وش يضمن لي كيف رح يكون تعامله مع عيالي؟! وأخاف إن وصل الخبر لاهلغ ابوغ طراد يأخذون عيالي ورح أفقد حضانتهم!! اغم ربيع بإقناع: ما رح يسكن هنا .. أهله بمنطقة******* بعيده ما رح يعرف أهل زوجك ياسمين برفض: ما ابغعى الزواج كله...وبعدين فكري فيها لو قلنا له تعال ؟! متخيله موقفي ما في رجال يوقف ويستقبله؟!! سكتت وهي تبلع غصتها!! رحيق كتمت ضيقها ونطقت بهدوء: تقدري تشوفين أعمامي أو مهند ...لا تنسين الخلاف كان بيني وبينه انت ما لك علاقه بالموضوع ام ربيع بمداخله : انت يا رحيق بالأصل سالفتك بمهند زمان انتهت دام إنه ما صار عليه شيء ووقع على تعهد ما يقرب لك ...يعني ما أظن يرفض ياسمين برفض: لو أموت ما طلبت مساعده من مهند وأعمامه...خلاص قفلوا السالفه أنا ما أبغى زواج!! رحيق نطقت بتردد: اذا على هذه السالفه جدي ابو عبدالرحمن وفارس موجودين سكتت لما سددت ياسمين الخداديه بوجه رحيق: ما بقى بالخم الا مقطوع الذنب! اقول انكتمي أفضل لك!! ضحكت رحيق على انفعال ياسمين: حنا نبغى مصلحتك! وقفت ياسمين وهي تجمع أغراضها وتطلع للشغل سدوا نفسها بسوالفهم البايخه!! طلعت من الشقة ونزلت بخطوات هادئة والغصه بحلقها من هذه الحياة.... وقفت لما لحقها ربيع وهو ينطق: خالتي ياسمين نسيت جوالك!! تناولت الجوال منه وكملت طريقها بدون ما تناظر الرجال الي مشى من جنبها! بعد ما تجاوزته وقف وهو مصدوم ...عقله ما هو مستوعب...عيونها بالارض وما ناظرته وعيونها مو ظاهرات مثل رحيق! شد على اسنانه بقهر من هالرحيق..يعني توقع بعد جنانها تأثرت من أختها ...بس أختها محتشمه وما تصدق إنها ياسمين...وحتى طول الفترة الماضية أول مرة يصادفها من لما سكنوا هنا ولا يسمع لها حس!! سبحان الي مغير الأحوال!! وقف عند باب الشقة وصوت ضحك رحيق واصل لمسمعه...مبسوطة وهو بالحريقة ما هو هامها... دخل الشقة وبداخله زعل وعتب عليها كبير...هو يحاول يعدل الحياة وهي تهدمها بتصرفاتها... جلس بالصالة وهو يطقطق بجواله ...ما رفع نظره لها لما دخلت الشقة!! بعد ما خبرها ربيع انه فارس موجود ... رح تحاول تعدل الامور معه تخاف يطول زعله ويسمي البنت صيته! وبنبرة هادئة ردت السلام!! حست بالانتكاسة لما تجاهلها وهو منشغل بالجوال وحتى ما رفع عينه لها!! جلست على الجهة الثانيه ونطقت بهدوء: السلام لله! تجاهلها ولا كأنها موجوده...نطقت كمحاوله اخيرة: أجهز لك أكل؟! حست بالغيض من تجاهله لها ...نطقت بقهر: يعني أنا المفروض الي أزعل مو انت!! ما شافت منه استجابه ..وقفت وتوجهت الغرفه وهي تنطق بقهر: أنا الغبية الي تنازلت وكلمتك! ناظر زولها بقهر ...لا والله حضرتها مغلبه نفسها وتنازلت حتى تكلمني!! فوق اغلاطها تتكلم بقوة عين!! فرق بينها وبين حصه ....يحس حصه إذا عصب عليها تسكت أما رحيق ما يدري من وين طلع هاللسان!! أسند رأسه على الكنبة بتعب من الحال إلي وصلوا له!! ** ** ** عبست ملامحها بضيق وهي تشوف صاحبة الشركه مسنتره باب المكتب...من ذاك اليوم وهي متضدده لها!! تجاهلتها وانشغلت على اللاب..رفعت رأسها لما اقتربت منها ونطقت بترفع: إجازتك الي طلبتيها مرفوضه! واعتبري نفسك اذا عطلتي يوم مفصوووووله من الشركة!! مطت رحيق شفتها بسخريه من سخافة هالانسانه ورجعت تكمل شغلها بدون ما ترد عليها! انتفخت ملامحها بغضب من تجاهل هالموظفه لها ...وبكل قوتها ضربت على المكتب وهي تنطق بغضب: أنا لما أكلمك تردين؟! لا اراديا ضحكت رحيق بخفه على انفعالها وعصبيتها... صدق انها سخيفه وفاضيه اشغال!! بداخلها بركان من رد فعل رحيق .. أعطتها نظرات توعد وطلعت من المكتب!! بعد ما طلعت زمت شفتها رحيق بضيق ...ما صدقت تخلص من حصه وصيته تطلع لها هذه! دفنت وجهها على مكتبها بتعب...تحس جسدها ما يقدر يتحمل ضغط الشغل اكثر...حتى الشقة أهملتها ما فيها حيل تنظفها ...وعلاقتها بفارس للحين مقطوعه ...ولا واحد منهم تنازل للثاني!! عبست ملامحها من هالمغص من الصبح ما هو تاركها...متى يخلص الدوام وترجع للشقة.... بعد وقت طويل دخلت شقة ياسمين حتى تأكل معها وبعدها تنام!! وقت الاكل ام ربيع باستغراب: رحيق انت عليك طلق؟! رحيق ما تفهم بذي الامور...رفعت حاجب باستغراب: كيف يعني؟! ام ربيع: احسك عافسه ملامحك يوجعك شيء!! ياسمين وهي تناظر رحيق: ترى باقي ايام حتى تدخل شهرها!! رحيق تحس بالخوف يدب بقلبها لما تتذكر قرب الولادة...وبنفي نطقت: ما فيني شيء ...بس مغص خفيف الظاهر اخذت برد!! ياسمين باهتمام:الدكتورة وش قالت لك بموعدك؟! رحيق ببرود: ترى للحين ما راجعت عند اي دكتورة...ولا ادري عن شيء خليها على البركة ام ربيع بانفعال: جعل البقرة ترفسك قولي امين!! مجنونه انت ؟! وليه ما راجعت عند دكتورة ؟! يمكن يكون عندك مشكلة؟! رحيق اكتساها الهم: ما ابغى أستحي...اذكر مرة رحت للمستشفى ...تبغاني الدكتورة اتسطح على ظهري واكشف عن بطني!! ياسمين وهي كاتمه الضحكه: ايه وش عملت! رحيق مطت شفتها : رفضت وحملت نفسي وطلعت!! ام ربيع بضحكه: وقسم بالله انك هبله!! اجل كيف رح تكشف عليك؟! رحيق بعبوس وقرب الولادة لوحده عامل لها رعب: ما ادري...خلاص قفلوا على السالفه! ياسمين بابتسامة: اتركيها خلينا نشوف يوم الولادة وش رح تعمل؟!! رحيق بلعت ريقها : وش قصدك؟! ياسمين بابتسامه: ما قصدت شيء ..كملي اكل يا حلوة!! صحيح وش صار على اجازتك!! رحيق وهي تحس بصعوبة النفس ...كتمت وجعها ونطقت: رفضوا الإجازة!! وقفت رحيق وهي تكمل كلامها: انا راجعه للشقة ابغى ابدل واروح للحمام!! وبسرعه توجهت للشقة....تحس الوجع كل ما فيه يزيد ...ويا دوب يمديها تروح للحمام!! ما تذكر إنها شربت سوائل وش سالفه الحمام!! عضت على يدها من شدة الوجع وهي ندمانه على الزواج والحمل ...ما تبغى تولد...خايفه خايفه!! همست بخوف يا رب ما يكون ولاده!!! مر الوقت وهي بين الوجع يغيب عنها ويرجع!! رن جوالها وكانت ياسمين..ما قدرت تكمل كلامها رحيق من قوة الطلق!! لحظات وكانت ياسمين وخالتها فوق رأسها: أنا اقول قومي الظاهر عندك ولادة !! رحيق برفض: ما ابغى ما ابغى ..اتركوني الحين يروح الوجع! ام ربيع بتحليل: يمكن التهابات..بس لازم نأخذها للمستشفى ونتأكد ياسمين مسكت جوال رحيق: الحين اكلم زوجها خليه ييجي ويأخذها ما هي حلوة نطلع بسيارة اجره ...افرضي صار شيء معها على الطريق رحيق سحبت الجوال منها وبصعوبة نطقت: ما ابغى اروح للمستشفى! ياسمين زفرت بضيق ما هو وقت حركات المبزرة: رحيق تراك مو صغيرة ...بلاه يصيب الجنين شيء وتكونين السبب! وباستدراك نطقت: انت وفارس ما تكلمون بعض!! رحيق بصعوبه نطقت: فارس بالدوام! ياسمين: خلاص اكلم جدي او خالتي زينب! رحيق بعناد بعد ما راحت الطلقه: ولا احد ما رح اروح للمستشفى... أعطوني مسكن أو أي شيء!! بغت ياسمين تسحب منها الجوال...رحيق بكل قوتها حذفت الجوال بالجدار وهي تتنفس بصعوبه: لا تتصلين بأحد أعطيني مسكن قطعت كلامها وبسرعه توجهت للحمام... ياسمين ناظرت خالتها بعجز: ما توقعت رأسها يابس كذا؟! وش نعمل الحين؟!! ام ربيع تناولت عباية رحيق وبتصميم: غصب عنها تروح للمستشفى... طلعت من الحمام بانهيار ما لها حيل تتحمل اكثر...ناظرت ياسمين الي تكلمت بغضب: اقسم بالله اذا ما تحركت الحين للمستشفى الا نحمل قشنا انا وخالتي وانسي إنك تعرفينا!! ام ربيع تضغط عليها: امشي يا ياسمين رحيق بضعف نطقت: اخاف يدخلوني ولادة ما اقدر اتحمل وجع الولادة!! ياسمين لانت نبرتها وهي تقنع فيها: ومين قال لك ولاده ...هذه التهابات تعمل وجع زي الولادة. الحين يعطونك علاج وتصيرين طيبه...بس امشي معنا!! ** ** *** ياسمين تبغى تنتف شعرها من رحيق ..ناظرت الممرضه الي خبرتها انها رافضه الفحص !! ما تدري كيف تتعامل معها هالبزر!! المشكلة إنه مستشفى حكومي يعني ما في مجال للدلع...ناظرت الممرضه وهي تنطق بمهنيه: لو صار شيء للجنين المستشفى ما عليه مسؤولية...اضطرت ياسمين تدخل عندها تقنعها... بعد وقت طلعت وهي تزفر بضيق بعد ما اقنعتها...تحس طلعت روحها وهي تقنع فيها! بدأت تمشي بصالة الانتظار ...القلق أكل روحها...تحس رحيق بعدها بزر ما تدري اذا تقدر تتحمل وجع الولادة!! تحركت بسرعه للممرضه تسألها عن حالتها: وش عندها؟! ردت الممرضه بعبوس وكأنه ينقصها دلع هالبزر: ليه متأخرين ؟! مويه الرأس من فترة طويله نازله معها وهذا يؤثر على الجنين...والخلاصه سابقه الجنين ...الوضع ما هو مطمئن ...على الاغلب رح تكون عمليه!! ياسمين بقلق: طيب كيف سكتت لما تركتها الممرضه وراحت تكمل شغلها...مسكت نفسها ما تضربها بالنعال على رأسها على وش شايفه نفسها هالممرضه.. تتكلم من رؤوس خشومها!! زفرت بضيق ما معها رقم احد من اهل ابو ضاري ...وفارس بالدوام...اصلا ما له داعي يعرفون ...خلهم يشبعون بعيال حصيص...هي الي رح تهتم بأختها وما هي بحاجة احد!! ** ** ** جالسه قدام الغرفة بتعب وهلاك...قلبها اوجعها وهي تشوف أختها بالعناية والبنت بالخداج وضعها ما هو مستقر! زفرت بضيق كله من رحيق وعنادها...كانت رح تفقد روحها بسبب جنانها!! همست وهي تدعي انها تكون بخير وسلامه!! اتصلت بخالتها تطمئن على العيال...بعدها قفلت الخط وقررت تروح للمصلى تصلي وتريح ظهرها شوي!! بعد ما كملت صلاة اسندت ظهرها للجدار وهي تبكي خايفه تفقد رحيق ...الفترة الي مرت تعلقت فيها وكأنها ابنتها...ما تتخيل فكرة إنها تفقدها..... بدأت تدعي ربها إنه يحفظها لها من كل سوء!! *** *** *** بالرغم من القطاعه الي بينهم الا انه لما يداوم يرسل لها رسالة اذا بغت شيء وهي ترد ب "لا" وكذا يرتاح انها بخير وما فيها شيء!! ناظر الجوال باستغراب قبل ساعات ارسل لها وما ردت عليه...أقنع نفسه يمكن انشغلت بالدوام او اي شيء.... مر وقت وعيونه ما فارقت الجوال... ضغط اتصال عليها ... عقد حواجبه باستنكار مقفل!! رح تجننه ليه قافله الجوال!! طال زعلهم لزوم واحد يتنازل للثاني ...والظاهر هو الي رح يتنازل .... اتصل بأمه حتى تروح تزور رحيق وتتفقدها...بعد وقت قفل الخط بضيق ... أمه طالعه زيارة وبنفس الوقت زعلانه لأنها رحيق ما تزورها ليه هي الي تزورها ...المفروض رحيق الي تزورهم مب امه الي تركض خلفها!! خليه يرجع من الدوام ويتفاهم معها ...هذا الحال ما هو عاجبه أبدا.... للحظه كره حصه لأنها السبب بالمشكلة الي صارت ... كانوا عايشين ومبسوطين بسبب لسانها الطويل خربت كل شيء... ناظر جواله وهو يرن واسم حصه ينور الشاشه...اعطاها مشغول ما هو طايق يكلمها!! *** *** *** رجع من السفر ومباشرة توجه للشقة ...فتح الباب وتجول بالمكان فاضي ما فيه أحد!! للحين جوالها مغلق ...طلع من الشقه وطرق باب شقة ياسمين! فتحت ام ربيع الباب وارتبكت وهي تشوف فارس بوجهها...فارس وهو يحاول يكون هادىء: السلام عليكم ردت عليه السلام ... مباشرة سألها: ابغى أسألك عن رحيق قاطعته بهدوء: رحيق بالمستشفى ولدت قبل يومين ..ومبارك المولوده انصدم من الكلام وحس وكأنه مويه بارده انسكبت عليه...رحيق ولدت قبل ايام وهو اخر من يعرف ...لا كذا تصرفها اوفر...كتم ضيقه ونطق: الله يبارك فيك...اي مستشفى؟! بعد ما عرف اسم المستشفى مباشرة توجه بعد ما أخذ أمه الي انصدمت من الخبر وتوجه مباشرة للمستشفى!! بعد وقت كان أمام غرفتها ...فتح الباب بعد ما طرقه والشرار يطلع من عيونه! ياسمين ناظرتهم باستغراب كيف عرفوا ...ملامحهم ما تبشر بخير...قبل ساعه طلعت رحيق من العنايه ما تبغى تنتكس حالتها... قبل ما تنطق ...نطقت زينب بقهر وهي توجه الكلام لياسمين: يعني متى كنت ناويه تخبرينا!! ياسمين ناظرت رحيق نائمه ..بعدها ناظرت زينب بقوة: اذا تبغين مشاكل رجاء خلي الردح برا ... فارس ناظر أمه : هدي يمه!! وبعدها ناظر ياسمين بكره: كيف وضعها الحين! ياسمين وهي تشوف نظراتهم لها ردت بدون نفس: بخير! البنت بالخداج تقدروا تشوفوها! زينب وهي مفوره من العصبيه: كأنك تطردينا!! يا قو عينك...انت بأي وجه تأخذينها للمستشفى وحنا ما عندنا خبر!! ياسمين تتريق: ليه يعني كنت بتولدينها بنفسك؟! فارس وهو يحاول يتحكم بأعصابه: دام إنها ولدت قبل يومين ليه للحين بالمستشفى؟! صاير شيء!! ياسمين تجاهلتهم وجلست وهي تطقطق بالجوال ...هذا الناقص يفتحون معها تحقيق!! دخلت الدكتورة وطلبت منهم يطلعون حتى يكشفون عليها!! زينب ماسكه نفسها ما تنتف ياسمين...اقتربت منها وبتهديد: رح تندمين على تصرفك!! ياسمين باستفزاز: إيدك وما تطول!! فارس رفع حاجب وهو يشوف طريقتها المستفزه: ما رح اطوف لكم هالحركة..واذا ناسيه تراني زوجها وما يطلع لك تتصرفين على كيفك!! زينب مطت شفتها بقرف: ناس تجيب الهم!! ياسمين احتدت ملامحها: دام حنا نجيب الهم ...ليه اخذتم رحيق؟! طلقها ويا دار ما دخلك شر! تراها بالغصب بالعيتكم ...وجالسه تجامل من فوق طاقتها ... وساكته لعيون ابو عبدالرحمن ...وما ظنيت تكمل معك بعد ما يموت جدك ...فأنا أقترح توفر الوقت عليها وتفكونها من ملاغتكم وثقل طينتكم!! واجلس عند حصيص أفضل لك ... وأختي رح تلقى الي يسعدها ويرفع قدرها!! زينب اشتعلت من وقاحة ياسمين: ليه يعني رحيق اشتكت لك .وانت الناطق الرسمي لها؟! ياسمين تكتفت ببرود: بالضبط !! ناظرها فارس وصد عنها ما رح ينزل مستواه ويرادد الحريم ...انسانه سخيفه وشرانيه ما رح ينزل مستواه لها...نطق بهدوء متجاهل ياسمين وكلامها: انا رايح اشوف البنت ..تعالي يمه معي. ابتعد وأمه معه حتى يضمن ما تشتبك مع ياسمين ..وبداخله قهر من كلام ياسمين...معقول كلامها صحيح؟! معقول انها تشتكي لأختها ولذي الدرجة كارهيته!! وقف عند غرفة الخداج ...دخل يشوف البنت وبداخله ضيق ما يبغى من رحيق بنات ...كان راسم ولد على الاقل يقدر يضبطه ... أما البنت يخاف تحمل جينات اسماء!! ناظر البنت وجهها أحمر وما هي باين ملامحها للحين ..ناظر أمه الي ما عبرت البنت وللحين تتكلم على ياسمين من القهر الي فيها!! ** ** ** عافسه ملامحها من شدة التعب ....ناظرت ياسمين الي تتكلم بإهتمام: يوجعك شيء!! رحيق بعبوس: تعبانه! ياسمين بابتسامة: وجع عادي رح يروح بإذن الله!! صحيح جاءت زينب وابنها بلعت رحيق ريقها وهي تنتظر اختها تكمل: وأختك قامت بالواجب وزيادة ما ارتاحت رحيق لكلامها وقبل ما تنطق..تكلمت ياسمين بقرف: ترى بأي لحظة تشوفينها دشت الغرفه لانها رجعت للبيت تحضر لك أكل..يعني تعرفين حنونه! ختمت كلامها بسخريه! ما علقت رحيق لأنها ما فيها حيل تتكلم حتى البنت ما سألت عنها ...ما تدري وش صايبها ما هي سائلة عن شيء!! يمكن من كثر الوجع والتعب الي شافته ...تحس خارت قوتها.... دخلت زينب بهدوء المكان ...اقتربت من رحيق وتحمدت لها بالسلامه وهي تسأل عن وضعها! ورحيق ترد بهمس...دخل بعد ما طرق الباب ...ياسمين حملت نفسها وطلعت من الغرفه! اقترب بملامح هادئة وتحمد لها بالسلامه!! عم الصمت المكان للحظات ...زينب باهتمام اقتربت من رحيق وبيدها طبق الاكل: الحين بإذن الله رح تتحسنين رحيق اشرت بحواجبها بالرفض: ما لي نفس خليه بعدين!! التفت فارس على ياسمين الي دخلت وهي تنطق بهدوء: سألت وقالوا لها تخريج اليوم؟! زينب ناظرت ولدها: رح تجلس في بيت اهلي والا عندنا؟! ياسمين قاطعتهابحزم: بشقتها! زينب رفعت يدها وهي تؤشر على ياسمين: وانت مين طلب رأيك!! ياسمين تكتفت وهي تتكلم بإصرار: والله أختي وابغاها جنبي حتى أقوم فيها وما رح أتركها لأحد يتمنن عليها! زينب تنرفزت من ياسمين: تخسين احد يتمنن عليها! وبعدين انا موجوده اقوم فيها انت انتبهي على بيتك وعيالك يكون أفضل! ياسمين بقوة نطقت: أختي رح ترجع للشقة زينب ناظرت رحيق وسألتها والقهر طالع من عيونها بسبب ياسمين: رحيق وين تبغين تجلسين؟! رحيق ناظرت ياسمين اذا جلست في بيت جدها ما تقدر تزورها..المكان الانسب حتى تبقى ياسمين عندها هو الشقة ... ناظرت خالتها وهي تنتظرها تختار مكان غير الشقة ... وبهدوء نطقت: أبغى أجلس بالشقة ..هناك أرتاح أكثر! انتفخت ملامح زينب من اختيار رحيق ..وقبل ما تنطق قاطعها فارس بحزم ينهي المشكلة: خلاص يمه اتركيها على راحتها ...والشقة قريبه منك ما في مشكلة!! الحين رح اروح اشوف اجراءات الخروج وبعدها نطلع!! ** ** ** تحس تبغى تنتحر وهي تشوف مشاكل ياسمين وخالتها ما تنتهي ..تحس راسها صدع منهم .... ياسمين بإصرار: بالاول الصغيرة وبعدها رحيق زينب حطت عيونها بعيون ياسمين بتحدي: أول شيء رحيق تأخذ دش وتبدل وتأكل وبعدها الصغيره! ياسمين بتحدي أكبر: الصغيرة اول ام ربيع بضيق من خلافاتهم: خلاص ياسمين خذي الصغيرة واهتمي فيها ..وانا وام ضاري نهتم برحيق!! رحيق بإرهاق نطقت: أعطوني ملابس وأنا أجهز نفسي لوحدي بس فكونا من المشاكل!! لوت زينب بوزها بتكبر وهي تناظر ياسمين...وبعدها نطقت وهي تناظر رحيق بحنان : هات يدك أساعدك! رحيق تتكلم بصعوبه: اتركوني بالغرفة لوحدي وأنا اتدبر امري!!! مر يومين وتعب النفاس هدها هد .. ما توقعت إنها صعبة لذي الدرجه... وإلي زاد تعبها ياسمين وزينب طول الوقت شجار.... رفعت رأسها لما دخلت ياسمين باستنكار وهي تكلم زينب وبيدها ورق: ما هو على كيفه !! زينب لأول مرة تتوافق مع ياسمين: والله إني استنكرت عليه! ليه انقطعت الاسامي حتى يسميها " صيته"؟!! بهتت ملامح رحيق ونزلت رأسها بوهن ... ما توقعت ينفذ كلامه!! مسكت العبرة بصعوبه...زينب اقتربت منها بمواساه: والله ما ادري وش قالب زوجك؟! اغلب وقته معصب ويتكلم من رؤوس خشومه...انتم صاير بينكم شيء؟! رحيق بلعت غصتها وبهدوء نطقت: لا ياسمين زفرت بقهر: أقسم بالله لو يطلع بيدي الا اكسر رأسه!! زينب حتى لو فارس غلط بس ما تسمح لاحد يتعدى عليه بالكلام: وانت وش حاشرك بالسالفه!! اذا ام البنت ما تكلمت انت وش عليك؟! هو حر ابنته وانت انشغلي بعيالك وما لك خص! ياسمين بردح: يا سلااام! جعل الكر يسحبه..قال حر!! وش هالانسان المتخلف؟! ما فكر بشعور هالبنت لما تكبر !! ما فكر بإسم الدلع ...وش يدلعونها " صوص" زينب بانفعال نطقت: انت انكتمي وما لك دخل...هذا ولدك اسمه طراد ! وش هالاسم المتخلف؟! وهذا انت ساكته ومنكتمه وبالعه العافية ..لا تجلسين تحرشين رحيق على زوجها! ياسمين بقوة : والله طراد احلى من صيته بألف مرة!! وش هالاسم صيتة واعععععع ابغى استفرغ!! سكتت لما نطقت رحيق بغضب:خلااااااص خلااااص...مليت منكم كلكم ... ياسمين استغربت وهي تشوف رحيق انفجرت بالبكاء!! اقتربت منها وهي تتفقدها: يا قلبي لا تبكين زينب من الجهة الثانيه: كله منك يا ياسمين جالسه تحفرين فوق راسها !! تراها نفاس ولزوم لها الراحه النفسيه! ياسمين باستنكار: شوف مين يتكلم؟!! زينب بغيض: انا قلت لك لا تخبريها بالاسم حتى ما يتكدر خاطرها!! ياسمين بعناد: الحين والا باكر مصيرها تعرف بالاسم التراثي العريق!! رحيق ابعدت ياسمين عنها بشويش..وبنبره رجاء: اتركوني بحالي!! زينب وقفت: تعالي للصاله ياسمين وقفت : انا راجعه للشقه خليها ترتاح الحين!! سكتت زينب لما رن جوالها ...ردت بابتسامة ...بعد وقت قصير قفلت الخط وهي تناظر رحيق: ابوي جاي لزيارتك!! ** ** ** جالسه قريب من جدها بالصالة وتبتسم له وملامح التعب واضحه عليها... ابو عبدالرحمن بابتسامة وهو يناظر الطفلة بحضنه: ربي يجعلها قرة عين لكم! ما تدرين كم كانت فرحتي لما سمعت إنك صرت أم! ما احد بفرحتي وأنا اشوفك استقريتي وصار لك عائلة زينب بابتسامه:مين تشبه البنت! ابو عبدالرحمن بهدوء: الاطفال بهذا العمر يتقلبون... ارجع الطفلة لحضن زينب .. وأمسك بيد رحيق بحنان: وجهك واضح فيه التعب! رحيق بنبرة واضح فيها التعب:ما توقعت الولاده كذا!! مستحيل اكررها مرة ثانية ياسمين ونورة يكفوني عن كل العيال! عقد حواجبه بعدم فهم: مين ياسمين! رحيق اشرت على الصغيرة بثقه: ابنتي!! زينب مطت شفتها بسخرية: وش هالمسخرة هذه؟! تبغون تشتتون البنت كل واحد يناديها بإسم! رحيق بعناد: ابنتي ورح اناديها بالاسم الي ابغاه انا...واسم جدته خليه ينقعه ويشرب مويته!! ضحك ابو عبدالرحمن بروقان على انفعال رحيق ...وبنبرة حانيه: يا ابنتي صدقيني هالسالفه ما تستاهل كل هالزعل ..شوفي وجهك كيف الزعل واضح فيه...ارحمي هالطفلة الي ترضع منك ...ما يصير تشرب حليب زعل يقولون يؤثر عليها!! رحيق تحس بغصه بحلقها من تصرفه ...ليه حصه هي الي سمت طفلها الاول ...للحين تتذكر كلامه قدامهم ما يبغى يكسر بخاطرها دامها تعبت بالولد ...وهي ليه كسر بخاطرها؟! زفرت بضيق وهي تحس النيران مشتعله بداخلها...ناظرت خالتها الي نطقت برجاء: خلاص يا رحيق فكي هالكشرة...كل واحد فيكم معصب وزعلان لمتى حالكم كذا؟! ابو عبدالرحمن بنبرة هادئة نطق وهو يبتسم: صدقيني هو يحبك ويعزك بشكل ما رح تتصورينه... باكر تمر الايام وتصير هالسالفه ذكرى وتجلسون تضحكون عليها!! خلاص يا ابنتي فكي هالعقدة وخلي المركب يسير!! انت تحبينه وهو يحبك لا تخربون حياتكم بالعناد... وإذا لي خاطر لك لا تطرين الطلاق مرة ثانية نهائيا... قاطعته بتبرير: انا ما جبت سيرة الطلاق قاطعه بلامبالاة من تبريرها حتى يوصل فكرته: اذا لي خاطر عندك ما تفترقين عن فارس طول حياتك...ارضي بنصيبك وإن شاء الله ربنا يوفقك ويسعدك ! ناظرت جدها بمحبة...مهما قسى عليها ..جدها له معزة بقلبها وما رح تنسى فضله عليها بعد الله...حتى لو قسى عليها ..له مواقف تشفع له وتمسح كل شيء سيء بدر منه!! ابو عبدالرحمن بهدوء تكلم: والله البيت ما له طعم بدونك يا رحيق!! يا ليتك ترجعين وتملينه علينا..جدتك مشتاقه لك حيل!! زينب بحسن نية نطقت: ما يمداها لأنه فارس بدأ يجهز لها جناح عندنا ..رح تنتقل عندنا!! رحيق صكت على اسنانها بقوة وهي ماسكه اعصابها من فارس ..رح يذبحها بتصرفاته!! قالت له من قبل ما رح تعيش عند اهله والحين يجهز لها جناح!! ترجع لبيت جدها ولا تعيش في بيت ابو ضاري!! ما رح تستبق الأحداث...رجعت ناظرت جدها الي يتكلم بابتسامة مريحه: انا وجدتك جهزنا لك هدية بمناسبة إنك صرت أم ...إن شاء الله تعجبك!! ابتسمت رحيق ونطقت بنبره صادقه: انت وجدتي من أجمل الهدايا إلي رزقني ربي بها! توسعت ابتسامته وهو يناظرها ...هز رأسه ونطق بنبرة هادئة : تدرين كانت نظراتها مسلطه عليه بدقة ..استغربت لما سكت ومال رأسه للجهة الثانيه!! حست قلبها طاح وبخوف نطقت: جدي! زينب بدون وعي اقتربت وهي تحركه:يبه يبه يبه!! رحيق نسيت كل وجعها وهي تحاول تحرك جدها...والدموع متحجره بعيونها!! زينب بدأت تصرخ وهي تشوف ابوها بدون اي حركه!! دخلت ياسمين بفزع على صراخها: وش صاير؟! رحيق وهي تحس ريقها جف ...نطقت بارتجاف: جدي ما يرد اقتربت ياسمين وبسرعه اتصلت بجوالها بالإسعاف! قفلت الجوال ..واخذت جوال زينب ...واتصلت على ابو ضاري ويدها ترتجف من الموقف!! *** ** *** مرت الايام وللحين ما هي مستوعبه رحيل جدها ابو عبدالرحمن ...ومن بعدها جدتها ام عبدالرحمن الي تعبت بعد فراق زوجها أيام قليله ورحلت عن الدنيا!! وضعت يدها على صدرها وهي تحس للحين وجع فراقهم ينزف بداخلها!! ما عادت تحس بطعم الحياة بدونهم ...تأثرت على موتهم اكثر من امها وأبوها ..تحس فقدت قطعه من قلبها!! مسحت دموعها الي للحين ما جفوا على فراقهم...اخذت نفس عميق وطلعت من المطبخ بعد ما جهزت القهوة! اقتربت من فارس الي يطقطق بجواله ....وضعت كوب القهوة أمامه بهدوء ...وجلست على الجهة الثانية بعد ما أخذت كوبها ...وفتحت جوالها تقلب فيه بدون اي هدف!! تناول كوب القهوة ..ارتشف منها ونطق باستغراب: كأنها بدون سكر! رحيق ناظرته ببرود وبصوت منخفض: أجيب لك قاطعها ببرود: لا هزت رأسها ورجعت تطالع بالجوال...حياتهم باردة وما فيها روح ...تحسه تغير بعد ولادتها وزاد تغيره بعد موت جدها وجدتها... أغلب الوقت ساكت .. وإن تكلم يتكلم برؤوس اقلام وبنبرة بارده بدون روح...نفسها تماماً ما عادت تحس للحياة طعم بعد فراقهم!! ارتشفت من القهوة وهي تفكر بدوامها ما أعطوها إجازة الا شهر...وباكر دوامها!! رن جوالها كانت ياسمين .. وضعت القهوة على الطاوله ..وتوجهت للغرفه تكلمها ... جلست على السرير وفتحت خط بهدوء: هلا ياسمين!! ياسمين بنبرة هادئة: كيفك رحيق ردت ببرود: الحمد لله ياسمين متضايقه من برودها نطقت بضجر: رحيق والله ما صارت ..الميت الله يرحمه ... رحيق قاطعتها بقلب ميت: يعني متصله تقولين هالكلام قاطعتها ياسمين: لا بس بغيت اقولك زمان ما شفتك تعالي لشقتنا!! من يوم ما سكنت في بيت أبو ضاري ما عدنا نشوفك! رحيق سكتت للحظات وبعدها نطقت بتبرير: والله ما لي نفس اطلع برا البيت ...تعالي انت قاطعتها بانقراف: ما بقى الا بيت أبو ضاري! رحيق تقنعها: ترى جناحي منفصل عنهم يعني ما رح تدخلين بيتهم! ياسمين برفض: لا تعالي انت ...انتظرك قاطعتها رحيق: اشوف فارس وأعطيك خبر! ياسمين بعبوس: ان شاء الله!! أنهت رحيق المكالمة ما لها خاطر تطلع برا البيت ...اقتربت من ابنتها الي نايمه بعمق وجنبها نورة! مسحت على شعرها وهي تشوف الشبه الكبير بينها وبين اسماء!! مين توقع إنها تنجب طفله نسخه عن أسماء ..وكل يوم عن يوم يزيد الشبه ويظهر أكثر!! التفتت على فارس الي دخل الغرفة ... وأخذ بعض الاغراض...نطقت رحيق بهدوء: أبغى اروح لاختي ياسمين اجلس ساعة وأرجع هز رأسه بهدوء: لا تتأخرين! وسحب نفسه وطلع من الغرفة ...مسحت وجهها بارهاق من هذه الحياة !! ** ** ** داومت بالشركه وضغط الشغل ما هو طبيعي ...ناظرت سوزان بمهنية: أي ساعة الاجتماع؟! سوزان وهي تناظر ساعتها:قدامك ساعتين تقدرين تنجزين؟! رحيق هزت رأسها بهدوء:ان شاء الله سوزان ناظرت رحيق: تدرين بغيابك صار أمور كثيرة! ناظرتها رحيق بتسليك حتى تكمل السالفه: رغد صاحبة الشركة عبست ملامحها تلقائيا من سيرتها ...تابعت سوزان كلامها: جاءت مع زوجها للشركة ولف على كل الموظفين ولو تشوفينه استغفر الله ...تدرين رغد جنبه متواضعه ويا زينها!! عصبي ورافعه خشومه للسماء وكأننا حشرات يناظرنا!! لوت رحيق بوزها بطفش: أنا على الأغلب رح اترك هذه الشركه...شفت اعلان بشركه******** ورح اقدم عندهم ...لأني بصراحه الكرامة أولا وما أسمح لأحد يناظرني نظرة دونية أو يحتقرني...هم الي بحاجتنا ! سوزان ابتسمت بروقان: اخص يالقويه...والله تعجبيني لما تعاملت مع رغد بفوقيه..ايوه كذا خلها تنقهر!! وبضحكه تابعت كلامها: اذا جلست هنا ما رح تجهزين الأوراق..اشوفك بعدين يا حلوة!! هزت رحيق رأسها بهدوء وبدأت تشتغل وهي تفكر مين رح يحضر الاجتماع من شركة ابو ضاري!! ما توقعت يكون فيه صفقات بين هذه الشركه وشركة ابو ضاري!! *** *** *** دخلت الاجتماع بعد ما طلب منها بدر تحضره ...ما لها خلق لهذه الأمور..بس بحكم شغلها مضطره تحضر الاجتماع...عدلت نظارتها الطبية وسحبت كرسي وجلست جنب زميلتها تنتظر أعضاء الاجتماع يحضرون!! بعد دقائق دخل زوج رغد وبرفقته مدير الشركه يكلمه بأمور عن الصفقة ...جلس وهو يرد السلام بصوت ثقيل ...وبعدها بدأ يتكلم معهم في بعض الأمور الي تخص الصفقة لوقت وصول اعضاء شركة ابو ضاري!! لحظات ودخل ابو ضاري وفارس ومعه بعض الموظفين !! رفعت نظرها لهم لثواني ونزلت نظرها ...وقلبها يدق بقوة لما شافتهم..ما تدري ما ارتاحت!!! ما تدري اذا انتبه فارس لوجودها أو لا .... بدأ الإجتماع وانشغلوا بالصفقة...ناظرت ساعتها مرت ساعة وللحين ما اتفقوا!! ملت من هالوقت...ناظرت فارس الي يتكلم بكل قوة وثقه .. ابتسمت ما تنكر إنه احتل مركز بقلبها ...بالرغم من زعلها عليه .. ما قدرت تقوى على الرحيل!! التفتت على زوج رغد وهو يقاطع فارس ونبرته واضح فيها الاستعلاء وكأنه فارس خصم له!! حست بين هالشخصين شرار .... بعد وقت كان ثقيل على قلبها تم تأجيل الاجتماع ليوم الخميس!! تنهدت براحه وبدأ الحضور بالانسحاب ...تحركت للخارج وتوجهت لمكتبها ... اول ما دخلت التفتت لبدر الي تقدم منها بمهنيه: خذي هذه الأوراق ضروري تناظرينها زين هزت رأسها بهدوء وتوجهت للمكتب بعد خروجه... *** *** ** ابو ضاري جلس على المكتب وعدم الراحه رافقته: رحيق تشتغل بهذه الشركة؟! فارس جلس بهدوء: والله ما كنت اعرف ...اذكر انها تشتغل بشركة صديق جدي ...ما تكلمت إنها اشتغلت بشركة ثانية! ابو ضاري ناظره بتحذير: انتبه انتبه تترك أي ورقه أو شيء من شغلنا بالبيت ... ناظر أبوه للحظات وبعدها نطق: ما توصل لذي الدرجة!! أبو ضاري بقوة: توصل لأبو أبوها..لا تنسى إنها ابنة منصور وفهمك كفاية!! أنا استغربت لما شفتها بغرفة الاجتماع..الظاهر إنها واصله ولها مكانتها بالشركه! حنا بالاجتماعات ما نختار الا اصحاب الخبرة الطويلة ومسيرتهم العمليه متميزه ...كيف صارت بهذه الفترة القصيرة مهمه بشركتهم!! بس تدري كله بسببك طردتهامن الشركة ..البنت لماحه وعندها ذكاء بتخصصها كنت ابغى استثمرها بس انت الله يسامحك تعجلت!! فارس ينهي السالفه: كذا أفضل! **** **** انتهى البارت دمتم بخير 🌹 | ||||
|  |
|
26-03-22, 01:48 AM
| #902 | ||||||||
| الذين يشاهدون محتوى الموضوع الآن : 179 ( الأعضاء 24 والزوار 155) mansou, همسات مطرر, صل على النبي محمد, بْعَثْرَآتّ, عبق الرياحن, م ممم ممم, ضاقت انفاسي, ام ندى سيرين, s2020, فله بنت احمد, amana 98, الجوهر الماسي, لمعة فكر, ام ري, Sariha, بنت العوالق, ابتهال نور اليقين, Katrina seashadow, فيروزززززززززز, جاسمن81, رواء الزين, مُلهمه, عبوره//, حنين ام وسيم | ||||||||
| |
|
26-03-22, 07:06 AM
| #904 | ||||
| رووووووووووعة مشكورة ابرار بس اسم صيته ماهو عاجبني زعلت على رحيل ابو عبدالرحمن كان سند رحيق كانت رحيق ترتاح معاهم كثير والله قهر شك ابو ضاري برحيق يزعل مررررة اي مشكله قالوا رحيق بعدين مات أبو عبدالرحمن ماعرفت أن رحيق مظلومه مااخذت فلوس اسماء أنه في وحده ثانيه انتحلت شخصية رحيق | ||||
|
| |
|
26-03-22, 11:08 AM
| #905 | ||||
| لوهلة صعبت عليا حصة لما رحيق تقل ادبها وبتعاند ومع ذلك فارس يقفل من حصة وميردش عليها رغم أنه عقليا بيقارن بينهم وطبعا الغلبة العقلية لحصة بس قلبه مازال بيفضل رحيق وهي في منتهى الاستعباط بتتعامل ببرود رهيب . ياسمين وخالتها ايه قلة الذوق اللي فيهم ده جنبهم إنسانة مريضة ودول شغالين لوكلوك ومناقرة انا لو من فارس كنت طردت ياسمين صراحة باله طويل مع رحيق واهلها جدا . صدمة ابوعبدالرحمن والغلبانة ام عبدالرحمن ليه تموتي وراه ده كان متجوز عليكي إنسانة متساويش ضفرك طب عيشي شوية 💔 يا ريت رحيق تعقل شوية وان كنت مظنش يعني | ||||
|
| |
|
26-03-22, 01:55 PM
| #906 | ||||
| شكل حصه بتنتقم من رحيق بتعمل شي بشغل فارس يتهم رحيق بعد موت ابو عبدالرحمن محد بيدافع عنها بنت رحيق تشبه اسماء هذا بيخلي فارس ينفر منها مابيعاملعها بحب مثل اخواتها ضروري رحيق تواجهه فارس بكل الي بخاطرها لمن سمت حصه ابنها بنفسها وهي حرمها من هذا الشي | ||||
|
| |
|
26-03-22, 05:52 PM
| #909 | ||||
| سمو بنتها صيته لاا هيك كثير يعني ما بكفي بتشبه اسماء ويسموها صيته . شو راح يكون مستقبل هالبنت !! هسه رحيق بيتهموها بسرقه الاوراق اذا فلس ابو ضاري والله فارس ببسرق الاوراق المهمه اللي معاها عالحالتين هالوضع وراه مصيبه | ||||
|
| |
 |
| الكلمات الدلالية (Tags) |
| ... |
| أدوات الموضوع | |
| انواع عرض الموضوع | |
|
|
4017Likes
Wwwwwww 
العرض العادي
