23-09-22, 02:45 PM
| #42 | |||||
 
|  اقتباس:
| |||||
|  |
|
23-09-22, 02:51 PM
| #44 | ||||
| 18 لااله الا الله وحده لاشريك له،،له الملك وله الحمد وهو على كل شي قدير - ، ، {{قـبـل سـنـتـيـن}} ،،الـثـانـويـة لـلـبـنـات،، //بعد نهاية يوم خميس حافل بالترتيبات والتجهيزات بالمعرض خاصةً ان استقبال الوفد الرئاسي من وزارة التعليم يوم الاحد القادم// رغد بمريولها الميدي باللون الكحلي لافة شعرها كعكة لابسة عبايتها المفتوحة وطرحتها على اكتافها وشنطتها بظهرها وقفت وراها وهي تهمس لها/فتنة خلاص امشي فتنة بمريولها الميدي مثلها مثل رغد لافة شعرها كعكة ومثبتته بقلم الرصاص ومنسدلة بعض الخصل على اكتافها ورغم انها باول صف من هالمرحلة الا انها مسؤولة عن تجهيز اغلب المعرض وبقمة انشغالها وهي تلزق على احد الطاولات/يوووه رغد ثواني بس رغد بقلة صبر/خلاص فتنة خلاص هم يكملونه فكينا عاد!! فتنة/روحي يارغد اجي مع باص المدرسة روحي رغد/واذا عمي سالني عنك تعرفينه تحقيق!! فتنة/ماعليك العيال يصرفونه روحي خليني اشوف شغلي رغد زفرت/وعمتي؟ فتنة صرخت بعد مالسعها صمغ المسدس اللي تشتغل فيه وتنط بمكانها بالم/اااااحححححح رغد ضحكت بخفة/طول عمرك تلسعين عمرك ماتعودتي للحين!! فتنة بتكشيرة وهي تسحب المسدس وتكمل شغلها/امي تدري ان عندي معرض واخذ كل وقتي هالاسبوعين رغد زفرت/متاكدة؟اروح؟ فتنة هزت راسها بايه/ايه متاكدة رغد قربت وهي تحاوط يدها اللي فيها المسدس وتسند راسها على كتف فتنة وبابتسامة/فتفت فتنة تناظرها عن طرف وسط عقدة جبينها/خير غدغد رغد وهي تترك احتضانها وتكتفي بيدها وتتمايل/فتفوتة قلبي فتنة ميلت فمها بشك/قولي قولي رغد/ابي جوالك ابي اتابع مسلسلي عاد اليوم خميس وبتطلعين مع اخوانك بالليل وباقعد لحالي فتنة زفرت/كم مرة اقولك اجيب لك احسن منه وتقولين لا عناد براسك عناد ياكافي رغد تركت يد فتنة وكشرت بوجهها/تبين ابوي يطب ويشوفه والله ان يذبحني!! فتنة/وهو وش يدريه يابنت!! رغد وهي تتحاشى تناظرها من الضيق اللي اجتمع بصدرها/لا من خاف سلم فتنة تنهدت وهي تنزل المسدس وتقبص خدود رغد بيديها/وازينه الزعول واااازيينننه رغد دفت يدين فتنة وهي تمسك خدودها تتوجع وتناظرها بغيظ/اااه فتنة!! فتنة ضحكت/عموما حلالك كم مرة اقولك لاتستاذنين ابدا وبعدين حتى لو طلعت مع اخواني باتركه معك كله حلالك كم غدغدية بحياتي انا رغد لفت طرحتها وهي تسمع صوت الحارس اللي ينادي عليهم بالندا المعتاد/يالله انا رايحة اشوفك بالبيت/مشت بخطوات سريعة/سلام فتنة بابتسامة/سلااماات الاستاذة فدوى(المشرفة مع فتنة)وقفت عند فتنة/فتنة فتنة التفتت لها بابتسامة/ياهلا بعين فتنة الاستاذة فدوى اللي متعودة على حركات فتنة وتمون عليها/خلاص روحي الباقي صباح الاحد ان شاء الله فتنة وهي تحاوط يد استاذتها وبابتسامة/فدوتي الحلوة فدوى ضحكت/عيب عيب استاذة معلمة اي شي عيب يابنت فتنة/وش اسوي الحب لاعب بي فدوى سحبت يدها/بتجيبن لنا مصيبة على ذَا الكلام والله/بعصبية/عيب يابنت عيب فتنة زفرت بتكشيرة/استاذة فدوى تدرين الاحد ورانا كومة تجهيزات خليني اخلص والله مرة كثير مايمدي الاستاذة فدوى تنهدت وهي تنزل عبايتها/توكلنا على الله وبعدين وش ذَا المريول غريبة عليك!! فتنة بتكشيرة وجهها/ماقصرت فيني استاذة نهلة الصباح فدوى وهي تجلس وتلف معها التجهيزات/شغلها وماخاصمتك عبث!! فتنة سكتت فدوى/وبعدين مااحنا متعودين عليك بهالمنظر وانتي طالبة لك صيتك من المتوسط بالمجمع(المدارس)يعني لاتلومين لاشدوا عليك شوي فتنة/مريولي الصباح مدري وينه واخذت مريول رغد فدوى/الله يصلحها فتنة كملت شغل هي ومعلمتها بهدوء . ((السيارة)) عمر خارج من دوامه بثوب وشماغ واقف بسيارته قبال باب المدرسة رغد خرجت من المدرسة وهي تتجه للسيارة وقفت عندها وهي تفتحت باب الراكب عمر اتسعت عيونه بصدمة رغد جلست جنبه قدام عمر صد بوجهه وبنرفزة/استغفر الله!!ورا يابنت!! رغد تكتفت/ليش؟!!خلاص كاتبين كتابنا!!انت تحل لي!! عمر كتم غيظه وبحدة/مابعد صرتي ببيتي ارجعي ورا!! رغد بتكشيرة/ترا خلاص زوجتك وش فيك عمر!! عمر رفع صوته/الاشهار!! رغد تناظره بقهر عمر بحدة/مابعد درا الكل انك على ذمتي!!انزلي وخلصيني!! رغد فتحت الباب ونزلت وهي تقفله بقوة وفتحت الباب اللي ورا وهي تجلس وتقفل الباب وتصد بوجهها عنه وهي تتكي بطرف فكها على باطن يدها بغيظ عمر زفر/وينها فتنة؟ رغد/تجي مع الباص عمر قطب جبينه/انزلي ناديها رغد ناظرته/ليش؟!! عمر/تمشي وش تبي بالمدرسة رغد/يعني تبيها تزعل منك!!انت تدري وكل العالم يدرون ان عندها معرض تبيها تخرج وهي ماخلصت والاحد موعده!!لو عليها نامت بالمدرسة الليلة عمر كشر بوجهه وهو يعرف عنادها/اجل انزلي وقولي لها بأرجع لها بعد ساعة رغد/باص المدرسة موصل بنات الحي موصلهم وهي تبي ليش الشقى!! عمر/انتي انزلي وقولي لها وش عليك مني ومن اختي!!اخلصي علي!! رغد نزلت وهي كلها غيظ عمر بنفسه وهو يناظرها/وش ذَا!!كل كلمة جاهز لها تعبير من الرد رغد دخلت للمدرسة وخرجت بعد فترة ركبت بالسيارة عمر/قلتي لها؟ رغد/ايه قلت لها وتقول بترجع مع السواق يبي لها اكثر من ساعة ارتحت الحين عمر/مـاهـو بكيفها انزلي ناديها لي هالعناد ذي رغد/مع استاذة فدوى تشتغل وبعد المناوبة موجودة وش تبي اكثر!! عمر حرك راسه يمين ويسار وهو يزفر وحرك السيارة/عناد تموت لو مامشى كلامها هالعنادية/وقف عند محل وجبات سريعة وهو يطلب غدا/ رغد قطبت جبينها بصمت وهي تناظره باستغراب عمر بعد مااخذ الطلب حطه عالكرسي اللي قدام عنده ورجع للمدرسة ووقف وهو ياخذ كيس الاكل ويرجعه لورا بدون مايلتفت/هذا غداها هي واستاذتكم انزلي رغد بغبنة/ماني بنازلة!! عمر بغيظ/مشكورة لاتنزلين/نزل من السيارة وهو يتجه للمدرسة/ رغد بقهر منه وهي تناظره وبنفسها/ولا فكر فيني لحظة كل شي فتنة عنده فتنة فتنة فتنة!!اوووف!! عمر اللي سلم الاكل للحارس المدرسة ورجع السيارة وحرك وبغيظه وبقصد للي ورا/الله يغنينا عن الحاجة لخلقه رغد صدت بوجهها وهي تكبح عبرتها . {الساعة3,30} الاستاذة فدوى واقفة بعبايتها/خلاص يـافـتـنـة خلاص ارحمي نفسك ماصارت!! فتنة وقفت بابتسامة رضا عن صنع يديها اللي تشوفه وبابتسامتها المنهكة/خلاص هالمرة خلاص استاذة الاستاذة فدوى ابتسمت لابتسامتها/امشي اوصلك معي فتنة باحراج وهي ترفض/لاااا مشكورة وبعدين باص المدرسة كلمه الـعـم خالد اكيد ينتظرني الاستاذة فدوى/امشي معي يابنت مابقي غيرك خليني اوصلك انا واكيد انه راح بيتهم تعالي بس فتنة باصرار/لا والله سواق الباص يدري حرام ينتظرني من الظهر للحين والله مااقدر اسحب عليه اخاف من ذنبه تكفين استاذة اعفيني الاستاذة فدوى تنهدت/على راحتك لكن بانتظر معك الى ماتتيسرين فتنة وهي تلبس عبايتها بابتسامة/برا ينتظر اكيد كالعادة . ((بيت ابو عمر1)) طلال دخل للبيت بلبسه العسكري وهو يمدد جسمه بتعب بعد استلامه الطويل شايل بيده كيس نايلون فيه كل شي تحبه طلع الدرج بخطوات ثقيلة من تعبه وهو متجه لغرفتها ابتسم وهو يتخيل ردة فعلها اكيد بتستانس واليوم خميس لازم هالقرابيع بعينه تكون عندها تحمس وهو يتخيل بوسة على راسه منها ووناسته وهو يغيظها ايام وهي تناقره ماتهجد وقف على طرف الدرج بالدور الثاني وهو يسمع صوته بدر واقف بطريقه ويديه بجيوب بنطلون بجامته الرمادي وبابتسامة/الله الله الله ليتني فتنة لي الله!! طلال دفه/ابعد بس ابعد بدر تحرك من دفته/شوي شوي اللي تبيها ماجت من المدرسة للحين طلال قطب جبينه وهو يرفع يده لمستوى نظره يتاكد من الوقت بشك بدر/مضبوطة مضبوطة ساعتك طلال باستغراب/وش فيها ماجت للحين!!/اتسعت عيونها/لايكون تركتوها/احتدت نظرته/قطع لهالوجيه ثلاث مامنكم فايدة!! ريان اللي صحى من نومه وقف جنب بدر/الغدا وش اليوم؟ طلال اتسعت عيونه/وجوع دهر اي والله جوع دهر مافيكم خير!!/نزل الدرج بخطوات سريعة/ بدر مشى وراه ومسكه من يده/هيه هيه صبر اسمع وانت طرت علينا!! طلال سحب يده/اختك تاركها بالمدرسة لحالها وتقول اصبر اذلف عن وجهي بس/نزل/ بدر رفع صوته/عندها معرض وش فيك نسيت!! طلال التفت له وهو يوقف/لذا الوقت!! بدر/ومعها معلمتها اهل عمر يقولونه ريان بضحكة سخرية/اهل عمر بدر التفت له وهو يناظره بتكشيرة طلال/انا رايح اجيبها الله والمعرض الدولي عاد!!/خرج/ بدر زفر/مطيور مطيووور الله يعينه على نفسه ريان نزل عالدرج/احسبك معي بالغدا بس بدر التفت له وهو يطالعه بشك ومسك طرف بنطلون بجامته/مـاهـو بغريب علي؟!! ريان دف يده/حقي!! بدر سحبه بقوة من البنطلون وهو يطلع فيه الدرج/ماتوب عن السرقة انت!! ريان يدف يده/هيه هيه!! بدر/والله تفصخه لافصخك الحين بنص الدرج . //بـاص الـمـدرسـة// مثبت عيونه عالباب بترقب..بمشاعر مختلطة مابين الحماس والتوتر وموعد اللقى وفرحته فيه اخيرا..انتفض قلبه من فرط اختلاط مشاعره اللي ماقدر يكبحها الا بشدته عالدريكسون بيديه وهو يناظرها تخرج من الباب وسط هزات رجله اليسار اللي فلتت غصب عنه وهو يزفر نفسه بصوت فتنة بعبايتها الكتف ورمية غطاها على وجهها شنطتها بظهرها نزلت الدرجات المعدودة اللي قبال باب المدرسة بخطوات سريعة وطارت عبايتها لثواني عواد قطب جبينه بانزعاج من لمح رجولها اللي مايغطيها المريول صد بوجهه للجهة الثانية بغيظ وهو يزفر فتنة اللي زمت عبايتها تغطي رجولها بسرعة فتحت باب الباص وهي تجلس عالمقعدة الثانية وقفلت الباب وهي تسحب نفسها مبتعدة عن الباب للجهة الثانية من المقعدة وتكت براسها على القزاز بتعب وارهاق عواد حرك السيارة وهو انفاسه تسابق نبضات قلبه من السرعة وهي بهذا القرب منه . ((بيت ابو عمر1)) عمر نازل من الدرج بتقطيبة جبينه وهو يمسع اصواتهم وقف على مدخل الصالة يناظرهم يتغدون/ماشاء الله!!مافيه اخو كبير تحترمونه وتعزمونه عالغدا معكم!! بدر/مرفوع القلم عن النايم عمر ثنى يديه ولامس بها وسطه/ايه القلم مرفوع عني بالاكل لكن غيره ماينرفع!! ريان/يحق لنا!! عمر قطب جبينه/نعم!! بدر/صادق ريان لو صحيناك ذبحتنا عمر/الله لايجعلني بحاجتكم ريان/لاتدعي لاتدعي ندري مابتحتاجنا بدر/صاااادق اصلا انت مايملى عينك الا طلال عمر بتكشيرة/سبحان الله القرود تعرف بعضها!! بدر بضحكة/رحم الله امرىء عرف قدر نفسه ريان التفت له بوسع عيونه //بدر وريان ضحكوا وهم فكروا بنفس الشي// عمر بغيظه/والله لولا انكم تاكلون وريتكم قدري!!وين امي انت وياه بس؟ ريان/امي مع المدام حقتك يتقهوون بالحوش عمر مشى بدر رفع صوته/لاتتحمس وتدخل ترا امي بتطردك يعني لاتتعشم كثير عمر التفت يناظره بحدة بدر بلع ريقه/امزح امزح توبة ماعاد اقول شي عمر زفر وهو يستغفر وكمل طريقه وخرج ،،حوش البيت،، رغد تصب لها الفنجال بابتسامة/تفضلي ياعمة ام عمر بابتسامة/الله لايخليني من هالقهوة وراعيتها رغد بابتسامة/ولايخليني منك ياعمة ام عمر نزلت فنجالها/اتصل ابوك اليوم رغد تغير وجهها وبلعت ريقها وشدت بيدها على فنجالها وبصوت اهتز للحظة وسط ابتسامة شاحبة/عسى ماشر وش الطاري ام عمر تنهدت/يسأل عنك رغد نزلت نظرها الفنجال/عمة اذا ثقلت عليك ام عمر قاطعتها بحدة/رغد!!اخذتك من بيته وانا متكفلة فيك وللحين عند كلمتي ماغيرتها لاعاد اسمع هالكلام!! رغد زفرت بصوت وهي ماشالت عينها عن الفنجال ام عمر/رغد رغد ناظرتها ام عمر/اخذتك من ابوك بالقوة تاكدي محد له كلمة عليك محد ابد رغد غرقت عيونها دموع وضمتها/والله ياعمة بدونك اضيع والله اضيع ام عمر ابتسمت وهي تمسح عليها/لو الكل يتخلى عنك انا ماأتخلى يارغد مااتخلى رغد بكت ام عمر/وبعدين الله مايضيع احد يابنتي مايضيع احد رغد ماردت ام عمر/وابوك لاتشيلين همه دامك عندي مايقدر يسوي لك شي رغد تركت عمتها وهي تمسح دموعها/ادري اصلا ابوي مايبيني كل همه زوجته ورضاها ام عمر/لو تموت مالها كلمة عليك ارتاحي وتطمني رغد ابتسمت/مااقول الا الله يطول بعمرك بصحة ويخليك لي ام عمر بابتسامة/ويخليك/اختفت ابتسامتها/الا وينها فتنة؟ رغد/بالمدرسة ام عمر قطبت جبينها/للحين!! رغد هزت راسها بايه ام عمر/الله يعوضني بخير هالبنت مدري وش اخرتها معها رغد بابتسامة/وانا وين رحت!! ام عمر ابتسمت/اي والله انتي العوض كله مااقول الا الله يصلحها بس رغد بتردد/عمة ام عمر وهي تتقهوى/همم رغد سكتت ام عمر ناظرتها/وش فيك؟ رغد/الجوال ام عمر انخطف وجهها/لايكون درا فيه عمك!! رغد هزت راسها بلا/لا لا/ابتسمت/خلاص ماله داعي ام عمر بنرفزة/انا مااحب اللي يقول سالفة ويقطعها قولي رغد ابتسمت/خلاص والله خلاص ام عمر ناظرتها/قولي واخلصي عمر وقف عند طرف جدار البيت من ورا/يمّه ام عمر بابتسامة وهي توقف/ياهلا ياهلا جايتك الحين رغد اخذت نفس وهي تناظر عمتها وبنفسها/كل شي عيالها وانا طيب!! . ((السيارة)) طلال وقف عند المدرسة وهو يقطب جبينه من مظهر المدرسة اللي كل مافيها يعلن عن نهاية الدوام وهذا شي اكيد والوقت اكبر دليل نزل من السيارة بتوتر خفيف وهو يتعوذ من الشيطان ويطرد افكاره الشينة وقف عند بيت الحارس المجاور للمدرسة وهو يدق الباب الحارس خالد خرج وباستغراب/خير!! طلال/اختي للحين مارجعت والمدرسة مقفولة الحارس خالد/به طالبة وحدة هي والاستاذة اخر من طلعوا وتوها راحت مع الباص لها ابو عـشـر دقايق طلال زفر براحة/اي السواقين اليوم؟ الحارس/عواد اليوم دوره طلال/مشكور ماقصرت/مشى وهو يسرع بخطواته للسيارة وحرك بسرعة باتجاه البيت وهو مشغول باله جدا عليها/ . . {الـمـغـرب} فتنة متمددة عالمقعدة باستسلام للنوم اللي غلبها من كثر تعبها والمواصلة بالسهر صحت من نومها بتكذيب للي لمحته عيونها اللي لازالت تغفي بنومها فزت جالسة برعب وهي تستوعب اللي تشوفه الظلام يلفها من جميع الجهات تلفتت برعب وسط رجفة تسري بكل جسمها تبي تعرف وين ارضها من سماها لكن بدون اي فايدة الشي المطمن لقلبها المرعوب انها لازالت بالباص وبخير بدون اي اذى عقدت حواجبها وسط انفاسها المخطوفة من كثر الخوف وهي تناظر لقدام الباص اللي مفتوحة انواره عواد جالس باحد المخططات المهجورة اللي خالية حتى من الانارات فارش فرشته وهو جالس باخر ماوصل له نور السيارة شابّ ناره وهو يجهز دلته ومعطي السيارة ظهره فتنة مدت يدها الراجفة لشنطتها وهي تدور اي شي تدافع عن نفسها فيه وكان اخر حلولها مقص ورق صغير فتحته وهي تمسك طرفه اخذت نفس رغم الغصة اللي اجتمعت بنهاية حنجرتها وهي تعيش الموقف من جديد باختلاف الزمن والمكان وحتى الاشخاص مع اختلاف الغاية هالمرة تماما همست بينها وبين نفسها(وجعلنا من بين ايديهم سدًا ومن خلفهم سدًا فأغشيناهم فهم لايبصرون)كررت الاية بعدد ماقدرت تحسبه من خوفها واحيان تغلط وترجع تعيد الاية لفت طرحتها وتلثمت وشدت عالمقص بيمينها اللي ترجف وضمتها بيسارها كنوع من المواساة لنفسها حتى تهدا شوي وبالاول والاخير المواجهة معه هو حلها الوحيد فتحت باب الباص اللي اصدر صوت معلن عن تواجدها بالنسبة له اما بالنسبة لها بداية النهاية بعينها عواد ارتشف من اول فنجال من دلته بعد مامل من انتظارها تصحى انتفض قلبه من وصل لمسامعه صوت الباب والتفت غصب عنه وكله شوق وحب لصاحبة الرسايل العذبة..صاحبة صباحات ومساءات يومه الكئيب المتعب له..صاحبة منارة الامل اللي يعيش عليه كل يوم بعد مايأس من هالحياة بوفاة كل اهله والحالة النفسية اللي يمر فيها من سنة..صاحبة الصور المبهمة اللي مااكتمل شكلها بعيونه للحين..صاحبة روحه اللي تقتحم صدره مع كل نفس يتنفسه..همس برجفة صوت من كثر فرحته وسط ابتسامته المُحبة/فتنة؟ فتنة انخطف وجهها برعب وهي تضيع بافكارها(وشلون عرف اسمي؟..وش يبي يوصل له؟..ليش جايبني هينا)غرقت عيونها دموع من سيطرة السؤال الاخير لنفسها عليها ولا ردت عواد لف بجسمه بعد ماكان صاد وهو يلتفت عليها كله وبحب/حياك ياحياك فتنة بخوف وبهمس/صاحي ذَا؟بهالليل ويحيي بوحدة غريبة!!/اتسعت عيونها برعب وهي تناظره من بعيد/ عواد وقف وهو يتجه لها/شفتك نايمة مابغيت ازعجك قـ فتنة قاطعته بصرخة وهي تناظر قربه المفجع ومدت المقص بيدها الراجفة/لا تقرب والله اذبحك!! عواد انتفض قلبه بصدمة وارتسمت الصدمة على ملامحه وهو يناظرها بذهوله/فتنة!! فتنة بتهديد/سويتها قبل واسويها من جديد محد يردني سمعت!! عواد احتدت نظرته/وش قصدك؟!!تعرفين غيري يـافـتـنـة!!/صرخ/تعرفين!! فتنة بجرأة/مجنون انت صدق!!خلني اعرفك بالاول عشان اعرف غيرك!!رجعني للبيت الحين الحين عواد اخذ نفس وبكسرة خاطره/ليش يـافـتـنـة ليش كل ذَا!! فتنة قطبت جبينها باستغراب منه عواد/كم لنا ننتظر ونتواعد على هاللحظة!!انتي لي وانا لك!! فتنة اتسعت عيونها عواد/وهاذي الطريقة الوحيدة اللي تجمعنا سوا!! فتنة صرخت/باحلامك!!باحلامك تجتمع فيني!!مريض مريض والله ياعديم المرجلة/صرخت/رجعني البيت الحين رجعني!/صرخت بكل مافيها/ياناااااس يااااااعالم الحقوني مجنون مجنون خاطفني الحقوني عواد بكره لهاللكمة اللي يشوفها توصفه ويكره هالوصف(مجنون)اسرع لها بخطواته بعد الصبر والاخذ والعطا معها بهدوء وهو يحاول يحتويها فتنة اتسعت عيونها وهي تهدده بصراخ وسط تحريكها للمقص اللي شادة عليه بيديها الثنتين وهي تنزل وترجع لورا بخطواتها عنه/وربي تندم وانا قدها تسمع/وبرعبها وهي تناظر خطواته الثابتة لها عطته ظهرها وهي تجري بخطواتها مبتعدة عنه قد ماتقدر/ عواد جرى وراها بكل سرعته واحتضنها من ورا وهو يحاوطها بيديه فتنة صرخت صرخة رعب هزت المكان الخالي من حولهم . ((بيت ابو عمر1)) ام عمر جالسة وبدموعها وهي ترجف من الفجعة/اختكم راحت اكيد ماتت اكيد ابو عمر جالس بهدوء وعينه بالارض بوسط افكاره عمر بقلة صبر وهو جالس قبال ابوه وحوله اخوانه/يبه وشو له جالس!!مشينا نبلغ خلنا نلحق عليها نشوف وش الوضع عسى ربي يسترها ابو عمر رفع عينه بنظرات محتدة وهو يناظره طلال يغلي وهو شاد على قبضتيه وبحدة/وش تنتظر يبه يجيك خبر موتها!!هذا اللي تبيه صح؟!! ابو عمر من بين اسنانه بكل مافيه من غبنة يكبحها/واحد منكم تخطي رجله خطوة برا هالبيت والله والله مايردني غلاه عن المسدس شعرة ام عمر اتسعت عيونها طلال بصراخ/اجل يرضيك جلستنا بهالشكل قدامك لا اللي خليتنا ندور عليها ولا اللي نقدم بلاغ!! ابو عمر صرخ/طلااااال!!ورب البيت اول من يجيه اجله على يديني انت سمعت!! بدر/اللي تقوله يبه مايدخل العقل وش اللي تبي توصله بهالفعل وشو وشو!! ابو عمر عض على شفته وهو يفز واقف ام عمر وقفت بسرعة برعب من ابو عمر وجنونه رغد وقفت برا الصالة بعبايتها وبرجفة/ياعم عبدالله ابو عمر اتجه للباب بخطواته السريعة وهو يصرخ بوجهها/وش تبين انتي؟!!هي ناقصتكي انتي بعد فوقهم!! رغد انتفضت برعب واضح وهي ترجف مدت الجوال اللي بيدها له/هذا جوال فتنة ياعم ام عمر اتسعت عيونها بصدمة وهي تناظرها ابو عمر بحدة/ومن وين لها جوال هي بعد؟ رغد بخوف منه/طلال ياعم اشتراه لها ابو عمر التفت لهم يناظرهم بداخل الصالة بوسط نظراته الحادة عمر انخطف وجهه وهو يوقف/لحظة يبه تفهم الموضوع ابو عمر جرى لطلال وهو يحتضن رقبته بين كفوفه يخنقه وبصراخه/بعت اختك!!بعت عرضك ياخاين الامانة بعتها!! طلال يناظر ابوه بصدمة من كلامه القوي بحقه وشلون اخ يبيع اخته ممكن تصير لكن وشلون يقيم مشاعر طلال بهالخسّة والدناءة يناظره بدون اي مقاومة ام عمر جرت لهم وهي تصرخ/لااااا ياعبدالله تكفى لاااا //عمر وريان وبدر يفكون طلال من ابوهم بوسط صراخهم// طلال دف يدين ابوه عنه بكل قوته ابو عمر تركه وسط نظراته المحتدة طلال بصراخ وسط محاجر عيونه اللي تلتمع بدمعها/انا قلبي عليها اكثر منك!!هي بنتي قبل تكون اختي!!/بقهر وسط رجفة صوته/بعتها!!كيف تساومني على اختي وتتهمني بالباطل كيف!! رغد رفعت صوتها/عم عبدالله //الكل التفت لها وسط مداخلاتها الغريبة// رغد بصوتها المرتفع/ياعم مو وقته ابد اللي تسويه شف جوالها يمكن نوصل لشي اذا ناوي تكمل بهالعناد ولاتبلغ عنها!! بدر يناظرها بكل مافيه بكره ابو عمر اسرع بخطواته وهو يسحب الجوال من يدها بقوة وهو مانع كل شي عن فتنة حتى الدراسة لولا تدخلات اقنعته انها تدرس للثانوي فكيف بجوال بيد بنته التفت لطلال وبحدة/جهز نفسك والله ماتطلع من السجن لو تجيب اكبر راس يتوسط لك ياطلال والله لاخليك على كل لسان يالردي/خرج بخطوات سريعة وهو يتجه لمركز الشرطة/ ام عمر جلست بدون ماتنطق كلمة وهي تشوف بيتها تهدمت اركان سعادته بكل دقيقة تمر عليهم عمر ناظر طلال وبدر/دوروا حارس المدرسة وجيبوا السواق من تحت الارض الليلة/عينه على ريان/وانت خلك يمكن تجي للبيت وتبلغنا/مشى بخطوات سريعة يلحق ابوه/ طلال مشى خارج بسرعة ووراه بدر . فتنة متمددة عالارض منهارة بوسط دموعها وهي تقاومه بكل مافيها تضرب هالجثة الصامدة اللي مثبتتها بكل قوة لكن قوتها ورقة شجر تطفو على سطح بحر قوته عواد مثبت جسمها اللي عالارض تحته وهو منحني فوقها ومثبت يديها يناظرها وهي منهارة بدموعها وبحقده/كيف تظنين فيني الشينة وانا اللي طلبتك بالحلال كيف!! فتنة بدموعها/الله فوقك خاف ربك اذا تعرف من الدين شي خاااافه!! عواد صرخ/ماني ردي ماني لامسك ابيك بالحلال فتنة وهي تتحرك بكل حيلها تحاول تفك نفسها منه وبنفسها/يارب نجني منه يارب مالي غيرك يارب تحتي ارضك وفوقي سماك وانت الوحيد اللي تشوفه يارب احرقه يارب انتقم منه يارب عواد صرخ يأكد لنفسه صحة فعله/ماااااني ردي مااااني بردي يافتنة فتنة صرخت وسط دموع حرقت خدها/يااااارب لاتحلله ياااارب طلبتك شوفة عيني انتقم لي ياااارب عواد ترك يديها بفزع من كلامها وهو يعتدل بجسمه جالس فوقها وهو الصادق بكل كلمة يبيها بالحلال لكن رسايلها تقول عكس اللي يشوفه منها الحين وبغبنة وهو يصرخ بوجهها/انتي اللي اقنعتيني انتي!!كيف ترفضيني الحين كيف!! فتنة حررت يمينها منه وبكل قوتها غرزت المقص بفخذه اللي اقرب شي من جسمه لها عواد صرخ بألم من انغراز المقص وهو يقوم من فوقها فتنة سحبت جسمها لورا برعب وهي تبعد عنه وقفت وهي تلف عنه تهرب مبتعدة عواد وسط المه مد يده يحاول يمسك طرف مريولها او حتى عبايتها حتى ماتغيب عنه فتنة فلتت من يديه وهي تهرب بكل مافيها من قوة باقية كل همها تبعد تبعد عن هالادمي اللي يقول كلام متناقض مايمت لها باي صلة وتفسيرها الوحيد(مجنون لكن بعد اللي صار تاكدت مجرد حيوان حيوان تسيطر عليه شـ***) . ،،مركز الشرطة،، ابو عمر بخيبة ونظرة انكسار ووجه كل مافيه ينطق ضاع عرضي ضاع وبرجفة صوته/ولدي ولدي غرر باخته ولعب عليها باعها اللي مايخاف الله باعها وضيع العرض وانا عمك ضاع!! عمر بصدمة/يبه استهدي بالله وش هالكلام!! ابو عمر اشر على عمر/والله العالم اذا هاللي تشوفه له يد معه ولا لا!! عمر اتسعت عيونه بصدمة/يبه!! ابو عمر بحسرة/حتى بني صلبك ماعاد فيهم خير اويل حالك ياعبدالله ضاع التعب كله ضاااع الضابط/استهدي بالله ياعم استهدي بالله!!وهالحالات وضعها سري مايطلع عن القسم تطمن حنا ستر وغطا تطمن ياعم ابو عمر غطى فمه بكف يده وهو يكبح عبرته الضابط ناظر عمر/لو سمحت برا عمر بوسع عيونه/لكن الضابط بحدة/برا لحد ماننادي عليك برا لو سمحت عمر خرج مجبر ومكره ابو عمر مد الجوال للضابط/شف شف ليته يسوى يومه ضيعها ياليت!! . عواد لف هالمخطط المظلم بالباص مرة واثنين وثلاث بدون اي فايدة مالها اثر كان الارض بلعتها واخفتها زفر بكل مافيه من ضيقة العالمين وهو يتوجع من رجله اللي رابطها بشماغه اخذ نفس وهو يوقف بالباص نزل منه يعرج وقف وسط النور الامامي للسيارة وهو يثني يديه حول وسطه ويتلفت بيأس واضح عليه اتجه لباب الباص الجانبي وهو يفتحه ونزل شنطتها واغراضها ورماها عالارض وسط رصة اسنانه من كثر غبنته منها وانخداعه فيها وبحقد وهو يهمس لنفسه/موتي بهالمكان موتي وان حصلتي احد يدري بك او يساعدك هين!!/توتر وهو يرجع للباص من لاحظ سيارات شرطة بشك وخوف حرك الباص ومشى تركها بدون لايدور لها اكثر/ . {بدر و طلال} بدر يسوق وسط رجفة قلبه اللي بيخرج من مكانه من كثر توتره بعد مالقوا هاللي اسمه عواد بالبيت وحتى الباص مو موجود طلال وهو يغلي التفت لبدر وبحدة/امش!!وش ذَا!!اخلص!! بدر بنرفزة/وش اسوي انا الحين!! طلال اتسعت عيونه وهو يناظر الباص من الجهة الثانية وبصراخ وهو يضرب قدامه بيده ويتحرك بمكانه وهو شوي وينط من السيارة/الحقه الحقه لايضيع منك ذَا الباص ذَا هو الحقه يابدر الحقققههه . ((بيت ابو عمر1)) ام عمر ممتدة وهي ساندة راسها تحت يديها المثنية لافة طرحتها على راسها ومتلثمة فيها مغمضة عيونها بعد تلف اعصابها اللي للحين مستمر بدون اي خبر يذكر عن فتنة سواء بخير او حتى شر رغد جلست عندها بين يديها صينية فيها كاسة عصير وموية وتمر وسط وجهها الاحمر من البكا/ياعمة قومي اشربي ام عمر ماردت رغد بصوت يرجف وهي تمسك يدها تقومها/ياعمة تكفين ماحنا بناقصين فوق ضياع فتنة تتعبين انتي بعد تكفين قومي ام عمر اللي غرقانة بدموعها سحبت يدها/امشي عني يارغد اتركيني عنك رغد بعصبية/وشلون اتركك وانا اشوفك كذا!!قومي اشربي وكلي تمر اخاف يصير لك شي ياعمة تكفين قومي ام عمر ماردت رغد برجى/ياعمة تكفين ام عمر بدموعها/خليني اموت وارتاح بيتي انهدم خلاص انهدم الباقي منه كله انهدم على راسي رغد بصوتها المهتز/ماينهدم ماينهدم وانا معك ياعمة ماينهدم ابد تكفين قومي تكفين ام عمر سكتت ولاتحركت رغد جلست جنبها بياس وهي تنتظر شوي وبتعيد المحاولة معها . {بدر و طلال} بدر يسوق ورا الباص وهو يكبّس له بنور السيارة عواد عقد حواجبه باستغراب وهو يفتح له الطريق يييه يمر طلال بصراخ وهو يضرب قدامه/حدّه طلّعه عن الخط ماتعرف انت!!حدّه لااحدّ رقبتك الليلة حدده!! بدر لف وهو يوازي السيارة بالباص ويلف عليه عواد يناظره بصدمة/وش فيه خير الطريق قدامك!! طلال مد يده للدريكسون وهو يلفه بكل قوته عالباص عواد خرج عن الطريق وهو يوقف بالباص بفجعة من هالمجانين اللي استلموه وهو بطريقه ماغلط بشي طلال نزل من السيارة يجري وهو يوقف جنب باب الباص عواد فتح الباب مع فتحة طلال للباب طلال مد يده وهو يسحب عواد بكل قوته من مكانه ورماه عالارض وجلس فوقه بدون اي نقاش وهو يستلمه ضرب/وين اختي انطق يالخسيس انطق بدر مسك طلال وهو يرفع صوته/خل يتكلم اول لاحقين على جزاه ياطلال اتركه عواد دف طلال عنه بكل قوته وبضحكة/الله والحالة البنت واخوانها يستشرفون على راسي!! طلال مسكه وهو يشد على ياقة ثوبه وبصراخه/وين فتنة انطق تكلم بدر يناظره بحدة وهو يترك طلال يشوف شغله معه عواد وهو يمسك يدين طلال المهتاج/اختك هي اللي جتني برجولها!!فتنة هي اللي عرضت نفسها علي بدر انشلت انفاسه بصدمة من اللي يسمعه طلال بردت عظامه للحظة وهو يفك يديه من عواد/تخسى وتعقب لاتجيب طاريها على لسانك يالوسخ عواد صرخ/هي اللي حفرت ونبشت وراي سنة مايجيب رووس رجال البيت الا هالطريقة ذَا رايها وكلامها طلال ارتخى جسمه بصدمة وبفجعة من اللي يسمعه بدر جمع قبضته وهو يضرب عواد بكل قوته على وجهه/تخسى وتعقب يادني النفس يالخسيس تعقب عواد ضحك وبثقة/كل شي موجود بالجوال شوفوا جوالها وتعرفون من الصادق ومن الكذاب طلال تسلل الشك بفتنة لقلبه يناظره بصدمة مابين يصدقه او يكذبه صحى على صوت بدر بدر بحدة/امسكه ياطلال امسكه/جرى للسيارة وهو يجيب شماغه ورجع لهم وهو يربطه خنقه بيديه وبصراخ/وينها فتنة تكلم وينهاااا!! . فتنة بعبايتها المفتوحة وشيّال مريولها من جهة اليسار مقطوع من هالمجرم اللي ارعبها تحس بوجع خدودها وهو اللي ضربها كم مرة حتى يقدر يثبت يديها تجر خطواتها بثقل وياس وصدمة من اللي صار ماتدري هي وين لكن كل اللي تعرفه لازم تبعد لابعد مكان تقدر توصل له حتى مايوصل لها هو تعثرت وطاحت عالارض بكت بحسرة وهي تلفتت حولها كل اللي تشوفه ظلام بظلام وش بتسوي وكيف بتتصرف وقفت وهي تشاهق وتختنق بدموعها وعبرتها تسحب نفسها سحب تكمل طريقها اتسعت عيونها وهي تشوف نور سيارة من وراها جرت بدون لاتلفت برعب وهي تعيش أسوأ لحظات حياتها اكيد هو هو ذاك المجنون بكت جرت بكل طاقتها المتبقية وهي ماتشوف قدامها من كثر دموعها لكن هالنور يقرب منها اكثر وبسرعة اكبر من سرعة جريها جرت وجرت وجرت صرخت برعب من حست يدين تحاوطها من ورا تحركت بين يديه وهي تنتفض وبشهقاتها/اترتتتتررررككككنننيييي!!! بدر رفع صوته وهو يسمي/بِسْم الله عليك بِسْم الله بدر بدر يـافـتـنـة بدر فتنة بدموعها وهي للحين تقاوم ماستوعبت الصوت ولا اللي انقال وبترجي هالمرة/اتررررركنني الله يخليك اتركني بدر ضمها لحضنه بقوة وصرخ/فتنة بدر انا بدر فتنة وقفت حركتها وهي تستوعب صوته بدر تركها بشويش وهو يلفها بين يديه لوجهه حتى يشوفها فتنة لفت معه بين يديه واعتلت شهقاتها وهي تناظره/ااه اااه بدر ضمها لصدره بقلبه اللي يعتصر عليها وهو يحبس دموعه وبرجفة صوته/سوا لك شي؟صار بك شي؟تعورتي فتنة بكت بحرقة بين يديه وهي تدفن نفسها بحضنه تبي تتخبى فيه من فجعتها بكل اللي صار بدر باس جبينها وهو انهالت دموعه بحرقة قلبه على اخته المفجوعة/والله لاأخذ حقك منه والله وانا اخوك والله فتنة شهقت وهي تمد يديها وتتعلق بتيشرت بدر من فجعتها وهي تهز راسها يمين ويسار/لاااا لاااااا طلال مد يده وهو يسحبها من بين يدين بدر وتسبب برعبها بدر رفع صوته لها يطمنها/طلال طلال فتنة التفتت له وهي منهارة وبصوت شبه مختفي من كثر بكاها من فرحة وجودهم/طلال طلال تامل وجهها المجروح وقطب جبينه من تناقض تصرفاتها وكلام ذَاك الخسيس نفضها بين يديه وبقسوته وبصراخه/انطقي وش اللي جابك معه وشو له رايحة معه انطقي فتنة انخطف وجهها من صدمتها باللي تسمعه بدر سحبها من طلال وبحدة/مو وقتك ياطلال مو وقته ابد!! طلال دف بدر وهو يسحبها ويضغط على يدها/من وين عرفتيه تكلمي؟ فتنة هزت راسها يمين ويسار بفجعتها من كلامه وانخرست ماردت عليه بدر دف طلال بكل قوته وهو يسحبها بحضنه وبصراخه/صاحي انت!!تصدق ذاك وتكذب اختك صاحي!! طلال بصراخ/اسكت مالك شغل فتنة انهارت بين يدين بدر من صدمتها . ـــــــــــــــــــــــــ ـــــــــــــــــــــــــ ــــــــــــــــــــــــ //مر شهر على بيت ابو عمر وكان أسوأ شهر يمر// *الجوال أثبت ان المحادثات كانت من طرف فتنة رغم انها نفتها ورفضت هالاتهام وطلبت التحقيق مع رغد اللي تستخدمه معها لكن اتضح بعد التحقيق مالها اي علاقة بالجهاز كون صاحبة الجهاز والصور فتنة وبراءة رغد من هالاتهام.. *عواد تم اتهامه ووقع الحكم بتغريمه وسجنه لثلاث شهور ومنعه من الاقتراب من فتنة باي مكان وزمان.. *طلال عاش اسوأ شهر بحياته تم حبسه اسبوع على ذمة شكوى ابوه وبعد مرض امه تنازل ابو عمر ولكن منعه من بيته وحتى شوفة اهله.. *ابو عمر اللي منع اي فرصة لاي مستشفى يكشف عليها اتيحت له الفرصة اخيرا بسبب هالاتهام الظالم يسوي اللي يبيه بفتنة بدون اي اعتراض من اي شخص بعد المصيبة اللي كسرت الكل وتذكيره لهم لو كشفوا عليها تلطخت وجيههم بالتراب من سواد الحقيقة.. *فتنة توقفت حياتها عند ذاك اليوم وذاك الحادث اللي انظلمت فيه..ظل الموضوع حبيس صدور اهل البيت وماتسرب الموضوع لبرا ابد وظلت هي حبيسة البيت حتى لو تمرض ماتشوف غير جدرانه لكن مايهمها هالموضوع ابد كل همها علاقتها باخوانها يتحاشونها بكل ثانية حتى بالنظرات لو تلتقي تنصرف عنها بسرعة تغيرت هالعلاقة للعكس بعد المحبة حل الكره والبغض مكانها ماعدا شخص واحد فقط.. ـــــــــــــــــــــــــ ـــــــــــــــــــــــــ ــــــــــــــــــــــــ {{بـعـد شـهـر}} ((بيت ابو عمر1)) //بعد الكابة اللي والحزن اللي غطى جو البيت لشهر ارتسمت مظاهر تشبه الفرح رغم خفتها البخور غطى البيت..القهوة فاحت ريحتها وخالطت البخور..صواني الحلا والكيك غطى السفرة اللي تتوسط الصالة بفرحة برجعته للبيت// ،،المطبخ،، فتنة صدت عنها اول مالمستها وهي يحترق قلبها كل ماشافتها بقهر لكن ملتزمة الصمت بخوف لاتكون ظالمتها رغد دخلت وهي تحط الغلاية بمكانها تغلي لها موية فتنة تحط الموية بصينية تقديم خاصة فيه رغد وقفت جنبها وهي تمد يدها بتاخذ موية فتنة دفت يدها رغد اتسعت عيونها/خير!! فتنة شالت الصينية/مفارق وجهك الخير/مشت/ رغد ضحكت برضا وراحة وهي تشوفها حاقدة فتنة اتجهت الصالة ودخلت وهي تنحني تنزل الموية وسط انظار ابوها اللي حرقتها/اذلفي الله لايردك اذلفي بدر شد على قبضته بغيظ ريان سكت وهو ماله اي كلمة بهالموقف ولاتحسب له من الاساس فتنة اعتدلت بوقفتها وسط وجهها اللي تتغير وهي للحين مااعتادت هالجفا على انظارهم وصمتهم بدون دفاع منهم عنها عمر دخل وهو يرحب به/حياك ياحيّه ياهلا فتنة فز قلبها وهي تسابق خطواتها له وقفت قبال باب البيت بعيون تنطق فرح بشوفته طلال دخل فتنة قطبت جبينها باستنكار لمظهره طلال بوجهه الكئيب اللي تغير فيه شي من البشاشة وصار كله ينطق جلافة وحدة فتنة تقدمت بخطواتها له/نور البيت ياطلال اشتقنا لك يااخوي طلال ناظرها بحدة وهو يشد على قبضته ويمر من جنبها وبتهديد/انقلعي عن وجهي لاادفنك بمكانك فتنة انخطف وجهها بصدمة عمر مر من جنبها وهو يضرب كتفه بكتفها بدون اي كلمة فتنة طاحت دموعها غصب وهي تحس بخنجر انغرس بقلبها اخر شي تتوقع هالجفا منهم رغد واقفة على باب المطبخ عن طرف تناظرهم بابتسامة بيدها كوب قهوتها تحركه وهي تهمهم بابتسامة زفرت وهي تطلع الدرج برضا وطيب خاطر ، ، عواد برجفة صوته وبينهم الباب/فتنة!! فتنة انشلت كل خلية بجسمها عن الحركة وهي تعرف صاحب هالصوت زين عواد وقف على باب البيت وبيساره باقة الورد اللي باللون الاحمر والكيس الصغير اللي باللون الاسود وهو يمسك طرف الباب يسحبه يبي يشوفها كابر وكابر طول هالمدة لكن قلبه استرجع كل ذيك المشاعر اول ماحس انها ممكن تكون محبوبته/فتنة؟!! فتنة مسكت الباب وشدته بكل قوتها على جهتها وهي ترجف برعب وسط عيونها اللي امتلت دموع طلال خرج من البيت ووراه عمر وريان ابو عمر اللي واقف من قبل خروجهم يناظر اللي يصير بصدمة زلزلت كل اركانه وهو يناظر هاللي ينطق اسم بنته للمرة الثانية قدامه بكل وقاحة بوسط بيته وهو يكسر ظهره اللي توه استقام بعد ذاك الموقف بفعلته اللي يكررها بدون حيا عمر يناظر عواد بصدمة من وجوده ريان انتفض جسمه بخوف من اللي بيصير وهو يكره هالشخص اللي قلب حياة الكل بلحظة طلال اتسعت عيونه بصدمة وهو يناظر اللي يصير قباله صرخ بكل مافيه/فـتـنــة!!!! عواد التفت للصوت بفزع واتسعت عيونه وهو مانسى اللي صار بينهم رمى اللي بيده وهو يخرج يجري مبتعد عن المكان لو طاح هالمرة بيد هالادمي مايفكه منه الا الموت طلال انعمى عن عواد وجرى بجنونه لفتنة عمر جرى ورا عواد هاذي هي فرصته يطرد الشك باليقين ريان جرى ورا طلال وهو يحس قلبه بيوقف وهو يناظر قفاه فتنة قشعر كل جسمها من سمعت صرخته وضمت الباب لها اكثر هالمرة موتها على يدين طلال قبل عواد مافيها اي كلام ريان اللي توازى جنب لجنب بطلال المجنون دفه وهو يكمل طريقه وهو يسحب الباب بكل قوته فتنة تحركت مع الباب من قوة سحبته ريان احتضن فتنة بين يديه ويثبتها عالجدار وهو يحميها بجسمه وسط صراخ هالمجنون طلال اللي انهال بالضرب على ريان وهو يحاول يوصل لفتنة اللي مغطيها ريان بكل قوته فتنة تعلقت بريان وهي تبكي/ظلم ياطلال ظلم حرام عليك والله ظلم مظلومة ابو عمر اتجه لباب البيت متجاوزهم بدون اي تعليق وهو يقفل باب البيت وهو يناظر اللي يصير بهدوء طلال سحب ريان بكل قوته وهو يطيره عن طريقه واستلم فتنة اخيرا . عمر يسوق بسيارته وراه بكل سرعة بدون اي اهتمام لسرعته او حتى المرور اللي ممكن يصيده وحتى ساهر قطب جبينه وهو يشوفه يقطع الاشارة زاد سرعته وهو يقطعها وراه اتسعت عيونه بصدمة من السيارة اللي طلعت قدامه فجأة من الجهة الثانية قاطعه الطريق واصطدمت وجها لوجه وارتدت فيه لورا واستمرت تتقلب السيارة بعمر بدون اي قدرة منه عالسيطرة عليها او على نفسه . ((بيت ابو عمر)) ريان اللي بعد دفاع مستميت عنها مرتمي عالارض بجروحه بدون اي حركة ابو عمر مثبت انظاره ببرود وهو جالس عالارض متربع يناظرهم بصمت ام عمر تهل الدمع بدون اي قدرة انها توقف بوجه زوجها او حتى ولدها اللي صار نسخة ابوه القاسي فتنة ترجف بالم من جروحها بين يدين طلال طلال شادها من شعرها ورافعها له وهو يناظرها بحقد غيب عقله عن الموقف الواضح فتنة مسكت رجوله بيديها وبرجى يخالطه يأس من انه يسمعها وبدموعها/خذني للدكتورة اللي تبي والله والله شريفة طاهرة عفيفة ياطلال!!/وبوسط شهقاتها/حرام عليك ياطلال انا فتنة فتنة متى تحس على نفسك/صرخت/متى؟؟!!! طلال ضربها كف بكل قوته وهو يتركها فتنة طاحت عالارض وهي ترجف وتلفتت لريان وهي تزحف له بخوفها عليه/ريان ريان ابو عمر بحدة/هذا اللي تبينه تصير سمعتنا على كل لسان من سواد وجهك!! طلال وهو يدخل يده بجيبه يخرج سكينة جيبه ام عمر اتسعت عيونها طلال وهو يفتح سكينته بيد وحدة/سواد الوجه يبه ابشر باللي يمحيه عن اكتافك ام عمر جرت لهم وهي توقف بينه وبين فتنة اللي عالارض وراها وهي تدفه بعصبية وبصراخ وسط دموعها/والله والله ان سويت بها شي ماتروح من يديني ياطلال!! ابو عمر وقف/عزة ام عمر بصراخ وهي تلتفت له/الله لايعزك ياعبدالله قل امين!!سكت عنك وللحين مستمر بجنونك عطيته لولدك الله لايعزك ابو عمر مشى لها بخطوات سريعة وبحدة وهو يسحبها من يدها/ورب البيت لاتعضين اصابعك ندم!! ام عمر وهي تفك يدها منه/شبعت ندم من رضيت اجلس على ذمتك بعد ماهجرتني اتركني اتركني/صرخت بدموعها/فتنة فتنة ابو عمر ثبت ام عمر ماتركها تتحرك ام عمر تنادي بنتها بقلة حيلة وهي اللي ماتبعد عنها بالقوة طلال انحنى وهو يتكي على ركبته اليمين اللي ثانيها ورفع فتنة من شعرها ببرود وهو يرفع يده بسكينه فتنة تضربه من يديه بقوتها الضعيفة موج واقفة عالباب صرخت برعب من المنظر/طلاااااال!! طلال التفت يناظرها ولجزء من الثانية تردد ماحس الا بدفه قوية طيحته بدر اللي دف طلال برجله بكل قوته بعيونه الجاحظة من الغيظ والحقد اللي امتلى بصدره وهو يناظر اخوانه المرتمين صرخ/عدو عدو تخسي ماانت باخو خسيت يالعدو خسيت!! ام عمر بدموع الفرح وهي تناظره/بدر ابو عمر كشر بوجهه طلال ناظره بحدة بدر انحنى وهو يرفع فتنة لحضنه فتنة تضربه وهي تصرخ/ظلم ظلم اقولك ظلم ليش ماتصدقني ليش والله مااعرفه والله بدر ضمها لصدره/ادري ادري وانا اخوك ادري ابو عمر/مالك شغل يابدر مالك شغل بدر ناظر ابوه بحدة/اجل مين اللي له شغل انت!! ابو عمر انصدم من جرأة رده فتنة استوعبت صوته وناظرته برجفتها اللي اختلطت بدموعها/بدر!! بدر ناظرها وهو يضمها له ويمسح على راسها/بِسْم الله عليك ياعين اخوك بِسْم الله طلال مسك بدر من يده وهو يفكها بيمينه ويسحب فتنة بيساره بدر دفه بقوته اللي تعادل قوة طلال وهو يناظره بحدة/حط طرف اصبعك عليها والحين اتهمك بمحاولة قتل ياطلال انت/التفت لابوه/وابوك معك ابو عمر/وشوووو!!! بدر وقف وهو شايل فتنة اللي تنتفض بين يديه وبملامحه المحتدة وهو يناظر ابوه وطلال/والله والله بسابع سماه مايمر اللي صار مرور الكرام وانا بدر/وبتهديد/وتعرفون من هو بدر اذا حقد!!/ناظر امه/عبايتها وين؟ ام عمر وهي تمشي/داخل داخل الحين اجيبها الحين ابو عمر مسكها وناظرها بنظرات محتدة بدر صرخ بعناد وتحدي لابوه/يااهل البيت عطوني عبايتها ابو عمر/تعقب تطلع بها من بيتي بدر بحدة/مـاهـو مشكلة اعقب ولاتجلس بهالبيت معك دقيقة/ابتسم بتحدي/واللي تبي تسويه سوه موج اللي من لمحت بدر دخلت للبيت وهي تراقب اللي يصير من ورا الباب وسط دموعها وفجعتها اول ماسمعت كلامه جرت لفوق وهي تسحب عبايتها مو عباية فتنة ونزلت وهي تمدها من ورا الباب/خذ يابدر خذ طلال اتسعت عيونه واسرع بخطواته لباب البيت الداخلي وسحب العباية من يدها بقوة بدر/تدري عاد ماابي عباة مايحتاج/جلس جنب ريان وهو يحركه/ريان قم قم ريان كله كدمات وواضح ان رجله مكسورة تالم بدر/قم امش معي ابو عمر/ان طلعت ياريان لاترجع كلكم لاترجعون بدر/محد يبي مكان كله وحوش تنهش محد يبيه ارتاح ريان تعلق بيد وحدة برقبة بدر وهو ساند عليه بدر رغم الثقل اللي يحس به الا انه مشى اتجاه باب البيت الرئيسي بيخرج ام عمر/انتظروني يابدر رايحة معكم ابو عمر اتسعت عيونه/عزة!! بدر/ان شاء الله يمّه/خرج برا البيت وهو شايل فتنة بين يديه وساند ريان بتحدي واضح وصريح لابوه وطلال ام عمر ناظرت ابو عمر بحدة/مثل ماهجرتني اليوم دوري اهجرك ابو عمر بحدة/تتركيني ياعزة تتركيني!! ام عمر/تعديت كل الحدود سكت غصب علي اقول بكرة يرجع عبدالله لكن كل ماتكبر تتوحش اكثر واكثر!! ابو عمر احتدت نظرته بتهديد/البيت بحط به غيرك ام عمر/الله يهنيك ببيتك ماابيه/مشت وتركته وهي تتجه للبيت تاخذ اغراضها/ ابو عمر/عزة ام عمر ماناظرته ابو عمر صرخ/عززززةةةة!!! ام عمر طنشته ولااهتمت له ابد ،،وبذات الوقت داخل البيت،، طلال دف الباب وهو يدخل ويرمي العباية عالارض بعصبية موج رجعت بخطواتها لورا من دفته وهي تناظره بحقد طلال بصراخ/وش اللي تسوينه انتي؟ موج بكره وسط صراخها/طلقني ياطلال طلقني طلال احتدت نظرته/وشو!! موج بصراخ/كيف استأمن نفسي مع واحد مثلك واخته اللي هي اخته يضحي بها وهي مظلومة ويدري انها مظلومة طلال صرخ/موج!! موج بنفس نبرته/الحمدلله الحمدلله الف اللي ماعطاني منك عيال خيرة خيرة يالله لك الحمد طلال ضربها كف بكل قوته موج نزفت من طرف شفتها وهي تناظره بحقد/توجعك الحقيقة!!ايه مبسوطة مبسوطة ومرتاحة ان مافيه شي يربطني بواحد عديم انسانية ومتخلف فكر مثلك/صرخت/طلقني طلقني الحين طلقني طلال بحدة/اجمعي اغراضك وروحي بيت ابوك بنفسك موج/ماابي شي منك ماابيه الله يغنيني عنك/انحنت وهي تاخذ عبايتها وتلبسها ومرت من جنبه بدون مايرف لها جفن ندم عاللي قالته وهي رافعة راسها باعتزاز وتبي يرسخ بباله منظرها بهالشكل خرجت بخطوات سريعة وهي مامعها شي فقط عبايتها/ طلال عض شفته بقهر وهو يناظرها تخرج بدون اي اهتمام بدر برا البيت وقف جنب سيارته الايجار اللي وصل فيها للبيت ريان استند بظهره عالسيارة وهو يفتح الباب لبدر بدر نزل فتنة بالكرسي اللي ورا وسط انينها اللي وصل له عض شفته بغبنة وحزن على حالتها اعتدل بوقفته وهو يقفل الباب ويسحب يد ريان ويسنده ريان ابتسم وهو يستند عليه بدر لف للجهة الثانية وهو يفتح له باب الراكب ريان دخل وجلس بدر قفل الباب وهو يجلس بمكانه ورا الدريكسون ينتظر امه موج خرجت برا البيت بورطة وحيرة وهي تدري بخالتها مو موجودة ام عمر وقفت عالباب بدر رفع يده/هينا يمّه ام عمر التفت لموج/وش فيك تعالي نوصلك معنا موج بربكة/بس ام عمر مدت يدها وهي تمسك يد موج تسحبها معها وهي تتجه للسيارة موج تبددت قوتها بهاللحظة وبكت بصمت وهي تحس بحرارة احتوت جسمها من الموقف اللي صار . اللهم صل وسلم على نبينا محمد . #سلطان_الهوى_يافتنة_الألفية | ||||
|
| |
|
24-09-22, 09:52 AM
| #46 | ||||
| هالبارت المفروض تكتبين فوق بللون الاحمر تحذير هذا البارت يسبب الحموضه والحرقان والارتجاع والخفقان وياثر علي السكر والضغط علشان تخلين مسوليتك مدري ليش حسيت كل كلمة اقرائها كانها ضربه حجر بعظمي بس اخف احس بالعظم الكلمات قبل كان يكش جلدي يشب لحمي هذا عظامي كرهت اسم رغد كره كنت احب اسم طلال وكرهته فتنة الله يعينها علي اسمها | ||||
|
| |
|
26-09-22, 07:17 PM
| #47 | |||||
| اقتباس:
فعلا رغد قلبت بيت عمتها لمشاكل رغم معاملتهم الطيبة لها | |||||
|
| |
|
26-09-22, 07:18 PM
| #48 | |||||
| اقتباس:
بس ماطلع هالكلام الا انه وصلت لك كل كلمة كتبتها ❤❤ والله حتى انا احب اسم طلال مرة مدري ليش خليته شرير راح عن بالي 🌚💔 | |||||
|
| |
|
26-09-22, 10:27 PM
| #49 | ||||
| 19 اللهم صل وسلم على نبينا محمد - . ((نايف وياقوت)) نايف جالس بالمجلس مع عياله يلعبون ماد يديه قبال بعض مجد يمرر يده من بين يديه ابوه نايف اللي يقفل يديه ببعض يحاول يصيده وسط ضحكات مجد العالية سمو بحماس/لا لا انتبه بسرعة مر لاتخسر مجد بكلامه المكسر/لااا مايقدر علي بابا نايف اللي نزل يديه من شوي ضحك ضحكة شريرة وهو يناظره وبلغة الاشارة/صدق؟ مجد ابتسم وبحماس وتحدي هز راسه بسرعة/ايه نايف رفع يديه من جديد وبيده اشر/اتحداك سمو جلست على ركبها من حماسها وهي تشجع/بابا بابا بابا مجد يناظرها بزعل/وانا؟!! سمو/بابا يودينا السوبر ماركت اذا خسرت نايف اتسعت عيونه وهو يناظرها/بدري عليك للحين!!/سحبها لحضنها وهو يدغدها/ سمو بضحكاتها العالية وهي تقاومه/بابا خلاص والله خلاص نايف سحب مجد وهو يحطه جنبها ويدغدهم الاثنين وامتلى المجلس باصوات ضحكاتهم الشافية لقلب ابوهم ياقوت دخلت وهي تناظرهم وبابتسامة/ليه ماناديتوني ولا محد يبيني نايف تنهد وهو يناظرها سمو/ماما انتي اللي قلتي اخرجوا ماسمعتي وش باقول ياقوت جلست قبال نايف وبين مجد وسمو وهي تضم سمو بوسع عيونها/متى قلته؟!! مجد/حتى انا سمعتك ماما نايف يبرر لعياله وهو يلاحظ ضيقتهم وزعلهم منها/ماما بس تبي ترتاح شوي ماتقصد شي سمو ناظرت امها بتكذيب مجد بزعله/لا يابابا ماما كله كله تقول اوص اطلع برا كله كله نايف ناظر ياقوت وهو يميل فمه سمو/خلاص مجد ياقوت بربكة وهي ترفعه لحضنها ووجهه بوجهها/مااقول كذا الا وقت اكون تعبانة وابي ارتاح ياماما عرفت؟ مجد قام من حضنها وجلس جنب ابوه وهو يناظرها بغيظ مارد ياقوت قطبت جبينها باستنكار لردة فعله نايف باس راسه مجد رفع راسه يناظر ابوه نايف بابتسامة/روحوا البسوا نروح السرير ماركت سمو ومجد نطوا بحماس وجروا لغرفتهم ياقوت ناظرته/نايف انا نايف/شفتي ياقوت/وش تبيني اسوي يبيني طول الوقت له بعد ماينفع كذا!! نايف تنهد/وقتك لهم وان جيت ساعدتك مااقصر مااتركك لحالك ياياقوت عيالك بهالعمر محتاجينك اقضي كل دقيقة معهم بكرة يكبرون وتتغير تصرفاتهم وبتندمين ياقوت بنرفزة/طول وقتي بالبيت معهم مااقصر بس هم يبون طول الوقت قبالهم وانا مااتحمل هالشي نايف بحدة/عيالك!!اذا ماتتحملين من يتحمل ياقوت/الحين من زمان ماجلسنا مع بعض ويوم جلسنا نتخاصم مايصير يانايف مايصير نايف/البلا ماتشوفين خطاك!!تعبت معك ياياقوت تعبت!! ياقوت/نعم!! نايف/اخر حقوقي عليك عيالي اللي هم عيالك غيره ماابي منك شي مسامحك ومحللك ياياقوت ياقوت بحدة/وش قصدك!! نايف وقف وهو يناظر عياله اللي واقفين عالباب/قصدي واضح فمان الله/مشى/ ياقوت بغيظ/حتى ماكلف نفسه يسال اذا محتاجة شي او لا!! . ((بيت ابو عمر)) {المجلس} ابو عمر جالس لحاله فاتح ازارير ثوبه ورامي شماغه جنبه متربع وهو شاد على قبضتيه اللي تلامس ركبتيه بوجهه اللي ينطق غيظ من الموقف اللي صار وتحدي بدر اللي يدري فيه يسوي اللي براسه ولا يهتم لاأحد رن جواله اللي عالارض قباله زفر بوسط غيظه/استغفر الله العظيم!!/رن جواله من جديد رد بحدة/نعم!!! رغد ببكاها/ياعم الحق على عمر تكفى ياعمي تكفى ابو عمر انتفض قلبه وهو يوقف وبصوته العالي/وش فيه عمر وش صاير؟ رغد بشهقاتها/اتصلوا فيني المستشفى مافهمت وش يقولون تكفى ياعم تكفى الحقه الله يخليك تكفى ابو عمر اللي يمشي بيخرج من المجلس بصراخ/وينه اي مستشفى؟ رغد/مستشفى*** ابو عمر قفل الجوال وهو يوقف بوسط حوش بيته/طلااااال ولد ياطلاااااال الحق علي طلااااال . ـــــــــــــــــــــــــ ـــــــــــــــــــــــــ ــــــــــــــــــــــــ ((بـعـد يـومـيـن)) . ((شقة المفروشة)) {غرفة ريان وبدر} ريان متمدد عالسرير برجله المجبسة يناظر بدر/بدر فيه شي لازم تعرفه بدر قطب جبينه وهو يلبس ثوبه ويقفل ازاريره/وش؟!! ريان/ترا فتنة زواجها الاسبوع الجاي بدر اتسعت عيونه وهو يلتفت له/نعم!!! ريان/اللي سمعته بدر بنرفزة/وليش ماتكلمت!!توك تتذكر!! ريان/هو صارت فرصة!! بدر/ايه هالموضوع يبي له فرص عشان تقوله اكيد ابوي مزوجها غصب ريان/هو ابوي مزوجها صح لكن الصدق الرجال والنعم فيه بدر قطب جبينه باستغراب من ردة فعل ابوه/ابوي وافق عليه؟ ريان/حتى انا استغربت مثلك!! بدر ميل فمه لثواني بتفكير زفر/يصير خير اقول يصير خير . ((بيت ابو فواز)) سحايب خارجة من بيت الجدة سدول سلطان راجع للبيت من برا واقف عالباب يقفله رفع صوته وهو يناظرها/سحايب سحايب وقفت وهي تلتفت له/هلا سلطان سلطان مشى سحايب رجعت طريقها له سلطان اللي التقى فيها بوسط الحوش بابتسامة وهو يحاوطها بيده من كتفها ويمشي معها/وشلونك ووشلون العيال سحايب بابتسامة/الحمدلله بالف خير عساك بخير سلطان/محتاجة شي ناقصك شي وانا اخوك سحايب/عسى خيرك دايم وسابق ماتقصر ماني بمحتاجة سلطان وقف على باب بيت جدته/سحايب سحايب/سم سلطان/تدرين انه كل يوم واقف برا؟ سحايب تغير وجهها سلطان/يعني تدرين سحايب بنرفزة/ادري ياسلطان وماابي له شوف سلطان/اطلع واطرده راضية؟ماعلي ملامة؟ سحايب/لا اتركه سلطان قطب جبينه/ليش!!! سحايب/ابي ابرد قلبي ياسلطان ابي اشوفه مكسور مثل ماكسرني انا وعيالي سلطان/بس انتي ماتبين تشوفينه!!وشلون تبين تبردين قلبك!! سحايب تنهدت/على كثر ماابي اشوفه على كثر ماابي اشوفه مكسور ياسلطان ابيه يشوف افعاله وين وصلته المهم الحين تبي شي مني؟ سلطان زفر/لا مشكورة ماابي شي سحايب/اجل فمان الله/مشت لبيت ابوها/ سلطان يناظرها وهي تبتعد بحيرة من وضعها/الله يجبر قلبك وانا اخوك الله يجبره . {الـمـسـتـشـفـى} رغد جالسة جنبه وهي تبكي بهم عمر متمدد عالسرير ونايم بمغذيين متصلة بيده بكدمات ملت وجهه وغرز براسه وكسر بيده والاكبر كسر بحوضه ام عمر دخلت وهي تنزل سلة فيها اشياء دافية(شوربة نعناع وقهوة)وهي تحاول تتماسك قد ماتقدر رغد اول ماشافتها جرت لها/عمة/ارتمت بحضنها وهي تبكي/ ام عمر/الحمدلله يارغد اللي سلمه الحمدلله جت على كذا كل شي يتعوض ادعي له الله يشفيه رغد بهم/كيف اهتم فيه لحالي ياعمة كيف ام عمر/كلنا معك لاتشيلين هم ادعي له رغد بكت/الله يشفيه الله يشفيه ام عمر شدت على يدها وهي تبعدها عنها/لاتبكين قدامه ابد خليك معه يارغد الحين دورك ياترفعينه يايتحسس ولا يطيب ابد رغد هزت راسها/ابشري ابشري ياعمة الله يعيني ويساعده يارب ام عمر/يبي له وقت والوقت يبي له صبر اصبري وانا عمتك اصبري وانا معك لاتخافين ،،برا الغرفة،، بدر متكي بظهره جنب الباب وهو ينتظر امه اعتدل بوقفته وهو يناظرهم //ابو عمر وطلال متجهين للغرفة// ابو عمر احتدت نظرته وهو يناظره بدر ابتسم طلال يمشي ورا ابوه وارتسمت اكبر تكشيرة على ملامحه وهو يناظره ابو عمر وقف وبحدة/وش تسوي هينا!! بدر رفع اكتافه/اخوي!! ابو عمر/اخوك وانت تتعدى على ابوك ياللي ماتستحي ولاتخاف ربك بدر ضحك/الحمدلله اخاف ربي لكن الخطا ماارضى به حتى لو هو ابوي!! ابو عمر بتكشيرته/الردي ردي طلال شده من ياقة ثوبه بعيون جاحظة من الغيظ/هييييهههه بدر مسك يدين طلال وهو يضغطها بكل قوته/الحمدلله اخيرا عرفت وين تودي قوتك مو تحطها بالضعوف يارجال!! طلال ضربه على وجهه ام عمر خرجت وبحدة/طلااااال طلال التفت لامه ام عمر دفته وبعصبية/ابعد عن اخوك!!ماكفاك اللي سويته بريان ابو عمر بحدة/نقصي صوتك!! ام عمر/ماني منقصة صوتي وانت تحط حيلك بين عيالي!!مااسمح لك تهدم اللي بنيته سنين وانت لاهي مااسمح لك ابو عمر صرخ وهو يسحبها بيساره من يدها وهو يرفع يمينه بيضربها/عزة/التفت وهو يناظره بحدة وتبدلت النظرة لصدمة بلحظة/ طلال مسك يد ابوه بدر سحب امه ورجعها وراه ابو عمر رص على اسنانه بقهر وهو يسحب يده بقوة من طلال طلال/امي يبه امي ام عمر وهي تمسك بدر تسحبه بدر ثابت بمكانه يناظر ابوه بحدة ام عمر/امش يابدر امش هالناس كل ماكبروا كل ماعقولهم تزيل اكثر ابو عمر مر من جنب طلال وهو يدفه عن طريقه ودخل للغرفة وهو يكبح غيظه طلال تنهد بضيق وهو يناظره بدر ميل فمه بابتسامة سخرية وهو يناظر طلال/الحمدلله والله وطلع فيك خير!! طلال التفت لبدر بنظرات محتدة بدر مسك يد امه/مشينا يمّه مشينا لاتقسى قلوبنا مثلهم حتى الهوا حولهم معدي مشينا طلال عض شفته وهو يتوعده بينه وبين نفسه دق الباب وهو يدخل عند عمر .. {{{الـلـيـل}}} .. ((شقة مفروشة)) بدر متكتف وهو يناظره بحدة ام عمر جالسة جنب بدر فتنة عن يمينها بدر ويسارها ريان جالسة تناظر اللي قبالها بحدة ابو عمر قبالهم عالكنبة طلال جنب ابوه وهو يناظرهم بكره ام عمر بغيظها/خير وشو له جاي ولا ناوي تكمل اللي سويته اليوم؟!! ابو عمر ناظر فتنة/زواجك بدر كشر بوجهه فتنة قطبت جبينها وهي تناظره/وش فيه؟ بدر قاطعهم/قبل كل شي ينقال طلال بغبنة/انت اسكت مالك شغل بدر بحدة/انت اللي اسكت يكفي راز وجهك بعد سواتك ولاطردناك!! طلال وقف وبصراخ/ماتستحي انت شايفني ساكت لك تتمادى!! ابو عمر بحدة/بدر!!!/مسك يد طلال يجلسه/ بدر طنشهم وهو يلتفت لها/هاللي جايبه ابوي موافقة عليه؟ فتنة سكتت بدر/سألت عنه بس محد يعرفه وكلهم يعرفون ابوه ويشهدون لابوه بالخير فتنة زفرت/ابوه زين وامه واولهم جدته يابدر ناس طيبين بالحيل بدر تنهد/بس يـافـتـنـة ابو عمر قاطعه/سمعت رايها وشو له تشكك بها!! بدر ناظر ابوه وبحدة/لازم تعرف كل شي!! ابو عمر/هاذي هي قالت لك تبيه وش تبي اكثر بدر التفت لها/ماعليك منهم كل شي علي اللي تبينه سويه ولايهمك احد ابو عمر شد قبضته بغبنة فتنة/موافقة يابدر موافقة ابو عمر/دامك سمعت اسكت لاتنطق شي/ناظر فتنة/زواجك نبي نأجله لحد مانشوف وش وضع عمر ام عمر/وهذا اللي بيصير اخوها للحين مريض فتنة بعناد/لاااا مايتاجل ابو عمر اتسعت عيونه/وشو!! ام عمر انصدمت وهي تلتفت لها/بس يـافـتـنـة طلال بحدة وهو يقاطع امه/مو بعلى كيفها بدر/على كيفها لحالها زواجها مو بزواجكم انتم!! فتنة/ولدكم الله يرفع عنه ولايبتلينا واللي معترض لايحضر يوفر علينا مكان ابو عمر صرخ/فتنة!! فتنة وقفت/اذا هذا موضوعك وصلك الجواب/مشت وتركتهم/ ابو عمر ناظر ام عمر وبعصبيته/عاجبك اللي يصير عاجبك!! بدر بابتسامة/زواجها وهي حرة ومثل ماسمعت معترض لاتحضر ابو عمر وقف/عساك تلقى اللي يعل قلبك وينحره مثل ماعليتني يابدر قل امين بدر بابتسامة/الحمدلله دعوة الظالم مردوده ابو عمر/الله يرزقك بولد مثلك يابدر/مشى بخطوات سريعة/ بدر بصوت عالي يغيظه اكثر/امين ياحظي والله ام عمر/خلاص يابدر خلااااص ابو عمر وقف عند الباب وهو يلتفت وبنبرته العالية/وانتي ارجعي بيتك حتى نجيب ولدك فيه سمعتي ام عمر كشرت بوجهها/مالي رجعة ابي ورقة طلاقي ابو عمر/وش تفرق ورقة الطلاق وحنا من سنين مثلهم ارجعي ولك علي مااجيه سمعتي/خرج/ طلال بحدة وهو يناظر بدر/لاتحسب انك بترتاح وانت تعق ابوك استعد يابدر للعسر بعمرك استعد بدر بابتسامة سخرية/اهون من الظلم توكل بس توكل طلال خرج بخطوات سريعة ام عمر/اخطيت يابدر بالحيل اخطيت بدر وقف وبغيظ/لا يمّه لا!!خليهم يعرفون ان اللي سوووه حرام قبل مايكون غلط تمادوا بالحيل والحين انا اللي بتمادى وبكيفي محد له كلمة علي . ـــــــــــــــــــــــــ ـــــــــــــــــــــــــ ــــــــــــــــــــــــ {{بـعـد أسـبـوع}} . {الـعـصـر} . ((بيت ابو فواز)) ،،الصالة،، ام فواز نزلت الدلة واغراضها بابتسامتها الواسعة وهي تجلس قبالها/ياحيك ياعمة ياحياك رضا الخاطر علينا الحمدلله يالله لك الحمد الجدة سدول زفرت/لاوالله للحين مارضي لكن الشكوى لله نصبر لاجل عين تكرم مدينة ام فواز وهي تمد لها الفنجال/افا ياعمة افا وش اللي مارضي وبكرة الفرح كله!!سويتي اللي تبين ومحد له كلمة عليك!! الجدة سدول وهي تزفر/ايه بوطي الخشوم مـاهـو من قلب!! ام فواز/استغفر الله ياعمة وش هالكلام!! الجدة سدول/اتركي عنك الامور اللي خلصنا منها ام فواز قطبت جبينها/امري ياعمة الجدة سدول/مايامر عليك عدو/سحبت الكيس الرمادي اللي جنبها ومدته لها/خذي ذَا مرسول لك ام فواز اخذت الكيس باستغراب وهي تناظرها/من مين؟ الجدة سدول تتقهوى/لافتحتيه عرفتي ام فواز سحبت علبة الطقم المخملية السودا وفتحتها وغرقت عيونها دموع ، ، ،،قبل15سنة..تحديدا قبل زواج سلطان بيومين،، سلطان واقف قبال امه بخجل وهو ساكت ام سلطان اللي تغسل الصحون/سلطان لاتوقف كذا رح شف لك شغلة سلطان واقف بالجهة المقابلة/ماعندي شي ام سلطان/رح لخواتك اكيد محتاسين مع الحنا سلطان بغيظ/ليش ماتحنيتي للحين يمّه ام سلطان/شوي لاخلصت شغل البيت ان شاء الله سلطان/ماشاء الله وهم يتحنون عذر عشان مايشتغلون ام سلطان تنهدت/رح بس شف وش يبون سلطان تقدم وهو يمسك يدها اللي غرقانة صابون ويفتح الموية عليها ويغسلها ام سلطان سحبت يدها منه بوسع عيونها/والله ماانت بصاحي وش فيك ياولد!! سلطان سحب يدها بيساره من جديد وهو يدخل يمينه بجيب ثوبه يخرج خاتم ذهب ويلبسها اياه ام سلطان تناظره وضربته على كتفه وهي تسحبه بتخرجه من اصبعها/يالمسرف خل فلوسك لك عليك مصاريف واجد!! سلطان مسك يدها وهو يرجعه باصبعها لمكان ويحتضن يدها/والله والله ان الود ودي اكسيك ذهب من راسك لرجولك ياجنة سلطان ام سلطان تغير وجهها وهي تكبح عبرتها سلطان/لكن معوضة خير ابشري بالرشرش اللي عجبك ابشري يمّه ام سلطان بعيونها اللي امتلت دموع/جعل خيرك سابق وانا امك الله ينعم عليك لكن ماابي شي احسن ماعلي اشوفك مرتاح ومبسوط ياعيني سلطان باس كفها/ابشري والله ان ترقصين به بسابع ولدي ابشري ، ، الجدة سدول زفرت وهي تناظرها/وش فيك يامرة؟!! ام فواز وعينها بالرشرش اللي بالعلبة وهي تبلع ريقها تكبح عبرتها/والله ياعمة ان ارقص به قبل سابع ولده يبشر يبشر الجدة سدول ابتسمت/امين امين . ((شقة بدر)) ،،غرفة فتنة وامها،، بدر دق الباب وفتحه وهو يناظرها بابتسامة/فتنة بدر فتنة التفتت له وهي جالسة عالارض تكوي ملابسها بدر تنهد بضيق من فكرة زواجها وهو يجلس جنبها/خلصتي اغراضك فتنة ابتسمت/كلها شنطة خلاص شوي واخلص بدر/اذا محتاجة شي مـ فتنة قاطعته/عساك سالم مو محتاجة الله يكثر خيرك بدر وهو يمسك يدها يوقفها عن شغلها/فتنة فتنة ناظرته بابتسامة/امر بدر/اذا بقلبك ذرة لو هي ذرة تردد ماتبينه قولي لي وانا اتكفل بكل شي لاتشيلين هم وانا اخوك لاتشيلين هم ابد فتنة ضغطت على يديه/تاكد لو مترددة والله والله مااوافق عليه ابد يابدر تاكد بدر زفر بضيق واضح لها فتنة ابتسمت/خلاص بدر لاتشيل هم انت بنفسك تقول دامه ولد ابو فواز ينشرى وانت سالت عنه ليش ضايق صدرك بدر/والله ماودي بشي يضر خاطرك تسوينه وانتي ماتبينه طيب تدرين عنه قالوا لك؟ فتنة شدت على يده/بدر تطمن تطمن دامك معي ماعلي من احد بدر/لكن هو فتنة قاطعته بابتسامة/اهم شي اني مرتاحة يابدر ادري انك خايف لان ابوي ورا الموضوع لكن اللي وراه جدتي بدر قطب جبينه/اي جدة؟!! فتنة ضحكت بخفة/المهم الحين اني موافقة لاتشيل همي يابدر ارتاح بدر ميل فمه بعدم راحة لكن ماحب يضغط عليها اكثر ام عمر دخلت/بدر بدر التفت لها/سمي يمّه ام عمر/رح لريان ساعده بقياس ثوبه بدر وقف/ان شاء الله/مشى/ ام عمر/تبين اساعدك بشي فتنة طول هالاسبوع تعامل امها بجلافة رغم تودد امها الواضح لها وبتكشيرة/لااا مشكورة ام عمر باحراج/فتنة اذا ناقـ فتنة قاطعتها وهي تكوي وبدون لاتناظرها/مو بناقصني شي والله لايحوجني لااحد ام عمر بلعت ريقها بانكسار وهي ماتقدر تلومها على تصرفها معها/زين زين تبين شي؟ فتنة/لا بس قفلي الباب وراك ام عمر خرجت وهي تقفل الباب وراها بضيقة صدرها فتنة وهي تغلي للحين تحس قلبها مليان على امها وكثير . ((بيت ابو فواز)) //تغطى بيت ابو فواز والجدة سدول بعقود اللمبات اللي تعلن الفرح بهالبيت لكل الحارة واللي يمر منها وهذا بامر الجدة سدول فرض عالكل بدون اخذ راي احد// ،،الحوش،، //الجدة سدول وسحايب وعجايب وسدول وسلطان وثابت وعلي جالسين عالفرشة بوسط الحوش وهم يتقهوون والصغار وراهم يلعبون بدون عيال فواز// سلطان بفرح يحتوي صدره لدرجة انه مكذب اللي يشوفه يسرق النظر ليدين جدته وخواته اللي مصبوغة باللون الاحمر من رسمات الحنا الي تعلن له وتأكد له فرحته بكرة زواجه بكرة حقيقة مو حلم والاهم من ذَا عجايب وهي تناظر الصندوق اللي من الخيش بحضن الجدة سدول وبفضول ذبحها/تكفين ياجدة تكفين ارحمي حالي وقولي وش فيه بموت بموت لو ماعرفت سلطان اللي يفتح التمر ويخرج نواه ويحطه بيد علي اللي جالس جنبه ابتسم وهو يسمعها/ارحميها ياجدة ارحميها الجدة سدول/موتي انا طالبتك موتي محد مناشبني بعمري غيرك!! عجايب/بِسْم الله علي والله لاانشب لك لحد ماتودعين قبلي يالعجوز الجدة سدول رفعت عصاها وهي تبي تضربها/عجوز تشيلك وتهبدك قولي امين وقاعدة على قلبك قاعدة ثابت ضحك/عاد ياجدة تدرين كل يوم تتحلم بورثها من وراك الجدة سدول/والله والخيبة اذا تحترين شي من وراي ماوراي غير الفلس سلطان ضحك عجايب بنص عين تكذبها/علينا علينا ياسديل الجدة سدول بغيظ/والله لو عندي لاكتبها وصية ماتذوقين منها هللة سمعتوا كلكم شاهدين عجايب/هب يالحسد!! الجدة سدول/هب ياعينك اللي تقطع الرزق من قاعه سدول/بِسْم الله عليك ياجدة بعد عمر طويل ان شاء الله سحايب ضحكت/ياجدة عجايب تحبك والله بس تقوله لكن الصدق تموت لو يصير لك شي الجدة سدول/الا عيد عندها عجايب/الحمدلله تدرين!! سلطان ضحك وهو يضم علي لجنبه شبه محتضنه/شف ياعلي/ناظر جدته/شف العجوز حاليا/ناظر عجايب/والعجوز مستقبلا ثابت ضحك/اصلا مايحتاج نشوف مستقبلا هاذي هي نسخة واضحة من الحين عجايب بغيظها/وش قصدك عجوز انا!! الجدة سدول زفرت براحة/الحمدلله ذوقي ذوقي ماذقت يالله لك الحمد صدق الظالم ماأتعداه دعوة المظلوم عجايب شهقت/يمّه منك!!بوش ظلمتك انا!! ذهب وسجايا خرجوا وهم شايلين كيكة علا خرجت وراهم حاطة حزام السماعة اللي يتردد صداها على كتفها(عزوبية.. عزوبية..عزوبية وداعاً للعزوبية..وداعاً للسهر والطيش لقيت اللي تحس بيّ...)وبيديها شايلة كيس مليان اغراض //تجمعوا الصغار اللي شافوهم حولهم بحماس وهم مابين صراخ وضحك وتصفيق// الجدة سدول مسكت راسها بصداع من الازعاج وهي تكتم هوشتها بقلبها سلطان التفت وهو يناظرهم باستغراب مو فاهم عجايب فزت وهي تركض لهم سحايب وقفت وهي تزغرط سدول وقفت وهي تناظرهم بابتسامة وتصفق ذهب وسجايا وقفوا عندهم وسط صراخ عجايب اللي تبعدهم عن طريقهم ثابت وقف وهو يمسكها معهم وانحنوا قبال سلطان وهم ينزلون الكيكة سلطان اتسعت عيونه بصدمة وهو يناظر الكيكة اللي مكتوب عليها(الف مبروك)وعليها قبعة تخرج الجدة سدول بحدة/علا عساك ماانتي بعلا سكري البلا اللي معك صدعتي براسي علا/وناسة ياجدة وناسة ليش اسكره الجدة سدول وهي ترفع عكازها/والله براسك بهالعصا اعلمك الوناسة سدول قفلت السماعة/قفلناها ياجدة قفلناها سحايب وهي توزع الاغراض حول الكيكة عجايب باحراج وهي تناظر سلطان وهي ترتب مع سحايب/عاد السموحة وانا اختك الفاشل مايعرف زواج من تخرج ثابت/عاد حشرتوني وذا اللي لقيته سلطان بلع ريقه يكبح عبرته/لي انا؟! سجايا وهي تغرز شموع الشرار بالكيكة/مين بيتزوج غيرك عندنا عجايب ضربتها على كتفها سجايا صرخت بوجهها وهي تلتفت لها/اااه الجدة سدول/الله يصدع بعدوينكم ماتعرفون تسكتون كلن يهرج من عنده اوص اوص اوص ثابت صرخ/اااوووووصصصصص!! //الكل سكت// سلطان اخذ نفس يكبح مشاعر المحبة اللي فاضت وارتسمت على وجهه اللي تلون من فرط شعوره/والله مدري وش اقول سجايا ولعت الشموع بابتسامة/قص الكيكة وحنا نقول مبروك ياسلطان الجدة سدول صفقت وهي تغني/عريسنا يابدر بادي دامت لياليك السرور.. علا نزلت الفناجيل من الصينية وهي تقلبها وتدق لجدتها //الكل صفق وسط صوت الجدة سدول العالي وهدوء الصغار بعد ازعاجهم وزغاريد عجايب وسحايب وتصفير ثابت// الجدة سدول/عريسنا ياعطر زاهي..غلّب على كل العطور سلطان رفع يمينه اللي ترجف ووضحت بالسكينة اللي اهتزت للحظة بوضوح للكل وقص الكيكة //اعتلى صوت الكل بالتصفيق والزغاريد// الجدة سدول بكت وهي تزغرط/مبروك ياعسااااه مبروك ياسلطان ياعساه مبروك يامضنون عيني . ام فواز تراقبهم من بعيد من الصالة وهي قلبها يفز تتمنى تكون معهم ابو فواز اللي نزل من غرفة النوم من كثر الازعاج اللي واصل عنده فوق وقف وهو يناظرها/نورة ام فواز فزت/سم ياجابر ابو فواز/وش اللي صاير اقلقتوا الجيران!! ام فواز بابتسامة/لا بس البنات مسوين حفلة لسلطان تدري بكرة زواجه ابو فواز ميل فمه بتردد للحظة/وليش ماانتي معهم؟!! ام فواز اتسعت عيونها بصدمة منه/هاه؟ ابو فواز زفر/اذا خاطرك تكونين معهم روحي يانورة روحي مالي كلمة عليك ام فواز بربكة/كيف اروح الحين ماينفع ابو فواز/وش اللي كيف!!عيالك تبين تروحين روحي وقولي لهم يقصرون اصواتهم الحارة ماهي بلهم لحالهم فيه ناس غيرهم/رجع طريقه لغرفة النوم/ ام فواز التفتت تناظرهم بتردد . ،،الحوش،، //بعد ماخلصوا الكيكة ورفعوها جالسين يسولفون بهدوء// ثابت زفر/والله تدرون جوكم بالحيل بيض/ناظر سلطان/العذر منك بس ذي الحقيقة سلطان ابتسم/الا يازين جونا انت اللي تدور القلق عجايب/ايه غصب بيض اللي ماينسق ويخطط وش تبي يطلع يعني!! ثابت وقف/علا روحي جيبي الطيران علا فزت واقفة/حاااضر/جرت بحماس/ الجدة سدول/اهجد ياثابت فك اباليسك بكرة اتركنا نرتاح الليلة ثابت وهو ينحني ويمسك سلطان من يده/قم ياعريس سلطان وقف بابتسامة ثابت غنى/يامدلع/غمز لسلطان/يازين ماترحم اللي //البنات صفقوا وهم يوقفون واختلط الصراخ والزغاريد وسط التصفيق// ثابت رفع صوته وهو يرفع يده ويلف الفرشة وهو يخطي بخطواته يرقص وسط نظرات سلطان/عايش بحبك مولع بسك دلع سلطان رقص معه وسط صراخ خواته الحماسي من بدا يرقص البنات غنوا/يامدلع يازين ماترحم اللي عايش بحبك مولع بسك دلع الجدة سدول فتحت صندوقها الصغير وهي تاخذ من الصندوق حلاو اللي مربوط فيه مبالغ مختلفة وترشه عليهم //الصغار صرخوا بفرحة وهم يجمعون من الارض// عجايب زغرطت بفرح وسط عيونها اللي امتلت دموع البنات/مانركب الا كلوزر لاجا مع العرق يطلع بسك دلع ثابت مات ضحك وهو يرقص ويتخليهم راكبين السيارة سجايا نطت وهي ترقص ووقفت جنب سلطان وهي توازيه بالحركات سلطان ابتسم وهو يمد يده لفوق لجهتها سجايا رفعت يدها ومسكت يده وهي ترقص معه البنات/وختامها بري حالي عليك ياراس مالي بسك دلع يامدلع يازين ماترحم اللي... فواز دخل بوسط ملامح محتدة من اصواتهم اللي واصله برا قطب جبينه وهو يناظرهم/ماشاء الله ماشاء الله!! //الكل سكتوا وناظروه// الجدة سدول/كمّل طريقك يامفرق الجماعة كمّل طريقك فواز مشى لهم بابتسامة وهو يتفحص بنظره الوضع/ومستانسين وحالة!! عجايب/ليش!!نصيح يعني!! فواز بابتسامة/اي والله صيحوا على وش مستانسين!!/ناظر سلطان بسخرية/على زواجه!! سلطان احتدت نظرته وهو يشد قبضته بغبنة من فواز اللي مستكثر الفرحة عليه/ايه نستانس ونفرح وش عليك انت!! فواز بسخرية/خلني اسكت بس الجدة سدول/الحمدلله جت منك توكل كمّل طريقك فواز بابتسامة/افرحوا افرحوا ماتدرون بكرة وش يصير لا درت العروس بسواياه اجل وحدة صاحية تقبل به!! ام فواز وقفت قباله وبحدة/وليه وش ناقصه سلطان يافواز!! //الكل التفت لها ومحد توقع وجودها// سلطان انصدم من وجودها وهو يناظرها واتسعت عيونه وهو يشوفها لابسة الرشرش انتفض قلبه من جمال الشعور وناظر فواز بابتسامة عفو عن كل مايقوله الليلة فواز اتسعت عيونه/يمّه!! ام فواز/وش زايد عنه فيه!!كلكم عيالي وعيال تسع شهور بالتمام والكمال محد زاد عن احد منكم يالاثنين فواز بعصبية/بس يمّه انتي ام فواز قاطعته بحدة/احترم نفسك يافواز ياتقول خير يااذلف عنا خلنا نفرح مثل مافرحت انت بنا معك فواز بغبنة/كيف تقارنينه فيني يمّه كيف!!هو مسـ ام فواز قاطعته/اول عيالي واول فرحتي مالك حق تمنعني منها سمعت وايه يافواز غلاه منك فواز يناظرها بصدمة ام فواز/وواجب عليك تحترمه اقلها بوجودي سمعت فواز/خليه ينفعك اجل/مشى بخطوات سريعة لبيته/ ام فواز اخذت نفس وهي تناظر سلطان بابتسامة/مبروك ياسلطان مبروك ياولدي سلطان ابتسم وهو يبوس راسها ويدها/الله يبارك فيك ياجنة سلطان الله يبارك فيك الجدة سدول غنت بابتسامة/لطيف الروح ذَا الليل دنّا ياحن قلبي عجايب رجعت تطبل بابتسامة ذهب زغرطت بعد ماكانت مكتفية بالتصفيق سحايب وسجايا بصراخ/ياحن قلبي ام فواز مسكت يد سلطان وهي ترقص معه الجدة سدول غنت/على كفه رسم نقش حنا ياحن قلبي ثابت صفر/اويلي ياحن قلبي علا بصراخ/عاشت ام سلطان عااااشت الجدة سدول/وفي خده تمثنى الوشامِ ياحن قلبي البنات بصراخ/يااااااحــن قـلـبـي //واستمرت الليلة الجميلة برقص وسوالف// . ((بيت ابو راضي)) ام راضي تتقهوى وسط سوالف بناتها وضحكهم ساجي دخل/السلام عليكم/وقف واحتدت نظرته وهو يطالع عزيزة ورجع طريقه/يمّه انا بالمجلس انتظرك ام راضي تنهدت/قومي ياعزيزة عزيزة بعناد/ماني بقايمة يمّه مو بيته عشان اطلع!! سماح/قومي عزيزة امي تعبانة!! عزيزة/قولي له هو يجي اذا خايف على امي مو يقول انا بالمجلس!!ولا العتب علي بس!! ام راضي زفرت وهي تلتفت لرحمة/تعالي ساعديني عزيزة عضت شفتها بقهر وهي توقف/خليه يجي الله ياخذه هو واللي ميت عليها ذي/مشت بخطوات واسعة وكلها زعل وقابلت بطريقها راضي/ راضي ناظرها باستغراب وهي تمر دخل/السلام عليكم ام راضي ابتسمت/وعليكم السلام والرحمة راضي انحنى وهو يسلم على راس امه ثم سلم على خواته جلس قبالهم وناظرهم/اطلعوا شوي ابي امي بسالفة ام راضي قطبت جبينها وهي تناظره البنات خرجوا ساجي دخل وسلم على امه ثم على راضي وجلس جنبه ام راضي بزعل/الى متى ياساجي!الى متى؟ ساجي قطب جبينه/وشو يمّه؟ ام راضي/يرضيك هاللي تسويه باختك؟!! ساجي كشر بوجهه ام راضي ناظرت راضي/ماتقول لاخوك وتعلمه!!الاي يسويه قطيعة ذي اذا مايدري ساجي/يمّه انا جايك بموضوع اهم ام راضي وهي تمرر نظرها بينهم/الله يجعله خير وش وراكم يالاثنين ساجي التفت لراضي/قول ياراضي راضي ناظر امه/يمّه نويت اتزوج ان شاء الله ساجي ارتسمت ابتسامة عريضة على وجهه وهو يناظره ام راضي اتسعت عيونها بوسط ابتسامتها/صدق!! راضي هز راسه بايه/ان شاء الله ام راضي زغرطت بفرح/عالبركة مبروك ياراضي مبروك راضي بضحكة خفيفة/بالاول يوافقون يمّه وبعده باركي ام راضي/تحمد ربها تلقى واحد مثلك امها داعية لها هالبنية ساجي باستغلال الفرحة/وانا يمّه ام راضي بفرحة اكبر/تبي تزوج بعد!! ساجي/قولي تم يمّه تم ام راضي بابتسامتها/تم ياساجي تم ساجي/يمّه ابي ارجع سدول تكفين يمّه تكفين لاترديني ام راضي اختفت ابتسامتها راضي زفر بضيق ساجي/يرضيك يمّه اول فرحتي اللي انتظرها من سنين ماحسيت فيها للحين يرضيك ام راضي زفرت وسط تكشيرة مرتسمة على وجهها ساجي/تكفين يمّه ابي ارجع سدول يمّه تكفين ام راضي/بعد اللي سوته هي وامها والله ماترجع لك ابد ساجي انخطف وجهه/يمّه ام راضي زفرت وسط عدم رضا/لكن شفعت لك فرحتي براضي ساجي ارتسمت ابتسامة الفرح على وجهه ووقف وهو يسرع بخطواته وانحنى قبالها يسلم على راسها/الله يخليك لي يمّه الله يخليك لي/سحب يدها بيبوسها/ ام راضي سحبت يدها منه/لكن ساجي قطب جبينه وهو يناظرها ام راضي/حلفتك على عزيزة ساجي كشر بوجهه/بس يمّه ام راضي قاطعته/ساجي ساجي زفر/تم لكن علميها ماتتدخل بسدول ابد ولسانها تمسكه ولا اخر مابيني وبينها يمّه راضي احتدت نظرته وهو يسمع كلامه ام راضي هزت راسها يمين ويسار بعدم رضا من ساجي وياس منه ثم ناظرت راضي وهي ترتسم على محياها ابتسامة فرح أنستها ساجي وطلبه/زين زين الحين رح حب راس اللي شفع لك وتشكره رح بس ساجي فز بخطواته وهو ينحني لراضي يسلم على راسه راضي بابتسامته/سلمت سلمت ساجي بيعتدل بوقفته راضي مسكه من يده لايوقف وهو عيونه بعيون ساجي/لكن ساجي قطب جبينه وهو يناظره باستغراب راضي/اختها عديمة التربية ماتدخل بيتك ابد ساجي اتسعت عيونه بصدمة ام راضي ابتسمت برضا من اللي سمعته وانشرح صدرها راضي وهو يضغط على يده وبتاكيد/هذا اقل حقوق امك عليك يالبار ياولد امك وابوك!! ساجي تنهد بضيق/ابشر ابشر راضي ترك يده ساجي اعتدل بوقفته/انا طالع تامرون على شي؟ ام راضي/سلامتك سلامتك بس رح طيب خاطر اختك ساجي بنرفزة/ابد!!لحد ماتسمع اللي قلته لك منك وتفهمه زين ثم تجي وهي راضية وتتعذر بعد راضي احتدت نظرته ساجي مشى/سلام ام راضي هزت راسها بخفة يمين ويسار وناظرت راضي بابتسامة وهي تتناسى موضوع ساجي/ها يمّه قولي مين اللي غيرت رايك بالزواج بعد هالسنين هاه؟ راضي ابتسم وهو يتقهوى ام راضي/مين اللي قدرت عاللي ماقدرنا عليه راضي/تعرفينها يمّه تعرفينها ام راضي قطبت جبينها/اعرفها!!من هي؟ راضي/جوهرة ام راضي رمشت/جوهرة؟مااذكر احد راضي قاطعها/جوهرة بنت احمد يمّه ام راضي تغير وجهها/بس هي متزوجة!! راضي/وين يمه تطلقت من اول ولا خلصت من العدة ناوين اخطبها ان شاء الله ام راضي بربكة تخفيها وهي تتقهوى راضي باستغراب/ماباركتي لي يمّه؟!! ام راضي بضحكة واضح معها شحوب وجهها/مبروك مبروك يمّه بس بالاول هي توافق راضي قطب جبينه وهو يناظرها ام راضي/والله يكتب لك اللي فيه الخير وانا امك/تقهوت وهي تحس بحرقان القهوة ارتفع لاعلى حنجرتها/ . {مـنـايـا و بـجـاد} منايا جالسة عالسرير وهي ترتب اغراض عيالها اللي خرجتها للعرس بجاد دخل ببذلته العسكرية بدون لايناظرها وهو يفتح ساعته ووقف قبال التسريحة وهو ينزل ساعته منايا اخذت نفس وهي تحافظ على هدوءها وبينها وبين نفسها/حتى سلام مافيه!! بجاد وهو يفتح ازاريره/ناقصكم شي منايا/مشكور ماتقصر/وقفت وهي تتجه للدولاب وتفتح دولاب فساتينها وهي تدور لها على فستان/ بجاد ناظرها بالتسريحة واتجه لها وهو ويقف وراها منايا قطبت جبينها بانزعاج وهي تلمحه عن طرف بجاد قلب بفستاينها ومسك فستان ابيض من طرفه بيمينه وهو يسحبه على جنب وتكى بطرف دقنه على كتفها/هذا منايا كشرت بوجهها وهي تحرك كتفها تدفه عنها بجاد حاوط خصرها بيساره وهو يثبتها ويرجع طرف دقنه على كتفها وبدون اهتمام لانزعاجها/هذا منايا بانزعاج منه/بس ذا لبسته كثير بجاد تنهد وهو يضمها اكثر لصدره/بس ذَا حلو عليك منايا سحبت فستان اسود وبابتسامة/هذَا بجاد كشر بوجهه/غيره منايا لفت راسها له وهي تناظره عن جنب/مالبسته للحين بجاد كشر بوجهه/مااحب الاسود منايا/انا اللي بألبسه مو انت!! بجاد/وأنا اقول لا منايا تنرفزت وهي تترك الفستان وتدفه عنها وبعناد وهي تناظره وتتكتف/ابي البس الاسود بجاد ببرود/لاااا منايا فكت تكتيفتها وبنرفزة/ليش!! بجاد ناظر الدولاب وهو يسحب الفستان الابيض ويرميه عالسرير/ذَا اللي بتلبسينه منايا بعصبية/ماابيه ماابي!! بجاد وهو ينزل بلوزة دوامه ويرميها عالارض وعينه على حزام بنطلونه يفتحه/وتلبسين ذهبك كله منايا اتسعت عيونها/نعم!!! بجاد/اللي سمعتيه منايا/تبي العالم يتكلمون علي!! بجاد ناظرها بحدة/احرقه منايا قطبت جبينها وهي تناظره بجاد/اللي يفكر بس ينطق حرف عليك احرقه يامنايا احرقه منايا عضت طرف شفتها بقهر ثم تكلمت/احرق نفسك اجل بجاد اتسعت عيونه وبحدة/منايا!! منايا وبعصبية/لان اللي تسويه هو اللي بيجيب الكلام كله يابجاد بجاد/بتلبسين هالابيض وذهبك كله مايبقى منه شي بصندوقه منايا اتسعت عيونها بغيظ بجاد بالبوكسر وبنطلونه اللي نزله بيده وضربه بالارض وبحدة/اللي اقوله يمشي انتهى الموضوع/مر من جنبها وهو يتجه لدورة المياه/ . ((شقة بدر)) {غرفة فتنة وام عمر} فتنة متربعة عالارض تناظر الكيكة الصغيرة والبوكس الاحمر وباقة الورد اللي باللون الاحمر ثم ناظرتها بعيون غرقانة دموع تكافحها لاتطيح وكلها امتنان ومحبة موج جالسة قبالها بعبايتها وطرحتها على كتفها بلعت ريقها وهي تناظرها/خلاص عاد لاتناظريني كذا والله اصيح فتنة تناظرها وسط دموع رقيقة من رقتها تشابه هتان المطر الندي طاحت غصب عنها موج وهي تتحاشى تناظرها حتى ماتبكي معها سحبت ثلاجة القهوة وتصب لهم/كان ودي من بدري احتفل معك بمكان احلى ونجلس سهرة مع بعض لكن الحمدلله اللي يسرها وقدرت اشوفك فتنة مسحت هالدمعات بطرف اصابع يمينها بسرعة وهي ترسم ابتسامة على وجهها/يكفي جيتك والله موج مدت لها الفنجال وابتسمت بحب وهي تناظر ابتسامة فتنة الصادقة اللي ماشفتها من فترة طويلة فتنة بابتسامتها/كانت امنيتي اشوفك قبل زواجي والحمدلله تحققت اغلى امنياتي موج نزلت دموعها/ليش تبكيني ليش/رفعت يدها وهي تمسح دموعها بطرف كم عبايتها/حتى منديل مامعي فتنة ضحكت بخفة وهي تسحب منديل من الكرتون قدامها وتمده لها موج ناظرتها بتقطيبة زعل/تضحكين علي!!/دفت يد فتنة/مشكورة وصل المنديل المغلف بسخريتك فتنة ضحكت اكثر وهي ترفع نفسها شوي وتمد يدها لوجه موج ومسكتها من فكها بيسارها وبيمينها المنديل تمسح وجه موج بقوة/مغلف بحب بحب وش عرفك انتي موج دفتها عنها وهي تحس بحرقة بوجهها من فرك المنديل اللي تقطع بين يد فتنة ووجهها فتنة جلست مكانها بابتسامة وهي تناظرها موج مسكت خدودها وهي تناظرها/اااح عورتيني!! فتنة/الحب يوجع/ضحكت/ موج زفرت وهي ماتقدر تزعل عليها يكفيها نفسية فتنة الحلوة ابتسمت/يالله متى تقطعين الكيكة ومتى بتفتحين الهدية والله لو انا مااقدر اصبر ثانية فتنة ناظرت الهدية للحظة ثم ناظرت موج وبابتسامة/اختفت مشاعر الفضول للهدية ياموج اختفت موج بلعت غصتها من كلامها/ان شاء الله بيرجع وبتكثر الهدايا بأغرقك هدايا الى مايرجع ذاك الفضول مااكون موج يـافـتـنـة فتنة هزت راسها بلا/يكفيني ياموج هالمشاعر والله تكفيني هالراحة وهالسعادة تكفيني!! موج سحبت البوكس ومدته لها/افتحيه يالله ولا بأفتحه انا فتنة بضحكة/افتحيه انتي موج اتسع عيونها/مو تزعلين بعدين فتنة سحبت البوكس بابتسامة/هذا اللي تبين تسمعينه لكن تحلمين/فتحت الهدية/ موج تناظرها بحماس لردة فعلها فتنة اتسعت عيونها وهي تناظر البوكس كان بداخله فستان بلونه البنك فتحت الفستان وهي توقف بكتف واحد طوله ميدي وطبقتين اخر الفستان فوق بعض ناعم جدا جدا ينطق انوثة ناظرته بابتسامة/مع اني مااحب هاللون موج قاطعتها/يجنن عليك والله بس انتي مدري وش فيك مع هاللون فتنة ناظرتها/مشكورة ياموج مشكورة موج اشرت بطرف فكها للصندوق/شوفي الباقي يالله يالله فتنة تخرج باقي الاغراض اللي هي عبارة عن ملحقات للفستان وتحطها جنبها اختفت ابتسامتها وتغير وجهها وهي تناظر اللي باقي بالبوكس ثم ناظرت موج/هذا اللي افكر فيه؟ موج بابتسامة/مايصير تروحين لبيتك وانتي مامعك جوال كيف باتطمن عليك واخذ اخبارك فتنة بحدة/لا ياموج لا موج رمشت/ليش فتنة مدت البوكس الاحمر/مشكورة يكثر خيرك عالفستان والله انه اخذ قلبي ياموج لكن هالشي لا اعتذر منك مااقدر اقبله موج/ليش طيب قولي لي ليش!! فتنة/مااقدر مااقدر عليه موج قطبت جبينه/كله جوال وش اللي ماتقدرين عليه!! فتنة/تكفين ياموج اذا تعزيني تعفيني منه تكفين موج بوسع عيونها/والله يـافـتـنـة هاذي الهدية الاساسية الفستان كان غطا بس لاترديني فتنة مدت البوكس الاحمر/موج طلبتك موج سكتت وهي تناظرها بتفكير فتنة بصوت اهتز للحظة/والله والله اخاف اخاف من هالشي وكثير مااقدر له مااقدر موج تنهدت وهي تاخذ البوكس وتنزله ماتبي تخرب اجوائهم اللطيفة/باوافق هالمرة لكن ينتظرك جهازك الى ماتقدرين سمعتي فتنة تضايقت موج/ها سمعتي؟ فتنة بضيق/سمعت سمعت موج بابتسامة وهي تمد لها السكينة/يالله يالله اقطعي الكيكة ياعروسة اقطعيها فتنة اخذت السكينة وقطعتها موج صرخت وهي تصفق/مبروك يـافـتـنـة مبرووووك ام عمر اللي ماتحملت تصبر اكثر وهي تسمع صوت صراخ موج دخلت وهي بيدها كيس صغير فتنة اختفت ابتسامتها ام عمر بابتسامة وهي تجلس جنب فتنة/مبروك فتنة سحبت نفسها تبعد عنها شوي موج حست بحرارة من تصرف فتنة مع امها وهي تتحاشى تناظرهم فتنة ببرود/الله يبارك فيك امنيتك وتحققت اخيرا ان شاء الله تكونين فرحانة كثير ام عمر/اكيد فرحانة لك وانتي بنتي!! فتنة زفرت بوسط ابتسامة سخرية/بنتك!! موج وهي تقطع كلامهم مدت الفنجال اللي صبته/تفضلي ياعمة ام عمر اخذته/مشكورة/ناظرتها وبتردد/اقول ياموج موج/سمي ام عمر/وشلونك ووشلون طلال موج بابتسامة/والله ياعمة ولدك كيف تساليني عنه!! فتنة ضحكت بصوت قاصدة ام عمر/انتي تدرين بقصدي ياموج موج/واكيد قال لك ياعمة وش صار ام عمر/ووش صار بعدها ياموج؟ موج/ذاك اخر مابيني وبينه ام عمر تنهدت/موج يابنتي تعرفين طلال ومحد يحبه ويصبر عليه كثرك فتنة ناظرتها وبحدة/لاتتدخلين بينهم موج انصدمت من فتنة وهي اللي تقدر ترد بدون محد يرد عنها وهذا حقها ام عمر احتدت ملامحها/الكلام مو لك يـافـتـنـة فتنة بنرفزة/وانا مااسمح لك تناقشين امور عيالك بوسط حفلتي!! ام عمر/عيالي يصيرون اخوانك فتنة بصوت عالي/كانوا كانوا اخواني الحين الزم ماعلي نفسي موج قاطعتهم/عمة عزة ام عمر التفتت لها وسط ملامحها المحتدة موج/اموري انا وطلال نحلها بيننا حتى لو كان نهايتها الطلاق مال أحد اي حق انه يتدخل ام عمر زفرت/الله يهدي النفوس ويصلحها/حطت الكيس بجنب فتنة ووقفت/ موج/تقهوي ياعمة ام عمر/تقهويت خلاص/خرجت/ فتنة قطبت جبينها وهي تفتح الكيس الابيض الصغير وخرجت منه علبة مخمل باللون الاحمر فتحتها ورمشت وهي تستوعب الهدية وضحكت بسخرية وهي تلفها لموج وباستغراب/وش افهم من ذَا الحين!! موج قطبت جبينها وهي تناظر عقد اللولو الملتف بداخل العلبة ثم اتسعت عيونها/هذا مو شبكة عمتي!! فتنة هزت راسها بايه/دنيا غريبة والله غريبة!! . ((بيت ابو عمر1)) {عمر و رغد} رغد قبال عمر المتمدد عالسرير تاكله بوجه واضح عليه الضيقة عمر ناظرها/وش فيك؟ رغد زفرت بصوت وهي تنتظر هالسوال/مافيني شي عمر/وش اللي مافيك شي والصوت اللي طلع رغد/اذا تكلمت بتزعل وانت مو ناقص فوق وضعك زعل عمر بغيظ من كلامها/الحمدلله وضعي مافيه شي كلها راحة كم شهر وبترجع اموري تمام رغد/ان شاء الله وهالشي مافيه شك حبيبي عمر/قولي وش عندك؟ رغد/فتنة عمر قطب جبينه/وش فيها!! رغد نزلت الاكل عالطاولة اللي جنبها وبزعل/يرضيك تسوي زواجها وانت بهالحالة يرضيك!! عمر بتقطيبة جبينها/وانتي وش عليك!! رغد رمشت/اخوها تعبان وتتزوج!!وش ذَا ماصدقت تلاقي احد يقبل فيها وتتدبس فيه!! عمر بحدة/رغد!! رغد/ها شفت قلت لك كلامي مابيعجبك!! عمر وهو يكتم غيظه/تبين تروحين بس؟ رغد اتسعت عيونها/واتركك!!اكيد لا عمر ناظرها/روحي خذي بطاقتي واشتري هدية لفتنة وخلصي امورك واحضري الزواج وانبسطي رغد/وش تقول انت!! عمر/رغد روحي وانبسطي واتركي فتنة بحالها رغد/حتى وانت بهالحالة تتهمني!! عمر/جميلك معي غير وفتنة غير رغد تناظره بغيظ عمر/البطاقة اكيد عند طلال اكلمه شوي وبكرة باذن الله معك خلصنا رغد ابتسمت غصب/مشكور ماتقصر عمر/جيبي الدوا رغد/مااكلت شي عمر/خلاص الحمدلله جيبي الدوا رغد وقفت وهي ترفع الاكل وبنفسها/هدية قال!!هين بأعطيها احلى هدية . ـــــــــــــــــــــــــ ـــــــــــــــــــــــــ ــــــــــــــــــــــــ ((يوم الزواج)) . . {{الـمـغرب}} . ((بيت نايف)) ،،غرفة النوم،، ياقوت بروب ميدي باللون البني يتوسطه حزام ملتف على خصرها يثبته لافة شعرها وحاطة اساس المكياج تلبس مجد وسمو وسط ربكتها ماتبي يوصل نايف وهي بهالمنظر وبتافف/بسرعة بسرعة/ناظرت سمو/ساعدي اخوك/اتجهت وهي تجلس عالكرسي قبال تسريحتها تكمل مكياجها/ نايف دخل وابتسم وهو ينحني لعياله يبوسهم وبلغة الاشارة/ابوي يالزين كله انتم عـيـونـي بِسْم الله عليكم بِسْم الله سمو ابتسمت وهي تدور بفستانها الاحمر ويلتف معها شعرها المسدول على ظهرها بفيونكة كبيرة باللون الاحمر تغطيه من فوق اذنها اليمين/بابا جميل؟ نايف وهو يضمها وباسها ثم ناظرها وهي بحضنه/كل شي تحلينه ياعيني والله انتي الجميلة مو بالفستان مجد ببنطلون بيج وتيشيرت ابيض وجزمة باللون الاسود مسك ابوه بزعل/وانا نايف ضحك/انت اخو الزين وش تبي بعد مجد ابتسم وهو يضم ابوه نايف حاوطهم بحضنه وهو يطلع بوسة لسمو وبوسة لمجد تركهم وهو يوقف/تاخرت انا تعالوا مع جدو تمام يابابا؟ سمو ومجد هزوا راسهم بموافقة ياقوت اللي حطت الروج الاحمر تكسر شحوب وجهها من الاساس اتسعت عيونها وهي تسمعه ثم التفت بالكرسي وهي تناظره/نعم!! نايف التفت لها بتقطيبة جبينه/مشغول تعالوا مع عمي ياقوت تكتفت وبغيظ/لا انت توصلنا ابوي زحمة سيارته نايف/مع حاتم ياقوت/ديني ودينه هالحاتم انا وهو مانتصافى مع بعض بيجلس ينتقد كل حركة قفلي عبايتك دخلي يدك ليش ريحة عطرك اخر الشارع يعني ماتعرفه!! نايف زفر/خلاص اخلص شغلي المهم وارجع لكم بس لاتاخريني تكفين مشغول كثير ياقوت لفت وهي تحط مكياج/والله لو اخوك عاد!! نايف احتدت ملامحه جا بيتكلم سكت وهو يحس بيدها تحتضن يده نزل نظره لها سمو بوجهها المتغير/بابا نايف ابتسم غصب وهو ياشر على عيونه/عيونه سمو/عمو سلطان اكيد ينتظرك روح ياقوت احتدت نظرتها من سمعت(عمو)وهي تمرر فرشة البلشر على خدها الايمن نايف انحنى وهو يبوس خدها ثم اعتدل بوقفه وهو يفتح الدولاب وياخذ ثوبه ويخرج ياقوت رمت الفرشة بغبنة عالتسريحة قبالها سمو ومجد فزوا وهم يناظرونها ياقوت لفت بالكرسي وهي تناظر سمو وبحدة/لاعاد اسمعك تقولين عمو لسلطان فهمتي . ،،غرفة الضيوف،، جوهرة مجهزة اغراضها قبالها عالطاولة وهي تحط الفاونديشن ابو ماهر دخل بكل مافيه من عصبية/صاحية انتي صاحية!! جوهرة التفتت لابوها/خير يبه وش فيك؟!! ابو ماهر/خفت عليك لحالك وجبتك معنا مو عشان تحضرين انتي للحين بالعدة ولا نسيتي!! جوهرة زفرت/يعني اضيق على عمري واكتم نفسي وهو رايح جاي ولا عليه شي ابو ماهر/ليته انكتم نفسك قبل هاللي تسوينه ياليت!! جوهرة بغيظ/يبه!! ابو ماهر/انتي ماتفهمين ذَا دين دين مو لعبة جعل انفاسك تنقطع قبل سواتك ياجوهرة جوهرة بغبنة/الدين سمح لي ابو ماهر بحدة/لاتفتين على كيفك ياجوهرة وروحة مافيه انطقي ياجوهرة انطقي جوهرة بنظرات محتدة/رايحة احضر عرس ماسويت جريمة!! ابو ماهر بيموت من غبنته صرخ/جووووهررررةةة!! جوهرة رمت الباليت من يدها عالارض/يووووووه ابو ماهر/روحة مافيه ان طلعتي قصيت رجولك من قاعتها سمعتي/خرج/ جوهرة بكت بقهر وبصراخ/كل شي لا لا لا والله لاروح وماهمني احد ماهمني . ((بيت ابو فواز)) سلطان اللي رجع من القاعة وسط اغراض اخواته اللي تاركينها ببيت جدته وموصينه عليها خارج من بيت جدته وهو شايل اغراض كثيرة بين يديه وقف وهو يناظره فواز راجع من صلاة المغرب ناظره ببرود وكمل طريقه سلطان/فواز فواز وقف والتفت وهو يناظره بحدة/خير سلطان/مافيه شي منا ولا منا؟ فواز ارتفعت حواجبه وسط استغرابه/مثل ايش؟!! سلطان ابتسم/انتظرتك تبارك تهني بالاخير انت اخوي واكيد مهما تقسى تظل تتمنى لي الخير فواز/ايه اتمنى لك الخير صحيح لكن مـاهـو بالحين ابد هذاك اول سلطان اختفت ابتسامته وهو يناظره بصدمة فواز بنرفزة/ابارك واهني وانت هدمت فرحتي سلطان احتدت نظرته فواز/تعيش افراحك وانت ناسي افراح غيرك اللي هدمتها وقلبتها احزان سلطان بغيظ/هاذي علومك اجل!! فواز/حتى الله يستر عليك كثيرة كثيرة بالحيل سلطان زفر وهو يميل فمه بابتسامة جانبية فواز احتدت نظرته سلطان/تدري عاد اللي صار لك عقوبة فواز/وشو!! سلطان/حريق المعرض سخط حتى يصحى قلبك قبل عقلك وتشوف اللي حولك فواز رفع صوته/احترم نفسك سلطان بحدة وسط صوته العالي اللي ينطق بالغضب اخرست معها فواز غصب/انت اللي تحترمني وتقصر صوتك واخوك الكبير يكلمك فواز بسخرية وهو يتلفت/اي اخو!! سلطان رمى الاغراض اللي بيده وهو يطبع على خد فواز كف بيمينه فواز اتسعت عيونه بصدمة سلطان بحدة/هاللي قدامك اذا ناسي اذكرك فواز عض شفته بغبنة وهو يناظره سلطان/غصب عنك اخوك يافواز والله والله لو تمشي وسط العالم وانت تنفض بثيابك وتنابح باعلى صوتك ماعرفه ماعرفه/رفع قبضة يمينه وهو يضرب بسبابته الممتدة براس فواز/دمك يشهد غصبن عليك اني اخوك يافواز فواز دف يد سلطان عنه بقوة/والله لاتندم على سواتك ذي يالخسيس واذكرك سلطان رجع بخطواته لورا ميل فمه بابتسامة/مامن حسوفة والله فواز يناظره بغيظ سلطان/دام قلبك صار قلب بعير محد بيتحسف على شي من وراك/عطاه ظهره وهو ينحني ويجمع الاغراض اللي عالارض/ فواز مشى لبيته بخطوات سريعة . . [[[الـقـاعـة]]] . بدر وقف على باب مدخل العروس بسيارته نزل من السيارة بثوبه والطاقية على راسه وفوقها عقاله وشماغه على كتفه فتح الباب اللي ورا السواق وهو يمد يمينه لها ويزفر بابتسامة/سمي وانتي تنزلين فتنة مدت يمينها وهي تمسك يمينه تستند عليه بدر شد على يدها يسندها فتنة نزلت بفستانها الابيض الواضح اللي مااقدرت تحتويه عبايتها وتغطيه بوسط نبضات قلبها السريعة وهي تناظر باب القاعة ريان نزل من السيارة وهو يستند على عكازاته وبيده مسكتها التوليب اللي باللون الابيض يتدلى منها كرستالات ناعمة فتنة اخذت نفس تهدي نفسها وتركت يد بدر بدر مسك يدها فتنة التفتت له باستغراب بدر/الحين الحين لو شعرة من التردد تتوسط قلبك وماتبين ابشري وانا اخوك ابشري اخذك ولاعليك من احد عـيـونـي لك فتنة تجمعت دموعها بعيونها وهي تناظره بدر/لايردك شي ابشري يـافـتـنـة ابشري وانا اخوك باللي يسرك فتنة هزت راسها بلا/عساك سالم لي ولايحرمني منك يااخو فتنة بدر ضمها لحضنه وهو وده يدفنها بين ضلوعه فتنة ابتسمت وهي تبادله الحضن بدر برجفة صوته من مشاعره المختلطة من لوم وعتاب وفراق وحب/سامحي بدر يـافـتـنـة وحلليه فتنة/ماضر فتنة حتى تحلله عزها عساه عزيز دايم ومايعرف للذل طريق بدر بلع غصته/ماشبعت منك وبتروحين عني فتنة/اذا ماشالك البيت تشيلك عيوني بدر/مبروك مبروك ياروح اخوك مبروك فتنة ببحة صوتها من العبرة/الله يبارك فيك ريان حط مسكتها على شنطة السيارة ووقف عندهم وهو يترك عكازاته ويضمهم الاثنين وهو رافع رجله المكسورة وبصراخ/مبرووووووككك!! بدر دفه بتكشيرة وسط وجهه المحتقن من فرط شعوره ريان رجع لورا وهو ينط على رجل وحدة/باطيح باطيح بدر مد يمينه باتساع عيونه ومسك ريان بيساره فتنة مدت يسارها بفجعة ومسكته من يمينه ريان بوجهه المخطوف وهو يناظر فتنة/جعلني ماباركت لاحد اذا بانكسر مرة ثانية ام عمر فتحت الباب بفستانها البنفسجي الطويل ماسك عالجسم بقصة سبعة من عالصدر كاشف ليديها باكسسوار ثقيل كريستالي يزين نحرها باكسسوار فضي يزين تسريحتها المرفوعة ومكياج ثقيل ناظرتهم/عسى ماتاخرت عليكم/قطبت جبينها باستغراب وهي تناظرهم كيف ماسكين ريان/وش فيكم؟!! بدر سحب ريان بقوة له وهو يمسكه وبابتسامة/ادخلي عساه مبروك والف مبروك يـافـتـنـة فتنة ابتسمت رغم توترها وهي تمشي للباب ام عمر بابتسامة/الف الصلاة والسلام عليك ياحبيب الله محمد/زغرطت باعلى صوتها/ ريان/الورد حقك الورد . {جـنـاح اهـل الـعـريـس} ام فواز بفستان سكري كاشف عن اكتافها واكمامه تل ناعم يتخلله اكسسوار فضي من خصرها تقفل ساعتها باللون الفضي وهي تناظر جوالها اللي يرن سدول بفستانها الزيتي المخمل المخصر ع جسمها بكم واحد طويل واقفة ورا امها تقفل لها عقدها ام فواز/علا ياعلا علا بفستان بيج كاشف عن اكتافها ماسك على جسمها لحد خصرها ومنفوش بشعرها الملفوف كعكة واكسسوار يلتف حول هالكعكة وبكعب عالي بنفس لون فستانها وقفت عند جدتها/نعم ام فواز اشرت عالبشت المعلق قبالها/خذي بشت جدك واطلعي لثابت قولي له يعطيه ابوه علا هزت راسها/طيب/اسرعت بخطواتها وهي تاخذ البشت وتطلع لثابت اللي على مدخلهم/ ثابت بنرفزة/سنة علا مدته له/خذ وش فيك معصب ثابت/ابوي بيجلدني وهو يبي بشته وانتم مأخريني!! علا بتكشيرة/هذا هو خلاص ثابت/وين عجايب؟ علا/تلبس ثابت/قولي لها تجي هينا تنتظر حاتم اقلقني يبيها وقولي لها تفتح جوالها المقفول قفلوا راس عدوها علا فتحت باب الغرفة الصغيرة اللي فيها تجهيزاتهم/هينا ينتظر تمام؟ ثابت هز راسه بايه/مو تنسين ينتظر الرجال واتفشل معه علا/خلاص قلت طيب!! ثابت مشى بخطوات سريعة علا رجعت للداخل وهي تدور عجايب ناظرتها وهي تخرج من دورات المياه اسرعت بخطواتها لها/خالة عجايب بفستانها توب باللون الفوشي ماسك لحد خصرها الملتف حوله حزام من الفصوص الفضية منسدل اسفله قصير لتحت ركبتها وطويل من ورا بكعب فضي عالي بشعرها المسدول على ظهرها وطوق من الورد الكرستالي وعقد ناعم باللون الفضي يزين رقبتها ناظرت علا وهي تلبس حلقها/نعم علا/ثابت يقول خالي حاتم يبيك عجايب تغير وجهها/وش يبي!! علا رفعت اكتافها/مدري عجايب/وينها سدول؟ الجدة سدول بثوبها الاحمر وطرحتها الملتفة على راسها ومزينة بفصوص لابسة احسن ذهبها بهاالليلة المميزة تلف بالغرفة عليهم وهي تناظر يدين البنات وتهز راسها عجايب دخلت وهي تجري/سدوووول الجدة سدول التفتت لها/وبلا فيك حيل تناقزين عجايب وقفت جنب سدول وهي تسحب فستانها/بسرعة نزليه ام فواز تناظرها باستغراب/وش فيك؟ سدول اتسعت عيونها/ليش!! عجايب/بسرعة بسرعة سدول/مقاسنا غير شوفي سحايب او سجايا سجايا جالسة بالزواية مالبست/لاتدورين عندي والله تقطعينه علي شوفي ذهب عجايب بربكة/وش اسوي الحين وش الجدة سدول اتسعت عيونها وهي تناظر يدها وبحدة/وينها ياعجبة القرادة وينها عجايب بضيقة/موجودة ياجدة موجودة خلني بهمي الحين . {الـرجــال} ثابت وهو يدخل للقاعة ناظر حاتم/ينتظرونك عالباب حاتم ابتسم وهو يتجه للقاعة ثابت دخل لداخل القاعة ووقف عند ابوه وهو يمده/سم يبه ابو فواز جالس ناظر البشت اللي باللون السكري/مـاهـو بلي ثابت مافيه حيل يرجع/امي عطتني اياه ابو فواز وقف وهو ياخذه وناظره بتفحص/زين هالبشت سلطان بابتسامة وهو واقف عندهم/لبس العافية يبه ابو فواز انصدم/منك!! سلطان وهو ياخذه من يد ابوه ويحطه على اكتافه وبابتسامة/يزهاك البشت ياابو سلطان يزهاك ثابت ابتسم ابو فواز تنحنح وهو يناظره ثابت بمدح/اصلا كل شي زين على ابوي سلطان ابتسم/صدقت ابو فواز وهو يتحاشى يناظره/كثر خيرك ماتقصر سلطان/بالعافية ياابو سلطان بالعافية ثابت بابتسامة/ايه يبه الحين يغلطون يحسبونك العريس ابو فواز ميل فمه بابتسامة سلطان وهو يناظر ثابت بغيظ/هيه امي!! ثابت بنص عين/يبه كنك راضي بالسالفة والله لاقول لامي ابو فواز ناظره بغيظ/ثابت!! سلطان مسكه من ياقته يسحبه/امش امش معي تشيل الاغراض امش بس . عجايب واقفة ورا الباب بعبايتها المقفولة لاخر زر وهي تنتظره حاتم تنحنح من ورا الباب/ياولد عجايب/مافيه ولد انا انا بس ادخل حاتم دخل وهو ينزل عينه/بِسْم الله عجايب الباب اللي قدامك حاتم دخل للغرفة الصغيرة وهو يجلس على طرف الكنبة اللي عند الباب عجايب وقفت عند الباب للحظة وهي تاخذ نفس ودخلت وهي توقف عالباب حاتم ناظرها باستغراب/وش فيك ادخلي!! عجايب/هينا احسن واشرح حاتم ناظرها بشك ولمح طرف فستانها الفوشي احتدت نظرته وهو يوقف ويسحبها ويقفل الباب عجايب جرت ورا الطاولة اللي تتوسط المكان وصارت بينهم/لحظة لحظة اشرح لك حاتم بغيظ/ليش اخذتيه وانا قايل لا ليش!!اصلا متى بدلتيه متى!! عجايب/لمى رجعتني وقلت لك ضيق بدلته حاتم من بين اسنانه/عجاااايب!! عجايب نزلت عبايتها/امانة حاتم مو احلى من ذاك اللي كانه خلاقين امانة حاتم جرى لها عجايب صرخت وهي تجري حول الطاولة/يمممههههه حاتم يجري/نزليه تنزلينه الحين الحين عجايب/والله لاصرخ وانادي اخواني حاتم وقف وهو يثني يديه حول وسطه/يالله عجايب واقفة تناظره بانفاسها السريعة حاتم/يالله اصرخي وناديهم عجايب كشرت حاتم/شفتي تدرين ان الغلط عليك عجايب/انت بس طالعه بس شوي حاتم جرى وراها عجايب صرخت وهي تجري/بس شوي بس حاتم مسكها عجايب طاحت عالكنبة حاتم سحبها من يدها يوقفها عجايب ناظرته بدموعها/حرام عليك حاتم يعني مو حلو حاتم ناظر دموعها اخذ نفس وهو ينزل راسه ويستوعب ان الوقت والمكان كلها غلط لمناقشة هالموضوع وهي سوت اللي براسها وانتهى عجايب برجى/زواج اخوي خلني ألبس اللي ابيه تكفى حاتم/ليش تكسرين كلمتي طيب عجايب/قلت لك ماابيه ليش تغصبني عليه!! حاتم ترك يدها وهو يناظرها تنهد يعدل فستانها وطوقها عجايب بوجهها المتغير/لهالدرجة مو حلو علي!! حاتم/وانتي فيه شي مو حلو عليك عجايب/ليش زعلان طيب!! حاتم/ماابي احد يشوف شي لي عجايب بغيظ/اجلس بعبايتي ونقابي احسن!! حاتم/ياليت والله عجايب بوسع عيونها/نعم!!! حاتم كشر/ماتفهمين بالحب انتي عجايب/حبني ماقلت لا لكن وش دخل فستاني!! حاتم كشر/خلاص البسي اللي تبين هذا اللي تبين تسمعينه؟! عجايب ابتسمت وهي تمسك يده/مشكور حبيبي حاتم ناظر ابتسامتها وضحك/رضيتي الحين عجايب هزت راسها بايه/من البداية كان ريحت عمرك وخليتني اخذه حاتم تجهم وجهه وبتهديد/تبين ترجعين البيت؟ عجايب/اسفة اسفة خلاص اخر مرة حاتم تنهد وهو يمشي بيخرج/تبين شي بس عجايب تمشي وراه/تسلم لي مشكور حاتم وهو يخرج من الباب/تحصني بس استودعتكم الله/خرج/ . لاحول ولاقوة إلا بالله #سلطان_الهوى_يافتنة_الألفية | ||||
|
| |
 |
| أدوات الموضوع | |
| انواع عرض الموضوع | |
|
|
162Likes
العرض العادي
