12-02-23, 12:51 AM
| #462 | ||||
|  يااااعمررري وووش هالقفله الخطيييره حرااام بيلسان تموت من الغيره من ميس والحين صاروا ثنتين 😭. اتوقع انها حامل بس بعد الموقف ما بترضي تفحص حالياً وبترجع للبيت زعلانه منه. ولييد وخزامي اكييد مشكلتهم هي الفلوس اكيد بيلسان اعطت امها المبلغ او الذهب عشان تكاليف العرس ووليد قد حذر خزامى من قبل انها ما تأخذ من بيلسان شي عشان تطور الموضوع وصار مشكله كبيره. ابرار 😍بحبك يا ابرار جداً جداً انتي انسانه حساسه ومرهفة الحس♥ بحب ابداعك وقصصك ومواضيعك الاجتماعيه اللي نادراً ما احد يتطرق لها من الكاتبات الاخريات . طريقتك واسلوبك ووصفك لكل شي دائماً يأثر علينا بالدمووووع دائماً 😅والفرح قليلاً 😉لاتزعلي برو هذي الحقيقه بصراحه .لكن بالعكس هذي الدمووع والتأثر برواياتك اللي نقرأها وانا قرأتها كلها ومتابعه معك بالانستقرام اول ب اول ،المهم هذي الدموع تفرحني لانك الوحيده اللي احس انها تنصف المرأه المظلومه من المجتمع ومن العادات والتقاليد زي كل رواياتك . 😒ادري طولت عليكم بس بجد حسيت اني لازم اعبر شوي ع اللي بنفسي . Big love Bro❤ | ||||
|  |
|
13-02-23, 10:36 PM
| #464 | ||||
| 💕💕اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم 💕💕 | ||||
|
| |
|
15-02-23, 04:27 PM
| #467 | ||||
| الرواية جدا جميلة ما شاء الله ..اليوم بس خلصت قراءة الأجزاء الماضية و أكثر حد قاهرني هي هالخزامة ...مالقيت أي سبب منطقي يخليها تعامل بنتها بهالطريقة حتى وليد سامحته و تركض لتنال رضاه ..إذا وش سبب هالمعاملة ؟؟ برأيي منار مهما كانت سيئة فهي أحسن من خزامى ألف مرة رغم كرهها لوليد و حقدها عليه و رغم كل اللي عانته إلا أنها تحب بنتها و متعلقة فيها . كنان و بيلسان حبيتهم جدا مع بعض بس من سير الأحداث واضح أنهم راح يعانوا جدا في زواجهم بس أتمنى في الأخير أنهم يكملوا مع بعض و يستقروا لأنهم جدا مناسبين لبعض . يعطيك العافية على الرواية الحلوة 💓💓💓💓 | ||||
|
| |
|
16-02-23, 11:52 PM
| #470 | ||||
| بارت ٣٠ فوق ألمها وتعبها ..زاد عليها موقف كنان ... ما تدري وش طبيعة العلاقه الي تجمعهم بس تحس ميس اوفر ملتصقه بكنان ...كتمت ضيقها وهي تتجاهل الموقف ..ما هو وقته الحين .... رح تشوف آخرها معها وبعدها تتصرف.... ناظرت جدها الي جالس جنبها على كراسي الانتظار وكأنه بعالم اخر..تحس الحزن يكتسي ملامحه..تتمنى لو تقدر تبعد هالحزن عن قلبه ...ما تحب تشوفه كذا ... متأكدة ملامح الحزن الي ارتسمت على ملامحه لأنه جالس يستذكر ماضي حياته مع أمه..إلي متأكدة إنها حزينه وبائسة...تستغرب من حال الامهات ..اذا ما كان عندك قدرة ترسمي الابتسامه على ملامح ولدك ليه تنجبيه؟!...ليه ترميه وتكسري قلبه بالتجاهل والإهمال ...تحس متقاربه من جدها وتلتقي معه بذي النقطه وتحس بمدى حزنه وضيقه لانهم ذاقوا من نفس الكأس...ارخت رأسها على كتف جدها بعد ما احتضنت يده ....سمحت لنظرها يناظر للجهة المقابلة....... كانت منار وإخوانها وأخواتها مجتمعين مع بعض... كتمت ضيقها من هالموقف...وش يخسرون لو وقفوا مع جدها واعتبروه اخ لهم...مطت شفتها بسخرية إخوان من القله!! تجاهلت وجود منار ما رح تروح عندها ولا كأنها موجوده..هي وجدها كانوا جالسين بالاول ولما جاءت منار واخوانها ما احد كلف نفسه يقترب من سلطان ويسلم ...وش هالقسوة الي فيهم؟!! شدت على يد جدها بمواساة: بعد ساعة رح يسمحون لنا نشوفها!! قطعت كلامها وهي تحس نفسها رح تستفرغ بأي لحظه!! وش فيها انتكست من جديد!! سلطان هز رأسه وما علق! ام خزامى ناظرت بيلسان وجهها أصفر وشاحب: انت بخير!! بيلسان هزت رأسها: بخير ..بس الظاهر للحين البرد قاطعتها ام خزامى بلوم: كم مرة قلت لك لزوم تتغطين! سلطان وهو يناظر بيلسان لما عدلت جلستها : ننزل على الطوارئ ؟! بيلسان بهدوء : انا بخير ...رح اروح للحمام ما رح أتأخر استأذنت وغادرت وهي تشد على بطنها من المغص .... اسرعت خطواتها للحمام لما حست نفسها رح تستفرغ ما رح تتحمل أكثر.... بعد وقت طلعت من الحمام وهي تحس عيونها تورمت ولونهم احمر من كثر ما شدت على نفسها من الاستفراغ!! قررت تنزل للطوارئ وتتعالج وتشوف اذا رح تلقى حل لنومها!! دخلت الطوارئ وهي تترقب تخاف يطلع بوجهها كنان...تنهدت براحه ما هو موجود .... قبل ما تسجل قاطعها رنين الجوال .. وكان ماجد...حست النفس وقف عندها ... توجهت لخارج المستشفى وهي تأخذ نفس عميق قبل ما تفتح خط ... تنهدت وفتحت خط وهي تحس برجفه بيدينها : الو....هلا عمي ...ايه وصلنا المستشفى...ما شفناها ممنوع الدخول ...ايه ... أنا بخير.....الظاهر رضه خفيفه عادي أقدر أمشي عليها ....لا لا ما له داعي للطوارئ أنا بخير والطيحه ما أثرت علي ... بس لا تخبر كنان ...ايه وش صار ....ايه...زفرت بضيق وهي تنطق: حصل خير....غلبتك معي يا عمي ...ربي يسعدك ويحفظك...امين امين ...ان شاء الله مع السلامه!! قفلت الخط والهم اكتساها ...ما لقوا احد بالمزرعه ...معقول هرب مباشره؟! متأكدة إنه مستقصدها هي بالذات وما هو حرامي مثل ما يقول ماجد ...واكبر دليل قال "ما في احد الكل رجع للمدينه" يعني هو مراقب كل تحركاتها وتحركات اهل كنان!! انقبض قلبها بتوتر وخوف وش يبغى منها هذا الشخص؟! وكأنه ينقصها؟! لزوم تكون حذرة في شخص جالس يتربص فيها وكامن لها الشر! ما رح تترك الدعاء حتى ربنا يصرف عنها كيد الحاقدين عليها!! مسحت وجهها وهي تحس نار تطلع من عيونها وما هي قادرة تفتحهم!! حست نفسا تقلب عليها من جديد وبسرعه تحركت لسلة المهملات قريبه منها ...ورجعت تستفرغ من جديد! بعد وقت جلست على المقعد وهي تحس قوتها خارت من كثر ما شدت على نفسها بالاستفراغ... مسحت وجهها وهي تحس جسمها يرتجف....ارخت راسها على المقعد تريح نفسها شوي .. وبعدها ترجع لهم!! ** ** اقترب كنان من سلطان وسلم عليه بهدوء...وبعدها على ام خزامى وهو يسألهم عن الحال والاحوال..بعدها التفت حوله وهو يبحث عنها بعيونه: بيلسان وين ؟! ام خزامى بهدوء: راحت لدورة المياه الحين ترجع! هز رأسه بتفهم وبعدها التفت لمنار وأهلها ...استأذن منهم وتوجه لهم !! منار ناظرته برجاء: ما صار شيء ؟! كنان هز كتوفه: ربك كريم عليك بالدعاء!! ناظر أخت منار وهي تنطق بتساؤل وهي تؤشر بعيونها: الي كانت معهم زوجتك؟! ما التفت كنان لجهة سلطان وهو ينطق ببرود: متى؟! ناظرت منار أختها: قلت لك زوجه كنان قاطعتها: غريبه ما كلفت نفسها تسلم علينا على الاقل توقف معك وتواسيك انت بمقام حماتها!! منار نطقت بجمود:ما ابغى احد يواسيني اهم شيء تقوم أمي بصحه وعافيه!! خالد بهدوء يسأل كنان: يعني لمتى مانعين عنها الزيارة؟! كنان بهدوء: اتوقع بعد شوي رح يسمحون شخص شخص يدخلون عندها!! كمل كلامه والتفت خلفه يشوف اذا رجعت او لا ... للحين ما رجعت كأنها تأخرت وما يدري من متى راحت!! هم يتحرك يشوفها ..سرعان ما اعتدل بوقفته لما لمحها رجعت وجلست جنب سلطان!! سلطان رفع حاجب وهو يشوف جلد وجهها كله عروق احمر وكأنه متفجر ...نطق باستنكار: وش فيه وجهك كذا ؟! ام خزامى هبط قلبها وهي تشوف تحول بشرتها: وش صار معك؟! بيلسان ما هي فاهمه شيء: يمكن من الاستفراغ ما فيني شيء!! سلطان وقف وهو يمسكها من يدها : تعالي للطوارئ قاطعته باستغراب ليه مكبر الموضوع:جدي ما فيني شيء ام خزامى بإصرار: تحركي بسرعه!! تحركت معهم وما انتبهت على وجود كنان بنفس المكان!! رفع حاجب باستغراب من مغادرتهم .. حتى ما عبرت وجوده ...تحرك خلفهم يشوف وش صاير..قاطعته منار وهي تمسك بيده: جوالي طفى من الشحن..اتصل على هاني شوفه راح للقرية يرجع اخواتك؟! هز رأسه بطاعه وطلع الجوال يجري الاتصال!! ** ** ** جالسه على سرير الفحص وهي حاسه جدها وجدتها كبروا الموضوع ...اي انسان يستفرغ يصير وجهه احمر وعيونه تنتفخ!! الدكتورة سألت بمهنيه عن الاسباب..قاطع كلامها دخول كنان ...وقبل ما يسأل عن سبب تواجدهم..عقد حواجبه باستنكار وهو يشوف بشرتها : وجهك وش فيه كذا؟! عقدت حواجبها باستغراب من رد فعلهم .. ام خزامى وقلبها خائف: ما كان فيها شيء ..راحت لدورة المياه ورجعت وجهها كذا!! كنان ناظر بيلسان بتساؤل: شربت دواء وجسمك يتحسس منه؟! بيلسان هزت رأسها بالنفي: بس استفرغت مرتين كنان هز رأسه بتفهم وهو يكلم الدكتورة: الظاهر انها شدت على نفسها بالاستفراغ وانفجرت عندها الشعيرات الدموية!! هزت الدكتورة رأسها: واضح كذا!! عموما أخذنا لها عينه قاطعها سلطان: متى تطلع النتيجه! كنان بهدوء: النتائج زي كذا ما تحتاج وقت طويل!! غمصت عيونها بتعب وهي تحس فعلاً كبروا الموضوع!! رح تطلب من الدكتورة تعطيها دواء للمغص...عبست ملامحها للحظات لما رجع لها المغص!! سرعان ما ارتخت ملامحها لما بدأ عقلها يدخل عالم الاحلام.. نقزت على يد جدتها وهي تهزها: لا تنامين الحين!! هزت رأسها بالنفي: ما ابغى أنام بس اريح عيوني!! ناظر كنان جواله الي يرن ...فتح خط وخرج من المكان!! بعد وقت صرفت لها الدكتورة العلاج ... كنان يحس بالانتكاسه للحظة كان عنده أمل يكون حمل...ناظر بيلسان وابتسم لها وهو يسندها: بعدك صغيره تنامين بأي مكان..شوفي نتيجة لامبالاتك!! ابتسمت بتعب: كنت جالسه انتظر رجوعك وبدون وعي غفيت!! ضحك بخفه: قصدك أنا المذنب والسبب قاطعته وهي تناظر جدها وجدتها قدامها يمشون: ايه بسببك اصابني البرد!! كنان بملامح مريحه: للحظة ظنيت إني رح اكون أب!! زمت شفتها باستبعاد هالشيء ..ما تتمنى الحين تحمل حتى تعالج نفسها من النوم حتى تقدر ترعى الطفل : العمر قدامنا إن شاء الله قاطعها وهو يتأملها بترقب: ليه حسيتك ما تبغين نطقت بتبرير: مو كذا. ...بس احس نحتاج وقت أكثر لنفهم بعض أكثر وبعدها إن شاء الله ربنا بيرزقنا ذرية طيبة!! هز رأسه بهدوء وهو يناظر سلطان وزوجته عند المصعد .... حست بشيء ضايقها لما اكتفى بالسكوت وكأنه ما عجبه كلامها ... دخلوا المصعد والهدوء خيم على الجميع ما احد تكلم ....فتح المصعد وتوجهوا للعناية المركزه ...كنان بصوت هامس وهو ماسك يدها : تعالي سلمي على امي و قاطعته بنفس الهمس: بعدين اسلم على خالتي قاطعها وهو رافع حاجب: تراهم محرمين عليك اخوان جدك ..تعالي تعرفي عليهم قاطعته بضيق ليه تراكض خلف ناس ما يعترفون بوجودهم: جدي ما له إخوان قلت لك ما أبغى شد على يدها وهو ينطق بهدوء: لا تحشرين نفسك بالماضي...حنا ما لنا علاقه بأحد ... وبنبره حازمه : تعالي نسلم!! نزلت نظرها من نظراته الغاضبه...تستغرب لما تشوف نظراته الغاضبه ما كانت تتوقع هذا الانسان يعصب...وتوجهت معه على مضض...بعد ما سلمت وعرفها عليهم ...وقفت شوي وعيونها تتسارق بالنظر لجهة سلطان ..نطق وهو يؤشر لها على جهة سلطان:بيلسان روحي ارتاحي هناك!! هزت راسها وتوجهت مباشره ...منار اول ما غادرت نطقت باستنكار: وش فيه وجهها كذا؟! كنان بهدوء: استفرغت ومن كثر الشد انفجرت الشعيرات الدموية!! منار هزت رأسها وبتوجس نطقت: وش سبب الاستفراغ يمكن تكون قاطعها بالنفي: اخذت برد والحين وضعها أفضل!! خالد وهو جالس متكتف: هي مثل خزامى عندها مشكله بالمشي حسيت مشيتها ما هي متوازنه!! منار بنفي: ما فيها شيء ! كنان ما عجبه السؤال ...زم شفته وهو يجلس مقابل بيلسان وعيونه مسلطه عليها وكأنه ما في احد حوله غيرها .... ** ** ** راكان مسكه من ياقته بغضب وهو يهزه: انت مجنون ..وش تبغى فيها حتى تلاحقها؟! ابعده وهو ينطق بشرار: وش فيك قلبت علي ؟! مو انت قلت لي اذا طلعت من بيت سلطان اتصل فيك؟! راكان هز رأسه بجنون: ايه ايه قلت لك اتصل فيني مو تلاحقها؟! رد بعبوس: اتصلت فيك وما في شبكه ...الحق علي كنت ابغى اجيبها لك وقتها غصب عنها يطلقونها !! زفر راكان بضيق: تدري انه ابوي للحين ما يكلمني ؟!! مط شفته بسخرية: وانت تراكض خلف هالشايب؟! لو يحبك كان وقف معك ما هو يقاطعك!! راكان مط شفته بقرف: خلاص انا رفعت يدي من الموضوع ..ورضيت بقدري ....اذا انت ما تسأل عن ابوك ..انا ابوي ما ابدله بالعالم كله ... تابع كلامه بغصه: الاسبوع الجاي خطوبتي ...اليوم كلمت ابوي وقلت له إني تبت عن هالطريق ونويت أتغير واعيش حياتي قاطعه باستنكار: وش تقول؟! دامك نويت تترك الموضوع ليه طلبت مني اراقب قاطعه بضياع: كنت ابغى اشوفها لاخر مرة! نويت اتزوج واطلع من القرية واترك الماضي والذكريات ...افضل حل حتى انسى واكمل حياتي!! نطق بسخريه: يعني رفعت رايه الاستسلام مثل تركي؟! نطق راكان بلامبالاة: افهمها مثل ما تبغى!!! ** ** ** ناظرت جدها بعد ما طلع من غرفة أمه ..مسكت يده بمواساة : كيف وضعها؟! تنهد وبنبره مخنوقه نطق: ربك كريم! نطقت بضيق وهي تحس الغصه بحلقه: والنعم بالله!! هز رأسه وبعدها نطق: رح نروح عند خزامى وبعدها نرجع هنا!! ام خزامى بتأييد: يا ليت تعبت من الجلوس هنا!! بيلسان انخطفت ملامحها لما قربت المواجهة بينها وبين وليد ..بس فكره تروح مع جدها افضل من وحدها... بهدوء نطقت: لحظه اشوف كنان توجهت له وبهدوء نطقت: ابغى اروح لبيت اهلي مع ابوي سلطان هز رأسه بتفهم وهو يمشي معها : انتظري في بيت اهلك لوقت يخلص دوامي لا ترجعين للمستشفى..عازمك على العشاء بالمطعم...والحين امشي أوصلكم!! هزت رأسها وتوجهت معه باتجاه جدها ...نطقت وهي تشوف نظرات جدها لكنان: يبغى يوصلنا سلطان باعتراض: لا تتعب نفسك الحين يأ قاطعه كنان بإصرار: ما في تعب ولا شيء زم شفته على مضض سلطان وتوجه خارج المستشفى.. طول الطريق سلطان صاد لجهة الشباك وما كلم كنان بشيء ..ضاق صدرها بيلسان من جفاء جدها لكنان...ما تدري ليه ما يحب كنان .... بعد وقت وصلهم باب البيت ...ساعدت بيلسان جدتها بالنزول...ابتسمت لكنان لما نطق بتذكير: لا تنسين الموعد!! هزت رأسها بابتسامة وهي تنطق: ما رح أنسى ابتسم لها وبعدها تحرك بهدوء ...تنهدت وهي تحس قلبها طاير عليه ...قاطع مشاعرها سلطان بنبره ناقده: تراه راح وانت للحين واقفه تناظرين زوله!! انحرجت من كلام جدها ودخلت معهم ....وقلبها يدق بقوة من مواجهة ابوها!! اول ما دخلوا كان باستقبالهم وليد ..سلم عليهم بجمود...رفع حاجب وهو يتأمل بيلسان وللحين يده بيدها: وش فيه وجهك ؟! سحبت يدها وللحين قلبها طبول ..ردت وهي تحاول تسيطر على رعبها .. قبل ما ترد نطقت جدتها وخبرته بالسبب!! هز رأسه بتفهم وأشر لهم فوق !! اخذت نفس عميق وهي مستغربه طلبه منهم يطلعون لفوق ...غريبه جدها ابو فيصل وزوجته مو موجودين!! استقبلتهم خزامى بوجه شاحب ..والضيق واضح على ملامحها.... سلمت على بيلسان بطرف يدها وتوجهت مع امها للصالة يجلسون!! توجهت خلفهم وعقلها يلف ويدور وش يبغى أبوها منها!! جلست والضيق يزداد مع قرب المواجهة ... بعد السؤال عن الحال والاحوال ...نطق وليد بنبره قويه : بما إنك يا عمي هنا أبغى اتكلم معك عن ابنتك وحفيدتك وتصرفاتهم الي ترفع الرأس!! حست قلبها هبط من كلامه ....ناظرت جدها الي عقد حواجبه لما نطقت خزامى: ابو رعد خلا قاطعها وليد بقوة: لا ما خلصنا .. ابغى عمي يعرف واشوف وش رايه بذي التصرفات؟! سلطان وللحين عاقد حواجبه: وش فيه يا وليد؟! وليد بنبره مقهورة: وش تقول لخزامى الي من اول ما تزوجت بيلسان وهي تعيد وتزيد بنفس السالفه تبغى الفلوس الي دفعتهم مصاريف على زواج بيلسان .. قاطعه: بس ابوك قال قفلنا الموضوع وانتهينا منه! وليد هز رأسه: كذا اتفقنا وكل شخص يتحمل نتائج افعاله ...بس الي صار ما هو مثل ما قلنا ..تفاجأت إنه حضرة حفيدتك جايبه شبكتها والطقم لخزامى بدل مصاريف الزفت !! شفت لاي درجه وصلت حضرة الدكتورة؟! هذا الناقص قدام الناس تصغرنا؟! باكر إن سألها زوجها عن الشبكه وش تقول له؟! تقول بعتها واعطيت الفلوس لأمي الي خزامى بدفاع قاطعته: أنا غلطت واعتذرت منك ..ليه مصر تر وليد نطق بغضب: ماني بزر ترمين كلامي بالأرض وتضحكين علي بكم كلمه!!! وبعدها أسامحك!!! سلطان ناظر خزامى بعتب: وش هالتصرف ؟! انت المفروض لما جابت لك الفلوس لزوم رفضت وأرجعتي كل شيء؟! وبعدين وش فيها لو أهديت ابنتك يوم الزواج نطقت بدفاع: لو كانت لجين ما تفرق معي ..بس ذي عاقه وما تعترف فيني ليه اهدر فلوسي عليها؟! من لما طلعت على الدنيا وانقلبت حياتي بسببها!! مستحيل اقترب منها الا تدمر حياتي ..والسبب هي!! فتحت عيونها باستنكار بيلسان من كلامها ....خلاص ملت من هالسيناريو كلما تشوفها تعيده!! سلطان قاطعها بغضب: وقص يقص لسانك..البنات نعمه من نعم الله ...الا التفرقه بين العيال يا خزامى... إلا التفريق بين العيال خزامى بانفعال من صراخ أبوها عليها وكأنها بزر: ما تستحق الاحترام ...لو تعرف بفعايلها كان رد فعلك غير ... وليد ناظر خزامى بقوة ما يبغى هالسالفه توصل لسلطان ..يبغى يتفاهم مع بيلسان لوحدهم: كافي كلام! وبعدها التفت لبيلسان ونطق وهو يرجع لسالفه الشبكه: انت كيف تتصرف من نفسك ؟! تظنين نفسك كبيره وتفهمين؟! بلعت ريقها وكأنها مذنبه وجالسه بالتحقيق...ناظرت كف وليد وهو قابض عليها بقوة..تحس بأي لحظة يسددها عليها ....زمت شفتها بقوة تمنع نزول الدموع من هجومهم عليها ....ما تصرفت كذا الا حتى تتخلص من كلام خزامى ..بس رجعت المشاكل على رأسها ..الظاهر ما رح ترتاح من هالمشاكل الا اذا ماتت.....رجعت ناظرت ابوها لما تابع كلامه والنار تشع من عيونه: وربي احترام لعمي والا كان عرفت كيف اتصرف معك سلطان بدفاع عنها: هذي صغيره وش يفهمها بذي الامور..الحق على خزامى الي اكيد اكلت رأس البنت بالسالفه فاضطرت تعمل كذا حتى تخلص من نقها؟! خزامى انقهرت من كلام ابوها...دوم بصف بيلسان ما هو كأنها هي ابنته..وبنبره مقهورة نطقت: هذي صغيره؟! المويه تمشي من تحت رجولكم ....حنا جالسين على اساس انك عند ابوي بأمان وحضرتك فاله أمها مع كنان؟! كل اهل القرية يتكلمون عن علاقتك بكنان قبل خطوبتك..فضحتينا وصغرتينا وللحين ابوي يقول عنك صغيره قاطعها سلطان بغضب: قص يقص لسان كل واحد يتطرف لبيلسان بالعاطل!! رفع يده بتهديد وهو يتابع كلامه: إياك إياك اسمع هالكلام مرة ثانية خزامى بقهر: ترى هالكلام ما هو من عندي ..كل اهل القرية تتكلم عنها وليد بما انه وصل الموضوع لسلطان ..نطق بعتب: انا تركت البنت عندك على أساس تكون بأمان ...اما انصدم بكلام الناس عنها...ما رح أمرر هالموضوع بسلام ...الغلط ما أقبل فيه قاطعه سلطان بغضب من كلام وليد الي حس فيه يبغى يحسسه بتقصيره بالتربيه: اذا كانت غلطت فشيء طبيعي تطلع لك..ناسي نفسك ترى ليان حملت فيها منار قبل الزواج بفترة الخطوبة وليد فتح عيونه باستنكار كيف سلطان عرف بالسالفه: ان قاطعته خزامى إلي فتحت عيونها باستنكار من الكلام : كيف؟! قبل الزواج؟! وليد بدفاع عن نفسه: ترى كنت مملك عليها يعني زوجتي ... أما بيلسان يقولون بينهم علاقه قبل الخطوبه من ايام المدرسه وينك عنها ام خزامى تحس راسها انفجر من شجارهم!! بس توصل فيهم يتكلمون بعرض بيلسان الي متأكده من عفتها ...ما تسمح لهم ..وبغضب نطقت: ما لكم دخل ببيلسان ..حتى لو عملت الغلط ما لكم الحق تحاسبونها ...رميتوها باللفه علينا وما احد فيكم اعترف فيها !! نبذتوها بدون ذنب ...ما احد فيكم حملها بطفولتها او لاعبها او مسح على شعرها ... كل واحد فيكم كره هالبنت والسبب؟! تابعت كلامها وهي تؤشر على وليد :كرهت البنت يا وليد لانها كانت السبب برفض ابو خالد لرجوعك لمنار ..حقدت على هالبنت وكرهتها بدون ذنب...وانت يا خزامى كرهت هالبنت لأنه وليد رفض يعترف فيها ..... ولأنها سلطان قاطعهاوهو يشوف بيلسان تناظرهم بسكون والدموع تلمع بعيونها ..ما يبغى تنجرح أكثر : خلاص!! ام خزامى نطقت بقهر: ما خلصنا ما اسمح لأحد بكلمه على بيلسان .. أنا ربيتها وواثقه فيها ...والحين ابغى اعرف مين طلع هالكلام حتى اطلع حقها من عيونه! مطت شفتها بسخرية خزامى: كل اهل القرية يتكلمون ..تبغين تحاسبين كل اهل القرية ... أنا مب قادرة أصدق إنها ابنتي تكون بيوم من الايام كذا ...كل يوم عن اليوم الي قبله أتفشل أكثر منها .... اغلب الأحيان أشك إنها ابنتي يمكن صفاء بدلتها قاطعها سلطان وكف يده تستقر على خدها: انكتمي..تراك تماديت بالكلام!! لمتى يبقى لسانك مثل الأفعى تبثين سمومك بدون ما تراعي مشاعر خلق الله!! وبانفعال غاضب تابع كلامه : اعتبري كلامك صحيح وهذي البنت ما هي ابنتكم ...وكلامك مضبوط يوم السيل ابنتك ماتت وحنا أخذنا من القرية الثانيه طفله توفى كل اهلها واعتبرناها حفيدتنا ...بدلناها بدون ما تعرفين ..فلا تتفشلي من افعالها لأنها ما تقرب لك ...ومن هنا اقولك انت بعد مو ابنتنا لأنه افعالك تفشلنا ومستحيل يكون عندي بنت مثلك أنا متاكد الدايه بدلتك يوم ولادتك ...صدق العقل زينه وما هو بالشهادات!! ومن الحين اقولك غضبي عليك ليوم الدين وما ينزل غضبي الا يوم تضحك بيلسان وتقول أمي خزامى بكل سعادة!! دامك دوم تكسرينها ما ابغى اعرفك ولا ابغى اشوف وجهك!! خزامى هجمت على ابوها وهي تقبل يدينه برجاء وهي تبكي: يبه لاتحملني فوق طاقتي..ما قدرت أتقبلها.انا ام واعرف وش يعني الضنا...بس ما قدرت اتقبلها ما هو بيدي ...حاولت وفشلت ما احد يدري ويحس فيني وش يصيبني لما أشوفها ....أختنق ولو يطلع بيدي أحرقها وما اقول لا ...أنا أكرهها وما اطيق أشوفها... لا تحملوني فوق طاقتي...اموت بحرتي اذا شفتها مبسوطه ...لو يطلع بيدي تبقى مكسورة طول الوقت...من صغرها وأنا ازرع كرهها بقلب وليد وخليته ينبذها وما يهتم فيها ...احس بنشوه سعاده لما اشوفها منبوذه ... ما اقدر انفذ طلبك يبه ..شيء ما هو بيدي!! ختمت كلامها وانخرطت بالبكاء ...زفر سلطان بضيق من كلامها ...ناظر ام خزامى الي نطقت بأسى للحال الي وصلوا له: قلت لك من قبل يا سلطان هالبنت احد عامل لها شيء ...ودوم ترفض نشوف شيخ سلطان قاطعها بضيق: اتركينا من ذي السوالف ام خزامى بإصرار: ليه ليه اعطيني سبب واحد! يعجبك حالهم كذا كل وحده بطريق والأسى بينهم؟! تنهد وليد والضيق اكتسى ملامحه...جلس جنب بيلسان الي جالسه بسكون تراقب بصمت ... وضع يده على كتفها.. ضايقه كلام خزامى ...كيف تتكلم بكل قوة قدام البنت وما تراعي مشاعرها ..بلع غصته ونطق: بيلسان ابعدت يده بشويش ..وقفت والصمت يغلفها..توجهت بخطوات ميته باتجاه غرفتها القديمه ..دخلت الغرفه وقفلت الباب بالمفتاح ...توجهت لجهة الشرفه ..وقفت وهي تحس بالاختناق ..كتمت انفاسها للحظات وبعدها تنفست بعمق!! الصمت يحيط فيها ..هذا حالها وحال كثير من الناس ينجرحوا من اهلهم وما يكون لهم رد الا الصمت ... هذي أمها ما رح تجلس تردح لها ...اختارت خيار الصمت بالرغم من الجروح الداميه الي حصلتها من أمها ....وش أصعب من لما يكون الي جرحك أمك او ابوك ...لو كان غيرهم تأخذ حقك بكل سهوله بيدك او بالدعاء ..ما تقدر ترفع يدينها وتدعي ..مهما وصل الحال تبقى أمها .....عندها امل بيوم من الايام يتغير كل شيء.... رفعت نظرها للسماء وبداخلها غصه ما قدرت تبلعها ...نزلت دمعه وتبعتها دموع .... تنهدت وهي تمسح دموعها وهي تردد بداخلها " ايام ورح تمر وتصير ذكريات" دخلت الغرفه وتوجهت للمرايه تفك الشال ..طلعت عيونها برعب وهي تشوف وجهها ....مخيف...تحسست وجهها بخوف من المنظر!! الحين عرفت سبب فجعة الناس لما يشوفون وجهها!! توجهت للسرير وألقت نفسها بتعب من هالحياه كلها ... غمضت عيونها كل الي تبغاه تبعد عن كل شيء يوجعها ويجرحها !! ** ** ** ساعات مرت وانتشر خبر وفاة ام سلطان ...جالسه بيلسان بالصالة متمدده على طولها تناظر الشاشة على سبيستون ..جذب انتباهها قصة سندريلا ... وكأنه مكتوب عليها تعيش مع خزامى ومنار زوجات أب!! تنهدت لما انتهت الحلقة ...طلعتها مع كنان أكيد إلتغت بسبب الوفاة... رفعت نظرها لجدتها الي جلست على كنبه مقابله لها: كيف وضعك الحين؟! بيلسان بصوت مجروح: الحمد لله بخير!! ام خزامى هزت رأسها: اتصل عليك كنان يسأل عنك .... يقول جوالك مغلق؟ بيلسان هزت رأسها وما علقت!! اقتربت خزامى وجلست والضيق مخيم عليها بعد مقاطعه ابوها لها ...رفعت حاجب ونطقت بسخرية: غريبه جالسه هنا ...على الاقل روحي واسي حماتك منار..الحين تلاقينها حزينه! ام خزامى زفرت بضيق: لا حول ولا قوه الا بالله..انت ما تتركين حركاتك ؟؟ خزامى مطت شفتها بقهر ..للحين ما نسيت كيف أبوها صرخ عليها وضربها والسبب بيلسان ...ونفس الشيء وليد صرخ عليها وطلقها بعد ما ضربها والسبب بيلسان!! ما ردت بيلسان وهي غارقه تفكر بسالفه كنان ...ما تدري كيف انتشرت ووصلت لامها...ومن وين طلعت هالكذبه...ما عمرها كان فيه تواصل بينها وبين كنان...والاهم من كل هذا ليه السالفه انتشرت قبل زواجها ...الفترة بين زواجها والمدرسة طويله ليه انتشرت بهذا الوقت أكثر!!! عقدت حواجبها بتذكر شيء غاب عن ذهنها ....ايام المدرسه لما وقفها كنان وكلمها عن صديقاتها..بس متاكده ما كان فيه أحد بالمكان ..معقول هاللحظات القليله تم تأليف قصة حب كامله؟! ما تدري الناس ليه تنشغل ببعضها وتترك نفسها....رفعت نظرها لامها وهي تنطق بضجر: افففففف ترى مليت صار الف مرة متصل حتى يطمئن على صنوايت...خذي كلميه وما تتأخري أبغى جوالي!! تابعت كلامها وهي تشوف بيلسان تناظرها بتناحه: خذي كلمي كنان!! مدت يدها واخذت الجوال بهدوء لما عقلها استوعب السالفه ...فتحت خط ورجعت لغرفتها!!! ام خزامى بعد خروجها نطقت بنصيحه: اسمعي كلامي وخلينا نروح لشيخ قاطعتها خزامى بعناد: هذي آخرها انا دكتورة قد الدنيا واراكض خلف ذي السوالف....شايفيتني مصروعه حتى تقولين كذا قاطعتها أم خزامى بقهر: واكبر مصروعه وغبيه وتافهة!! استغفر الله ...استغفر الله...تحملين البنت فوق طاقتها...تراها للحين محترمه إنك أمها وساكته لك. ....بس رح ييجي يوم وتفقد قدرة التحمل وتنفجر بوجهك .... ما اقولك تحبينها بس على الاقل عامليها بلطافه والي بقلبك خليه بقلبك....يمكن مع الايام ربنا ييسر ويفكها ....حسبي الله على من فرق بينكم!! ارتخت ملامح خزامى وبصوت ظهر فيه الضيق وهي تفضفض: لما وقعت عن الدرج وغرقت بدمها..وقتها لما شفتها حسيت قلبي انفطر...كنت مستعده اعمل اي شيء بس ترجع سالمه...ما طال هالشعور سرعان ما استقر الكره بداخلي لها..... خلال الفترة المقبلة رح اسافر هذا افضل حل ..كذا ترتاح من قسوتي . بس ما رح اسافر وأبوي زعلان مني!! والمشكلة يطلب شيء فوق طاقتي!! ام خزامى مطت شفتها بعجز من الحال يلي وصلوا له!!! ناظرت بيلسان الي طلعت من الغرفه لابسه ..اقتربت ونطقت بنبره هادئة: كنان ينتظرني تحت!! خزامى ناظرتها وهي تشوف اهتمام كنان فيها :ايه اركضي لحبيب القلب .. بس يكون بعلمك وليد ما رح يسكت على السالفه ورح يحاسب كنان على كل شيء عمله واستغفلنا فيه!! ** ** ** ام خزامى اشرت لها بقلب ميت: روحي لا تأخرين زوجك ..الله يثبت علينا العقل!! هزت رأسها بيلسان بنفس الهدوء وغادرت المكان وغيمه الاحزان من فوقها خيمت...طلعت من البيت ووقفت لما التقت بجسار الي من اول ما شافها شهق: بسم الله اللهم سكنهم مساكنهم!! ابتسمت بدون نفس على تعليقه..تابع كلامه وهو ينطق: سلامات قاطعته بهدوء: الله يسلمك سكتت وهي تسمع صوت الهرن من سيارة كنان .استأذنت من جسار وتابعت خطواتها بهدوء! اول ما ركبت نطق بعدم استحسان: اشوفك طقتيها سوالف مع جسار؟! رفعت حاجب بعبوس من كلامه وكأنه ينقصها تنظير: كلها ثواني الي وقفتها عكس بعض ناس ساعات مع بنات العم يتكلمون؟! خزها وهو يحرك السيارة:كلمتك ملغومه .. مين تقصدين؟ ردت بجمود: كل شخص يعرف نفسه توسعت ابتسامته لما فهم كلامها : قصدك عن ميس!! زفرت بضيق وهي تناظره: طول وقتك معها وأنا ساكته والحين لأني وقفت ثواني قاطعها بابتسامه: الحمد لله في بوادر لو ادري من زمان كلمت ميس رفع حاجب وهو يشوفها ما ردت والضيق واضح عليها ..نطق باستغراب: لا تقولين إنك زعلانه علشان ميس؟! ترى هي بحسبة أختي وطلبت مساعدتي ومستحيل أردها...وبعدين لو ابغى ميس تراها ما هي بعيده عني ...بس أنا اخترتك انت وتحملت المهر الي يكسر الظهر قاطعته بعبوس: ذلتوني على هالمهر ..ترى ادري ما دفعته!! ضحك بخفه: طيب ليه معصبه؟! هزت راسها بالنفي: مو معصبه!! تابع كلامه وهو يسأل باهتمام: اذا تحسي نفسك تعبانه خلينا نمر بطريقنا للمستشفى قاطعته برفض: انا بخير ...بس وين رايحين لا تقول للعزاء؟! نطق بروقان: قالوا لك مجنون حتى أخذك للعزاء واخرع الحريم هناك!! ما عبرت كلامه وهي تعيد نفس السؤال: وين رايحين ؟! رد وعيونه على الطريق:نغير جو والا عندك مانع؟! نطقت باستغراب: والعزاء؟! رد بهدوء: تراها ما هي جدتي ..الله يرحم جميع المسلمين!! خاطري من وقت أتفضى وأقضي وقت معك ... تنهدت وهي تناظره عيونه على الطريق...كلام خزامى عمره ما رح يخلص ليه تنكد حالها علشانه قاطع افكارها كنان وهو ينطق: زعلانه علشان كلام اهل القرية!! فتحت عيونها باستنكار: اي كلام؟! ضحك بخفه: خالي وليد اتصل فيني بلعت ريقها وهي تحس اهلها ما رح يرسونها على بر: وش قال قاطعها بلامبالاة: يقول عن علاقتنا قبل الزواج؟! نطقت بضيق من كلمة علاقتنا قبل الزواج ما استساغتها حتى تضيفها لاسمها تحس نفسها ارفع من كذا ..وبتحقيق نطقت : أكيد قلت له إنه هالكلام كذب وما في بيني وبينك شيء؟! ضحك بخفه: وليه اكذب ؟! فتحت عيونها باستنكار: كنان!! ما اسمح لك بهذا الكلام حتى لو مزح!! رفع حاجب وهو يناظرها بنظرات خاطفه: ومين قال مزح!! أنا اتكلم بجديه!! قلت له الكلام مضبوط انا اعرفها قبل ما تنتقل للمدينه من ايام المدرسه...وبالعطلة شبه يومي نلتقي قاطعته بانفعال من كذبه: انت وش قاعد تخبص...كيف تقول هالكلام لابوي... ترى انت تقهرني بكلامك حتى لو كان مزح صف السيارة بعدها التفت عليها وهو يضحك على انفعالها وقهرها : اعترفي انا وانت نعرف بعض وكنا نلتقي ليه تنكرين؟! ..لا تقولين نسيتي الجدار الفاصل بيننا؟!! ارتخت ملامحها بعد ما زفرت بضيق...تابع كلامه وهو ينطق بابتسامة: قلت له اعرفك لماكنت صغيره تجلسين على الجدار والناس بس تبغى أي كذبه وتبهرها .... تابع كلامه بروقان: قلت لأبوك شبيهة أمي مستحيل أفرط فيها لو ادفع دم قلبي!! عشقت رائقة الاحساس ام الجدايل قاطعته بانفعال من كلامه الي حسته ما له معنى الحين هي مقهوره وايام ما نامت من كلام اهل القرية وهو جالس يتريق: لا تقول انك قلت لأبوي هالكلام؟! اشر لها بابتسامة: اقول انزلي ...لا تفكرين بالموضوع ...سواء كنا بعلاقه او لا ما احد له دخل فينا ...دام اجتمعنا بالحلال ما احد له عندنا ...وما رح نسمح لاحد ينكد حياتنا ويدخل الضيق لحياتنا.... ايامنا تمضي ما رح نقضيها بالنكد والزعل ...رح نستغلها ونستمتع فيها ..باكر رح تصير ذكريات ...أبغى لما نذكرها نبتسم ونتمنى ترجع مره ثانيه.. ما ابغى لما نذكرها يمتلئ القلب بالضيق والنكد ...هذي حياتنا وحنا نختار كيف تكون!! ختم كلامه بابتسامة جميله تريح القلب...ابتسمت بألم لو كان الفعل سهل مثل الكلام ... ناظرت المطعم الي وقف عنده ....ناظرته والدموع تتراقص بعيونها !! نطق بروقان: اكيد دموع فرح لأنك معي؟! خزته وهي تدفه بابتسامه حزينه..وبصوت شبه باكي: ابوك يالثقه!! مسحت دمعه تسللت لخدها...ضحكت ودموعها تنزل لما نطق بضجر: تراك مخربطه العزاء ما هو بالمطعم ..الحين ارجعك عند امي واجلسي فوق رأسها وابكي!! يلا عاد انزلي !! مسحت دموعها ونزلت من السياره ..قفلت الباب ووقفت تناظره.. ابتسمت له لما ناظرها وللحين عيونها تلمع بالدموع... مسكت بيده ودخلت وهي تحاول بأقصى جهدها ترمي خزامى وكلامها خلف ظهرها .... لحظات ما رح تتكرر ما رح تفرط فيها !!! ** ** ** مر اسبوع على وفاة ام سلطان ...إلتزمت بيلسان في بيت ابو ماجد وخاصه بعد رجوع جدها للقريه من ثاني يوم للوفاه ... عدلت جلستها وابتسمت لليان الي تتكلم عن بعض مواقف صارت بالعزاء!! ديما بتحذير: انتبهي بأي لحظة ترجع أمي لا تسمعك تتكلمين كذا!! ليان ابتسمت: انا وش قلت؟! رنا مندمجة: كملي ما عليك منها هالخوافه! ليان ناظرت بيلسان لما حكت جبهتها وهي تثاوب ..ابتسمت لها بمحبه ...رمت كلام امها بعرض الحائط... لأنه مستحيل تصدق بأختها ...ثقتها ببيلسان كبيره ..وحتى زوجها نفس الشيء تحسه ما عنده شيء عاطل ...هو يعتبرها مثل أخته بس ما تدري ليه امها فسرت الامور بطريقه ثانيه ... سحبت بيلسان من خدها: اقول يا حلوة صحصحي واترك عنك النوم!! بيلسان بنعاس: ترى صاحيه من الصبح رنا قاطعتها بفجعه: يا كذابه جهزت فطور كنان واول ما طلع مباشره رجعت نامت وما صار لك نص ساعه صاحيه!! بيلسان رجعت تثاوب: وش احلى من النوم!!! أول ما ختمت كلامها...سرعان ما صرخت لما كبت رنا المويه على وجهها!! ضحكت رنا بقوة على شكل بيلسان : ايوه كذا فتحي عيونك يا كسوله!! بيلسان مسحت المويه عن وجهها وهي تنطق بتوعد:وربي الا سطل مويه فوق راسك باكر وانت نايمه رنا تضحك: رح اقفل الباب بالمفتاح ما رح تقدرين! ليان بابتسامه: ما هو شرط باكر لو مكانك يا بيلسان الا اترقب لها واخليها تغرق بالمويه البارده!! ديما : لو مكانك ارميها بالمسبح رنا حركت حواجبها تغيضهم: ما رح تقدرون علي!! بيلسان حركت شفتها تتكلم بس سكتت لما دخل ماجد بهدوء وهو يرد السلام!! بعدها سأل باستفسار: وين أمي؟ رنا بابتسامة : عند عمتي جميله رح تنام عندها!! هز رأسه واقترب وهو يسلم على ليان : كيف حالك ...وين ولدك؟! ليان بابتسامه: الحمد لله بخير من الله ..ولدي نائم هز رأسه وجلس وهو يناظر بيلسان بابتسامه ما يدري محبة هالبنت دخلت قلبه ..ما يدري السبب هل هو الشبه الي بينها وبين فاطمه والا يحبها لانها زوجة ولده واخذت من غلا كنان ....نطق وهو يناظرها: كنتنا الحلوة كيفها اليوم؟! رنا بمداخله وهي تضحك: بابا لزوم تقول كنتنا النائمه بيلسان خزتها بتوعد ..بعدها التفتت على ماجد بابتسامة وهي تقهويه: الحمد لله بخير!! تناول منها وهو ينطق : إن شاء الله دوم تكونين بخير!! الغداء جاهز؟! رنا : ماما قالت ننتظرها على الغداء هز رأسه وهو يسأل بيلسان : وكنان ردت بهدوء: ما رح يحضر الغداء... هز رأسه وهو يقاطعها: على خير إن شاء الله... على العموم جهزي نفسك باكر عندك مقابله بمدرسه******* نطقت باعتراض: بس أنا ما قدمت وما افكر حالياً بالتدريس قاطعها بحزم: أنا قدمت لك ...ليه الواحد يدرس ويتعب علشان يضع الشهاده بالخزانه؟! دام تقدرين تساعدين غيرك وتساهمين في بناء المجتمع ليه ما قاطعته بضيق: يعن نطق وهو يقاطعها: بدون اي اعتراض ...اذا تبغين ترمين كلمتي بالارض هذا شيء ثاني!! هزت راسها بقلة حيله...نطقت بهدوء: مثل ما تشوف يا عمي!! ** ** ** مرت الايام عليها وكانت أجمل ما تكون ... اليوم مر على زواجها سنه ونصف... انشغلت بالتدريس وانغمست فيه ..بعد ما تحسن وضعها كثير وما عادت تنام مثل قبل .... حياتها مع كنان من اجمل ما تكون...وما تخلو من المشاكل البسيطه الي تعتبرها ملح الحياة...الي للحين مستغربه منه " منار" تعاملها وكأنها وحده من بناتها ...اما ماجد ما تقدر توصف روعة هذا الانسان ...تغبط رنا وديما على هذا الاب... اما جدها وجدتها للحين بالقرية ووضع جدها تمام ....اما خزامى ووليد سافروا لخارج البلد واستقروا هناك ...وما رح يرجعون الا بعد سنوات حتى يأخذون الجنسيه!! تنهدت وهي تنتبه لورقة الامتحان عفستها وهي تخربش عليها نسيت نفسها!! عضت على شفتها من هالورطه ؟! وش تقول للطالبة؟! اقترب منها كنان وجلس جنبها وهو رافع حاجب بابتسامة: ليه عفست الورقه كذا؟! ابتسمت بتورط: نسيت نفسي ظنيته واحد من دفاتري ؟! وش الحل الحين؟! سحب الورقه وهو يناظر الخرابيش: خلاص لا تعطيهم الاوراق سحبتها منه وهي تنطق بضيق: وكأني ما قلت لك عن قوانين هالمدرسه!! خلاص اقول لهم زوجي قاطعها وهو يشدها من خدها: يمه منك مستحيل تعترف وتقول عليها الحق !! قولي الحقيقه إنك للحين بعدك بزر وتخربشين على أي شيء!! ابعدته بعبوس وهي تزفر بضيق: خلاص اعيد لهم الامتحان ابعد الاوراق من يدها : خلاص اتلفي الورقه وقولي للبنت ورقتك ما هي موجوده وعيدي لها الامتحان وانتهينا ... هزت راسها بعد مااستحسنت الفكرة ...وبتذكر: خالتي منار اليوم طالعين للسوق حتى يتجهزون لزواج هاني!! هز رأسه بابتسامة: ما ادري ليه امي مستعجله على زواجهم احسه بعده بزر على الاقل ينتظرون يكمل جامعه ...ناشب لهم من الثانويه ... ابتسمت بيلسان : الله يوفقهم !! نطق بهدوء: اوصلهم للسوق وانا وانت نشوف مكان هادئ نجلس فيه قاطعته : خالتي مصممه اروح واشتري للزواج ..مع اني قلت لها عندي ملابس بس قاطعها باعتراض: وليه الملابس؟! يا جمال العباية والشال ما له داعي لكل هالخرابيط!!! ويا ويلك لو سمعت حركات الطقاقة!! خزته بقوة: لا والله؟! وش فيها يعني؟! رفع حاجب : كيف وش فيها؟! بيلسان ما احب هذي الحركات ...خليك عاقلة وثقيله مثل دوم ...اتركي حركات البزران والهبل نطقت بضيق : خلاص ما رح أحضر من الأساس..نزلني على القرية واكون لك من الشاكرين!! ختمت كلامها بملامح بريئة... ضحك بخفه على ملامحها تتمسكن حتى تتمكن : رح تحضرين الزواج ...ور سكت لما رن جواله ...فتح خط وابتعد وهو يتكلم بالجوال...تنهدت بضجر ...ما لها نفس تحضر الزواج ...مشتاقه لجدها ولجدتها مر اسبوع وما شافتهم ...دوم تخاف يصير معهم شيء وما عندهم معيل... غمضت عيونها وهي تدعي من قلبها ربنا يحفظهم لها .... ** ** ** يوم الزواج واقفه مع ليان بملامح هادئة...تناظر من حولها بتأمل ... قاطع تأملها ليان وهي تنطق بضيق: بالله باينه كرشتي! بيلسان ابتسمت بخفه: والله ما هو باين شيء... بالعكس الفستان حلو وناعم!! ليان زمت شفتها بضيق: عجبني فستان كثير بس المشكله ماسك على الجسم ومع كرشتي الصغيره منظري يضحك..اضطريت اخذ هذا الفستان يعني يخفي شوي!! بيلسان بابتسامه: اعملي رياضه ليان بضجر: كل يوم اقول باكر رح اعمل رياضه ولما ييجي اليوم الي بعده اتكاسل واقول اليوم الي بعده !! انت تلعبين رياضه ؟! بيلسان ابتسمت بحسره: اي رياضه مع التدريس وربي ارجع للبيت ابغى الفرشه والصبح اروح للمدرسه وأنا مغمضه!! ليان ضحكت بخفه: شوفي عمات كنان مجتمعات واشرت جميله عليك بعيونها..الظاهر يحشون فيك انت وهذي العبايه!! ما ادري كنان كيف يفكر ؟! بيلسان ابتسمت: خايف احد يصيبني بالعين ختمت كلامها وهي تمد لسانها مع ابتسامه صغيره! ليان ابتسمت : ترى كنان عنده من طبع بابا ...تتذكرين ممنوع نحط مكياج بالمناسبات بيلسان مطت شفتها: ابوي اخف منه على الاقل ما يقول اذا وضعت شيء خفيف ... تخيلي ممنوع ولا شيء اضع خارج الجناح؟! ويضحك علي بسالفه انت جمالك ما هو بحاجة هذي المساحيق!! ليان ضحكت: وانت مثل الغبيه تصدقين؟! هزت راسها بابتسامة عبيطه: ايه احس حالي ملكة جمال العالم واتخيل الناس من حولي يبغون يتنافسون مين يعمل معي لقاء! ليان هزت رأسها : أحيانا تضطرين تتجاهلين بعض تناحة عقل الرجال حتى تمشي الحياة!! كلها حفلة وخرابيط ما له داعي للمشاكل علشان حفلة!! بيلسان بهمس لها: يا ليته كمل لي معروفه واعفاني من الحضور كله...ما لي خلق للمجاملات!! ليان : لا ما يصير لزوم تحضرين ...تعالي سلمي على حماتي تراها معجبه فيك!! ختمت كلامها وهي تمد لسانها بغمزه!! بيلسان قرصتها : اتركيني من حماتك ...رايحه اشوف خالتي ام ماجد اشرت لي ..الله يستر!! اقتربت من ام ماجد ونطقت بلطافه: خالتي نادي قاطعتها: ايه ..اجلسي أشوف!! جلست وهي تناظر جميله الي اقتربت منهم ....التفتت لأم ماجد: تفضلي خالتي!! ام ماجد ناظرت جميله الي سحبت كرسي وجلست بهدوء ...رجعت ناظرت بيلسان وهي تنطق بحذر: انتهى البارت... دمتم بخير 🌹 | ||||
|
| |
 |
| أدوات الموضوع | |
| انواع عرض الموضوع | |
|
|
2373Likes
العرض العادي
