20-05-23, 10:51 PM
| #542 | ||||||||
 
|  اظن زيارة الوليد فقط الانه مشتاق للاطفال ، سبحان الله ممكن الاطفال يكونون سبب لتقرب الوليد لبيلسان وتعلقه فيهاا ، ممكن راح نشوف نسخه ثانيه من تعلق سلطان في بيلسان في الوليد | ||||||||
|  |
|
21-05-23, 12:45 AM
| #543 | ||||
| بارت ٤٠ واقفه تناظر وليد وغصة الفرح خنقتها ...ما توقعت بيوم يزورها ...فرحتها بتواجده ما توصف.. شعور جميل لما تحس بتواجد أهلك من حولك!! وليد باستغراب وهو يشوف لمعة الدموع بعيونها:صاير شيء؟ بيلسان هزت رأسها بالنفي ورسمت ابتسامه دافيه: ما في شيء سكتت لما خنقتها العبرة!! وليد بإصرار: متأكده؟! هزت راسها بابتسامة واسعه والدموع تتراقص بعيونها : والله ما في شيء ..بس مبسوطه بشوفتك!! سكت للحظات وليد ما توقع جوابها ..ما توقع بيوم من الايام تفرح بشوفته بيلسان او تشتاق له...منصدم من كلامها ما توقع هالشيء ابدا!! ابتسم بملامح مريحه: اعتبريني كل يوم باب بيتك!! توسعت ابتسامتها: تنور البيت !! هز رأسه بابتسامة عريضة وعيونه تتوزع على المكان: مرتاحه هنا!! هزت رأسها : الحمد لله اهم شيء الاستقرار نطق بتأييد: اكيد ...الحين عندك ٣ ما هو مثل قبل كنت برأسك ...لزوم تكبرين عقلك وتفكرين الف مرة قبل ما تخطين أي خطوة ...ما ينفع الزعل ...وسعي صدرك كل الحريم تواجه صعوبات مع اهل زوجها ...عقبات تواجه أي حرمه ... قاطعته : يعني نرمي بكرامتنا الارض حتى تستمر الحياه قاطعها بتبرير: ما قلت كذا؟! مو كل مشكله كل العالم تسمع فيها وتوصل لمركز الشرطه!! ماجد رجال غانم وما رح يظلمك اذا احد غلط عليك ...وحتى كنان ما رح يقصر!! ربي يشهد احب ما علي اشوفك مستقره ومبسوطه بحياتك !! الا ما قلت لي وين العيال .. وربي اشتقت لهم مو عارف اجلس بدونهم؟! بيلسان ابتسمت على تعلق أبوها بالصغار: عمي ماجد مثلك متعلق فيهم..شوي ويرجعهم كنان!! وبتردد سألت: أمي ما قاطعها لما فهم سؤالها: كانت تبغى ترافقني هنا ..بس ما تبغى تترك جدتك لوحدها ...لما تنتهي العده يصير خير !! سكتت وهي تسمع تبريره وهي متأكده إنها رفضت تزورها!! ما تدري متى يطيح الحطب من رأس أمها!! وليد بتساؤل: عمك ماجد نقل من مكانه؟! هزت رأسها بعدم معرفه: ما ادري ليه؟! نطق بهدوء: اليوم بالمركز ما شفته عقدت حواجبها وهي تقاطعه: بالمركز؟! وليه كنت هناك؟! وليد مط شفته بسخرية: ما ادري لاي حد توصل النفس الرديئة عندج بعض البشر ...يعني لو بيت سلطان قصر أقول طمعوا فيه ...يعني ما ادري وش فيه حتى يسرقوه؟! انصدمت من كلامه: انسرق ؟! متى وكيف؟! ومين ابتسم بسخريه: ما هو بعيد ..جاركم الي مفروض يصون بيت جاره بغيابكم ..بس واضح انه نفسه دنيئة ومنحط...جاركم سلمان ومعه واحد ثاني قاطعته باستنكار: سلمان!! وليد هز رأسه : في ناس شافوهم وبلغوا الشرطه عنهم ومسكوهم قبل ما يهربوا!! للحين مصدومه ...طول عمرها تشوفه انسان سيء ويحشر نفسه بكل شيء.... بس ما توقعت توصل فيه يخون عشرة الجيره!! تنهدت وهي تفكر كيف مع الايام تنصدم بالناس الي حولك ... وليد تابع كلامه: انا رح انزل البيت للبيع...جدتك ما تبغى ترجع للقرية من بعد رحيل سلطان حست الغصة تخنقها وهي تسمع كلامه ...تحس جرح فقدان سلطان انفتح من جديد ...كيف يبيعون ذكرياتهم الي عاشتهم مع سلطان وجدتها؟! وليد تابع كلامه بهدوء: البيت باسم جدتك والمزرعه مسجلها باسمك هزت رأسها لانه عندها علم مسبق بهذا الشيء!! فتحت عيونها بصدمه لما نطق وليد: لما تخلص فترة النفاس رح اكون جهزت امور بيع المزرعه قاطعته برفض: ما رح أبيعها وليد مط شفته بسخرية: وش تبغين فيها ... تحتاج لرعاية واهتمام وانت هنا قاطعته: رح اعطيها لأي احد يحافظ عليها ويهتم فيها حتى لو بدون مقابل ...رح اتركها ما ندري وش مخفي عنا بالايام القادمه!! هز رأسه بتفهم: براحتك ..هذا شيء يخصك وما اقدر أجبرك عليه!! ** ** ** خزامى نار بقلبها لما اكتشفت انه أبوها مسجل البيت باسم امها والمزرعه باسم بيلسان!!...وبنبره مقهورة نطقت: يا يمه انا مو بحاجه للفلوس لكن احس النار تشتعل بداخلي .. وكأنها بيلسان ابنتكم وانا الغريبه ام خزامى بطول بال: يا خزامى لمتى وانت متحامله على البنت؟! وكأنها بنت الجيران!! الي مثلك المفروض تفرح لما تشوف اي احد يهتم بعيالها ويقدرهم!! خزامى هزت راسها بعجز: مب قادر يمه احبها او اتقبلها ما هو بيدي ..لما اشوفها احس كل كره العالم بقلبي لها!! ام خزامى نطقت بجديه: وضعك ما هو طبيعي ..كم مرة اقولك خلينا تشوف شيخ قاطعتها خزامى بعبوس: اتركينا من هالسوالف!! بالله مين رح يعمل لنا سحر ؟! او اي شيء!! وكأنه ما احد أنجب بنت بالعالم غيري!! ام خزامى ما عجبها كلامها: الناس عينها فارغه والحسد يسري بدمها !! وش تخسرين لو جربنا خزامى يضيق صدرها من ذي السالفه ...نطقت تقفل الموضوع: يمه اتركينا من هالسالفه!! الحين خلينا بسالفة سرقة البيت ...ما دخلت رأسي..معقول سلمان يعملها ويسرق بيتكم؟! ام خزامى ما تحب بيت ابو سلمان ...نطقت بهدوء: السجن وقليل عليه !! ما قدر يحفظ شيباته على اخر العمر!! خزامى زمت شفتها وللحين مستغربه تصرفه: يمكن ظن يلقى بالبيت فلوس ام خزامى قاطعتها: ابوك ما كان يترك الفلوس بالبيت ...يسحب من البنك اول بأول خزامى عبست ملامحها: تدرين كل الميراث بكفة وعيال ابو خالد بكفه ... ام خزامى بهدوء قاطعتها: حتى هذي رح تعترضين عليها خزامى قاطعته وهي تنطق بخفوت: استغفر الله خليني اتصل بوليد كل هذا جالس عند البزران ...الله يحفظ عليه العقل ...اشوفه استخف مع هالبزران!! ما ردت عليها ام خزامى وعقلها سرح بحياتها ...الوحده تمزقها بغياب زوجها بالرغم من وجود الناس من حولها ...ما تحس بطعم الحياة بدونه!! ** ** ** مرت الايام ومنشغله مع اطفالها ...كنان تدبر امر المزرعه وضمنها لواحد من القرية يعتني فيها ....ما نزلت للقرية ولا لها نيه تدخلها ...اطمأنت على نجوى والشلة ....والحين كل وقتها على صغارها ....استهلكوا طاقتها ...اذا نام عبدالرحمن يبكي سلطان واذا نام سلطان تصحى فاطمه ...جننوها وما عادت تعرف الليل من النهار ....امنيتها تنام الليل الطويل بدون ما تصحى ....وضعها صعب وما عادت تقدر تتحمل اكثر ...كنان لما يكون متواجد يساعدها ...بس اغلب الاحيان يرجع من الدوام يبغى ينام ويريح وخاصه لما يكون عنده مناوبه....ناظرت المراية وهي تشوف الهالات حول عيونها بسبب قلة النوم ...متى يكبرون ؟! زفرت بضجر لما ناظرتهم وبدأت اسطوانة البكاء!! كلهم يبكون مع بعض...تبغى تصرخ بأعلى صوتها " ارحموني" تقدمت منهم ...ناظرتهم بقلة حيلة...نطقت بضجر: يقولون البكاء يوسع الحنجرة ...سحبت نفسها وطلعت من الغرفة تكمل تجهيز الاكل!! تحوس بالمطبخ ومتجاهله صوت البكاء.. الي ما تدري وش سببه ...شبعانين وغيرت لهم وكل شيء تمام ...ليه يبكون!! يظنون انها فاضيه لهم ...الظاهر حسوا بدلالهم ويبغون احد يلفلف فيهم ويحملهم طول الوقت ...كله من بيت عمها طول الوقت حاملينهم والحين يبغون طول الوقت تحملهم..... رح تربيهم من جديد وتعودهم على نظامها ... نقزت على صوت كنان وهو واقف عند باب المطبخ وهو رافع حاجب: ما تسمعين صوتهم يبكون .. بيلسان ناظرته للحظات للحين ما رجعت علاقتهم مثل قبل ..تحس في برود وفتور ...ايام وضعهم تمام وايام وكأنهم غرباء ...نطقت بهدوء: البكاء مفيد للحنجره قاطعها بحده من سخافتها: دكتورة ما شاء الله عليك تركها وتوجه لهم ...حاست بوزها يقال الاب الحنون والمهتم .... ما احد حاس بطاقتها الي نفدت يا دوب تقوم بنفسها ...فيها كسل ما طبيعي ...لو يطلع بيدها ما تتحرك ...بس مضطرة تقوم بواجبها..... زمت شفتها وللحين صوت البكاء يوصلها ...جهزت الاكل وتوجهت للغرفه وهي تشوفه يحمل عبدالرحمن وفاطمه مع بعضهم ويهزهم !! بيلسان ناظرت سلطان على السرير للحين يبكي ..رفعت حاجب وما عجبها تصرفه: ليه ما حملت سلطان قاطعها بهدوء: اركب يد ثالثه ...تعالي خذي فاطمه حتى احمله!! زمت شفتها بضيق واقتربت من سلطان وهي تحمله وتقبله بحنان: يا قلبي انا ...خلاص بكاء!! مط شفته بسخرية وهو يناظرها : وش معنى هالحركه؟! رفعت حاجب وباستغباء نطقت: أي حركة؟! هز رأسه بأسف لتفكيرها الغبي ...بعدها نطق بهدوء:انا طالع مع الصغار عند اهلي ...اذا بغيت تروحين قاطعته: الحين وقت الغداء قاطعها: ما لي نفس بالاكل ...تناولي اكلك وتعالي صكت على اسنانها بغيض: تبغى تروح الله معاك بس الصغار اتركهم الحين وقت الغداء نطق بسخريه: صدق؟! لا تنسين تحطين لعبد الرحمن دجاج تراه يحبه كثير !! احتدت ملامحه وهو يتابع كلامه: ترى عمر الصغار ٤ اشهر اذا ناسيه وش علاقتهم بالاكل؟! استغفر الله !! بيلسان بالله عليك اتركي المركب ساير ...واتركي هالتصرفات لانه صبري له حدود ...أكثر من الف مرة اقولك ما يطلع لك تمنعين الصغار عن أهلي عقدت حواجبها : امنعهم؟! كل يوم ناخذهم قاطعها باتهام: تنكر وكأنها مو هي الي ترفض يغيبوا عن عينها في بيت اهلي ..اما هنا يموتون من البكاء وانت متجاهله زمت شفتها بضيق من طريقه كلامه ...سرعان ما تنهدت وتكلمت بهدوء : صحيح كلامك ...أنا ما اثق بأي احد من حولي ...وقلت لك هالشيء من قبل... اعتبروا العيال ما هم موجودين...من قبل انكرتم وجودهم واتهمتوني بشرفي قاطعه بقرف من كلامها: اقول اسكتي ما ادري عقلك من وين يجيب هالكلام!! وقبل ترمي كلام علينا ..ناظري نفسك وأغلاطك ....مو انت الي حاولت بكل جهدك ما تحملين وما ادري وش هدفك من ذي السالفه ...لكن سبحان الله غصب عنك ربي رزقني بالعيال ...انت الي ما بغيتي اطفال فلا تمثلي دور انت مو صاحبيته!! وربي إن سمعت كلامك مرة ثانية ما رح يحصل خير..اهلي خط أحمر تفهمين!! انقهرت من نبرته ونطقت بقهر: ما فهمت!! اذا اهلك خط احمر انا بعد خط نار ...رح احرق كل من يقترب مني ومن عيالي ..بيلسان الغبية ماتت! مط شفته بسخرية: اشك انها بيلسان الغبية ماتت لانها جالسه تكلمني!! فتحت عيونها باستنكار من كلامه ...وقبل ما ترد نطق : كبري عقلك واتركي هالوساوس عنك!! خلي قلبك ابيض وسواد قلبك ما نبغاه واتمنى لا تورثينه لعيالي!! حست خنقتها العبرة من كلامه ..وبنبره مهتزه ودموعها تلمع بعيونها نطقت: انا مو حقوده بس ما احد يتركني بحالي...جعل ربي يأخذ عيالي الثلاثة وانا معهم اذا كنت اعلم شيء عن الحبوب الي للحين حاقد علي فيهم قاطعها وقلبه خفق بقوة خاف يفقدهم: استغفري ربك وش هالكلام!! نطقت بقهر: انت ليه مو راضي تصدقني قاطعها بهدوء: لا تتكلمي بهذا الكلام مرة ثانية ..خلاص صدقتك بس لا تدعين مرة ثانية نطقت بقهر: لو مصدقني كان رجعت المياة لمجاريها مثل قبل ..بس انت تغيرت كثير وكأنه ما يهمك امري... للحين متحامل علي على سالفه الحمل !! تتكلم عن القلب الابيض ...رح افرض اني تناولت حبوب منع الحمل عن قصد ...مو فتحنا صفحه جديده ليه ما تنسى ونعيش حياة جديده ؟! ليه قلبك اسود كذا!! تنهد بضيق: انا قلبي ما هو اسود ..وتصرفاتي مجرد خيبه من كل شيء حولي ...قتلت بداخلي اشياء جميلة ...احتاج وقت حتى انسى وتنمو المشاعر من جديد ... أنا احاول بس انت بتصرفاتك هذي تهدمين كل شيء!! جهزي الاكل رح نأكل وبعدها نروح عند اهلي!! كذا يعجبك؟! مطت شفتها بضيق: ما ابغى تعمل لي اي شيء بس علشان تؤدي واجب عليك وتبغى تخلص منه!! سكتت للحظات وبعدها نطقت: خاطري اطلع انا واياك والعيال نغير جو لوحدنا ...ممكن؟! ناظرها وعيونها تلمع بالدموع ...نظرتها الراجيه وهي تنتظر موافقته ... ابتسم غصب عنه وهو ينطق بهدوء: من عيوني ...بس من الحين اذا بتقلبي الطلع حزن وكآبه وعتب ووجع رأس الا يحرم علي اطلع مرة ثانية...نبغى نطلع وننسى كل شيء من حولنا ...اتفقنا!! هزت رأسها بابتسامة عريضة...ودموعها تنزل بخفه!! عقد حواجبه وهو يشوف دموعها: بيلسان!! وضعت سلطان على السرير ومسحت دموعها وهي ترقع:هذي دموع الفرح سكتت لما خنقتها العبرة وما قدرت تكتم شهقاتها..ما تدري وش أصابها ....حزن عميق يسكن اعماقها..تبغى تتخلص منه ...يمكن فرحتها باول خطوة للتغيير مع كنان ..... ما تبغى تخسره مثل ما فقدت سلطان ...رح تحاول ترجع المياه ما رح تخسر شيء!! ** ** ** بالحديقة جالسه على المقعد بكل جسدها ومحتضنه نفسها مع رجولها.... تراقب غروب الشمس وكأنها بعالم ثاني ...نسمات الهواء والهدوء من حولها زاد تعمق التأمل ....بداخلها خيبات ما قدرت تبلعها ...هذي الخطوة الاولى للتغيير تحسها فشلت بقوة...كتمت انفاسها وهي تحس بالاختناق ....من لما جاءت وهي جالسه لوحدها بعد ما اعتذر وغادر لأمر مهم ....خيبتها منه ما قدرت تتجاوزها ... تنهدت وهي تواسي نفسها يمكن الموضوع مهم وما يقدر يتأجل .... بس الظاهر من كثر أهمية الامر نسيهم هنا وما رجع ... ناظرت الصغار بالعرباية يغطون بالنوم...غمضت عيونها للحظات وهي تتمنى ربنا يحفظهم لها ...رجعت بعيونها تتأمل غروب الشمس ... وعقلها يدندن نشيد عن الرحيل قطعت افكارها لما حسته يقترب منها ...جلس على المقعد جنبها بهدوء بعد ما رد السلام ...ردت عليه بدون ما تناظره!! ناظر المشتريات الي جلبوهم للطلعه كل شيء مثل ما هو ...رجع ناظرها وهي سرحانه بالغروب ...نطق بهدوء: تأخرت عليك ...حالة طارئة سكت للحظات بعدها تابع بنفس الهدوء: لزوم تتعودين بأي لحظة قاطعته ببرود وصوتها وكأنه معزوفه حزينه وهي تنطق: متعودة ...ما هو مهم !! تنهد وهو يحسها زعلانه ...وضع يده على كتفها وارخى راسه للمعقد وهو يناظر الغروب معها: كنت متحمس للطلعه معك ...من زمان ما جلسنا كذا جلسه بدون نق ونغزات ...ابغى ننسى الماضي ونبدا صفحه جديده ...نربي عيالنا بأجواء أسرية كلها امان ومحبه قاطعته وعيونها مسلطه لجهة الغروب: وأنا ابغى ننسى الماضي ونبدأ صفحه جديده ..بس بداخلي غصه ما قدرت اتجاوزها وانا اشوف ثقتك فيني معدومه...الي انكسر ما يتصلح ..واذا تصلح رح يبقى الشرخ موجود وبكل موضوع نذكره ونعاير بعضنا!! تنهد ونطق بهدوء:لو ما اثق فيك ما كنت للحين على ذمتي!! خلاف صار وانتهينا منه بغض النظر عن الغلطان ..الشيطان من مهامه يخرب حياتنا ويشتت قلوبنا ويزرع الحقد والكره بقلوبنا ...ما رح نقدم له هالشيء على طبق من فضه ...والا لك رأي ثاني!! بانت ابتسامتها من عيونها وهي تناظره بمحبه: لو ما بغيت ما لقيتني جالسه انتظرك مثل الغبية!! ضحك بخفه على تعليقها: واحلى غبية!! خزته بقوة:كنان تعالت ضحكاته وهو ينطق: انت الي قلت عن نفسك كذا!! توسعت ابتسامتها ونطقت : انا اشتم نفسي بس انت لا ! قبل ما يرد بدأت فاطمه تبكي ...ناظرها ونطق: عيالك رح يخربون الجلسه ...تحرك وحملها حتى ما تزعج اخوانها ... قبلها وهو ينطق : احسها تشبه أمي كثير قاطعته وهي تناظرها: كلهم يشبهون عمتي الله يرحمها!! بلع غصته كنان وهو ينطق: الله يرحمها!! ** ** ** مرت السنوات عليها بحلوها ومرها ...حاولت بكل قوتها تنجح حياتها وتتغاضى عن كل شيء صار بالماضي ....ما كان سهل عليها تعيش مع ناس ما تثق فيهم ...بس اضطرت تضغط على نفسها حتى ما تخسر كنان مرة ثانية ....وضعت القلم بضجر : وبعدين!! فاطمه حاست بوزها: ماما شوفيه بابا اشتراه لي !! عبدالرحمن شد شعرها: ما هو لك!! اشترى لنا كلنا!! زفرت بضيق كذا ما رح تكمل مطالعه بسببهم ..نفسها تجلس بمكان هادىء تطالع اي كتاب بدون ما ينغصون عليها ...نطقت بأمر : اعطوني الزفت ! سحبته منهم ووضعته جنبها: يلا كل واحد يكمل الواجب!! عبدالرحمن مط شفته بقهر: ما ابغى أكتب.. أنا طالع العب برا!! فتحت عيونها على تمرده: عبدالرحمن سكتت لما طلع وضرب الباب خلفه ... صكت على اسنانها من هالولد المتمرد ...ما يسمع الكلام ...بعمرها ما توقعت التربيه كذا !! فاطمه بدلع: انا رايحه عند سلسبيل ألعب قاطعتها بيلسان بتهديد: وربي اذا تعدت رجلك باب البيت احشها ...ارجعي كملي حل الواجب نطقت برفض: وليه عبد قاطعتها بصراخ: فاطمه!! سكتت لما دخل كنان ويجر عبدالرحمن من اذنه: ليه صوتك طالع كذا؟! لا تقولين كل هالصراخ على فطومه!! فاطمه بعد كلام أبوها كبر راسها ...تقوست شفتها وعيونها بدات تنذر للبكاء ...وركضت لابوها احتضنت رجله!! كنان انفطرقلبه ما يحب يشوفها زعلانه ..نزل لمستواها بعد ما ترك اذن عبدالرحمن...مسح على شعرها بحنان: لا تبكي يا قلبي !! فاطمه ما صدقت خبر ودفنت نفسها بحضن ابوها!! لاعت كبدها بيلسان من هذا المشهد المتكرر..اكره ما عليها البنت الماصخه والدلعه ما هو كذا !! كنان يكلم بيلسان: اتمنى تفرقين بطريقة التعامل مع البنت والولد ...البنات كلهم احاسيس ومشاعر !! بزوم تعامليهم بأسلوب رقيق انتفخت ملامحها من الغيظ: كنان!! ضحك بخفه على ملامحها ..بعدها التفت على عبدالرحمن بملامح حاده: ليه تضرب ولد عمك!! عبدالرحمن بدفاع: هو الي ضربني بالأول كنان بحزم: يا ويلك احد يشكي عنك ...وممنوع تطلع الا بإذن أمك ... والحين على الغرفه كمل واجبك!! ما قدر ينطق شيء قدام أبوه...ناظر أمه بغيض وهو يشوف ابتسامتها العريضه!! كنان ناظر فاطمه بعد ما مسح لها دموعها: كملتي الواجب هزت رأسها بالرفض! نطق بأسلوب رقيق: ليه يا قمر؟! الحين الأبله تزعل منك! فاطمه ردت وهي ماده البوز: خليها تزعل لاني أكرهها ضحك كنان على كلامها: وليه تكرهينها! بيلسان مطت شفتها: ايه اضحك ونعم التربيه!! فاطمه ناظرت بيلسان بعبوس: لأنها مثل ماما طول الوقت تصرخ علينا وتضربنا!! ليه حنا حيوانات حتى تعمل فينا كذا! بيلسان نطقت وقلبها طق منهم: الا قولي اكبر حماره!! كنان خزها بقوة: بيلسان وش هالكلام؟! بدل ما تشجعي البنت تحطيمها كذا!! بيلسان فقعت مرارتها منهم قفلت الكتاب الي قدامها بقوة: اقوم افضل لي من مشاهده هالدراما الي تبط الكبد!! كنان خزها : تراك ما تستقوين الا على هالضعيفه والا عبدالرحمن ما تقدرين له ...وسلطانووووو وينه ما أشوفه! ابتسمت بمحبه لهذا الطفل: حبيب امه جالس بالداخل يكتب الواجب!! مط شفته بعدم رضا تفضل سلطان على عيالها وكأنه ملك نازل من السماء ...ما ينكر انه هذا الطفل مختلف عن فاطمه المدلعه ومختلف عن عبدالرحمن المشاغب إلي ما في شكوى الا اسمه موجود فيها ...بعكس سلطان هادىء كلامه دافىء.... ابوه دوم يقول هذا نفس كنان وهو صغير نفس الاطباع....بالرغم إنه اكثر واحد يشببه ويمثل شخصيته الا انه يحس نفسه شديد عليه ما يعرف وش السبب !! اقرب الصغار له عبدالرحمن بالرغم من شقاوته الا انه يحبه وبعدها فاطمه واخر شيء سلطان!! قاطع أفكاره على كلام بيلسان: اليوم بالليل أبغى ازور أهلي اذا ما عليك شيء!! اقترب وهويمسك بيد فاطمه ..جلس على الكنبه وهو ينطق: اليوم مخطط نطلع للألعاب هزت رأسها بموافقه : مثل ما تبغى سكتت وناظر سلطان الي طلع من الغرفه بخطوات هادئة ..اقترب من كنان وقبل راسه: كيف حالك ؟! ابتسمت بيلسان عليه وهي تحسه يتصرف بطريقه أكبر من عمره!! كنان مسح على رأسه بهدوء: بخير يا بطل ...كيف الروضه؟! سلطان هز رأسه : الحمد لله! بعدها التفت على امه: ماما هذا السؤال ما فهمته!! بيلسان سحبت منه الدفتر واجلسته جنبها وهي تشرح له تحت نظرات كنان الي يناظرهم بصمت!! قاطع الهدوء عبدالرحمن وهو يخرج من الغرفه: ماما قلمي مكسور كنان خزه: وين البرايه رد بسرعه: ضايعه كنان بطول بال: خذ من اخوانك نطق برفض: ما احب استعمل إلا اغراضي! كنان رفع حاجب: من متى ؟! اعطيه يا بيلسان قلم جديد قاطعه برفض: ما احب اكتب بالاقلام الجديده صوتها مزعج!! كنان كتم غيضه وهو يناظر بيلسان: لو ذبحته احد يلومني!! التفت عليه وبقوة نطق: وربي اذا ما اختفيت من قدامي الا سكت لما شافه دخل وقفل الباب خلفه! فاطمه ناظرت ابوها: بابا اليوم الصبح طلع عبدالرحمن على سور الروضه ورفض ينزل يقول ما له نفس يحضر شيء ..يبغى يتمشى! والمديره عصبت عليه وحتى اتصلت بماما!! خزتها بيلسان بقوة كل شيء تنقله لكنان ...ما تبغى الولد يتعقد من كثر ما يمسح فيه كنان الارض ... كتمت ضيقها لما نطق كنان بعدم رضا: وليه ما خبرتيني؟! تنهدت بيلسان : كذا الولد رح ينفجر من كثر الضغط ..اتركه ينفس عن الطاقات الي فيه!! عقد حواجبه : ما شاء الله طاقات! عاجبك تصرفات هالولد وين ما أروح الكل يشتكي منه وفوق هذا غبي بالدراسة ؟! بيلسان قاطعته: حنا لزوم ندعمه بالايجابيه ونتركه على راحته ... ما تقدر تمشيه على كيفك زفر كنان بضجر: ما شاء الله هذي التربية الحديثة ؟! يعني اناظر بعائلتنا ما في احد مثله ...لمين طالع مشاكس كذا!! ختم كلامه وهو يناظرها باتهام!! فتحت عيونها من نظراته: تقصد طالع لي!! هز رأسه وهو ينطق بضجر: سور المزرعه يشهد !! ابتسمت على ذيك الايام ....وبتبرير: انا كنت بس اجلس وما اتشاجر مع احد وما عمره احد اشتكى مني!! وش حلاتي!! كنان مط شفته: الله يعيني على هذا الطفل لأني رح افقد اعصابي بسببه!! سلطان بهدوء نطق: يمه عبدالرحمن ما يحب الروضه يقول لما يكبر رح يهرب منها .. كنان رفع حاجب وهو زام شفته: ما شاء الله!! عقدة قلبي هالولد رح يطلع صايع ضايع!! العين جاءت فيه... بعكس اخوانه! فاطمه ابتسمت: انا احب الروضة والابلة اعطتني نجمه كبيره!! قبلها هلى خدها: اموت على الاذكياء!! بيلسان ناظرت سلطان ورجعت تشرح له وقلبها يفيض من الحب لهذا الولد لسببين ... لأنه على اسم جدها سلطان ..والسبب الثاني لأنه نسخه عن كنان نفس الاسلوب والنظرات وكأنه نسخه ثانيه عنه!! ** ** ** منار قفلت الجوال وناظرت ام ماجد الي نطقت بتساؤل: وش صار؟! منار نطقت بضيق: تبكي كالعادة!! والله قلبي محروق عليها ...حماتها كلما شافتها تنغز عليها بالكلام.....خايفه تزوج ولدها !! ما ادري وش اعمل لها ما تركت دكتورة والا دكتور والا وصلت له ...ما هو نافع شي! ام ماجد مطت شفتها بضيق: الله يرزقها الذريه الصالحه!! منار هزت رأسها: بكل صلاة أدعي لها ام ماجد قاطعتها: ربك كريم الي له نصيب يعيش رح ييجي غصب عن الكل!! سكتت منار ومن داخلها تتجرع الالم وهي تشوف انكسار رنا ..ولهفتها على طفل ...عاجزه عن مساعدتها ....أي عقاب تلقته وهي تناظر ابنتها تتألم وحزينه طول الوقت....غمضت عيونها بندم وهي تردد بداخلها " يا ربي سامحني على الماضي " ندمانه على كل شيء صار بالماضي ... وش استفادت من حركتها ذيك ؟! ....زفرت زفرات حاره وهي تحس انها كانت للحظة رح تخرب بيت انسانه بريئة وما لها ذنب بأي شيء...ما تدري كيف سولت لها نفسها تعمل كذا ...اه من الشيطان ومن نفسها لما سولت لها هالشيء ...ما تدري كيف نسيت انه الظلم ظلمات يوم القيامه... أحيانا بتقرر تطلب السماح من بيلسان ...سرعان ما تتراجع لانه ما تدري وش رح تكون رد فعلها ..والاهم ما تبغى تسقط من عين كنان الي اعتبرها امه ...وفوق هذا ماجد ما تضمن رد فعله !! هزت رأسها رح تتركها للايام لانها تخاف من رد فعلهم!! بس بداخلها لو طلبت السماح وسامحتها بيلسان يمكن تحمل رنا !! هزت رأسها بالرفض ما رح تتكلم بشيء!! قطعت افكارها وناظرت بيلسان داخله مع كنان ومنسجمين مع بعض وفاطمه تركض من خلفهم !! انفطر قلبها لهذا المنظر متى تدخل عليهم رنا برفقة عيالها!! سلمت بيلسان وجلست والابتسامه تزين ثغرها وهي تناظر كنان الي سلم وجلس جنبها! ام ماجد بتساؤل: وين العيال؟! كنان بابتسامه: عبدالرحمن معاقب ممنوع يطلع برا وسلطان نام! ام ماجد باعتراض: وربي ما تستقوي الا على هالضعيف ..هذا سمي جدك كذا تعمل فيه كذا ...وربي الا يصيب الطفل حالة نفسيه من تعاملك معه! كنان بلامبالاة: تراه جننا الكل يشتكي منه!! تخيلي دوبه ضرب أخوه بالقلم وجاءت جنب عينه ربك ستر ..نام سلطان وهو يبكي !! ام ماجد بترقيع: اكيد بالغلط بس انت ما عندك تفاهم ..وذاك المدلع لو تقول له بسسسس يبكي!! بيلسان بابتسامة: يا زين سلطان يا ليتهم كلهم مثله! ام ماجد عبست ملامحها للحين ما هي راضيه عن الاسم: لا تقول إنك طقيت عبدالرحمن هز رأسه كنان بابتسامه عريضه: طقيته طق بالحزام...يمكن يتعدل ! بيلسان مطت شفتها: اشك فيه ...خلاص اتركه لانه ما ينفع معه الضرب ولا الكلام ..ما ادري كيف يفكر...صعب تتعامل معه!! ما نبغى نخسر الولد بسبب عنادك!! كنان بإصرار: انا وراه ونشوف مين الي يمشي كلمته! باكر يكبر اذا ما وضعنا له حد رح يتمادى اكثر واكثر ام ماجد ما عجبها الكلام: هين يا كنان..لما يرجع ابوك الا اخبره عن اجرامك !! كنان بلامبالاة: ما احد يموت من الضرب!! بيلسان انتبهت على منار والسكون يحيط فيها ..علاقتها سطحية جدا ما في أي احتكاك بينهم مجرد وكل واحد بحاله ....استغربت حالها وما علقت على الوضع !! كنان باستفسار: علامك يمه ساكته! منار هزت رأسها بالرفض وهي تمسح على شعر فاطمه الي جالسه جنبها : ما فيني شيء مصدعه!! نطق كنان بنبره حانيه: سلامتك ! منار بهدوء: الله يسلمك!! ساد الصمت لحظات ..قطعه احمد وهو يدخل بسرعه: كنان كنان إلحق عبدالرحمن كسر زجاج سيارة ابو ساري!! كنان وقف ونطق باستنكار: بس عبدالرحمن بالبيت!! ام ماجد ناظرتهم: يمكن يكون سلطان تراهم نفس الشكل منار مطت شفتها: ما في احد غيره ابو المشاكل! بيلسان تحركت بسرعه خلف كنان الي طلع مثل البركان الثائر ...تخاف يضربه ويقسى عليه ...بالرغم من تصرفاته المتهورة يبقى طفل ويبغى يستكشف العالم بطريقته!! كنان النار تشتعل بداخله ما هو متحمل تمرد هالطفل ما ترك وسيله والا تعامل معه فيها ... لكن بدون فائدة ...ما يدري كيف يفكر هالبزر !! طلع باب البيت وعيونه تبحث عنه !! قاطعته بيلسان من خلفه: كنان بشويش ..الضرب ما هو حل!! صك على اسنانه وهو يشوف ابو ساري متوجه لهم: لا تتدخلين وادخلي للداخل احمد وهو يسحب عبدالرحمن باتجاه كنان غصب عنه وصراخه بالمكان يبغى يهرب!! بيلسان انفطر قلبها وهي تشوف عبد الرحمن بحجم النمله ..ما رح يتحمل عقاب كنان!! نطقت بقوة وهي تقترب من احمد وتفلت ولدها منه : اتركه!! احكمت قبضة يدها على عبدالرحمن وتوجهت للداخل وهي تحاول تهدي دقات قلبها بعد نظرات كنان الناريه ....توجهت للصالة واول ما دخلت نطقت بقوة وهي تهزه بقهر: وش هالتصرف ؟! متى تترك الاذى ام ماجد نطقت بأمر: اتركي الولد ارعبتيه؛! مطت بيلسان شفتها بسخرية: فيلم الرعب الحقيقي على الطريق شوي ويدخل!! ما ظنيت يطلع من يده سالم!! ام ماجد نطقت بقوة: تعال يا ولدي عندي والي فيه خير يلمسه!! منار وهي تناظر عبدالرحمن الي استكان بحضن ام ماجد ومعالم الخوف واضحه بملامحه نطقت بهدوء: بس يا خالتي كذا تشجعينه على الغلط!! لمتى كنان يرقع خلفه وكانه ناقصه مصاريف زايده!! ام ماجد بعدم اقتناع: انا مستعده ادفع تعويض الزجاج الي انكسر على حسابي!! تابعت كلامها وهي تمسح على شعر الصغير: لا تخاف يا ولدي ما احد رح يلمسك¡ زمت شفتها بيلسان بضيق ... دوم هالولد مسبب المشاكل ..حست قلبها هبط لما دخل كنان والنيران تشع من عيونه ... ام ماجد قبل ما يتكلم كنان نطقت: وربي إن لمسته ما اجلس بهذا البيت دقيقه!! انتفخت ملامحه وما بقى شيء على انفجاره وكلام جدته ربطه وما يقدر يطلع حرته بهذا البزر!! شد على قيضة يده بقوة ما هو قادر يكتم غضبه اكثر من كذا ... التفت على دخول سلطان وهو يركض وينطق بصوته الهادئ : ماما ماما حلت الصدمة على سلطان لما قطع طريقه كنان وسحب اذنه بقوة وهو يصرخ: انت الثاني وين كنت ؟! سلطان ما يدري عن شيء كان نايم ...استيقظ وما لقى احد حوله .. انصدم من تصرف ابوه معه ... ما عمل شيء ليه يكلمه كذا ...نزل نظره وهو يحاول يسيطر على تقوس شفته الي تنذر بالبكاء !! بيلسان سلطان بالنسبة لها خط احمر ...انقهرت لما شافته يبغى يحط حرته بسلطان ...تقدمت بقوة وضعت يدها على يد كنان تسحبها عن اذنه وبقهر نطقت: ما قدرت لابو لسان تطلع حرتك بهذا البريء!! ابعدت يده وهي تسحب سلطان لحضنها ...ما قدرت تمنع دموعها ...ما تدري ليه تبكي ...ابتعدت وهي تأخذ سلطان وتطلع من المكان!! منار متعجبه من حال كنان طول عمره هادئ وعنده طول بال ...بس لما كبر عبدالرحمن صار عصبي وبسرعه ينفعل ...وبهدةء نطقت: كنان تصرفك قاطعها بقهر: ترى وربي ما عاد عندي صبر من هالعيال!! حدد نظره على عبدالرحمن وبقوة نطق: ما رح أضربك ...لكن وربي الا تتعاقب على تصرفاتك ... اشر لفاطمه : قدامي!! توجه للملحق ...دخل بضيق من تصرفه ...حس بالندم تصرف بدون وعي من غضبه ....تنهد واقترب من سلطان الي دافن وجهه بحضن بيلسان ويبكي بصمت!! نزل لمستواهم وسحبه من بيلسان وهو ينطق بهدوء: سلطان!! ما ناظره وهو يمسح دموعه بكل براءة!! قبله كنان على رأسه: زعلان مني؟! هز رأسه سلطان بالنفي ودموعه مستمره بالنزول ....مسح دموعه برفق: لا تبكي انت رجال وكبير ... ما كان قصدي ازعلك كنت معصب من اخوك ...رح نطلع للالعاب وتلعب حتى تمل تعويض وترضيه لك ..وش قلت؟! بيلسان مطت شفتها: تقتلون القتيل وتمشون بجنازته!! ناظرها وهو يقلدها بسخريه: تقتلون القتيل وتمشون بجنازته!! لا تحششي بعقل الصغير ....طول عمره الاب يضرب عياله وش صار يعني نطقت وهي رافعه حاجب: يضربهم اذا غلطوا ...ما هو بدون سبب تحرجه كذا قاطعها بضجر: لا حول ولا قوه الا بالله!! انا وسلطان نتفاهم انت اجلسي على جنب..مسح وجه سلطان وهو ينطق بحنان: يلا يا بطل تجهز رح نطلع قاطعته فاطمه من خلفه: وانا بيلسان مطت شفتها بسخرية: لا تخافي يا دلوعة اكيد انت بالمقدمه!! كنان هز راسه بقلة حيلة: تفكيركم يالحريم ما ادري كيف!! جهزي العيال قاطعته: وعبدالرحمن نطق وهو ينطق بقوة: وربي ما يرافقنا عقاب له وخلي جدتي الحنونه تنفعه!! بيلسان تنهدت : انت دكتور المفروض يكون عندك اسلوب نقدر تتعامل فيه مع الصغار قاطعها : انت من جدك تتكلمين؟! تتكلمين وكأنك مو شايفه ما تركنا طريقه والا جربناها معه وبدون فايده!! بيلسان بترقيع وهي فاقده الامل من عبدالرحمن: باكر يكبر ويعقل!! ** ** ** جالسه في بيت اهلها وتتكلم عن سالفة عبدالرحمن ...قاطعها وليد باندماج: لو كان عندي لو الف جدة ما وقفتني الا اكسره تحت يديني!! خزامى مطت شفتها بسخرية: كان عندك ازفت من عبدالرحمن ما شفتك قلت شيء..عاقه قاطعتها بيلسان بخيبه : انا عاقه؟! وليد نطق بهدوء: لا تسمعين كلامها .. صحيح كان عليك تصرفات تجلط بس ما توصل لحركات عبدالرحمن قاطعه عبدالرحمن وهو واقف قريب من وليد: جدي وش فيني؟! ابتسم وليد له: نقول انك بطل الابطال! ما قلت لنا ليه كسرت الزجاج عبدالرحمن بحماس:, ولدهم يغلط علي ...وانا ما اسكت احد يشتمني بيلسان اشرت له: اقول اسكت احسن ما يسمعك كنان تراه للحين متوعد فيك!! مط شفته بلامبالاة: ما اخاف من احد والي ابغاه اعمله ضحكت بيلسان بخفه: ما تخاف من احد ...لو شفته لما طقه عمي ماجد على هذي السالفه وزعلت منه خالتي ام ماجد ليه يضربه!! عبدالرحمن مد لسانه بغيض: ما احبكم!! خزامى بانتقاد نطقت: كذا تتعاملوا مع هذا الطفل الصغير ..باكر يتعقد من الحياة! بيلسان مطت شفتها بسخرية من كلام امها ..تتكلم عن التعامل ...مع هالسنوات الي مرت ما عادت ترتجي منها تتغير ....الي مريحها انها ما تكره عيالها... الكره مقتصر عليها ....امنيتها بالحياة تكون علاقتها طبيعيه مع امها ..ينفطر قلبها لما تشوف ليان ورنا لما يلتقوا بمنار ....نفسها بهذي العلاقه ....لو تتحقق هالامنيه تكون اسعد بنت بالعالم ... بس بالنهاية تقنع نفسها الدنيا ما هي كامله والحياة اختبار ... بر الوالدين ما هو شعار نرفعه بحاجه لتطبيق ..ما رح تستسلم ورح تبقى تدعي ربنا يحسن الوضع بينهم ؟! ** ** ** انتهى البارت..دمتم بخير ???? | ||||
|
| |
|
22-05-23, 02:48 PM
| #550 | ||||
 
| اللهم صل على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم وبارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم في العالمين إنك حميد مجيد لا تنسوا الباقيات الصالحات سبحان الله الحمد لله لا إله إلا الله الله أكبر لا حول ولا قوة إلا بالله العلي العظيم | ||||
|
| |
 |
| أدوات الموضوع | |
| انواع عرض الموضوع | |
|
|
2373Likes
العرض العادي
