عجاف القلوب / للكاتبة شمس السعدي ، عراقية مكتملة

[لامارا]

/// البـارت التاسع والعــشرون ////
عجـاف_القلـوب ..
الكاتبـة_شمـس ..

وداعـاً .. وداعـاً ..
يقولها لك هذا القلب الذي تعـب ..
من تلك الوعود التي امطرتها على روحي ..
وبكل هدوء تخبرني انك لن تحب غيري ..
وامراة غيري سيكون صدرك وسادتها ..
وتقسم لي انني عشقك الوحيد..
وغيري في اوراقك الرسميه ..
ستكون صفتها زوجتك !!
اذهب ولاتنضر الى الخلف ابدا..
لانني ساحرق كل تلك الذكريات ..
وسأنثر رمادها في كل الطرقات ..

اذهب فالله هو الذي سيقتص لي ..
من كل الذين ملئوا قلبي بكل هذا الالم ..

اذهب ودعمهم يقنعوك بشتى الحلول ..
اذهب ودعهم يقولون لك شتى الوعود !!
اذهب واحلم انك ستلمس تلك النجوم ..
اقسم بكل ذرة حميم قد احرقت بها عشقي لك ..
انك ستندم كثيرا لتركك لي ..
وسأنسى الماضي واكتب من بداية السطر ..
انني كـالعنقاء من تحت رماد محرقتـي ..
قد حلقت عالياً فوق كل ترهات العشق الكـاذب ..

بعد ماتحسنت طلعنا ثاني يوم للبيت ..
صحيح تعبانة وگلبي جاي يحترگ من الالم ..
بس ماردت اشوف الحزن والالم بعيون اني واخواني ..
جنت لازمة بآيد اموري ومتكية عليه ..
گتله اموري اريد ازور ..
امير .. اي گولي وين تردين ..
درة .. محتاجة اشم ريحة الامام علي ..
امير .. من عيوني ..
صاح على حيدر وعلي ..
هاكم الغراض اخذوهن للبيت .. اجرو تكسي وروحوا
واني راح اخذ امي ودرة للنجف ..

امي .. اي يمة وبطريقك اروح ازور بيبيتك ..
امير .. يمة ماتشوفين حال درة غير مرة نروح اني وياج سوية ..
طلع بينا گبل للنجف ..
كانت الزيارة خفيفه وماكو ناس هواي او لان صبح مااعرف ..
صار گبالي الامام .. دموعي نزلن من وحدهن شماانسح بيهن ينزلن ..
ماردت اضعف بس مااتحملت ..
لسا مامستوعبة يوسف صار الغيري ..
رغم كلشي بعدني اعشگة واريدة ..

گتله مولاي واني متوجهة الك هسا ..
لو يطلع من گلبي .. لو تخلوني انساه ..
رفعت راسي للسما الزرگة والشمس صارت بعيوني ..
ربي .. اذا مامقسوملي ليش خليت حبة يتغلغل بضلوعي ربي بحق الامام علي وهسا اني راح ادخله ..
تساعدني وتخليني اختار طريقي واگدر انسى واصبر على ابتلائك ..
اذا كان هذا اختبار .. فساعدني حتى انجح واتجاوزة ..
ياقوت .. يله يمة تعاي ندخل نتوضأ ..
امير .. نلتقي جوة ..
دخلنا للحمامات غسلت وتوضيت ..
احس جسمي حار شما اغسل ..
كملنا بعدها رحنا للامام..
دخلنا بالتفتيش ..
انتبهت المفتشة عليه ..
ماما ليش مالابسة عباية مايصير ..
ياقوت .. خية مو لابسه عبايه اسلامية وعريضه مابيها شي والله جبناها من المستشفى لهنا حتى ماتتحمل وگفه ..
امي تحجي واني ساكته ..
اجت وحدة وياها ..
گالت سبحان الخلق هاي العيون .. بس الظاهر مرضج مو جسدي نفسي لأن عيونج حمر من البجي ..

هاج حبيبتي هاي عباية البسي ومن تكملين رجعيها ..
اخذتها ولبستها ..
رغم مااحب البس من احد او شي ملبوس قبل ..
بس هالمرة مااهتميت ..
اريد بس ادخل واذب حملي بداخل الامام ..

دخلت لجوة ..
عفت امي وبلا وعي رحت للشباك ..
لزمتة وگعدت يمة ..
وفرفحت وطلعت قهري كله ..
كل الي تشوفني تمسح على راسي وتدعيلي الله يفرح گلبي .. ويسهل امري وينطيني مرادي ..
دعواتهم ريحة گلبي ..
بس ادري ماراح يرجعلي يوسف .. خلص راح وانطوت صفحته ..
گابلتني امي .. وتبجي وياي ..
-يمة ليش هيج تسوين . قابل هو جان رجلج وعافج ..
باوعتلها وگلتلها ..
-يمة الله يساعدج شلون تحملتي ..
-شنو يمة ..
-شلون تحملتي ابوي من خانج وتزوج عليج وجابها البيتج شلون گدرتي تنسين وتوگفين على رجلج ..
اني مو رجلي ولا بينا اولاد واحس ارد اموت شحال انتي
اخذت حسرة طويله وگالت ..
-تنسين يمة لاتخافين .. الزمن هو الينسيج .. لاتصيرين مثل امج ضعيفه ..
اريدج قوية .. ربيتكم ع القوة وماتنهزون وتضعفون .
لاتخلين يوسف هو سبب حياتج ..
اني واخوانج ودراستج ومستقبلج الاهم ..
يمكن تنسيه ويجيج الاحسن منة ويعوضج .. ومستقبلج مفتوح واحنه يمج وراح نبقى نحبج ومانخليج تحتازين واحد ..
حضنتها وابجي .. اي يمة احجي وانصحيني محتاجة هيج حجي يطمني ويشجعني ..
مسحت دموعي ..
انت حجيج صح .. ليش هو مافكر بيه من خطبها .. وماصبر ولاانتضر .. ليش اني ابجي ومدمرة نفسي وهو راح يبني حياتة ويستقر ..
دوامي راح يبدي وراح انجح واوصل ومااريد اي رجال بحياتي ..
هيج مرتاحة كافي انتي واخواني يمي ومسانديني ..
ضحكت امي وگالت ..
رحمتك ربي الحمد الك .. شكرا الك يبو الحسنين الما طلعت واحد منك زعلان لو مهموم ..

گمنا اني وياها ..
لگينا امير منتضرنا خطيه ..
عيونة مافارگتني شفت الغضب والقهر بعيونة بس مايبينهن ..
ابتسمت اله .. ضحك وفرح..
گال جوعانة ..
هزيت براسي ..
يله امشونا .. واحلى گص ومقبلات الاحلى درو بالدنيا ..
درة… ههههههه اموت عليك ..
باسني براسي ومشينا ..

تريگنا ورجعنا للديوانية ..
گال بس ناخذ دهينة السدن تحبها وللولد ..

ذكرت سدن ..
-هي شلونها هسا ..
امير .. لا زينة نايمة جوة واني هم نبهت عليها ماتگوم وتسوي شي الولد يجيبون غدا من برة ..
بس گالت خالة ام يوسف طابخة ودازة غدا الهم ..

من ذكر اسم يوسف درت وجهي للشباك ..
امير .. سدن ماراحت ومقاطعتهم ترى ..
درة .. لا وهي شنو ذنبها هم ذولة اهلها ليش تقاطعهم
مااقبل تصير بينا وبينهم خطيه ..

لفت انتباهي من الجام .. مزرعه وخضار على طريق النجف ..
تذكرت ايامنا بالمزرعة ..
وكلامة ووعدة الي ..
غمضت عيوني وطردت افكاري بسرعه ..
تكيت راسي ع الكشن وحاولت انام شوية ..

وصلنا للبيت ..
دخلت اني وامي وامير يركن السيارة ..
شفت زينب بالمطبخ ..
هي شافتنة انخطف لونها وبقت واكفة بمكانها ..
زينب .. شلون صرتي ..
درة .. ليش شبيه ..
زينب .. ترى اني مالي دخل ومادريت الا قبل كم يوم من العقد ..
ياقوت .. كافي زينب لاتبررين هاهي بالعافيه عليهم ..
درة .. مااهتميت الحجيها .. يمة اني رايحة اشوف سدن
دخلت السدن لگيتها بجربايتها گاعدة شافتني صفنت بوجهي ..
درة .. لازم مااشتاقيتي الي ..
سدن .. ثولة شلون مااشتاق بس خفت كرهتيني وماترديني بعد بس والله كل شوية اخابر امير واسأل ..
گامت الي وحضنتني ..
حضنتها وگلتلها ..
احنه خوتنا جبيرة وماتنقاس بأفعال غيرنا .
سدن .. تعاي ارتاحي هنا ..
درة .. لا اروح بغرفة امي خطيه اموري خلي يرتاح تعب

اجت زينب .. يعني اني ماخذة موقف مني وتحجين من ورى خشمج وياي ..
وسدن الي اخوها ضحك عليج وعافج تحضنين وتبوسين بيها ..
يعني هسا طلعت اني الغلطانة ..
امير .. زينب كافي منو جاب طاريج . لا انتي ولاسدن الجن ذنب . هي قسمة وماصارت بعد عليمن ..
زينب .. ادري بيكم ماتحبوني لأن تكرهون امي .. بحياتكم ماعاملتوني مثل سدن ..
وانت اكيد تدافع المرتك واختك قابل مثلي رجلي مايدافعلي ..
ياقوت .. يمة عيب حماج الجبير قابل شحجى وياج هو ..
زينب .. كل هذا وماحجة يعني الا يغلط عليه ويضربني يله ترتاحين ..
امير .. امشي اصعدي الغرفتج والعني الشيطان ..

نزل علي .. هايمة اجيتوا شلونها درة ..
شكو هالصايح شبيكم ..
زينب .. شكوووو اسألهم . صارلهم ساعة يحجون عليه ويحملوني ذنب يوسف وخطوبتة من حوراء .. وهاي اختك شايله خشمها عليه ..
وانت تگول شكو .. مليت من هذا البيت كلها تحاربني وتلومني من اختل بغرفتي ..
لأن ادري محد يحبني ..
امير .. هههههه زينب تحجين صدگ .. يعني كبرتي السالفه وعظمتيها ومحد حاجي وياج شبيج..
علي .. زينب اصعدي الغرفتج ..
زينب .. لا وديني الاهلي ماابقى هنا ..
علي .. گتلج اصعدي ..
زينب .. مااصعد الا تاخذلي حقي ..
علي .. اصععععدي گلت ..
ياقوت .. يمة استهدوا بالرحمن شجتكم .. سوالف ماسخة كبرتوها .. وانتي يمة حافظي على بيتج ورجلج ولاتجيبين مشاكل للبيت ..
زينب .. سمعت سمعت استاذ علي طلعت اني الي اجيب مشاكل ..
علي .. روحي گتلج يله…

صعدت وهي تدردم ..
علي .. يمة انتو هم انطوها على گد عقلها بعدهي صغيرة واكيد فسرت نضراتكم غلط من دخلتوا لأن تعبانين بس انت امير هم مايصير تحجي وياها هيج وامي تگلها تجيبين مشاكل ..
امير .. علي لاتخليني احجي ترى واصلتلي لهنا بعلي واشر على راسة ..
هو منو الحاجي وياها شو هالطوله وخابصه البيت صابرين ومتحملين سوالفها علمودك وهي تعلي صوتها اعلى من حسي .. والله لو مرتي تعلي صوتها هيج مابقيتها عندي ..
من گتلك لاتخلي امها تغسل دماغها .. وهاي النتيجة كل يوم اهلي واهلي ونايمة بغرفتها ليل ونهار ومخابرات وي امها ولاشغل ولاعمل ..
اني مااحب اتدخل بسوالف النسوان ..
بس من تزوجت لسا .. گعدت وي البنات ساعدتهن ضحكت سولفت وياهن ..

علي بأستغراب .. ليش مو الصبح عليها المطبخ والماعين وتنضيف الطابق الفوگ ..
ياقوت .. يايمة على بختك .. مرتك يادوب تطلع تاكل وتدخل حجرتها بعد شوكت تنضف ..
علي .. يمة لاتخبليني كلما اجي الگيها بالمطبخ تشتغل لو فوگ ترتب ..
امير .. اني اروح ارتاح تعبان وهاي سوالف النسوان ماتاكل وياي ..
بس نصيحة من اخوك .. لاتخلي مرة تمشيك بسوالفها كلنا نحب نسوانة بس بحدود لان اذا ماضبيتها من هسا بعد تتعود على الدلال وماتگدرلها ..
ياقوت .. يمة اخوك وتدري بي بحياتة ماضلم واحد وهي مثل اخيتة وانت اخوه ويتمنالك السعادة لاتاخذ الحجي مالته بشي ثاني ..
اني تدري بيه مااهتم للشغل والطبخ .. بس مرتك من تشوفك تگوم حتى ماتحس عليها ..
وهاي سوالف امها ادري بيها .. لأن البنيه فقيرة واعرفها من صغرها بس تدريس امها يعم عليها ..
علي .. اني اتصرف ..

صعد لفوگ وشويه وسمعنة حسة ..
وگالها بعد روحة الاهلج ماكو .. والبيت حالج من حالهن طوله لسان على امي واخواني مااريد ..
تمشين عدل اخليج على راسي ..
غير هيج مااعترف بحبي الج واغير معاملتي وياج ..

ياقوت .. الله يهيديها خايفه على ولدي منها خاف يوم يتاكتلون بسببها ..
درة .. لا يمة اسم الله .. امير عاقل وعلي رزن لاتخافين عليهم ..
بس خوفج من امها ماراح تسكت والله اليستر ..

ياقوت .. الله يجفينا شرها ان شاء الله..
مر كم يوم وگدرت انسى شويه او احاول انسى ..
بعدها تفاجئنا بجية فاطمة وخالي حمزة للبيت ..

فاطمة .. وين بنتي ..
ياقوت .. بحجرتها ..
فاطمة .. ليش حابسيها ولاموبايل ولااجتنا صار كم يوم
نزلت زينب من سمعت صوت امها ..
يمة اخذوني منا ..
حمزة .. شكو شبيج بوية
زينب .. بوية الكل مايحجي وياي لان يوسف اخذ حوراء وفوگ هذا يحيلون بعلي عليه وعلي صار كم يوم مايحجي وياي واخذ موبايلي وحرمني منكم ..
حمزة .. هالحجي صدگ ام امير .. هي هاي الامانة ..
ياقوت .. خوية مشاكل بسيطة بين الرجال ومرتة ..
فاطمة .. شنو ذنبها هي اذا يوسف اختار بنت عمة قابل ترديه ينتضر بنتج العمر كله ويعنس وياها ..
واصلا هي اله من صغرهم لو مابنتج قشمرتة بعيونها بس الله بالمرصاد ..
ياقوت .. ياخية ببيتي وتتشمتين بنتي .. بالعافية عليكم يوسف بنتي ماقاصرة والف واحد يتمناها ..
حمزة .. اصعدي لمي هدومج وتعاي ..
ياقوت .. خوية ابو عبد الله هذا مو حل بدال ماتحطهم وتفتهم السالفه شني وتحلها تاخذها من بيت رجلها ومن غير مايدري ..
حمزة .. للاسف ماتصورتة هيج گلت خوش ولد ودارس ومثقف تالي يحرمها من اهلها ويعاقبها ..
عندكم مشكلة اني ابوها موجود واحجوا مامن حقكم تتهموها بشي مو ذنبها وتگاطعوها ..
ياقوت .. صدگ تحجي .. هي حالها من حال درة وسدن عندي شو مدللتها دلال الورد مااخليها تشيله وهاي جزاتي ..
فاطمة .. اي صح .. اشو حتى امتحانات موزينة بيهن وهاي سدن نايمة وبنتج راح تداوم وتطيح براس بنتي ..
خلي اصعد اشوفها.

تخبلت من طريقه حجيها وفوگاها تريد تصعد عبالك البيت بيتها ..
نص الدرج ونزلت زينب وبيدها جنطة ..
گالتلها امها . ذهبج وفلوسج جبتيهن ..
هزت براسها زينب ونزلن ..
صدگ من يومها احتقرتهن ..

سدن رادت تحجي وي عمها وتبرر بس هو ماانطاها مجال وگالها لاتتدخلين المفروض انتي بنت عمها واختها وماتقبلين واحد يذلها ..
امها تخابر عليها تگليلها زينة بس جهازها عاطل وتجذبين علينا ..

اخذوا زينب وطلعوا وامي تگلها يمة رجلج مايدري شلون تطلعين .. خلي يجي وتفاهموا ..
بس ماسمعوا منها ..
سحلتها .. يمة كافي تريد تروح خلي تروح لاتذلين نفسج ماصارلها شهرين وگلبت البيت گلاب ..
ودور خالي حمزة ابد مااتوقعته هيج يحجي ويصدگ بيهن
ياقوت .. يمة خالج هم حقه شمدريه تلگيها غاسله دماغة بالحجي ..

خابرت سدن الامير وگالتله ..
شوية واجو علي وامير ..
علي .. شصار وراي ..
ياقوت .. ماصار شي يمة .. شو اجو هادين واخذوها لان انت ماخذ موبايلها ..
علي .. اني اروح واتفاهم وياهم شلون ياخذوها بغير علمي ..
لزمة امير .. لا لتروح مثل مااخذوها بنفسهم يرجعوها هم اذا عودتهم من هسا كلما تزعل تروح تجيبها راح يتعودون ومانرتاح بحياتك ..
علي .. جا شتريدني اطلگها ..
امير .. لايخوي ماعدنا مرة تتطلگ بس لازم تراوي عينك الحمرة الهم .. وخاصه امها حتى تبطل تتدخل بينكم ..
علي .. ع الاقل نخابر الشيخ ..
امير .. مو هسا خليها يومين لاحس ولاخبر وذيج الساعه عود نخليهن وحدة اثنين ثلاثة گدامهم ونطلع ..
وغصب عنة يرجعها ابوها للبيت مثل مااخذها ..

علي .. مااحب المشاكل تطول ودووم ..
امير .. جا اسكت وعوفها وراي .. حتى تاخذ درس وماتسمع بس كلامك ..

مر كم يوم .. وطلعت نتائج زينب ناجحة بدرس وراسبة بواحد ..
حسيت على علي ضايج عليها ويشتاقلها بس مايگدر يحجي وي امير ..
گاعدة بالغرفة واجت سدن گالت درة ..
كم رفضت بس هو يلح وحلف يجي للبيت اذا ماانطيتج الموبايل ..
درة .. منووو
گلبي دگ وحدة وصار عندي مثل الخفقان .. معناها الي ببالي ..
سدن .. يوسف ..
درة .. ماعندي حجي وياه ..
سدن .. سمعت شگالت ..
يوسف .. افتحي مايكرفون ..
فتحته سدن .. درة بالقرآن اذا ماسمعتيني اجي هسا البيتكم ..
درة .. شتريد مني ماتگلي مو كافي حطمت احلامي وثقتي بيك ..
هسا انت خاطب وعيب تسوي هيج وتخون خطيبتك ..
يوسف .. لا موعيب لان ماريدها انجبرت عليها ..
درة .. وشنو الجبرك عليها انت صغير .. جنت تگول محد يگدر يجبرني وانتي الي وابقى انتضرج .. لهنا وكافي انتهى كلشي بينا انساني يوسف ..
يوسف .. درة اني سويت هيج علمود جدي مضطر ..
درة .. ومن يمتة انت تنجبر وجدك يجبرك .. يوسف كافي انتهى كلشي بينا وبالعافيه عليك بنت عمك واتمنالك السعادة من گلبي ..
اخذت الموبايل من سدن وغلقته ..
درة .. سدن الخاطري بعد لاتخليني احجي وياه .. اني اريد انساه وهو يحاول يذكرني .. شعندة بعد يمي مو اختار غيري بعد شكو ..
سدن .. خلص لاتقهرين روحج والله حجيت وياه شگد بس هو عنيد ..

مرت ايام ولاحس ولاخبر من زينب واهلها .. وعلي ضايج وحتى اكل ماياكل يجي من الشغل يحبس روحة بغرفته
امي من تشوفه هيج تنقهر ..
حاجت امير يحجي وي الشيخ ..
امير .. يمة يعني الشيخ مايشوفها عندهم صارلها اسبوع مايگلها شعندج هنا لو الا نحجي ..
ياقوت .. يمة الخاطر اخوك ماتشوفه شلون ذبلان ..
امير .. خلي يتعود .. الى متى يبقى يركض وراها وهي تتدلل ..
ماادري شلون وبالگوة اقتنع امير يروح ..
ثاني يوم اخذ علي وراحوا ..

امير .. صار فترة مارايح البيت الشيخ .. من عقد يوسف حتى هو ماشايفه ..
ومايخابر ولايسأل .. يمكن حس بروحة غلطان او راد يطوي هالصفحة ..
ولو الولد حقه يتزوج ويستقر بس موومعناها يگاطعنا ..
دخلت للبراني ..
اجة الشيخ وخالي مرزا ..
ام يوسف .. شلونها سدن عود اليوم گلت اجي اشوفها مشتاقتلها ..
امير ..الحمد لله هي هم مشتاقه الكم ..
ام يوسف .. اروح اسويلكم جاي ..
الشيخ .. ها بوية گلتلي بالتلفون عندك شغله وياي اذا على سالفه يوسف وخطبته ..
امير .. لا لا شيخ مو هاي السالفه .. هذا شي يخصكم وكلشي بالقسمة ..
بس اني عتبي وكلامي على مرت علي ..
الشيخ باستغراب .. ياهي زينب شبيها .. صاير شي والله اكسر راسها اذا مأذيتكم ..
امير .. اصبر يشيخ .. ليش انت ماتدري اجو اهلها واخذوها من غير علم زوجها من اسبوع ولاحس ولاخبر لسا ..
الشيخ .. اول هيله بطل كلمة شيخ .. وثاني هيله ماادري بهالحجي .. كلما اسألها تگلي مريضه وجابني رجلي ارتاح يم اهلي ..
امير .. لا شيخ مو هيج .. بس البنية صغيرة وماتعرف والعتب على الي يعلمها ويقويها على بيتها ورجلها ..
گول امها عندها حقد قديم ومدفون ..
بس خالي حمزة شلون يطاوعها وياخذ بنته من غير علم رجلها . يقبلها على روحها ..
لو اخو مرتة سوة هيج يرجعها المرتة ..
الشيخ .. بهاي حگكم .. مرزا خابر على حمزة وخلة يصيح بنتة ومرتة ويجي ..
شوية واجو ..
زينب شافتنا وجههة اصفر ..
وخالي حمزة .. حتى ماسلم ..

الشيخ .. ولك حمزة من يمتة تتصرف من وحدك من غير شوري ..
حمزة .. بوية المشكله تخص بنتي من اشوفها محبوسة بغرفتها وماخذين الموبايل منها شتريدني اسوي حتى لو غلطانة جانوا دزوا علينا مو يحبسوها ..
امير .. من رخصتك شيخ ..
التفتت الخالي حمزة ..
خالي من دخلتوا وصحتوها اكو واحد صعد فتحلها الباب لو هي نزلت وحدها ..
حمزة .. هي نزلت ..
امير .. بعد شلون تگول محبوسه . اذا بقائها بالغرفه عادة عندها من يوم الي تزوجت .. تاكل وتصعد وللظهر يله تنزل .. قابل شنسويلها نجبرها ننزلها ..
الشيخ .. هالحجي صحيح ✔ ولج ..
زينب .. وهي تبجي .. جدي مايحبوني شلون اگعد وياهم
الشيخ .. زين شلون عرفتيهم مايحبوج ..
طگوج بيوم همة لو رجلج ..
زينب .. لا
الشيخ .. غلطوا عليج ..
زينب .. لا
الشيخ .. نزلتي گعدتي وسولفتي وضحكتي وي البنات وعافنج وگامن ..
زينب .. لا بس هن دوم سوالف وضحك ومايصيحني ..
الشيخ .. ماصاحنج اروح واگلهن ها خية شو گاعدات وماصحتني وسالفه وضحكة وتقربي منهن ..
فاطمة .. يابوية حارميها من كلشي حتى مصرف ماينطيها ..
علي .. ليش حارمها شو شتريد اجيبلها .. وشحصل من المحل اشتريلها بي الي تريدة ..
باوع الزينب . مو كل يومية علاگة حلويات اجيبلج ..
مو كلما تردين كماليات وملابس اجيبلج ..
بشنو مقصر وياج ..
الشيخ .. فاطمة انتي عوفي البنية ولاتتدخلين بيها ..
لاتخربين حياتها .. رجال يحبها وشاريها شتردين بعد ..
فاطمة .. رسبت من وراهم شلون مااتدخل وهي مستقبلها راح ..
علي .. ليش من ورانا .. هي حتى شغل تگلي اشتغل وطلعت جذب ماعون ماتغسل .. وليل ونهار بالغرفه شنسويلها بعد ..
فاطمة .. بله انت ماعندك شخصيه ..شيگلولك تصدگ ..
الشيخ .. احترمي نفسج وگومي اطلعي .. يله ولي من وجهي ..
وانتي ولج اذا سمعت مساندة امج وتسوين مشاكل اكسرج تكسر ..
شو لاشغل ولاعمل عندهم شنو الي ملهيج وماقريتي ..
ولو انتي ببيت ابوج مانجحتي تردين هناك تنجحين ..
يله گومي بوسي راس رجلج واخذي من خاطرة ..
ولمي غراضج وروحي وياهم مااريد تزعلين وتجين بعد ..
امير .. لا شيخ .. تريد تراضي رجلها ترجع البيتها شلون ماطلعت منه .. وهناك تراضيه وتاخذ من خاطرة ..
علي .. تريد ترجع تطيع كلاامي وتقدر حبي الها وماتطلع من كيفها واني ماموجود ..
وخالي شلون مااخذها يرجعها ..
يله امير خلنا نگوم ..

گمنا اني وعلي والشيخ يتعذر وياخذ بخاطرنا هو وخالي مرزا ..
وحتى خالي حمزة گال اني ماادري بهيج حجي ..
بالليل اجيبها وبنفسي اعتذر من امكم ..

طلعنا .. اجة يوسف شافنا انصدم ..
يوسف .. شلونك امير شلونك علي ..
امير .. الحمد لله .. يله احنه نترخص ..
يوسف .. امير زعلان مني ..
امير .. زعلان لااا بس گول ماخذ على خاطري منك ..
يوسف .. الي صار موبيدي ..
علي .. امير اني منتضرك برة ..
يوسف .. علي هم زعلان ولو حقكم ..
امير .. الي قاهرني اني جنت حاسبك اخوي .. واذا ماصارت قسمة بينك وبين اختي مو معناها راح اگاطعك مثل ماسويت ..
خوتنا شي ثاني ..
وانت من حقك تستقر وتعيش حياتك .. بس غلط منك انطيت امل الدرة وخليتها تتأمل ع الخالي بلاش ..
يوسف .. اني ماگاطعتك بس مستحي منك ومااگدر اخلي عيني بعينك ..
ولو اني مو رجال وعند كلمتي ماجان انطيت كلمة بس الي صار جدي بي سرطان بالدم ..
ورادني اتزوج وافرحة .. يگلي عسا وان الله يطول بعمري واشوف ولدك ..
امير .. گعدت بالگاع من الصدمة . شلون هيج .. بس مامبين عليه ..
يوسف .. جا اني شصار بيه من گالي .. احس الدنيا ضاگت عليه . جدي الي ربانا وجان مثل النا ..
يمكن بأي يوم نفقدة ويروح منا ...

گعد گبالي .. شفت شلون مااتحملت ..
نزلت دموعي .. مااصدگ ..
يوسف .. طول عمرة هو يكابر ومايگول مريص لو بيه شي فمو جديدة عليه ..
محد يدري بس ابوي .. ومرات بحجة مشيات لو فواتح ويروح للمستشفى يبدل دم ويتعالج ..
لو انت بمكاني ويطلب منك هيج طلب .. والانسانة الي تريدها مربوطة بنهوة وطياح حظ .. شتسوي فهمني ..
شلون ترفض وتوگف بوجهة ..
امير .. كااافي يوسف كافي .. وفوگاها يضوج من اگله شيخ واني مصر اسمعه هالحجايه ..
يوسف .. انت اكثر واحد يحبك .. رغم اني ابن ابنة بس من يشوفك يبقى يصفن عليك ويگول لو من نفس العشيرة جان وكلتة شيخ من بعدي ..

بقينا بالحديقه واحد يواسي الثاني ..
امير .. اگوم اشوفه ..
يوسف .. لا مو هسا . خاف يحس وهو حلفني اني وابوي مانگول الاحد بس انت مااگدر اضم عنك ..
بس منا وهيج حاول تتقرب منة اكثر ..
امير .. وليش اگدر بعد افارگة ..

رجعت للبيت واني ضايج ومقهور ومالي خلگ الكلشي ..
دخلت سبحت ورحت نمت ..
حتى خالي حمزة جاي وجايب زينب ومعتذر من امي واني ماادري ..
ردت انام حتى انسى ..
صحيت على صوت سدن وهي تگعدني ..
حبيبي مايصلح صار الليل وانت نايم وبلا عشا ..
امير .. سدن تعبان ..
سدن .. اهلي ضوجوك لو سمعوك حجايه .. جدي شگال
امير .. بالعكس ماكو شي .. بس اني تعبان ..
شلونة ابنة ..
سدن .. ههههه زين بس ليش گلت ابنة مو بنتنا ..
امير .. هيج اجت وحدها ..
شوكت مراجعتج للدكتورة ..
سدن الاسبوع الجاي ..
امير .. يصير خير . زينب رجعت ..
سدن .. اي رجعت واعتذروا من عمتي .. وهسا العصافير فوگ ..
امير .. ههههه هسا تلگين علي يطلع الفرق بيها مال اسبوع ..
سدن .. ههههههه صاير وكيح ..
امير .. اااااخ وعظ شفته .. لو ماوضعج جا راويتج الوكاحة على اصولها ..
سدن .. جا همزين وضعي مايسمح ..
امير .. ليش ماتشتاقيلي ..
سدن .. لا شلون مااشتاق .. بس حضنك مكفيني ..
امير .. جا تعاي الحضني مشتاقلج ..
اخذتها الحضني وامسد على راسها وبالي يم الشيخ لسا مامصدگ ومااگدر استوعب لسة ..

درة .. ماصدگت اجت الدوامات .. حتى اغير جو وانسى ..اموري اشترالي موبايل خاف احتاجة ..
كان جو غريب عليه ومختلط ولد وبنات .. فكنت متوترة
اتعرفت على بنية مثل حالي اسمها هلي ..
هم كلشي ماتعرف ومتندل بس هي محافضات ..
كل يوم نلتقي وسلام وكذا الى ان صرنا صديقات ..

متعودة كلما ارجع للبيت اسولف ملخص عن دوامي والي صار ..
الامي وسدن ومرات زينب هم ..
لأن صارت شوية احسن من قبل ..وتگعد ويانا وخاصه بعد ماشافتني مااشكل خطر على اختها وعلاقتها بيوسف فتغيرت ..
سدن لأن رابطة ونايمة فكلنا نتجمع بالغرفه يمها ..
حتى مرات احسها تغار من علاقتي بهلي ..
خطية لان هي اجلت السنة بسبب حملها ووضعها ..
واني اسولف الهن ..
امي صفنت عليه وگالت ..
جا انتي شوكت داومتي بالجامعه ..

بقينا اني وسدن صافنين ..
-هههههه يمة شبيج راح يصيرلي شهر ..
سكتت وگامت .. اروح اتوضى واصلي ..
سدن .. بس عمة بعد وكت للصلاة ..
درة .. خاف تريد تصلي البيبيتي لان هي دايما تصليلها ..
اروح اني اسوي عشا وبالليل نكمل سوالف ..
سدن ... ههههههه اذا خلاج استاذ امير ..
درة .. اووووف شلون بضرتي ..
سدن .. لا عمي بعد انتي اجتج هلي مو بحالي ..
درة .. هههههه فدوة للي يغار . تبقين انتي الاصل يحلو

رحت سويت العشا وكملت .. دخلت الامي اشوفها كملت
لگيتها گاعدة تسبح ..
يله يمة كملتي اخواني راح يجون حتى نتعشا وراي محاضرات كومة اكتبها ..
ياقوت .. وابوج اجة ؟؟
درة .. يمة شبيج .. ياابوي .
ياقوت .. شمالج صفنتي بوجهي شبيج ..
درة .. لا يمة مابيه ..
طلعت واني مستغربة .. تذكرت من مرة دخلتلها ولگيتها تسولف وي روحها وگالت اسولف وي بيبيتج ..
يااااا اسم الله لا بس خاف من التعب والبيت كله عليها خطية وتخبز وتطبخ ..
لان زينب دوام وسادس وسدن رابطة ونايمة ..
اجو اخواني وتعشوا ..
بقيت اراقب امي .. ماشفت شي غريب وحياتها عادية وطبيعية ..
ومااتوهمت ولا نست ..
فگلت اكيد من التعب ..
مرت االاشهر والجامعه ماخذة كل وقتي ..
وسدن طلع بيها ولد وفرحنة الهم ..
ورجعت زينب ضاجت لأن لسا ماصار عندهم ..
بس علي قنعها وگالها كملي سادس وانجحي يله نسوي هسا اذا سويتي طفل تتعبين ..
قربت امتحانات نصف السنة وكانت المواد صعبه بس اني مسيطرة زينة ..
قبل الامتحانات تفاجأت بيوسف يطلع من القسم ..
عصرت ايد هلي حيل ..
صاحت اااخ شبيج ..
هذا يوسف شجابه ..
شو وينة وينة امنيتي اشوفه گد ماسولفتيلي عنة ..
هذا گبالج اجة بأتجاهنا ..
خرررب ولج هذا يخبل وفوگاها محامي راح اذوب ..
بس خاين مايستاهل هيج جمال ..
يوسف .. شلونج درة .
درة .. زينة الحمد لله .. يله هلي امشينا ..
يوسف .. اوكفي درة ..
درة .. انت شعندك هنا ..
يوسف .. ليش حرام اجي انتي ناسيه هاي جامعتي اجيت اخذت وثيقه محتاجها وسألت عليج القسم يمدحون بيج ووصيتهم عليج ..
هلي .. اني رايحة درة ..
درة .. وانت ليش تسأل عليه وبصفتك شنو انتضري هلي جاية وياج ..
مااتحملت اوگف وياه بمكان واحد ادري بروحي مااتحمل واضعف وماصدگت گدرت انسى شويه وتمشي حياتي بدونة ..
مشيت وگلبي ورجلي يرجفن..
خابرت على سدن .. وگلتلها بعد لايجي للجامعه ويحرجني خلي ينساني كافي تعبت والله ..
سدن .. درة احتمال جاي ينهي كلشي لو عندة شي يريد يگوله ليش منعتيه ..
درة .. مااريد اسمع شي صارله اشهر خاطب هسا ذكر
سدن .. سمعت جدي معجل زواجهم العطلة نصف السنة وهو ضايج وماقابل ..
بس تدرين بجدي اذا قرر ..
درة .. يتزوج ؟؟ ولو هو خاطب وعاقد شيتوقع مثلا ..
يله عندي محاضرة راح اسدة ..
سديتة وماگدرت ادخل محاضرة رحت للحمامات ..
مااتحملت وبجيت ..
احس روحي اختنگت ..
اجت هلي وراي ..
شبيج درة .. شصاير منو خابرج ..
درة .. لج يوسف راح يتزوج ..
هلي .. بعدج تحبيه مووو جا انتي شمتوقعه يبقى عمرة كله خاطب ..
هو الخسران اصلا .. انتي الف واحد يتمناج عليمن تبجين انسيه وعيشي حياتج ..

بيومها ماگدرت اكمل دوامي خابرت امير گال صديقي مريض واني وياه بالمستشفى راح اخابر علي يجي ياخذج ..
رجعت واحس گلبي معصور ويوجعني حيييل ..
وخاصه من اسمع زينب تخابر اختها وامها وتفكر شتلبس وشتجهز ..
سدن گالت مااروح بس اني گلتلها روحي معليج بية ..
هذا اخوج وحقج تفرحين بعرسة ..
وحتى الاخواني گلتلهم يحضرون مااضوج ولااهتم ..
كملت امتحانات وعطلت ..
واول خميس جان زواجهم .. بيومها كلها راحت والشيخ عزم امي بس رفضت علمودي ..
گالت عود باجر اروح اباركلهم ..
سمعت من سدن الشيخ حاجزلهم بالفندق بس هو ماقابل وگالهم خلوها بالبيت ..
جانت ليلة سودة عليه واني مگابله الساعه واحس الثواني تخنگني ..
خلص راح وانتهى كلشي ..
هسا هو وياها انسدت عليهم باب وحدة .. وصارت مرتة
هسا شسوالها وشلون يتغازل وياها معقوله شلون جان يگلي يگلها ..
لو هي لمستة نامت بحضنة ونستة حبي ؟؟

بقلمي_الكاتبة_شمس
يتبع ....

[لامارا]

/// البـارت الـثلاثـون ////
عجـاف_القلـوب ..
الكاتبـة_شمـس ..

لا تسئالني من أنا ?...
فأنا الفصول الأربعه في إمراءة...
شتاء غاضب...
وليالي صيف مرهقة...
وربيع لا يكبر ...
وخريف أوراقة مبعثرة...
أنا أحتمال واقع وأبتسامات ...
تحمل مواجع عمر لي ليس براجع...
لا تسئالني من أنا ...
فأنا كوكب من الأحزان ...
أشجار مر وطرقات من الحرمان ...
بارده أيامي ...
ودفئي بركان ...
فلا تغرنك الحروف ...
وبريق سبعة ألوان ...
فلا تسئالني من أنا ...
لأنني امرأة كسرتها الأيام...♥

بقيت اواسي نفسي بقيت اكتب وافرغ همومي ..
ياترى ..
هسا يذكرني من يشوفها لو هم يخطأ بأسمها ويذكر اسمي . لو من يلمسها يتخيلني ..
ااااااه .
افكار وافكار تدور ببالي ..
سمعت صوت الباب انفتح ..اجو اخواني ..
سويت نفسي نايمة ..
فزت امي على صوت الباب ..
وگامت ..
-ها يمة اجيتوا ..
اي يمة ..
شبيج يمة سدن ..
سدن .. مابية عمة رايحة انام ..
ياقوت .. جا مابقيتي يمهم
سدن .. لا شعندي باقية هو اصلا عزا مو عرس ..

ياقوت .. يمة شصاير ..
وليش اتأخرتوا.
امير .. يمة ماكو شي .. بس الشيخ تخربط شويه من التعب والوگفة وتعرفين عشا وناس ملتمة ..
ياقوت ..يايمة اسم الله باجر من الصبح اروح اشوفه ..

امير .. يله يمة روحي ارتاحي انتي ..
علي .. تصبحون على خير ..
حيدر .. يله اني صاعد ..
ياقوت .. وانتوو من اهل الخير يمة ..

امير .. شبيج سدن ..
سدن .. ماشفته شلون ضايج ومقهور بله شنو يجبروه هو مرة .. حتى مايباوع بوجهها وحلقه مالابس ..
امير يوسف بعدة يحب درة ..
والله حرام
امير… اشششش ديري بالج تحجين هالحجي گدام درة وتنطيها امل .. ماصدگت نست .. وبعدين هو تزوج مايفيد الحجي ..
سدن .. دور جدو تخربط خطيه ووگع .. من هسا گصتها فگر عليهم .. بس لو اعرف شلون اقتنع يوسف اصلا هو مو من النوع الي احد يمشي امر عليه ..
امير .. هي قسمة بعد .. امي تگول القسمة تسد الحلوگ .. يعني الله رادها وكتبهه اله ..

سدن .. وماقسمله الا هاي .. الله يستر شراح تسوي بي امير .. يله حبيبتي عوفينا .. مااشتاقيتي الحضني .. صدگ شوكت نصعد الغرفتنا هنا ماماخذ راحتي ..
سدن .. هههههه المراجعه الجايه اسألها ..

يوسف .. اليوم زفتي واني مااعرف شلون بدلت ..
بس من شفت امير واخوتة تغير مزاجي شويه ..
يدري بيه مافرحان بس حاول يقنعني بان هاي قسمة الله ولازم ارضه بيها ..
طلعت الزفه بس حسينا على جدي تعبان ..
ابو گاله انت ابقى يم الناس واني اروح بسيارة الزفه
رحنا جبنا حوراء من بيت عمتي اقبال ..
واجينا للبيت ..
طول الطريق ماشفتها ولادرت وجهي ..
المفروض هسا درة بمكانها .. لو هي يمي جان هسا فرحتي غير وزفتي غير شكل ..
جماعتي نزلوني يم الكورنيش ودگ ورگص بس اني مجامله وياهم اضحك وارگص ..
وصلنا للبيت دخلتها وطلعت بسرعه مابقيت ..
التهينا وي الناس وعشا وهوسة ..
وراها جدي تعب كلش وتخربط ووگع .
اخذنا اني وامير وابوي ..
كلها گالت مايصير انت تروح وعريس بس ماسمعت منهم
دخلناه للطورائ ..
طلع ضغطة مرتفع والسكر ..
خلوله مغذي وابر ..
ابوي گال للدكتور على حالته وهو جاي يتعالج ..
اني وامير گاعدين برة ولابسين قاط فوگاها ..
اجة ابوي گالي جدك يريدك ..
رحت يمة ..
گال بوية اعذرني ..
-ليش تگول هيج ..
-اول مرة اصير اناني وافكر بروحي .. جنت عبالي اذا خطبتلك بنت عمك راح تنسى وتحبها ..
بس اليوم شفتك شلون ضايج ووجهك مگلوب من الحزن
اني ماردت اگلك بمرضي واشيلك همي ..
بس من گتلك ازوجك درة اذا اخذت بنت عمك ..
وشفتك مااقتنعت وگلت اني مستعد ابقى عمري كله بلا زواج ولااخذ وحدة غيرها ..
اضطريت اگلك حتى تفرحني بشوفة عرسك ..
يمكن الحگ على جهالك لو لا ..
بس المهم ارتاحيت ..
واريدك تبريلي الذمة اذا متت وانت بعدك بحسرة بنت ياقوت ..
بس يبوي هي هاي النهوة يمكن يتراجعون ويمكن يبقون العمر كلة ناهين عليها وانت تخلص عمرك تنتضر ..
مااريد ابري روحي واطلع من خطيتك بس اني والد ومن حقي اشوف احفادي واحفاد احفادي وافرح بيهم ..
اني حتى عبد الله ردت ازوجة بس لو مايداوم محافضات
يوسف .. الي صار صار جدي لاتلوم روحك ..
هو كلشي بالقسمة ..
وين ابوك صيحة خلينا نرجع مناك مرتك وانت عريس فشله شتگول علينا العالم ..
يوسف .. خليك هنا الليله لاتتأزم حالتك ..
الشيخ .. لا مابيصير شي . بس اگلك امير يدري لو لا لأن شفت خوفه ولهفته عليه قوية وصار فترة مايفارگني مثل قبل ..
وكل يوم يجي يمي بالليل ..
يوسف .. اي يدري بس هذا مو معناه انه هو مايحبك تدري بمعزتك عندة شلون ..
وهو الي يتبرع بدمة الك كلما نبدلك دم ..
الشيخ .. روح صيحة ..
صحت امير واجة ..
الشيخ .. تعال يمي ..
امير .. ها بوية گول ..
الشيخ .. خو ماضايج مني لأن كسرت گلب اختك ..
امير .. لا بوية انت مالك ذنب .. حقك تشوف عرسهم وتفرح بيهم .. العتب على ابوي هو السبب ..
الشيخ .. انت دريت بية شنو فاذا متت وصارت فرصه لاتقصر واجمعهم اثنينهم ..
امير .. الله ينطيك طولة العمر بس هذا الطلب صعب مااگدر اظلم اختي واجبرها من حقها هي الي تختار مو اني ..
الشيخ .. اذا البنية موافقه مايمنع شي . بس اذا ماموافقه طبعا مايصير تجبرها . عايلتي امانة عندك .
صح عندي ولد اثنين ومرزا راح يلزم من بعدي بس اريدك ماتعوفهم وتخلي ايدك بإيد خالك وماتفارگة ..
امير .. الله يشافيك بويه وينطيك طولت العمر لاتگول هيج ..
اني اگول لو تطلع للخارج وتتعالج . اول وتالي راح يعرفون ماكو داعي نضم السالفه ..
الشيخ .. هي موتة وحدة اذا الله كاتبلي اعيش اعيش بس مااريد عايلتي تتأذة بالخبر وتنصدم وتخاف اموت بأي ساعه اريدهم مايتوقعون موتي شوكت ..
امير .. بس انت تتخربط هواي اكيد يحسون ..
الشيخ .. طلعولهم اي سالفه ضغط سكر بس المهم مايخافون وينگلب البيت الحزن ..
امير .. زين ابقى للصبح هنا ..
الشيخ .. لا شيردون يسولي .. اروح البيتي ارتاح احسن

طلعنا من المستشفى .. بالبيت كلها منتضرتنا وبالها يم الشيخ ..
بس هو اول ماوصل .. وگف على حيله وماقبل واحد يساعدة .. ودخل يضحك ..
ويگله يله بوية يوسف اصعد المرتك .. عريس وگطعنا ليلتك ..
لأن شاف الوجوه حزينة واكو وجوه مگلوبه وتنضر بحقد
يوسف .. هسا جدي بس اطمأن عليك ..
الشيخ .. يابوي هاي اني مابيه شي .. مو عبالكم كبرت بعدني شباب هههه ..
يله بويه زفوه الغرفته ..
بدت كلها تصفگ وتگفل وهو صعد للغرفه ..

يوسف .. رجليه ماتريد تصعد .. اذا امشي خطوة ارجع خطوتين .. احس روحي تندمت بس بعديش ..

فتحت باب الغرفه .. اخذت نفس جانت الغرفه دافية وجن بيها ريحة درتي ..
صارت عيني على حوراء مدنگة ..
وجن شفت درة الگاعدة ..
اتقربت ومااريد احد يخرب حلمي .. اتمنيت درة هسا هنا واخذها لحضني واخلص الليل وياها ..

رفعت راسها .. حسيت واحد وضربني على راسي ..
ابتسمت ..
گلتلها گومي بدلي وارتاحي ..
ليش لسا بالبدلة ..
حوراء .. مو امي گالت لاتنزعيها لمن يجي يوسف ..
يوسف .. وشسوي قابل اني .. گومي گومي بدلي ..
گامت للكنتور طلعت سيت ابيض ..
اني نزعت سترتي .. وجواريبي ..
وتمددت ع الجرباية ..
افكر بدرة وحالها .. هم ذكرتني لو نستني ..
ولك يوسف شلون الك عين وتفكر بيها وانت العفتها بوسط الطريق ..
بس مو بيدي گلبي يريدها وعشگها مااگدر المس وحدة غيرها .. ياناس هاي طفلتي وحبيبتي شلون اگدر انام بصف وحدة غيرها ..

من التعب والتفكير .. ماحسيت على روحي وغفيت ..
گعدت على صوت الباب تندگ ..
فزيت .. انتبهت الحوراء نايمة يمي وايدها مكشوفه ..
ابد ماحسيت اتجاههة برغبة لو كأنه مرتي نايمة يمي ..
استغربت وجودها بجربايتي اصلا ..
شفت صينية اكل موجودة منو جابها وشوكت ..
الباب بعدهي تندگ .. واني لسا بالقميص والبنطرون نايم طفرت من مكاني صحت منووو..
امي .. يمة يله نزلوا جدكم جايب گيمر وكاهي ومنتضركم ع الريوگ ..
يوسف .. اي يمة جايين ..
رحت سبحت وبدلت دشداشة ..
اووووه نسيت اگعد حوراء .. بس معقوله كل هذا الصوت وهي نايمة ..
صحت .. حوراء .. حوراء ..
تالي حركتها بإيدي .. حوراء اگعدي ..
گعدت شافتني طفرت .. هاي شوكت گعدت وبدلت وين رايح .. وجهه ضايج .. اعرف ماخذة على خاطرها بس موبيدي ..
يوسف .. جدي منتضرنا ع الريوگ يله بدلي وانزلي ..
حوراء .. غير ننزل سويه ..
يوسف .. لا انتي بدلي على راحتج واني نازل ..
حوراء .. يوسف احنه غير عرسان ومتزوجين اشو تعاملني مثل اختك ..
يوسف .. يعني شلون اعاملج .. اذا ع البارحة عفتج ونمت اني اعتذر بس تعبان وماحسيت على روحي ..
حوراء .. مااقصد هيج تعرف قصدي ..
يوسف .. هسا گومي وبعدين نحجي ..
طلعت واني مصدوم .. شني هالبنية من اول يوم تطالب بحقها .. هو صح حقها بس ماحبيت جرأتها ..

نزلت .. هلهلن بيبياتي ..
والكل باركلي .. جدي جان يباوع الوجهي ومنتضر اجابه مني بس اني ماخليت عيني بعينة ..

فاطمة .. جا حوراء وين ؟؟
يوسف .. فوگ تبدل ..
فاطمة .. اصعد اشوفها ..
صعدت وعرفت تالي صعدتها مو خير ..
نزلت معبسة هي وبنتها ..
گعدنا تريگنا وكملنا ..
اجت ناس تسلم وتبارك ..
التهينا كلنا بالديوان ..
واجو شيوخ وعمام النا من كربلاء ..
جدي ذبح طليان الهم وسوينا غدا ..
فللعصر مافرغنا من الخطاطير ..
جدي .. گوم بوية لمريتك مايصير تعوفها البارحة التهيت وياي واليوم خطار ..

گمت للبيت .. شفت امي ضايجة ..
گلت اكيد تعبانة طبخ وتنضيف ..
اتقربت وحضنتها .. شبيها ام يوسف ضايجة ..
ام يوسف .. يمة فدوة لاتخليني بحلگ فاطمة ماتريدها المن اخذتها وخليتني امام الامر الواقع ..
يوسف .. خير ياستار شكو ..
ام يوسف .. بنتها مدري شگايلتلها واجت هادة عليه .. من اول يوم ابنج يكسر ببنتي ويخليها وحدها وينام وحتى عشا ماتعشت .. اني ادري البنية تستحي وتخاف مو الزلم ..
يوسف .. حجت هيج ؟؟
ام يوسف .. واكثر فضحتنا گدام عماتك وبيبياتك ضليت لااخذ ولاانطي ..
يوسف .. الصوج مو بيها ببنتها . لازم اعلمها ماتطلع اسرار غرفتها برة الغرفه يله ..

ردت اصعد .. صاحتني بيبيتي ام مرزا ..
تعال يمة ..
يوسف .. هابيبي .
ام مرزا .. يمة هلا هلا ببنت عمك .. صح صغيرة وماتعرف تتصرف بس ارشدها وعلمها ..
مو تعوفها وتنام وتخليها وحدها..
يوسف .. بيبي هاي شغله بين اثنين عود مسمايين مرة ورجال المفروض ماتطلع ومحد يتدخل بيها ..
جدي وراي سمع ..
-شكو بوية شصاير ..
ابوي وراه يأشرلي براسة ..
يوسف… ماكو شي جدي سوالف نسوان ..
جدي .. تعال للبراني ..
اجيت وراه وابوي گاعد ..
احمد الله عمي ومرتة ماهمة ببيتهم جان عرفتها شلون تتدخل وتحجي وطلعتني مو زلمة ..
جدي .. شكو .. انت البارحة ماكملت شغلتك ..
يوسف .. هههههه والله ناقص حوراء وامها يذيعنها بقناة الشرقية ..
ولو هن الشرقيه والجزيرة شأتوقع منهن ..
جدي .. عيب هالحجي ولك .. وحدة مرت عمك والثانية مرتك ..
يوسف .. مرتي الي انت جبرتني عليها .. جدي سويت الي تريدة بس ماتجبرني انام وياها غصب هاي معاشرة ورغبة اذا مو بقناعتي مااسوي شي غصب ..
جدي .. ولك انت رجال شنو رغبة مارغبة .. مدامك دخلت عليها تنطيها حقها مثل ماانت عندك حقوق الها ..
شتريد العالم تاكل وجهنا من تسمع مرتك بعدهي بنية اللوم كله يوگع عليك مو عليها ..
مرزا .. لاتعاند جدك واصعد المرتك ..
ردت احجي خزرني ابوي ..
صعدت واني النار تسعر بيه ..
دخلت للغرفه . هي گاعدة ع الجرباية لابسه دشداشه ربع ردن ومخليه رجل على رجل وتخابر وي اختها ..
اشرتلها سدي التلفون ..
سدتة وعدلت گعدتها ..
يوسف .. شموصله الامج حجي ..
حوراء .. هاااا مو هي سألتني ..
يوسف .. حتى اذا سألتج اسرار الغرفه ماتطلع برة فاهمة .. امج ماشاء الله مامخليه واحد ماگايلتله ..
حوراء .. ماحجت شي خطأ ..
يوسف .. اذا سمعتج تردين عليه بهيج اسلوب اتصرف وياج غير تصرف ..
حوراء .. وعساس انت مقصر انت طول فترة خطوبتنا ماسمعتني حجايه والبارحة واليوم ماطايقني وعفتني ونمت وعبالك اخوة مو متزوجين ..
يوسف .. هههههه وشتردين مثلا .. خبصتينا انتي وامج علمود مااتقربت ..
يابة مايعجبني وشوكت ماتطخ براسي يله اتقرب عسى ما بعد سنين ..
حوراء .. ليش لازم انت مو رجال وماتعرف ..
هي حجت هيج .. واني ماشفت بعيني ..
يوسف .. منو مو رجال ولج .. الضاهر عمي ماعرف يربي وطلعتي هيج على امج ..
حوراء .. لاتجيب طاري امي انت خليتني احجي هيج ..
يوسف .. وبعدج تحجين وبصلافه واللسان ..
اريد اراويج الرجال شيسوي ..
مو تردين حقج وخبصتن الجو علمود حقج .. تتدللين ..
نزعت الدشداشة ..
ونزعت الساعه وهي فتحت عيونها ..
شتسوي انت ..
يوسف .. اسوي الي يعجبني .. مو مرتي .. وتردين حقج .. اريد انطيج حقج .. حتى اثبتلج الرجال مو بهاي السوالف ..
وصلت يمها وهي تباعد ..
لزمت رجليها ومديتهن .. وهي السانها اطول منها وتتجاوز ..
سديت حلگها بإيدي .. وگلتلها ..
صوت واحد احسب الله ماخلقج ..
نزعتها واخذتها بأبشع طريقه .. بحياتي مافكرت اتعامل وي مرة هيج ..
ولاهذا طبعي بس هي الي جبرتني وماعرفت تصبر عليه
وماعرفت تكسبني وتحاول تتقرب بلين ..
گلبي جان نار جهنم تسعر بي وهي زادت عليه بانزين وخلتة يشتعل اكثر ويحقد ..
كملت وهي تبجي ..
گلتلها مبروك اخذتي حقج وزيادة بس اريد اگلج الرجال ماينقاس بهاي ..
الي يدور رغبات ونومة فراش هذا بس الحيوان ..
وبفضلج حولتيني الهمجي وضيعتي كل تعامل حلو بينا من اول يوم ..
اسمعي كلام امج وخليها تفيدج ..
ومنا وجاي اذا تطاولتي عليه اعلمج الرجوله شلون تكون ..
تركتها ورحت سبحت ..
ونزلت ماردت اشوفها خاف اتأذة .. ضجت من نفسي والمرحلة الي وصلتها ..
نزلت صارت گبالي امي ..
همستلها .. روحي اصعدي شوفيها وعلميها لاتتجاوز وتطول السانها ..
لأن خاف اقسى عليها وااذيها ..
امي انخطف لونها وگالت .. شسويتلها اووووف منكم راح تموتوني ناقصه عمر ..
عفتها وطلعت ..
ركبت سيارتي وماعرفت وين اروح ..
بس افتر طلعت خارج الديوانية ومااعرف وين اريد ..

خابرني ابوي ..
مارديت .. مرة مرتين .. فتحت خط ..
-ها يابة شكو خلوني ارتاح واهج ..
-تعال هسا هاي شمسوي بالبنية .. ماوصلناها الجدك لان مريض وامك نبهت عليها ماتحجي الاحد وهسا احنه بالمستشفى حتى اهلها مايدرون ..
-شبيها ليش للمستشفى..
-متأذية مااگدر اوضح اكثر .. شنو سويتها عناد ..
-لا بالله بس هي استفزتني وگالت مو رجال ردت اعلمها الرجوله مو بهاي حتى بعد ماتتطاول عليه ..
-تقيس عقلك بعقلها هي صغيرة وماتفتهم وانت محامي ودارس ومثقف ..
-خليتو بيها مثقف .. مو كافي جبرتوني ..
-شو مسوي منيه عليه قابل اني الجبرتك انت قبلت الخاطر جدك فكمل جميلك ولاتكسرة وهو مريض ..
يله بوية انت جبيري وفتشت عيني لاتخلي العالم تضحك علينا .. بعد صارت مرتك وبنت عمك وعرضك ولازم تقبل بالامر الواقع ..
-خليني ارتاح واجي ..

لليل رجعت .. شفت امي بالمطبخ .. تخابر بسدن وتبجي
وهسا شلونها زينة ..
سدن .. احسن بس بقت اليوم تحت المراقبة وباجر يطلعوها .. خطية تكابر وعود مامهتمة بس هي تضم بگلبها ..
يله يمة روحي فشلة لايخابر رجلج وسلميلي عليها ..
يوسف .. شكو ..
ام يوسف .. ماكو شي اصعد المرتك .
يوسف .. لا گولي شكو .. درة بيها شي ..
ام يوسف .. اششش منا بيت عمك لايسمعون .. انسى البنيه واصعد المرتك ..
مو كافي الي صار بيها ..
يوسف .. تگولين لو اروحلهم ..
ام يوسف .. ياعزا العزاك وين تولي ولك يمة شبيك تغيرت وهيج صرت جنت تسمع الكلام شمالك هسا ..
يوسف .. هسا تحجين لو لا ..
ام يوسف .. درة گاعدين الصبح لاگينها سابحة بدمها ومغمى عليها ..
يوسف .. شنووووو وهسا
ام يوسف .. طلع ضغطها مرتفع وگايمة تنزف من خشمها يگول الدكتور بيها بخت نزفت لو باقية جان انجلطت اني ادري هاي الطفله شجاب الضغط الها ..
بعدها صغيرة وينها وين الضغط ..
همزين ماراحت من ايديهم ..
خليت امي تسولف ..
عفتها وطلعت وهي تركض بالطارمة ..
-يمة تعال لاتصخم وجهي تروح شتگللهم ..
-مااگول شي يمة .. واني اگول ليش امير والولد مااجو للغدا ..
ركبت سيارتي ومشيت للمستشفى ..
وصلت لگيت بس حيدر وعمتي ..
سلمت عليهم ..
باوعت الها نايمة ووجهها اصفر ..
سألت حيدر على امير ..
گال راح هسا هو وعلي للبيت البنات وحدهن بالبيت ..
عمتي ملتهية تقرا قرآن وماباوعتلي اصلا ..
عرفت ماخذة على خاطرها ..
حقها ومااعرف بيا وجه جاي ..
يوسف .. عندها العافية ان شاء الله اي شي تحتاجوه خابرني ..
حيدر .. مشكور ماتقصر ..
شفت الوجوه مگلوبة افتهمت الوضع درت وجهي ومشيت بس المهم شفتها .. بس جانت ذبلانة ..
ونايمة .. ريت بية ولا بيج يبعد روحي ..

طلعت بحديقه الهوا اريد اتنفس .. لااراديا نزلن دموعي گمت ابجي .. ابجي على حبي الضاع وحياتي بغبائي ..
اول مرة بحياتي ابجي .. بس درتي تستاهل دموعي ..

بقيت بالحديقه جوة گاعد بالبرد ..
اريد اتنفس وياها نفس الهوا ..
مايهون عليه امشي واعوفها هنا ..
خابر ابوي ..
ماگدرت ارد لأن اعرف مااتحمل وتطلع مني حجايه
دزيت رساله ..💬 اني جاي بالطريق ..

طلعت من المستشفى للبيت ..
شفت ابوي بالصاله هو وامي ..
گال اصعد المرتك وبعدين الي حجي ثاني وياك ..
وجن ماسمعت شي ..
صعدت .. لگيت الضوة مطفي وشاعله التيبلام ..
بدلت ونمت ..
هي تحوس .. عرفتها گاعدة وتتصنع النوم ..
درت وجهي ونمت ..

درة .. بليلة عرسة بقيت الليل كله افكر واكل بنفسي
احس راسي يريد يطگ من الالم ..
بقيت طول الليل سهرانة جوة البطانية وابجي ..
والقهر والالم بگلبي مايعلم بيهن الا الي حاس بنفس احساسي والي مجرب شعوري ..
انسان تحبه الليله بحضن غيرك اصعب شعور بالدنيا ..
احس عيوني غوشن وحسيت بخنگة ..
الظاهر امي مگعدتني للصلاه لان هي متعودة تگعدني وياها ..
لان توقت موبايلي ع الوقت ..
وشايفتني نازفه دم وصايحة اخواني ماخذيني للمستشفى..
بقيت فاقدة كم ساعه رغم خلوني بالطوارئ وعلاجات ..
بس للظهر يله فقت ..
لگيت اخواني وامي متخبلين عليه ويبجون ..
وامي تگلي يغبرة تموتين روحج علمود واحد باعج ..
استحيت من اخواني ..
بس امير ماقبل وگالها مااريد اي حجايه بهذا الموضوع
ومااقبل احد يحجي وياها ..
انطويت على نفسي وسويت نفسي نايمة ومن المهدئات والادوية فعلا انام ومااحس بنفسي. .
بس سمعت صوتة .. وصحيت ..
بقيت مغمضة واسمع ..
جان يحجي .. وبلهفة .. عگبيش وجاي هسا بعد مالوكت فات .. غدرت بيه وهسا جاي بخوف عليه ..
ردت افتح عيوني واعاتبة واگله ..

أني أشبـگ بليلي البرد ..
ويا الخوف ..
وأنت بحضن غيري الليله گـاضيها ؟؟

شوية شوية الى ان اختفى صوتة عرفته مشى ..
وجن اخذ روحي وياه ..
فتحت عيني .. امي صدقت وسدت القرآن ..
درة .. يمة جوعانة ..
امي .. اي يمة علواه . هاج هاي لفة گص جابلج اموري وعصير زبيب .. گومي تغذي ..
اكلت شويه وشربت العصير ..
احس نفسي مسدودة ..

اجة حيدر فرح من شافني بقى يسولف ويتشاقه وياي ..
تالي گال راح انام يم الممرضين هنا ردهة نسائية واي شي تحتاجون خابروني ..

ثاني اجو اموري وعلي من الصبح .
فرحوا من شافوني گاعدة ..
اجة الدكتور شافني وقاسوا ضغطي گال زينة تگدرون تطلعوها بس هالفترة كون تتحامى دهون وموالح ماكو واهم شي الحاله النفسية ..
ياقوت .. اي دكتور گللها ترى شلعت گلوبنا على كلشي تقهر بروحها ..
الدكتور .. لا يمعودة بعدج صغيرة وحلوة واشوف اخوانج مداريج بعد لويش القهر ..
انتي تدرسين ..
امير .. اي سنة اولى قانون ..
الدكتور .. اووووه ماشاء الله .. اكيد هذا ضغط الدراسة يله شدي حيلج حتى تفيدينا هههههه ..
اباوع الاخواني يردون ياكلوه هو صغير بالعمر مو كبير
ويحب يتشاقه وي المرضى ..
بس اخواني ضاجوا وغاروا ..
همسلي امير .. يله حبيبتي گومي لا ابتلي بي اليوم
ضحكني صدگ بكلامة ..
طلعنا للبيت .. وسدن تلگتنا حضنتني وتبجي ..
سدن .. بعد لاتسوين هيج والله ازعل خوفتيني عليج
درة .. لا كلشي ولازعلج انتي وكروري ههههه
امير .. ها مشيتوها كرار ..
ياقوت .. اي حلو دخيل اسمة ابو الحسن ..
امير .. هاهي جا اسمة كرار من اليوم .. شتگولين سدون ..
سدن .. اني گتلك الولد عليك والبنات عليه اسمائهم
امير .. خوش متصافين يعني. .
ردت ادخل الغرفة امي ..
گالت سدن لا تعاي الغرفتج ..
لگيتهم مرتبيها مثل ماجانت قبل ..
درة .. هاي شنو صعدتوا ..
سدن .. اي كافي بعد .. بالنهار انام جوة وبالليل نصعد الغرفتنا والدكتورة هم خابرتة گالت عادي ..

دخلت ارتاحيت .. اجت زينب سلمت وباستني .. الصراحة استغربت ..
سدن .. سويتلج شوربة على دجاج ..
ياقوت .. اي يمة خليها تتغذى كلشي ماماكلة ..
صبت الي زينب وجابتة ..
اكلت واخذت علاج ونمت ..

يوسف .. گعدت الصبح .. لگيتها تشسور بشعرها .
گالت ..
صباح الخير ..
يوسف .. صباح النور ..
حوراء .. البارحة مااجيت واطمأنيت عليه .. غير وصلت الموت وخيطوني ..
يوسف .. من ايدج ..
حوراء .. وهاي فوگاها .. بس اعرف وين رحت .. مرتك مريضه ماتجيها ورحت الحبيبة الگلب موووو
يوسف .. هههههه ابقي ابقي بلسانج هذا خلي يفيدج بس خافي مني بيوم اگصه الج ..
لان اگلج حجايه وخليها بأذنج .. مااحب المرة العرمة واللسان ..
فأذا تبقين هيج تخسريني ويمكن مانكمل سوة ..
حوراء .. شنو يعني تهددني .
اني لان احبك هيج تسوي وياي بيش هي احلى مني عود عيونها زرگ .. عبالي نسيتها من يوم انخطبنا ماادري بيك لسا تحبها ..
يوسف .. همزين يعني تعرفين احبها .. خلص بعد لاتجيبين اسمها على السانج .. بدل هذا الحجي ..
لو تحاولين تكسبيني بأسلوب حلو ..
بس انتي بنتج امج مو بيدج ..
وهاااا اگلج اني ترى اني مو عمي ..
عفتها وطلعت ..
اهلي نضراتهم كلها عتب .. سلمت على جدي لونة شاحب اتذكر اليوم عندة جرعة وتبديل دم ..
گلتله ابدل واخذك ..
صعدت ابدل .. هي ملتهية بالموبايل ..
بدلت گالت وين تريد راح تروحلها ..
ماحجيت وياها ..
نزلت اخذت جدي تفاجئت بأمير بالباب ..
ضحك جدي وگال اصلك طيب وليدي ..
اخذنا ومشينا ..
اتخيل من اشوف جدي يتلوع ويتخربط رغم هو يكابر ويمثل القوة ..
يوسف .. شلونها درة ..
امير .. احسن هسا .. صدگ شصار القضية الورث مال امي شو طولت ..
عرفته يريد يغير الحديث ..
جاوبتة .. هاي الايام الجلسة ان شاء الله واحتمال يتحول للمزاد وينباع مادامهم مايقبلون ينطون حصة امك ..
امير .. الله كريم ..

وفعلا مرت الايام وصارت الجلسة ونباع البيت بالمزاد واخذت عمتي حصتها ..
وبيومها تعارك قيصر وي امير وضربة وعمة وابوه يتوعدون ويهددون ..
اني جان گلبي جمر منة وبسببة افترقنا اني ودرة ..
بسرعه سجلت عليه دعوة وسجنته ..
وگلتله .. هالمرة اريد اشوف من يطلعك الا اخليك تختخ بالسجون ..
درة .. رجعت اني بعد العطلة للدوام وكل الي يشوفني يگلي مسوية دايت جسمج صاير يخبل ..
مايدرون الي بية شنو ..
بيوم گاعدين اني وهلي ..
اجة ولد اسمة مهيمن .. گال درة اريد احجي وياج بموضوع ..
گتله تفضل هنا احجي ..
مهيمن .. مو هو شي خاص ..
درة .. اخوية انت مرحلة ثانية واني اولى مابينا اي موضوع ..
مهيمن .. اني الصراحة معجب بيج ونيتي صادقة وياج ومراقبج من بداية السنة لسا وكلها تحمد بيج وبأخلاقج
گمت من مكاني وگلت ..
اعتذر خوية اني مو مال هاي السوالف وجاية هنا حتى ادرس واشوف مستقبلي ..
يله هلي امشينا ..
گمنا واني ارجف وهلي تلوم بية ولج ليش هيج تحاجيه مبين الولد حباب وصدگ يريدج ..
درة .. تحجين صدگ هلي .. بعد تجربتي وي يوسف تتوقعين راح اكرر نفس التجربة ..
وتردين الصدگ مااتخيل گلبي راح يحب واحد ثاني بعد يوسف ..
احس حبة مثل المرض الخبيث الي مستحيل اشفى منة الا اذا متت ..
بقى هذا الولد مراقبني وين مااروح وكل يوم داز بنية تحجي وياي واني اصدها واطردها ..
بيوم من الايام رجعت من الجامعه للبيت تفاجأت ببنية متوسطة بالعمر
ووياها مرة جبيرة ..
گاعدات بالبراني .. واسمع امي تفرفح وسدن تحجي وتغلط وتدعي ..
گلت السلام عليكم واني مستغربة ..
امي وسدن صفنن بوجهي ..
درة .. ماما شكو شصاير ..
ياقوت .. درة ادخلي لجوة ..
البنية انتفضت من مكانها وگالت .. انتي درة ..
درة .. اي اني منو الاخت ولاصغرا ..
البنية .. اني مرت قيصر واجيت اترجاكم تطلعوه من السجن صار عشر ايام ماشايفيه ..
بقيت صافنة ومستغربة ..
وبلا وعي گمت اضحك بهستيريا ..
والكل صافن عليه بأستغراب .. واني مستمرة بالضحك

بقلمي_الكاتبة_شمس
يتبع……

[لامارا]

//// البـارت الحادي والـثلاثـون ////
عجـاف_القلـوب ..
الكاتبـة_شمـس ..

البنية .. اني مرت قيصر واجيت اترجاكم تطلعوه من السجن صار عشر ايام ماشايفيه ..
بقيت صافنة ومستغربة ..
وبلا وعي گمت اضحك بهستيريا ..
والكل صافن عليه بأستغراب .. واني مستمرة بالضحك
البنية .. ليش اكو شي يضحك ..
درة .. انتي تدرين رجلج ناهي عليه وتالي يطلع متزوج وعايش حياتة وحطمني ..
البنية .. وانتي ليش مستغربة قابل ترديه يبقى العمر كلة منتضر مزاجج .. اصلا لو ما انتي منطيتة مجال ماجان نهى عليج .. بس مادام اني موجودة مستحيل اخليه يتزوجج حتى اذا بقيتي هيج معلگة مايهمني ..
درة .. اطلعي برة يله اطلعي .. شايفه صلافه مثلج مشايفة وج النذل زوجج حطم حياتي بنهوة طايحظها مثله وانتي ولاهامج ..
لو انتي بمكاني شتسوين .. تضحكين على حياتج الي انكسرت لو تگعدين تبجين وتندبين حظج ..
درة .. گتلج اطلعي برة .. وخليها ترجية بأذنج ماتهمني نهوة رجلج ولو ابقى عمري كله هيج احسن مما اخذ شخص عار وماعندة غيرة ..
الاحسن تتعودين على سجنة لان هو من زمان يستحق هيج مكان..
المرة .. يله يمة امشي ماتنلام خالتج سهيله من سولفتنا عنهم .. بس صوجي السمعت كلامج واجيت وياج ..
طلعن وهنة يحجن ويغلطن ..
مااعرف ليش البنية من شافتني تخبلت وعبالك راح اخذة الرجلها لو كاتلة نفسي عليه ..
ماتدري لو يبقى بس هو رجال مااخذة ..
ذبيت جنطتي والسجلات وگعدت ع حيلي ..
گعدت ابجي واندب حظي ..
گابلتني سدن .. درة گولي يلة شبيج ..
درة .. شنو شبية سدن .. وج بسبب هالحقير اني كل يوم ابجي دم .. وتالي هو متزوج وعايش حياته ..
شنو من تقاليد عدنا وشنو من مجتمع عايشيه .. الرجال يسوي كلشي يريدة ومحد يمنعه ..
والمراة كون تندفن بالحياة ولاهامهم اهم شي يعيش هو ورغباته الوسخة ..
من شرع بالعشاير قانون النهوة ماعرفوا يساون بيها الرجال والمراة ..
المفروض عمرة كله يدفنة بالحياة مثل مادفني ..
سدن .. اشششش كافي يروحي كافي .. شوفي امج منا خطيه ضاجت وگاعدة تبجي ..
درة .. خابريلي امير خابري خلي يشفي غليلي بهذا العار خاااابريه اگلج ..
ياقوت .. كافي يمة لاتسوين بروحج هيج .. اني اعرف المن اخابر وعليمن احجي ..
لبست جواريبها وعبايتها ..
سدن .. عمة وين رايحة ..
ياقوت .. البيت ام احمد ..
طلعت امي وسدن خابرت امير وبلغته .. گالها اني رايح البيت ام احمد اشوف امي وبعدين اتصرف ..

ياقوت .. رحت شايطة ودمي يفور .. وصلت البيت ام احمد تلگتني بعد ماسلمت ..
تفضلي خيه تفضلي ..
ياقوت .. ماجايه اگعد خية اريد رقم حاكم ..
ام احمد .. يا حاكم هاااا يع شتسوين بي .. شكو صاير شي الولد بيهم شي ..
ياقوت .. انطيني خية واني افهمج بعدين ..
ام احمد .. والله مااعرفه خلي اشوف احمد بلكن يدبرة الج ..
راحت الاحمد واجة سلم ..
ها خاله امي نگول تردين رقم ابو امير .. اني هم مااعرفه بس راح اخابر جماعتي هناك يدزوليا ..
ياقوت .. اي يبعد خالتك مستعجله ..
ام احمد .. غير تفهميني خية ؟؟

ياقوت .. شأحجي خية شأحجي الله ينتقم منك يحاكم انت واخوك وابنة دعوة ام محروگ گلبها على بنتها ..
ولج خية بنتي مثل الوردة مفتحة وبيوم خطبتها نهى عليها هال…. استغفر الله ..
وحرمها من خطيبها وسعادتها ..
وخطيبها سنة سنتين ماانتضر وتزوج ..
وحطمها فد مرة وانتي تعرفين الصار بيها ..
تالي اليوم تجي بنية هي وامها وتگول اني مرت قيصر واريدكم تطلعوه من السجن وحامل ومااريد ابني ينولد وابوه بالسجن ..
شايفه هيج صلافه .. متزوج ومرتة حبله .. وبنتي مكسورة ..
وفوگاها ابوها يستر وصاف وياهم هم لو ماتجي هالبنية ماندري بي متزوج ..
ام احمد .. الله لاينطيه .. عساها ببختة ومايتهنى لابعيشة ولابخلفة .. ماكو غير سهيله اخذتله بنت اختها حتى تحرگ ارواحكم وشمدريج ماهي الي دازتها حتى تتشمت جا اني اعلمج بسهيله يياقوت ..

ياقوت .. اووووف اووووف حسبي الله عليهم. .
احمد .. خاله هذا الرقم عندج موبايل لو اخابر من جهازي ياقوت .. لا هذا عندي الولد اشترولياه خاف احتاج شي وهمة طالعين ..
بس خاله انت دگ الرقم مااعرفه ..

دگ الرقم احمد وجان گلبي يدگ مثل الطبل ..
ماصدگت سمعت صوته فقدت ..
الو ياهو ..
اني ياقوت ..
ياقوت ؟؟ شرايدة
انت هم ابو انت والله حرام تتسجل بالجنسية ابوهم .. لو بيدي ماخلي اسمك بصف اسمهم ..
تصف وي اخوك وابنة على بنتك ..
بنتك الي جنت تگول لو يوگفون طابور على الباب ويخطبوها ماانطيها الا للي يستاهلها ويشروط ..
تالي انت اول واحد تكسر بختها ..
وتخلي ابن سهيله ينهى عليها ..
وفوگاها يتزوج وينسعد بنتي مكسورة وكل يوم مرضة وقهر ..
اريد الله يراويني يوم بيك ..
مثل مافرفحتي گلبي بولدي اريد الله يراويك ضيمي وقهري ..
اول مرة ادعي هيج بس انت سوالفك زادن ..
ودير بالك يظالم يجي يوم ينگلب ظلمك كلة عليك ..
حاكم .. الله يطيح حظج .. تدعين عليه ولي يله وبعد لاتخابرين .. بنتج انتي الحطمتيها لمن عاندتي وردتي تنطيها الاعدائي من غير علمي ..
ياقوت .. اعرف الحجي وياك ضايع ومايفيد لجن ذيل الجلب بعمرة ماينعدل ..
طبگت التلفون بوجهة واحس روحي ردت الي اول مرة اطلع قهري بي هيج ..
يمكن لو يمي هو جان ماادري شسويت بي ..
عساه مايتوفق ان شاء الله..

اندگت الباب وشفت امير گبالي .
-هايمة شجابك ..
-ليش اجيتي لهنا يمة ..
-اخذت رقم ابوك وخابرتة ..
-هفففف استغفر الله ليش خابرتيه يمة ..
-شنو ليش خابرتة .. كل الي صارلنا من تحت راسة فوخت گلبي بي ودعيت عليه يله ارتاحيت ..
-يمة هي هاي اليردوها .. يعني هو ماانكسر گليه على بنته من زمان ترديه ينكسر گلبه هسا ..
يمة رحمة الاهلج لاتتدخلين وخلينا احنه نتصرف ..
اني اعرف شلون اخلصها من هاي النهوة ..
مو جاي نطبخهم على نار هادية ..
ياقوت .. لاتلومني كافي نفذ صبري واني اشوف بنتي تدبل گدامي ..
امير .. يمة ادري والله ادري بس عوفيها ورانا ومعليج ..
گومي هسا خلينا نمشي للبيت ..

يوسف جنت راجع من المحكمة گلت امر على امير للمعرض اشوفه ..
بقينا نسولف على قضية قيصر .. وشراح نسوي ..
خابرت سدن مافهمت شگالت بس انخطف لون امير ..
صار بالي يم درة خاف بيها شي ..
يوسف .. خير شكو صاير شي بالبيت .
امير .. قيصر الكلب ..
يوسف .. شبي ؟؟
امير .. طلع متزوج ..
گمن بسرعه ومنفعل واسب عشيرتة واهلة ونسيت امير گبالي ..
استغفرت ربي وفركت وجهي وگلتله ..
اعتذر بس هالعار طلعني عن طوري ..
امير .. لا يخوي عاد همة شلون اهل يرفع بيهم الراس
اني اعلمة هالكلب ..
فوگاها جاية مرتة تريدنا نطلعة ..
يعني لو مامسجون ماندري ..
اني رايح ..
-وين ..
-اشوف امي مشت البيت ام احمد خاف شوشتسوي ..
-واني رايح للبيت عود خابرني ..
وهذا النذل الا اخليه عبرة باجر والله ..

يوسف ..رجعت تعبان للبيت وبلا غدا .. جدي ماهو هو وابوي عدهم مشية بالحله ..
والكل نايم ..
صعدت للغرفه ..
ماكو احد ..
بدلت ونزلت ..
گعدت امي ..
هايمة اصبلك غدا ..
جا حوراء وين ؟؟
عند اهلها ..
شكو ؟؟
تريد امها تاخذها للدكتورة ..
ومن غير علمي ..
ليش ماگالتلك عبالي تدري ..
امي تحجي اني طلعت موبايلي وخابرت ..
وينج تعاي لهنا بسرعه .. صوت زايد مااريد تعاي بسرعه شوية ودخلت من الباب شافتني بالمطبخ ..
شعندج هناك ..
زينب هنا جاية ورحت يمها وعندي مراجعه للدكتورة گلت فد مرة تاخذني ماما ..
واني شنو رجل كرسي بالبيت ..

ليش اني شايفتك شو من الدوام تجي تاكل وتنام وبالليل تطلع ماتجي لل11 وترجع تنام وهكذا ..

وتردين اخذ اذنج مثلا .. وماعندج موبايل تخابرين وتگليلي اريد اولي الامي ..

گلت خاف ماحافظ رقمي مثل الحلقه المشمورة بالكومدي وماتلبسها ..

السانج ولج ..

انت شتريد مني گلي .. ترى ماجبرتك تاخذني انت الخطبتني وحدي وهسا ماتريدني ولاتتقربلي ..

ام يوسف .. عيب ياامي هاي شغلات بينكم .. اصعدوا فوگ وتفاهموا وانتي حوراء رجلج عيب تعلين صوتج

التفتت على امي ..
اصلا انتي تكيفين يعوفني وياخذ ذيج الحية .. ادري بيج ماتحبيني وماترديني لهذا تطلعين اخطائي وتسترين الابنج ..

عصرتها من ايدها حيل .. اذا حجيتي وي امي بهيج صوت وهيج لهجة ماتلومين الا نفسج ..
وهسا يله ولي من وجهي والغرفتج حتى طبيب ماكو ولاطلعة ولا حجج ماسخة ..
شئتي ام ابيتي اني رجلج وغصب عنج تاخذين اذني يله تطلعين ..
صعدت وهي تدردم وبس بهاي انت رجلي وبغير شي عبالك غريبة اني ..

ردت اصعد اربيها بس امي لزمتني وماقبلت ..
وطلعت بيبيتي ..
شبيكم يمة تتهاوشون وانتو بعدكم عرسان ..
يوسف .. الواحد يجي تعبان وتتلگاه المصايب من كل جهة
ام مرزا .. بس يمة البنية هم حقها .. انت ابني مو غريب حتى لو جنت مارايدها بس هسا صارت مرتك . ولازم تراعي الله بيها ..
اني اشوفك حتى جلمة طيبة ماتسمعها ..
والمرة ييمة مثل الطفل تقنع بضحكة وبتفاحة لو نستله تتقشمر بكلشي ..
يوسف .. بيبي خلي تحترم وماتطول السانها وبعدها تطالب بحقها ..
هي لو تفكر عدل جا عرفت شلون تكسبني بس هي عقلها طاير وي امها ..

ام مرزا .. عوفها الي واني احجي وياها بنت فطيم ..
ام يوسف .. تعال يايمة تغدا هاي حميتلك الاكل وصبيتلك بيدي ..
يوسف .. عاشت ايدج يمة ..
ام يوسف .. صدگ يمة طلع قيصر متزوج ..
يوسف .. اي النذل الحقير والله الا اندمة ..
ام مرزا .. يمة ذولة شرانيين لاتنطخ بيهم خلي يولون .
وبعدين حتى لو تزوج .. عبالك تنفك النهوة .. لايمة اني بنت عمي الحد ماماتت والنهوة ملازمتها ..
وهو تزوج ثلاثة ومافك النهوة عنها ..
يوسف .. شو شگد طلعنا ومشينا وي جدي ماشفت هيج البنية تنظلم علمود رجال ناقص غيرة ..
ام مرزا .. هاي العشاير يمة .. اكو تصير مجاتل بينهم وهذا ينهى وذاك ينهى ويتجاتلون ..
ام يوسف .. يايمة سترك ..

يوسف .. بقيت اليوم كلة مقهور وافكر بحال درة ..
ماردت اصعد الغرفتي جازة روحي منها ..

طلعت برة اتمشى ..
اجة ولد جيرانا يمنة وگعدنا بالباب ..
جاب نرگيله واجة ..
جاي نسولف ..
گال اجة اليوم ولد شاب يسأل على بنية بالمنطقه يمكن يريد يخطب ..
بس الي عجبني گال عندها اخو اسمة امير وعندة معرض سيارات ..
بس يمكن مايندل البيت الجديد الهيج اجة سأل عنها هنا
بس الشارع كلة مدح بيهم وگالوله الشيخ مجبل يصير جدها ..
بس گال اريد عنوان عمامها ومحد يعرفه ..

الولد يحجي واني بركان يطلع مني منو هذا وشلون عرفها ..

بقيت اروح وارجع ..
ومااحس الا رجلية تاخذني البيت امير ..
دگيت على سدن ..
گالت درة نايمة تعبانة ..
وعمتي تخبز ورى البيت ..

يوسف .. والولد ؟؟
سدن .. ماهمة ..
يوسف .. اي زين افتحي الباب بسرعه وروحي يمة عمتي لهيها ..
سدن .. ليش انت وين وشتريد تسوي ..
يوسف .. مثل ماگتلج لاتضيعين وكت ..
سدن .. استر علية لايجي امير او واحد من الولد شتريدني اگلهم ..
يوسف تفتحين لو ادگها ..
فتحت الباب اشرلي اروح يم عمتي ..
اشرتله مو يتأخر ..

يوسف .. دخلت على كيف .. جان البيت معطر وبي برودة تنعش ..
گمت اشم عطرها بي ..
فتحت الباب نايمة ملاكي ..
شعرها مبعثر ولابسه تراك ونايمة على بطنها بحيث شعرها مغطي وجهها كلة ..
اتقربت وجانت اول مرة اتجرأ هيج ..
نسيت الحلال والحرام كله ..
قرفصت گبالها وسحبت شعرها عن وجهها ..
ردت اتلمس وجناتها بس ماگدرت ..
شي يمنعني اتقرب الها ..
حست بانفاسي او يمكن گلبها حسها .. فتحت عيونها فزت بسرعه ..

درة .. جنت تعبانة وبجيت هواي .. رحت لفراشي وكالعادة النوم صار سبيلي الوحيد للهروب ..
واني غافية حسيت بشعري انسحب من وجهي عبالي سدن لان هاي سوالفها مرات تخلي طرف شعري بخشمي حتى تضوجني ..
بس العطر هو الي خلاني افتح عيوني .. هذا العطر شامتة قبل بساع ..
فتحت عيني عبالي احلم ..
من شفته فزيت ..
شتسوي هنا ..
گمت ادور شي استر شعري بي ..
گام هو بسرعه وسد الباب وسحب من ورى الباب معلگة شالات .. اخذ شال وشمرة عليه ..

درة .. شعندك هنا ..
يوسف .. ماادري شنو الجابني بس اريد اسألج سؤال
منو هذا الي يسأل عليج بالمنطقه ويريد يخطبج ..
درة .. مافهمت شتقصد يوسف اطلع لايجي احد يشوفنا
يوسف .. وياج بالجامعه مووووو ..
درة .. بقيت صافنه تالي اجة مهيمن ببالي. . اكيد هو ماكو غيرة لان صار فترة يلح على عنواني ..
گتله ..
وافرض من الجامعه ليش ضايج ..
يوسف .. لاتخبليني شنو ليش ضايج انتي درتي الي مستحيل تصيرين الغيري ..
درة .. هههههه درتك راحت من يوم الي عقدت بي على غيرها. وبعدين انت شگد اناني . مو متزوح وعندك مرة جاي وراي ليش ..
يوسف .. معقوله نسيتيني هيج گلبج بسرعه حب غيري
درة .. تعرف كلش زين مو من حقي احب واتزوج لان اكو نهوة وراي تكسر سعادتي بكل مرة ..
بس اذا اكو شخص يحبني ومستعد ينتضرني ليش مااقبل اقبل ..
يوسف .. لاتخبليني درة ادري بيج تبسمرين عليه لان عفتج بس والله مجبور مجبور ..
درة .. هذا الشي راح وانتهى مامستعدة اسمع كلام عنه . بس شغله وحدة اريدك تعرفها لو اني بمكانك مستحيل انجبر واخذل الانسانة الاحبها ..
وهسا اطلع يله ..
ردت افتح الباب طبگها وتقرب عليه عيني بعينة ذايبات فضحني عيوني بنضرتهن ..
گلبي وايدي وكل جسمي يرجفن .. شگد مااحاول اكابر وابين قوية هن يخذلني ويصفن وياه ..
ماردت اضعف .. دفعته وردت اطلع فتحت الباب ..
صار بوجهي علي وزينب جايين ..
اصفر وجهي وارتبكت طبگت باب الغرفه بسرعة ..
زينب .. شبيج ليش خايفه ..
درة .. ها مابيه هسا گعدت من النوم ..
زينب .. جا ليش لابسة حجاب ..
درة .. الحجاب اي مو ردت اطلع بالطارمة يم امي وگلت خاف احد بالسطوح صاعد ..
علي .. امير گالي على هذا النذل متزوج ..
زينب .. منووو
علي .. قيصر متزوج طلع ..
زينب .. يعني شنو معناها النهوة انتهت اذا تزوج .
درة .. وليش ضجتي ترديني ابقى عمري كله هيج
زينب .. لا موقصدي ..
علي .. لا ماتنفك بس ياريت اكو طريقه نفكها ونرتاح يله خلينا نصعد ..
صعدوا وزينب جانت عينها على باب غرفتي وعبالك حاسة اكو احد ..
لو شايفته جان يوم القيامة يصير علية.
اول ماتأكدت دخلوا الغرفتهم ..
فتحت الباب بسرعه وگتله .. اطلع بسرعه وبعد لاتسويها اترجاك ماناقصه مصيبة انت متزوج انساني بعد ..
طلع بسرعه وگال .. صعب انساج اعذريني ..
اول ماطلع بالباب ..
صارت امي بوجهة ..
انخطف لوني وغمضت شيخلصني اليوم وزينب اصلا شاكة ..
يوسف .. شلونج عمة ..
امي بقت صافنه بوجهة بالدقايق وگالت ..
انت منوووو ورايد من ؟؟

يوسف واني وسدن بقينا صافنين واحد بالثاني ..
معقوله ماعرفته ..
ياقوت .. انت قيصر ياعمة شجابك وشلونها عمتي الحجية يوسف .. هااا زينة ..
ياقوت .. سلملي عليها .. اوگف اوگف هي تحب خبزي وخاصه خبز باللحم ..
هاك هاي اربع گرص اخذهن الها ..
اخذهن يوسف وطلع واني دموعي نزلن وحدهن ..
اباوع السدن مصدومة اكثر مني يمكن اول مرة تمر بهيج حاله گدامها ..
دخلت امي غسلت وگالت اروح اسبح واتحضر للصلاة قبل لايأذن اقرأ قرآن ..
اني دموعي مابطلن بجي .. شنو الي يصير بأمي وليش هيج تنسى وتتذكر بيبيتي هواي ..
سدن .. ولج درة فهميني شيصير عمتي شبيها ..
درة .. علمي علمج ماادري ماادري بس هاي مو اول مرة سبق ودخلت للغرفه لگيتها تحجي وحدها ..
ومرة من سقطتي انتي خابرت عليها تگلي انتي منووو
امي مو طبيعية سدن ..
سدن .. هسا شلون نگول الامير .. وخاف يسأل وين شافته اليوسف ..
درة .. ماادري بس لازم يعرف ..
كل مرة جنت اگول شغله عادية من التعب لو قهر ..
بس هسا لا يختلف مااتذكرتة ابد ..
سدن .. راح اگله اجة يوسف يشوفني من الباب وعمتي شافتة وماعرفته ..
درة .. اي وخبري يوسف هم ..خاف يختلف الحجي ..
سدن . اي هسا ..
خابرت على يوسف بالاول ..
الو يوسف خاف يصير حجي انت اجيت تشوفني من الباب وطلعت وعمتي اجت من ورى البيت جانت تخبز شافتك وماعرفتك وعبالها قيصر ودزت بيدك خبز العمتها ..
يوسف .. اگلج اني هم استغربت شبيها عمتي ..
سدن .. ماادري هو اريد اخابر امير واگله ..
يوسف .. وهذا الخبز وين اوديه ..
سدن .. اكلة وين توديه ..
يوسف .. هو هم هيج لان ماقاومت ريحته طيبة .. بس انتي طمنيني على عمتي ..
سدن .. اي يله روح ..
درة .. هااا شگال ..
سدن .. مستغرب مثلنا وحاير بالخبزات ..

درة .. دخابري امير واني اروح اشوف امي ..
رحت لگيتها تمشط بشعرها ..
درة .. امشطلج اني ..
ياقوت .. اي والله علواه ادية يوجعني من الخبز مدري كبرت ..
گعدت يمها وشعرها جان مبلل ..
الجو بعدة بارد خلي انشفه الج ..
نشفته واخذت المشط وامشطلها .. واتقربت منها اشمة ودموعي ينزلن ..
خايفه عليها مدري ليش .. مااعرف شنو بيها بس گلبي مامطمأن ..
حست بيه گالت .. ليش يمة دومج مهمومة .. اذا تحبيني بعد مااريد عيونج يدمعن ..
درة .. مو بيدي يمة ..
ياقوت .. بعدج صغيرة وحلوة والف واحد يتمناج .. بس انتي لاتيأسين من رحمة الله ..
درة .. والنعم بالله .. احجي بداخلي ..
بس هالمرة ماابجي على حظي لو قسمتي .. هالمرة الوجع اكبر يمة ..

كملت تمشيط گالت روحي وي نسوان اخوانج جهزن العشا لايجون جوعانين ..
بين مااقرأ قرآن واصلي ..

عفتها وطلعت .. مسحت دموعي نزلوا علي وزينب ..
شافني اجة ..
شبيج حبيبتي ..
درة .. تعال للبراني مو هنا ..
رحنا للبراني وزينب ماعافتنا ..
گلتلها زينب من رخصتج عندي حجايه وي اخوي ..
باوعتلة گالها روحي يم سدن ..
عوجت حلگها وطلعت ماعجبها الحجي ..

علي .. شكو قلقتيني قيصر مسوي شي جديد..
درة .. هالمرة الشغله اهم .. لاقيصر ولايوسف ولاالدنيا كلها تهمني بعد ..
هالمرة امنا علي .. امنا ..
علي اصفر وجهة .. شبيها امي لاتخوفيني وراد يروحلها ..
سحبتة من ايدة .. وسولفتله كلشي هو يسمع ومامصدگ علي .. يمعودة خاف متوهمين امي ماتنسى اصلا مرات تتذكر اشياء بطفولتنا بشكل دقيق ..
درة .. اي اني وياك لهذا مااهتميت النسيانها كل مرة بس هسا غير ..
اتقربت يم يوسف بالباب وشافته وصفنت بوجهة وبهدين گالتله انت قيصر وسألته على عمتها وانطتة خبز باللحم الها ..
فرك وجهة .. دخيلك يارب دخيلك ..
دخلوا امير وحيدر ..
السمعناه صدگ ..
درة .. اي صدگ بس تدرون بأمي حساسة لاتخلونه نحسسها ومانريد احد يدري ابد ..
امير .. هسا ردت احجي اي ان كان ماتگلوله فاهمين بين مااقنعها شلون ماجان واخذها الطبيب ..
علي .. يعني سدن ماتدري ..
امير .. خاف احجي وتگول ينحاز المرتة .. اني وانت نعرف سدن مستحيل توصل شي الامها..
بس انت تضمن زينب ماراح تخابر امها وتگلها وامها ماشاء تحب امي ..
هاي اذا ماحجتها بوجهها وصدمتها ..
علي مو وكت عواطف هسا امي اهم .. واذا سمعت الشغله طالعه ماتلومون الا نفسكم ..

طلعنا للعشا .. كلنا گاعدين وعيونا مافارگتها هي تاكل وتحجي بشغلتي وي امير وشايله همي ..
زينب مااعرف شلون سمعت يوسف جاي وبقت تحوس تريد تعرف شعندة جاي ..
سدن .. غير اني اخته واجة يسأل عليه لو حرام ..
شلنا الماعين جاي اصفي بيهن وهي تغسل ..
گالت ماعبرت عليه السالفه تعرفين بي راح يجي لهذا لبستي حجابج موووو
درة… ههههههه ادري ماتصدگين بس اني انتهت علاقتي بي من يوم الي خطب اختج ماعاد يهمني ارتاحي
زينب .. ايييه بعدين كلشي يظهر ويبين ..
خلي اكمل بسرعه واروح ادرس تعرفين سادس اني وماالحگ ..
غسلت الفرفوريات كالعادة وعافت الصينية والخواشيك والنواعم ..
كملت تنضيف ورحت للغرفه ..

مر كم يوم واحنه مراقبين وضع امي وماكو شي ..
حتى يوسف يخابر سدن وسألها .
بس سدن گالتله ماكو شي من التعب وسدت الموضوع ..
مهيمن نضراتة مافارگتني ..

بيوم رجعت من الجامعة خابرت هلي ..
گالت سمعت مهيمن راح يدز امهاتة اليوم..
درة .. تحجين صدگ..
هلي .. اي والله اليوم من طلعنا لاگاني بالموقف وگال ياليت تنطين خبر الدرة لان ماگدرت احجي وياها تصدني

درة .. هذا اكيد تخبل . ولو احسن خلي يجي ونگلهم ع النهوة وخلي ارتاح ..

رحت حجيت وي امي .. احسها فرحت
وزينب گالت راح اسوي كيك وضيافه فشله ..
حتى بقينا مستغربين وصافنين اني وسدن ..

ساعه اربعه اندگت الباب ..
دخلن ثلاث نسوان واثنين بنات ..
سلمن وصاحتني امي ..
اني مابدلت لبست گلبيه ورافعه شعري حتى كلشي ماخليت الوجهي لان فعلا مامهتمة ..
من شافني صلن ع النبي ..
وعرفني عن نفسهن ..
البنات اخواتة وامة هم بعدهي صغيرة مو جبيرة كلش ومعلمة ..
والبقية عماتة ..
سولفن وگالن مهيمن خابصنا لو هي لو مااريد ..
وهسا هذا عنوانة واسألوا ..
امي اخذتة وگالتلهن الي بي خير يصير .. بقيت صافنه اشو امي ماخبرتهم ع النهوة ..
گالتلهن اسأل اخوتها احنه عمامها وابوها ترى مقاطعيهم من زمان فالحجي بيد اخوانها ..

سلمن وطلعن وامي ماحجت ..
درة .. يمة شو ماگلتي شي ع النهوة ..
ياقوت .. يانهوة خلي تفيدهم مثل ماهو تزوج وشاف حياتة انتي هم تتزوجين واذا الولد زين وحباب نزوجكم ومانگول مثل ماهمة سكتور وماحجوا ..
درة .. بس يمة هيج معناها غشيناهم واذا عرف ابوي وعمامي خاف تصير مشاكل ..
ياقوت .. قيصر وبالسجن بعد منو يحجي ..
مااهتمت وگامت ..
زينب .. والله اني وي عمتي قسمة مبينة زينة ماشغتيهن شلابسات .. والولد ميت عليج مبين ..
درة .. زينب تحجين صدگ لو تردين تخلصين مني
زينب .. قابل گاعدة بييتي واريد اخلص منج .. لو عندج شي الهيج ترفضين ..

اجو اخواني وماقبلوا على رأي امي .. وگاللها الافضل انه يعرفون واذا يردون يستمرون او لا بقت يمهم ..

مرت ايام واجة مهيمن ضايج ..
-ليش ماگلتي ناهي عليج ابن عمج ..
-وليش اگلك ..
-الهذا السبب رفضتيني .
-مهيمن اني سواء اكو نهوة او لا ماافكر بالزواج ..
-لازم ببالج خطيبج الي تخلى عنج وتزوج بسبب النهوة بس……
-انت منو وتحكم عليه هيج .. حياتي مامتوقفه على رجال ترى عندي مستقبلي اهم ..
-انطيني فرصه اني مو مثلة اني مستعد انتضرج واودي ناس الابوج وعمامج واقنعهم بأي طريقة ..
-اعتذر مااگدر احجي وياك اكثر عندي محاضرة ..
عفته وگمت صح ضرب الحقيقه الموجعة بوجهي بس صحاني ..
ليش مخلية حياتي متوقفة على الزواج .. اكو اشياء اهم نجاحي ومستقبلي اهم من كلشي ..
هلي بقت تحاول تقنع بيه وتگلي انطيه فرصه بلكي يگدر يقنع ابوج ويمكن هو قسمتج واذا على يوسف راح تنسيه لمجرد ماتتزوجين وتعيشين حياتج ..
درة .. ماادري هلي لاتضغطين عليه .. او مااريد اتامل ع الفاضي ..
هلي .. لاتتأملين خلي يروح ويحاول بعدها قرري ..

كلام هلي خربط عقلي رغم اعرف گلبي مايحب ولايحب غيرة..

رجعت من الجامعه ..
شفت امي ماهي .. صعدت السدن ..
گالت اتخربط وراسها يأذيها واخذها امير بحجة جيك ..
درة .. وهسا ..
سدن .. لاتخافين قنعها يعرف سبب الالم بس هو راح يحجي بينة وبين الدكتور ويگله على شغله النسيان ..
بقى بالي يمها ..

للمغرب يله رجعوا ..
ها يمة شلونج ..
يمة كلشي مابيه شبيكم تخبلوتوا تلگين الضغط يرتفع ويوجعني راسي ..
اشرلي امير اسكت ..

تعشينا وكملنا واني احوس اريد اعرف شصار ..
ماصدگت امي نامت وركضت الغرفة امير ..
امير فهمني شكو ..
امير .. ماگدر يشخص بس سوالها تحاليل وحولها مفراز ورنين ..
بس كلامة مايطمن . گال هذي اعراض الزهايمر المبكر
لكن نتأكد احسن لان عمرها صغير مو مال زهايمر بهيج عمر ..
درة .. لا يربي كون كلشي مابيها .. زين هذا الزهايمر يخليها تنسى ..
امير .. اسم الله اذا تقدمت الحاله ماتعرفنا كلنا ..
گمت ابجي واشهگ لا يربي لا مااگدر اتخيل امي ماتعرفني اموت والله ..
امير .. اشششش تعاي الحضني حضني ونزلت دموعه على خدي ..
لازم نصير اقوياء .. صح مو هينة وصعبة بس لازم مانبين الها ونبعد القهر والنكد عنها ..
اصلا الدكتور يگول الحاله النفسية اهم بهيج حاله ..

بقينا ننتضر النتائج وبعد ماطلعت شخص الدكتور الحالة
بس امير مااقتنع ..
ورغم سوء الوضع راح البغداد وعرضهن على دكتور اخصائي بالجمله العصبيه ..
وكان التشخيص .. زهايمر بمرحلة مبكرة ..
امير .. وماله علاج ..
الدكتور .. للاسف نگدر ننطي مضادات ومهدئات لكن مانگدر نقضي عليه ..
الاهم تخلوها بحاله نفسية جيدة وماتصغطون عليها ومن تنسى ماتبينون الها يعني تتغاضون وكأنه ماسمعتوا ..
امير .. زين راح تنسانة ..
الدكتور .. انتو يمكن تتأخر يله تنساكم لان غريزة الامومة تمنع العقل من النسيان .. ولان عايشين وياها من فترة طويله ..
هي راح تنسى الامور الجديدة او الحديثة بحياتها فقط .. وبعدها بالتدريج تنسى ..
كأنه ترجع حياتها بالعكس الى ان توصل المرحلة الطفوله وماعاد تتذكر شي ..

كان كلام امير النا عن لسان الدكتور مثل الصاعقه بحياتنا ماردت اصدگ واقتنع بكلشي گاله الدكتور ..
وبقيت مصممة ع الرفض ..
جنت اكتم خنگتي وبواجي وابجيهن بعيد عنها ..
مو بيدي مااتحمل كلما اتخيل بيوم تنسانا انجن واتمنى الموت عليه اهون ..
قررت اخلص عمري كله برعايتها واقضي وقتي وياها حتى ماتنساني ..

بقلمي_الكاتبة_شمس
يتبع ..

[لامارا]

//// البـارت الثانـي والـثلاثـون ////
عجـاف_القلـوب ..
الكاتبـة_شمـس ..

كنت اداوم وبالي يم امي .. ماكو لحظة غابت بيها عن عقلي ..
هلي .. شبيج درة صار فترة مو على بعضج حتى بالمحاضرة ملاحضتج ..
درة .. لا مابيه بس امي هالفترة مريضه وشاغله بالي
هلي .. خطيه الله يشفيها ان شاء الله..
درة .. امين رب العالمين ..

السلام عليكم ..
رفعت راسي شفت مهيمن ..
گمت .. وعليكم السلام .. من رخصتك عدنا محاضرة
وگف گبالي ..
درة ليش هيج وياي .. ترى اني شاريج ورايدج بالحلال
درة .. بس اني سبق وان گتلك ماافكر بالزواج ..
مهيمن .. بسبب النهوة مووو
درة .. لا مو بسببها بس اني حاليا ماافكر .. الاهم عندي دراستي وبس ..
مهيمن .. مستعد انتضر بس ع الاقل انطيني امل ..
درة .. من رخصتك .. يله هلي ..
هلي .. شبيج جافه وياه هيج .. الولد مبين كاتل نفسه عليج لو اني هيج واحد يجيني مستحيل ارفض ..
درة .. صعب تفهميني واكيد تگولين متبطرة بس سالفه الزواج ماببالي نهائي ..
هلي .. دضلي لمن يفوتج القطار .. والنهوة تاخذ من عمرج وتبقين وحيدة .. ادري كلامي يضوج بس هاي الحقيقه ..
درة .. بالعكس مااضوج لان عندي ابقى وي امي واباريها احسن من اخلص عمري وي شخص مااعرفه ولااريدة ..

رجعت للبيت تعبانة ..
شفت امي فرحانة وعلي طاير من الفرح ..
شكو ..
علي .. زينب حامل ..
درة .. صدگ مبروك حبيبي وحضنته ..
علي .. ماصدگت من ابو التحليل گالي مبروك اكو حمل جنت خايف ..
درة .. الله يفرحكم بجيته بس ترى سنة ماصارلكم لويش خايف ..
علي .. اريدهم يكبرون وياي وبعدين زينب جانت تتمنى الحمل وهسا فرحانة ..
درة .. وين هي خليني اباركلها ..
علي .. وديتها الاهلها مناك رادت تبشر اهلها ..
درة .. بس دير بالك عليها مو كل يوم رايحة راجعه هم الطسات مو زينة عليها ..
علي .. لا بس اليوم ولان ظهر گلت للعصر اروح اجيبها اني صاعد ارتاح شوية ..
وها عشاكم عليه اليوم لاتسون عشا ..
ياقوت .. الله يفرحني بيهم واشوف اولادهم .. واولاد حيدر واولادج ..
گعدت يمها وبوستها .. اني قررت مااعوف هالحضن واتزوج ..
ياقوت .. جا تبقين كل عمرج وحيدة ..
درة .. شلون وحيدة وعندي ام مثلج واخوان مثل اخواني
واشو اني هالايام اشتهيت ارجع الطفولتي وانام بحضنج ..
ياقوت .. ههههههه دروحي بدلي وتغدي وعود تعاي نامي بحضني ..
درة .. طلقه مااتأخر ..
بدلت ورحت للمطبخ صبيت غدا ..
نزلت سدن ..
جان وجهة اصفر وتتوجع ..
هلو سدون شبيج حبيبتي ..
سدن .. ماادري احس بمغص موتني ..
درة .. ليش هسا شگد عليج ..
سدن .. اصلا خلصت شهري ودخلت بالعاشر .. عود باجر جمعه واراجع اشوف وضعي بس اليوم من الصبح لسا نفسي تلعب ومغص موتني ..
درة .. ماشفتي امي ..
سدن .. هو اني رايحتلها حتى اذا ولادة اخابر امير يجي ياخذنا ..
درة .. ياالله اليوم الاخبار الحلوة كلها تجمعت .. زينب حامل وانتي حتولدين ويشرف كروري النا ..
سدن .. ليش زينب حامل شو ماادري ..
درة .. هسا علي گال هستوهم محللين ..
سدن .. ااااخ بيها الخير خلي اروح العمتي اسأالها راح اموت ..
درة .. واني جايه وراج ..
درة .. ماما ماما .
جانت متمددة ع الجرباية ..
فتحت عينها ..
سدن .. عمة عندي وجع موتني مدري شبيه ووساخة توگع عليه يصير راح اجيب ..
ياقوت .. انتي ياهي .. ومنين حامل ..
بقت سدن صافنه والوجع كاتلها ..
درة .. يمة سدن مرت امير حامل وهسا عندها الم ..
ياقوت .. ليش امير تزوج وماگالي شوكت هاي .. حسيتها انهضمت وضاجت ..
وعبالك مثل الصدمة صابتها ..
سدن طلعت برة تخابر امير وتبجي من الوجع ..
واني بقيت صافنه على امي الي تبجي وتلوم بأمير لان تزوج ..
رحت جبت دواها وماي وگلتلها هاج ماما اخذي علاجج
ياقوت .. شني هذا . مااخذ
درة .. هذا حب الضغط مالج ..
اخذتها وبلعتها ..
رجعتها لفراشها ونومتها ..
كل مرة تجيها نوبة النسيان اتدمر ومااتحمل .. يمة عقلج جان يوزن بلد شبسرعة هيج صرتي ..
دخل امير وجان مرتبك .. لا سدن تبجي وتصيح من الالم بدأ يزيد واني عفتها والتهيت بأمي ..
امير .. شبيها امي سدن گالت نستتني ..
درة .. امير ملاحظ نوبات النسيان جاي تزيد عندها .. احس هالمرض جاي يستعجل بيها ..
امير .. اشششش لاتحجين يمها مو گلنا مانضعف .. خليج يمها انتي واني راح اخذ سدن وامر على خالتي ام يوسف ونطلع للمستشفى ..

درة .. اوگف خلي اجيب جنطة الطفل وملابسها ..
سدن .. كلشي محضرة من الصبح . امير تلگيهن ع الجرباية ..
امير .. والفلوس وين ..
سدن .. بالكومدي ..
درة .. سدون اعذريني جان رحت وياكم اني بس امي
سدن .. لا درة عمتي اهم .. والله كسرت گلبي قبل شويه بس الالم موتني هالطلعت من الغرفة مااتحملت
نزل امير وراه علي ..
علي .. اروح وياكم ..
امير .. انت روح للمعرض بمكاني وخابر حيدر يجيني وين صار لسا جامعتيش هاي ..
درة .. اموري طمني وخابرنا .
امير .. ان شاء الله بس خلي بالج على امي ومن تگعد خابريني ..
طلعوا والبيت صفيت بس اني بيه ..
گمت نضفت البيت كله وغسلت المطبخ ردت شي يلهيني وماادخل الامي واگابلها وابجي ..
بالاول يوسف ماعرفته وهسا سدن وماتتذكر زواج امير بعد شنو الي راح يصير ..
انفتحت باب الغرفه ..
هايمة درة شتسوين ..
درة .. انضف البيت وعطرتة خاف سدن تجيب وكلها تجي
ياقوت .. ليش وينها سدن ..
درة .. صار عندها مغص واخذها امير ..
ياقوت .. وليش ماگعدتوني .. شلون تخليها تروح وحدها شيگولون اهلها مو عيب وفشله ..
وين جواريبي ..
دخلت للغرفه تدور .. لبست حجابها ..
درة .. يمة وين رايحة خاله ام يوسف راحت ..
ياقوت .. يع وشيگولون ماعندة ام .. اذا مااشوف ابن ابني واخليه بحضني ماارتاح ..
ولج وين جواريبي صار ساعه ادور ..
درة .. هاي جواريبح ع الكومدي .
ياقوت .. اووورف الجواريب گبال عيني وماشفتهن من وراكم هي هاي سواية تسووها ..
درة .. زين اوگفي يمة خلي اخابر حيدر يجي ياخذج ..
ياقوت .. وشبيه اني اخذ تكسي منا وامشي .. شيصبرني لمن يجي حيدر ..
خابرت امير .. الو امير امي گعدت وگلتلها على سدن وهسا تريد تجي وحدها وماتاخذ حجي وشلون اخليها تروح وحدها خاف…
امير .. هسا ادز حيدر الها حاولي تأخريها ..
بقيت احاول وياها وگلتلها امير يگول لاتطلع ومايقبل
وبالگوة يله قبلت تنتضر ..
اجة حيدر ويوسف بسيارتة ..
رحت لبست حجابي واجيت ..
ياقوت .. وين صرت يمة واني بالي يم مرت اخوك ..
يوسف .. شلونج عمة وجانت عيونة علية ..
ياقوت .. هلا يمة هلا يله امشونا ..
يوسف .. ودرة تبقى وحدها ..
درة .. وشعليه ..
يوسف .. لا خلينا ناخذج البيتنا ..
ياقوت .. يمة وين نلحگ اني مستعجله ..
يوسف .. جا جهزي روحج بين مااوصلهم وارجع اخذج الاهلي ..
درة .. لا ماكو داعي اني اقفل الباب واگعد شعليه ..
يوسف .. اوصلهم وارجع ماكو نقاش ..

بقيت صافنة على جرأتة وكلامة ..
ومااهتميت اله ..
نص ساعه واندگت الباب .. عبالي رجعوا ركضت للباب ..
فتحتها صار يوسف گبالي ..
بقيت مصدومة ..
يوسف مو گتلك لاتجي ليش اجيت ..
لو تستغل اهلي ماكو ..
يوسف .. وهيج ناقص بنضرج اني واستغلج .. يله بدلي وامشينا ..
درة .. ماامشي روح ..
يوسف .. لاتعاندين لااخذج بدشداشتج هاي ..
درة .. وانت هم الك عين بعد وتجي وتحجي وياي .. اترجاك اطلع مااريد اروح هي گوة ..
يوسف .. الهاي الدرجة كارهتني ..
درة .. لو اكرهك معناها اكو مشاعر اتجاهك .. بس اني ماعندي اي مشاعر تربطني بيك ومااهتم الك لهذا لاتحاول كل مرة تذكرني ..
يوسف .. بس اني بعدني احبج درة ..
درة .. ههههه وفر حبك هذا المرتك .. انت بعد ماتعنيلي شي ولاتنسى اني راح انخطب
ضرب ع الباب حيل .. المنو الهذا بالجامعه مووو ..
ادري بيج تردين تغيضيني .. والا اعرف عيونج مايشوفن غيري ..
درة .. وليش مايشوفن غيرك .. اعتقد الخلقك خلق غيرك ويمكن الله راد يعوضني بأنسان ينتضر وراح يسوي المستحيل وياخذ مشيات الابوي حتى ينهي النهوة وساعتها ماكو شي يمنع ..
يوسف .. لاتختبرين صبري درة . مستحيل واحد ياخذج غيري .. اثنينا مانگدر نحب غيرنا لاتكابرين ..
درة .. ههههه وانت منو هااا انت منو واكابر الحبك . انت الي بعتني ونسيتني وتزوجت وماگدرت تنتضر وباول فرصه اجتك اخذت بنت عمك ..
يوسف اني مو حوراء .. اني درة وكرامتي عندي فوق كلشي حتى لو كان گلبي ..
وهسا اطلع وانساني احسلك ..
يوسف .. جذابة ..
درة .. شنووو
يوسف .. لو نستي صدگ جان نزعتي الگلادة الي لابستها برگبتج .. وهذا اكبر اثبات انتي تحبيني ..
غطيت رگبتي بسرعه ..
مااتحملت نضرتة الي وضحكتة للحضة ردت اضعف واگله اي مانسيتك والگلادة هاي هي الي مصبرتني على فراگك ..
بلحضة غضب سحبتها من رگبتي وانطيتها الة ..
تفضل .. هي هاي الي مخليتك تصدگ اني بعدني احبك هاك ماعادت تلزمني وماتهمني ..
منا وانگطع كلشي بينا ..
وهسا اطلع ..
راح اخابر علي يجي يمي ..
اطلع لايجي احد او يشوفنا احد من الجيران وتطلعلي حجايه ..
طلعتة وسديت الباب ..

رجعت للبيت اندگت الباب ..
اكيد هو رجع مااتحمل كلامي .. بس خليه ينسى لازم اقسي گلبي عليه ..
اندگت الباب زايد ..
اووووف يوسف ..
گلت منووو
اني علي ليش قافلتها افتحي ..
فتحت الباب ..
علي وزينب .. وجانت نضرتها غريبه وتخزر بيه ..
درة .. مبروك ع الحمل ..
زينب .. الله يبارك بيج .. يوسف جان هنا ..
درة .. هااا اي وصل امي للمستشفى واجة عود ياخذني البيت الشيخ حتى ماابقى الوحدي وگتله مااروح ..
زينب .. بس
درة .. شتقصدين ..
زينب .. ماادري والله
علي .. شنو هالحجي زينب ع الاقل احترميني واگف شنو بس ..
زينب .. شبيك علي .. يعتي درة وحدها البيت شعندة جاي لهنا ويدري وحدها مايخاف على سمعتها ..
درة .. گتلج اجة ياخذني البيت الشيخ وماقبلت وبعدين من الباب وطلع بعد شنو هالحجي ..
علي .. زينب سدي الموضوع اذا انتي ماعندج ثقه بأبن عمج اني عندي ثقة بأختي يله ادخلي گدامي ..
زينب .. يعني طلعت اني الغلطانة .. اولا يوسف يصير رجل اختي وشي طبيعي اسأل وخاصه ماكو نار بدون دخان ..
علي .. احترمي نفسج وادخلي لاتخليني انسى انتي حامل واتصرف وياج غير تصرف ..
زينب .. يعني شتريد تضربني .. بعدني باول حملي وهيج تعاملني بسبب اختك الله العالم شتسوي بيه بعدين ويجي واثبتلك كلامي واعرفكم باختكم المغشوشين وخابصينا بيها ..
دخلت وهي تبجي ..
درة .. علي والله ماعندي شي وياه واصلا نهيت علاقتي بي من يوم الي تزوج ..
علي .. اعرفج حبيبتي لاتبررين .
دخلنا لجوة .. التهيت بالعشا وعلي صعد ودور سمعت اصواتهم تعاركوا ..
اووووف كله بسببك يوسف ..

يوسف .. طلعت واني عيني ماتشوف من الغضب . گلادتها بيدي .. بقيت صافن عليها ..
قربتها الخشمي واشم بيها واخذ نفس . احس كل عطرها موجود عليها ..
خابرني امير .. گال راح يسون عمليه السدن تعسرت ولادتها ..
حركت سيارتي ورحت للمستشفى..
بقيت يمهم وبعدها اجة ابوي وجدي رغم مريض .. بس جان فرحان لان راح يشوف اول حفيد اله ..
بعد ماولدت سدن .. الفرحة ماسعتنا .. جابت الممرضه الطفل وگالت منو ابوه ..
مبروك ..
بس نريد بشارتنا ..
امير مامصدگ بقى يشمر فلوس وهن ماشاء الله تكاثرن مدري منين يطلعن ..
صاح امير الممرضة وانطاها فلوس وگالها .. ديري بالج على مرتي ..
اخذ جدي الطفل وكبر بأذنة وگالة. انت اسمك كرار .. اسمك كرار ..
ويبوس بي ..
امير ماشاف ابنة وجان مگابل غرفه العمليات ومنتضر
عمتي وامي اخذن الطفل وصعدن للغرفه ينتضرن لان مخليها بالخاص وغرفه وحدها ..
وجدي هم گلناله اصعد فوگ ارتاح احسن ..
بقيت بس اني وامير ..
جنت اتخيل نفسي بمكانة ومنتضر درة تطلع من العمليات اشتهيت حتى الخوف الي بعيون امير وانتضارة ..

طلعت الممرضه وگالت راح نصعدها ..
طلعوها تهذي من البنج وتصيح بأسم امير ..
وهو يبوس براسها ..
سدن .. امييييير امييييير
امير .. ها حبيبتي اني يمج .
سدن .. ابني ووووين
امير .. ابنا فوگ بالغرفه اخذتة امي وامج ..
سدن .. امييير انت تحبني ..
امير… ههههههه اموت عليج شعندي غيرج بس ترى يوسف منا عيب فضحتينا ..
سدن .. خلي يولي يوسف مااحجي وياه راح اتزوج الحية حوراء وعاف درو ..
الممرضات يباوعن وخربانات ضحك ..
يوسف .. كسرت گلبي بحجايتها وامير يريد يسكتها وماكو طلعت الي بگلبها كله ..
الممرضه .. انت يوسف ..
يوسف .. اي اني اخوها .
بقت تباوع وتضحك .. بقيت صافن عليها شبيها هاي
بيومها مافارگتنا كل شوية تجي تشوف المغذي لو تگول محتاجين شي ..
وعينها مانزلتها علية ..
ابوي گال اخذ جدك وروح انت مايتحمل تعب ..
اخذتة ومشينا ..
دخل جدي الغرفته لان تعب ..
وگتله اي شي تحتاجة خابرني ..
اصلا جدي بهذي الفترة ضعف حيل وكثرت تساؤلات الناس عن حاله بس هو جان يگلهم سكر عندي ..

صعدت للغرفه .. شفت حوراء مبدلة ومعدله وگالبه الوجه ..
گلت السلام عليكم ..
حوراء .. شعندك رايح الدرة ووحدكم بالبيت ..
يوسف .. منو الي گالج .
حوراء .. ليش خايف لان عرفت ..
يوسف .. مااخاف بس من ربي .. وبعدين مو انتي الي تحكميني وبكيفي وين اروح اروح . وخلي اختج تضب السانها مو مخليتلج جهاز تنصت هناك ..
حوراء .. شلون ماتگلي تريد تلعب بكيفك واسكت ماگلتلي شعندك رحت الها .
طبعا استغليت الفرصه ورحت يمها ترتاح وتريحها .. ادري بيها تريد تسوي كلشي حتى تاخذك مني هالحية ..
يوسف .. احترمي نفسج .. ولاتجيبين طاريها على السانج الي تحجين عليها اشرف وحدها شفتها بحياتي ..
حوراء .. شنو قصدك اني مو شريفه .. الحمد لله ع الاقل مانتختل ولالمسنا واحد غريب وماانتضر اخواني يطلعون وادخل حبيبي وانام وياه گالتلك اول وتالي مااتزوج بسبب النهوة ع الاقل خلي اتونس واشبع ..

مااتحملت تفاهاتها وكلامها على درة وطعنها بشرفها ..
ضربتها راشدي حسيتها انسطرت ..
بقيت صافنه بوجهي ومامصدگة ..
گلتلها لاتشوفيني ساكت ومتحمل السانج . لو ماجدي فلا اخذ وحدة مثلج واخليها مرة الي ..
فتحت الكنتور وطلعت عباتها ورادت تطلع ..
يوسف .. اذا طلعتي من الباب ورقتج تجي وراج ..
سدت الباب ورجعت ..
فتحت موبايلها خابرت امها وتبجي وتعيط ..
هسا تجون .. شبعني ضرب وموتني علمود الساقطه درة يروح ينام وياها ويجيني ..
لزمتها واخذت الموبايل ورگعته بالحايط ..
وگلتلها .. خو كبرتي السالفه وكررتي كلامج عليها ..
دروحي خسرتيني وتحلمين بعد يصير بينا شي الا اخليج هيج معلگة منا لمن تنعدلين ..
عفتها وطلعت ..

وي طلعتي .. صارت گبالي فاطمة…
شسويت البنتي خابرت ابوها وابوك هسا يجون ..
يوسف .. ربيها بالاول يله تحجين ولو لمن احجي ..
فاطمة .. تعال شقصدك وين رايح الذيج الساقطة
رجعتلها…
اياج تجيبين اسمها . تدرين بنتج نسخة منج بكلشي بس المشكله اني مو عمي واتحمل تصرفاتها واسكت .
تطخ براسي ارجعها الج ومن باجر ..

طلعت من البيت كله صاير يخنگني ..
خابرني ابوي يستفسر ليش ضاربها ..
سولفتله السالفه كلها ..
گال تعال جدك يريدك ..

رجعت .. لگيت الامم المتحدة كلها مجتمعه ..
خالي حمزة .. انت شلون تضربها وحقها تغار وشعندك رايح لهناك ..
يوسف .. اول رحت حتى اجيبها لهنا وبعلم امها واخوها بس هي ماقبلت واني رجعت للمستشفى ..
البنية من جنت خاطبها ماخلتني بيوم المس ايدها لو شعرة منها مو هسا بعد ماتركتها وتزوجت تردوها تباوع الوجهي ..
كلكم تعرفون تربات درة وهي اخت منو وبنت منو .. ومااسمح الاي احد يطعن بيها ..
مو لغاية ببالكم بس لان اخت امير وتعرفون امير شنو وشيسوي للي يجيب سمعة اختة ..
واصلا احنه مشكلتنا الرئيسية هو طولت اللسان مال بنتك يعمي بدل ماتحاسبني ..
گللها احترمي رجلج ولا تلاسنين ولاتطلعين السانج مثل السان دلالة ..
كل احترام ماعندها . شلون تردوني احترمها ..
الشيخ .. گومي ولج حبي راس رجلج واعتذري منه ..
حوراء .. بس جدي ..
الشيخ .. گومي ولج ومااريد حجي زايد .. ومنا وجاي اذا رفعتي صوتج لو لاسنتي رجلج ماتلومين الا نفسج ..
والله اني اربيج من جديد ..
اذا اني عايش وهيج تسوون بعد عيني شلون ..
وانت حمزة ضب مرتك ولاتدخل روحها ببناتها وتخرب بيوتهن ..
ترى يردن ويگعدن على گلبها ولاتگول ماگال مجبل ..
مرزا .. اسم الله عليك بويه .. وانت يوسف اخذ مرتك واصعدوا يله كافي كل يوم عركة ..
خزرني سكتت لان اعرف جدي مايحمل مشاكل ..
صعدنا للغرفه ..
نزعت الدشداشة وسحبت الغطا ونمت ..
شوية واحس اجت نامت ..
وتحاول تتقرب مني وتتدحج اخر شي استغلت نومتي ونايمة بحضني وتسوي حركات وتبوس ..
حتى نومي طيرتة وعبالها راح انسى واسامح بسرعه ..
گمت من مكاني ..
واخذت مخدتي خليتها ع الزولية وسحبت بطانية من فوگ الكنتور وتغطيت بيها ونمت ..

درة .. ثاني يوم گعدت من الصبح حضرت غرفتي السدن خافت تجي وماتگدر تصعد لان عملية ..
ونزلت الكاروك مال كروري ..
رتبت الغرفه وبخرتها ..
ورتبت ملابسه يخبلن اشم بيهن وفرحانة ..
ونضفت البيت وسويت غدا ..
خابرني امير .. گال راح ندزها البيت الشيخ ..
لان زينب حامل وانتي دوام وامي تعرفين وضعها وخاف تجيها نوبة ..
ومحد الهم .. كم يوم بس تصير احسن واجيبها لهنا ..
حضريلي جنطة بملابس الها والكروري راح اجي اخذهن بس اوصلهم ..

نزلت زينب .. تحجي من ورى خشمها ..
شوكت يجون ..
درة .. مايجون لهنا راح ياخذهم البيت الشيخ وراح يجي امير ياخذ ملابس ..
اروح اصعد اجيب ملابس السدن من فوگ ..
وانزل ..

صعدت اخذت ملابس ونزلت ..
شفت زينب ماكو ..
دخلت للغرفة ..
لگيتها تدور بكنتوري ..
درة .. شتسوين ..
زينب .. هاااا كلت اطلع ملابس للطفل مو شفتج مرتبة الغرفه فگلت اكيد ملابسه هنا ..
درة .. اي بالمجر مخليتهم مو بالكنتور ..

طلعتهم وخليتهم بالجنطة .. بس ماارتاحيت الوجود زينب بغرفتي ..
اجة امير اخذهن وگال بدلي وروحي وياي حتى تشوفين كروري ..
درة .. لا غير مرة زينب وحدها ..
امير .. تروح ويانا زينب ..
زينب .. لا مااگدر وعلي ماهو اني راح اقفل وانام وللعصر اجي يجيبني علي ..
درة .. اني منضفه والغدا طابخته كلشي ماعندج .
هزت راسها وجانت هادية كلش ..
رحت بدلت ومشيت وي امير ..
دخلت سلمت وركضت الغرفه خاله ام يوسف ..
بوست سدن ورحت الكروري ..
يروحي شنو هذا يخبل شوف ايدة شلون صغيرة ومدنفشه ..
سدن .. طالع على عمته حلو واحلى مابي عيونة ملونة عليج انتي وعمتي ..
درة .. يروحي يخبل بس انتي هم حلوة واخذ بياضه منج
ام مرزا .. يمة الطفل الا اربعين شكل منا للاربعين يله يثبت يعني مايبقى على حاله ..
ام حمزة .. اي يمة يتغير وكل يوم اله شوفه .

گمت سلمت عليهم كلهم لان من شفت كروري نسيت السلام ..
الشيخ اجة ذب عليه نگوط ورقه ..
وامير ماقبل وگالة وجودك خيمة علينا يكفي ..
اما امي مگابلتة وگاعدة وتگول ملامحها كلها امير بصغرة حتى عقجة حاجبه ..
دخل يوسف .. هههههه هذا من هسا عصبي والدنيا طالعه من عينة ..
امير .. اي منين يطلبها ويضحكون ..
حوراء اجت سلمت بس ماباوعت ولاسلمت . وواگفه گبالي وتفر بحلقتها عود تغيضني ..
اني مااهتميت ومخليه كروري بحضني ..
ام مرزا .. الله يسهلج وتشوفين ولد ولدج ..
ياقوت .. ان شاء الله هي خطبها ولد وياها بالجامعه والولد شاريها وبلكي يگدر يقنع اهلها ويوافقون ..
ام مرزا .. ان شاء الله..
يوسف ماعجبه الحجي وطلع ..
رفعت راسي الحوراء وابتسمت كانه مامهتمة ..
وبيبياتي سألني على الولد واهلة واني اجاوب ..
هي عافتنا وطلعت ..
ردت ارجع للبيت ..
الشيخ گال ذبحت طلي السلامة سدن وابنها وخابرت البنات راح يجن وخابرو علي ومرتة هم خلونا نلتم ..
فأضطريت ابقى ..

شوية واجت زينب .. صاحت حوراء وصعدن ورى شوية
نزلت حوراء عصبيه وتغلط وتسب عليه ..
بقيت صافنه ..
ام مرزا .. انضبي ولج ماتستحين شني هالغلط ..
ام حمزة . هاي ماميدبة يراد تتربى من جديد وين حجي جدج وياج البارحة ..
حوراء .. البارحة كلكم ذبيتوا اللوم عليه ويوسف طلعها شريفه وعفيفه وشوفوا شكاتبة الرجلي ..
بقيت صافنة ومستغربة هاي الورقه شنو.
طلعت ورقه وفتحتها ..
وبدات تقرأ بيها ..
حبيبي وعشقي الابدي يوسف. .
هي بدات تقرأ واني حسيت راح يغمى عليه ..
احس وجهي وجسمي نار صارن ..
هاي منين جابتها وشلون وصلت الايدها .. هاي الرساله كتبتها اليوسف من زمان وتراجعت انطيهيا وخليتها بوسط الدفتر وبكنتوري ومحد يوصله منو الي جابها ..

الكل جان صافن ويباوع الي بتساؤل حتى امي ..
درة .. هاي شجابها الج جيبيها ..
حوراء .. يعني تعترفين الج .. ماتستحين ماتخجلين تكتبين الواحد متزوج ..
وفوگاها ذاكرة كل سوالفهم المكسرة وعشگهم بيها ..
غمضت عيوني وصحت ..
اسكت كافي . هذي الرساله من زمان كتبتها واحتفضت بيها يعني مو جديدة ..
والله يمة قديمة من خربت خطوبتنا بسالفه النهوة حتئ لاخاطب ولامتزوج حوراء..
حوراء .. وليش محتفضة بيها لسا ..
درة .. هاي خصوصياتي ومو من حقج تحاسبيني فاهمة
سدن .. حوراء احترمي شوية ورجعيها ..
حوراء .. ماارجعها والا اوديها الجدي حتى يشوف بعينة اني كلامي كله صح ..
اجة يوسف من وراها سحبها ..
شنو هاي الي تراويها الجدي ..
حوراء .. جيبها هاي دليل خيانتك الي جيبها ..
يوسف .. مصرة تنزلين من عيني ومصرة ترخصين روحج يعني عبالج حلوة تفضحين غيرج وتسوين هية وتخربين فرحة العالم ..
اذا تردين تگولين الجدي گولي مايهمني لان مامسوي شي خطأ بس مو هسا فضحتينا ومنا وادم وحسابج بعدين على هاي ومنين جبتيها ..
حوراء .. انطينياها وين ماخذها ..
عفسها يوسف وخلاها بجيبة ..
يوسف .. ماانطيها وراح تسكتين وماتجيين طاريها فاهمة
بقت تدردم وراحت الامها ورى البيت هي وخاله ام يوسف يطبخن ..
اني مااتحملت وانهاريت وابجي ..
صارت عيني بعين زينب .. وگلتلها ..
انتي مووووو انتي الي دورتي بكنتوري وطلعتيها ..
وجبتيها الاختج ..
مع الاسف كلما اگول تغيرتي واحسبج مثل اختي تطعنيني ..
وتلوميني لان مااعاملج مثل سدن ..
يمة اني اريد اروح ..
اقبال .. لاتبجين درة خاله كلنا نعرفج ونعرف تربيتج .. وكلنا نعرف انتي ويوسف جنتو مخطوبين واكيد بينكم رسائل وذكريات ومامن حقنا او حق واحد يحاسبج ..
درة .. خاله والله قديمة هاي الرساله ..
منال .. لاتحلفين نعرفج شنو انتي انسي السالفه ولاتضعين فرحة اخوج وسدن ..
ام مرزا .. يله بيبي روحي غسلي وجهج وتعاي ..

گمت اريد اغسل المغسله جوة الدرج ..
ومخلين بردة ..
دخلت اريد اغسل طلع يوسف من الصحيات .. شافني گال اعتذر ع الي صار ..
ماحجيت وياه وفتحت المغسله .
گتله اريدها الورقه وينها.
يوسف .. ذبيتها ..
درة .. ادري ماذبيتها انطنياها ..
يوسف .. اعذريني مااگدر وعافني وراح ..

غسلت وطلعت ..
صاحني امير .. شصاير شبيج تبجين ..
درة .. ماكو شي ..
امير .. سمعت الحجي والصياح للبراني وصل بس ماگدرت اجي زحمة .. حوراء جانت تغلط عليج وتسب شكو ..
درة . . امير والله مالي ذنب .. زينب مدورة بكنتوري ولاگية رسالة او مذكرة كتبتها مرة وتخص شسمة شسمة ..
امير . تخص يوسف موووو
درة .. والله قديمة وقبل مايخطب حتى بس ماادري ليش ماشگيتها وذبيتها وبقيت محتفضه بيها ..
حتى نسيتها ..
وحوراء عبالها لسا نتراسل وبينا شي وفضحتني گدام الكل ..
امير .. كافي لاتبجين اعرفج ماتغلطين بس وعيونج الا ارجع كرامتج ودموعج الغاليه هاي الا اخليهن يعتذرن منج بنات فاطمة ..

امير .. مااتحملت واني اشوف اختي وفوگ كسرتها يهينوها وينزلون كرامتها ..
انتضرت عماتي ورجولتهن وولدهن يطلعون ..
گعدت الشيخ وخوالي ويوسف وعلي ..
وفتحت الموضوع ..
امير .. اختي ترباتي واعرفها وماتسوي العيبة وتغلط وموعودها ع الصراحة وكلشي تسولفلي ..
بس العيب ع الي تدخل الغرفتها وتدور بكنتورها والثانية الي تتهمها بشرفها ..
هاي مشاعرها ومالنا دخل بيها مادام مامأذية احد بس مو من حق بناتك ياخالي يحاربنها ..
كل ذنبها انه جانت مخطوبة اليوسف وماصارت القسمة .
لو زينب الي حاسبيها وحدة منا ومأمنين على اسرارنا عدها هيح تسوي ..
علي ضاج وماقبل ..
الشيخ .. احسبوها عليه يبوية واني اخذلكم حقها ..
امير .. حق اختي حقنا وكرامتها من كرامتنا والبيت الي انهانت بي مانبقى بي ..
ومرتي راح اخذها هي وابني من رخصتك بوية ..
واذا تردون تشوفوها البيت بيتكم ..
علي .. اوگف امير .. اسمع خالي كم مرة نبهت زينب وگلتلها لاتغلطين بحق درة ..
وان كانت حامل وام ابني الجاي بس سوالفها زادت ونبهت ومافاد ..
اني اشوف تبقى يمك بين ماتعرف غلطها يله ترجع ..

اخذنا امي ودرة وسدن وطلعنا والشيخ باس راس درة واعتذر منها وگالها اعرف اني ضلمتج انتي ويوسف بس لو ماابوج وعمامج جان هسا ولدكم يلعبون بحضني ..
درة .. من سمعت كلامة مااعرف ليش مااتحملت وبجيت
زينب گامت تبجي وللحضه انقهرت عليها وخاصه علي اعرفه يحبها كلش بس مااتحمل انهان وضحى بحبه علمودي هذا اكبر فخر الي ..
درة .. علي زينب حامل العن الشيطان اكيد غلطت بس مو هيج تعاقبها خطيه ..
علي .. معليج انتي خليها هنا يم اختها كم يوم وخلي تفيدها اختها هسا اختها تبيع يوسف علمودها ..
بس هي الثولة ضاله تضحك عليها حوراء ..

رجعنا للبيت ..
والكل جان فرحان بكروري .. ومن يبجي الكل تتطافر اله ونبقى نباوعلة وممصدگين عدنا طفل بالبيت ..
واخواني يگولون خلص بعد انتي كبرتي واجة من ياخذ مكانج ..
لكن بداخلي اعرف محد ياخذ مكاني بگلبهم ..

مر كم يوم وامي تتوسل العلي يجيب مرتة بس علي مايقبل ..
وبيوم اجة الشيخ وجانت حالته غريبة وتعبان ..
وحتى بالگوة يحجي ..
وجايب وياه زينب وحوراء وخوالي ..
طلب منهن يعتذرن الي ..
واتعذرن .. وگال الزينب بوسي راس رجلج ..
الشيخ .. يبوي اني باجر مسافر بشغل واريد اطمأن عليكم .. اريدكم گلب على گلب مااريد ناس تاكل ناس عوفوا الحقد والكره ..
وخليكم ايد وحدة ..
هاي دنيا ومحد ضامن روحة ..
جان يحجي ويوصي وعبالك بعد مايرجع ..
والغريب سمعت خالو مرزا ويوسف سافروا وياه ومحد يعرف السبب ..
بعد اسبوع من السفر ..
نايمين بالليل ..
نزل امير الفجر يبجي ..
ماگدر يگعد امي ..
وسدن نفسة خاف عليها ..
گعدني واشرلي اگوم لان اني نايمة يم سدن ..

وخابر العلي وگاله تعال جوة ..
گال خابرني يوسف .. الشيخ توفى ..
لطمت على وجهي .. شموتة غير هو بالبنان ..
امير .. الي ماتعرفوه الشيخ عندة سرطان من زمان وجان يتعالج وماقبل واحد يدري وراح البنان حتى يتعالج هناك بس راح متأخر ..
جان امير يلطم ويبجي ..
وكاتم بجيته ويگله اااااخ يوبة صار اسبوع ماشايفك ورحت مني ..
بقينا للصبح نبجي وامير كل شوية مخابر يوسف ويسأله
يوسف گال بس نكمل الاجراآت نجي ..
روح البيتنا وخبر امي وبيبياتي حقهن يعرفن خلي يترحمولة ..
صعد علي يخبر زينب .. زينب ماتحملت وبقت تصيح من فوگ رجت البيت رج بصوتها ..
بحيث سديت اذاني من فجاعة صوتها ..
فزت سدن وهي هستوها فاتحة خيوطها ماتگدر تمشي
بس تصيح شكو شكو من مات ..
حضنها امير وگال الشيخ انطاج عمرها ..
هي مااتحملت واغمى عليها ..
شالها والتهينا بيها ذب امير عليها ماي وگعدها شافته گالتله گول جذب گول جدي مامات شموتة شلون .
بس من شافت دموع امير وعيونة الوارمات من البجي صدگت وبقت تلطم وتبجي ..
وامير يهدي بيها ويگلها منا كروري مو زين عليه لاتصيحين ..
اجة حيدر گال امي تعالو بسرعه ..
ركضنا للغرفه ..
شفناها تبجي وتون .. عمي ابو قاسم مات .هو جان مايحبني بس ليش مات ..
امير .. منو گالها اني ردت اگلها بطريقتي ..
حيدر .. هي گعدت سمعت صوت زينب تصيح وگالت شكو گلتلها ..
امير .. يمة يمة شو باوعيلي ..
صفنت عليه وتبجي .. مات مات .
من شفت اني بهيج حاله تهسترت ومااعرف شأسوي ..
احس امي بكل مرة جاي نفقدها اكثر ..

بقلمي_الكاتبة شمس
يتبع .…

[لامارا]

//// البـارت الثالـث والـثلاثـون ////
عجـاف_القلـوب ..
الكاتبـة_شمـس ..

لبسنا اسود ورحنا البيت الشيخ بعد ماامي رجعت الحالتها الطبيعية ..
امير ماقبل سدن تروح هسـا ..
گالها من يجيبوه للبيت اجيبج هسا هوسة وانتي بعدج نفسة ..
خابر الخالة ام يوسف وحجت وياها .. يمة لاتجين اصلا مايصير منا ابنج صغير وانتي نفسة مو زين عليج..
سدن .. تحجين صدگ يمة هذا جدي الي مااعرف شلون مات وليش .. ولكم لسا مامصدگة رجال يهز الدنيا بطوله شموتة شموتة ..
امير .. هذا قدر الله لاتگولين هيج .. اذا هو جدج اني جان ابو الي وفگدانة اذاني اكثر واحد بس هذا حكم الله ولااعتراض عليه ..

ماگدر امير يقنعها .. ومن شافها مصرة گالها .. هاهي اجي اخذج بس مو هسة ..
واذا رحتي تگعدين بغرفه امج انتي وابنج وماتطلعين فاهمة ..
علي .. يله ترحون زينب ماتتحمل بعد ..
امير .. غير كلنا ندخل سوة .. ماتشوف امك هسا صحت
علي .. اي شگلت بس خطيه متأذيه…
امير .. ترى كلنا متأذين وهو وينة ومستعجلين اجرآت وهوسة الباجر زين اذا اجو ..

رحنا البيت الشيخ .. وجان مبين عليه الحزن تحسة اضلم ومابي طعم ..
هاي توك متت والحيطان حزنت .. جا بعدين شيصير بيها بوية ..
اني لاف راسي بجراوية ولبست دشداشة سودة ..
بس گلبي يون ويبجي ..
جان مثلي الاعلى .. اتذكرت اول مااجيت لهنا شلون خلاني تحت جناحة واحتواني ..
كبرني وعلمني ..
طلعني دواوين وخلاني اتعرف على عالم وشيوخ ..
نساني كسرت اهلي وابوي وعمامي ..
اخذت قوتي واصراري منه ..
كبرت ودرست ووصلت كلة بفضل الله وبفضله ..
شانسى منك وشلون اگدر اعيش بلا حسك..
جنت امشي ومامهتم لان انت بضهري ..
انت جبيرنا وسندنا ..
وهسا راحت كل ذيج الايام وياك ومابقت بس الذكريات .
دگ موبايلي ..
رفعته .. صوت يوسف وهو يبجي ..
مااتحملت ونزلن دموعي ..
ها خوية ..
شبعدلكم ..
يوسف .. بعد هواي شغل .. بس بعد مااتحمل امير راح اطگ مامصدگ جدي خلص راح منا ..
ولك امير بآخر لحضاته وهو يوصي ويگول امير ..
مانزلت من السانة ..
وحتى الابوي گال ولد ياقوت امانة برگبتك ..
يوسف يحجي واني ابجي مااعرف شسوي ..
امير .. اااااه يوسف ريتني هناك يمك واحضنه واشمه ..
يوسف .. حتى اني ماشبعت منه اخذوه للثلاجات ..
مرزا .. هذا منو امير .. انطينياه ..
هلا بوية امير گوانا الله بمصابنا ..
امير .. البقاء لله خالي .. والله يساعدنا على فراگ الهيبة مرزا .. لاعاب حلگك .. شوف وليدي خالك حمزة وحدة ومايدبرها همتكم وياه بوية نصبوا الجوادر وزهبوهن وذبحوا الذبايح ورتب كلشي ..
فلوس بالخزنة ومفتاحها عند بيبيتك لو تحجي وي خالتك ام يوسف ..
مااريد شي ينقص اريد فاتحة تلوگ بالشيخ ..
امير .. لاتشيل هم خالي ..

سديتة منه .. ودخلت لگيت البيت مگلوب بالنسوان والصياح للشارع ..
شفت خالي حمزة حضنته وبقينا نبجي ..
گتله خالي مايصير هيج ..
خلي ذاك البيت للزلم وهذا للنسوان ..
حمزة .. اي بعدهن جاي يجهزن بي وينضفنه خلي يكملن وننقل الزلم لهناك ..

دخلت مرت خالي حمزة وحوراء وبنات عماتي ..
گالن البيت كمل نقلوا الزلم ..
درنا لهناك واني رحت حجزنا جوادر وكراسي وسوينا القطع ..
وسدينا الشارع من الطول للطول ..

رغم الشيخ بعدة ماجاي بس الناس تكومت علينا كلها تحبه وتريدة مافد يوم اذاى احد ولاطلعت العيبة منه ..
وين مااروح اشوفه گدامي لو اسمع صوته من يگلي بوية امير ..
التفتت مااشوفه ..
گمت اتخيل صوته بأذاني ..

ثاني يوم للظهر يلة اجوا ..
العالم انگلبت علينا .. وبدت الشيوخ والعشاير تجي وعراضات ورمي وهوسات ..
جان منضر يقشعر اله البدن ..
يستاهل هيج جنازة مهيوبة . هيبتة ورجولته ماترضى بالقليل ..
احنه تلگيناهم بالسيارة بوسط الطريق ..
وگفت السيارات ..
ونزلت ركض اله صعدت التابوتة بسته وحجيت وياه ودموعي تجري ..
نزلت تلگاني يوسف تحاضنه ونبجي ..
وصلنا شارعنا ..
وبدأ الرمي والهوسات ..
وعبالك زفة مو فاتحة ..
گالوا ماندخلة لجوة ..
النسوان تملخة تملخ ..
من الباب ونطلع بي للنجف ..
لان وكت ماكو بعد ..
صدگ من الباب ودعناه وبيبياتي اجن ودعنة ورحنا بسرعه من هوسة النسوان ولمتهن .
طلعنا للنجف والسيارت يمكن مئة سيارة قليله ..
جانت جنازتة هيبة مثلة ..
وصلنا زورناه الامام علي ..
ومناك لگينا عمامهم بكربلاء وبالنجف منتضرينا ..
دفنا وكملنا ورجعنا والوادم كلها رجعت ويانا ..

بيتين وجوادر وماكفت العالم ..
من غير الطبابيخ والذبايح .. جانت فاتحته سهله ومابيها كل عسر ..
خوالي جانوا معتمدين عليه بكلشي ..
بالصغيرة والجبيرة ..
حتى امي واهلي ماادري بيهم ..

درة .. الفاتحة ضخمة والنسوان هوسة ..
ومانلحگ ..
فاحنه البنات كلنا بالمطبخ نشتغل .. مابينا وحدة گعدت
سدن هي وكروري بالغرفه وزينب هم نايمة يمها تخاف على نفسها لان حامل ..
بس بالي كلة يم امي .. لا شبعت بجي ولطم ..
خايف لاتنتكس لو يصير بيها شي ..

شوية ودخلن نسوان شايفتهن من قبل ..
گالن نريد ام امير ودرة ..
اشرن البنات عليه ..
سلمت عليهن ودخلتهن .. تذكرت ذني الي اجن خطبن ام مهيمن وعماته ..
اخذتهن الامي وسلمن عليها ..
الكل جان يسأل منو ذني ..
وامي تگلهن اهل خطيب درة ..
طشت السالفه كلها بالفاتحة ..
بس فاطمة تگلهن جذب هي منهي عليها وماتتزوج غير ابن عمها هاي ياقوت تحجي وحدها اصلا لسا كلشي ماكو ..
اختنگت وانهضمت واني اشوف حياتي وسيرتي من السان للسان ..

مااتحملت وگمت من الهول ..
وقت الغدا ..
كلنا ملتهين بالمطبخ ..
اجة يوسف ..
عيونة وارمات وشحاله ..
سلم وگال كم مرة عندجن بالضبط ..
صارت عينة بعيني ..
گتله البقية بحياتك ..
اخذ حسرة طويله وعيونة لمعن ..
وبصوت مخنوگ جاوبني ..
شافتة حوراء ..
اجت تركض ..
ها حبيبي رايد شي ..
يوسف .. شوفيلي كم مرة بسرعه ..
حوراء .. هواي كلش ماينحسبن ..
يوسف .. باعن هوسة وسوالف نسوان مااريد والتسويلها عركة بالفاتحة اجفص ببطنها فاهمات .. وشغله ثانية .. اكل خير من الله وطبابيخ واگفه لاتبخلن ع النسوان انطن للكل حتى الجهال ولاتفشلنا ..

كلها هزت راسها وطلع ..
هي بقت تخزر بيه ..
اني درت وجهي اغسل بالماعين ..
التهينا بالغدا والهوسة ..
تغدت النسوان ..
دخل حيدر ويوسف وعبد الله يجيبون اماعين ..
حيدر .. اگلج درة غدي امي ولاتخليها تتعب فاهمة
يوسف .. اوگفي هسا اجي ..
راح ورجع جايب ماعون مليان لحم وگال هاجن ..
اخذي عمتي وروحن يم سدن بالغرفه ..

گتله شكرا واخذت التمن والمرگ من حيدر خليتهم بالصينية واخذتهم ..
اجت حوراء وراي ..
درة منا فاتحة وهوسة لاتضلين تتمسكنين وتفترين بالمطبخ محد عاتب عليج ..
الفاتحة فاتحتنا واحنه الي نگوم بيها . اگعدي بالغرفه واسكتي ..
درة .. الشيخ جان ابو النا كلنا وماگايمة علمودج .. ومو انتي الي تقررين اذا اگوم لو اگعد ..
عفتها ودخلت ..
سدن تبجي گعدت يمها واسيتها وگلتلها موزين على ابنج وجاي ترضعين ..
تعاي تغدي يله ..
گعدت زينب گلتلها انتي هم حامل مو زين تبقين بلا اكل
گامت يمنا ..
رحت جبت امي واجيت لگيتها تصلي ..
ياقوت .. يمة فشله النسوان اعوفهن واگعد هنا ..
درة .. يمة هناك هوسة وماتگدرين تاكلين وانتي تعبتي
ياقوت .. ولج يمة هو منو اله نفس ياكل .. جن ابوي المات مو خالي ..
درة .. يمة هم هيج مو زين عليه جاي تعذبنه بهاي صياحجن ولطمجن ..
جاي نسولف وسمعنا الصياح گب بالهول ..
ذبيت الخاشوگة وگمت ..
اشوف النسوان ملتمة وتهوس ..
دخلوا الولد بعدوهن ..
وشالوا بيبي ام مرزا متخربطة واخذوها ..
سدن انهبطت وتبجي ..
عبالها ماتت ..
ياقوت .. يمة درة صيحي اخوج خلي ياخذ مرتة وابنة وامشن للبيت ..
درة .. شلون اعوفج هنا مااگدر ..
ياقوت .. شبيج ولج حاسبتني مثل الجاهل .. شبيه اني وماتعوفيني ..
ماعرفت شلون ارد عليها وشأگلها ..
خابرت امير ..
وانطيته الامي ..
گال حضرن روحجن شويه وادز علي لو حيدر ياخذوجن ..

اني هم كيفت لان راح ارجع للبيت مليت من نضرات وكلام حوراء وامها الي ..
زينب گالت اني ابقى ماامشي ..

رجعنا للبيت ..
سدن جانت معتكفه وحزنانة ومابيدها شي غير بس الدموع ..
ساعات يجي امير شويه يشوفها ويواسيها ويشوف كروري ..
ويجيب امي بالليل والصبح ترجع لان يخاف عليها ..

بيوم الثالث مال الفاتحة لبسوا خالو مرزا عگال الشيخ ونصبوه شيخ ع العشيرة ..
وصار الشيخ مرزا بمكان شيخ مجبل حسب وصيتة ..
خلصت الفاتحة ..
ورجعنا للدوامات لان كنت ماخذة اجازة ..
اجة مهيمن سلم عليه وعزاني ..
وحسب مافهمت انه اجة للفاتحة هو وابوه وعمامة ..
تشكرت منه وگمت ..
هلي .. والله مابيج حظ اذا تعامليه هيج ..
ماتشوفيه يحاول يرضيج بأي طريقه شبيج درة ..
ليش مجلبه بأمل مامنة فايدة ودعاء مايتحقق ..

درة .. هلي ماراح تفهميني الا تعيشين شعوري .. مات كل احساس عندي بعد يوسف ..
ساعات احس روحي معوقه احساس ومشاعر ..
اتجاه اي شخص ..
وكأنه عندي گلب واحد واخذة يوسف وياه وخلص ..
هلي .. بحياتي ماشفت مثلج .. ولج شوفي البنات ملعبه كل يوم وي واحد ..
شني ذني عدهن تعدد گلوب وانتي بس گلب واحد ..
درة .. ههههه خررررب يومج ضحكتيني .. اني تربيت هيج وامي علمتنا هيج .. مانغدر ولانخون يعني هذا طبعنا كلنا ..
حتى اخواني حبو مرة وحده واخذوا الي يحبوهن ..
هلي .. هنيالهن .. ماتخلين الصغير يحبني ..
درة .. ياليت والله ليش وين الگي مثلج اله بس السانج شويه ..
هلي .. هاااا گلبتي ..
درة .. ههههه دگومي يله المحاضرة بدأت ..

فترة امتحانات وتعب ومااعرف شلون ارجع للبيت تعبانه وطايرة على كروري صرت اشتاقله ..
زينب من الفاتحة لسا عند اهلها مااجت ..

وبس اني وامي .. وهم مااريد اضغط عليها اخاف عليها وهي ماتقبل حتى الخبز ضاجت من امير دزة الخبازة بيت الشيخ ..
وتقلد عليه ومايعجبها الا خبزها ..
امير قرر ياخذها البغداد ويعرضها على اكثر من طبيب ..
بس امي معاندة وتگله صرت زينة مو مثل قبل ..
بس من گالها اخذج وازورج الامام الكاظم اقتنعت وراحت كان حذر انه امي ماتدري وحتى نبه الاطباء مايحجون گدامها لان الوهواس يزيد المرض ويقدمة ..

النتائج ماااختلفت والكلام نفسة بس الي هون علينا ..
انه ماراح تنسى فجأة.. بالتدريج ولمدة سنين ..
جنت مرات اتخيل انام واگعد وامي ماتعرفني ..

بعد مالزم خالوا مرزا الشيخة ..
جان ياخذ يوسف وامير وياه ..
وهذا الشي ضوج خالوا حمزة ..
وگام يتحجج ويتزعل ..
على اقل شي ..
من جان الشيخ عايش ماكان يروح وياه الاماكن بعيدة ومكتفي بخالو مرزا ..
بس هسا گام يحجي واني شنو هنا وتاخذ الزعاطيط .
هالشي ضوج امير واتعذر يروح بعد وي خالي ..

مرة من المرات وقبل اربعين الشيخ ..
رحنا البيت الشيخ حتى نسوي خفيفي وحلاوة ..
وجنا كلنا ملتمين .. خالاتي وبناتهم واحنه وسدن لان طلع اربعينها ..
حتى بيبياتي گاعدات ..
وجان تجي فاطمة وتصيح علينا يله فاهيات همن اديجن ..
كلجن ملتمات على الخفيفيات ..
جانت تأمر وتنهى وجن هي ام البيت ..

اقبال .. فاطمة ذاك بيتج مو هنا .. روحي البيتج وامري وانهي .. هذا بيت الشيخ وبيت اخونا الجبير وگاعدين بي
فاطمة .. هيج صار الحجي .. لأن مرزا صار الشيخ عليتي علينا يااقبال ..
ترى شيخ عليج مو علينا .. هو الي نصب روحة شيخ مو احنه الي نصبناه ..
ام حمزة .. تأدبي وانلصمي شنهي انتي محد يلزم السانج ..
لو الشيخ عايش جان گص السانج ومافكيتي السانج ..
مرزا شيخج وغصب عنج واذا ماعاجبج روحي الاهلج البدو وتشيخي عليهم ..
فاطمة .. هيج صارت عمة مووووو خليج تدافعين عنهم لين مامرزا يكوش على كلشي وهاي الگعدة تبقين تتحسرين عليها ..
بيبي ام حمزة يمها مطفاية مال جگاير ..
شالتها ورگعتها بيها وذيج طفرت ..
ولي من وجهي جليله حيا بناتها متزوجات وراح يخلفن وهي عايبة ومابيها حظ..
بس خل يجي زلمتج واني اعرف شأحجي ..

اجة خالو حمزة شايط ويحجي على بيبيتي شلون هيج تحجي وياها وتعاملها گدام الزعاطيط والنسوان ..
ام حمزة .. ولك بمكان ماجاي تحاسب امك ضب السان مرتك العايبه ..
بس ادريها حاقدة وراح تموت جيف مرزا صار الشيخ ..
حمزة .. يمة شنهي الحجي يعني واذا صار شيخ قابل شراح يسويلنا ..
مااريد واحد يتدخل بحياتنا عايلتي بس اني المسؤول عنها ..
ام حمزة .. هيج صارت يحمزة تقويها عليه .. خوش روح البيت وخلها تفيدك ..
اني هنا باقية وغضبانة عليك ولاانت ابني ولااني اعرفك يله امشي من وجهي ..

طلع خالو حمزة ضايج وبيومها مااجت فاطمة بس حوراء وزينب ضاجن وگلين وجهن علينا كلنا ..

كملنا وگالت امي يله خلينا نمشي ..
ماقبلن بيبياتي وگالن ..
هو سواد الليل وباجر اربيعنية الشيخ خلج هنا يمنا وعود باجر ارجعوا ..
ياقوت .. لا عمة مناك الولد وحدهم ..
ام مرزا .. ولج يمة الولد خلي يباتون هنا بالبراني قابل همة غرب غير ربو عدنا وبوسطنا ..

امي مارادت تكسر بخاطرهن .. بتنا بيومها ببيت الشيخ
ولو ادري راح انغث ..

تعشينا وكملنا ..
حوراء .. كملن الماعين انتن اروح اجهز نفسي الرجلي خطية صارلة شگد حزنان وتعبان ..
زينب .. احم عيني احم حقج روحي خية روحي ..
بس مو تخبليه مثل ليلة الدفنة. مال جدي وخلتيه يدور حمام يسبح ماكو…
ضجت من كلامهن وعرفتهن متقصدات يسمعني ..
سويت نفسي مااسمع. .
سدن .. شو ماتستحن ماتشوفن منا بنات واگفات وانتي حوراء عوزج بس تصوير وتفضحين روحج ماتستحين يله روحي الغرفتج ..
ضحكت بشيطنة وراحت ..
سدن باوعتلي واخذت جياس الزبل وطلعت ..
سدن جانت تگلي بعدة يحبج لدرجة حتى مايگدر يلمسها معقوله يجذب ..
ولو ليش اضوج ماهي مرتة وحقه يتقربلها بس ماكو داعي يجذب ويگول بعدني احب درة ومااگدر اتقربلها
جذاب وخاين ومنافق ..
احجي بداخلي واغسل الماعين وماادري بروحي الا الماعون طاح من ايدي وانكسر بالسنگ ..
صحيت على روحي ..
البنات .. ها خو ماتأذيتي ..
درة .. لا مابيه شي ..
غسلت ودخلت لجوة ..

سدن .. طلعت جيس الزبل ..
وشفت طفل گتله صيح عمو يوسف ..

راح صاح واجة .. ها سدن خير ..
سدن .. خلي مرتك تتأدب وضب السانها كافي امها الصبح خبصت البيت ..
يوسف .. شكو شسوت ..
سدن .. ماكو داعي تگعد تجذب وتصطر حجي وتسولف انت متقربلها بليلة الفاتحة ومعيشها ليله ورديه ..
ادري بيها تريد تغيض درة وتعمدت حجت گدامها ..

يوسف .. ليش جانت درة موجودة ..
سدن .. وليش سالت يعني حجيها صدگ موووو
فرك وجهة .. وسكت ..
سدن .. مااريد اتدخل بحياتك .. وهذا حقك بس ماكو داعي تجذب وتگلي مااحب غير درة واريدها ومخليني واسطة ..
مع الاسف ..
يوسف .. اوگفي شبيج گمتي ترعدين ..
سدن .. مالي حجي وياك هاهي بعد ..
عفته ودخلت ..

يوسف .. ااااه ربي رحمتك .. تذكرت ذيج الليلة بيوم دفنت الشيخ ..
رجعنا تعبانين بليل ..
اخذت حب براسيتول وفاليوم من الالم والارق ومانايمين ليلتين ..
ورحت انام بغرفتي لان البيت هوسة ومتروس عالم وردت ارتاح لان ورانا وكفه وتعب ..
جان الحزن مخيم عليه ..
ووجعه جدي جبيرة ..
بليلتها دخلت حوراء سابحة ولابسة ثوب قصير ..
جنت منتبه الها بس تعبان ..
گلتلها طفي الضوة اريد انام ..
حوراء .. من عيوني ..
طفته وشغلت التيب اللام ..
اني بهذي اللحظة غفيت ..
واني نايم حسيت بقربها الي وجانت تسوي شغلات بحياتي مامسويتها بنيه الي ..
مااعرف شلون خلتني اندمج وياها ..
او يمكن جنت محتاج احد يحتويني ويخفف وجعي .. وهي عرفت تختار اليوم المناسب الي تجيني بي ..
ماحسيت بروحي الا واني مكمل وياها ..
وهي جانت جريئة كلش ونستني نفسي ..
بعدها نمت وگعدت الصبح على صوت الاذان والهوسة مالبيت ..
انتبهت روحي جنت بوضع مااتذكرة شلون وشوكت صار ..
حوراء نايمة يمي وبنفس وضعي ..
تذكرت الي صار احترگت روحي ..
گمت بسرعه طلعت ملابس سبحت ونزلت ..
من يومها وهي كل يوم تريد تتقرب وتتجهز وتلبس بس اني ماانطيها مجال ..
حتى بدأت تحجي بهدوء وشأكلها تگول صار ..
تحاول تكسبني بأي طريقه.

بس ضجت منها حيل من اجن سدن وگالتلي شحاجيه گدام درة ..
صعدت للغرفه بسرعه ..
لگيتها تبدل وتبتسم ..
يوسف .. طلعيلي ملابس اريد اسبح وانام يم الولد
حوراء .. ليش تنام هناك ..
يوسف .. حتى تضبين السانج وماتطلعين اسرار الغرفه برة ..
حوراء .. هااا يعني ضجت لان الخانم عرفت انت نايم وياي ليش انت رجلي لو رجلها ..
يوسف .. اششششش صوتح لابالقرآن اخليج تباتين يم امج الليلة ..
وهااا مو معناها نمت وياج ليله يعني احبج ومااگدر استغنى عنج .. الي صار مو بوعي والا مايصير بحياتي
حوراء .. حرام عليك ليش هيج تسوي وياي المن ابدل واعدل كل يوم ..
يوسف .. ع الاقل احترمي العزا الي عدنا ومااقبل تصعدين تنزعين الاسود .. هذا الشيخ مو واحد غريب ميت ..

اخذت ملابس ونزلت ..
مو غرضي اجرحها بس مااريدها تطلع اسرار غرفتي برة كلما استخطيها ترجع تجفص ..
من صدگ تربات امها .. ماتنعدل ابد ..
فاطمة عمي گدرت تغيرة على اخوه وبأقل من اربعين يوم من وفاة الشيخ ..
ماتگدر على بناتها ..

درة .. اجت سدن للغرفه لگتني شايله كروري والعب وياه ..
گعدت يمي ..
ها درو لاتضوجين من هاي الثوله تريد تضوجج ..
درة .. وليش اضوج غير رجلها ..
سدن .. حاسة بشعورج ويمكن لو اني امير متزوج غيري اسم الله وهيج مرتة تگلي جان موتتها ..
درة .. هههههه صحيح ✔ بس لو صدگ ماتسوين شي ..
شخص صار الغيري وتزوجها بعد مالي حق اغار لو احجي وبصفتي منووو..
اذا هو باعني واشتراها ..
سدن .. بس هسا يله عرفت انو جدي الي جبرة ..
درة .. جدج وليش ؟؟
سدن .. جدي جان يعرف بمرضه من زمان بس محد يدري بس ابوي ..
وهو الي طلب من يوسف وگاله اريدك تتزوج بنت عمك واشوف جهالك .. ويوسف من سمع بمرض جدي ماگدر يرفض لان تعرفين شلون متعلق بي ..
وحتى امير يدري وسكتوا وماحجوا ..
درة .. ماادري شأحجي .. الوم الشيخ لو الوم يوسف لو الوم القدر ..
ليش الشيخ جان ضامن روحة يعيش ويشوف جهالهم هالمات وماشاف شي منهم ..
اعذريني الميت مايجوز واحد يحجي عليه ..
بس بسوايته هاي حطم گلبين .. فكر ببنت ابنة ومافكر ببنت الناس من يروح حبيبها من اديها شيصير بيها ..
وهذا مايمنع انه يوسف هم غلطان ..
لان ماكو واحد ينجبر على شغله مارايدها ..
وجان يگدر يناقش جدة ويقنعه بس هو اختار الحل الاسهل ..
كافي سدن سدي الموضوع اني خلص رضيت يوسف مو قسمتي ومقتنعه ..
واصلا مشاعري تجمدت وماعادت مثل الاول ..

مرت الايام وخلصت السنة الدراسية ..
وعطلنا ..
واجاني خبر مثل الصاعقة ..
بيوم گاعدين نتغدا .. خابرت حوراء الزينب وبشرتها حامل الها ثلاث اشهر وماتدري بروحها ..
وفرحانة…
سدت الموبايل زينب وبشرت سدن ..
بسرعه وگغت الخاشوگة من ايدي واتخربطت احوالي ..
الي اعرفه حوراء صارلها فترة مريضه وتشكي من قالونها وحتى گالوا تنتفخ بطنها بسبب القالون ..
بس مااتوقعت تكون حامل ابد ..
شنو حال يوسف هسا ..
اكيد فرحان وماسايعته الدنيا ..
مااعرف ليش ضجت بس ماردت ابين ..
وكملت اكلي بهدوء وگمت الغرفتي ..
دخلت وطلعت رسائله وكلشي يخصه ..
وشگگتهن وابجي ..
دخلت سدن ..
درو حبيبتي حقج .. بس مو هيج ..
باعي اني هسا اگلج انسيه وعيشي حياتج كافي رابطة نفسج بحبه وذكرياته ..
يوسف مايستاهلج .. غير هو اخوي بس اني اگلج مايستاهلج انتي تستحقين واحد يحبج ومتمسك بيج مثل مهيمن الي عرفته ماخذ ناس وعالم ورايح العمامج ..
وطارديه ..
هذا انسان يستحق تبدين حياتج وياه مادامة مستعد يسوي كلشي علمودج ..
مسحت دموعي وجمعت الورق كله وخليته بالمجر ..
وگلتلها .. مااريد اتأمل كافي .. اعرف بحياتي ماراح اتزوج ولايصير عندي عائله واطفال بسبب ابوي وعمامي وتتوقعين يعني بعد ماطردوهم وفشلوهم بعد يفكر بيه
اني هذي حياتي ..
والافضل تتعودين على وجودي يمج العمر كله ..
سدن .. على گلبي مثل العسل بس هم انتي اختج واتمنى اشوفج سعيدة واولادج يلعبون وي اولادي ويمكن اخطب بنتج الابني تحجي وتضحك ..
گدرت تخليني ارتاح ..
هالانسانة نعمة الله انطاها الي ..

بعد فترة زينب راحت وي حوراء للطبيب وطلع بيها بنية .. وضاجت وانقهرت ..
واجت تبجي وعلي وامي يواسون بيها ويگلولها شبيها البنيه اهم شي تمام الخلقة ..
بس هي بقت ضايجة وتصيح مااريدها اني ردت ولد .

يوسف .. من تقربت عليها مرة بعد ماوصلتلها لهذا جنت مطمأن مو حامل رغم مرضها وقالونها منتفخ وتتعب ..
الا انه بالسونار بين اكو طفل ..
الدكتورة .. ماما انتي حامل شلون جاي تاخذين علاج وتلعبين بنفسج ..
فاطمة .. يادكتورة شلون حامل هي عندها تكيس من هي بنية والدورة مامتتضمة عندها ..
الدكتورة .. اي ماما اكو تكيس يصير حمل عليه مباشرة .
طلعت حوراء تسولفلي وامي ويانا وفرحانة واني مامصدگ
والصراحة شكيت للحظة ..
يوسف .. منين حامل ولج ..
حوراء .. شنو من منو شبيك يوسف اني عليه ثلاث اشهر هسا ..
بقيت مصدوم وامي تندس بيه وتخزر ..
معقوله من مرة وحدة .. رحمتك ربي هسا اني شسوي اضوج لان راح يجيني طفل من حوراء ..
لو افرح لان راح اصير اب واحقق امنية جدي ..

لكن بعد شهر انگلب البيت عزا لمن اخذت سونار بيها بنية وتبجي ..
بيومها اني مارحت وياهن ..
نزلت من فوگ وجاي من الدوام تعبان ..
-شكو شبيج تبجين الطفل بي شي ..
ام يوسف .. يمة معليك بيها هاي مخبله لان بيها بنية تبجي ..
ام مرزا .. وشبيها البنية خالقين ايد رجل منها ..
فاطمة .. الظاهر مكتوب على خلفتنا البنات الله يعين حظجن يمة ..
ام حمزة .. خايبة ماتنلصمين انتي . مو جنت مرتاحة وگاعدة هنا وبالي بارد لو ما حمزة يجي ويتوسل ارضى وارجع جان ماشفتج ولاشفت همج ..
بمكان ماتعقلين بناتج وتعلميهن .. تروحين تحرضيهن لان بيهن بنات ..
يوسف .. حوراء كافي .. بنية ولا ولد كلها نعمة فضيله ديري بالج على روحج والي ببطنج ومعليج بالحجي ..
هي فرحت وجنها منتضرة مني هالكلمتين ..
طلعت واني عيني ع السما .. الحمد الك والشكر ربي
جدي زوجني وحطمني وبعدني عن حبيبتي علمود الولد ويكثر نسله ..
وتالي مااجة الولد .. ااااااه ياابن ادم ..

رحت يم امير للمعرض وگلتله راح تجينا بنية فرح وگال بنتك الكروري ..
يوسف .. مو خاف تندم بعدين امها حوراء وبيبيتها فاطمة طگ من الضحك ..
وگال .. اني اخذ بنت ابوها .. لان اعرفك راح تربيها على طبعك ولاتنسى عمتها سدن وبيبيتها ام يوسف وهذا يكفي ..
يوسف .. بهاي غلبتني . ولاتصدگ اخلي بنتي تاخذ طبعهن ان شاء الله اربيها على ايدي وايد امي وبيبياتي
كل فكري يم درة وشصار بيها من سمعت .. حتى سدن ماتحجي وياه وماتنطيني حجايه جان خابرت اطمان ..
امير .. دريت عملة ابوي الجديدة ..
يوسف .. شكو
امير .. الولد الي خطب درة مبين خوش ولد ومتمسك بيها اخذ ناس وعالم وراح للابوي وعمامي ..

يوسف .. وشصار ..
امير .. طردهم .. لان حضرت قيصر افندي گالهم بنت عمي الي وماتصير الغييري وابوي مطربگ وياه ..
تطخ براسي ازوجها من غير علمهم وشيسوون خلي يسووون ..
يوسف .. ارتاحيت من سمعت طارديهم مدري ليش هالولد معاند عليها .. يصير بينهم شي هالمتمسك بيها بس لا درة تربات ايدي واعرفها ماتسويها وهي تعرف اكو نهوة بالوسط ..
اووووف يهالنهوة وقيصر الكلب. . شگد ردنا نخليه يتنازل عنها مقابل يطلع من السجن بس هو اتحمل السجن وعاند ومافك النهوة ..
وگال الا اخليها تعنس ولااخذها ولااخلي واحد غيري ياخذها ..
بذاك اليوم ردت افلش وجهة لو مااحنة بوسط محكمة ..

درة .. اجة امير وگال يوسف راح تجيهم بنية ..
زينب ضاجت الظاهر جانت تدري وماحجت ..
وخاصه هي رسبت هالسنة هم لان حامل وماقرات ..
فأكتأبت كلش ..
ياقوت .. الحمد لله على تمام الخلقه يمة .. هذا صديقك متبطر الناس حسرتها ع الطفل ..
صفنا على ححيها والمشكله زينب جانت گاعدة ..
زينب .. عمة مو صديقه يوسف يوسف وحوراء راح تصير عندهم بنية ..
احنه كلنا صافنين ..
امير راد يغير الموضوع حتى ماتحس زينب ..
ياقوت .. يوسف منوووو .. اگلك ابوك وين شو اتأخر ماتشوفه وين صار خلنا نتعشا ..

زينب صافنه وتضحك .. ياااا هاي عمتي شبيها ..
علي .. زينب اسكتي ..
زينب .. شكوووو
علي .. بعدين افهمج ..
دگ تلفون امير ..
واني اخذت امي گومتها للغرفه ..
لان هي من تنسى وتجيها النوبة تصير هادية وتصفن مثل واحد ينسى ويريد يتذكر ..

سمعت امير گال هذا احمد خير ..
الو احمد ..
صفن وتغيرت احواله .. وهساااااا ماتتتت الى رحمة الله
من سمعنا بيها موت تخبلنا بعد مو حمل هم وحزن ..
وديت امي لاتسمع ..
گالت انطيني سجادتي خلي اصلي ..
درة .. يمة قبل شويه صليتي هاج هاي دواج وراتاحي بلعتة وتمددت ..
بالي كله اريد اعرف منو المات ..
طلعت وسمعته يگول ابوي ..
درة ... ابوييييي الي مات .. ماادري ليش اقشعر بدني ودموعي نزلن رغم كارهتة بعد ماكان السبب بتعاستي هو ..
امير .. لا مو ابوي .. ابنة الجبير ..
درة .. حمودي ليش وشلون ..
امير .. ابوي مشتري سلاح للحماية ولان الوضع مو زين
ومخليه فوگ الكنتور ..
صاعد الصغير يلعب بي ..
دخل محمد للغرفه وشافه .. راد ياخذة منه مدري يگله ذبة ..
ذاك يلعب وياه وعباله لعبة والظاهر ابوي ساحب اقسام وعافية بدون مايأمنه .. وطالعه طلقه منه براس محمد ..
لطمت على وجهي ووگعت ..
رغم مامعاشرتهم ولا شايفتهم بس من همة صغار بموتت بيبيتي الا صورتهم مافارگت بالي ..
علي .. لا حول ولاقوة الا بالله .. وابوي شصارله ..
امير .. ماادري احمد يگول صديقه گايله مجلوط وماخذيه للمستشفى ..
طفرت من مكاني وگلتلهم .. اريد اروح اشوفه !!

بقلمي_الكاتبة_شمس
يتبع ....

[لامارا]

// البـارت الرابع والـثلاثـون ////
عجـاف_القلـوب ..
الكاتبـة_شمـس ..

بيومها حتى عشا مانشتهي من سمعنا الخبر ..
درة .. امير هاااا شگلت ..
امير .. شأگول درة تحجين صدگ .. شعندج ترحين نسيتي الي سواه بينا ..
درة .. اني وياك امير .. صح انت او امي واخواني وعيتو على قسوتة وضربة وطردة النا ..
وانت تحملت المسؤوليه بصغرك بسببه .. بس اني تأذيت اكثر .. اني الي ضاعت سعادتي واحلامي بسببه ..
اني الي انهدم كلشي حلو بيه بسببه ..
بس الموت والمرض مابيهن شماته .. وهيج ربتنا امنا .

امير .. بوية افهميني هي مو قصة شماته بس سواياته الشينة هواي وگلوبنا ماعادت تنقهر لو تحزن عليه ..
والله اني ماضايج ولاحزنان الا على هالطفل الصغير ..
الي ماله ذنب وتحمل ذنب امة وابوه ..

درة .. اني هم مقهورة ع الطفل ولاعبالك اروح من حبي الابوي بس لغاية ببالي ..
علي .. درة كافي ليش تلحين ..
امير .. لا خلها هذا حقها وماامنعها .. خلي يطر الصبح واخابر احمد واشوف لان هو وابوه راحوا جنانيز وياهم ..

ثاني يوم گعدت ..
وشفت امي بالمطبخ جاي تطبخ ..
حصنتها .. شلونة الحلو ..
ياقوت .. ها خير شبيج اليوم ..
درة .. انتي شبيج شو ضايجة وعيونج ورامة ..
ياقوت .. هسا خابرتني خالتج ام احمد وگالتلي خبر ضوجني ..
درة .. قصدج على محمد ابن ابوي ..
ياقوت .. جا شو اني ماادري ..
درة .. احمد خابر امير بالليل وانتي نايمة ماگعدناج ..
ياقوت .. هسا گالتلي ابوج انگلب شرجي وانشل وبالمستشفى .. حتى الجنازة خواله وعمامج الرايحين بيها ..
درة .. وهسا ابوي وين ..
ياقوت .. بالمستشفى العام هنا بالديوانية .. خلي يجون اخوانج وروحوا شوفوه ..
بقيت صافنه بوجهها وعبالي نوبة من نوباتها ..
ياقوت .. شمالج صفنتي ترى صح هو قهرنا وأذانا بس مانصير مثله .. وماامنعكم عنة ..
حضنتها وبستها .. ليش هو اكو اطيب من گلبج انتي ..

اجت سدن وشايله كروري ..
وتحجي نيابة عنه ..
صباح الخير بيبي اني اجيت ..
ياقوت .. يمة بعد بيبيتك صاير نسخة من ابوه بصغرة ..
سدن .. يعني اني احبه اكثر مما يحبني شفتو شلون .
درة .. والله تأمنين بيهج سوالف ..
سدن .. لا ماأومن لان اعرف امير يحبني شگد .. بس هاي سوالف بيبياتي ..

نزلت زينب مالها خلگ وتعبانه ..
وبطنها لگدام ..

ياقوت .. ها يمة شبيح ..
زينب .. ماادري شو عندي نحول ومسخنه الليل كله مانمت ..
ياقوت .. خابري رجلج خلي يروح الشارع الاطباء ويحجزلج السخونة مو زينة وتكتل الطفل ..

زينب .. هو خابرتة وراح يحجز . واني راح امشي الاهلي ومناك تاخذني امي ..

دخل امير ..
تفاجأنا بجيتة هيج وكت ..
گال ..
يله درة بدلي وتعاي ..
ياقوت .. ها خير ..
امير .. تريد تشوف ابوي .. احمد خابرني هسا يگول حالته كلش ..
ماادري هيج گلبه حنين ويحب ولدة ..
جا شو ماانقهر علينا ولاانجلط من طردنا ومن عافنا سنين
ياقوت .. لايمة لاتگول هيج .. جايز حس بقيمتكم من خسركم هالتعلق بولدة ..
وترى يمة مهما يصير بس الضنا غالي وصعب تشوفه يموت گبال عينك ..
امير .. يمة انتي شنو من گلب شايله .. اووووف ودخل للغرفه ..
راحت سدن وراه ..
واني رحت ابدل ..
سدن .. شبيك امير ..
امير .. مقهور على امي .. معقوله مرة شايله هيج گلب وهيج عقل وحكمة توزن بلد .. وتالي كل هذا يختفي.
والله حريمة ..
سدن .. گول يالله هذا امر الله ومابيدنا شي. بس اني اشوفها احسن صح تجيها نوبات بس مو دوووم يعني بالاسبوع او اكثر مرة وهذا الشي زين ..
تتذكر من گلت الدكتور گال اذا نوبات النسيان قليله معناها المرض يمشي بطيئ ومايتطور بسرعه ..
امير .. ان شاء الله صعب اگدر اتحمل نسيانها بسرعه .
اگلج زينب خو ماحجت شي ..
سدن .. لا ماحجت ..
امير .. مو علي گال مسولفلها بليل من بعد ماصارت حاله امي .. ومنبه عليها ماتحجي ولاتگول الاحد ..
سدن .. ها زين هم هي اليوم مريضه مو بحال السوالف
امير .. اي گال علي يريد يحجزلها ..
يله خلي اشوف درة وامشي بسرعه وارجع لان علي يريد ياخذ مرتة الاهلها ..

درة .. بدلت وكملت .. واخذني امير ورحنا للمستشفى.
كنت مامرتاحة وگلبي يدگ سريع ..
ليش ماادري ..
وصلنا للانعاش ..
گالوا ممنوع الدخول اله ..
لگيت رجل عمتي بلقيس يمة ..
الرجال سلم عادي وگال مايخلون واحد يشوفه ..
امير .. وهسا شلونة ..
احسان .. احسن من البارحة .. البارحة گلنا مات .. من شاف ابنة سابح بدمة وذاك مغمي عليه لبالة اثنينهم ماتوا وگع وصار خشبه ..
تلاحگنا للمستشفى وحتى ضربات كهربائية سووله لان نبضه ضعيف ..
بس اليوم گعد ويون اريد ادفنه بيدي ..
ويبجي لان ماگدر يدفنه ..
امير .. لا حول ولاقوة الا بالله ..
احسان .. صح مالي حق اتدخل .. بس ابوكم محتاجكم هسا .. لاتعوفوه ..
امير .. ولو مايصير احجي هالحجي . بس يعمي من باعنا وشمرنا شو ماكو واحد بيكم گاله اولادك محتاجيك وروحلهم واحتويهم .. هسا من وگع وزاد حمله گلتوا هيج ..
درة .. رجل عمتي يحجي واني ابجي مااتحملت الموقف ..گلت ..
امير هسا شلون مااشوفه ..
امير .. راح احجي وي الطبيب واجي ..
راح واجة ..
اشرلي اجي ..
دخلت وياه ..
ورجلي ماتشيلني ..
بالگوة امشي ..
وصلنا يمة .. صدرة مليان صوندات ..
ومخليله صوندة بخشمة مال تنفس ..
جنت واگفه ودموعي ينزل .. عليه او على الي سواه بينا او على شنو ماادري المهم گلبي مااتحمل اشوفه بهيج منضر وحلگة اعوج ..
حسيتة صاحي ويسمعنا لان يرمش ..
امير .. يله امشينا اصلا ماواعي ومايشوفنا ..
فتح عيونة بتثاقل وجان يون وكلماتة مامفهومة ..
بس الي فهمته اسمي دلة .. عود درة .. وبلگوة تطلع من السانة ..
حمد راح مات .. شورتي بية ..
التفتت ومسحت دموعي ..
امير وگف على جهة ..
درة .. مو زين عليك الحجي لاتحجي ..
حاكم .. سامممممحيني وبالگوة تطلع منه ..
درة .. خلص لاتحجي ..
حاكم .. لاتعوووووفيني ابقققققي اااهناا.
وجانت عيونة تبجي ..
باوعت الامير ..
هز راسة بمعنى لااا . تحجين صدگ درة هاي ردهة زلم مستحيل اخليج هنا ..
اتقربت منه ..
مسحت على راسة وگتله ..
اني راح ارجع اجيك واشوفك .. بس مااگدر ابقى ..
غمض عيونة وهز راسة ..
طلعت ومااتحملت ..
وامير بقى يمة ..

امير .. ماجاي اشوفك ولاجاي اتشمت بيك .. لان ماخليت مشاعر داخلي اتجاهك لاحب ولاكره ..
بس الله يشافيك هذا كل الي اگدر اگوله ..

حاكم .. ادري الي صااااارلي من دعواااتكم عليه .. بس اذا متت ابرولي الذمة ولاتحررررمني من درة ..
امير .. استغفر الله .. هسا انت بوضع مااگدر الومك لو احجي وياك .. بس درة مالك حق تطالب تشوفها .. لانك اكثر واحد ضلمتها .. حرمتها من الشخص الي تحبه وتعذبت بسببك ووصلت الموت .. وهي تشوفه ياخذ غيرها وانت مارف گلبك عليها .. وهسا هي الي جابتني هنا وشفت دموعها عليك شلون ..
خطيتها راح تبقى برگبتك ..
گام يبجي ..
عفته وطلعت ..
وصيت الممرض عليه ..
خوية بس شوف المريض الي بذيج الردهة لاتتأزم حالته
طلعت لگيت درة منتضرتني وعيونها حمر ..
امير .. كافي درة لاتخليتي بعد مااجيبج ..
درة .. يعني راح تجيبني مرة ثانية .. والله الحد مايصير زين وبعد مالي شغل بي .. اصلا صعب اسامحة وانسى ع الي سواه بيه ..
امير .. ادعي ينعدل ويحس على ذنبه ويصححة ..

رجعنا وامي مابطلت سؤال عليه .. وتلوم بروحة لان جانت تدعي عليه وتگول طاحت الدعوات بالطفل ..

مر كم يوم وخابر احمد ..
حجة وي امير ..
وگاله يصير خير ..
ياقوت .. هايمة شكو ..
امير .. ابوووي طالب يشوف درة ..
ياقوت .. خير شيريد ..
امير .. نروح ونشوف ..

اخذني امير ورحنا .. جان هناك عمي قاسم وقيصر ..
شافونا تفاجأوا ..
قيصر .. شتسوي هنا هسا ذكرتوا عندكم ابو ..
امير .. انت تسكت حباب لا اهينك هنا بوسط المستشفى لو تعودت ع السجن بين فترة وفترة ..

اشرلي وگال .. انتي دخلي شوفيه واني منتضر هنا ..
دخلت شفته حالته تعبانه بس يگدر يحجي لكن النفس بالگوة ياخذة ..
شافني ابتسم ..
اجاني احمد وابوه ووصيتة اشوفج بس ماتوقعت تجين
درة .. شلون صرت ..
حاكم .. شلوني .. صفيت وحدي بهالمكان .. وكل الي يجي دقيقتين ويروح وعايفيني وحدي .. حتى مرتي مااجت ولاشافتني ملتهيه بالفاتحة وحزنها ..
درة .. بس انت بالانعاش وحتى الي يجي مايخلوه يشوفك واذا كلش دقايق ويطلع ..
اصلا الحجي مو زين عليك ..
حاكم .. خاف اموت اريد ابري ذمتي ..
جان حلگة اعوج وبالگوة تنفهم كلماته..
-اني كسرتج وضلمتج والله عاقبني ..
درة .. مو بس اني امي واخواني كلنا ضلمتنا ..
حاكم .. بس ذولاك جانوا يگدرون ياخذون حقهم مني الا انتي سكتي على ضلمي وهاي النتيجة ..
منا وجاي اني محررج من النهوة .. ومادام اني محررج محد يگدر يحجي بعد ..
درة .. وشنو الفايدة بعد ماتفيدني ..
حاكم .. بعدج صغيرة والف واحد يتمناج ..
درة .. وقيصر تتوقع يقبل ..
حاكم .. روحي صيحيهم ..
رحت صحتهم ..
الدكتور ماقبل گال مو كلكم بس امير گاله هو المريض طالبهم ..
دخلوا ووياهم امير واگف بعيد ..
حاكم .. اسمع قاسم انت وقيصر .. فكيت نهوة درة .. وبعد مالكم شغل بيها اني ابوها وبعد مالكم شغل بلي يجي ويخطبها ..
قيصر .. هي لعب مو انت الي ردت هالشي وعاندت امي واهلي ووافقت ..
حاكم .. بعدني على وعدي الك بس هالمرة اذا عفتها بحالها وفكيت النهوة عنها .. والي تريدة يصير ..

قيصر .. هاهي مالي شغل بيها بعد ..
امير .. شايف انذال مثلكم ماشايف .. تتساومون على مستقبل اختي .. وشنو هالوعد الي خلين بنتك لعبة بيدة
جنت عبالي من صدگ رايدها وينهى عليها ..
بس طلعت لعبة منك ..
مع الاسف كل يوم اكتشف شي جديد بيك يخلني مااندم على قسوتي عليك ..
يله درة امشينا ..
جانت نضراتي الابوي اسف وخيبة امل ..
وهو جان يباوعلي بندم واعتذار ..
تركته ومشيت من غير اي كلام ..
شگد انقهرت وبجيت وجنت اصبر بروحي واگول ابوي ماله ذنب .. قيصر هو الي نهى وابوي من خوفه منهم وافق وماگدر يحجي ..
صح عذر سخيف بس ماردت اخلي اللوم عليه واكرهة ..
وهسا اكتشفت هو الي ساوم قيصر وخلاه ينهى عليه والله العالم مقابل شنو ..

رجعت للبيت مالي خلگ كلشي ..
وحطيت كل صوري وياه الي جنت محتفظة بيهن وشگگتهن مايستاهل دمعه مني ..
هذا مستحيل يكون ابووو ..
وحتى الي صار وندمة مايشفعله الي سواه الي ..

يوم كامل واني حابسة روحي بالغرفه ..
حتى مافرحت بفك النهوة ..
بعديش والاحبة راح مني وصار بحضن غيري ..
دخلت سدن ..
گالت .. درة المفروض تفرحين واخيرا راح تشوفين حياتح ويصير عندج العائله الي تتمنيها ..
درة .. ياعائله سدن .. انتي تعرفين اني مااتخيل حياتي الا وي شخص واحد وراح ..
سدن .. اعرف يوسف انجبر بس صدگيني انت تستاهلين الاحسن .. صعبه اگلج انسيه وعوفيه لان هو اخوي ..
بس مستحيل اگلج اقبلي بي على حوراء .. لان اعرفج ماراح تنسعدين ..
درة .. تحجين صدگ سدن .. طبعا لا .. صح لساتني احبه بس مااقبل ادمر حياة مرتة وبنته الي بالطريق ..
مااگدر ..
سدن .. جا گومي ولاتسوين بنفسج هيج امج واخوتج مقهورين عليج كافي گومي ..
دگ الباب امير ..
كملت مرتي المقدمة لو لا ..
درة .. هههههه يعني انت الي دازها ..
سدن .. لا والله اني گتله راح اروح احجي وياها ..
امير .. لا مو اني بس اعرف مرتي الحلوة هاي الي گدامج تگدرن تقنع بلد بلسانها الحلو ..
سدن .. اموووواح اموت عليك ..

درة .. بله انتو جايين تواسوني لو تتغزلون يمي .. راعوا شوية اكو بنية مامتزوجة يمكم شنو الغزل ..
امير .. ههههه ياسخيفه .. لاتخافين ماراح تعنسين انفكت للنهوة وراح اتحضر للطابور الي بالباب والخطاطيب ..
درة .. هههههه بس هاااا مو اي واحد الا اذا اقتنعت بي
امير .. وتبصمين بعد .. وهسا يله بدلي وخلينا نطلع نتعشا برة ..
درة .. شو كلما تشوفني ضايجة تگلي خلي نتعشا برة هسا من حور المطاعم الموجودة بالديوانية ..
اشو كلها لفات گص وكباب وناكلهن بالسيارة هههه
امير .. انتي مو وجه نعمة .. اروح اجيبلكم عشا لهنا احسن ..
درة .. لا مورتك خلينا نطلع وفررنا وقابله اكل بالسيارة ..
امير .. لا راح اخذج للكورنيش حتى ماتگولين ناكل بالسيارة ..
ضحكنا اني وسدن ..
وگمت بدلوا وهمة طلعوا يبلغون امي ..
مشينا كلنا تعشينا برة ومناك اجو زينب وعلي ..
وبلغهم امير بفك النهوة ..
علي فرح بس زينب حسيتها ضاجت .. واعرف السبب ليش كل توقعها راح اخذ يوسف من حوراء ..
افترينا وكملنا ورجعنا للبيت ..
خابرت هلي وبشرتها فرحتلي ..

بعد كم يوم اتفاجأت بنسوان بالباب ..
راح سدن فتحت الباب واجت تركض ..
وج درة ذني امهات مهيمن جايات ..
درة .. اسم الله اشتمن شني .. ماادري ليش اجت ببالي هلي ..
رحت خابرتها ..
درة .. هلي انتي عندج اتصال بمهيمن ..
هلي .. هاااا لاتزعلين مني درو والله انتي اختي وتهمني مصلحتج .. مهيمن هو الي ترجاني واخذ رقمي حتى يعرف اخبارج ولو ماادري بي يحبج ما گتلة على فك النهوة ..
درة .. وامهاتة ذني شرفن بالبيت ..
هلي .. لا بربج . بس شجابهن ..
درة .. ليش ؟؟مافهمت ..
هلي .. مو الي ادري بي شالوا البغداد ..
درة .. صدگ ليش ..
هلي .. راحوا يم عمامهم هناك بالكاضمية لان هم اصلا مناك بس بعد السقوط اجو للديوانية ..
درة .. ياااا واني اگول لهجته تختلف وعبالي يتماوع ..
هلي .. درة هذي حياتج بس نصيحة اخت الاختها لاتفوتين هيج فرصه ..
درة .. ماادري عقلي مشوش وتدرين بگلبي شنو ..
هلي .. فكري زين وتاليتها عقلج يغلب گلبج ..
درة .. بس ببغداد صعبه مااگدر افارك اهلي وخاصه امي هلي .. شنو السالفه هاهي وياها بغداد ..
وبعدين انتي اشرطي عليه واگعدوا هنا ..
وهو اصلا دوامة هنا حتى لو يأجر بين ماتكملون جامعه
درة .. اي خانم وماقررتي شكم طفل نجيب .. شو حياتنا كلها رسمتيها لگدام ..
هلي .. هههههه ادري بيج ثوله وماتفتهمين لهذا اخططلج حياتج ..
درة .. اگلج اني اصلا مامتقبله الفكرة ولااريد اتزوج وانتي شتگليلي ..
هلي .. زين خليها فترة خطوبه وبين ماتكملون تزوجوا ..
درة .. ماادري روحي هسا روحي وبعدين اشوف ..

صاحتني سدن گالت بدلي دشداشتج وتعاي النسوان گاعدات ..
بدلت واجيت ..
سلمت ورحبن بينا .. وجانت زينب گاعدة وخاله ام يوسف امي دازة عليها ..
ياقوت .. شوفي خية .. احنه هالفترة حزانة ع الشيخ وتعرفين الوضع ..
ام مهيمن .. ادري خيه بس البنية سكة وبنا متمسك بيها ويريدها .. واحنه شلنا وگتلج وضعنا يعني مانگدر كل يوم رايحين راجعين ..
بس ع الاقل انطونا كلمة والبنية النا وبعدين نسوي كلشي رسمي .. ها شگلتي ..
ياقوت .. انتي انطتيني رقمج واني اشوف اخوتها والبنية وان شاء الله اخابركم واردلكم الخبر ..
ام مهيمن .. اريد البشارة منج ام امير الولد والله گاعد على نار ..
ياقوت .. ان شاء الله والله انتو دخلتوا گلبي ومو گدامج احجي ..
ام مهيمن .. الگلوب نفسها والله يله احنه نترخص لان ورانا طريق ..
سلمن وبوسني وطلعن ..
وكلهن گابلني ..
زينب . ها شگلتي درة والله مبينين خوش ناس وببغداد بعد شتردين اني منج اوافق شفايتلي لو اعيش هناك جنه درة .. وانتي ماصدگتي حتى تخلصين مني موو.
زينب .. لا عليمن بس المصلحتج غير ..
خاله ام يوسف ابد ماحجت وجانت ضايجة ..
بس امي فرحانة وتگلي ارتاحتيلهم واخوانج سائلين عليهم خوش ناس بعد ماكو حجة ..

الكل موافق ومقتنع الا اني .. مااعرف ليش داخلي مامرتاح او الخوف من انه ابتعد عن امي واتزوج هي الي مخوفتني ..

لليل اجو اخواني وامي سولفتلهم ..
وحيدر يگلي دوافقي وبلكي عندة اخت واخذيني وياج هناك گعيدي ويضحك ..

امير .. حبيبتي هاي حياتج والقرار الج .. وانتي شتگولين احنه وياج ..
درة .. ماادري خلوني افكر ..

رحت للغرفه اريد انام ..
اجت سدن تركض ..
درة .. شبيج ليش هيج ترجفين ..
سدن .. ولج راح انجلط من ورى اخوي ..
درة .. يوسف ؟؟ ليش شبيه ..
سدن .. درة بفك النهوة وبمهيمن ولعب جوله وهسا يگول لو تحجي وياي بالموبايل لو اني بالباب اجي وادگ الباب والي يصير يصير ..
درة .. هذا شبي اتخبل يعني راح تجيه بنيه وهو بعدة يراهق. .
سدن .. الحب هذا الحب خيه ..
درة .. اثبتي انتي الثانية ياحب هذا .. مو هو الباعني ..
سدن .. هاج هذا يدگ ..
شمرتة عليه وطلعت بالباب ..
ايدي ترجف ترددت يله فتحته ..
الو ها يوسف شرايد عود اتجرأت ..
يوسف .. وحق محمد اذا وافقتي اگلب الدنيا ..
درة .. وليش وانت شيخصك ..
يوسف .. درة لاتخبليني انتي الي وماتصيرين الغيري فاهمة ..
درة .. انت ناسي راح تصير اب . بعد شعندك يمي ..
يوسف .. واذا .. هالشي مايمنع اخذج مرة الي ..
درة .. قصدك تاخذني مرة على حوراء .. لا يوسف انت متوهم .. اني مااحب احد يشاركني بزوجي .. لو اول وحدة لو ماكو ..
يوسف .. مستعد اطلگها او ماتجيب ونتزوج ..
درة .. واطلع اني السبب بخراب بيتك موووو .. يوسف شوكت تفهم احنه طريقنا مسدود وماننفع البعض ..
يوسف .. بس اني احبج درة وانتي تحبيني وادري بيج مستحيل تحبين غيري ..
درة .. صح جنت احبك بس مايمنع ابدي حياة جديدة واتزوج انسان انتضر وصبر وحاول مثل مهيمن ..
يوسف .. يعني هيج الحجي صار بسيطة درة .. بس ثقي بالله مستحيل راح ترتاحين وي غيري ومستحيل تصيرين الغيري ..
درة .. مع السلامة يوسف .. سديتة بوجهة. وفرفحت بجي اجت سدن گلتلها اخوج اناني ..
ولج تزوج ومرتاح وراكض وراي لسا شيريد ..
سدن .. انتي اذا ماترديه وتحسين نفسج صدگ نستيه اقبلي بمهيمن .. واخلصي ..
وهو راح يقبل بالامر الواقع ويسكت ..
درة .. ماادري ماادري .. مااريد اطلع من غلط واوگع بأكبر .. ولج بصلافه يگلي اطلگ حوراء ..
لان هي هينة .. يريدني ابني سعادتي على تعاست غيري شگد اناني اذا ..
سدن .. اسكتي يمعودة لاتسمع زينب وتنگلب الدنيا ..
اني الصبح اخابر امي واحجي وياها ..

ثاني يوم اجة امير وگال راح يجي خالي مرزا وخاله ام يوسف ..
استغربنا شعندهم ..

بعد مااجوا .. حجة خالو مرزا وگال ..
بوية الشيخ قبل مايموت وصاني اجمعكم انتي ويوسف مثل مافرقكم ..
الي صار غصب ويوسف انجبر واخذ بنت عمة مااريد ابين انه مضلوم بس هذا الي صار ويوسف وافق لاجل جدة وماراد يكسر حجايته وهو مريض وعلى وشك الموت ..
بس ابوي وصاني اني وامير انه اذا بيوم صارت فرصه نجمعكم سوة ..
وهسا جاي اخطبج اليوسف رغم حزني على ابوي بس مايمنع نعقدلكم والعرس بعد السنة ..
درة .. خالي مع احترامي الك بس انت ناسي يوسف متزوج ..
مرزا .. بس الرجال محلل الله يتزوج اربعه ..
درة .. واني مااقبل لااتزوج عن شرج ولاابني سعادتي على سعادة احد ..
ام يوسف .. الله شاهد يمة انتي الي تمنيتها من الاول الابني بس الضروف عكست ويانا ..
مااگدر اخليه يطلگ بنت عمة مايصير والناس تاكل وجهنا وراح تجيه بنيه منها ..
بس بنفس الوكت مااريد اشوفكم مضلومين وواحد رايد الثاني ..
درة .. لا خاله اطمأني اني شايلته من بالي ومااريدة .
واصلا اخذت قرار وفكرت بمستقبلي ..
وشفت الولد الي خطبني او الانسب الي ..
اني اريد استقر واعيش حياتي بدون مشاكل .. وحياتي وي يوسف مستحيله ..

مرزا .. يعني هذا اخر حجي ..
امير . خالي اني گلتلك البارحة اي قرار تاخذة درة اني مااعارض عليه بس هذي حياتها ومااريد نضغط عليها ويوسف اخوي بس مصلحة اختي اهم عندي ..

ترخصوا وطلعوا وهمة عندهم امل افكر وارجع جواب الهم ..
نزلت زينب شافتهم طالعين سألت شعندهم ..
سدن .. اجو مسيرين مايصير ..
اني دخلت للغرفه واتصلت بهلي ..
الو هلي ..
اريدج تخابرين مهيمن وتگليله اذا درة وافقت يتحمل ويصبر ومايستعجل بالزواج والى ان نتعرف على بعض
شوية واتصل رقم غريب ..
عبالي هلي ..
رفعته ..
صوت ولد .. سكتت ..
شلونج درة اني مهيمن ..
خرررب يومج هلي شلون تنطيه رقمي ( احجي بداخلي)
مهيمن .. اعتذر اذا تجاوزت واخذت رقمج من غير اذنج بس لازم احجي وياج ..
الووو درة وياي ..
-اي اسمعك
-اشوفج مترردة والف سؤال ببالج .. هياتني يمج اسألي الي ترديه ..
-مهيمن اني بعد لسا باول الجامعه وكم سنة يله نخلص فمااريد استعجل ..
-واني وياج .. تردين نعقد تردين نلبس حلقات اني قابل وشوكت ماتكونين مستعدة نتزوج المهم ارتاح انه انتي الي ..
ها شگلتي ..
-بكيفك ..
-يعني ادز اهلي يتفقون ع المشيه والخطبه ..
-لا خليني احجي وي اهلي وامي تخابر امك .. بس تدري احنه حزانة ..
مهيمن .. اعرف ماراح نسوي هوسة .. ونخلي حفلتنا الجبيرة للعرس .. بعد اكو شي ترديه ..
-سلامتك ..
-الله اول مرة اسمع كلمة حلوة مثلج .. درة اني مستحيل اخليج تندمين على اختيارج وراح اخليج اسعد وحده بس مااريد اشوف هالتردد والمخاوف الي عندج
درة .. ان شاء الله بس خليني شويه شويه اتعود ..
مهيمن .. واني وياج الاخر الطريق .. هسا راح انتضر مكالمة امج على احر من الجمر ..
درة .. زين اروح احجي وي امي ..

سديت الموبايل واني كلي ارجف من التوتر والخوف .. اول خطوة خطيتها بحياتي الجديدة ..
وان شاء الله مااتندم عليها ..

رحت الامي وفتحت الموضوع وياها وانطيتها الموافقه فرحت وگالت الاخواني ..
باركولي وسدن بوستني وحضنتني وحتى زينب جانت فرحانه ويخططن الزواجي ..
امير .. هاهي رجعي الخبر للوادم وخلهم يحددون المشيه ..
درة .. عندي طلب يمك امير .. صح مايستاهل .. بس اريد ابوي يحضر بالمشيه بس هو لاعمامي ولاغيرهم
امير .. بعد الي سواه كله ..
درة .. اريد اثبت اله تربيت امنه مو مثل تربيتة وع الاقل فخر الي گدام الي راح يكونون عيالي ..
مااريد يگولون ابوها ماحضر ..
امير .. احجي وياه واذا يگدر خلي يجي ولو رجله اليمنى مشلوله .. بس نشوف ..

رجعولنا خبر عن موعد المشيه وراح امير خبر خالي مرزا .. حتى يجمع الزلم وتصير ببيتنا ..
امي راحت هي وسدن يتسوگن للمشيه وي امير .. استكانات وگلاصات وشغلات بيت ..
وخلو كروري يمي ..
اندگت الباب ..
زينب ماهي يم اهلها ..
فتحت الباب وتفاجأت بيوسف گبالي ..
جانن عيونه حمر ومبين يبجي او مقهور ..
بسرعه صرت ورى الباب وگتله ..
شرايد يوسف ماكو احد بالبيت روووح ..
گال .. صدگ الي سمعته وافقتي وراح تجي مشيتج هيج نسيتيني يدرتي واختاريتي غيري ..
بقلمي_الكاتبة_شمس
يتبع ..

[لامارا]

//// البـارت الخـامس والـثلاثـون ////
عجـاف_القلـوب ..
الكاتبـة_شمـس ..

يوسف .. صدگ الي سمعته وافقتي وراح تجي مشيتج هيج نسيتيني يدرتي واختاريتي غيري ..
درة .. يوسف روووح ليش جاي هسا .. طريقنا انتهى من يوم الي عقدت بي على حوراء ..
انت تزوجتها وعشت حياتك وراح تجيك بنيه .. عوفني وخلني اعيش حياتي كاااافي تقهرني الخاطر الله ..
يوسف .. لاتبيعيني بسهوله درة .. لاتخلين غيضج وحرگتج تنهي كلشي بينا ..
درة .. ابيع ليش هو منو الي باع ونسى الحب والعشرة والوعود ..
لاتصير اناني يوسف تدري اثنينة ماننجمع ولا راح ننجمع
يوسف .. غلطانة احنه مكتوبين البعضنا وماراح نرتاح وي غيرنا .. لا اني المرتاح وي غيرج ولا انتي راح ترتاحين وي غيري ..
درة .. جربت وياك وماشفت بس الاذية . خلني اجرب حظي وي غيرك .. روووح يوسف ودير بالك على بيتك وبنتك الي جايه .. ولاتنتضر مني شي ..
لهنا وكلشي انتهى وخلص بينا ..
سديت الباب بوجهة وهو يحلف بصوت مخنوگ ..
ادري بيج تحبيني درة .. ثقي بالله ماراح تنسعدين وي غيري ..
عفته ودخلت ودموعي يجرن ..
احس روحي تريدة وعقلي يمنعني عنه ..
گعدت ابجي واندب حظي الماجمعني بي ..

افترگنا بليل ونايمه الناس
خفنه من النهار الناس تعلم
تركنه ارواحنا المايرضن انروح
بالدمعه العزيزة انريد نسلم
الشماته تحولو بفراكنه حجار
الطريق البي گبل نوكف تلعثم ..

سمعت الباب نفتحت ..
ركضت للحمام .. غسلت وجهي وطلعت ..
لاگتني امي ..
هاج عني وتعاي خلي نصفي العلاليگ .
دخل امير الباقيات وگال اروح انزل المسواگ ..

سدن .. كروري نايم ..
شافت وجهي اشرت شبيج ..
اشرتلها تسكت ..
صفينا العلاليگ واخذت الگلاصات والاستكانات رتبتهن بالكاونتر ..
وسدن تريد تعرف شبيه ..
درة .. اجة يوسف ..
لطمت على صدرها .. شجابه ..
درة .. اششش لايجي امير يسمع بعدين اسولفلج ..
التهينا بالمسواگ والعشا ..
اجو علي وزينب ..
بدلت ونزلت ..
بيدها علاگة ..
باعوا شنو اشتريت ..
فتحتها فستان مال حفلات اسود وقصير كلوش ..
گالت بما انه احنه حزانة اخذتة اسود ولان حامل اخذتة كلوش بس عجبني وجنت حايرة شألبس بالعقد مالتج ..

سدن .. ماشاء فكرتي الكلشي .. بس مافكرتي احنه ماراح نسوي حفله هو بس يعقد عليها ويلبسها الحلقه ويرحون ..

زينب .. واذا المهم ابدل اكيد يجن امهاتة واخواتة لو گرايبهم من بغداد غير نتشيك خو مايشوفونا بدشاديشنا السود ..

اني سمعت حجي سدن من گالت يدخل ويعقد عليها حسيت غصة بگلبي ..
تذكرت من جنت ناطرة عقدنا اني ويوسف وشلون جنت فرحانة ..

كملت عشا ..
وگلتلهم مااشتهي رايحة انام ..
امي .. شبيج يمة شني مريضه ..
حيدر .. لايمة هاي توتر وقلق ماقبل الزواج ..
امير .. الي يسمعك يگول مجربها ..
حيدر .. لا بس نسيتو بخطوبتها من يوسف هم هيج…
خزرة امير سكت..
كلامة جان مثل خنجر بگلبي ..
الكل صفن لثواني .. وامير حاول يغير الحديث ويسولف ع المشيه ويگله اجرت كراسي بالحديقه خاف البراني ماتكفي ..
اني دخلت الغرفتي ..
اجت سدن وراي ..
شبيج درة ليش حاستج مجبورة ..
درة .. لا بالعكس جنت مقتنعه بس اخوج بجيته دمرني ..
سدن .. شگالج ..
درة .. يعاتبني لان وافقت .. ويلوم بيه .. ليش منو الي باع بالاول ومنو الي خان غير هو ..
ليش يصير اناني ويطلعني اني الغلطانة ..
سدن .. ادري بي مانساج وبعدة يحبج . ماجان متخيل تصيرين الغيرة ..
درة .. لا گولي مامتخيل تنفك النهوة واتزوج جان متوقع ابقى هيج گباله ..
سدن .. جدي جان واعدة ياخذج اله حتى لو على حوراء لهذا هو يحاول يقنع نفسه بعد ماجبرة يتزوج حوراء ..
درة .. يعني قنعه من غير مايعرف رأي شنو ..
اااااه سدن تعبت صدگ تعبت ..
كلما اگول اريد ابدي حياة جديدة تطلعلي الف شغله وشغله تخربها ..
سدن .. سوي الي مقتنعه بي ولاتشيلين هم للباقي ..
مصيركم تنسون وتبدون حياتكم من جديد ..
درة .. ماادري ماادري ..

دخلت زينب .. خابروا يردون المشيه والعقد بيوم واحد لان مايگدرون يجون من بغداد لهنا كل يوم ..

درة .. لا شنو مو بكيفهم ..
زينب .. شعندج انتي اذا الذهب همة راح يجيبوه ..
درة .. مامجهزة نفسي ومامستعدة اصلا ..
زينب .. لا والله تردين حجة اتأخرين بيها الخطبه مدري ليش ..
درة .. ترى هاي حياتي واني حرة بيها ..
سدن .. زينب شنو هالحجي واذا اتاخرت شنو يعني قابل تبطل .. تدرين هاي ماتصير عدنا .. فلا تحجين حجي زايد زينب .. اوووي اني شعليه ..
عافتنا وطلعت ..

سدن .. معليج منها بس صدگ انتي ليش متقبلين بيوم واحد ..
درة .. ماادري بس مامجهزة نفسي ..
سدن .. هو يدخل يعقد ويلبسج ذهب ويطلع هو اصلا ماكو حفله ..
درة .. ادري بس مامجهزة لبس واصلا مااعرف شألبس
سدن .. اخذي من فساتيني اشو جديدات واغلبهن مالبستهن ..
درة .. لا فساتينج مكشوفات .. اريد شي مستور ..
سدن .. تحجين صدگ غير هو عقدج وبعدين راح يصير رجلج واذا لبستي مكشوف ..
درة .. حتى اذا واصلا هي مو حفله بس يعقدون ويطلعون .. يعني البس شي بسيط ..
اشو مفكره البس من هاي الفساتين الخليجيه الي هسا نازلة جديد حلوات ومرتبات شتگولين ..
سدن .. اي يخبلن ذني .. جا اخذي اللون الحليبي والذهبي ..
درة .. هو هم هيج ننزل ونشوف ..
سدن .. بس اگلج اشو ماجابو طاري المهر شو سكته ..
درة .. تدرين بية ماادور هيج سوالف واكيد من يجون يحجون بيهن بحكم طريقهم والمسافه بعيدة ..
سدن .. اي يمكن ..

اجت امي ..
خابرت عمتج ..
درة .. ياعمتي ؟؟
ياقوت .. ام مهيمن شبيج ..
درة .. شبسرعه سوتيها عمتي يمة ..
ياقوت .. اي اول وتالي تصيحيلها عمة ..
سدن .. اي وشگالت ..
ياقوت .. گالت الذهب احنه نشتريه وان شاء الله يعجبكم ومانجيب البيتنا شلون ماكان ..
واي شي تخسروه صالون لو فستان احنه حاضرين لان نجي قبل المشية ونجيب عدادها ويانا ..
وگالت شگد تردون الحاضر والغايب احنه موافقين ..
سدن .. هسا جنت اسولف .. والله مبينين خوش ناس وماتهمهم الماديات ..
دگ الباب امير ..
سمعنا نسولف ..
امير .. وحتى لو ينطون ملايين .. الي تريدة حبيبتي وتطلبه يجيها ..
بس تامر وتگول ..
درة .. عساك سالم حبيبي ..
امير .. يمة باجر تاخذيها والثوب الي تريدة تجيبه وكل احتياجاتها ..
گمت حضنته وبوسته ..
عصرني حيل بحضنه وگال ..
شلون راح اگدر افارگج .. لا هنا ولا هنا البغداد ..
درة .. هو اصلا اني مااتزوج الا اكمل ..
ومنا الذاك الوكت الله كريم ..
ياقوت .. يمة يارجال ينتضر ثلث سنين ..
درة .. ينتضر وهو اصلا يداوم هنا وعود اذا تخرج وراد يتزوج نأجر هنا سنة والله كريم ..

امير .. الله كريم .. المهم سعيدة ويصونج ويخاف عليج كلش كافي عندي ..

بقينا نسولف بعدها امير اخذ مرتة وابنه وصعدوا ..
بقينا اني وامي وگعدت توصيني وتعلمني ..
كلامها حلو وواعي .. بس للاسف مامشة وي ابوي ..
حبتة وفدتة بشبابها وحيلها وتالي ماغزر وياه وبقت هي الي تعاني وحدها بينا واخرها خلاها تتمرض وتنسى ..
واصلا اني حبيت وضحيت بگلبي الشخص ماگدر يحافظ عليه وباعني بأول فرصة ..

مر كم يوم .. واحنه نحضر وامي حارت شسوت ..
والبنات وياها حتى زينب رغم حملها بس گعدت وسوت كليجة وحلويات وياهن ..
طلعنا للسوگ اخذ مكياجات بس مالگيت مثل الفستان الخليجي الي عجبني الي اريدة اوڤ وايت ومطرز ذهبي وبي حزام ذهبي من الخصر ..

ضجت حيل بيومها ..
رجعت بس بالكماليات والداخليات .. واخذت حذاء .
امير اخذنا للعروبة فرنا المحلات كلها مالگيت .
گال ولا تضوجين ..
باوع للساعه .. ب 11 الصبح ..
گال اي نلحگ ..
ياقوت .. يمة وين نلحگ ..
امير .. للنجف ..
سدن .. صدگ تحجي كروري عفته عند امي ..
امير .. وقابل امج راح تعوفه .. لاتخافين عليه هو بأيادي امينة .. المهم درة تلگي الي يعجبها ..
وصدگ طلع بينا للنجف ..
واخذنا الشارع الروان وفرنا كل محلات النجف ..
ولگيت الاحلى منه والارقى ..
بس جان غالي حيل ..
وحبيبي اموري ماقصر ولااهتم ..
گال روحي قيسي واذا صار خليه بعلاگة واخذيه ومعليج
دفع فلوسة وسدن هم اخذلها واحد نفسة بس لون اسود لان حزينة صح بي تطريز من الصدر ..
بس گالت اغطيه بالشال ..
رجعنا بحدود الثلاثة ونص او الاربعه العصر حتى تغدينا هناك وزرنا ..
وطلبت من ربي بحق الامام علي عليه السلام .. ينور طريقي ويريح بالي وگلبي الي عايشين بدوامة وي عقلي وتفكيري ..

من دخلنا للبيت ضاجت زينب من عرفت بينا رحنا للنجف ..
وگالت ليش مگلتوا خاف اروح وياكم ..
امي گعدت تحلفلها صارت بسرعه ومامحسبيلها ..
سدن گالت الامير خلي نروح نجيب كروري ونجي ..
اخذت الغراض ودخلت للغرفه ..
طلعت الثوب گدرتة يخبل عليه بس ماحسيت بلهفة الفستان الي اخذتة بخطوبتي من يوسف ..
حتى كرهت اللون الشذري بسببه ..
شگد جنت اباوع اله وانتضر البسه يوم يوم ..
خلص درة ..
اجة الوكت الي تحاولين تنسين .. الذكريات ماراح تجيبلي بس الحزن والااااااه ..

طلعت راويتة الامي وزينب .. تعجبت بي وگالت لو گايلين وتجيبولي لون ماروني احمر وانطيكم فلوسة ..
هسا شيوديني للنجف ..
ياقوت .. يايمة جا شمدريني گلت حزينة انتي .. حتى سدن اخذت لون اسود منة لان حزينة ..
زينب .. اي سدن هي الكل بالكل جا اني شني ..
ياقوت .. اثنينجن بناتي وماافرق بينجن .. وسدن رجلها اشترالها مو اني ..
زينب .. اي قابل رجلها مثل رجلي ..
درة .. ليش تگولين هيج زينب علي مامقصر عنج .. اشو كلشي ترديه يجيبه الج واذا گلتيله اريد انزل للسوگ واشتري قابل يمنعج ..

اعرف ماعجبها الحجي .. بس ع الاقل سكتت وماحجت
ابد مااحب وحدة زوجها يحبها ومدللها وهي بالطالعة والنازلة تذم بي وتنتقص منه ..

بقى يومين للمشية والعقد ..
قررت اسرح شعري بالبيت .. واخلي طبيعي ..
اني اصلا حزينة ..
لكن بيبياتي وخالو مرزا طلبوا انزع ..
امي گالتلي بس وكت العقد وارجعي البسي الاسود .
بس خاله ام يوسف گالت لا ..
تعتبر عروس مايصلح ترجع للاسود ..

خابرت هلي واتوسلت بيها تجي ..
گالت اشوف اهلي اذا قبلوا اجي اني وامي ..
بس لازم من وكت حتى نرجع من وكت ..
درة .. اي هي بالثلاثة المشيه والعقد لان تدرين همة هم وراهم طريق البغداد ..
هلي .. اي كون بالاربعه طالعين لان خاف ماكو سيارات بالگراج واخواني يبقون يحجون ..
درة .. والله اذا مالگيتي عود اني وامير لو واحد من اخواني انرجعج ..
وحجيت وي امها وبالگوة گدرت اقنعها ..
گالت مهيمن خابرني وباركتله وگال لازم اول وحدة تجين انتي الوسيطة مالتنا ..
ضحكتني ..
شويه واجت رساله ..
اوگفي مدري منو دز رساله ..
باوعت ..
ولج هلي ابن الحلال بذكرة ..
هلي .. لا عليج الله هو
درة .. اي ولج شعندة ..
هلي .. شنو شعندة غير راح يصير خطيبج وباجر عقدكم بعد شكو ..
دروحي شوفي الولد عيب ..
سديتة من هلي…
ورجعت قريتها مرة ثانية ..
-كاتب فارغه اتصل هسا لو مشغوله ..
بقيت مترددة مااعرف شأرد ..
رجع دز ..
-براحتج اذا متگدرين بس حبيت اسمع صوتج ..
استحيت منه ..
گلت خلي اشوف شيريد ..
اتصلت .. فصله ورجع اتصل هو ..
گلت .. الووو ..
-ياهلا بهالصوت ..
استغربت مااتوقعت هيج جريئ من ثاني مكالمة وحتى مامخطوبين ..
سكتت ..
درة لا تسكتين احب اسمع صوتج ..
شأحجي ..
شلونج ..
الحمد لله ..
معنوياتج الباجر ..
هااا ماادري ..
لعد اني الدنيا ماسايعتني .. خابص اهلي خبص عبالك زفتنا مو خطبتنا .. مامصدگ باجر تصيرين مرتي ..
ليش ساكته احجي ..
مااعرف شأحجي يعني ..
كملتي تحضيرات .. محتازة شي نجيبه ويانا من نجي
لا سلامتك كلشي مامحتاجة ..
اوووف شيجيب باجر .. وبقى يغني ( شيجيب باجر واصبر شلون باجر التقي وي اجمل انسان ) ..

قاطعته .. مهيمن عادي اذا اسده اهلي ديصيحوني ..
مهيمن .. براحتج حبي .. من بعد باجر الايام كلها النا ..

سديتة واني مستغربه الجرئته .. وماعجبني استعجاله وسرعته .. بعدنا ماعاقدين ويگلي حبي ..
صدگ ضجت ..
احس الامور جاي تمشي بسرعه وتتطور بأسرع مااتوقعت ..
احنه اتفقنا تكون هالفترة للتعارف .. ووعدني يخليني اتعود عليه يله ..
ساعات اگول استعجلت .. واريد اتراجع ..
بس مااگدر شأگول للناس واخواني واهلي .. صعبه باجر خطوبتنا والمشيه واني ابطل ..

سولفت السدن .. گالت احتمال يريد يعبر عن حبه واهتمامة الج ..
لاتستعجلين بالحكم .. وانتي بعدج متعرفيه ومريت بأشياء صعبه لهذا متوترة ..

فكرت بكلامها صحيح ✔..جائز لان مامتعودة عليه لهيج اخذت فكرة موحلوة عنه ..
بس هو بالجامعه جان رزن ومايتعدى حدودة ..
اكيد مثل ماگالت سدن يحاول يعبر عن اهتمام وفرحتة ..

بيوم المشيه والعقد ..
گعدنا من الصبح ..
اني وسدن نضفنا البيت كله وعطرناه ..
ودخلت سبحت ..
طلعت شفت خالاتي وبناتهن ..
وكلها ملتمة ..
شويه واجت هلي وامها .. حضنتها شگد مشتاقتلها ..
ورحنا للغرفه ..
شسورت سدن شعري .. وبيرمنته ..
طلع حلو ..
نضفت وجهي ..
بعدها تغدينا وامي جانت مسويه دولمة وتشريب دجاج وبرياني ..
بس من التوتر ماگدرت اكل بس كم دولمايه لان احبها ..

بعد الغدا بدلت ..
وخليت طبيعي وخاله نضال جرت عيوني بالرميل ..
وماسكرا ..
وعيوني زرگ برزن بالكحل ..
طلعت حلوة وامي تمشي وتقرأ معوذات وايات عليه ..
تفاجأت بجيه حوراء ..
ابد ماجنت متوقعه تجي ..

ساعه 2 دخلن النسوان ..
وگامن يهلهلن .
بس ام مهيمن ماقبلت وگالتلهن حزانة مايصير ..
اجت بوستني وطشت جكليت عليه ..
وصلت ع النبي ..
هواي نسوان جايات وبناتهم كلهن سفور وعلى اخر موديل ..
اجت بنيه سلمت علية وگالت اني مرت اخوهم الجبير ..
رحبت بيها ..
جانت شايله طفل بيدها بس مبين مريض او بي شي مااعرف بس شكله غريب ..
بس البنية ماتحركت من مكانها بقت بس گاعدة وصافنه عليه مااعرف ليش كلما اباوعلها الگيها تباوعلي ..

حجت ام مهيمن ..
او ام محمد لان الجبير محمد ومهيمن الصغير ..
وگالت هذي بتنا بعد واحنه حبيناها والولد شاريها ..
فشما نجيب مو خسارة ..
طلعت علبة ذهب راقية ..
والذهب الي بيها ثگيل وحلو ..
تذكرت ذهبي الي ماتهنيت بي ..
شفت الحلقه ..
گالت گدريها حتى اذا ماتصير نبدلها ..
جانت شويه جبيرة بس گلتلها هذا هو استحيت احجي ..
وگالت الامي ..
الولد مو هسا يتزوجون والموديلات هواي .. قريب الزواج نجيب الفلوس وتجهز ..
بعد مااتفقن النسوان ..
والحاضر والغايب خلوه خمسة بعشرة ..
وهذا الحجي بنهاية 2006 تقريبا ..
عيون الحاضرين كلها مبهورة بالزوج الي اجاني على طبق من ذهب ..
طلعت خمسميه گالت هاي مصاريف العقد ..
وهي جانت صاحبه السان حلو وتجذب المقابل وامي فقيرة وبس تگلها اي واي ..
گالتلي درة يوووم هاج البسي التراجي حتى البقية هو يلبسج اياهن ..
گامت سدن لبستني ..
اجو الزلم ..
التهوا بالمشيه والكل جانت گاعدة وساكته وتسمع الكلام الزلم ..
خالوا مرزا حلو كلامة وهو يمدح بيه ويگلهم تربت على ادينا ..
جنت انتضر اسمع صوت ابوي او احس بوجودة بس ماكو
كملت المشيه واتفقوا بدأ العقد ..
للحظة انقبض گلبي وضجت ..
اتمنيت انهي كلشي ..
مااعرف شنو الي صبرني وماحجيت ..
واني اشوف الفرحة بعيون الكل الا عيوني جانت ذبلانة ..
اجه امير وگال جيبولها كرسي يم باب البراني الشيخ راح يعقد ..
گومتني سدن واخت مهيمن وخلولي الكرسي يم باب البراني ..
گعدت ..
وخلن حجاب على راسي وفاتحات القرآن ..
گالن اقري والشيخ يعقد ..
بس ماجنت اقرأ ولاگدرت احس عيوني غوشت ..
كمل وگال قولي نعم انت وكيلي ..
واني صافنه مااعرف شنو السالفه ..
ام مهيمن .. يوووم يله ردي وراه الشيخ ديحجي ..
وعيت وطلعت الكلمة مني وعبالك غصة وطلعت من گلبي
اول ماكملتها امة هلهلت وطشت جكليت ..
صارت هوسة ..
والكل تسلم وتبوس ..
اخذتني سدن عدلت شعري ووجهي ورجعتني ..
شويه ودخل مهيمن لابس قاط ومرتب ..
وابوه واخوه وراه ..
استحيت بسرعه اشرت السدن على شالي ..
اتقرب مهيمن باسني براسي دنگت ..
گاااال .. واخيراااا وجرها بحسرة ..
صرتي مرتي ..
ابتسمت خفيف ..
سلم ابوه عليه .. وصل ع النبي واخوه يگله ها لك اگول كتلت نفسك طلعت صدگ تستاهل ..
مهيمن .. لعد شعبالك اخوك مايضيع التايهة ..
كان كلام والغاز بينهم مافهمتها ..
ابو مهيمن .. بابا منا وجاي انتي بنتنا واي شي ترديه لاتخجلين ..
ام مهيمن .. لا بعد هي بنتي صارت وحتگلي ماما دور مووو..
اني مااحجي بس صافنه وانطي ابتسامات ..
جابو الذهب والحلقات ..
وانطوني حلقته ..
اخذتها ولبستها اله .. تذكرت حلقه يوسف وشلون جنت اسوي بروفة وي سدن حتى البسة ..
رجع هو لبسني الحلقه وجان عاصر ايدي ..
سحبت ايدي وكملت لبس ..
رجع لبسني الگلادة وجان لازگ بيه حيل وعبالك يشم برگبتي ..
ماادري ليش اتضايقت او لانه ماجنت متعودة عليه جان زميلي وبس وفجأة صار زوجي وعاقد عليه ويلزم ايدي ويتقربلي ..
خلصها غزل ويهمس بأذني بحيث همساته تدغدغ اذني وتزعجني ..
رفعت راسي شفت حوراء .. تخابر وتضحك وعينها عليه
وكانه تگلي خلص ماعدتي خطر علية ..
ياترى هل شعوري وشعورها يتشابه او يختلف ..
هي اخذت انسان مايحبها ويحب غيرها رغم عندها علم بهذا الشي وراضيه ..
واني الي اخذت انسان مااحبه ولااعرفه ورغم احاول اقنع بنفسي بانه يجي يوم واحبه واتقبله ..
لكن اعرف گلبي اذا قفل .. مستحيل يفتح قفله الاحد ..
جانت نضراتي المهيمن واني اشوفه فرحان ويضحك من گلبه تخليني اتراجع عن كلامي ..
واگول مو ذنبه انه يحبني .. فمو من حقي اضلمة واخليه تعيس بحياتة ..
ع الاقل احاول وياه وابدي صفحة جديدة ..
كان عقلي وگلبي متناقضين لدرجة خلتني بصراع بيني وبين نفسي ..
كمل العقد وگالوا يله ورانا طريق ..
هو اشر الامة وگالها اني راح ارجع وي محمد بسيارتة انتو ارجعوا ..
بعدها طلع وگالي .. اني باقي هنا بس اودعهم وارجعلج بقيت صافنه هذا شبي ..
زينب .. الظاهر الاخ حامي ومايگدر يسيطر على نفسة
هسا اسبوع ويگلج نتزوج ماشفتيه شلون يباوعلج ..
حوراء .. هزت ايدها وگالت حضوظ ..

جانت حاسدتني على قسمتي .. واني الي جنت اگول هنيالها الليله نايمة بحضن حبيبي ..

باوعت السدن .. گلتلها هسا شنو ابدل ابقى ..
سدن .. ابقي وخلي نشوف خاف يرجع عيب ..

اجت ام مهيمن قبل لتطلع ..
گالت ماما درة اني سولفت وي امج ..
احنه طبعنا البنيه من تعقد تختلي وي خطيبها بغرفه وحدهم او بالاستقبال يگعدون يسولفون يتعرفون على بعض لان تدري انتو بينكم مسافه طويله مو بالسهوله يگدر يجي ..

ماحجيت شي وسكتت .. هي سلمت وطلعت ..
اجت هلي بوستني وگالت يله حياتي لازم نروح الوقت اتأخر ..
گلتلها اوكفي خلي اشوف علي لو امير ياخذج ..
خزرتني زينب ماقبلت الظاهر غارت ع زوجها ..
گلت السدن تخابر امير ..
خابرت وگالت .. امير مشغول بالزلم حيدر راح يوصلهم بسيارة امير .. منتضركم برة ..
راحن وودعتهن للباب ورجعت ..
بقينا بس احنه وخالاتي ..

اجة امير حجة وي امي بالمطبخ جانت عيني عليهم ..
والظاهر مامقتنع لان يهز بإيدة..
وامي تحاول تقنعه ..
اشرت السدن اجت ..
گالت .. امير ماقابل يگول شني من اول يوم يگلي اريد اگعد اني وياها وحدنا ..
وعمتي گالتله .. هاي عقائدهم الولد من يعقد يگعدون وحدهم يسولفون ويتعرفون على بعض ..
امير .. اي هاي ببغداد مو هنا .. اني مو ماعندي ثقه بأختي بالعكس ..
بس تدرين اذا طشت حجايه منا منا شيلمها بعد ..
ياقوت .. قابل هو غريب غير صار رجلها يمة .. خل تحجب الناس ..
انت بقيه يمكم شويه بين ماتروح حوراء وخالاتك ..

وصدگ گامن خالاتي وبناتهن وحوراء گالتلهن اروح ويتجن ..
زينب .. لا انتضري علي راح ياخذنا اني وياج .. صار كم يوم ماشايفه اهلي ..
بدلن واخذهن علي وراحن ..

شويه واجه امير .. گال الولد وحدة بالبراني روحي يمة واحنه راح نگعد بالحديقه ..
امي گالت فشله ترحين ايدج فارغه ..
ترست الصينيه حلويات وكيك وعصير واخذتهن ..
دخلت وجنت مخليه شال على راسي ..
اتقدم شال الصينية مني وخلاها ع الطبله ..
واشرلي اگعد ..
گعدنا واثنينة صافنين مانعرف شنحجي ..
طلع كارتونة گال هذا موبايل حديث وكامرة ..
الج ..
وبي خط اسيا بس النا خليه من ورى منتصف الليل مجاني حتى نسولف براحتنا ..
اتقرب اخذ ايدي باسهن .. سحبتها منه ..
گال شبيج خايفة اني رجلج ..
درة .. يو… وقطعتها .
وعيت على روحي بسرعه ..
مهيمن .. شبيج ؟؟ شردتي تگولين
درة .. اتفقنا تنطيني مجال اعرفك واتعود عليك عفيه لاتجبرني على اشياء فوق ارادتي ..
هاي فترة تعارف مو من اول يوم تريدني اكون مرتك او خطيبتك ..
مهيمن .. حقج اعتذر لاتضوجين بس لان احبج ومامصدگ صرتي الي هيج اتصرف بشغف ..
درة انتي حتى بأحلامي عايشه وياي يعني احس نفسي اعرفج من زمان لهذا متعود عليج ..
درة .. عدنا ثلاث سنين گدامنا حقنا نتعرف ونفهم بعض قبل لانخطو اي خطوة ..
مهيمن .. لا قصدج سنتين .. اني مااگدر ابقى اكثر ..
درة .. الله كريم الذاك الوكت ..
مهيمن .. يله اني اروح ورانا طريق .. باسني بخدي وگام وهذا الحجاب مااريدج تلبسيه اذا اجي .
انتي مرتي ..

طلع سلم على امي وسدن وراح..
امي .. مبين خوش ولد حبيته والله ..
دخلت بدلت بسرعه ..
رحت طلعت موبايلي من الكنتور ..
شفت مكالمات ورساله ..
هااا يدرتي صرتي الغيري موووو .. بالعافية عليه حضنج وحبج ..
ولج ايدة الي لمستج جنها ذبحتني .. يظالمة هيج هان يوسف عليج ..

تخبلت من قريتها وحسيتها موجود وياي ويشوف كلشي ..
اجت سدن راويتها الرساله ..
گالت هاي ماكو غير الحقيرة راوتة الصور ..
درة .. ياصور ؟؟
سدن .. انتبهت عليها تصوركم بسته عود مسويه نفسها تخابر ..
وهو يلبسج الذهب والحلقه ..
درة .. اي انتبهت وجانت تضحك ..
سدن .. وحجيت وياها حلفت مامصورة ..هسا اخابر اني واخليها تشوف جهازها ..
راحت خابرت واني بقت عيوني ع الرساله ..
ليش تسوي بيه هيج يوسف ليش ..
حسيت بوجعي هسا من خطبت وتزوجت شصار بيه ..
ضگت نار عذابي الي ضگته ..
بس ع الاقل اني ماخنتك .. انت الي بديت الخيانة ..
اني ردت انهي هاي القصه وابدي حياة جديدة ..

بدلت وطلعت ..
صار بوجهي حيدر ..
تعاي ولج شني هاي صديقتج الصاكة وين ضامتها عليه ..
جا غير تگولين حتى اجيج للكلية اشوفج اسأل عليج خاف محتاجة شي ..
ضحكني من صدگ ..
درة .. لا عيني صديقتي خط احمر معليك بيها .. هاي فقيرة مو مثلك ملعب ..
حيدر .. والله انتي مو خوش اخت .. شوف البنات تنسق الاخوانها وانتي تگطعين قسمتي ترضين ابقى عانس ..

ضحكنا عليه اني وامي وسدن ..
اجة امير .. ايبااااه متنا تعب .. يله اخوي حدوري بمكان ماتنسق .. شوفلك كم واحد من جماعتك الهتليه وروحوا لموا الكراسي ورجعوها ..
حيدر .. ايباااه ذكرتني بالشيخ من يگللنا هتلية والله مكانة فارغ ..
امير غرغرت عيونة وراد يبجي ..
-اي والله يابويه مكانك وحشة علينا ..
امي وسدن گامن يبجن ونقلبت لحضاتنا الحزن ..
حيدر .. اني اترخص .. وطلع ..

درة .. امير ابوي مااجه موووو..
امير .. اي خابر يتعذر ويگول وضعي مايسمح والاربعين مال اخوك طلع مدري راح يطلع مافهمت وسدة بسرعه.
بس مرتة يمة تحجي وتدردم ..
ابني بالتراب وهمة يسون عرس ويعزموك مووو..
لهذا ماطول وسدة بسرعه ..
ياقوت .. خله يمة لاتصغطون عليه حقه .. مو شويه الي بي .. مرضه وابنه ماصارله هواي ..
امير .. جا شلنا بي يمة لو مادرة فلا اخابرة وانطخ بي .
حتى الي صار مايشفعلة الي سواه بينا ..
اني اگوم ..
محتاجين شي ..
ياقوت .. لايمة سلامتك عدنا اكل زاد هواي من الغدا ..
گلن الدجاج وحمن الدولمة وزلاطة ونعمة من الله ..

نزعت الذهب كله ضميته .. صارت عيني بالحلقه ..
بقيت صافنه اجت سدن ..
درة هاج كروري يمج خليه بين مااحضر العشا ..
انطيتة الامي وگمت وياها ..
گالت ماخابرتي الولد سألتي عليه ..
درة .. لا مااخابر ..
سدن .. شوفيه وصل لا ..
درة .. هو يخابر استحي ..
سدن .. لاهاهي تعودتي ..
درة .. خلوني براحتي بلا كلشي اني مامرتاحة مااعرف ليش ..
سدن .. ااااخ لو بس تخلين گلبج ترتاحين ..
درة .. صح گلبي مو خالي بس قفلته وقفلت كلشي بي من ساعة الي عقدت بيها ..
يعني حتى التفكير بيوسف راح تكون خيانة المهيمن ومثل مااقبل الخيانة النفسي مااقبلها الغيري بس اريدج تدعين وياي الله يخلصني من هذا الحب وانسى وارتاح ..
سدن .. الله كريم .. هو القادر ينسيج ان شاء الله..

تعشينا وكملنا وبقينا شويه سوالف وضحك ..
وبعدها كلمن راح الغرفته وامي بقت ع التلفزيون ..

دخلت واسمع موبايلي يدگ .. يبووو عفته بالكنتور ..
باوعت 32 مكالمة من مهيمن ..
استغربت معقوله هالگد متصل ..
رفعته .. الوو.
الوووو معقوله ماتسمعين .. صار ساعه ادگ گلبي راح عبالي شو شبيج .. ردت اخابر على اخوتج والله ..
درة .. شبيك مهيمن الموبايل بالغرفه واني برة ماسمعت مهيمن .. درة مااحب البرود الي عندج .. موبايلج خلي بيدج مااريد اخلص عمرس واني ابقى اتصل وماالگي الرد ..
درة .. وهسا كملت ..
مهيمن .. شنو ضجتي لو انتي بمكاني شتسوين ..
درة .. جان عذرتك وگلت اكيد عندة شي شاغله او جائز موبايله صامت .. عاد مااصيح واحجي مثلك ومن اول يوم مهيمن .. زعلتي شنو ..
درة .. لا بس تعبانة واريد انام مامتعودة ع السهر ..
مهيمن .. براحتج مع السلامة ..
سديتة منه واني ضايجة .. شلون هيج يحجي وياي ..
من اول يوم وهيج اسلوبه ..
صح هواي متصل بس قابل متعمدة مارديت ..
رمشت السدن ..
نزلت بسرعه ..
ها شبيج ..
سولفتلها ..
سدن .. حقه والله اني امير اذا يتصل مرتين وماارد يلعب جوله مو عاد 32 مرة من غير الرسائل ..
درة ..يعني هسا اني الغلطانة .. تدرين بيه مو من طبعي اخلي الموبايل بيدي وافتر .. حتى استحي من اخواني شيگولون عليه ..
سدن .. الاحسن تگليله من ماارد معناها اهلي او اخواني يمي ..
انت دز رساله واني اخابرك ..
درة .. اووووه والله مالي خلگ . اصلا شكله هادئ بالكليه وابد مامبين هيج عصبي .. يوم عن يوم اكتشف بي شي جديد ..
سدن .. بعدكم بالبدايه هيج تگولين .. خلي اروح الرجلي گاعد على نار وانتي ضيعتي المباراة من عدنا ..
خلي امشي الحگ ع البدل الضايع ههههه..
درة.. ههههههه عابت ولي شلون حجي ..
سدن .. ههههههه تتزوجين وتصير عادي عندج يله باي .

راحت واني اخذت الموبايل ورحت يم امي ..
لگيتها نايمة گبال التلفزيون ونايمة ..
خطيه غافيه من التعب ..
ماگعدتها .. رحت جبت بطانيه وغطيتها..
لان نايمة گبال المبردة ..
وبقيت اگلب بالتلفزيون ومنصيه صوتة ..
بقيت متابعه فلم اجنبي جان طالع على قناة mbc2
يمكن كاثرين البطله جانت ..
وهي ماشاء الله افلامها فضيحة ..
كل شويه ودايرة القناة بسببها لا يجي واحد من اخواني ويشوف شيگول عليه ..
صارت الـ 12 طفيتة وگمت ..
اجت رساله من مهيمن ..
فتحتها ..
كاتب .. اعتذر حبيبتي اذا گعدتي الصبح خابريني ..

سديتة ونمت ..
ثاني يوم ..
امير گال خالي مرزا عزمنا على عشا بمناسبة خطوبه درة ..
للعصر بدلنا كلنا ورحنا ..
على عيوني رحت ..
بس مجبورة وعيب ..
جانت خاله ام يوسف ضايجة ومقهورة ..
صبينا العشا ..
وكلها گعدت ..
طلع يوسف من الاستقبال گال السلام عليكم ..
بس ماباوع بوجهي ..
گعدنا ناكل صارت عيني عليه ..
خازر ايدي الي بيها الحلقه ..
بسرعة سحبتها ..
يوسف .. يابة اليوم قدمت اوراقي وراح اقبل بالشغل الي اجاني ..
ام يوسف .. يعني عاندت الا ببغداد ماكو شغل هنا ..
يوسف .. هاهي وياها بغداد .. قابل وين رايح .
امير .. والوضع شلون تروح وترجع ..
يوسف .. مااروح .. هناك شقق مخصصه نگعد بيها وكل خميس وجمعه اجي ..
حوراء .. واني شنووو
يوسف .. انتي شبيج ..
حوراء .. اروح وياك ..
يوسف .. وين اخذج ماتشوفين بطنج وحامل يصير عليج شي منو الج .. وبعدين اني هناك راح اشتغل مو اتونس ..
هي ضاجت وگامت ..
بيبياتي گامت يحجن ..
يوسف .. هذا قراري واخذتة بعد مااتراجع واصلا قدمت اوراقي وباجر اطلع البغداد اكملهن ..
مرزا .. بويه مااگدر احجي شي لان انت الظاهر مقرر وماجاي تاخذ رأينا ..

هو عاف الاكل وگام ..
وخاله ام يوسف تفرفح ..
وتگول هو هالواحد عندي ومامرتاحة شسوي بله اذا راح من ايدي ..
ياقوت .. گولي يالله خيه . هناك عيال درة ورجلها ونوصيهم عليه لاتخافين ..
امير .. خاله هو مو وحدة وياه محامين وقضاة بمجمع واحد يگعدون سوة يعني لاتخافين امان ..

گمنا اني وسدن شلنا الماعين .. لان حوراء زعلت وصعدت واختها وراها ..
امهن ماجايه مدري ليش ..
وبس اني وسدن بالمطبخ ..
نضفنا وغسلنا الماعين ..
دخل يوسف من برة وبيدة جگارة ..
وجان عصبي ..
اشر السدن تسد الباب ..
سدن .. يوسف اطلع لاتفضحنا ..
يوسف .. سدي گتلح بصوت مخنوگ ..
سدتة ..
اتقرب يمي وسحب الماعين مني ..
واني جامدة بمكاني مثل الصنم ..
يوسف .. شو افتحي ايدج شو خلي اشوف .
ولج ماستحيتي من لابسة حلقتة بيدج ومتباهية واني الماخليت حلقه تطخ بيدي لان مو منج ..
بس ارتاحي .. عايفلج الديوانية بما فيها ..
وراح اخلصج مني .
وعود من تجين البغداد .. ارجعلها ..
بس هااااا راح يكون طيفي محاوطج وين ماترحين لان مو بسهوله تنسيني ..
اني الي علمتج ع الحب وتالي بعتيني ..
درة .. روح يوسف المرتك احسن .. اني هسا مخطوبه مايجوز هيج تحجي وياي ..
يوسف .. هههههه اشبعي بي . بعد مااهتم وخلي يشبعج بيج ويحضن ويلمس .. هذا حدنة وانتهى كلشي بينا .. بس لاتنسين الاخر لحظة اني شاريج وانتي الي بعتي وغدرتي ..
ومنا وجاي اني هم اشوف حياتي .
اتقرب وهمس بأذني ..
مشكولة الذمة ومااسامحج طول عمري ..
طفى الجكارة برجله وطلع ..

بقلمي_الكاتبة_شمس
يتبع .…

[لامارا]

//// البـارت السـادس والـثلاثـون ////
عجـاف_القلـوب ..
الكاتبـة_شمـس ..

بقيت صافنه بوجه سدن وارجف ..
واحس گلبي يريد يطگ وعيوني يردن يبجن ..
انفتحت الباب صارت حوراء ..
گبالي ..
وهي تخزر ..
اشرتلي سدن ..
درت وجهي للسنگ ..
هي بقت واگفه وعينها ع الطارمة وگالت ..
يوسف جان هنا ..
شو سمعت صوتة ..

سدن .. اي جان يحجي وياي ..
حوراء .. هااااا ..
بقت گاعدة يمنا بالمطبخ طول مايوسف بالطارمة ..
طلع امير يمة وبقوا يسولفون بالحديقه گعدوا ..

كملت الماعين .. اشرت السدن ..
ودخلت لجوة ..
گعدت يم امي والحجيات يسولفن ..
واني بالي لسا بكلام يوسف ..
بأي حق يشكل ذمتي .. ليش هو منو الي باع .. لان مارضيت اعيش وياه على ضرة طلعت غلطانه ..

خاله ام يوسف .. شوكت مقررين الزواج من تكملون ..
درة .. اي بعدنا ..
ام حمزة .. بس يمة الخطوبه الطويله تسوي مشاكل ليش ماتتزوجون ويأجر هنا ومن تكملون عود روحوا البغداد ..
ياقوت .. لا بنتي يمي مااوديها لهناك مااگدر افارگها اني اگول اليوسف يخليها يمي ..

كلها صفنت ..
امي .. هو وينة يوسف اني احجي وياه .. يخليها يمي ماياخذها بعيد عني ..
حوراء .. ها شتخربط شجاب يوسف بالوسط ..
درة .. لاتگولين هيج عليها ..
حوراء .. طبعا بودج انتي وامج تاخذنا بس ماصح الجن ..
ام يوسف .. حوراء اسكتي ..
ام مرزا .. خايبه ماتتيدبين انتي شو مالج رداد ..
زينب .. حوراء .. اسكتي ترى عمتي مو واعيه .. واخذتها للغرفه ..
اشرت السدن تصيح امير حتى ناخذها ونمشي ..
علاجها هناك بالبيت ..
مااتوقعت تجيها نوبه وخاصه صارلها فترة مابيها شي وفرحانين ..
اجة امير واخواني ويوسف وخوالي ..
شافت يوسف ..
اي عمة تعال اگلك اگعد يمي ..
اجة يمها ..
وامير يگلها يله يمة امشينا نروح ..
-اوگف يمة خلي احجي وي رجل اختك .. لو احجي وي الشيخ يقنعه ..
ماياخذها بعيد ..
اني انطيتك بنيتي بس مااريدك تحرمني منها .. وماتبعدها عني شگلت ..
يوسف .. الي تردي يصير عمة .. درة يمج تبقى ومااخذها لاتخافين ..

جانت عينة عليه .. اني درت وجهي وگلتلها يله يمة گومي ..
هي ابتسمت وگامت ..
حوراء واگفه بالباب ..
ردنا نطلع سحبت يوسف من ايدة ..
انت شلون تسايرها الهاي الخبله وتوعدها لو حلتلك السالفه ..
اني واخواني اول ماسمعنا كلامها ..
التفتنا بسرعه وبغضب ..
شلون تگول على امي خبله ..
انهضمت ونزلت دمعتي ..
بس يوسف سبقنا بردة فعله .. وضربها راشدي ..
-احترمي نفسج .. صايرة تتجاوزين ومامتربايه ..
هي لزمت خدها وعاطت ..
ادري بيك تكرهني وماتحبني .. كل هذا لان حبيبة الگلب انخطبت طلعت حرگتك بيه .
مو كافي راح تعوف الديوانية وتهج بسببها .. ماتگول عندي طفله بالطريق جايه ..
الله لاينطيج يدرة خربتي حياتي عساج ماتشوفين يوم حلو بحياتج ..
صم حلگها ودخلها لجوة ..
وراح وراه خالو حمزة ..
صار حجي بينهم ..
گال امير .. خلونا نمشي ..
علي گام يحجي على زينب لان گالتلها ..
وزينب گالت .. اول وتالي الكل يعرف ليش ضاميها للسالفه ..
علي .. امشي گدامي هسا ويصير خير بالبيت ..
مرزا .. احسبوها علية بويه هاي الله مطيح حظها والسانها متبري منها ..
امير .. لا خالي اني مااعتب ع النسوان ..
رجعنا للبيت انطيت العلاج الامي .. ونامت ..
طلعت سمعت صوت علي وزينب يتعاركون ..تدافع الاختها وتگله ..
حقها تغار على رجلها بسبب اختك الخربت حياتهم ..
علي .. ولج اختي شعليها مو عافته وانخطبت بس شنسوي اذا هو مايحبها وانجبر عليها .. بويه الصوج بيها لو تعرف تكسبه وتبطل السانها جان ماعافها وهج البغداد ..

بعد الحجي والعرك نزل علي من فوگ ودخل للبراني ..
صاح درة جيبيلي مخدة وبطانيه ..

اخذتله فراش ومخدة ..
گال مااريد انام بالگاع ..
ردت احجي وياه واهديه ..
علي .. مو هسا درة تعبان اريد انام ..
عفته وطلعت ..
اشرلي امير بمعنى اعوفه ..
واخذ مرتة وابنه وصعدو..
بقى حيدر ع الموبايل ويضحك ..
يابويه والله .. الله يحبني مخلصني من النسوان والقال والقيل ..
بس هي كله منج .. والله هاي لو اني جان وافقت على يوسف وگعدت على گلبها ..
درة .. حيدر هسا وكت ضحك ..
حيدر .. ومنو گالج اضحك احجي صدگ .. شو هسا انتي مخطوبه وماخالصه من السانهن ..
يمعودة هاي حوراء جازة نعمته بيدها ..
واذا يوسف راح البغداد بعد يرجعلها ..
انتي شايفه النسوان هناك شني .. اصلا يغم روحة الي وافق وتزوج هالبومة ..
درة .. اروح انام احسن انت مااحصل من وراك بس الغيبة رحت نمت يم امي ..
بقيت اباوع عليها ..
اوووف يمة بعدني محتاجتج ومحتاجة ترشديني وتدليني على طريقي ..
لو اولادي .. منو يربيهم وياي ومنو تولدني وتوگف يمي اخاف الي يجي اليوم الي ابقى وحيدة من دونج ..

دگ الموبايل .. سويتة صامت بسرعه ..
طلعت من الغرفه ..
شفت مهيمن داز رسائل هواي ..
رحت الغرفتي طلعت الموبايل الي بي خط الاسيا ..
اتصلت عليه ..
الوووو هاي وينج معقوله لسا زعلانة علية وماتردين ..
درة .. لا بس جنت ببيت الشيخ عازمنا على عشا .. وامي تخربطت وماگدرت اخابرك ..
مهيمن .. هاا سلامتها .. اگلج يوسف ابن الشيخ مرزا .
درة .. اي هو ليش ..
مهيمن .. هو نفسة الي خطبج وبعدها ابن عمج نهى عليج وتزوج بنته عمة مو ..
درة .. تعرف كلشي يعني ماكو داعي اجاوب ..
مهيمن .. مااحب ترحيلهم بعد ..
درة .. بس عزمونا علمود خطوبتي شلون مااروح ..
مهيمن .. حتى اذا .. مدام جان رايدج قبل مااحب ترحين لهناك ..
درة .. بس اني تربيت بوسطهم .. ويوسف صار ماضي وهسا هو متزوج وراح تجيه بنية بالطريق ..
مهيمن .. درة لاتعاندين گلت ماترحين بعد ..
درة .. مهيمن شبيك .. مثلما انت تطلب اني من حقي اقبل او ارفض .. وبعدين مااحب صيغه الامر والنهي ..
خلي حياتنا تنبني ع المناقشة واسلوب الحوار والاخذ والعطا ..
مهيمن .. هاهي درة اعتذر ..
درة .. مهيمن انت ليش تاخذ الامور بتهور وبزعل ..
اني تصورتك انسان صبور والدليل صبرت عليه وگدرت تقنعني وتخطبني ..
مهيمن .. هذا شي وذاك شي ثاني .. اني اغار افهميني مااحب احد يباوعلج غيري ..
تدرين كم واحد ضاربه ومتعارك وياه علمودج بالكليه ..
كل الي يگول هاي حلوه لو يتغزل بعيونج اتخبل واتعارك وياه .. من زمان واني احسج ملكي والي ..
درة .. بس هيج غيرة مو حلوة وماتجيب بس المشاكل ..
مهيمن .. انتي بس طاوعيني وگليلي اي وماكو مشاكل بينا ..
سكتت عنه لان جنت دايخة ومالي خلگ اتناقش وياه ..
مهيمن .. ها شو سكتي لازم كلامي مايعجب ..
درة .. لا بس ضايجة على ماما تعبانه حيل ..
مهيمن .. هاااا .. شوكت يجي الدوام واشبع منج اشتاقيتلج ..
شو انتي ماتشتاقيلي ..
درة .. مو جاي نححي سوى كل يوم .. ولاتنسى بعدنا جديد مخطوبين وهذي فترة تعارف ..
مهيمن .. الا تذكريني ..
هسا جنت اتباوع الصورج . ماعجيني هذا الي لابستة ..
هو عقد غير تلبسين شي مكشوف حتى اشوف جسمج شنو سادة عليه البيبان من كل الجهات ..

بقيت بين الاستغراب وبين الخجل .. هذا شلون هيج يحجي ..
مهيمن .. درة انتي مرتي ومن حقي اشوف كل جسمج ليش مستحيه مني ..
درة .. من حقك اذا تزوجنا مو هسا . الخطوبه اعتبرها فترة تعارف مو زواج ..
مهيمن .. انتي حلالي مو بكيفج . من اول يوم شفتج بي واني اشتهيج .. ولو ماالناس گاعدة بالعقد حان ماعرفت شاسوي ..
درة .. مهيمن عفيه كافي .
مهيمن .. انتي ليش باردة وماعندج مشاعر ..
درة .. بااااردة . ماعرفتك الا من كم يوم شلون تريدني اكون .. المفروض تفرح انه خطيبتك تخجل مو تضوج ..
مهيمن .. هاهي درة اعرف راح تگولين احنه بفترة تعارف ومن هذا حجي ..
درة .. لاتزعل مهيمن بس اذا اتصالاتك كلها تدور بيها هيج اشياء فأكيد ماراح تسمع مني الا الرفض ..
قبل كلشي المفروض تسألني عن حياتي واعرف عنك عن اهلك ..
تدري اني كلشي مااعرف عنك او اهلك شگد واسمائهم .
مهيمن .. شتسوين باهلي اني اكفي .. واذا مصرة ..
يابة عندة اخوات رحمة من الله واخوان اثنين محمد واني وبس ..
امي موضفه وابوي تاجر .. بعد شنو تردين تعرفين اسالي واني اجاوب ..
درة .. يعني البنية الي عندها طفل هاي مرت محمد ..
مهيمن .. اووووه درة خلينا بروحنا معلينا بغيرنا ..
يله حبيبتي هسا انتي تعبانه نامي وبعدين نحجي باجر ..

استمرت اتصالاتنا اني ومهيمن .. ومرات يدز غزل او يتمادى من يشوفني اضوج يتراجع ..
يعني نوعا ما بدأ يعرف طبعي ويسايرني او يحاول يفهمني ..
اني ماعدت اضغط عليه او اسكت عنه في بعض الاحيان اتماشى وياه ..
وحتى بديت اعرفه شويه شويه ونضحك ونسولف ..

يوسف راح البغداد ..
وماشفته من يوم العزيمة حتى لقائه بـ أمير كان خارج بيتنا او بيتهم ..

كانت نهايه السابع والجو حار ..
نزلن سدن مريضه وبس تتقيأ ..
درة .. شبيج سدن خير ..
سدن .. ولج مااعرف تعبانه .. واحس عندي نحول وهذا كروري متعبني ماينام ..
درة .. روحي نامي وخليه يمي ..

نزلت زينب تخابر ومخبوصه ..
اي هسا اشوف علي يجيبني ..
ياقوت .. ها يمة شبيج ..
زينب .. حوراء راح تجيب وامي ماهي بكربلاء هي وابوي وراح تاخذها عمتي ام يوسف ..

ياقوت .. ليش رجلها مو هنا ..
زينب .. اليوم وله ليش هو يدري بيها شبيها مابيها ..
سدن .. زينب احترمي شويه ..
زينب .. شو دروحي انتي ..
اشرت السدن تسكت .. حقها مقهورة ع اختها وماتعرف شتحجي ..
خابرت العلي اجة اخذها وراحت ..
واني تگلها يمة مايصير ترحين انتي هم حامل وخاف تطلگين وبعدج بالسابع ..
بس هي ماسمعت وراحت ..

بقينا منتضرين ..
وسدن كل شويه تخابر امها وتگلها صار عندها عسر بالولادة ..
وراح يدخلوها عمليات ..
امي وكلنا ندعي الى ان خابروا وگالوا جابت بالسلامة ..

بسرعه سدن خابر يوسف وباركتله ..
وگالتله ابو ايه .. اجتي ايه ..

بقيت مبتسمة بيني وبين نفسي ..
الله يحفظها الاهلها ..
ماادري ليش تجدد شعور خيبة الامل داخلي ..
لكن تأنيب الضمير اتجاه مهيمن واتجاه حوراء منعني

مر يومين گالت امي خلونا نروح نبارك الهم ..
اني ماقبلت امشي ..
بس اني تگول اذا مارحتي يگولون ضايجة

اضطريت امشي ..
بعد ماخابرت المهيمن واستأذنت منه .. صح ضاج بس من گلتله مانتاخر واصلا ماكو احد عندهم بس بيبياتي ..
وافق ..

دخلنا البيت الشيخ وسلمنا ..
جانت حوراء نايمة ..
وامها يمها ..
شافت امي شالتها وباستها ..
فاطمة .. على كيفج وياها لا توگع ..
ياقوت .. ياخية اربع جهال ربيت وكرار الخامس شكالي مااعرف اشيل جاهل ..

فاطمة .. اي خيه ذاك وكت جنتي بحيلج مو هسا بعد ماعقلج طار ..
ياقوت .. شتقصدين خيه شمالي انسى ..
فاطمة .. لازم محد يگلج .. كبرتي وگمتي تخرفين ..
ام مرزا .. كافي ولج فاطمة اويلي عليج بالعباس انتن مال حرگ ..

فاطمة .. لسا راشدي بنتي يغلي بيه بسببها شلون اسكت هااا ..
عافتنا وطلعت وهي تدردم وامي تتسائل بعيونها ..
بس ماتتجرأ تحجي ..

انقرهت عليها حيل ..
بهذي اللحظة دخل يوسف ..
وجانت عيونة تلمع من الفرح ..
دخل گال السلام عليكم ..
وركض شالها ..
يبوس ويشم .. ويحجي وي بيبياته ..
يومين واني محترگ اريد اشوفها بس ماينطوني اجازة ..
وهسا اجيت وباجر راجع علمودها ..

ام مرزا .. يايمة تتربى بعزك شفت الضنا شلون غالي ..
هالحننت گلبك واجيت ..
يوم الولد ان شاء الله يمة ..

هو جان بعالم ثاني وي بنته ويبتسم ..
شال راسة سلم على امي وباركتله ..
صارت عينة بعيني ..
گتله بالخير تتربى بعزك ..
هز راسة ورجع يبوس بيها ..

من هذي اللحظة حسيت فعلا يوسف گدر ينسى ويتجاوز كلشي وگدرت بنته تاخذ اهتمامة وحبه ..

جان كل خميس وجمعه من يجي يحير شيجيب ويشتري الها ..
حتى سدن تگول ..
هالطفله معجزة وگدرت تغير يوسف ..

بدأ الدوام ..
والتهيت بي .. وصرنا نلتقي اني ومهيمن هواي ..
لدرجة مايتركني الا وقت المحاضرة ..
حتى هلي گامت تضوج ..
مرحلته سولنا حفله وعزموني ..
وجانت مفاجأة مهيمن الي ..
تونسنا وهو فرحان وطاير ولازم ايدي ماتركها ابد ..

اخذنا صور سويه بالجامعه .
وتقريبا كل يوم ناخذ سوة ..
جان يطلب نلبس نفس اللون حتى ناخذ صور ..

امي من يوم كلام فاطمة وهي منتكسة بس ماتحجي ولاسألت ليش هيج گالت ..
كم مرة راد امير يفاتحها بالموضوع بس احنه مانقبل ونخاف عليها ..

گاعدين واجت سدن ..
عمة عمة ..
ياقوت .. ها عمة .
-عمة الشهرية صارلهة شهر ونص وماكو بس لا حامل . وجاي اتعب واتقيأ..

ياقوت .. يايمة هذا رزق ..
سدن .. لا عمة فدوة .. هستوني رجعت للجامعه وجاي اداوم شلون راح ادبرها هم اجل مااگدر ..

ياقوت .. وليش تأجلين .. ابنج يمنا اني وزينب ..
وانتي رجلج ياخذج ويجيبج ..

سدن .. راح اخابر امير يجي ياخذني نحلل .. بلكي مو حامل .. والله تعبانه ..

درة .. گولي يله شبيج ..
اجة امير فرحان .. اخذها وراحوا ..
ورجع يرگص ويطگ اصبع ..
اجه الثاني اجة يغني ..

وهي ضايجة ..
بقينا نحجي عليها . وامي تگلها ولج خالقين ايد رجل منه ..
لاتسوين هيج لا الله يغضب علينا ..

نزلت زينب ..
وامي گالتلها ..
زينب .. اي بالعافية .. جا انتي بزونة كل يوم طفل ..
سدن .. اللهم صلي شبيج مخليه عينج ..
زينب .. عليمن مخليه عيني قابل ماعندي .. الحمد لله بس ما كل يوم اخلف اربي واكبر يله ..

سدن .. اي صح خلي نشوفج من تجيبين .. لازم نسيتي شسويتي ببدايه زواجج حتى تحبلين ..

درة .. كافي سدن بله مخليه عقلج وياها . همستلها
زينب .. احجي بصوت عالي ليش تنصين صوتج ..
درة .. اني اگوم احسن خابرني مهيمن .

عفتهن وگمت مالي خلگ مشاكل ..
الو ..
هلو حبيبتي شلونج ..
الحمد لله زينة .. اهلك شلونهم ..
زينين يسلمون وهاي امي يمي ..
اگلج حبيبتي ..
گول ..
اهلي باجر ناوين يرحون للنجف يزورون ..
وامي تگول ترحين انتي وامج ويانا ..
هاااا ماادري اشوف ماما ..
درتي هاي اول مرة نطلع سوة .. اذا تردين اني اخابر امير واستأذن منه ..

هو يحجي واني صفنت على كلمة درتي ..
الوووووو
وين رحتي ..
درة .. هاااا اي خابر امير وشوفه افضل ..
مهيمن .. زين لعد شويه واخابرج ..

سديتة منه .. اووووف درة ليش كلما تنسين تصير شغله وتذكرج بي ..
انسي وعيشي حياتج .. مثل ماهو عاش حياته ..

طلعت خبرت امي ..
گالت خلي نشوف اخوج شيگول ..

شويه واتصل مهيمن .. گال حبي حضري روحج باجر من الصبح ناخذكم ..

اجة امير بالليل هم گاللنا ..
بقيت حايرة شالبس ..
ولو راح اول وتالي راح البس عبايه ..
نسقت الشال والحذاء وحضرت ملابسي ..

للفجر توضيت وصليت وبدلت ..
طلعت شفت امي تتريگ ومبدله ..
ياقوت .. اصبلج جاي ..
درة .. لا يمة تدرين مااكل من الصبح اذا عندي طريق ..
تلعب نفسي ..

اتاخروا يله اجو ..
لان من بغداد لهنا ..
اندگت الباب .. طلع امير رحب بيهم وطلب يدخلون بس گالوا متاخرين مانلحگ ..
صعدت وسلمت على ابوه وامة بس الي جايين ..
جان ابو يسوق ..
وهو بالصدر ..
امي تاخذ ع الناس بسرعه ..
جانت تسولف وي امة .. وهي على فطاريتها يعني ماتتصنع ..
بس امة حسيتها تضايقت ..
ابو مهيمن .. هاااا عمو شو ساكتة خلينا نسمع صوتج ..
مهيمن .. مرتي خجوله لاتحرجها بابا ..
ام مهيمن .. لا مااريدها هيج جامدة احنه مجتمعنا يختلف وعندنا اصدقاء ومعارف .. ومن هسا اني اسولف بيها گدامهم اريدها مثل طبعي ..

مااعرف ليش ماارتاحيت او يمكن لان كلامهم وبيئتهم مختلفه عنه ..
وصلنا ونزلنا ..
اشرتله امة وگالتلها اخذ مرتك وروحوا گدامنا ..
بقى بالي يم امي ..
مهيمن .. العبايه حلوة عليج بس مااحبها .. اذا تزوجنا مااريد لاعبايه ولاجبه ولا صايه .. اريدج على اخر موديل

درة .. بس مامتعودة ..
مهيمن .. تتعودين .. من تجين البغداد اعيش حياة ثانية ..
اصلا مفكر اخذ شقه النا وحدنا ..
حتى ناخذ راحتنا ..

زرنا وطلعنا دخلنا مطعم تريگنا ..
بعدها ..
گالوا يله نطلع الكربلاء ..
ماجنت حاسبة حساب نمشي الكربلاء ..
للظهر يله وصلنا ..
وصلنا زرنا وتغدينا ..
گال الاهله خلو بالكم من عمتي ..
اني راح اخذ مريتي ونفتر ..

رحنا افترينا ودخلنا محلات ..
اشترالي ملابس تنورة وسترة حلوات ..
وبعدها عجبه ثوب نوم ..
گال هذا حلو ..
استحيت احجي ..
مال الابو المحل نزلة النا ..

طلعنا من المحل ..
گال درة راح اطلب منج طلب .
درة .. شكو ..
مهيمن .. اريد نبقى وحدنا .. بمكان بس اني وانتي ..
درة .. يعني شنو مافهمت ..
مهيمن .. خلينا نأجر فندق حتى لو ساعه .. بس نگعد سوة مانسوي شي والله ..

درة .. تحجي صدگ مستحيل ..
مهيمن .. من شنو خايفه اني رجلج ..
درة .. والمفروض تخاف عليه وعلى سمعتي ماتطلب هيج مني ..
مهيمن .. واني شطالب .. هذا حقي مشتاقلج ومن انخطبنا لسا ماباقين وحدنا .. ليش تكبريها ..
درة .. مهيمن رجعني يم امي ..
مهيمن .. درة لاتصيرين طفله .. ماماخذج الشقه مهجورة هي غرفه ساعه زمان ونطلع ..
درة .. طفلة ؟؟؟؟ هههه هاي عقليتي وتربيتي ومستحيل اتغير ومن اخذتني تعرف هالشي. .

عفته ومشيت وهو يصيح وراي ..
درة ارجعي فضحتيني .. مدتسمعين مو اصيح ..
تعاااي ..
وگفت .. شرايد ..
اوگفي اني اوصلج .. خلص احسبي ماطلبت ولاسمعتي بس لاتزعلين ..
دگ موبايله ..
الو ..هااا ماما ..
شنو .. شبيها .. ياحاكم .. جاين جاين ..

درة .. شكو شبيها امي ..
مهيمن .. امج تگلهم منو انتو ودوني البيت عمي .. وين حاكم راح وتخربط بالحجي ..

درة .. اخذني الها بسرعه بسرعه ..
مشيت اركض گدامة وهو وراي ..
مااعرف منين اطلع لو امشي تيهت ..
سحبني من ايدي .. مو منا شبيج ..
لازمني واني وياه ..
وصلت وشفت اني واگفه مثل التايهة وابو مهيمن يحجي وياها ..
ركضت الها ..
يوم يوم .. اوگفي هاي اني اجيت ..
شافتني ضحكت .. سندس وين رحتو حاكم وين .. خلتيوني وحدي مااعرف احد ..
حضنتها ..
طلعت علاج من جنطتي ..
وانطيتها ماي ..
هدأت شوية ..
ام مهيمن .. امج شبيها ليش هيج تتصرف مريضه لو بيها شي ..
درة .. مهيمن لازم نرجع .. حتى لو تاخذنا للگراج واني اخابر امير ياخذنا ..
مهيمن .. لا شلون اعوفكم وحدكم ..
يابة انتو ابقوا انتي وماما ..
واني اوصلهم ومناك اروح للقسم فد مرة ..

سلمت عليهم ومشينا ..
بس نضرات ام مهيمن ماعجبتني وكانت بيها الف سؤال وحيرة ..

ماگدرت افسر وضعها وخاصه اني وحدي واول مرة ماكو اخواني يمي يساندوني ..
حسيت بضياع ..
امي عقلها نساني حتى اني وعبالها عمتي سندس ..
ومهيمن جرحني ..
ماعرفت شسوي ..
خابرت امير وابجي ..
گال اني منتضركم يم سيطرة الجامعه لاتبجين ..
شويه حسيت بأمان من سمعت صوته ..

اجرلنا مهيمن سيارة خصوصي من كربلاء للديوانية ..
گعدت اني وامي بالورى ..
نامت على كتفي طول الطريق كانت هاديه ..
بس اني دموعي مانشفن ..
حتى السايق عينة عليه ومستغرب ليش ابجي ..
درت وجهي للشباك ..
وكاتمة شهگاتي ..
ودي اصرخ وابجي بعلو صوتي ..
بس مااگدر ..
مجبورة اكتم واسكت ..

وصلنا السيطرة وشفت امير وعلي واگفين يم السيارة ..
وجن روحي ردت الي ..
نزلت وذبيت روحي عليهم وابجي ..
امير .. اشششش حبيبتي منا عالم .. كافي هاي احنه يمج ..
خلي ننزل امي ..
نزلوا امي وصعدوها بسيارتنا ..
تشكروا من مهيمن واصروا يروح ويانا ..
باوعلي اني درت وجهي وصعدت للسيارة ..
مهيمن .. لا مشكورين .. رايح للقسم سلامة الوالدة ان شاء الله.. طمنونا عليها ..
راح واحنه رجعنا للبيت ..
نزلنا ..
هي وعت ع روحها ..
هايمة هاي شوكت رجعنا وشلون وصلت لهنا ..
شجاب علي وامير ..
جانت تسأل مستغربة ..
ماتحجون شبيكم .. ليش اني مااتذكر .. شبيه گولوا ..
امير .. يمة مابيج شي بس تخربطتي وجابوج لهنا واحنه تلگيناج ..
ياقوت .. ماتقنعوني .. لو صدگ جان تذكرت ..
درة شصار احجي .. وعيالج وين ..
درة .. يمة ماكو شي ادخلي ارتاحي هسا وبعدين ..
دخلت ..
اني گبل رحت الغرفتي مااتحملت تسال ومااعرف شجاوب ..
اجاني امير ..
درة عيالج شگالوا ..
درة .. ما حجوا بس استغربوا .. واصلا مايهمني .. الي يهمني امي . ترى بدت توعى وتعرف حالتها مو طبيعية
وخاصه بعد مانبهتها فاطمة ..
انير بأستغراب .. فاطمة شگالت ..
درة ..گالتلها انتي تنسين وتخربطين ..
امير .. اااااخ شنو من بشر هاي ..
درة .. لاعبالك امي راح تسكت بس هي مالحت من خوفها ..
امير .. الله كريم .. ربي يعينها ويعينا ان شاء الله..
بس انتي لازم تگولين للولد ..
درة .. ياولد ..
امير .. مهيمن . حقه يعرف والله مبين ذهب .. اسلوبه ورزانته ومواقفه تعجبني ..

ماعرفت شأحجي .. طبعا كلهم يشوفوه الشخص المثالي الي .. لان گدامهم انسان ثاني ..
نفسة الانسان الي كنت اشوفه بالجامعه بشخصيتة ورزانته ..
بس الحقيقه انسان ثاني .. احسة يمثل القوة والرزانة والوعي .. ويخفي بداخله ضعفة اتجاه رغبتة وغريزتة .
بديت اخاف منه ..
ولازم ماانطي مجال واخليه يحس بخطأة ..
صرت مثل بلاع الموس ..
لااگدر احجي ولااگدر اسكت ..
ومااعرف لوين راح توصل ..

غلقت جهازي ..
ومن داومت .. اجه يلوم بيه ..
ليش جهازج مغلق .
درة .. عندي محاضرة من رخصتك .. هلي واگفه يمي ..
مهيمن .. من رخصتج هلي اريد احجي وياها ..
درة .. لا اوگفي هلي خلينا نروح سوه ..
هلي .. اثبتوا عاد مو حيرتوني ..

مهيمن .. درة انطيني مجال احجي ..
باوعو الهلي .. راحت للقاعه ..
تفضل شتريد ولو اي كلام مايبرر سوايتك ..
مهيمن .. امج شلونها
درة .. الحمد لله .. هاهي اروح ..
مهيمن .. اني اسف والله ماقصدي شي .. اعتبريها نزوة وراحت .. بس من اشوفج اضعف مااعرف شيصير بيه ..
درة اني اريدح تصيرين ملكي مااتحمل بعدج عني والمسافه الي مخليتها بينا ..
درة .. بس اني باعتبار مرتك يعني مو بعيدة عنك .. انت الي تريد كلشي كن فيكن ..
الحياة مو هيج .. والحب والخطوبه وحتى العلاقه الزوجيه مو امتلاك ..
بالعكس هي مشاركة ..
بالاحاسيس والمشاعر والكلام ..
مايصير همك بس جسمج والاختلاء بيج ..
اني قريبه عليك بس انت الي ماتعرف تمتلكني انت الي ماتعرف تحتويني ..
انت الي ماتعرف شلون تخليني اتقربلك واحس بمشاعرك واحساسك ..
مهيمن .. اعتذر ..
درة .. مو كل مرة تحجي وتخطأ وتگول اعتذر ..
مهيمن المفروض انت انسان واعي ومحامي ومثقف ومنفتح وحياتك مختلفه ..
انت الي تعلمني وتوجهني مو اني الي اعلمك ..
مهيمن .. وعد بعد ماححي بأي شي يضوجك ..
بس لاتعبسين واضحكي ولاتزعلين ..
شو يله مو راح اتدمر من بعدج وجفاج عني ..
ابتسمت لااراديا ..
مهيمن .. اموت ع ربج الي خلقج .. شنو انتي بابتسامة منج تغيريني 180 درجة ..
درة .. مهيمن اني اريد نبدي حياة صحيحة .. واحد يفهم الثاني اني عانيت من اب وام مامتفاهمين وانتهت بزواج ابوي وطردنا من البيت .
واكيد تعرف او سامع عن حياتنا ..
مااريد تجربه اهلي تتكرر ..
اريد حياة مثاليه مثل الي اتمناه طول عمري ..
مهيمن .. اوعدج الي ترديه يصير .. ومنا وجاي راح تشوفين مهيمن ثاني ..
درة .. بقت شغله .. بس من اخلق محاضرة اسولفلك عنها ..
مهيمن .. خير ..
درة .. بعدين تعرف ..

كملت محاضرة .. وگعدنا وحدنا وسولفتله عن امي ونسيانها..
مهيمن .. شنو عندكم وراثة بهذا الشي ..
درة .. لا ابد ليش سألت ..
مهيمن .. لا بس عبالي هالمرض بي وراثة ..
درة .. لا بس يجي من القهر او الحزن وامي تعبت بحياتها كلش .. بس الي مطمنة انه هي تنسى شوية وترجع الحالتها ..
بس اذا نستنا نهائي شلون ..

لزم ايدي وعصرهن .. لاتخافين ماراح نتركها كلنا واني وياج ومااعوفج ..
ابتسمت اله وشبكت اصابعي حول ايدي ..
وگتله .. مساندتك الي اكيد راح تريحني ..

كنت محتاجة احد يساندني ويوگف وياي .. ومهيمن گدر يخليني اغير نضرتي اله ..
بتغيرة ومساندتة وكل يوم يخابر يسأل عليها ويواسيني ويحاول يقويني حتى كلامنا تغير وماعاد يحجي باغراء او اباحة ..
بالعكس نگعد نسولف بالساعات من غير مانحس ع بعضنا وبديت اتعود عليه ..
لدرجة اذا اتاخر او ماخابر استفقدة ..
حتى صباح الخير مالته ومسجاته الصباحية صارت روتين يومي بالنسبة الي وتعودت عليه ..
بيوم سألتني سدن عنه وعن وصعي وياه ..
فرديت عليها وگلتلها ..
(عسـا ان تكـرهوا شيئا وهو خيراااا لكـم ) ..

بقلمي_الكاتبة_شمس
يتبع ..…

[لامارا]

//// البـارت السـابع والـثلاثـون ////
عجـاف_القلـوب ..
الكاتبـة_شمـس ..

في لحظة ما ..
ولبرهة من الزمن .. تشعر بأن الدنيا قد فتحت لك ابوابها من جديد ..
بعد ان يأست من شئ اسمه الامل ..
ليعود بك الزمن مرة اخرى ويصدمك بواقع مختلف عن ماكنت تتأمل به ..

-حبيبتي ماتخلينا نتزوج بالعطله ..
- لامهيمن انت وعدتني لمن اكمل ..
-لج شيصبرني .. اشتاقلج مو بيدي ..
مستعد اجر بيت هنا ونگعد .. هم قريبة على اهلج ..
وهم دوامنا هنا ..
-واهلك يقبلون ..
-معليج بيهم اني اقنعهم ..
-بس مهيمن مااريد نسوي شي بأستعجال خلينا نكمل وبلكي تتعين وبعدها نستقر ..
-تحجين صدگ درة هو انتي ضامنه بسرعه نتعين هاي اذا ما بقينا كم سنة يله ..
والحمد لله اني مامحتاج اگدر افتح اي مشروع واكون نفسي بين مايجي تعيني ..
-ع الاقل خليك تتخرج انت .. بقت الك سنة وحدة لويش مستعجل ..
-گولي انتي الي خايفه وماتردين تتزوجيني ..
-وليش اخاف .. ماانكر بالبدايه صح مترددة بس هستونا بدينا نعرف بعض ومااريد نستعجل ونتندم ..
مهيمن .. هاهي الي تشوفيه ..

حسيته ضاج وانقهر ..
گال اروح للمحاظرة .. يله تگومين انطاني ايدة يگومني ..
مهيمن .. درة وين حلقتج ..
بقيت صافنه ..
حلقتي !!
ماادري ..
شنو ماتدرين ليش نازعتها .. شفتيني فد يوم اني نازعها
درة .. شبيك مهيمن انتو من جبتوها جبيرة عليه اخاف وگعت بالبيت من ارجع اشوفها ..
مهيمن .. خاف هنا وگعت .. من توصلين للبيت شوفيها وانطيني خبر ..
درة .. ميخالف . بقيت اباوع بمكاني ومنا ومنا ماكو ..
اخاف الصبح من غسلت بقت ع المغسله اي يمكن لان اني انزعها وكت مااسبح او اغسل لان تخرط .
ارجع واشوفها ..

كملت محاضرات وطلعت اني وهلي ..
ماشفت مهيمن ..
بس استغربت حيدر گبالي ..

سلام .. شلونكم ..
هلو حدوري شتسوي هنا ..
اجيت اشوف اختي واوصلها وياي مايصير ..
لايصير .. بس مو عوايدك ..
هاااا .. ايا ناكرة ابد ماموصلج ..
ههههههه اشاقه وياك ..

صدگ نسيت اعرفكم ..
هلي صدقتي واختي ..
وهذا حدوري اخويه راح يتخرج السنة ..

حيدر .. اتعرفنا على بعضنا بيوم عقدج ..
هلي .. اي صح ..

درة .. هاااا اي صدگ نسيت .. يله خلينا نوصل هلي وبعدها نروح للبيت ..
حيدر .. ومناك نمر على سدن ناخذها امير مافارغ ..

وصلنا هلي ورحنا ناخذ سدن لگيناها منتضرة بالباب ..
دگ الموبايل ..
الو درة وينج طلعتي شنو ..
اي طلعت اجه حيدر واخذني ..
غير تحجين. صار ساعه انتضر برة ..
هااا ماادري نسيت اعتذر ..
هاهي حبيبتي سلميلي عليه ..
الله يسلمك ..

سدن .. هذا مهيمن ..
درة .. اي .. ماگتله رايحة ويدور عليه ..
سدن .. خطيه .. غير تگليله
درة .. شمدريني اجه حيدر وانشغلت وياه ونسيت .. وهو اصلا ضايج ع الحلقه مالتي عباله نازعتها ..
سدن .. ليش وينها ..
درة .. ماادري الصبح من غسلت نزعتها وبقت ع المغسله يمكن من نرجع اشوفها ..
سدن .. اي اذا بالبيت ماتضيع تلگيها . بس انتي لازم تصغيرها حتى ماتوگع من ايدج ..

حيدر .. مو كافي صارلجن ساعه تسولفن واني صافن ..
درة .. غير جاي تسوق شعليك بينا ..
اشو قبل شويه هادئ وشحلاتك ..
سدن .. ليش شكو قبل شويه ..
درة .. وصلنا هلي ويانا للقسم وهو ماشايفته الله نزل عليه السكينة والرزانة مرة وحدة ..
حيدر .. اي خوش اجتج سالفه تسولفين بيها ..
سدن .. احم احم واخيرا اكو من وگعت الاسد ..
حيدر .. ها سدن دور انتي گلبتي عليه ..
سدن .. هههههه اي ضايجين نريد عرس ع نهايه السنة ..
حيدر .. عرسي الاخت الي يمج وروحن البغداد اردحن هناك ..

مااعرف ليش من جاب حيدر طاري العرس وبغداد گلبي رجف وخفت وتوترت ..

وصلنا للبيت واول شي سويتة رحت ادور الحلقه ماكو
ماخليت مكان ..

درة .. ماما ماشفتي حلقتي ماهي ..
ياقوت .. لا والله ماشفتها وين سلحتيها .. شوفي زينب هي نضفت الصبح ..

زينب شفتي حلقتي نزعتها ع المغسله من غسلت ..
زينب .. لا ماشفتها .. خاف عمتي شايلتها وناسيه تدرين بيها تنسى ..
درة .. مو الهلدرجه يعني كل حاجة تضيع نگول امي شالتها ونست ..
زينب .. اي قابل بگتها اني .. شوفيها بغرفتج شو وين والله يالله اني حايرة بروحي وهي بحلقتها ..
قحط حلقه لو ماشايفين حلقه ..

درة .. كافي هسا اني شگلتلج قابل .. سألتج اذا شايفته سدي الموضوع خلص .
زينب .. لا مو نضراتج بيها اتهام الي ..
درة .. اووووه ياكلمة ردي المكانج خلص اسفه ..

دخلت بدلت واني افكر وين الگيها .. دورت غرفتي كلها ماكو ..
يوم كامل ادورها وماكو ..

اجة امير شافني مهوسة ..
شبيج اليوم تدورين وخابصه روحج ..
درة .. حلقتي ضاعت ..
امير .. دگومي فداج الف حلقه .. اريد اخذ سدن للدكتورة مراجعه .. ومااريد اتعب ع
امي .. روحي ويانا ومناك اني اخذلج حلقه والي تعجبج
درة .. بس بشرط اني ادفع فلوسها ..
امير .. هههههه عود عندها فلوس وتتشرط .. هذا الحجي من تتزوجين وتطلعين من مسؤوليتي ..
ولو حتى لو صار عندج عشر جهال تبقين مسؤوليتي لاتنسين هالشئ ..
گرص خدي وطلع ..
بدلت ورتبت غرفتي ..
اجت زينب ..
صدگ راح ترحين وياهم ..
اي وي سدن خطيه وحدها وامها ماهي وماما ماتگدر
زينب .. والعشا من يسويه ..
درة .. لا تسوين شي احنه نجيب ويانا ..
زينب .. اي عفيه اني ظهري موتني من الوجع وتدرين ولادتي قربت مااگدر اتحرك ..
درة .. نامي وارتاحي .. بس ديري بالج على امي لاتغفلين عنها ..
زينب .. اي ميخالف ..

رحنا للدكتورة وطمنتها على وضعها زين وماكو اي خطورة ع الطفل .. انطتها علاجات وموعد للمراجعه من تدخل بشهر الرابع ..
وسألتها سدن عن الدوام گالتلها مايأثر بس كون ماتمشين هواي او حركة زايدة ..

طلعنا للسوگ .. دخلنا للصايغ جان راقي والذهب يخبل عندة… وهو معروف بالديوانيه ..
شاف امير رحب بي وكأنه يعرفه ..
طلع يتعامل وياه وماخذ سيارة من معرض امير ..

طلب امير نشوف الحلقات ..
جانن يخبلن والصراحة حرت بالاختيار.. تالي فضلت السادة گتله احسن واخذتها ع قياسي حتى ماتضيع

سدن .. اخذي سادة عريض هذا احلى من الرفيعه ..
لبستها حلوة على ايدي وثگيله ..
حتى سعرها كان غالي بوكتها ..
بس امير خزرني وماقبل اساعدة بالدفع ..
رغم اني عندي اجمع من مصروفي ومرات مهيمن ينطيني ..

امير .. هسا اريد اشوف المحابس بس كون حلوات وثگال ..

بقينا اني وسدن صافنين ..
جاب المحابس .. يخبلن ..
وكل محبس ع طول الاصبع وزايد ..
باوع السدن وگالها يله ام كروري اختاري ..
سدن .. اني ههههه شسوي بي تسلم ابو كروري مامقصر عني انت ..
امير .. يله يعيني هذي مالها علاقه بالتقصير هاي هديتة رضاوي ..
سدن .. يارضاوي .
امير .. مرتضى ابنه الي راح يشرف.
سدن .. هههههه امير من هسا سميته وشعرفك ولد. .
امير .. ماادري هيج احساس ولو تدرين بيه مايفرق عندي الولد من البنيه كلشي يجي من الله هلا بي ..

اختارت محبس حلو ع طول اصبعها وبي شذر .. جان نازك ..
دفعنا وكملنا وطلعنا ..
گتله اموري ناخذ عشا لان زينب ماتگدر تسوي وخاف مانلحگ ..
امير .. ماتگدر هاي لو طلعه ماگالت مااگدر ..
سدن .. يله حبيبي شنسوي هذا طبعها ..
امير .. واني هم ماگايل بس من تزوجت لسا مخلصتها طلعات وونسات واهلها مسويتهم مزار كل يوم ..
بس من نطلع احنه ماتگدر تسد مكانه ..
اني الخاطر علي ساكت ومااريد هالسوالف تخرب خوتنا

درة .. هاي انت گلتها .. سوالف تافهة لاتخليها تخرب خوتكم لو مهما تسوي ابد لاتخربوها .. هي تكيف تطلع وحدها من باجر وتاخذة وياها ..
بس فكروا بأمي تموت ماتتحمل فراگكم ..
امير .. لا والله مااهتم ماتشوفن حتى اختلاطي بيها قليل بس هسا يمجن حجيت لان گلبي طاگ منها ..

اخذنا عشا ورحنا للبيت ..
دخلنا .. صارت بوجهنا گاعدة ع التلفزيون ..
مدري شلون انتبهت ع ايدينا ..
عيني عيني الله يزيد شنو هالادين يلمعن ..
هذا منين اخذتي المحبس سدن حلو ..

امير .. وين امي ؟؟
زينب .. ورى البيت تخبز ..
امير .. تخبز ؟؟ وشلون تخليها تخبز احنه مو مانعيها وليش عايفتها وحدها ماتخافين يصير بيها شي ..

ركض امير ورى البيت ..
زينب .. اوووي ليش يصيح عليه . قابل هي صغيرة وامنعها هي اذا عاندت منو يمنعها .
درة .. بس احنه مخليها بأمانتج .. وتدرين بوضعها ..
زينب .. والله مو انتن طالعات وتتونسن وتشترن ذهب واني تخلني حراسه عليها .. اصلا اني اخاف منها من تجيها الحاله ..

سدن .. احترمي شنو الحاله قابل هي شبيها ..
زينب .. مااسمح تصيحن عليه امير من جهة وانتن من جهة اني رجلي مااخليه يصيح عليه ..

درة .. اروح اشوف امي احسن ..
رحت الامي لگيتها تخبز وامير يتوسل بيها تعوفه ..

ياقوت .. يمة هن قليلات شبيك كبرتها .. والله خبز المخابز مابي طعم واشتهيت اخبزلكم خبزة حارة ..

امير .. اروحلج فدوة يمة لاتسوين هيج .. من نطلع اگعدي واسكتي واذا درة وسدن هنا .. شتردين سوي اخبزي اطبخي بس كون البنات وحدج ..

ياقوت .. ليش خايف عليه اتخبل لو تجيني حاله انسى بيها ومااتذكر .. صح عقلي خرف بس گلبي يحس ويعرف لاتتوقعون بيوم انساكم لو انسى ريحتكم ..

امير .. شني هالحجي يمة ..
ياقوت .. كلشي عرفت .. انتو ضامين عليه اني خرفت وانسى ..
درة .. منو گالج هالحجي يمة .. هذا مو خرف .. مجرد تنسين اشياء وترجعين تتذكرين يعني حاله مؤقته ..
والعلاج والفيتامين جاي يفيدج ..

ياقوت .. مااريد اصير عليكم حمل .. ولااريد تعاملوني مثل الطفله .. الي كاتبه الله يصير لاتخافون عليه ..

امير .. هي ماطلعت ولامشت ماكو غير زينب گالتلها ..
دخل امير فاير للبيت ..
وگال .. ابقي يم امي لاتعوفيها ..

امير .. زينب زينب ..
زينب .. ها شكو .
امير .. انتي شنو من بشر ماعندج رحمة لو امج تسوين هيج وياها ..
زينب .. شسويت شكو حامي عليه ..
سدن .. امير شكو شبيك ..
امير .. الي ماعندها ضمير .. راح گايله الامي على مرضها .. وياريت موصلته الها بصورة صحيحة ..
گايلتلها تنسين وتخرفين وماتعرفين واحد ومكبرتها ومعضمتها ..
سدن .. عزا العزاج شلون هيج تگليلها ..
زينب .. اوووي شبيكم هايجين عليه اول وتالي تعرف وهي عاندت الا تخبز گلتلها بلكي تتراجع ..
اني مو حايط نصيص هنا ياهو اليجي يصيح عليه ..
ادري بيكم ماتحبوني وتدورون زلات عليه حتى تطلعوني من البيت .

امير فرك وجهة وگال ..
ياربي شنو انتي فوگ شينج گوات عينج ..
زينب .. اني اصعد الغرفتي احسن .. استغليتوني وحيدة
امير .. عندج رجل ويحاسبج خلي يجي واني اتصرف ..
زينب .. عليمن تگله اني اگله شسويتوا بيه .. وانت شويه وتضربني وتصيح وتغلط عليه ..

امير .. لا اله الا الله شني من بشر هاي . منو الي وصلللها وغلط عليها ..
سدن .. مو گتلك ياعيني تريد حجة هاي وهي تتعمد تسوي هيج عندها غايه ..
امير .. والله مااخليها تنول غايتها ..

للمغرب رجع علي ضايج وشحاله ..
دخل البيت ..
شكو شصاير هنا .. شبيكم وي زينب ..
امير .. گول هي شسوت بالاول يله تحجي ..
اكيد خابرت تبجي وتتمسكن ..
علي .. امير مهما تسوي تجي تگلي الي مرتي واني اتصرف وياها .. مو من حق اي احد يتجاوز عليها ويغلط .
يعني تدرون بأمي اذا عاندت شتسويلها هي قابل تمنعها لو تقفل الباب عليها ..

امير .. باوع ولك لاتصير اثول وتتقشمر بالحجي .. مو هاي سالفتنا ..
مرتك رايحة گايله الامي انتي تخرفين وتنسين وماندرين بروحج شتسوين ..
وامي عاندت وخبزت حتى تثبت انه مابيها شي ..
تدرون بأمي تكتم بگلبها وماتحجي يعني هالسالفه راح تخلي حالتها تزداد اكثر واكثر ..
اني مكيف حالته تمشي بالبطئ وبسبب مرتك امي راح ياخذها الوهواس والله العالم شيصير بيها. .

علي من غير مايحجي صعد لفوگ ..
طلعت امي من الغرفه جانت تصلي ..
شبيكم يمة شكو ..

درة .. ماكو شي يمة يله حضرنا العشا خلونا نتعشا ..
مدينا السفرة وجاي اخلي بالاكل ..
سمعنا صوت زينب وعلي يتعاركون. .
وهي تعيرة بأمير وتگله شوف شلون يعامل مرتة وشجايبلها محبس تارس اديها وانت بالجذب تجيبلي هديه وفوگ هذا مخليهم يحجون عليه ويغلطون وانت ساكت ..
ماتشوفهم واليني لان يدرون بيك ماتحجي ..

علي .. احترمي نفسج .. ترديني اعاركهم على سوالف الزعاطيط مالتج .. وبعدين بشنو مقصر عنج .. شو كل الي احصله تاخذيه وتجمعين ماتعرفين تشترين ذهب

زينب .. المن ماخذتة غير ضمان البنتك الي تجي للدنيا وهي كل ضمان ماعندها ..
باجر عگبه ننطرد منا وحتى بيت ماعدنا ..

علي .. لاتحورين بالحجي .. انتي شلون ترحين الامي وتگليلها صايرة تتمادين هواي .
ذيج المرة گلتي الاختج .. واختج الوكحة طلعت السانها على امي شعلاته . وهسا انتي ..
ابتليت حبيتج لو ماابتليت . كل مرة تدوسين عليه واتحمل واصبر واسكت بس من توصل الشغله الامي ..
ادوس على گلبي وامشي فاهمة ..

بقت تبجي وتعيط .. اطلع منا اكرهكم كلكم وديني الاهلي ماابقى يمك شمحصله……… ماخلت حجايه ماگالتها ..
عافها ونزل ..

ياقوت .. شبيكم يمة ليش تتعاركون ..
علي .. ماكو شي يمة اني طالع ..
امير .. وين اتهدى واگعد تعشا ..
علي .. لعبت نفسي بعلي .. اتزوجت حتى ارتاح واستقر تالي مامحصل بس النگ والقهر ..

حيدر .. السلام عليكم .. شكو لازم اكشن جديد فاتني الوجوه ماتتفسر ..

امير .. دنجب وتعال تعشا وحسابك بعدين على هاي طلعاتك وتتأخر ..

باوع الساعته ..
شنو السالفه ابو كرار ترى هستوها صارت السبعه ..
الي يسمعك يگول جاي بـ 12 الضهر ..

ياقوت .. يمة الوكت مايتأمن واخوك يخاف عليك ..
حيدر .. هاي شنو اليوم كباب .. طلقه اغسل واجي ..

امير .. هههههه الي يسمعه يگول ماماكل ..بحياتة كباب تعشينا وكملنا ..
اندگت الباب ..
اجه خالو مرزا وخالو حمزة ..
الظاهر زينب مخابرة امها لو ابوها ومشتكيه الهم ..

امير .. سووو جاي .
دخلو للبراني .. واني وسدن سوينا جاي ..
ماقبلوا اني تدخل وگاللها امير عندنا شغله ..

هي حست يخافون على مشاعرها .. جانت هادية كلش وابد ماعلقت لو حجت بالموضوع ..
گالت راح اقرأ قرآن بغرفتي ..

دخلت وسدت الباب ..
بقينا اني وسدن بالهول گاعدين ..
صاحوا زينب نزلت ..

مرزا .. بويه اجينة حتى نفهم السالفه شصاير بينكم . البنية خابرت تبجي وتگول الابوها يجي ياخذها ..

گعد امير يسولف بحيث ماانطاهم فرصه للحجي .. وحجة افعالها كلهن وعدم احترامها الامي وتصرفاتها وياها ..
بحيث استحوا على نفسهم ..
كل هذا وعلي مدنگ وماحجة شي ..

وهي تبجي وتحجي حجي ماله معنى .. ومايحبوني ومدري شنو ..
مرزا .. زينب انتي غلطانه .. والي سوتيه بحق عمتج ماينغفر لو امج ومرت اخوج تسوي هيج تقبليها ..
كافي يبوي اكبري راح تصيرين ام اعقلي رجلج يحبج ومقدرج لو واحد غيرة شمرج من زمان ..
مايصير كل يوم زعلانة ومسويتلج مصيبة ..

حمزة .. انتو هم اعذروها حامل وراح تطب شهرها .. اني اگول اخذها كم يوم ترتاح يمنا وتهدأ واجيبها ..
ها شگلت علي ..

علي .. اذا تريد تروح خلها تروح مالي شغل بيها . بلكي تعقل وتتهدى ..

عافهم وطلع ..
امير راد يكسر الحاجز ..
سألهم عن عبد الله .. لان سافر السوريا يدرس ..
وسألهم عن يوسف ووضعه ..
بعدها سالفه وضحكة غيروا الجو ..
طلعوا ونزلت زينب محمله جنط . تلگاها حيدر اخذهن منها ..
عبالك راح تبقى سنين مو كم يوم ..
ماحجت ولاسلمت گبل طلعت ..

رحت اشوف امي .. شفت عيونها وارمات ..
مبين جانت تبجي ومقهورة ..

اتقربت منها . سحبت ايدها وبستها ..
شبي الحلو ضايج ..
ياقوت .. يمة خاف يزيد حملي عليكم اعذروني مو تملون مني ..
درة .. حضنتها شنو هالحجي يمة انتي بعيونا معليج بالحجي انتي مابيج شي وحتى من تنسين مرات ماتنسينا ابد ..
بقت تتلمس بوجهي وجنها تريد تحفظ ملامحي ..
دخل امير شافها ..
مااتحمل ..
حضنها ويواسي بيها ويطمنها ..
گالت صيحوا اخوتكم ..
بيومها لمتنا كلنا ..
وگالت ..
خاف بيوم انسى .. اريدكم تذكروني .
مااريد ذكرياتي تروح كلها لازم تعرفون كلشي عني من اني صغيرة الحد ماكبرت ..
مااحب اكتب جان كتبت الكم ..
بس الحجي اسرع واحسن يعبرلكم عن كلشي وتبقون تتذكروه ..

خلتنا داير مدايرها .. وسولفتلنا على كلشي صار من هي صغيرة الى يومنا هذا ..
كل ذكرياتها وي ابوي وشلون حبته وشلون غدر بيها ..
جانت تسولف وعيوني تجري ومااتحمل ..
الله يساعدها حقها تنسى وتتمرض ع الضيم والقهر الي شافته ..
الله يساعدج يمة شلون اتحملتي .. واني الي اگول على نفسي الحزن يركض وراي ..
اثاري حزني مايوصل ذرة من حزنها ..

بجت وضحكت وتعبت وجانت تتلمسنا واحد واحد ..
انطيتها علاجها ونامت ..

كلمن راح الغرفته ..
تمددت ع الجربايه اخذت الموبايل من الشاحنة ..
شفت رقم هواي داگ عليه ..
ومهيمن هم متصل وداز رسائل ..

خابرتة ..
ها حبيبتي وين اتصل وماكو ..
درة .. جان عدنا خطار وماادري بي. .

مهيمن .. شبي صوتج شنو باجيه ..
درة .. لا بس مالي خلگ ونعسانه ..
مهيمن .. ولو مااقتنعت بس يله باجر نلتقي ونسولف روحي نامي ..

سديتة ونمت تعبانه حيل ..
ثاني يوم داومت ..
شاف الحلقه ..
گال .لعد حلقتج وين ..
درة .. مالگيتها .. وامير اشترالي هذي الحلقه حلوة ؟؟
مهيمن .. وليش ماگلتي جان اني اشتريتلج ..
درة .. ماكو فرق ..
مهيمن .. لا اكو .. حسسني اني رجلج لمرة واطلبي مني ..
درة .. ليش تكبر الامور .. هسا اني بعدني ببيت اهلي واخواني مايحبون يقصرون عني ..
من اصير يمك ذيج الساعه طلباتي واحتياجاتي راح تكون منك ..

مهيمن .. اممممم .. هم اتصل عليج رقم غريب البارحة
درة .. اي هذا الك ..
مهيمن .. لا الماما .. مااعرف شلون اخذتة من جهازي وخابرت .. المهم لاتردين عليه ابد بحجة ماترفعين الارقام الغريبة ..
درة .. ليش ..
مهيمن .. من غير ليش گتلج لاتردين وخلص ..
يله خلينا نگوم للمحاظرة ..

كمل اليوم عادي ..
وحيدر اجه اخذني كالعادة بالفترة الاخيرة صاير هو السايق مالتنا ..
وشاف مهيمن وسلم عليه ..
اگلك مهيمن هذي اخر سنة اذا سوينا حفله جيب درة وتعالوا ..
مهيمن .. ان شاء الله..

رجعنا للبيت ..
جاي ابدل .. دگ الرقم نفسه ..
مرة مرتين استحيت ماارد ومااعرف اجذب اذا بيوم عاتبتني ..
اضطريت رديت ..
الو درة اني ام محمد ..
هلاو عمة شلونج ..
هلاو بنتي ..
اگلج يوم اريد احجي وياج بس مااريد مهيمن يعرف ..
-خير عمة گولي ..
-اني سمعت امج تجيها حالات تنسى .. والصراحة شكلها ذاك اليوم ماراح من بالي ..
وخايفه ..
-من شنو خايفه ..
-خايف هذا المرض وراثي ويطلع بجهالكم .. واني گلبي متولع مااريد هالشي ياثر على اولادكم بالمستقبل ..

درة .. عمة ترى هذا زهايمر . لاوراثة ولاهو مرض معدي ..
اغلب كبار السن يصير بيهم بسبب الكبر والتعب .. بس ماما اتقدم بيها لان عانت بحياتها هواي واني سولفت المهيمن كلشي ..

ام مهيمن .. اي صح بس اني حقي .. ويجي يوم تفهميني الصراحة گلبي لعب ومااعرف شأگلج ..

درة .. ترديني افسخ لو شنو مافهمت ..
ام مهيمن .. لا ديري بالج تحجين يم مهيمن مايقبل بس اني حبيت انبهج ..
لان احنه… لو اگلج سدي الموضوع ولاتفتحيه ولاتسولفين بي المهيمن ابد ..

سدت التلفون واني مافاهمة شتقصد وشتريد ..
حجت وياي وكأنه تگلي مااريدج ..
اخاف احافدي يطلعون مثل امج ..
هزيت ايدي .. عبالك امي شو شبيها مرض .. شنو هالناس ياربي ..

بقيت كم يوم اريد افتح الموضوع وي مهيمن ومااگدر ..
اخاف تصير مشكله بسببي ..
بس اني هم حقي افهم شنو قصدها وليش هيج جانت خايفه ..

مرة گاعدين سوة وسألته ..
مهيمن انتو عندكم مرض وراثي ..
ماكملتها للجمله هو عصب وتنرفز .. شتقصدين وليش هيج حجيتي ..

درة .. مااقصد بس ..
مهيمن .. امي خابرتج مووو ..
سكتت ..
مو گتلج ماتردين عليها ..
-من شنو خايف ..
-ماعندي شي اخاف منه .. بس ادري بأمي ضايجة من سالفه امج وماحبيتها تجرحج وتسوي مشكله الج ..

درة .. لاتعصب اصلا ماحجت شي بس استفسرت .. خلص سد الموضوع ..

فرك وجهة .. درة اني خايف من فقدانج . مااعرف ليش احسج بيوم تنهين كلشي وترحين ..

درة .. ليش هيج تفكر .. اذا انت زين وياي ومتفاهمين مااعتقد اكو شي يخليني اتراجع ..

مهيمن .. وكلام امي ..
درة .. حقها تخاف بس اكيد مو حقها تتدخل بعلاقتنا .. وهذي العلاقه احنه الي نقرر تنتهي او لا ..
ومدام انت ماعندك افكار براسك مثل افكار عمتي فأني اكيد راح امسك ايدك ومااتركها ..

لزمت ايدة .. عصرها وابتسم ..
بس حسيته متوتر بعدة ..
وكأنه خايف من فقداني بعدة ..
ومن هذا اليوم مهيمن اتغير اكثر وصار رومانسي اكثر ومايدقق ع اللكلام ولايتنرفز ويتعصب مثل قبل ..
بس طالعلي بسالفه خلي نتزوج ونستقر هنا ..
مااعرف شنو الي مخليه متوازي مع انه احنه متفقين نكمل وهو بعد اله سنة ويتخرج ..

رجعت للبيت .. لگيت امي مبدله ومنتضرة ..
ها يمة شكو ..
مرت اخوج جابت ورايحة اشوفها ..
منو زينب ؟؟ جابت لو راح تجيب .

ياقوت .. لا جابت صارلها ساعه . واخوج من المحل مخابريه وراح .
درة .. يعني لمن جابت يله كلفت نفسها تخابر ماعرفت تگول قبل ..

ياقوت .. يمة لاتصيرين هيج .. هاي هم حسبة اخيتج . تلگيهم انشدهوا بيها ومالحگوا يخابرون ..

درة .. هاهي يمة ادري بيج ماراح تنطين بيها .. بس هم حجيج صدگ مانضيع فرحة علاوي خطيه ..

راحت امي الهم ..
ونزلت سدن .. گالت خابرت امي گالت من الصبح تطلگ للظهر يلة جابت ..

درة .. وامي تدافع الها وتگول خطيه . جا امها ماعرفت تخابر وتگول ..
سدن .. المهم گاموا بالسلامة . بس انتي شبيج ضايجة

درة .. لا ماضايجة .. بس مهيمن هالايام طالعلي بسالفه الزواج .. ماصارلنا سنة مخطوبين .
سدن . اي هاهي حقه هم يريد يستقر ..
درة .. احنه متفقين لمن نكمل يله .. هسا يگلي لا نتزوج بالعطله يم اهلي .. وقبل الدوام انأجر بيت هنا ونگعد بي ..
سدن .. والله كلامة حلو ومابي شي لويش انتي رافضه .. عيشوا حياتكم سويه هنا وروحوا سوة وارجعوا وتونسوا وع الاقل عمتي تتعود شويه شويه على غيابج تدرين بيها شايله هم الج شلون راح ترحين البغداد ..

درة .. ها ماادري ..
لليل رحنا شفنا زينب وبنتها تخبل تشبه امي .. سموها جنه ..
ورجعنا بالطريق ..
خابر مهيمن الامير .. حجة وياه وسدة ..

باوع من المرايا . گال باجر مهيمن غداه يمنا عندة شغله وياي ..

بسرعه ضاگ صدري مااعرف ليش .. وتوترت ..
ثاني يوم جان جمعه .. جهزنا الغدا اني وماما وسدن ويانا ..

اجه مهيمن تغدينا وكملنا وامي فرحانه بي ..
فتح الموضوع ..
امير .. من رخصت عمتي ..
اني حجيت وي درة بس هي مترددة او مستحيه ماادري
اني قررت نتزوج بالعطله يم اهلي .. وبعدها انأجر هنا ونگعد نكمل جامعتنا واحنه متزوجين ..
لان تدرون اني گاعد قسم ومتشتت .. واريد استقر

ياقوت .. تعالوا گعدوا عدنا هنا بيت جبير وواسع وغرفتها فارغه ..
مهيمن .. لا عمة مايصير .. اني اجرلي حتى اذا شقه صغيرة ونگعد بيها بس الاهم موافقتكم نتزوج بالعطله ..

امير .. والله مااعرف شأگلك .. بس فاجأتني اني متوقع لمن تكملون .. وبعدين هذا قراركم اثنينكم اني مااتدخل

مهيمن .. انت بمثابة ابوها ويهمني رأيك ..
امير .. ها شگلتي درة ..
درة .. بكيفك ..
مهيمن .. احنه بالاول نعقد محكمه ونكمل شغلنا وبعدها نتزوج .. بالعطله .. شگلتي درو ..

درة .. الي تشوفوه .. حسيتة خلاني امام الامر الواقع حتى اذا ارفض او احجي راح امير يبقى يسأل ويشك اعرفه ماتفوتة فايته ..

ياقوت .. يمة هسا انت عليمن مستعجل .. كملوا امتحانات وبعدها اخذ مرتك اعقدوا وارتاحوا ومناك الامتحانات اخر السنة الف حلال ..
هسا انتو تعبانين من الدوام وامتحانات راح تجي لهذا ماتگدرون تقررون ..

مهيمن .. هو هم هيج .. حتى تجي امي وعماتي وتقررون التجهيزات ..

قررنا بعطلة نصف السنة نعقد محكمة ولازم نمشي البغداد ..
كملنا امتحانات وعطلنا ..
گال امير مااگدر اودي امي وياج . لان تدرين بوضعها وخاف تحيرين بيها هناك ..
انتي روحي وي مهيمن من الصبح كملوا شغلكم . واني بعد الظهر اجي اخذج بنفسي ..

حرت شنو البس ..
لبست تنورة وسترة اوڤ وايت .. لان مهيمن ماقبل البس عبايه اسلامية ..
گال رايحين نعقد ..
حسب مافهمت گال عدنا معارف هواي وابوي مناك مكمل الاوراق بس نعقد ونطلع الاهلي عازمينا على غدا
حتى من يجي امير نطلعكم نفتر شويه واراويج الغرف نختار سوة ..

اجة مهيمن من الفجر ..
جان كاشخ ولابس قاط ..
اصرت سدن تاخذلنا صور سوة قبل العقد ..
واهلي جانوا طايرين بيه ودموع امي وحضناتها . خلتني ادمع ..
مسح عيوني مهيمن وگال مااريد هذي الدموع تنزل بعد منا وجاي اريد بس الضحكة اشوفها ..

وصلنا امير للگراج وركبنا .. گال بس اكمل شغلي اجيج . وصى مهيمن عليه ..
مهيمن .. لاتشيل هم درة بأمانتي وبعيوني ..
امير .. كفو والله .. يله مودعين ..
طلعنا البغداد ..
وكنت مستمتعة بالمنضر بس جانت مليانة صبات والوضع يخوف هناك .. بقيت لازمة بيد مهيمن وخايفة ..
هو گاعد بالصدر ..
مد ايدة الي وگال .. ماكو شي هنا امان لاتخافين ..
ماصدگت وصلنا ..
گتله خلينا نزور بالاول حتى اذا من بعيد وبعدها نروح ..
مهيمن .. هو هيج مفكر ..
تفاجاأت بأمة وابوه سابقينا هناك ..
سلمت عليهم ورحنا زرنا وتريگنا وطلعنا للمحكمة ..
بقينا منتضرين للعشرة بين الاجراات والفحص ..
دخلنا للقاضي ..
جان مخلي حاضر وغايب خمسة بعشرة . وبسنة 2007 هالمبلغ كبير يعني ..
گال اخلي اكثر اذا تردين ..
درة .. لا هذا هو. السعادة مو بالفلوس ..
مهيمن .. ويلوموني لان حبيتج ومستقتل عليج ..

كملنا حسيته فرحان .. وامة طشت جكليت علينا ..
ابو مهيمن .. نورتي عائلتنا بويه .
خلونا نمشي كلها منتضرتنا بالبيت ومحضريلكم حفله صغيرة هناك لان ماگدرنا نحتفل بعقد السيد ..
طلعنا للبيت مالتهم ..
ودخلنا منطقه راقية وبيوت حلوة وكبيرة ..
بس ماادري ليش حسيت بضيق بصدري وخوف ..
او يمكن لان وحدي بوسط ناس وعالم غير عالمي ..
تمسكت بإيد مهيمن حيييل ..
وهو جان فرحان اخذهن وباسهن ..
مهيمن . شبيج متوترة حبيبتي .. اني يمج ..
درة .. لاتعوفني ابد استحي ..
ضحك ..
دخلنا البيتهم عماتهم وخالتهم هناك ..
كلها تهوس وتصفگ ومشغلين اغاني ..
سحبونا للوسط ويرگصون داير مدايرنا ..
بعدها گال ابو مهيمن ..
يله حضروا الغدا يابه ..
گعدت بالهول .. وكل شويه جايه وحدة تسلم وتبارك
نزلت مرت اخوهم .. تباوع بطرف عينها سلمت ببرود وراحت ..
انتبهت المهيمن خزرها .. وجان ضايج منها حيل ..
من الهوسة الي بالبيت والتعب مادققت ولااهتميت ..
اصلا حاسة اكو شي غريب بس مافاهمة شنو ..

شويه واجت وحدة شمرت روحها عليه ..
وتحضن وتسوي حركات غريبه وتعيط ..
رعبتني وگمزت من مكاني وصرخت ..
صرت ورى مهيمن ..

مهيمن .. لاتخافين حبيبتي ماتأذيج .. بس تسمع عنج وعروس تريد تشوفج ..
انتبهت شكلها غريب .. اعتقد منغوليه .
گتله هذي منو ..
مهيمن .. اهدي شبيج الكل يباوعلنا .. اشر الهم ياخذوها
درة .. اسفه ماقصدي بس تفاجأت بيها .. اجت ع غفله ..
مهيمن .. يله مصار شي .
درة .. منو هذي ..
مهيمن .. اختي ..

بقيت متفاجأة ابد ماحجة انه عندة اخت مريضه . باوعت الابن اخوه الصغير هم نفسها ..
لهذا جانوا خايفين من شغله الوراثة ..
بس ليش ضموا عليه هيج موضوع ؟؟

صبوا الغدا وكلها سويه گعدت نسوان وزلم ..
هاي عادتهم واصلا كلهن بلا حجابات گدام اقاربهم ..
بقيت انقش ..
وطلعت موبايلي ودزيت رساله الامير اجيت لو بعدك ..
بقيت اترقب الساعه ..
دز مسج..
راح اطلع من البيت حبيبتي جاي ..
اطمأنيت شويه ..
بس مااعرف ليش متوترة لان اول مرة اطلع وحدي والمكان بعيد وناس غربة ..
بس همة حياتهم فري وتختلف عنه .
انتبهت مهيمن ماكو ..
والبنات ملتهيات بالماعين ..
گلتلهم .. تحتاجون مساعدة ..
ام مهيمن . لا ماما روحي انتي يم رجلج ..

درة .. هو مهيمن وين بالاستقبال ..
ام مهيمن . لا صعد فوگ روحي شوفيه وگليله خلي ينزل محضريلكم مفاجأة ..
بقيت مترددة اصعد او لا ..
تالي تجرأت وصعدت ..


بقلمي_الكاتبة_شمس
يتبع .… .

بالبارت القادم / وينك امير وين صرت اني خايفه بسرعه تعال ..
الو درة ..
خابرت يوسف اجاج .. روحي الاقرب مكان واسألي ومن يخابرج گوليله ..
لاتخافين حبيبتي يوسف يمج واني راح اوصل ..

[لامارا]

//// البـارت الثامن والـثلاثـون ////
عجـاف_القلـوب ..
الكاتبـة_شمـس ..

انتبهت مهيمن ماكو ..
والبنات ملتهيات بالماعين ..
گلتلهم .. تحتاجون مساعدة ..
ام مهيمن . لا ماما روحي انتي يم رجلج ..

درة .. هو مهيمن وين بالاستقبال ..
ام مهيمن . لا صعد فوگ روحي شوفيه وگليله خلي ينزل محضريلكم مفاجأة ..
بقيت مترددة اصعد او لا ..
تالي تجرأت وصعدت ..

باوعت ماكو احد بالطابق الفوگ ..
ردت انزل استحيت ..
سمعت صوت مهيمن ..
ولي من وجهي ولج .. شو ماتستحين ومتفاخرة بلي جنتي تسويه وياي ..
وهسا تحضنين وتتقربين مو گتلج كلشي انتهى ..

مااعرف ليش اخذتني رجلي للغرفه ..
الباب مفتوح قليل ..
ماعرف وي منو يحجي ..
بس من الكلام والصوت فهمت ..
هاي مرت اخوه محمد ..
تبجي وتگله ..
-جايبها تغيضني بيها .. انت خلتني احبك واتعلق بيك .. استغنيت عن رجلي بسببك ..
وهسا تگلي انسي واني احبها ..
مهيمن .. وشتردين .. ابقى وياج .. شوكت تفتهمين اني جنت مراهق وانتي الي جذبتيني وخلتيني اتقربلج ماانكر ضعفت وخنت اخوي بسببج ..
بس هسا وعيت وعرفت غلطي ومستحيل اكرر الغلط ..

-لك اني جنت احبك قبل محمد .. بس عمي وابوي اخذوني لمحمد .. ماردتة اني ردتك انت .. محمد مايوم شوفني رومانسيه لو حب .. الي جنت اشوفهن بيك ..
مهيمن لاتعوفني .. قابله ادوس على گلبي واتحمل اشوفك وياها بس لاتحرمني من حبك وحضنك ..
اشتاقيتلك افهمني ..
حتى محمد من يتقرب مني مرات تلعب نفسي منه بس اصبر واتخيلك انت بمكانة ..
تتذكر هنا شگد نمنا وسهرنا وضحكنا ..
هاي الغرفه بيها ذكرياتنا شلون تجيب وحدة ثانيه الها ..
مهيمن .. لاتخافين .. راح احاول ابعدها عنج وعن سمج وماراح اخليها يمج راح اتزوج واعيش وياها هناك ..

-شنو تروح هناك .. واني وابنك ..
مهيمن .. اششششش كم مرة گتلج هذا مو ابني اني جنت اخذ احتياطي وياج لاتبليني فاااهمة ..

درة .. اني سمعت هالحجي مااعرف شسوي . خليت ايدي ع حلگي وكاتمة صوتي ومصدومة !!
احس روحي گامت تلعب ..
مامصدگة وعبالك بحلم ..

نزلت بسرعه ورجلي ترجف .. مااعرف شسوي ..
لااگدر افضحة ولااگدر احجي ..
واني وحدي هنا بينهم ومااعرف شنو ردة فعلهم اذا سمعوا ..
للحظة تخيلت يمكن يقتلوني ولاينفضحون وهي بنت عمهم مو غريبة ..

ااااه درة وين وگعتي بأي مستنقع ..
ربي رحمتك مثل ماكشفتهم الي قبل لااتورط .. طلعني منا بهدوء وسلام ..

جسمي كله يرجف ..
الكل بالاستقبال ومشغلين ديجي ويرگصون وهوسة ..
صارت بوجهي اخته ..
ها عروستنا وين مهيمن الكل منتضركم بالاستقبال ..

درة .. هااا هسا يجي .. اگول الحمام وين احس معدتي مدري شبيها ..

-الحمام بي بابا .. بس اذا تردين اكو واحد بالطابق الفوگ وواحد برة يم الحديقه خارجيات ..
شتحسين انطيج علاج ..

درة .. لا بس اغسل ارتاح ..
- وجهج اصفر كلش .. اشو حتى مااكلتي ليش هيج معدتج ..

-مااعرف يمكن من الطريق ..
-روحي غسلي بين مااشوفلج علاج عند ماما .. لو اصيح مهيمن يجيبلج علاج ..
-لا شكرا لاتعبيهم بس اغسل ارتاح ..

عفتها ورحت . هي تريد تسولف واني احس بالگوة واگفه ع رجلي ..
طلعت لبرة .. دخلت الحمام وقفلته .. اتذكرت كلامهم لعبت نفسي منه كرهتة شلون هيج سوة بأخوه ..
والطفل..
ماحسيت الا معدتي استفرغت كلشي اكلته . واحس روحي دتطلع ..
غسلت .. صار ببالي امير ..
طلعت الموبايل وخابرتة بسرعه ..

الو امير وين صرت تعال بسرعه اخذني ..
امير .. شكو حبيبتي شبي صوتج صاير شي .. احد سمعج كلام ..
درة .. بعدين اسولفلك . امير اني واگعه بوسط مستنقع عرفت اشياء عن مهيمن تخوف حباب بسرعه تعال وانقذني مااتحمل ابقى هنا ..
امير .. اهدي شبيج خوفتيني .. اصبري ولاتحسسين احد ابقي هاديه ..
درة .. شنو ابقى . اگلك مااگدر مااگدر ..
اني راح اطلع .. عسما اخذ تكسي واروح يم الامام وانت تعال لازم اطلع ماابقى ..
امير .. وين ترحين وانتي ماتندلين .. درة لاتستعجلين اوگفي .. خررررب ولج حتى مااعرف اسوق بعد ..

گمت ابجي .. انت ليش ماتفهمني اگلك مهيمن عندة علاقه وي مرت اخوه سمعت وشفت بعيني ماابقى اني طالعه يله باي ..

فتحت الباب . شفته اخته بالمطبخ ..
بقيت منتضرة تروح ..
اجت دگت الباب ..
-ها درة بيج شي ..
-مابيه ..
-راح اصيح مهيمن واجي ..

من سمعت هيج گالت ..
سحبت جنطتي وطلعت بسرعه ..
فتحت باب الشارع وانهزمت ..
الشارع هادئ وظهر ..
گمت اركض بالافرع بلا وعي ..
مافكرت ولاحسبت وين اروح ..
ماطلعت ع الشارع العام خفت يطلع ويشوفني ..

گمت امشي ومااعرف وين ..
بس دموعي يجرن وابجي بحرگة .. وادعي ربي يطلعني منا سالمة ..
الشوارع الهاديه زادتني خوف ..
احس روحي غريبه ووحيدة وماعندي احد ..

طلعت موبايلي ..
خابرت امير ..
وينك امير وين صرت اني خايفه بسرعه تعال اني بالشارع وخايفه ..
ها درة ..
خابرت يوسف اجاج .. روحي الاقرب مكان واسألي ومن يخابرج گوليله ..
لاتخافين حبيبتي يوسف يمج واني راح اوصل ..

درة .. ماادري اني وين ..
امير .. اطلعي الاقرب مكان او شارع عام ..
واسالي .. يله مااشغله خاف يخابرج يوسف ..

سديتة دگ جهازي ..
باوعت مهيمن .. مااعرف ليش رجفت وخفت . احسة وراي ويتصل ..
گمت اركض بسرعه ..
طلعت للشارع ..
شفت مجمع ويمة محلات وكوزمتك ..
ركضت للمكان وكانه اجاني بصيص امل ..
المجمع كان بي بنات يشتغلون ..
حمدت الله وشكرته ..
دخلت ..
عفيه ممكن ابقى بين مايجي اخوي ..
البنية .. شبيج خايفه من شي اكو واحد مراقبج لو مسويلج شي شبيها عيونج ..
اجة ابو المجمع ..
خويه انت منين منهزمة خاف وراج بلوة واحنه ناس بحالنا مالنا خلگ ..

درة .. عمي والله ماوراي شي .. اني غريبه مو منا وتيهت هسا يجي اخوي ياخذني ..
البنية .. مبينة مو منا .. زين شلون ضعتي ..

دگ الموبايل شفت رقم يوسف ..
حسيت بالامان ..
رفعته وايدي ترجف ..
درة وينج انتي .. شسوالج عالكلب گولي ..
اني قريب عليكم بس اوصفيلي المكان ..

درة .. مااعرف وين بس هسا اني بمجمع ..
يوسف .. انطيني اي واحد احجي وياه ..
انطيته للرجال وصفله المكان بالضبط ..

ربع ساعه وشفت سيارة يوسف وگفت بالباب ..
نزل بسرعه واني ركضت اله ودموعي مابطلن بجي ..

جان شغله متغير لحيتة طولانة بس لايگتله وضعفان ..
شافني تخبل ..
شسوالج گولي ..
عطت بي ..
وشتريد تسوي تروح تضربه ماهو الي صارلي كله بسببك انت ..
لو ماانت ماكانت انجبرت اقبل واورط نفسي هيج ورطة ..
جنت فاقدة واعيط وابجي واعاتبة ..
سحبني الحضنه بعدتة عني حيل ..
اششش كافي كافي اصعدي هسا وبعدين نفهم السالفه منا عالم تباوعلنا ..

انتبهت الاصحاب المجمع يباوعون ..
راح تشكر منهم واجة ..
صعد ..
درة .. بسرعه اطلعنا منا لا يجون ..
يوسف .. انتي ليش هيج خايفه شسوالج ماتحجين ..
درة .. مايخصك ..
يوسف .. لا يخصني .. وگف السيارة .. وماامشي الا تگولين .. حاول يسويلج شي احجي ..
درة .. لا طبعا شلون تفكر هيج ..
يوسف .. اي جا شكو غير تفهميني الف سالفه اجت ببالي ولج احجي مو خبلتيني .. شسوالج هالعار ..

درة .. يجي امير وافهم منه هسا عوفني ..
درت وجهي للشباك وابجي ..

ضرب ع الستيرن حيل .. وبقى يدردم ويحجي ..
اخلص من قيصر يطلعلي ايهم مدري شسمة .. مقسوملي ابتلي كل يوم بواحد ..

دايرة وجهي واحجي .. مامجبور تبتلي عندي اخوان ويبتلون بيه ..

وگف السيارة .. استغفر الله .. عنادج وتكبرج هو السبب للي وصلناه .
درة ..هههه عنادي .. يله هم صدگ اني الي خنت ورحت اتزوجت ..
يوسف .. رجعنا للبداية ..
سكتت عنه ..
وهو مستمر يحجي ابد ماارتاحيتله مدري ليش ..
والخانم من غير ماتعرفه زين .. بسرعه وافقت وربطت مصيرها وياه ..

درة .. كافي حرام عليك كافي الي بيه مكفيني .. وانت تتشمت بيه ..
هاي اجتك من الله .. طلع قهرك كله بيه ..
يوسف .. هفففف ليش تتوقعين اتشمت بيج .. ولج اني لو يمسج الهوا اتخبل مو دور اشوف دموعج ومهزومة ومن واحد ومااعرف السبب ..

كلامة ولومة كلها تعصر بروحي عصر .. مالگيت غير السكوت افضل وسيله للخلاص منه ..

خابر امير ..
ها يوسف وين انتو راح ادخل بغداد ..
يوسف .. شبسرعه ..

امير .. ليش من الخوف شفت دربي مااعرف شلون وصلت ..
يوسف .. اهدأ لاتخاف هاي يمي .. رايحين للكاظمية تعال لهناك اعذرني مااگدر اروح للشقه وهي وياي وتدري انت مو وحدي ساكن بالشقه وياي محامي صديقي ..
امير .. لا خوش تسوي انتضروني هناك واني جاي ..

رحنا للكاضمية والسكوت كان سيد الموقف .. فتح الراديوا مااعرف مسجل ..
طلعت اغنية .. اضعف گدامك .. الهيثم يوسف ..
وعبالك مقصودة هالاغنية طلعت بهالوقت ..

بقيت استمع بكل حواسي .. ودموعي ماوگفن ..
شنو من حظ حظج يدرة ..
كل اختياراتج خاطئة وماتعرفين تختارين ..

موبايلي ماسكت من اتصالات مهيمن ..
هو انتبه ..
سحبه من ايدي وغلقه ..

اااااخ لو بيدي جان رديت عليه وطيحت حظة ..

نزلنا گال تبقين هنا لو نتمشى للامام ..
درة .. لا خليني بالسيارة بين مايجي امير ..

نزل هو وطلع باكيت جگاير ويدخن ..
جانت عيني عليه ..
جگارة ورى جگارة ..
دور خابر بالموبايل ويفرفح ويعيونة يذبن شرار ..
رجع جابلي بطل ماي وعصير ..
گال هاج اشربي وجهج اصفر ..
خلاهن بحضني وسد الباب ..

شربت مي شويه ..
شفت سيارة امير وگفت ورى سيارتنا ..
ذبيت شكو بيدي وفتحت الباب ..
ورحت اله ..
حضنته وابجي ..
امير اروحلك فدوة خلصني منه ..
طلع خاين ..
وزاني وحقير ..
الي يخون اخوه كلشي يسوي بيه ..
مااريدة مااريدة ..

امير .. اششش اهدي وفهميني .. انتي متأكدة ..
يوسف .. ماتشوف حالتها لو مامتأكدة تنفعل هيج ..
امير .. يوسف اهدأ .. اريد اعرف شلون سمعتي وشفهمتي ..

سولفتله كلشي ..
يوسف مااتحمل .. راح بعيد عنه ومستمر بجگارة ورى جگارة ..
امير .. ايا ملعون الي يشوفه يگول ماكو منه .. وطلع نذل وحقير ..

راح اخابرة ..
درة .. شتگله ..
امير .. اوگفي ..
دگ عليه ..
وفتح سبيكر ..
مهيمن .. ها امير همزين خابرت .. درة ماكو واخابر عليها مااحصلها .. شلون طلعت ووين ماادري .

امير .. اي لان ناقص وماعندك غيرة لهذا ماتدري ..
مهيمن .. شتقصد شنو هالغلط ..
امير .. اسمع ولك .. درة صعدت للغرفه وسمعت حجيك كله وي مرت اخوك ..
اذا تريد ماتفضح روحك اكثر .. طلگ بهدوء . وكل حي يروح الحاله ..
مهيمن .. اوگف امير الي سمعته ماضي اني هسا احبها والله احبها ومستعد كلشي اسوي الها ..

يوسف .. تطلگ ولك ورجلك فوگ رگبتك لا بعلي ابهذلك بالمحاكم واخلي فضيحتك للعلن ..

مهيمن .. انت منو وشلون تهددني ..
امير .. هذا الحجي الي عدنا وبقت بكيفك تريد اخابر ابوك واخوك تريد تطلگ ..
لاتصدگ اخلي اختي تتزوج واحد خاين ويلعب بعرض اخوه .شلون امن ع عرضي عندك ..
وانت عرضك ماصاينه ..
وطبگ التلفون بوجهة ..

امير .. اسمعي درة .. هالحجي خليه بينا .
هسا راح نرجع ومااريد اي احد يدري حتى امي فاهمة مالي خلگ فضايح ..
واذا طلعت السالفه مستعدين يلوفوها علينا ونطلع احنه نهتك بعرضهم وتعال يعمي شيلني ..
خلي نخلصها بهدوء ومن غير مشاكل ..

هزيت براسي ..
يوسف .. وين رايحين هسا خليكم هنا زورا وخليها تهدأ ونفسيتها ترتاح يله ..

امير .. لا يخوي نرجع قبل الليل احسن ..
اشوفك بخير .. ورحم الله والديك ماقصرت ..
يوسف .. شنو هالحجي لاتخليني ازعل ليش اني غريب
وبخصوص الطلاگ اذا ماطلگ اني اعرف طرق قانونيه تجبرة ..
امير .. لا تخاف والله يطلگ وغصب ماعليه وكلشي يرجعلهم الله يبعدنا عنهم ..
يوسف .. جا الله وياكم مااعطلكم خلي بالك من الطريق ومن توصل خابرني ..
امير .. ان شاء الله.. واحد سلم ع الثاني ..
اشرلي بآيدة معناها مع السلامة ..
هزيت براسي من غير كلام ..
لان الي بيه مايخليني اعرف افكر لو احجي لو ابدي ردة فعل ..
احس روحي انخدعت مرتين ..
مرة حبيت شخص وبنيت امالي عليه واحلامي وتالي خدعني ..
والثاني گلت افتح صفحة جديدة وياه واحاول اطوي الماضي وتالي طلع خاين اخوه وي مرتة ..
شلون اگدر استوعب كل هذي الخيانات بحياتي ..
وشلون اگدر اثق بعد بالناس ..
حتى الحب كرهتة بسببهم وماعدت اثق بشي اسمة حب ووفى ..

سنة وياه شلون ماعرفته ع حقيقته .. ولو اصلا جان واضح انسان صاحب رغبه وشهوة وضعيف گدامهن ..
مبين عليه من يوم الي رحنا الكربلاء وراد يختلي بيه بالفندق ..
شلون استمريت وياه وصدگته ..
شلون گدرت آمن بي ..

امير.. درو حبيبتي لاتضوجين اعرف الي صار مو سهل عليج .. بس فكري من الجانب الايجابي ..
الله كشفة الج قبل تتزوجين . وتكتشفين خيانتهم بعينج ..
حتى لو هو تركها .. من كلامج مبين عي ماتركة ولاراح تخليكم ترتاحون ..
اعتذر حبيبتي ..
درة .. ليش ؟؟
امير .. احنه الي خليناج تستعجلين .. من شفت الولد وسألت عليه الكل تحمد بي .. گلت هذا الانسان الي راح يعوضج ..
جنت اشوف التردد بعينج بس اگول ميخالف من تعرفه راح تحبه وتتعود عليه ..
وبالفترة الاخيرة من شفتج فرحانة ارتاحيت ..
شمعرفنة يطلع هيج دنيئ وناقص غيرة ..

درة .. لاتعتذر انت گلتها شعرفنا يطلع هيج .. مااعرف ليش احس الله رتبلي الامور كلها حتى ينكشف .
ماردت اصعد ومترددة ..
وامة گالتلي اصعدي شوفيه ..
صعدت واكو شي بداخلي مخوفني ..
بس من سمعت رجليه ماعادت حملتني ..
احس ثگل بيهن ومعدتي اذتني وگلبي ينبض حيل .
كلشي اتوقع بس هيج يطلع مااتوقعت ..

امير .. هاهي لاتقهرين روحج .. لمي ذهبهم كله وغراضهم الي جابوها .. حتى ندزها الهم ..
مابعازة شي منهم ..
هزيت براسي ورجعت تكيت راسي ع الشباك وغفيت لان گاعدة من الفجر وتعبانه والي صار هد حيلي !!

صحيت على صوت امير ..
يله درو وصلنا ..
استوعبت اني وين..
اوووه هاي شگد نمت ..
جان الدنيا مغرب ومضلمة ..

امير .. راح ندخل .. اتصرفي عادي رتبي وجهج ولاتبينين الاحد ..
هزيت براسي ..
وصلنا للبيت نزلت ..
تلگتني امي فرحانة ..
وبوستني وتباركلي .. وسدن واخواني كلها باركتلي.
جانت الابتسامة بالگوة تطلع مني. .

امي .. شبيج يمة تعبانة شني ..
امير .. هههه اي الطريق كله نايمة مت التعب مامتعودة
سدن .. ههههه ادري بيها هي تروح للجامعه وتجي تعبانة وتنام مو دور البغداد ومن الفجر طالعين ..
مااخذتوا صور ..

خزرها امير سكتت ..
امي .. روحي بدلي واذا تسبحين هم ترتاحين .. وتعاي نتعشا ..
درة .. لا يمة تعبانه راح اسبح وانام مااشتهي ..
ياقوت .. بكيفج راح اعزلج عشاج من تجوعين اكلي ..
بستها ورحت للغرفه ..
طلعت ملابس ..
ورحت للحمام .. سبحت .. بقيت جوه المي واگفه بلكي ارتاح واگدر انسى ..

بدلت وخليت المنشف ع راسي وطلعت ..
اهلي يتعشون ..
وامير يسايرهم ويحجي وياهم ..
جانت عيونة عليه ومافارگني ..

دخلت نشفت شعري ومشطت ونمت ..
احس جسمي مكسر ..

اريد انام مااگدر اصلا شبعت نوم بالسيارة ..
بس جنت احاول حتى ماافكر ..
واني اتخيله هو ومرت اخوه سوة ..
اووووه صعبه صعبه مااتحمل ..

دخل امير بيدة لفه ..
ادري بيج مانايمة ..
هاج هاي من ايدي اكليها ..
درة .. اموري مااشتهي ..
امير .. الخاطري .. ليش تخليني افكر بيج الليل كله وماانام ..
درة .. اي عوفها هنا هسا اكلها ..
امير .. لا الا اني اوكلج ياها ..
وگعدني غصب وگعد يوكلني ويدخل اللگمة جبيرة غصصني صدگ ضحكت عليه وهو يضحك ..
ضميت راسي بحضنه وبجيت ..
اموري ليش هيج حظي ..
حاوطني بإيدة ..
للتگولين هيج . لو ماحظج ماكشفتيه .
كافي انسي خلي يولي مايستاهل دمعه منج .
درة .. ماابجي عليه ابجي ع نفسي ..
امير .. باجر يجيج الي احسن منه ..
درة .. مااريد بعد توبه .. جربت حظي مرتين وماصابت هاهي بعد ..
منا وجاي مستقبلي وبس ..
امير .. عفيه اريدج هيج ماتوگعين وتنهدين انتي اخت امير ..
درة .. بس شلون راح اداوم وهو موجود ..
امير .. معليج بي وانعل والديه اذا اتقربلج والله اخليه مايدخل الديوانية بعد ..

دخلت سدن .. احم احم .. ترى غرت ..
امير .. ههههههه روحي انتي الابنج .. خليني اني اليوم اريد انام يم اختي ..

سدن .. اي عادي اجيب ابني وانام يمكم ..
امير .. ههههههه ادري بيج ماتفوتيها ..
يله عمي جاي ..
يله حبيبتي اني رايح مااوصي بعد ..
باسني براسي وگام ..
اشرتلي سدن بعيونها .. بمعنى شكو ..
ابتسمتلها واشرت الها بعدين !!

اعرف مااگدر اضم عنها هي اختي وصديقتي مو بس مرت اخوي ..

بقيت الليل كله اتگلب وجهازي مافتحته ابد ..
حتى الموبايل الي بي خط اسيا مشترك بيني وبينة هم غلقته ..

للصبح گعدت احس جسمي متكسر ..
صباح الخير ماما ..
هلو يمة شلونج البارحة ماعجبتيني ..
ولاجنج عاقدة وفرحانه ..
تعاي سولفيلي ..
امير گال مخلين خمسة بعشرة ..
والله طلعوا اهل خير وماعندهم بخل ..
بس ولو السعادة مو بالفلوس بس يتسمن ذخر الج ..
شلونها عائلتهم شفتيهم شبيج ماتسولفين ..
درة .. يمة بعدني هسا گعدت خلي اصحصح واسولفلج كلشي ..
شو البيت هدوء ..
ياقوت ..
اي كلها نايمة وامير وعلي طلعوا للشغل ..
درة .. صدگ البارحة سمعت علي يسولف على تعينات ..
ياقوت .. اي راح تنفتح التعينات .. بلكي الله ويتعين ويرتاح ..
درة .. بس اموري مامقصر عليه ينطيه اكثر من حقه .
ياقوت .. لايمة ماقصدي هيج .. بس اسمة التعيين ضمان للواحد بي تقاعد يفيد ..
ليش ادگ وانوح على امير يذب تعيين وهو مايقبل ..
درس وتعب وشهادتها هيج تروح بلاش ..

درة .. تدرين بأمير مايحب واحد يحكمة يحب يكون حر نفسه وهو صاحب العمل ..
ياقوت .. اي يمة ادري من يومة وهو رجال حر ومايحب احد يتأمر عليه .. بس هذا ضمان اذا كبر منو يفيدة حتى الشغل والتعب هذا كله مايفيد ..
درة .. الله كريم .. يجي يوم يقتنع ويقدم ..

جاي نسولف اني وامي .. اندگت الباب حيل ..
فزيت من مكاني ..
ياقوت .. شكو ياساتر ..
مااعرف ليش گلبي نغزني ..

ياقوت .. شبيج واگفه يمة شوفي منو ؟؟
درة .. حيدر هنا ..
ياقوت .. اي نايم بالاستقبال خلص الليل سهران ..
ردت اگعدة ترددت ..

رحت للباب .. منوو؟؟
مهيمن .. اني درة افتحي احسنلج .. خلي احجي وياج..
درة .. ماكو شي نحجي بي روح مهيمن كلشي انتهى ..
مهيمن .. مو بكيفج هسا انتي مرتي فاهمة ومااطلگج لو شو شيصير ..
درة .. روح بلا فضايح .. لعبت نفسي منك مااطيقك تعرف شنو مااطيقك .. روح لا تتدم بعدين ..
استمر يدگ بالباب ويگلي افتحي ماامشي منا انتي الي فاهمة الي ..

طلعت امي .. ولج يمة شكو منو هذا التحجين وياه ماتفتحين الباب ..
درة .. يمة معليج ماكو واحد هذا مجدي ..
ياقوت .. اي جا مجدي انطيه الي الله قاسمة خو مو هيج تطرديه ..
درة .. يمة عوفيه وخلينا ندخل ..
گعد حيدر ..
شكو ماتسمعن الباب منو هذا..
وراح بأتجاه الباب ..
هنا اخذت نفس قوي وماگدرت احجي بعد ..
بقيت متجمدة بمكاني ومااعرف شسوي ..

اجت سدن .. صباح الخير .. شكو الباب تكسرت اني فوگ وسمعتها ..
درة .. سدن بسرعه خابري امير خلي يجي ..
سدن .. شكو
درة .. بسرعه گليله مهيمن اجه هو يفهم ..

شفت مهيمن دخل بسرعه دخلت للمطبخ ..
حيدر يسلم ويمرحب بيه وبودة يفرشله الگاع ورد ..
واني لعبانه نفسي منه ..
صاح حيدر .. درة هذا مهيمن ليش مافتحتي ..
مهيمن .. اذا امكن اريدها وحدنا نحجي عندي شغله وياها ..
اجة حيدر . مهيمن يريدج ليش مافتحتي الباب ..
امي .. صاير شي بينكم شني متعاركين ..
البارحة عقدتو شمالكم .. شني عين وصابتكم ..
درة .. شغله بيني وبينه ..
حيدر .. اي ادخلي وتفاهموا مايصير هيج .. بطلي سوالف المزعطة مهما يكون رجلج افتهمي منه ولاتخلون مشاكلكم تكبر ..
باوعتله ومااعرف شلون احجي وافسرلة ..
وهو مصر ادخل واتفاهم وياه ..
دخلت مضطرة بس لازم اخلي حد الهذي التفاهة ..
ولازم انهي كلشي اليوم ..


بقلمي_الكاتبة_شمس
يتبع ....