|
روايه عادت ايامك في خجل .. *مكتملة * " رواية عادت ايامك في خجل " بقلمي / cloud24 (( الجـــزء الاول )) × مازال في قلبي بقايا .. أمنية أن نلتقي يوماً ويجمعنا .. الربيع أن تنتهي أحزاننا أن تجمع الأقدار يوماً شملنا فأنا ببعدك أختنق لم يبقى في عمري سوى أشباح ذكرى تحترق أيامي الحائرة تذوب مع الليالي المسرعة وتضيع أحلامي على درب السنين الضائعة .. × × في المزرعه تجري ومعها سطل صغير .. وشعرها بجديلته الطويله يتحرك معهاا يمين ويسار.. وقفت وناظرت حولها محد منتبه لها اخذت من التمر اللي في سطل عبدالرحيم وتخبت ورا النخله بسرعه قبل ينتبه لها عبدالرحيم نزل التمر اللي جمعه بثوبه بالسطل وراح يجري يجمع ضحكت بشيطانه واخذت منه شوي عشان مايحس انه نقص لفت من ورا النخل شافت عمر طالع ع النخله ويطيح من التمر راحت تجري بهدوء وتاخذ من التمر اللي يطيحه عمر صرخ عليهاا : رجعي اللي اخذتيه والله ان نزلت لك لااقطع شعرك أمنية طلعت له لسانها وراحت تجري .. وهو فوق الشجره ومايمديه يمسكهاا .. حست عيونها بتطلع لما شافت سطل نجلا اكثر منهاا قربت منها : نجلا شوفي عمر متعلق في النخله مو قادر ينزل نجلا بخوف : عمر اخوي وراحت تجري تشوفه وأمنية اخذت من تمر نجلا لين ملت سطلها .. وراحت تجري لعمها اللي ينادي عليهم وهي تصارخ : انا اول وحده عمر تعدا من جنبها وهو يجري : انا اول حاولت تسرع اكثر بس خلاص تعبت وصلت لعمها وعمر قبلها ناظرته بقهر ونزلت سطلها قبال عمهاا وكتفت يديها بزعل .. ابو عمر يشوف مين اكثر واحد احتار بين عمر و أمنية متساويين بس عشان ماتقول لابوها فضل ولده عليها طلع من جيبه ريالين ومدها لامنية وريال لعمر اللي ناظره بااعتراض : والله انا اكثر منها ووصلت قبلهاا ابو عمر مطنشه يعطي عبدالرحيم ونجلا كل واحد ريال وناظر ساعته : يالله مشينا نبي نلحق المغرب مع الجماعه عمر ناظر أمنية اللي تسوي له حركات تقهره سحب جديلتها الطويله بقوه وراح جري للسياره عند ابوه أمنية تصارخ : عمي شووف عمر شد شعري عصبت لما عمها طنشها وراحت للسياره الغمارتين وفتحت الباب اللي قدام وكان عمر جالس صرخ عليها : انقلعي ورا انا اكبر منك أمنية ناظرت عمها : عمي انت قلت في الرجعه انا اجلس قدام عمر لف ع ابوه : والله مااجلس ورا انا اكبر منها ابو عمر تنهد بضيق : اللهم طولك ياروح متى تعقلو انتو هااه وانت الكبير كبر عقلك عنها البزر أمنية تضرب رجلها بالارض : مااني بزر وانت قلت انا اجلس قدام بالرجعه عمر دفها ووطاحت ع الارض وقفل الباب : انطمي يلا انقلعي ورا تأخرنا ابو عمر عصب ليش يطيحهاا صرخ عليه : انزل لا انت ولا هي أمنية تبكي : عمي انا ابو عمر قاطعها معصب واخذ الخيزرانه اللي ع الطبلون ونزل لهم عمر يمد يدينه قدامه : خلاص يبه والله ابو عمر ضرب عمر ع رجوله وأمنية ع ذراعها .. وفتح الباب اللي ورا وصرخ عليهم : يلا اركبو الله لايبارك في ابليس وناظر نجلا وعبدالرحيم ساكتين ويناظرون بخوف : وانتو تعالو قدام عندي تحركت السياره وأمنية جالسه جنب الباب اليسار وبداخلها تتحلف تهدم المظله اللي بنتها لعمر وعمر جالس جنب الباب اليمين وبداخله يتحلف يهدم البيت اللي بناه لهاا لف عليها وانقهر من نظراتها المتشمته تكلم بشويش بدون مايسمعه ابوه : والله لاتندمين رح اهدم البيت اللي بنيته لك أمنية بداخلها مقهوره بس تبين العكس : عادي من حلاته عاد وحتى انت تشوف رح اهدم المظله اللي بنيتها عمر : وعووه مظلتك مخيسه مصدقه نفسك تعرفين تبنين اعترفي انك مقهوووره أمنية : انت المقهور ولا انا ماهمني اصلا الجلسه قدام شمس بس انا احب اخرب عليك " وطلعت له لسانها " عمر يتحلف لها بيده : هين بس نوصل دواك عندي أمنية بصوت عالي : عمي شوف عمر يتحلف لي ابو عمر بتهديد : عمررر عمر لف عليها وهو يحرك يده ع رقبته بعلامة اذبحك أمنية : عمي شوووفه يقول بيذبحني ابو عمر تأفف وبداخله يقول اخر مره ياخذهم مع بعض .. عمر يسوي لها حركات لقطي وجهك مارد عليك ويضحك أمنية ناظرته بقهر ومدت يدها وقرصة رجله بقوه عمر صرخ متألم : ااي يالعقرب يبه شوفها تقرصني ومن اول ماوصلو البيت راحو جري لمكان لعبهم ورا البيت .. يبنو بيوت صغيره بالخشب عمر هدم بيتها وهو يضحك : وريني عاد كيف تبنين لك أمنية ناظرته بقهر وهدمت المظلمه وللحين يضحك .. هدمت بيته كله اللي هو بناه وراحت تجري لما صرخ تحسه يجري وراها وهي تحاول تسرع وتوصل لامها بس ماامداها عمر سريع .. كالعاده اول شي يمسكه جديلتها الطويله سحبها مع شعرها وسطرها كفوف وهي تصارخ وتبكي .. بدريه جات تجري بخوف ضربت يدها ع صدرها لما شافت عمر يضرب ببنتها دفته ع الارض وحضنت بنتها : ياجعل يدينك الكسر شكبرك وشطولك وتضرب بزر عمر يرادد : هذي يبي لها تسكير راس تهدم بيتي اللي انا بنيته أمنية تشاهق : يمه هو هدم بيتي بدريه تناظر عمر : مو منك من امك اللي ماعرفت تربيك الجده منيره : شصاير وش فيها ام لسان صراخها واصل برا البيت بدريه اخذت بنتها وطلعت ماردت عليهاا .. الجده منيره اخذت معها عمر : شمسويه فيك ام لسان هذي اللي مو لاقيه احد يقص لسانها ويربيها عدل عمر بقهر : ماعاد العب معهاا بس تتهاوش ماتعرف تلعب اكرههاا الجده منيره ابتسمت بحسره وبداخلهاا " هه وابوك يبي يزوجها لك مالت عليها بنت امهاا" منصور دخل البيت : السلام عليكم منيره بزعل : مالي سلام ولا كلام معك بنتك هذي لازم تأدبها منصور باس راسها وجلس جنبها : يالغاليه لاتشرهين عليها بزر تكبر وتعقل منيره : البنت الدلع الزايد يخربهاا اذا ماعدلتها من الحين رح تكبر وماتحسب حساب احد منصور : يايمه لاتلوميني ربي مارزقني الا هالبنت والله مااداني زعلها منيره : اجل لاتجيني تتشكا منها بعدين عمر يناظر عمه يتمنى ابوه يكون مثله ..عمه منصور عمره مامد يده ع بنته ومدلعها اللي تبيه يجيها ..مهتم في نفسه وبدراسته وعنده اكثر من محل من اول ماعرف عمه وهو يشتغل بالتجاره والحين عنده فله قريب تجهز بجده واغلب شغله هناك.. هذا غير عن زوجته متعلمه وتدرس تاريخ بالمدرسه اما ابوه سعود .. عصبي ياكثر مايضربه ... كل يوم رايح للمزرعه اللي ماحصل منها الا الشقا مافكر يبني لهم بيت مثل عمه لمتى وهم عايشين ببيت جدته وبهالقريه اللي بعيده تمام البعد عن التطور.. وعمته شيهانه ام عبدالرحيم مطلقه وعايشه معهم ..عبدالرحيم بعمر أمنية واخوها من الرضاعه بس عايش عند ابوه بالمدينه ومن فتره لفتره يزورهم × × جالس ع عتبه الباب ويناظرها بيدها ريال وتتكلم مع نجلا وبنات الحاره بغرور.. تلفت بطفش ناظر البقاله اللي واضحه له رغم المسافه اللي بينهم شاف ولد يطلع وبيده اسكريم وهذا وقته بالحر .. تافف بقهر نفسه يشتري ليه ابوه مايعطيه فلوس نفس عمه يعطي بنته .. رجع ناظر أمنية وبتردد علا صوته : أمنية أمنية لفت عليه وتقلب عيونها بغرور بدون ماتتحرك من مكانها : نعــم عمر ياشر لها : تعالي ابيك أمنية تخصرت : انت اللي تبيني تعال انت انا بلعب مع البنات نجلا جالسه تخيط فستان لعروستها : كذابه ماتبين تلعبين اصلا ماتعرفين ريم مجلسه عروستها بحضنهاا : اصلا حتى عروستها رمتها بالزباله هنادي تضحك : أمنيووه زي العيال ماتعرف تلعب الا كوره أمنية تناظرهم بقهر : ياســلااام ومين جاب لكم العرايس غيري ريم : هه بدت تذلنا ع هديتهاا عمر يتافف بملل هوشاتهم ماتخلص وقف قريب من أمنية اللي شهقت بقهر وتناظر ريم : انا اذلكم اناا انا اقول كذا عشان اذكرك اني انااا علمتك لعبه العرايس ولا انتِ حدك تراب تلعبين به نجلا مسكت يد ريم اللي وقفت بزعل : أمنية مااسمح لك وهه خذي عرايسك مانبيها يلا بنات هنادي رمت عروستها بالارض وناظرت أمنية بااحتقار ومشت مع البنات .. أمنية فاهيه فيهم .. ضربت رجلها بالارض بزعل : بنــــاات تعالو عمر مسك ذراعها قبل تروح : تعالي ماعليك منهم هم الغلطانين أمنية بزعل : صديقاتي هم ماعندي غيرهم عمر ابتسم يتمصلح : انا صديقك من اليوم ورايح هاتي يدك أمنية ابتسمت ومدت يدها له مسك يدها وهي مستانسه دام عمر واقف بصفهاا تضمن ان محد بيضرهاا .. عمر تمشى معها شوي بالحاره لين وصل للبقاله وقف وناظرها بزعل : ياليت معي فلوس واشري لك اسكريم عشان صرنا اصحاب أمنية بسرعه : انا معي "كشرت" بس خساره ريال مايكفينا اثنيننا وابوي قال مارح يعطيني ثاني عمر يسوي عزه نفس : لا لا خلي ريالك لك تعالي نروح عند الشجر اسوي لك مرجيحه أمنية : طيب عمر ناظرها بقهر توقع تصر رجع وقف : اسمعي وش رايك بريال هذا ننصب ع السوداني وناخذ اسكريمين أمنية بحماس : كييف ؟؟ عمر : هاتي ريالك وانا اعلمك أمنية عطته ريالها ومشت معه للبقاله .. شافته يروح للفريزن .. ياخذ اسكريمين ابو ريال اللي يحبونه .. راحت معه للمحاسب وهي مستغربه كيف بياخذه عمر مد للسوداني ريال وبيده الاسكريمين : خذ السوداني : هزا الواحد بريال جيب ريال ساني عمر شهق : يالنصااب هذا بجده نشريه بنص والله لعلم عليك خالي يقفل محلك يالغشاش خالي شرطي أمنية ابتسمت بوناسه وهي تشوف العامل كيف خايف من جدية عمر وقاله ياخذه بنص ومايعلم احد ثاني ورح يبيعه بس لهم بنص ... طلعو من البقاله يضحكون ومستانسين .. أمنية اخذت اسكريمها منه : الله انت احلا صديق عمر يفتح اسكريمه ويمشي معها : انتبهي لاتقولين لااحد هذا سر أمنية تمسح فمها والاسكريم واصل لخشمها : لاتوصي حريص سرك ببير × دخل البيت معصب ويصارخ بأسمهاا : أمنيــــة وين هالمقروده حسبي الله ماحد سلم من لسانها وينهاا ام عمر "طوقه" تصب لنفسها فنجان قهوه ومتكيه ع المركى بكل روقان تكرهه هالبزر المدلعه من كثر ماازعجتها نجلا اي شي تجيبه أمنية تصيح عندهاا تبي نفسها .. وعاد من يفهم سعود ان البزارين يغارون من بعض .. ام سعود توقف بنشاط وتمشي ورا سعود : تعال انت وش تبي بالبنت وش مسويه سعود وقف ولف ع امه معصب : حتى ابو لافي صاحب البقاله يتشكى منها ام سعود تقاطعه : البنت مالك شغل فيها تبي اخوك يزعل علينا ويقول تفردتو ببنتي وانا بجده سعود بصوت عالي : اقولك فشلتنا ابو لافي يقول مسكها العصر وهي تغش ع العامل ماخذه اربع عسكريمات برياال ام سعود ضربت صدرها : حسبي الله ع ابليسك ياأمنيووه طوقه ضحكت وكتمت ضحكتها لما ناظرها زوجها بنظره اطرمتهاا .. نجلا دخلت مع باب البيت تجري بس وقفت لما سألها ابوها عن أمنية وشافت العصبيه بوجهه وجدتها نفس الشي .. ارتبكت وبسرعه خايفه اشرت برا : برا في المظله كان واقف عند الباب حط رجله جري .. شافها واقفه مع البنات بالمظله ولابسه طرحه ع شعرها وكأنه شعرها قصير كاريه .. وتتمايل يمين ويسار بشعرها الاصطناعي .. وبصوت عالي قبل يوصلها : أمنية انحاشي ابوي جايك بالخيزرانه أمنية صرخت وسحبت الطرحه ورمتها ع البنات وحطت رجلها مع باب البيت الخلفي و عمر وراها .. عمر شد ذراعها وسحبها تجري معه اسرع بين البيوت وتنفسه مسموع بتعب : يالغبيه ابو لافي شافك وعلم ابوي أمنية تجري باقوى ماعندها معه وبخوف : ياويلي ياويلي عمر سحبها معه وتخبو ورا النخل .. أمنيه جلست وتضم يديها والدموع بعيونها بخوف : ابي ابووي ياويلي من عمي ياويلي عمر يجلس جنبها ويضربها ع راسها ع خفيف : اووش لايحسون علينا تسمعي هنادي النذله تقول راحو من هنا أمنية بقهر : طيــب ياهنادي وانا كنت باخذ اربع اسكريمات عشانهم عمر ناظرها بقهر : غبيه والله لو مسكك ابوي وعلمتي علي عن المره اللي فاتت ياويلك أمنية تخصرت وهي جالسه : والله لا اعلم اذا انضربت تنضرب معي عمر ماامداه يرد عليها الا شاف كلب جارهم الضخم اللي مسبب رعب لكل بزارين الحاره .. وقف بسرعه وصرخ : انحاااشي الكلب الدب أمنية صرخت ونطت بمكانها ماشافت الا غبار عمر هاج عنها حطت رجلها وراه بسرعه وهي تصارخ بااعلا صوتهاا .. ماحست بنفسها الا وهي بحوش بيتهم وواقفه قبال عمها اللي شاد ذراع عمر ويناظرها بشر وبيده الخيزرانه : انا اللي بعيد تربيتك من اول وجديد وانت "ناظر عمر" والله لاتنجلد تخبيها ليه وهي غلطانه بتنجلد معهاا والله شيهانه طلعت مع باب البيت الداخلي بقميصها الفضفاض وجلالها لافته ع راسهاا وصوتها عالي : سعوود والله ماتلمسها ابوها وامها موصييني عليهاا والله ماتلمسها سحبت أمنية مع ذراعها : تعالي أمشي قدامي ع البيت سعود : ام عبدالرحيم لا تتدخلين تعالي أمنيووه شيهانه تمشي للبيت وتسحب أمنية معها مطنشته .. أمنية لفت بخوف لما سمعت صرخت عمر " ااي يبــه " غمضت عيونها بقوه لما شافت عمها يضربه بالخيزرانه وهو ينطط بمكانه .. بكت : عمتي عمر حرام شيهانه دفتها تدخل مع الباب : مالك شغل فيه اووف دخلت وهي تبكي شافت عمتها طوقه ترفع يديها فوق وتناظرها : حسبي الله عليك من بنت تسببتي بضربه وليدي × × وقفت بطفش تناظر البنات والعيال يلعبون .. لعبهم ممل مقهوره من عمر مسوي نفسه كبير وجالس عند الرجال .. بدريه : أمنية أمنية راحت لامها تشوف وش تبي : ايوه يمه بدريه تناظر بنتها برضاا فستانها الابيض نظيف وشعرها اللي مستشورته : تعالي ابله فوز تبي تسلم عليك أمنية قربت من امها اللي عدلت التاج ع شعرها وراحت معها لمجلس الحريم اللي ماتحب تدخله تستحي من نظرات الحريم فوز حضنتها : ياحبيبتي كبرانه انا زعلانه منك ليش ماتجي تعيدي علي من بدري أمنية ببراءه : ماشفتك فوز : ياعمري "ناظرت بدريه" بنتك كبرت لازم تتغطى بدريه تحط رجل ع رجل : حرام عليك لساتها بزر خليها تتهنى قبل تتغطى أمنية : يمه اروح بدريه تشوف نظرات الحريم : روحي حبيبتي فوز تناظر أمنية اللي طلعت تجري : اللي نافعها انها قصيره محد بيلاحظ عمرها بدريه : السنه الجايه تدخل اول متوسط واخليها تتغطى طلت مع باب قسم الرجال شافته واقف يسولف مع عيال من عمره : عمــــر عمر بداخله "قطع الله هالصوت وش جابك" منيف ولد جيرانهم : رووح البنات يبونك من قدك عمر ناظره معصب : امي اللي مرسلتهاا راح وهو يسمع ضحكهم عليه ..شافها واقفه تنتظره وبعصبيه : والله لو عدتيها وتناديني من عند الرجال ياويلك ونعم شتبين أمنية تلف يديها ورا ظهرها : ابيك تلعب معنا المتخلف نايف يتحكم باللعب وهو مايعرف يلعب اصلا عمر بغرور : انا كبير ماعدت ألعب مثلك يالبزر أمنية ناظرته بقهر : مين قال انك كبير شوف نايف اطول منك ويلعب معنا عمر ضحك ببحه تميزه : الكبر مو بالطول يالبزر يلا ع البيت ياويلك لو اشوفك جايه هناا أمنية بطفش : عمووري العب معنا الله يخليك والله طفشت عمر : بعد مايروحون اخوياي اجيكم بس لو تقولي لااحد اني العب معكم مارح اجي أمنية بسعاده : طيب بس لاتتأخر وقبل يمشي ضربها ع راسها وانحااش كذا نكاده أمنية ضربت الارض برجلها مقهوره مايمديها تلحقه راح لقسم الرجال وياويلها منه لو لحقته .. × ومن اول ماراحو اخوياه دخل قسم الحريم وراح لورا البيت مكان لعبهم شافها جالسه ع عتبة الباب تناظر اللي يلعبون بطفش ابتسم بغرور : وش تلعبون أمنية وقفت بحماس لما شافته وصارت تنطط وتمد لسانها لنايف : حرره حرره الحين عمر يطردك مثل ماطردتني نايف صرخ بقهر : انتِ غشاشه مااحد يلعب معك عمر : يلا يلا صفو من جديد انا اعدكم صفو ع الجدار وعمر قبالهم : عمي ابو كرش قلي عد احدعش ويعدهم اللي يطلع رقم 11 يطلع واللي يبقى اخر واحد يجري وراهم ..اخر شي بقى سالم وأمنية أمنية تأشر لعمر بحركات طلعني عمر فهم عليها بدأ يعد من عند أمنية عشان يطلع لها رقم 11 وتطلع ويبقى سالم يلحق وراهم عبدالرحيم منتبه لغشهم وساكت بمزاجه .. أمنية تصارخ بسعاده انها مابقت هي اللي تلحقهم .. سالم يجري ويحاول يمسكهم كلهم ..أمنية انحشرت بااخر البيت وسالم قبالها بيمسكها سوت نفسها طاحت وتبكي : والله لااقول لابوي عنك طيحتني سالم بخوف : والله ماانتبهت لك أمنية : خليني افوز ومااقول لابوي سالم : خلاص وراح عنها وهي تضحك بشيطانه .. سالم مسكهم كلهم : بقت أمنية مالقيتهاا نجلا تصارخ : أمنية اطلعي انتِ فزتي أمنية رجعت لهم وهي مبسوطه وخلتهم يصفو وهي تعدهم ..عمر يأشر لها تطلعه ترد له المعروف .. وهي بنذاله تغير اتجاه العد عشان يبقى هو يلاحقهم عمر الى اخر واحد بقى معه وهو متوقع انه يطلع بس انصدم لما بقى هو اخر واحد وهي تناظره بنذاله وتضحك وتصارخ : عمر يلاحقناا عمر عصب : والله ماالاحقكم انتِ غشاشه أمنية بصوت عالي : والله مو انا الغشاشه انت الغشاش اسمعوو تراه يأشر لي اخليه يطلع بس انا لايمكن ارضى بالغــش عمر ماتحمل نذالتها سحبها مع شعرها .. × × دخلت البيت تتحلطم وغشوتها اللي ماتعودت عليها شوي وتطيح صرخت بطفش من هالغشوه : اووف ياربي منك طيحي وريحيني مو هذا اللي تبينه سمعت صوته من عند المجلس : اللهم سكنهم مساكنهم أمنية لفت عليه ومو واضح لها زين بسبب الغشوه صرخت : انت ولا كلمه ناقصتك انت الثاني دخلت البيت وصوت ضحكته المبحوحه توصلها .. بدريه تناظرها بعتب : وش قلنا حنا أمنية ترمي عبايتها وشنطتها بطفش : صيري عاقله صوتك مايعلا ماتكلمين عمر بدريه تلم يديها لصدرها : وحافظه الكلام ماشاء الله ليش ماتطبقين شوفي نجلا بنت عمك اصغر منك واعقل منك أمنية طفشت من هالموال والمقارنه اللي كرهتها ببنت عمها .. بدريه قبل تطلع من الغرفه وتقفل الباب : العصر جايينا اهل عمتك طوقه من جده تجهزي مثل ماعلمتك أمنية بملل : طيب × صحت ع صوت الباب يدق راحت فتحت وهي تناظر ساعتها قريب المغرب شافت وسن بنت اخت طوقه : اهلا وسوونه وسن : أمنية تلعبيناا أمنية تحك شعرها : والله ودي بس امي تهاوشني التموو حولها الاطفال وكل واحد يترجاها من جهه.. أمنية : خلاص انا الشرطي والغرفه السجن اللي اشوفه بوجهي امسكه اهربوووو وراحو جري عنهاا وهي تجري وراهم واللي تمسكه تحبسه بغرفتها كم دقيقه وتطلعه الاطفال مبسوطين وهي مبسوطه معهم طوقه تنهدت بحسره وهي تشوفها ماسكه روان : الى السجن ايتها الحراميه طوقه راحت لاام أمنية : بنتك مافيها طب والله تلعب مع البزران بدريه : اووف منهاا ماني عارفه كيف اتعامل معهاا ام نايف : خلوها والله اخذت اجر في البزران سلتهم بدريه سكتت مقهوره " بنتي تسلي عيالكم وبناتكم جالسات جنبكم مع ان بنتي اكبر منهم " × × تبكي من قلب : مانبي بيت كبير مابي اطلع والله بيتنا حلووماابي اترك الديره ماابي جده منصور يمسح ع شعرهاا : صدقيني لاشفتي بيتنا الجديد بجده رح تنبسطين يلا ياقلبي نطلع مابقى الا احنا أمنية لبست عبايتها وطلعت مع ابوهاا : بروح اودع مكان العابي منصور : خلاص اطلعي من الباب اللي ورا وقفليه بعدك أمنية طلعت مع الباب اللي كل صباح تطلع منه هي ونجلا وعمر ومرات يكون معهم عبدالرحيم يلعبون في بيوتهم قبل تطلع الشمس واذا طلعت يوقفوا ويكملون العصر .. وقفت ع عتبة الباب تناظر مكان بيتها .. لفت عيونها يمين وهي تحس احد يناظرها وماخاب احساسها كان عمر واقف عند مكان بيته ويناظرها بصمت ... صدت عنه وقفلت الباب وراحت لاابوهاا ماعندها الجرأة مثل اول تكلمه عادي .. طلعت من البيت .. ناظرت شباك جيرانهم ريم وهنادي يأشرون لها مع السلامه .. اشرت لهم وهي تبكي وراحت سياره ابوها .. ركبت وقفلت الباب وسندت راسها عليه .. نجلا اللي مبسوطه : سنه اخرتيناا بنروح جده ياغبيه استانسي أمنية صرخت عليها معصبه : اووص لاتكلميني انتِ صدت عنها وناظرت عمر يطلع من البيت ويقفل الباب تشوف الضيقه بوجهه .. يمشي لسياره ابوه الغمارتين القديمه اللي مافيها مكيف يمشي فيها هو وابوه .. الباقي معهم بسيارة ابوها الجمس الجديد .. * يارفيق الدرب تاه الدرب منا في الضباب يارفيق العمر ضاع العمر وانتحر الشباب اه من ايامنا الحيرى توارت في التراب اه من امالنا الحمقى تلاشت كالسراب .. * الساعه 2:14 م .. في شوارع جده المزدحمه .. لكزس ابيض .. السياره يعمها الصمت تركب هي ورا وتناظر الطريق واللهفه الي كانت متوقعتها وتنتظر اللحظه الي تطلع من المستشفى وتشوف الحياه ماهي موجوده كانت متوقعه انها تكون طاايره من الفرحه .. تحس الحين كل شي مات بعيونها الحياه رماديه بدون الوان .. ماصدقت ان ابوها جا يستلمها اخيراً .. كانت واثقه انه مارح يخليها هي وحيدته كيف يخليهاا .. بس الي تشوفه الحين غير ابوها مو ابوها الي دخلها المستشفى تتعالج ودافع عنها قدام اهله مو ابوها الي كانت اخر مره شافته اول مادخلت هالمستشفى وعذرته تدري ان الي صار كسره وماتلومه ليش مازارهاا ابوها غيير التعب هاااد حيله .. ماناظرها ولا حتى سلم عليهاا لما قربت بتحضنه رفع يده قدامها يعني لاتقربين .. تنهدت وهي تناظر الطريق .. مو قادره تبكي ولا حتى لمعت دموع بعيونهاا .. خلاص ملت البكا صارت عندها مناعه .. غمضت عيونها دام ابوها صدها فالكل ع خطاه .. لازم تنام ماتبي تفكر حلوو التبلد لازم تستمر عليه عشان تعيش تدخل من اذن وتطلع من اذن بدون مايأثرون عليها بكلامهم .. يكفيها تعب خلاااص تبي تعيش الحياه دام ربي كاتب لها عمر عمر !! شدت ع عيونها لا لا مااتبي تتعمق اكثر لازم يتبلد شعورها لازم يمووت * ناظرت البيت الي وقفو عنده .. ماتعرفه .. معقوله غيرو بيتهم في سنتين ! لفت تشوف الشخص الثالث الي كان يسوق السياره وهي للحين تحس علامات تعجب من وجوده "تركي ولد عمتها مريفه" نزل وراح لباب البيت يدقه .. رجعت ناظرت ابوها الي جالس قدامها مو واضح لها الا طرف شماغه .. ابو أمنية لما شاف تركي يأشر له يجي .. فتح بابه وبنبره جديه : انزلي أمنية فتحت بابها بهدوء ونزلت صارت تمشي ورا ابوها لداخل البيت .. شافت رجال مطوع ماتعرفه يأشر ع باب : من هنا باب الحريم ابو أمنية اشر لها بدون مايناظرها : ادخلي أمنية ناظرت ابوها بخوف وين جايبها وين بيرميها هذا البيت ماتعرفه ولاتعرف هالرجال .. اخذت نفس تهدي خوفها .. ودخلت لقت حرمه كبيره ع الباب تستقبلها بدراعه ومتحجبه ومبتسمه ببشاشه : ياهلا والله حيااك ي بنيتي أمنية دخلت للمجلس البسيط .. جلست ع الارض وبدون ماتنزل نقابهاا ماقدرت تقول شي خايفه ومتوتره وش بيسوي ابوهاا ام احمد تمد لها الفنجان : تفضلي أمنية اخذته منها بيد ترجف ونزلته قدامها ولا في بالها تذوقه ابد وضعها مايساعد ام احمد بحنيه تناظرها : اذكري الله وانا امك عادي مافي داعي توتري ابو احمد يجي يسألك من ورا الباب أمنية تناظرها ودقات قلبها تزيد تحاول تفهم .. رجال مطوع .. ويسألها من ورا الباب .. بديهياً فهمت زواج ابوها بيزوجها ؟! بدت ترجف وهي تستوعب وجود تركي يزوجها تركي !! معقوول ؟ تركي كبير بنص الثلاثين ومتزوج ام احمد تقهوى بدون ماتكلمها مبين البنت مستحيه ومتوتره ماتبي تضغط عليهاا شوي كذا اندق الباب .. وفز قلب أمنية بخوف مع الدقه راحت ام احمد اخذت الدفتر من زوجها ودخلت عند أمنية : اقربي يابنيتي عشان تسمعينه الشيخ ابو احمد : السلام عليكم يابنتي هل تقبلين بتركي بن شداد ال.. زوجا لكِ أمنية تجمعت الدموع بعيونها غصب .. ابوها خلاص باعها مايبيهاا .. مالها الا هالتركي فرصتها بالحياه همست : نعم ام احمد : علي صوتك وانا امك ماسمعك أمنية رفعت راسها : نعم اقبل واخذت الدفتر من احمد وهي تسمع الشيخ يدعي لهم .. بصمت بسرعه وهي خلاص بتنهار تبي تطلع من هنا ولوين بياخذونها ماتدري بس هالمكان خنقها لازم تطلع هذي اخرتها تتزوج تركي الي حضرت زواجه ورقصت فيه للصبح .. ياويلها من سهام * فالسياره .. تركي يناظر ابو أمنية مغمض عيونه وحاط يده ع قلبه : خالي انت بخيير ابو أمنية يهز راسه : اييه ماعليك نغزات صارت روتين أمنية عضت شفاتها والدموع بللت نقابهاا ااه ياابوي شلي سويته فيك حسبي الله ونعم الوكيل حسبي الله ونعم الوكيل وصلو لبيتهم .. ع طول عرفته هذا تعب ابوها وشقاه .. هذا الي كتب نصه لعمها سعود بدون اي وجه حق بس عشان جدتها طلبت من ابوها يكتب لاخوه الطفران نصه عشان يقبل يعيش معهم دايماً ابوها مضحي ومحد يشوف له معروف .. تركي : تحتاج مساعده خالي انزل معك ابو أمنية فتح الباب : لا طيب مع السلامه أمنية فتحت بابها بتنزل .. ابو أمنية بدون مايناظرها : لاتنزلين توكلي مع رجلك تركي بعد مانزل خاله وقفل بابه .. لف عليها شافها للحين فاتحه الباب وماسكته مانزلت وكأنها مصدومه : قفلي خلصيناا أمنية قفلته وهي تحاول توقف بكاا مو قلنا خلاص صار عندها مناعه ليش تبكي الحين .. تخلي ابوها عنها صعب زوجها من تركي صعب جيتها قدام البيت الي كانت معززه مكرمه فيه صعبه عمر هه خلاص مفروض تحمد ربها قبل فيها تركي .. اكيد كرهها ونساها يمكن حتى تزوج .. ليه تبكي عليه الحين هي بمصيبه اكبر غمضت عيونها ودموعها تنزل تتذكر اخر مره شافته .. فالمستشفى " كانت تبكي بصمت واصابع عمها سعود معلمه بخدهاا .. هي مدمنه مخدرات!!! نوير .. كانت تعطيها حبوب عن الاكتئاب خدعتها بكل سهوله استغلت تعبها النفسي بعد وفاة امها الحبوب كان تريحهاا ماكانت حاسه انها قاعده تهلك نفسها وتنطفي .. فزت بخوف لما انفتح الباب بقوه .. اكيد ابوها جا يكمل الي بداه عمها كانت اول مره تنضرب بحياتهاا بس تفاجأة لما شافت عمر دخل ولااهتم اذا هي متغطيه ولا لاء عمر وقف بنص الغرفه يناظرها وهو يرجف مو مستوعب الي سمعه أمنية تتعاطى مخدرات!!؟ ناظر ملامحها والتعب مبين عليها وسواد تحت عيونها .. ناظرها بحسره وهمس بوجع : لييه ؟ أمنية غطت وجهها بكفوفها وصارت تبكي بصوت وتهز راسها وتتكلم بين شهقاتهاا : والله م مددد رري عمر تقدم لها والعبره باينه بصوته الواطي المخذول : شلون ماتدرين علميني تكلمي انا اصدقك أمنية تشهق وخرت يديها عن وجهها وكلها ترجف وتحرك يدها تحاول تشرح ويطلع صوتها متقطع : احسب حبوب اكتئاب نوير تعطيني عمر يشد ع اسنانه وعيونه صارت حمرا من الغضب والحقد : من نوير من بنته انا بتلها للسجن تل عمر لما شافها مو قادره تتكلم من كثر بكاها والتعب هد حيلهاا .. تقدم بتهور وحضن وجهها بين كفوفه وخلاها تناظره ويهز راسه يطمنها : بتتعالجين لاتخافين بتتعالجين علميني اسمها بالكامل واخذ لك حقك أمنية تحاول تشوفه بس دموعها مغشيه نظرهاا اخذت نفس : نوير سالم ال نفس دفعتي عمر يمسح ع خدها وهو يشوف تعليمه الاصابع همس من بين اسنانه بقهر : من ضربك ؟ أمنية ومن خوفها ومصيبتها مو مستوعبه وضعها هي وياه همست بتعب : عمي عمر غمض عيونه وبنفسه ردد "ااه ياابوي" ابو أمنية فتح الباب وناظر عمر القريب من أمنية وهي كاشفه بصدمه : عمرر !! عمر تركها ورجع ع ورا صحى ع نفسه ناظر عمه بقواه عين ماهمه شي : أمنية لازم تتعالج بالمستشفى لا تطلعها للبيت أمنية ترجف بخوف من نظرات ابوها الغاضبه لعمر .. ابو أمنية يأشر ع الباب : اطلع برا وش مدخلك عندها انت مااالك دخل بررا عمر مايبي يزيد عمه الي فيه مكفيه مشى للباب وهو يقول بقوه : أمنية مالها ذنب خدعتها الي ماتخاف الله ابو أمنية : اطلع بررا ماتنسى نظرته الموجوعه لها قبل يقفل الباب وراه " * نزلت من السياره لما قالها تركي تنزل .. مشت وراه تركي دخل العماره .. مشى جهة الدرج اشر ع الباب : الدور الاول لسهام لاتجيها ولاتجيك ماابي مشاكل ودوشه راس أمنية تمشي وراه بصمت للدور الثاني وهي متوقعته لها بس انصدمت لما اشر ع الباب وقال : وهذا دور جميله ونفس الكلام بعد ماابي دوشه راس صدمه ! متى تزوج ع سهام هه وهي الي كانت تظن انها زوجه ثانيه طلعت زوجه ثالثه هه ياحبيبي .. لايكون تصير الرابعه بعد ماتستغرب تركي فتح باب : هذي الشقه ملحق لك "واشر ع الباب الي قباله " وهذا سطح لااشوفك طابته اصلا لااشوفك طابه عتبة باب شقتك يله ادخلي بالرجل اليمين ياعروس ههههه أمنية دخلت برجلها اليمين بدون ماترفع عيونها له .. ناظرت الشقه واثاثها البسيط واضح تأثيث سريع من جنب بدون تنسيق .. ههه تنسيق ايش ياعمي انا وين افكر والمصيبه الي انا فيها تزوجت تركي وهذا انا معه بمكان واحد بروحنا حست بيدينه حطت ع كتوفهاا .. جفلت ولصقت بالجدار وتناظره بخوف تركي ابتسم : وش فيك اهدي انا زوجك شيلي هالنقاب خلني اشوف وجهك الي مصبرني اني اذكرك مزيونه عسى الادمان بس ماشوهك أمنية ترجف بمكانها مو قادره تتحرك .. تركي تقدم بشويش مبتسم يطمنها وهو يشوف كيف عيونها جاحظه من الخوف ورجفة جسمها واضحه .. مسك يدها ومشاها للكنبه جلسها وجلس جنبها بشويش : بسم الله عليك أمنية غمضت عيونها لما حست نقابها يرتفع عن وجهها .. تركي تنح يتأمل ملامحها بااعجاب .. وماامداه الا قام منفجع من صراخها العالي يناظرها كيف مغطيه اذونها بيديها ومغمضه عيونها وتهزراسها وتصارخ بااعلا صوتها : هششس يابنت أمنية تصاارخ من اعماق روحها ولاهي سامعته تركي يمسك يدينها يحاول يوخرهم عن اذنها : اصص اقلك كانت تهتز كلها وتزيد صراخ مع محاولاته تركي ماتحمل ضربها كف خلاها تطيح ع الكنبه .. ناظرها كيف ثبتت وهي مغمضه عيونها وبدون اي حركه او صوت .. تقدم لها بشويش وهزكتفها : بنت هااي تسمعيني أمنية ثابته نفس ماهي تركي يهزها اقوى : بنت اصحي أمنية فزت جالسه بشكل مفاجأ وسحبت نفسها لااخر الكنبه وهي تحضن نفسها وتناظره بخوف .. تركي يناظرها بتفحص ووقف وابتسم : عز الطلب مجنونه فاقده الاهليه أمنية تابعته بنظراتها لين طلع من الشقه وقفل الباب وراه بالمفتاح .. تنفست براحه .. وراحت لباب الشقه شافت ان فعلاً مقفل عليها ولا في مفتاح عندها .. جلست ع الارض وبكت يااربي ليه كذا طلعت ابي اعيش ماابي انسجن .. ليه ياابوي خليتني مو مكفي امي الي ماتت قدام عيوني ليش تحرمني منك وانت حي .. * تعودت ع الوحده بهالشقه .. تركي اول يومين كان يجيها كل شوي بس تنكمش ع نفسها وتعطيه النظره الخايفه وماتتكلم .. وماكان يهتم ولا حاول يقرب منها بس يجيب اغراض لشقه ويتأكد انها عايشه ومو ناقصها شي ويطلع ويقفل الباب .. بس صار له ثلاث ايام ماطل عليها ثلاث ايام محبوسه ماانفتح عليها الباب .. راحت للشباك العاكس ناظرت الشارع وهو الي مسليهاا طلت تحت تشوف سيارته هنا ولا لاء وحتى امس ماكانت هنا شكله سافر او شي ابتسمت حلوو خله يذلف ودها تاخذ راحتها مو تكون قلقانه فاي لحظه يدخل راحت لغرفه نومها .. ناظرت المرايه .. قميص بيت واسع .. شعرها رابطته كله ولافته كعكه وهذا شكلها الي معتمدته من جت هالشقه ماتبي تلفت نظره لها .. هي مرتاحه ع هالوضع يحسبها مجنونه جت من الله رحمه ودها تفك شعرها وتكشخ بس ماتقدر تغامر تخاف .. مشت بسرعه للمطبخ جوعانه طفشت من السندويشات الي تسويها ليتها تعرف تطبخ كان طبخت لها شي بس احسن عشان مايشك تركي لما يشوفها تعرف تطبخ سوت لها ساندويش جبنه وحطت معه شبس حار .. اخذت لها عصير برتقال من الثلاجه وطلعت للصاله .. شغلت التلفزيون وجلست تدور لهاشي تتابعه شوي كذا سمعت صوت المفتاح فالباب .. عدلت جلسها بسرعه وجلست برسميه بعد ماكانت منسدحه .. وصارت عادي تتابع المسلسل وهي ماتدري وشو بس هي عطته فكره انها تحب التلفزيون لانه كل مايدخل يلقاها عليه بس هالمره سمعت صوت كعب !! وهمسات شوي شافت سهام ووراها وحده اول مره تشوفها اكيد جميله .. وش يبون اكيد قالهم ان الحبوب لعبت بعقلها وصارت مجنونه .. يعني تمثل عليهم بعد لازم لان اكيد بيعلمونه لو كشفوها سهام تناظرها بتفحص : السلام أمنية تناظرهم بصمت .. تحس انها بتضحك بداخلها ع نظراتهم لبعض سهام للحينها واقفه : كيفك أمنية انا سهام تتذكريني أمنية هزت راسها : ايه جميله تلوي فمها : وانا جميله تتذكريني أمنية وبداخلها مستانسه لقت شي تتسلا عليه هزت راسها : ايه جميله تحرك يدها : ايييه تقول خلف الله ع عقلها سهام تناظر أمنية بشفقه من يصدق هالبنت الي كان الكل يتمناها يصير معها كذا .. ومع هذا للحين محتفظه بجمالها جميله ناظرت أمنية من الى وراحت جلست جنبها وابتسمت كأنها تكلم بزر : طيب امونه قولي لي تركي وش يسوي لما يجيك أمنية بنفس الهدوء : يجيب اكل جميله ناظرت سهام الي للحين واقفه مكانها ورجعت ناظرت أمنية ومسكت قميصها من عند صدرها تحركه : يعني تركي مافي شيل ملابس انتِ ويبوسك أمنية ناظرتها بعدوانيه وضربتها كف سريع فاجأها سهام حطت يدها ع فمها تضحك : ههههههههههههههههههههههههه ه جميله ناظرتها بقهر ومسكت يدها بقوه : اكسر يدك لو انمدت مره ثانيه سهام ولسى فيها ضحكه : حرام عليك لاتنزلين عقلك لها وبعدين وش سؤالك هالغبي كأنك تكلمين شغاله شيل ملابس هههههههههههههه جميله تمسح ع خدها وهي تناظر أمنية الي تناظرها وساكته ولا كأنها سوت شي : بمووت غيره والله شوفيها كيف حلوه سهام بهدوء وحزن بقلبها ع وضع أمنية : من يومها أمنية حلوه ماشاءالله بس قلت لك تركي مو مقرب منها عايفها هو قالي وانا اصدقه جميله تتخصر : ايه يضحك علينا بكلمتين هي ماهمتني فلوسها تهمني اتحداا والله لو انها بعقلها كان ماخلاها سهام تهز كتفها : مو غريبه أمنية تفكر بكلامهم وش فلوسه هي مامعها ولا ريال صح ابوها غني بس خلاص تبرا منها .. معقوله ابوي يدفع له فلوس عشانه قبل يتزوجني.. حست الحزن يملا قلبها عند هالنقطه فعلاً ابوها باعها خلاص سهام : ناقصك شي أمونه أمنية : لاتقفلو الباب انا مو مجنونه سهام بلطف : ايوه انتِ مو مجنونه من قال بس لازم نقفل الباب اذا تبين شي دقي عليه بقوه أمنية وقفت لما شافتهم يتجهو للباب .. راحت لهم بسرعه تجري سهام وجميله صرخو بخوف وحطو رجولهم بينحاشون مايعرفون وش قومها كذا فجأه.. أمنية مسكت بلوزه سهام من ورا قبل تنحاش .. سهام تحاول تدفها وتلحق جميله الي نزلت الدرج تجري وتصارخ برعب .. أمنية سحبت المفتاح من يدها ودفتها برا وقفلت الباب بوجهها سهام تدق : امونه ياحلوه تكفين افتحي وهاتي المفتاح لاتوهقينا مع تركي أمنية ضحكت بدون صوت وهي تناظر المفتاح معه مفتاح ثاني .. جربته وطلع للباب صح فكتهم عن بعض ورمت واحد من تحت الباب لسهام وهمست بصوت ثقيل : اذا علمتي ان عندي مفتاح اعلم انكم جيتوني سهام اخذت المفتاح ونزلت بشويش وهي تفكر أمنية ماهي مجنونه مثل ماقال تركي البنت عاقله وهاديه بس الاكيد عندها حالات نفسيه لازم تكون حذره .. أمنية تناظر المفتاح كأنه كنز .. راحت للصاله وصارت تضحك تضحك خلاص تعبت تكتم ضحكتها وهي تتذكر كلام جميله والكف الي اكلته خلاص بتعتمدها كفوف ع الطاير ههههههههههههههههههههه قالت شيل ملابس قالت ههههههههه ااه يابطني * الصباح .. الجده منيره جالسه تتقهوى مع عيالها منصور وسعود .. منصور نزل فنجاله ع الارض وغطاه بيده : بسس يله استاذن بلحق شغلي منيره : الله يوفقك ياارب منصور طلع من البيت وهو يعدل شماغه وياخذ نفس طبيعي .. مايبي يفكر لازم ينشغل بشغله وينسى أمنية مايبي ضميره يأنبه عمر طلع من باب غرفته الخارجي شاف عمه طالع من البيت .. تحرك بسرعه يلحقه : عمي منصوور منصور وقف ولف يناظر عمر يمشي بسرعه لين وصله .. عمر : صبحك الله بالخيرر منصور : هلا صبحت بالنور عمر تحرك يمشي مع عمه لمواقف السيارات : شلون صحتك اليوم منصور تنهد وهو يطلع مفتاح سيارته من جيبه : لو اقول بخير ادري انك مارح تصدق نفس امي وسعود عمر ابتسم بحب لعمه : كويس انك عارف اني كاشفك منصور وقف عند سيارته : ضيقه خاطر بس وتروح ماعليه عمر بهدوء : عشان بنتك !؟ منصور : صح زوجتها ومفروض ارتاح بس تركي يقولي انها مريضه نفسياً بنتي الوحيده كسرتني وضيعت نفسها عمر يربت ع كتف عمه : لاتضيق ع نفسك زوجتها خلاص انساها يله عن اذنك ولف يمشي لسيارته وهو يلبس نظارته الشمسيه وملامحه جامده ركب سيارته وحركها طالع من البيت وهو يتذكر اخر لقاء بينهم بالمستشفى كانت عاقله .. ليه كذا بسنتين فتره علاج مفروض ليش تضيع كله من جدتي الي حرضت عمي يخليها ومايستلمها بسرعه اكيد تعبت نفسيتها بعد ماتعالجت ومحد اخذها بسرعه * دخل الشقه ولف عيونه بالصاله بالعاده دايما يلقاها متكيه ع التلفزيون .. طل فالمطبخ وهو ماشي مو موجوده وقف قدام باب غرفه النوم المقفل .. فتحه بتردد شافها نايمه ع السرير اول مره يلقاها المغرب نايمه !! بس وقفت عيونه ع شعرها الي ماخذ راحته وراها وهي نايمه يمينهاا .. بااختصار فتنه .. مشى بشويش مايبيها تحس فيه وتصحى جلس ع طرف السرير وهو يتأملهاا تغير شكلها مع شعرها وهو مفتوح او هو اول مره يلقاها هاديه كذا ويناظرها زين توه ينتبه للشامه الي قريبه من فكها اليسار .. رجع يناظر شعرها هذا الشعر ولا بلاش مو سهام لحد كتفها وجميله شوشه ماتستشور الا لماتروح لأهلها مد يده يلمسه بشويش هو كذا ناعم طبيعي ولا مستشور تنهد بقهر ووقف طالع من الغرفه وهو يردد بنفسه مدمنه مجنونه خساره هالحلا فيها لو مامصلحته الي من وراها كان رماها ع ابوها مايتشرف ياخذها * فالمطبخ .. ام عمر طوقه .. جالسه تسوي الغدا وتكلم اختهاا ام نايف : اييه الحمدلله وافق وبس يجي ابوها من سفره بنروح نخطبها له ام نايف : ماشاءالله ربي يتمم لهم ع خير طوقه تقطع البصل : ااه الحمدلله واخيراً ساره بتصير مره ولدي الحمدلله الي ربي ابعد عنه العوبا أمنيوه ام نايف تضحك : اي والله النصيب من يقول عمر بيتزوج غير أمنية طوقه : دعوواتي انقبلت الحمدلله باقي دعوه بس تتحقق واكون سعييده ام نايف : هههههه قوليها قوليها خليها تسمعك طوقه تناظر الباب وتهمس : عجوز وسمعها احسن مني قطيعه ام نايف : عاد صدقيني هم كذا الناس الشريه عمرهم طويل خالتي قاعده ع قلبك يمكن تموتين قبلها ههههه طوقه : الله لايقوله ابي يووم بس اتهنى ام نايف : وهذا وانتِ بنت اختها كذا مبهدلتك الله يرحمها بدريه تحملت منها الكثير طوقه تنهدت وهي تتذكر بدريه : الله يرحمها بس كانت قويه وماخذه حقها يكفي منصور يحبها ومايرضى عليها مو زي الي عندي ام نايف : حرام عليك سعود شحليله طوقه : اي بس لو منفك من امه كان اموري بخير صح انه فاشل وعايش بخير منصور بس مايهم انا بس ابي يبعد عن امه الي تملا راسه اوووف * العصر .. سمعت صوت المفتاح بالباب .. كانت بتنحاش الغرفه تنام بس مارح يمديها تجلس كذا مصنمه احسن سهام نزلت الاكياس الكثيره الي بيدها وابتسمت : استأذنت من تركي اجيك امم "واشرت ع الاكياس" امس رحت السوق انا واختي ساره وبنت عمك نجلا تذكرينهم صاحبات هم أمنية "ساره كيف تنساها وهي الي دوم عمتها تدعي تكون من نصيب عمر" : اذكرهم سهام : وهذول هديه من نجلا لك كان ودها تجي بس يعني ظروفها صعبه ماتقدر امها تعبانه وكذا أمنية ساكته وهي فاهمه اكيد مانعينها ولو درو عن هالهديه ياويلهاا .. وقفت وراحت للاكياس وغصه بحلقهاا كاتمتهاا سهام تناظرها : ملابس ع ذوق نجلا أمنية تحس مو قادره تتحمل اكثر بتبكي شالت الاكياس كلهم دفعه وحده وراحت لغرفه نومها وقفلت الباب وراهاا نزلت الاكياس ع السرير وماهمتها سهام اكيد بتروح .. صارت تطلع فالملابس وهي تتبسم ودموعها تنزل وتمسحهم شكثر اشتاقت لنجلا هي بلسم هذاك البيت كيف عايشه بدونها كانت تقولها انا مو مصبرني ع هالبيت الا انتِ .. تسلط جدتهم .. طوقه الي سعود دامر شخصيتهاا لفت للباب الي يدق سهام : أمنية ادخل أمنية ببحه : وش تبين سهام بهدوء تخفي نص الحقيقه : ام تركي تبي تشوفك وتسلم عليك اليوم ام تركي عمتك مره مشتاقه لك أمنية ودها تضحك عمتها ام تركي تكرهها لان الفتره الي قبل وفاه امها كانت متمرده ترفع صوتها ع الكبار وماتحترم احد عاادي .. ماتلوم عمتها لما ماتحبها سهام : هاه امونه قلبي ادخل تركي موصيني اجهزك أمنية راحت للباب وفتحته وبملامح جامده رغم حمره عيونها من الدموع : مااروح مع تركي لحالي سهام : تخافين من تركي أمنية سوت نفسها ترجف ونظراتها مو ثابته : اخاف من كل الرجال اكرههم سجانين سهام بدت تفهم حاله أمنية وارتاحت يعني هي طبيعيه بس عند الرجال تجيها الحاله النفسيه : مارح تكونين لحالك بيودينا كلنا يله تعالي اختار لك من هديه جولي جات بوقتها انتِ تحتاجين ملابس أمنية تحضن قميصها الي لابسته تستهبل : لااا انا ابي هذا سهام طلعت لها فستان ناعم : ايه ياقلبي تلبسي هذا الفستان واذا رجعنا تلبسي قميصك ذا عادي أمنية اخذت الفستان منها وباابتسامه سعيده : البس هذا الحين سهام شهقت ولفت ع طول لما أمنية رفعت قميصهاا أمنية تلبس وهي تضحك ع الصامت مسكينه سهام ابد ماكانت تختلط فيها بس تشوفها بالاعياد ماتوقعت انها كذا طيبه ومتواضعه .. : سلييم سلييم وييش اسوي بمحبوبي تلقى الخلا واعطى المفاتيح عبدالله سهام تناظر الجدار بصمت وعيونها كذا !! توها تقول البنت طبيعيه الظاهر اسلاكها تفصل مرات أمنية بعد مالبست صارت ترقص بالغرفه وتدور بالفستان وتغني : ياوارد الما اسقني شربه والي سقااني مايخاف الله يووووك عاااشوو سهام فهت بأمنية مو عارفه تضحك ولا تبكي .. جميله وقفت ع باب الغرفه وتصفق وهي تضحك بشماته : هااه عسى جماعتك يرقصون زين سهام بخوف : وش جماعه انتِ اسكتي أمنية وقفت وناظر جميله بعدوانيه : اطلعي بررا جميله تناظر جسم أمنية كيف الفستان وضحه كانت ضايعه بالقميص كل شي فيها حلو الا عقلها فعلاً الزين مايكمل حلاه : ماني طالعه وبعدين سهام وش هالفستان تبينها تطلع احلا منا سهام خافت تقول شي وتفهم أمنية : اطلعي جميله والله اعلم عليك تركي هو قالي انا اجهزها ماقالك جميله ناظرتها بقهر وطلعت .. * ناظرت المرايه .. سهام لمت لها شعرها بتسريحه ناعمه ومكياج بسيط رفعت عيونها لسهام الي واقفه وراها : شكراً بس قلت لك انا اعرف ازين نفسي سهام تمسح ع شعرها : ايه بس هالمره زين ياحلوه لاتخلين تركي يشوفك وانتِ متزينه الحين البسي عباتك واجلسي فيها لانه لو شافك كذا بيصير يخوف مرره شبح أمنية فزت وراحت تدور عباتها وتهز راسها بجنون : البسهاا البسهاا عبااتي ويينك بسرررعه سهام ناظرتها برضا : انا بروح اجهز وبعدها نمشي * وقفت قبل تركب السياره ناظرت الشارع وهي مبتسمه اخيراً تشوفه من غير حدايد الشباك حفظت كل تفاصيل هالشارع وبزارين الحاره .. ركبت السياره وهي تشوف صلوح الدب الي امس ضرب تميم بالكوره متعمد ودها تنزل تهاوشه للحين تحس مقهوره منه امس ماقدرت تسوي شي وهي تشوف تميم يبكي بشكل يقطع القلب وصلوح وشلته يتنمرون عليه .. جميله صرخت : قفلي الباب هاااي بنمشي أمنية انتبهت لها بس طنشت وهي تلمح تركي يلف عليهم .. تركي : يله يامتخلفه اخرتينا أمنية تنقل نظراتها بين تركي وجميله بصمت .. سهام الي جالسه قدام بسرعه نزلت وقفلت باب أمنية وركبت : خلاص تركي ناظر أمنية بقرف : بلوه الله بلاني فيها استغفرالله أمنية لفت تناظر الشارع وتحمست لما شافت تميم جاي ومعه اخوه الكبير يمشون بااتجاه صلوح وشلته .. كورت يدهاا وحركتها بحمااس :يسسس انتبهت ان الكل يناظرها طنشتهم وفزت والسياره تمشي .. لفت تشوف من القزاز الي ورا .. كان اخو تميم ماسك صويلح من ياقته وكرشته طالعه وشكله يهاوش .. وتعمدت تضحك بصوت عالي والكل بالسياره يتحمدالله ع نعمه العقل تركي يناظر سهام : شغلتي الكاميرا سهام : ايه الله يحفظهم أمنية لفت وجلست زين ناظرت جميله مشغوله بجوالها .. شلون يتركون عيالهم عند الشغاله كله عشان حضرت جناب عمتها ماتحب ازعاج البزارين بعزايمها الراقيه يقالها مااالت * في بيت ام تركي .. عند المدخل جميله ترتب شكلها قدام المرايه وتهمس لسهام وهي تناظر أمنية تعدل روجها : انا ماابي ادخل بنفس وقت هالمجنونه مااعرفها اخاف تفشلني سهام وبنفس همسها : ماهي مجنونه قلت لك البنت عاقله بس تجيها حالات نفسيه ومابتدخلين معنا بكيفك "وناظرت أمنية" يله أمنية ندخل أمنية الي سمعت همسهم قفلت شنطتها : طيب ام تركي جايه لهم وعيونها عليهاا نفس ماهي مو مبين عليها الجنون مثل مايقول عنها تركي .. أمنية شافت عمتها كيف سفهتها وسلمت ع سهام وجميله وترحب فيهم ولا كأنها موجوده .. هالعجوز لازم تربيها وتعلمها ان الله حق بنت منيره طبق الاصل منها حست بيد سهام تمسك يدها .. مشت معها وهي تحس باامتنان كبيير لسهام وكأنها اختها الكبيره دخلو للمجلس الكبير المليان حريم .. تسلم ع الماشي في بعض وجيه عرفتهم كثير شافتهم بعزايم عمتها الي ماتخلص مصدقه نفسها محبوبه والله محد يجيها الا عشانها بطرانه جلست وهي تحس الانظار عليهاا .. مو هي مدمنه المخدرات وهالحين مجنونه بنظرهم .. ليش جت كان المفروض جلست بشقتها وارتاحت من الناس ليش تواجههم صح انها صامده ولامبين انها متأثره وهزتها نظراتهم بس ماتدري لمتى تصمد تخاف تجيها كلمه تخليها تنهار ماامداها تفكر الا تسمع جميله ترد ع حرمه بصوت عالي : اييه سهام ترحمها وماتعتبرها ضرتها مسكينه هي تضيع مرات وتخاف من الرجال خوف مجنون رفعت عيونها تشوف الكل يناظرها .. شفقه .. ام تركي بشماته : سبحان مغير الاحوال ام خالد : اي والله هالدنيا تخوف اللهم الستر بس أمنية اخذت فنجان القهوه من البنت .. وحطت رجل ع رجل وتقهوى وهي تناظرهم بثقه ولا عليها من احد هي في حررب مارح تكون ضعيفه وتسمح لهم يكسروها الي جاها كفاهاا خزامى اخت تركي : زرتي جدتي منيره ي أمنية أمنية ومااهتزت نظرتها : لا ولا ابي ازورها ام تركي بقهر : وليه ان شاءالله أمنية تنزل فنجالها الي خلصته بهدوء : شوفتها تجيب لي حموضه ام تركي شهقت : ايا الي ماتستحين ولاتحترمين احد صدق بو طبيع مايجوز عن طبعه ام فارس : اصلا جدتك الي ماتبي تشوفك في كل مكان تتحسب عليك طيحتي وجه ولدها بين الناس أمنية بثقه : انا مارح ابرر لاحد اهم شي ربي عارف اني ماغلطت وهالعجوز ماهي جدتي ام تركي عصبت ووقفت كيف تتكلم عن امها كذا : قوومي قوومي اشووف بيتي يتعذرك يالمدمنه سهام : اهدي ياعمتي ام تركي تقاطعها : دقي ع تركي ياخذها ويرميها بعيد عن وجهي أمنية وقفت واخذت شنطتها وابتسمت وتناظر عمتها : اصلا حتى انتِ ماكنت بجي بيتك بس قلك اطلع اغير جو بس غلطانه والله بس عكرت جوويّ خزامى تقدمت بتضربها أمنية مسكت يدها قبل ترفعها بوجهها ولوتها بقوه : اكسررها وربي سهام سحبت أمنية : امشي أمنية وانتِ ساكته والله تركي يذبحك أمنية مشت بسرعه طالعه وهي تفكر كيف تصرف نفسها من تركي .. وعند باب البيت وهم طالعين قابلهم تركي الي اعصابه ثايره بعد اتصال امه .. راح لأمنية الي تخبت ورا سهام : وقص لساان ي المختله تعاالي أمنية تشبثت بسهام وصارت تصارخ نفس اول مره بالشقه تصارخ باعلا صوتها بدون توقف .. سهام انفجعت منها ومن تركي الي ماهمه صراخها سحبها بقوه وضربها كف وطاحت ع الارض وانكمشت ع نفسها وتصارخ ام تركي والحريم طلعو ع الصراخ مفجوعين .. تركي واقف قدامهاا بغضب : اصصص ام تركي : وخر عنها انت شقاعد تسوي فضحتنا سهام تبكي : عمتي وخريه عنها البنت بتموت علينا من الخوف تنجن اذا شافت رجال تركي جلس ع ركبه قبالها ورفع راسها يهزه : كف ثااني والله اصص اقووول ام تركي بقووه : وخر عنها اقولك تركي رجع ع ورا : بربيها يمه ام تركي تقاطعه : تربي وش البنت بتموت أمنية وقفت تجري وتخبت ورا عمتها وهي ترجف ووقفت صراخ وبشهقات تحضن ظهر عمتها : يممه يممه ام تركي تناظر تركي : اطلع بسرعه بسم الله الرحمن الرحيم تركي طلع وهو متنرفز .. ام تركي لفت عليها وتحاول تهديها : جيبو مويه بسم الله الرحمن الرحيم أمنية طاحت مغمى عليهاا .. حست بنفسها بتضحك لما شالوها الحريم ماتدري مين بالضبط بس مبين الكل خايف من حالتهاا عمرها ماتوقعت ان عندها هالقدره ع التمثيل بس فعلاً هي مبدعه وهالموهبه توها تكتشفهاا * الصباح في المدينه .. جالس يقرأ التعليقات والردود الي وصلته وكلها كلام ايجابي ونقد بنااء ع مقاله الجديد عدل نظارته واخذ كوب قهوته شرب شوي وابتسمم : الله يالروقااان الله ع الحلاه والجمال الي تبدا يومك فيه عفط ملامحه لما سمع صوت جواله وكأنه عرف المتصل .. مد يده وسحب الجوال الي بااخر الكنبه ومثل ماتوقع "امي شيهانه" اخذ نفس ورد : هلا بالغاليه شيهانه : ايييه مبيين الغلا مقطعك من بعضك عبدالرحيم يضحك : ههههه علامك علي شيهانه : قاطعني ابي اشوفك الله لايوفق ابوك حرمني منك بس العتب هالحين عليك انت رجال كبير ولك كلمه عبدالرحيم : كلمته بالطيب والله بس مايفهم يقول اذا رحت جده لاانت ولدي ولااعرفك شيهانه : بالعنا فيييه عبدالرحيم رجع براسه ع الخداديات بزهق : يمااه خلاص عاد ابوي تزوج وانتي بعد عشتو حياتكم خلاص عاد خلوني بحالي اعيش حياتي اهم شي متواصل معك ع الجوال وكل ماتجين للمدينه اقابلك وبالاعياد اجيك والحياه حلوه خلاص بلاش مشاكل وحنه زهقت شيهانه تنهدت : مااشي ي عبيد انا الي تعبت اقولك تعال بس ولد محمد ماعليك شرهه عبدالرحيم ناظر الجوال بعد ماقفلت بوجهه .. رمى جواله ع الطاوله ووقف بملل من هالموال .. بياخذ له دش ويطلع ولاعليه من احد .. اكثر شي يحمدالله عليه ان ابوه مخليه ع راحته يسكن بروحه خلاص تعايش مع انفصال امه وابوه يتذكر طفولته عند امه كانت جميله .. بس هي الي تزوجت وخلت ابوه ياخذه ويحرمها منه ويحرمه جدته الي مدللته عمر ولد خاله .. ع ان عمر كان دايما يتنمر عليه ويضربه وهو صغير الا انه يحبه ابتسم بحزن لما جت بباله أمنية اخته من الرضاعه هو اكبر منها بسنه وهي رضعة من امه مو معترف بهالاخوه ولا متواصل معها حتى شكلها ناسيه ابد ماتوقع توصل بهم الحياه للي هم عليه الحين .. نجلا جات بباله مثل الطيف وهو يحس ببروده المويه تنزل من الدش بقوه ع جسمه .. مايعرف عنها اي شي الحين الي يذكره هاديه ومسالمه عكس أمنية ولا تلعب معهم الا قليل ابتسم وهمس : الله ع ايام الديره * فالمطبخ يسوي له عصير برتقال وجزر .. تعود يشربه بعد الرياضه الصباحيه جلس ع الكرسي يشرب بهدوء ويناظر الفراغ مسرح .. نجلا : صباح الخيرر عمر رفع عيونه لها : غريبه صاحيه مو عندك اوف اليوم نجلا : اييه امم خزامى عازمتني ع الفطور وابيك توديني لها ع طريقك عمر يناظر ساعته : انا ترا بس البس وامشي اذا بتجهزين بسرعه اوديك نجلا ابتسمت : رح اجهز قبلك دقاايق بس عمر ابتسم بعد ماطلعت تجرري .. ووقف يروح يجهز لدوامه .. بالسياره .. نجلا تناظر الطريق بحماس .. أمنية في بيت عمتها ام تركي ي الله الحين تشوفها شكثر اشتاقت لهاا والحمدلله ان اهلها مايدرون ولا كان منعوها تروح بيت عمتهاا .. عمر يناظرها بطرف عين : غريبه ساكته نجلا : امم عادي بس افكر عمر بملل يناظر الطريق : شاركينا نجلا لفت عليه : فيك انت وساره عمر بهدوء : ايه !؟ نجلا تراقب ملامحه : يعني مبسوطه اخوي وصديقتي المقربه بيتزوجون عمر : هي تدري ؟ نجلا : عن وشو عمر : عن الخطبه نجلا ارتبكت : لا ماقلت لها تعرف هالامور للكبار خليها تعرف لما تخطبون رسمي مو حلو تعرف قبل عمر يحاول يصدقها : زييين * خزامى تجري وراها وتصارخ : يممه الحقي المجنونه بتنحااش ام تركي الي كانت جالسه بالصاله شافت أمنية نازله تجري وبعبايتها ومتنقبه : يااويلي انتِ ع وييين وبسرعه اخذت جلالها لفته عليها وهي تجري وراها لما شافتها فتحت باب البيت وطلعت .. أمنية طلعت الحوش تجري وتلف وراها تشوف عمتها وخزامى طلعو يجرون وراها لفت تكمل وهي تضحك في حياتها ماتوقعت يجي هاليوم الي تنتقم من عمتها بهالشكل اااه بعدين تشبع ضحك مو وقته الحين .. فتحت باب الشارع الا تشوف السياره الواقفه وبنت تنزل منها .. عرفتها ع طول نجلا نجلا لفت بصدمه وهي تسمع صراخ عمتها .. وهذي الي عند الباب أمنية !! الا أمنية أمنية بسرعه تحركت وحضنت نجلا بخوف : بيقتلوووني بيقتلووني الحقي عليييي ام تركي طلعت متلثمه بجلالها : لاتفلت منك ودخليها تبي تنحاش وتفضحناا نجلا تلم أمنية بقوه تحاول تهديها وتناظر عمتها : شصاير ام تركي انتبهت لعمر الي نزل ولف جهتهم صررخت : تخبى عمر لاتشوفك تنجن زياده اذا شافت رجال أمنية رفعت راسها من حضن نجلا وشافت عمتها وين تناظر .. شافته .. وااه من الي شافته تحس الوقت وقف اخر من تمنت يشوفها بهالحاله هوو .. كان واقف مكانه يناظر بصدمه ماتحرك مثل ماقالت عمته ارخت نفسها بحضن نجلا وغمضت .. نجلا تشد عليها بقوه عشان ماتطيح : يممه بسم الله طااحت عمتي لحقي علي . . نهايه الجزء الأول.. روابط الفصول الفصل الأول .... اعلاه الفصل 2، 3 .... بالأسفل الفصول 4، 5، 6 نفس الصفحة الفصول 7، 8، 9 نفس الصفحة الفصل 10، 11 الأخير نفس الصفحة |
مساالخييير ع الجمييع .. اتمنى عجبتكم البدايه .. الروايه بتكون عباره عن اجزاء طويله مثل كذا في كل اسبوع انزل جزء طويل نفس هاليوم "الثلاثاء" ♥♥. |
اقتباس:
وبإذن الله معك لما تكتمل للنهاية 🤍🤍🤍 |
رواية جيلة بس امنية المسكينة و معناتها حزنتني اتمنى ان أمورها تتحسن...موفقة بإذن الله |
](( الجـزء الثـانــي ))[/color] × او نلتقي بعد الوفاء .. كأننا غرباء لم نحفظ عهوداً بيننا يا من وهبتك كل شيء انني مازلت بالعهد المقدس .. مؤمنا فاذا انتهت ايامنا فتذكري أن الذي يهواك في الدنيا .. أنا . × ام تركي طلعت الشارع وهي بدراعه البيت ومتلثمه بجلالها .. شالتها مع نجلا : افتحي باب السياره والله ماتجلس في بيتي دقيقه نجلا تحركت معها بعدم فهم .. ركبت معها نجلا وحطت راس أمنية بحجرهاا ام تركي قفلت باب السياره وناظرت عمر الي واقف مكانه : البس عباتي واجيكم انتظروني عمر استوعب وفاق من صدمته تحرك بسرعه للسياره ركب ولف ورا بصمت .. نجلا تبكي وتلم راس أمنية لصدرها : ااه ياأموون شصار فييك عمر لف يدق بوري ورا بعض يعجل عمته لازم يفهم ليه طلعت كذا بتنحاش وش سوو فيها مو هي كانت ببيت تركي وش جابها هنا ...!!؟ ام تركي ركبت معصبه : يله حرك بسرعه ع بيتكم مايبون هالمهبوله ويدبسونها فيني بس انا اوريهم عمر يحاول يتحكم بااعصابه : وش سويتو فيها ليه كانت بتنحاش ام تركي تطبطب ع المسنده بينهم منفعله : اقولك مهبوله مجنونه مافيها عقل كل شوي يطري عليها طاري منحاشه تقول اننا بنقتلها عمر يشد ع اسنانه : وين تركي ام تركي : هه رماها علي البارح وهج بحريمه منصور غش ولدي وزوجها له ماعلمه انها مجنونه بس تشوفه تقعد تصارخ شوي وتموت من خوفها عمر همس بقهر : أمنية تحتاج علاج مو زواج أمنية مغمضه وقلبها يدق يدق .. مو مستوعبه قربه .. وصوته يوصل لأعمق نقطه بقلبهاا خذني ياعمر منهم خذني وهج فيني انا تعباانه ابي ارتاح نجلا تمسح دموعها هي من الاساس كانت جايه تشوف أمنية بعد ماقالت لها خزامى انها عندهم بس ماتوقعت تشوفها بهالشكل كيف ضعيفه وتدور الامان عندها حسبي الله فيك يانوير يالي ماتخافين الله الحمدلله ان القانون اخذ مجراه وقاعده تتعاقب لانها طلعت مأذيه بنات كثير مو بس أمنية شيطانه حقوده استغلت تعب أمنية النفسي بعد وفاه امها .. * أمنية حست السياره وقفت عرفت انهم وصلو بيتهم .. وهذا الي تبيه ترجع لابوها غصب عنه تدري انه حنين ومارح يخليها بس كله من عجوز النار منيره مايقدر يرد لها كلمه .. بس وجود عمر موترها كيف تمثل قدامه كيف تخاف منه هو !؟ هو الامان بالنسبه لها .. بس لازم تكمل الي بدته وتتجاهل وجوده واذا يشوفها مجنونه خلاص امون اصحي عمر ماهو لك ماانتِ من مستواه لاتهمك نظرته لك .. مالهاالا ابوها بهالدنيا تبي ابوها وبس فتحت عيونها ع يد عمتها الخشنه تحاول تطلعها من السياره ونجلا تساعدهاا ام تركي : هه صحيتي يله انزلي أمنية دفت يدها : وخرري يدك عني وش تبين وين ماخذتني ام تركي : الحمدلله رجع عقلها ام لسان انزلي بيت ابوك لابارك الله فيك أمنية نزلت : الله لايبارك فيك انتِ نجلا واقفه متنحه هذي أمنية الي تعرفها مو الي قبل شوي .. عمر لف جهتهم وهو يسمع صوتها ونفس تفكير نجلاا .. أمنية من شافت عمر جحظت عيونها وغطت اذونها بيديها الثنتين وصارت تصارخ وتلف يمين يسار ام تركي تأشر لعمر وهي تحاول تهدي أمنية وتعلي صوتها عشان يسمعها : روح رووح بسررعه نجلا تذكرت كلام عمتها : تخبى يااعمر حرام بتنهار عمر لف ورا السياره المهم ماتشوفه .. تخاف منه .. !! تنهار من شوفته أمنية تروح وتحضن نجلا وهي ترجف : اكرههم اكرههم ام تركي : امشي هالمهبوله والله ماتقعد ع ذمه ولدي أمنية مشت مع نجلا وهي تشوفها تلف ورا وتأشر .. فهمت انها تأشر لعمر يروح سوت نفسها ماتشوف ودافنه راسها بصدر نجلا وتمشي برجفه .. وهي فعلا تحس بخوف من مواجهة ابوها بس واثقه بعمتها ام تركي محد يدق راس منيره غيرها * ام تركي فتحت باب البيت وكالعاده منيره ع قهوه الصبح وعندها طوقه وسعود .. وبنبره عتب وهي تكشف وجهها : صبحكم الله بالخييييرر وقفت عيونهم ع الي دخلت مع نجلا وتناظر سعود بعدوانيه وتتخبى ورا نجلاا منيره عرفتها ع طول : هذي وش جايبها معك !؟ ام تركي : وينه منصور الي غش ولدي بهالمهبوله ماعاد يبيها ورماها عندي ولا انا ابيها خذوها مو هذا بيت ابوها وييينه سعود وقف بغضب وصرخ ع نجلا : وخرري عنها وش موديك لها انتِ نجلا بخوف : انا رحت لبيت عمتي ومدري انها هناك طوقه : استأذنت مني وسمحت لها استهدي باالله ياسعود سعود سحب ذراع نجلا بقوه واشر ع أمنية الي راحت تجري وتخبت ورا عمتها : خذيها معك ماعندنا بنات يتطلقوون وش تبينها تفسد بنتي ام تركي تتخصر ومتضايقه من تشبث أمنية فيها : اجل تبونها تفسد بناتي ويين ابوها خله يلمها ولا يبلا فيها الناس أمنية ودها تصارخ وتسفل فيهم واحد واحد بس كاتمه بقلبها وتتحلف ترد لهم الاهانه فيوم .. منيره وقفت بهدوء وصرامه : منصور بشغله خذيها ورجعيها بيت رجلها وهو يتفاهم مع منصور ام تركي : ولدي مايبيهااا سعود تقدم من أمنية مطنش كلام ام تركي : انا اوديها له والكلام بين الرجال لاتتدخلون أمنية صارت ترجع ع ورا بخوف وتتذكر ضربه لها فالمستشفى تكرهه هالعم .. حست بشجاعه وجنون فعلي تبي تاخذ حقها منه وهالحين وقفت بمكانها تشوفه جاي لها تناظره بكره وحقد .. وتحركت بسرعه مندفعه له وتعلقت برقبته وصارت تخمش وجهه بااظافرها وتصااارخ بجنوون : رح امووتك امووتك تبي تذبحني انت تذبحنييييي سعود طاح ع ظهره كانت ردت فعلها مفاجأه مو مستعد لها .. وهي صارت فوقه وتضرب بعشوائيه .. ام تركي وطوقه يحاولون يبعدونها عنه وهو يضربها كفوف ويشد شعرها بعد ماسحب حجابها بس فعلا مجنونه ماتحس ماتتحرك .. نجلا طلعت بسرعه شافت عمر جالس عند السياره صررخت : عمررر الحق أمنية تضرب ابووي منيره ماحيلتها الا تدعي علييهاا .. عمر دخل بسرعه وشافها جالسه ع ابوه وتضرب وهو يضربها وامه وعمته يفكون ويضربونها .. راح لهم بوسط صراخها وصراخهم مو شايف منها شي بعباتها وشعرها ابوه شاده مغطي وجهها ام تركي وطوقه وخرو لعمر الي شد ذراعها بقوه : قوومي أمنية يبه اهدى لاتضرب فكهاا هي تقووم أمنية مو حاسه بألم الضربات تضرب تبي تنتقم من هالعم الي هو سبب كل الي صار فيها هو الي رفض تروح دكتور نفسي تتعالج بعد وفاه امها يقول مافيها الا العافيه مو حاس بالاكتئاب الي بيموتهاا وبكل بجاحه يجي فالمستشفى يضربها عمر لف يدينه حولها وبقوه شالها .. وهي تصارخ بجنون وتقاومه تبي تنزل ووجهها احمر من ضرب عمها ودموعها ماليه خدودها مشى فيها لاقرب غرفه وهو يحس ابوه يجري وراه يبي يكمل عليهاا طوقه تمسك ذراع ابو عمر وبرجا : تكفى خلها مجنونه تبي يتلبسك شي منها ام تركي مسكته معها تثبته وهي تاخذ نفس : اذكر الله يارجال ابوها يتفاهم معها هالمهبوله عمر فتح الباب وبتعب من مقاومتهاا نزلها ع الارض وهو لسى لاف يده حولها .. أمنية توخر شعرها عن وجهها وحالها فوضوي وتضربه بيدينها الثنتين ع صدره وتصارخ : بذبحه وخررر وخررررر ااااااااااء عمر تركها وتحرك بسرعه للباب طلع وقفل الباب وراه قبل تطلع وقفله بالمفتاح وسحبه معه وراح لهم شاف ابوه جالس ووجهه احمر واظافيرها معلمه عليه منيره بحقد وهي تسمع ضربها ع الباب وصراخها : زيين قفلت عليها جعل يدينها الكسسر ماسلمنا منها لاصاحيه ولا مجنونه طوقه تمسح وجه ابو عمر : اي والله عمر بقوه : المفتاح معي ولااحد يقرب منها لين يجي عمي ام تركي وقفت تلم عباتها : انا بروح بيتي رجعني عمر وهو طالع : مانيب فاضي لك ام تركي لفت ع ابو عمر بعد ماطلع ولده : شفت ولدك الي مايستحي ابو عمر للحين محتر من أمنية ماله خلق شي : من قل عيالك تخدمين بولدي * أمنية فصخت عباتها وانسدحت ع السرير ترتاح .. بذلت مجهود كبيير في حياتها ماتوقعت انها تمد يدها ع عمها او جدتها ع كثر ماقهروها كانت أمنيتها المستحيله تضربهم ابتسمت بهبال : تحققت أمنيتي هالجنون بيساعدني اتجرأ واضرب والقلم مرفوع عني ههههههههههههههه اخخ يابطني جايك يووم يامنيرره والله لااخليك تراعديين اذا شفتيني ياعجوز الشرر تحس برووده بقلبها وهي تتذكر كيف ضربته .. حتى ماهمها الضرب الي جاها ووجهها الي اكيد معلم غمضت عيونها لما وقفت ذاكرتها عند نقطه .. عمر شالها كانت قريبه منه حيل من الخوف والربكه تصرفت معه فعلاً تقاومه تبيه ينزلها ويفكها حتى لما انحاش للباب وماراحت وراه بكل قوتها خلته يروح .. خلته يقفل عليها لازم يبعد عنها ماتتحمل قربه .. * جالس بمجلس الرجال بعد مااتصل ع دوامه يعتذر عن دوام اليوم .. ناظر ساعته تأخر عمه قالهم نص ساعه واجي وهالحين صارت ساعه .. وهي محبوسه خايف تسوي بنفسها شي كل شوي يرسل ع نجلا تروح عند الغرفه تتسمع سمع صوت سياره عمه فز بسرعه وطلع من المجلس .. وشاف عمه ينزل بسرعه ويدخل للبيت ناداه ولا سمعه مشى للباب ويده بجيبه يتحسس مفتاح بابها الباب الي هي وراه .. تحرك بسرعه يتجاهل صورتها الي جات بباله فتح باب البيت ع صوت ابوه : المفتاح مع عمر ابو أمنية لف عليه والقلق واضح بوجهه : عطني اياه عمر طلعه ومده لعمه بهدوء ابو أمنية اخذ منه المفتاح وراح للغرفه الي اشرو عليها .. * دخل الغرفه وهو يشوفها نايمه ع السرير بالعرض وللحين بعبايتها وشعرها الكثيف الطويل متناثر حولهاا و وجهها.. قفل الباب وراه وتقدم .. جلس ع السرير بشويش .. مد يده ووخر شعرها عن وجهها شد ع اسنانه بقهر وهو يشوف الضربات معلمه ع وجهها بكل مكان .. مسح عليه بحنان أمنية فتحت عيونها وناظرت ابوها بدون ماتتحرك وبعدم استيعاب : يبه !! منصور ابتسم والدموع تلمع بعيونه وهز راسه .. أمنية فزت بسرعه وطاحت بحضنه وتشد عليه مشتاقه له حييل : يبه لاتخليني يبه انا امووووت من غيررك منصور يلمها بقوه ويمسح ع شعرها : اعذريني يابووي سمعت كلامهم وانا ادرى الناس فيك أمنية فرحت وتبي تأنب ضميره اكثر وببكا : بيقتلووني يابووي بيقتلوني تركي يخنقني وانا نايمه بمووت لا ترجعني لهم منصور وقلبه محترق عليهاا : اهدي والله مااخليك لو اخربها مع اهلي وش لقيت من طاعتهم الا ضياع بنتي أمنية وخرت عنه وتناظره وهي ترجف وتبكي : انا ماضعت يبه انا مو مجنونه هم يقولو عني مجنونه وانا مو مجنونه شووف شووفني طيبه ممنصور بحنيه : اييه عاقله شايف اهدي خلاص مارح تروحين معهم بتظلين معي لين امووت أمنية بصدق تبكي : لا لاا جعل يوومي قبلك انا بدونك اضيع انا مالي غيرك بهالدنيا امي تركتني يبه تتذكر "وصارت ترجف من هالذكرى" لماامي تصارخ تتوجع بتموت لا لا صح انت كنت مغمى عليك بعد الحادث ماسمعتها انا رحت اجري للسفلت البعيد ابي اوقف اي سياره تمرتساعدنا كنت حتى وانا بعيده اسمعها تتألم ومافي سيارات محد جا تأخرو وامي تتألم بتموت وشفت سياره من بعيد جايه رحت اجري لهاقبل توقف كنت ميته بكا وخوف مدري كيف كنت اتحرك وركبت فالسياره وجيناكم كانت سيارتنا متقلبه كثير ابعدت عن السفلت نزلت رحت اجري لامي اطمنها ان هالناس بيساعدونها لقيتها ماتت كيف ماتت وانا كنت اسمعها ااااه احس صوتها للحين بأذني ودايما اسمعها باحلامي منصور الي صار يبكي معها هو يدري بالي شافته بس اول مره تقوله كذا بالتفصيل .. أمنية وهي منهاره بكا دفت يدين ابوها : لاتحضني بعد وفاتها كنت محتاجتك حيييل بس انت سافرت وتركتني رحت 5 شهور تتألم فراقها لحالك وانا طيب مافكرت فيني بنتك عمرها 21 سنه حزينه ومكتأبه خليتها واستغلوها الي مايخافون الله نوير فالجامعه كانت تحن علي وتسمعني وثقت فيها كانت تعطيني الحبوب تقول تخفف عنك اخوها كان نفس وضعي وراح دكتور نفسي وصرف له هالحبوب اخذتهم لاني بعقلي مقتنعه اني محتاجه دكتور نفسي قلت لجدتي وعمي رفض ارتحت ع الحبوب وانت جيت ولا كأنك سويت شي ولا حسيت اني قاعده انطفي سنه كاامله الا ذاك اليوم الي طحت ووديتوني المستشفى وطلعت التحاليل بعدها رميتني سنتيين والحين تكمل وترميني لتركي اناتعببببت تعببت ابي ارتاااح يااتريحوني ولاا ترا بنتحرر وافتك منكم منصور ونغزات قلبه تزيد مع كلامها والحزن غيم وجهه وبصعوبه نطق : حقك علي حقك علي أمنية تمسح دموعهاا ووجها احمر .. انتبهت ليد ابوها ع قلبه وشوي يفتح زرار ثوبه ووجهه مايبشر بخير : يبه شفيك منصور يفتح زراره ومو قادر يتكلم .. أمنية فزت واقفه بخوف ونطت من السرير تجري .. فتحت الباب بقوه وطلعت تصاارخ : الحقووو ابوووي الحقوووه تكفوووون لايمووت كانو جالسين بالصاله ومستغربين الهدوء ينتظرون يسمعون صراخها يأكد انه ضربها الا عمر جالس بهدوء متوقع ان عمه صحى من غفلته وعرف انه يسمع كلام امه ع حساب ضياع بنته .. ولما سمعو صراخ أمنية .. كلهم فزو وجرري ع الغرفه سعود ناظرها بحقد وهو يجري للغرفه : وش سويتي فيه الله ياخذك أمنية واقفه عند باب الغرفه وتبكي وتصارخ : لا يمووت تكفووون لايمووت بمووت انااا عمر دخل ورا ابوه بسرعه .. وكان منصور طايح ع السرير شالوه بسرعه مع بعض لبرا الغرفه منيره مسكت شعر أمنية الي راحت تجري وراهم وهي تبكي : والله لو صار في ولدي شي لااشرب من دمك طوقه مكتفه يديها لصدرهاا : جبتي الشر والمرض لابوك كان طيب ومايشكي قلبه الا من بعد فعولك حسبي الله فيك من بنت أمنية جلست ع الارض بعد مافكتها جدتها وتناظر باب البيت الي طلعو منه شايلين ابوهاا .. ودموعها تنزل بصمت وبنفسها تردد "لو صارفيه شي انا بموت نفسي وراه" * بعد يومين .. واقف بالصاله قبال امه واخوه : الي يغلط ع بنتي يغلط عللي بنتي مارح اتخلا عنهاا وبعالجها ولا رح ارميها لاحد تركي مايبيها الله معه يطلقها وتعيش معززه مكرمه ببيت ابوهاا بنتي ماغلطت ولارح اسمع لاحد يهينها او يضايقها بكلمه منيره بقوه : اجل خذ بنتك وعيش انت وياها بروحك منصور قاطعها بقوه ولااول مره يذكرهاا : هذا بيتي اذا ناسيه يمه بيتي اناا تعبي وشقااي منيره تناظره متفاجأه .. منصور يحاول يتمالك اعصابه ومايغلط ع امه : بيتي مارح اطلع منه وبنتي بتعيش معي وانتهى سعود يناظر اخوه يعطيهم ظهره ويمشي لغرفه بنته .. بنته المدلله من صغرها دلعها وخلاها لاتحترم لاصغير ولا كبير .. دلعها لين ضاعت وصارت مدمنه مخدرات كيف يخلي بنته نجلا المؤدبه الخلوقه تعيش بنفس هالبيت مع بنت عمها الضايعه .. يخاف ع بنته لف ع امه وبهدوء : انا بطلع من هالبيت منيره بسخريه اشرت ع الباب : اطلع وانا امك سعود : حتى انتِ تعايريني يمه منيره : والله محد قالك ضيع عمرك بالهياته ولاتأسس لك شغل وتصرف ع نفسك اخوك عطاك نص هالبيت بلااش كررم منه وهالحين ولدك يصرف عليك عاجبك حالك سعود : ماالله كتب لي وظيفه انا رجل حر منيره تنهدت بدون ماتقول شي يأست منه .. سعود : انا مااقدر اخلي بنتي تعيش مع هالخايبه بنت منصور لازم اطلع منيره : اجلس بس بنتك ماهي لحالها انا وامها موجودات مارح نخليها تختلط ببنت منصور حسبي الله عليهاا * في الجامعه .. وقت البريك .. جالسه ع لابتوبها وتشرب قهوتها والسماعه بااذنها موسيقى هاديه وتقرأ نهاية روايتها .. صح حزينه النهايه بس مقتنعه فيها طلعت من ملف الروايه وقفلت اللاب .. ابتسمت لما شافت ساره جايه لها ساره قبل توصل : الحمدلله قفلتي هالروايه هفف نجلا ضحكت وهي تشوفها تجلس ع الكرسي الي قبالها : خلاص عاد ارتاحي خلصتها ساره بفرحه : والله متى نجلا : اليوم الفجر واصلت عليها ساره : حلوو ومتى النشر ان شاءالله نجلا تنهدت : بدت المرحله الاصعب البحث عن دار نشر تقبل تنشر لي ساره : لو انك مشهوره كان نشرو لك بسرعه ولافكرو بالمحتوى قومي بس خل نشتري فطور ميته جووع * في مجلس البيت .. منصور وقع ع الاوراق وهو يحس براحه : باقي لي كم شغله اخلصها وارتاح المحامي ذيب ياخذ الاوراق ويدخلهم بشنطته : الحمدلله في الحياه اهم شي الواحد ينتبه مايظلم احد منصور : اي والله يبعدنا عن الظلم المحامي ذيب وقف : زين عاد توصي ع شي منصور وقف وصافحه وودعه .. وبعدها اتصل ع تركي الي قاله انه اليوم يروح المحكمه يطلق تركي : هلا خالي منصور : سلام هاه وش سويت تركي يجامل : بالمحكمه الحين اخلص والله اني شاري نسبك حتى والبنت مريضه بس عاد رغبتك منصور : كفو ياتركي ماتقصر بنتي فعلاً مريضه ومحتاجه علاج الزواج هذا يتعبها اكثر تركي : الله يشفيها منصور : والمبلغ احوله لك واعذرنا ع القصور تركي يعنني : لا لا ياخالي ماابي شي حنا اهل وشو له تعوضني منصور : لاتناقشني هالموضوع خالص مبلغ بسيط انت تستاهل ماقصرت معي تركي : الي تشوفه زين بقفل الحين واكلمك اذا خلصت * بالليل .. طلعت من غرفتها بشويش بعد ماتأكدت امها وابوها ناموو مشت لغرفه أمنية الي جنب غرفتها .. فتحت الباب بدون صوت .. ناظرت الغرفه الفاضيه بحسره تعبت من منظر هالغرفه الفاضيه .. تجمعت الدموع بعيونها خلاص ياامون ارجعي انا احتاجك وبتواصل معك غصب عن اهلي انتِ اختي الي ماجابتها امي كيف يحرموني منك اووف رجعت لغرفتها تداري دموعها .. جلست ع سريرها وفتحت جوالها والضيقه الفف دخلت ع تويتر وصارت تكتب وتفضفض * بغرفه منصور .. حاطه راسها بحضن ابوها : اول مره بنام مرتاحه من ثلاث سنين شكراً ياابوي احس صدري منشرح منصور يمسح ع شعرها : دووم يارب واوعدك من اليوم ورايح لك الي تبينه ولايهمني احد غيرك أمنية مبتسمه براحه : الحمدلله منصور : بكره موعدك فالعياده دكتوره شاطره الكل يمدحهاا أمنية تقاطعه : والله ماله داعي قلت لك انا مافيني شي لاحاله نفسيه ولاهم يحزنون انا بس الي كنت احسه خوف من تركي وخلاص طلقني وارتحت منصور وهو متأكد انها مريضه هم كذا المريضين دوم ينكرون مرضهم ويعتبرون نفسهم طبيعيين : ادري ياقلبي انك بخير بس انا ابي اتطمن عليك اكثر أمنية تنهدت تسايره : طيب منصور : وبعد العلاج ان شاءالله ابي اسجلك في معهد تدرسين الي تبين أمنية سكتت تفكر وبضيق : كان من اول اخذتني وسويت كذا ليش بعتني لتركي منصور يعدل جلسته : محشومه انتِ بنتي مهماً كان شلون ابيعك صح اني ادري انه مايناسبك بس هو لما عرف اني بطلعك جاني خاطب ووافقت " سكت شوي وهو يناظرها وصد" وقتها كنت كاره وماصدقت ومنها تتزوجين وتبعدين عن هالبيت الزواج ستر للبنت أمنية حاولت تكتم عبرتها : بس هو تزوجني عشان فلوسي هو انت كافأته عشانه تزوجني وستر علي ؟ منصور بااستغراب : من يقول انا مادفعت له شي الا بعد ماطلق رديت له المهر وزود عليه من عندي أمنية : هو قايل لحريمه انه مايتشرف فيني بس متزوجني عشان فلوسي منصور سكت يفكر وهو مو مستوعب الفكره الي وصل لها .. من اول ماخطبها وهو مستغرب .. بس الحين فهم وبان الحزن بوجهه "لهالدرجه هو تعبان والكل متوقع ان يومه قريب لهالدرجه الحقاره يخطط ويضمن يجيه نصيب من الورث عن طريق بنتي !! يجيه يعتذر عن كلام امه وانه عادي راضي ببنته حتى وهي مريضه .. شاري نسبه هه شاري فلوسه ولا هو راميها بالملحق حتى ماقرب منها كزوجه .. رفع عيونه للسقف وهو يحمدالله انه اصر عليه يطلقها وان بنته محتاجته وبيعالجها " أمنية : يبه شفييك منصور يلمها ويحاول يكون عادي : ابد ياروحي مرتاح اني واخيراً صحيت ع نفسي وتخلصت من قيود امي ورجعتك لي غصبً عن الي مايرضى أمنية ابتسمت براحه : الحمدلله احبكك ياابووي احبكك منصور ابتسم : وانا احبك يارووح ابوك * العصر .. جالسه مع امها وطوقه وهي مو مركزه بسوالفهم .. ماصدقت يرجعون من السفر تبي تشوف أمنية .. بنتها وبنت صديقتها الغاليه بدريه .. طوقه تكلم منيره : خلف الله عليها بنتك مو معك شيهانه انتبهت : وشوو منيره : اقول قومي شوفي عيالك لايكون طلعو الشارع شيهانه وقفت بسرعه وهي تتحلطم : بيجننوني هالتووم قلت كبرو برتاح الا زاد التعب تعب اووف طوقه : كان ماتزوجتي وريحتي راسك منيره بقوه : اسكتي بسس لاتزيدينها هم يكفي محمد الكلب حارمها من ولدها البكر * في السياره .. أمنية : يعني لازم استمر ع هالحبوب سته شهور منصور بتأكيد : ايييه أمنية تتأفف : هفف والله انها دكتوره ماعندها سالفه بس امرنا لله ابلعهم ولا اقابل خشتها وتحقق معي منصور يضحك : تمااام بس روقي اعصابك أمنية ابتسمت بحب لابوهاا : الله لايرحمني منك انا مرره مبسوطه انك معي منصور وقف السياره عند البيت : الحمدلله دووم أمنية نزلت من السياره واخذت شنطتها الصغيره .. قفلت الباب ولفت بسرعه تهرول .. وصلت لابوها ولفت يدها بذراعه وسندت راسها ع كتفه وهي تمشي معه لداخل حوش البيت .. بس وقفت لما شافت الي طلعت من باب البيت الداخلي .. ابتسمت وهمست بشوق : عمتي شيهانه شيهانه نست عيالها وكل شي لما شافتها نزلت الدجات بسرعه وهي تفتح يديها لأمنية الي تركت ابوها وراحت لعمتها تجرري .. رمت نفسها بحضنهاا شيهانه تشد من حضنها وتشمها بشوق : اموونتي يارووحي اشتقت اشتتتقت أمنية رفعت راسها تناظر وجه عمتها بشووق وهي مبسوطه : وانا اكثثثرر شيهانه لمحت عيالها زايد ورائد جايين من برا صررخت وهي تناظرهم بقووه : طالعيييين بررا ليييه أمنية غطت اذونها وهي تضحك حركات عمتها ماتتغير منصور يناظر البزارين خايفين .. مسك ضحكته : سامحيهم عشاني هالمره شيهانه تناظرهم بصرامه : بسررعه جوا وبدون اي كلمممه وبعد مادخلو .. ابتسمت ومسحت ع راس أمنية : تعالي ياقلبي وعلميني اخبارك * رجع للبيت متأخر بعد ماتابع مباراه فالاستراحه مع العيال وتعشى معهم .. دخل البيت وهو ناسي وجود أمنية .. ماتذكر الا لما وصل بنص الصاله ضرب جبينه : يووه وناظر حوله الحمدلله الكل نايم ولا حسو فيه راح بسرعه لغرفته الي لها بابين باب من داخل البيت وباب من الخارج .. خلاص دام أمنية رجعت لازم ينسى الباب الداخلي ويرجع يستخدم الخارجي نفس زمان .. قفل الباب وراه .. فصخ ثوبه ورماه ع الارض وانسدح ع السرير بتعب .. نعساان طول النهار مانام وهالحين خلاص طافي غمض عيونه مافيه يتحرك يبدل اول ينسدح ع السرير زين .. جات بباله صوره أمنية وهي تقاومه وتبيه ينزلها .. توخر شعرها الفوضوي عن وجهها .. وجهها الي رغم دموعها الي ماليته ويدين ابوه معلمه عليه مااخفو فتنه ملامحهاا .. فالمستشفى كانت اول مره يشوفها بعد ماكبرت .. كانت تعبانه ووجهها ذابل .. ماقدر ينساه .. وثاني مره كانت خلاص حفرت ملامحها بذاكرته .. غصب عنه تمنى يشوفها طبيعيه تضحك سعيده بدون ماتكون يدين معلمه ع وجهها .. ياترى كيف بتكون ؟!.. تنهد وانقلب ع ظهره يناظر السقف .. هو ماشي صح عقله مقتنع تمام الاقتناع بالي ماشي عليه بعد بكره بيروح بخطب ساره .. امه تمدحها جمال ودين واخلاق وناجحه بحياتها .. ساره مثال الزوجه الصالحه وام يتشرف فيها لعياله .. نفسه بأمنية يدري ومعترف بس هوى النفس بيضيعه .. عقله رافض أمنية ومستوعب الوضع صح هي ضحيه بس خلاص سمعتها تشوهت رجع دفن راسه بالمخده وهو يحاول يطلعها من راسه .. انساها خلاص .. بتتزوج ساره وبتحبها * * تأملت نفسها بالمرايه .. حركت شعرها الي سايح بنعومه ع كتوفها توها مخلصه استشوار اشتاقت تترك شعرها كذا حرر من بعد الحبسه عند تركي هههههههه ياحليله هو وحريمه لازم تقابل سهام حرام وتعلمها انها كانت تستهبل عليها جلستها مع عمتها امس ريحتها وجددت نفسيتها .. تحركت وهي مرروقه ومبسوطه اخيراً رجعت لحياتها الطبيعيه .. دارت حول نفسها وفستانها البسيط القصير يرتفع مع دورانها وهي تضحك : ههههههههههههههههه ااااه يامحلا الحياااه طوقه وقفت ورا باب الغرفه تسمع الضحك .. تجمدت ملامحها وتحركت بسرعه مبعده عن الغرفه بخوف : اللهم سكنهم مساكنهم أمنية اخذت عطرها ورشت عليها وهي مستمتعه باادق التفاصيل .. مشت للباب اييه يامنيره جااك الموت وربي لااطلع بهدلتك لامي من عيونك ياعجوز النار طلعت من غرفتها وهي مبتسمه وتمشي تتأمل تفاصيل البيت .. هذا البيت الي كان امل امي كانت متأمله تطلع من بيت منيره وتعيش ببيت زوجها وتستقل مادرت ان الشر معاها مو بس هي لا جابت ولدها وخلت ابوها يكتب نصه له .. وقفت اعلا الدرج تناظر جلسه جدتها المعتاده .. جلسه ارضيه بزاويه الصاله مكان استراتيجي تشوف الرايح والجاي .. كانت جدتها جالسه وعندها اختها ام منيف "ام طوقه" منيره رفعت عيونها وع طول كشرت لما شافت أمنية ولبسها الي ينرفزها : هو انتِ ماتعرفين تسترين امشي غيري لبسك الله لايبارك فيك أمنية نزلت الدرج ببطئ مستفز وهي مبتسمه .. ويدها تلعب بشعرهاا : صباح الخيييرر ام منيف تناظر اختها : طنشيها مرفوع عنها القلم لاتتعبين صحتك ع الفاضي منيره تمسك مسباحها : استغفرالله بس استغفرالله أمنية توسعت ابتسامتها .. وتتمخطر بمشيتها لين وصلت عند فرشتهم .. : مين مسوي القهوه منيره : اذلفي عن وجهي سود الله وجهك أمنية ناظرتها باستفزاز : دعواتك الي مثل وجهك بترجع عليك حبي "وتحركت بشويش ورفست الصينيه وتناثرت الفناجيل والكاسات .. ومشت عنهم لباب البيت منيره اخذت مركادها بتوقف تلحقها : وجعع ان شاءالله هذي الي بكسر العصا ع ظهرها ام منيف توخر عن الفنجال الي انكسر : علمي عليها ابوها ماانتِ لاحقتها حسبي الله في العدو منيره معصبه تنادي الشغاله : سووووومرررا سوومرا وصمممخ * أمنية وقفت عند مدخل البيت وغمضت عيونها مبتسمه ومطنشه صراخ جدتها .. تبي تستمتع بنسمه الصباح الهوا فيه بروده .. الشتا ع الابواب فتحت عيونها وتأملت حديقه البيت .. نزلت درجات المدخل .. تبي تتمشى وتتفقد البيت وش تغير بعدهاا وهي تمشي ومروقه .. مرت من عند باب غرفه عمر الخارجي .. وبدون تردد مدت يدها وفتحت الباب لانها شافته وهو طالع للدوام دخلت الغرفه وع طول ناظرت الباب الداخلي مقفل .. كويس ناظرت الغرفه حايسه ابتسمت بحب : طول عمره حوسه رفعت الثوب المرمي ع الارض وقربته من وجهها .. تشم ريحته يااربي ياجماله نفس عطره مايغيره جلست ع السرير وانسدحت بشويش وبيدها ثوبه لامته لصدرها .. تنهدت اشتقت وربي اشتقت احس ماابي من هالدنيا الا هو عمري انا .. نظراته لها بالمستشفى وخوفه عليهاا صدمها .. من بعد ماكبرو وافترقو وهي تحاول تلفت نظره وتتميلح وهو كان ابداً مو مبين لها اي شعور .. كان صدمتها لما جاها بالمستشفى جيته وخوفه اعطاها امل انه يحس بمشاعر تجاهها .. كان واقف بصفها مااتوقع يلومها هالحين او تغيرت مشاعره لفت ع ظهرها وناظرت السقف : ااه بمووت لو اخذ غيري انا اصلاً من بيقبل فيني اصلا انا الي ماارضى اتزوج غير عمر سمعت صوت عند الباب الداخلي .. ماامداها تتحرك الا انفتح الباب جلست مفجوعه تناظر الشغاله تحس قلبها وقف لو كانت عمتها او جدتها .. اخذت نفس وهمست : الحمدلله سومرا تناظرها بااستغراب .. أمنية رفعت عيونها لها بقوه : ادخلي وقفلي الباب سومرا سوت الي قالته وهي خايفه منها بعد ماشافتها كيف تضرب سعود وتسمعهم لما يقولون انها مجنونه .. أمنية نزلت عن السرير وبيدها الثوب رجعت تشمه وهو متحسره ماتبي ترميه وتروح بخاطرها تاخذه معها بس رح يفقده .. رمته ع السريروناظرت سومرا : لو تقولين لاحد انك شفتيني هنا بذبحك سومرا تهز راسها بسرعه تأكد : مافي شووف أمنية ابتسمت : شااطره وطلعت من الباب الخارجي وهي تحس بألم في قلبها .. الحب من طرف واحد اهلكني من سنين .. ليش مااستغل جنوني مع عمر .. اووف لااستحي وش بسوي يعني خاطري اضمه والله هيي اموون اشوف فعلاً بدا عقلك يضيع خافي الله قبل كل شي * جالسه بصاله بيتها وبيدها جوالها تفكر بكلام صديقتها .. " ولدك ماتجيب راسه الا بنت " ومن غيرها نجلا بنت اخوها من زمان تتمناها لولدها .. متردده بالخطوه الي تسويها رجعت تتأمل صورتها مع نجلا فالعيد وبسرعه عشان ماتبي تتردد زياده ويأنبها ضميرها .. ارسلتها ع عبدالرحيم وكأنها محددته بالغلط يله يارب سامحني ان شاءالله ذي نظره شرعيه وقفت وجوالها معها راحت للمطبخ بتسوي لها قهوه .. وكل شوي تطل ع الجوال تشوفه فتحها ولا لاء شغلت الغلايه .. وفتحت الجوال اوووه فتحها ماتبي تدخل ع المحادثه تنتظر هو يرد اول او شي .. بس طول مارد والظاهر انه مو ناوي يرد خلصت قهوتها ورجعت للصاله اي كذا الحين اخذت وقت وكأنها الحين تنتبه .. دخلت ع المحادثه وكتبت "جاك شي !!؟ " عبدالرحيم " ايه " شيهانه "وشفتها " عبدالرحيم ضحك وكتب "والله يمه ماني اعمى ركزي وانتِ تحددين " شيهانه "عياال يممه منكم تمقلت فيها شكلك ياقليل الحياا " عبدالرحيم يحك شاربه وهو فعلاً تأمل كل تفاصيلها " لا بس نظره وعرفت غلطانه " شيهانه "زين اشوا انك موب غريب " عبدالرحيم يشوف امه تطلع من المحادثه كان متوقعها تقوله من هذي الي معهاا بس مو كذا خلاص تنهي السالفه تقول مو غريب يعني مين!؟ كتب بتردد " ماقلتي مين هي ؟ " شيهانه "وليه اقوول عيب يكفي شفتها " عبدالرحيم ساكت ماكتب شي شيهانه "جازت لك ؟ " عبدالرحيم " لا عادي مو مهم اعرف " شيهانه شافته طلع كتبت " هذي نجلا بنت خالك " عبدالرحيم ع طول دخل يقرأ .. انصدم ان الي تو نجلا تغيرت حييل شيهانه " مناي والله تكون من نصيبك " عبدالرحيم بفطنه "متعمده اجل الصوره " شيهانه سفهت كلامه " .... هذا حسابها بتويتر تراها نفس طقتك تحب الكتابه " عبدالرحيم كتب اليوزر عنده بالورق فضول لااكثر ورد ع امه "شبي فيها الله يستر عليها " * يوم الخميس .. جالسه بالصاله تشرب شاهي وتناظر بصمت .. الي يشوفها يقول ماهمها الوضع وطفشانه .. مو صدرها قاعد يحترق من الغبن والغيره بس مابيدها شي .. تشوفهم يتجهزون رايحين يخطبون لعمر ساره .. وهي مكتفه يديها يروح لساره قدام عيونها وهي ساكته ماتتصرف نجلا توقف قبال أمنية تستغل ان امها وجدتها مشغولات : وش رايك أمون حلو شكلي أمنية ببرود : لا اووفر "وتشرب شاهيها" نجلا كشرت : ليه بالعكس احسه ناعم ولايق لخطبه أمنية تهز كتفها : طلبتي رايي ورايي اني اشوفه اووفر نجلا تلوي فمها بقهر : هه وانا مالقيت غيرك اسألك مريضه أمنية بهتت ملامحها وهي تناظر نجلا تلف عنها وتروح .. اخر وحده توقعت تعايرها نجلا !! اكيد مو اخوها بيتزوج اعز صحباتها انا وشوو حي الله بنت عم عشت معها ببيت واحد ومشاكل وفوق هذا مانعينها عني .. وقفت وبيدها كوب الشاهي الي مااستطعمته بس عشان تعطي انطباع انها مو مهتمه .. وقفت ع الشباك وخرت الستاره شوي شافت عمها وابوها جالسين بالحديقه .. سعود لاف ع جهة غرفه عمر : اخلص عليها لانتأخر مو باين لها شي .. نزلت الستاره بسرعه وهي فهمت ان عمر بغرفته .. حطت كوبها ع الطاوله ومشت بسرعه وهي تناظر وتتفقد المكان وقلبها يحترق مرت ع صندوق الجلالات اخذت لها واحد .. وتحركت بسرعه تجري وهي تلفه عليهاا وصلت للسيب الي يودي لغرفته فاضي وهادي ماحد يجي الجهه هذي اصلاً .. عدلت الجلال وتلثمت وقفت عند بابه ودقت بيد ترجف وهي تسمع كركبه فالغرفه غمضت عيونها وقلبها يدق يدق ليه جايه له مجنونه انتِ .. الا انا اذا مجنونه فاانا مجنونه عمرر مااقدر اجلس كذا اتفرج عليه وهو يروح لازم اسوي شي ادافع عن حبي عمر تأفف لما سمع الدقه الثانيه هفف كلن يستعجله من جهه راح للباب وهو متنرفز فتحه بقوه : نعمم جمد بمكانه متفاجأ .. يناظر عيونها من ورا اللثام تلمع بالدموع همس بااستغراب : أمنية !!؟ أمنية تناظره كاشخ بالثوب وبيده شماغه همست بصوت باكي : لاتزوج انا بموت عمر ارتبك من اعترافها بكل بساطه ويلف عيونه بالسيب لايجي احد : أمنية وقفتك غلط هنا روحي ا أمنية تقاطعه وهي تدف الباب وتدخل الغرفه وبوسط صدمته تقفل الباب وراها بالمفتاح .. × نهايه الجزء الثاني.. |
روايه جميله اتمنى تستمرين |
اقتباس:
اهليين منوره وبأذن الله روايتي رح اكملها للنهايه حتى لو ماجاني ولا رد بديت فالشي لازم انهيه .. بس عاد اجبرو خاطري اذا عجبتكم اتركو لي تعليق عشان اتحمس وكذا 🥺💔 موعدنا الثلاثاء ان شاءالله🤍. |
صباح الخيرات الف مبروك روايتك الجديده الحمد لله منصور صحى على نفسه وخلص ابنته من مصير سيء ياترى ماذا تنوي ان تفعل امنيه دخولها لغرفة عمر امر ليس سهل ابوه وامه وجدته كلهم ضدها لم تعجبني حركة الام واجبارها لمنصور بتسجيل نص البيت لاخيه بكل الاحوال بعد عمر طويل هو سيرث النصف مع ابنة منصور يعني هو من ورثة منصور لماذا شرط التسجيل الان اصبح النصف الثاني اذا لم يسجله باسم ابنته سيكون نصفه للعم هذه حقوق ويجب الانتباه لها ... الجده ظالمه بتصرفاتها وامنيه رغم ان اخلاقها ليست تمام لكنتها صغيره ومدلله وتحتاج احتواء وليس نبذ وكره بانتظار رد فعل عمر على دخول امنيه لغرفته |
(( الجزء الثـــالــث )) × عــادت ايامك في خجل تتسلل في الليل وتبكي خلف الجدران الطفل العائد أعرفه يندفع .. ويمسك في صدري ويشعل في قلبي النيران هدأت ايامك من زمن ونسيتك يوماً لا أدري طاوعني قلبي .. على النسيــان . × أمنية تقاطع عمر وهي تدف الباب وتدخل الغرفه وبوسط صدمته تقفل الباب وراها بالمفتاح وهي تبكي : ليش تجيني بالمستشفى وتأملني فيك ثم تروح تزوج غيري عمر بتوتر وهو عارف انها تتصرف بجنون لو جا ابوه ولا عمه !؟ : انا ماأملتك بشي اطلعي ياأمنية الله يستر عليك أمنية سحبت المفتاح من الباب وراحت بسرعه للباب الثاني وقفلته بالمفتاح عمر تقدم بسرعه ويبي يسحب المفتاح قبل تسحبه هي بس ماقدر لانها ثبتت جسمها ع الباب ولاقدر يقرب منها : أمنية تعوذي من ابليس وش تسوين أمنية تدخل المفاتيح بجيب بنطلون بجامتها .. وتنزل لثمتها ع وجهها المحمر ودموعها بدت تنزل : لانكذب ع بعض انت من زمان تدري اني احبك وتجيني بالمستشفى خايف علي وتدافع عني ماكان همك اني كاشفه عندك كذا ليييه لاني انا رح اكون زوجتك فعادي تشوفني صح عمر واقف بنص الغرفه خايف من اهله ومرتبك هذي مجنونه مو صاحيه للموقف الي هم فيه : اعطيني المفاتيح ونتفاهم وقت ثاني تمام ابوي وابوك برا مصيبه لو شافونا كذا أمنية ابتسمت من بين دموعها : وش بيسوون عمر من شاف ابتسامتها غسل يده انها تخاف وتستوعب .. قرب منها مسافه بسيطه بحذر : بيضربونك وانا لاني اخاف عليك ماابي يدرون أمنية بهدوء وهي فاهمه حركاته حتى هو صدق انها مجنونه : ليش ماتتزوجني انا مو حلوه مو ماليه عيونك هااه عمر خطف نظره سريعه عليها .. وارتبك لما سمع ابوه ينادي .. وهمس وهو يقرب منها بتوتر : حلوه وتهبلين عطيني المفتاح الحين واتزوجك بكره أمنية وقلبها يدق بقوه متوتره وضحكت تخفي ارتباكها : ههههه وعد عمر ابتسم يسلك وكانه معه طفله : وعديين يله هااتي أمنية تطلع المفتاح من جيبتها وتضمه وسط يدها : امم لاا مااثق عمر تقدم بسرعه متنرفز وهو يسمع ابوه ينادي ثانيه .. أمنية لفت تجري بتنحاش ماتدري لوين بس صدق خافت عمر صار يجري وراها بياخذ المفتاح بالغصب لمتى ينتظر تفهم المجنونه بتفضحه .. أمنية نطت فوق السرير وهي ترجف وتناظره واقف عند الطرف وركبته ع السرير .. اخذت نفس بخوف وكأنها توها تستوعب تهورها المجنون : اهدى اهدى انا اعطيك لاتقرررب والله اصرخ عمر شاد ع اسنانه وماد يده لها : بسسررعه أمنية انقهرت ان كل هالعصبيه عشان مايتأخر عن خطبه ساره .. نطت من الجهه الثانيه ناويه تنحاش فالحمام بس بيده مسك طرف جلالها وبنفس اللحظه تعثرت بالزوليه وطاحت ع وجهها عمر جلس ع ركبه ويحاول يمسك يدها وهي شااده قبضتها بقووه وتحاول تقوم رغم الم راسها من طيحه الارض .. بس تفاجأه بعمر يمسك يدها الثنتين مانعها تقوم .. احتقرت نفسهاا هي الي سمحت له يقرب منها كذا كله عشان ساره الله ياخذها أمنية بقهر وكرره تحاول تسحب يديها منه : والله اصررخ وخر ياقليل الادب عمر يناظر وجهها المحمر وشعرها الي بدا يظهر من الجلال : انا قليل الادب الي داخل غرفه رجال مو محرم لي ومقفله عليه الباب ماابيه يطلع أمنية لما حست بيدينه قدرت تفكفك اصابعها عن المفتاح .. رفعت راسها وعضت يده بقووه خلته ينتفض ويقوم عنها أمنية فزت بسرعه رغم الم راسها وهي كارهه نفسها شلون ارخصت نفسها بهالشكل .. رمت المفتاح عليه ..مفتاح الباب الخارجي وضرب بصدره وطاح عند رجوله : تفوو ع الحب الي بيذلني لك انقلع تزوج انا مجنونه انا مدمنه انا قليله ادب اخلاقي صفرر رح تزوج ساره حبيبه الكل ولا عاد اشوفك موطوط ببيت ابووي وياليت تقش اهلك معك ولفت فتحت الباب بتطلع .. طوقه الي كانت جايه تعجله .. ضربت يدها ع صدرها لما شافت أمنية فتحت الباب وعمر واقف بنص الغرفه وشكله مبهدل : ياااويلي انتِ وش تسوين هناا أمنية : انقلعي عن وجهي عمر بصوت عالي : اصلاً انا مااتشرف فيك زوجه وام لعيالي وقحه وقليله حياا طوقه تناظرهم مفجوعه خييررر !!؟ .. أمنية تمر من عندها وجلالها ع كتفها بكل برود هذي الي ماعاد فيها لاحيا ولا دين .. لفت ع عمر : هذي وش تسوي عندك شصار بتفضحناا انت رايحين نخطب لك عمر يحاول يهدي اعصابه ويعدل ثوبه : ماسويت لها شي هي جتني وطردتها طوقه تاخذ نفس : المجنونه بتبلاك جعلها ماتربح الحمدلله محد شافكم انت اسكت لاتقول لاحد ابوك لو درا مصيبه عمر يلبس شماغه واعصابه ثايره .. طوقه : يله كمل بسرعه واطلع لابوك انا بروح البس عباتي * مرت هالاسبوعين سريعه .. واليوم ملكه عمر وساره .. في استراحه بسيطه ومعازيم قليل عائليه يعني أمنية جالسه جنب شيهانه وهي كاشخه .. هذي اول مناسبه جماعتهم يشوفونها بعد ماانتشر عند الكل انها مجنونه .. تحس بالانظار عليهاا وكأنهم مستغربين هدوئها وينتظرون اي حركه تثبت انها مجنونه حضرت اليوم اولاً تثبت لنفسها صدق قرارها نزعت حب عمر من قلبها ورمته بااقرب زباله بعد ذيك الليله بكت لين الصبح بكت لين وجعها قلبهاا اصعب شعور لما تكره نفسك بسبب تصرف انت اقدمت عليه بكامل عقلك .. كلماته لها اخر شي جلست ترن براسها "انا مااتشرف فيك زوجه وام لعيالي وقحه وقليله حياا" وهو صاادق لازم تستوعب انه بصفها ويعرف انها مظلومه غير عن انه يتشرف فيها ولا مايشرف وهي زادت الطين بله بروحتها له .. خلاص عمر مو لها .. لازم تحترم نفسها وماتخسر نفسها اكثرر .. بتحضر ملكته وزواجه وكأنه شخص عااادي وفعلاً تحس بهالشعور المريح .. ماهمها نظرات عمتها طوقه المحتقره من بعد ماشافتها طالعه من غرفه عمر محتقره وبنفس الوقت خايفه ان أمنيه تسوي شي تخرب ملكة ولدهاا أمنية ابتسمت لطوقه وكأنها تقول اي خليك كذا خايفه مارح اطمنك اني عفت ولدك هههههه شيهانه تاكل بقلاوه : ذوقيها امون مرره مزبوطه أمنية توسعت ابتسامتها بعد ماشافت طوقه تصد عنها بقلق وتبعد .. لفت ع شيهانه واخذت بقلاوه واكلتها : اممم صاادقه شيهانه تصب لامنية فنجال قهوه : خذي كملي اللذاذه ام تركي وقفت عند راسهم : جالسات كأنكم ضيوف ليه ماتوقفون معناا شيهانه تأشر ع بطنها حامل بالشهر 6 : بدبتي اطلع خلني جالسه ابرك لي مافي احد غريب ام تركي تناظر أمنية : وانتِ أمنية رفعت عيونها لها : انا ضيفه ام تركي تلوي فمها : ملكه ولد عمك وش ضيفه !! أمنية تهز كتفها ببرود : ايه ولد عمي مو اخوي شيهانه : اجلسي بس يااختي تقهوي البنات ماشاءالله مكفيات ام تركي جلست تنهدت : اييه يقولون منصور يراجع فيك عند دكتوره نفسيه كيف عاد أمنية ابتسمت بصدق لعمتهاا الي جنونها عرفها بجوهر هالعمه طيبه وماترضى بالظلم والغلط .. تنصر المظلوم وقفت معها وهي كارهتها وقفت معها رغم قلة ادبها عليها قدام ضيوفها .. حمتها من ولدها ومن عمها سعود .. لمعت الدموع بعيونهاا : ايه ومنتظمه ع حبوب صرفتهم لي وانا احسن بكثيييير عن قبل انا بخير الحمدلله ام تركي اخذت الفنجال من شيهانه : الحمدلله أمنية رفعت عيونها تناظر السما .. اجمل شي انهم رتبو الطاولات كذا بحوش الاستراحه المكان مفتوح .. ونسمه بارده منعشه .. لفت تناظر البنات يرقصون وساره جالسه ع الكوشه وهي مو مركزه مع سوالف عماتهاا .. من اليوم تتصدد عن ساره تأملتها بفستانها الوردي المنفوش .. جميله ساره .. اكيد بتعجب عمر مؤدبه حتى فستانها محتشم انا ليش جالسه اكيد ساره تفكر اني للحين ابيه ومقهوره .. لازم اقوم ارقص اييه استمتع بهالليله والجو العليل لي زماان مارقصت وقفت ولفت ع عماتها : انا بروح عند البنات شيهانه : خذي راحتك ياقلبي أمنية مشت وهي ترفع خشمها ولاتناظر الي تمر من عندهم .. بنت منصور ماتبي شفقه من احد .. بنت منصور اصحى منكم كلكم .. نجلا اول ماشافتها جايه ابتسمت بفررحه .. وراحت قالت لهم يشغلون اه ياليل لشيرين .. أمنية تحبها وكانت ترقص وتستهبل عليها كثيير نجلا مطنشه امها وجدتها واذا شافوهاا خل تتمرد شوي .. استقبلت أمنية وهي تصارخ بحماس وتغني تحمس أمنية ترقص نفس زماان :اااه ياليييل اااه ياليييل أمنية ضحكت وبدت تتمايل مع الاغنيه وتردد وهي تضحك لنجلا : اييه يعني غراامك ودعني نجلا ترقص معها .. والبنات كأنهم خايفين من أمنية المجنونه محد صار يرقص وفضو لهاا المكاان أمنية ترقص باانسجاام مع الكلماتت الي جاات بوقتها إبعد واهجر يا أناني ما أنا عارفة هترجع تاني إبعد واهجر يا أناني أنا عارفة هترجع تاني لكن عمري ماهرجعلك لو حتى بكيت طول عمرك إيه يعني غرامك ودعني… أمنية ترقص وهي تحس باانتعااش تحررت من مشاعرها ايييه تحررت ولايهمهاا شي الا نفسهاا وملعوون ابو الحب الي يذلها ويرخص نفسهاا اووعى لاتتغر يااقمرري انا قلبي يهووى بأمرري وبأمرري هيبعد عنك خليك كدا عاايش وحدك اييه يعني غراامك ودعني .. * جميله تقرص سهام الي واقفه جنبها : انا اشهد ان تركي ماشاف هالزين ولا ماخلاهاا سهام متنحه في أمنية : اي والله جميله تتكلم بسرعه : الحمدلله ان ابوها ماعالجها قبل تتزوجه الحمدلله تركي ماعنده صبر ع المهابيل الحمدلله انه صدق ان أمنية تموت قبل تورث ابوها وياكل فلوسها سهام لفت عليها : هشش لااحد يسمعك وخرري بس بروح عند اختي * بعد ماراحو المعازيم وبقى بس القريبين .. دخل عمر اللي رفض يدخل اول شي بوسط الحريم .. هالحين يشوف المتغطيات ينعدون عالاصابع وصل لساره وأمه تمشي معه .. ناظرها توقف بنعومه .. مد يده وسلم عليها مصافحه وجلس جنبها والكل يبارك لهم .. والبنات يصورونهم طوقه تصفق بشويش : يله نخليهم بروحهم الكيكه واكلناها قبله ام تركي : مالك داعي ياعمر كان دخلت وقطعتو الكيكه مع بعض حتى الشبكه امك لبستها اياهاا عمر خطف نظره لساره يجس النبض لاتكون متضايقه : دخلتي هالحين اروق طوقه ومبسوطه لرايه لان أمنية هالحين ماهي موجوده نفس قبل شوي : اي والله اروق يله ياجماعه امشوو ندخل جوا عمر بعد ماراحو وفضى المكان لف ع ساره جميله وناعمه : شلونك ساره ساره همست بدون ماترفع عيونها له : بخير الحمدلله وانت عمر : الحممدلله مبسوط ضايقتك اني مادخلت من اليوم ساره بسرعه : لا عادي الي يريحك اصلاً كان زحمه عمر مو عارف وش يقول .. سكت يفكر وش يفتح سالفه معهاا ساره تناظر الطاوله قدامها القهوه والعصير : تتقهوى عمر : لاا تسلمين كثرت قهوه مارح تخليني انام اليوم ساره رفعت نظرها له بنعومه : ايه اليوم سبت وانت عندك دوام بكره هههه انا عندي اوف عمر ابتسم : اووه بدينا نذاله ساره مبتسمه : امم مااقصد * ومن شباك الدور الثاني تناظر .. اليوم حالفه تختبر نفسها وتنجح .. هذا هي تشوفه جالس معها ع الكوشه وتبسم ونظرات هاا شفتي اموون هذا عمر زوج ساره تماام ساره الي يتشرف فيها زوجه وام لعياله خلاص كذا وضحت الصوره .. تماام حلو يله دقي ع ابوك وروحي بيتكم وتروشي ونامي احلااا نومه انتِ حررره * طلع من دوامه .. ركب سيارته وع طول شغل المكيف الجوو حاار وبقوه الظهر .. الصبح برد والظهرر حر خييير الشتا للحين مستحي يدخل بقوه فتح جواله وروتينه الي كل مايفضى لازم يدخل ع حساب نجلا يخاف يفوته شي لان لاحظها مرات تكتب وشوي تحذف ماتابعها بس يراقبها من بعيد فضول وده يعرف هالبنت الي عاش معها نص طفولته وش صار ميولها لما كبرت ومن مراقبته لحسابها .. عرف عنها اشياء كثيره " تتحلطم وتفضفض بالكتابه ، تحب اغاني شيرين هي وأمنية ، والروايات ، ماتعرف تطبخ ، والاهم تكتب روايه " شافها تتحلطم عشان اكثر من دار نشر رفضو روايتها .. صار عنده فضول يقرأها بس مو عارف كيف .. وده انها تيأس وتنشرها بالنت عشان يقرأها قفل جواله لما ماشافها كاتبه شي جديد نفس اخر كلام قبل 12 ساعه " سعيده سعييده اخوي تزوج صديقتي المفضله الحمدلله " * من بعد ماقالت له أمنية "لا عاد اشوفك موطوط ببيت ابوي" وهو مانام في غرفته .. البيت صاير زي الفندق يبدل ويطل ع اهله ويروح الاستراحه جلسه اكل نوم فيها .. حتى ابوه قعد يهاوش ليه مايجلس بالبيت ولازم يبطل هياته وهو يتعذر انه مايحس بالوقت وينام بدون ماينتبه .. بس لمتى !!؟ لازم يعجل يدور شقه ويأثثها لزواجه حتى لو مطول الزواج تكون الشقه جاهزه وينام فيها .. ولاتذله مدلعه ابوها .. صح ان نص البيت لابوه وتتحمله غصب عنها وعمه مو بزر مااحد اجبره راضي يقاسم البيت مع اخوه بس هو كاره يعيش معها بنفس البيت وبينه وبين نفسه خايف من جنونها تبلاه ببلوه اليوم جا ع العشا عشان يسكت ابوه وبعد ماينام يطلع للاستراحه .. وع سفره العشا .. منصور ياكل بهدوء وساكت يحس بكتمه ونبضات قلبه تزيد .. من الصبح هالشعور ملازمه سعود : ومتى ودك العرس يكون عمر : لما تخلص هالسنه ان شاءالله وتتخرج ساره بس عاد التاريخ ع حسب حجز القاعه سعود : دور بس في اول شهر 10 الحق الاجازه من اولها عمر يناظر عمه وهو من اول ماجلس حس انه مو معهم : ايه اشوف عمي انت وش رايك منصور ترك الملعقه وهمس بتعب : ودوني المستشفى * منيره جالسه ع سجادتها تسبح وتدعي .. مرض منصور هد حيلها .. تشوف ولدها الناجح المحبوب هده المرض .. تدري ان الفراق يوجع وهوماهده كثر فراق بدريه من بعد الحادث الي صار لهم وهو يشكي اوجاع عمره ماشكاها كان دايماً بصحه وعافيه بدريه بنت جيرانهم وصديقه شيهانه حبها اول مراهقته تعلق فيها وجننهم لين رضو يزوجوها له غطت وجهها بيدها وبكت خووف فقد ولدها الغالي أمنية تنزل الدرج وهي لابسه عباتها بتروح لأبوها بالمستشفى ولا عليها من عمها الي منعها امس تروح .. شافت جدتها تبكي ع سجادتها انقبض قلبها .. لا لا ماتبي تشوف انهيار جدتها لأول مره .. بسرعه مشت لباب البيت وفتحته وطلعت ركبت مع السواق الي طلبته .. وقالت له يروح للمستشفى .. * في غرفه منصور .. قرب الكرسي من سرير عمه مثل ماطلب : سم ياعمي قول اسمعك منصور بلل شفاته وبهدوء : الموت حق وانا عارف ان مابقى لي من العمر شي عمر : بعييد الشر عنك كم يوم وتط منصور يقاطعه بحركه من يده وعيونه تطلبه مايقاطعه .. عمر تنهد : طيب منصور : بنتي ياعمر اخوي مارح يرحمها بعد عيني وانت عارف هالشي "اخذ نفس" انا كتبت كل حلالي بأسمها عمر يناظره يشجعه يكمل .. منصور تنهد : أمنية ضعيفه مااقدر اتركها لحالها بياكلونها تركي طلب يتزوجها عشان حلالها انا داري ولامحد يقبل فيها عمر انقبض قلبه وفهم وش الي يمهد له عمه .. بس ماقدر يقاطعه . منصور يشد ع يد عمر : انت الوحيد الي اثق ان بنتي معه بامان توقف معها وتنصرها لاظلموها ولارح تزيغ عينك ع حلالها ابيك تملك عليها وتصير في ولايتك قبل اموت ماابي سعود يتولاها عمر همس : يمكن هي ماتبي منصور يهز راسه : بترضى ماعندي غيرك اثق فيه عمر يتجاهل كل شعور نفور يحسه اهم شي يريح عمه ومايخذل ثقته فيه : ابشر ياعمي بالي تبيه بس ارتاح منصور : لا كلم المحامي ذيب يدبر امور زواجكم مو لازم احد يعرف حتى أمنية نخلص هالموضوع بيننا الحين عمر ماامداه ينطق حرف .. الا الباب ينفتح لف بيشوف أمنية الي يميز عيونها وطولها وجسمها لو تكون بين ميه بنت بيعرفهاا أمنية تجاهلت الجالس قريب من ابوها وابتسمت تحت النقاب تداري ألمها : صباح الخير ياابووي منصور فتح يدينه بحب : تعالي ياكل اهلي عمر وقف : استاذن انا أمنية تقدمت بسرعه لابوها وحضنت ابوها وهو شبه جالس ع السرير .. منصور يلمها وهز راسه لعمر .. عمر طلع من الغرفه قفل الباب وراه .. وغمض عيونه يحس حمل ثقيل ع كتوفه بس فكره فقد عمه ترهقه .. وأمنية !! اذا فقد امها ضيعها اجل بعد ابوها وش بيصير فيها طلع جواله من جيبه بيتصل ع المحامي ذيب يعجل .. خايف ع أمنية لايمكن يسمح لها تضيع مره ثانيه بيملك عليها بدون مايفكر بساره وكيف وامه وجدته وابووه .. بيخلي كل شي بوقته هالحين لازم يلحق يضمن أمنية بولايته قبل ابوه وهو اخبر الناس باابوه . * جالسه بالصاله وجو البيت كئيب ابوها اعطاهم اياها ع بلاطه ان منصور شكله قريب .. طوقه طلعت من غرفه منيره تنهد : الله يصلح ابووك ع هالاسلوب مسكينه جدتك بالعافيه نامت نجلا : الله يسامحه الاعمار بيد الله يتكلم كأن الدكاتره عالمين الغيب طوقه جلست عندها بالصاله وتنهدت : صادقه والله أمنية للحين ماجت نجلا : لا احسن لها تجلس هالفتره عند عمتي شيهانه طوقه : الله يقوم منصور بالسلامه نجلا تنهدت : اميين يارب طوقه وقفت : انا بروح انام قبل يجي ابوك قسم باالله ماني طايقته نجلا فتحت جوالها وهي عادي تعودت ع حشهم ببعض .. دخلت تويتر تشوف الرساله الخاصه ( السلام عليكم ... هذا ايميلي ممكن ترسلين لي روايتك اقرأها زميلي صاحب دار نشر وماابي اكلمه عن الروايه وانا ماقرأتها ) رجعت تقرأ الاسم تستوعب "عبدالرحيم ال.." دخلت ع حسابه ولقت عمتها شيهانه تتابعه .. دخلت ع الصوره الشخصيه صورته بشكل رسمي هذا هو رحيم ماتغير حيل نفس الملامح الهاديه خيييرر وش عنده يرسلي .. اكيد عارفني .. ومن متى الميانه الاخ يقاله يبي يتوسط لي .. طنشت رسالته ولاتبي ترد عليه وجلست تقرأ في حسابه دخلت ع الرابط الموجود بالتغريده .. مقال .. قرأته بكل انسجام واعجاب بكتابته اول مره تقرأ له قد سمعت عمتها تقول انه يكتب بس مااهتمت تبحث وتشوف صارت تقرأ تغريداته ومنها اخذت انطباع عنه هادي يحب الكتب التاريخيه والحضاره وله فالسياسه .. محترم بردوده مع متابعينه .. يحب كاظم الساهر .. ومحمود درويش ضحكت لما قراءة مقال له منزل رابطه عن الام .. فعلاً الكتابه تغر تقرأ كلامه تحس انه بار بأمه مو شخص قاطعها عشان رضا ابوه .. مسكت نفسها لاترد انت اخر واحد يتكلم عن الام انت حارق قلب امك وداري للاسف . * في بيت شيهانه .. صار لها يومين في بيت عمتها من بعد ماشافت انهيار جدتها وهي كارهه ترجع البيت .. شافت ابوها بالمستشفى طيب مافيه شي ليش يبالغون .. ليش جدتها تبكي هالشكل .. كم يوم يرتاح وبيطلع عادي واحسن قرار انها تجلس عند عمتها شيهانه .. جالسه ع الارض تلعب شيش مع التوم وشيهانه جالسه ع الكنب تناظرهم وهي تشرب شاهي : قايله لك لاتعطينهم وجه رح يبهدلونك أمنية : تتعاونون علي والله لااطقطقكم كلكم عمتي انتِ المفروض رايد تسمينه ناقص زايد وناقص هههههههههههههه رايد بقهر يضربها بقس ع ركبتها : ناقص بعيينك أمنية ترد له الضربه : وجعع لاتضرب حديد هذي مو يد زايد بطفش : هشش خلوني اركز أمنية : هالحين ناقص انت ليش مو شاطر نفس زايد رايد يناظرها بحقد : لاتقولين ناقص أمنية تضحك وترمي الشيش : طيب طيب رايد قلي ليش ماتحب المدرسه وتصير شاطر ترا بعدين زايد يروح ثاني وانت تبقى باول زايد يتكتف : رايد شاطر بس انه ملقوف فالفصل رايد ياخذ الشيش ويرمي دوره : اييه شاطر * شيهانه مشت من عندهم وراحت لزوجها الي ارسل لها تجي .. حست ان عنده شي ضروري وماخاب ظنها من شافت وجهه مايبشر بالخير : وش صاير فارس يتقدم لها بهدوء : اخوك منصور عطاك عمره شيهانه غطت فمها بيدهاا واطرافها بردت وعقلها يحاول يستوعب .. فارس حضنها : انا لله وانا اليه راجعون خلك قويه ياشيهانه عشان تقولين لبنته شيهانه بكت : لا لا مااقدررر فارس يشد عليها ويحاول يصبرها : لا اله الا الله شيهانه تبكي : ااه يااخوي الغالي ااه ي أمنية انا شلون اقول لها والله مقدر مافيني حيييل فارس لما شاف انهيار شيهانه تركها تجلس .. واتصل ع امه واخته يجون ماله غيرهم يكونون مع شيهانه وأمنية وقت تعرف الخبر .. لان اكيد شيهانه بتنهار زياده مع أمنية سعود قاله الخبر ووكله مهمه شيهانه وأمنية .. لان ام سعود تعبت لما عرفت وهو معها * أمنية استغربت لما شافت ام فارس واخته لها زماان عنهم .. اوف مايجون الا فجأه وهي كذا ببجامتها ويدخلون كذا عادي بدون لايدقون الباب ولا شي !! راحت سلمت عليهم .. والتوم انبسطو بشوفه جدتهم زهراء مسكت التوم كل واحد بيد : تعالو معي لبابا أمنية تأشر ع المجلس : حياكم الحين تجي عمتي ام فارس ابتسمت بحنيه ولفت ذراعها حول كتف أمنية وهي تمشي معها : شلونك يابنتي كيف صحتك أمنية تهز راسها وهي متضايقه من هالحنيه المزيفه بنظرها : بخير الحمدلله تفضلي جلست ام فارس تنتظر بنتها تجي وتجي معها شيهانه وهي تستغفرالله وتناظر أمنية بحزن أمنية وقفت بتروح تشووف عمتها وهه هذي هي جايه مع زهراء .. بس ماعجبها شكل عمتها عيونها حمرا وخشمها .. باكيه .. ليه !؟ لايكون جلستي عندها سببت مشكله مع زوجها .. شيهانه رجفت شفاتها ببكا لما شافت نظرات أمنية القلقه .. ام فارس قربت من أمنية : اذكري الله يابنتي ابوك عطاك عمره انا لله وانا اليه راجعون شيهانه ع طول غطت وجهها بكفوفها وبكت .. أمنية تناظر عمتها تبكي .. وام فارس وبنتها يترقبون ردة فعلهاا تحس جسمها كله قشعرر ونبضات قلبها تزيد.. : ابوي طيب لما زرته !!؟ ام فارس : توفى العصر عسى الله يرحمه ويغفرله أمنية صارت ترجف والعبره بحلقها صرخت عشان تروح هالعبره الي تخنقق : ابووي طيييب بخييير اقولك انتِ شقاعده تخرففييين واتجهت بسرعه للباب تبي تطلع ماتدري ويين وهي تصارخ بصدمه : وييين ابوي وييينههه ام فارس تجري وراها تحاول تهديها .. عمر الي توه وصل بعد ماكلم فارس يتأكد ان أمنية درت ولا لاء وقاله انه ينتظر امه واخته يعلمونها .. لازم يكون موجود يخاف تسوي بنفسها شي.. وهو واقف مع فارس عند الباب سمع صراخها يقرب بسرعه تحرك .. وقابلها عند الباب قبل تطلع مسك ذراعهاا : ويين طالعه أمنية اذكري الله قولي لا اله الا الله أمنية ودموعها اخذت مجراهاا وكلها ترجف وتأشر وراهاا وشفاتها ترجف وصوتهاا : تقول ابوي ماات ام فارس طلعت .. وشافت أمنية ورجال ماتعرفه يحاول يحضنها وهي تدفه وتبكي : اقرأ عليها ياولدي أمنية ناظرت ام فارس بخوف وتشبثت بعمر : هذي هي الكذابه ابوي مايخليني امي رااحت وهو بقى لي لااا مايروحون كلهم بدوووني لااا عمر والعبره خانقته حضنهاا : اذكري الله ي أمنية اذكري الله أمنية تحس جسمها مافيه طاقه وراسها يغلي ماعاد تسمع صار ثقلها كله ع عمر وغابت عن الوعي .. * مررت ايام العزا ثقيله ع الكل .. .. ام منيف تمد كوب الاعشاب لااختها ام سعود : سمي وانا اخيتك هالدنيا دار عبور ياالله حسن الخاتمه عسى الله يرحم ويغفر لموتانا وموتى المسلمين ام سعود اخذت الكوب وشربت شوي وتنهدت : اميين ميير انا الحين قلبي ع بنت الغالي ليت بس يطلعوها من هالمستشفى ام منيف : يطلعوها وش تسوي هناك احسن لها البنت منهاره ماتحط لقمه بفمها خلها عندهم المغذي ينفعهاا وابرهم الي تهديهاا الله يربط عقليبهاا لاتعود لجنونها بعد ماعالجها المرحوم نجلا دخلت وهي لابسه عباتها ومتحجبه وبيدها نقابهاا وبهدوء : تبون شي انا بروح عند أمنية ام سعود : ابد الله يسلمكم نجلا هزت راسها ولبست نقابها وطلعت لعمر الي ينتظرها بالسياره .. عمر حرك السياره بهدوء وصوت القران الواطي معطي جو السياره سكينه وطمأنينه .. نجلا لمت يديها لصدرها وتتأمل من الشباك .. فعلاً دنيا عبور الواحد لازم يعمل لااخرته وش ينتظر لمعت الدموع بعيونهاا فقد عمها موجع حييل .. يااربي اربط ع قلوبنا شلون بتصبر ع الحياه بدونه هو كان بلسم البيت احن عليها من ابوها عمر وقف عند المستشفى ونزل واخذ الشنطه الي جابتها معها نجلا لأمنية .. نجلا نزلت وقفلت بابها : ارتاح انا ادخل لحالي وتجيك عمتي عمر يمشي قدامها : لا مرتاح واكيد عمتي شيهانه معها اغراض انزلهم معها نجلا مشت معه : الي يريحك دخلو المصعد .. نجلا تناظر عمر وبهدوء : لاتقلق هي بخير عمر بدون مايناظرها : شايفها بعيوني ذابله مافيها روح نجلا بااستغراب : وين شفتها عمر ببساطه : اطل عليها كل يوم . نجلا سكتت ماعلقت اصلاً صدمتها الثانيه بعد ايام العزا عمر قالهم ان عمها منصور زوجه أمنية ووصاه عليها قبل يموت .. تنهدت بضيق ع ساره الي ماكلمتها ولا تدري كيف وضعها .. فتح المصعد وطلعو .. وكان في واحد بيدخل بس وقف عمر يسلم عليه ماناظرته صدت ومشت عنهم لغرفه أمنية .. عبدالرحيم بعد ماخطف نظره لنجلا بدون ماينتبه عمر : لا خلاص انا اودي امي بيتها عمر : وينها عمتي ماطلعت عبدالرحيم : الحين جايه وراي تقول بس تطمن ان اختك وصلت عند أمنية عمر يمسح ع ذقنه المهمل : اهاا زين انت متى بترجع المدينه عبدالرحيم : اليوم ان شاءالله ابوي عطاني اربع ايام عمر لمح عمته من بعيد تطلع من غرفه أمنية : ياليت والله ماتقطعها ماتدري شكثر جيتك ساعدتها وهونت عليها فقد عمي عبدالرحيم : ان شاءالله ماعليك * * نجلا تغرف من الشوربه بصحن : جبت لك شوربه جدتي مسويتها مخصوص عشانك من قدك منيره حنت عليك أمنية همست : اذا اكلت شي بستفرغ ماني قادره والله نجلا تحط يدها ع ثلاجه الحليب : طيب حليب !؟ أمنية هزت راسها بلا .. نجلا تصب كوب حليب : عشان جدتي تكفين اشربي لو نصه والله انها ماتنام زين تحاتيك أمنية والعبره خانقتهاا : لاتضغطين علي وربي مو قاادره نجلا جلست ع الكرسي وبيدها كوب الحليب شربت منه وهي ساكته بتتركها ع راحتها تهدى شوي .. أمنية : ابي اطلع احس اختنقت هناا نجلا : مو عشان تطلعين لازم تاكلين ياقلبي أمنية تنهدت وصدت بضيق .. نجلا نزلت كوبها وراحت عند السرير : سوي لي مكان جنبك أمنية زحفت ع اليمين وهي ساكته نجلا انسدحت جنبها وتتبسم : الحمدلله اننا رشيقات ولا تخيلي انام ع هالكرسي ياحبيبتي ي عمتي نامت عليه باالله أمنية : ايه نجلا لفت ذراعها ع كتف أمنية وسندت راسها ع صدرها : نامي ياقلبي ارتاحي أمنية غمضت عيونها وع طول نزلت دمعه سريعه : كيف اعيش بدون ابوي نجلا تمسح ع شعرهاا : الله رحييم مايخلي عبده امس وانا اقرأ بالجزء الثاني من سوره البقره اقرا كل وجه اقراه اقرا تفسيره ووقفت عند استغفرالله مو حافظه بس بمعنى ان العبد لازم يبتلا بنقص بالمال او بالانفس وغيره ومعنى الانفس يعني موت الاحباب هذا ابتلاء لازم يكون عندك يقين اننا كلنا ميتين الدنيا مو مكاننا احنا رايحين بس بالدور راح عمي واحنا وراه النقطه مو هناا لاا عند ايش تسوي ايش تاخذي معك للمكان الي بنروح له واذا احد راح قبلنا لازم نذكره الحمدلله ربي فاتح مجال للدعاء للصدقه أمنية وكلام نجلا برد ع قلبهاا كلام تعرفه زيين بس لما تنحط بالموقف تنسى كل شي تحتاج من يذكرها ويوعيهاا.. نجلا : اممم احسني تكلمت كثير خلاص نامي واذا صحيتي لازم تاكلين عشان نطلع من هالمستشفى تمامم ؟؟ أمنية همست : تمام * طلعت الممرضه من الغرفه وناظرته : كلوو نووم عمر ابتسم : شكراً وبعد ماراحت اتجه للباب .. فتحه بشويش ودخل وقفله وراه بنفس الهدوء مشى بااتجاه السرير وعيونه عليهاا .. نايمه بحضن نجلا وشعرها مغطي وجهها راح للكرسي وشاله بشويش .. نزله بجهة أمنية وجلس وهي يراقب اذا حسو فيه ولاا سند راسه ع حافه السرير وعيونه عليها تتأملها بصمت نجلا الي حست فيه من اول مادخل وهي كانت تنتظره من الاساس قال كل يوم يطل عليها فتوقعت هالوقت .. فتحت عيونها وهمست : هذي مو طله هذي نومه عمر فز منفجع من صوتها الي جاه وهو سرحان خلعه .. ضرب راسه بحديده المغذي وحاول يثبت لايطيح وحركاته سببت ازعاج بالمكان الهادي .. ونجلا الي تحركت وتأشر له بسم الله كل ذا كان شي طبيعي تصحى أمنية .. أمنية فتحت عيونها بخوف وتناظر نجلاا : هاااه !!؟ نجلا ارتبكت وصدت نظراتها عن جهة عمر عشان ماتلف أمنية وراهاا : ولا شي بسم الله عليك بس ينظفون دورة المياة عمر جالس ع الارض عند راس السرير وهو مرتبك ويتحسب ع نجلا بداخله .. لو لفت أمنية بتشوفه .. مصيبه البنت مو ناقصه نجلا ترجع راس أمنية ع صدرها : كملي نوم باقي الفجر مطول أمنية غمضت ع طول تكمل نوم مابعد صحصحت اصلااً .. شوي كذا .. نجلا اشرت بيدها لعمر يطلع عمر وقف وناظر أمنية الي وضحت له ملامحها هالمره نجلا تأشر له بيدها وحركات عيونها اطلع بسرعه .. عمر سافهها ويتأمل أمنية يحاول يطمن روحه انها بخير .. تقدم بتهور وباس يمين جبينها بسرعه وطلع نجلا تناظره بصدمه .. تنفست براحه بعد ماطلع مجنوون * سعود جالس بحديقه البيت يفكر كيف يدير امور العايله بعد وفاه اخوه الي كان شايل عنه كل هالمسؤوليه .. هالحين محلات منصور من يشرف عليهم .. صح ان عمر يعرف للشغل وحتى منصور عرض عليه يشتغل معه ورفض يبي يشتغل بشي حكومي .. لازم يقنعه يرجع يمسك شغل عمه مثل ماكان زمان يساعده طوقه نزلت صينيه الشاهي قباله .. سعود : وين امي ماتجي تقهوا معي طوقه : صار ع وفاه اخوك اسبوع امك ماهي مثلك قلبها قوي وتكمل حياتها عادي وتتقهوا سعود رفع عيونه لها وهو جالس : اشوف لسانك طايل هالفتره كنت خايف ع نجلا من بلوه منصوره والظاهر انها اثرت عليك انتِ طوقه ماتقدر تناقره اكثر تخاف : المهم تبي شي ثاني انا عندي شغل سعود يحرك يده : الله معك شوي كذا وهو يتقهوا .. دخلت سياره عمر انتفخ صدره يحس انه للحين مقهور منه شلون يتزوج بدون مايقوله ليه املك ع الساكت مع منصورولا شاوروه حتى .. شيهانه نزلت من قدام .. ولفت ورا فتحت الباب تساعد أمنية عمر نزل وناظر ابوه بتوتر خايف يقول شي لأمنية وهي مابعد درت ان ابوها زوجها له .. يبي يقولها بنفسه بس ترتاح مايبي تنصدم سعود يناظرهم بدون مايعلق بكلمه وهو يشرب شاهيه .. شيهانه تمسك يد أمنية وتمشي معها .. ولما مرور من عند سعود : شلونك ياابو عمر سعود بهدوء : بخيرر الحمدلله أمنية تجمعت الدموع بعيونها .. حست نبرته فيها تهديد ووعييد .. سندها راح عمر قرب من ابوه وباس راسه وجلس قباله : شلونك ياابوي سعود : قلنا بخير عمر صد يناظر عمته وأمنية لما دخلو البيت ورجع ناظر ابوه : عمي كان مستعجل وكل شي سويناه بيوم حتى التحاليل تو طلعناها وتدبرالامر المحامي سعود : وليه تزوجها من الاساس انت خاطب وبعدك مااعرست تروح تزوج ع مرتك عمر : هذي رغبه عمي وماقدرت ارده سعود بقهرر : تزوج مدمنه مخدرات ومجنونه صااحي انت !! مو كل شي يقوله عمك توافق هو يدري ان بنته بلوه ومحد بيقبل فيها راح دبسك فيها لييه تقبل عمر : تزوجتها وخلاص ولاني ضايمها أمنية ماغلطت هي ضحيه وبتعيش معي معززه مكرمه هي وصاه عمي سعود بصرامه : وصيه عمك وتبيها ع ذمتك خلها متعه ولاتخلف منها سوودت وجهي عند ابو ساره "حط يده ع فمه لما جا عمر يتكلم" اصص ولاكلمه قم انقلع عن وجهي ولاتناقشني عمر وقف وهو كاتم غيضه ابوه متى يستوعب انه كبير رجال لازم يحترمه .. مشى لسيارته .. حرك بسرعه طالع من البيت كان يتمنى بس يتزوج ويطلع يعيش برا هالبيت ويرتاح .. شوف الحين وين وصل ناظر جواله رقم يتصل .. رفع جواله ورد : هلا جاه صوت انثوي مو غريب عليه : السلام عليكم عمر : وعليكم السلام تنهد بضيق لما سمعها تقول : انا ساره ي عمر ليش تسوي فيني كذا "وبان بصوتها البكا" تتزوج علي واحنا بعدنا مملكين انا وين اودي وجهي من الناس وش بيقولون عني عمر : ساره الظروف ماهي ع كيفي انتِ اختياري وتبقين زوجتي معززه مكرمه وأمنية بنت عمي مالها غيري وصاني عليها عمي ومو انا الي اخذله ساره والله عمي له فضل كبير علي ابسط شي اسويه اخليه يموت وهو مرتاح ومتطمن ع بنته ساره صرخت : بنته حيييه تحسب اننا بنعيش بسلام مع بعض لاا انت ماتعرفها انا كنت صاحبتها زمان اعرف طبعها وحركاتها هالبنت ماتتعاشر عمر يقاطعها : وش ماكانت انا مااقدر اتركها ساره تقاطعه بنفس الصراخ الباكي : لييه ترا انت اكثر من تأذيت منها تتذكر لما صادك ابوك تدخن وضربك ترا هي الي علمت عليك عمر بهتت ملامحه وهو يتذكر ذيك الضربه وهو بأول جامعه كانت اخر مره ضربه ابوه بس كانت مؤلمه بالعقال نسته شي اسمه دخان . ساره : اييه وحتى لما تروح تسهر عند اخوياك كانت تقفل الابواب عشان تضطر تدق ويعرف ابوك انك سهران برا ويهاوشك صدقني كل المشاكل الي صارت لك هي وراها حقووده تكره تشوف الناس مستانسين عمر الي تحليله اختلف عنها .. أمنية كانت تحبه والاشياء الي يسويها وماترضيها تحاول تخربها عليه ساره : الووو انت معي تكفى عمر طلقها ابوك الحمدلله بعده عايش يهتم في بنت اخوه عمر يقاطعها بصرامه : هالموضوع لاتناقشيني فيه ترضين فيني وهي ع ذمتي ع العين والراس ماترضين خلاص كلن بطريق وماتشوفين شر. ساره : جزاك الله خير وقفلت بوجهه .. ورمت الجوال قبالها وقعدت تبكي اول سرقت زوج اختها تركي والحين هي حسبي الله فيهاا * منيره جالسه فالصاله .. قفلت الجوال والضيق بوجهها طوقه الي جالسه قبالها وخافت من مكالمه ام تركي : وش صايررر منيره تنهدت : شيهانه سقطت الله يعوضها طوقه : ياحرام اكيد هي تعبت بين العزا وأمنية بالمستشفى منيره : اي والله طوقه : يله اهم شي هي تكون طيبه كيف ام تركي عندها جابت لها اكل ولا اسوي منيره : لا عندها وجابت لها بتجلس ثلاث ايام ويطلعونها طوقه وقفت : اجل بكره انا بسوي اكل واروح لها منيره مسكت يد طوقه باامتنان اهتمامها فيهم هالفتره وقلبها عليهم الا من طيب اصلها : اصيله ياام عمرر والله ان اختي ربت الله يخليك لعيالك طوقه ابتسمت : امين ويخليك لناا * بعد اسبوعين .. بغرفه أمنية .. خلصت صلاتها وجلست ع سجادتها بدون ماتفصخ جلال صلاتها .. كانت تردد اذكار الصباح وبعد ماخلصت انسدحت ع سجادتها تحس بسكينه وطمأنينه امس حلمت في امها وابوها .. كانو يوصوها على نفسها وتسمي عيالها عليهم ابتسمت وهي تتذكر الحلم وهمست : ان شاءالله مااتأخر واجيكم غمضت عيونها وماتدري كيف غفت .. اصلاً مااستوعبت انها نامت الا لما قامت مفجوعه من فتحته الباب بقووه سعود والشر يطلع من عيونه : قومي البسي عباتك والحقيني بسررعه أمنية قلبها يدق بقووه من الفجعه ومن عمها همست : وين بتاخذني سعود تقدم ووقف بنص الغرفه : ع جهنمم يله تحرركي * نهايه الجزء الثالث .. |
رواية رائعة وامنية حقا ضحية الاهمال الاسري ....عدم احتوائها خلها تتصرف بواقحة فبعض الاحيان....ولي بيقهرني هو سعود يترى هو حياخد امنية لي فين؟و علاقة عمر و امية وسارة حتوصل لي فين ؟ موفقة باذن الله |
Surprise (( الجزء الرابـــــع )) × قل للحبيب الذي يرضيه سفك دمي دمي حلال له في الحل والحرم والله لو علمت روحي بمن علقت قامت على رأسها فضلا عن القدم يالائمي لاتلمني في هواه فلو عاينت منه الذي عاينت لم تلم × سعود والشر يطلع من عيونه : قومي البسي عباتك والحقيني بسررعه أمنية قلبها يدق بقووه من الفجعه ومن عمها همست : وين بتاخذني سعود تقدم ووقف بنص الغرفه : ع جهنمم يله تحرركي أمنية وقفت وهزت راسها بطيب .. وراحت للشماعه القريبه من الباب .. وبس وصلت حطت رجلها وجرررري طلعت من الغرفه .. نزلت الدرج تبي تروح لجدتها ماعندها غيرها تحميها منه هي تغيرت صارت تحن عليها وتقولها يابنيتي .. منيره شافت أمنية نازله تجري وهي رافعه جلال صلاتها لاتتعثر .. وسعود وراهاا أمنية وصلت جدتها ولفت وراها : تكفين ياجدتي فكيني منه ومدري وين بياخذني منيره رفعت عصاتها تمنع سعود يقرب وبقوه : ابعددد ورااك وش سوت لك سعود بقهر : يرضيك يايمه ولدك سجل كل حلاله بااسمها محلاته وشغله كله مايمشي غير بتوقيع منها وين اودي وجهي بين الرجال وحرمه تديرهم حتى ليتها صاااحيه مهبوله وحالتها حاله أمنية انصدمت ابوها سجل كل شي بااسمها !! منيره ونفس صدمه أمنية وبعتب : الله يسامحه منصور ع هالفعله سعود وبراحه ان امه نفس رايه : اييه عشان كذا باخذها تسوي لي توكيل وانا اقابل الرجال أمنية شهقت : تعقققب والله ماسوييت منيره نزلت عصاها سامحه لولدها يتصرف .. سعود ع طول وصل لها وشدها مع ذراعها تطلع من ورا ظهر امه : بتسوين لي وانتِ ماتشوفين الدرررب ماعندنا بنات يقودون الرجال أمنية صررخت وهي تحاول تسحب نفسها منه : وانت عااد نفسك منهم سعود ضربها كفف خلاها تطيح ع الارض : مابقى الا هي بزر طول يدي تشكك برجولتي أمنية سندت يديها ع الارض تاخذ نفس تحس وجهها تخدر من الكف وراسها ثقل .. سعود نزل لها ووخر الحجاب المرتخي عن شعرها وشد شعرها رافع راسها مخليها تناظره : صوتك بس لو يرتفع علي بسحب لسانك واقصه دلع ابووك ولى أمنية همست بألم : ليتك مت وبقى هو منيره بضيق : ياسعود خلها عنك ضعيفه انفتح باب البيت بقوه ودخل عمر الي جن جنونه لما شاف ابوه شاد شعرها .. وبقووه وهو يتقدم لهم : فكها ياابووي سعود خفت قبضته وهو يناظره يستوعب انه يدافع عنها ايه صح مو صارت زوجته .. حس بعمر يسحبها منه عمر لفها وراه وهو يناظر ابوه وجدته ويحاول يتمالك اعصابه وبقوه : محدد له حق يمد عليها يده وانا موجود ان غلطت ع احد علومني انا وانا اتفاهم معها طوقه اخذت نفس براحه وهي فالمطبخ بعد مااتصلت ع عمر الي كان بدوامه وقالت له الحق ابوك ناوي ع أمنية .. سعود : انا عمها واربيها واربيييك بعد ياولد ترفع صوتك علي وانا ابووك !! منيره الا عمر عندها وقفت : تعوذ من ابليس ياسعود هو مارفع صوته عمر يقاطعها وهو يشد ع يد أمنية لما حس انها بتسحبها : ع راسي ياابوي بس أمنية زوجتي ولاارضى احد يضربها من اليوم ورايح الي يهينها يهينني أمنية شهقت وسحبت يدهاا : نعممم !!؟ "وناظرت عمها وجدتها" زوجتوني وانا مدري الله ياخذكم كلكم سعود بقهر : وقصص لسان ان شاءالله منيره : ابوك هو الي زوجكم قبل وفاته ولاحنا راضيين عن هالزيجه عمر لف ع أمنية وشد يدها بسرعه : امشي معي افهمك أمنية تحاول تسحب يدها وتصارخ : وخرر عني لو انك اخر واحد بهالحياه ماقبلت فيك "وثبتت رجولها بالارض تحاول ماتمشي معه" فككني يا.. الله ياخذك سعود ابتسم بشماته : ورني شلون بتعيش معها ياولد سعود عمر سحبها معه بقوه لغرفته .. أمنية تضربه بيدها الثانيه وهي خلاص تعبت مافيها طاقه هالفتره ماتاكل زين وكف عمها رج راسها .. همست بصوت باكي : فكني شتبي مني انت بعد عمر فتح غرفته ودخلها ودخل وقفل الباب وراه واستند عليه .. ناظرها ع طول جلست ع طرف السرير بتعب وكأن رجولها مو شايلتها : عمي وصاني عليك وايه زوجك لي قبل يتوفى أمنية بكت بتعب : لييه ياابوي لييه ااه عمر يناظرها بحنيه وتحرك بشويش وجلس جنبها : عشان الي تو صار مايبي ابوي يكون والي عليك هو اخبر الناس باابوي وشفتي تو انا امي اتصلت وعلمتني لو ماجيت ماكان بيقدر يرده احد عنك أمنية غطت وجهها بكفوفها صار تبكي من الحقيقه المره .. عمر ظل ساكت تاركها تبكي ع راحتهاا أمنية بوسط بكاهاا : ابوي سجل حلاله بااسمي "وشهقت ببكا" عمي يبيني اسوي له توكيل عمر بقهرر : مااله حق أمنية : اييه وانا رفضت وضربني عمر يلف عليها وحرك يده بالهوا ورجعها جنبه : انتِ اهدي الحين وانا اتفاهم مع ابوي أمنية وخرت يديها وناظرته ودموعها تنزل : بس انا ماابيك انا كرهتك والله عمر يتأمل ملامحها الباكيه وخدها الاحمر من كف ابوه .. مد يده بتردد مو قادر يمنع رغبته .. مسح ع خدها بحنيه : نصيبناا أمنية وملمس يده ع خدها صحاها خلاها تستوعب وضعها .. " عمر تزوجها " دفت يده بقوه ووقفت وناظرته بكره : لو تبوس رجولي مارضيت فيك وبشلعك من حياتي انت وابوك وفوقكم عجوز النار منيروه انا ماني ضعيفه اذا ابوك تجرأ ومد يده علي اليوم بكره بكسررها وبيني وبينكم المحاكم لين تذلفوون من هالبيت وطلعت من الغرفه بسرعه والنار تغلي بصدرهاا .. تكره هالغرفه الي شهدت ذلها * فالجامعه .. ساره تمشي ويديها بجيوب جاكيتها الجو اليوم باارد : ماكلمني نجلا وبيدها قهوتها تدفيها : اكيد مارح يكلمك ينتظر قرارك ساره تنهدت : احسه بايعني مو هامه رضيت او لا عادي عنده اروح نجلا : لاتلوميه شي طبيعي مابعد عرفك زين بس والله هو شاريك ووافق عليك بااقتناع بس جت الظروف بسرعه ساره : وهي للحين ماعلمتوها نجلا : ايه ماتدري ومو عارفه والله اتوقع ردت فعلها أمنية تغيرت عن زمان انا كل شوي اجيها واتكلم واحاول اغير من جوها وهي مسرحه وماهي معي اخاف بس ترجع لحالتها النفسيه ذيك ساره سكتت وبنفسها " هه اكيد بتموت من الفرحه انها تزوجت عمر حبيبها بس والله مااخليه لهاا المريضه " * يوم الجمعه .. أمنية جالسه ع السرير الي جايبينه فالمجلس لشيهانه طلعت من المستشفى وجات عندهم ترتاح .. وتناظر جدتها الي رجعت لطبعها .. منيره : وش هالتمر الي ماينذاق بسم الله ع النعمه لاقهوة زينه ولا تمر وش حاطه عليه طوقه بصبر : حطيت عليه اعشاب اصلاً سويته لشيهانه منيره شهقت : لا امنعييني بعد مااكل من حلالنا طوقه : ماقصدت كذا بس اقول منيره تقاطعها تبعد عنها الصينيه : الله لايحوجني لك وييينها نجيله تسوي لي قهوه "وناظرت أمنية" قليله مسده مامنك فايده حتى قهوه ماتعرفي تسوين أمنية رفعت حاجب الحين جا دورها بعد طوقه : وحتى لو اعرف مارح اسوي لك منيره بسرعه ومن قلب : الله لايحوجني لك "وبصوت عالي" نجلاااا يانجلااااا طوقه طلعت من الغرفه تشوف نجلا وينها تجي تسوي لها وتفكهم اووف شيهانه الي كانت تبدل .. دخلت الغرفه ع طلعه طوقه : تنادون نجلا انا ارسلتها فوق تجيب جوالي من العيال منيره : ياجييل الفلس بس ع الجوالات شيهانه : الله يهديهم * وقفت ع باب الغرفه .. شافت زايد يلعب بالسيارات ع الارض وناظرت رايد الي بيده جوال أمه ويصور رسمته : الحين ليه ماخذ جوال امك بدون استئذان هاته تبيه رايد مطنش كلام نجلا : اخلي نجلا تصور الرسمه احسن نجلا بعدم فهم : وش !! عبدالرحيم الي كان يكلمه فديو بالسناب : خلاص اكلمك بعدين نجلا انخرشت لما سمعت الصوت وماعرفته ع طول مسكت الجوال ويديها ع الكام من قدام وورا تخاف يكون صورها اصلاً ماتدري يتكلم مع مين هالبلوه رؤود .. شافت اسمه وخشته وارتاحت رحييم هفف رايد بكى بصوت عالي : لاتقفلييييي هااتي الجوال نجلا تسوي له حركات تهديد بوجهها واص بيدهاا .. عبدالرحيم يناظر سواد الكاميرا وصوت بكا اخوه : خلاص رؤود اقفل وانت ارسلي صوره الرسمه اشوفها رايد يحاول يسحب الجوال من نجلا : لاا لاا ماابي نجلا حيوانه والله لااقول لبابا عبدالرحيم ماسك ضحكته : ممكن تعطين اخوي الجوال وتطلعين برا نجلا ناظرته بقهرر خيير انت ووجهك ميته عليك انا .. رمت الجوال ع السرير واشرت لرايد اعلم امك ومشت عنه عبدالرحيم لمح مقفاهاا لما رايد رفع الجوال وقبل يلف الكام ع وجهه وهو يبكي : تقول تعلم امي علي عبدالرحيم : لاتبكي خلاص انا اتفاهم مع امي * * مع وجود شيهانه عندهم البيت مافضى كل شوي زايرهم احد .. والتوم معطين البيت جوو حست ان وجودهم فعلاً هذا وقته انشغلت معهم عن التفكير بسلبيه .. والاهم عمها سعود مسافر لوين ماتدري بس اهم شي ارتاحت منه .. طلعت من غرفتها بعد مانامت نوومه طويله ماتدري شصار فالبيت .. ومايهمها شي جوعاانه وتبي تاكل بسس وهالحين الساعه 9 بالليل اكيد في عشا اممم سومرا قابلتها عند الباب : هذا عمر يقول يبغى انتِ أمنية لوت فمها : قولي له ينقلع سومرا هزت راسها ومشت .. أمنية نزلت تحت وسيده ع المطبخ وهي تسمع صوت عمتها ام تركي فالمجلس من متى عندهم ذي .. وقفت ع باب المطبخ وشهقت متفاجأه .. عمر الي جالس ع الكرسي واوراق قدامه ع الطاوله .. انتبه لها قبل تنتبه له سومرا دخلت وراها وتعدها ووقفت قدام عمر : ماما يقول قولي له ينقلع عمر رفع عيونه لأمنية الي واقفه متنحه .. مبين اصلاً انها صاحيه نوم وجهها مفقع وشعرها مربوط وطالعه شعرات بشكل فوضوي وبجامتها ساده رصاصي اول مره يشوفها ببيجامه ووضح له ملامح جسمها .. وبهدوء بدون مايتحرك من مكانه : صباح الليل أمنية استوعبت موقفها وناظرته بقهر : وش تبي وبعدين احترم نفسك وين داخل المطبخ وماخذ راحتك عمر : كل الي فالبيت محارمي وين المشكله ؟ أمنية تناظره بااحتقار : تخسي وتعقب ماصرت محرمك عمر ضحك بااستفزاز : هههه اجل روحي تغطي وتعالي "وطق بالقلم ع الاوراق الي قدامه" استلمي شغل ابوك أمنية تنرفزت منه وطلعت يحسب مااروح اتغطى الا اروح هه .. وراحت لصندوق الجلالات ولبست واحد وتلثمت .. ورجعت للمطبخ ناظرت سومرا الواقفه عند الثلاجه وتناظر عمر ومسرحه وهو مو منتبه لها : انتِ هيي سوي لي شي اكله لين مااخلص من ذا عمر ناظرها تجلس قدامه وهي متلثمه عقل طفله والله مالها داعي بس طنش .. ودف الاوراق والملف لها : انا تفاهمت مع ابوي ان انا اكون بالوجه مع الرجال وامري لله اكون بين شغلي وشغلك أمنية تناظر الورق تحاول تفهم ودها تحارش وتقول ماتبيه بس هي ماتعرف هو اعرف منها اشتغل مع ابوها كثير : وهذول وشو عمر : نسخه من العقود احتفظي فيهم عندك أمنية ترجع الاوراق بالملف بدون ماتناظره .. طوقه وقفت ع باب المطبخ ووراها نجلا لما شافتهم .. رجعت بسرعه وقفلت الباب وتقدمت من أمنية بقهر : ياسلااام وهذي الي تقول مماتبيه ع طول مقابلات بالمطبخ وساره بالمجلس تبين تخربين بيت ولدي زود ماانتِ خاربته خلقه نجلا استندت ع الباب وهي خايفه ساره تلحقها وتدري .. عمر : يمه اهدي انا ناديتها عشان الشغل أمنية وقفت وبيدها الملف وتناظر طوقه : اخرر همي ساره وولدك واشوف جازت لكم نومتي محد صحاني لانها هنا والله لو اني اييش ههههه طوقه : اييه جازت لنا وياليت تروحين غرفتك ماتطلعين وتفكينا من شرك أمنية نقلت نظراتها بينهم الثلاثه حتى سومرا .. عمر ونظرتها وجعت قلبه : يمه الله يهديك أمنية في حالها واشتطيتي عليها من لا شيء أمنية حست انها بتضعف مع دفاعه عنها وكأنها بتبكي بس لاا .. ناظرت طوقه : افككم شري طيب ومشت للباب وصرخت ع نجلا : وخرري نجلا حست ان نيتها شييينه : وش بتسوين أمنية فتحت الباب بقووه وفصخت جلالها ورمته بعيد وصاارخت بااعلى صوتها : ساااااااارررررااااهه سااااااررره طووقه لحقت بسرعه تحاول تسكتهاا : اصص انططمي الله ياخذك عمر واقف بمكانه يناظرها باحتقار مجنونه .. تظنه يخاف من ساره .. رعب اذا شافته عندها هه ههههه غبيه طلعت ام تركي وساره وامها ووراهم منيره ع مركادها مرعوبين من صراخها وش فيييه.. ام تركي وقفت تشوف طوقه تحاول تسكتها ونجلا واقفه وراهم بصمت : وش فيييه أمنية لفت تشوف عمر واقف عند طاوله المطبخ ومكتف يدينه لصدره ويناظرها ببرود .. رجعت ناظرت ساره واشرت داخل المطبخ : تعالي خذي رجلك وفكيني منه يطاردني من مكان لمكان وكأني ناقصته طووقه شهقت : حسسبي الله عليييك تبلين ع ولدي عمر انصدم من كلامها طلع من المطبخ وشاف ساره تناظره بخذلان ..ولفت بسرعه راجعه للمجلس ومشت امها وراها ام تركي ناظرت أمنية بقهر : استري نفسك عشان مايطاردك انتِ وهالضيق الي لابسته كاسيات عاريات الله لايبلانا عمر لف ع أمنية بعصبيه : تبلين علي عيني عينك وامي واختي شايفين اوقح من كذا ماشفت منيره تناظر ماتعرف كذب أمنية من صدقها من وهي صغيره هذا موالها مع عمر وشكل ايامهم راجعه وبقوه .. نجلا مسكت ذراع عمر وناظرت أمنية بااحتقار : خلها مريضه أمنية تقدمت من نجلا بجنون ودفتها مع كتفها بقوه : مييين المريضه هااه نجلا صرخت بوجع من دفتها واستندت ع عمر القريب منها عمر كان بيمسك يدها ويوقفها عند حدها تضرب اخته قدامه !! بس .. طوقه لفت أمنية عليها وضربتها كف وهي تصرخ : عياالي خط احمررر والله ان اذيتيهم مره ثانيه ماتشوفين خيرر نجلا شهقت .. وعمر تجهم وجهه وكور يده يضبط اعصابه .. من بقى ماضرب هالخد الناعم ؟ وقدام عيونه بعد .. تنضرب ؟!! أمنية حطت يدها ع خدها وبدون ماتبكي نقلت نظراتها بينهم .. جدتها عطهم مقفاها وراحت .. وام تركي واقفه وتتفرج بصمت همست بتهديد : صدقيني بطردكم من هالبيت وترتاحون مني ومشت عنهم بسرعه طالعه لغرفتهاا .. دخلت وقفلت الباب وراها بقووه .. صارت ملطشه كل يضرب فيها عارفين ان ماوراها احد وربي لاتندموون .. حتى الدموع ملت منها هالمره فعلاً خلاص تعودت ع الضرب راحت بسرعه للدرج الي احتفظت فيه بااغراض ابوها طلعت جواله .. جلست ع السرير وفتحته وع طول بحثت عن الرقم الي تبيه "المحامي ذيب" سجلت الرقم بجوالها واتصلت .. وهي تهدي انفاسها الغاضبه جاها صوته الرزين : هلا مرحبا أمنية برسميه : السلام عليكم ذيب : وعليكم السلام أمنية : انا أمنية بنت منصور ال.. واحتاج تساعدني ذيب : حياك الله امري ولك الي تبين أمنية اخذت نفس : ابي اشتري نص البيت الي بأسم عمي بس هو اكيد يرفض ومو عارفه يعني كيف تكون الاجراءات وشي ثاني بعد ذيب : تفضلي اختي أمنية : ابي ارفع قضيه خلع ماابي عمر وانت كنت معهم لما زوجوني بدون مااعرف وهالشي يفيدني صح ؟ * الساعه 2 ص : رجع البيت بعد مااشترى لها وجبه وهو ملغي عقله وتابع ضميره .. تذكرها لما تقول لسومرا تسوي لها اكل اكيد جوعانه طول يومها نايمه واخرتها تنضرب وتروح غرفتها ماتاكل .. دخل غرفته .. رمى شماغه ع الطاوله وهو يناظر ساعه يده الوقت متأخر والبيت هادي يحس روحته لها غلط .. لو معه رقمها ع الاقل بس لا كان مستحيل ترد يعرفها سما باالله وفتح باب غرفته الداخلي وطلع .. يمشي وبيده الوجبه هو مسؤول عنها عمه موصيه عليها .. هل يرضيه ان بنته تجلس بدون اكل .. لا اجل خلاص اسكت ياعقلي طلع الدرج وهدوء البيت يخليه يحس بدقات قلبه بكل وضوح .. ناظر باب غرفتها المطرف والنور شغال تقدم له ودق الباب بشويش وواضح له من الباب الدولاب .. دق ثاني ونفس الهدوء دف الباب بشويش وطل براسه الغرفه فاضيه .. دخل وهو ناوي يحط الوجبه ع الطاوله .. يمكن انها فالحمام اذا جت تلقاها حطها ع الطاوله ولف بيطلع .. شافها داخله وحاضنه روب الحمام بقوه والمنشفه مغطيه شعرها .. متروشه وبردانه .. أمنية شهقت لما شافته بوسط غرفتها : وش تسوي هناا اطلع برااا عمر اشر ع الطاوله : انا دقيت ع الباب ومافي احد ودخلت خليت لك الوجبه هنا وطالع اساساً أمنية تشد روبها وتحمدالله انه واسع وطويل لو حق الصيف مصيبه : ماطلبت منك خذها واطلع ووالله لو تجرأت ثاني وجيت لغرفتي بتشوف شي عمرك ماشفته عمر يتأملها وكالعاده هالخد احمر : امم جبتها لواحد من العيال وطلع متعشي وتذكرت انك مااكلتي وقلت اعطيك اياها أمنية تناظره انا ماتكذب علي ياعمر اكشفك بسرعه .. ابتسمت بخبث وبنبره هاديه : طيب شكراً لك عمر صد عن ابتسامتها وشكلها الفاتن : عوافي وتحرك متجه للباب بيطلع .. وهي للحين واقفه عنده أمنية قبل يطلع نادته بشويش : عمر انا ماقصدت اليوم وسكتت وهي تشوفه يناظرها ويتقدم الخطوه الي بينهم .. عمر وبصوت واطي : ولا انا راضي بضرب امي لك أمنية رفعت عيونها له تناظره بدون ماتقول شي عمر ناظر عيونها شوي وراحت عيونه لخدها الاحمر بتردد ثبت يدينه ع خصرها وقربها منه .. نزل راسه وباس خدها بنعومه .. وظل ثابت يشمها وهي مابدرت منها اي مقاومه قرب من اذنها وهمهم بشي مو واضح .. حركت يدها الي ترجف وحطتها ع صدره حست بدقات قلبه السريعه .. دفته بشويش ومشاعرها بتعمي عيونها لازم يطلع .. السحر بينقلب ع الساحر عمر حس بدفتها .. وخر عنها وبدون مايناظرها طلع وصل لغرفته مثل البرق .. دار فيها وهو يستوعب الي صار ليش يقرب منها ليش يتنازل لهواه بلل شفاته وهو يحس ريحتها عالقه فيه وخاطره بااكثر .. ابتسم باارتباك واتجه للباب وفتحه وطلع .. رايح لسيارته يبعد ويتمشى شوي ويعود لعقله . * الصباح .. جالسه ع سريرها وبيدها جوالها تناظر الساعه وهي متأكده انه صاحي عشان الدوام بس متردده ومقهوره المفروض هو يتصل ويراضيها موهي ! صح نجلا علمتها بالي صار وصدقتها لانها تعرف أمنية هذي حركاتها .. بس التبرير مفروض يجي من عمر مو اخته تأففت واتصلت تقطع ترددها .. جاها صوته الثقيل : هلا ساره تعدل جلستها وتضم المخده : صباح الخير عمر طالع من البيت وبيده مفتاح سيارته فتحها من بعيد : صباح النور ا كنت بتصل وسبقتيني ساره ابتسمت براحه : ايه وش كنت تبي عمر : عن الي صار امس .. "رفع عيونه لشباك أمنية بعفويه شافه مفتوح والستاره تتحرك" ساره تنتظره يكمل بس لما طول بسكوته ..: ايه قالت لي نجلا عمر ركب سيارته وشغلها وهو يناظر شباك أمنية بقلق فاتحه الشباك في هالجو الباارد !!!؟ : زين ساره تنرفزت يتكلم بالقطاره : التبرير مفروض يجي منك مو من نجلا عمر اذا ماتبيني قول ترا محد جابرك بس انك تقعد كذا سافهني ابد ماارضاها عمر : ماني سافهك انا يعني قلت اخليك امس ترتاحين واليوم اكلمك وماادري ان نجلا كلمتك قبلي ساره شوي وتبكي : اصلاً لو مهتم كان مشيت وراي وبررت لي ع طول عمر حرك السياره وهو يتنهد : لاتلوميني انا وقتها كنت معصب وطلعت اصلاً ومارجعت الا اخر الليل ساره : شفت قلت لك هالعوبا مارح تخلينا فحالنا الا تخرب مابيننا شفت كيف تبلت عليك عيني عينك لاتستحي ولا تخاف من احد عمر : تمام ساره اكلمك وقت ثاني هالحين اسوق رايح الدوام ساره : تمام بالتوفيق ياقلبي عمر : وياك وقفل منها ورمى الجوال بجيبه وهو يفكر .. ياقلبي !!؟ هل فعلاً تشعر بهالكلمه او هم كذا البنات عاطفيات حتى بكلامهم .. تنهد وهو يفكر انه مايحس بأي انجذاب ناحيه ساره يحسها ثقيله ع نفسه عقله مستوعب هالشي بس مستصعب الخطوه خاصه انها عادي رضت تكمل معه حتى بعد الي صار يحس انه حقير لما وصل لفكره "يخليها تطفش منه" وش يعني ياعمر .. رضيت بأمنية !!؟ خلاص بتتبع قلبك وتسفه عقلك والمنطق .. * جالس ع الارض ياكل من العريكه الي جابتها جارتهم لشيهانه : ايه يومين وبرجع المدينه ماخلصت شغلي منيره : اييه وشوو شغلك هذا علمني يارجل سعود رفع راسه بطفش : ماني بزر تحققين معي خلاص عااد شيهانه جالسه ع السرير وحاضنه المخده والنوم بعيونها لازم ترجع بيتها صح ان عند امها مرتاحه بس ماتتنهى بالنوم كل شوي قاطعينها .. لفت تناظر سعود الي اكل نص العريكه : هااي بقي لي ترا انا مخليتها اكلها بعدين سعود : مين مسويها منيره : جارتنا ام حامد سعود قفل الحافظه : هذا الشغل السنع مو مثل الي عندي لاطبخ زين ولا وجه زين شيهانه صحصحت من القهر : اقول احمد ربك طوقه شايله البيت شيل جعله نوم العافيه مسكينه خلها ترتاح منيره : لو تنام بدري كان هالحين صاحيه بس ماغير هذره ع هالجوال مع خواتها سعود يرفع يده بتأييد لامه : عز الله انك صادقه خواتها لازم تعطيهم موجز كاامل عن يومنا شيهانه : مرره مااااشاء الله الاحداث الشيقه بيتنا محور الكون عشان يتكلمون بس فيه سعود وقف وقاطعها : اقوول ع شحمم "ولف ع امه" بنت منصور نايمه ؟ شيهانه كتمت غيضها فعلاً الله يعين طوقه عليه .. منيره بقلق : يمكنها نايمه ماشفناها وش تبي فيها سعود اتجه للباب : ولا شي شيهانه بعد ماطلع لفت ع امها : لارحت بيتي باخذ أمنية معي مارح اخليها عنده منيره اخذت الفنجان بتتقهوى : هي لو تلم لسانها محد جايها حتى عمر الي يدافع عنها ماسلم منها وشفتي امس شيهانه لوت فمها وهي تفكر تدري ان أمنية تتبلا ع عمر .. ماتلومها اكيد بتغار من ساره وتحاول تخرب بينهم الله يستر بس * منسدحه ع السرير بالعرض وتناظر السما من الشباك والغيمات البيضا المتفرقه .. مو حاسه ببروده الجو كل ماتجلس لحالها تحس بنفس الشعور .. عالم اسود كئيب قاعد يسحبها يسحبها يبيها تدخله وتضيع فيه .. جلست بسرعه : مارح ارجع لذيك الفتره المهلكه لا مااسمح الاكتئاب يموتني لاتفكريين امون لاتفكرين ريحي عقلك لفت للباب بخوف رغم ان الدق كان هادي .. غمضت عيونها واخذت نفس تهدي اعصابها : ادخل سعود فتح الباب وبهدوء : السلام أمنية ماتحركت من جلستها وبهدوء مترقب : وعليكم السلام سعود سحب كرسي التسريحه ولفه وجلس عليه : كلمني المحامي أمنية : ايه !؟ سعود : موافق ابيع لك نصيبي فالبيت أمنية بصدمه : ليه سعود : وش ليه مو انتِ تبين البيت كله لك خلاص موافق ابيعه لك وابي الفلوس كااش أمنية عدلت جلستها وفرحه داخليه تكتمها عشان مايستغلها .. سعود قاطعها قبل تتكلم : وهالبيعه ابيها سر بيننا لين تتم عاد مصيرهم يدرون أمنية : طيب بس مجرد مايصير البيت كله لي تاخذ اهلك وتدورون لكم مكان تسكنون فيه سعود وقف : اكيد مارح اسكن عندك أمنية كتمت ابتسامتها لين طلع وقفل الباب وراه .. وقفت وصارت تنط ع السرير وترقص ع الصامت .. وهي تتخيل كيف بتكون ردة فعل منيره واااه طوقه وربي لااطلع الكف من عيونك ونجيله المريضه هههههههههههههههههه اااه يالشعووورر جلست بتعب ووخرت شعرها عن وجهها : واخلع عمير ومايصير له حكم علي وينقلعو كلهم من حياتي رجعت براسها ع ورا وطاحت ع المخدات وغمضت عيونهااا : انا قاادره اعيش بالبيت لحالي قاادره مااخاف مااكتئب * ليله خميس .. وقفت اعلا الدرج وهي تناظر البزارين ماليين الصاله وصايره فوضى .. هذا غير اصوات الحريم من المجلس سوالف وضحك .. ولااحد معطيها اي اعتبار حتى عمتها شيهانه انشغلت مع بنات خالتها خوات طوقه ونستها ولاكأن البيت بيتها .. اييه بيتها كله ابتسمت وهي تنزل الدرجات ياهي عندها خبرر قنبله ماصدقت المحامي لما قال لها اجل عمي سعود متزوج بالسر من ثلاث سنوات وباع لها البيت واخذ فلوسه وهج لحرمته الي عنده منها ولدين وواحد منهم مريض ومحتاج علاج عشان كذا كان محتاج الفلوس .. هذا انسب وقت افجر القنبله قدام اخت منيره وخوات طوقه وبنات خالات نجيله وصلت اسفل الدرج وجا ببالها عمر الي طول هالاسبوع ماشافته ولا حاولت تتبحث عنه نفس زمان .. اليوم قالت للمحامي يقوله عن قضيه الخلع الي بترفعها خلاص دام انتهت من البيت الحين تتفضى له شافت البزارين يجرون لباب البيت : مطر مطرر بسرعه مشت وراهم وهي مبسوطه .. وقفت ع المدخل تناظر حبات المطر القويه والبزارين يلعبون ويصارخون بحماس .. طلعت من المدخل وحبات المطر تبللها .. فردت يديها ورفعت راسها للسما والمطر يضرب بوجهها .. غمضت عيونها وضحكت بسعاده .. والبزارين حولها صارت تدور وهي تضحك وتلعب معهم مبسوطه من جوا الله ي المطرر فعلاً يغسل الروح وينعشها .. طلع من مجلس الرجال لما سمع اصوات البزارين .. وقف عند الباب وعيونه عليها .. فستانها السماوي القصير يدور معها وشعرها الاسود الطويل تبلل كامل .. ضحكتها .. حركاتها العفويه لو ماسمع البزارين وهم ينادونها أمنية .. ماكان صدق ان هذي هي .. أمنية المدمنه المجنونه !!؟ الي ماخلو شي شين ماقالوه فيها .. بس يسمع اسمها يشفق عليها .. يذكرها وهي بزر كتله نشاط وذكاء كانت ماتحبه كل ماتشوفه تقوله "نايف الدب" تسحب لباب البيت طلع بدون ماينتبهون له وكويس ان الوقت ليل ومطر .. ركب سيارته وارسل لاخته فتون "حطيت اغراض امي بالمجلس ارسلي بزر يجي ياخذهم" رفع راسه الا هذا عمر جاي ووقف سيارته ونزل بسرعه بدون ماينتبه له .. تنهد براحه اشوا انه طلع من البيت قبل يجي ويشوفه يناظر زوجته ضحك : اجل يقولون تزوجها عشان عمه اقص ايدي اذا ماكنت ميت عليها من يشوف هالزين ويخليه هههههههه غير الدلخ تركي * عند مدخل البيت فتون تناظر أمنية بااحتقار بعد مادخلو البزارين عن البرد : هي الي طلعتهم معها فهالبرد المريضه خزامى واقفه جنبها وتشد الشال الثقيل ع كتوفها : هاااي حجيه ماتحسين البرد فتون بصوت عالي : ماعندها احساس صدقيني ولا في احد يلبس قصير وكت بالشتا خزامى ضحكت : هههههه ماتكون أمنية اذا ماطلعت جسمها تموت لو تسترت أمنية متبلله كلها والمطر صار ينزل بشويش ناظرتهم متنرفزه لازم ينكدون سعادتها .. راحت بسرعه للزرع اخذت من عنده حصى ورمته عليهم : انقلعوو عن وجهي فتون وخزامى صرخو بخوف وجرري لداخل البيت لاتفلقهم المجنونه .. * دخل البيت وهو مايشوف قدامه من العصبيه .. اجل ابوه باع لها البيت لاا وبترفع قضيه خلع وتتواصل مع المحامي تكلمه يسمع صوتها وتناقشه وقف لما شافها تاخذ الحصى وترمى ع بنات ودخلو .. اتجه لها بسرعه والشر يطلع من عيونه كانت معطيته ظهرها شد ذراعها بقوه ولفها عليه : شريتي البييييت أمنية حست قلبها بيوقف اولاً من وجوده المفاجأ لها والعصبيه الظاهره ع وجهه وصوته .. وبثبات بدون ماتحاول توخر عنه : حقي عمر يشد ع اسنانه ويدف كتفها بقوه لورا وهو يتكلم بقووه : وليش ماقلتي لي انااا اناا اخلص امورك الي تبينها كلهاااا مو المحامي باي حق تكلمينه هااه "دفها مره ثانيه وهي تمشي ع ورا وهو يتقدم" هااه رردي باي حق تكلمينه أمنية تحس كتفها بينخلع من قو دفاته .. وقفت وناظرته بقوه : ابوي يثق فيه رجال محترم وكلمته بااحترام ماكلمته اغازله صرخت بوجع لما شد ع فكها بيد وحده بقوه شوي ويكسره .. ويادوب طلع صوتها وهي تناظر عيونه الي تناظرها بكره : اتركني عمر يهز فكها وهو يهمس بشرر : والله والله وهذاني حلفت ياأمنية لو ادري بس انك تواصلتي معه لااذبحه قدام عيونك أمنية تضرب يده تحاول تبعدها فكها بينكسر لامحال مو قادره حتى تتكلم .. عمر دفها ع ورا ووخر عنها ويرفع سبابته يهدد : انا علمتك أمنية اخذت نفس وصرخت عليه وهي توخر شعرها عن كتفها بعصبيه : ماااالك حكم علي انا رح اخلعك تفهممم اخللعك ماااابيييكك * نجلا دخلت المجلس بسرعه : الحقوو عمر وأمنية بالحوش يتهاوشون شيهانه فزت بسرعه هالمره مارح تسمح لهم يأذونها وهي موجوده .. طلعت اول وحده ووراها طوقه وخواتها والبنات الكل بيشوووف الهووشه عمر يناظرها بحقد : انا الي مييت في هواك ي عيين ابووك كان قلتي لي طلق وابششري بدال هالخلع اناا الي ماابيك انااا "ويضرب ع صدره" انتِ ع ذمتي عشان طلب عمي فقط ولا انا خاطب ومبسوووط أمنية تحس الم بقلبها تكرهه تكرهه تقدمت له خطوه وبهدوء : طلقني الحيين طيب يله شيهانه تنزل درجات المدخل بسرعه : عمررر والله ان مديت يدك عليها يااويلك عمر وأمنية لفو لجهة الصوت وشافو الكل طالع وشيهانه وطوقه وراها يقربون منهم والباقي وقفو ع المدخل متفرجين .. طوقه : وش بعد متبليه ع ولدي هالمره يالعوبا أمنية ناظرت جدتها الي تنزل درجات المدخل بشويش وابتسمت بشماته هذا وقته : ولدك مقهوور عشان ابوه باعني نصيبه من البيت هالبيييت بيت ابووي والحق رجع لاصحابه الحمدلله عمر تقدم لها بسرعه وقفل فمها بيده بقوه ويناظرها بقوه وهمس خايف ع امه : لاتكمليين انطمي الله ياخذك أمنية تتحاول توخر يده وترفسه برجولها وتدخلت شيهانه : وخرر عنها اقولك وخرر كتمتها منيره : وشوو وش تخربط هالمجنونه باع عليها البيت !!! عمر وخر يده وغصب عنه ناظرها برجا وعيونه تتكلم " لاتكملين لاتجرحين امي قدام هالمتفرجين ".. شيهانه حضنت أمنية الي يادوب تتنفس : بسم الله علييك خذي نفس أمنية صدت عن نظرته .. وناظرت طوقه باانتصار : زووجك ياحلووه متزوج عليك من ثلاث سنوووات وعنده ولدييين هههههههههه طوقه ضربت صدرها : وشوو الكل شهق من هالخبرر وعلت الاصوات .. عمر راح لامه : يمه لاتصدقينها أمنية تقاطعه من وراه وهي تضحك : تكذب ع امك ياعميير شيهانه : اسكتي وش الي قاعده تقوليه عمررر صددق ؟؟ طوقه تناظر عمر برجا عمر حضن امه وماقدر يقول شي حتى هو مصدوم لما قاله المحامي للحين مااستوعب سوات ابوه .. منيره : كذاااببه شلون يبيع عليك البيت أمنية تقاطعها بقووه : بييييتي هذا الي انتِ عايشه فيه بيتي ولدك باع لي نصيبه وهج بالفلوس عند زوجته وعياله يااعمري يقول ولده الصغيرمريض ادعي له يالجده الحنونه طوقه تبكي بحضن عمر : سوود الله وجهه سوود الله وجهه هذي اخرت صبري يتزوج علي ويبيع حلال عياالي تفوو عليه ام منيف : قوومي ياام عمر لمي اغراضك وامشي معي مالك مكان بهالبيت منيره جلست ع الارض تستوعب المصيبه .. شلون خذلها سعود وتركهم لمذله بنت منصور وهو ادرى الناس فيها شيهانه وخرت عن أمنية وراحت لامها : بسم الله عليك يمه قومي معي داخل ارتاحي طوقه ناظرت أمها : اييه بروح معكم مالي مكان بهالبيت "وناظرت عمر" وانت كلم هالخسيس وقله ورقه طلاقي تجيني بااسرع وقت صرخت نجلا الي كانت تبكي بوسط البنات الي يهدونها : لاا تكفيين يمه لااا أمنية وبقلبها خوف كبير من عمر .. تحركت بثقه مصطنعه لمدخل البيت بتنحاش قبل يمسكها .. وناظرت الي واقفين عند المدخل وبالذات فتون وخزامى : وانتم برا من غير مطرود ودخلت بسرعه وجررري ع غرفتها توها تحس بالبرررد * حاولت توقف بس مافيها حيل رجعت جلست وانسدحت بتعب .. جسمها كله مكسر وتحس الجو باارد مووت وحلقها يوجعها ااه مو وقتها الحراره .. غمضت عيونها وهي تتذكر امس عمر قعد يدق ع باب غرفتها ويتحلف لها وهي مطنشته ماتدري وش صار بعدها وغصب عنها تحس بالخوف من عمر لانها اخبر الناس فيه اذا عصب ماعنده ياامي ارحميني كان صوته وهو يدق الباب امس مررعب ماتدري وش كان بيسوي فيها لو فتحت له الباب .. بس الي تعرفه ان عمر من كبر ماقد مد يده ع بنت.. يكسر يصارخ يعاقب بس مايضرب يمكن لانه عانى كثير من ضرب ابوه له اووف انا وش قاعده افكر انا تعبانه بردانه اررجف لو اموت محد اهتم فيني .. محد يحبني .. انا لحااالي سحبت جوالها من تحت المخده .. ودخلت ع رقم عبدالرحيم الي سجلته من كم يوم من جوال ابوها .. كان بتكلمه بس هونت بس الحين لازم .. كتبت .. " السلام انا أمنية الي محسوبه عليك اخت انا احتاجك اكثر من اي وقت مر لو ماجيت صدق بنسى هالاخوه ولااعترف فيها بيوم " واتصلت ع سومرا .. سومرا : هالوو أمنية وصوتها رايح : وين عمر سومرا : مافي موجود أمنية : انا تعبانه سومرا سوي لي شوربه وهاتي لي بنادول وليمون سومرا : تمام أمنية قفلت منها وشافت رد عبدالرحيم استغربت السرعه " وش صاير معك " أمنية " اذا جيت تشوف " عبدالرحيم " ابشري بس اتفاهم مع ابوي اول واخذ اجازه " أمنية " شكراً " * نهايه الجزء الرابع .. |
والله هاد امنية حكاية بس احس احيانا انهم يزيدون فيه يعني كلو على خد امنية ...لكن اتمنى عبد الرحيم يكون ليها عون ...تسلمي عل بارت موفقة باذن الله |
بصراحه طوقه فاجئتني كانت هي الوحيده اللي تعرف الحق وماترضى بالغلط واسلوبها مؤدب فجأة اليوم ظهرت طوقه ثانيه لاتختلف عن سعود قبل بيوم اتصلت بعمر الحق ابوك يضرب امنيه ثاني يوم تقف وتصرخ وتغلط وتضرب امنيه عائله كلها بهم انفصام كل يوم تصرفهم شكل تقلب الشخصيات يسبب لي لخبطه ولا افهمهم ساره فعلا مظلومه وسط كل مايجري انحسب عليها زواج وهي لاذنب لها اذا عمر اختار امنيه |
اقتباس:
الله يسلمك ياقلبي .. ظهور عبدالرحيم فالبارت الجاي ان شاءالله ونشووف😁 |
اقتباس:
اقتباس:
هلاا والله امم مااشوف تقلب بالشخصيات عادي طبيعي في ناس كذا يعني طوقه من هم صغار وضحت ان اهم ماعندها عيالها ولاترضى عليهم تشوف أمنية تتبلا ع ولدها وبعدها تضرب بنتها وردة فعلها تدافع ومو شرط ردة الفعل صحيحه او خاطئة مافي احد معصوم وفعلاً ساره مالها ذنب بالي يصير 🥺💔 |
وين البقيه يعني المشاهدات حلوه اتركو تعليق طيب🥺 |
( ( الجزء الخــــامــس )) × اوكلما وجهت قلبي وجهة ياتي غرامك اول الوجهات اوكلما انوي التجلد جئتني في الصمت في الالهام في الغفوات اوكلما انوي الخصام رمقتني فتراجعت وتخاذلت نياتي ماانت ياهذا ؟ لعبت بهيبتي خالفت فيك مجامع العادات × نجلا تمسح ع ظهر امها : يرجع وتتفاهمون بس الطلاق لا اماانه عمر جالس ع يمينها : اذا ماتبينه خلاص عيشو مفترقين بس بدون طلاق ع اخر عمركم وش تبين الناس تقول طوقه : طول عمري متحملته واداريه وهذي اخرتها يتزوج ولا حتى عبرني وقالي 3 سنيين مخبي علينا ميين هالي ماخذها نجلا : مايهم يمه مرده بيرجع لك صدقيني انتِ اصيله ومحد فاهم ابوي ويصبر عليه غيرك طوقه : ماابيه يرجع لي انا عفته ماابيه عمر حط يدينه ع جبينه وتنهد بتعب من البارح مانام .. طوقه : شفت بنت عمك الي تدافع عنها كيف تشمتت فينا وطردت خالاتك قليله الادب عمر بضيق : شايف طوقه : ودامك شايف ليه ماتطلقها وخل تشبع في بيتها تمووت لحالها نجلا : أمنية تغيرت ياعمر ماهي نفسها الي زمان صايره لاتطاق عمر يصد بنظراته عنهم وبهدوء : مااقدر اخليها لحالها عمي طوقه قاطعته وهي تضربه ع صدره : عمي وعمي بلا نصب انا ادري ان هذا علتك "وتضرب ع قلبه" طلعها منه لاتحرقه هالبنت ماوراها الا الاذيه عمر يشد ع يد امه : لا ماله علاقه انا افكر بعقلي اذا طلقتها كيف بتعيش لحالها ؟ جدتي لمت اغراضها وتبي تروح بيتها فالديره ولاتعيش بمذله بنت منصور ع قولتها يمه انا للحين مو عارف شسوي مااقدر اخلي بنت عمي تعيش بروحها حتى دخلتي البيت وهي بروحها غلط وانا مابعد اعرست عليها قدام خلق الله نجلا : يااويلك ياعمرر ياويلك تعرس عليها قبل ساره والله تموت بقهرها البنت عمر تايه : وش اسوي حاولت في جدتي تجلس معها رفضت وانتِ يمه مو راضيه ترجعين نجلا تمسك يدين امها : ارجعي يمه ماعلينا منها وحتى لو البيت بيتها بنبقى فيه غصب عنها نتحمل يمه عشان ساره انتِ تحبينها طوقه تناظر عمر : متى ناوي تعرس ع ساره عمر باانفعال طلع من كثر ماكتم : شلون بعرس عليها وعمي ماصار له فتره متوفي طوقه : توك تقول تفكر تعرس ع أمنية عمر : ماقلت اعرس عليها بس وضحت لك الوضع طوقه : ومتى بتعرس ع أمنية عمر ناظر امه وهو يحس انه مجهد تايه : مدري طوقه صدت عنه وهي فهمت وش بخاطره مهما انكر هو يبي أمنية اما ساره مافكر فيها اصلاً .. نجلا : هاا يمه ترجعين طوقه تنهدت : مو اليوم محتاجه ارتاح عند امي شوي عمر وقف : ع راحتك يله نجلا * دخل صفحتها وصدف انها توها منزله تغريده من دقيقه .. " صداع وارق من التفكير اتمنى انام وارتاح " شوي كذا حذفتها ونزلت تغريده جديده " للحين مو مستوعبه الي صار حياتنا ع جرف شوي تنهار كله منها الحيه انا ماادري شلون كنت احبها وبصفها دايم " صار يحدث كل شوي صفحتها .. تفضفض وتحذف وحمداالله انه صدف هالفضفضه عشان يفهم مبين ان صاير عندهم مشكله .. ولازم يقنع ابوه ويجيهم من الصباح ان شاءالله بيروح له يتفاهم معه " جدتي بكره الصباح بتروح الديره لو ماعندي جامعه كان رحت معها وارتحت " " الا ساره مااسمح لاحد ياذيها حتى لو انه كان اخوي " " بس واضح وضوح الشمس عمر مايبيها احسني محتاره اقول لساره واخليها هي الي تتركه بكرامتها قبل يتركها هو " " هو الغبي الي مدري وش يحب فالعوبا امون يحبها واضح ورربي مهما انكر كنت اسمع ان قلبك يحب شخص انت نفسك مو عاجبك هذا الشخص وشلون تحبه ماتدري .. ماكنت استوعب هالشي " " الا لما شفت عمر الله يرفع عنه ولا يبلانا " " اووف لازم اقفل الجوال وانام تعبت وربي " وحذفت كل الي كتبته .. وجلس ينتظر يمكن تكتب شي بس تأخرت ماكتبت عرف انها قفلت جوالها .. * وهو بعد بغرفته مو قادر ينام مع انه طول ليله امس صاحي ونام بس ساعه بعد الظهر .. والحين الساعه 11 بالليل مفروض يصير طاافي وينام بسرعه بس يحس بقلق .. جدته تقول ماشافتها اليوم ابد ولا نجلا كلفت ع نفسها تطل عليها حتى عمته شيهانه راحت بيتها جلس وحط راسه بين يدينه كارهها وحاقد عليها كثييير مو شوي بس مايقدر يتجاهلها وهو مو عارف كيف وضعها .. ليش مانزلت اليوم مو هي مبسوطه ومتشمته فيهم .. كيف تفوت الشماته في جدتها وماتنزل تشوفها !!؟ رمى لحافه ونزل من السرير .. واتجه لبابه فتحه وطلع يدري انه مارح يرتاح الا اذا تطمن عليها ليه يضيع الوقت .. طلع الدرجات بسرعه وعند اخر درجه قرب يتزحلق بسبب شراباته تثبت ومشى لغرفتها المقفله .. وقف عنده وبدون تردد .. دق الباب بشويش ومافي رد .. دق مره ثانيه وثالثه ورابعه .. عاد الحين مالها عذر حرك يد الباب وهو يدعي انه مو مقفل بالمفتاح .. حس براحه لما فتح معه الغرفه ظلام ماغير نور الابجوره عند السرير .. وهي متلحفه دخل يمشي بشويش مايبيها تحس فيه يبي بس يتأكد انها نايمه .. بس وقفت عيونه ع الطاوله عليها صينيه فيها شوربه ماكول منها قليل وليمون والبنادول استوعب انها تعبانه .. جا في باله شكلها امس كلها مبلله من المطر .. من العصبيه مااستوعب انها شلون طالعه كذا فالبرد جلس ع ركبه عند السرير .. مد يده بشويش ع جبينها همس : اووف مرتفعه أمنية اصحي أمنية ولا كأنه يكلمها متعمقه فالنوم .. مسد خدها وهو يتأملها براحه اول مره يشوف وجهها كذا صافي مافيه علامات ضرب .. مسد خدها الثاني بشويش ورقبتها .. تنهد وهو يحس قلبه ينقبض بوجع كيف كذا يكرهها ويحبها بنفس الوقت .. يمسح ع شعرها ويرتبه وهو خاطره يشده بقوه ويوجعها يتذكرها كيف تجاهلت رجاه وعلمت عن ابوه بكل شماته .. ليه الحين يرحمها وموجوع قلبه ع هالحراره الي لاعبه فيها تستاهل ماجاها والله تستاهل بس قلبه الي مايدنا عليها تكه وش يفهمه : يااربي ارحمنيي أمنية تحركت وهي تتمتم .. شوي فتحت عيونها الي واضح فيهم التعب ناظرت عمر بعدم استيعاب .. جالس ع ركبه عند سريرها ووجهه قريب عمر وخر يديه وهمس : حرارتك مرتفعه حيل من متى نايمه انتِ أمنية رجعت براسها ع ورا تبعد عنه وهي مو عارفه اي وقت الحين مضيعه .. عمر لف بيده للطاوله اخذ البنادول ومده لها : خذي لك وحده الحين أمنية سحبت جسمها بثقل وجلست واخذت منه الحبه عمر ناولها كوب المويه وهو ساكت .. اخذته منه واخذت الحبه وشربت وراها عمر : قومي تروشي او حطي لك كمادات عشان تنزل الحراره أمنية وتحس مافيها طاقه همست وصوتها رايح : مالك دخل فيني عمر ضحك بتعب : اتقي الله يابنت أمنية رغم تعبها مدت يدها تأشر ع الباب : متقيه ربي قبل اعرفك برا عمر وقف وبسط يده ع صدره : سويت الي علي وبريت ذمتي يله سلام أمنية تناظر ظهره وهو رايح للباب .. لاتضعفين امون صح انه حنون حييل امس كان معصب ويهاوش واليوم يمسح عليك بحنيه بس لاتضعفين لاتضعفيين خل ينقلع لسارته ماابيه .. عمر وقف عند الباب ولف عليها : تعبك عقاب من الله ع سواتك بس برضو ماني ناسي الحساب بعدين أمنية حطت يدها ع حلقها يعورها وتحاول تعلي صوتها تسمعه : اعلا مافي خيلك اركبه عمر ناظرها بقهر وطلع وصفق الباب وراه حتى وهي مريضه لسانها شطوله .. رجعت حطت راسها ع المخده ونزلت دمعه سريعه .. ليش انا كذا مااعيش بدون مشاكل .. وش فيها لو تعاملت معه بلطف ولااحرم نفسي حنيته هو الوحيد الي جاني واهتم فيني ليش اتعامل معه كذا يقولي انا خاطب ومبسوط ياالله انا شلون بفرط فيه .. اعذرني ياعمر انا حبك ماتشافيت منه ايه اعترف اعذرني لاني بخرب هالبسطه الي حاس فيها مع ساره والله مااخليها تاخذك وتهنى فيك * بعد يومين .. يتقهوى مع عمر في مجلس الرجال .. يحس عمر مو طايقه وكاره جيته بالعافيه يتكلم معه عمر يحس نار بصدره العقل والمنطق رافض تفكيره بس غصب عنه مو قادر يتقبل وجوده هو ماقد شاف أمنية حتى بعزا عمه ماشافها بسبه نفسيتها التعبانه ..عهده فيها وهم صغار كيف كذا يجي ويقابلها عادي وانها اخته .. عبدالرحيم يناظر ساعته وكأنه يكلم نفسه : قالت خمس دقايق وتجي صارت عشر عمر لف للباب بسرعه لما شافها دخلت وحس بشويه راحه لما شافها بتنوره وبلوزه وجلالها الطويل جزء بسيط منه مرفوع ع راسها والباقي نازل ع كتوفها وظهرها .. أمنية نقلت نظراتها بينهم ووقفت ع عبدالرحيم الي تعرفه من الصور : السلام عبدالرحيم ابتسم وهو يتأملها تغيرت كثيير : هلا وعليكم السلام أمنية جلست قبال عبدالرحيم وعمر ع يمينها بدون ماتسلم باليد تحس انها مستحيه وكأنه غريب مو اخوها اصلاً لو ماهي محتاجته ماكان اعترفت بهالاخوه .. عبدالرحيم : شلونك أمنية أمنية بهدوء : بخير انت كيف حالك عبدالرحيم : تماام الحمدلله أمنية لفت عمر : ممكن تتركنا بروحنا انا واخووي عمر ناظرها وبكل هدوء وجديه : لا مو ممكن أمنية ناظرتنه متنرفزه : اخوان وبينهم موضوع خاص تفضل لو سمحت عمر ثابت بمكانه وببرود : انتِ زوجتي مابيننا خصوصيه أمنية ارتبكت من الكلمه جات بقلبهاا ومااحلاهاا .. بس حاولت تبين عادي : زوجتك بااحلامك ياحبه الهيل فالرز عمر ابتسم بتسليه : قولي الي عندك مانيب طالع عبدالرحيم يتبسم : ياالله رجعتوني للطفوله نفسكم ماتتغيرون للحين مناقر خلاص عاد كبرتو أمنية : هو الي بدا عمر : هي الي بدت كلهم سكوت وناظرو بعض لما تكلمو بنفس الوقت .. عبدالرحيم ضحك : ههههههههه خلف الله ع عيالكم أمنية صدت والخجل بان بوجهها ونظراتها .. عمر يتأملها مفتون ويلهم من الله كيف يقولون لي طلقها هم مايشوفون الي اشوفه !! لهالدرجه عمييان !؟ أمنية ناظرت عبدالرحيم بجديه تخفي ارتباكها ودقات قلبها المزعجه وهي حاسه بنظراته عليها : هالبيت صار كله لي وجدتي راحت الديره ولا عمي موجود ولارح اسمح له اصلا يعيش ببيتي عمر صد عنها وهو يكور يده تبي عبدالرحيم اخوووها هاه اخوها يسكن عندها ببيتها أمنية تكمل بدون ماتناظر عمر : ابيك انت اخوي تسكن معنا عمر مو دايم رح يتزوج ويروح والبيت يحتاج رجال عمر ناظرها وعيونه تحمل الشر .. ليه ؟ ليه تزيد بأذيته ووجعه ؟ وقف ولف ع عبدالرحيم : خلك معها يااخوها لان انا مو عاجبني اني جالس ببيتها بس ماقدرت اتركها بروحها "وناظر أمنية" بطلع واخذ امي واختي معي لاتشيلين هم وطلع من المجلس بسرعه .. أمنية بدون شعور فزت وطلعت وراها .. مسكت يده : تاخذهم وين تروحون كذا فجأه انا ماقلت تطلعون انا بس ابي اخوي عمر سحب يده منها وهو كارهها هاللحظه : لانلعب ع بعض من زمان وانتِ تنتظرين هاللحظه كلنا نذلف عنك أمنية رجعت مسكت يده بقوه : لا عمر والله انا قصدي عمي وجدتي هم اذوني كثير بس انتم عادي خلوكم نتهاوش صح بس انا احب نجلا وامك لاتاخذهم تكفى عمر : ابوي وجدتي مايهموني بس الا امي ونجلا مااسمح لك تذلينهم أمنية تقاطعه والدموع بعيونها : مااذلهم والله احبهم انا اموت لو بقيت لحالي عمر انت تبي تجنني انا اخاف من الوحده اخاف اكتئب وارجع لتعبي ماابي والله اموت عمر حنت ملامحه وهو يناظرها وبهمس : بعيد الشر أمنية برجا وتشد ع يده : لاتاخذهم عمر تنهد وهو يرفع عيونه للسما ويرجع يناظرها : طيب بس انا مالي مكان هنا أمنية بكت وحطت يدها ع فمها تمنع صوتها وهي صاده عنه .. عمر حرك يده الي مو ماسكتها قدام وجهها كان بيمسك ذقنها بس تردد وبقت فالهوا : ليه تبكين الحين ؟ أمنية كتمت بكاها الي بيزيد من حنيه صوته وناظرته : لاتروح انت بعد عمر سكت وهو يناظرها وقلبه طبول .. أمنية : انسى ان البيت صار لي عادي خليك نفس ماكنت عمر بجديه : ماتدفعين ريال انا الي اصرف ع البيت وعطيني وعد هالحين ماتتواصلين مع المحامي لو وش ماصار أمنية بسرعه : وعد وعد ابشر بالي تبيه عمر اخذ نفس : وشي ثاني بعد أمنية تناظره : ايه ؟ عمر وعينه بعينها ووطى صوته تو تذكر رحيم ممكن يسمعهم : ماتطلعين لعبدالرحيم الا كذا محتشمه أمنية ناظرته مستنكره : اييش !! عمر بتأكيد : لااشوفك طالعه له بنفس نوعيه ملابسك الي شفتك فيهم المرات الي فاتت أمنية همست بااحراج : اخوي تراه عمر ورجعت النار بصدره : للحين ماتأقلمت ع هالاخوه اعذريني أمنية وقلبها يرفرف يارربي يغاار علي والله يغاار لو يقولي الحين البس خيشه بقوله حااضر : طيب عمر كور يده ومدها قدامها ع طول ابتسمت وكورت يدها وضربت يده من فوق وتحت .. نفس ماكانو يسوون وهم صغار لما يتفقون * بالليل .. وقفت عند باب غرفه عمتها بتردد .. تروح وترجع .. اخرتها وقفت ودقت بشويش سمعتها تقول : ادخل ياعمر أمنية ابتسمت وفتحت الباب وناظرتها : أمنية طوقه الي كانت جالسه ع سريرها وتقرأ كتاب قفلته وناظرتها بهدوء : وش تبين أمنية تقدمت لوسط الغرفه وهي لافه يديها ورا ظهرها : امم ابي نبدا صفحه جديده مع بعض طوقه : عشان ؟! أمنية : مو عشان شي بس ابي نعيش مع بعض بهدوء بدون مشاكل انا مااتشمتت فيك ياعمتي انا بس وريتك حقيقه عمي انا ارتحت منه الحين ومن جدتي الي ادري انها اذتك اكثر من امي الله يرحمها خلينا نعيش متهنيين بعدهم طوقه : ارتاحي بنصير مسالمين ببيتك انا جالسه هنا عشان عمر بس وبتحمل أمنية مشت ببطء وجلست ع طرف السرير : تتحملين وشو انا ابيكم معي انا مااقدر اعيش لحالي اعتبريني بنتك انتِ كنتي تحبين امي خليك معي عشانها طوقه لمعت الدموع بعيونها : الله يرحمها انا مااكرهك ياأمنية بس افعالك ولسانك ماينصبر عليهم أمنية تربعت فوق السرير وابتسمت بفرحه : بحاول اتعدل طوقه ابتسمت تحسها للحين بزر .. أمنية : احضنيني طيب طوقه فتحت يديها : تعالي الله يصلحك أمنية ارتمت بحضنها وهي تتبسم براحه .. تبي تنام هنا خلاص * وفالمجلس .. قفل جواله بعد ماكلم امه وقالت تجيهم بكره والحمدلله مازعلت تفهمت انه بالعافيه اقنع ابوه يجي وهو شرط عليه مايروح بيت زوج امه اذا جت هنا يشوفها .. انسدح بفراشه وغمض بروقان له زمان مااخذ اجازه طويله .. حلو يغير جو هنا ومنها يستعرض شوي عند نجلا يبيها تنتبه له .. لانه خلاص توصل ان هي البنت المناسبه الي يبي يكمل حياته معهاا يعجبه تفكيرها اهتماماتها يحس انها نفس المود وفعلاً اذا بيرجع للطفوله بيشوف انه كثير ينسجم معها باللعب رايقه ومرنه فالتعامل .. بس ماهو مستعد هالحين للزواج واكبر عائق ابوه لازم يمهد شوي .. وبهالوقت يبي يلفت انتباهها يبيها تتمناه واول حركات الصيد يحسن علاقته بااخته .. ضحك لتفكيره : ههه وهي سفهتني لما ارسلت لها يااخي قولي ماابي طيب ياليييل الثقل لف ع يمينه وتغطى وهو يتمتم : نام نام بسرعه لازم اصحى واترزز وتشوفني قبل تروح جامعتها * الصباح .. نزلت الدرج وهي لابسه عبايتها وطرحتها ع كتفها .. مستغربه صوت الضحك الي جاي من المطبخ همست : أمنية وامي !! والله ضحكهم شصاير قربت من المطبخ وعلامات التعجب تزيد .. وقفت ع الباب تناظر امها واقفه مع أمنية عند الغاز تعلمها تسوي بيض أمنية تحرك البيض : بس كذا بيض وملح وبهار هههههه احسك تخدعيني طوقه تضحك : هههههههه خلف الله عليك هذا البيض المقلي الي تحبينه شفتي كيف سهل أمنية : طيب كيف اعرف انه جهز طوقه لفت بتجلس وشافت نجلا واقفه ع الباب تناظر بتعجب : يكون نفس شكله لما تأكليه نجلا بهدوء : صباح الخير طوقه : صباح النور تعالي افطري نجلا ماتحركت من مكانها : لا صحباتي جايبات فطور وبفطر معهم أمنية قفلت النار وحطت البيض بصحن وحطته ع الطاوله وناظرت نجلا بغرور مصطنع تضحك : لايفوتك البيض حقي نجلا تمسد بطنها : لا ماابي اتسمم أمنية لفت ع عمتها : جاهز صح مو ني ؟ طوقه تناظر البيض : ايه جاهز بالعافيه نجلا عطت امها نظره استغراب ولفت بتروح : يله مع السلامه يمه طوقه : بالتوفيق نجلا وقفت عند مرايه المدخل تلبس طرحتها ونقابها وهي مستغربه تغير أمنية .. هذي أمنية القديمه الي كانت تحبها وكأنها اختهاا .. ابتسمت وبداخلها تدعي يارب ماترجع لأمنية الكريهه ناظرت جوالها لما وصلت رساله من صحبتها فاطمه "انا قريبه من البيت اطلعي" دخلت جوالها بشنطتها وطلعت .. كان جالس عند الشباك وبس سمع صوت فتح باب البيت الداخلي .. طلع بسرعه من المجلس .. لمح الي طلعت بعباتها ومنشغله في شنطتها تحرك بااتجاه باب البيت الخارجي وهو يلبس نظارته السودا وكأنه طالع مو منتبه لها هذي نجلا اكيد من غيرها يداوم الصباح .. خلها تمقلني زين هههههه نجلا تبطأت بمشيها لما انتبهت له ونزلت الغشوه ع عيونها وارتاحت انه ماانتبه لها .. وقفت تنتظره يوصل للباب ويطلع بعدين تطلع هي بعد مايروح عبدالرحيم هو بعد تبطأ بمشيه ومسوي انه منشغل بجواله يبيها تمشي وتعداه بس ابد مايسمع ولا حركه وراه الظاهر انها رجعت البيت !! نجلا تأففت بدون صوت شذاا يمشي ع بيض !! اطلع ياخي خلصني اووف الحين تجي فطوم عبدالرحيم وقف عند باب البيت بدون مايفتح الباب ويناظر جواله .. ماحس الا والباب ينفتح ويضرب براسه .. رجع ع ورا متألم حييل شيهانه صرخت : يمممه بسم االله علييك وش موقفك عند الباب ورني اشووف بسم الله ع وليدي عبدالرحيم يمسح ع راسه مكان الضربه متألم وغصب عنه لف ورا وهو منحرج هذي نهايه الترزز .. شافها واقفه وحاطه يدها ع فمها من فوق النقاب .. نجلا الي كتمت شهقتها رحمته الضربه قوويه مبين .. انتبهت انه يناظرها بسرعه نزلت يدها وتحركت بتطلع وقفتها غبيه .. شيهانه تحضن وجهه بيدها وتلفه لها : يارروحي والله مادريت عبدالرحيم يقاطعها وهو يحس راسه يدور : عادي فدااك لاتهتمين شيهانه انتبهت لنجلا الي قربت ووقفت بتردد كيف بتعدي وهم ع الباب وتسلم ع عمتها ولا لاء .. شيهانه فهمت عليها وبتستغل الموقف تركت عبدالرحيم ولفت ع نجلا ومدت يدها : ياسعد عيني هالصباح عبدالرحيم ونجلا نجلا مدت يدها وسلمت ع عمتها بدون ماتقول شي تبي تخلص وتطلع بس عمتها مو فاكتها اخذتها بحضنها عبدالرحيم يناظر امه الي تمسح ع ظهر نجلا وتناظره .. حس وقفته غلط واحرج البنت وامه مبين مستغله الموقف وترز نجلا قدامه .. لف ومشى للمجلس بدون مايقول شي يعني البنت اول وقفت تنتظره يطلع ويبعد عن طريقها عشان تطلع وامه تمسكها وتحضنها قدامه بتنقد عليه اذا ظل واقف يناظر كذا يروح احسن عشان تعرف انه محترم ويعجبها .. شيهانه دخلت المجلس شافته جالس : شفتهاا هذي نجلا رايحه الجامعه ماشاءالله خريجه هالسنه عبدالرحيم : يمااه اشوف نجلا نستك تسلمين علي شيهانه ضحكت وقربت منه وحضنته : شلوون مااسلم ع وليدي والله اني مبسووطه بجلستك هنا ماتشوفني جايتكم من صباح الله خير عبدالرحيم يضحك وهو يلمها بشوق : الله يحفظك لي شيهانه وخرت وهي تناظره : بس عاد شوفتك انت ونجلا سوا شعلت قلبي اي والله قلي قلي وش رايك فيها عبدالرحيم تأفف : هو انا شفت شي !؟ ماطالع منها الا يديها شيهانه : مسووي فيها نااسي صورتها انا هالحين اقصد طولها وجسمها عبدالرحيم : شيليها من راسك يمه وكل فكره الزواج مأجلها كم سنه شيهانه بحزن : ماتبيني افرح فييك عبدالرحيم : بدري ع الزواج يمه توي 25 وش مستعجله عليه شيهانه : اخاف نجلا تروح عليك عبدالرحيم يمسح ع راسها : نصيبي باخذه سوا نجلا او غيرها ريحي باالك * يلف ع نفسه والجوال ع اذنه وهو متنرفر ويحاول مايبين بصوته الا الاحترام : حقك وادري ان الشرع حلل لك اربع بس ليه تخبي وبعرف هالحين انت وين سعود : انا موجود بجده بس ماني فاضي لكم خلاص قروشتوني ولدي تعبان وبين المستشفيات مراجعات ماعندي وقت انت واختك كبارماانتم بحاجتي عمر : وامي مافكرت فيها ؟! سعود : وش تبي امك بعد ! هذاني مخليها ع ذمتي معززه مكرمه عمر غصب عنه علا صوته : وين معززه مكرمه وانت بعت البيت عشان مصلحتك ولافكرت بامي ونجلا حتى امك !! سعود صرخ معصب : كل شي علي انااا بعت البيت عشان اعالج اخوك يالكل.. وانا مخلفك لييه مو عشان تنفعني لاكبرت هذا انت توظفت ولا استفدت منك خل امك ع الاقل تستفيد اشتر لها بيت وضفها بدل مااتنقد علي لاابو ذا الوجه ابي اعيش حياتي واتهنى اذلففف يله نااقصك انتِ وامك الي ماحلاها ربي صااابر عليها سنيييين خلووني اتهناا وقفل الجوال بوجهه .. وهو يسب ويسخط واقفه ع حافه الباب ومكتفه يديها : وش يبي ولدك سعود لف عليها : ماهم فاكيني من شرهم وراي وراي خلاص بعيش حياتي يبون يموتوني وانا حي شهد ابتسمت : شفت قلت لك من زمان بيع البيت لاخوك واتهنى بالفلوس قبل يتهنون فيها عيالك سعود يمسح ع شعره : اييه الله يرحم منصور ويغفرالله والله اني عفت البيت بعده شهد : اميين يله عاد قوم حجزت لنا نتعشا بمطعم وبودي العيال عند امي ونروق سعود ابتسم بسعاده : ياحي ذا الوجه الزيين * عبدالرحيم : لا ماتدخل البيت ع كيفك بعد ماتعرس ع اختي ذيك الساعه درعم وقت ماتبي عمر وكأن هذا الي ناقصه شد ع اسنانه : رحيم اذلف عن وجهي ابي اميي وخررر عبدالرحيم وخر عن طريقه لما شاف عصبيته .. يتقي شره هاللحظه ويتفاهم معه بعدين . عمر تحرك بسرعه لمدخل البيت وفتح الباب ودخل شاف بزارين عمته بالصاله .. وسمع اصواتهم فالمجلس راح له وبدون اي مقدمات ناظر امه والقهر بعيونه : الحين تكلمين ابوي وتخلينه يطلقك ووالله مايذلك وانا عايش طوقه تناظره بصدمه وش غير رايه .. شيهانه : تعوذ من ابليس ياعمر وش صاير أمنية جالسه وجنبها نجلا كلهم يناظرونه بقلق .. كلامه .. عصبيته .. عمر وعيونه ع امه وبقوه : ماتبينه صح ؟؟! مو قلتي تبين تتطلقين منه وهونتي عشاني انا ونجلا خلااص انا اقولك هالحين تطلقي منه طوقه بتوتر : وش تغير انت كلمته عمر : اييه خسيس ونذل مايستاهلك شيهانه بصدمه : استح على وجهك كيف تقول عن ابوك كذا أمنية تتأمله مفتونه اييه انا عكس الناس من زمان يعجبني اذا عصب كيف ملامحه نظرراته صوته وحركاته شي يشلع القلب .. عمر لف ع عمته وبنفس النظره القويه يأكد : خسيس ونذل أمنية بالعافيه حاولت تمنع ابتسامتها .. ع وجه عمتها الي قمط طوقه : ايه ماابيه ودامك موافق ولابتزعل مني اكلم خوالك يتفاهمون معه ونتطلق نجلا ببرود متكتفه : هو وافق وانا بالجدار يعني ؟! طوقه وقفت واشر لنجلا : بعدين "وراحت وقفت قبال عمر تحاول تهديه " اهدى وعلمني وش قالك ليه عمر يقاطعها باس راسها : لايهمك ولف طالع بسرعه .. طوقه جلست وشوي وتبكي : حسبي الله عليه من رجال كانه ضيق خاطر وليدي شيهانه ضربت ع فخذ أمنية : الحقيه يمكن يقولك طوقه ناظرت أمنية الي تناظرهم متنحه : اي باالله حاولي تخلينه يتكلم لايكتم أمنية وقفت وناظرتهم بتردد ولفت بسرعه تلحقه وهي عندها فضول بعد .. وقفت عند المدخل شافته رايح لسيارته الي موقفه بالمظله : عمررر عمر وقف ولف يتأكد أمنية تناديه صوتها !!؟ ناظرها واقفه ع المدخل .. تحركت بسرعه له أمنية وقفت قباله وهي تشوف الضيق بوجهه : وين بتروح ؟ عمر رفع عيونه للسما وتنهد : بطلع اشم هوا أمنية : حتى انا بشم هوا اممم تجي نجلس هناك واسوي لنا شاهي عمر ناظر الجلسه الي اشرت عليها بيمين البيت : مالي نفس شكراً أمنية مسكت يده لما لف بيروح وناظرته برجا : بدون شاهي طيب عمر حس ببروده يدها : الجو بارد أمنية ادخلي انا بطلع شوي وارجع مارح اطول أمنية بزعل تركت يده : طيب عمر يناظرها وهي تلف وتروح ومنزله راسها علا صوته عشان تسمعه : انتظرك هناك سوي شاهي وتعالي أمنية ابتسمت بدون ماتلف عليه تحركت للبيت جرري .. قابلتها شيهانه بسرعه مسكت يديها : تكفيين عمتوو سوي كوبين شاهي بسررعه شيهانه : لييه وش صار تكلم عمر أمنية برجا : اماانه شاهيي ماصخ وهو ينتظرني يبي شاهي شيهانه : طيب طيب أمنية طلعت لغرفتها تجري .. طلعت شال كبير ثقيل بني لفته ع كتوفها .. وجلست تلبس شرابات وجزمات لازم تتدفى عشان تطول معه بالجلسه ماتبرد ناظرت نفسها بالمرايه مرتبه بنطلون والشال واصل لنص فخذها .. وشعرها فاكته من اول حمدت الله عشان مايقول فكته عشاني امم اخذت طاقيه صوف بيج تليق مع الشال لبستها ورتبت شعرها الطويل ع كتفها .. اخذت العطر بخت عليها كم بخه ونزلت لعمتهاا * جالس ينتظرها وهو يتأمل هالجلسه الي كان يجلس فيها مع عمه الله يرحمه هو الي كان له الاب والسند .. شافها جايه وشايله صينيه صغيره فيها كوبين .. وتتبسم يامحلاها وهي رايقه مايلومها لما حاولت تبعد ابوه من حياتها حتى نفسيتها اعتدلت بعده .. جت في باله صورتها لما كانت طايحه في ابوه ضرب .. ضحك ضحكه بسيطه ع تفكيره حلال فيه الضرب أمنية : ايش يضحكك عمر اخذ منها الكوب ودفا يدينه فيه : تسلمين أمنية جلست ع الكرسي : الله يسلمك عمر سكت شوي وناظرها وتذكر لما شالها وحبسها فالغرفه تبسم : تذكرت لما ضربتي ابوي وضحكت بس أمنية تشرب شوي من الشاهي : اهاا حتى انا ضحكت بعدين مصدومه بس ماندمت عمر يناظر مظله السيارات البعيده : منتظمه ع الحبوب أمنية تحس بتوتر اول مره يسألها عن وضعها وبكذب من اول ماصرفتها لها الدكتوره مااخذت منها ولا حبه : ايه عمر سكت ماعلق وهو يشرب شاهيه .. أمنية نزلت كوبها ع الطاوله قدامهم واضاءة الجلسه خافته : تدري اجمل شي يقدمه الاب لعياله هو حبه لامهم ونفس الشي الام تحب ابوهم ابوي وامي كانو يحبون بعض حيل بس عاد راحو عني هي كذا الحياه عمر مافي شي كامل احمدالله ان والدينك عايشين وبصحه وسلامه والباقي هين عمر ناظرها بحزن : الحمدلله بس الباقي مو هين يوجع القلب شعور مااقدر اتخطاه شسوي عاد ابوي يجرح يجرح ويمن انه خلفني ع هالدنيا أمنية تناظره سكت وياخذ نفس كأنه متردد يتكلم .. عمر تنهد وناظرها : دايم يحثون ع بر الوالدين طيب وتعامل الوالدين مع عيالهم ليه مايتكلمون عنه وينصحوننهم مفهوم اني خلفتك لمصلحهت خدمني وتنفعني اذا مالقيت منك فايده معناته خساره لو ماجبتك احسن طيب ليه حب ولدك ساعده من هو صغير ادعمه وتعامل معه بحسنى كل ذا بيرجع لك اذا كبر من نفسه يسوي لك بكل حب ورضا مو ضرب واهانه حتى لين خط الشارب بوجهه تضرب وتهين الي تعمله تلقاه يالاب بر بولدك قبل هو يبر فيك أمنية تناظره بحنيه : حاسه فيك وشايفه من يومه عمي محسسكم انكم عاله عليه والي يشوفه يقول مقطع نفسه يشتغل عشانكم ولا عياله ضايعين مفروض يحمد ربه انت ونجلا طول دراستكم متفوقين وعمري ماشفت عمي جاب لكم هديه او كلمه مبروك النجاح ع الاقل مؤدبين ومحترمين انتم خساره فيه عمر يقاطعها وهو يناظر بعيد : الله يسامحه خلاص هو يبي يكمل حياته بعيد عنا بكيفه امي واختي بحطهم بعيوني مو محتاجين له أمنية تحس انها بتبكي ليه مايحبها مستعده تعطيه كل حلالها وفلوسها بس يعطيها قلبه يحطها بعيونه .. بلعت عبرتها وهمست : الله يحفظك لهم عمر خطف نظره لها ورجع يناظر كوبه وشرب دفعه وهو يحس الجو بارد بعد ماهدت اعصابه .. أمنية رفعت راسها تناظره والالم بعيونها : احسك بتكون اب نفس ابوي عمر ابتسم : اتمنى عمي هو قدوتي بهالحياه الله يرحمه أمنية نزلت شالها تحس الجو حار .. تطبقه بيدها وحطته بحجرها عمر يناظرها بلوزتها البيضا الثقيله مدخلتها جوا البنطلون ومبين نحافه خصرها واكمامها طويله ومغطيه رقبتها بعد .. ماتلبس الا ضيق هالبنت !؟ مد يده لها وهو مبتسم : عطيني اتغطى فيه بعد ماراقت اعصابي بردت أمنية مدته له واخذت كوبها تشرب وهي تناظره ياخذه ويلفه ع كتفه ويقربه من خشمه .. توترت وتحس قلبها ينشد لحركته عمر ناظرها : حتى ريحته دافيه بسرقه أمنية ودها تقول فداك هو وراعيته بس ثقلت : هههه تسرقه وين تلبسه مايليق ع رجال عمر بهدوء : اتغطى فيه لما انام أمنية تحس رغبتها فالبكا تزيد ليه يسوي فيني كذا !؟ ليه الخباثه هو يدري اني احبه ليه يلعب بمشاعري وهو مايبيني .. وقفت ومدت يدها بتاخذ الشال منه : لا مااستغني عنه عمر يحرك حواجبه بتسليه وهو يشد الشال عليه : انسييه أمنية ماتحركت واقفه قباله وماده يدها وبرسميه : لو سمحت هاته بمشي عندي شعل عمر وقف لما حس انها قلبت الموقف جدي .. نزل الشال من كتوفه واخذه بين يدينه وهو يناظرها واقفه قباله وملامحها جامده : كنت امزح أمنية اخذته من بين يدينه وناظرته ببرود : مزح او غيره شالي تحلم فيه عمر تحرك بسرعه ووقف قبالها لما لفت بتروح : من زين شالك ترا كنت اجاملك أمنية بسرعه ابتسمت بتقهره : شفتني طلبت رايك ؟ هه عمر رفع حاجبه اليسار : انا اقول رايي وقت ماابي أمنية والشال شايلته ع ذراعها : قوله بس ماني مجبوره اهتم فيه عمر يحرك يده قدامها فوق وتحت : ولاعاد تلبسين لون ابيض مايليق عليك ووش ذا شرابات ملونه وش هالترقيع "ومد يده سحب الطاقيه ع شعرها وهو يضحك" وهذي بيج هههههه يبي لك تاخذين دوره عند نجلا أمنية حركت يدها تمسح ع شعرها الي تحسه تكهرب بعد ماسحب الطاقيه .. عمر يناظر شعرها بااعجاب وهمس : حتى شعرك يبي له قص أمنية ناظرته والدموع تلمع بعيونها : اذا جيت اهون عليك وانت متضايق بعد كذا اتفل بوجهي عمر بسرعه : محشومه أمنية تحركت بسرعه ومشت عنه ونزلت دمعه سريعه ليه تبكي لييه .. صارت تجرري بتوصل غرفتها بسرعه لييه تبكي لييه يهمها رايه اصلاً غبيه غبيه .. * رجع جلس بمكانها وهو يناظر الفراغ .. يحس ريحه شالها بقت بثوبه غمض عيونه بتعب عاجبك يعني ماترتاح الا اذا بكيتها ..!! كنت امزح معها ليه هي كذا حساسه بزياده هو ليه اجلس معها من الاساس ليه اقرب منها اكثر احفظ ملامحها وتفاصيلها اكثر ليه اتعب قلبي اكثر انا مقتنع بساره ابيها بالعقل والمنطق .. ورح احبها مع الوقت بس دام أمنية بوجهي مااقدر لازم ابعد عشان انسى عشان اقدر اعطي ساره فرصه تحببني فيها ساره مالها ذنب .. ناظر كوبها ماخلصته .. اخذه وشرب منه بهدوء يستطعم .. بارد .. بس شعور انها شربت منه خلاه يتلذذ ويشرب الباقي كله رفع عيونه للسما بتعب .. ياالله انا شلون بتجاوزها ..؟ * نهايه الجزء الخـــامسس |
عمر بصراع بين عقله وقلبه من سينتصر ياترى ؟ |
اقتباس:
العقل / ساره القلب / أمنية الفصل الجاي يبين مين ينتصر وهل هو فعلاً انتصر ؟؟ ولا خسران الي يربح . |
(( الجزء الســــادس )) × ولربما أقسو عليك وفي دمي جمرً من الآلام والأشواق وأقول لا ارجو وصالك ثانياً وأنا اجرجر في هواكِ وثاقي وادير وجهي لادعاء تجلدي وودت لو يحويك طوق عناقي × بعد شهر .. غرفه منصور وبدريه .. منسدحه بوسط السرير وتناظر الفراغ وافكارها تاخذها وتجيبها انطوت ع حالها من بعد ماتحدد زواج عمر بعد ماتنتهي عدة امه بااسبوع .. زواج بسيط ع قولتهم تحس خلاص ماعاد فيها حيل تحارب وتعيش كم مره فكرت بالانتحار وتتعوذ من ابليس فااخر لحظه وتروح تصلي وتبكي خاايفه تحس انها قاعده تنطفي وتستسلم لذيك النقطه السودا تسحبهاا وتدمرها نجلا فتحت الباب لما ماردت عليها ناظرتها بحزن ع حالها : أمنية تعالي تعشي أمنية جلست تبي تهرب من هالنقطه : جايه نجلا مشت قبلها .. وصلت للمطبخ تساعد امها .. طوقه تسخن الخبز : وش قالت نجلا بضيق : تجي الحين يمه احس مايصير نسكت ع حالها احسها مريضه لازم نقول لعمر طوقه : هذي بس حركات عشان تفركش زواج اخوك ولا كانت طيبه مافيها شي وش هالتعب الي ماجا الا وقت تحدد زواج عمر نصابه دامها تاكل وتشرب معناته طيبه نجلا جلست ع الكرسي ولفت تشوف أمنية الي دخلت وجلست بهدوء وبدت تاكل وتسرح بوسط الاكل .. طوقه جلست تاكل معهم : أمنية اذا محتاجه تروحين لدكتورتك نجلا تروح معك وبدون مااحد يدري لاتخافين أمنية تهز راسها : انا بخير وش شايفه يعني طوقه : ماتجلسين معنا بس جالسه بروحك أمنية : انا مرتاحه بعزلتي طوقه : الي يريحك أمنية وقفت واخذت علبه مويه ومشت كذا صار اكلها قليل .. راحت لغرفتها .. ضمت جاكيتها لما حست الهوا البارد منن الشباك المفتوح .. وقفت ع الشباك قبل تقفله .. شافت عمر توه وقف سيارته بالمظله ونزل وكأنه حس ان في احد يناظره رفع راسه لشباكها ووقف يناظرها ناظرته بقرف وقفلت الشباك بسرعه .. قبل كم يوم سمعت طوقه تكلم اختها تقول انه يدور ع شقه ودها تطردهم وهذا كان مناها بس لما جا الجد ماتقدر تخاف شلون تعيش بروحها .. ناظرت جوالها الي يدق .. اخذت نفس وردت ببرود : نعمم عمر : انزلي ابي اتكلم معك أمنية : انت ماتفهم ماابي اقابلك ماابي اشوفك ولاعاد تدق وترسل تراك ازعجتني عمر وبنفسه يدعي ع عبدالرحيم الي اخذ منه عهد قبل يمشي انه مايدخل البيت اذا يبي امه او اخته يجونه ع الباب : لمتى طيب ؟! أمنية بجديه : الى مالا نهايه عمر : طيب انتبهي ع نفسك أمنية قفلت بوجهه ورمت حالها ع السرير وصارت تبكي .. شوي كذا جلست وصارت ترمي كل شي حولها بقهرر وتصاارخ تبي تنهي هالضعف تحس بكرره وحقد تجااه الكل * في احد المولات .. سحبت الكرسي وجلست بتعب وطلعت دفتر صغير من شنطتها : الحين ايش باقي لناا سهام جالسه قبالها : نروح البيت خلاص تأخرت اخاف تركي يهاوش ساره تكتب صح عند الاشياء الي جابتهم : باقي مهام اليوم ماخلصت كذا بيتخربط جدولي سهام : اجل روحي جيبي شي اكله لين اكلم تركي واصحصح ساره اخذت محفظتها وهي تضحك : الشهر الي قبل عرسي بااخذ اجازه عن الشغل والله ماالمس شي سهام ابتسمت : الله يتمم ع خير سهام اتصلت ع تركي وجاها صوت جميله : هلا والله ويين الناس سهام : ليه تردين ع جواله وينه فيه جميله : انتِ الي وين هايته خلاني اسوي العشا وهو عليك جعلك ماتربحين تركي سحب منها الجوال وضربها ع راسها : وجع ان شاءالله سهام : الوو تركي انا بتأخر شوي مع ساره للحين ماخلصت تركي : اجل نامي عند اهلك انا بنام ماني منتظر اجيبك الصبح سهام : زين شكراً تركي قفل منها وهو يتنهد : اييه لو سويره تقدر وتخلي عمير يطلق بنت عمه البطرانه جميله : ماهو مطلقها وبيعرس عليها بعد سويره تركي : انا الغلطان الي سمعت كلام الحريم لو خليتها عندي وماشافتها امي كان هالحين زوجتي وكل حلالها باسمي ميير حظي طايح من يومي الي الله بلاني فيك * اخذت الصندوق من سومرا وطلعت تجري لغرفتها .. حلوو وصلت طلبيتها بسرعه دخلت وقفلت الباب وراها وهي تضحك بشرر .. جلست ع الارض وفتحت الصندوق .. طلعت الكاميرا الصغيره تأملتها وهي تفكر كيف تخبيها مر الوقت سريع وهي تضبطها مع جوالها وتعدل فيها .. بعد ماخلصت لبست جاكيت وحطتها بجيبته وطلعت من غرفتها .. ابتسمت وهي تشوف طوقه واختها ريم جالسات ومعهم دفتر ويكتبون المعازيم عشان ماينسون احد ريم : لا لا ام خالد لاتعزميها عرس بناتها الثنتين ماعزمتنا طوقه : بس ولدها عزمتنا اكتبي اسمها بس انا عاونتها ب500 مع انها ماتستاهل خل ترجعها ريم تكتب : اي والله صادقه أمنية تسحبت بدون ماينتبهون لهاا .. راحت لغرفه عمر وهي تتبسم مبسوطه من جوا لها زمان ماانبسطت كذا نجيله فالجامعه وطوقه مشغوله بمعازيمها هه والعريس بدوامه اييه هيين والله مااخليكم تفرحون وانا بنت ابوي * الساعه 12:30ص جالس ع سريره وبيده جواله يرد ع ساره " باقي مالقيت شقه تعجبني " ساره " لو تقنع ابوي واروح معك تكون معنا نجلا خاطري انا اختار الشقه " عمر " اكلمه بعدين وقت التأثيث خلي الشقه علي " ساره " تمام اهم شي الاثاث انا اختاره تبي تنام الحين ؟ " عمر " ايه تبين شي ؟ " ساره " لا سلامتك نوم العافيه " عمر " يعافيك ربي " وطلع وقفل جواله ورماه جنبه وانسدح بتعب .. يصحى بدري يداوم ولما يرجع ماينام يشغل نفسه بااي شي طول يومه صاحي ويتحرك عشان اذا جا الليل ينام بسرعه من التعب ومايفكر .. ومع هذا لازم تطري عليه .. مشتاق لها ينحرم من شوفتها ولقاها بعد مارجعت ايامهم صعب .. زمان كان مأقلم نفسه انها تتغطى عنه وماتجوز له تعود ع بعدها بس بعد ماصارت حلاله وشافها بعد ماكبرت صار صعب يتأقلم ع بعدها فز قلبه لما دق جواله وكأنه عرف مالكته هي المتصله .. جلس باارتباك ورد : هلا أمنية بهدوء : وينك ؟ عمر : بغرفتي أمنية : ابي اجيك عادي ؟ عمر يمسح ع شعره : ا طيب تعالي وش فيك انتِ أمنية همست : اشتقت وقفلت الخط .. وبسرعه راحت تشوف ردت فعله شافته ثابت بمكانه يناظر الجوال وابتسامته تتوسع .. ضحكت : هههههههههه مبسوط هااه عاجبك ان في بنت تحبك وتشتاق لك كذا ترضي غرورك صح هييين ياعميير ههههههه لفت تناظر المرايه تاركه شعرها سايح ووجهها خالي من اي مكياج لبست جاكيت طويل خفيف .. ع قميصها القطني علاقي ولحد ركبتها هزت كتفها وهي تناظر المرايه وتتبسم بروقاان : هالجاكيت انت الي بترميه ياعوومرريّ ههههههخخخ رشت عطر خفيف وطلعت من غرفتها .. شافت نور غرفه نجلا مفتوح .. تمام واذا صاحيه يكون احسن بعد نزلت الدرج تتمخطر وابتسامتها تتوسع ياترى وش يسوي الحين ينتظرها ياحلات السحبه عليه والله بس مو وقتها الايام جايه .. * وقفت بالسيب وهي تناظر باب غرفته بتردد .. بس شهقت لما شافت الباب ينفتح وعمر يناظرها لفت بسرعه وحطت رجلها تجري مبعده حست فيه يجري وراها .. هي قادره تطير لغرفتها ولا يمديه يمسكها بس تباطئت متعمده عمر مسك ذراعها قبل توصل الصاله : وين منحاشه أمنية تتصدد عنه وهو يلفها عليه : مدري خفت عمر ضحك : هههههه وش يخوفك تعالي انا طلعت لما تأخرتي ولا رحيم مااخذ مني عهد ماادخل البيت أمنية مشت معه : انا مافيني نوم قلت اسولف معك شوي عمر مببتسم ويهز راسه وهم متجهين لغرفته : زين حتى انا شبعان نوم أمنية دخلت الغرفه وهو وراها .. دخل وقفل الباب وراه ناظرته بتوتر اشرت ع الباب : خلي الباب مفتوح عمر لف وفتح الباب وخلاه مردود : تمام امم تفضلي تجلسين ع الارض ولا شسمه السرير أمنية تناظره بحب واضح بعيونها بدون ماتتحرك .. عمر تعلقت عيونه بعيونها نظرتها شلعت قلبه نفس ذيك النظرات لما جاته بهالغرفه تقوله لاتتزوج .. شبك اصابعه ببعض : فيك شي احد مضايقك ؟ أمنية بتردد : مشتاقه لك ابي اضمك بس مو قادره عمر وكأنها عطته الضوء الاخضر .. تقدم بسرعه واخذها بحضنه وهو يتنهد ويدفن راسه بشعرها ويغمض عيونه .. أمنية ابتسمت برضا رغم دقات قلبها الي ازعجتها .. همست : احبك عمر احبك حييل عمر وخر وحضن وجهها بين يدينه ومشاعره واضحه بوجهه ونظراته .. كان يائس انه يسمع اعترافها مره ثانيه .. وبلهفه : هااه !! أمنية تناظره وبدت ترجف بخوف صدقي من المشاعر الي شافتها بوجهه كان متوقعه انها اقوى ليش الحين خافت .. ماامداها تقول شي الايسحبها له بقبله خلت اطرافها ترجف وماعاد تشيلها .. وهو يلف يده ع خصرها يرفعها له ويثبتها ماتطيح ويقبلها بكل لهفته وشوقه لها من سنين أمنيته الي ماتمنى غيرها هذي هي بين يدينه ويذوق حلاوتها لاول مره حبيبته حلاله .. أمنية عقلها ينبهها يحاول يصحيها من حلاوة الشعور كيف تنسى الكاميرا وخطتها لااا مايصير تستسلم لمشاعرها وتخرب ع نفسها .. ثبتت يدها ع صدره ودفته بقوه .. رجعت خطوه ورا وقلبها يدق بسرعه عشان الشعور حلوو لازم تصبر وتكمل حربها والله ماتذوقه ساره نزلت دمعتتها ونار بصدرها من الغيره والتملك صرررخت وهي تمد يدها قدامها : لاا تقرررب عمر بسط يده ع صدره الي يطلع وينزل يحاول يضبط مشاعره : اهدي أمنية لاتخافين مارح ااذيك أمنية جلست ع الارض وغطت اذونها بيديها الثنتين وصاارت تصاارخ بااعلا صوتها .. عمر خاف ذكرته بااول مره شافها بعد ماطلعت من المستشفى : بسم الله عليك حبيبتي لا تخافين والله مااسوي لك شي اهدي أمنية ترجف وتصاارخ : وخررررر وخرررر عمر يأشر لها وصوته ضايع مع صراخها : رح اطلع تماام اهدي بطلع نجلا دفت الباب ووقفت عليه وهي تلهث من الجري لما سمعت صراخ أمنية وكل ماله يوضح لها ان المصدر غرفه عمر .. شافتها متكوره ع نفسها وتصارخ وعمر لف يناظرها بخوف .. صرخت : انت شسويت فيهاا عمر باارتباك لف يناظر أمنية نجلا راحت تحضن أمنية الي ضمتها بسرعه وهي ترجف : اطلعع بررا حسبي الله اهددي اموون بسم الله عليك عمر طلع بسرعه وقابل امه عند الباب .. وهو متورط مو عارف وش يسوي ووش يقول للحين اصلا مرتبك من قربها وقلبه ماهدا .. طوقه ناظرت داخل الغرفه نجلا حاضنه أمنية .. أمنية تبكي وترجف وتشهق : اقوو ولكم .. يت يتحرش فيني ماتصدقو ون ت ت تتعببت ابي امي وابوووي "وبكت بقووه" عمر لف يناظرها مصدوم وش تقول هذي .. !!! طوقه ناظرت عمر بخيبه وماترددت رفعت يدها وضربته كف : ماتخاف الله في هاليتيمه اذلف عن وجهي أمنية سكتت ورفعت راسها تستوعب انه فعلاً طوقه ضربته كف .. شافته يناظرها والشر بعيونه .. دفنت راسها بسرعه بحضن نجلا عمر صد عنهم وطلع بدون مايقول اي كلمه .. * صار له يومين مارجع البيت .. ينام بالاستراحه صحى الصباح .. لقى اتصالات من ساره ورسايل كثير فتح رسايلها .. " حسبي الله فييك انا وش سويت لك عشان تخونني مو قلت انا الاولى وانا وثقت بكلمتك باقي 3 شهور ع عرسنا يامشفووح دامك تبيها قلي ماابيك وننفصل مارح اموت بعدك بس مو تخدعني بهالشكل والحين مقفل جوالك نذل عرفت انها وثقت وصاختك وكشفتك عندي مالك وجه تواجهني تفوو عليك ورقت طلاقي توصلني بااسرع وقت ولاعاد تكلمني عندك ابوي خلص امور الطلاق معه وهاك شوف وصاختك وانا بكون ارقى منك ومنها الكل.. واحذف المقطع " فتح الفديو والصدمه بوجهه .. بدايته وهو يدخلها الغرفه ويقفل الباب .. لين دخلت نجلا وطردته وكله بدون صوت .. فز واقف وهو مصدووم كان يقول انها استغلت الموقف وتبلت عليه بس ان تطلع الشغله كلها تخطيط وحاطه كاميرا بغرفته وترسل التسجيل لساره !! ضرب جبينه وهو يضحك بصدمه : ياالله شلوون هي بهالحقااره ههههههه طحت بالفخ بكل سهوله تقول اشتقت واحبك ههههههههههههههههههه "صار يدور حول نفسه ووقف يحك جبينه" أمنية جنيتي ع نفسك ورربي مااخلييييك واخذ ثوبه بسرعه لبسه وطلع يهرول لسيارته والشر بعيونه ونارر بصدره من القهر .. * بالجامعه .. تمشي وراها وهي مستغربه ليه لما شافتها صدت ورجعت : ساره لحظه ساره وقفت : نعمم !!؟ نجلا وقفت قبالها تناظرها بااستغراب : وش فيك ساره سكتت شوي تفكر : امم نجلا ماودك تقولين لي شي نجلا : شي وش ! ساره : ماادري بخصوص عمر احسه متغير صاير عندكم شي بالبيت نجلا ارتبكت : لا يمكن صاير معه شي بالدوام وتعرفين التجهيزات للزواج مشغلته ساره بقرف : اهاا نجلا تناظرها : وش فيك ساره اخذت نفس : فعلاً انا قرفانه منك ومن اخوك لاابعد حد لاعاد اشوفك بوجهي وخليك كذا متستره ع اخوك بس ياحلوه الي ماترضيه ع نفسك لاترضيه ع بنات الناس ترا الدنيا دواره نجلا فهمت انها عرفت : ساره والله انا مااقصد اخبي عليك انا مصدومه من عمر اصلا كيف له وجه يقولك !! ساره : مو هو الي قال بنت عمك المريضه قالت وانا بنفصل عن اخوك خل تشبع فيه المجنونه نجلا تمسك يد ساره : ساره انا مالي دخل فيهم ساره تقاطعها بصراخ خلا البنات الي حولهم ينتبهون لهم : وخرري عني الحمدلله ان الاختبارات قربت واخلص ماعاد يجمعني فيك مكان نجلا وقفت تناظرها تروح عنها .. ناظرت البنات حولها باانكسار .. وجلست ع الكرسي بندم فكرت تقول لساره من اول ماحست بحب عمر لأمنية .. بس سكتت ليه ماتدري شلون كذا يعني خسرت صديقه عمرها !! لا ساره طيبه وبتتفهم موقفها وبس تمر هالفتره بيرجعون لبعض .. * يدق ع باب غرفتها بقوه : افتحي الباب لااكسره ع راسك طوقه بقوه : والله ياعمر اذا ماابعدت عن بابها لاني امك ولااعرفك عمر لف ع امه بقهر : يمه لاتتدخلين الله يخليك هالبنت يبي لها تربيه من اول وجديد أمنية من ورا الباب : مقهوور عشاني فضحتك عند ساره ووريتها حقيقتك طوقه ضربت خدودها : ياويلي ساره دررت عمر صرخ : حقيقه وش يالكذابه وربي لاتندمييين أمنية ابتسمت بمتعه وهي تحرق اعصابه : تطلقني تسسسمع تطلقني بالطييب ولا اخلعك تحسب ماوراي احد طمعت فيني " تدري انه مايقدر يطلقها بس كذا تسوي يعنني مظلومه قدام طوقه وانها ماتبيه وهي مبسوطه من ساره الي ع طول انسحبت وفضت لها الطريق " طوقه تنهدت بتعب : تكفى ياعمر خل البنت فحالها طلقها وفكها من شرك وخل نشوف حل مع ساره عمر رجع كم خطوه ورا عن الباب واخذ نفس واشر ع نفسه : افكها من شري اناا !! انا الشر الحيين صرت يمه طوقه تعلي صوتها : اييه شر محدد زواجك ع بنتك الناس فالنور ومخلي هاليتيمه بالظلام عشان ماوراها احد خلاص انت واليها ومحد يردك عنها تطلقها غصبن عنك البنت ماتبيك عمر ضحك بصدمه من كلام امه وببرود نزل عليه فجأه : مارح اطلقها أمنية تدق ع الباب تأكد وهي تحبس ضحكتهاا : رح اخلعك والمحاكم بيننا عمر ناظر امه : عشانها يتيمه وبنت عمي مااقدر اطلقها بعد مادخلت عليها وبسوي عرس بسيط بااقرب وقت أمنية صرخت بصدمه وفتحت الباب بسرعه وناظرته شافت الكره والتهديد بنظرته : كذااب والله كذااب طوقه تفلت ع الارض عند رجوله : تفوو عليك ياولد سعود ومشت عنهم .. أمنية تحركت بسرعه بتلحق عمتها بس هو مسك ذراعها وهي تصارخ : والله يكذب ياعمه لاتخليني مااابيييه عمر يضحك بشماته وحقد وهو يدفها بغرفتها وطاحت ع الارض : طبخٍ طبختيه يالرفلا اكليه أمنية بكت بخوف من الشر الي تشوفه بعيونه وصررخت : والله لااعلم رحييم عليييك رح اخلعك اطلع بررررا ياكذااب عمر ضحك بتفشي وهو يشوف دموعها : علميه وانا اوريه الفديو ويلعن خيرك ليين تطلعين التسجيل كاامل ميير ابلعي العافيه واستري ع نفسك أمنية اخذت التوحفه الي ع الطاوله ورمتها عليه : انقلللع ياكل.. عمر غمض عيونه متألم من التوحفه الي ضربت بكتفه .. تقدم لها بسرعه وهي حاولت تفز من ع الارض بس كان اسرع جلس ع ركبه ومسك فكها بيد وحده بقوه وتكلم من بين اسنانه : اسبوعين بالكثير بسوي زواجنا مو هذا الي تبينه يتفركش زواجي ع ساره واتزوجك انتِ أمنية تحاول توخر يده الي تحسها شوي وتكسر فكها ويادوب طلع صوتها : لاا عمر يناظر عيونها الدامعه وابتسم بتهديد : خفتي مني الحين بعد سواتك بتنحاشين ع بالك نفس كل مره تاذيني واسكت لاا هالمره حسابك عسير مثل ماهدمتي حياتي بهدم حياتك وادفنها دفن أمنية مسكت فكها بعد ماتركها ووقف ودموعها تنزل بصمت رفعت راسها وناظرته بحقد : اسعد شي سمعته هدمت حياتك مسكين تبي تهدم حياتي ههههههه انا حياتي مهدومه من زماااان ماعاد عندي شي اخسره بتتزوجني تزوج وانا الي بدفن حياتك صدقني عمر ناظرها بااحتقار وطلع وصفق الباب وراه * نهايه الجزء السااادس |
|
((الجزء الساابع)) × في بيت ام منيف .. نجلا ترتب الغرفه الي صارت لها ولأمها .. قالتها امها أمنية مع عمر راضيه بس عندهم تسوي انها مظلومه والدليل انها قالت لساره عشان تفركش الزواج وهذا هي فركشته وبكره زواجها هي وعمر .. من ذاك اليوم طلعت هي وامها لبيت جدتها ماعاد لهم جلسه في بيتها الحيه .. هي وعمر قدر ولقى غطاه ماعاد يتدخلون فيهم حتى الزواج بكره مارح يحضروه عزيمه رجال بس فااستراحه .. فتون دخلت الغرفه بحماس : جووج تكفيين روحي الزواج بكره وانا اروح معك دام خالتي ماتبي نجلا ببرود : مافي زواج حريم فتون تجلس ع السرير : اييه بس عادي نكون موجودين احس بمووت لو ماشفت شكل أمنية ووش مسويه نجلا بحزن : لا ماابي بعدين تدري ساره اني حضرت وماتسامحني فتون : قلعتها ساره من قالها تتنازل عنه لأمنيوه شفتي خزامى بتروح مع امها وطول الايام الي فاتت عماتك مريفه وشيهانه يجهزون لأمنية يقالها يتيمه مسكينه والله انها سكينه نجلا ضحكت : ههههههههه انا اشهد فتون : هااه نروح نجلا : انا اذا رحت رح اخرب فرحتها مارح اخليها تاخذ اخوي وتحرق قلب ساره بارده مبرده فتون : الله اكشششن * لابس البشت الاسود ويسلم ع الي يباركون له .. جماعته واخوياه وزملاء العمل .. ناظر ابوه وسلم عليه وباس راسه : ماتوقعت تحضر سعود : للحين انا ماابيها لك بس من معزه اخوي الله يرحمه واجب احضر واسلمها لك بنفسي عمر ابتسم : فيك الخيرر سعود وقف جنبه ويباركون له بزواج ولده .. تركي جالس والحسره بوجهه لو صبر ع جنونها وعالجها .. اجل سحب ع سويره وتزوج بنت منصور اليينه محظوظ ويشاركه الشعور نايف الي جالس جنبه ولاهم داريين ان شعورهم واحد .. بس نايف كان طمعان فيها هي مو فلوسها مثل تركي شلون بتطلع بالفستان الابيض حوريه من بنات الحوور .. * في صاله البيت .. جالسه بفستانها الابيض كانت متوقعه محد يجي بس عماتها شيهانه ومريفه الي اخجلوها بكرمهم لهدرجه ابوها محبوب !! مريفه الي ماتحترمها ودوم تطول لسانها عليها وقفت معها بس عشانها بنت منصور انصدمت منها حييل طول الايام الي فاتت معها ويجهزونها كأنها بنتهم مو بنت اخوهم .. هي اليوم عروس كاامله بكشختها وجهازها مثلها مثل كل العرايس ماكانت متوقعه انها بتكون كذا ولاحتى فكرت تلبس فستان وتتجهز كانت ضايعه صح جهزت وكل شي .. بس للحين تحس انها ضايعه مو عارفه كيف بيكون وضعها وش مخطط عليه عمر وين تروح هالليله وين تسكن ماااتدري .. قلقانه وخاايفه مو قادره حتى تفرح انها الليله عروس لابسه الفستان الابيض لحبيبها وزوجها عمر اما الي حضرو !! .. طوقه حضرت بس مكشره وكأنها بعزا .. وامها وخواتها كلهم حضرو .. اما البنات بس نجلا وفتون وخزامى .. شيهانه ماعجبها الصمت : شغلو شي يابنات وارقصو الليله فرح خزامى بضحكه : فرح والعريس مسرورق ههههههههه فتون ضحكت معها وسكتت لما نجلا عطتهم نظره .. هي الي كانت ناويه تضايق أمنية بس ماتقوى تجرح أمنية بهاليوم دامها راضيه وعمرراضي خلها تفرح من توفت امها وهي من حزن في حزن مافرحت خلها تفرح .. مريفه عطت بنتها نظرة تهديد وراحت شبكت جوالها ع التلفزيون أمنية بهدوء : عمتي لاتشغلين شي مو حلوه بحق ابوي مريفه : ابوك لو عايش مايرضيه تتزوجين كذا ع السكيتي طوقه الي اقنعوها خواتها تحضر وماتفوت شوفه ولدها الوحيد عريس مايهم من العروس اهم شي تشاركه هاليوم .. وقفت : شغلي ياام تركي حتى انا مايرضيني يمر عرس ولدي وانا مارقصت فيه أمنية سكتت عنهم ولفت تناظر الساعه الي ع الجدار 10:30 الليل بااوله .. لفت تناظرهم الكل قام يرقص والاكيد انه طرب مو فرحه لزواجهم * حاطه راسها بحضن اختها ودموعها جفت : يطلقني ويتزوجها الحين باالله قولي لي من بيتزوجني بعد سواته ذي حسبي الله فيه سهام تمسح ع شعرها : لاتفكرين خلي كل شي بوقته نصيبك بيجيك وعمر مو كفو مايستاهلك ربي ان شاءالله يرزقك بالي يقدرك ويصونك ساره : مو زعلانه عليه كرهته خلاص بس حركته تقهر ماصبر ع طول تزوجها سهام : خلاص انسي تزوجها تطلقو كيف عاشو لاتهتمين لحياته وحلو قطعتي علاقتك بنجلا كذا ماتدرين اي شي عنهم ساره : نجلا مالها ذنب بس صدق صرت مو طايقتها من فعله اخوها سهام : قلعتهم قوومي خلينا نجهز عيشه ونشوف لنا فلم ولا مسرحيه ساره جلست ورتبت شعرها : روحي انا اجيك ابي اتروش واجدد النفسيه وجعل الرجاجيل للماحي سهام ضحكت وطلعت وهي مبسوطه بقوه ساره عقلانيتها تعجبها من زماان . * شيهانه دخلت : يله ياحريم تغطو ولا تفضلو للمجلس بيدخل عمر ام نايف جالسه : ولد اختي محرمنا شيهانه : بيدخل معاه عبدالرحيم و"ناظرت طوقه" وابو عمر طوقه بدون نفس : هذا وش جايبه شيهانه : يرحم والديك ياام عمر مانبي مشاكل وتضيقون بال المسكين عمر ام منيف وخاطرها ترجع بنتها لزوجها : ماعليه خلك انتِ للحين بالعده وتحلين له طوقه : يعقب والله مايشوفني أمنية ماكانت مركزه معهم متوتره وخايفه .. شافت الكل لبسو عباياتهم وجلسو بفضول دخل عمر وع يمينه ابوه ويساره عبدالرحيم .. فتون قرصت نجلا وهمست : هذا ولد شيهانه نجلا بنفس الهمس : اييه فتون : ياملحه احسه مؤدب أمنية وقفت وسلمت ع عمها الي تقدم لها قبل عمر .. وغصب باست راسه هو الثاني صدمها تحسه مبتسم لها من قلب ويناظرها بحنيه لاول مره ليش هم كذا اليوم يتعبوني والله بصيييح .. سعود وخر ع يمينها واشر لعمر : تفضل عروستك بنت منصور الغالي حطها بعيونك عمر سلم عليها وشد ع يدها : ان شاءالله وقرب منها باس جبينها ووخر : مبرووك أمنية و تشوفه يلف ويوقف ع يسارها وبتوتر ماتدري وش تقول قالت : الحمدلله عبدالرحيم الي تقدم بيسلم عليها سمعها وكتم ضحكته لان حتى عمر مرتبك ولاانتبه وش قالت سلم عليها وبارك لها وطلع ووراه خاله سعود .. وبنفسه يفكر بنجلا اكيد انها وحده من هالمتغطيات تشوفه وهو مايشوفها .. نفسه يعرف شعورها وانطباعها عنه .. هل تدخل حسابه وتقرأ نفس ماهو مايفوت شي تكتبه يعني هو اول شي جاها من باب الفضول حست بفضول تجاهه ولا .. * طوقه رمت عباتها وهي مستغربه تصرف سعود مع أمنية توه تذكر اخوه وين هالذكرى عن لما كان يضربهاا ماالت همم ماالت نجلا تصورهم بالكاميرا مع ان محد طلب منها بس هي تحب التصوير وجابت كاميرتها .. ماحبت تفوت هالمناسبه الجلسه كانت عباره عن تصوير مرره عمر وأمنية لحالهم وبعدها مع امها بس بعدين هي بس بعدين هي وامها وصوره مع العمات وصوره مع الخالات والجده حتى سومرا تصورت معهم ... * بالفندق .. نزلت عباتها وقلبها يدق يدق بخوف وتوتر .. حست فيه ينزل شنطتها ع الارض مو قادره تلف وتشوفه مع انها متعوده عليه ماكانت متوقعه هالتوتر بس الفستان الابيض والبشت لهم هييبه هي بالفستان مو نفسها ذيك الي بلبس عادي تهاوش وتصارخ تحس لسانها مربوط مو قادره تنطق حرف .. عمر واقف يناظر ظهرها وهو نفس حالها كان مخطط ومتوعد ومتحلف لها .. بس الحين مو قادر ينفذ شي من الي خططه أمنيته عروس بالفستان الابيض سلبت عقله وروحه .. طيب عادي يريح عقله هالليله ويستسلم لمشاعره ؟؟ أمنية لما حست انه طول بوقفته لفت تشوف .. حست قلبها بيوقف من نظراته ماكانت حاقده وشرانيه نفس ماكانت متوقعه لاا هذا مبهور بشكلهاا واذا نجي للصدق حتى هي معجبه في طلتها اليوم وماتلومه يناظرها بهالطريقه ابتسمت باارتباك واشرت ماتدري ع وين : امم شسمه ابي ابدل ذا "سكتت مو قادره تكمل وهو يناظرها كذا تبيه يطلع عشان تاخذ راحتها وتبدل الفستان .. لانه حاجز غرفه وحده ذي والحمام مايدخل فستانها مع الباب واضح " عمر : خليك فيه شوي "وصد عنها وجلس ع الكنبه" اجلسي نسولف أمنية جلست ع السرير من قدام والكنبه الي جالس عليها قبالها .. عمر ماعلق انها ليه ماجت تجلس جنبه : انبسطتي أمنية بسخريه : جداً وانت عمر يرتاح بجلسته : جداً جداً زواج بسيط ماتكلفت فيه وجتني فلوس حالياً بطران وش ابي بعد الحمدلله أمنية ساكته ماعلقت .. عمر : اصدميني وقولي انك مستحيه مني أمنية ناظرته باارتباك : لا عمر ابتسم ووقف بيروح يجلس جنبها شافها فزت وقفت : وش فيك وين رايحه أمنية ترفع فستانها : مو رايحه بس حسيت في شي عند رجولي عمر يدري انها نصابه خايفه ومستحيه ومرتبكه وعاجبه انها تكابر كذا يستفزها صح .. جلس ع السرير : اجلسي يتهيأ لك اكيد أمنية جلست وقلبها ماهدا .. حست فيه يمسك يدهاا عمر يضم يدها بين يدينه الثنتين : ايه اكيد ماتستحين مني دامك قدرتي تمثلين ذاك الفديو حركاتك وصراخك الي يصم الاذان أمنية وخوفها زاد هذا هو يذكرها بالفديوو ياويلي .. عمر يحك شاربه : عاد تصدقين افكر بصراخك يعني مو معقول قدره التمثيل نفس صراخك بذيك الفتره أمنية سحبت يدها منه : ماتدري يمكن حتى بذيك الفتره كان تمثيل عمر ناظرها حس الصدق بصوتها : صدق ؟؟! أمنية تنهدت : ابوي تركني وحيده بدون سند وظهر ومن له حيله فل يحتال عمر مو مستوعب : كييف !! أمنية ببرود ولا كأنها سوت شي : ماابي تركي ابي ارجع لابوي مثلت الجنون ونجحت عمر يناظرها بصدمه : مو لهالدرجه أمنية لمعت الدموع بعيونها : لو ماسويت كذا كان للحيني ع ذمه تركي وهف فلوسي وهذا الي كان مخطط عليه لانه شايف ان ابوي تعبان وانا بورثه قالك اتزوجها واكون متفضل عليها واهف فلوسها بس لااا انا جننته كل ماقرب مني خطوه اصارخ كذا ويهج لين عافني ورماني عند امه وجننتها لين رجعتني لاابوي وردت روحي انا حميت نفسي بنفسي عمر حضنها وهو يحس براحه .. دايم كان يتجاهل ذيك الفتره الي عاشتها ببيت تركي مع انه يدري والكل عارف انه مادخل ع المجنونه وماكانت لها عده .. بس شعور انها عاشت معه تحت سقف واحد يوجعه عشان كذا مقفل ع السيره .. : اخير حيله سلمتك لي أمنية رفعت راسها من حضنه وبعدم فهم : هااه !! عمر يرجع فيها ع ورا وهمس : هشش * شيهانه طلعت من البيت وقفلته بالمفتاح وسحبته معها ووقفت تناظره بحزن .. عبدالرحيم ركب سيارته وهو يحاول يضبط نفسه ويثقل .. امه ونجلا وخزامى جلسو اخر شي يرتبون البيت وياخذون اغراضهم قبل يقفلونه والحين هو يرجعهم .. نجلا من ورا عمتها : يله عمتي نروح وربي تعتب ابي انام شيهانه لفت : يله وراحو للسياره .. عبدالرحيم حرك بهدوء بعد ماركبو وهو مميز نجلا عن خزامى الطويله .. كان وده هي تجلس وراه بس احسن ورا امه تشوفه اوضح شيهانه : نام عندنا الليله وامشي بكره فالنهار عبدالرحيم : مايمديني والله عندي دوام ضريبه زواجات يوم السبت شيهانه : الله يحفظك اهم شي خليك ع مهلك لاتسرع نجلا سانده راسها ورا وتناظر نص وجهه الواضح لها .. الي اشوفه انه محترم ليه انا نيتي شينه اكيد انه ارسل لي من باب المساعده لماشاف حلطمتي مالت علي وانا كذا اسفهه .. فتحت جوالها ودخلت ع حسابه .. شافته منزل صوره له مع عمر ويبارك له طلعت بسرعه وقفلت جوالها ورجعته بشنطتها .. جعلني مانشرتها ولا ارسله عبدالرحيم : احمم نوصل البنات اول ؟ شيهانه : لا ياقلبي بينامون عندي ولما وصلو البيت .. نجلا تضرب ع كتف خزامى بشويش ؛ خزامى اصحي وصلناا شيهانه نزلت وصارت تنزل اغراضهم مع عبدالرحيم من ورا .. خزامى : خلاااص بنزل نجلا تناظرها تتأكد انها صاحيه .. خزامى فتحت بابها بقوه بنفس اللحظه الي كان عبدالرحيم معدي من عنده بيروح لبابه .. وضرب الباب فييه نجلا صرخت ع خزامى : انتبهييي عبدالرحيم يمسك كتفه وهو يحاول يكتم غيضه يعني مو كل مره يتصقع قدامها تحرك وفتح بابه وركب وقفله بقوه متنرفز .. خزامى : اسفه "ونزلت بسرعه " عبدالرحيم لف يشوف نجلا تفتح بابها وتنزل .. جات عينه بعينها قبل تقفل بابها بسرعه وتروح ولف يشوف امه رجعت بعد مادخلت اغراضها .. نزل يسلم عليها ويروح .. * جلست ع سجادتها بعد ماصلت الفجر .. تقرأ اذكارها بهدوء .. عمر رجع من الصلاه وقفل الباب وراه ناظرها : البسي عباتك بنمشي أمنية ناظرته بدون ماتتحرك : وين نروح عمر راح يلم اغراضه : بعدين تشوفين أمنية طوت سجادتها وراحت تلم اغراضها وهي تتصدد عنه وكل مايجي بطريقها تنزل عينها بااحراج وهو يتحرك ويقفل شنطته متجاهل وجودها .. أمنية لبست عبايتها وهو طلع الشنط ورجع لها .. طلعو من الفندوق وناظرت الجو والشمس ماطلعت .. تحس ان فيها نوم حق يوم كاامل ودها تنام ومحد يصحيهاا جلست بالسياره وقفلت بابها .. وهي تشوفه يجلس وتهتز معه السياره ويقفل بابه ويحرك السياره صدت تناظر برا وهي متبسمه .. اوف ليش احسه غريب ومستحيه منه ايش بتكلم ايش بقول يعني لما اتذكر البارح انحرج بزياده كان غير للحظه حسيته يحبني ويموت فيني مو بس اني صرت زوجته وعاجبته شكلاً .. وقف عند مجمع يعبي بنزين .. : قفلي السياره عليك ونزل .. قفلت السياره بعده وهي تشوفه رايح لكوفي ابتسمت : اوواللِه عمير من طقه الي يشربون قهوه ع الصبح شوي كذا جا و معه قهوتين ودونات .. أمنية : كان جبت لي شاهي عمر ناظرها مستنكر : ع الصبح ! أمنية تناظره بنفس نظرته : قهوه ع الصبح ! عمر رجع محفظته بجيبه وفتح الباب : طيب أمنية تحس انها رجعت ع طبيعتها : وساندوش فلافل باالله وخليه يكثر شطه عمر وقف ع الباب وهو منزل راسه يناظرها برفعه حاجب : تكفيك وحده ولا ثنتين أمنية تناظره ببرائه وتحرك يديها : وحده مكفيتني اصلا مااكلها كلها عمر قفل الباب بقوه ومشى وهي تضحك مروووقه .. * تناظر الطريق بملل .. وهو يتقهوى ع مهله وبدال مايشغلهم اغنيه شي رومانسي بما انهم بصباحيه عرسهم وكذا لاا مشغل بودكاست ثقافي .. ولا حتى فكرت تركز بالكلام شوي كذا بدا لها الطريق مألوف .. لفت ع عمر : وين رايحين عمر يعدل نظارته السودا والشمس بوجههم : لاتقولين ماعرفتي الطريق أمنية : اي هذا طريق الديره تذكرته بس وين رايحين عمر بهدوء : ايه رايحين لها أمنية تأففت : تبي تمر جدتي ماله داعي مارح تدري اننا مرينا من عندها ولا سلمنا عليها عمر ضحك وتعمد يضحك بصوت عالي ويطول : ههههههههههههههههههههههههه هههه أمنية تناظره بعدم فهم : اييش ؟! عمر يمسح عيونه من تحت النظاره : هههههه ااه مسكينه ي أمنية أمنية جمدت ملامحها وانشدت اعصابها بخووف .. عمر بجديه : بنروح الديره ولاانتِ طالعه منها تجلسين عند جدتي تربيك وتعلمك الادب أمنية ساكته تستوعب الصدق بصوته .. صرخت وصوتها يرجف : تستهببل انت موو ع كييفك رجعني بيييتي عمر بقووه : ولااا كلمه بيتك قفلته وانسييه أمنية تقاطعه بصراخ وهي ترمي كوب الشاهي الفاضي عليه : رجعنيي اقولك مو متربيه مو مأدبه موووشغلك محد جبرك تاخذني وووقف ياااتبن عمر بسرعه وقف ع جنب وهو معصب لف عليها يصارخ : اذييتي مييين مو انااا تبليتي ع مييين فركشتي زوواج مييين استغليتي مييييين هاااه ليي الحق اني اربييك من جديد وابلعي العافيه لاتخليني اتعامل معك تعامل مايسرك أمنية بكت : جدتي تكرهني واكرهاا مجنون انت عمر يشد ذراعها بقوه : اصص ماابي اسمع ولا كلمه قلت تحملي فعايلك الناقصه ودفها ع الباب وحرك السياره بسرعه وحواجبه معقوده .. أمنية حضنت نفسها وهي تكتم بكاها تحاول تستوعب الوضع الي هي فيه .. الكلام الحين مو فايد معه تحس قلبها يدق بخوف من سرعه السياره لها زمااان ماركبت مع احد يسرع تشوف كيف يتعدون السيارات الي قدامهم بسررعه .. صررخت بررعب وبكاا تحس شوي ويغمى عليها : لاتسرع لاتسرع امي ماتت من السرعه * نهايه الجزء السابع .. |
موفقة بإذن الله ... لك مني أجمل تحية . فى أنتظارك |
اقتباس:
اهلييين نورتي🤍🤍 |
((الجزء الثاامن )) صباح الخييير بارت طويل تعويضاً عن البارتين القصيرات الي فاتو كانت عندي مناسبه وانشغلت عاد هاالله هالله بالتعليقات لاتحرموني * وقف السياره بحوش البيت شاف جدته جالسه بالدكه المظلله وجالسه عندها حرمه متغطيه .. لف ع أمنية النايمه بمكانها فجعته ببكاها وخوفها من السرعه شلون نسى الحادث الي صار لهم .. ماصدق تهجد وتنام نزل من السياره وراح لجدته الي شافها وقفت منيره تزغرت : كلوووش حي الله هالزوول جعلني ماابكييك عمر ابتسم واسرع بمشيه يحب جدته صح انه يشوف تفرقه تعاملها معه ومع البنات بس يحبها لانها تحبه ودوم بصفه .. بااس راسها وحضنها : كيف حالك بشريني عنك منيره بسعاده : ابد والله مرتاحه بين اهلي ومبسوطه بجيتك "ناظرت السياره" وينها ماجت معك ؟ عمر الي من اول مكلم جدته واتفق معها : الا بس نايمه ام سويلم الي جالسه بمكانها : كيف حالك ياولد سعود وكيف ابووك منيره : هذي جارتنا وبنت عمي ام سويلم عمر يرفع يده ويعلي صوته يسمعها : هلاا بخيير والله شلونك انتِ ياخاله ام سويلم : طيبيين الحمدلله عمر راح للسياره واخذ شنطتين كبار واتجه للبيت .. دخل و ناظر الصاله البسيطه .. بيت الطفوله لف يمين للسيب الي عباره عن اربع غرف وكل غرفتين متقابلات وبالوسط الحمام ومغسلته برا دخل اول غرفه ع يمينه هذي الغرفه الي كان ينام فيها هو ونجلا وأمنية ولما كبر طلعوه وخلوه ينام بمجلس الرجال .. جا قبل اسبوع واثثها نزل شنطها ع الارض جنب الدولاب وطلع يكمل باقي اغراضها العروس .. ام سويلم استأذنت وراحت تشوف غنمها .. منيره : لو تجلس تغدا ماهي زينه والله تروح كذا وانت ماتضيفت عمر بعد ماخلص تنزيل اغراضها والمقاضي الي جابها للبيت : ماني غريب ياجده انا راعي محل بس لازم امشي وقريب بنقل دوامي بالمحافظه القريبه واسكن معك منيره : اللي يريحك عمر ناظر السياره : ماني مصحيها اشيلها تكمل نومها "وباارتباك من نظره جدته الناقده" احسن امشي وهي نايمه منيره لفت بتدخل البيت وبسخريه : انتبه لاتصحى الشيخه بنت منصوور عمر راح لبابها فتحه بشويش .. اخذ شنطتها وحطها ع كتفه ودخل يدينه تحتها وشالها بشويش ومشى للبيت سمعها تتمتم بس واضح نايمه وتضايقت من الحركه .. دخل الغرفه شاف جدته تشغل المكيف ووقفت تناظر ومو عاجبها الشكل .. عمر تجاهل نظرتها .. ونزل أمنية بشويش ع السرير وفك عقدة نقابها وسحبه وهو يناظر وجهها ارخى حجابها عشان ترتاح بنومتها .. وسحب اللحاف وغطاها حس في جدته تطلع تحسب انه خلص وبيطلع وراها .. بسرعه قرب من أمنية وباس طرف شفاتها "ليتك دووم بهالبراءة" وقف وهو مقهور من شعوره ياربي وش احب فيها ليه احس قلبي من الحين يتقطع شوق لها .. صد عنها وطلع وهو عاقد حواجبه وش هالسخافه الي يفكر فيهاا .. مشى لجدته فالصاله : يله انا بروح وبنت ولدك بين يديك توليها وسنعيها سلمتها لك منيره ضحكت : ماعليك الله يسهل دربكك * فتحت عيونها وناظرت المكان بنعاااس .. المسافه الي بين السرير والدولاب شنطها ماليته .. لفت تشوف التسريحه .. غرفه صغيره والاثاث الابيض جاي فيها بشكل مرتب جميل .. دفت اللحاف عنها بعيد وهي تتذكر كانت فالسياره .. عمر قال يوديها عند جدتهم !! وقفت تناظر الغرفه واغراضها !! لاا انا نمت كيف جيت هنا ؟؟ بسرعه نطت شنطتها وراحت للباب فتحته وطلعت هذا بيتهم القديم وبصراخ وهي طالعه للصاله : عمرررر عمررر منيره طلعت من المطبخ وناظرتها : عمر رااح أمنية سفهتها وطلعت للحوش .. سيارته مو موجوده لفت طرحتها ع راسها وتلثمت وطلعت للشارع بعد سيارته مو موجوده .. رجعت للبيت بسرعه مرت من عند جدتها الي لفت عنها بتكمل شغلها بالمطبخ ولا كأنها موجوده أمنية دخلت الغرفه وهي ترجف من العصبيه مو مستوعبه صدق راح وخلاهاا كذا بسهوله ؟؟! فتحت شنطتها واخذت جوالها .. اتصلت عليه وصارت تدور بالغرفه تنتظره يرد .. صرخت بقهرر : رررد ياحيوووان عمر فتح الخط وسمعها وسكت .. أمنية رفعت الجوال تشوف الا هو فاتح الخط سمعت صوت نفس : ويين رحت هاااه بسرعه ارجع ورجعني بيتي الله يااخذكك عمر ببرود : صح النووم صليتي الظهر والعصر ؟! أمنية رفست صندوق لها ع الارض بقهرر : مااالك دخل وانا جلسه عند عجوز الناار مارح اجلس تدري انا اصلاً ليه اكلمك انت والله لااعلم عبدالرحيم اخوي يجي ياخذني ويطلقني منك يالنذل وقفلت بوجهه وجلست تحاول تهدي اعصابها .. ناظرت ساعه جوالها 4 العصر لازم تتوضى وتصلي وتكلم عبدالرحيم بهدوء .. * كان جالس يتقهوى وينتظر اتصالها بعد ماكلمه عمر .. وماتأخرت هذي هي تتصل رد بهدوء وهو مقهور منها : هلا أمنية : رحيييم تعال لي تكفى عمر الحيوان رماني عند جدتي بالديره وراح عبدالرحيم بنفس الهدوء : وش مسويه له انتِ ؟ أمنية سكتت شوي كانت متوقعه ينفعل ويفزع لها : لازم اكون انا الباديه يعني ؟! عبدالرحيم : وداك عند جدتي مو عند احد غريب وكلها كم يوم يتفاهم مع دوامه وينقل ويسكن عندكم أمنية بخذلان : سبقني واشتكى اجل انا اختك ترا مو هو عبدالرحيم يقاطعها : انا مع الحق وقالي عن فعولك الي ماتسر دامك ماتبينه الحين ليه تخربين زواجه وتبلين عليه وتستغلينه وحنا رجال نفهم بعض أمنية بعصبيه : تفوو عليك انت وياااه رفع الجوال يتأكد فعلاً قفلت بوجهه هذي الي صدق يبي لها دق راس .. الله يعينك ع ماابتلاك ياعمر ويقويييك * اخذ المفتاح منها ولف بيروح متجاهل اسئلتها .. شيهانه تمسك ذراعه : وقف وفهمني ليه أمنية عندي امي عمر تأفف من هالسالفه المو منتهيه : نبي نسكن عند جدتي فيها شي ؟! شيهانه : ع طوول كذا روحو سافرو انبسطو بااول ايامكم والله تندموون عمر : رجاءً ياعمتي خلااص لااحد يتدخل بيني وبين زوجتي خلونا نعيش مثل مانبي حنا شيهانه : انا مااتدخل بس انصح وأمنية بنتي مااتمنى الا انها تعيش بسعاده حافظ عليها ياعمر عمر : ان شاءالله وطلع من عندها وركب سيارته ومشى .. اتصل ع جدته منيره : ايييه اشوفك صرت واصل ماشاءالله توك الصبح عندي ماامدا عمر يمسد رقبته بااحراج وهو يناظر ساعه السياره 9 م : لا بس ودي اعرف شسوت معك أمنية كلمتني العصر وبعدها هجدت استغربت منيره : ايه من العصر دخلت غرفتها ولا طلعت دقيت عليها قبل شوي قامت جنونها وتصارخ وتسب قلت ماعادني جايتها هالمجنونه اخير لي عمر : الله يسعدك ياجدتي اذا طلعت من غرفتها خذي المفتاح اخاف تسوي بنفسها شي منيره : ابشر وطمن بالك مابها الا الدلع الي ذبحها من بكره ان شاءالله اتفاهم معهاا عمر : زين توصي ع شي منيره : سلامتك * صحت قبل اذان الفجر جوعااانه الجوع هو الي صحاها .. طلعت من الغرفه وسيده ع المطبخ فتحت الثلاجه وبقهرر : لااا وماشاءالله مالي الثلاجه قبل يروح عسى ارتاح ضميره بس جعل الجاثووم مايفارقه الليله حطت لها فواكه بصحن وغسلتهم وجلست ع الارض تاكل وهي تناظر المطبخ بحنيييين .. هالمطبخ امها كرفت فيه كرف كانت حتى الذبايح تطبخهم هي وعمتها طوقه .. تتذكر حلطمة امها وعمتها لما كانت تدخل بعد اللعب عطشانه وتشرب مويه وتسمعهم وتروح تكمل لعب بدون ماتدقق بكلامهم .. رجعت لهمها .. الحقير عمر كيف يقول لعبدالرحيم عن الفديو معقوله وصفه شصاار وربي قليل ادب قالك اييش حنا رجال نفهم ع بعض .. يعني وقتها كنت معصبه بس الحين اووف احراج احس مالي وجه اشوف عبدالرحيم .. اخاف اقوله اعلم عمتي شيهانه يروح يسبقني ويعلمها بالصدق زي رحيم حسبي الله فييه لوى ذراعي بس هيين انا اورييك تبي اجلس عند جدتي اجلس ليه لا حلوو اجننها لين تطردني واشيل عني العتب سمعت اذان الفجر وبنفس اللحظه ناظرت الباب جدتها واقفه والصاله وراها مظلمه تحس للحظه ان شكلها يخوف ذكرتها بسموره الي في بابا فرحان كانت تخاف منها حييل وهي صغيره جدتها قصرانه ولا ايش بجلابيتها البنيه الفضفاضه و ملفعها الاسود متحجبه ومغطيه ذقنها .. وواقفه تناظرها بدون اي ابتسامه او ملامح لينه تعوذت من ابليس وشالت صحنها ووقفت وبنبره مسالمه تبعد الخوف : صباح الخير منيره : سهرانه ولا صاحيه توك أمنية وللحين قلبها يدق بخوف هذي سموره : تو صحيت منيره : زيين ماعندي سهر انا امشي صلي وتعالي نسوي الفطور أمنية اخذت لها علبه مويه وطلعت من المطبخ وهي تتصدد عن جدتها ماتبي تشوفها .. هذا الباقي تتخدم فيني والله اصلي وارتب اغراضي وجايب غرفه جديده مالت عليييه * دخل غرفتها وهو خلاص يأس من النوم .. طول ليله بغرفته يحاول ينام بس ارق .. هدوء البيت موحش كان يبي يروح الاستراحه عند اخوياه ولا ببيت جدته عند امه بس وش يقولون امس معرس واليوم عندنا انجبر ينام ببيتها لين يخلص من دوامه وينقل .. وقف يناظر سريرها وخر اللحاف بهدوء وانسدح وتغطى وهو يحس بريحتها تغمره .. ابتسم بعشق ومشاهد البارح مو راضيه تروح عن باله جلس ووخر اللحاف عنه وناظر المرايه قباله : ياحبيبي !! المغروره حاطه المرايه قبال السرير عشان تصبح بوجهها ماتنلام عز الله ان امس كان احلا صباح نزل من السرير وهو يستوعب ان جيته هنا غلط تخليه يفكر بعاطفه مالها داعي * اووف ازعاج اصوات الباصات .. وبعده اذاعه مدرسه العيال خييررر وش هالمكرفون الي يوصل لبيتهم حتى تمارين الصباح واح تنين تلات اربع طلعت من غرفتها وهي تشم ريحه القرصان حست بطنها تتعصر من الجوع والرييحه راحت للمطبخ شافته فاضي بس ريحه الاكل تبين انه توه جاهز .. طلعت بسرعه لباب البيت وهي تسمع صوت وضح لها ان جدتها بالدكه .. وقفت ع باب البيت تشوف جدتها وعندها حرمتين جالسات يفطرون طلعت وهي حافيه ع التراب تحس الاحجار الصغيره تعور رجولها مو متعوده تمشي حافيه بس الجوع كافر .. أمنية تلم شعرها ورا اذنها وبلطافه : السلام عليكم منيره نزلت راسها متفشله من بجامتها القصيره .. ام سويلم وام نوره : وعليكم السلام أمنية بدون ماتسلم عليهم باليد وكذا جلست ع طول تحس عيونها تطلع قلوب لما شافت الفطور قرصان وسمن وزبده يوووه لها زمان عنهم مشتاقه لذاك الطعم اللذييد : الله اشتقت لهالفطوور ام نوره تناظرها بتنقد : من هذي ياام سعود منيره تحاول ماتبين قهرها : بنت وليدي منصور الله يرحمه ام سويلم تمسح ع شعر أمنية : ماشاءالله كبرت اذكرها وهي بزر أمنية تاكل وحاسه بقهر جدتها وتتبسم : جدتي ابي حلييب منيره تقرب الصينيه لها بدون ماتقول شي ام سويلم : زين والله جت تسليك ماتدرس هي ؟ أمنية بسرعه : خلصت دراسه ام نوره تناظر ركبها الي انكشفت لما جلست ولوت فمها : وماتزوجتي منيره : الا متزوجها عمر ولد سعود الله يحفظه ام سويلم تضحك : ههههه والله وكبرنا توي اذكر مهاوشاتهم سبحان الله واخرتها تزوجو منيره تنهدت وتقصد عمر : القط مايحب الا خناقه أمنية كارهه سيرته وبتضيع السالفه وهي تأشر ع السمن والزبده : جبتي لك غنم ياجدتي منيره : لا هذي ام سويلم كثر الله خيرها ويطرح البركه في غنمها ام سويلم تربت ع كتف منيره : والله ان ودي اعطيكم اكثر بس لما اسوي السمن يجن بناتي واوزع عليهن ام نوره : اول تقولين مالك شده ع الغنم هالحين عندك بنتاخ تساعدك جيبي لكم عنز بس أمنية تستوعب قصدهم عليها تساعد جدتها بالغنم !!! منيره : لو اتكلت ع بنتاخي عز الله ماتو غنمي ام نوره : هوو ليه ياكافي منيره : من وهي صغيره تخاف منهم ام نوره تناظر أمنية : ايه صغيره بس هالحين كبيره تخافين من عنز يابنت !!؟ أمنية بااحراج : ايه كنت صغيره بس الحين عادي ام سويلم تناظر ساعتها : يله انا استاذن بروح لغنمي منيره باابتسامه واسعه تأشر ع أمنية : خذيها معك خلها تشوف الغنم وتساعدك ام سويلم : هذي والله الساعه المباركه أمنية تناظر جدتها بورطه : لا انا مشغ منيره تقاطعها بنذاله : لا معفيه من الشغل روحي تونسي وشوفي الديره ام نوره تضحك : ههههه والله شكلها للحين تخاف أمنية وقفت بقهر وناظرت ام سويلم : اجهز واجي × ام نوره الي تبعت أمنية بعيونها لين دخلت البيت .. لفت ع منيره : والله ياام سعود طحتي من عيني شلون ترضين تطلع للناس بهاللبس ولاحتى سلمت علينا بسنع منيره : ماني راضيه والله بس هذاني احاول اسنعها رحمة الله عليه وليدي عشانها بنته الوحيده دلعها ام نوره : الله يعيينك ام سويلم : خلوها هذا جيلها لو تتابعون لبس بنات هالجيل تتعبون كلن وجيله يله انا بروح البيت اجيب سيارتي * سمعت جدتها تنادي .. بسرعه تلثمت ولبست نظارتها الشمسيه وطلعت شافت جدتها جالسه لحالها منيره تصارخ : سنننه تأخرتي ع الحرمه اطلعي يله أمنية تعدت من عندها وبغرور : الي يبيني ينتظرر منيره تمسك تراب بيدها وترميه عليها : اقوول اذلفي بس أمنية ضحكت تقهرها ايييه الحين طلعت ع حقيقتها ولا عند الحريم محترمه نفسها العجوز المنافقه .. طلعت عند البوابه الكبيره شافت ددسن قديمه وفيها ام سويلم فاتحه الشباك ومطلعه يدهاا : يله يابنيتي تأخرناا لفت للباب الثاني وهي تشوف حرمه راكبه .. شلون تركب هي جواهر فتحت الباب ونزلت واشرت لها : ادخلي اجلسي بالنص أمنية رفعت حاجب : ادخلي انتِ والله مااجلس بالنص ام سويلم : جواهر ووجع اركبي خلي البنت ع كيفها جواهر تأففت وركبت وبعدها أمنية .. وام سويلم حركت السياره وصوت الراديوو أمنية صرخت بشويش لما كتف جواهر ضرب فيها مع تحركات السياره والطريق حفريات جواهر متعمده كل شوي تميل عليها وتدفها بقوه .. مقهوره امها صحتها من النوم عشان تروح معهم تسلي بنتاخ منيره .. أمنية تلصق فالباب : ههفف خالتي مافي طريق ثاني اسفلت ام سويلم : ماعليك قريبه العزبه جواهر بملل من الراديو : يمه ابي الف عن هالقناه ام سويلم : لفي جواهر تلف بالقنوات والشمس قبالهم .. أمنية رفعت كوعها ع الشباك وحطت يدها ع خدهاا .. عروس ورايحه للغنم ي حياة الشقاا جواهر لفت ع أمنية وضحكت لما لقت اغنيه فيروز نسم علينا الهوا : ههههههه هذا وقتها وحنا محشورين بالددسن أمنية تضحك : هههههه ورايحيين الغنم ياالله شوو هييداا الجمال نسم عليناا الهواا من مفرق الواادي ياهوى دخل الهواا خدني ع بلادي * * ام سويلم راحت تفتح الباب للغنم عشان يطلعون .. جواهر تناظر أمنية بتحدي : يله روحي عند شبكهم أمنية استندت ع بركه المويه وتعدل نظارتها الشمسيه : عن حركات البزارين ترا مااخاف هذي هي حيوانات عاديه اليفه بس انا هالحين قرفانه من ريحتهم لااكثر جواهر تنزل طرحتها ع كتفها وشعرها مرفوع كله : اي والله صادقه ريحه المكان استغفرالله انا مااحب اروح للغنم بس اليوم عشانك امي صحتني من النوم اروح معكم أمنية طلعت عيونها لما شافت الغنم طلعو من الشبك وكلهم كذا يجرون بجهتهم .. صرررخت ونطت فوق البركه بخووف وجواهر وخررت شوي بعيد وهي ميييته ضحك ع شكل أمنية : هههههههههه اااخ ياابطني ياغبيه ههههههههه جايات للمويه هههههههه أمنية تناظر تجمع الغنم عند حوض المويه .. تربعت فوق البركه وتناظر من فوق مطنشه جواهر وتكلم الغنم : شوي شوي كلكم بتشربوون بدون زحمه جواهر طلعت جوالها تصورها .. أمنية : هااي انتِ ام قروون لاتدفين زميلاتك حسووده المويه كثيره تكفيكم "ولفت لجواهر شافتها تصور صرخت " وربي انك عنز من سمح لك تصوريني جواهر تضحك ببرود : هههههه انا اسوي الي براسي ماانتظر سماح أمنية تنرفزت : احذفي الي صورتيه بسررعه والله لااخليك تندمين جواهر قفلت جوالها ورجعته بجيبتها ولفت عنها رايحه سافهتها .. أمنية ناظرت الغنم مشغولات مو منتبهات لها .. نزلت بسرعه وراحت جري لجواهر وسحبتها من شعرها وهي تصارخ : انا اييش قلت جواهر تحاول تمسك شعر أمنية وترد لها الضربات .. وطاحو ع الارض وكل وحده شاده حيلها تضرب ام سويلم لما شافتهم جت بسرعه تفك بينهم واكثر شي تضرب بنتها عشان تفك : فكي بنت الناس فشلتينا وقدرت توخرهم عن بعض .. أمنية ترتب شعرها ووجهها احمرر : بنتك قليله الادب صورتني بدون ماادري خليها تمسح جواهر بسرعه تطلع جوالها من جيبتها وشعرها الي كان مرفوع طايح بتبعثر وتصارخ : انا الي بحذفها جوالي تلوث ام سويلم تضربها ع ظهرها : حسبي الله امسحيها بسرعه وهاتي الجوال والله ماتشوفينه أمنية ابتسمت بشماته : اييه خالتي خذيه منها الاطفال مايصير تعطونهم جوالات جواهر بعد ماحذفت الفديو وامها سحبت الجوال ناظرت أمنية بحقد : وجه النحس ورربي مااصبحت بخير من سمعت اسمك قطيييعه ام سويلم : اصص ولا كلمه امشي يله اطعمي الغنم .. امسحيها بوجهي يابنت منصور هالبنت الجوال بيدها طول الوقت وكل شي تصوره اتكلم ولا تسمع أمنية تناظر جواهر الي راحت عنهم زعلانه : ماعليه خالتي * في سياره نايف راجعين من الجامعه .. نجلا جالسه ورا عند الشباك تناظر الطريق .. العيشه ببيت جدتي ابد مو عاجبتني امس لما قلت لامي اني بعد الاختبارات بروح الديره عند جدتي وأمنية زعلت مني.. بس خلاص مليت ماني قادره اخذ راحتي خوالي 24 ساعه موجودين ماتعودت ع بيت فيه رجال كثير مااخذ راحتي لا بلبس ولا شي خاصةً اني مو متعوده عليهم واستحي منهم امي عاجبها الوضع رفضت لما عمر قال يأجر شقه ويسكنون معه امي من بعد ماعمر طلق ساره وتزوج أمنية وهي مو طايقته ماادري ليش يعني صح تحرشه فيها يضايق بس مو لهالدرجه بالنهايه هي زوجته .. بس احس ان في شي ماادري عنه فتون : باالله نايف ابي فطور بعد هالاختبار الزفت نايف : افطرو فالبيت مالي خلق امر شي نجلا طلعت جوالها من شنطتها متجاهلتهم وارسلت لعمر " متى تروح الديره " عمر رد عليها سريع "الثلاثاء ان شاءالله " نجلا " عادي تنتظر للخميس ؟ " عمر " ليش " نجلا " اخر اختبار عندي الخميس وابي اروح معك " عمر "وامي ؟ " نجلا " ماتبي تروح بس انا بروح مو مرتاحه ببيت جدتي " عمر " تمام انتظر للخميس ان شاءالله " * بعد المغرب .. أمنية فالمطبخ تسوي لها شاهي وتسمع صوت التلفزيون عاالي ع مسلسل خليجي : اييه منيرروه ماتبطل مسلسلات المغرب حطت لها مكسرات بصحن وهي تضحك : بو طبيع ماييوز عن طبعه ههههههه صبت لها في كوب وطلعت من المطبخ تتمخطر لين وصلت الصاله وجلست وهي تناظر التلفزيون : باالله هذي المره كم تتابعين الحياله انا معكم تابعتها مرتين مو من صجك عااد منيره تناظر كوب الشاهي : ولا طبع زيين اخذتيه من ابوك الكريم الحين مسويه شاهي من حلالي ولاتصبين لي وش براده الوجه هذي أمنية ببرود تشرب شوي : سويت ع قدي منيره تناظرها بصرامه : تقومين هالحين تسوين لي أمنية : انا ماني جايه هنا شغاله عندك اخدمي نفسك بنفسك حبيبتي منيره تهز راسها : ززين اجل اخدمي نفسك بنفسك وماعادني حاسبتك معي فطبخي هه أمنية ناظرت جدتها الي وقفت وراحت للمطبخ .. شلون يعني !! انا طبخي اسم الله ع النعمه وهي تعرف عشان كذا ماقالت لي اطبخي ولاطلبت مساعدتي .. تذلني باكلها منيروه بس هين انا ادبر نفسي * * بيت ام منيف .. تمشي بالحوش وبيدها كتابها تدرس و بصوت عالي وتكرر وتحرك يدينها داخله جوو مع الحفظ .. حست بجوالها يهتز بجيبتها .. طلعته بزهق بس اعتدلت بوقفتها لما شافت المتصل .. ردت : هلاا ابووي سعود : السلام عليكم كيف حالك نجلا : وعليكم السلام الحمدلله انت كيفك سعود : والله مضغوط وابيك تساعديني ولدي مرقد فالمستشفى وامه معه وانا محتاس مع اخوك الثاني خالته ماهي متحملته وانا مااعرف له لحالي ابي اجيك واخذك تساعديني نجلا : بس انا عندي اختبار بعد يومين سعود : ماعليه خذي كتبك معك وكل شي تحتاجينه يله بعد المغرب اجيك نجلا ناظرت جووالها .. يعني خلاص امر ولا في مجال تناقشه .. خييرر بعد ناقصه انا قروشه بزارين الحين شقول لامي * ام منيف : خلاص ياحرمه صرعتي روسنا بالحنه مثل ماانت امها وتخدمك هو ابوها وواجب تساعده نجلا لابسه عباتها وجالسه تنتظر وبيدها جوالها وبزهق : انا لو بيدي رفضت وانتِ اكثر من يعرفه مايحتاج اقول هفف طوقه بقهر : هذا لانك ضعيفه اخخ بس لو أمنية مكانك كان ورته الشغل نجلا رفعت حاجب : ياسلااام هالحين عجبتك أمنية وانتِ قاطعه ولدك من تزوجها طوقه : شاايفه يمه طوله لسانها بس علي اناا وعند ابوها ولاتسمعي حسها نجلا : ترباتك يمه من زمان محسستني ان ابوي وحش ولازم انطم ولااتكلم عنده ولااطلبه شي عودتيني ع الادب الزايد معه لين ضاع حقي وكبرت عرفت انه انسان عادي ليش مااتكلم معه طبيعي اضحك وامزح ليش هالرسميه بس خلاص تعودت مااقدر اغير تعاملي معه طوقه لمعت الدموع بعيونها : ابووك ما لان الا لما كبر ولا وانتم صغار كان قوي وماعنده الا ضرب والي اكلها عمر لانه شقي انتِ لانك تسمعين كلامي وساكته مؤدبه عشان كذا ماكان يضربك الحين صار اللووم علي الله يساامحك بسس نجلا بسرعه لحقت امها قبل تطلع وحضنتها بقووه : يمه مااقصد والله حقك علي ام منيف تناظر بصمت ولاتبي تتدخل بينهم .. طوقه نزل دمعتها وهي تحس ببوسات نجلا ع راسها : خلاص ياامي انا ماازعل منك نجلا : الله لايحرمني منك انا ماابي اروح الا وانتِ راضيه علي طوقه تحضنها : الله يرضى عليك ويفرحني فييك ياجعلني اشوفك عروسه قرييب نجلا ضحكت : يعني ماتفرحين الا تشوفيني عروس طيب قريب تشوفيني خريجه ام منيف : لاا باالله مافي مثل فرحه شوفه ضناك بيوم عرسه * لاا خلاااص مااقدر اتحمل اكثر من كذا .. من متى صارت جدتي طباخه وريحه اكلها تمووت جووع العووبا البخييله تخلص اكلها وتغسل مواعينها ولا تبقي لي شي .. انا ماقهرني الا الغدا اليوم اكلت وارسلت الباقي لام سويلم .. طيب والادميه الي عندك بالبيت احس كرهت الاندومي والسندويشات الي اسويهم خلااص ابي اكل ثقيل وحار هو الي يشبع صدق .. ابي ررررززز ياعاالم يلعن الجووع شو بيزل اااءءء احس ببكي خلاص لازم اتنازل واروح اتفاهم مع جدتي مو حاله هذي حسبي الله فيك ياعمير لا اتصال ولا حتى رساله وانا لو تمووت مابديت رحت انقلع والله ماادور وراك وبس تجي اعلمك ان الله حق اشوا ان اهل الديره مايدرون متى كان زواجي ولا فضيحه يدرون انه رماني هنا وراح بعد ليله زواجنا ناظرت المرايه : تمام قميص روز بيعجب جدتي اكيد وهذي البدايه اووف ياريحه عشاها تررد الروووح هههههه ااه يااربي احس انخبلت طلعت من غرفتها .. شافت جدتها جالسه بالصاله وكالعاده المغرب تتابع الحياله قربت منها وباست راسها وجلست جنبها .. منيره بدون ماتناظرها وبداخلها رضاا من هالخطوه .. أمنية تناظر جدتها بااستعباط : ليش ساكته طيب قولي شكراً ع البوسه منيره لفت تناظرها وهي تلوي فمها أمنية ابتسمت بتمصلح : امم منوور خلينا نبدا صفحه جديده دامنا يعني ساكنات مع بعض مايصير انتِ مو طايقتني ولا انا طايقتك لازم نتأقلم منيره : ساكنه عندي ببيتي هذا غير اني جدتك ام ابووك ولازم تحترميني منور ذي لااسمعها ولاقلت لك كلمه تسمعيها ولسانك لايطول علي أمنية تكتم غيضها وتتبسم متجاهله بعض الكلام : انا اقولك منور ادلعك جدتي مو حلوه تكبرك وانتِ صغيره ماشاءالله ولدتي عمي وانتِ بنت ال15 منيره تبتسم بخجل : ايييه الحمدلله بعدني بصحتي وعافيتي أمنية بتمصلح : كل الجدات ياالله السلامه دوبها تتحرك وانتِ ماشاءالله نشيطه تنظيف البيت وطبخ سنعه ماشاءالله الا ماقلتي لي ليش ماتزوجتي بعد جدي وانتِ صغيره وحلوه غريبه جلستي منيره تعتدل بجلستها وعجبتها السالفه وبفخر : مااخون العهد وانا بنت ابوي طويلع الله يرحمه حفى ليين اخذني كان الكل يبي نسب ابوي وبناته وانا كنت ازينهم وتهاوشو علي اثنين من عيال عمي وحلف ابوي مايزوجني ولا واحد من عيال عمي واكثر من فرح بهالخبر طويلع ولد خالي الي خطبني قبل ورفض ابوي ورجع خطبني مره ثانيه وابوي رفضه مره ثانيه بحجه انه مو من قبيلتنا وانا اتضايق ولد خالي ابيه من اول مره خطبني وانا تعلقت فيه وماابي غيره وهو بعد الرفض مرتين مرض ولااحد عارف وش بلاه لامستشفيات ولاشيوخ نافعين معه وجانا خالي في ليله وحب لحيه ابوي يقوله بنتك علاج ولدي والله ان نفسه فيها واليوم الي بعده جا هو وخالي وشيوخ قبيلته وخطبوني له ووافق ابوي"تنهدت" عز الله ان عشت معه بجنه رحمه الله عليه أمنية انسجمت بالسالفه الي لاول مره تدري عنها : ابوي طالع ع جدي حنوون ورومانسي منيره تضحك بحزن : اييه منصور طبق الاصل من ابوه بالشكل والاخلاق أمنية شمت ريحه حرق وهمست بخووف : العشا احترق !؟ منيره شهقت وفززت : يااويلي الاكل ع النااااررر أمنية بااحباااط : لاااااءءءء اااه جوووعااانه * أَراكَ طَروباً ذا شَجاً وَتَرَنُّمٍ تَطوفُ بِأَذيالِ السِجافِ المُخَيِّمِ أَصابَكَ عِشقٌ أَم بُليتَ بِنَظرَةٍ فَما هَذهِ إِلّا سَجِيَّةُ مُغرَمِ طلع من حسابه بعد ماكتب هذي الابيات ليزيد بن معاويه .. ودخل حسابها وهو يتذكر نظرتها له قبل تقفل باب سيارته وتنحاش .. عجبته انها في كل المرات الي تفشل قدامها ماضحكت ولابين عليها بالعكس كانت خايفه وكأنها حاسه بألمه .. سمعها لما قالت لخزامى انتبهي وماامداه ينتبه هو الا يضرب فيه الباب اووف لازم تحبني شلون اعجبها واخليها تتمناني قرأ كلامها " اكرره البزارين ياربي هالمخلوقات ازعااج من وين طلع لي هالاخو وربي مجنون قطع كتابي ع طول طيب يااورع انا للحين ماخلصت دراسه بعد الاختبار قطعه ع كيفك " " ماالوم خالته تنحاش وترميه ع ابوي الولد قرد بمعنى الكلمه مايجلس كل شي تكسير وفجأه كذا يجي يشد شعري وينحاش ومرات يعطيني كف ع الماشي " وفرق ساعتين .. " هممفف اكملت مدري من هالعملاق الي المقرود فتح له الباب وخلاه يدرعم ياربي يالاحراج بس شفته قعدت اصارخ وهج خلعني وخلعته " عبدالرحيم يشد ع اسنانه بقهر .. ويين هي ؟؟ ومن ذا الي شافهاا .. يحس بصدره يغلي خلاص هي صارت له شي يعنيه ويخصه وبدون تردد فتح الخاص وارسلها " انتِ ووييين ؟؟! " نجلا الي كاانت جالسه بالصاله تناظر حوسه اخوها بتبلد توها منظفه ياعاالم تعبت .. شافت الاشعار الي وصلها وشهقت لما قرأت الاسم !!! ضربت جبينهاا اووف كيف نست تحذف حلطمتها كله من هالمقرود فواز ماخلا فيها عقل .. راحت حذفت كلامها بسرعه وبدون ماترد عليه خيير شعنده هو وسؤاله المتطفل ليش يقرأ الي تكتبه لازم تخلي حسابها خاص عبدالرحيم لما شافها حذفت كلامها ارسل وهو متنرفز " جاااوبيني وييينك فيه ؟؟!! " نجلا تناظر بتردد وارسلت " !! " عبدالرحيم عدل جلسته : لاابوو الثقققل تكلمي وكتب " ويينك ؟ كيف شخص غريب يدخل ويشوفك ؟ " نجلا كتبت " في بيت ابوي والي دخل اخو زوجته وماكان يدري اني موجوده وانتهت السالفه ونقطه . " عبدالرحيم مقهوورر بس شي بنفسه ارتاح انها جاوبته وشرحت له ماعاندت وطولت لسانها عليه .. هذي نجلا الي يذكرها مرنه فالتعامل ماتلف وتدور " انتبهي ع نفسك واعتذر ع الازعاج " انتظر ترد عليه بس سفهته وانقهرر لما حولت حسابها خااص * طلع من دوامه وهو مروق هذا اخر دوام له هنا ومن الاحد الجاي رح يداوم بالمحافظه الي تبعد عن ديرتهم ربع ساعه .. جلس فالسياره وطلع جواله من جيبته وبدون تردد اتصل عليها قرب ع الاسبوعين وهو لا سمع صوتها ولاعرف اخبارها مايدري كيف وضعها.. الجوال ع اذنه ويناظر موقف السيارات الي فضى : هه ماترد طبيعي لو مااتصلت احسن حرك السياره وتنهد وحط يده ع قلبه وهو يغني : لما بتوحشيني بحط ايدي على قلبي كأني بضمك ليا واسمع صوتك قوا مني وانا مغمض عينيا وافتكر كل اللي بينا دا اللي بينا مش شوية اييه والله مو شويه اخخ لو ما نجلا كان دعست هالحين ع الديره * صباح الخميس .. جالسه مع جدتها فالدكه حبت نظامها هالفتره تصحى الفجر تصلي وتجلس مع جدتها وجاراتها يفطرون وبعدها كل وحده تروح لشغلها وهي ترجع تنام وتصحى ع الغدا حلوه الحياه بدون مشاكل ومشاحنات .. اتفقت مع جدتها هي عليها التنظيف وجدتها الطبخ توها تستوعب ان جدتها ماهي سيئه حيل عادي تقدر تتعايش معها وتاخذها بالكلام الحلوو وتلوي ذراعها بأنها يتيمه .. منيره : نامي عشان تساعديني الليله بخلي بناخي محمد يذبح لنا تيس بسوي عليه عشيوه لعمر ونجلا أمنية ناظرت جدتها بصمت .. منيره : علامك !؟ أمنية اخذت نفس : بصراحه ياجدتي راضيه عن سوات عمر فيني يتزوجني ومن ثاني يوم يرميني هنا ويروح هذا وهو مجبرني اتزوجه يعني تزوجني بس عشان يهينني ولا هو مايبيني منيره : اول قولي لي انتِ وش مسويه له عشان يبي يسنعك عيا يقولي وانا متأكده ان الحق معه بسواته ذي أمنية ناظرتها بقرف : دايماً بصف الرجال الكل تخلا عني انا من لي يدافع عن حقي من يوقف عمر عند حده وياخذ بكرامتي منيره وهي تشوفها توقف معصبه : قلت لك علميني أمنية تقاطعها بصراخ : مااابي اشووف رقعه وجهه وخليه يطلقني ولا ترا اروح لااخوك الشيخ جابر يخلصني منه منيره شهقت : والله ان عتبتي باب البيت لااحش رجولك هذا الناقص بعد تسودين وجهي بفعايلك عند اهلي أمنية اخذت مجموعه حصى من الارض وبقهر رمته ع البيت وهي ماشيه بسرعه معصبه لداخل البيت .. منيره تناظر اللمبه الي عند الباب انكسرت : وكسرر ان شاءالله * نهايه الجزء الثــــامن .. |
الذين يشاهدون محتوى الموضوع الآن : 11 ( الأعضاء 4 والزوار 7) Cloud24, My.sai889, أميرةالدموع, وجدان1417 ♥♥ |
ممتعة مشاكسات أمنية مع جدتها تسلمى كاتبتنا العزيزة الذين يشاهدون محتوى الموضوع الآن : 5 ( الأعضاء 1 والزوار 4) موضى و راكان |
[align=center] ((الجزء التــاسع)) × فالسياره .. الساعه 1 الظهر : نجلا تأفف : كان انتظرنا للعصر لما يبرد الجو مو كذا نمشي بعز القايله عمر يناظرها من ورا نظارته الشمسيه : عادي السياره مكيفه انا مرتب اني امشي الصباح بس عاد طولتي بااختبارك نجلا : ايه كان صعب وختامها مو مسك عمر ابتسم : يله اهم شي خلصتي ومبرووك نجلا براحه : الله يبارك فيك ارتحت وتكمل راحتي بعد ماتطلع درجاتي والمعدل عمر بتردد : كيف ساره معك خلصت اليوم زيك نجلا : ايه شفتها وهي طالعه وكنت ببارك لها وطلعت بسرعه عني عمر سكت ماعرف وش يقول بسبته افترقت اخته عن اعز صديقاتها .. ظلم ساره بس الافضل انهم انفصلو وهم ع بر قبل مايزوجها ويكون بينهم عيال هنا يكون ظاالم صدق نجلا تناظره : لما تركت ساره توقعت تبي أمنية وتحبها بس يعني وضعكم الحين مو فاهمه ليش تركتها عمر : ماتركتها عادي قلت لكم بنعيش عند جدتي بس انا الدوام ربطني هنا شوي وهذاني راجع زواجنا كان بسرعه ولاقدرت اخذ اجازه نجلا لفت تناظر برا : ليت امي جت معنا عمر ابتسم براحه : ماعليه اهم شي انها مرتاحه عند جدتي انا مره مبسوط انها طلعت لي اليوم وسلمت عليها وودعتها نجلا : امي طيبه ماتطول زعل * صحت ع صوت منبه جوالها الي حاطته ع صلاه العصر .. قفلته وناظرت السقف بجمود بيشرف حضرته الليله .. قبل كل شي لازم اكوون ع سنقه عشره عشان اقهره فزت بسرعه لازم تلحق تتروش وتستشور شعرها وتتعدل طلعت من غرفتها ناظرت الغرفه الي قبالها الباب مردود ومظلمه وبروده المكيف واصلتها !!! مشت بشويش وطلت من الباب شافت شنط ونجلا نايمه ومتغطيه .. وخرت بسرعه عن الباب اووف هذول متى جو راحت تجري لغرفه جدتها وبسرعه مشت للشباك الي يطل ع الحوش من جهة البوابه الكبيره ومجلس الرجال .. شافت سيارته بالحوش موقفه ابد ماتوقعت يجو الظهر بسرعه راحت تتجهز قبل تصحى نجلا * في مجلس الرجال .. عمر : والله ان طبت مجلس ابو سطام لااكسر رجليها منيره : البنت يتيمه ولاارضى تظلمها وتهضم حقها سااامع من اليوم مايصير الا الي يرضيها عمر يكتم غيضه : بس انا لازم اشوفها عشان اتفاهم معها منيره : ماتبي تشوفك انت ماتفهم عمر جلس منهي النقاش : عاد انا طلاق ماني مطلق وصلي لها منيره تنهدت : بكره يصير خير هالحين روح اشتر لمبه وركبها العوبا كسرت لمبه الحوش * واقف ع السلم ويركب اللمبه الي فوق باب البيت وهو يتحلطم هذا الي ماحسبت حسابه تغسل راس جدتي وتلفها بصفها .. الا ويسمع صوتها من داخل البيت أمنية فالصاله تحرك شعرها بيدها ومبتسمه : مساالخيير حبيبه طويلع عمر ناظر تحت وهو ماسك اللمبه وابتسم اثااري الشغله فيها طويلع والله وجابت راسك بنت منصور يامنيره هههههه نزل درجتين وطل براسه من الباب .. ووقفت عيونه عليها شعرها الطويل تاركته براحته وفستان بيت قطني بلون القهوه منيره انتبهت لعمر : روحي بس صحي نجلا أمنية تلوي فمها بروقان وتلف : ننكد عليها شوي "وجات عينها بعين عمر الي بس باين راسه بنص الباب صرررخت بفجعه بدون ماتتحرك " عمر ارتبك من صرختها ورجع ع ورا ومايدري كيف زلت رجله ومال السلم وطاح ع الارض .. ومايسمع الا صوت ضحكها العالي .. وجدته طلعت تسمي علي أمنية وقفت تتمايل عند الباب وهي تضحك من قلب وتناظره وهو طايح ع التراب : ههههههههههه ااه ياابطني هههههههههههههههههه كيف طعم التراب "وتضرب كفوفها ببعض وتميل وتضحك" ههههههههههههههههه عمر جلس بمكانه بوجع ويناظرها مفتوون وضحك من ضحكها : ههههههههه أمنية لما شافته يضحك استوعبت وكتمت ضحكها وناظرته بااحتقار ولفت داخله البيت .. منيره : عسى مااوجعك شي عمر رجع انسدح ع الارض وناظر السما وتنهد : لا طيب * عشا بسيط حضرو الجيران واخوان ام سعود .. وهي الي طبخت الذبيحه والبنات يساعدونها وبعد العشا .. أمنية رافعه فستانها لركبتها ومثبتته بشال مربوط ع خصرها وبيدها المساحه وتشطف المطبخ نجلا طلعت من المطبخ بعد ماغسلت المواعين وبيدها البخور تلف بالبيت : جيت للكرف وربي مابغينا نخلص منيره تغسل يديها ع المغسله الي قبال الحمام : انا بنام الحين تعباانه ولاابي اسمع ازعاج نجلا : يعطيك العافيه والله تعبتي فالطبخ كان مرره لذيذ نوم الهنا منيره دخلت غرفتها وقفلت الباب .. نجلا رجعت البخور للمطبخ حطته ع الطاوله : باخذ القهوه برا ع القمرا تجي ؟ أمنية خلصت تشطيف : تمام اتروش واجيك * قفلت انوار الحوش عشان توضح القمرا .. وفرشت الفرشه بالنص ونزلت صينيه القهوه والحلا .. وجلست ناظرت عمر الي طلع من مجلس الرجال وقفل انواره والباب وراه .. عمر قفل الباب ولف بيروح للبيت بس راح لنجلا لما شافها : وينها ؟ نجلا : شوي تجي عمر جلس : كويس نجلا : تتقهوى ؟ عمر : لا من اليوم كثرت قهوه كفايه نجلا فتحت جوالها تطقطق فيه .. عمر : كان جبتي معك مركى ولا مخده نجلا : شايفني اخطبوط انا بالعافيه شلت الفرشه وصينيه القهوه عمر ضحك بخمول : طيب قومي جيبي لي والله ان ظهري يتطقطق تراي ع صحوتي الفجر مانمت من جيت هنا وجدتي كارفتني وبعدين عند الرجال صرت مقهوجي نجلا : والله حتى انا زيك بس ع الاقل نمت ومن اول ماقمت شغل شغل تو الي ارتحت عمر : عجوز نجلا ترفع حاجب : ورينا نشاطك يالشباب وقم جيب لنفسك أمنية طلعت من البيت وهي لافه عليها بطانيه خفيفه صغيره .. وبالظلام ماميزت وجود عمر الا لما قربت من الجلسه .. تباطئت بمشيها وهي تحاول تكون عادي وتتجاهله جلست وهي تشد البطانيه عليها بدون ماتقول شي .. نجلا صبت فنجال ومدته لأمنية اخذته منها وصبت لنفسها : ماشاءالله الجو هنا يرد الروح أمنية تشرب قهوتها وماعلقت وتناظر بعيد .. عمر يتأملها ع ضوء القمر .. احبها ياناس ومييت شوق لاابو العقل والمنطق الي يبعدني عنها نجلا حست ان جلستها غلط الكل ساكت .. اخذت جوالها : اوف جوالي يبي له شحن ومشت بسرعه وابتسمت وهي تفكر حتى ماقالو لها اجلسي او شي هههههه عمر بعد ماشاف نجلا دخلت البيت : جهزي اغراضك بنمشي الفجر أمنية تناظره بااستهزاء : ماشاءالله وين عمر : نروح نعتمر ونتمشى أمنية تحط فنجالها بالصينيه وتناظره : باالله بكامل قواك العقليه تتكلم اجبرتني اتزوجك وبعدها ترميني هنا وتفضحني عند اخوي من الاساس دام مو عاجبتك ليش تتزوجني يقالك بتربيني هه بس شكراً لاني حبيت الجلسه هنا وحبيت جدتي وكررهتك فعلاً مو طايقتك فياليت تحس ع دمك وننفصل بدون مشاكل عمر بجديه : قلتها لجدتي واقولها لك ماني مطلق أمنية : الشغله عناد يعني ؟ عمر ناظر حوله شوي ورجع ناظرها وبينهم صينيه القهوه : لا انا ابيك أمنية ضحكت بااستخفاف : هههههه احلف من متى ! ولا عشان ضيعت عليك ساره الي تتشرف فيها زوجه وام لعيالك تبيني تصبيره لين تلاقي غيرها تتشرف فيها عمر يهز راسه يأكد كلامه : ابيك زوجه عمر .. مو تصبيره أمنية وقفت وناظرته بجديه : وانا ماابيك مو طايقتك ياعمر حس ع دمك رجاءً عمر ظل جالس بمكانه يشوفها تروح عنه .. يحس كلامها اوجع قلبه .. حس الصدق بصوتها .. * نجلا منسدحه بفراشها وبيدها كتاب تقرأ .. عمر دق ع الباب المردود وفتح ناظر نجلا واشر ع شنطه : اغراضي هنا نجلا : ايوه اول ماجينا أمنية نايمه بالغرفه وبعده والله مافضيت اوديهم معليش عمر يفتح شنطته : لا عادي بكره انقلهم نجلا رجعت تكمل قراءة وهي حاسه ان فيه شي وجه عمر مايبشر بخير .. لمحته طلع من الغرفه وبيده بيجامه ولف لجهة الحمام .. ناظرت باب غرفه أمنية قبالها مقفل .. خيرر ايش فيهم هالاثنين يعني تركتهم ابيهم ياخذون راحتهم مو يتهاوشون .. * دخل الغرفه وقفل الباب وراه وقف شوي يناظر السرير .. فوق ماانه نفر ونص هي نايمه بوسطه ومغطيه راسها .. الغرفه صغيره ولا كان اختار سرير اكبر أمنية الي كانت تبكي استغربت مين الي دخل .. بس لما حست بالي جلس ع السرير وصلتها ريحه عطره .. فزت جالسه وعيونها حمرا وخشمهاا .. صرخت : نعممم !!؟ اطلع براا ماعندك احساس انت ؟! عقلك مااستوعب اي شي من الي قلته !؟ عمر ابتسم بتبلد متجاهل ملامحها الباكيه وهو يوخر اللحاف ويعدل المخده ورا ظهره : ازحفي ع الجدار هالمكان مايكفيني أمنية شدت ع اسنانها واخذت الخداديه وضربته ع وجهه تحس دمها يغلي وهو يتبسم ويسفه كلامها : اطلع بررا عمر يحاول يمسك الخداديه وهي تشدها وتضربه مره ثانيه ع وجهه .. سحب الخداديه بقوه ورماها ع الارض : طلعه مااني طالع والله والله هه حلفت أمنية تهز راسها : طيب ووقفت ع السرير ودعست ع رجله قبل تنزل وراحت للباب وقبل تفتحه وتطلع ناظرته وهي توخر شعرها عن وجهها بعصبيه : اشببع فييها عمر يرجع راسه ورا ع المخده ويلف ذراعه تحت رقبته ويناظرها بدون مايقول شي .. أمنية طلعت وقفلت الباب وراها بقوه .. نجلا جلست لما شافت أمنية داخله : وش فيه ! أمنية بكت : بنام عندك اخوك هذا ماابيه ثقيل دمم متخلف نجلا زحفت مسويه لها مكان ع فراشها : حياك أمنية انسدحت جنبها وعطتها ظهرها وهي تبكي بصمت .. نجلا تناظر كتابها وبالها معها .. كاسره خاطرها بس بتتركها ع راحتها مارح تتدخل . * الساعه 10 الصباح .. جالس في السياره ينتظرهم .. رافع ركبته ومطلع يده من الشباك وبفمه عود اسنان يلف فيه يمين يسار بدون مايمسكه .. ونظاره شمسيه زهقان ومانام زين وجدته مصبحتهم تبي يتغدون بمزرعه ابوه البعيده .. اصلاً مايدري وش اخبارها اهملوها من زماان .. شاف جدته جايه للسياره .. وركبت : ياالله بسم الله عمر يناظر ساعته : وين البنات يله عشان الحق صلاة الجمعه منيره تنهدت : من اليوم اعجل فيهن مدري وش يسون نجلا طلعت ووراها أمنية الي لفت قفلت باب البيت بالمفتاح .. نجلا ركبت ورا عمر : هاااي منيره : سنه انتِ وهيي أمنية ركبت ورا جدتها وبيدها صينيه خلتها بحجرها : كان مفروض من اول قايله لنا ع هالطلعه انقطع نفسنا وحنا نجهز نجلا : اي والله كل شي جري جري تعبت عمر حرك السياره ولف يناظر ورا وهو يريوس .. أمنية تناظره بطرف عينها .. ياربي هو ليه كذا حلوو بغض النظر عن فعايله لو اقعد اتأمله طول الوقت ماامل وجهه مرييح يمممه ابتسم لي انتبه لنظراتي اوووف عمر لف قدام وعدل جلسته وهو مبتسم برضا يحب فهاوتها .. * ع الغدا .. نجلا تاكل بتلذذ : فعلاً كبسه النار غيييير تجنن عمر : والله اشتقنا لطبخك ياجده حرام حارمتنا منه كل هالفتره منيره مبسوطه من المدح : بالعافيه مير طوقه ماتقصر مريحتني وهالحين مافي غيري بنات هالجيل طبخهم كله اندومي نجلا : لا عاد انا فنانه بالحلويات عمر وهو ياكل : وش تفيد الحلويات بكره لاتزوجتي وش تغدين زوجك وتعشينه حلاا أمنية تاكل بصمت ومتجاهله تناظره وهو قبالها .. منيره : اي باالله صدقت بس دامها خلصت دراسه انا اعلمها نجلا : بتعلم عشان نفسي انا حابه اتعلم الطبخ عمر يناظر أمنية وقفت اكل ورجعت شوي ورا : وعلمي أمنية بعد أمنية ناظرته بسخريه : وليه ماتعلمك انت عمر باابتسامه : انا اعرف اسوي كبسه تبين اذوقك اياها بيوم أمنية وقفت : لا شكراً ماابي اتسمم "وناظرت نجلا" يله نجيله سنه تاكلين نجلا وفاهمه قصدها وتكمل اكل : انتظري شوي عمر وقف : كثر الله خيرك ياجدتي وراح لجك المويه والصابون الي ع جنب يغسل .. منيره تناظر أمنية جلست ع المركى : علامكن نجلا : تنتظرني عشان اصب عليها وتصب علي عمر يناظرهم وهو يغسل ويصب ع نفسه باليسار : تعالي أمنية اصب عليك انا خلصت أمنية وقفت وراحت له وهي مصدومه من نفسها بس غصب عنها تلبي نداه .. جلست ومدت يديها قدامها .. عمر يصب ع يديها المويه وهو يناظر ذبلتها براحه انها مافصختها .. أمنية تخفي ارتباكها : اووف صب بقوه ايش هذا نجلا احسن منك عمر يبتسم بااستعباط : لا لا تسرف بالماء لو كنت ع نهر جااري أمنية طلعت منها ضحكه ماقدرت تمسكها ووقفت ورشت عليه المويه الي بيدها : سخيف نجلا جتهم : اماانه امانه صب علي حتى انا مااعرف اصب ع نفسي عمر جلس يصب ع نجلا وعيونه تتابع أمنية مايدري وش تسوي اخرتها فهم .. طبعاً شاهي هه حبيبها الشاهي * رجعو البيت المغرب .. منيره بعد ماصلت ع طول راحت للتلفزيون تلحق مسلسلها لايفوتهاا ونجلا جلست تتابع معها .. شوي يسمعو الاصوات العاليه أمنية تسحب شنطته وترميها فالسيب : غرفتي اناا جيت فيها قبلك عمر يسحب الشنطه الثانيه منها قبل ترميها : غرفتي انا معك وترتبين اغراضي بالدولاب من فوق خشمك نجلا جات بتقوم بس منيره مسكت طرف ثوبها : خليهم يطحنو بعضهم مالنا دخل نجلا رجعت جلست بتوتر .. أمنية واقفه عند الباب تخصرت : نعم نعم ناقصتك يد ولا رجل ماترتبهم بنفسك عمر شق الابتسامه : حلوو كذا استوعبي ان ذي غرفتي معك واغراضي بتترتب فيها "ويهز راسه وهو رايح للدولاب" وعاد مو مشكله عادي ارتبهم انا أمنية دخلت الغرفه بسرعه ومسكت باب الدولاب لايفتحه : انت ماتفهم انا مو طايقتك ماابيك بعقلك جاي تشاركني الغرفه ماابيك يااخي عمر يناظرها بجديه : وانتِ ماتفهمين قلت لك انا ابيك أمنية تلف نظراتها بالغرفه وتأفف : طيب وانا ماابيك احترم رغبتي عمر يلم يدينه لصدره : وليه مو انتِ تحترمين رغبتي أمنية ناظرته بااستنكار : عن الاستعباط عاد عمر يقرب منها ويحضن وجهها بين كفوفه ويهمس : لا مااستعبط انتِ ماتبيني بس انا ابيك ومارح اتنازل واتركك مثل ماتبين ليه مو انتِ تتنازلين وتبقين معي لاني ابيك أمنية تناظره وتحس عقلها توقف عن التفكير وكأن المعادله صعبه .. دفا يدينه .. نبره صوته .. دقات قلبها مو راضيه تهدا .. اخذت نفس بصعوبه : مارح اتناازل انت اذيتني عمر يرفع راسها يخليها تناظره : حتى انتِ اذيتيني وش بعد شوهتي سمعتي عند امي واختي وفوقه سكت عشان ماتطيحين من عينهم أمنية لمعت الدموع بعيونها : ورحت قلت لعبدالرحييم عمر : عبدالرحيم غير أمنية بكت : لا مو غير انا مرره منحرجه منه عمر تنهد وحاول يحضنها بس دفت يدينه : انتِ الي حديتيني والحين تبكين أمنية تمسح دموعها بقهر وتحاول توقف بكا : مارح اسامحك مارح اسامحك عمر يبي يستفزها : حقوده انا سامحتك وانتِ ماتسامحين !! أمنية ناظرته بقهر : تسامح ع وشوو انا مااذيتك قد مااذيتني عمر باابتسامه : الله اكبببر نسيناا كنت محدد زواجي وتفركش بسب أمنية هجمت عليه وتعلقت بذراعه وعضته بقووه بكتفه وتضرب .. وهو يحاول يدفها فاجأة هجومها منيره وقفت ع الباب وحطت يدها ع راسها : يافضحي فضحااه تضربين رجلك عمر استغل تفاجأها بوجود جدتها .. تحرك بسرعه لجدته : بنت ولدك هذي لازم تعلموها الانوثه مايصير والله مزوجيني واحد من الربع أمنية صرخت مستنكره ولفت حولها تدور شي ترميه عليه عمر ع طول سحب جدته وطلع وقفل الباب وراه وهو يسمع شي ضرب فالباب : قايمه عليها جنيتها خليها لحالها تهجد منيره تهز راسها : لاحول ولا قوه الا باالله * وقف السياره بالحوش .. وشمس الظهر الحااره توه راجع من الدوام نزل معاه صندوق الرطب وقفل سياره وراح للبيت .. فتح باب البيت وجاته بروده مكيف الصاله .. الفاضيه .. سمع صوت جدته فالمطبخ راح للمطبخ منيره قفلت النار عن القدر ولفت تشوفه واقف ع الباب : ماشاءالله ع الوقت توه جهز الغدا عمر نزل صندوق الرطب ع الطاوله : يعطيك العافيه ياارب منيره : الله يعافيك يله بس اشوف البنات صحو ولا لاء عمر : خليك ارتاحي انا اشوفهم وطلع من المطبخ .. شاف نجلا عند المغسله الي جنب الحمام تتوضى : زيين صحيتي نجلا ابتسمت : هلااا بالمداوميين عمر يفتح باب غرفته : اييه داومت وجييت والناس باقي نايمين أمنية الي كانت جالسه ع كرسي التسريحه وتمشط شعرها .. اخذت البكله تلم شعرها سريع وبتطلع عمر دخل ونزل شماغه وعلقه ع الشماعه .. شافها تقوم وتطلع من الغرفه متجاهلته : بزر خوافه أمنية وقفت وهي ماسكه الباب ولفت عليه : عفواً عمر : الي ع راسه بطحى أمنية بقهر : لاتدخل بنيتي من انت عشان اخاف منك انا طالعه اتغدا عمر يهز راسه يسلك : اييه ماتخافين قويه ماشاءالله أمنية : بزر "ودفت الباب وطلعت متنرفزه منه ثقيل الدم" * العصر .. نجلا طلعت للحوش وبيدها كيكه مسويتها ومبسوطه فيهاا .. راحت لجدتها وأمنية الي جالسات فالدكه وعندهم القهوه أمنية : هلااا هلاا كييكه شايله كييكه كيف تجي نجلا تضحك ؛ ايييه يالبطينيه مو لله المدح منيره : ع حبك للاكل مفروض تتعلمين وتستنعين طبخك لمتى ماتعرفين أمنية : والليييل بديناا نجلا جلست وحطت الكيكه ع السفره وبدت تقطع .. منيره : اييه ماعادك بزر بكره تصيرين ام ولازم تطبخين لعايلك أمنية ضحكت : ههههه باالله اسكتي ي حبيبه طويلع وخلينا نحلي بروقان ماابي شي يعلني منيره تنهدت : حلي وبعده روحي صحي رجلك اعوذ باالله وش هالنوم الناس من زمان صلو العصر نجلا مدت صحن لجدتها وبعده لأمنية .. أمنية وهي تاكل : جدتي بكره خلي نجيله تروح مع ام سويلم لغنمها نجلا : نعمم !! أمنية : ايييه رحت للغنم وبسيارتها الددسن هي تسوق وربي كان يوم ونيس لازم تجربين منيره : عوذ الله من كذبك ومن الي جت تتحلطم وتحلف ماتروح مره ثانيه نجلا تضحك : يعني صدق راحت والله ماصدقت منيره : الا راحت غصبن عن خشمها خليتها تروح أمنية خلصت صحنها ووقفت تناظر جدتها : ومفتخره ماشاءالله صفقي لها نجلا باالله لايطق فيها عرق منيره تلف تدور عصاتها .. وأمنية انحاشت البيت * أمنية طلعت من باب البيت تجري وهي تضحك وتصارخ : منووور منووور عمر طلع وراها يجري وع وجهه دقيق : انا اوريك يالبزر نجلا الي كانت تمشي بااتجاه البيت وقفت وأمنية لفت وراهاا وعمر صار قدامهاا !! : هاااي انت وخرر وش ذا بوجهك !!! أمنية تضحك وتمد له لسانها عمر ياخذ نفس ويناظر نجلا ويأشر ع وجهه : شوفي شسوت فيني تكب علي مويه وبعده دقيق والله لااادبها أمنية انحاشت لجدتها بعد ماقرب يمسكها من ورا نجلا منيره تمسك عصاتها بتضرب أمنية اللي دعست ع الصينيه وكسرت الفناجيل : ي الشيطانه وخرري عمر طيح ثلاجه القهوه برجله بدون ماينتبه وراح وراها جري لما لفت ورا البيت منيره تنهدت : المطفوقه في وحده تصحي زوجها بهالطريقه ياالله ان تعينك ياوليدي ع ماابتلاك نجلا تبتسم : هذا جزا اللي مايصحى بسرعه * أمنية انحشرت بالجهه الخلفيه للبيت مقفله مافي مهرب .. لفت ع عمر الي قرب منها وشكله يضحك بس مسكت ضحتها عشان مايعصب :اصبر اصبر انا الي وقفت غشش لاتمسكني ماهي رجوله روح يمين عشان اجري وعاد اذا مسكتني خلاص عمر وقف وتنح فيها وعلامات التعجب يحسها فوق راسه : العبب معك اناااا !!؟ أمنية تتوسع ابتسامتها من كثر ماهي ماسكه ضحكتها : لا مو لعب بس يعني حتى الهواش له قوانين عمر اخذ نفس بتعب من الجري وتوه صاحي : واللهِ ؟ أمنية تهز راسها : ايه يله روح يمين وماتتحرك الا اذا وصلت لزاويه البيت عشان غش اذا جريت وانا قريبه لانك اسرع طبعاً عمر تأملها شوي ..البزر النصابه ماتتغير .. تحرك يمين : اها طيب يله امشي أمنية : والله انك كفوو عمر ساكت ماتحرك وهو يشوفها تمشي بتردد وبس مرت من عنده .. مسك ذراعها بسرعه أمنية صرخت وتحاول تفلت منه وهو سكر فمها بيدده .. عمر يلف ذراعه حول رقبتها وهو مسكر فمها بيده ويمشيها معه : اووش تبين تنصبين علي امشي وانتِ ساكته أمنية تمشي معه وتحاول توخر يده عنها ويادوب تتكلم : ماارح اصرخ وخرر يدك عمر مارد عليها وهو يسحبها معه ودخلو باب البيت الخلفي .. ومشى لين المغسله ووخر يده عن فمها .. وناظرها فالمرايه قدامهم وهو لاف يده ع رقبتها .. حزن ع حال وجهه : يله غسلي وجهي أمنية بهدوء : طيب فكني كيف اغسله وانت وراي عمر وخر عنها ومسك يدها اليسار عشان ماتنحاش : يله غسلي أمنية واقفه جنبه .. فتحت المويه وهي تحس بتوتر : نزل راسك طيب عمر نزل راسه للمغسله وغمض .. أمنية دخلت يدها بالمويه الي صارت ترجف وتحاول تتحكم برجفتها .. غسلت وجهه .. والدقيق لاصق بلحيته تحاول تطلعه .. عمر مغمض وساكت .. يحس بيدها المرتجفه تمر ع ملامحه أمنية تغسل يدها : خلاص عمر فتح عيونه وناظرها كيف محمره .. وبهدوء اخذ يدها وباسها : مفروض مااقول شكراً بس شكراً أمنية سحبت يديها منه بقوه ورجعت ع ورا : غصبً عنك عمر شد ع اسنانه بقهر وهو يشوفها تروح تجري وشعرها يتحرك معها .. : هذي الي ماتمشي بالطيب × يوم الاثنين .. وقف عمر السياره عند الباب الي قالت له عليه جدته .. : متأكده ي جدتي هذا باب الحريم ام سعود تعدل عباتها : اييه شقالو لك مااتذكر نجلا : اييه ايه هذا بزر طلع منه عمر : تمام اذا تبون ترجعون البيت ارسلو لي نجلا : انا جوالي خليته بالبيت شغلت فيه سورة البقره أمنية فتحت بابها ونزلت .. تحس مرتبكه ونفس الشي نجلا كلهم يمشون ورا جدتهم .. انعزمو ع حنا والصدمه لما عرفو العروس هنادي صاحبتهم وهم صغار .. دخلو مع الباب وكان بااستقبالهم الحريم يهلون فيهم .. أمنية نزلت نقابها وهي تناظر الحوش المفروش بالسجاد الاحمر .. وكرسي العروس بالنص .. والسماعات الكبيره .. والحريم الكثار جالسين كذا عادي ع الارض واغلبهم بالعبايات والبزارين منتشرين فالمكان يلعبون ويجرون .. جلسو فالمكان الي قالو لهم عليه .. نجلا مسكت يد أمنية وهمست : نشيل عباياتنا ؟ أمنية تهمس : مدري اسألي جدتي انتِ اقرب لها نجلا لفت ع جدتها وهي تشوف البنات الي بااعمارهم عادي بدون عبايات .. ماامداها تسأل جدتها .. اخذت فنجان القهوه من البنت وابتسمت : تسلمين أمنية تعدل حجابها واخذت الفنجان ونزلته ع الارض رفعت راسها الا بنت ثانيه تمد لها صحن .. اخذت حبه معمول ورفضت تاخذ شوكولاته كفايه .. ام سعود الي سحبت ع البنات دقتها سوالف مع الحريم .. لفت ع نجلا بطفش : وش تبين انتِ قطعتي عباتي نجلا بشويش : نفصخ عباياتنا عادي ام سعود : عادي نجلا لفت ع أمنية الي سمعت جدتها : نشيلهم هنا ؟ احس شكلي غلط ماادري عن شعري كيف أمنية رفعت عيونها للبنت الي رجعت ومعها ثلاجه القهوه : بس ياقلبي تسلمين رحمه : فنجاان ؟ أمنية : لا والله بس الله يسعدك اا شسمه وين دورات المياه رحمه ابتسمت : تعالي انا اوصلك له نجلا اخذت شنطتها ووقفت : خلاص طيب جدتي حنا بنروح داخل ام سعود : ع كيفكن أمنية ونجلا مشو مع رحمه الي وصلتهم لدوراة المياه .. نزلو عباياتهم نجلا تعدل شعرها ع المرايه : كيف ؟ أمنية تتعطر : تهبليين رحمه واقفه تنتظرهم وتتبسم : ماشاءالله عليهم ترا للحين مااميز بينكم اعرف اسمائكم بس مااعرف اي وحده اسمها كذا نجلا ابتسمت : انا نجلا وهذي أمنية رحمه : تشرفنا انا رحمه اخت العروس نجلا وأمنية شهقو مع بعض بصدمه رحمه البزر .. الي كانت هنادي تنحاش عنها ماتبيها تلعب معهم لانها تعلم امها بكل شي .. نجلا تضحك : متى كبرتي ههههههه رحمه تبتسم بااحراج : توني بالثانويه المكياج يكبر ههههه أمنية : يااعمري رحمه : اذا خلصتو تعالو عند هنادي بالغرفه نفاجأها * أمنية وقفت عند الباب تشوف هنادي العروس بالغمره الخضرا .. وعندها بنتين يعدلون شعرها .. رحمه : هنوو شوفي من جبت لك هنادي لفت تناظر البنتين الي فيهم من بعض ومع انهم تغيرو عن زمان بس عرفتهم ع طول : نجلا وأمنية !!!!!؟؟؟ نجلا صاارخت بحمااس وراحت لها بسرعه وحضنو بعض بقووه .. وأمنية تناظرهم فعلاً هنادي ماتغيرت نفس الشكل بس ماتدري شخصيتها تغيرت ولا لاء كانت مصلحجيه وفتانه .. تقدمت بعد ماوخرت عنها نجلا وحضنتها بشويش : الفف مبرووك هنادي تناظرهم مو مصدقه : الله يباارك فيكم وربي احلا مفاجأه شوفتكم متى جيتوو نجلا : حبيبتي جدتي رجعت هنا وجينا عندها هالفتره هنادي تتأملهم : وش هالزييين ماشاءالله نوره جيبي القهوه للبنات نجلا : لا والله تقهوينا هنادي ناظرت أمنية : وش ي أمنية هااجده لاتقوليين عقلتي أمنية ضحكت : عاقله من يومي * جلست العروسه بالغمره الخضرا ع الكرسي بالنص .. والحريم يحنن يديها وحولها متجمعين ويصفقون .. وحرمه تدق الدربوكه وتغني .. والبنات معها الحنا الحنا يابنااات ع عروستنااا يابنااات وهييييصه هيييصه هيييصه ولمه والخاله والعمه هييصه عند العروسه هييصه عند العريس نفرح ونهيص هيييصه وادحرج واجري وتعالى ع حجري ي رماان دنا حجري حنين يارماان ياخذك ويميل نجلا و أمنية يرقصون فالنص مع البنات وهم مرره مبسوطاات ع الاجواء والدق يحمسس * بعد العشاا نجلا تلف بعيونها تدور أمنية ماتدري وين راحت .. شافتها جالسه عند حرمه ماتعرف منهي .. الحرمه كشيخه تمسح ع شعر أمنية : الله يرحمها كانت ونعم المعلمه مربيه الاجيال أمنية اللي ماتتذكر الحرمه بس راحت لها لما نادتنا وسلمت عليها قالت لها تعرف امها : امين نجلا سلمت ع الحرمه بذوق وبعدين لفت ع أمنية : جدتي تقول بنمشي أمنية تجاهد دموعها من طاري امها استاذنت الحرمه بعدين راحت تسلم ع هنادي قبل تروح الضيقه ماليه قلبها تبي بس تحط راسها ع المخده وتبكي اشتاقت لامها حييل الكل يذكرها بالخير حتى طالبات امها زمان سلمو عليها ويذكرون امها مخنوقه مخنوقه حيل ماصدقت لبست عباتها وطلعت مع جدتها ونجلا .. شافت سيارة عمر ينتظرهم .. ركبت بدون ماتقول شي او تناظره .. عمر يناظرها من المرايه صاده وتناظر الطريق .. يحس فيها شي × نهاية الجزء التــــاسع ..[/align] |
الذين يشاهدون محتوى الموضوع الآن : 7 ( الأعضاء 4 والزوار 3) موضى و راكان, الذيذ ميمو, halloula, amana 98 فصل مبهج و أمنية مازالت شعنونة و مشاكسة مع عمر موفقة بإذن الله ... لك مني أجمل تحية . |
اقتباس:
شكراً لردك🤍🤍 الروايه باقي لها جزئين وتكتمل بإذن الله الي يقرأون بصمت ابي اشوفكم قبل النهايه 😁♥. |
مساء الخير.. انا من المتابعين الصامتين بس حقيقي غصب عني مااعرف اعلق واعبر.. مااقول غير ربي يسعدك ويسلم يدينك الجميلة دي من النار. انا من متابعينك من اول رواية لكي لكن من وراء الشاشة وحبيت واقعية قلمك وسلاستو انتي مبدعة ورااائعة رجااااء كبير مني لكي لاتوقف كتابة ولاتحرمينا من جمال قلمك ومخيلتك حبيبتي بالتوفيييق.. ومعك للنهاية 💓🌷 |
اقتباس:
مساالنووور ياهلاا شكراً لردك الجمييل اسعدني الله يسعدك♥♥ |
وقراءة ممتعه للزوار دايماً متواجدين اكثر من الاعضاء شكراً😂😂💔♥ الذين يشاهدون محتوى الموضوع الآن : 10 ( الأعضاء 1 والزوار 9) |
صباح الخييرر♥♥ ابي اقدم البارت اليوم لاني مسافره الليله ومارح اكون فاضيه الثلاثاء فقلت اقدمه بما اني خلصت منه بعد الظهر بنزله ان شاءالله ودعواتكم لي . |
((الجزء العاشر)) ماقبل الاخير.. * أمنية دخلت غرفتها نزلت عباتها وعلقتها بالشماعه .. ناظرت الباب المفتوح عمر يدخل ويقفله وراه ويستند عليه تحس انها بتبكي مخنوقه مو ناقصته .. كل الليالي الي فاتت متجاهلته وتنام قبله ولما تصحى بكل ثقاله دم تلقاه نايم جنبها .. همست : محتاجه اجلس لحالي لو سمحت عمر يتأمل زينتها بالفستان الزيتي وشعرها سايح بنعومه .. يشوفها تجلس ع السرير وتفصخ كعبها ومبين العصبيه بحركاتها : ليش ماانبسطتي نجلا من زود البسطه انهبلت تو ترقص بدون صوت أمنية تلف شعرها ورا اذنها وعيونها بالارض : انبسطت عمر تحرك وجلس قبالها ع الارض ويدينه ع ركبها ويناظر وجهها : لا اشوف الضيقه بعيونك والله أمنية تناظره وهي شاده ع اسنانها تحاول تحبس دموعها .. عمر يهز راسه وبشويش : هااه علميني من ضايقك أمنية تجعدت ملامحها ونزلت دمعتها غصب من نبرته الحنونه : اشتقت لأمي الكل هناك يتذكرها بنت ابله بدريه يقولون "وحطت يدها ع فمها وبكت" عمر جلس جنبها ولف يديه حولها وحط راسها ع صدره بدون مايقول شي يبيها تكمل أمنية تشهق : انا ليش كذا بكايه احس خلاص يعني مفروض انبسط الكل يذكرها بالخير عمر يبتسم بحب ويلمها له اكثر وهمس : أمنية انا احبك والله أمنية رفعت راسها وناظرته بعدم استيعاب ووقفت بكا .. شافت نظرته الصادقه : تحبني !! عمر يناظر عيونها وبتأكيد يهز راسه : ايه حييل أمنية تمنع ابتسامتها وقلبها يدق بجنون : من متى عمر : خلك مني قولي لي انتِ باقيه ؟! أمنية وفهمت بس تستعبط وبهدوء : باقيه ايش ؟! عمر يبتسم ويمسح ع خدها بااصبعه وهو يشوف السعاده بوجهها مهمها تنكر : لما جيتيني بغرفتي قلتي لي كلمه أمنية وذكرى ذاك اليوم توجعها .. وخرت عنه شويه وتحرك شعرها بيدهاا وكأنها مو مهتمه : اهاا كنت مراهقه وامر بفتره صعبه عمر يرفع حاجبه بتسليه : مراهقه ! مسرع كبرتي أمنية تصد عنه وتلوي فمها : بس دامك تحبني وتبيني بعطي نفسي فرصه اتقبلك بحياتي وهه يمكن مع الوقت ابادلك الشعور عمر ابتسم وهو يرجع يضمها له : طااايب طاايب * فالحوش فارشين السفره وينتظرون اذان المغرب .. نجلا تناظر عماتها شيهانه ومريفه الي جابهم سعود.. كلهم جو يفطور اول يوم برمضان مع امهم والحمدلله امي جت هي وجدتي وخوالي في بيتهم القديم .. ان شاءالله بعد التراويح بسير عليهم انا وعماتي امم اكيد بتسألون وين معاريسنا المجانين هههه راحو مكه بيجلسون فيها كم يوم برمضان .. بعد الفطور .. فالمطبخ ام تركي اخذت صينيه القهوه وطلعت لامها واخوها بالحوش .. شيهانه مسكت يد نجلا قبل تطلع وهي مبتسمه : الحمدلله نجلا تناظرها بااستغراب وبيدها صينيه الحلا : وش فيه ؟! شيهانه تركت يدها ومشت معها لبرا : مبسوطه لأمنية وعمر نجلا ماعلقت وهي حاسه ان في شي من اول ماجت عمتها نظراتها غريبه .. لايكون ولدها قايل لها شي من بعد درعمته عليها بالخاص اخرمره وهي قلقانه منه .. سعود متكي ع المركى : ماعليه وليدي طيب وودديت الحرمه عند اهلها تستانس منيره تلوي فمها : كان جبتها اول شي نشوفها ونشوف بزارينك سعود وهو ياخذ الفنجان من فوزيه : اجيبهم ان شاءالله ع العيد نجلا توزع صحون الحلا عليهم .. وجلست جنب شيهانه وصبت لنفسها قهوه .. حست نظرات ابوها عليها رفعت راسها وفعلاً يناظرها .. وربي في شي سعود لف يناظر امه : كلمني ابو عبدالرحيم خطب نجلا لعبدالرحيم منيره بفرحه : هذي الساعه المباااركه والله نجلا تحس بااحراج والكل يناظرها ياربي ايش هالموقف شقوول !! شيهانه تناظر نجلا بحب : وهو الي اختارها بنفسه سعود : انا من جهتي قلت لهم ماعندي مانع وعبدالرحيم رجال كفوو بس عاد الراي الاخير عند نجلا وش رايك ام تركي : عطوها فرصه تستوعب الخطبه وتفكر وتستخير صدمتو البنت ههههههه نجلا لسانها انربط وتتمنى الارض تنشق وتبلعها خيير ليش كذا قدام الكل احراااج سعود : زين عاد فكري ع راحتك .. اقول يمه المسجد القريب يصلون فيه تراويح ؟ منيره : لا صغير هذا الاكيد في مسجد ابو سطام الكبير * بعد صلاه الفجر .. أمنية جالسه ع الارض وسانده ظهرها ع الجدار وتناظر الحرم من الشباك .. عمر طلع من الحمام وجا جلس قبالها : في وشو سرحانه أمنية تهز كتفها : مو سرحانه قاعده اتأمل مرره حلوو المنظر عمر سكت وجلس يتأملها .. رافعه ركبها ومكتفه يديها لصدرها وتناظر برا .. شوي ولفت وجات عينها بعينه .. عمر : رمضان الي فات كنت اجلس نفس هالوقت بالحوش اناظر شباك غرفتك المظلم وادعي لك البيت كله ظلم بعدك ماعاد اسمع صوتك العالي بالبيت ماعاد اشوفك وانتِ طالعه لدوامك البيت هدوء مافيه مشاكل "وضحك بألم" كنت احس بداخلي ضيقه وكأني فاقد قطعه من قلبي بس اتجاهل واقنع نفسي ان هذا شعور عادي بما اننا عايشين مع بعض من طلعنا ع الدنيا طبيعي احس كذا بعدك ولما عمي قال بيطلعك وبيزوجك تركي انا ماقدرت اتكلم اقول انا ابيها انا مشتاق ولهت عليهاا ماقدرت كنت كاتم نفسي ورغباتها عقلي هو المتحكم ومأثر علي تفكير ابوي وامي وجدتي أمنية مسحت دمعه سريعه خاينه وتناظره بصمت وهي تلم يديها لصدها اكثر .. عمر : لما طلعتي كنت اتحاشا اخبارك بس لما كان عمي يفضفض لي انجبر اسمع كنت مقتنع ان كل الي احسه بس عشانك اول بنت بحياتي واذا عرفت غيرها بنساها كنتِ مجنونه وجننتيني معك للحين ماانسى شكلك لما شلتك للغرفه وقفلت عليك حاولت كثير اتجاهل صورتك ماقدرت شلعتي الباقي من قلبي ولما جيتيني بالغرفه كنت في صراع بين عقلي وقلبي وندمت حيل ع كلامي لك كنت قاسي وكذااب أمنية لفت تناظر الجو والشمس مابعد اشرقت : وانا ندمت اني جيتك اصلا ماادري كيف جتني جرأه اجيك فعادي استاهل الي جاني عمر بهدوء : طبيعي الشخص الي تحبيه تشوفيه بياخذه غيرك طبيعي تدافعي وماسكتي انا مانقدت عليك عادي حاس بشعورك لاني ندمت ع سكوتي يوم تركي اخذك أمنية تأففت ووقفت وراحت للسرير وهي تدري كل هالكلام عشان يوصل للي يبيه يبيها تقول اييه احبك : تعال نام بس خل عنك الهذره بعدين تعطش عمر ابتسم وقفل الستاره وراح جلس قبالها : حتى لو عطشت اتحمل تحملت اشيا كثير جت ع مويه أمنية تحضن الخداديه : المويه سر الحياه العطش يمووت ياحلو عمر بضحكه : طؤ سر الحياه عيونك أمنية ضحكت بقووه وتحط يدها ع فمهاا : لايااشييخ * ليله 26.. اليوم ام منيف مسويه عزيمه سحور .. أمنية جالسه تاكل مهلبيه بصمت وتناظر عمتها شيهانه بس دوبها نجلا من اول ماقالت انها موافقه وهي مقابلتها 24 ساعه ماتدري وش يتكلمون يعني مو معقول كل هذا تخطيط للملكه الي تحددت ثاني العيد .. تنهدت وهي تاكل وبنفسها .. المهلبيه لذيذه بشكل نفسي اخذ صحن ثاني بس استحي ياربي .. مو هنا الكل منتبه لتصرفاتي يدورون الزله خلصت صحنها وحطته ع الطاوله والطعم بفمها تحس لاول مره نفسها كأنها نفس طفل مو قادره تتحكم فيها .. وهي تشوف صحون المهلبيه مرصوصه ع الطاوله والفستق مرشوش عليها اااه ياربي مااقدر امسك نفسي ناظرت حولها الكل لاهي بالسوالف .. وقفت وراحت للطاوله اخذت لها صحن ثاني وطلعت من عندها برا يقالها بتودي الصحن لاحد او شي المهم ماتاكل الصحن الثاني عندهم ناظرت الصاله البزارين ماليينها .. وتسمع اصوات البنات من الغرفه الثانيه .. طلعت لباب البيت وجلست ع عتبته الباب تاكل وتناظر الحوش الكبير واللمبات ع الجدار .. طوقه وقفت ع الباب تناظرها : ليه طلعتي وجلستي لحالك أمنية رفعت عيونها لعمتها : عادي بس حبيت اشم هوا شوي طوقه استندت بكتفها ع الباب : اهاا .. مبسوطه مع عمر أمنية تحس الم بقلبها من نبرتها .. اييه مبسوطه وتحس روحها ترفرف معه .. بس خايفه يخربون عليها حياتها : الحمدلله طوقه تلوي فمها : وعمك سعود عندكم هالفتره يعاملك نفس اول ولا تغير أمنية : عمر مايسمح لأحد يأذيني طوقه ناظرتها ووصلتها الرساله بوضوح : الله يهني سعيد بسعيده أمنية ناظرتها وهي تلف وتروح عنها .. تنهدت ورجعت تكمل صحنها بعد ماخلصت .. راحت تتمشى فالحوش ترخي اعصابها شوي الوقت طويل اضطرت تجي معهم بعد صلاه التراويح لان مابقى احد بالبيت عمر بيساعد خواله .. ولا كان ودها تجيهم قريب السحور عشان ماتجلس عندهم فتره طويله : أمنية لفت لمصدر الصوت الهامس !!.. كانت وصلت للجهه المظلمه .. همست : عمر ؟! نايف قرب لها وهو بايعهاا مايهمه شي الا انه يشوفها عن قرب .. يروي شوي من ضمااه في كل مكان سيرتها وكله يسبون فيها .. وتتعلق روحه فيها اكثر .. صورتها وهي تلعب تحت المطر مو رايحه من باله .. مشكله ولد خالته عمرخويه ويحبه بس مايقدر يمنع مشاعره الي كل مالها تكبر مشاعره خانته جات عليه هو مايخون يعني ؟! * نجلا دخلت الغرفه ووقفت تناظر البنات يلعبون اونوو ع الارض .. اخذت نفس براحه يادوب صرفت عمتها نشبت لها تحس خلاص ياربي تبيها غصب تحب ولدها توريها صورها ومقالاته طيب اصبري ياعمه بفتره الملكه اتعرف عليه اكثر .. يووه فتون رفعت راسها تناظرها وتضحك : هااه انفك الحصار نجلا ابتسمت بخجل : يسعدها عمتي متحمسه مره هههه روان ترمي ورقه زرقاء : ووينها بنت عمك ماتنازل تجلس معنا فاطمه : لا ياحبي حنا الي مانتنازل نجلس معها المجنونه نجلا تحرك كتوفها : ماادري والله ماشفتها فتون : تعالي بس الحين ننهي اللعبه وابدا معنا وربي عندي عقااب خطييير للي تبقى اخر وحده فاطمه : علميني ايااه شكلي انا بفوز اول وحده واعاقب * ابتسمت لما شافته جاي من نفس جهة الصوت .. انا دعيت ربي كثير انه يكون من نصيبي ويحبني كثر مااحبه .. بس مو بهالسرعه ابتسامته لي ونظراته شي جمييل شكراً ياربي شكراً عمر يسرع بمشيه وعيونه عليها .. رجع ع ورا بسرعه وتخبى ورا الحطب .. وهو يشوف أمنية واقفه بمكانها ومبتسمه وعمر يجيها وياخذها بحضنه .. حس النار تشب بصدره .. غصب عنه يحسد عمر ويغار منه عمر يمسح ع شعرها : ليش طالعه هنا بروحك كان لبستي شي ع راسك لو احد من العيال شافك أمنية ترفع راسها وتناظره : البوابه الكبيره مقفله لو احد بيددخل يدق الباب وانتبه عمر يلف خصله من شعرها ورا اذنها بهدوء : والباب الخلفي الي دخلت منه شكلك ناسيته أمنية بملل : اووف والله كنت جالسه ع المدخل وجا في بالي اتمشى ومشيت شوي وخلاص انت جيت مو احد غيرك الحمدلله عمر ناظرها بصرامه : تدخلين البيت وماتطلعين أمنية انا اموت بحرتي لو احد شافك نايف صد عنهم وهو متفشل ومقهور من نفسه .. نزل راسه ع ركبته وغطى اذونه بيدينه مايبي يسمعهم ويكره نفسه اكثر .. ولو بيده طلع من هالمكان بس رح يشوفونه أمنية ترفع حاجبها : وانت داخل حضرتك لييش لو شفت وحده من البنات بالغلط عمر ابتسم : والله انا خالي ارسلني اجيب لبن نحتاجه بالطبخ مو مثلك اتمشى ليش ماتجلسين مع البنات ليش دايماً بروحك أمنية لمت يديها لصدرها وتأففت : مايحبوني ولااحبهم عمر بهدوء : مين يحبك ؟ أمنية ناظرته تستوعب سؤاله .. مين يحبها ؟ محد .. صديقات ماعندها .. حتى عمتها شيهانه سحبت عليها .. هو ماسأل هالسؤال الا وهوعارف انها منبوذه من الكل واولهم امه وابوه .. كانت حبيبه امها وابوهاا .. كسرت نظرتها وهمست : مااعرف عمر حط يده تحت ذقنها ورفع راسها وعينه بعينها : عمر يحبك يكفي ؟ أمنية ابتسمت وهزت راسها باايه .. وتعلقت برقبته تحضنه بقوه وهمست : تسواهم كلهم عمر توسعت ابتسامته وهو بالعافيه قدر يسمع همسها .. ياسعد عينه للحين تحبه . * بعد الفجر .. أمنية تناظر من شباك المطبخ .. عمها سعود يشغل سيارته ويروح كعادته ينام بالمزرعه اريح له مشت بسرعه وطلعت من المطبخ .. دخلت غرفتها ناظرت عمر نايم بالعافيه انتظر صلاه الفجر تعب مع خواله اليوم .. ابتسمت وهي تهز كتفها ع الصامت .. اخذت جلالها الكحلي ولفته عليها وبيدها نقابها وطلعت وقفلت الباب وراها بشويش ناظرت غرفه نجلا الباب مفتوح وفاضيه : اييه هيين من جو بنات خالاتك سحبتي علي طلعت من البيت والجو للحين مظلم .. مشت للباب الخلفي مثل مااتفقت مع رحمه اخت هنادي طلت من الباب والجهه الخلفيه ماتجيها سيارات .. شافت بنتين جايات من اللفه لبست نقابها ووقفت تنتظرهم .. ولما قربو عرفت البنت الي مع رحمه هذي جوهره بنت ام سويلم .. علت صوتها : ايش جايب هذي معك جوهره تلف يدها بذراع رحمه : رحمه توأمي ماتخبي عني شي رحمه : تعرفو بعض !! أمنية تضرب كف بكف : للأسف ايه رحمه : جوهره محزمي الملياان صدقيني بتعجبك أمنية سكتت شوي تفكر وتعيد حساباتها .. : طيب رحمه : وحنا جايين شفت البنات جالسات بنفس المكان الي قلتي عنه وصوت ضحكهم عالي أمنية : مااشاءالله مبسوطين جعلهم المانيب قايله جوهره بشماته : وش سوو لك أمنية ماانتبهت لنبرتها : كبو علي فيمتو يقالهم بالغلط قسم تنورتي صارت تفششل ولما قفلت الكهربا جاني كف ع الطاير وشدو شعري كلشي بسرعه وانحاشو ماادري مين منهم وربي انقهرت جوهره ضحكت بقووه : ههههههههههه رحمه : جوهره خلاص أمنية قربت من جوهره وشدت عباتها من عند صدرها : تنطمي ولاافطرك ترااب جوهره تمسح دموع عيونها : خلاص خلاص دخلو الحوش الي بابه مكسور والبيت الي فيه قديم واهله هاجرينه .. قبال جلسه البنات أمنية طلت من فتحات الجدار تشوف البنات يلعبون ولا كلمه .. جلست في مكانها تشوف جوهره ورحمه دخلو البيت .. ماقدرت تدخل معهم تخاف مع انهم قالو لها عادي البيت مافيه شي بس ماتقدر * نجلا وقفت قدام البنات الجالسات وتسوي حركات مثل وتحاول توضح لهم ويضحكون ع حركاتهاا .. روان تناظر ورا نجلا البيت المهجور شغلت لمبه وحده من الغرف والي يعرفونه ان البيت مافيه كهرباا همست : بنات شوفو البنات ناظرو وين ماتأشر روان .. قفلت اللمبه .. روان : الغرفه هذيك الي باليمين شغلت لمبتها والله فتون بخوف : يمممه شفتها والله كانت شغاله نجلا : ماشفت شي شوفوها مقفله عن هالحركات تبون تخوفونا فاطمه تناظرهم بخوف : ماانتبهت وانا قايله لكم جلستنا هنا غلط شوي كذا شغلت اللمبه مره ثانيه .. صرخت روان : شغلت شووفوو وبنفس هاللحظه أمنية اخذت مجموعه حصى من الارض ورمته عليهم من ورا الجدار .. فزو من مكانهم وصقعو ببعض الي انحاشت ع طول والي شالت شوي من اغراضهم واخرتها هجوو كلهم ميتين خوف * أمنية والبنات رجعو البيت ميتين ضحك .. والشمس بدت تشرق رحمه : اهم شي لاتعلمي هنادي صح انها تزوجت وراحت بس لو تعرف شي ع طول تعلم امي فتانه أمنية تضحك : من يومها سوسه وفتانه لاتخافين هذا سر بيننا الثلاثه وطلعت محفظتها من جيبتها وعطت كل وحده ميه : هذي عيديه مقدمه رحمه : مايحتاج أمنية تقاطعها : ولا شي حنا اصحاب وانا احب اسعد اصحابي جوهره : شكراً يله انا بروح قبل تفقدني امي أمنية ودعتهم ودخلت البيت وهي مرروقه تحس بردت ع قلبها الوقحات يستغلون تقفيله الكهربا ويضربونها بس حست قلبها يوقف لما شافت عمر جالس عند عتبة باب البيت .. ورفع عيونه لها وهو يشوفها جايه من الجهه الخلفيه فصخت نقابها وهي تفكر وش تبرر له .. عمر وعيونه حمرا مبينه مو شبعان نوم اصلا ايش صحاه : وين كنتي ؟ أمنية قربت وتحاول تكون واثقه : مع البنات سولفت معهم شوي وجيت عمر بدون مايتحرك او حتى تلين ملامحها : اي بنات !؟ أمنية تفك لفه الجلال وتنزله ع كتوفها وتبين عاادي : بنات جارتنا ام سويلم عند الباب قعدنا نسولف عمر : اي باب أمنية : خيير بعد اسألني وش كنا نسولف فييه وخر عن طريقي ابي انام دايخه عمر : اي باب قلت أمنية بملل : باب بيتنا الخلفي انا عنده وهم جوني سولفنا وراحوو عمر وقف وهو يحاول يتحكم بااعصابه : اهاا طيب انا لفيت الحوش كله ورحت للباب الخلفي ماشفت احد أمنية تحس قلبها وكأنه طاح ببطنها .. ماعرفت شتقول : ارجع كمل نوم شكلك تحلم انا عند الباب ماتحركت ومشت بسرعه ومرت من جنبه بتدخل البيت وهي ترجف .. بس شد ذراعها بقوه وهي حاولت تسحبها منه ودخلت البيت بس شدها بقوه وثبتها مكانهاا .. ومن بين اسنانه : انا ماتكذبين علي علميني وين كنتِ ؟؟ أمنية تهاجم تحاول تبعد خوفها : عناد فيك ماني قايله اييش يعني تشك فييني عمر صرخ بقهر : انتِ مسويه بلووه انا عاارف انطقي لاا بكف نجلا وقفت ع الباب ونزلت نقابها وتناظرهم بصدمه !! أمنية انتبهت لها وصرخت : ماتسأل اختك كماان ولافالح تتقاوى بس علي عمر يهزها مع ذراعها : مااالك شغل بنجلاا تكلمي احسن لك نجلا بتوتر : كنت عند امي ببيت خوالي أمنية ضربته ع صدره بيدها الثانيه : قلت لك وماتبي تصدقني بكيفك فكك يدي بتكسررها منيره طلعت من غرفتها : اعوذ باالله من ابليس وش فيكم ع الصبح وانتم صياام عمر دفها ع الارض وناظرتها بااحتقار : تكذبين علي عيني عينك وش هالبجاحه أمنية وشفاتها ترجف تحس انها بتبكي نظرته اوجعتها : ماكذبت عمر : الكذب والاحتيال يجرون بدمك منيره ناظرت عمر الي طلع برا البيت .. ورجعت ناظرت أمنية : وش سويتي له ماهو مكفي انه قابل فيك بعد كل بلااويك مفروض مايسمع منك الا لبيه وتامر وحاضر بس عووبا من يومك ولفت راجعه لغرفتها .. نجلا تناظر أمنية بشفقه بعد كلام جدتها : كل مشكله ولها حل أمنية وقفت وراحت غرفتها وقفلت الباب وراها بدون ماتقول شي .. * ليله العيد .. في الصاله .. فارشات الصفره ع الارض وكل وحده عاصبه شعرها .. ويسوون معمول العيد .. ام تركي : كلهن ولا وحده رضت تعيد بالديره قهرني مافيه حيل يحكمهن شيهانه : كان ودا كل وحده تعيد عند اهلها وجا هنا ام تركي : مايقدر مايقابل عياله صبح العيد يقول ماعليه يمه لا جيتي ثالث العيد اسلم عليك خزامى : ماعليك يمه اهم شي امدانا نجي والله مبسوطه اننا نعيد هنا نغير جو نجلا وقفت : بشوف الفرن يممكن جهزت الصينيه حاولو تعجلون شيهانه تضحك : وحنا قادرين نعجل من هذره مريفه ام تركي : لو مااسولف كان حسيتي بتعبه مع السوالف ماتنتبهبن الا وحنا خالصين أمنية تسوي معهم ع الصامت .. ضايق خاطرها عمر من بعد ذاك الصباح وهو يتجنبها .. يداوم فالنهار يجي ينام يفطر وبعد الفطور يروح عند العيال مايجي الا ع السحور وكذا .. كل ماحاولت تكلمه يسفهها ويمشي وكملت الحين .. البيت امتلا ام تركي جت ومعها بناتها .. وفارس جا وجاب معه عيال عمتها شيهانه ... وعمر صار مايدخل البيت عشان بنات ام تركي ينام بمجلس الرجال مع فارس * في غرفه نجلا .. أمنية واقفه ومستنده ع الجدار وتناظر فراشاتهم ع الارض واغراضهم مرتبه ع جنب .. الغرفه فاضيه من الاثاث .. بس مرايه ع الجدار ركبتها نجلا .. وشماعه نجلا تعلق فستانها بمعلاق وتعلقه ع الشباك : بنات كل وحده تكوي فستانها وتعلقه مانبي نضيع وقت الصباح خزامى منسدحه بفراشها : والله دايخه بنام لي شوي تكفون لاتزعجوني ليان جالسه ع جوالها تلعب لعبه وهي بفراشها : انا مارح اطلع عاجبني مكاني غزلان تلعب نفس لعبه ليان : ولا انا خزامى : اجل للااسمع لكم حسس أمنية طلعت بهدوء ودخلت غرفتها .. ونجلا طلعت وراها بعد ماقفلت اللمبه وردت الباب .. دخلت غرفه أمنية : بتنامين ؟ أمنية جلست ع كرسي التسريحه وفكت شعرها : لا مافيني نجلا جلست ع مقدمة السرير تناظر أمنية بدت تلف شعرها بالمكرات : ماتصالحتي مع عمر أمنية تفرق خصله من شعرها وتلفها : وانا قادره اوصله من الامه الي بالبيت نجلا : كلميه ارسلي له شي مو حلوه العيد يجي وانتم زعلانين من بعض أمنية تناظرها بالمرايه : مايرد ع اتصالاتي وارسلت له رد علي طيب نجلا : يعني انتِ الغلطانه أمنية بزهق : وش رايك باالله اكيد انا حسبي الله بس نجلا ضحكت : هههههه الحمدلله والشكر تحسبين ع نفسك أمنية لفت عليها ويدها تعبت ترفعهاا : لا ياقلبي احسب ع شي بيني وبين ربي تعالي بس لفي لي دامك فاضيه تعبت نجلا راحت ووقفت وراها واخذت المشط : تهقين بنتوافق انا وعبدالرحيم أمنية تناظرها بالمرايه : تبين الصراحه انا مااعرف عبدالرحيم كثير بس احسه نفس ماهو ماتغير عن وحنا صغار طيب ومسالم "وابتسمت بصدق" نفسك احس رح تفهمون ع بعض نجلا تلف شعر أمنية وبهدوء : ان شاءالله انا احسني مرتاحه ومبسوطه أمنية مبتسمه : الحمدلله هذا اهم شيي * صباح العيد .. في الصاله جالسه وهي كاشخه بفستان ابيض وبيدها جوالها وتصور نفسها .. ولا هي منتبهه لبزرها الي حاس البيت وهم ماصار لهم ساعه واصليين .. ومنيره جالسه بالطرف المقابل تناظرها .. زوجه ولدها شهد .. من ناحيه الزين مزيونه بس مبين انها رفلا ولاتجي ربع سناعه طوقه .. ام تركي بيدها المبخره ورفعتها فوق لما مر من عندها فواز يجري وقرب يصقع فالمبخرره : وييي بسم الله منيره ناظرت شهد بقوه : اقضبي ورعك ياحرمه ماانتِ شايفته كيف ماخلا شي بحاله شهد تترك جوالها : عادي خالتي طفل ام تركي حطت المبخره ع الطاوله : ولانه طفل خليه عندك وانتبهي عليه شهد وقفت وهي تلوي فمها وراحت تدور بزرها .. مرت من عند غرفه أمنية .. شافت البنات الي سلمو عليها اول ماجت واختفو .. كيف مخليين الغرفه فوضى وكل وحدهه تتزين من جهه ومتزاحمين ع التسريحه مشت عنهم وهي متباطه متى يخلص عيد الصباح وتروح ابد مو عاجبها الجو هنا بس سعود خلاها تجي غصب ومايهمه رضت او لا .. * دخل مع ابوه يعايدون الحريم .. ع طول جات عينه عليها مقهور منها حتى بعد رسالتها تحسب انه بيرتاح لاا هي زادت الطين بله اجل بيت مهجور الفجر !!؟ أمنية قربت سلمت ع عمها وباست راسه : من الفايزين سعود تعداها وراح يسلم ع اخته ام تركي بعدها .. أمنية تناظر عمر الي صار قبالها مدت يدها وصافحها ببرود .. ولا واحد نطق بكلمه .. عمر سحب يده وراح يسلم ع الباقين لين وصل لزوجه ابوه سلم عليها ونفسه كارهتها : من العايدين شهد تناظره لو تزوجت من زمان كان صار عندها ولد بكبره .. بس تمسكت بدراستها لين عنست وقبلت بااول خاطب سعود : من الفايزين عمر طلع من البيت بدون مايلتفت لأمنية بنظره .. وجلس ابوه يعايد بنات ام تركي * منيره راحت تعايد اخوانها وراحو معها ام تركي وشيهانه .. أمنية جالسه تناظر البنات يلبسون عباياتهم : وين بتروحون انتم بعد نجلا : وين بعد بروح لامي أمنية : طيب نجلا تروح لامها انتم شوضعكم خزامى تلوي فمها : وضعنا حبيبتي اجتماعيات خالتي طوقه وخواتها وبناتها نروح نعايدهم يحبونا ونحبهم ليان : خلوكم منها هذي نفسيه حتى بيوم العيد نجلا ناظرت شهد الي تناظرهم بصمت .. ورجعت لفت لأمنية : تعالي معنا الجو ببيت جدتي اونس من هنا أمنية بلا مبالاه مصطنعه : لا ماابي اصلا نعسانه وبنام نجلا : بكيفك شهد تناظرهم لين طلعو .. : وش هالملل متى بس ارجع جده اووف أمنية وقفت وسفهتها راحت غرفتها وقفلت الباب وراها .. ومشت بشويش ل السرير .. جلست ومالت ع جنبها لمت ركبها وصارت بوضعيه الجنين نزلت دمعه سريعه .. اشتقت اعيد مع امي وابوي صار لي 3 سنين ماعيدت زي العالم والناس .. كنت متفائله بهالعيد بس نفس الشي وحيده .. وطول عمري ببقى وحيده ومحد يحس فيني ليش ياعمر وش تبي اسوي يعني بررت واعتذرت وش بعدد .. هو يبي هالزعل من الله قال يحبني قال النصاب مسحت دموعها بكفها واختلط كحلها مع دموعها .. وهمست وهي تغمض عيونها وصورتهم ببالها : عييدكم سعييد يااحلا ام واب بالدنيا كلهااعسى الله يجمعني فيكم بالجنه * نهايه الجزء العاشر .. |
الذين يشاهدون محتوى الموضوع الآن : 12 ( الأعضاء 6 والزوار 6) Cloud24, My.sai889, الذيذ ميمو, soso200, رسوو1435, سوووما العسولة |
ما بتخلى من المشاكل و الحزن حياة أمنية على طول يجافيها الفرح |
مساالخيييرر بس حابه اعطيكم خبر ي اصحاب البارت الاخير بكره الاحد ان شاءالله 💗 |
((الجزء الحــادي عشر)) والأخـــيـــــر × يوم العيد العصر .. بالحوش واقفين عند السياره .. عبدالرحيم : ايه بس اعيد ع أمنية والحقك عمر مستند ع باب سيارته : قلت لها تطلع لك ولا كيف عبدالرحيم : امي راحت تقولها أمنية وقفت عند باب البيت تشوفه واقف مع عمر عند السياره .. عمتها صحتها من النوم عشان تلحق تعيد ع رحيم لانه مشغول بيروح يجهزلملكه بكره .. تحس انها مو طايقته هو الثاني ونفسها بخشمها لبست الشبشب الي عند الباب ومشت بجهتهم .. عبدالرحيم يناظرها ببجامتها وشال ع كتوفها مستغرب وين كشخه العيد .. تحرك يستقبلها أمنية مدت يدها بدون نفس .. عبدالرحيم صافحها وهو يشوف كشرتهاا .. سحبها كلها لحضنه : كل عاام وانتِ بخيييرر وبصحه وسلامه أمنية تفاجأة من هالحضن تحس العبره خنقتها مابين مستحيه منه ومابين محتاجه هالحضن والاهتمام : وانت بخير عمر يشد ع اسنانه وهو يناظرهم .. عبدالرحيم يمسح ع شعرها : علامك مكشره بيوم العيد من مزعلك أمنية تمسكت بثوبه من ورا بقوه وبكت وهي تدفن راسها بصدره اكثرر عبدالرحيم يحاول يرفع راسها وهي رافضه وتبكي : افااا تبكيين وانا اخووك عمر تقدم لهم بسرعه وصوت بكاها هز قلبه : أمنية شفييك أمنية بصوت مخنوق من البكا وبدون ماترفع راسهاا : خله ينقلع ماابي اشوووفه عبدالرحيم ناظر عمر بعتب : هذا وانت قايلي اموركم تعدلت عمر : وهي تعدلت بس هوشه بسيطه أمنية صرخت : ماابي اسمع صووته خل ينقلللع عبدالرحيم يمسح ع ظهرها يهديها : روح ياعمر بعدين نتفاهم عمر اخذ نفس وراح وهو متنرفز من بكاها بحضن غيره .. تكذب عليه وتضايقه ثم تروح تبكي وتتشكى ويل قليبك ياعميير * ملكه نجلا وعبدالرحيم .. في صالة البيت مزينين الكوشه .. جالسين العرسان طوقه تزغرت مبسوطه .. وشيهانه تساعد عبدالرحيم يلبس نجلا الشبكه قبل يدخل عبدالرحيم قالو للحريم يتفضلو بالحوش الي من اول فارشينه والحفله كلها فيه .. بس لقافه البنات والحريم لبسو عباياتهم ووقفو يتفرجو وسببو زحمه بالصاله الصغيره .. أمنية لفت ع البنات : قلنا تفضلو هناك عرساننا يبوون هواا فاطمه تهمس للبنات : هادمة اللذات ومفرقه الجماعات فتون تضحك وهي ماسكه لثمتها الي كاشفه نص وجهها : سوو نفسكم ماتسمعون روان : شووفو جووج ياعمري كيف مستحيه خزامى بخرفنه : مو منها من نظراته شوفو كيف يناظرها شيهانه : الفف الفف مبرووك حبايبي والله ان الفرحه ماهي سايعتني نجلا وصوتها واطي عكس عبدالرحيم الي صوته طغى ع صوتها : الله يباارك فييك يارب ام نوره الي واقفه عند الباب بعبايتها تناظر وتنقد بنفسها وش هالمعرس الي مايستحي يجلس عند الحريم وجارتها ع يمينها تناظر وتهمس لها : يافضحي بنات هاليوم مايستحن شوفي ذرعانها باينه عند الرجال ام نوره : جيل اقشر من اول مره يشوفها كذا وين ايامنا حتى وجهي نادراً يشوفه رجلي ام صبحي : اييه والله ام سعود ريحت راسها طلعت برا عن هالمنظر ام نوره : وانتِ ليه ماريحتي راسك مثلها ام صبحي بضحكه : امووت من حرتي لو ماشفت وش يسوون عبدالرحيم يبتسم لأمه الي راحت ترقص بسعاده .. لف يناظر نجلا الي توزع نظراتها ع الي حولهم .. لف بعيونه يدور أمنية .. أمنية راحت له لما شافته يأشر لها بعيونه تعالي : هلاا نجلا تناظر أمنية واقفه قدامهم .. عبدالرحيم : باالله خففي هالزحمه من اول قلت ماابي الا محارمي أمنية تأففت : والله من اليوم اتكلم اووف متطفلين مايفهمون نجلا وهي بعد متضايقه : قولي لامي تكلمهم أمنية : طيب وراحت لطوقه الي تصفق وتشجع شيهانه .. مسكت ذراعها وهي تلف شعرها ورا اذنها : عمتي قولي للحريم يطلعون عبدالرحيم مايبي الا محارمه حتى نجلا متضايقه منهم طوقه : اجل بس تخلص هالاغنيه وكلنا نطلع ونشغل السماعات برا أمنية اخذت نفس واشرت لعبدالرحيم ونجلا اوك .. * أمنية جلست ع الكرسي تحس رجولها مو شايلتها الكعب اتعبها بظهرها ورجولها .. ابتسمت وهي تناظر الي يرقصون والهوا البارد يحرك شعرها .. اليوم الجو عليل يهبل هنا ماشاءالله الحريم الكبار طربيات واغلب شي هم يرقصون غطو ع البنات .. تأملت عمتها ام تركي ترقص مصري .. كتمت ضحكتها ااه ياربي طربانه وتحسب ان رقصها حلو وهي بس كرشتها تهتز ههههههه اووف ياربي مااقدر امنع نفسي من التريقه الداخليه هههههههه ولا شوفو ام نايف حرام باالله هزت الارض وصدمت الناس شوي شوي ياحرمه من قال ان الرقص المصري رباش بالهداوه حبي هههههههه ااخخ يابطني عاد الي تردد مع الاغنيه وتمثل ونظرات حكااايه ثاانيه .. تحس انها بتختنق من كثر ماكتمت ضحكها .. اخذت نفس وصدت عنهم فتحت جوالها .. لقت رساله من عمر " الفجر امرك ونروح المزرعه " ماتت ابتسامتها .. كذا بس .. وانت حتى ماعيدت علي زي العالم والناس .. سلمت علي عادي مثلي مثل محارمك مو كأني غير عنهم .. زوجتك .. حبيبتك مثل ماتقول هه !؟ حتى رسالتي الي شرحت له فيها انا وين كنت واني ماكذبت عليه الا لاني خفت وقتها .. يرد علي طيب !!؟ هو يبي الزعل من الله حتى لو البيت مليان .. هذا هو قال نطلع المزرعه مفروض من اول .. ليش طول فتره القطاعه .. تحس صدرها يغلي من القهر ارسلت له " مااني رايحه معك " عمر "ماشاورتك . " أمنية رفعت حاجب وكتبت " ولا انا شاورتك . " عمر " تمام اجل بعد مايروحون الناس نروح المزرعه " أمنية " ماني رايحه معك لا الفجر ولا بعد شوي . " عمر " قلت لك مااشاورك انا اعطيك خبر فقط " أمنية " مع نفسك " وطلعت من المحادثه .. وتناظر جوالها تنتظر يرد .. بس تأخر وواضح انه مارح يرد خلاص . * دخلت المطبخ شافت طوقه حايسه مع الشغالات الي مأجرينهم لليوم يساعدونهم .. وقفت بدلع : اليوم ملكة بنتك وتاركه المعازيم وتشتغلين مثلك مثل الشغاله الحين صدقت سعود لما كان يشكي لي منك يقول طول اليوم تشتغل ولاتهتم في نفسها لا لبس ولا ريحه حلوه احزن عليك ليه كذا ماعندك انوثتك طوقه بهتت ملامحها وهي تسمع كلامها .. سعود كان يقول عنها كذا .. وهي تخدم امه الي لو نقصت عليها شي كسر راسها .. أمنية دخلت المطبخ بعد ماسمعت كلامها : وانتِ حبيبتي ليه كذا ماعندك اموومه ولدك المريض ياعمري من اول ماجيتو حابسته فالغرفه ولاتطلعينه لنا تراه مريض عادي وحنا ناس مثقفين مو مثلك نتفشل منه ليه كذا ماتراعين شعوره سمعته اليوم وهو يصيح يبي يطلع ويلعب مع البزارين وانت تخوفيه باان في عجوز تاكله لييه ياجاهله ولدك مو متوحد انتِ تمرضين ولدك زيااده خلي عندك احساس بالامومه وروحي طلعي ولدك وافتخري فيه باي شكل كااان تعلمي من هالام العظيمه "واشرت ع طوقه" الي ربت عيالها واهتمت فيهم وطلعو ناجحين رغم قساوه ابوهم طوقه لما شافت شهد صارت تبكي : خلاص يا أمنية شهد صدت وطلعت من المطبخ وهي تمسح دموعهاا .. أمنية ناظرت طوقه الي جلست ع الكرسي .. طلعت من المطبخ تاركتها بروحهاا × نجلا جالسه ع فراشها ببجامتها .. وتمسح مكياجها بالمناديل خزامى : بكره العصر يجي ابوي ونروح نفسي نجلس اكثر مره انبسطت هنا نجلا : فعلاً الاجواء هنا حلووه خساره حتى امي وخالاتي بيروحون بكره شيهانه فالسيب تمشي .. ناظرت البنات وارسلت بوسه لنجلا وهي تضحك ومشت لغرفتها هي وام تركي الي ينامون فيها .. تحس بتعب تبي تنااام هذي ملكه وتعبت كذا شلون العرس نجلا انسدحت بفراشها .. وفتحت جوالها ترد ع الي يباركون لها .. ناظررت اسم ساره بضيق ليه كذا ؟! حتى مبروك مافيه ياقو قلبك ياساره.. دخلت ع حساب عبدالرحيم وهي تتبسم متجاهله ساره .. شافته توه من عشر دقايق منزل مقطع اغنيه "ماكنني بين البشر يوم شفته ولاكن به حوله من أهله عذولين ولاكن قبله مر في القلب مره ولا أظن بعده تعشق العين لسنين .." ومعلق ع المقطع " فعلاً ماكنني بين البشر يوم شفته " حطت يدها ع فمها وهي مبتسمه وتحس بحراره خدودها .. النص ساعه الي جلستها معه بروحنا .. مررت بسرعه ماحسيت فيهاا .. اسلوبه لطييف وراقي نظراته لي لحالها كفايه تسعدني .. امم شعور حلو والله انا عمري مااهتميت بمشاعري مع ان خيالي واسع واكتب روايات .. بس في مشاعري جديه ماقد مر بحياتي شخص عجبني حتى بمراهقتي ماكنت نفس البنات الي يحبون المشاهير ويطيرون فيهم مرات احسني متبلده مدري العيب فيني انا مو فيهم حتى لما اتابع فلم او مسلسل حزين وفراق وكذا ماابكي اصلا مااذكر متى اخر مره بكيت .. هل انا متبلده !! بس اليوم حسيت بشعور حلوو مع عبدالرحيم احس روحي خفيفه .. عجبني اسلوبه احسنا متوافقين جلست لما وصلها اشعار منه وفتحته بالغلط : اووف لييه كذا مفروض اثقل شوي قرأت رسالته " يمديني اكلمك مو جايني نوم " نجلا ناظرت بنات عمتها نايمات .. هو قال انه رح يأجر بفندق بالمحافظه القريبه وينام وبكره يروح للمدينه .. كتبت " طيب انتظر شوي " ووقفت اخذت شاحن جوالها معها .. والجلال لفته ع كتفها وطلعت من الغرفه مشت لباب البيت تبي تطلع بالحوش اروق وتتكلم ع راحتها .. عمر الي كان بيدق الباب وقف لما شاف نجلا فتحته : اا شسمه نادي لي أمنية نجلا : طيب ورجعت للصاله .. مشت لغرفه أمنية المقفله .. دقت الباب : امون أمنية الي جالسه ع الارض وقدامها صحن فطاير وشاهي : ادخلي نجلا نجلا فتحت الباب ودخلت ناظرتها وابتسمت : خياانه ليش ماناديتيني أمنية : لو انك بروحك ناديتك بس عندك الشينه خزامى وبعدين الفطاير كثير بالمطبخ خذي لك نجلا تشد الجلال ع كتوفها : اصلا ماابي بس عمر برا يبيك أمنية تكمل اكل : قولي له اني نايمه نجلا : اكذب عليه !!؟ أمنية : ع اساس ماعمرك كذبتي روحي بس صرفيه يحسبني ع كيفه وقت مايبيني اجيه معصي والله نجلا هزت راسها مأيدتها وهي شايفه كيف عمر ساحب عليها من ايام ومثل ماقالت انها اعتذرت له ولااهتم .. طلعت لعمر شافته مستند ع الباب : أمنية نايمه عمر لف عليها : كذابه والله ادري انها صاحيه قولي لها تجي احسن ماانادي ع عماتي نجلا تأففت : خلااص عاد كلمها وتفاهم معها انا مالي شغل بينكم ولاا تناديني هفف " ودخلت البيت سافهته .. وراحت للباب الثاني الي جنب المطبخ ويطلع ع الحوش " طلعت من البيت وراحت عند المراجيح .. جلست ع وحده وارسلت ع عبدالرحيم " تمام فضيت " وع طول اتصل .. اخذت نفس وفتحت الخط : هلاا عبدالرحيم : هلا شلونك نجلا : بخير وانت عبدالرحيم : مبسوط ومرتااح حيل .. "سكت ينتظرها تقول شي " .. اييه ليه مانمتي ولا انتِ كذا نظامك سهر نجلا : لا انام بالليل وكنت بنام بس شفت رسالتك ورديت عبدالرحيم : طيب وهالعشر دقايق الي انتظرتهم ع جمر وش تسوين نجلا ضحكت بااحراج : ههههه امم كان عمر يدق الباب يبي امون وكنت بتأخر اكثر معهم بس سحبت عليهم عبدالرحيم ضحك : هههههههه زيين والله سحبتي عليهم ولا جلست للصبح انتظرك هوشاتهم ماتخلص نجلا تضحك : ههههههههه فعلاً عبدالرحيم بهدوء وضحكتها يحسها بقلبه : ايه ياجعلني فدا هالضحكه * يدق ع باب البيت : أمنييية اموووونتي "ويضحك بشوش ههههههه ويرجع يدق الباب وبجديه مصطنعه" امووون ليان طلعت من غرفتهم ع صوت الدق سمعته فتحت غرفة أمنية بدون ماتدق شافتها نايمه .. وراحت غرفة امها شافت شيهانه صاحيه : خاالتي عمر يدق الباب وينادي أمنية وهي نايمه اطلعي له شيهانه وقفت وراحت تشوف : وش فيه ؟! عمر : وين أمنية متفق معها نروح المزرعه اتصل عليها ماترد شيهانه ابتسمت : نايمه امون شكلها من التعب ياحرام ماحست بنفسها عمر بزعل مصطنع : لا مايصير انا مجهز لها مفاجأه صحيها عمتي باالله شيهانه : الله يسسسعدكم خلاص اشوفها وراحت غرفة أمنية .. شافتها نايمه .. جلست ع طرف السرير ومسحت ع شعرها : امون اصحي ياقلبي اموون أمنية معمقه بالنوم ولاترد عليها .. شيهانه تهز كتفها : يله اموون اصحي عمر ينتظرك مسوي لك مفاجأه اصحي لاتخربين ع نفسك أمنية بنعااس وشوي تبكي : اييش بناام تعبااانه شيهانه تمسح ع شعرها : صحصحي ياقلبي والله تندمين أمنية تدفن راسها بالمخده : ابي انام خلوووني شيهانه رحمتها ووقفت وطلعت من الغرفه وقفلت الباب وراها .. أمنية رفعت راسها وهي تضحك ع الصامت وترجع تدفن راسها بالمخده .. شوي جلست وهي تهز كتوفها وتحرك يديها .. وتغني بشويش وتتمايل : اجي بالحنيييه انا انا بورده وبهدييه اناا اناا بهتمااموو فيي لوحدي اناا بالزااات ونزلت من السرير ورمت المخده وكملت رقص وهي تناظر المرايه وكأنها تكلم عمر وتسوي حركات تستعبط : اجي بالحنيييه انا اناا * عمر ويعنني متلهف : هااه وينها شيهانه بتأسف : والله عيت تصحى مسكينه تعبت اليوم اعذرها عمر يهز راسه : حصل خير ومشى بااتجاه المجلس بشويش ولما شاف عمته قفلت الباب .. تحرك ولف ورا البيت لين وصل لشباك غرفتها دف الشباك بيده وسمعها تغني .. وخر الستاره بقوه : لا باالله تجيين بالغصب أمنية صرخت مفجوعه وجري للباب فتحته وطلعت .. عمر يضحك بقوه ع خلعتها ههههههههههه مسكينه كانت تترقص وتغني ونجلا من بعيد تناظره عند شباك أمنية يضحك ويضرب كفوفه ببعض ويمسك بطنه .. صارت تضحك من ضحكه وهي مو عارفه شصار .. * فالسياره .. عمر يسوق وهو ساكت وبدون مايلف عليها .. من اول ماركبو السياره وهي تتحلطم .. أمنية لافه عليه بكل جسمها : والله لااطلع هالروحه من عييونك فشلتني عند عمتي وليان السوسه الحين عرفو اننا متهاوشين عمر ببرود : حبل الكذب قصير سبحاان ربي كشفتي نفسك بنفسك أمنية تناظره بقهر متفشله من عمتها الي عرفت انها كذابه مو نايمه لما طلعت من غرفتها تصارخ .. وانجبرت تروح مع عمر ترقع السالفه : كلله منك هفف عمر : انتظر اعتذار أمنية : نعممم !!؟ عمر يناظرها بثقه : اقصد اعتذارين عن كذبتك الاولى وكذبتك اليوم أمنية ضحكت وقدمت وجهها قريب منه : والرساله الي طول جبهتك عمر يقاطعها بحدده : قصدك طول لسانك الي رح اقصه بعد شوي أمنية تعض باطن خدها تفكر باللين باللين عمر يجي بالحنيه ههههههههه .. عدلت جلستها وفصخت نقابها ونزلت طرحتها ع كتفها ورتبت شعرها: امم اعتذرت لك بالرساله وهالمره كنت فعلا نعسانه عمر يناظرها وهو يحبس ابتسامته : ايه لدرجه ترقصين من النوم أمنية تناظره بااحراج : طيب انا قلت ماابي اروح عمر رجع يناظر الطريق الفاضي : وانا قلت لك ماشاورتك أمنية بنعومه : طب ليه كذا انا من حقي اقول رايي ابي الشي ولا ماابيه كل شي بالغصب يعني عمر يناظرها : لا مو غصب بس قولي رايك بهداوه نفس الحين وانا اقولك ابشري وتم ع امررك أمنية تلوي فمها بخجل وتقرب منه : يعني الحين ماانت زعلان مني عمر تنهد : وانا اقوى ؟ أمنية وقلبها يرفرف : بس انا زعلانه ليش تسفهني كل هالايام عمر : ماني زعلان ايه واحمدي ربك اني بعدت عنك لين هديت لاني مقهور منك وودي اكفخك اجل تروحين البيت المهجور الفجر ومحارش مع البنات لمتى !؟؟ والله لو اني مو متأكد ان الجهه هذيك فاضيه ومايمرون منها رجال كان ماسكتت ي أمنية أمنية : انا مارحت اصلا الا وانا اخبر المكان واعرف ان مافي احد حتى البنات جالسات برا كانو انا كبيره وعاقله تطمن عمر : مرره ماشاءالله مقطعك العقل يالكبيره أمنية تخصرت : لاا والله ترا صدق ازعل عمر يبتسم : ماتقوين أمنية تلف عيونها : هفف ياربي مو كأن الطريق طول انت كم تمشي ؟ عمر بضحكه : على وش مستعجله أمنية ماانتبهت لقصده الا لما شافته يضحك بقووه ع شكلهاا الفاهي .. * فالمستشفى .. منسدحه ع السرير الابيض ويدها ع بطنها .. نزلت دمعه سريعه ومسحتها بتعب .. التلفزيون قدامها مشغل ع قناة القرآن بس مافي صوت .. تناظر حولها تدور الريموت تبي تسمع قرآن وتريح اعصابهاا وعمر ماتدري وينه .. من صحت مالقته سألت الممرضه عنه قالت لها كان هنا وراح .. حتى جوالها مو معها تتصل ع احد .. الي تتذكره كانت فالمزرعه مع عمر العصر .. هو طالع ع النخله وينزل لها تمر ويضحكون .. ماتدري وش ضرب راسها وماتتذكر شي بعده .. مسحت ع بطنها بيدها الي فيها ابره المغذي وهمست بألم : شكل ابوك انحاش لما عرف عنك قال لي قبل مايتشرف فيني ام لعياله "وبكت" دخلت الممرضه السعوديه .. شافتها تبكي وبحنيه : سلامات يعورك شي اختي أمنية تناظرها وتبكي باانهيار : ابي امي وابوي اليتم يووجع والله الحين شسوووي الممرضه قربت منها وحضنتها تخفف عنها .. وأمنية تمسكت فيها وتبكي : احس قلبي يوجعني بمووت الممرضه : اذكري الله حبيبتي مابعد الشده الا الفرج عمر فتح الباب ووقف يناظرها بخوف : وش صاير أمنية رفعت راسها ووقفت بكا وناظرته وهي تشهق .. الممرضه وخرت عنها لما قرب عمر والقلق بعيونه : وش فيك ليه تبكين كذا أمنية تحاول تستوعب هو قدامها ماتركها .. يتكلم عادي .. مهتم ليش تبكي .. يعني !! الممرضه طلعت لما حست وقفتها غلط .. عمر جلس قبالها ع السرير وحضن وجهها بين يدينه ويمسح دموعها : ليه هالبكا علميني الدكتور يقول صحتك كويسه أمنية تحاول ماتبكي همست وهي تشد ع يدينه الي حاضنه وجهها : حسبت انك تركتني لما عرفت اني حامل عمر ناظرها بقهر ووخر يده : تبيين كف يصحيك وش الي اتركك لما عرفت انك حامل صااحيه انتِ أمنية تشهق وهي تلف شعرها ورا اذنها : انت قلت ماتتشرف اني اكون ام عيالك عمر بقووه وقهر : كنت حمااار أمنية ضحكت من بين دموعها وصدت عنه بألم .. عمر يلف وجهها له : ارجعي ناظريني أمنية وهالتفكير السخيف انسييه كلام متخلف مدري شلون قلته أمنية : الكلام الي ينقال وقت الغضب هو الصح هو الي بالقلب عمر : تماام كنت افكر كذا بس الحين لاا انتِ ياأمنية ضحيه مالك ذنب ومو كل من يدخل الصحه النفسيه معناته هو سيء وغلطان لااا انا وعيالنا نتشرف فيك ونحطك فوق روسنا ماسويتي شي يعيب عشان نخجل منك أمنية رجعت تبكي : الا سويت بلعت مخدرات وش بعدها عمر يشد ذراعها بقوه يصحيها : مو بيييدك استغفلووك كنتِ تمرين بحاله اكتئاب حنا الغلطانين الي ماانتبها لك وحافظنا عليك حنا الغلطانين الي فتحنا المجال لغيرنا يحتويك أمنية تمسح دموعها بيدها الثانيه وبصوت بح من البكا : انت تجاملني ادري عمر بقوه وهو يهزها وعينه بعينها الباكيه : انا مااجاملك انا احبكك انا ماابي غيرك زوجه وام عيالي حاولت لما كان تفكيري حماار حاولت مع ساره بس ماقدرت تذكرين مره قلتي لي اجمل شي يقدمه الاب لعياله انه يحب امهم انا ماقدرت احب ساره حتى لما فركشتي زواجي ترا من داخلي فرحت احسني تخلصت منها بدون مايأنبني ضميري وش افيد عيالي اذا ماكنت احب امهم وقلبي وروحي مع غيرها انا جربت مع امي وابوي عمري ماشفت نظره حلوه بينهم امي طول الوقت تسب باابوي من وراه وابوي يهزأها قدامنا مابينهم اي حب وود تحسهم مغصوبين ع بعض ومكملين الحياه رجع حضن وجهها وقرب منها وسند جبينه ع جبينها : انا احبك انتِ وابي عيالي يشوفون شكثر ابوهم يحب امهم أمنية ابتسمت وتحس وجهها حار : عمر عمر همس : قلبه أمنية وعينها بعينه : انا اشهد ان ربي عوضني خيير عمر ابتسم : طيب في كلمه حلوه سمعتها مره وادري انها باقيه وابي اسمعها ثاني أمنية ضحكت بشويش .. ووخرت وجهها عنه وهي تحك خشمها بااحراج : امم احس مقدر اقول ههههه عمر والفرحه بوجهه : يله عاد قوليها وانتِ تناظريني أمنية ناظرت شوي وتحرك فمها وترجع تقفله وتضحك : ههههههههه خلاص عاد انت تعرف مو لازم انت تحرجني عمر يمسك يديها يثبتها ويغمض : يله بغمض أمنية ضحكت وهي تناظر وجهه مغمض عيونه ومبتسم .. لانت ملامحها ياالله هالمزيون يحبني زوجي ابو عيالي الي قلبي ماعرف غيره .. بشيب انا وياه ونشوف احفادنا سوا .. لمعت الدموع بعيونها من جديد عمر ثابت وهو حاس ببروده يديها .. حس فيها تقرب وتبوس عينه اليمين واليسار فتح عيونه لما حس بدمعتها نزلت ع خده .. اخذها بحضنه : ليه تبكين الحين أمنية تشهق ببكا وهي تشد عليه : لاني احبك مرره مرره انت كل اهلللي * نجلا بفستانها الوردي وتاركه شعرها براحته .. تدور ع المكان الي مزينينه وتتأكد ان كل شي في مكانه .. شافت رائد يطلع من ورا الطاوله وينحااش : رؤوود ووجع قلنا محد ياخذ من الي ع الطاوله لين يجون رائد يمد لها لسانه من بعيد .. نجلا : وقص لسان والله اعلم عمتي عبدالرحيم طل من ورا الجدار : يصير اخذ لي مويه ولا بتهزأ والله عطشان نجلا ابتسمت بخجل : لا خذ عادي رائد تخصر : ياسلااام ع التفرقه عبدالرحيم يضحك : اقلب وجهك بسس واخذ علبه مويه من ع الطاوله وشرب وهو يتأمل نجلا : ورده وربي نجلا ترتب شعرها بيدها : امم متى تروح المدينه عبدالرحيم : بكره ان شاءالله اجلت روحتي اليوم لما كلمني عمر وقالي انه بيسوي حفله لأمنية ويبينا موجودين نجلا : اي ياعمري يبي يعدل نفسيتها الدكتور يقول انتبهو لها مع الحمل تكون معرضه للاكتئاب ، حز في نفسي لما قالنا انها تحسب اننا مانحبها اعطانا محاضره طويله عريضه فالتعبير عن المشاعر تخيل عمير يقولنا تحبونها قولو لها نحبك ليش جلفين عبرو لها هي محتاجه تعرف شكثر اهلها يحبونها ويخافون عليها عبدالرحيم يضحك : حتى انا اخذت نصيبي من هالمحاضره يعني انا احبها اختي بس ماقد حاولت احسسها بأهميتها عندي نجلا لفت تشوف جدتها وهي تطلع من باب البيت ومعها عمتها شيهانه وكلهم كاشخين .. رجعت ناظرت عبدالرحيم : جمعتنا اليوم غير نفس زمان محد يتغطى عن احد عبدالرحيم يلف ذراعه حول كتفها : بالضبط وانا وانتِ نفس الوقفه نجلا ضحكت وهي مستحيه من قربه .. وشيهانه تناظرهم ومبتسمه طوقه طلعت من باب البيت وبيدها الكيكه وحطتها ع الطاوله وزغردت متحمسه : كلللللوووش وييينهم مو كأنهم تأخرو وع كلمتها الاخيره دخلو رائد وزايد من البوابه الكبيره يجرون : جوو جوو نجلا الي هي وعبدالرحيم واقفين عند السماعه .. شغلتها .. رائد وزايد فتحو البوابه الكبيره عشان تدخل السياره وبعده يقفلونها .. مع ان بيتهم قدامه براحهه فاضي بس عشان يرتاحون اكثر .. عمر دخل بالسياره ويده بيد أمنية .. لف يشوفها تناظر الشرارات الناريه الي اشتغلت حوالين السياره أمنية ناظرت قدام تشوف جدتها وشيهانه وطوقه ونجلا وعبدالرحيم كلهم بالاستقبال .. همست : ايش فيه ؟! عمر بزعل مصطنع : طلع مو بس انا الي احبك أمنية ضحكت مصدومه ليش كذا .. ولما وقفت السياره .. نجلا جات تجري بشويش .. فتحت باب أمنية : تفضلي ي أميرره اليوم يومك أمنية رجعت ناظرت عمر !!! عمر يحط اصبعه ع فمه : لو تبكيين ياويلك ونزل من السياره .. وهو يشوفها تنزل ونجلا تفك نقابها وتنزل طرحتها ع كتوفها وهي مفهيه .. طوقه جت سلمت عليها وحضنتها : الفف مبرووك والله يقومك بالسلامه عاد لو جات بنت وسميتوها طوقه بتبرا منكم ههههههههههههه أمنية تضحك بعدم استيعاب .. وسحبتها شيهانه لحضنهاا : يارووحي نتفتي حاامل مااتخييل الفف مبروك حبيبتي عبدالرحيم بعد ماوخرت عنها امه .. سلم عليها بيده ويشد ع يدها ويهزهاا : لااوصييك جيبي ولد عشان ازوجه بنتي بعدين نجلا ضحكت ومشت أمنية لجدتها .. منيره تناظر أمنية والدموع بعيونها : ابيه ولد نفس جده منصور واسمه منصور بعد أمنية ماتحملت جلست ع الارض وصارت تبكي وبنفس الوقت تضحك نفس البزارين .. عمر : يالليل الدمووع الي مو خالصه رحييم رح جيب الوايت يشفط عنا لانغرق أمنية رفعت راسها له ومن بين دموعها : ماتضحك عمر يأشر لهم بيده : اضحكوو اضحكوو هااهاا هااهاا اول شي ضحكو يسلكون له بعدين صارو يضحكون جد حتى أمنية ضحكت معهم من قلب . * النهـــايـــه . * روايــــاتي الساابقه * رواية برد الجفا https://www.rewity.com/forum/t375828.html رواية مابعد الخذلان https://www.rewity.com/forum/t435708.html |
تسلم يدك جداا ممتعه |
| الساعة الآن 06:34 AM |
Powered by vBulletin®
Copyright ©2000 - 2024, vBulletin Solutions, Inc.