04-01-23, 12:28 AM
| #371 | ||||
 
|  بارت ٢٤ خلال الأيام الماضيه اعتزلت فوق وما نزلت نهائيا لتحت حتى ما تلتقي بكنان وتصير مشاكل بينها وبين جدها سلطان ....مطت شفتها بإحباط حسب معلوماتها ما سمعت إنه جاء لبيت جدها .. بعكس نورس الي كانت زياراته كثيره ..بس استغربت شيء واحد ما توقعت أبوها شديد كذا ..يعني توقعت يعطي ليان حريتها بالخطوبة.. انصدمت لما اصدر قرار ممنوع يجلسون لوحدهم لزوم يكون متواجد وما يثق بتواجد إخوانها ... ما قدرت تفهم سبب هالتصرف ..وش فيها لو جلسوا لوحدهم ... طلعت من المطبخ وبيدها كوب المويه تشرب بروقان... اليوم رح تطلع للسوق تشتري ملابس لزواج ليان ... ناظرت ليان لما طلعت من غرفتها لابسه ومتجهزه ..وتتكلم بالجوال ..وقفتها خزامى وهي تنطق باهتمام : ليان يا قلبي اليوم رح نطلع للسوق علشان نبدأ نجهز لك ما بقى وقت على زواجك! قاطعتها ليان بلطافه: مشكورة يا خالتي... بس ما له داعي... الحين طالعه مع أمي رح أجهز بمرافقتها لا تغلبين نفسك !! غصت بيلسان بالمويه وهي تشاهد هالموقف ..شكل خزامى الي تفشلت من رد ليان ... كحت بيلسان وما قدرت تكتم ضحكتها على موقف..يمكن ما تصير تعمل كذا وتتشمت بأمها ..بس خزامى الي حولت العلاقة لكذا يوم تركتها على رف النسيان واهتمت بالبنت الغريبه وقدمتها عليها بكل شيء...تحس جواب ليان أنعشها يمكن تصحى أمها على نفسها وتستوعب إنها هي ابنتها ما هي ليان!! خزامى الي تفشلت من رد ليان بالأخص قدام بيلسان .. بعد خروج ليان ناظرت بيلسان والشماته واضحه بعيونها وهي تضحك عليها..نطقت بغضب: انكتمي يا قليلة الادب ؟! على وش تضحكين يا حظي؟! صدق متخلفه وطحتي برقبتي ..متى تتخرجين وتنقلعين من هالبيت الي تحول لأسوأ حالاته بوجودك !! بيلسان انمحت ابتسامتها من ملامحها وهي تسمع كلام أمها...وبضيق نطقت : أنا قاطعتها خزامى بغضب ما له مبرر وبداخلها قهر من ليان ومنار : انكتمي ما ابغى أسمع صوتك...تراك تلوعين الكبد انقلعي من وجهي..ومن الحين أقولك ما رح اطلع مكان معك للسوق وأصلا ما له داعي تحضرين الزواج لأنك كلك على بعضك تفشلين!! سكتت للحظات خزامى وللحين بداخلها تغلي غليان...تابعت كلامها بحزم: وربي ما تحضرين الزواج حتى أراويك كيف تضحكين !! تحس بيلسان النفس ضاق بصدرها ..ليه كل هالكلام ؟! ودوم تكرره وتتفنن بتجريحها وتحطيمها ... قررت ما ترد ما هو ضعف بشخصيتها ..مهما حصل تبقى أمها ..مع الايام متأكده رح تعرف كم قست عليها وتندم على تصرفاتها معها ..بس ذاك الوقت تكون احترق قلبها وما رح ينبض لها من جديد بعد دمرت كل شيء جميل بداخلها ...هي إنسانه ولها طاقه بالتحمل .. دخلت غرفتها وقفلت الباب وبداخلها أقسمت إلا تحضر الزواج وتثبت وجودها بطريقتها ورح تعرف خزامى الفشيلة على أصولها!! ** ** ** يوم الزواج جالسه على السرير وتحس النار مشتعلة بداخلها ما توقعت من أمها هالحركة تقفل الباب بالمفتاح حتى ما تحضر الزواج؟! ضربت على السرير بقوة بقهر من نفسها ...لو ما نامت كان ما تركتها تقفل عليها..وش تعمل بهذا النوم الي ما هو تاركها... البيت كله فاضي وموحش ..ما عندها الا الشرفة بس طابق ثاني..اي غلطه منها رح تتكسر... زفرت بقهر من الحياة ....كيف تحضر الزواج ؟!! لمعت بذهنها فكره ...رح تنفذها يمكن تزبط معها ...جمعت شالاتها وملابس ربطتهم ببعض وهي مصممه الا تحضر الزواج وتنتقم منهم كلهم ... لبست ثوب تقليدي بالقرية يلبسونه بالأعراس ..وفوقه العبايه ..لفت الشال على شعرها ...وتوجهت للشرفه ..أخذت نفس عميق تقوي نفسها ....شجعت نفسها متعوده على تسلق المناطق المرتفعة... لزوم تثبت وجودها بينهم .. ناظرت المكان ما في شيء تربط فيه الشال...فكرة مجنونه ما رح تضحي بنفسها علشان حفلة ... تسلل الاحباط لقلبها ....ناظرت من الشرفه للأسفل وهي تفكر لو في شجره قريبه منها ...عقدت حواجبها وهي تشوف مراهق قريب من البوابة الداخليه....وبدون تفكير نادت عليه وهي تلوح بيدها : لو سمحت !! ناظرها وهو عاقد حواجبه ....اقترب ووقف تحت الشرفه وهو ينطق باستغراب: وش فيه؟! نطقت بلطافه: الباب تقفل ومب راضي يفتح ..اذا في سلم او شيء أنزل من هنا؟! عقد حواجبه وهو يحسها جالسه تمزح معه: من جدك تتكلمين! زفرت بملل: لا من عمي!! وبرجاء نطقت: تأخرت على الحفلة بسرعه ساعدني!! نطق بهدوء: لحظة اشوف السلم!! بعد وقت قصير رجع وهو يحمل السلم ...ثبته وناظرها: متأكدة تقدرين تنزلين! ابتسمت له: ما عليك السلم لعبتي! سمت بالله واخذت نفس عميق ...ونزلت عن السلم بشويش وهي تحسه ما هو ثابت ..تنهدت براحه أول ما استقرت على الارض... ناظرته بامتنان:مشكور!! ومسكت السلم ونزلته تحت انظاره المذهوله من تصرفها.. ما توقع وحده من حفيدات ابو فيصل كذا ..خابرهم رقيقات! ناظرته: تقدر ترجعه مكانه؟! هز رأسه وأخذ السلم وغاب عن عيونها!! تنهدت براحه أول عائق تعدته .....تحركت كم خطوة وهي تفكر بطريقه توصلها للصالة ما معها فلوس نسيت تأخذ معها ... وبدون ما تنتبه تدعثرت على الارض!! اقترب منها وهو ينطق : انت بخير!! عقدت حواجبها وهي تسند نفسها: بخير ...صحيح ما عرفتك أول مرة اشوفك نطق بابتسامة وهو يقاطعها: انا خليل ..جيت أرجع أمي ونسيت حقيبتها هنا عند ذي الدرجة...ودخلت أحضرها!! هزت رأسها بتفهم ..سرعان ما لمعت بعقلها فكره: أمك وين؟! رد باستغراب من سؤالها وتواجدها هنا الكل بقاعة الزواج: بالسيارة برا نطقت بعجله:تقدر توصلوني لقاعة الزواج هز رأسه بهدوء: أنا رايح أوصل أمي بطريقي!! تنهدت براحه ..وموضوع الصالة انحل بسرعه ...نطقت بهدوء وهي تشوفه وكأنه مراهق مين يصدق انه بالجامعه..حست نفسها تكلم اخوها رعد ..نطقت بهدوء: ما ارجعت لي كتبي؟! فتح حلقه وهو يستوعب انها بيلسان ..نطق بانحراج: اسف وربي نسيت ..ان شاء الله هاليومين أرسلهم ... تحركت بيلسان بهدوء للخارج وهي تسمعه ينطق بشكر : مشكورة حيل على المساعدة ..ولله الحمد نجحت ..حتى الدكتور يقولي كيف نجحت؟! ابتسمت على فرحته وسعادته لأنه نجح بالمادة ...أصعب شيء لما نوصل لمرحلة ننسى طعم الابتسامه والسعادة .. راسمه ابتسامه مزيفه ومن داخلها ما تشوف للحياة أي طعم!! توجهت للسيارة وهي تشوف ام خليل جالسه بالسيارة ..فتحت الباب وركبت بدون ما تنتبه للسيارة الي واقفه قدام بيت عمها ابو جسار!! جالس ينتظر جسار ...لفت نظره بيلسان لما طلعت برفقة خليل والإبتسامة شاقه الحلق ..وهو يتكلم معها بكل اريحيه ومبسوط على الاخير!! والي زاد النار بداخله وهو يشوفها ركبت معه بالسيارة. ....ما يدري اذا معه أحد او لا ...حتى لو كان معه احد كيف تطلع معه!! تحرك مباشرة خلفهم وما انتظر جسار بعد ما أرسل له رساله إنه غادر!! خليل الحين أولى منه يكلمها ؟! صدق موازينهم مقلوبه ؟؟ زم شفته بضيق لما صارت الاشارة حمراء وسيارة خليل سبقته ...يهز رجله بسرعه وكأنه يسابق الوقت ... أول مرة يشوف اشارة مرور تتأخر كذا ...زفر بضجر لما انفتحت الاشارة ..تحرك لعل وعسى يلحق عليهم قبل ما يدخلون ... بعد وقت وقف السيارة ونزل بسرعه لعله يلحقها...زم شفته بقهر وهو يشوفها دخلت من باب الحريم ... الحين رح يتفاهم مع خليل وبعدها يشوف بيلسان!! ** ** ** ام ماجد جالسه على احدى الطاولات مع بناتها ...خلود وهي تؤشر بعيونها على ليان: لو خطبتوها ما شاء الله تقول للقمر انزل وأنا أجلس مكانك!! ام ماجد وعيونها على ليان بانبهار: تشبه أمها كثير ..تبارك الرحمن! جميلة باستغراب: غريبة خطيبة كنان ما حضرت!! ام ماجد بهدوء: سألت عنها ..أمها تقول إنها مريضه وتعبانه وما تقدر تحضر قاطعتها خولة بتحليل: أنا اقول وضع البنت ما هو مضبوط .. لما زرناها تتذكرون وجهها وكأنه مع الاموات وكانت مريضه والحين مريضه.. أنا أقول البنت فيها علة وتكتموا على الموضوع..وش هالمرض الي يمنعك تحضرين زواج أختك؟! جميله بتحليل: يمكن علاقتها بأختها سيئة علشان كذا ما تبغى تحضر خولة هزت رأسها: يمكن كل شيء جايز ...ناظري ذيك الي متوجه للكوشة؟! خلود وعيونها عليها: مين هذي ..لو تعطينا وجهها يمكن نعرفها ..معقول الطقاقه؟! ام ماجد باستبعاد: ما ظنيت بيت ابو نورس يحضرون طقاقه جميله قاطعتها: ملابسها بسيطه وتقليدية اكيد انها الطقاقه!! ** ** ** تحس اغلب النظرات عليها ..هي متأكدة من أناقتها بهذا الزي ...ابتسمت بنصر وهي تشوف خزامى ملامحها انخطفت والصدمة ألجمتها ...وش تحس لما تقفل عليها الباب وكأنها بهيمه... تابعت طريقها للكوشه ..اقتربت من ليان وباركت لها ..ليان بفرحه حضنتها: ما توقعت تحضرين..سلامتك يا قلبي خالتي خزامى تقول إنك تعبت؟! بيلسان زمت شفتها بضيق وهي تهز رأسها: أنا بخير ....الأهم عندي انت قاطعتها عائشة من خلفها: يا قلبي على المتميزين دوم ..وش هاللباس هذا ؟! ابتسمت بيلسان لها: تسلمي عائشه بانبهار : وربي تجننين بهذا الفستان مع هالخصر المنحوت ..وكأنك عارضة ازياء ..حنان هي الي حطت لك المكياج؟ بيلسان هزت رأسها بابتسامة: لقيتها بوجهي وعملت الواجب هنا ليان وهي ماسكه بيد أختها: والجدلة ما تغيرينها؟! هزت رأسها بالرفض: هذي جزء مني!! اقتربت خزامى وملامحها رح تنفجر..نطقت بهمس: مثل ما دخلت انقلعي فضحتينا قاطعتها عائشه باعتراض:والله تجنن مثل اللعبة...ناظريها كيف متميزه بالحفلة عن الباقي بهذا الفستان !! خزامى بقهر من عائشة الي تحسها تتريق عليهم .... ناظرت بيلسان من رأسها لرجلينها بانتقاد.. سرعان ما فتحت عيونها باستنكار وهي تشوفها لابسه نعال البيت..وبقهر نطقت: وليه لابسه هذا؟! ناظرت بيلسان رجولها بانحراج من السرعه نسيت تبدل النعال.. وبابتسامة بسيطه نطقت وهي تخلعه : خلاص ما نبغاه عائشه وهي تمسك بيدها ومبتسمه على بساطة بيلسان وهذا أجمل شيء تشوفه فيها : يلا أبغى تولعين القاعة بإبداعاتك!! هزت رأسها بداخلها كبت رح تطلعه هنا .... تحركت وما انتبهت لمنار الي كانت متوجهة لهم ... ام فيصل ناظرت خزامى واشرت لها ..اقتربت خزامى منها : نعم خالتي؟! ام فيصل بقهر وهي تهمس لها : وقفي هالمجنونه فضحتنا قدام اهل العريس!! خزامى بقهر وهي تناظر بيلسان: كله من عائشة هي السبب يا فشيلتي قدام العالم!! دوم هي الي تسحبها حتى يفشلوني متأكدة هذي نيتهم..والغبية بيلسان ماشيه معهم!! ام فيصل اشرت لها: حاولي اسحبيها لو بالغصب!! هزت راسها خزامى وتحركت لعل وعسى تقدر توقفها !! منار تناظر بيلسان ...مطت شفتها بسخرية وهي تنطق بخفوت:أختك هذي مجنونه؟! وش هالحركات هذي؟! ليان ابتسمت بفخر بأختها: والله حركاتها تجنن! ناظريها مثل اللعبة!! منار مطت شفتها باستعلاء: همجية!! رنا اقتربت من البنات وهي تصفق وتناظر بيلسان بانبهار ..تلفت نظرها دوم هالبنت بكل شيء!! جميله رفعت حاجب وعقلها ما هو مستوعب: هذي خطيبة كنان ؟! ام ماجد مطت شفتها بسخرية: ما تترك حركاتها!! جميلة بعدم تصديق: وانا الي ظنيت القط يأكل عشاها من كثر الهدوء والخجل عندها ...يمه يمه ما أقواها متأكدين ذي مو الطقاقه!! خلود بسخريه: على أساس مريضه ومب قادرة تحضر؟! خولة ابتسمت: ملفته للنظر شوفي الكل يناظرها !! جميلة باستغراب: سمعت للحين كنان ما زارها او تواصل معها ام ماجد بهدوء وعيونها على بيلسان: جدها سلطان ما يبغى أي تواصل الا يوم الزواج!! جميلة ما راق لها هالكلام: دام إنه ملك عليها ليه يرفض؟! طيب ابوها قاطعتها خلود: في ناس عندهم تحفظ من ناحية الخطيب ويكونون حريصين قطعت كلامها وهي تؤشر بعيونها: ناظروا منار وخزامى؟! خولة بابتسامة: نظراتهم لبعض تضحكني الشرار واضح بعيونهم جميلة وهي تراقب: منار طبعها هادي وما تفتعل المشاكل ..بس واضح هالخزامى ما هي قليلة!! ومغترة بنفسهاكثير!! ام ماجد بنهر: ما ترتاحون الا لما تحشون بالعالم! ** ** ** جالسه عند جدتها بعد ما اعلنوا دخول العريس وتسمع لموشح طويل وعريض..نطقت بضجر: أنا وش عملت ؟! ام فيصل بقهر : حسابك عند وليد ..ألف مرة قال لك هالحركات ما يبغاها ومع ذلك مصممه تفشلينا!! خزامى بحده: كيف طلعت من الغرفة؟! زمت شفتها بضيق: من الشرفه بطريقتي الخاصة!! لا تنسين تدفعين كفارة يمينك! كلامها استفز خزامى بقوة ..نطقت بقهر: رح اطلع هذا كله من عيونك ...وبتحقيق تابعت كلامها: كيف وصلت للقاعه؟! تحس بيلسان بالملل من هالتحقيق ..وبهدوء نطقت: مع خليل قاطعتها ام فيصل باستنكار:, وش تقولين؟! وش جابك له؟! وش عرفك فيه من الأصل؟! انت اليوم تصرفاتك فاقت حدود صبري! خزامى قرصتها بفخذتها وهي تشد بقوة : انت تبغين تفضحينا؟! لو شافك احد تركبين معه وش رح تقول الناس؟! كيف طلعت معه يا غبيه؟! قاطعتها بيلسان وهي تبعدها عنها ..فركت مكان القرصه بعبوس من الألم: تراه أصغر مني بعمر عيالي قاطعتها خزامى بقهر: لا والله!!, بيلسان زفرت بضيق: امه كانت معه ... وين المشكلة بالموضوع.. وش الفرق بينه وبين سيارة الاجرة على الاقل هذا تعرفونه وأ صغر مني وأمه معه !! خزامى بوعيد: أنا مليت من تصرفاتك ..تفاهمي مع وليد اليوم لأني ما اقدر أتحملك أكثر.. ختمت كلامها وتوجهت للكوشه حتى تثبت وجودها بالمكان وتقهر منار!! ام فيصل مطت شفتها بقهر: وربي عليك تصرفات عجيبه ...وليه نازله من الشرفه وكيف نزلت ؟! جالسه تتريقين علينا؟! تنهدت بيلسان وما ردت ..حست هالشيء ثقيل وما تقدر تتكلم فيه ..كيف تقول لها أمها حبستها حتى ما تحضر الزواج وتفشلها؟! بعد المجهود الي بذلته بالحفلة حست بدأت تفقد قوتها ..وبدأ يغزوها التعب وما فيها حيل تتحرك والنعاس يداعب جفونها...ما هو وقت النوم الحين ؟! لو تتحرك او تعمل أي شيء حتى ما تنام ...نغزتها ام فيصل وهي تنطق بهمس: سلمت على جدة كنان وعماته؟! بيلسان نطقت وهي منزله رأسها وما رفعته ولا ناظرت حتى ما تلتقي عينها بعين أي احد.... ما لها حيل تقوم تسلم عليهم ولا لها نفس تجامل أحد ...نطقت تغير الموضوع: جدتي متى نرجع للبيت؟! ام فيصل رفعت حاجب: أنا أسألك سؤال وتجاوبين بسؤال ثاني؟! قاطعتهم مريم وهي تقترب منهم: يلا يمه تعالي سلمي على العرسان!! ام فيصل وقفت بمساندة ابنتها وغادرت باتجاه الكوشه ...ناظرت جهة العرسان ...ابتسمت بسخريه وهي تشوف أمها مقحمه نفسها بينهم ...دام أم العروس موجوده هي وش علاقتها ؟! قررت تروح للحمام وتغسل وجهها من هالخرابيط يمكن تصحصح..زفرت بضيق من الكسل الي يصيبها ..ما فيها حيل تتحرك ..جبرت نفسها وتحركت خارج القاعه بدون ما تناظر حولها ... ** ** ** بعد ما انتهت الحفلة على خير وبدون اي مشاكل....واقفه قريب من ابوها وهو يوصي نورس على ليان ..ابتسمت وهي تتخيل نفسها مكانها معقول يعمل نفس الشيء..ينقبض قلبها لما تتخيل هالموقف ..اقتربت من ليان وسلمت عليها بحراره ...باركت لها وهي تتمنى لها حياة سعيده .... ما انتبهت على العيون الي تناظرها بتأمل ...تنهدت وتركت يد ليان برقه...رفعت نظرها للشخص الي يكلمها بروقان: لا تخافين ليان بعيوني!! نزلت نظرها بيلسان للأرض ونطقت بهدوء: ما تقصر .. مبارك الزواج رد بابتسامة واسعه: الله يبارك بعمرك!! رجعت كم خطوة للخلف وهي تناظر أخوانها لما سلموا على ليان ..تحس بالاختناق .. لحظات الوداع ما تحب تحضرها ... بعد وقت غادرت ليان مع زوجها والضيق واضح على وليد وكأنه فقد روحه..تحسه شوي ويبكي على فراق ليان...عجزت تعرف سبب تعلق ابوها بليان لذي الدرجه !! حضنت نفسها لما حست بنسمه بارده اجتاحت جسدها ..متى يرجعون للبيت تعبت من الوقوف ...حست جسدها تصلب لما اقترب كنان منهم ..وقف مع ابوها وتكلم معه بكلام ..ما تدري هو همس لابوها بصوت خافت والا هي ما عادت تسمع ...ما تدري وش قال لأبوها..قررت الانسحاب أفضل لها ... تحركت خطوة للخلف بس وقفها وليد وهو يقترب منها ..نطق بهدوء: كنان يبغى يكلمك دقيقيتين هنا قاطعته برفض: ما ابغى قاطعها بصوت هامس فيه حده:لا تخليني أقلب الدنيا فوق راسك كلها دقيقه ما رح يأكلك.. ننتظرك بالسيارة! ختم كلامه وناظر عياله: يلا على السيارة!! بلعت ريقها بتوتر واحراج وهي تناظر اهلها توجهوا للسيارة... بلعت ريقها بصعوبه لما اقترب منها كنان ..مد يده يسلم بهدوء:كيف حالك بيلسان؟! كتمت نفسها للحظات من شدة التوتر ..ناظرت يده الممدوده ..تحس جسمها يرتجف وما عندها الجرأه تسلم بيدها....لو شافها جدها سلطان رح يزعل منها وما رح يكلمها ...ما رح تزعل جدها وكنان اكيد رح يتفهم موقفها . ..نطقت بصوت حاولت بصعوبه يكون هادي: بخير ..كيف حالك نزل يده الممدودة بالهواء .. يتفهم موقفها يمكن تستحي ..قاطعها بهدوء: الله يسلمك...ا قبل ما يتكلم بأي شيء نطقت بانسحاب: بالإذن قاطعها بسرعه قبل ما تنسحب : لحظة لحظة وقفت وتنتظره يتكلم وقلبها يدق طبول ..... نطق بهدوء وهو يشوف استعجالها :كيف اتواصل معك..جوالك مغلق !! مطت شفتها باستغراب كم صار لهم مخطوبين الحين تذكر يتواصل معها ..وباعتذار نطقت: أنا آسفه ما اقدر اتواصل معك ... تضايق من كلامها الحين خليل اولى منه تكلمه بكل أريحيه...وبهدوء نطق عكس الضيق الي بداخله: علشان جدك سلطان ؟! نطقت بصراحه أزعجته: أنا ما أخالف أبوي سلطان بشيء وما أستغفله بأي شيء..وما أحب أكسر كلامه علشان كذا أنا أعتذر منك للمرة الثانية..رجاء لا تحرجني !!وتحملني فوق طاقتي!! ختمت كلامها وانسحبت بسرعه من المكان.. واقف يناظر زولها لما طلعت بالسيارة والضيق اعتراه من كلامها... لذي الدرجه تقدس سلطان؟! معقول البنت مجبورة وما تبغاه؟! زفر بضيق وتوجه لسيارته بخطوات هادئة... وصورتها ما راحت من باله ....ركب السيارة وقبل ما يحرك ناظر رنا الي نطقت باستغراب: وين تركتنا بالسيارة!! زم شفته بضيق وحرك السيارة بهدوء بدون ما ينطق ...رنا تهمس لاختها: الاخ منفس يمكن ما شاف اليوم خطيبته!! ديما غمزت لها وبهمس: الحين نشوف! رفعت نظرها لأخوها وبابتسامة نطقت: لو شفت خطيبتك اليوم كانت كل الانظار عليها!! ضحكت رنا : وربي انها نهفه ..وش هالفستان التراثي الي لابسيته ؟! ديما بابتسامه: اتوقع لجدتها؟! ام ماجد التفتت عليهم: ما شاء الله لسانكم مايعرف الا الحش بخلق الله!! رنا خزتها: مو كأنك كنت مقهورة من تصرفاتها وكيف فشلتك لما الحريم يسألونك" هذي الطقاقة خطيبة حفيدك" ديما تكمل عنها: وانقهرت يا جدة لانها ما عبرتكم ولا سلمت على أي أحد منا!! رنا بتحليل : اصلا دخلت على الحفلة متأخرة ..رقصت وبعدها طلعت وما رجعت للقاعه ديما خزتها: ما شاء الله مراقبه عليها ..كاميرا أصليه؟! رنا دقت على صدرها بغمزه: أعجبك؟! يسمع كلامهم والهدوء يغلفه .. "تأخرت حتى دخلت القاعه؟! " "بعدها طلعت من القاعه؟! " وما سلمت على اهله والحين تصرفها أبد ما عجبه ...وبنبره هادئة نطق وهو يكلم جدته بدفاع عنها: يمكن ما شافتكم؟! ام ماجد هزت رأسها: يمكن ما شافتنا ...امها قالت ما رح تحضر مريضه ..بس استغربنا لما حضرت الزواج؟! يسمع جدته وهي تتكلم ...صورتها بين عيونه ما فاته ملامحها واضح فيها التعب...وش هالمرض الي يمنعها تحضر زواج أختها ؟! ناظر بالمرايه ديما لما نطقت بتكذيب: اي مرض هذا يا جدتي؟! وكأنك ما شفتي وهي تغني وتتمايل قاطعها بجمود: انت وش عليك منها ؟! ترقص تغني تمرض ..وش علاقتك فيها؟! لما تمرضين تقضين كل حياتك مريضه بالفراش؟! زم شفته بضيق من كل شيء حوله ...الي زاد قهره بيلسان وكيف ما اعطته فرصه يتكلم معها ؟! وخليل هذا الي واضح مطيحه الميانه معه .... رح يتفاهم مع خليل بنفسه ...ورح ينفذ طلبها ويتركها مثل ما تبغى وما رح يحرجها او يحرج نفسه ... ** ** ** رجعت أدراجها لسيارة وليد والحزن تلبسها ..تمنت لو كان الوضع طبيعي وما في مشاكل...تتمنى لو جدها موافق على هذا الزواج...تمنت لو ما في حواجز بينها وبين كنان وتقدر تكلمه بأريحيه مثل زمان ....متضايقه من نفسها ومن ردها ...خايفه يكون زعل منها أو حمل عليها بقلبه ...أصعب شيء تكون بين نارين ...جدها سلطان من جهة وما تقدر ترفض طلبه وكنان من جهة ما تبغى تخسره ...ما تدري اذا كان تصرفها غلط او صح ...ركبت سيارة ابوها وهي ماسكه نفسها ما تبكي ...اول ما حرك أبوها ..رفعت نظرها له لما تكلم بحده: وش سالفه خليل ؟! ناظرت أمها بخيبه وعتب ...تم شحن وليد بنجاح ...ما تدري وش تبغى منها ...ليه متضدده لها هالكثر .. الي تعرفه الام دوم تدافع عن عيالها ...ليه أمها مختلفه عن باقي الامهات معها ..غمضت عيونها للحظات لما نطق بغضب: تكلمي!! كتمت أنفسها بضيق ما تدري وش تقول او تبرر! خزامى تزيد الحطب على النار: وكأنه ناقصنا كلام حتى تطلعين معه ..لنفرض احد من اهل خطيبك شافك والا احد من الجيران ؟! تبغين تنزلين رأسنا للأرض!! وليد وهو يناظرها من المرايه: تكلمي!! ناظرت رعد الي شدعلى يدها يشجعها .. ناظرته بامتنان ..بعدها ناظرت ابوها وبهدوء نطقت تبرر موقفها: ما ركبت معه لوحدي ..كانت امه معه رايحه للقاعه. ..وما لقيت احد يوصلني غيرهم قاطعها بغضب: وليه ما انقلعت للحفلة من البدايه مع أمك؟! ردت والضيق يتصاعد بداخلها من كل شيء من حولها : امي ما قبلت أحضر الحفلة ختمت آخر كلمه واكتفت بذي الجملة لما خنقتها العبرة!! خزامى توهقت وهي تشوف نظرات وليد الناريه وهو ينطق: خزامى ردت خزامى وهي تحبك السالفة حتى ما تنقلب عليها: قبل ما تناظرني كذا إسألها وش عملت حتى منعتها تروح؟! فتحت عيونها بيلسان باستنكار ..ما عملت شيء يحملها تمنعها تحضر زواج ليان ....هي توعدتها وقت تجهيز ليان ما رح تخليها تحضر .. بس ما توقعت تبقى حاقده لهذا الوقت !! وليد ناظرها من المرايه: وش عملت لأمك؟! بلعت غصتها وبنبره ما فيها حياة نطقت: ما عملت شيء خزامى قاطعتها: منعتها لأنها إنسانه تفشل...حسيت نفسي بحجم النمله قدام اهل العريس واهل كنان بالملابس الي لبستها ..ألف مرة أقولها إلبسي شيء مثل الخلق ..وكل مرة تعاند ولا كاني أكلمها وتنفذ الي برأسها ..تخيل لبست فستان تراثي أعتقد إنه لأمي لبسته بيوم زواجها وقامت تعمل نفس حركات الخبل والجنان تبعها ...مو انت قلت لها ممنوع ترقص وتغني؟؛ ما سمعت كلامك وكل الحريم يقولون من وين هالطقاقه...ويتريقون علينا!! فضحتنا وفشلتنا بتصرفاتها ..وحتى خالتي أم فيصل انبط كبدها منها وارتفع ضغطها .. أنا خلاص مليت من هالبنت ومن تربيتها مب قادرة أتفاهم معها ...ما ادري وش لغتها الي تفهم فيها ..الحمار لو تقول لها هذا غلط بيفهم عليك ..وهذي البنت غباء مستفحل ..ما عدت أقدر أتحمل تصرفاتها !! انت تفاهم معها يمكن تسمع منك .. أنا خلاص مليت منها!! ولو ترجعها للقرية يكون أفضل لأني ما رح اسمح لها بالتواجد بأي مكان اكون فيه...انا اكتفيت من الشماته من حولي!!! بيلسان تناظر من الشباك وتسمع كلام هالموشح .. ما عادت تعرف شيء ..تحس عقلها مشوش ..معقول هي سيئة هالكثر وما هي حاسه على نفسها والا أمها تبالغ؟! ما عادت تعرف نفسها اذا كانت سيئة او لا!! ناظرت ابوها لما هز رأسه بتوعد : لما نوصل البيت رح نتفاهم على كل شيء!؟ تتمنى لو يرجعونها للقرية ويتركونها بحالها ..هذا اقضل حل بالنسبة لها!! ** ** ** اول ما وصلوا ما لها نفس تدخل ..قلبها قارصها وما هو مرتاح لهم ....ومع ذلك طردت هالاحساس وتابعت طريقها للداخل ... وقفت لما دخلت الصالة ..وناظرت جدتها الي نطقت بحده: علامكم تأخرتم؟! رعد بهدوء: ما تأخرنا؟! تابعت خطواتها بيلسان بهدوء ...وقفت لما نطقت جدتها وهي تكلم وليد إلي دوبه دخل: لمتى رح اتحمل هالمهزلة؟! وليد عقد حواجبه باستنكار: وش صاير؟! ام فيصل بغضب: حركات ابنتك ما تنطاق فضحتنا بين المعازيم ؟! ما عندك فلوس تشتري لها ملابس واحذيه مثل الخلق ..قول لي انا اشتري لها ...فضحتنا بالقاعة تمشي حافيه وغير حركات الجنان الي تعملها؟! تخلف وقرف!! بيلسان وكأنه ينقصها تشحن أبوها مرة ثانية ..يكفي خزامى قامت بالواجب وزيادة..وفوق هذا تتكلم عليها وكأنها شيء حقير مستعره منه ...ما رح تسكت يكفي تمادوا معها كثير ..وبدون تردد وبصوت قوي نطقت نابع من اعماقها: ما اسمح لاحد يتكلم عني بذي الطريقه؟! وليد قاطعها بتهديد:انكتمي وما ترفعي صوتك على امي..تفهمين؟! نطقت بقهر: انا ما رفعت صوتي وما رح أنكتم علشان افكاركم المتخلفه قاطعتها ام فيصل بقهر من تصرفاتها: حنا متخلفين؟! وسالفه خليل ؟! وإلا هذي بعد تخلف؟! نطقت بانفجار بوجه جدتها: انت وش تبغين مني جالسه تحفرين علي مع أمي ..ما تعرفون حكم النميمه قاطعها وليد وهو يسحبها من يدها بقوة ..استقرت يده على شعرها من فوق الشيله ..شد شعرها بكل قوته وهو ينطق بتحذير: لآخر مرة أقولك انكتمي!! وتكلمي بأدب مع أمي!! حاولت تفلت شعرها وهي كاتمه ألمها .... ام فيصل ما طاب لها يضربها كذا ..تقدمت تبعده عنها: اتركها وليد اتركها اول ما تركها نطقت بكره لجدتها : تقتلون القتيل وتمشون بجنازته فقد أعصابه وليد من كلامها ...أمه خط احمر وما يسمح لبزر تتمادى عليها بالكلام ..وبدون وعي طقها ... دخل ابو فيصل بفزع وهو يشوف وليد يطق ببيلسان وأم فيصل تصرخ عليه تحاول تبعده عنها!! وبعصبيه دف وليد عنها : اتركها ..انت مجنون ؟! هذي بنت تعرف وش يعني بنت؟! اقترب من بيلسان ومد يده لها : تعالي يبه!! ناظرت يد جدها ..ودموعها تنزل بصمت تشكي حالها ...رفعت نظرها لخزامى واقفه متكتفه وكل الرضا واضح على ملامحها...تبغى أحد يقنعها إنها هذي أمها !! مسحت دموعها بقوة ما تبغى تكون ضعيفه كذا ... تجاهلت يد جدها الممدودة نحوها ما تبغى شفقه أو مساعدة منهم..اكتفت من الجميع ... رح تنغلق على نفسها لوقت التخرج وبعدها ما رح تجلس هنا لو تنام بالشارع ...وقفت بهدوء وتحركت للأعلى بقلب ميت ... ** ** ** مرت الأيام بنفس الروتين ....باقي لها امتحان واحد وتتخرج من الجامعه ...تاقت روحها لذاك اليوم ..متى تودع هالمكان وترجع للقرية .... وضعت يدها تحت خدها بملل..ما تغير شيء بحياتها هنا .. تحس من يوم زواج ليان انكسرت اشياء كثيره بينها وبين أبوها ..ما أظهر ندمه على ضربها بالعكس دوم يردد " بغيت أكسر رأسها لولا تدخل ابوي" يقهرها بكلامه ..ومع ذلك ما كرهته كثر الكره الي تحمله لخزامى...تدري إنها غلطانه وهذي أمها معما عملت المفروض يكون عندها طول بال أكثر ..بس عجزت تتحمل استفزازها لها ....ما اكتفى العقاب بالضرب ...حرموها تلتقي بأي احد من حولها او تحضر أي مناسبه قريبه او بعيده والاهم من كل هذا منعوها من زيارة القرية....زفرت بملل من الحياة وهي تناظر بالحديقه ليان جالسه مع زوجها على مقعدها المفضل تحت الشجرة ....تمنت كثير تجلس مع نصفها الثاني بذاك المكان ... ما تتوقع وييجي ذاك اليوم ويتحقق...كل لحظة تنتظر ورقة طلاقها ... ما عندها احلام او طموحات كل شيء بداخلها تحطم ... تنهدت ودخلت غرفتها وهي تسمع أبوها ينادي عليها ...فتحت باب غرفتها... رجعت خطوة للخلف لما التقت بوليد عند الباب .....نطق بنرفزه: انت وينك سنة وأنا أنادي عليك ؟! ردت بهدوء: ما سمعت قاطعها بلامبالاة من تبريرها: جهزي القهوة ليان هنا وجهزي الضيافه...وإلبسي رح نجلس بالصالة!! هزت رأسها بهدوء.. وبداخلها أحيانا تكره ليان ونورس من كثر تقديس أبوها لهم ... وش هالتفريق بالمعاملة؟! لبست وتوجهت للمطبخ تجهز الضيافه ...ابتسمت بهدوء لرعد الي جالس بالمطبخ : كيفك يا دكتور؟! رعد نشف ريقه من دراسة الطب..نطق بقرف: ليتني رسبت قاطعته بغمزه : لا يسمعك أبوي رعد ابتسم : ما هو فاضي لنا ..قالب البيت ليان هنا!! يا عمي الناس حظوظ !! والمشكلة أمي دوامها متأخر اليوم بالجامعه..اسمعه يقول يبغى يشتري أكل جاهز..متوهق وحالته حاله قاطعته بيلسان بهدوء: ما ادري ليه التكلف ..لو عشنا على طبيعتنا رح تكون الحياة أجمل وأبسط!! رعد بمحبه لها: ما هو كل الناس تفهم الحياة بنظرك ! وباستدراك نطق: تدرين نسيت اقولك اليوم شفت كنان ويسلم عليك؟! خزته وهو تعرف كذبه ...ضحك بخفه وهو يحلف: ورب الكعبة إني شفته وسلمت عليه ..حتى أكون صادق معك ما قال يسلم عليك ..بس قال سلم على اهلك ..اكيد يقصدك!! ما علقت والضيق اعتراها ..ما تذكر متى آخر مرة شافته ..من يوم زواج ليان ما إلتقت فيه وما في أي تواصل بينهم ...وحتى الزواج ما احد جاب طاريه!! تنهدت وتابعت شغلها وهي تشغل فكرها بأمور ثانيه ...ناظرت ابوها الي وقف عند باب المطبخ وهو ينطق: عجلي شغلك واتركي عنك الكلام ..وانت على غرفتك !! رعد وقف بانصياع وطلع و هو من الداخل رح ينفجر من الدراسة ... مطت شفتها من هالحياة والتفريق بالمعاملة... بعد ما طلع أبوها للصالة وصوته وهو يرحب فيهم الظاهر بلقيس وصلت!! بعد وقت قصير اضطرت تطلع بالضيافه ..ردت السلام بهدوء ..بعد ما وضعت الضيافه على الطاولة... وقفت ليان وسلمت عليها بحفاوة والحمل واضح عليها. ..ابتسمت لها بيلسان وهي تسألها عن حالها واحوالها ..بعدها التفتت على نورس بجمود : كيف حالك قاطعها بابتسامة : الله يسلمك ..وش اخبارك واخبار دراستك ؟! هزت رأسها بهدوء: الحمد لله!! جلست بعد ما اشر لها ابوه بعيونه تجلس معهم ... كتمت ضيقها وهي تناظرابوها بنفسه قام يوزع الضيافه ...تتضايق من تقديس ابوها المبالغ فيه لليان ونورس ... وكأنه ما عنده عيال الا ليان ....يوم تخرجها عمل لها حفلة كبيرة على حسابه الخاص واشترى لها سيارة..ما هي حسودة او حقودة..بس يحز بخاطرها التفريق بالمعاملة ؟! نورس باهتمام يكلم بيلسان: وش ناويه بعد التخرج؟! بيلسان نادرا تجلس مع نورس...نطقت بهدوء: راجعه للقرية! قاطعها باستنكار: احد يترك الحياة هنا ويرجع للقرية ...وش رايك بعد التخرج أشوف لك صديقي أبوه عنده مدرسة خاصة رواتبهم عاليه قاطعته بهدوء: راجعه للقرية! ليان ابتسمت: قولي لمزرعة عمي ماجد من هنا لوقت التخرج يكون موعد زواجك!! انقلبت ملامحها من هالسيرة ..وناظرت أبوها الي نطق بسخريه: أي زواج وللحين ما جمع ربع المهر؟! ليان بابتسامه: البارحة إلتقيت فيه وسألته عن موعد الزواج قال " إن شاء الله خير" نورس باهتمام: طيب لما يتصل فيك ما تتباحثون بهذا الموضوع ؟ وليد بهدوء: ما في تواصل بينهم قاطعه باستنكار نورس: نعم؟! حنا بأي عصر ؟! وليد وقرار سلطان لما فكر فيه جاز له لأنه يخاف من الانتقام ...نطق بهدوء: يعني بناء على رغبة عمي سلطان ما عنده البنت تجلس مع خطيبها نفذنا له رغبته بما إنه البنت هو الي اعتنى فيها! نورس ما عجبه هالقرار: وكنان وش قال؟!! وليد مط شفته بسخرية: وش رح يقول؟! بعد الزواج يجلس معها مثل ما يبغى ...اما الحين ما هو مسموح! نورس بابتسامة: الحمد لله سلطان ما هو جدك يا ليان!! ليان بهدوء: فترة خطوبتنا ما طولت مثل بيلسان!! نورس بتساؤل: قلت رح ينتقل من المستشفى الي تشتغلين فيه؟! ليان هزت رأسها: هو قال لي قبل فترة عن انتقاله بس صارت بعض الامور وأخرت انتقاله!؛ مطت شفتها بيلسان بسخريه..اختها تعرف كنان اكثر منها ...دوامها معه بنفس المستشفى وتلتقي فيه كثير ...بس ما عمرها خبرتها إنه سأل عنها أو يسلم عليها او شيء يدل على إنه للحين ناوي يكمل معها ....ما احد زاراها الا جدته وعمته خلال هالفترة مرتين وما كانت موجودة بالبيت كانت بالجامعة! ما رح تربط نفسها بأشخاص ...رح ترجع بيلسان القديمه ايام القرية وترجع الامل والحياة لقلبها من جديد ...ما بقى شيء على هذا الحلم ..تتمنى إنه ابوها ما يوقف بطريقها حتى ما يكون تصادم بينهم من جديد ..... ** ** ** ** ما هي مصدقه انها كملت امتحانها ...ما انتظرت التخرج اهم شيء كملت امتحانات ....اتفقت مع جدها اول ما ترجع يكون بانتظارها ....كان عند وعده وما تأخر دقيقه عنها ....تناظر القرية وهي تشوف التغير الي صار فيها ...ابتسمت لنفسها ما هي مصدقه إنها تركت ذاك المكان ...طول الفترة تدعي ربها إنه وليد ما يوقف بطريقها ...ناظرت جدها سلطان بابتسامة: مب مصدقه إني رجعت...احس نفسي بحلم وبأي لحظة رح أصحى منه ... سلطان مد يده وقرصها بكتفها: ما هو حلم! فركت مكان القرصه : اوجعتني !! سلطان بملامح مرتاحه لتواجدها معه: اليوم عندي وكأنه عيد من الفرحة بتواجدك معنا!! بيلسان تنهدت بحنين: أحس كأني تارك المكان عشرين سنة..ااااه واخيرا رجعت! ضحك سلطان بخفه: الي يسمعك يقول عمرك خمسين ما هو ٢١ سنة؟! ضحكت على نفسها: قلت كذا من لهفتي وشوقي لكم ..شوفني تخرجت بثلاث سنوات حتى ارجع لكم ...والحمد لله !! سلطان مط شفته بابتسامة ساخره: الي يشوفك يقول وكأنك مقفول عليك بغرفة بأربع جدران!! تنهدت بيلسان والايام الماضيه للحين معتليه فوق صدرها ما قدرت تتجاوزها ...كتمت ضيقها ونطقت بابتسامة: ناظر ذيك نجوى ..لو انزل أسلم عليها قاطعها : الايام طويله رح يملون منك!! ابتسمت بحنين لأيام نجوى والبنات : ما رح نمل من بعض!! نطقت باستدراك: صحيح يبه سمعت عن المدرسة الي رح يفتتحونها هنا ..رح اقدم لهم طلب وأدرس فيها ! هز رأسه بتشجيع: أكيد ..ابغى الكل يتكلم عن شطارتك ..رح تكونين أحلى أبله بالمدرسه!! زمت شفتها بسعاده..وهي تنتظر اللحظة الي تكون فيها معلمه! بعد وقت قصير وقفت السيارة قدام بيت جدها ..نزلت وهي تسمع جدها يتكلم مع السائق ...ناظرت البيت بحنين ...اقتربت من جدها حملت اغراضها وهي ناويه تلف القرية شبر شبر !! ** ** جالس بالصالة عند اهله ويطقطق بالجوال ...نزل الجوال وناظر ابوه وهو رافع حاجب بعد ما وصله الكلام: سلطان جاء وأخذها؟! أبو فيصل هز رأسه: ايه تقريبا على الساعه ١١ ...ليه قاطعه وليد وهو مقطب حواجبه: كيف يأخذها بدون ما احد يقول قاطعته ام فيصل: انت وافقت بعد الامتحانات ترجع للقري قاطعها بعدم رضا: وافقت بس ما هو من بعد الامتحان مباشرة ؟! طيب ما لها اهل تسلم عليهم قبل ما ترجع؟! أبو فيصل مط شفته بسخرية: لو شافت منكم ريق حلو ما هجت بذي الطريقه ..يمكن خافت لو انتظرتك تغير رأيك! زم شفته وليد وما عجبه كلام أبوه: الي يسمعك يقول تصبح بطراق وتمسي بطراق ؟! أبو فيصل مط شفته بطريقه استفزت وليد: الله اعلم..حنا جالسين هنا وش يعرفنا الي يحصل في بيتكم ؟! هز رأسه بقلة حيلة: لا حول ولا قوه الا بالله! ام فيصل اكتفت بالسكوت وهي تحس بيلسان من زواج ليان حملت عليها ..مع انها حاولت تراضيها بس حستها ما صفيت لها ...ناظرت وليد الي نطق بقهر: وربي أفكر أنزل للقريه وارجعها حتى تعرف اداب البيت ام فيصل برجاء: اذا لي عندك خاطر يا ولدي اتركها ..لو شفت فرحتها والإبتسامة شاقه حلقها ...زمان ما شفت فرحتها كذا !! اتركها تراك خنقتها بالعيش هنا ..حياتها وطبعها مختلف عنا ...اتركها تعيش بالمكان الي يناسها!! ** ** ** فتحت عيونها باستنكار وهي تشوف المكان ظلام ...عقدت حواجبها وعقلها ما هو مستوعب المكان ... بدأ تدريجياً عقلها يستوعب إنها في بيت سلطان ... وقفت بشويش وهي تتلمس مكان الانارة ...ما تدري كم الوقت ...طلعت من الغرفة واقتربت من جدتها متمدده على طولها بالصالة..نطقت وهي تناظر من حولها: كم الوقت؟! ام خزامى بهدوء: قريب اذان العشاء ... بيلسان عقدت حواجبها بضيق: وليه ما صحتيني للصلاة ام خزامى بهدوء: والله يمه صحيتك وقلت لي صليت ..يمكن تعبت من الطريق ونمت بعمق!! روحي يمه لحقي المغرب قبل العشاء! هزت رأسها ورجعت ادراجها تتجهز للصلاة ما تتذكر جدتها صحتها ...تتذكر انها دخلت تبدل ملابسها ..تريح شوي وتلف بالقريه..وبعدها ما تدري عن شيء!! ما تدري وش هالنوم إلي متسلط عليها ...ندمانه على تساهلها المفروض لما كانت عند اهلها راجعت بالمستشفى وعرفت سبب هذا النوم!! قضت الصلوات الي فاتتها ..وجلست تستغفر ربها ... رفعت نظرها لما فتح جدها الباب بعد ما طرقه وبابتسامة نطق: تعالي نتعشى قبل اذان العشاء زمان ما جلست معك ! ردت له الابتسامه وبداخلها مشاعر دغدغه ..حلو تلقى ناس من حولك تحبك لذاتك تهتم فيك..تحسسك بقيمتك كإنسان... وضعت جلال الصلاة وتوجهت لجدها والسعادة والفرح بدأ ينبت من جديد بداخلها!! جلست على الأرض بأريحيه زمان ما جلست على الارض تأكل ... ام خزامى بفرح: والله نور البيت بوجودك يا يمه...الحمد لله انتهت دراستك على خير!! سلطان جلس جنبها وهو ينطق: باكر رح تعزمين كل صديقاتك على الغداء هنا .. متأكد مشتاقه لهم وللحش والضحك .. ابتسمت بحنين وهي تناظر جدها بامتنان وكأنه يعرف الكبت الي عاشت فيه!! تابع كلامه بجديه: جربتي الحياة هناك ومتأكد كانت من أسوأ السنوات الي عشتيها ..وأحب أقولك حياتك في بيت كنان ما رح تفرق شيء ..الوقت للحين معك ..فكري زين وما تتسرعين بالزواج ..وما يغرك الشكل ...تزوجي انسان من هنا تعرفين عاداتهم وتقاليدهم وحياتهم نفس الحياة الي عشتيها ...والخيار لك قاطعته ام خزامى: اترك البنت بحالها..دام انها وافقت عليه فأكيد راضيه فيه ..والزوجه الصالحه تتحمل زوجها بالسراء والضراء .. واذا كرهت منه خلق رح ترضى بأخلاق ثانيه منه ...ما في إنسان كامل ... تحس بالغصه بعد كلامهم مب قادرة تبلع اللقمة ...معقول تعجلت بقرارها...كتمت انفاسها للحظات ...متشتته وعقلها مب قادر يأخذ قرار سليم .. الشيء الوحيد الي متأكده منه ...إنه قلبها ما نبض لشخص غيره ...ليه تظلمه وللحين ما شافت منه شيء سيء ...الرجال ما ظهر خيره من شره.. وبهدوء نطقت عكس وجهها الي تحس إنه ولع : أنا استخرت يا يبه وربي كتب نملك .. وأنا راضيه فيه .وللحين ما شفنا منه شيء قاطعها بصراحه: أنا هالشاب ما اعرفه ولا لي فيه اختلاط ..بس أنا أخاف عليك من الي حوله ..منار ما رح ترتاحين معها ..هذي أختي وأعرفها ...اذا حقدوا صعب يغفروا لأحد ويبقى الانتقام بداخلهم حتى بعد مرور السنوات!! ام خزامى باستبعاد: الحين متزوجه وعندها عيال ...الماضي مات وأي حركه رح تحسب حسابها وتخاف يقولون للحين على ذكرى وليد ..ما ظنيت تعمل شيء!!! الله يهديها ويهدي الجميع!! نطقت بيلسان بخفوت: آمين!! ** ** ** انتهى البارت .. دمتم بخير 🌹 | ||||
|  |
|
04-01-23, 01:14 AM
| #373 | |||||
| اقتباس:
| |||||
|
| |
|
04-01-23, 01:57 AM
| #375 | ||||
| بارت جميل ❤️ الحمدلله بيلسان طلعت من حالة الكآبة اللي عيشتنا فيها لما كانت ف بيت وليد اتمني انه سلوكها يتعدل اكثر بعد رجوعها للقرية بالنسبة لجدها سلطان لم أفهم سبب كرهه لكنان ومحاولة ابعاده بكل الطرق مع انه ماشاف منه شي | ||||
| |
|
04-01-23, 07:54 AM
| #378 | |||||
| اقتباس:
مشكلته في اخته العله منار...يخاف تطلع قهرها من خزامى في بيلسان.. عشان كذا مايبغاها تعيش عندهم..وتتنكد عيشتها.. يبغاها تتزوج عند ناس ترتاح معاهم وتستقر.. | |||||
|
| |
|
04-01-23, 07:57 AM
| #379 | |||||
| اقتباس:
ولو اننا ماشبعنا يا أبرار..ترانا نعطش من ابداعك مانرتويّ 😔،.. | |||||
|
| |
 |
| أدوات الموضوع | |
| انواع عرض الموضوع | |
|
|
2373Likes
.png)
العرض العادي
