[مدامع حزينة]

بسم الله الرحمن الرحيم..

نبدأ روايتنا الجديدة (سلطان الهوى يافتنة الألفية)
أتمنى تنال إعجابكم
.
1
-
وقف قبال البوابة الحديد المسّورة بحدايدها الطويلة الممتدة من فوق لتحت بوجهه يتخللها مسافة بسيطة بين كل حديدة والثانية مكتسية باللون الاسود اللي يكرهه كره الويل بثوب وشماغ واخيرا بيفارق هالمكان اخيرا بكل مافيه من مشاعر مختلفة(قهر..حقد..كره..خيبة..ا� �عدام شعور..اكتئاب..أمل..انتظار غاية)ردد بنفسه/مايهم مايهم مايهم ابد/صحى من دوامة افكاره على صوت فتح البوابة وهو يرفع عيونه لها وهي تنفتح له بترقب وتوتر تسارعت نبضات قلبه بأضعاف اضعاف سرعة فتح البوابة اللي قدامه اللي تعود يوقف قدامها كل مرة بيدين مكبلة هالقضبان اللي طوقت روحه وشتتها قبل جسده تنفتح قدامه اخيرا بعد سنين طويلة وطويلة جدا عليه نزل نظره ليدينه يناظرها يتأكد/مافيه كلبشات مافيه/رفع يديه وسط رجفة قلبه وهو يستوعب اللحظة اخيرا حانت هاللحظة اخيرا التفت للعسكري اللي جنبه وهو يبي يتأكد ناظره وهو يشوف شفات العسكري تتحرك وسط ابتسامة على وجهه لكن مايوصله صوت مجرد همس خافت مو واضح له من زود صوت نبضاته اللي صمّ اذانيه/
العسكري بابتسامة وهو واقف عند بوابته المسؤول عنها/تفضل تقدر تكمل لنهاية الممر وقدامك الاخوان يخلصون امورك
سلطان ناظره وهو ياخذ نفس
العسكري مد يده لسلطان بالابتسامة اللي مافارقت وجهه من البداية ولاانتبه لها سلطان
سلطان ناظره بتفكير للحظة مد يده بتردد
العسكري امتدت يده ليد سلطان المترددة وصافحها/مبروك مبروك والله يوفقك بحياتك
سلطان توتر فوق توتره اكثر وضغط على يد العسكري
العسكري ابتسم بتطمين له وهو يحس بضغطه على يده اللي وصلت حجم قلق سلطان وتوتره بدون اي شعور منه/الله يكتب لك الخير وبداياته
سلطان ترك يده وهو يشد على قبضته وتوجهت انظاره للممر قدامه رغم ان الممر مايزيد طوله عن السبع امتار الا انه مايشوف نهايته ابد من فرط توتره تقدم خطوة والتفت لورا بسرعة من وصله صوت سحب البوابة اللي تنقفل بينه وبين هالمكان اللي قضى فيه سنين طويلة من عمره تقفلت وهالمرة مو عليه هالمرة هو برا هالمكان بلع ريقه وهو يوجه نظره من جديد لنهاية الممر وهمس بينه وبين نفسه/بِسْم الله توكلت على الله/خطى خطواته اللي واضحة لغيره بثبات وقوة وهي العكس تماما خطوات ترجف معها رجوله وثقيلة عليه يالله يرفعها كمّل هالخطوات المهتزة الثابتة لنهاية الممر وانفتحت اخر بوابة واللي كان بعينه من سابع المستحيلات تنفتح بوجهه بيوم ولكن هالمستحيل حصل وانفتحت له اخيرا انفتحت بعد15سنة>>
>>قضاها بهالمكان طالع العسكري وهو يكبح عبرته وعلى عكس العسكري اللطيف اللي قبل شوي هالعسكري غير ملامح محتدة والتمس له العذر لطبيعة هالشغل وحتى المكان وقف وهو يسمعه/
العسكري مد يده وبجلافة/هات اوراقك اختمها؟
سلطان مدها له
العسكري ختمها بسرعة وهو يمرر نظره عالورق بسرعة اكبر من ختمه ومدها بتكشيرته المرتسمة على وجهه/خذ /فتح البوابة وبنفس النبرة الحادة والملامح المحتدة/لاطلعت يقابلك مسؤول النقل اللي يحطك عند البوابة الخارجية وهناك تقابل الاهل فمان الله
سلطان انصعق ووضح على وجهه وبصدمته/اهل!!
العسكري وهو يمد يده لزر البوابة الخارجية عكس الداخلية اللي يدوية ويضغطه وبحدة/ايه اهل تفضل قبل تقفل عليك داخل الوقت محسوب علينا بالملي
سلطان خرج وهو يطالع لقدامه صحرا قاحلة وبوابة مدخل السجن على مسافة بعيدة جدا عنه ثم التفت لبوابة السجن اللي وراه وهي تنقفل بوجهه تعلن موعد رحيله عن هالمكان رسميا لكن رهبة الخروج وحتى فرحته تبددت من سمع ان اهله ينتظرونه برا رفع عينه عالباص اللي وقف قدامه وانفتح بابه طلع له وهو يسمي وجلس باخر هالباص وهو اخذ عقله التفكير وبنفسه/مين ياسلطان مين اللي بيجيك!!/قطب جبينه بشك/فواز؟ولا بجاد؟/اتسعت عيونه بتكذيب/ابوي!!!/انعاد بذاكرته ذاك اليوم اللي يعتبره ثاني أسوأ ايام حياته انعاد وكانه يحصل قدامه الحين/
،
،
سلطان بدموعه وهو جالس عند رجول ابوه ومتعلق فيهم/تكفى يبه تكفى صدقني مالي شغل
ابو سلطان يتامله بصمت مطبق من وصل عنده وانقفل عليهم الباب وهو مانطق حرف مجرد نظرات مسلطة على سلطان وسط وجهه الجامد الخالي من اي تعبير يتامل فقط
سلطان برجفة صوته من كثر بكاه/واللي رفع سبع وبسط سبع مالي ذنب/وبشهقات انبح معها صوته من القهر/مظلوم يبه مظلوم
ابو سلطان سحب رجله وهو يصد بوجهه ولا رف له جفن وهو يسمع نحيبه
سلطان فز واقف وهو يسحب يمين ابوه ويبوسها بدموعه اللي تطيح من عينه وتلامس ظهر كف ابوه واحتضن هاليد بين كفوفه احتضنها وهو يضغط عليها بآخر أمل بقى له آخر ملجأ اخر من يصدقه بهالمصيبة الكبيرة اللي صابته/يبه يبه مظلوم والله مظلوم تكفى
ابو سلطان سحب يده من بين يدين سلطان بقوة ووجهها لخد سلطان وارتسم الغضب على التعابير الجامدة وطبع كف بكل مااختزن قلبه من غيظ وغضب على سلطان من وصله الخبر وثبتت التهمة عليه
سلطان التف بوجهه من هالكف اللي انطبع على خده وتراجع بخطواته من قوة الكف وهو وصلت له مشاعر ابوه قبل ينطق بها
بجاد انصدم وهو يطالعهم
ابو سلطان مسك سلطان الضايع بحسرته من ياقته المبعثرة وشده وهو ينهال عليه بالضرب
بجاد تحرك لابو سلطان وهو يمسكه ويبعده عنه
سلطان واقف بدون اي ردة فعل وهو يطالع الفراغ من صدمته ويأسه كل شي انتهى خلاص انتهى رسميا مافي احد يصدقه مافي احد يوقف معه حتى ابوه اخر امل له بهالدنيا تركه
بجاد/ياعم جابر استهدي بالله ياعم تعوذ من الشيطان وافهم السالفة تعوذ ياعم
ابو سلطان دف بجاد عنه وبغضب وضح بوجهه اللي اختفت باللون الاحمر من شدة غيظه المكبوت/لاتحسب اني حبيت خشوم وتوسطت لاجل شوفتك ياسلطان
سلطان حرك عيونه وهو يناظر ابوه بهدوء
ابو سلطان بقهر/مظلوم!!!تقول مظلوم هاه!!والاوراق والبلاوي السودا اللي لقوها ياسلطان وباسمك!!الجماعة اللي معك/صرخ/وللحين تقول مظلوم!!
سلطان ناظره وبخيبته همس/ايه مظلوم
ابو سلطان زلزل صوته الغاضب المكان/اعقب!!ياخاين دينك ووطنك اعقب!!مابه ظلم وتبلي بهالامور اعقب لااسمع لك صوت
سلطان سكت وهو يشوف هالغضب المتأجج عليه واللي لاول مرة يعيشه ويحس به من ابوه
ابو سلطان/انا جيت بس عشان اقولك هالكلمتين وماشي
سلطان برجفة واضحة بصوته وعيون جفت من الصدمات المتوالية/إتبرى مني؟
بجاد قشعر جسمه من قوة الكلمة بلع ريقه وهو ملتزم الصمت حس انه غلط يوم وافق على طلب عمه السري بينهم
ابو سلطان/ليت التبري يفيد كان سويته لكن مايفيد ابد اسمك مربوط باسمي ليوم الممات مايمحيه لا قول ولافعل
سلطان بلع ريقه وبهدوء عكس عاصفة المشاعر اللي تجتاحه داخليا/أجل؟
ابو سلطان بغضب وصوت ثابت عكس عيونه اللي امتلت دموع من الغبنة والقهر/كسرتني ياسلطان كسرتني
سلطان اهتز كل مافيه من قوة الكلمة
ابو سلطان بغضبه/كسرت شيخ قومه ومرغّت خشمي اللي بأعالي السما مايقصه السيف مرغته بالتراب برمشة عين
سلطان اختنق بصوته وهو ينادي ابوه اللي ماوصله صوته
ابو سلطان بغضب تمردت معه هالدموع المحبوسة على خده/كسرتني ياسلطان رح عساك تنكسر ورا كسرك لي ولاخوانك عساك تنكسر كسر ولاتنجبر منه بيوم ياسلطان ياولد جابر/خرج/
بجاد خرج وراه/ياعم ياعم
سلطان واقف بمكانه ولالحق ابوه ولاابدى اي تصرف مجرد يناظر مكان ابوه بهدوء من صدمته
،
،
سلطان زفر بابتسامة وهو يضحك على نفسه بخيبة وبنفسه/باقي تنتظره ياسلطان!!انت انكسرت بلحظة القبض وهو دعى فوق كسرك كسر الله يجيرك من هالدعوة ويسامحه/تنهد/وهو يطالع الطريق قدامه اعتدل بجلسته وهو يشوف بوابة دخول السجن اخذ نفس يكبح فيه توتره ويهدي نفسه وسط تفكيره بمن يكون هاللي جاي عشانه/
//وخرج الباص من السجن وابتعد عنه ووقف بمواقفه الامامية وانفتح باب الباص لسلطان//
السواق التفت له/تفضل
سلطان وقف وهو ياخذ اغراضه البسيطة مجرد شنطة سودا صغيرة نزل من الباص وهو كله فضول وتفكير باللي ينتظره التفت يمين ويسار وهو يمرر نظره بسرعة عالكم شخص المتواجدين قباله مايشوف احد يعرفه
//كل اللي موجودين عند المحطة ينتظرون اهلهم ابتعدوا بخيبة وقت شافوا ان اللي نزل مو الشخص المنتظر بالنسبة لهم ماعدا شخص واحد فقط//
سلطان قطب جبينه وهو يناظر المتسمّر بمكانه قباله بمسافة متر تقريبا دقق النظر فيه يحاول يتعرف هالوجه المخطوف اللي يناظره الوجه مألوف له نوعا ما لكن مااسعفته الذاكرة بمعرفة هالشخص خصوصا بعد الفترة اللي مرت عليه/
وقف قباله وهو ينتفض بخفة من فرط مشاعره شوق حنين حب فرح رفع يديه اللي تنتفض وهو يحركها بلغة الإشارة وسط عيون التمعت من كثر الدموع اللي ملتها
سلطان اتسعت عيونه بذهول عرفه عرف هالشخص لام نفسه كيف مايعرفه كيف!!لانت ملامح وجهه وهو يتامله يتامل كمية التغير اللي صارت لهالانسان فعلا كبر كبر كثير صار يوازيه بالطول وممكن اكثر يالله يالوقت اللي مر عليه غرقت عيونه دموع وهو ماابدى اي اهتمام ولااستيعاب للي يقوله هالشخص بلغته فتح يديه وبصوت كله حب ابوي طاهر قبل يكون اخوي/ياعين سلطان أقبل ياعينه
نايف جرى هالمسافة وهو يرتمي بهالحضن اللي فارقه مُجبر وانتحب لكن بدون صوت بالنسبة لوضعه
سلطان غلبته دموعه وطاحت وهو يحس به ينتفض ينتحب بين يديه بدون صوت لو الكل تركه يبقى نايف الولد والاخ والصديق اللي مايتركه ابد شده لحضنه وهو يمسح عليه يحاول يخبيه بين ضلوعه وهو نساه ونسى حاجته وبخوف واضح بصوته المهتز/وش سوت بك الدنيا بعدي ياعين سلطان وش سوت؟!!
ـــــــــــــــــــــــــ ـــــــــــــــــــــــــ ـــــــــــــــــــــــــ
.
صحت من نومها بكسل مو رضا بهالكسل غصب عنها مغمضة عيونها وممتدة للحين مافتحتها ولاقامت تحس بكل جسمها مكسر بعد تعب البارح اللي زايد عن كل ليلة كيف لا وهي المسؤولة الوحيدة بهالبيت الكبير عن كل اشغاله رفعت يدها لوجهها وهي تغطي عيونها تحديدا بهاليد اخذت نفس وزفرته وهي تهمس لنفسها/اجر اجر الكلمة الشينة ماتلحقك يقولون اللي يقولونه يسوون اللي يسووونه كله اجر/جلست على فراشها الارضي وهي تبعد اللحاف من فوقها وقفت وهي ترفع قميصها الاخضر الطويل عليها شوي عن الارض وتقدمت خطوة وهي تفتح الباب اللي مايبعد الا كم خطوة عن فراشها فتحته وفزت غمضت عيونها وهي تحط يدها على قلبها وتسمي/سلامُ قولا من ربٍ رحيم
موج ميلت فمها بزعل/وش شايفة هاه!!انتي مو بس انتقصتي انوثتي انتي نسفتيني نسف
فتنة بابتسامتها الذابلة وهي تتجه للحمام اللي قبالها بمسافة بسيطة/مو ذنبي انتي اللي مدري وش تبين؟
موج ابتسمت وهي تمشي وراها/لا الحمدلله اليوم احسن جيت خايفة اقول اكيد ميتة الحين
فتنة لفت عليها وهي تطرد التعب وتخصرت/بِسْم الله علي فالك ماقبلناه يامويج
موج ضحكت/ادخلي ادخلي قبل ترجع عمتي من المدرسة
فتنة اختفت ابتسامتها وبضيقة/وطلال؟
موج تنهدت/انا تعبت اخوك ذَا يبي له ضربة على راسه عشان يصحى وانا من رايي اقول يعني انسيه وقفي اهتمام يمكن هو يحس شوي ويستحي على دمه
فتنة زفرت/يعني مافيه أمل
موج بسخافة/لا والله فيه رغد حسبي الله عليها سبع التحاسيب
رغد بعبايتها المفتوحة اللي واضح من تحتها مريولها باللون الكحلي واقفة بنهاية الممر الضيق وهي تناظرهم ومتكتفة وبنرفزة/ماشاء الله ماشاء الله طاقين حنك عالضحويات وتضحكون لكن هين دواكم عند عمتي
موج زفرت وعينها على فتنة/استغفر الله العظيم هينا اللي ينقال سلامُ قولا من ربٍ رحيم مو بأنا
رغد تخصرت وبصوت عالي/نععععمممم!!
فتنة تنهدت/موج اتركيها عنك وروحي ماانتي ناقصة مشاكل مع امي
رغد اتسعت عيونها/نعم!!!وش هالكلام اللي يسمعك مايدري اي فينا بنت خالك!!
فتنة ناظرتها/رغد انتي مستأذنة من المدرسة على ابو انك تعبانة اشوف لسانك وش طوله!!متاكدة تعبانة
رغد كشرت/اعوذ بالله منك!!صدق حسودة!!ايه وش ارتجي من وراك وانتي
موج قاطعتها بصرخة/رغد!!!
رغد بصوت عالي/هيه هيه انتي لايرتفع صوتك علي والله ان اغطسك بالبحر واطلعك ناشفة!!
موج بحدة/تعلمي الامثال صح وتعالي تكلمي بعدين
رغد/هين ياموج والله ان تندمين مااكون بنت ابوي اذا ماخليتك تبكين دم هين
موج/روحي روحي كلي كروسونك واشربي حليبك وبعدين تكلمي معي روحي يالله يالله
رغد عضت شفتها بقهر ولفت وهي تمشي مغبونة
موج/بزران اخر زمن
فتنة ناظرتها بضيقة/وش تستفيدين الحين ياموج هاه وش تستفيدين بالله
موج/خلي اطلع شوي من اللي بقلبي والله ان سكت اكثر باموت
فتنة بقلق/وامي اكيد بتـ
موج قاطعتها/عمتي مبهذلتني فيها وبدونها يعني شي جديد بالله عليك؟/ابتسمت/مو جديد اكيد
ام عمر(عزة)وقفت على نهاية الممر وهي تناظرهم بغضب وبصوت عالي/ووجع يشيلكم من مكانكم يضرب بكم قاع ارضه اي والله ووجع !!
//فزوا للحظة مع بداية صراخها//
موج بربكة وهي تمشي لها/هلا عمتي ياهلا
ام عمر رفعت يدها بوجهها وهي توقفها قبل توصلها/وعمى انزلي تحت زيني الدلة وانتي واقفة هينا اتضحكين لي لاشغل ولامشغلة
موج/طلال مدوام ياعمة
ام عمر/ويوم انه مدوام على يديك نقش حنا!!اذلفي جهزي القهوة اذلفي
موج مرت من جنبها/ابشري ان شاء الله ان شاء الله
ام عمر قطبت جبينها وهي تشوف اثار التعب على وجه فتنة/وانتي وش فيك بعد؟!
فتنة/مافيني شي يمّه
ام عمر/دارية مايصيبك لاوصب ولا نصب سبع ارواح الله اكبر عليك
فتنة كتمت ابتسامتها من قوة الكلام اللي معتادة عليه وهي تزفر/سمي يمّه
ام عمر/وسم يفكني منك ماوراك الا المصايب اذلفي نظفي الحوش وبعده نظفي بيت الشعر مو اهل ابوك وشغالتهم على يديهم نقش حنا مايعرفون السنع ابد
فتنة/على امرك حاضر يمّه
ام عمر زفرت/لاتتاخرين مو بناقصين ابوك يدق يابنت بعد فترة بسبتك ويقلب على اخوانك نظفي بسرعة
فتنة/ابشري يمّه
ام عمر لفت ومشت كم خطوة ووقفت وهي تلتفت لها من جديد وبابتسامة/ايه اليوم وانا رايحة استاذن لرغد قابلت معلماتك
فتنة فز قلبها بشوق وهي تناظر امها
ام عمر/الله والخيبة باقي احد يذكرك ياوجه المصايب والنحس!!
فتنة اخذت نفس وهي تكتم ردودها كالعادة/تامرين على شي ثاني
ام عمر بحدة/ايه لاخلصتي تعالي واساليني هالسؤال/مشت/
فتنة همست لنفسها/صبر جميل والله المستعان صبر جميل
ـــــــــــــــــــــــــ ـــــــــــــــــــــــــ ـــــــــــــــــــــــــ
.
((بمكان ثاني))
//على باب الحوش//
سدول واقفة قدامه على اطراف اصابع رجولها وهي رافعة نفسها بكل تركيزها تعدل شماغه
ساجي واقف قبالها يتاملها بابتسامة وبعناد وهو يرفع نفسه شوي
سدول كشرت وهي تناظره وبزعل لطيف/وبعدين!!
ساجي ابتسم/ياويل قلبي ويلاه!!تلوميني لااعاندك!!
سدول بتهديد/ترا والله باتركك
ساجي رفع يساره المجبسة/ويرضيك تتركيني وانا كذا
سدول بتكشيرتها/تعبتني طيب
ساجي بابتسامة كلها ثقة/تعبي راحة
سدول مسكته من يديه تنزله/اهجد تراك متاخر على دوامك وتاخرت زيادة وكثير
ساجي/الله والدوام كله محل!!
سدول زفرت ماعجبها كلامه/قل الحمدلله!!رزقنا وش بتسوي يعني!!
ساجي/الحمدلله الف اللي عطاني اياك ومارتي لغيري
سدول ابتسمت وهي تتفادى نظراته بخجل
ساجي باستقعاد/ماصار شماغ ذَا!!كرفتة الظاهر
سدول تركته وباحراج/اصلا خلصت
//سماح وبدرية نازلين من الدرج بيتمشون بالحوش شوي//
سماح بابتسامة وهي تناظرهم/ياعيني ياعيني
سدول تغير وجهها من زود الاحراج
بدرية/الله يرزقنا ياسموحة الله يرزقنا بس
ساجي وهو ينفث/قل اعوذ برب الفلق قل اعوذ برب الفلق اذكروا الله!!هب مب خوات عدوات!!
سماح شهقت/الله اكبر عليك انت اللي مو بأخو!!
بدرية/وبعدين الله رازقنا والله يزيدنا ويهنيكم وش فيك علينا!!
ساجي بشوفة نفس/ايه مـاهـو انتم مـاهـو بحاصلكم ساجي مثلي
سماح/حاصل وحاصل مرتين بعد بس لاتطولها وروح واللي يعافيك
بدرية/ترا كلها نزلنا نتمشى وانتم يابلس 18طلعتوا بوجيهنا
ساجي انحنى وباس سدول على خدها الايمن
سدول اتسعت عيونها بصدمة من حركته واخواته مثلها بنفس الصدمة من جرأته
ساجي التفت يناظرهم/والله اذا زوجتي تساعدني بشماغي لظرف مرضي وانتم قلبتوها بلس18مرة وحدة اجل تفضلوا هذا اوله المرة الجاية الله اعلم وش بيصير/التفت لسدول/
سدول اللي للحين مصدومة من اللي صار ولاحظت عينها بعينهم مثبتتها عالارض
ساجي ابتسم وانحنى وهو يطبع بوسة على جبينها/انا رايح اذا بغيتي شي ارسلي لي ياعيني/ناظر خواته/وانتم اتركوا اللقافة عنكم واذا بغيتوا شي ارسلوا لي بعد/التفت لسدول وهمس بحب/فمان الله/خرج/
سدول قفلت الباب وراها وهي تكره هالمواقف وتكره تبقى معهم لحالها بعدها
سماح تكتفت وبابتسامة/ياحظك والله ياحظك باخوي
سدول التفتت تناظرها
سماح/ربي معمي عيونه عنك لو غيره من زماااان مطلق ومتزوج ثانية
بدرية/الشكوى لله،ربي بلاه يحبك على كثر عيوبك
سدول شدت قبضتها وهي تعبت من كثر اللعب على راسها وهي ساكتة زفرت/قولوا لعمتي باجهز الغدا انا لاتتعب نفسها/مشت مرت من جنبهم بخطواتها السريعة وهي ماتناظرهم/
بدرية رفعت صوتها وبهمز/بسرعة بسرعة املي عينه لايلف يدور غيرك/ضحكت وشاركتهم سماح بالضحك وسط قلب سدول اللي ينعصر من الحزن/
ـــــــــــــــــــــــــ ـــــــــــــــــــــــــ ـــــــــــــــــــــــــ
.
عجايب ببجامتها القطنية باللون الابيض تمشي وراه وهي تتحلطم/كل يوم وانت مشغول خاطري يوم تجي ونطلع برا نتغدى حتى شف قلت نتغدى ماقلت نفطر
حاتم وهي يمشي باتجاه باب الشقة وبطفش/لاحول ياعجايب لاحول ماتطفشين انتي ماتطفشين!!
عجايب/حرام عليك هذا جزاي اني ابي اجلس معك لحالنا بدون ازعاج البزران ليش زعلان علي كذا هاه ليش
حاتم وقف وهو يرفع راسه ياخذ نفس يكتم غيظه
عجايب ضربت فيه بخفة ووقفت وهي مكشرة/وش فيك!!
حاتم يضبط شماغه/مـاهـو وقته هالكلام مـاهـو وقته ابد فكينا ياعجايب من هالسيرة اللي تنفتح كل صبحية مايكفي قلق الدوام اتركيني يابنت الحلال اعتقيني
عجايب اتسعت عيونها وبنرفزة/وش فيك علي وش فيك!!كل كلمة والثانية اعتقيني اعتقيني وش مسوية لك انا هاه هاه!!
حاتم التفت لها/مافيك شي ابد البلا فيني واقولك من الحين قررت ارجع دوامي مثل قبل من ثمان لاثنين ارتحتي الحين/فتح الباب وهو يقفله وراه بقوة/
عجايب امسكته قبل يتقفل وهي تخرج وراه ونزلت الدرج بنفس سرعته
حاتم ينزل الدرج بخطوات سريعة يبي يفتك من كثر الكلام اللي صدع براسه على هالصباح
عجايب بمكانها من اعلى الدرج/حاتم لحظة اصبر حاتم/وقفت بين الدور الارضي والثاني اللي به شقتهم وهي ترتسم تكشيرة على وجهها اول ماوصلنا صوت فتح باب احدى الشقتين الارضية المتقابلة/
//انفتح باب الشقة//
حاتم وقف مضطر وهو يلتفت لهالباب
خرجت بكامل اناقتها كالمعتاد فستان مخمل باللون العنابي يبرز مفاتنها شعر مسدول لمنتصف الظهر مكياج صباحي ناعم يكسر لون الفستان المخملي سيدة اربعينية لكن من فرط الجمال والاناقة تعتقد انها ببداية العشرينات وبابتسامة زادت جمالها جمال/صباح الخير ياحاتم
حاتم ابتسم مكره وهو يدري انه عجايب بتقوم الدنيا عليه/هلا ياعمة صبحتي بالنور/تقدم لها وهو يرفع نفسه يبي يسلم على راسها/
عليا دفته بخفة عنها وهي تناظره بعتب/وبعدين ياحاتم وبعدين
حاتم ابتسم وهو يسلم خد بخد
عليا قبل يبتعد عنها حاتم مسكته من اذنه وبنص عين/وش فيك على عجايبنا ياحاتم؟
عجايب عضت طرف شفتها وبحدة وهي متكتفة/مافينا شي!!ليش شايفة شي مثلا!!
عليا تركت حاتم وبربكة/لا مو قصدي بس صوتكم عالي وخفت
عجايب قاطعتها/وفري خوفك لك مشكورة مانبي متعبك معنا
حاتم اتسعت عيونه/عجايب!!
عجايب ناظرته بابتسامة/حبيبي تاخرت على دوامك وش فيك!!ناسي ان المدير مستقعد لك!!
حاتم زفر وهو يفهم تصريفتها ناظر عليا/ابوي وينه ياعمة؟
عليا/طلع من الصبح تعرفه مايحب جلسة البيت
حاتم بوسع عيونه/لحاله!!
عليا/ايه الله يهديه مارضى يسمع لي كلمة
حاتم زفر/خلاص انا
عليا قاطعته/لاتشيل هم رح دوامك وانا بأكلم سراج يشوفه
حاتم/زين وانا بعد باكلمه واتطمن يالله فمان الله/رفع عينه لعجائب اللي للحين واقفة بمكانها تخز عليا بنظراتها/وانتي ادخلي قبل يطلع سراج
عجايب/طيب طيب
حاتم مشى يعاجل بخطواته
عليا ناظرت عجايب وهي تميل فمها/وش فيك علي من هالصبح اللهم ياكافي
عجايب ابتسمت/والله ابد بس البغض من الله من شفتك وانا ماادانيك الله يكفينا شرك ياعليّة
عليا ابتسمت/الله يسامحك انا شرانية وش شفتي مني
عجايب ضحكت بصوت عالي/خليها مستورة ياحية اوه اقصد ياعليّة
عليا بغبنة منها/عليا عليا متى يتعدل هاللسان
عجايب/ابدد طال عمرك لابق لك عليّة مو جوك ابد عليا وهاللسان بيعلك دايم تعودي عليه/راحت لبيتها وصدى ضحكتها يغطي المكان/
عليا عضت على لسانها وهي تكتم غيظها واتجهت للشقة المقابلة لشقتهم/
ـــــــــــــــــــــــــ ـــــــــــــــــــــــــ ـــــــــــــــــــــــــ

((الـشـقـة الـمـقـابـلـة))
سراج بنطلونه الرمادي وتيشيرته الابيض متربع قبال التلفزيون وهو يتابع الاخبار
سحايب ببجامة حرير زيتي وبلوزتها بنفس اللون باكمام قصيرة وبتوربان باللون البيج غطت معه شعرها ماعدا غرتها اللي غطت يمين ويسار جبينها جالسة جنبه تقطع بصحن الفواكه ومدت له الفاكهة وبتردد/سراج
سراج وهو ياخذ القطعة منها وعينه عالتلفزيون/خير
سحايب/وش رايك ندخل علي لمدرسة احتياجات خاصة
سراج احتدت نظرته وهو يلتفت لها يناظرها
سحايب تعلثمت/يعني علا بالمدرسة هي وعاصم وحتى عفاف وعزام دخلوا الروضة وهو المسكين بالبيت لايجي ولايروح ولايشوف احد
سراج اعتدل بجلسته وبعصبية/خليه يقعد بالبيت اجل يروح ويأذي خلق الله فوق أذيته لنا اصلا هالاشكال مكانها البيت
سحايب امتلت عيونها دموع رمت السكين بالصحن ووقفت
سراج بحدة/اجلسي ماخلصت كلامي
سحايب ناظرته
سراج صرخ/اقول اجلسي
سحايب جلست غصب عنها
سراج/كملي تقطيع وبعدين اذلفي باللي مايحفظك
سحايب عضت طرف شفتها وهي تحبس دموعها وسحبت السكين وهي تدعي عليه بينها وبين نفسها
سراج بنرفزته/وبعدين ماقلت لك ماابي اشوف شعرة من شعرك هاه؟!!
سحايب/اسفين بالغلط طلعت
سراج زفر/اخر مرة
سحايب وقفت وهي تسمع صوت الجرس/افتح الباب ولا ممنوع بعد
سراج مد يده لرجلها وهو يقرصها بكل قوته
سحايب كتمت المها
سراج/عدلي اسلوبك معي ترا يوم امشي لك شي امشيه بمزاجي فهمتي؟
سحايب ماردت ومشت
سراج رفع صوته/ايه اقولك
سحايب وقفت والتفتت له وهي تغلي
سراج/سويد الوجه
سحايب اللي بتنفجر منه
سراج بابتسامة/يقولون طلع اليوم
سحايب اتسعت عيونها بصدمة
سراج بابتسامة/لو اهلك قريبين كان رحنا نشوف البث مباشر/ضحك وهو يتكي عالمسند براحة بعد الشماتة اللي رماها/
ـــــــــــــــــــــــــ ـــــــــــــــــــــــــ ـــــــــــــــــــــــــ
.
((بيت ابو عمر الثاني))
ام تركي وهي قباله عالفطور/حبيبي
ابو عمر يفطر/هلا
ام تركي/وش رايك تجيب شغالة تساعدني
ابو عمر قطب جبينه وهو يناظرها
ام تركي بتبرير/ذبحني الوحم غير طلبات العيال وفوقها الضيوف وغير باقي البيت
ابو عمر/عندك فتنة تساعدك
ام تركي/والمسكينة وش تلحق عليه بيت امها ومجلس الضيوف وفوقها بيتي بعد!!ماتقدر والله لو هي مشحونة فل اربع وعشرين ساعة
ابو عمر بنرفزة/بثينة!!
ام تركي بعناد/وبعدين انا مااحب احد يشوف حوسة بيتي ياعبدالله
ابو عمر/والشغالة عادي!!
ام تركي/عبدالله تكفى والله مو قادرة الحق على شي
ابو عمر/شوي وفتنة عندك تنظف البيت لك اقطعي هالسيرة خلاص
ام تركي/ايه لو هي عزة كان ابشري من عـيـونـي
ابو عمر اعتدل بجلسته وبحدة وسط صوته اللي اعتلى/بثينة!!
ام تركي فزت/بِسْم الله علي وعلى وليدي خوفتني
ابو عمر وقف/خليه اول يكبر ثم قولي وليدي وقفلي فمك عني وماتخافين وشغالة مافيه انسي/خرج/
ام تركي بغبنة/يارب تجيب اليوم اللي تهرب فيه فتنة يارب هاذي كيف صابرة عليهم
ابو عمر خرج من بيته الثاني ومتجه لبيت ام عمر اللي مايفصله عن بيت ام تركي الا كم بلاطة من الحوش مشى بالحوش اللي بين البيتين وقف وهو يناظرها
فتنة رافعة شعرها كله لفوق ورافعة قميصها لتحت الركبة باينة رجولها تكنس الحوش بمكنسة اليد وسط حرارة الشمس
ابو عمر احتدت ملامحه وهو يطالع رجولها وبصرخة زلزلت المكان/فتنة وبلااا
فتنة فزت برعب وهي تلتفت له وبلعثمة واضحة وجدا وسط رجفة اهتز منها كل جزء منها/ييببهه!!
ابو عمر وهو يمشي لها بخطوات سريعة كلها غضب/وبلا يفكني منك يافتنة وبلا/وقف قدامها وهو يسحبها من يمينها بكل قوته/
فتنة عضت شفتها وهي تحس بيدها انخلعت من مكانها
ابو عمر سحب المكنسة من يدها وضربها على رجلها بطرفها بقوة
فتنة تاوهت بألم
ابو عمر بجنونه عليها وهو يهزها بيده وهي مثل الورقة تروح وتجي معه/ومتعرية بوسط حوش البيت ياللي ماتستحين هااااه
//عمر خرج من البيت ووراه امه ورغد//
رغد ابتسمت وهي تناظرها
عمر جرى لابوه وبدون لايتدخل/يبه اتركها عنك لايضرب الضغط معك وماتنفعك وقتها
ام عمر تناظرهم/حسبت به مصيبة/لفت عنهم ببرود ودخلت للبيت/
رغد باستعطاف مصطنع من مكانها عند الباب/عمي الله يهديك لاتوجع راسك بناس ماتستاهل
فتنة تناظرهم بصمت
ابو عمر دفها عالارض بقوة طاحت منها عالارض مثل مايبي ودعس على طرف رجلها
فتنة غرقت عيونها دموع
ابو عمر/ورب البيت والله يافتنة والله ان شفت هالسيقان متعرية مرة ثانية ان اقصها واعلقها برقبتك سمعتي
رغد مشت لهم ووقفت جنب عمها/عمي الحين اذا انكسرت ورحت بها للمستشفى بيمسكونك سين وجيم والله العالم وش بتفتري عليك وقتها
فتنة التفتت تناظرها بقهر
عمر وهو يطالع ابوه الهايج/يبه الله يهديك وش بتحصل لاكسرت رجلها غير التعب مابتنفعك بشي اتركها يبه اتركها
ابو عمر رفع رجله عنها/احمدي ربك ان به شي يشفع لك ولا كان علمتك وشلون تتعذرين وسط بيتي يالخايس خمي خمي هذا قدرك مابه زود يالخمة/مشى بخطوات سريعة للبيت تاركها وراه وهم يتبعونه/
فتنة ضغطت على نفسها ووقفت وهي تاخذ نفس بلعت ريقها رجعت تكمل شغلها وهي تدندن بينها وبين نفسها بأنشودة من كتاب الابتدائي تحبها وجدا(الله رب الخلق..أمدنا بالرزق...)
ـــــــــــــــــــــــــ ـــــــــــــــــــــــــ ـــــــــــــــــــــــــ
.
#سلطان_الهوى_يافتنة_الألفية





روابط الفصول

الفصل 1.. اعلاه
الفصول 2, 3, 4 .. بالأسفل
الفصول 5, 6, 7, 8 نفس الصفحة
الفصول 9, 10, 11, 12 نفس الصفحة
الفصول 13, 14, 15, 16, 17 نفس الصفحة
الفصل 18, 19
الفصول 20, 21, 22 نفس الصفحة
الفصول 23, 24, 25, 26, 27, 28, 29, نفس الصفحة
الفصل 30
الفصول 31, 32, 33 نفس الصفحة
الفصول 34, 35, 36 نفس الصفحة
الفصل 37, 38 نفس الصفحة
الفصول 39, 40, 41 نفس الصفحة
الفصل 42 الأخير